Акафистник

Помочь сайту
·
·
·
·

Канон святому преподобному Феофану Сигрианскому

Память: 25 (12) марта

Глас 4.

Припев: Преподо́бне о́тче Феофа́не , моли́ Бо́га о на́с.

Пе́снь 1.

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Бо́га, пло́тию я́вльшагося, стопа́м после́довал еси́, благоче́стием, о́тче, разже́гся, я́ко отсю́ду зва́ние прие́м, е́же пои́стинне тезоиме́нно, я́ко промышле́ние прообразова́ся.

Насла́ждся жела́ннейшим раче́нием Влады́ки твоего́, пренебре́гл еси́ любо́вь мирску́ю; сраствори́в же ся Боже́ственней любви́, жите́йскую красоту́ в ничто́же вмени́л еси́, всеблаже́нне.

Устреми́вся зверови́дно, гоня́ше Ле́в, томи́тель избра́нныя, не терпя́ зре́ти почита́ему ико́ну Христо́ву, с ни́миже и тя́, Феофа́не, изгна́нию осуди́.

Богоро́дичен: Две́рь, я́же к на́м Твоего́, Го́споди, сни́тия, Восто́к, и Со́лнце, и Све́т та́инственно Тя́ нарица́емаго преесте́ственно облиста́, сугу́ба естество́м Богочелове́ка.

Пе́снь 3.

Ирмо́с: Не му́дростию, и си́лою, и бога́тством хва́лимся, но Тобо́ю, О́тчею ипоста́сною Му́дростию, Христе́: не́сть бо свя́т, па́че Тебе́, Человеколю́бче.

Све́та Боже́ственнаго испо́лнен ви́ден бы́л еси́, Феофа́не, любо́вию сраствори́вся Жела́емому, блаже́нне. Те́мже твою́ сла́вную па́мять почита́ем.

Отре́к злочести́ваго Льва́ повеле́ния, преда́ния благоче́стно церко́вная удержа́л еси́. Те́мже тя́ Христо́с чудесы́ просла́ви.

Вжиля́емо наде́ждею и ве́рою, преподо́бне, твоея́ пло́ти неможе́ние, душе́вною кре́постию утвержда́емь, Бо́гу присво́ил еси́ те́ло купнора́бное.

Богоро́дичен: Созда́вый в нача́лех от пе́рсти мя́, челове́ка, зи́ждется мене́ ра́ди во чре́ве Твое́м, Всенепоро́чная, дре́внее паде́ние исправля́я.

Седа́лен, гла́с 8.

Рачи́тель любве́ Иису́совы бы́в, отрази́л еси́ сла́сти и жите́йский мяте́ж, и, мона́шествовав, пожи́л еси́ на земли́, я́ко небе́сный а́нгел, и чуде́с то́чиши дарова́ния, преподо́бне. Те́мже во светоно́сней и святе́й твое́й па́мяти ве́рно восхваля́ем тя́ и согла́сно вопие́м ти́: богоно́се Феофа́не, моли́ Христа́ Бо́га прегреше́ний оставле́ние дарова́ти чту́щим любо́вию святу́ю па́мять твою́.

Сла́ва, и ны́не, богоро́дичен: Я́ко де́ву и еди́ну в жена́х, Тя́, без се́мене ро́ждшую Бо́га пло́тию, вси́ ублажа́ем, ро́ди челове́честии: о́гнь бо всели́ся в Тя́ Божества́, и я́ко Младе́нца дои́ши Зижди́теля и Го́спода. Те́мже, а́нгельский и челове́ческий ро́д, досто́йно сла́вим пресвято́е Рождество́ Твое́ и согла́сно вопие́м Ти́: моли́ Христа́ Бо́га согреше́ний оставле́ние дарова́ти покланя́ющимся ве́рою пресвято́му Рождеству́ Твоему́.

Крестобогоро́дичен: А́гнца, и Па́стыря, и Изба́вителя А́гница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мляй Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние ве́рою пою́щим Боже́ственныя стра́сти Твоя́.

Пе́снь 4.

