Пе́снь 1.

Ирмо́с: Ли́цы изра́ильтестии, невла́жными стопа́ми по́нт Чермны́й и вла́жную глубину́ прогна́вше, вса́дники триста́ты враги́ ви́дяще в не́й погруже́ны, с весе́лием поя́ху: пои́м Бо́гу на́шему, я́ко просла́вися.

Боже́ственным све́том осия́н и со а́нгелы, о́тче, ны́не водворя́ешися, моли́твами твои́ми спаса́й творя́щия всегда́ свяще́нную твою́ па́мять, в ра́дости пою́щия: пои́м Бо́гу на́шему, я́ко просла́вися.

Пу́ть, и́же к жи́зни возводя́щий неукло́нно, преблаже́нне, ше́ствовал еси́, избе́г мяте́жей мирски́х, и де́монская смуще́ния разори́л еси́, ра́достно взыва́я, о́тче Иоа́нне: пои́м Бо́гу на́шему, я́ко просла́вися.

Умертви́в плотско́е мудрова́ние, твои́ми по́стными боре́ньми, Боже́ственному Ду́ху покори́л еси́, окормле́нием Боже́ственныя си́лы, ра́достно вопия́л еси́: пои́м Бо́гу на́шему, я́ко просла́вися.

Вся́ кра́сная оста́вил еси́, непреста́нную, о́тче, возлюби́л еси́ красоту́, в дому́ Госпо́дни, иде́же шу́м пра́зднующих, ра́достно пою́щих: пои́м Бо́гу на́шему, я́ко просла́вися.

Богоро́дичен: Безле́тна Сы́на из Безнача́льна Отца́, пло́ть на́с ра́ди в челове́цех бы́вша, во утро́бе заче́нши, под ле́том сего́ родила́ еси́ несказа́нно, Ему́же ра́дующеся, вопие́м: пои́м Бо́гу на́шему, я́ко просла́вися.

Пе́снь 3.

Ирмо́с: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́.

Зако́ну повину́лся еси́ Ду́ха, его́же все́м, преподо́бне, предложи́л еси́. Греха́ же зако́ну изволе́нием не повину́лся еси́.

Горе́ к Бо́гу мудрова́ние име́я, о́тче, я́же на земли́ оста́вил еси́, боле́зньми воздержа́ния непреста́нно облегча́емь.

Растерза́в ю́зы естества́, преесте́ственным чи́стым житие́м, богоно́сне Иоа́нне, вышеесте́ственных прия́л еси́ де́йство.

Да Бо́гу, блаже́нне, без смуще́ния бесе́дуеши, в пусты́ни жи́ти, о́тче, изво́лил еси́, от молвы́ удаля́яся.

Богоро́дичен: Спасти́ восхоте́в челове́ка на поле́зное, я́ко Благоде́тель и Человеколю́бец, в Твою́ утро́бу неопи́санно, Богома́ти, всели́ся.

Седа́лен, гла́с 1.

Воздержа́ния огне́м, я́ко зла́то в пещи́, му́дре, искуси́вся, светле́йший яви́лся еси́, Иоа́нне преподо́бне, те́мже к небе́сному преста́вился еси́ Ца́рствию. Сего́ ра́ди ве́рою тя́ восхваля́юще, вопие́м: благода́ть, и ми́лость и очище́ние согреше́ний на́ших, о́тче, испроси́.

Богоро́дичен: Наста́ви мя́ на пу́ть покая́ния, преблага́го прогне́вавша Го́спода, неискусобра́чная благослове́нная Мари́е, прибе́жище отча́янных челове́ков, Бо́жие вмести́лище.

Пе́снь 4.

Ирмо́с: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Обветша́вшаго челове́ка а́бие совле́кся, о́тче, со грехо́вными страстьми́, воздержа́нием незави́стным обле́клся еси́ в но́ваго по Христу́, всече́стне.

Све́тлое твое́ житие́, я́ко пра́вило изве́стно, в тебе́, о́тче, боже́ственныя доброде́тели показа́ся, в моли́твах и поще́ниих, во бде́ниих же и мольба́х, я́же ко Христу́ Человеколю́бцу.

