Акафист Пресвятой Богородице пред иконой «Игоревская»

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 18 июня (05 июня ст. ст.)

Не утвержден для общецерковного использования.

Конда́к 1.

Избра́нней Преве́чным Царе́м, Небесе́ и земли́ Цари́це, ро́да христиа́нскаго всеси́льней Засту́пнице похва́льная воспису́ем Ти́ раби́ Твои́, Богоро́дице; Ты́ же, я́ко иму́щая держа́ву непобеди́мую и милосе́рдие неизрече́нное, от вся́ких на́с бе́д свободи́ и от оби́дящих защити́, да зове́м Ти́: Ра́дуйся, Всеми́лостивая Влады́чице, стра́ждущих и оби́димых Засту́пнице.

И́кос 1.

А́нгелов и челове́ков Творе́ц и Созда́тель, ви́дя сострада́ние Твое́ и милосе́рдие к па́дшему челове́честву, дарова́ Тя́ ми́ру я́ко благу́ю Защи́тницу все́х оби́димых и стра́ждущих, да вси́, позна́вше Твое́ всемо́щное заступле́ние, зову́т такова́я:

Ра́дуйся, Ма́ти Све́та невече́рняго.

Ра́дуйся, раю́ сла́дости Небе́сныя.

Ра́дуйся, мо́ре милосе́рдия неистощи́мое, вся́ ско́рби на́ша омыва́ющее.

Ра́дуйся, исто́чниче ми́лости безконе́чныя, духо́вную жа́жду утоля́ющий.

Ра́дуйся, неду́гов душе́вных и теле́сных благода́тная Цели́тельнице.

Ра́дуйся, печа́льных милосе́рдная Уте́шительнице.

Ра́дуйся, в ско́рби вопию́щих ско́рая Услы́шательнице.

Ра́дуйся, гони́мых пра́вды ра́ди ми́лостивая Защи́тительнице.

Ра́дуйся, Всеми́лостивая Влады́чице, стра́ждущих и оби́димых Засту́пнице.

Конда́к 2.

Ви́дяще святу́ю ико́ну Твою́, Пресвята́я Де́во, от ле́т дре́вних чудесы́ Боже́ственными просла́вленную, со благогове́нием е́й покланя́емся и славосло́вим преблагослове́нное и́мя Твое́, взыва́я Бо́гу: Аллилу́иа.

И́кос 2.

Ра́зуму на́шему просвеще́ние свы́ше исхода́тайствуй, Пресвята́я Богоро́дице, я́коже ве́рному рабу́ Твоему́ страстоте́рпцу кня́зю И́горю, да и мы́, в ско́рбных обстоя́ниях пребыва́ющии, по́мощи Твоея́ прося́ще, тому́ в терпе́нии подража́ем, зову́ще такова́я:

Ра́дуйся, Попечи́тельнице неусыпа́ющая спасе́ния и́щущих.

Ра́дуйся, Вои́тельнице кре́пкая на вся́ враги́ ви́димыя и неви́димыя.

Ра́дуйся, покро́ве ши́рший о́блака, в напа́стех на́с покрыва́ющий.

Ра́дуйся, щи́те несокруши́мый, от стре́л вра́жиих сохраня́ющий.

Ра́дуйся, броне́ неодоли́мая, во все́х беда́х на́с защища́ющая.

Ра́дуйся, мечу́ неотрази́мый, вся́ поползнове́ния враго́в на́ших посеца́ющий.

Ра́дуйся, страстоте́рпца кня́зя И́горя всера́достное утеше́ние.

Ра́дуйся, все́х ве́рных непосты́дное упова́ние.

Ра́дуйся, Всеми́лостивая Влады́чице, стра́ждущих и оби́димых Засту́пнице.

Конда́к 3.

Си́ла Вы́шняго даде́ся Тебе́, Ма́ти Де́во, бы́ти все́х христиа́н Защи́тницею и Покрови́тельницею, да вси́ под кро́в Тво́й прибега́ющии, вели́кия и бога́тыя ми́лости от Тебе́ восприя́вше, вы́ну пою́т: Аллилу́иа.

И́кос 3.

Иму́ще ико́ну Твою́, Пречи́стая, я́ко зало́г Твоего́ к на́м благоволе́ния, в беда́х и напа́стех к Тебе́ прибега́ем, вопию́ще во умиле́нии такова́я:

Ра́дуйся, в ско́рбех и печа́лех Уте́шительнице.

