Акафист Пресвятой Богородице пред иконой «Корсунская (Ефесская)»

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Кондак 1

Взбранной Воеводе и Заступнице Усердной рода христианскаго, Пресвятей Деве Богородице, даровавшей стране нашей пречудную икону Корсунскую, благодарственное приносим пение. Ты же, Всемилостивая Владычице, яко имущая державу непобедимую, от всяких нас бед свободи и от враг видимых и невидимых защити, да зовем Ти:

Радуйся, земли Русския скорая Заступнице, любовь Свою и милость нам являющая.

Икос 1

Ангелов лицы и человеков собори благоговейно взирают на чудотворныя образы Твоя, Богородице Пречистая, во объятиих Предвечнаго Младенца держащая. Ты бо любве ради к верующим в Сына Твоего, благословила еси апостола и евангелиста Луку образы Твоя честныя написати, да вси вернии преклоняют пред ними колена душ и сердец, воспевающе Ти таковая:

Радуйся, изображение пречистаго лика Своего нам оставившая;

Радуйся, всю вселенную иконами Твоими просветившая.

Радуйся, священнаго иконописания Покровительнице;

Радуйся, почитания святых икон освящение.

Радуйся, лествице, Небо и землю соединившая;

Радуйся, огнь Божества неопально вместившая.

Радуйся, со апостолы веры истинныя Насадительнице;

Радуйся, Домостроительнице нашего спасения.

Радуйся, во Успении Своем мир не оставляющая;

Радуйся, чудотворными иконами Твоими милость нам ниспосылающая.

Радуйся, всего мира надеждо и утешение;

Радуйся, благоуханный цвете девства и чистоты.

Радуйся, земли Русския скорая Заступнице, любовь Свою и милость нам являющая.

Кондак 2

Видящи Святая Дева изображение лика Своего, еже святый апостол и евангелист Лука написа, рече: «С сею иконою благодать Сына Моего и Моя да пребудет». Темже веруем, яко и с иконою Твоею, нарицаемою Корсунскою, благодать и сила Божественная пребывают. Сего ради, с благоговением притекающе к иконе Твоей чудотворней, воздаем ей честь, яко Тебе Самой, и благодарственно вопием Сыну Твоему и Богу: Аллилуия.

Икос 2

Разум неуразумеваемый человеческими помыслы явила еси, Богородице Дево, егда возсия благодатию во граде Ефесе икона Твоя Одигитрия, святым Лукою написанная, и явися всем православным людем путеводительница и защитница веры Христовы от еретических мудрований, яко во Ефесе святии отцы Третияго Вселенскаго Собора, богомудрия исполненнии, еретическая учения низложиша и божественными словесы Тя, едину истинную Богородицу и Приснодеву исповедаша, верныя научающе ублажати Тя сице:

Радуйся, град Ефес иконою Твоею прославившая;

Радуйся, в честней иконе Твоей от всех родов покланяемая.

Радуйся, святых отец, ревнителей веры мудрая Наставнице;

Радуйся, именем Божия Матере Собором Вселенским возвеличенная.

Радуйся, лжеучителей еретических низложение;

Радуйся, веры православныя непоколебимое утверждение.

Радуйся, яко отступницы от веры отеческия Тобою вразумляются;

Радуйся, яко Тобою козни врагов Православия посрамляются.

Радуйся, советы лукавыя и коварство еретиков разоряющая;

Радуйся, светом истиннаго богопознания нас просвещающая.

Радуйся, православных догматов Охранительнице;

Радуйся, учением истинным и доныне нас питающая.

Радуйся, земли Русския скорая Заступнице, любовь Свою и милость нам являющая.

Кондак 3

Сила Божия укрепи тя, преподобная мати Евфросиние, егда слышавши о величии чудес, исходящих от икон Богоматере, апостолом Лукою созданных, восхотела еси принести едину от них во град свой. Сего ради, создавши в нем обитель иноческую, испросила еси у благочестиваго царя Мануила и патриарха Царяграда Луки икону Пречистыя Владычицы Одигитрии, яже во Ефесе, да покровом Ея защищаеми, иноцы обители и вси людие града Полоцка в веселии сердец воспевают Богу: Аллилуия.

