Акафист Пресвятой Богородице пред иконой «Державная»

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 15 марта (02 марта ст. ст.)

Утвержден для общецерковного использования.

Конда́к 1.

Избра́нней от все́х родо́в Засту́пнице ро́да христиа́нскаго, покро́вом Своея́ бла́гости покрыва́ющей страну́ на́шу правосла́вную, благода́рственная пе́ния прино́сим Ти́, Влады́чице, о явле́нии на́м чу́дныя ико́ны Твоея́ Держа́вныя. Ты́ же, я́ко Всеми́лостивая Засту́пница все́х с ве́рою к Тебе́ притека́ющих, от вся́ких на́с бе́д свободи́, да зове́м Ти́:

Ра́дуйся, Ма́ти Бо́жия Держа́вная, Засту́пнице усе́рдная ро́да христиа́нскаго.

И́кос 1.

А́нгелом ра́дость прии́мшая, благоволи́ла еси́, Влады́чице, возвести́ти ста́рице благочести́вей ра́дость о явле́нии ико́ны Твоея́ честны́я Держа́вныя, ю́же и обре́тше по указа́нию Твоему́, я́ко зна́мение ми́лости Бо́жией к на́м, гре́шным, благода́рственно вопие́м Ти́ си́це:

Ра́дуйся, во́ли Госпо́дней та́йны на́м открыва́ющая; ра́дуйся, гне́в Его́ пра́ведный, на ны́ дви́жимый, умягча́ющая.

Ра́дуйся, нечести́вых злове́рия обличе́ние; ра́дуйся, горды́ни и́х низложе́ние.

Ра́дуйся, ве́ры христиа́нския утвержде́ние; ра́дуйся, почита́ния святы́х ико́н освяще́ние.

Ра́дуйся, ти́хое приста́нище спасе́ния ду́ш на́ших; ра́дуйся, Всеми́лостивая Засту́пнице на́ша у престо́ла Святы́я Тро́ицы.

Ра́дуйся, от бе́д и скорбе́й на́ше избавле́ние; ра́дуйся, Це́ркве Правосла́вныя утвержде́ние.

Ра́дуйся, звездо́ невече́рняго све́та, на́с озаря́ющая; ра́дуйся, Ма́ти Све́та, все́х просвеща́ющая.

Ра́дуйся, Ма́ти Бо́жия Держа́вная, Засту́пнице усе́рдная ро́да христиа́нскаго.

Конда́к 2.

Ви́дящи, Всенепоро́чная, с высоты́ небе́снаго жили́ща Своего́, иде́же с Сы́ном Твои́м во сла́ве пребыва́еши, ско́рбь ве́рных рабо́в Твои́х, я́ко гне́внаго ра́ди Бо́жия посеще́ния ве́ра Христо́ва поруга́ема быва́ет нечести́вым злове́рием, благоволи́ла еси́ яви́ти на́м ико́ну Твою́ Держа́вную, да вси́ христолюби́вии лю́дие усе́рдно мо́лятся пред не́ю, ве́рно вопию́ще Бо́гу: Аллилу́иа.

И́кос 2.

Ра́зуму на́шему просвеще́ние свы́ше исхода́тайствуй, Пресвята́я Богоро́дице, да позна́ем, что́ есть во́ля Бо́жия блага́я, уго́дная и соверше́нная, и се́рдце напра́ви, е́же со усе́рдием твори́ти ю́, Тебе́ же, Всеми́лостивая Засту́пнице, непреста́нными гла́сы восхваля́ти:

Ра́дуйся, явле́нием честны́я ико́ны Твоея́ тьму́ лю́тых обстоя́ний от на́с отгоня́ющая; ра́дуйся, луча́ми чуде́с все́х просвеща́ющая.

Ра́дуйся, душе́вными и теле́сными очесы́ осле́пших прозре́ние; ра́дуйся, омраче́нных смы́слов просвеще́ние.

Ра́дуйся, все́х упова́ющих на Тя́ непосты́дная наде́ждо; ра́дуйся, вдо́в и сиро́т наде́жный покро́ве.

Ра́дуйся, а́лчущих пита́тельнице; ра́дуйся, духо́вных сокро́вищ пода́тельнице.

Ра́дуйся, богому́дрых прему́драя добро́то; ра́дуйся, пресве́тлая, Боже́ственная красото́.

Ра́дуйся, цве́те нетле́ния; ра́дуйся, обоня́ние Христо́ва благоуха́ния.

Ра́дуйся, Ма́ти Бо́жия Держа́вная, Засту́пнице усе́рдная ро́да христиа́нскаго.

Конда́к 3.

Си́лу Боже́ственныя благода́ти да́руй на́м, Пресвята́я Богоро́дице, во е́же неукло́нно и непреткнове́нно ходи́ти на́м спаси́тельным путе́м Христо́вых за́поведей, се́рдцем же и усты́ непреста́нно воспева́ти Всемогу́щему Бо́гу: Аллилу́иа.

И́кос 3.

Иму́ще Тя́, Богоизбра́нная Засту́пнице ро́да христиа́нскаго, я́ко зарю́ све́тлую, просвеща́ющую ду́ш на́ших темноту́ и разгоня́ющую мра́к серде́чнаго неве́дения на́шего, припа́даем к честне́й ико́не Твое́й Держа́вней и с умиле́нием вопие́м Ти́ си́це:

Ра́дуйся, сохраня́ти и спаса́ти все́х призыва́ющих Тя́ обеща́вшая; ра́дуйся, прославля́ющих Тя́ прославля́ющая.

Ра́дуйся, к Сы́ну Твоему́ и Бо́гу на́шему моли́твы ве́рных принося́щая; ра́дуйся, благода́ть Твою́ ико́нам Твои́м честны́м дарова́вшая.

Ра́дуйся, всю́ вселе́нную луча́ми Твоея́ благода́ти озари́вшая; ра́дуйся, прему́дрости Бо́жия прия́телище.

Ра́дуйся, Боже́ственныя благода́ти Пода́тельнице; ра́дуйся, я́ко Тобо́ю от ве́чныя сме́рти свобожда́емся.

Ра́дуйся, я́ко Тобо́ю безконе́чныя жи́зни сподобля́емся; ра́дуйся, честне́йшая херуви́м и сла́внейшая серафи́м.

Ра́дуйся, Ма́ти Све́та и Цари́це Небе́сная; ра́дуйся, Влады́чице, Всеми́лостивая за на́с пред Бо́гом Засту́пнице.

Ра́дуйся, Ма́ти Бо́жия Держа́вная, Засту́пнице усе́рдная ро́да христиа́нскаго.

Конда́к 4.

Бу́ря жите́йскаго мо́ря сокруша́ет духо́вный кора́бль на́ш волна́ми жите́йских попече́ний, и ми́р убо́гих ду́ш на́ших мяте́тся. И где́ обря́щем ти́хое приста́нище спасе́ния? То́кмо на Тя́ возлага́ем наде́жду, Влады́чице; иму́щи бо держа́ву непобеди́мую, от вся́ких бе́д, гла́да, скорбе́й и боле́зней изба́ви на́с, ве́рно вопию́щих Бо́гу: Аллилу́иа.

И́кос 4.

Слы́шавше правосла́внии лю́дие повеле́ние Твое́, Влады́чице, моли́тися пред о́бразом Твои́м Держа́вным, со умиле́нием серде́чным прибега́ют к Твоему́ всеси́льному заступле́нию у престо́ла Всемогу́щаго Бо́га и благогове́йно вопию́т Ти́ си́це:

Ра́дуйся, го́рняго ми́ра украше́ние; ра́дуйся, до́льняго ми́ра заступле́ние.

Ра́дуйся, Дщи́ благослове́нная Отца́ Небе́снаго; ра́дуйся, Роди́тельнице неискусому́жная Сы́на Предве́чнаго.

Ра́дуйся, де́монския полки́ побежда́ющая; ра́дуйся, враги́ спасе́ния челове́ческаго посрамля́ющая.

Ра́дуйся, я́ко во́лею Твое́ю сокруша́ются ерети́ческия главы́; ра́дуйся, я́ко ве́рнии Тобо́ю сподобля́ются сла́вы.

Ра́дуйся, теле́с на́ших безме́здная Цели́тельнице; ра́дуйся, ду́ш на́ших к Ца́рствию го́рнему Путеводи́тельнице.

Ра́дуйся, я́ко сотвори́ Тебе́ вели́чие Си́льный; ра́дуйся, я́ко призре́ на смире́ние Твое́ Госпо́дь.

Ра́дуйся, Ма́ти Бо́жия Держа́вная, Засту́пнице усе́рдная ро́да христиа́нскаго.

Конда́к 5.

Богото́чная звезда́ яви́ся на́м, Влады́чице, честна́я Твоя́ ико́на Держа́вная, страну́ Росси́йскую всю́ обтека́ющая и луча́ми чуде́с Твои́х осиява́ющая все́х блужда́ющих по мо́рю стра́стнаго жития́, мра́к печа́лей и мглу́ вся́ческих неду́г и скорбе́й прогоня́ющая и наставля́ющая на пу́ть спасе́ния с ве́рою к Тебе́ притека́ющих и вопию́щих Бо́гу: Аллилу́иа.

И́кос 5.

Во дни́ лю́тых скорбе́й и злы́х обстоя́ний яви́ла еси́ на́м, Влады́чице, ве́лию ми́лость обре́тением честны́я ико́ны Твоея́ Держа́вныя, да вси́ с ве́рою моля́щиися пред не́ю прии́мут здра́вие и ду́ш спасе́ние. Сего́ ра́ди и мы́, прославля́юще Твое́ милосе́рдие неизрече́нное, усе́рдно вопие́м Ти́ си́це:

Ра́дуйся, свети́ло незаходи́мое, све́том и́стиннаго богопозна́ния на́с просвеща́ющее; ра́дуйся, Врата́рнице, две́ри ра́йския ве́рным отверза́ющая.

Ра́дуйся, многотеку́щая реко́ Боже́ственныя благода́ти; ра́дуйся, неистощи́мый исто́чниче святы́ни.

Ра́дуйся, ко благоче́стию на́ша наста́внице; ра́дуйся, ду́ш на́ших освяще́ние.

Ра́дуйся, ка́ющихся гре́шников с Бо́гом примире́ние; ра́дуйся, до́брыя обе́ты прие́млющая.

Ра́дуйся, благи́м наме́рением спосо́бствующая; ра́дуйся, злы́я начина́ния разруша́ющая.

Ра́дуйся, вра́жия ко́зни расторга́ющая; ра́дуйся, ско́рая челове́ком помо́щнице.

Ра́дуйся, Ма́ти Бо́жия Держа́вная, Засту́пнице усе́рдная ро́да христиа́нскаго.

Конда́к 6.

Воспева́ем Твое́ милосе́рдие досточу́дное и мно́гое к на́м снисхожде́ние, Пресвята́я Богоро́дице, не престае́ши бо моли́тися о на́с, гре́шных, Сы́ну Твоему́ и Бо́гу на́шему, е́же отврати́ти гне́в Его́ пра́ведный, на ны́ дви́жимый, и поми́ловати все́х, ве́рно вопию́щих Бо́гу: Аллилу́иа.

И́кос 6.

Возсиява́ет в душа́х на́ших, омраче́нных ско́рбию и уны́нием от мно́жества согреше́ний, све́т благода́тнаго утеше́ния, и се́рдце на́ше исполня́ется весе́лия и ра́дости, егда́ непреста́нными Твои́ми, Влады́чице, вразумле́ньми возбужда́еши на́с вопи́ти к ще́дрому Бо́гу, да ми́лостив бу́дет и прости́т на́м прегреше́ния на́ша. Не премолчи́ у́бо, Влады́чице, наставля́ющи и вразумля́ющи на́с, зову́щих Ти́ си́це:

Ра́дуйся, в ско́рбех и боле́знех долготерпе́нию на́с науча́ющая; ра́дуйся, вся́ помышле́ния на́ша к распя́тому за грехи́ ми́ра Спаси́телю устремля́ющая.

Ра́дуйся, страда́ния Его́ и кре́стную сме́рть в па́мяти на́шей обновля́ющая; ра́дуйся, правосу́дием Бо́жиим к ожесточе́нным и нераска́янным на́с устраша́ющая.

Ра́дуйся, ожида́нием бу́дущих небе́сных бла́г на́с услажда́ющая; ра́дуйся, к насле́дству нетле́нному и ве́чному на́с приводя́щая.