Ра́дуйся, неча́янныя ра́дости Пода́тельнице.

Ра́дуйся, испо́лненная сострада́ния ко все́м стра́ждущим.

Ра́дуйся, прибе́жище наде́жды и утеше́ния лише́нным.

Ра́дуйся, печа́лей и боле́зней утоле́ние.

Ра́дуйся, все́х скорбя́щих ра́дование.

Ра́дуйся, не отверга́ющая моле́ния са́мых па́дших и отве́рженных.

Ра́дуйся, утеша́ющая убо́гих и все́ми оста́вленных.

Ра́дуйся, Всеми́лостивая Влады́чице, стра́ждущих и оби́димых Засту́пнице.

Конда́к 4.

Бу́рю вну́трь име́я помышле́ний сумни́тельных и зло́бных, нечести́вии мяте́жницы, распаля́ющеся зло́бою, вверго́ша сла́внаго кня́зя И́горя в по́руб, тща́щеся оте́ческаго насле́дия его́ лиши́ти; о́н же вся́ с кро́тостию претерпева́я, пред ико́ною Влады́чицы Не́ба и земли́ ско́рбь свою́ излива́юще, вопия́ше Сы́ну Ея́: Аллилу́иа.

И́кос 4.

Слы́шавше, ка́ко благове́рный кня́зь И́горь на вся́к де́нь пред ико́ною Твое́ю, Влады́чице, моля́ся, ско́рби многоразли́чныя и сме́рть му́ченическую безро́потно претерпе́в, Ца́рствия Небе́снаго сподо́бися, вси́ ве́рнии вседу́шно к заступле́нию Твоему́ притека́ют, жи́знь свою́ Твоему́ води́тельству вверя́я, со умиле́нием зову́ще:

Ра́дуйся, Ма́ти Милосе́рдия, сострада́ния испо́лненная.

Ра́дуйся, Стено́ несокруши́мая, врага́ми ве́ры правосла́вныя неодоле́нная.

Ра́дуйся, о все́х лише́нных утеше́ния усе́рдная Хода́таице.

Ра́дуйся, неви́нно стра́ждущих всеми́лостивая Покрови́тельнице.

Ра́дуйся, все́х с ве́рою к Тебе́ притека́ющих ско́ро от бе́д избавля́ющая.

Ра́дуйся, житие́ на́ше во бла́го устроя́ющая.

Ра́дуйся, ико́ною Твое́ю исто́чники чуде́с ве́лиих на́м явля́ющая.

Ра́дуйся, тьму́ лю́тых обстоя́ний от почита́ющих ю́ отгоня́ющая.

Ра́дуйся, Всеми́лостивая Влады́чице, стра́ждущих и оби́димых Засту́пнице.

Конда́к 5.

Боготе́чней звезде́ подо́бна яви́ся ико́на Твоя́, Богоро́дице, пред не́юже кня́зь И́горь моля́ся, утеше́ние от Тебе́ в ско́рбех свои́х обрета́ше. Мы́ же, подража́я ему́, все́ упова́ние на Тя́ возложи́вше, к Тебе́ припаде́м, вопию́ще Бо́гу: Аллилу́иа.

И́кос 5.

Ви́дяще пресла́вная чудеса́, от ико́ны Твоея́ И́горевския быва́емая, вси́ скорбя́щии и у́зами тя́жких жите́йских обстоя́ний обремене́ннии к Твоему́ заступле́нию прибега́ют, о Всеми́лостивая Влады́чице, и, в печа́лех утеше́ние, в боле́знех исцеле́ние и скорбе́й на ра́дость преложе́ние от Тебе́ прие́мля, со умиле́нием вопию́т такова́я:

Ра́дуйся, зна́меньми непостижи́мыми моля́щихся Ти́ ободря́ющая.

Ра́дуйся, ма́терними щедро́тами прибега́ющих к Тебе́ посеща́ющая.

Ра́дуйся, ключу́ воды́ живы́я, сострада́ния испо́лненный.

Ра́дуйся, милосе́рдия исто́чниче, жа́ждущим утеше́ние излива́ющий.