Икос 3

Имущи Матернее попечение о просвещении земли Русския, благоизволила еси, Владычице, даровати праотцем нашим икону Твою чудотворную, Одигитрию Ефесскую. Темже царь и святейший патриарх, уразумевше волю Твою, принесоша из Ефеса в Царьград икону сию, и отпустиша ю на Русь, да будет в знамение покрова Твоего всем людем русским, прославляющим милосердие Твое неизреченное, и воспевающим Ти с любовию таковая:

Радуйся, отчизну нашу яко жребий Свой возлюбившая;

Радуйся, лучами чудотворных икон землю Русскую озаряющая.

Радуйся, страну нашу Российскую достоянием Своим избравшая;

Радуйся, образ Твой чудотворный в утешение и радость даровати нам изволившая.

Радуйся, благое промышление о стране нашей явившая;

Радуйся, любовь Твою к русским людем показавшая.

Радуйся, град Полоцк иконою Твоею Ефесскою облагодатствовавшая;

Радуйся, во святем житии преподобную Евфросинию утвердившая.

Радуйся, Царьград на пути в землю Русскую посетившая;

Радуйся, вся страны православныя покровом милости Твоея осеняющая.

Радуйся, Путеводительнице, к Небесному Отечеству нас возводящая;

Радуйся, пред Богом милостивая наша Предстательнице.

Радуйся, земли Русския скорая Заступнице, любовь Свою и милость нам являющая.

Кондак 4

Бурю скорбей и напастей в людех Своих утолити хотящи, святую икону Твою Ефесскую, шествующую на Русь из земли Греческия, граду Корсуни даровала еси, Владычице, да познают вси христиане, коль сильна есть помощь Богоматере, и да поклоняются священному и прославленному образу Твоему, Господеви зовуще: Аллилуия.

Икос 4

Слышавше жителие Корсуни о пришествии иконы Твоея, Богородице Дево, и о чудесех от нея бываемых, скорбию одержими быша за отшествие чудотворнаго образа от града их. Обаче уведевше, яко сия пречестная икона в наследие христианом Руси даровася, благодаряху Тя, Пречистая, за милости Твоя, и отпустиша икону в надежде на предстательство Твое пред Богом. Мы же, обетование радости сея приемше, гласом хваления приносим Тебе таковая:

Радуйся, чудесы многими шествие иконы Твоея знаменавшая;

Радуйся, принесением ея град Корсунь освятившая.

Радуйся, иконою Твоею чудотворною жителей града возвеселившая;

Радуйся, предстательством о них Бога умилостивляющая.

Радуйся, икону Твою, яко проповедницу спасения, едино лето в Корсуни оставившая;

Радуйся, Предстательнице наша к Богу, мир спасающая.

Радуйся, всемогущество Христово иконою Твоею возвещающая;

Радуйся, дары милостей и исцелений от нея источающая.

Радуйся, о всех чтущих образ Твой промышляющая;

Радуйся, всем молящимся пред ним покрове и спасение.

Радуйся, скорбь людей корсунских о лишении образа Твоего в радость претворившая;

Радуйся, о всем мире христианстем Ходатаице.

Радуйся, земли Русския скорая Заступнице, любовь Свою и милость нам являющая.

Кондак 5

Боготечная звезда, землю Русскую сиянием преславных чудес просвещающая, явися чудотворная икона Твоя, Пресвятая Дево, из Корсуни принесенная, юже, яко дар Божественный восприимши, преподобная Евфросиния, радостию несказанною исполненная, постави в церкви Святаго Спаса града Полоцка, и от того часа наречеся дивная икона сия Корсунская. Сего ради молим Тя, Всемилостивая Владычице, освети и нас светом небесным, сохраняющи под кровом Твоим, и услыши глас всех верных страны нашея, любящих Тя и поющих Богу благодарственную песнь: Аллилуия.

Икос 5

Видевше чудеса и знамения от иконы Твоея, Пресвятая Владычице, князи и вси благовернии жителие полоцстии благоговейне храниша святыню сию, яже явися воистинну благая Одигитрия, на путь спасения многих приводящая; к Тебе бо прибегаху людие, помощи на вся дела своя просяще, и благодарная моления приносяще за избавление от скорбей и напастей. Сего ради тако прославляем Тя, Пречистая:

Радуйся, шествием иконы Твоея землю Русскую освятившая;

Радуйся, принесением на Русь честныя Твоея иконы нас обрадовавшая.