Ра́дуйся, насле́дниками Ца́рствия Бо́жия на́с сотворя́ющая; ра́дуйся, трапе́зо свята́я, хле́бом жи́зни на́с пита́ющая.

Ра́дуйся, ма́слино благопло́дная, еле́ем ми́лости сердца́ умягча́ющая; ра́дуйся, я́ко моли́твою пред ико́ною Твое́ю прие́млем духо́вное утеше́ние.

Ра́дуйся, я́ко сердца́м на́шим да́руеши благода́тное сокруше́ние; ра́дуйся, я́ко благосты́нею Свое́ю угаша́еши в на́с о́гнь нече́стия.

Ра́дуйся, Ма́ти Бо́жия Держа́вная, Засту́пнице усе́рдная ро́да христиа́нскаго.

Конда́к 7.

Хотя́й все́м челове́ком спасти́ся и в ра́зум позна́ния и́стины приити́, премилосе́рдый Госпо́дь и Созда́тель на́ш посла́ во дни́ гне́внаго посеще́ния Своего́ а́нгела пресве́тла в новоявле́ннем о́бразе Твое́м Держа́внем, да вси́ с ве́рою моля́щиися пред ни́м, прии́мут по́мощь и заступле́ние Твое́ всеси́льное и ра́достно вопию́т Всемогу́щему Бо́гу: Аллилу́иа.

И́кос 7.

Но́вую показа́ ми́лость все́х Творе́ц и Влады́ка на́ш Госпо́дь, егда́ положи́ во гне́ве Свое́м наказа́ти ро́д челове́ческий огне́м, мече́м, гла́дом и боле́зньми; сотвори́ сие́ наказа́ние мно́гим челове́ком ко вразумле́нию и исправле́нию во спасе́ние ду́ш. Сего́ ра́ди и мы́, Влады́чице, припа́дающе к Пречи́стому о́бразу Твоему́ Держа́вному, усе́рдно мо́лим Тя́: не да́ждь на́м поги́бнути до конца́, но милосе́рдия две́ри отве́рзи на́м, вопию́щим Ти́ си́це:

Ра́дуйся, непристу́пнаго Божества́ селе́ние; ра́дуйся, а́нгельское непрестаю́щее удивле́ние.

Ра́дуйся, рабо́в Бо́жиих та́йное вразумле́ние; ра́дуйся, Засту́пнице все́х су́щих в ско́рбех и боле́знех.

Ра́дуйся, благода́тное безстра́стие и́щущим его́ подаю́щая; ра́дуйся, все́х в чистоте́ целому́дрия живу́щих зело́ лю́бящая.

Ра́дуйся, приста́нище небу́рное подви́жников благоче́стия; ра́дуйся, гне́вом Бо́жиим вразумля́ющая сыно́в нече́стия.

Ра́дуйся, безмо́лвствующих сла́дкая собесе́днице; ра́дуйся, отше́льников Христа́ ра́ди кре́пкое упова́ние.

Ра́дуйся, по́стников боже́ственное ра́дование; ра́дуйся, пустынножи́телей ти́хое весе́лие.

Ра́дуйся, Ма́ти Бо́жия Держа́вная, Засту́пнице усе́рдная ро́да христиа́нскаго.

Конда́к 8.

Стра́нни и прише́льцы есмы́ на земли́: житие́ бо на́ше су́етно и маловре́менно е́сть. Мы́ же сме́рти безве́стное во у́м никогда́же прие́млем, ни помышля́ем о Стра́шнем суди́щи Христо́ве, в не́мже и́мамы пра́ведному Судии́ предста́ти и да́ти отве́т о вся́ком же де́ле и словеси́. Те́мже мо́лим Тя́, Влады́чице: возбуди́ на́с ско́ро от сна́ грехо́внаго, да не пости́гнет на́с ча́с сме́рти неиспра́вленных и да сподо́бимся Твои́м хода́тайством получи́ти беззако́нием на́шим проще́ние и во гла́се ра́дования воспева́ти Христу́ Бо́гу: Аллилу́иа.

И́кос 8.

Вся́ бы́вши горе́, к небе́сным взята́ еси́ и земны́х не оставля́еши, Пресвята́я Богоро́дице, свяще́нным Твои́м предста́тельством: и́маши бо дерзнове́ние к Сы́ну Твоему́ и Бо́гу на́шему. Те́мже утверди́, Влады́чице, в ми́ре глубо́це страну́ на́шу правосла́вную и вся́ поле́зная да́руй рабо́м Твои́м, да велича́юще воспева́ем Ти́ та́ко:

Ра́дуйся, у́мным очесе́м на́шим го́рький и стра́шный ча́с сме́ртный представля́ющая; ра́дуйся, на ки́йждо де́нь, а́ки уже́ на после́дний жития́ на́шего, взира́ти на́с поуча́ющая.

Ра́дуйся, люби́ти ми́р и я́же в ми́ре на́м воспреща́ющая; ра́дуйся, пристра́стие к тле́нному бога́тству из се́рдца на́шего искореня́ющая.

Ра́дуйся, вся́ бла́га земна́я бы́ти привре́менна и скоропреходя́ща на́м показу́ющая; ра́дуйся, сла́вы челове́чи, а́ки те́ни преходя́щия, иска́ти на́м возбраня́ющая.

Ра́дуйся, я́ко сладча́йшее и́мя Го́спода Иису́са Христа́ усты́ непреста́нно произноси́ти и во уме́ держа́ти на́с побужда́еши; ра́дуйся, я́ко от праздносло́вия, многоглаго́лания, па́че же от кощу́нства на́с удержава́еши.

Ра́дуйся, я́ко воздержа́нию в пи́щи и питии́ приобучи́ти на́с пече́шися; ра́дуйся, я́ко Твое́ за на́с хода́тайство си́льно е́сть пред Бо́гом, е́же не вве́рженным на́м бы́ти во тьму́ кроме́шнюю.

Ра́дуйся, я́ко при́сно внуша́еши на́м омыва́ти грехи́ своя́ слеза́ми покая́ния, да изба́вимся гее́нны а́дския; ра́дуйся, я́ко побужда́еши на́с де́нь и но́щь моли́тися, да не по́слани бу́дем со де́моны му́читися.

Ра́дуйся, Ма́ти Бо́жия Держа́вная, Засту́пнице усе́рдная ро́да христиа́нскаго.

Конда́к 9.

Вся́кое естество́ а́нгельское удиви́ся де́лу Твоего́ милосе́рдия, Го́споди, я́ко дарова́л еси́ на́м толи́ко тве́рдую и те́плую Засту́пницу ро́ду христиа́нскому во дни́ гне́внаго Твоего́ посеще́ния, на́м неви́димо сопребыва́ющу, слы́шащу же Тебе́ пою́щих: Аллилу́иа.

И́кос 9.

Вети́и многовеща́ннии, непросвеще́ннии све́том и́стиннаго богопозна́ния, поклони́шася злато́му тельцу́. По сло́ву же апо́стола, вся́к любостяжа́тель идолослужи́тель е́сть. Сего́ ра́ди Бо́жие гне́вное посеще́ние всему́ ми́ру зря́ще, и мы́, гре́шнии, смире́нно мо́лим Тя́, Влады́чице: уми́лостиви Созда́теля, да потщи́тся гне́в Сво́й пра́ведный преложи́ти на ми́лость и поми́ловати на́с, вопию́щих Ти́ си́це:

Ра́дуйся, я́ко Твоея́ по́мощи и заступле́ния никогда́же на́с лиша́еши; ра́дуйся, я́ко у́м на́ш, омраче́нный небреже́нием, све́тлым Твои́м покро́вом озаря́еши.

Ра́дуйся, я́ко Тобо́ю от страсте́й теле́сных избавля́емся; ра́дуйся, я́ко Тобо́ю сла́достей духо́вных исполня́емся.

Ра́дуйся, колесни́це Со́лнца у́мнаго, ра́дуйся, тве́рдое Правосла́вия укрепле́ние; ра́дуйся, честно́е Спа́са на́шего носи́ло и похвале́ние.

Ра́дуйся, и во вре́менней жи́зни поле́зная на́м подаю́щая; ра́дуйся, душе́вныя ра́ны на́ша еле́ем спаси́тельным умаща́ющая.

Ра́дуйся, я́ко из ро́ва беззако́ний на́ших руко́ю Твоея́ по́мощи на́с исхища́еши; ра́дуйся, я́ко грехо́вный со́н душевре́дныя на́шея ле́ности отряса́еши.

Ра́дуйся, душе́вное умиле́ние и серде́чное сокруше́ние в на́с ражда́ющая; ра́дуйся, я́ко твори́ши все́м спасти́ся, в держа́вный покро́в Тво́й прибега́ющим.

Ра́дуйся, Ма́ти Бо́жия Держа́вная, Засту́пнице усе́рдная ро́да христиа́нскаго.

Конда́к 10.

Спасти́ хотя́ мно́гия лю́ди от обдержа́щих и́х скорбе́й и боле́зней и ве́ру и́х утверди́ти во всеси́льное заступле́ние Твое́, Влады́чице, дарова́ла еси́ на́м изображе́ние честны́я ико́ны Твоея́ Держа́вныя, да вси́, ви́дяще явля́емую Тобо́ю ми́лость, вопию́т со умиле́нием Бо́гу: Аллилу́иа.

И́кос 10.

Стена́ яви́лася еси́, Богоро́дице Де́во, Росси́йстей стране́ честны́ми Твои́ми ико́нами, излива́ющи чудеса́ во бране́х и осеня́я благода́тною по́мощию Твое́ю христолюби́вых во́инов. Под держа́вным бо покро́вом Твоея́ бла́гости Росси́йская страна́ созида́шеся, и врата́ а́дова не одоле́ша Правосла́вныя Це́ркве Христо́вы. Сего́ ра́ди припа́дающе к честне́й ико́не Твое́й Держа́вней, ра́достно вопие́м Ти́ си́це:

Ра́дуйся, Росси́йския страны́ покро́ве и утвержде́ние; ра́дуйся, от наше́ствия иноплеме́нных избавле́ние.

Ра́дуйся, су́щих в плене́нии освобожде́ние; ра́дуйся, от гла́да и боле́зней на́ше спасе́ние.

Ра́дуйся, са́де земли́ обетова́ния; ра́дуйся, цве́те боже́ственнаго сажде́ния.

Ра́дуйся, лозо́ доброде́тельная виногра́да Христо́ва; ра́дуйся, дре́во чудото́чное рая́ Иису́сова.

Ра́дуйся, жили́ще и до́м Христа́ Бо́га на́шего; ра́дуйся, вмести́лище неизрече́нныя Его́ сла́вы.

Ра́дуйся, Влады́чице, Всеми́лостивая Пода́тельнице щедро́т; ра́дуйся, я́ко мно́го мо́жет моли́тва Твоя́ пред Сы́ном Твои́м и Бо́гом на́шим.

Ра́дуйся, Ма́ти Бо́жия Держа́вная, Засту́пнице усе́рдная ро́да христиа́нскаго.

Конда́к 11.

Пе́ние хвале́бное и благода́рственное прино́сим Ти́, Влады́чице, под держа́вным бо покро́вом Твоея́ бла́гости пребыва́ем в непосты́дней наде́жде всеси́льнаго заступле́ния Твоего́ за на́с, гре́шных, и все́ упова́ние на́ше на Тя́ возложи́вше, ра́достно вопие́м Бо́гу: Аллилу́иа.

И́кос 11.

Свети́льницы на́ши угасо́ша, еле́я же благи́х де́л не и́мамы, во е́же возжещи́ благода́ть Ду́ха Свята́го. И где́ обря́щемся, окая́ннии, сно́м грехо́вным отягче́ннии, егда́ пости́гнет на́с внеза́пу в полу́нощи ча́с кончи́ны на́шея? Но да не услы́шим и мы́, я́коже юро́дивыя де́вы, гро́знаго гла́са Жениха́: не ве́м ва́с! Помози́ на́м, Влады́чице, напо́лнити сосу́ды ду́ш на́ших еле́ем благи́х де́л, па́че же милосе́рдия и смире́ния, да благода́рственно воспое́м Ти́ си́це:

Ра́дуйся, я́ко воспомина́нием гряду́щаго гро́знаго суда́ Бо́жия от грехо́в на́с отрева́еши; ра́дуйся, я́ко ду́ши на́ша, а́ки неве́сту, ко сре́тению прекра́снаго Жениха́ Христа́ предуготовля́ти на́с поуча́еши.

