Акафист Пресвятой Богородице пред иконой «Иверская»

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 25 февраля (12 февраля ст. ст.); 26 октября (13 октября ст. ст.)

Конда́к 1.

Взбра́нной Воево́де, Влады́чице на́шей Богоро́дице, похва́льная пе́ния прино́сим Ти́ раби́ Твои́, я́ко прише́ствием честна́го о́браза Твоего́ стяжа́вшии щи́т кре́пкий, сте́ну необори́мую и стра́жа неусы́пна. Ты́ же, я́ко иму́щая держа́ву непобеди́мую, покры́й и защити́ на́с, Влады́чице, от все́х враго́в ви́димых и неви́димых и изба́ви от вся́каго вре́да, душе́внаго и теле́снаго, да зове́м Ти́:

Ра́дуйся, блага́я Врата́рнице, две́ри ра́йския ве́рным отверза́ющая.

И́кос 1.

А́нгел предста́тель по́слан бы́сть рещи́ Богоро́дице, егда́ паде́ Е́й жре́бий апо́стольскаго служе́ния в земли́ И́верстей: «Не разлуча́йся Иерусали́ма, жре́бий же, Тебе́ па́дший, просвети́тся в после́дния дни́, Ты́ же и́маши потруди́тися в земли́, ю́же Тебе́ Бо́г изво́лит». Те́мже [зове́м Ти́]:

Ра́дуйся, Е́юже Ева́нгелие благовести́тся; ра́дуйся, Е́юже и́дольская пре́лесть упраздни́тся.

Ра́дуйся, Е́юже вла́сть кня́зя тмы́ разруши́тся; pа́дуйся, Е́юже Ца́рство Христо́во утверди́тся.

Ра́дуйся, па́дших во тму́ идолослуже́ния к све́ту Ева́нгелия воззва́ние; ра́дуйся, от ра́бства диа́волу в свобо́ду сла́вы ча́д Бо́жиих приведе́ние.

Ра́дуйся, гото́вая служи́тельнице Сы́на Своего́ и Бо́га; ра́дуйся, послуша́нием преслуша́ние Е́вы исцеля́ющая.

Ра́дуйся, высото́ доброде́телей; ра́дуйся, глубино́ смиренному́дрия.

Ра́дуйся, Е́юже неве́рнии познаю́т Творца́; ра́дуйся, Е́юже ве́рнии усыновля́ются Отцу́.

Ра́дуйся, блага́я Врата́рнице, две́ри ра́йския ве́рным отверза́ющая.

Конда́к 2.

Ви́дящи Свята́я Де́ва ди́вное и но́вое о Себе́ промышле́ние Бо́жие, я́ко раба́ Госпо́дня, при́сно гото́вая твори́ти во́лю Его́, возопи́: Аллилу́ия.

И́кос 2.

Ра́зум недоразумева́емый глаго́ла а́нгельскаго разу́мен Тебе́, Пречи́стая, творя́ Госпо́дь, упра́ви ше́ствие Твое́ к горе́ Афо́нстей, иде́же пропове́дася Тобо́ю Ева́нгелие, и та́ко яви́ся жре́бий Тво́й. Мы́ же ра́достно вопие́м:

Ра́дуйся, освяти́вшая Афо́н Свои́м прише́ствием; ра́дуйся, низложи́вшая та́мо и́долов.

Ра́дуйся, насади́вшая та́мо ве́ру и́стинную; ра́дуйся, неве́рие отгна́вшая.

Ра́дуйся, в жре́бий Себе́ го́ру сию́ избра́вшая; ра́дуйся, благода́ть сему́ ме́сту обеща́вшая.

Ра́дуйся, ве́рным, живу́щим в не́й, пода́тельнице земны́х бла́г; ра́дуйся, спору́чнице ве́чнаго и́х спасе́ния.

Ра́дуйся, те́плая хода́таице о живу́щих в жре́бии Твое́м; ра́дуйся, все́х враго́в и́х устраше́ние.

Ра́дуйся, ми́лость Сы́на Своего́ до сконча́ния ве́ка ме́сту сему́ обеща́вшая; ра́дуйся, благода́ть Его́ неотсту́пною бы́ти предре́кшая.

Ра́дуйся, блага́я Врата́рнице, две́ри ра́йския ве́рным отверза́ющая.

Конда́к 3.

Си́ла Вы́шняго заступле́нием Богома́тере осени́ Святу́ю Го́ру, и удо́лия и де́бри ея́, я́ко село́ простра́нное показа́, все́м в и́ноческой жи́зни хотя́щим жа́ти спасе́ние, внегда́ пе́ти си́це: Аллилу́ия.

И́кос 3.

Име́я промышле́ние о жре́бии Свое́м, лю́дех И́верския земли́, устро́ила еси́ в ме́сте, иде́же Сама́ к Афо́ну приста́ла еси́, оби́тель ро́ду и́х, в ти́хое приста́нище и́щущим спасе́ния, хотя́ дарова́ти е́й в щи́т и огражде́ние ико́ну Свою́, да вси́ взыва́ют:

Ра́дуйся, посла́вшая пропове́дницу Ева́нгелия в зе́млю И́верскую; ра́дуйся, обрати́вшая сию́ страну́ от пре́лести и́дольской к све́ту Христо́ву.

Ра́дуйся, о́трасли неувяда́емыя розго́, ди́вную лозу́ Ни́не дарова́вшая; ра́дуйся, от нея́ произрасти́вшая гро́здие чуде́с и благи́я ве́ры.

Ра́дуйся, са́д духо́вный на Афо́не насади́вшая; ра́дуйся, струю́ из него́ просвеще́ния духо́внаго стране́ И́верстей источи́вшая.

Ра́дуйся, Евфи́мия златослове́сныя уста́; ра́дуйся, Торни́кия непобеди́мая кре́посте.

Ра́дуйся, царе́й благочести́вых укрепле́ние; ра́дуйся, и́ноков огражде́ние.

Ра́дуйся, ти́хое приста́нище и́щущих спасе́ния; ра́дуйся, ве́чный поко́й и́м уготовля́ющая.

Ра́дуйся, блага́я Врата́рнице, две́ри ра́йския ве́рным отверза́ющая.

Конда́к 4.

Бу́рю вну́трь име́я помышле́ний сумни́тельных, честна́я вдови́ца, я́же в Нике́и, смяте́ся, зря́ копие́м во́ина иконобо́рца прободе́ну святу́ю и чти́мую ико́ну Богома́тере и а́бие источи́вшу кро́вь и, стра́хом обдержи́ма, да не пору́гана бу́дет свята́я ико́на, с моли́твою слезоточа́щи вве́рже в мо́ре. Уви́дев же ю́ пря́мо верху́ воды́ пу́ть творя́щу и теку́щу к за́паду, возопи́ с весе́лием: Аллилу́ия.

И́кос 4.

Ви́деша и́ноцы Святы́я Горы́ я́вльшийся в мо́ри я́ко пла́мень, я́ко сто́лп о́гнен, его́же ве́рх досяза́ше небеси́, я́ко со́лнце сия́ющее, и в нощи́ притеко́ша к кра́ю мо́ря и, ви́девше святу́ю ико́ну Богома́тере, по мо́рю носи́мую си́лою свы́ше, возопи́ша Благода́тней:

Ра́дуйся, купино́, Законополо́жником предзри́мая; ра́дуйся, сто́лпе о́гненный, наставля́яй су́щия во тме́.

Ра́дуйся, ле́ствице, досяза́ющая до небе́с, е́юже сни́де Бо́г; ра́дуйся, мо́сте, преводя́й су́щих от земли́ на не́бо.

Ра́дуйся, заре́ та́инственнаго дне́; ра́дуйся, звездо́, явля́ющая Со́лнце.

Ра́дуйся, Све́т неизрече́нный роди́вшая; ра́дуйся, е́же ка́ко ни еди́наго же научи́вшая.

Ра́дуйся, облече́нная в со́лнце, сия́ющая благода́тию и сла́вою все́й вселе́нней; ра́дуйся, мо́лние, ду́ши просвеща́ющая и ве́рных смы́слы озаря́ющая.

Ра́дуйся, све́тлосте, во тме́ светя́щая; ра́дуйся, я́ко многосве́тлое возсиява́еши просвеще́ние.

Ра́дуйся, блага́я Врата́рнице, две́ри ра́йския ве́рным отверза́ющая.

Конда́к 5.

Боготе́чную ико́ну Свою́ да́ти хотя́ И́верстей оби́тели, рекла́ еси́, Богома́ти, преподо́бному Гаврии́лу: «Иди́ с ли́ком и́ноков к бре́гу мо́ря, сни́ди в пучи́ну и приими́ ико́ну Мою́». О́н же, ве́рою и любо́вию окриля́емь, по воде́, а́ки по су́ху ходя́, прия́т ю́ во объя́тия своя́ и, дости́гши сокро́вища, ины́м недостижи́маго, в достоя́ние и́ноков ро́да своего́ и́верскаго, веселя́ся поя́ше: Аллилу́ия.

И́кос 5.