Радуйся, града Полоцка верная Хранительнице;

Радуйся, жителей его милосердная Покровительнице.

Радуйся, обитель преподобныя Евфросинии под Матерний Покров с любовию приемшая;

Радуйся, образом Твоим чудотворным обитель сию обогатившая.

Радуйся, преподобней Евфросинии небесная Покровительнице;

Радуйся, и в затворе иночестем дивная ея Собеседнице.

Радуйся, яко с верою и надеждою покланяемся пречистаго лика Твоего изображению;

Радуйся, яко от него приемлем благодатныя дары на пользу душ и телес наших.

Радуйся, святую икону сию в залог милости Своея нам даровавшая;

Радуйся, яко Тобою вера православная в стране нашей утверждается.

Радуйся, земли Русския скорая Заступнице, любовь Свою и милость нам являющая.

Кондак 6

Проповедница благодати от иконы Твоея явися Александра, дщи полоцскаго князя Брячислава, иже вручи княжне святыню града своего, благословив на брак с Великим князем Александром Невским. Таже, по глаголу летописца, оженися князь Александр Ярославич и венчася в Торопце, и остави благоверная супруга его икону Корсунскую в соборе града сего. Темже радующеся покрову Твоему, Пречистая, дарованному во образе сем, умиленною душею и сокрушенным сердцем взываем Богу: Аллилуия.

Икос 6

Возсия во граде Торопце, яко пресветлая заря, святая икона Твоя Корсунская, Богомати, пред неюже православнии людие во всех бедах, скорбех и печалех молитвенно колена преклоняют. Сего ради вси вернии с любовию к чудотворней иконе Твоей, Пречистая, притекающе, единеми усты и единым сердцем велегласно Тебе возглашают:

Радуйся, иконою Твоею святаго князя Александра с княжною Александрою благословившая;

Радуйся, любовь Божественную и согласие в сердца супругов вкоренившая.

Радуйся, домов благочестивых незримое ограждение;

Радуйся, благая Домостроительнице жития нашего.

Радуйся, град Торопец, яко место пребывания иконы Твоея освятившая;

Радуйся, по всей земли нашей его прославившая.

Радуйся, пришествием чудотворнаго образа Твоего землю Смоленскую осиявшая;

Радуйся, яко и в пределех Торопца славу чудес Твоих показала еси.

Радуйся, иконою Твоею град сей от всяких бед избавляющая;

Радуйся, благое о нем попечение явившая.

Радуйся, града Торопца похвало и славо;

Радуйся, гражданы его радостию небесною исполнившая.

Радуйся, земли Русския скорая Заступнице, любовь Свою и милость нам являющая.

Кондак 7

Хотяще полки сильных воинов литовских град Торопец пленити, огню и мечу землю нашу предати, и веру православную в ней разорити, обаче преславным заступлением Твоим, Пречистая Владычице, даровала еси благоверному князю Александру Невскому помощь, и град Твой от разорения чудесно спасла еси. О Владычице и Взбранная Воеводо воинства православнаго, сподоби и нас, вкупе с великим воином и заступником земли нашея, сокрушати врагов державы Российския, и воспевати Христу Богу нашему победную песнь: Аллилуия.

Икос 7

Новое знамение милости Твоея о граде Торопце явила еси, Пресвятая Дево, егда прииде на Русь воевода литовский Сапега с воинством великим, яко море грозное и мрачное, в скорбь погрузивше землю нашу и пленивше ю. Тогда вси жителие града устремишася в храм Твой, пред иконою Корсунскою со слезами молящеся о избавлении от погибели. Ты же, Пречистая, устрашила еси врагов, и бежаша неудержимо полки Сапеги от стен Торопца. Темже победу славную, всесильною помощию Твоею совершившуюся, и доныне православнии празднуют, воспевающе сице:

Радуйся, благовернаго князя Александра на подвиг ратный укрепившая;

Радуйся, мужество неодолимое воином его даровавшая.

Радуйся, град Твой Торопец от разорения избавившая;

Радуйся, в щит и ограждение цельбоносную икону Твою нам оставившая.