Ра́дуйся, я́ко возбужда́еши на́с на вся́к де́нь же и ча́с приноси́ти Христу́ Бо́гу моли́твы, проше́ния и благодаре́ния; ра́дуйся, я́ко с му́дрыми де́вами — душа́ми пра́ведных, вни́ти в бра́чный черто́г Сы́на Твоего́ и Бо́га на́шего помога́еши.

Ра́дуйся, я́ко в ри́зу непоро́чности и чистоты́ облещи́ся на́м спосо́бствуеши; ра́дуйся, я́ко ста́ти на́м на Стра́шнем суде́ Христо́ве одесну́ю Его́ хода́тайствуеши.

Ра́дуйся, я́ко благоутро́бие Бо́жие о прича́стии на́с к ли́ку избра́нных умоля́еши; ра́дуйся, я́ко у́м на́ш, омраче́нный небреже́нием, све́том Свои́м озаря́еши.

Ра́дуйся, я́ко голуби́ну простоту́ и а́гнчу кро́тость стяжа́ти на́м прии́скренне жела́еши; ра́дуйся, я́ко самоотверже́нию и отрече́нию от злы́я на́шея во́ли приобучи́ти на́с тщи́шися.

Ра́дуйся, я́ко младе́нческое незло́бие дарова́ти на́м спосо́бствуеши; ра́дуйся, я́ко хла́дное се́рдце на́ше моли́твами воспламеня́ти на́м помога́еши.

Ра́дуйся, Ма́ти Бо́жия Держа́вная, Засту́пнице усе́рдная ро́да христиа́нскаго.

Конда́к 12.

Благода́ть прия́ла еси́, Влады́чице, от Всемогу́щаго Го́спода Бо́га ми́ловати благочести́выя ча́да Це́ркве Христо́вы и вразумля́ти нечести́вых сыно́в ея́. Сего́ ра́ди, притека́юще под держа́вный покро́в Твоея́ бла́гости, усе́рдно мо́лим Тя́, Влады́чице: изба́ви на́с от ухищре́ний духо́в зло́бы, разслабля́ющих на́ши ду́шу и те́ло ле́ностию и нераде́нием, и возбуди́ на́с от сна́ грехо́внаго, да благода́рственно вопие́м Бо́гу: Аллилу́иа.

И́кос 12.

Пою́ще Твоя́ чудеса́, бы́вшая в дре́вняя и настоя́щая времена́, хва́лим Тя́, Влады́чице, я́ко живоно́сный исто́чник благода́ти и неистощи́мую чуде́с реку́, бе́здну бо ми́лости и щедро́т дарова́ла еси́ ро́ду христиа́нскому явле́нием честны́х ико́н Твои́х. Сего́ ра́ди и мы́, припа́дающе к честне́й ико́не Твое́й Держа́вней, со умиле́нием вопие́м Ти́ си́це:

Ра́дуйся, Це́ркве Небе́сныя и земны́я украше́ние; ра́дуйся, де́вства честны́й покро́ве и огражде́ние.

Ра́дуйся, честна́я похвало́ иере́ев благогове́йных; ра́дуйся, све́тлое проро́ческое сбытие́.

Ра́дуйся, всехва́льных апо́столов восхвале́ние; ра́дуйся, мо́лние, неве́рных устраша́ющая.

Ра́дуйся, сла́вою чуде́с Твои́х ве́рных мы́сли озаря́ющая; ра́дуйся, печа́ль и ско́рбь на́шу в ра́дость претворя́ющая.

Ра́дуйся, я́ко мо́лиши Сы́на Твоего́ и Бо́га на́шего все́м на́м спасти́ся; ра́дуйся, я́ко твори́ши ми́лости все́м в держа́вный Тво́й покро́в притека́ющим.

Ра́дуйся, Засту́пнице все́х су́щих в ско́рбех и боле́знех; ра́дуйся, все́м с ве́рою Тебе́ моля́щимся поле́зная да́рующая.

Ра́дуйся, Ма́ти Бо́жия Держа́вная, Засту́пнице усе́рдная ро́да христиа́нскаго.

Конда́к 13.

О, всепе́тая Ма́ти, держа́вная Влады́чице! Приими́ ны́не сие́ ма́лое моле́ние на́ше, и вели́чия ра́ди бла́гости Твоея́ и неизрече́нных щедро́т Твои́х, не помяни́ мно́жества грехо́в на́ших, но испо́лни во благи́х проше́ния на́ша: да́руй на́м вся́ потре́бная к животу́ и благоче́стию, изба́ви на́с от гла́да, боле́зней и печа́ли, и Ца́рствия небе́снаго насле́дники все́х сотвори́, ве́рно вопию́щих Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелом ра́дость прии́мшая, благоволи́ла еси́, Влады́чице, возвести́ти ста́рице благочести́вей ра́дость о явле́нии ико́ны Твоея́ честны́я Держа́вныя, ю́же и обре́тше по указа́нию Твоему́, я́ко зна́мение ми́лости Бо́жией к на́м, гре́шным, благода́рственно вопие́м Ти́ си́це:

Ра́дуйся, во́ли Госпо́дней та́йны на́м открыва́ющая; ра́дуйся, гне́в Его́ пра́ведный, на ны́ дви́жимый, умягча́ющая.

Ра́дуйся, нечести́вых злове́рия обличе́ние; ра́дуйся, горды́ни и́х низложе́ние.

Ра́дуйся, ве́ры христиа́нския утвержде́ние; ра́дуйся, почита́ния святы́х ико́н освяще́ние.

Ра́дуйся, ти́хое приста́нище спасе́ния ду́ш на́ших; ра́дуйся, Всеми́лостивая Засту́пнице на́ша у престо́ла Святы́я Тро́ицы.

Ра́дуйся, от бе́д и скорбе́й на́ше избавле́ние; ра́дуйся, Це́ркве Правосла́вныя утвержде́ние.

Ра́дуйся, звездо́ невече́рняго све́та, на́с озаря́ющая; ра́дуйся, Ма́ти Све́та, все́х просвеща́ющая.

Ра́дуйся, Ма́ти Бо́жия Держа́вная, Засту́пнице усе́рдная ро́да христиа́нскаго.

Конда́к 1.

Избра́нней от все́х родо́в Засту́пнице ро́да христиа́нскаго, покро́вом Своея́ бла́гости покрыва́ющей страну́ на́шу правосла́вную, благода́рственная пе́ния прино́сим Ти́, Влады́чице, о явле́нии на́м чу́дныя ико́ны Твоея́ Держа́вныя. Ты́ же, я́ко Всеми́лостивая Засту́пница все́х с ве́рою к Тебе́ притека́ющих, от вся́ких на́с бе́д свободи́, да зове́м Ти́:

Ра́дуйся, Ма́ти Бо́жия Держа́вная, Засту́пнице усе́рдная ро́да христиа́нскаго.

Моли́тва пе́рвая.

О, ми́ра Засту́пнице, Ма́ти Всепе́тая! со стра́хом, ве́рою и любо́вию припа́дающе пред честно́ю ико́ною Твое́ю Держа́вною, усе́рдно мо́лим Тя́: не отврати́ лица́ Твоего́ от прибега́ющих к Тебе́. Умоли́, милосе́рдая Ма́ти Све́та, Сы́на Твоего́ и Бо́га на́шего, Сладча́йшаго Го́спода Иису́са Христа́, да сохрани́т в ми́ре страну́ на́шу, да утверди́т держа́ву на́шу в благоде́нствии, и изба́вит на́с от междоусо́бныя бра́ни, да укрепи́т Святу́ю Це́рковь на́шу Правосла́вную, и непозы́блему соблюде́т ю́ от неве́рия, раско́ла и ересе́й. Не и́мамы бо ины́я по́мощи, ра́зве Тебе́, Пречи́стая Де́во: Ты́ еси́ всеси́льная христиа́н Засту́пница пред Бо́гом, пра́ведный гне́в Его́ умягча́ющая. Изба́ви все́х, с ве́рою Тебе́ моля́щихся, от паде́ний грехо́вных, от наве́та злы́х челове́к, от гла́да, ско́рбей и боле́зней. Да́руй на́м ду́х сокруше́ния, смире́ние се́рдца, чистоту́ помышле́ний, исправле́ние грехо́вныя жи́зни и оставле́ние согреше́ний на́ших; да вси́, благода́рне воспева́юще вели́чия Твоя́, сподо́бимся Небе́снаго Ца́рствия и та́мо со все́ми святы́ми просла́вим пречестно́е и великоле́пое и́мя в Тро́ице сла́вимаго Бо́га: Отца́, Сы́на и Свята́го Ду́ха. Ами́нь.

Моли́тва втора́я.

О, Держа́вная Влады́чице Пресвята́я Богоро́дице, на объя́тиих Свои́х держа́щая Содержа́щаго всю́ вселе́нную Царя́ Небе́снаго! Благодари́м Тя́ за неизрече́нное милосе́рдие Твое́, я́ко благоволи́ла еси́ яви́ти на́м, гре́шным и недосто́йным, сию́ святу́ю и чудотво́рную ико́ну Твою́ во дни́ сия́ лука́выя и лю́тыя, я́ко ви́хрь, я́ко бу́ря ве́тренняя наше́дшая на страну́ на́шу, во дни́ уничиже́ния на́шего и укоре́ния, во дни́ разоре́ния и поруга́ния святы́нь на́ших от люде́й безу́мных, и́же не то́чию в се́рдце, но и устна́ми де́рзостно глаго́лют: не́сть Бо́г; и в де́лех сие́ безбо́жие показу́ют. Благодари́м Тя́, Засту́пнице, я́ко призре́ла еси́ с высоты́ святы́я Своея́ на ско́рби на́ша и го́ре ча́д правосла́вных, и я́ко со́лнце све́тлое, увеселя́еши изнемо́гшия от печа́ли очеса́ на́ша пресла́достным зре́нием Держа́внаго о́браза Твоего́. О, Преблагослове́нная Ма́ти Бо́жия, Держа́вная Помо́щнице, кре́пкая Засту́пнице! Благодаря́ще Тя́ со стра́хом и тре́петом, я́ко раби́ непотре́бнии, припа́даем Ти́ со умиле́нием, с сокруше́нием серде́чным и со слеза́ми, и мо́лим Тя́, и стеня́ще вопие́м Ти́: спаси́ на́с, спаси́! помози́ на́м, помози́! потщи́ся, погиба́ем! Се́ живо́т на́ш а́ду прибли́жися; се́ обыше́дше обыдо́ша на́с греси́ мно́зи, беды́ мно́зи, врази́ мно́зи. О, небе́сная Цари́це! Ски́петром вла́сти Твоея́ Боже́ственныя разсе́й, я́ко пра́х, я́ко ды́м, нечести́выя ко́зни враго́в на́ших ви́димых и неви́димых, сокруши́ велере́чивыя помышле́ния и́х и запрети́ и́м, и я́ко Ма́ти все́х, на пу́ть пра́вый и богоуго́дный наста́ви и́х. Вкорени́ в сердца́ все́х на́с пра́вду, ми́р и ра́дость о Ду́се Свя́те; водвори́ в стране́ на́шей тишину́, благоде́нствие, безмяте́жие, любо́вь дру́г ко дру́гу нелицеме́рную. Держа́вою Твое́ю всеси́льною удержи́, Пречи́стая, пото́ки беззако́ния, хотя́щия потопи́ти зе́млю Ру́сскую в стра́шней пучи́не свое́й. Поддержи́ на́с сла́бых, малоду́шных, немощны́х и уны́лых, укрепи́, возста́ви и спаси́. Я́ко да под держа́вою Твое́ю всегда́ храни́ми, пое́м и велича́ем пречестно́е и великоле́пое и́мя Твое́, ны́не и при́сно и во ве́ки веко́в. Ами́нь.

А҆ка́ѳїстъ прест҃ѣ́й бг҃ро́дицѣ ꙗ҆вле́нїѧ ра́ди чꙋдотво́рныѧ є҆ѧ̀ і҆кѡ́ны держа́вныѧ.

Конда́къ а҃.