Ра́дуйся, во вся́ком обстоя́нии наде́жное прибе́жище.

Ра́дуйся, в ско́рбех пребыва́ющим неисчерпа́емое ми́лости сокро́вище.

Ра́дуйся, стра́ждущих пра́вды ра́ди отра́до.

Ра́дуйся, оби́димых и угнете́нных Засту́пнице.

Ра́дуйся, Всеми́лостивая Влады́чице, стра́ждущих и оби́димых Засту́пнице.

Конда́к 6.

Пропове́дницы благосты́ни Твоея́ яви́шася вси́ притека́ющии к цельбоно́сней ико́не Твое́й, Влады́чице, не отри́нула бо еси́ никого́же, в те́плей моли́тве ру́це свои́ к не́й простира́ющих, да позна́вше ми́лость Твою́, благода́рственно возопию́т Бо́гу: Аллилу́иа.

И́кос 6.

Возсия́ неизрече́нная благода́ть от ди́внаго о́браза Твоего́, Пречи́стая, к нему́же вси́ в ско́рбех, печа́лех и боле́знех обрета́ющиися прибега́ют, си́х же изба́вльшеся, вопию́т Тебе́ такова́я:

Ра́дуйся, во смире́нии нести́ кре́ст сво́й на́с науча́ющая.

Ра́дуйся, в терпе́нии скорбе́й тве́рдо укрепля́ющая.

Ра́дуйся, от поги́бели и отча́яния спаса́ющая.

Ра́дуйся, безчи́сленныя щедро́ты все́м подаю́щая.

Ра́дуйся, в стяжа́нии Ца́рствия Христо́ва смы́сл жи́зни полага́ющая.

Ра́дуйся, и́щущим пути́ Христо́ва стези́ спасе́ния указу́ющая.

Ра́дуйся, ше́ствующих ско́рбным путе́м, веду́щим в Ца́рствие Небе́сное, укрепля́ющая.

Ра́дуйся, непра́ведно гони́мых и оби́димых защища́ющая.

Ра́дуйся, Всеми́лостивая Влады́чице, стра́ждущих и оби́димых Засту́пнице.

Конда́к 7.

Хотя́ Всеми́лостивый Госпо́дь яви́ти Свою́ Боже́ственную любо́вь к на́м, недосто́йным, дарова́ на́м Твою́, Богома́ти, ико́ну, да ви́дящии чудеса́, от нея́ быва́емая, вси́ лю́дие с ве́рою и умиле́нием взыва́ют: Аллилу́иа.

И́кос 7.

Но́вая сокро́вищница Боже́ственныя благода́ти яви́ся на́м ико́на Твоя́, Пресвята́я Де́во, пред не́юже святы́й кня́зь И́горь, сме́ртнаго своего́ часа́ ожида́я, предстоя́ со слеза́ми, та́ко моля́шеся: «Го́споди, при́зри на не́мощь мою́, да, упова́я на Тя́, претерплю́ вся́; благодарю́ Тя́, я́ко смири́л мя́ еси́; изми́ мя́ от ми́ра сего́ мяте́жнаго и мра́чнаго в Тво́й све́т». Мы́ же, дивя́ся неизрече́нному милосе́рдию Бо́жию, неви́нным страда́льцем Тобо́ю явля́емому, воспева́ем си́це:

Ра́дуйся, оби́димых усе́рдная Засту́пнице.

Ра́дуйся, во все́х ско́рбех ми́лостивая Сострада́тельнице.

Ра́дуйся, от ве́чныя поги́бели ве́рных избавля́ющая.

Ра́дуйся, пра́ведный гне́в Бо́жий Твои́м моле́нием ско́ро утоля́ющая.

Ра́дуйся, утеше́ние и ско́рую по́мощь ми́лостиво подаю́щая.

Ра́дуйся, наде́жду иму́щих на Тя́ никогда́же посрамля́ющая.

Ра́дуйся, те́плая о на́с пред Бо́гом Моли́твеннице.

Ра́дуйся, о все́х по́мощи у Тебе́ прося́щих неусыпа́ющая пред Ни́м Хода́таице.

Ра́дуйся, Всеми́лостивая Влады́чице, стра́ждущих и оби́димых Засту́пнице.

Конда́к 8.