Ирмо́с: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Небе́сное угото́вася жили́ще я́ко страда́льцу, тебе́, сла́вне: от земны́я бо, ра́дуяся, преложи́лся еси́ ски́нии, вопия́ Влады́це твоему́: сла́ва си́ле Твое́й, Го́споди.

Венцено́сец, Феофа́не, показа́лся еси́, честно́е бо изображе́ние Христо́во, богоно́се блаже́нне, не отве́рглся еси́ чествова́ти. Те́м и взыва́л еси́: сла́ва си́ле Твое́й, Го́споди.

Проти́вяся повеле́нию мучи́теля злочести́ваго, преподо́бный плотска́го неможе́ния отню́д небреже́, взыва́я Созда́вшему: сла́ва си́ле Твое́й, Го́споди.

Возвели́чился еси́ чудесы́, богоно́се, и́бо Христо́с возмзди́ тя́ за терпе́ние. Те́мже исцеле́ния то́чиши тре́бующим, я́коже от исто́чника, свяще́ннейше.

Богоро́дичен: Превы́шши а́нгел показа́лася еси́, Еди́на: Сове́та бо Вели́каго А́нгела родила́ еси́ — Сло́во, вся́ просвети́вшаго, ве́рою зову́щия: сла́ва си́ле Твое́й, Го́споди.

Пе́снь 5.

Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Сло́вом всеблагочести́вым правосла́вно пропове́да преподо́бный Феофа́н ве́ры повеле́ния, ду́хом сия́я.

Бога́тство всеразли́чно богому́дренне разда́л еси́ по повеле́нию Влады́ки, в нищете́ живу́щим после́дуя, всехва́льне.

Име́я твою́ ду́шу по о́бразу Созда́вшаго, пречи́стей Влады́чней покланя́лся еси́ ико́не, любо́вию облобыза́я.

Богоро́дичен: Све́та безле́тнаго на́м, под ле́ты бы́вшаго, родила́ еси́, Богома́ти, су́щим во тме́ жития́, и ми́р просвети́ла еси́.

Пе́снь 6.

Ирмо́с: Пожру́ Ти́ со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Напра́ви к доброде́тели житие́ мое́, преподо́бне, поще́ния стезю́ моли́твами твои́ми, блаже́нне, углажда́я, по не́йже кре́пко правоше́ствовати мя́, о́тче, сподо́би.

Целому́дренно твою́ жи́знь соверши́л еси́, преподо́бне, с му́дростию, ю́же име́л еси́, с му́жеством же пра́вду, и кру́гом доброде́телей яви́лся еси́ украша́емь.

На благосла́вие му́ченическое вше́л еси́, Феофа́не, Богома́тере Отрокови́цы и му́чеников, о́тче, ико́ны я́ко поче́л еси́, гони́телем сопротивля́яся.

Богоро́дичен: Всю́ Тя́ освяти́ Сло́во Свято́е, во Твою́ всели́вся утро́бу освяще́нную неизрече́нным сло́вом, Богоро́дице, Его́же моли́ спасти́ся рабо́м Твои́м.

Конда́к, гла́с 2.

Свы́ше прие́м Боже́ственное открове́ние, со тща́нием изше́л еси́ от среды́ молвы́ жите́йския, и уедини́вся, преподо́бне, чуде́с прия́л еси́ де́йство и проро́чества досто́инство, бога́тства и супру́жницы лиши́вся.

И́кос:

На земли́ ничто́же предпоче́т, после́довал еси́, ра́дуяся, зову́щему Христу́, и и́го Его́ прия́т на ра́мо твое́ усе́рдно, поко́й обре́л еси́ в души́ твое́й. Его́же и мне́, ни́щему и уны́лому, низпосли́, глаго́лющему и ника́коже соверша́ющему, но еще́ упражня́ющемуся в жите́йских ве́щех и чудя́щемуся, ка́ко все́х избежа́л еси́, сожи́тельницы и бога́тства лиши́вся.

Пе́снь 7.

Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Е́же по о́бразу стяжа́в и по подо́бию, житие́м пресве́тлым, о́тче, прии́м, обою́ду украси́лся еси́, благослове́н еси́ в хра́ме, — вопия́, — сла́вы Твоея́, Го́споди.