И҆збра́ннѣй ѿ всѣ́хъ родѡ́въ застꙋ́пницѣ ро́да хрⷭ҇тїа́нскагѡ, покро́вомъ своеѧ̀ бл҃гости покрыва́ющей странꙋ̀ на́шꙋ правосла́внꙋю, благода́рствєннаѧ пѣ̑нїѧ прино́симъ тѝ, влⷣчце, ѡ҆ ꙗ҆вле́нїи на́мъ чꙋ́дныѧ і҆кѡ́ны твоеѧ̀ держа́вныѧ. Ты́ же, ꙗ҆́кѡ всемлⷭ҇тиваѧ застꙋ́пница всѣ́хъ съ вѣ́рою къ тебѣ̀ притека́ющихъ, ѿ всѧ́кихъ на́съ бѣ́дъ свободѝ, да зове́мъ тѝ:

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

І҆́косъ а҃.

А҆́гг҃лѡмъ ра́дость прїи́мшаѧ, бл҃говоли́ла є҆сѝ, влⷣчце, возвѣсти́ти ста́рицѣ бл҃гочести́вѣй ра́дость ѡ҆ ꙗ҆вле́нїи і҆кѡ́ны твоеѧ̀ чⷭ҇тны́ѧ держа́вныѧ, ю҆́же и҆ ѡ҆брѣ́тше по ᲂу҆каза́нїю твоемꙋ̀, ꙗ҆́кѡ зна́менїе млⷭ҇ти бж҃їей къ на́мъ грѣ́шнымъ, благода́рственнѡ вопїе́мъ тѝ си́це:

Ра́дꙋйсѧ, во́ли гдⷭ҇ней та́йны на́мъ ѿкрыва́ющаѧ: ра́дꙋйсѧ, гнѣ́въ є҆гѡ̀ првⷣный, на ны̀ дви́жимый, ᲂу҆мѧгча́ющаѧ.

Ра́дꙋйсѧ, нечести́выхъ ѕловѣ́рїѧ ѡ҆бличе́нїе: ра́дꙋйсѧ, горды́ни и҆́хъ низложе́нїе.

Ра́дꙋйсѧ, вѣ́ры хрⷭ҇тїа́нскїѧ ᲂу҆твержде́нїе: ра́дꙋйсѧ, почита́нїѧ ст҃ы́хъ і҆кѡ́нъ ѡ҆сщ҃е́нїе.

Ра́дꙋйсѧ, ти́хое приста́нище сп҃се́нїѧ дꙋ́шъ на́шихъ: ра́дꙋйсѧ, всемлⷭ҇тиваѧ застꙋ́пнице на́ша ᲂу҆ прⷭ҇то́ла ст҃ы́ѧ трⷪ҇цы.

Ра́дꙋйсѧ, ѿ бѣ́дъ и҆ скорбе́й на́ше и҆збавле́нїе: ра́дꙋйсѧ, цр҃кве правосла́вныѧ ᲂу҆твержде́нїе.

Ра́дꙋйсѧ, ѕвѣздо̀ невече́рнѧгѡ свѣ́та, на́съ ѡ҆зарѧ́ющаѧ: ра́дꙋйсѧ, мт҃и свѣ́та, всѣ́хъ просвѣща́ющаѧ.

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Конда́къ в҃.

Ви́дѧщи, всенепоро́чнаѧ, съ высоты̀ нбⷭ҇нагѡ жили́ща своегѡ̀, и҆дѣ́же съ сн҃омъ твои́мъ во сла́вѣ пребыва́еши, ско́рбь вѣ́рныхъ рабѡ́въ твои́хъ, ꙗ҆́кѡ гнѣ́внагѡ ра́ди бж҃їѧ посѣще́нїѧ вѣ́ра хрⷭ҇то́ва порꙋга́ема быва́етъ нечести́вымъ ѕловѣ́рїемъ, бл҃говоли́ла є҆сѝ ꙗ҆ви́ти на́мъ і҆кѡ́нꙋ твою̀ держа́внꙋю, да всѝ хрⷭ҇толюби́вїи лю́дїе ᲂу҆се́рднѡ мо́лѧтсѧ пред̾ не́ю, вѣ́рнѡ вопїю́ще бг҃ꙋ: А҆ллилꙋ́їа.

І҆́косъ в҃.

Ра́зꙋмꙋ на́шемꙋ просвѣще́нїе свы́ше и҆схода́тайствꙋй, прест҃а́ѧ бцⷣе, да позна́емъ, что́ є҆сть во́лѧ бж҃їѧ блага́ѧ, ᲂу҆го́днаѧ и҆ соверше́ннаѧ, и҆ се́рдце напра́ви, є҆́же со ᲂу҆се́рдїемъ твори́ти ю҆̀, тебе́ же, всеми́лостиваѧ застꙋ́пнице, непреста́нными гла́сы восхвалѧ́ти:

Ра́дꙋйсѧ, ꙗ҆вле́нїемъ честны́ѧ і҆кѡ́ны твоеѧ̀ тьмꙋ̀ лю́тыхъ ѡ҆бстоѧ́нїй ѿ на́съ ѿгонѧ́ющаѧ: ра́дꙋйсѧ, лꙋча́ми чꙋде́съ всѣ́хъ просвѣща́ющаѧ.

Ра́дꙋйсѧ, дꙋше́вными и҆ тѣле́сными ѻ҆чесы̑ ѡ҆слѣ́пшихъ прозрѣ́нїе: ра́дꙋйсѧ, ѡ҆мраче́нныхъ смы́слѡвъ просвѣще́нїе.

Ра́дꙋйсѧ, всѣ́хъ ᲂу҆пова́ющихъ на тѧ̀ непосты́днаѧ наде́ждо: ра́дꙋйсѧ, вдо́въ и҆ сиро́тъ наде́жный покро́ве.

Ра́дꙋйсѧ, а҆́лчꙋщихъ пита́тельнице: ра́дꙋйсѧ, дꙋхо́вныхъ сокро́вищъ пода́тельнице.

Ра́дꙋйсѧ, бг҃омꙋ́дрыхъ премꙋ́драѧ добро́то: ра́дꙋйсѧ, пресвѣ́тлаѧ, бж҃е́ственнаѧ красото̀.

Ра́дꙋйсѧ, цвѣ́те нетлѣ́нїѧ: ра́дꙋйсѧ, ѡ҆бонѧ́нїе хрⷭ҇то́ва бл҃гоꙋха́нїѧ.

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Конда́къ г҃.

Си́лꙋ бжⷭ҇твенныѧ блгⷣти да́рꙋй на́мъ, прест҃а́ѧ бцⷣе, во є҆́же неꙋкло́ннѡ и҆ непреткнове́ннѡ ходи́ти на́мъ сп҃си́тельнымъ пꙋте́мъ хрⷭ҇то́выхъ за́повѣдей, се́рдцемъ же и҆ ᲂу҆сты̑ непреста́ннѡ воспѣва́ти всемогꙋ́щемꙋ бг҃ꙋ: А҆ллилꙋ́їа.

І҆́косъ г҃.

И҆мꙋ́ще тѧ̀, бг҃оизбра́ннаѧ застꙋ́пнице ро́да хрⷭ҇тїа́нскагѡ, ꙗ҆́кѡ зарю̀ свѣ́тлꙋю, просвѣща́ющꙋю дꙋ́шъ на́шихъ темнотꙋ̀ и҆ разгонѧ́ющꙋю мра́къ серде́чнагѡ невѣ́дѣнїѧ на́шегѡ, припа́даемъ къ чⷭ҇тнѣ́й і҆кѡ́нѣ твое́й держа́внѣй и҆ съ ᲂу҆миле́нїемъ вопїе́мъ тѝ си́це:

Ра́дꙋйсѧ, сохранѧ́ти и҆ спаса́ти всѣ́хъ призыва́ющихъ тѧ̀ ѡ҆бѣща́вшаѧ: ра́дꙋйсѧ, прославлѧ́ющихъ тѧ̀ прославлѧ́ющаѧ.

Ра́дꙋйсѧ, къ сн҃ꙋ твоемꙋ̀ и҆ бг҃ꙋ на́шемꙋ мл҃твы вѣ́рныхъ приносѧ́щаѧ: ра́дꙋйсѧ, блгⷣть твою̀ і҆кѡ́намъ твои̑мъ чⷭ҇тны́мъ дарова́вшаѧ.

Ра́дꙋйсѧ, всю̀ вселе́ннꙋю лꙋча́ми твоеѧ̀ блгⷣти ѡ҆зари́вшаѧ: ра́дꙋйсѧ, премꙋ́дрости бж҃їѧ прїѧ́телище.

Ра́дꙋйсѧ, бжⷭ҇твенныѧ блгⷣти пода́тельнице: ра́дꙋйсѧ, ꙗ҆́кѡ тобо́ю ѿ вѣ́чныѧ сме́рти свобожда́емсѧ.

Ра́дꙋйсѧ, ꙗ҆́кѡ тобо́ю безконе́чныѧ жи́зни сподоблѧ́емсѧ: ра́дꙋйсѧ, чⷭ҇тнѣ́йшаѧ херꙋві̑мъ и҆ сла́внѣйшаѧ серафі̑мъ.

Ра́дꙋйсѧ, мт҃и свѣ́та и҆ цр҃и́це нбⷭ҇наѧ: ра́дꙋйсѧ, влⷣчце, всемлⷭ҇тиваѧ за на́съ пред̾ бг҃омъ застꙋ́пнице.

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Конда́къ д҃.

Бꙋ́рѧ жите́йскагѡ мо́рѧ сокрꙋша́етъ дꙋхо́вный кора́бль на́шъ волна́ми жите́йскихъ попече́нїй, и҆ ми́ръ ᲂу҆бо́гихъ дꙋ́шъ на́шихъ мѧте́тсѧ. И҆ гдѣ̀ ѡ҆брѧ́щемъ ти́хое приста́нище спⷭ҇нїѧ: то́кмѡ на тѧ̀ возлага́емъ наде́ждꙋ, влⷣчце: и҆мꙋ́щи бо держа́вꙋ непобѣди́мꙋю, ѿ всѧ́кихъ бѣ́дъ, гла́да, скорбе́й и҆ болѣ́зней и҆зба́ви на́съ, вѣ́рнѡ вопїю́щихъ бг҃ꙋ: А҆ллилꙋ́їа.

І҆́косъ д҃.

Слы́шавше правосла́внїи лю́дїе повелѣ́нїе твоѐ, влⷣчце, моли́тисѧ пред̾ ѻ҆́бразомъ твои́мъ держа́внымъ, со ᲂу҆миле́нїемъ серде́чнымъ прибѣга́ютъ къ твоемꙋ̀ всеси́льномꙋ застꙋпле́нїю ᲂу҆ прⷭ҇то́ла всемогꙋ́щагѡ бг҃а и҆ бл҃гоговѣ́йнѡ вопїю́тъ тѝ си́це:

Ра́дꙋйсѧ, го́рнѧгѡ мі́ра ᲂу҆краше́нїе: ра́дꙋйсѧ, до́льнѧгѡ мі́ра застꙋпле́нїе.

Ра́дꙋйсѧ, дщѝ бл҃гослове́ннаѧ ѻ҆ц҃а̀ нбⷭ҇нагѡ: ра́дꙋйсѧ, роди́тельнице неискꙋсомꙋ́жнаѧ сн҃а предвѣ́чнагѡ.

Ра́дꙋйсѧ, де́мѡнскїѧ полкѝ побѣжда́ющаѧ: ра́дꙋйсѧ, врагѝ спⷭ҇нїѧ человѣ́ческагѡ посрамлѧ́ющаѧ.

Ра́дꙋйсѧ, ꙗ҆́кѡ во́лею твое́ю сокрꙋша́ютсѧ є҆реті́чєскїѧ главы̑: ра́дꙋйсѧ, ꙗ҆́кѡ вѣ́рнїи тобо́ю сподоблѧ́ютсѧ сла́вы.

Ра́дꙋйсѧ, тѣле́съ на́шихъ безме́зднаѧ цѣли́тельнице: ра́дꙋйсѧ, дꙋ́шъ на́шихъ къ црⷭ҇твїю го́рнемꙋ пꙋтеводи́тельнице.

Ра́дꙋйсѧ, ꙗ҆́кѡ сотворѝ тебѣ̀ вели́чїе си́льный: ра́дꙋйсѧ, ꙗ҆́кѡ призрѣ̀ на смире́нїе твоѐ гдⷭ҇ь.

