Акафист Пресвятой Богородице пред иконой «Почаевская»

Составилен протоиереем Андреем Хойнацким, одобрен определением Св. Синода 27 июля /14 августа 1883 года № 1372.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 13 апреля (31 марта ст. ст.); 21 сентября (08 сентября ст. ст.); 05 августа (23 июля ст. ст.)

Утвержден для общецерковного использования.

Конда́к 1.

Взбра́нной Воево́де родо́в христиа́нских и страны́ на́шея изве́стней Изба́вительнице хвале́бныя пе́сни принесе́м, ве́рнии, на святе́й горе́ Ея́ собра́вшеся; Ты́ же, я́ко иму́щая милосе́рдие неизрече́нное, о Влады́чице Богоро́дице, моле́ния на́шего, пред чудотво́рным Твои́м о́бразом возноси́маго, не отве́ржи, да в умиле́нии серде́ц зове́м Ти́:

Ра́дуйся, похвало́ Поча́евская и всего́ ми́ра наде́ждо и утеше́ние.

И́кос 1.

Арха́нгел Гаврии́л пе́рвее «Ра́дуйся!» тебе́ приноша́ше, Влады́чице, егда́ зача́тие Сы́на Бо́жия благовествова́ше, по пресла́внем же Успе́нии Твое́м вся́ Небе́сныя си́лы ту́южде хвалу́ на Небеси́ Тебе́ непреста́нно прино́сят; ка́ко у́бо мы́, гре́шнии, своя́ гла́сы с гла́сы Безпло́тных совокупи́ти де́рзнем? Оба́че, милосе́рдие Твое́ ко все́м ка́ющимся помина́юще, устне́ на́ша со стра́хом и любо́вию отверза́ем, глаго́люще си́це:

Ра́дуйся, ми́лости бе́здно; ра́дуйся, любве́ неистощи́мое мо́ре.

Ра́дуйся, ро́да христиа́нскаго блага́я Предста́тельнице; ра́дуйся, оби́тели Поча́евския стено́ неруши́мая.

Ра́дуйся, правосла́вныя лю́ди на го́ру Поча́евскую у́зами любве́ привлека́ющая; ра́дуйся, вся́кую печа́ль от ду́ш и́х отгоня́ющая.

Ра́дуйся, Ея́же чудотво́рный о́браз, я́ко звезда́, от горы́ Поча́евския на́с путево́дствует; ра́дуйся, Е́йже возноси́мыя моли́твы стра́стныя прило́ги вско́ре отража́ют.

Ра́дуйся, явле́нием Свои́м на горе́ се́й лю́ди уте́шившая; ра́дуйся, сле́д стопы́ Твоея́ на не́й на́м оста́вившая.

Ра́дуйся, ве́рных при́сное дерзнове́ние; ра́дуйся, сумня́щихся до́брое утвержде́ние.

Ра́дуйся, похвало́ Поча́евская и всего́ ми́ра наде́ждо и утеше́ние.

Конда́к 2.

Ви́девше пусты́нницы поча́евстии и просте́ц Иоа́нн Босы́й Пресвяту́ю Богоро́дицу на скале́ во о́гненном столпе́ яви́вшуюся, сле́д стопы́ Ея́ облобыза́ху и водо́ю, зде́ от ка́мени исте́кшею, окропля́яся, вопия́ху Бо́гу: Аллилу́иа.

И́кос 2.

Ра́зум недоразумева́емый о явле́нии Твое́м, Влады́чице, и́щуще, в сицево́м упова́нии утвержда́ется, я́ко пе́рвее от ага́рян, по́слежде от еретико́в опло́т Правосла́вия на горе́ Поча́евстей утверди́ти благоволи́ла еси́, сего́ ра́ди в Тво́й святы́й хра́м приходя́ще, те́плою ве́рою сердца́ на́ша исполня́ем, глаго́лющи:

Ра́дуйся, и́стинныя ве́ры утвержде́ние; ра́дуйся, злове́рия я́вное обличе́ние.

Ра́дуйся, дре́вле в неопали́мей купине́ сина́йстей извести́вшаяся; ра́дуйся, христиа́ном в столпе́ о́гненном зде́ яви́вшаяся.

Ра́дуйся, я́ко в пещи́ горя́щей, росо́ю спасе́ннии, Авраа́мстии о́троцы Тя́ предвозвести́ша; ра́дуйся, я́ко водо́ю от сле́да стопы́ Твоея́ исцеле́ннии благода́ть Твою́ пропове́даша.

Ра́дуйся, зе́млю на́шу, дре́вле от ага́рян разоре́нную, явле́нием Твои́м тогда́ уте́шившая; ра́дуйся, и ны́не мно́гими зна́меньми моля́щияся зде́ ободря́ющая.

Ра́дуйся, ка́ющихся ско́рое услы́шание; ра́дуйся, подвиза́ющимся по́мощь и прибе́жище.