Радуйся, от огня, меча и нашествия иноплеменных нас свобождающая;

Радуйся, во бранех силу духа русских воинов возвышающая.

Радуйся, коварнаго врага внезапным бегством истребившая;

Радуйся, упования на помощь Твою не посрамившая.

Радуйся, полцы чуждих далече от святыни Твоея отгнавшая;

Радуйся, чтущим образ Твой на враги способствующая.

Радуйся, боголюбивых воинов на поли брани благая Покровительнице;

Радуйся, венцы мученическия убиенным православным воином уготовляющая.

Радуйся, земли Русския скорая Заступнице, любовь Свою и милость нам являющая.

Кондак 8

Странное и неизреченное чудо у иконы Твоея, Всемилостивая Владычице, совершися: девица некая, бесом томимая, молитв ради Церкве Святыя, наипаче же Твоим, Богомати, предстательством и благословением, потщися направити стопы своя во обитель преподобнаго Нила Столобенскаго, и тамо свободися от насилия диавола, и исцелися от болезни своея. Темже и нас грешных от действия диаволя свободи, Всеблагая, да благодарственно зовем Сыну Твоему и Богу: Аллилуия.

Икос 8

Весь мир преисполнен, яко звездами богосветлыми, чудотворными иконами Твоими, Богородице, в нихже икона Твоя Корсунская предивными чудесы сияет, и согревает хладная сердца наша знаменьми любве Твоея и милости. К Тебе убо прибегаем, Пресвятая Заступнице, и пред образом дивным молим Тя: исполни радости скорбящая сердца наша, мрак уныния разгони, умоли Сына Твоего прощение прегрешений нам даровати, и сподоби чистым сердцем воспевати Тебе тако:

Радуйся, благ временных и вечных Ходатаице;

Радуйся, живоносный источниче, всех нас животворяй.

Радуйся, девицу, злым духом одержимую, от мучения демонскаго свободившая;

Радуйся, яко иконою Твоею сила диаволя сокрушается.

Радуйся, козни духов злобы разрушающая;

Радуйся, от нападений их нас ограждающая.

Радуйся, ада и смерти попрание;

Радуйся, жизни вечныя дарование.

Радуйся, демонския полки побеждающая;

Радуйся, враги спасения нашего посрамляющая.

Радуйся, светом Божественныя благодати души наша озаряющая;

Радуйся, на подвиг духовныя брани нас невидимо укрепляющая.

Радуйся, земли Русския скорая Заступнице, любовь Свою и милость нам являющая.

Кондак 9

Всякое естество ангельское благоговейно Тебе служит, Небесе и земли Царице, человеческий же род непрестанныя хвалы Тебе приносит, и Твою святую икону с любовию почитает. Сего ради, в благодарную память Твою, жителие града Торопца воздвигоша новую соборную церковь в честь Корсунския иконы Твоея, Богомати, в нейже и доныне вернии не престают прославляти Тя, Владычице, воспевающе благодарственную песнь: Аллилуия.

Икос 9

Ветии многовещаннии не возмогут по достоянию воспети множество чудес, от святыя иконы Твоея являемых, имиже православныя людие от бед, напастей и всякаго зла сохраняеши, ибо в земли нашей прославися не токмо первописанная икона Твоя Корсунская, но и многи грады, веси, обители иноческия и храмы украсиша подобия ея, пред нимиже теплятся лампады неугасимыя и воздыхания молитвенная не умолкают. Сего ради благодарим Тя, Госпоже Всемилостивая, за дар сей отечеству нашему, и с веселием Тебе взываем:

Радуйся, благодать иконам Твоим даровавшая;

Радуйся, всю землю нашу лучами благодати озарившая.

Радуйся, страны Российския Покрове, ширший облака;

Радуйся, православныя веры в ней возвышение и утверждение.

Радуйся, грады и веси наша принесением иконы Твоея от бед сохраняющая;

Радуйся, храмы и домы наша иконою Твоею благодатно посещающая.

Радуйся, благолепный храм, аки жертву приятную Тебе принесенную, благословившая;

Радуйся, в красоте его красоту небеснаго храма показующая.