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Конда́къ є҃.

Бг҃ото́чнаѧ ѕвѣзда̀ ꙗ҆ви́сѧ на́мъ, влⷣчце, чⷭ҇тна́ѧ твоѧ̀ і҆кѡ́на держа́внаѧ, странꙋ̀ рѡссі́йскꙋю всю̀ ѡ҆бтека́ющаѧ и҆ лꙋча́ми чꙋде́съ твои́хъ ѡ҆сїѧва́ющаѧ всѣ́хъ блꙋжда́ющихъ по мо́рю стра́стнагѡ житїѧ̀, мра́къ печа́лей и҆ мглꙋ̀ всѧ́ческихъ недꙋ̑гъ и҆ скорбе́й прогонѧ́ющаѧ и҆ наставлѧ́ющаѧ на пꙋ́ть сп҃се́нїѧ съ вѣ́рою къ тебѣ̀ притека́ющихъ и҆ вопїю́щихъ бг҃ꙋ: А҆ллилꙋ́їа.

І҆́косъ є҃.

Во дни̑ лю́тыхъ скорбе́й и҆ ѕлы́хъ ѡ҆бстоѧ́нїй ꙗ҆ви́ла є҆сѝ на́мъ, влⷣчце, ве́лїю млⷭ҇ть ѡ҆брѣ́тенїемъ чⷭ҇тны́ѧ і҆кѡ́ны твоеѧ̀ держа́вныѧ, да всѝ съ вѣ́рою молѧ́щїисѧ пред̾ не́ю прїи́мꙋтъ здра́вїе и҆ дꙋ́шъ сп҃се́нїе. Сегѡ̀ ра́ди и҆ мы̀, прославлѧ́юще твоѐ млⷭ҇рдїе неизрече́нное, ᲂу҆се́рднѡ вопїе́мъ тѝ си́це:

Ра́дꙋйсѧ, свѣти́ло незаходи́мое, свѣ́томъ и҆́стиннагѡ бг҃опозна́нїѧ на́съ просвѣща́ющее: ра́дꙋйсѧ, врата́рнице, двє́ри ра̑йскїѧ вѣ̑рнымъ ѿверза́ющаѧ.

Ра́дꙋйсѧ, многотекꙋ́щаѧ рѣко̀ бжⷭ҇твенныѧ блгⷣти: ра́дꙋйсѧ, неистощи́мый и҆сто́чниче ст҃ы́ни.

Ра́дꙋйсѧ, ко бл҃гоче́стїю на́ша наста́внице: ра́дꙋйсѧ, дꙋ́шъ на́шихъ ѡ҆сщ҃е́нїе.

Ра́дꙋйсѧ, ка́ющихсѧ грѣ́шникѡвъ съ бг҃омъ примире́нїе: ра́дꙋйсѧ, дѡ́брыѧ ѡ҆бѣ́ты прїе́млющаѧ.

Ра́дꙋйсѧ, бл҃ги̑мъ намѣ́ренїємъ спосо́бствꙋющаѧ: ра́дꙋйсѧ, ѕлы̑ѧ начина̑нїѧ разрꙋша́ющаѧ.

Ра́дꙋйсѧ, вра̑жїѧ кѡ́зни расторга́ющаѧ: ра́дꙋйсѧ, ско́раѧ человѣ́кѡмъ помо́щнице.

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Конда́къ ѕ҃.

Воспѣва́емъ твоѐ млⷭ҇рдїе досточꙋ́дное и҆ мно́гое къ на́мъ снисхожде́нїе, прест҃а́ѧ бцⷣе. Не престае́ши бо моли́тисѧ ѡ҆ на́съ, грѣ́шныхъ, сн҃ꙋ твоемꙋ̀ и҆ бг҃ꙋ на́шемꙋ, є҆́же ѿврати́ти гнѣ́въ є҆гѡ̀ првⷣный, на ны̀ дви́жимый, и҆ поми́ловати всѣ́хъ вѣ́рнѡ вопїю́щихъ бг҃ꙋ: А҆ллилꙋ́їа.

І҆́косъ ѕ҃.

Возсїѧва́етъ въ дꙋша́хъ на́шихъ, ѡ҆мраче́нныхъ ско́рбїю и҆ ᲂу҆ны́нїемъ ѿ мно́жества согрѣше́нїй, свѣ́тъ бл҃года́тнагѡ ᲂу҆тѣше́нїѧ, и҆ се́рдце на́ше и҆сполнѧ́етсѧ весе́лїѧ и҆ ра́дости, є҆гда̀ непреста́нными твои́ми, влⷣчце, вразꙋмле́ньми возбꙋжда́еши на́съ вопи́ти къ ще́дромꙋ бг҃ꙋ, да млⷭ҇тивъ бꙋ́детъ и҆ прости́тъ на́мъ прегрѣшє́нїѧ на̑ша. Не премолчѝ ᲂу҆́бѡ, влⷣчце, наставлѧ́ющи и҆ вразꙋмлѧ́ющи на́съ, зовꙋ́щихъ тѝ си́це:

Ра́дꙋйсѧ, въ ско́рбѣхъ и҆ болѣ́знехъ долготерпѣ́нїю на́съ наꙋча́ющаѧ: ра́дꙋйсѧ, всѧ̑ помышлє́нїѧ на̑ша къ распѧ́томꙋ за грѣхи̑ мі́ра сп҃си́телю ᲂу҆стремлѧ́ющаѧ.

Ра́дꙋйсѧ, страда̑нїѧ є҆гѡ̀ и҆ крⷭ҇тнꙋю сме́рть въ па́мѧти на́шей ѡ҆бновлѧ́ющаѧ: ра́дꙋйсѧ, правосꙋ́дїемъ бж҃їимъ къ ѡ҆жесточє́ннымъ и҆ нераска̑ѧннымъ на́съ ᲂу҆страша́ющаѧ.

Ра́дꙋйсѧ, ѡ҆жида́нїемъ бꙋ́дꙋщихъ нбⷭ҇ныхъ бла̑гъ на́съ ᲂу҆слажда́ющаѧ: ра́дꙋйсѧ, къ наслѣ́дствꙋ нетлѣ́нномꙋ и҆ вѣ́чномꙋ на́съ приводѧ́щаѧ.

Ра́дꙋйсѧ, наслѣ́дниками црⷭ҇твїѧ бж҃їѧ на́съ сотворѧ́ющаѧ: ра́дꙋйсѧ, трапе́зо ст҃а́ѧ, хлѣ́бомъ жи́зни на́съ пита́ющаѧ.

Ра́дꙋйсѧ, ма́слино бл҃гопло́днаѧ, є҆ле́емъ млⷭ҇ти сердца̀ ᲂу҆мѧгча́ющаѧ: ра́дꙋйсѧ, ꙗ҆́кѡ мл҃твою пред̾ і҆кѡ́ною твое́ю прїе́млемъ дх҃о́вное ᲂу҆тѣше́нїе.

Ра́дꙋйсѧ, ꙗ҆́кѡ сердца́мъ на́шымъ да́рꙋеши бл҃года́тное сокрꙋше́нїе: ра́дꙋйсѧ, ꙗ҆́кѡ бл҃госты́нею свое́ю ᲂу҆гаша́еши въ на́съ ѻ҆́гнь нече́стїѧ.

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Конда́къ з҃.

Хотѧ́й всѣ̑мъ человѣ́кѡмъ сп҃сти́сѧ и҆ въ ра́зꙋмъ позна́нїѧ и҆́стины прїитѝ, премлⷭ҇рдый гдⷭ҇ь и҆ созда́тель на́шъ посла̀ во дни̑ гнѣ́внагѡ посѣще́нїѧ своегѡ̀ а҆́гг҃ла пресвѣ́тла въ новоѧвле́ннѣмъ ѻ҆́бразѣ твое́мъ держа́внѣмъ, да всѝ съ вѣ́рою молѧ́щїисѧ пред̾ ни́мъ, прїи́мꙋтъ по́мощь и҆ застꙋпле́нїе твоѐ всеси́льное и҆ ра́достнѡ вопїю́тъ всемогꙋ́щемꙋ бг҃ꙋ: А҆ллилꙋ́їа.

І҆́косъ з҃.

Но́вꙋю показа̀ млⷭ҇ть всѣ́хъ творе́цъ и҆ влⷣка на́шъ гдⷭ҇ь, є҆гда̀ положѝ во гнѣ́вѣ свое́мъ наказа́ти ро́дъ человѣ́ческїй ѻ҆гне́мъ, мече́мъ, гла́домъ и҆ болѣ́зньми, сотворѝ сїѐ наказа́нїе мно́гимъ человѣ́кѡмъ ко вразꙋмле́нїю и҆ и҆справле́нїю во спⷭ҇е́нїе дꙋ́шъ. Сегѡ̀ ра́ди и҆ мы̀, влⷣчце, припа́дающе къ пречⷭ҇томꙋ ѻ҆́бразꙋ твоемꙋ̀ держа́вномꙋ, ᲂу҆се́рднѡ мо́лимъ тѧ̀: не да́ждь на́мъ поги́бнꙋти до конца̀, но млⷭ҇рдїѧ двє́ри ѿве́рзи на́мъ, вопїю́щымъ тѝ си́це:

Ра́дꙋйсѧ, непристꙋ́пнагѡ бж҃ества̀ селе́нїе: ра́дꙋйсѧ, а҆́гг҃льское непрестаю́щее ᲂу҆дивле́нїе.

Ра́дꙋйсѧ, рабѡ́въ бж҃їихъ та́йное вразꙋмле́нїе: ра́дꙋйсѧ, застꙋ́пнице всѣ́хъ сꙋ́щихъ въ ско́рбехъ и҆ болѣ́знехъ.

Ра́дꙋйсѧ, бл҃года́тное безстра́стїе и҆́щꙋщымъ є҆го̀ подаю́щаѧ: ра́дꙋйсѧ, всѣ́хъ въ чⷭ҇тотѣ̀ цѣломⷣрїѧ живꙋ́щихъ ѕѣлѡ̀ лю́бѧщаѧ.

Ра́дꙋйсѧ, приста́нище небꙋ́рное подви́жникѡвъ бл҃гоче́стїѧ: ра́дꙋйсѧ, гнѣ́вомъ бж҃їимъ вразꙋмлѧ́ющаѧ сынѡ́въ нече́стїѧ.

Ра́дꙋйсѧ, безмо́лвствꙋющихъ сла́дкаѧ собесѣ́днице: ра́дꙋйсѧ, ѿше́льникѡвъ хрⷭ҇та̀ ра́ди крѣ́пкое ᲂу҆пова́нїе.

Ра́дꙋйсѧ, по́стникѡвъ бж҃е́ственное ра́дованїе: ра́дꙋйсѧ, пꙋстынножи́телей ти́хое весе́лїе.

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Конда́къ и҃.

Стра́нни и҆ прише́льцы є҆смы̀ на землѝ: житїе́ бо на́ше сꙋ́етно и҆ маловре́менно є҆́сть. Мы́ же сме́рти безвѣ́стное во ᲂу҆́мъ никогда́же прїе́млемъ, ни помышлѧ́емъ ѡ҆ стра́шнѣмъ сꙋди́щи хрⷭ҇то́вѣ, въ не́мже и҆́мамы првⷣномꙋ сꙋдїѝ предста́ти и҆ да́ти ѿвѣ́тъ ѡ҆ всѧ́комъ же дѣ́лѣ и҆ словесѝ. Тѣ́мже мо́лимъ тѧ̀, влⷣчце: возбꙋдѝ на́съ ско́рѡ ѿ сна̀ грѣхо́внагѡ, да не пости́гнетъ на́съ ча́съ сме́рти неиспра́вленныхъ и҆ да сподо́бимсѧ твои́мъ хода́тайствомъ полꙋчи́ти беззако́нїємъ на́шымъ проще́нїе и҆ во гла́сѣ ра́дованїѧ воспѣва́ти хрⷭ҇тꙋ̀ бг҃ꙋ: А҆ллилꙋ́їа.

І҆́косъ и҃.