Ра́дуйся, и неве́дущих вразумле́ние; ра́дуйся, и малоду́шных укрепле́ние.

Ра́дуйся, похвало́ Поча́евская и всего́ ми́ра наде́ждо и утеше́ние.

Конда́к 3.

Си́лу сугу́быя благода́ти яви́ла еси́, Влады́чице, на горе́ Поча́евстей, егда́ ме́сто явле́ния Твоего́ по трие́х ста́х ле́тех чудотво́рною ико́ною Свое́ю обогати́ла еси́, ю́же руко́ю святи́теля Неофи́та Е́ллина, из Москвы́ гряду́щаго, пе́рвее боя́рыне А́нне дарова́ла еси́, пото́м же от нея́ во оби́тель Поча́евскую прия́ла еси́, ра́дующимся лю́дем и пою́щим Бо́гу: Аллилу́иа.

И́кос 3.

Иму́щи в дому́ свое́м ико́ну Твою́, Влады́чице, боя́рыня А́нна и исцеле́ние от нея́ слепорожде́нному бра́ту своему́ Фили́ппу бы́вшее уве́девши, а́бие ду́хом ре́вности о сла́ве Твое́й возгоре́ся и оби́тель из ка́мене во и́мя пречестна́го Успе́ния Твоего́ пусты́нником поча́евским устроя́ет, в не́йже чудотво́рному о́бразу Твоему́ покланя́ющеся взыва́ет си́це:

Ра́дуйся, сокро́вище бога́тное в Твое́й святе́й ико́не на́м препода́вшая; ра́дуйся, святи́теля руко́ю дарова́нным о́бразом Твои́м зе́млю на́шу освяти́вшая.

Ра́дуйся, ду́ши на́ша от земна́го бога́тства отвраща́ющая; ра́дуйся, Сла́ву Бо́жию пе́ти на́с науча́ющая.

Ра́дуйся, я́ко чудеса́ Твоя́ зря́ще, к Небеси́ сердцы́ свои́ми восхища́емся; ра́дуйся, я́ко во оби́тели Твое́й, а́ки в преддве́рии рая́ обрета́емся.

Ра́дуйся, правосла́вныя лю́ди ико́ною Твое́ю уте́шившая; ра́дуйся, от все́х стра́н моля́щияся лю́ди во оби́тель Поча́евскую призыва́ющая.

Ра́дуйся, Е́юже ве́ра умножа́ется; ра́дуйся, Е́юже уны́ние отго́нится.

Ра́дуйся, и́ноков поча́евских при́сное Ра́дование; ра́дуйся, мирски́х люде́й непосты́дное Упова́ние.

Ра́дуйся, похвало́ Поча́евская и всего́ ми́ра наде́ждо и утеше́ние.

Конда́к 4.

Бу́ря ерети́ческаго неи́стовства на святу́ю оби́тель Твою́ устреми́вшися, Влады́чице, святу́ю ико́ну Твою́ руко́ю злы́х иконобо́рцев плени́вши и на злохуле́ние те́х подви́гши, вско́ре гне́вом Бо́жиим уде́ржана бы́сть, егда́ неви́димая си́ла безсту́дне пи́ршествующия ху́льники, а́ки Артаксе́ркса и И́рода, сляче́ и в неду́г вве́рже, над святы́нею Твое́ю руга́вшихся и не уве́девших пе́ти: Аллилу́иа.

И́кос 4.

Слы́шаша и́ноцы поча́евстии и вси́ правосла́внии лю́дие, я́ко свята́я ико́на Твоя́ по седмина́десяти ле́тех ерети́ческаго плене́ния во святу́ю оби́тель от посра́мленных хули́телей возвраща́ется, а́бие на сре́тение ея́ изыдо́ша и пла́ч сво́й на ра́дость прело́жше, вопия́ху Тебе́:

Ра́дуйся, христиа́ном прибе́жище; ра́дуйся, еретико́в обличе́ние.

Ра́дуйся, оби́тель Поча́евскую ико́ны Твоея́ до конца́ не лиши́вшая; ра́дуйся, злохуле́ние иконобо́рцев посрами́вшая.

Ра́дуйся, я́ко в беда́х не уныва́ти и на́с науча́еши; ра́дуйся, я́ко правосу́дию Бо́жию ве́ровати на́м повелева́еши.

Ра́дуйся, Е́юже Правосла́вие во стране́ на́шей утверди́ся; ра́дуйся, Е́юже и вся́ вселе́нная воплоще́нную И́стину прия́ти сподо́бися.

Ра́дуйся, долготерпе́нию Бо́жию подража́ющая; ра́дуйся, в терпе́нии лю́ди Твоя́ утвержда́ющая.

Ра́дуйся, я́ко смире́ннии Тобо́ю утеше́ние прие́млют; ра́дуйся, я́ко гордели́вии Тобо́ю смиря́ются.