Ви́деша и́ноцы и́верстии мно́гажды ико́ну Богома́тере из хра́ма в верху́ вра́т монасты́рских на сте́ну гра́да незри́мою си́лою изнесе́нную, ужаса́хуся и стоя́ху, зову́ще к не́й такова́я:

Ра́дуйся, святу́ю ико́ну да́ти на́м изво́лившая; ра́дуйся, покро́в ю́ бы́ти на́м обеща́вшая.

Ра́дуйся, любо́вь Твою́ к оби́тели на́шей показа́вшая; ра́дуйся, благо́е о не́й промышле́ние яви́вшая.

Ра́дуйся, по́мощь на́ша в чужде́й стране́; ра́дуйся, в стра́нствии на́шем утеше́ние.

Ра́дуйся, Бо́жие к на́м благоволе́ние; ра́дуйся, на́ше к Бо́гу дерзнове́ние.

Ра́дуйся, сле́з на́ших избавле́ние; ра́дуйся, си́рых на́с защи́тнице.

Ра́дуйся, огражде́ние на́ше; ра́дуйся, еди́на ра́досте на́ша.

Ра́дуйся, блага́я Врата́рнице, две́ри ра́йския ве́рным отверза́ющая.

Конда́к 6.

Пропове́дника творя́ Гаврии́ла во́ли Своея́, рекла́ еси́ к нему́, Влады́чице: «Не приидо́х храни́ма бы́ти от ва́с, но да бу́ду А́з храни́тельница ва́ша не то́кмо в настоя́щем, но и в бу́дущем ве́це. Се́ даю́ ва́м зна́мение: до́ндеже зрите́ в монастыре́ ико́ну Мою́, не оскуде́ет ва́м благода́ть Сы́на Моего́ и ми́лость», да вопию́т Ему́ вси́: Аллилу́ия.

И́кос 6.

Возсия́ ра́дость ве́лия слы́шавшим Твоя́, Богома́ти, обетова́ния, и Тебе́, небе́сней Врата́рнице, хра́м на врате́х оби́тели с весе́лием и́ноцы воздвиго́ша и возопи́ша та́ко:

Ра́дуйся, храни́тельнице на́ша в настоя́щем ве́це; ра́дуйся, предста́тельнице на́ша в бу́дущем.

Ра́дуйся, стра́ху Бо́жию на́с науча́ющая; ра́дуйся, на пу́ть доброде́тели наставля́ющая.

Ра́дуйся, дерзнове́ние на́ше и наде́ждо; ра́дуйся, упова́ние на́ше и покро́в.

Ра́дуйся, благоутро́бие Сы́на Своего́ к на́м преклони́вшая; ра́дуйся, благода́ть Его́ неоску́дно пребыва́ти с на́ми возвеща́ющая.

Ра́дуйся святу́ю ико́ну зало́гом ми́лости да́вшая; ра́дуйся, да́р чудоде́йствия е́й дарова́вшая.

Ра́дуйся, прило́г вся́каго зла́ от оби́тели отража́ющая; ра́дуйся, всему́ благо́му вхо́д отверза́ющая.

Ра́дуйся, блага́я Врата́рнице, две́ри ра́йския ве́рным отверза́ющая.

Конда́к 7.

Хотя́щу иногда́ злочести́вому Ами́ре оби́тель И́верскую разори́ти и ста́до и́ноков, та́мо собра́нное, разсе́яти, ско́ро позна́ кре́пкое оби́тели заступле́ние от Богома́тере, уви́дев корабли́ своя́ в пучи́не мо́ря погря́зшия и ра́тники изги́бшия. И прише́д со смире́нием, сребро́ и зла́то в оби́тель дая́ше, моли́твы прося́. И́ноцы же, ви́девше сия́, возопи́ша к Бо́гу: Аллилу́ия.

И́кос 7.

Но́выя и безчи́сленныя чудеса́ показа́ Богома́терь, в оби́тели оскуде́ние вина́, муки́ и еле́я восполня́ющи, бесны́я исцеля́я, хромы́м да́руя хожде́ние, слепы́м прозре́ние и вся́к неду́г врачу́я, да, ви́дяще чудеса́ сия́, воспева́ют Тебе́:

Ра́дуйся, Взбра́нная Воево́до, враги́ побежда́ющая; ра́дуйся, ско́рая на по́мощь призыва́ющим Тя́.

Ра́дуйся, не презира́ющая моле́ния на́шего; ра́дуйся, обеща́ния Своего́ не отступа́ющая.

Ра́дуйся, ско́рбь оби́тели в ра́дость претворя́ющая; ра́дуйся, оскуде́ние оби́тели восполня́ющая.

Ра́дуйся, слепы́х прозре́ние; ра́дуйся, хромы́х хожде́ние.

Ра́дуйся, все́х немощны́х цели́тельнице; ра́дуйся, все́х ско́рбных уте́шительнице.

Ра́дуйся, я́ко не престае́ши промышля́ющи и спаса́ющи на́с; ра́дуйся, я́ко от толи́ких бе́д избавля́еши на́с.

Ра́дуйся, блага́я Врата́рнице, две́ри ра́йския ве́рным отверза́ющая.

Конда́к 8.

Стра́нно покрыва́емую от ико́ны Богома́тере оби́тель И́верскую слы́шав патриа́рх Ни́кон, вожделе́ и Росси́йстей стране́ благода́ти Ея́ стяжа́ти прича́стие, сего́ ра́ди, созда́в оби́тель в че́сть сла́внаго о́браза, со тща́нием испроси́ изображе́ние чудотво́рнаго о́браза Богома́тере, да, покро́вом Ея́ защища́еми, вопию́т Бо́гу: Аллилу́ия.

И́кос 8.

Вся́ су́щи в вы́шних, но и ни́жних не отступа́я, благоизво́лила еси́, Богома́ти, я́коже дре́вле Анто́нию дарова́ся благослове́ние горы́ Афо́нския на утвержде́ние оби́тели Пече́рския, дарова́ти и но́вой оби́тели в стране́ Росси́йстей Свою́ благода́ть, е́юже благослови́ла еси́ Афо́н, в подо́бии честна́го о́браза Твоего́. Те́мже взыва́ем Ти́:

Ра́дуйся, страны́ Росси́йския покро́ве, ши́рший о́блака; ра́дуйся, правосла́вныя ве́ры в не́й огражде́ние и утвержде́ние.

Ра́дуйся, Правосла́вныя Це́ркве непоколеби́мый сто́лпе; ра́дуйся, ересе́й и раско́лов обличе́ние.

Ра́дуйся, све́тлыми луча́ми чудотво́рных ико́н всю́ страну́ озаря́ющая; ра́дуйся, да́ры исцеле́ний и ми́лостей от ни́х источа́ющая.

Ра́дуйся, ски́птры царе́й на́ших утвержде́ние; ра́дуйся, враго́в устраше́ние.

Ра́дуйся, святи́телей весе́лие; ра́дуйся, иере́ев похвало́.

Ра́дуйся, и́ноков наста́внице; ра́дуйся, всего́ ро́да на́шего спасе́ние.

Ра́дуйся, блага́я Врата́рнице, две́ри ра́йския ве́рным отверза́ющая.

Конда́к 9.

Вся́ко тща́ние иму́ще о написа́нии честна́го о́браза ми́лостивыя Врата́рницы, со́нм по́стников и́верских моле́бная пе́ния соверша́ет, водо́ю от чу́дныя ико́ны омыва́ет дску́, на не́йже и́мать изобрази́тися честны́й о́браз, и преподо́бнаго Иамвли́ха освяща́ет, и́же подвиза́вся в посте́, моли́тве и бде́нии со все́ю бра́тиею, списа́ ва́пы, свято́ю водо́ю и моща́ми освяще́нными, честно́е изображе́ние Богома́тере, вы́ну моля́ся и вопия́ Бо́гу: Аллилу́ия.

И́кос 9.

Вити́я многовеща́нныя, я́ко ры́бы безгла́сныя, ви́дим о Тебе́, Богоро́дице, недоуме́ют бо, ка́ко по досто́инству похвали́ти вся́ чудеса́ Твоя́, явле́нная ро́ду на́шему от святы́я Твоея́ ико́ны: еще́ бо на пути́ в Росси́йскую страну́ чудоде́йствоваше, благочести́вому Ману́илу повелева́я вы́куп да́ти неве́рным, возбраня́ющим ше́ствие святы́я ико́ны в страну́ Ру́сскую, и сугу́бо ему́ по́слежде отда́вши. Мы́ же, дивя́щеся, ве́рно вопие́м Ти́:

Ра́дуйся, исто́чниче чуде́с неисчерпа́емый; ра́дуйся, вся́кия ми́лости пода́тельнице.

Ра́дуйся, всегда́ те́плая о на́с хода́таице к Бо́гу; ра́дуйся, промышле́ния Его́ о на́с сокро́вище.

Ра́дуйся, су́щим в беда́х прибе́жище; ра́дуйся, скорбя́щих утеше́ние.

Ра́дуйся, больны́х исцеле́ние; ра́дуйся, немощны́х укрепле́ние.

Ра́дуйся, вдо́в заступле́ние; ра́дуйся, сиро́тствующих милосе́рдая Ма́ти.