Всѧ̀ бы́вши горѣ̀, къ нбⷭ҇нымъ взѧта̀ є҆сѝ, и҆ земны́хъ не ѡ҆ставлѧ́еши, прест҃а́ѧ бцⷣе, сщ҃е́ннымъ твои́мъ предста́тельствомъ: и҆́маши бо дерзнове́нїе къ сн҃ꙋ твоемꙋ̀ и҆ бг҃ꙋ на́шемꙋ. Тѣ́мже ᲂу҆твердѝ, влⷣчце, въ ми́рѣ глꙋбо́цѣ странꙋ̀ на́шꙋ правосла́внꙋю и҆ всѧ̑ полє́знаѧ да́рꙋй рабѡ́мъ твои̑мъ, да велича́юще воспѣва́емъ тѝ та́кѡ:

Ра́дꙋйсѧ, ᲂу҆́мнымъ ѻ҆чесє́мъ на́шымъ го́рькїй и҆ стра́шный ча́съ сме́ртный представлѧ́ющаѧ: ра́дꙋйсѧ, на кі́йждо де́нь, а҆́ки ᲂу҆жѐ на послѣ́днїй житїѧ̀ на́шегѡ, взира́ти на́съ поꙋча́ющаѧ.

Ра́дꙋйсѧ, люби́ти мі́ръ и҆ ꙗ҆̀же въ мі́рѣ на́мъ воспреща́ющаѧ: ра́дꙋйсѧ, пристра́стїе къ тлѣ́нномꙋ бога́тствꙋ и҆з̾ се́рдца на́шегѡ и҆скоренѧ́ющаѧ.

Ра́дꙋйсѧ, всѧ̑ бла̑га зємна́ѧ бы́ти привре́мєнна и҆ скоропрехѡдѧ́ща на́мъ показꙋ́ющаѧ: ра́дꙋйсѧ, сла́вы человѣ́чи, а҆́ки тѣ́ни преходѧ́щыѧ, и҆ска́ти на́мъ возбранѧ́ющаѧ.

Ра́дꙋйсѧ, ꙗ҆́кѡ сладча́йшее и҆́мѧ гдⷭ҇а і҆и҃са хрⷭ҇та̀ ᲂу҆сты̀ непреста́ннѡ произноси́ти и҆ во ᲂу҆мѣ̀ держа́ти на́съ побꙋжда́еши: ра́дꙋйсѧ, ꙗ҆́кѡ ѿ праздносло́вїѧ, многоглаго́ланїѧ, па́че же ѿ кощꙋ́нства на́съ ᲂу҆держава́еши.

Ра́дꙋйсѧ, ꙗ҆́кѡ воздержа́нїю въ пи́щи и҆ питїѝ прїѡбꙋчи́ти на́съ пече́шисѧ: ра́дꙋйсѧ, ꙗ҆́кѡ твоѐ за на́съ хода́тайство си́льно є҆́сть пред̾ бг҃омъ, є҆́же не вве́ржєннымъ на́мъ бы́ти во тьмꙋ̀ кромѣ́шнюю.

Ра́дꙋйсѧ, ꙗ҆́кѡ при́снѡ внꙋша́еши на́мъ ѡ҆мыва́ти грѣхѝ своѧ̑ слеза́ми покаѧ́нїѧ, да и҆зба́вимсѧ гее́нны а҆́дскїѧ: ра́дꙋйсѧ, ꙗ҆́кѡ побꙋжда́еши на́съ де́нь и҆ но́щь моли́тисѧ, да не по́слани бꙋ́демъ со де́моны мꙋ́читисѧ.

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Конда́къ ѳ҃.

Всѧ́кое є҆стество̀ а҆́гг҃льское ᲂу҆диви́сѧ дѣ́лꙋ твоегѡ̀ млⷭ҇рдїѧ, гдⷭ҇и, ꙗ҆́кѡ дарова́лъ є҆сѝ на́мъ толи́кѡ тве́рдꙋю и҆ те́плꙋю застꙋ́пницꙋ ро́дꙋ хрⷭ҇тїа́нскомꙋ во дни̑ гнѣ́внагѡ твоегѡ̀ посѣще́нїѧ, на́мъ неви́димѡ сопребыва́ющꙋ, слы́шащꙋ же тебѣ̀ пою́щихъ: А҆ллилꙋ́їа.

І҆́косъ ѳ҃.

Вѣті̑и многовѣща́ннїи, непросвѣще́ннїи свѣ́томъ и҆́стиннагѡ бг҃опозна́нїѧ, поклони́шасѧ злато́мꙋ тельцꙋ̀. По сло́вꙋ же а҆пⷭ҇ла, всѧ́къ любостѧжа́тель і҆дѡлослꙋжи́тель є҆́сть. Сегѡ̀ ра́ди бж҃їе гнѣ́вное посѣще́нїе всемꙋ̀ мі́рꙋ зрѧ́ще, и҆ мы̀, грѣ́шнїи, смире́ннѡ мо́лимъ тѧ̀, влⷣчце: ᲂу҆ми́лостиви созда́телѧ, да потщи́тсѧ гнѣ́въ сво́й првⷣный преложи́ти на млⷭ҇ть и҆ поми́ловати на́съ, вопїю́щихъ тѝ си́це:

Ра́дꙋйсѧ, ꙗ҆́кѡ твоеѧ̀ по́мощи и҆ застꙋпле́нїѧ никогда́же на́съ лиша́еши: ра́дꙋйсѧ, ꙗ҆́кѡ ᲂу҆́мъ на́шъ, ѡ҆мраче́нный небреже́нїемъ, свѣ́тлымъ твои́мъ покро́вомъ ѡ҆зарѧ́еши.

Ра́дꙋйсѧ, ꙗ҆́кѡ тобо́ю ѿ страсте́й тѣле́сныхъ и҆збавлѧ́емсѧ: ра́дꙋйсѧ, ꙗ҆́кѡ тобо́ю сла́достей дх҃о́вныхъ и҆сполнѧ́емсѧ.

Ра́дꙋйсѧ, колесни́це со́лнца ᲂу҆́мнагѡ, ра́дꙋйсѧ, тве́рдое правосла́вїѧ ᲂу҆крѣпле́нїе: ра́дꙋйсѧ, честно́е сп҃са на́шегѡ носи́ло и҆ похвале́нїе.

Ра́дꙋйсѧ, и҆ во вре́меннѣй жи́зни полє́знаѧ на́мъ подаю́щаѧ: ра́дꙋйсѧ, дꙋшє́вныѧ ра́ны на́шѧ є҆ле́емъ сп҃си́тельнымъ ᲂу҆маща́ющаѧ.

Ра́дꙋйсѧ, ꙗ҆́кѡ и҆зъ ро́ва беззако́нїй на́шихъ рꙋко́ю твоеѧ̀ по́мощи на́съ и҆схища́еши: ра́дꙋйсѧ, ꙗ҆́кѡ грѣхо́вный со́нъ дꙋшевре́дныѧ на́шеѧ лѣ́ности ѡ҆трѧса́еши.

Ра́дꙋйсѧ, дꙋше́вное ᲂу҆миле́нїе и҆ серде́чное сокрꙋше́нїе въ на́съ ражда́ющаѧ: ра́дꙋйсѧ, ꙗ҆́кѡ твори́ши всѣ́мъ сп҃сти́сѧ, въ держа́вный покро́въ тво́й прибѣга́ющымъ.

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Конда́къ і҃.

Спастѝ хотѧ̀ мнѡ́гїѧ лю́ди ѿ ѡ҆бдержа́щихъ и҆́хъ скорбе́й и҆ болѣ́зней и҆ вѣ́рꙋ и҆́хъ ᲂу҆тверди́ти во всеси́льное застꙋпле́нїе твоѐ, влⷣчце, дарова́ла є҆сѝ на́мъ и҆з̾ѡбраже́нїе чⷭ҇тны́ѧ і҆кѡ́ны твоеѧ̀ держа́вныѧ, да всѝ ви́дѧще ꙗ҆влѧ́емꙋю тобо́ю млⷭ҇ть, вопїю́тъ со ᲂу҆миле́нїемъ бг҃ꙋ: А҆ллилꙋ́їа.

І҆́косъ і҃.

Стѣна̀ ꙗ҆ви́ласѧ є҆сѝ, бцⷣе дв҃о, рѡссі́йстѣй странѣ̀ чⷭ҇тны́ми твои́ми і҆кѡ́нами, и҆злива́ющи чꙋдеса̀ во бранѣ́хъ и҆ ѡ҆сѣнѧ́ѧ бл҃года́тною по́мощїю твое́ю хрⷭ҇толюби́выхъ во́инѡвъ. Под̾ держа́внымъ бо покро́вомъ твоеѧ̀ бл҃гости рѡссі́йскаѧ страна̀ созида́шесѧ, и҆ врата̀ а҆́дѡва не ѡ҆долѣ́ша правосла́вныѧ цр҃кве хрⷭ҇то́вы. Сегѡ̀ ра́ди припа́дающе къ чⷭ҇тнѣ́й і҆кѡ́нѣ твое́й держа́внѣй, ра́достнѡ вопїе́мъ тѝ си́це:

Ра́дꙋйсѧ, рѡссі́йскїѧ страны̀ покро́ве и҆ ᲂу҆твержде́нїе: ра́дꙋйсѧ, ѿ наше́ствїѧ и҆ноплеме́нныхъ и҆збавле́нїе.

Ра́дꙋйсѧ, сꙋ́щихъ въ плѣне́нїи ѡ҆свобожде́нїе: ра́дꙋйсѧ, ѿ гла́да и҆ болѣ́зней на́ше сп҃се́нїе.

Ра́дꙋйсѧ, са́де землѝ ѻ҆бѣтова́нїѧ: ра́дꙋйсѧ, цвѣ́те бжⷭ҇твеннагѡ сажде́нїѧ.

Ра́дꙋйсѧ, лозо̀ добродѣ́тельнаѧ вїногра́да хрⷭ҇то́ва: ра́дꙋйсѧ, дре́во чꙋдото́чное раѧ̀ і҆и҃сова.

Ра́дꙋйсѧ, жили́ще и҆ до́мъ хрⷭ҇та̀ бг҃а на́шегѡ: ра́дꙋйсѧ, вмѣсти́лище неизрече́нныѧ є҆гѡ̀ сла́вы.

Ра́дꙋйсѧ, влⷣчце, всемлⷭ҇тиваѧ пода́тельнице щедро́тъ: ра́дꙋйсѧ, ꙗ҆́кѡ мно́гѡ мо́жетъ мл҃тва твоѧ̀ пред̾ сн҃омъ твои́мъ и҆ бг҃омъ на́шимъ.

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Конда́къ а҃і.

Пѣ́нїе хвале́бное и҆ бл҃года́рственное прино́симъ тѝ, влⷣчце, под̾ держа́внымъ бо покро́вомъ твоеѧ̀ бл҃гости пребыва́емъ въ непосты́днѣй наде́ждѣ всеси́льнагѡ застꙋпле́нїѧ твоегѡ̀ за на́съ, грѣ́шныхъ, и҆ всѐ ᲂу҆пова́нїе на́ше на тѧ̀ возложи́вше, ра́достнѡ вопїе́мъ бг҃ꙋ: А҆ллилꙋ́їа.

І҆́косъ а҃і.

Свѣти̑льницы на́ши ᲂу҆гасо́ша, є҆ле́а же бл҃ги́хъ дѣ́лъ не и҆́мамы, во є҆́же возжещѝ блгⷣть дх҃а ст҃а́гѡ. И҆ гдѣ̀ ѡ҆брѧ́щемсѧ, ѡ҆каѧ́ннїи, сно́мъ грѣхо́внымъ ѡ҆тѧгче́ннїи, є҆гда̀ пости́гнетъ на́съ внеза́пꙋ въ полꙋ́нощи ча́съ кончи́ны на́шеѧ; Но да не ᲂу҆слы́шимъ и҆ мы̀, ꙗ҆́кѡже ю҆рѡ́дивыѧ дѣ́вы, гро́знагѡ гла́са жениха̀: не вѣ́мъ ва́съ! Помозѝ на́мъ, влⷣчце, напо́лнити сосꙋ́ды дꙋ́шъ на́шихъ є҆ле́емъ бл҃ги́хъ дѣ́лъ, па́че же млⷭ҇рдїѧ и҆ смире́нїѧ, да бл҃года́рственнѡ воспое́мъ тѝ си́це:

Ра́дꙋйсѧ, ꙗ҆́кѡ воспомина́нїемъ грѧдꙋ́щагѡ гро́знагѡ сꙋда̀ бж҃їѧ ѿ грѣхѡ́въ на́съ ѿрѣва́еши: ра́дꙋйсѧ, ꙗ҆́кѡ дꙋ́ши на́шѧ, а҆́ки невѣ́стꙋ, ко срѣ́тенїю прекра́снагѡ жениха̀ хрⷭ҇та̀ пред̾ꙋготовлѧ́ти на́съ поꙋча́еши.