Стра́нно е́сть неве́рующим ви́дети, ка́ко вси́ оби́димыя и пра́вды ра́ди гони́мыя к заступле́нию Богома́тери прибега́я, в ско́рбех и печа́лех утеше́ние и от все́х злы́х обстоя́ний избавле́ние Ея́ всеси́льным хода́тайством обрета́ют, вопию́ще Бо́гу: Аллилу́иа.

И́кос 8.

Вся́ в вы́шних пребыва́еши, Влады́чице, но и на́с, ни́жних, ника́коже отступа́еши, я́ко Сама́ на земли́ ско́рби мно́гия претерпе́ла еси́; сего́ ра́ди все́м стра́ждущим помога́еши и печа́лей на ра́дость преложе́ние на́м да́руеши, пою́щим:

Ра́дуйся, все́х немощны́х и стра́ждущих Покрови́тельнице.

Ра́дуйся, И́стины Христо́вы и́щущих Наста́внице.

Ра́дуйся, подвиза́ющихся за пра́вду до́брая Вои́тельнице.

Ра́дуйся, творя́щих беззако́ние гро́зная Обличи́тельнице.

Ра́дуйся, живоно́сный исто́чниче, и́стины взыску́ющих напоя́ющий.

Ра́дуйся, кла́дезю прохла́дный, жа́жду пра́вды утоля́ющий.

Ра́дуйся, кни́го, та́йны Ца́рствия Бо́жия ве́рным открыва́ющая.

Ра́дуйся, ле́ствице, в го́рния оби́тели на́с возводя́щая.

Ра́дуйся, Всеми́лостивая Влады́чице, стра́ждущих и оби́димых Засту́пнице.

Конда́к 9.

Вся́каго естества́ а́нгельскаго превы́шши еси́, Богоро́дице Де́во, честне́йшая Херуви́м и сла́внейшая без сравне́ния Серафи́м, предстоя́щи бо пред Престо́лом Сы́на Твоего́ на Небеси́, вы́ну мо́лишися о все́х вопию́щих Ему́: Аллилу́иа.

И́кос 9.

Вети́я многовеща́нныя су́етнаго и жестокосе́рднаго ве́ка сего́, я́ко ры́бы безгла́сныя, зри́м о Тебе́, Богоро́дице, недоуме́ют бо, ка́ко по досто́инству похвали́ти вся́ чудеса́ Твоя́, явле́нныя ро́ду на́шему от святы́я ико́ны Твоея́. Мы́ же, к чудотво́рному Твоему́ о́бразу припа́дающе и все́ упова́ние на Тя́ возложи́вше, ве́рно вопие́м:

Ра́дуйся, любве́ Бо́жия к челове́ком проявле́ние.

Ра́дуйся, гони́мых пра́вды ра́ди защище́ние.

Ра́дуйся, неви́нных страда́льцев укрепле́ние.

Ра́дуйся, оби́дящих и беззако́ния творя́щих наказа́ние.

Ра́дуйся, ка́ющихся гре́шников проще́ние.

Ра́дуйся, грехо́в и́х очище́ние.

Ра́дуйся, к Небе́сней пра́вде обраще́ние.

Ра́дуйся, к И́стине, И́же е́сть Христо́с, ве́рных приведе́ние.

Ра́дуйся, Всеми́лостивая Влады́чице, стра́ждущих и оби́димых Засту́пнице.

Конда́к 10.

Спаси́тельное прибе́жище в ско́рбех и напа́стех Ты́ еси́, Пресвята́я Де́во; те́мже испроси́ у Сы́на Твоего́ и Бо́га на́шего ми́лости на́м, гре́шным, со умиле́нием пою́щим Ему́: Аллилу́иа.

И́кос 10.

Стена́ еси́ неруши́мая оби́димым и пра́вды ра́ди гони́мым, Богоро́дице Де́во, и все́м к заступле́нию Твоему́ прибега́ющим, и́бо Небесе́ и земли́ Творе́ц устро́и Тя́, Пречи́стая, все́лься во утро́бе Твое́й, и вся́ приглаша́ти Тебе́ научи́:

Ра́дуйся, Ма́ти Бо́га Вы́шняго.

Ра́дуйся, Благослове́нная в жена́х.

Ра́дуйся, к Небе́сным сокро́вищам у́м на́ш возводя́щая.