Ра́дуйся, заблужда́ющих на пу́ть и́стины обраще́ние; ра́дуйся, гре́шников к покая́нию воззва́ние.

Ра́дуйся, блага́я Врата́рнице, две́ри ра́йския ве́рным отверза́ющая.

Конда́к 10.

Спасти́ хотя́ мно́гия лю́ди от бе́д и скорбе́й, источа́еши, Богома́ти, неоску́дный исто́чник ми́лости от Своея́ ико́ны ро́ду на́шему: се́ бо и в ца́рствующем гра́де Москве́, блага́я Врата́рница, явля́ешися все́м покланя́ющимся Тебе́, ско́рое вспоможе́ние подава́я, и в но́вой оби́тели И́верстей благода́ти струи́ от ико́ны Твоея́ испуща́еши, и во ины́х граде́х, оби́телех и ве́сех чту́щим Тя́ поле́зное проше́ние исполня́я. Те́мже, прославля́я Бо́га, да́вшаго на́м благода́ть такову́ю, вопие́м Ему́: Аллилу́ия.

И́кос 10.

Стена́ еси́ и́ноческому чи́ну, Богоро́дице, и все́м, к Тебе́ прибега́ющим, и́бо небесе́ и земли́ Творе́ц, все́лься в де́вственной утро́бе Твое́й, научи́ все́х чистоты́ и целому́дрия ревни́телей возглаша́ти Тебе́:

Ра́дуйся, де́вства сосу́де избра́нный; ра́дуйся, чисте́йший о́бразе целому́дрия.

Ра́дуйся, черто́же безсе́меннаго уневе́щения; ра́дуйся, Неве́сто неневе́стная.

Ра́дуйся, Се́ятеля чистоты́ ро́ждшая; ра́дуйся, ве́рных Го́сподеви сочета́вшая.

Ра́дуйся, в бу́ри искуше́ний ско́рая помо́щнице; ра́дуйся, прило́ги врага́ отража́ющая.

Ра́дуйся, мглу́ душевре́дных страсте́й отгоня́ющая; ра́дуйся, по́мыслы очища́ющая.

Ра́дуйся, земны́я сла́сти презира́ти науча́ющая; ра́дуйся, к го́рнему умы́ и сердца́ направля́ющая.

Ра́дуйся, блага́я Врата́рнице, две́ри ра́йския ве́рным отверза́ющая.

Конда́к 11.

Пе́ние вся́кое побежда́ется, спростре́тися тща́щееся ко мно́жеству мно́гих щедро́т Твои́х: равночи́сленныя бо песка́ пе́сни а́ще прино́сим Ти́, Влады́чице на́ша Богоро́дице, ничто́же соверша́ем досто́йно, я́же подава́еши на́м, о Тебе́ вопию́щим: Аллилу́ия.

И́кос 11.

Светоприе́мную свещу́, су́щим во тме́ бе́д я́вльшуюся, зри́м святу́ю ико́ну Богома́тере: невеще́ственный бо о́гнь благода́ти прие́млющи, луча́ми чуде́с все́х озаря́ет, науча́я си́це взыва́ти Благослове́нней:

Ра́дуйся, во вся́ких ну́ждах ско́рое вспоможе́ние; ра́дуйся, в печа́лех бы́строе услы́шание.

Ра́дуйся, от огня́, меча́ и наше́ствия иноплеме́нных на́с избавля́ющая; ра́дуйся, от гла́да и напра́сныя сме́рти на́с свобожда́ющая.

Ра́дуйся, от я́звы и всегуби́тельства сме́ртнаго на́с соблюда́ющая; ра́дуйся, бе́дствующим в пути́, на су́ше и на вода́х внеза́пное вспоможе́ние.

Ра́дуйся, я́зв душе́вных и теле́сных врачева́ние; ра́дуйся, оста́вленных врача́ми в Свои́ ру́ки прие́млющая.

Ра́дуйся, милосе́рдая уте́шительнице все́х скорбя́щих и обремене́нных; ра́дуйся, не отверга́ющая все́х презре́нных и отве́рженных.

Ра́дуйся, са́мых отча́янных из ро́ва поги́бели исхища́ющая; ра́дуйся, и мене́, обнаже́ннаго до́брых де́л, не оставля́ющая Свои́м покро́вом и заступле́нием.

Ра́дуйся, блага́я Врата́рнице, две́ри ра́йския ве́рным отверза́ющая.

Конда́к 12.

Благода́ть да́ти восхоте́в долго́в дре́вних, все́х долго́в Реши́тель челове́ком, прии́де Собо́ю ко отше́дшим Того́ благода́ти и, раздра́в рукописа́ние, дарова́ на́м кре́пкое Богоблагода́тныя хода́тайство, да вопие́м вси́ моли́твами Ея́: Аллилу́ия.

И́кос 12.

Пою́ще Твоя́ чудеса́, явля́емая на́м в жи́зни се́й, хва́лим Тя́, Богоро́дице, я́ко неисчерпа́емый исто́чник ми́лости. Но, припа́дая к Тебе́ пред чудотво́рною ико́ною Твое́ю, мо́лим Тя́ смире́нно, бу́ди на́м покро́в и защище́ние и в де́нь кончи́ны на́шея, и егда́ и́мамы предста́ти на су́д стра́шному престо́лу Сы́на Твоего́, да вопие́м Ти́:

Ра́дуйся, во сла́ве приседя́щая престо́лу Сы́на Твоего́ и та́мо на́с воспомина́ющая; ра́дуйся, с Сы́ном Твои́м и Бо́гом ве́чно ца́рствующая и о на́с хода́тайствующая.

Ра́дуйся, упова́ющим на Тя́ коне́ц живота́ непосты́ден даю́щая; ра́дуйся, безболе́зненную и ми́рную кончи́ну устроя́ющая.

Ра́дуйся, мыта́рств го́рьких избавле́ние; ра́дуйся, от вла́сти кня́зя возду́шнаго свобожде́ние.

Ра́дуйся, грехо́в на́ших непоминове́ние; ра́дуйся, по Го́споде упова́ние на́м блаже́нныя жи́зни.

Ра́дуйся, упова́ющим на Тя́, одесну́ю Сы́на Твоего́ стоя́ние устроя́ющая; ра́дуйся, блаже́ннаго гла́са о́наго, небе́снаго Ца́рствия насле́дие обеща́ющаго, слы́шати сподобля́ющая.

Ра́дуйся, блага́я Ма́ти, все́х чту́щих Тя́ жи́ти с Собо́ю вселя́ющая; ра́дуйся, кре́пкая наде́ждо ве́чнаго спасе́ния все́м христиа́ном.

Ра́дуйся, блага́я Врата́рнице, две́ри ра́йския ве́рным отверза́ющая.

Конда́к 13.

О, Всепе́тая Ма́ти, Пресвята́я Госпоже́ Де́во Богоро́дице! При́зри на на́с, принося́щих смире́нно со слеза́ми ма́лыя сия́ моли́твы пред пречи́стым Твои́м о́бразом и все́ упова́ние и наде́жду возложи́вших на Тя́, и изба́ви на́с все́х бе́д и напа́стей в животе́ се́м и бу́дущия изми́ му́ки, да спаса́емии Тобо́ю, вопие́м вы́ну: Аллилу́ия.

Этот конда́к читается трижды, затем и́кос 1-й и конда́к 1-й.

Моли́тва ко Пресвяте́й Богоро́дице.

О, Пресвята́я Де́во, Ма́ти Го́спода, Цари́це небесе́ и земли́! Вонми́ многоболе́зненному воздыха́нию души́ на́шея, при́зри с высоты́ святы́я Твоея́ на на́с, с ве́рою и любо́вию покланя́ющихся пречи́стому о́бразу Твоему́. Се́ бо, грехми́ погружа́емии и скорбьми́ обурева́емии, взира́я на Тво́й о́браз, я́ко живе́й Ти́ су́щей с на́ми, прино́сим смире́нная моле́ния на́ша. Не и́мамы бо ни ины́я по́мощи, ни ина́го предста́тельства, ни утеше́ния, то́кмо Тебе́, о Ма́ти все́х скорбя́щих и обремене́нных! Помози́ на́м, немощны́м, утоли́ ско́рбь на́шу, наста́ви на пу́ть пра́вый на́с, заблужда́ющих, уврачу́й и спаси́ безнаде́жных, да́руй на́м про́чее вре́мя живота́ на́шего в ми́ре и тишине́ проводи́ти, пода́ждь христиа́нскую кончи́ну и на Стра́шнем суде́ Сы́на Твоего́ яви́ся на́м милосе́рдая Засту́пница, да всегда́ пое́м, велича́ем и сла́вим Тя́, я́ко благу́ю Засту́пницу ро́да христиа́нскаго, со все́ми угоди́вшими Бо́гу. Ами́нь.

А҆ка́ѳїстъ прест҃ѣ́й бцⷣѣ ꙗ҆вле́нїѧ ра́ди чꙋдотво́рныѧ є҆ѧ̀ і҆кѡ́ны і҆́верскїѧ.