Радуйся, святых храмов Божиих благодатное освящение;

Радуйся, строителей их и благоукрасителей любовию Твоею покрывающая.

Радуйся, пришествием иконы Твоея радости наша умножающая;

Радуйся, иконою Твоею присно нас утешающая.

Радуйся, земли Русския скорая Заступнице, любовь Свою и милость нам являющая.

Кондак 10

Спасти хотяще град Торопец и окрестная селения его от всегубительныя язвы, людие, страхом смерти одержимии, притекоша с верою и надеждою к иконе Твоей Корсунстей, и с пением обносиша ю окрест домов своих. И не посрамися вера их: Ты бо, Всемилостивая, укротила еси бурю смертную, яко заступлением Твоим недузи отступаху, людие же, исцеление от болезни получивше, в радости сердец своих воспеваху Богу Спасителю нашему благодарственную песнь: Аллилуия.

Икос 10

Стену необоримую и крепкое заступление даровала еси граду Торопцу иконою Твоею чудотворною, Богородице Дево, ибо во дни тяжких испытаний и нападений вражиих помощь от святыя иконы Твоея получаху жителие града многочудесно.

Темже молимся Тебе, о Всеблагая Мати, якоже град сей древний многажды от погибели спасала еси, тако и нас грешных спасай от всяких бед, зол и напастей, предстательством Твоим к Сыну Твоему, да благодарственно зовем Ти:

Радуйся, от язвы всегубительныя чудесное избавление;

Радуйся, гнев Божий праведный, на ны движимый, утоляющая.

Радуйся, прекращением язвы благодатную силу иконы Твоея возвестившая;

Радуйся, милость Божию к нам грешным явившая.

Радуйся, яко принесением иконы Твоея болезни лютыя отступают;

Радуйся, яко паче жемчуга икона Твоя слезами радости украшается.

Радуйся, во дни мора и язвы непреложная наша надеждо и ограждение;

Радуйся, Предстательнице к Богу, мир спасающая.

Радуйся, иконою Твоею нам благодеющая;

Радуйся, щедроты великия на нас изливающая.

Радуйся, града Торопца Небесная Заступнице;

Радуйся, яко и ныне гражданы его любовию Твоею не оставляеши.

Радуйся, земли Русския скорая Заступнице, любовь Свою и милость нам являющая.

Кондак 11

Пение похвальное приносят вернии Тебе, Владычице Преблагая, яко от лет древних и доныне силу огненнаго естества укрощаеши иконою Твоею Корсунскою, и многая чудеса содеваеши: храм бо Твой и град Торопец от запаления огненнаго многажды неврежденны сохраняла еси покровом Твоим. Темже молим пред пречистым образом Твоим: избави нас от пламене страстей и от огня вечнаго, да спасеннии Тобою, воспоем Богу благодарственную песнь: Аллилуия.

Икос 11

Светозарная свеща явися предивная икона Твоя, во граде Торопце возсиявшая и всю страну нашу Российскую озарившая, Владычице Всемилостивая, се бо хромии ходят, разслабленнии востают, беснующиися исцеляются, людие от смертоносныя язвы избавляются, грады и домы от огня спасаются. Мы же, ведуще Тя яко источник благодатных исцелений, со дерзновением вопием:

Радуйся, Мати Врача Небеснаго;

Радуйся, душевных и телесных недугов Целительнице благодатная.

Радуйся, любве Божественныя светильниче светозарный;

Радуйся, свеще неугасимая, души верных светом Христовым осиявшая.

Радуйся, чудотворною иконою Твоею пламень огня угасившая;

Радуйся, от запаления огненнаго росою молитв Твоих избавляющая.

Радуйся, силою Твоею благодатною силу естества огненнаго победившая;

Радуйся, образ Твой яко неопалимую купину явившая.

Радуйся, землю Русскую светом Своим озарившая;

Радуйся, Псковския и Тверския земли солнце пресветлое.

Радуйся, от глада, хлада, труса, потопа, огня и меча страну нашу ограждающая;

Радуйся, хлебом насущным нас питающая.

Радуйся, земли Русския скорая Заступнице, любовь Свою и милость нам являющая.