Ра́дуйся, страда́льцев благода́тным утеше́нием венча́ющая.

Ра́дуйся, разсла́бленным ско́рое возставле́ние подаю́щая.

Ра́дуйся, от сме́ртнаго губи́тельства на́с спаса́ющая.

Ра́дуйся, земна́го устрое́ния лише́нных Небе́снаго черто́га Созида́тельнице.

Ра́дуйся, в Ца́рствие Небе́сное ве́рная на́м Путеводи́тельнице.

Ра́дуйся, Всеми́лостивая Влады́чице, стра́ждущих и оби́димых Засту́пнице.

Конда́к 11.

Пе́ние всеумиле́нное приими́ от на́с, Небе́сная Цари́це, и моли́тву, приноси́мую Тебе́, ско́ро услы́ши: к Тебе́ бо в беда́х и напа́стех прибега́ем и со слеза́ми мо́лим: утоли́ на́ша печа́ли и приими́ моли́твы ра́б Твои́х, о Тебе́ вопию́щих: Аллилу́иа.

И́кос 11.

Светоприе́мную свещу́ во мра́це ско́рбнаго жития́ на́шего зри́м честну́ю ико́ну Твою́, Богоро́дице Де́во, пред не́юже благове́рный кня́зь И́горь на вся́к де́нь усе́рдно моля́шеся, я́ко насле́дие сла́вное, сию́ на́м оста́ви, зва́нии почита́ющим Тя́ си́ми:

Ра́дуйся, во вся́кой ско́рби ви́дети во́лю Бо́жию, вся́ ко бла́гу устроя́ющую, науча́ющая.

Ра́дуйся, ко спасе́нию на́с вразумля́ющая и направля́ющая.

Ра́дуйся, ско́рби на́ша ко бла́гу обраща́ющая.

Ра́дуйся, смы́сл жи́зни ра́зумом Христо́вым просвеща́ющая.

Ра́дуйся, пла́чущих наде́ждою утеша́ющая.

Ра́дуйся, ра́ны грехо́вныя врачу́ющая.

Ра́дуйся, поноше́ния Христа́ ра́ди терпя́щих в Ца́рствие Небе́сное управля́ющая.

Ра́дуйся, скорбя́ми, я́ко би́сером многоце́нным, черто́г Небе́сный ве́рным украша́ющая.

Ра́дуйся, Всеми́лостивая Влады́чице, стра́ждущих и оби́димых Засту́пнице.

Конда́к 12.

Благода́ть Боже́ственную испроси́ на́м у Сы́на Твоего́ и Бо́га, о Всеблага́я, простри́ на́м ру́ку по́мощи, отжени́ от на́с вся́каго врага́ и супоста́та, умири́ на́шу жи́знь, покры́й на́с любо́вию Твое́ю и сподо́би в жи́зни се́й и в Ца́рствии Небе́снем воспева́ти Творцу́ и Созда́телю на́шему: Аллилу́иа.

И́кос 12.

Пою́ще Твоя́ неизрече́нныя ми́лости к па́дшему и в ско́рбех погиба́ющему ро́ду челове́ческому явля́емыя, хва́лим Тя́ вси́, я́ко одушевле́нный хра́м, Богоро́дице, во Твое́й бо всели́вся утро́бе вся́ содержа́яй руко́ю Госпо́дь всю́ Тя́ освяти́ и просла́ви, науча́я вопи́ти Тебе́ все́х:

Ра́дуйся, неча́янное все́х бла́г исполне́ние.

Ра́дуйся, благода́ти явле́ние.

Ра́дуйся, милосе́рдие Бо́жие разуме́ти на́с науча́ющая.

Ра́дуйся, к де́лом милосе́рдия и на́с возбужда́ющая.

Ра́дуйся, млеко́м Свои́м пита́вшая Пита́теля вселе́нныя.

Ра́дуйся, руко́ю Свое́ю носи́вшая Нося́щаго вся́.

Ра́дуйся, во обстоя́нии пребыва́ющих моле́ния прие́млющая.

Ра́дуйся, от вся́кия ско́рби и печа́ли все́х избавля́ющая.

Ра́дуйся, Всеми́лостивая Влады́чице, стра́ждущих и оби́димых Засту́пнице.

Конда́к 13.