Конда́къ а҃.

Взбра́нной воево́дѣ, влⷣчцѣ на́шей бцⷣѣ, похва̑льнаѧ пѣ̑нїѧ прино́симъ тѝ рабѝ твоѝ, ꙗ҆́кѡ прише́ствїемъ чⷭ҇тна́гѡ ѡ҆́браза твоегѡ̀ стѧжа́вшїи щи́тъ крѣ́пкїй, стѣ́нꙋ неѡбори́мꙋю и҆ стра́жа неꙋсы́пна. Ты́ же, ꙗ҆́кѡ и҆мꙋ́щаѧ держа́вꙋ непобѣди́мꙋю, покры́й и҆ защитѝ на́съ, влⷣчцѣ, ѿ всѣ́хъ врагѡ́въ ви́димыхъ и҆ невиди́мыхъ и҆ и҆зба́ви ѿ всѧ́кагѡ вре́да, дꙋше́внагѡ и҆ тѣле́снагѡ, да зове́мъ тѝ:

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

І҆́косъ а҃.

А҆́гг҃лъ предста́тель по́сланъ бы́сть рещѝ бцⷣѣ, є҆гда̀ падѐ є҆́й жре́бїй а҆пⷭ҇льскагѡ слꙋже́нїѧ въ землѝ і҆́верстѣй: не разлꙋча́йсѧ і҆ерⷭ҇ли́ма, жре́бїй же, тебѣ̀ па́дшїй, просвѣти́тсѧ въ послѣ̑днїѧ дни̑, ты́ же и҆́маши потрꙋди́тисѧ въ землѝ, ю҆́же тебѣ̀ бг҃ъ и҆зво́литъ. Тѣ́мже зове́мъ тѝ:

Ра́дꙋйсѧ, є҆́юже є҆ѵⷢ҇лїе бл҃говѣсти́тсѧ: ра́дꙋйсѧ, є҆́юже і҆́дѡльскаѧ пре́лесть ᲂу҆праздни́тсѧ.

Ра́дꙋйсѧ, є҆́юже вла́сть кнѧ́зѧ тьмы̀ разрꙋши́тсѧ: ра́дꙋйсѧ, є҆́юже црⷭ҇тво хрⷭ҇то́во ᲂу҆тверди́тсѧ.

Ра́дꙋйсѧ, па́дшихъ во тьмꙋ̀ і҆дѡлослꙋже́нїѧ къ свѣ́тꙋ є҆ѵⷢ҇лїа воззва́нїе: ра́дꙋйсѧ, ѿ ра́бства дїа́волꙋ, въ свобо́дꙋ сла́вы ча̑дъ бж҃їихъ приведе́нїе.

Ра́дꙋйсѧ, гото́ваѧ слꙋжи́тельнице сн҃а своегѡ̀ и҆ бг҃а: ра́дꙋйсѧ, послꙋша́нїемъ преслꙋша́нїе є҆́ѵы и҆сцѣлѧ́ющаѧ.

Ра́дꙋйсѧ, высото̀ добродѣ́телей: ра́дꙋйсѧ, глꙋбино̀ смиренномꙋ́дрїѧ.

Ра́дꙋйсѧ, є҆́юже невѣ́рнїи познаю́тъ творца̀: ра́дꙋйсѧ, є҆́юже вѣ́рнїи ᲂу҆сыновлѧ́ютсѧ ѻ҆ц҃ꙋ̀.

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Конда́къ в҃.

Ви́дѧщи ст҃а́ѧ дв҃а ди́вное и҆ но́вое ѡ҆ себѣ̀ промышле́нїе бж҃їе, ꙗ҆́кѡ раба̀ гдⷭ҇нѧ, при́снѡ гото́ваѧ твори́ти во́лю є҆гѡ̀, возопѝ: А҆ллилꙋ́їа.

І҆́косъ в҃.

Ра́зꙋмъ недоразꙋмѣва́емый глаго́ла а҆́гг҃льскагѡ, разꙋ́менъ тебѣ̀, пречⷭ҇таѧ, творѧ̀ гдⷭ҇ь, ᲂу҆пра́ви ше́ствїе твоѐ къ горѣ̀ а҆ѳѡ́нстѣй, и҆дѣ́же проповѣ́дасѧ тобо́ю є҆ѵⷢ҇лїе, и҆ та́кѡ ꙗ҆ви́сѧ жре́бїй тво́й. Мы́ же ра́достнѡ вопїе́мъ:

Ра́дꙋйсѧ, ѡ҆ст҃и́вшаѧ а҆ѳѡ́нъ свои́мъ прише́ствїемъ: ра́дꙋйсѧ, низложи́вшаѧ та́мѡ і҆́дѡлѡвъ.

Ра́дꙋйсѧ, насади́вшаѧ та́мѡ вѣ́рꙋ и҆́стиннꙋю: ра́дꙋйсѧ, невѣ́рїе ѿгна́вшаѧ.

Ра́дꙋйсѧ, въ жре́бїй себѣ̀ го́рꙋ сїю̀ и҆збра́вшаѧ: ра́дꙋйсѧ, бл҃года́ть семꙋ̀ мѣ́стꙋ ѡ҆бѣща́вшаѧ.

Ра́дꙋйсѧ, вѣ̑рнымъ, живꙋ́щымъ въ не́й, пода́тельнице земны́хъ бла̑гъ: ра́дꙋйсѧ, спорꙋ́чнице вѣ́чнагѡ и҆́хъ сп҃се́нїѧ.

Ра́дꙋйсѧ, те́плаѧ хода́таице ѡ҆ живꙋ́щихъ въ жре́бїи твое́мъ: ра́дꙋйсѧ, всѣ́хъ врагѡ́въ и҆́хъ ᲂу҆страше́нїе.

Ра́дꙋйсѧ, млⷭ҇ть сн҃а своегѡ̀ до сконча́нїѧ вѣ́ка мѣ́стꙋ семꙋ̀ ѡ҆бѣща́вшаѧ: ра́дꙋйсѧ, бл҃года́ть є҆гѡ̀ неѿстꙋ́пною бы́ти предре́кшаѧ.

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Конда́къ г҃.

Си́ла вы́шнѧгѡ застꙋпле́нїемъ бг҃омт҃ре ѡ҆сѣнѝ ст҃ꙋ́ю го́рꙋ и҆ ᲂу҆дѡ́лїѧ и҆ дє́бри є҆ѧ̀, ꙗ҆́кѡ село̀ простра́нное показа̀, всѣ̑мъ въ и҆́ноческой жи́зни хотѧ́щымъ жа́ти сп҃се́нїе, внегда̀ пѣ́ти си́це: А҆ллилꙋ́їа.

І҆́косъ г҃.

И҆мѣ́ѧ промышле́нїе ѡ҆ жре́бїи свое́мъ, лю́дехъ і҆́верскїѧ землѝ, ᲂу҆стро́ила є҆сѝ въ мѣ́стѣ, и҆дѣ́же сама̀ къ а҆ѳѡ́нꙋ приста́ла є҆сѝ, ѻ҆би́тель ро́дꙋ и҆́хъ, въ ти́хое приста́нище и҆́щꙋщымъ сп҃се́нїѧ, хотѧ̀ дарова́ти є҆́й въ щи́тъ и҆ ѡ҆гражде́нїе і҆кѡ́нꙋ свою̀, да всѝ взыва́ютъ:

Ра́дꙋйсѧ, посла́вшаѧ проповѣ́дницꙋ є҆ѵⷢ҇лїѧ въ зе́млю і҆́верскꙋю: ра́дꙋйсѧ, ѡ҆брати́вшаѧ сїю̀ странꙋ̀ ѿ пре́лести і҆́дѡльской къ свѣ́тꙋ хрⷭ҇то́вꙋ.

Ра́дꙋйсѧ, ѻ҆́трасли неꙋвѧда́емыѧ розго̀, ди́внꙋю лозꙋ̀ ні́нѣ дарова́вшаѧ: ра́дꙋйсѧ, ѿ неѧ̀ произрасти́вшаѧ гро́здїе чꙋде́съ и҆ благі́ѧ вѣ́ры.

Ра́дꙋйсѧ, са́дъ дꙋхо́вный на а҆ѳѡ́нѣ насади́вшаѧ: ра́дꙋйсѧ, стрꙋю̀ и҆з̾ негѡ̀ просвѣще́нїѧ дх҃о́внагѡ странѣ̀ і҆́верстѣй и҆сточи́вшаѧ.

Ра́дꙋйсѧ, є҆ѵѳѵ́мїа златословє́сныѧ ᲂу҆ста̀: ра́дꙋйсѧ, тѡрни́кїа непобѣди́маѧ крѣ́посте.

Ра́дꙋйсѧ, всѣ́хъ бл҃гочести́выхъ ᲂу҆крѣпле́нїе: ра́дꙋйсѧ, и҆́нокѡвъ ѡ҆гражде́нїе.

Ра́дꙋйсѧ, ти́хое приста́нище и҆́щꙋщихъ сп҃се́нїѧ: ра́дꙋйсѧ, вѣ́чный поко́й и҆̀мъ ᲂу҆готовлѧ́ющаѧ.