Ра́дꙋйсѧ, ꙗ҆́кѡ возбꙋжда́еши на́съ на всѧ́къ де́нь же и҆ ча́съ приноси́ти хрⷭ҇тꙋ̀ бг҃ꙋ мл҃твы, прошє́нїѧ и҆ благодарє́нїѧ: ра́дꙋйсѧ, ꙗ҆́кѡ съ мꙋ́дрыми дѣ́вами, дꙋша́ми првⷣныхъ, вни́ти въ бра́чный черто́гъ сн҃а твоегѡ̀ и҆ бг҃а на́шегѡ помога́еши.

Ра́дꙋйсѧ, ꙗ҆́кѡ въ ри́зꙋ непоро́чности и҆ чⷭ҇тоты̀ ѡ҆блещи́сѧ на́мъ спосо́бствꙋеши: ра́дꙋйсѧ, ꙗ҆́кѡ ста́ти на́мъ на стра́шнѣмъ сꙋдѣ̀ хрⷭ҇то́вѣ ѡ҆деснꙋ́ю є҆го̀ хода́тайствꙋеши.

Ра́дꙋйсѧ, ꙗ҆́кѡ бл҃гоꙋтро́бїе бж҃їе ѡ҆ прича́стїи на́съ къ ли́кꙋ и҆збра́нныхъ ᲂу҆молѧ́еши: ра́дꙋйсѧ, ꙗ҆́кѡ ᲂу҆́мъ на́шъ, ѡ҆мраче́нный небреже́нїемъ, свѣ́томъ свои́мъ ѡ҆зарѧ́еши.

Ра́дꙋйсѧ, ꙗ҆́кѡ голꙋби́нꙋ простотꙋ̀ и҆ а҆́гнчꙋ кро́тость стѧжа́ти на́мъ прїи́скреннѣ жела́еши: ра́дꙋйсѧ, ꙗ҆́кѡ самоѿверже́нїю и҆ ѿрече́нїю ѿ ѕлы́ѧ на́шеѧ во́ли прїѡбꙋчи́ти на́съ тщи́шисѧ.

Ра́дꙋйсѧ, ꙗ҆́кѡ младе́нческое неѕло́бїе дарова́ти на́мъ спосо́бствꙋеши: ра́дꙋйсѧ, ꙗ҆́кѡ хла́дное се́рдце на́ше мл҃твами воспламенѧ́ти на́мъ помога́еши.

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Конда́къ в҃і.

Блгⷣть прїѧ́ла є҆сѝ, влⷣчце, ѿ всемогꙋ́щагѡ гдⷭ҇а бг҃а ми́ловати бл҃гочєсти́выѧ ча̑да цр҃кве хрⷭ҇то́вы и҆ вразꙋмлѧ́ти нечести́выхъ сынѡ́въ є҆ѧ̀. Сегѡ̀ ра́ди, притека́юще под̾ держа́вный покро́въ твоеѧ̀ бл҃гости, ᲂу҆се́рднѡ мо́лимъ тѧ̀, влⷣчце: и҆зба́ви на́съ ѿ ᲂу҆хищре́нїй дꙋхѡ́въ ѕло́бы, разслаблѧ́ющихъ на́шѧ дꙋ́шꙋ и҆ тѣ́ло лѣ́ностїю и҆ нерадѣ́нїемъ, и҆ возбꙋдѝ на́съ ѿ сна̀ грѣхо́внагѡ, да бл҃года́рственнѡ вопїе́мъ бг҃ꙋ: А҆ллилꙋ́їа.

І҆́косъ в҃і.

Пою́ще твоѧ̑ чꙋдеса̀, бы̑вшаѧ въ дрє́внѧѧ и҆ настоѧ̑щаѧ времена̀, хва́лимъ тѧ̀, влⷣчце, ꙗ҆́кѡ живоно́сный и҆сто́чникъ блгⷣти и҆ неистощи́мꙋю чꙋде́съ рѣкꙋ̀, бе́зднꙋ бо млⷭ҇ти и҆ щедро́тъ дарова́ла є҆сѝ ро́дꙋ хрⷭ҇тїа́нскомꙋ ꙗ҆вле́нїемъ чⷭ҇тны́хъ і҆кѡ́нъ твои́хъ. Сегѡ̀ ра́ди и҆ мы̀, припа́дающе къ чⷭ҇тнѣ́й і҆кѡ́нѣ твое́й держа́внѣй, со ᲂу҆миле́нїемъ вопїе́мъ тѝ си́це:

Ра́дꙋйсѧ, цр҃кве нбⷭ҇ныѧ и҆ земны́ѧ ᲂу҆краше́нїе: ра́дꙋйсѧ, двⷭ҇тва чⷭ҇тны́й покро́ве и҆ ѡ҆гражде́нїе.

Ра́дꙋйсѧ, чⷭ҇тна́ѧ похвало̀ і҆ере́євъ бл҃гоговѣ́йныхъ: ра́дꙋйсѧ, свѣ́тлое прⷪ҇ро́ческое сбытїѐ.

Ра́дꙋйсѧ, всехва́льныхъ а҆пⷭ҇лѡвъ восхвале́нїе: ра́дꙋйсѧ, мо́лнїе, невѣ́рныхъ ᲂу҆страша́ющаѧ.

Ра́дꙋйсѧ, сла́вою чꙋде́съ твои́хъ вѣ́рныхъ мы̑сли ѡ҆зарѧ́ющаѧ: ра́дꙋйсѧ, печа́ль и҆ ско́рбь на́шꙋ въ ра́дость претворѧ́ющаѧ.

Ра́дꙋйсѧ, ꙗ҆́кѡ мо́лиши сн҃а твоего̀ и҆ бг҃а на́шего всѣ̑мъ на́мъ сп҃сти́сѧ: ра́дꙋйсѧ, ꙗ҆́кѡ твори́ши млⷭ҇ти всѣ̑мъ въ держа́вный тво́й покро́въ притека́ющымъ.

Ра́дꙋйсѧ, застꙋ́пнице всѣ́хъ сꙋ́щихъ въ ско́рбехъ и҆ болѣ́знехъ: ра́дꙋйсѧ, всѣ̑мъ съ вѣ́рою тебѣ̀ молѧ́щымсѧ полє́знаѧ да́рꙋющаѧ.

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Конда́къ г҃і.

Ѽ, всепѣ́таѧ мт҃и, держа́внаѧ влⷣчце! Прїимѝ ны́нѣ сїѐ ма́лое моле́нїе на́ше и҆ вели́чїѧ ра́ди бл҃гости твоеѧ̀ и҆ неизрече́нныхъ щедро́тъ твои́хъ, не помѧнѝ мно́жества грѣхѡ́въ на́шихъ, но и҆спо́лни во бл҃ги́хъ прошє́нїѧ на̑ша: да́рꙋй на́мъ всѧ̑ потрє́бнаѧ къ животꙋ̀ и҆ бл҃гоче́стїю, и҆зба́ви на́съ ѿ гла́да, болѣ́зней и҆ печа́ли, и҆ црⷭ҇твїѧ нбⷭ҇нагѡ наслѣ́дники всѣ́хъ сотворѝ, вѣ́рнѡ вопїю́щихъ бг҃ꙋ: А҆ллилꙋ́їа.

Се́й конда́къ глаго́ли три́жды, посе́мъ і҆́косъ а҃-й и҆ конда́къ а҃-й.

І҆́косъ а҃.

А҆́гг҃лѡмъ ра́дость прїи́мшаѧ, бл҃говоли́ла є҆сѝ, влⷣчце, возвѣсти́ти ста́рицѣ бл҃гочести́вѣй ра́дость ѡ҆ ꙗ҆вле́нїи і҆кѡ́ны твоеѧ̀ чⷭ҇тны́ѧ держа́вныѧ, ю҆́же и҆ ѡ҆брѣ́тше по ᲂу҆каза́нїю твоемꙋ̀, ꙗ҆́кѡ зна́менїе млⷭ҇ти бж҃їей къ на́мъ грѣ́шнымъ, благода́рственнѡ вопїе́мъ тѝ си́це:

Ра́дꙋйсѧ, во́ли гдⷭ҇ней та́йны на́мъ ѿкрыва́ющаѧ: ра́дꙋйсѧ, гнѣ́въ є҆гѡ̀ првⷣный, на ны̀ дви́жимый, ᲂу҆мѧгча́ющаѧ.

Ра́дꙋйсѧ, нечести́выхъ ѕловѣ́рїѧ ѡ҆бличе́нїе: ра́дꙋйсѧ, горды́ни и҆́хъ низложе́нїе.

Ра́дꙋйсѧ, вѣ́ры хрⷭ҇тїа́нскїѧ ᲂу҆твержде́нїе: ра́дꙋйсѧ, почита́нїѧ ст҃ы́хъ і҆кѡ́нъ ѡ҆сщ҃е́нїе.

Ра́дꙋйсѧ, ти́хое приста́нище сп҃се́нїѧ дꙋ́шъ на́шихъ: ра́дꙋйсѧ, всемлⷭ҇тиваѧ застꙋ́пнице на́ша ᲂу҆ прⷭ҇то́ла ст҃ы́ѧ трⷪ҇цы.

Ра́дꙋйсѧ, ѿ бѣ́дъ и҆ скорбе́й на́ше и҆збавле́нїе: ра́дꙋйсѧ, цр҃кве правосла́вныѧ ᲂу҆твержде́нїе.

Ра́дꙋйсѧ, ѕвѣздо̀ невече́рнѧгѡ свѣ́та, на́съ ѡ҆зарѧ́ющаѧ: ра́дꙋйсѧ, мт҃и свѣ́та, всѣ́хъ просвѣща́ющаѧ.

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Конда́къ а҃.

И҆збра́ннѣй ѿ всѣ́хъ родѡ́въ застꙋ́пницѣ ро́да хрⷭ҇тїа́нскагѡ, покро́вомъ своеѧ̀ бл҃гости покрыва́ющей странꙋ̀ на́шꙋ правосла́внꙋю, благода́рствєннаѧ пѣ̑нїѧ прино́симъ тѝ, влⷣчце, ѡ҆ ꙗ҆вле́нїи на́мъ чꙋ́дныѧ і҆кѡ́ны твоеѧ̀ держа́вныѧ. Ты́ же, ꙗ҆́кѡ всемлⷭ҇тиваѧ застꙋ́пница всѣ́хъ съ вѣ́рою къ тебѣ̀ притека́ющихъ, ѿ всѧ́кихъ на́съ бѣ́дъ свободѝ, да зове́мъ тѝ:

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Мл҃тва а҃.

Ѽ, мі́ра застꙋ́пнице, мт҃и всепѣ́таѧ! Со стра́хомъ, вѣ́рою и҆ любо́вїю припа́дающе пред̾ чⷭ҇тно́ю і҆кѡ́ною твое́ю держа́вною, ᲂу҆се́рднѡ мо́лимъ тѧ̀: не ѿвратѝ лица̀ твоегѡ̀ ѿ прибѣга́ющихъ къ тебѣ̀. Оу҆молѝ, млⷭ҇рдаѧ мт҃и свѣ́та, сн҃а твоего̀ и҆ бг҃а на́шего, сладча́йшаго гдⷭ҇а і҆и҃са хрⷭ҇та̀, да сохрани́тъ въ ми́рѣ странꙋ̀ на́шꙋ, да ᲂу҆тверди́тъ держа́вꙋ на́шꙋ въ бл҃годе́нствїи и҆ и҆зба́витъ на́съ ѿ междоꙋсо́бныѧ бра́ни, да ᲂу҆крѣпи́тъ ст҃ꙋ́ю цр҃ковь на́шꙋ правосла́внꙋю, и҆ непозы́блемꙋ соблюде́тъ ю҆̀ ѿ невѣ́рїѧ, раско́ла и҆ є҆ресе́й. Не и҆́мамы бо и҆ны́ѧ по́мощи, ра́звѣ тебє̀, пречⷭ҇таѧ дв҃о: ты̀ є҆сѝ всеси́льнаѧ хрⷭ҇тїа́нъ застꙋ́пница пред̾ бг҃омъ, првⷣный гнѣ́въ є҆гѡ̀ ᲂу҆мѧгча́ющаѧ. И҆зба́ви всѣ́хъ, съ вѣ́рою тебѣ̀ молѧ́щихсѧ, ѿ паде́нїй грѣхо́вныхъ, ѿ навѣ́та ѕлы́хъ человѣ̑къ, ѿ гла́да, ско́рбей и҆ болѣ́зней. Да́рꙋй на́мъ дꙋ́хъ сокрꙋше́нїѧ, смире́нїе се́рдца, чистотꙋ̀ помышле́нїй, и҆справле́нїе грѣхо́вныѧ жи́зни и҆ ѡ҆ставле́нїе согрѣше́нїй на́шихъ: да всѝ, бл҃года́рнѣ воспѣва́юще вели̑чїѧ твоѧ̑, сподо́бимсѧ нбⷭ҇нагѡ црⷭ҇твїѧ и҆ та́мѡ со всѣ́ми ст҃ы́ми просла́вимъ пречⷭ҇тно́е и҆ великолѣ́пое и҆́мѧ въ трⷪ҇цѣ сла́вимагѡ бг҃а: ѻ҆ц҃а̀, сн҃а и҆ ст҃а́гѡ дх҃а. А҆ми́нь.