О Всепе́тая Ма́ти, ро́ждшая все́х святы́х Святе́йшее Сло́во! Ны́нешнее на́ше приими́ приноше́ние и от вся́кия ско́рби на́с изба́ви, от все́х бе́д и печа́лей спаси́, от оби́дящих защити́ и все́х бла́г испо́лни, о Тебе́ вопию́щих Бо́гу: Аллилу́иа.

Этот конда́к чита́ется три́жды, зате́м и́кос 1-й и конда́к 1-й.

И́кос 1.

А́нгелов и челове́ков Творе́ц и Созда́тель, ви́дя сострада́ние Твое́ и милосе́рдие к па́дшему челове́честву, дарова́ Тя́ ми́ру я́ко благу́ю Защи́тницу все́х оби́димых и стра́ждущих, да вси́, позна́вше Твое́ всемо́щное заступле́ние, зову́т такова́я:

Ра́дуйся, Ма́ти Све́та невече́рняго.

Ра́дуйся, раю́ сла́дости Небе́сныя.

Ра́дуйся, мо́ре милосе́рдия неистощи́мое, вся́ ско́рби на́ша омыва́ющее.

Ра́дуйся, исто́чниче ми́лости безконе́чныя, духо́вную жа́жду утоля́ющий.

Ра́дуйся, неду́гов душе́вных и теле́сных благода́тная Цели́тельнице.

Ра́дуйся, печа́льных милосе́рдная Уте́шительнице.

Ра́дуйся, в ско́рби вопию́щих ско́рая Услы́шательнице.

Ра́дуйся, гони́мых пра́вды ра́ди ми́лостивая Защи́тительнице.

Ра́дуйся, Всеми́лостивая Влады́чице, стра́ждущих и оби́димых Засту́пнице.

Конда́к 1.

Избра́нней Преве́чным Царе́м, Небесе́ и земли́ Цари́це, ро́да христиа́нскаго всеси́льней Засту́пнице похва́льная воспису́ем Ти́ раби́ Твои́, Богоро́дице; Ты́ же, я́ко иму́щая держа́ву непобеди́мую и милосе́рдие неизрече́нное, от вся́ких на́с бе́д свободи́ и от оби́дящих защити́, да зове́м Ти́: Ра́дуйся, Всеми́лостивая Влады́чице, стра́ждущих и оби́димых Засту́пнице.

Моли́тва.

К кому́ воззову́, Влады́чице, к кому́ прибе́гну в печа́ли мое́й? К кому́ принесу́ сле́зы и воздыха́ния моя́, а́ще не к Тебе́, Цари́це Небесе́ и земли́? Кто́ исто́ргнет мя́ от ти́ны грехо́в и беззако́ний, а́ще не Ты́, о Ма́ти Живота́, Засту́пнице и Прибе́жище ро́да челове́ческаго? Услы́ши стена́ние мое́, уте́ши мя́ и поми́луй в го́рести мое́й, защити́ в беда́х и напа́стех, изба́ви от озлобле́ний и скорбе́й, неду́гов и боле́зней и от вра́г ви́димых и неви́димых; умири́ вражду́ стужа́ющих мне́, да изба́влен бу́ду от клеветы́ и зло́бы челове́ческия; та́кожде от своея́ ми́ пло́ти гну́сных обы́чаев свободи́ мя́. Укры́й мя́ под се́нию ми́лости Твоея́, да обря́щу поко́й и ра́дость и от грехо́в очище́ние. Твоему́ ма́тернему заступле́нию себе́ вруча́ю: бу́ди мне́ Ма́ти и наде́жда, покро́в, и по́мощь, и заступле́ние, ра́дость и утеше́ние, и ско́рая во все́м Помо́щница. О чу́дная Влады́чице! Вся́к, притека́яй к Тебе́, без Твоея́ всеси́льныя по́мощи не отхо́дит. Сего́ ра́ди и а́з, недосто́йный, к Тебе́ прибега́ю, да изба́влен бу́ду от внеза́пныя и лю́тыя сме́рти, скре́жета зубна́го и ве́чнаго муче́ния, Небе́сное же Ца́рствие получи́ти сподо́блюся и Тебе́ во умиле́нии се́рдца реку́: Ра́дуйся, Ма́ти Бо́жия, Предста́тельница и Засту́пница на́ша усе́рдная, во ве́ки веко́в. Ами́нь.