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Конда́къ д҃.

Бꙋ́рю внꙋ́трь и҆мѣ́ѧ помышле́нїй сꙋмни́тельныхъ, честна́ѧ вдови́ца, ꙗ҆́же въ нїке́и, смѧте́сѧ, зрѧ̀ копїе́мъ во́ина і҆кѡнобо́рца прободе́нꙋ ст҃ꙋ́ю и҆ чти́мꙋю і҆кѡ́нꙋ бг҃омт҃ре и҆ а҆́бїе и҆сточи́вшꙋ кро́вь, и҆ стра́хомъ ѡ҆бдержи́ма, да не порꙋ́гана бꙋ́детъ ст҃а́ѧ і҆кѡ́на, съ моли́твою слезоточа́щи вве́рже ю҆̀ въ мо́ре. Оу҆ви́дѣвъ же ю҆̀ прѧ́мѡ верхꙋ̀ воды̀ пꙋ́ть творѧ́щꙋ и҆ текꙋ́щꙋ къ за́падꙋ, возопѝ съ весе́лїемъ: А҆ллилꙋ́їа.

І҆́косъ д҃.

Ви́дѣша и҆́ноцы ст҃ы́ѧ горы̀ ꙗ҆́вльшїйсѧ въ мо́ри ꙗ҆́кѡ пла́мень, ꙗ҆́кѡ сто́лпъ ѻ҆́гненъ, є҆гѡ́же ве́рхъ досѧза́ше нб҃сѝ, ꙗ҆́кѡ со́лнце сїѧ́ющее, и҆ въ нощѝ притеко́ша къ кра́ю мо́рѧ, и҆ ви́дѣвше ст҃ꙋ́ю і҆кѡ́нꙋ бг҃омт҃ре, по мо́рю носи́мꙋю си́лою свы́ше, возопи́ша бл҃года́тнѣй:

Ра́дꙋйсѧ, кꙋпино̀, законополо́жникомъ предзри́маѧ: ра́дꙋйсѧ, сто́лпе ѻ҆́гненный, наставлѧ́ѧй сꙋ́щыѧ во тьмѣ̀.

Ра́дꙋйсѧ, лѣ́ствице, досѧза́ющаѧ до нб҃съ, є҆́юже сни́де бг҃ъ: ра́дꙋйсѧ, мо́сте, преводѧ́й сꙋ́щихъ ѿ землѝ на нб҃о.

Ра́дꙋйсѧ, зарѐ та́инственнагѡ днѐ: ра́дꙋйсѧ, ѕвѣздо̀, ꙗ҆влѧ́ющаѧ сл҃нце.

Ра́дꙋйсѧ, свѣ́тъ неизрече́нный роди́вшаѧ: ра́дꙋйсѧ, є҆́же ка́кѡ ни є҆ди́наго же наꙋчи́вшаѧ.

Ра́дꙋйсѧ, ѡ҆блече́ннаѧ въ сл҃нце, сїѧ́ющаѧ бл҃года́тїю и҆ сла́вою все́й вселе́ннѣй: ра́дꙋйсѧ, мо́лнїе, дꙋ́ши просвѣща́ющаѧ и҆ вѣ́рныхъ смы́слы ѡ҆зарѧ́ющаѧ.

Ра́дꙋйсѧ, свѣ́тлосте, во тьмѣ̀ свѣтѧ́щаѧ: ра́дꙋйсѧ, ꙗ҆́кѡ многосвѣ́тлое возсїѧва́еши просвѣще́нїе.

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Конда́къ є҃.

Бг҃оте́чнꙋю і҆кѡ́нꙋ свою̀ да́ти хотѧ̀ і҆́верстѣй ѻ҆би́тели, рекла̀ є҆сѝ, бг҃омт҃и, прпⷣбномꙋ гаврїи́лꙋ: и҆дѝ съ ли́комъ и҆́нокѡвъ къ бре́гꙋ мо́рѧ, сни́ди въ пꙋчи́нꙋ и҆ прїимѝ і҆кѡ́нꙋ мою̀. Ѻ҆́нъ же, вѣ́рою и҆ любо́вїю ѡ҆крилѧ́емь, по водѣ̀ а҆́ки по сꙋ́хꙋ ходѧ̀, прїѧ́тъ ю҆̀ во ѡ҆б̾ѧ́тїѧ своѧ̑, и҆ дости́гши сокро́вища, и҆ны̑мъ недостижи́магѡ, въ достоѧ́нїе и҆́нокѡвъ ро́да своегѡ̀ і҆́верскагѡ, веселѧ́сѧ поѧ́ше: А҆ллилꙋ́їа.

І҆́косъ є҃.

Ви́дѣша и҆́ноцы і҆́верстїи мно́гажды і҆кѡ́нꙋ бг҃омт҃ре и҆з̾ хра́ма въ верхꙋ̀ вра́тъ монасты́рскихъ, на стѣ́нꙋ гра́да незри́мою си́лою и҆знесе́ннꙋю, ᲂу҆жаса́хꙋсѧ и҆ стоѧ́хꙋ, зовꙋ́ще къ не́й такова̑ѧ:

Ра́дꙋйсѧ, ст҃ꙋ́ю і҆кѡ́нꙋ да́ти на́мъ и҆зво́лившаѧ: ра́дꙋйсѧ, покро́въ є҆ѧ̀ бы́ти на́мъ ѡ҆бѣща́вшаѧ.

Ра́дꙋйсѧ, любо́вь твою̀ къ ѻ҆би́тели на́шей показа́вшаѧ: ра́дꙋйсѧ, бл҃го́е ѡ҆ не́й промышле́нїе ꙗ҆ви́вшаѧ.

Ра́дꙋйсѧ, по́мощь на́ша въ чꙋжде́й странѣ̀: ра́дꙋйсѧ, въ стра́нствїи на́шемъ ᲂу҆тѣше́нїе.

Ра́дꙋйсѧ, бж҃їе къ на́мъ бл҃говоле́нїе: ра́дꙋйсѧ, на́ше къ бг҃ꙋ дерзнове́нїе.

Ра́дꙋйсѧ, сле́зъ на́шихъ и҆збавле́нїе: ра́дꙋйсѧ, си́рыхъ на́съ защи́тнице.

Ра́дꙋйсѧ, ѡ҆гражде́нїе на́ше: ра́дꙋйсѧ, є҆ди́на ра́досте на́ша.

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Конда́къ ѕ҃.

Проповѣ́дника творѧ́щи гаврїи́ла во́ли своеѧ̀, рекла̀ є҆сѝ къ немꙋ̀, влⷣчце: не прїидо́хъ храни́ма бы́ти ѿ ва́съ, но да бꙋ́дꙋ а҆́зъ храни́тельница ва́ша не то́кмѡ въ настоѧ́щемъ, но и҆ въ бꙋ́дꙋщемъ вѣ́цѣ. Сѐ даю̀ ва́мъ зна́менїе: до́ндеже зритѐ въ монастырѣ̀ і҆кѡ́нꙋ мою̀, не ѡ҆скꙋдѣ́етъ ва́мъ бл҃года́ть сн҃а моегѡ̀ и҆ млⷭ҇ть, да вопїю́тъ є҆мꙋ̀ всѝ: А҆ллилꙋ́їа.

І҆́косъ ѕ҃.

Возсїѧ̀ ра́дость ве́лїѧ слы́шавшымъ твоѧ̑, бг҃ома́ти, ѡ҆бѣтова̑нїѧ, и҆ тебѣ̀, нбⷭ҇нѣй врата́рницѣ, хра́мъ на вратѣ́хъ ѻ҆би́тели съ весе́лїемъ и҆́ноцы воздвиго́ша и҆ возопи́ша та́кѡ:

Ра́дꙋйсѧ, храни́тельнице на́ша въ настоѧ́щемъ вѣ́цѣ: ра́дꙋйсѧ, предста́тельнице на́ша въ бꙋ́дꙋщемъ.

Ра́дꙋйсѧ, стра́хꙋ бж҃їю на́съ наꙋча́ющаѧ: ра́дꙋйсѧ, на пꙋ́ть добродѣ́тели наставлѧ́ющаѧ.

Ра́дꙋйсѧ, дерзнове́нїе на́ше и҆ наде́ждо: ра́дꙋйсѧ, ᲂу҆пова́нїе на́ше и҆ покро́въ.

Ра́дꙋйсѧ, благоꙋтро́бїе сн҃а своегѡ̀ къ на́мъ преклони́вшаѧ: ра́дꙋйсѧ, бл҃года́ть є҆гѡ̀ неѡскꙋ́днѡ пребыва́ти съ на́ми возвѣща́ющаѧ.

Ра́дꙋйсѧ, ст҃ꙋ́ю і҆кѡ́нꙋ зало́гомъ млⷭ҇ти да́вшаѧ: ра́дꙋйсѧ, да́ръ чꙋдодѣ́йствїѧ є҆́й дарова́вшаѧ.

Ра́дꙋйсѧ, прило́гъ всѧ́кагѡ ѕла̀ ѿ ѻ҆би́тели ѿража́ющаѧ: ра́дꙋйсѧ, всемꙋ̀ бл҃го́мꙋ вхо́дъ ѿверза́ющаѧ.