Дрема́ния твои́м очесе́м не да́л еси́, преподо́бне, до́ндеже, о́тче, хра́м себе́ сотвори́л еси́ прекра́сен всеви́дящему Влады́це, к Нему́же взыва́еши: сла́ва си́ле Твое́й, Го́споди.

Богоро́дичен: Умерщвле́нныя, Пречи́стая, челове́ки оживи́ла еси́, Жизнода́вца ро́ждши избавля́ющаго от тли́, взыва́ющия Ему́: сла́ва си́ле Твое́й, Го́споди.

Пе́снь 5.

Ирмо́с: Просвеще́ние Твое́, Го́споди, низпосли́ на́м и от мглы́ прегреше́ний разреши́ ны, Бла́же, Тво́й ми́р да́руяй.

В ю́ности му́дрость, в ста́рости ра́зум, во все́м житии́ пожда́ние и долготерпе́ние, и е́же ко все́м любо́вь показа́л еси́, блаже́нне.

Впери́в, сла́вне, душе́вный ра́зум, и чу́вства, му́дре, окорми́в, бы́л еси́ хра́м освяще́н Бо́гу че́стен.

Украси́л еси́, преподо́бне, души́ тричи́сленное, и влады́ку у́м поста́вив, име́юща Христа́, наставля́юща тя́ к ше́ствию небе́сному.

Богоро́дичен: Де́ва роди́ Пречи́стаго Бо́га, зако́н полага́юща, все́м челове́ком Спаси́теля, благоче́стие су́щим на земли́ возвеща́юща.

Пе́снь 6.

Ирмо́с: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л.

В пусты́ни жи́ти усе́рдно возлюби́л еси́, богоно́сне, в не́йже Бо́га прие́мля избавля́ющаго тя́, и соблюда́ющаго твоя́ стопы́.

Непрекло́нен в пусты́ни, богому́дре, претерпе́л еси́, да́же и до кончи́ны храня́ сие́ опасе́нием, и́мже нетле́нному сподо́бился еси́ наслажде́нию.

Равноа́нгельно на земли́ пожи́л еси́, равноа́нгельную че́сть досто́йно получи́л еси́, со а́нгелы все́ми Бо́гу предстоя́.

Богоро́дичен: Зачала́ еси́ во утро́бе, Богома́ти, безнача́льнаго Бо́га Сло́ва, на́с ра́ди в челове́цех бы́вшаго, по на́м непрело́жна, во дву́ зна́ема естеству́.

Конда́к, гла́с 8.

А́нгельскому житию́ поревнова́в, преподо́бне, вся́ земна́я оста́вив, ко Христу́ прите́кл еси́, и Того́ за́поведьми огражда́яся, яви́лся еси́ сто́лп непоколеби́м от вра́жиих нападе́ний. Те́м зове́м ти́: ра́дуйся, о́тче Иоа́нне, свети́ло пресве́тлое.

И́кос:

В ме́ртвеннем те́ле, а́нгельскому уподо́бльшася житию́ па́че естества́, и с те́ми на небесе́х лику́юща, прииди́те, вси́ ве́рнии, воспое́м преподо́бнаго Иоа́нна: то́й бо я́ко уме́ты вмени́ мирска́я вся́ кра́сная, я́ко да небе́сных получи́т, вше́д на го́ру я́коже дре́вле Моисе́й вели́кий и Илия́, посто́м очи́щся, сподо́бися ви́дети Тро́ическую Све́тлость, ни во мра́це, ни в ви́хре, но во све́те благода́ти Бо́жия. Те́м и чуде́с лучи́ испуща́я све́тло, исцеле́ния ре́ки источа́я ве́рным от гро́ба, я́ко жи́в неду́гов исцели́тель, сего́ ра́ди зове́м ему́: ра́дуйся о́тче Иоа́нне, свети́ло пресве́тлое.

Пе́снь 7.

Ирмо́с: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.

Вы́шнею си́лою Бо́жия по́мощи, враги́ низложи́л еси́, победоно́сец бы́л еси́, зовы́й: препе́тый Го́споди, Бо́же оте́ц на́ших, благослове́н еси́.

Очи́стив мглу́ от стра́сти бы́вшую, безстра́стием просвеще́ния озари́вся, зовы́й преподо́бне: препе́тый Го́споди, Бо́же оте́ц на́ших, благослове́н еси́.