Ис­то­рия ико­ны свя­за­на с па­мя­тью о свя­том ве­ли­ком кня­зе Иго­ре из ро­да Оль­го­ви­чей, в кре­ще­нии Ге­ор­гии, в ино­че­стве Гав­ри­и­ле, уби­том в Ки­е­ве в 1147 го­ду (па­мять 18 июня и 2 ок­тяб­ря по но­во­му сти­лю). Свя­той князь, во­вле­чён­ный про­тив сво­ей во­ли в са­мый центр меж­до­усоб­ной бра­ни, стал невин­ной жерт­вой нена­ви­сти ки­ев­лян к его стар­ше­му бра­ту – ве­ли­ко­му кня­зю Все­во­ло­ду. По­лу­чив по­сле смер­ти Все­во­ло­да в кня­же­ние го­род Ки­ев, князь Игорь вла­дел им все­го лишь две неде­ли, так как ки­ев­ские бо­яре сра­зу же при­зва­ли вра­гов ро­да Оль­го­ви­чей Мсти­сла­ви­чей с вой­ском.

Под Ки­е­вом про­изо­шла бит­ва меж­ду вой­ска­ми кня­зя Иго­ря и Изя­с­ла­ва Мсти­сла­ви­ча. Ки­ев­ские вой­ска в раз­гар сра­же­ния пре­да­ли Иго­ря и пе­ре­шли на сто­ро­ну Изя­с­ла­ва. Че­ты­ре дня Игорь Оль­го­вич скры­вал­ся в бо­ло­тах око­ло Ки­е­ва. Там его взя­ли в плен, при­вез­ли в Ки­ев и по­са­ди­ли в по­руб – хо­лод­ный бре­вен­ча­тый сруб без окон и две­рей (чтобы осво­бо­дить уз­ни­ка, при­хо­ди­лось его от­ту­да «вы­ру­бать»).

В по­ру­бе мно­го­стра­даль­ный князь тя­же­ло за­бо­лел. Ду­мая, что он умрёт, про­тив­ни­ки кня­зя раз­ре­ши­ли «вы­ру­бить» его из за­то­че­ния и по­стричь в схи­му в Ки­ев­ском Фе­о­до­ров­ском мо­на­сты­ре. Но князь вы­здо­ро­вел и, остав­шись ино­ком мо­на­сты­ря, про­во­дил вре­мя в сле­зах и мо­лит­ве.

Но не про­шло и го­да, как взбун­то­вав­ша­я­ся чернь ре­ши­ла рас­пра­вить­ся с кня­зем-ино­ком. Мит­ро­по­лит и ду­хо­вен­ство ста­ра­лись вра­зу­мить и оста­но­вить ки­ев­лян. Пра­вив­ший в Ки­е­ве князь Изя­с­лав Мсти­сла­вич и осо­бен­но его брат князь Вла­ди­мир пы­та­лись предот­вра­тить бес­смыс­лен­ное кро­во­про­ли­тие и спа­сти свя­то­го му­че­ни­ка, но са­ми под­верг­лись опас­но­сти со сто­ро­ны оже­сто­чён­ной тол­пы.

Вос­став­шие во­рва­лись в храм во вре­мя Бо­же­ствен­ной ли­тур­гии, схва­ти­ли мо­лив­ше­го­ся пред ико­ной Бо­жи­ей Ма­те­ри Иго­ря и по­та­щи­ли его на рас­пра­ву. Так по­гиб без­вин­ный му­че­ник, свя­той князь Игорь. Ико­на, пе­ред ко­то­рой свя­той мо­лил­ся пе­ред страш­ной смер­тью, с тех пор ста­ла на­зы­вать­ся Иго­рев­ской.

Вско­ре Иго­рев­ская ико­на Пре­свя­той Бо­го­ро­ди­цы ста­ла по­чи­тать­ся как чу­до­твор­ная и бы­ла по­ме­ще­на близ цар­ских врат в при­де­ле свя­то­го апо­сто­ла Иоан­на Бо­го­сло­ва в Успен­ском со­бо­ре Ки­е­во-Пе­чер­ской Лав­ры. Во вре­мя ок­ку­па­ции Ки­е­ва в 1941 го­ду ико­на бес­след­но ис­чез­ла.