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Конда́къ з҃.

Хотѧ́щꙋ и҆ногда̀ ѕлочести́вомꙋ а҆ми́рѣ ѻ҆би́тель і҆́верскꙋю разори́ти и҆ ста́до и҆́нокѡвъ та́мѡ собра́нное разсѣ́ѧти, ско́рѡ позна̀ крѣ́пкое ѻ҆би́тели застꙋпле́нїе ѿ бг҃омт҃ре, ᲂу҆ви́дѣвъ кораблѝ своѧ̑ въ пꙋчи́нѣ мо́рѧ погрѧ́зшыѧ и҆ ра́тники и҆зги́бшыѧ. И҆ прише́дъ со смире́нїемъ, сребро̀ и҆ зла́то въ ѻ҆би́тель даѧ́ше, мл҃твы просѧ̀. И҆́ноцы же, ви́дѣвше сїѧ̑, возопи́ша къ бг҃ꙋ: А҆ллилꙋ́їа.

І҆́косъ з҃.

Нѡ́выѧ и҆ безчи́слєнныѧ чꙋдеса̀ показа̀ бг҃омт҃рь, въ ѻ҆би́тели ѡ҆скꙋде́нїе вїна̀, мꙋкѝ и҆ є҆ле́а восполнѧ́ющи, бѣснꙋ́ющыѧ и҆сцѣлѧ́ѧ, хрѡмы́мъ да́рꙋѧ хожде́нїе, слѣпы̑мъ прозрѣ́нїе и҆ всѧ́къ недꙋ́гъ врачꙋ́ѧ, да, ви́дѧще чꙋдеса̀ сїѧ̑, воспѣва́ютъ тебѣ̀:

Ра́дꙋйсѧ, взбра́ннаѧ воево́до, врагѝ побѣжда́ющаѧ: ра́дꙋйсѧ, ско́раѧ на по́мощь призыва́ющымъ тѧ̀.

Ра́дꙋйсѧ, не презира́ющаѧ моле́нїѧ на́шегѡ: ра́дꙋйсѧ, ѡ҆бѣща́нїѧ своегѡ̀ не ѿстꙋпа́ющаѧ.

Ра́дꙋйсѧ, ско́рбь ѻ҆би́тели въ ра́дость претворѧ́ющаѧ: ра́дꙋйсѧ, ѡ҆скꙋдѣ́нїе ѻ҆би́тели восполнѧ́ющаѧ.

Ра́дꙋйсѧ, слѣпы́хъ прозрѣ́нїе: ра́дꙋйсѧ, хромы́хъ хожде́нїе.

Ра́дꙋйсѧ, всѣ́хъ немощны́хъ цѣли́тельнице: ра́дꙋйсѧ, всѣ́хъ ско́рбныхъ ᲂу҆тѣ́шительнице.

Ра́дꙋйсѧ, ꙗ҆́кѡ не престае́ши промышлѧ́ющи и҆ сп҃са́ющи на́съ: ра́дꙋйсѧ, ꙗ҆́кѡ ѿ толи́кихъ бѣ́дъ и҆збавлѧ́еши на́съ.

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Конда́къ и҃.

Стра́ннѡ покрыва́емꙋю ѿ і҆кѡ́ны бг҃омт҃ре ѻ҆би́тель і҆́верскꙋю слы́шавъ патрїа́рхъ ні́кѡнъ, вожделѣ̀ и҆ рѡссі́йстѣй странѣ̀ благода́ти є҆ѧ̀ стѧжа́ти прича́стїе: сегѡ̀ ра́ди созда́въ ѻ҆би́тель въ че́сть сла́внагѡ ѡ҆́браза, со тща́нїемъ и҆спросѝ и҆з̾ѡбраже́нїе чꙋдотво́рнагѡ ѡ҆́браза бг҃омт҃ре, да, покро́вомъ є҆ѧ̀ защища́еми, вопїю́тъ бг҃ꙋ: А҆ллилꙋ́їа.

І҆́косъ и҃.

Всѧ̀ сꙋ́щи въ вы́шнихъ, но и҆ ни́жнихъ не ѿстꙋпа́ѧ, бл҃гоизво́лила є҆сѝ, бг҃омт҃и, ꙗ҆́коже дре́вле а҆нтѡ́нїю дарова́сѧ благослове́нїе горы̀ а҆ѳѡ́нскїѧ на ᲂу҆твержде́нїе ѻ҆би́тели пече́рскїѧ, дарова́ти и҆ но́вой ѻ҆би́тели въ странѣ̀ рѡссі́йстѣй свою̀ блгⷣть, є҆́юже бл҃гослови́ла є҆сѝ а҆ѳѡ́нъ, въ подо́бїи чⷭ҇тна́гѡ ѡ҆́браза твоегѡ̀: тѣ́мже взыва́емъ тѝ:

Ра́дꙋйсѧ, страны̀ рѡссі́йскїѧ покро́ве, ши́ршїй ѻ҆́блака: ра́дꙋйсѧ, правосла́вныѧ вѣ́ры въ не́й ѡ҆гражде́нїе и҆ ᲂу҆твержде́нїе.

Ра́дꙋйсѧ, правосла́вныѧ цр҃кве непоколеби́мый сто́лпе: ра́дꙋйсѧ, є҆ресе́й и҆ раско́лѡвъ ѡ҆бличе́нїе.

Ра́дꙋйсѧ, свѣ́тлыми лꙋча́ми чꙋдотво́рныхъ і҆кѡ́нъ всю̀ странꙋ̀ ѡ҆зарѧ́ющаѧ: ра́дꙋйсѧ, да́ры и҆сцѣле́нїй и҆ млⷭ҇тей ѿ ни́хъ и҆сточа́ющаѧ.

Ра́дꙋйсѧ, врагѡ́въ ᲂу҆страше́нїе: ра́дꙋйсѧ, ст҃и́телей весе́лїе.

Ра́дꙋйсѧ, і҆ере́євъ похвало̀: ра́дꙋйсѧ, и҆́нокѡвъ наста́внице.

Ра́дꙋйсѧ, всегѡ̀ ро́да на́шегѡ сп҃се́нїе.

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Конда́къ ѳ҃.

Всѧ́ко тща́нїе и҆мꙋ́ще ѡ҆ написа́нїи чⷭ҇тна́гѡ ѡ҆́браза млⷭ҇тивыѧ врата́рницы, со́нмъ по́стникѡвъ і҆́верскихъ молє́бныѧ пѣ̑нїѧ соверша́етъ, водо́ю ѿ чꙋ́дныѧ і҆кѡ́ны ѡ҆мыва́етъ дскꙋ̀, на не́йже и҆́мать и҆з̾ѡбрази́тисѧ чⷭ҇тны́й ѡ҆́бразъ, и҆ прпⷣбнаго і҆амвли́ха ѡ҆свѧща́етъ, и҆́же подвиза́всѧ въ постѣ̀, мл҃твѣ и҆ бдѣ́нїи со все́ю бра́тїею, списа̀ ва́пы, ст҃о́ю водо́ю и҆ моща́ми ѡ҆сщ҃е́нными чⷭ҇тно́е и҆з̾ѡбраже́нїе бг҃омт҃ре, вы́нꙋ молѧ́сѧ и҆ вопїѧ̀ бг҃ꙋ: А҆ллилꙋ́їа.

І҆́косъ ѳ҃.

Виті̑ѧ многовѣща̑нныѧ, ꙗ҆́кѡ ры̑бы безгла̑сныѧ, ви́димъ ѡ҆ тебѣ̀, бцⷣе: недоꙋмѣ́ютъ бо, ка́кѡ по досто́инствꙋ похвали́ти всѧ̑ чꙋдеса̀ твоѧ̑, ꙗ҆влє́ннаѧ ро́дꙋ на́шемꙋ ѿ ст҃ы́ѧ твоеѧ̀ і҆кѡ́ны: є҆щѐ бо на пꙋтѝ въ рѡссі́йскꙋю странꙋ̀ сїѧ̀ чꙋдодѣ́йствоваше, бл҃гочести́вомꙋ манꙋ́илꙋ повелѣва́ѧ вы́кꙋпъ да́ти невѣ̑рнымъ, возбранѧ́ющымъ ше́ствїе ст҃ы́ѧ і҆кѡ́ны въ странꙋ̀ рꙋ́сскꙋю, и҆ сꙋгꙋ́бѡ є҆мꙋ̀ по́слѣжде ѿда́вши. Мы́ же, дивѧ́щесѧ, вѣ́рнѡ вопїе́мъ тѝ:

Ра́дꙋйсѧ, и҆сто́чниче чꙋде́съ неизчерпа́емый: ра́дꙋйсѧ, всѧ́кїѧ млⷭ҇ти пода́тельнице.

Ра́дꙋйсѧ, всегда̀ те́плаѧ ѡ҆ на́съ хода́таице къ бг҃ꙋ: ра́дꙋйсѧ, промышле́нїѧ є҆гѡ̀ ѡ҆ на́съ сокро́вище.