Уязви́в ду́шу доброде́тельными ле́потами, красе́н добро́тою бы́л еси́, Го́споду пое́ши, ра́дуяся: препе́тый Го́споди, Бо́же оте́ц на́ших, благослове́н еси́.

Богоро́дичен: Призыва́я ны́ плене́нныя, Де́во, во е́же бе́хом в нача́ле, во чре́во Твое́ всели́выйся, вопло́щся Человеколю́бец Госпо́дь.

Пе́снь 8.

Ирмо́с: О́троки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Глаго́лы жи́зни ве́чныя, преблаже́нне, в се́рдцы твое́м прии́м, пло́ть увяди́л еси́, ми́ру же умертви́ся, живоно́сным умерщвле́нием оде́явся. Го́спода по́йте, и превозноси́те Его́ во вся́ ве́ки.

Ми́лостива бы́ти, богоно́сне, Еди́наго Благоде́теля моли́, твою́ пречестну́ю па́мять пра́зднующим, согреше́ний оставле́ние си́м дарова́ти.

Воззре́нием к Бо́гу непреста́нно внима́я, отону́дуже не́коего сия́ния зарю́ прии́м, све́т неугаси́мый, я́ко зерца́ло, посыла́еши, пою́щим: Го́спода по́йте, дела́, и превозноси́те Его́ во вся́ ве́ки.

На ле́ствицу, к небеси́ просте́ртую, на не́йже утвержде́н Госпо́дь яви́ся, о́тче, вше́л еси́, боже́ственными восхожде́нии преспева́я, преподо́бне, до́ндеже дости́гл еси́ соверше́ние жела́емых, поя́: Го́спода по́йте, дела́, и превозноси́те Его́ во вся́ ве́ки.

Богоро́дичен: Пое́м Тя́, Обра́дованная, Бо́га бо воплоще́нна на́м родила́ еси́. Те́мже Тя́ Богоро́дицу вси́ имену́ем, богоприя́тную утро́бу, добро́ту Иа́ковлю, Го́спода воспева́юще, и превознося́ще Его́ во вся́ ве́ки.

Пе́снь 9.

Ирмо́с: Е́ва у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Слеза́ми по́стническими бразду́ напои́л еси́, ра́дуешися, о́тче богоно́сне, ны́не ра́достию рукоя́ти собира́я по́двигов по́чести, те́мже тя́ вси́ ублажа́ем.

Незаходи́мый возсия́ тебе́ Све́т, присносу́щее весе́лие восприя́, иде́же лику́я со а́нгелы окру́г Царя́ и Го́спода, ве́рою творя́щих па́мять твою́ помина́й, о́тче всеблаже́нне.

Возмо́г де́монов убежа́ти стреля́ний и кова́рств лука́вых, спа́слся еси́, блаже́нне. Отону́дуже душа́ твоя́ свята́, чиста́ и нескве́рна, наслажде́ния небе́снаго сподо́бися. Помина́й чту́щия тя́.

Зако́ном, о́тче, страда́льческим подвиза́яся, и победи́л еси́ де́монския полки́. Те́мже тя́ сла́вою венча́ет, я́ко Еди́н Благоде́тель по́честей, и Боже́ственнаго светоявле́ния сподо́би, боже́ственным наслажде́нием.

Богоро́дичен: Я́ко все́х тва́рей Творца́ ро́ждши, Богома́ти, превозшла́ еси́ всю́ тва́рь боже́ственною сла́вою, свя́тостию и благода́тию, и вся́кия доброде́тели бо́льши, те́мже Тя́ вси́ велича́ем.

Свети́лен.

А́нгельскаго жития́ жела́я, удали́л еси́ себе́ в пусты́нях, и стра́сти покори́в плотски́я, ра́вен а́нгелом яви́лся еси́, о́тче на́ш Иоа́нне богоно́сне.

Богоро́дичен: Держа́вным Твои́м покро́вом, от вра́г наве́та, Чи́стая, Твоя́ рабы́ соблюди́ ны вся́ невре́дны, Тя́ бо и́мамы Еди́ну прибе́жище в жена́х.