Испове́дания венце́м, о́тче, украси́лся еси́, де́лом обличи́л еси́ словеса́ злочести́вых, ве́рныя же извести́л еси́, благослове́н еси́ в хра́ме, — вопия́, — сла́вы Твоея́, Го́споди.

Ума́ тверде́йшим усе́рдием теле́сныя, о́тче, боле́зни подъя́л еси́ терпели́вно, благода́рно Влады́це твоему́ вопия́: благослове́н еси́ в хра́ме сла́вы Твоея́, Го́споди.

Богоро́дичен: Я́ко Богоро́дицу и Цари́цу всея́ тва́ри, вси́ ве́рнии, пое́м Тя́, Чи́стую, и — е́же ра́дуйся! — Тебе́ взыва́ем: благослове́нна Ты́ в жена́х еси́, Всенепоро́чная Влады́чице.

Пе́снь 8.

Ирмо́с: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Ви́дя блаже́нне, тве́рдость твоего́ противле́ния, Ле́в мучи́тель во изгна́ние тя́ осуди́ горча́йшее, вселука́вый, с весе́лием же вопия́, сие́ претерпе́л еси́: благослови́те, вся́ дела́ Госпо́дня, Го́спода.

На первообра́зное ви́дя ико́ны че́сть преходя́щу, на три́знище поте́кл еси́, я́ко страда́лец зако́ннейший и, победи́тель показа́вся, вене́ц прия́л еси́, взыва́я: благослови́те, вся́ дела́ Госпо́дня, Го́спода.

Небе́сную вме́сто земны́я ски́нию тебе́ даде́ вся́ческих Госпо́дь, вме́сто бо тесноты́ обре́л еси́ широту́ ра́дования в ра́йстей сла́дости, с му́ченики вопия́: благослови́те, вся́ дела́ Госпо́дня, Го́спода.

Све́том облиста́лся еси́ мы́сленным Боже́ственнаго Ду́ха, блаже́нне Феофа́не, те́мже исцеле́ния то́чиши ны́не ве́рою к тебе́ притека́ющим и святу́ю твою́ ра́ку любо́вию почита́ющим и вопию́щим: благослови́те, вся́ дела́ Госпо́дня, Го́спода.

Богоро́дичен: Боже́ственною си́лою содержа́й тва́рь всю́ и управля́я я́ве, рука́ми держи́тся Твои́ми, Пречи́стая, я́ко Младе́нец, присносу́щный и сопресто́льный Отцу́ и Боже́ственному Ду́ху. Ему́же вопие́м: благослови́те, вся́ дела́ Госпо́дня, Го́спода.

Пе́снь 9.

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Все́ бога́тство расточи́л еси́ убо́гим, богоно́се, пра́вду твою́ я́ве восприе́млеши, тебе́ возсия́вшую, вме́сто тле́нных пожина́я ве́чно пребыва́ющая.

Неду́ги исцеля́еши, всеблаже́нне, Утеши́телевою си́лою, де́моны я́ве отго́ниши де́йством Сего́, преблаже́нне. Те́м, ве́рнии, зря́ще, тя́, богоно́се, ублажа́ем.

Тво́й светоно́сный, богому́дре, преставле́ния де́нь вся́ призыва́ет ве́рныя к прича́стию освяще́ния, его́же и ны́не, ра́дующеся, соверша́ем, свяще́ннейше.

Дае́ши мне́ незави́стен да́р, похвале́ний тебе́ словеса́ спле́тшему усе́рдно, богому́дре, единонра́вна тебе́, я́коже тезоиме́нна сего́ показа́в мольба́ми твои́ми благоприя́тными, всеблаже́нне.

Богоро́дичен: Зако́н похва́л побежда́ется боже́ственною сла́вою Твое́ю, Де́во, но, я́ко Блага́ и Благосе́рда, Тя́ пою́щих приими́ похвалу́, грехо́в очище́ние воздаю́щи, Богоневе́стная.

Yandex Metrika