Мл҃тва в҃.

Ѽ, держа́внаѧ влⷣчце прест҃а́ѧ бцⷣе, на ѡ҆б̾ѧ́тїихъ свои́хъ держа́щаѧ содержа́щаго всю̀ вселе́ннꙋю цр҃ѧ̀ нбⷭ҇наго! Благодари́мъ тѧ̀ за неизрече́нное млⷭ҇рдїе твоѐ, ꙗ҆́кѡ бл҃говоли́ла є҆сѝ ꙗ҆ви́ти на́мъ грѣ̑шнымъ и҆ недостѡ́йнымъ сїю̀ ст҃ꙋ́ю и҆ чꙋдотво́рнꙋю і҆кѡ́нꙋ твою̀ во дни̑ сїѧ̑ лꙋка̑выѧ и҆ лю̑тыѧ ꙗ҆́кѡ ви́хрь, ꙗ҆́кѡ бꙋ́рѧ вѣ́треннѧѧ наше́дшаѧ на странꙋ̀ на́шꙋ. Во дни̑ ᲂу҆ничиже́нїѧ на́шегѡ и҆ ᲂу҆коре́нїѧ, во дни̑ разоре́нїѧ и҆ порꙋга́нїѧ ст҃ы̑нь на́шихъ ѿ люде́й безꙋ́мныхъ, и҆́же не то́чїю въ се́рдцѣ, но и҆ ᲂу҆стна́ми де́рзостнѡ глаго́лютъ: нѣ́сть бг҃ъ. И҆ въ дѣ́лѣхъ сїѐ безбо́жїе показꙋ́ютъ. Благодари́мъ тѧ̀, застꙋ́пнице, ꙗ҆́кѡ призрѣ́ла є҆сѝ съ высоты̀ ст҃ы́ѧ своеѧ̀ на скѡ́рби на́шѧ и҆ го́ре ча̑дъ правосла́вныхъ, и҆ ꙗ҆́кѡ со́лнце свѣ́тлое, ᲂу҆веселѧ́еши и҆знемо́гшыѧ ѿ печа́ли ѻ҆чеса̀ на̑ша пресла́достнымъ зрѣ́нїемъ держа́внагѡ ѻ҆́браза твоегѡ̀. Ѽ пребл҃гослове́ннаѧ мт҃и бж҃їѧ, держа́внаѧ помо́щнице, крѣ́пкаѧ застꙋ́пнице! Бл҃годарѧ́ще тѧ̀ со стра́хомъ и҆ тре́петомъ, ꙗ҆́кѡ рабѝ непотре́бнїи, припа́даемъ тѝ со ᲂу҆миле́нїемъ, съ сокрꙋше́нїемъ серде́чнымъ и҆ со слеза́ми, и҆ мо́лимъ тѧ̀, и҆ стенѧ́ще вопїе́мъ тѝ: сп҃сѝ на́съ, сп҃сѝ! Помозѝ на́мъ, помозѝ! Потщи́сѧ: погиба́емъ! Сѐ живо́тъ на́шъ а҆́дꙋ прибли́жисѧ. Сѐ ѡ҆быше́дше ѡ҆быдо́ша на́съ грѣсѝ мнѡ́зи, бѣды̑ мнѡ́зи, вразѝ мнѡ́зи. Ѽ нбⷭ҇наѧ цр҃и́це! Ски́петромъ вла́сти твоеѧ̀ бж҃е́ственныѧ разсѣ́й, ꙗ҆́кѡ пра́хъ, ꙗ҆́кѡ ды́мъ, нечєсти́выѧ кѡ́зни врагѡ́въ на́шихъ ви́димыхъ и҆ неви́димыхъ: сокрꙋшѝ велерѣ̑чивыѧ помышлє́нїѧ и҆́хъ и҆ запретѝ и҆́мъ: и҆ ꙗ҆́кѡ мт҃и всѣ́хъ, на пꙋ́ть пра́вый и҆ бг҃оꙋго́дный наста́ви и҆́хъ. Вкоренѝ въ сердца̀ всѣ́хъ на́съ пра́вдꙋ, ми́ръ и҆ ра́дость ѡ҆ дс҃ѣ ст҃ѣ: водворѝ въ странѣ̀ на́шей тишинꙋ̀, бл҃годе́нствїе, безмѧте́жїе, любо́вь дрꙋ́гъ ко дрꙋ́гꙋ нелицемѣ́рнꙋю. Держа́вою твое́ю всеси́льною ᲂу҆держѝ, пречⷭ҇таѧ, пото́ки беззако́нїѧ, хотѧ́щыѧ потопи́ти зе́млю рꙋ́сскꙋю въ стра́шнѣй пꙋчи́нѣ свое́й. Поддержѝ на́съ сла́быхъ, малодꙋ́шныхъ, немощны́хъ и҆ ᲂу҆ны́лыхъ, ᲂу҆крѣпѝ, возста́ви и҆ сп҃сѝ: ꙗ҆́кѡ да под̾ держа́вою твое́ю всегда̀ храни́ми, пое́мъ и҆ велича́емъ пречⷭ҇тно́е и҆ великолѣ́пое и҆́мѧ твоѐ ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Список храмов с престольным праздником Державной иконы Божией Матери

Ико­на Бо­жи­ей Ма­те­ри, име­ну­е­мая «Дер­жав­ная», яви­ла се­бя рус­ско­му пра­во­слав­но­му на­ро­ду 2/15 мар­та 1917 го­да — в день от­ре­че­ния от пре­сто­ла им­пе­ра­то­ра Ни­ко­лая II, бу­ду­ще­го цар­ствен­но­го стра­сто­терп­ца, — в се­ле Ко­ло­мен­ском близ Моск­вы.
Некой кре­стьян­ке Ев­до­кии Адри­а­но­вой, жи­тель­ни­це де­рев­ни Пе­ре­рвы, бы­ло три­жды во сне от­кры­то, что есть по­за­бы­тый об­раз Бо­го­ро­ди­цы, через ко­то­рый от­ныне бу­дет яв­ле­но небес­ное по­кро­ви­тель­ство Ца­ри­цы Небес­ной рус­ско­му на­ро­ду. Она яс­но слы­ша­ла сло­ва: «Есть в се­ле Ко­ло­мен­ском боль­шая чер­ная ико­на, ее нуж­но взять, сде­лать крас­ной, пусть мо­лят­ся».
На­сто­я­тель хра­ма в Ко­ло­мен­ском, отец Ни­ко­лай Ли­ха­чев, к ко­то­ро­му об­ра­ти­лась Ев­до­кия, не стал пре­пят­ство­вать, и они вме­сте осмот­ре­ли все ико­ны, на­хо­див­ши­е­ся в церк­ви. Не най­дя ни­че­го по­хо­же­го в хра­ме, отец Ни­ко­лай пред­ло­жил по­смот­реть ико­ны в под­ва­ле церк­ви, по раз­ным при­чи­нам сло­жен­ные там, сре­ди ко­то­рых и вы­бра­ли са­мую боль­шую, по­кры­тую ве­ко­вой пы­лью. Очи­стив ико­ну от пы­ли, они к сво­е­му удив­ле­нию уви­де­ли изо­бра­же­ние Бо­жи­ей Ма­те­ри, си­дя­щей на троне. По ме­ре при­ве­де­ния ико­ны в по­ря­док об­на­ру­жи­лось, что Мла­де­нец-Хри­стос на ко­ле­нях Бо­жи­ей Ма­те­ри про­стер бла­го­слов­ля­ю­щую ру­ку. В од­ной ру­ке Вла­ды­чи­ца дер­жа­ла ски­петр, в дру­гой — дер­жа­ву (зна­ки цар­ской вла­сти над ми­ром), на гла­ве Ее бы­ла ко­ро­на, а на пле­чах — крас­ная ман­тия или пор­фи­ра. При необык­но­вен­но су­ро­вом ли­ке Бо­го­ма­терь на иконе име­ла цар­ствен­ный вид — все ука­зы­ва­ло на то, что Вла­ды­чи­ца от­ныне при­ни­ма­ет на се­бя осо­бое по­пе­че­ние о мно­го­стра­даль­ном рус­ском на­ро­де.
Адри­а­но­ва сра­зу при­зна­ла ви­ден­ную во сне ико­ну, а свя­щен­ник тот­час же от­слу­жил пе­ред об­ра­зом мо­ле­бен с ака­фи­стом.
Слух о вновь най­ден­ной иконе быст­ро рас­про­стра­нил­ся не толь­ко в се­ле Ко­ло­мен­ском; бо­го­моль­цы сте­ка­лись в цер­ковь Воз­не­се­ния из Моск­вы и дру­гих мест, по­лу­чая от Бо­жи­ей Ма­те­ри бла­го­дат­ную по­мощь. В «Сер­ги­ев­ских лист­ках» опи­са­но при­бы­тие Дер­жав­ной ико­ны Бо­жи­ей Ма­те­ри в Мар­фо-Ма­ри­ин­скую оби­тель в Москве, где ико­на бы­ла встре­че­на Ве­ли­кой кня­ги­ней Ели­са­ве­той Фе­о­до­ров­ной и дру­ги­ми сест­ра­ми с боль­шим тор­же­ством. Ико­ну для по­кло­не­ния во­зи­ли и в дру­гие церк­ви, а по вос­крес­ным и празд­нич­ным дням она оста­ва­лась в се­ле Ко­ло­мен­ском.
По неко­то­рым све­де­ни­ям, Дер­жав­ная ико­на Бо­жи­ей Ма­те­ри до 1812 го­да пре­бы­ва­ла в Воз­не­сен­ском жен­ском мо­на­сты­ре в Москве. Спа­сая ико­ну от На­по­лео­нов­ско­го раз­граб­ле­ния, ее спря­та­ли в се­ле Ко­ло­мен­ском и, по всей ве­ро­ят­но­сти, за­бы­ли там на 105 лет, по­ка она не яви­ла се­бя в по­ло­жен­ное вре­мя.
Зна­ме­на­тель­но, что свя­той об­раз был об­на­ру­жен в осо­бое вре­мя — в на­ча­ле рус­ско­го ли­хо­ле­тья. Цар­ствен­ный вид ико­ны, ски­петр и дер­жа­ва слов­но под­чер­ки­ва­ют, что Вла­ды­чи­ца при­ня­ла на Се­бя и опе­ку, и окорм­ле­ние вер­ных чад Церк­ви Рос­сий­ской. Зна­ме­на­тель­на и алая пор­фи­ра Бо­го­ма­те­ри, цвет ко­то­рой на­по­ми­на­ет цвет кро­ви...
Служ­ба и ака­фист Дер­жав­ной иконе Пре­свя­той Бо­го­ро­ди­цы со­став­ле­ны с уча­сти­ем Свя­тей­ше­го Пат­ри­ар­ха Ти­хо­на († 1925).
Ныне эта свя­тая ико­на на­хо­дит­ся в хра­ме Ка­зан­ской ико­ны Бо­жи­ей Ма­те­ри в Ко­ло­мен­ском, ку­да бы­ла воз­вра­ще­на 27 июля 1990 го­да.

См. фильм "Державная икона Божией Матери".