Ра́дꙋйсѧ, сꙋ́щымъ въ бѣда́хъ прибѣ́жище: ра́дꙋйсѧ, скорбѧ́щихъ ᲂу҆тѣше́нїе.

Ра́дꙋйсѧ, больны́хъ и҆сцѣле́нїе: ра́дꙋйсѧ, немощны́хъ ᲂу҆крѣпле́нїе.

Ра́дꙋйсѧ, вдѡ́въ застꙋпле́нїе: ра́дꙋйсѧ, сиро́тствꙋющихъ млⷭ҇рдаѧ мт҃и.

Ра́дꙋйсѧ, заблꙋжда́ющихъ на пꙋ́ть и҆́стины ѡ҆браще́нїе: ра́дꙋйсѧ, грѣ́шникѡвъ къ покаѧ́нїю воззва́нїе.

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Конда́къ і҃.

Спастѝ хотѧ̀ мнѡ́гїѧ лю́ди ѿ бѣ́дъ и҆ скорбе́й, и҆сточа́еши, бг҃омт҃и, неѡскꙋ́дный и҆сто́чникъ млⷭ҇ти ѿ своеѧ̀ і҆кѡ́ны ро́дꙋ на́шемꙋ: се́ бо и҆ въ сто́льномъ гра́дѣ москвѣ̀ бл҃га́ѧ врата́рница, ꙗ҆влѧ́ешисѧ всѣ̑мъ поклонѧ́ющымсѧ тебѣ̀, ско́рое вспоможе́нїе подава́ѧ, и҆ въ но́вой ѻ҆би́тели і҆́верстѣй бл҃года́ти стрꙋи̑ ѿ і҆кѡ́ны твоеѧ̀ и҆спꙋща́еши, и҆ во и҆ны́хъ градѣ́хъ, ѻ҆би́телехъ и҆ ве́сехъ чтꙋ́щымъ тѧ̀ поле́зное проше́нїе и҆сполнѧ́ющи. Тѣ́мже, прославлѧ́ѧ бг҃а, да́вшаго на́мъ бл҃года́ть таковꙋ́ю, вопїе́мъ є҆мꙋ̀: А҆ллилꙋ́їа.

І҆́косъ і҃.

Стѣна̀ є҆сѝ и҆́ноческомꙋ чи́нꙋ, бцⷣе, и҆ всѣ̑мъ, къ тебѣ̀ прибѣга́ющымъ: и҆́бо нб҃сѐ и҆ землѝ творе́цъ все́льсѧ въ дѣ́вственной ᲂу҆тро́бѣ твое́й, наꙋчѝ всѣ́хъ чистоты̀ и҆ цѣломꙋ́дрїѧ ревни́телей возглаша́ти тебѣ̀:

Ра́дꙋйсѧ, дѣ́вства сосꙋ́де и҆збра́нный: ра́дꙋйсѧ, чистѣ́йшїй ѡ҆́бразе цѣломꙋ́дрїѧ.

Ра́дꙋйсѧ, черто́же безсѣ́меннагѡ ᲂу҆невѣ́щенїѧ: ра́дꙋйсѧ, невѣ́сто неневѣ́стнаѧ.

Ра́дꙋйсѧ, сѣ́ѧтелѧ чистоты̀ ро́ждшаѧ: ра́дꙋйсѧ, вѣ́рныхъ гдⷭ҇ви сочета́вшаѧ.

Ра́дꙋйсѧ, въ бꙋ́ри и҆скꙋше́нїй ско́раѧ помо́щнице: ра́дꙋйсѧ, прило́ги врага̀ ѿража́ющаѧ.

Ра́дꙋйсѧ, мглꙋ̀ дꙋшевре́дныхъ страсте́й ѿгонѧ́ющаѧ: ра́дꙋйсѧ, по́мыслы ѡ҆чища́ющаѧ.

Ра́дꙋйсѧ, земны̑ѧ сла̑сти презира́ти наꙋча́ющаѧ: ра́дꙋйсѧ, къ го́рнемꙋ ᲂу҆мы̀ и҆ сердца̀ направлѧ́ющаѧ.

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Конда́къ а҃і.

Пѣ́нїе всѧ́кое побѣжда́етсѧ, спростре́тисѧ тща́щеесѧ ко мно́жествꙋ мно́гихъ щедро́тъ твои́хъ: равночи́слєнныѧ бо песка̀ пѣ̑сни а҆́ще прино́симъ тѝ, влⷣчце на́ша бцⷣе, ничто́же соверша́емъ досто́йно, ꙗ҆̀же подава́еши на́мъ, ѡ҆ тебѣ̀ вопїю́щымъ: А҆ллилꙋ́їа.

І҆́косъ а҃і.

Свѣтопрїе́мнꙋю свѣщꙋ̀, сꙋ́щымъ во тьмѣ̀ бѣ́дъ ꙗ҆́вльшꙋюсѧ, зри́мъ ст҃ꙋ́ю і҆кѡ́нꙋ бг҃омт҃ре: невеще́ственный бо ѻ҆́гнь благода́ти прїе́млющи, лꙋча́ми чꙋде́съ всѣ́хъ ѡ҆зарѧ́етъ, наꙋча́ющи си́це взыва́ти бл҃гослове́ннѣй:

Ра́дꙋйсѧ, во всѧ́кихъ нꙋ́ждахъ ско́рое вспоможе́нїе: ра́дꙋйсѧ, въ печа́лехъ бы́строе ᲂу҆слы́шанїе.

Ра́дꙋйсѧ, ѿ ѻ҆гнѧ̀, меча̀ и҆ наше́ствїѧ и҆ноплеме́нныхъ на́съ и҆збавлѧ́ющаѧ: ра́дꙋйсѧ, ѿ гла́да и҆ напра́сныѧ сме́рти на́съ свобожда́ющаѧ.

Ра́дꙋйсѧ, ѿ ꙗ҆́звы и҆ всегꙋби́тельства сме́ртнагѡ на́съ соблюда́ющаѧ: ра́дꙋйсѧ, бѣ́дствꙋющымъ въ пꙋтѝ, на сꙋ́шѣ и҆ на вода́хъ внеза́пное вспоможе́нїе.

Ра́дꙋйсѧ, ꙗ҆́звъ дꙋше́вныхъ и҆ тѣле́сныхъ врачева́нїе: ра́дꙋйсѧ, ѡ҆ста́вленныхъ врача́ми въ своѝ рꙋ́ки прїе́млющаѧ.

Ра́дꙋйсѧ, милосе́рдаѧ ᲂу҆тѣ́шительнице всѣ́хъ скорбѧ́щихъ и҆ ѡ҆бремене́нныхъ: ра́дꙋйсѧ, не ѿверга́ющаѧ всѣ́хъ презрѣ́нныхъ и҆ ѿве́рженныхъ.

Ра́дꙋйсѧ, са́мыхъ ѿча́ѧнныхъ и҆з̾ ро́ва поги́бели и҆схища́ющаѧ: ра́дꙋйсѧ, и҆ менѐ, ѡ҆бнаже́ннаго до́брыхъ дѣ́лъ, не ѡ҆ставлѧ́ющаѧ свои́мъ покро́вомъ и҆ застꙋпле́нїемъ.

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Конда́къ в҃і.

Бл҃года́ть да́ти восхотѣ́въ долгѡ́въ дре́внихъ, всѣ́хъ долгѡ́въ рѣши́тель человѣ́кѡмъ, прїи́де собо́ю ко ѿше́дшымъ тогѡ̀ благода́ти, и҆ раздра́въ рꙋкописа́нїе, дарова̀ на́мъ крѣ́пкое бг҃обл҃года́тныѧ хода́тайство, да вопїе́мъ всѝ моли́твами є҆ѧ̀: А҆ллилꙋ́їа.

І҆́косъ в҃і.

Пою́ще твоѧ̑ чꙋдеса̀, ꙗ҆влѧ́ємаѧ на́мъ въ жи́зни се́й, хва́лимъ тѧ̀, бцⷣе, ꙗ҆́кѡ млⷭ҇ти и҆сто́чникъ неисчерпа́емый. Но, припа́даѧ къ тебѣ̀ пред̾ чꙋдотво́рною і҆кѡ́ною твое́ю, мо́лимъ тѧ̀ смире́ннѡ, бꙋ́ди на́мъ покро́въ и҆ защище́нїе и҆ въ де́нь кончи́ны на́шеѧ, и҆ є҆гда̀ и҆́мамы предста́ти на сꙋ́дъ стра́шномꙋ прⷭ҇то́лꙋ сн҃а твоегѡ̀, да вопїе́мъ тѝ:

Ра́дꙋйсѧ, во сла́вѣ присѣдѧ́щаѧ прⷭ҇то́лꙋ сн҃а твоегѡ̀, и҆ та́мѡ на́съ воспомина́ющаѧ: ра́дꙋйсѧ, съ сн҃омъ твои́мъ и҆ бг҃омъ вѣ́чнѡ црⷭ҇твꙋющаѧ, и҆ ѡ҆ на́съ хода́тайствꙋющаѧ.