Кондак 12

Благодать свыше даровася святей иконе Твоей Корсунстей, Владычице Преблагая, от неяже точатся исцеления и даруется утешение людем православным, наипаче же Тебе, Матерь Света, в песнех величающим. Темже молим Тя: сохрани град Твой и возлюбленную Тобою страну Российскую от всяких нестроений, неверия и суеверия, от тлетворных учений, да осеняеми покровом Твоим, сподобимся предстати престолу Царя Славы, поюще о Тебе хвалебную песнь: Аллилуия.

Икос 12

Поюще чудеса и милости, от иконы Твоея Корсунския являемыя, радуемся неизреченно, и с любовию прибегаем к Тебе, Небесной Заступнице и Покровительнице нашей: хвалим, славим и величаем Тя, честнейшую Херувим и славнейшую без сравнения Серафим, веруем, яко и в посленяя времена даруеши благодатную помощь, и имиже веси судьбами сохраниши Церковь нашу Православную и чад ея. О Всемилостивая Мати, покрый нас честным Твоим омофором, и избави нас от всяких бед и искушений вражиих, да воспоем Тебе непрестанно гласом радования:

Радуйся, Церкве Небесныя и земныя украшение;

Радуйся, во славе Небесней одесную Бога пребывающая.

Радуйся, яко Тобою Русь православная хранится;

Радуйся, яко Тобою весь род христианский хвалится.

Радуйся, праотцы и отцы наша во благочестии сохраньшая;

Радуйся, царства Российскаго благодатное утверждение.

Радуйся, яко на икону Твою взирающе, Самой Тебе, Богородице, покланяемся;

Радуйся, яко иконою Твоею святою окамененная сердца наша умягчаеши.

Радуйся, яко во отрочестве бывшу святителю Тихону под кровом Твоим во граде Торопце пожити даровала еси;

Радуйся, яко ныне вкупе с ним молиши за нас Сына Твоего и Бога.

Радуйся, торжество веры истинныя в стране нашей являющая;

Радуйся, Радосте наша, двери райския верным отверзающая.

Радуйся, земли Русския скорая Заступнице, любовь Свою и милость нам являющая.

Кондак 13

О Всепетая Мати, Царице Небесе и земли, Радость всему миру родившая, приими сие малое хваление наше, пред чудотворною иконою Твоею с верою и любовию возносимое, и всесильными молитвами Твоими спаси землю Русскую, отечество наше от врагов защити, печали наша в радость претвори, в любви и согласии всех людей православных соедини, и сподоби внити в радость Господа и Спасителя нашего, возносяще Ему ангельскую песнь: Аллилуия.

Сей Кондак читается трижды, затем Икос 1 и Кондак 1

Молитва

О Всемилостивая Госпоже, Мати Господа и Спасителя нашего, Небесе и земли Царице! Ты благоизволила еси даровати стране нашей образ Твой, святым апостолом и евангелистом Лукою написанный, и град Торопец пришествием Твоим возвеличила еси, повелевающи всем притекати к Тебе с верою и надеждою на скорую помощь и заступление.

Приими хвалебное пение сие от нас, недостойных раб Твоих, и вознеси молитвы наша ко Престолу Сына Твоего и Бога, да милостив будет нам грешным, с верою и любовию покланяющимся чудотворному образу Твоему, воспоминающе многая и дивная чудеса, во граде сем и во иных весех и градех земли Русския явленных и являемых. Спаси и сохрани, Владычице, Церковь Русскую Правосланую, страну нашу Российскую, град наш и вся грады и страны христианския от глада, смертоносныя язвы, огня, меча, междоусобныя брани, даруй нам воздухов благорастворение и земли плодоносие.

О Пресвятая Дево, Благая Одигитрие, указуй нам правый путь ко спасению, еретическая возстания низложи, заблуждшия во едино Христово стадо собери, уврачуй язвы душ и телес наших, просвети наш ум, омраченный страстьми, даруй нам время на покаяние и исправление греховныя нашея жизни, и избави нас от скорбей, бед и болезней, от внезапныя смерти и вечныя муки, да спасаеми всесильным Твоим заступлением, Царствие Небесное унаследуем, и со всеми святыми воспоем Пресвятую Троицу, Отца, и Сына, и Святаго Духа, и Твое к нам милосердие во веки веков. Аминь.