Ра́дꙋйсѧ, ᲂу҆пова́ющымъ на тѧ̀ коне́цъ живота̀ непосты́денъ да́рꙋющаѧ: ра́дꙋйсѧ, безболѣ́зненнꙋю и҆ ми́рнꙋю кончи́нꙋ ᲂу҆строѧ́ющаѧ.

Ра́дꙋйсѧ, мыта́рствъ го́рькихъ и҆збавле́нїе: ра́дꙋйсѧ, ѿ вла́сти кнѧ́зѧ воздꙋ́шнагѡ ѡ҆свобожде́нїе.

Ра́дꙋйсѧ, грѣхѡ́въ на́шихъ непоминове́нїе: ра́дꙋйсѧ, по гдⷭ҇ѣ ᲂу҆пова́нїе на́мъ бл҃же́нныѧ жи́зни.

Ра́дꙋйсѧ, ᲂу҆пова́ющымъ на тѧ̀, ѡ҆деснꙋ́ю сн҃а твоегѡ̀ стоѧ́нїе ᲂу҆строѧ́ющаѧ: ра́дꙋйсѧ, бл҃же́ннагѡ гла́са ѻ҆́нагѡ, нбⷭ҇нагѡ црⷭ҇твїѧ наслѣ́дїе ѡ҆бѣща́ющагѡ, слы́шати сподоблѧ́ющаѧ.

Ра́дꙋйсѧ, бл҃га́ѧ мт҃и, всѣ́хъ чтꙋ́щихъ тѧ̀ жи́ти съ собо́ю вселѧ́ющаѧ: ра́дꙋйсѧ, крѣ́пкаѧ наде́ждо вѣ́чнагѡ сп҃се́нїѧ всѣ̑мъ хрⷭ҇тїа́нѡмъ.

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Конда́къ г҃і.

Ѽ всепѣ́таѧ мт҃и, прест҃а́ѧ гпⷭ҇жѐ дв҃о бцⷣе! При́зри на на́съ, приносѧ́щихъ смире́ннѡ со слеза́ми ма̑лыѧ сїѧ̑ моли̑твы пред̾ пречⷭ҇тымъ твои́мъ ѡ҆́бразомъ и҆ всѐ ᲂу҆пова́нїе и҆ наде́ждꙋ возложи́вшихъ на тѧ̀, и҆ и҆зба́ви на́съ всѣ́хъ бѣ́дъ и҆ напа́стей въ животѣ̀ се́мъ, и҆ бꙋ́дꙋщыѧ и҆змѝ мꙋ́ки, да спаса́емїи тобо́ю, вопїе́мъ вы́нꙋ: А҆ллилꙋ́їа.

Се́й конда́къ глаго́ли три́жды, посе́мъ а҃-й і҆́косъ и҆ а҃-й конда́къ.

Моли́тва.

Ѽ прест҃а́ѧ дв҃о, мт҃и гдⷭ҇а, цр҃и́це нб҃сѐ и҆ землѝ! Вонмѝ многоболѣ́зненномꙋ воздыха́нїю дꙋ́шъ на́шихъ, при́зри съ высоты̀ ст҃ы́ѧ твоеѧ̀ на на́съ, съ вѣ́рою и҆ любо́вїю покланѧ́ющихсѧ пречⷭ҇томꙋ ѡ҆́бразꙋ твоемꙋ̀. Се́ бо, грѣхмѝ погрꙋжа́емїи и҆ скорбьмѝ ѡ҆бꙋрева́емїи, взира́юще на тво́й ѡ҆́бразъ ꙗ҆́кѡ живѣ́й тѝ сꙋ́щей съ на́ми, прино́симъ смирє́ннаѧ молє́нїѧ на̑ша. Не и҆́мамы бо ни и҆ны́ѧ по́мощи, ни и҆на́гѡ предста́тельства, ни ᲂу҆тѣше́нїѧ, то́кмѡ тебѐ, ѡ҆ мт҃и всѣ́хъ скорбѧ́щихъ и҆ ѡ҆бремене́нныхъ! Помозѝ на́мъ, немѡщны́мъ, ᲂу҆толѝ ско́рбь на́шꙋ, наста́ви на пꙋ́ть пра́вый на́съ, заблꙋжда́ющихъ, ᲂу҆врачꙋ́й и҆ спасѝ безнаде́жныхъ, да́рꙋй на́мъ про́чее вре́мѧ живота̀ на́шегѡ въ ми́рѣ и҆ тишинѣ̀ проводи́ти, пода́ждь хрⷭ҇тїа́нскꙋю кончи́нꙋ и҆ на стра́шнѣмъ сꙋдѣ̀ сн҃а твоегѡ̀ ꙗ҆ви́сѧ на́мъ млⷭ҇рдаѧ застꙋ́пница, да всегда̀ пое́мъ, велича́емъ и҆ сла́вимъ тѧ̀, ꙗ҆́кѡ бл҃гꙋ́ю застꙋ́пницꙋ ро́да хрⷭ҇тїа́нскагѡ, со всѣ́ми ᲂу҆годи́вшими бг҃ꙋ. А҆ми́нь.

Ивер­ская ико­на Бо­жи­ей Ма­те­ри, на­хо­дя­ща­я­ся на Афоне, про­сла­ви­лась мно­ги­ми чу­де­са­ми. Слух о чу­до­твор­ном об­ра­зе через па­лом­ни­ков рас­про­стра­нил­ся по Рос­сии. Свя­тей­ший Пат­ри­арх Ни­кон (то­гда еще Но­воспас­ский ар­хи­манд­рит) об­ра­тил­ся к ар­хи­манд­ри­ту Ивер­ско­го Афон­ско­го мо­на­сты­ря Па­хо­мию (ко­то­рый при­был в Моск­ву за ми­ло­сты­ней для афон­ских оби­те­лей) с прось­бой при­слать спи­сок с чу­до­твор­ной Ивер­ской ико­ны Пре­свя­той Бо­го­ро­ди­цы. Афон­ский инок Иам­влих на­пи­сал ко­пию с Ивер­ско­го об­ра­за, и через год ико­на, в со­про­вож­де­нии афон­ских мо­на­хов, при­бы­ла в Моск­ву. 13 ок­тяб­ря 1648 го­да она бы­ла тор­же­ствен­но встре­че­на жи­те­ля­ми сто­ли­цы. Ве­ли­кая свя­ты­ня Рус­ской Пра­во­слав­ной Церк­ви Мос­ков­ская Ивер­ская ико­на про­слав­ле­на от Гос­по­да мно­ги­ми чу­де­са­ми.

Ивер­ская ико­на (ко­то­рая сей­час хра­нит­ся на Афоне) в IX ве­ке на­хо­ди­лась у од­ной бла­го­че­сти­вой вдо­вы, жив­шей близ го­ро­да Ни­кеи. При им­пе­ра­то­ре Фе­о­фи­ле (829–842) ико­но­бор­цы, уни­что­жав­шие свя­тые ико­ны, при­шли в дом этой хри­сти­ан­ки, и один во­ин ко­пьем уда­рил по об­ра­зу Бо­го­ро­ди­цы. Тот­час из по­ра­жен­но­го ме­ста по­тек­ла кровь. Вдо­ва, бо­ясь уни­что­же­ния свя­ты­ни, по­обе­ща­ла им­пе­ра­тор­ским во­и­нам день­ги и про­си­ла их до утра не тро­гать ико­ну. Ко­гда они ушли, жен­щи­на вме­сте с сы­ном (впо­след­ствии афон­ским ино­ком), для со­хра­не­ния свя­той ико­ны опу­сти­ла ее в мо­ре. Ико­на, стоя на во­де, при­плы­ла к Афо­ну. Афон­ские ино­ки, несколь­ко дней ви­дя в мо­ре ог­нен­ный столп, вос­хо­дя­щий до неба, при­шли к бе­ре­гу и на­шли свя­той об­раз, сто­я­щий на во­де. По­сле мо­леб­на о да­ро­ва­нии мо­на­сты­рю явив­шей­ся свя­ты­ни бла­го­че­сти­вый инок Ивер­ско­го мо­на­сты­ря свя­той Гав­ри­ил Гру­зин (па­мять 12 июля), по по­ве­ле­нию Бо­жи­ей Ма­те­ри, явив­шей­ся ему во сне, по­шел по во­де, при­нял свя­тую ико­ну и по­ста­вил в хра­ме. Од­на­ко на сле­ду­ю­щий день ико­на бы­ла об­ре­те­на не в хра­ме, а над во­ро­та­ми оби­те­ли. Так по­вто­ря­лось несколь­ко раз, по­ка Пре­свя­тая Де­ва не от­кры­ла свя­то­му Гав­ри­и­лу Свою во­лю во сне, ска­зав, что не же­ла­ет быть хра­ни­мой ино­ка­ми, а хо­чет быть их Хра­ни­тель­ни­цей. По­сле это­го об­раз был по­став­лен над мо­на­стыр­ски­ми во­ро­та­ми. По­это­му свя­тая ико­на на­зы­ва­ет­ся Пор­та­и­тис­сою, Вра­тар­ни­цею.

См. фильм "Иверская икона Божией Матери".