Ра́дуйся, похвало́ Поча́евская и всего́ ми́ра наде́ждо и утеше́ние.

Конда́к 5.

Боготе́чная звезда́ и́щущим спасе́ния яви́лася еси́, Влады́чице, к Со́лнцу Пра́вды си́х приводя́щая, я́коже бо в земне́м житии́ Твое́м о лю́дех предста́тельница к Сы́ну Твоему́ в Ка́не Галиле́йстей показа́лася еси́, та́ко и по пресла́вном Твое́м на Небеса́ отше́ствии моле́ния о ве́рных, от коне́ц земли́ приноси́мая, к Сы́ну Твоему́ возно́сиши и зде́, на горе́ Поча́евстей, исцеле́ния многоразли́чная от Него́ лю́дем подае́ши, вопию́щим Бо́гу: Аллилу́иа.

И́кос 5.

Ви́деша лю́дие, на го́ру Поча́евскую, я́коже в дре́вняя, та́ко и в после́дняя ле́та притека́ющии, мно́жества исцеле́ний, Тобо́ю подава́емая, в жела́нии спасе́ния ду́ши своя́ утвержда́ху и о гресе́х свои́х покая́ние те́плое приноша́ху, вопию́ще Тебе́:

Ра́дуйся, слепы́х прозре́ние и хромы́х исцеле́ние; ра́дуйся, бе́сных от де́монов избавле́ние.

Ра́дуйся, плене́ннаго и́нока во оби́тель Твою́ на возду́се чуде́сне возврати́вшая; ра́дуйся, младе́нца Симео́на предуме́рша по моли́тве ста́рицы воскреси́вшая.

Ра́дуйся, я́ко в си́х зна́мениих си́ла дре́вних чуде́с Твои́х лю́дем па́ки яви́ся; ра́дуйся, я́ко исцеле́ния от святы́я ико́ны Твоея́ и в после́дняя дни́ не оскуде́ша.

Ра́дуйся, во все́м ми́ре исто́чник исцеле́ний от святы́х ико́н Твои́х подаю́щая; ра́дуйся, па́че си́х духо́вными дарова́ньми моля́щияся обогаща́ющая.

Ра́дуйся, Е́юже правосла́внии ро́ди хва́лятся; ра́дуйся, к Ея́же по́мощи и малове́рнии притека́ют.

Ра́дуйся, земноро́дных упова́ние; ра́дуйся, Небе́сных чино́в ра́дование.

Ра́дуйся, похвало́ Поча́евская и всего́ ми́ра наде́ждо и утеше́ние.

Конда́к 6.

Пропове́дницы сла́вы Пречи́стыя Де́вы яви́шася ага́ряне на оби́тель Поча́евскую наше́дшии и виде́ния Пречи́стыя Богоро́дицы с преподо́бным И́овом пе́рвее не уразуме́вшии; егда́ бо стре́лы, от ни́х пуща́емыя, па́ки на ня́ устреми́шася, а́бие си́лу Влады́чицы проразуме́вше и покая́ние о безу́мии свое́м прине́сше, ве́рою возопи́ша: Аллилу́иа.

И́кос 6.

Возсия́ виде́ние Твое́, Влады́чице, на горе́ Поча́евстей, егда́ бра́тия оби́тели, зело́ от ага́рян осажда́еми, с ве́лиим во́плем моле́ние пред свято́ю Твое́ю ико́ною и пред ра́кою преподо́бнаго И́ова возноша́ше, егда́ же бра́тия ага́ряны, виде́нием си́м смяте́нныя и бежа́щия, ви́деша, а́бие с весе́лием воспе́ша Тебе́ си́це:

Ра́дуйся, Изба́вительнице на́ша и спасе́ние; ра́дуйся, ро́да христиа́нскаго при́сное вспоможе́ние.

Ра́дуйся, нечести́выя враги́ от Твоея́ святы́ни отгна́вшая; ра́дуйся, в покая́ние и́х приводя́щая.

Ра́дуйся, Ея́же и неви́димии спасе́ния на́шего врази́ трепе́щут; ра́дуйся, Е́йже Святи́и А́нгели и преста́вльшияся пра́ведницы на Небеси́ покланя́ются.

Ра́дуйся, преподо́бнаго И́ова в моли́тву с Собо́ю прие́мшая; ра́дуйся, ага́ряны ко Свято́му Креще́нию виде́нием Свои́м приве́дшая.

Ра́дуйся, я́ко Тобо́ю ве́рнии стра́х сме́ртный в коне́ц отложи́ша; ра́дуйся, я́ко Тебе́ ра́ди не́цыи от ага́рян богобоя́зненнии и́ноцы зде́ яви́шася.

Ра́дуйся, и́стины при́сное изъявле́ние; ра́дуйся, заблужда́ющимся до́брое вразумле́ние.

Ра́дуйся, похвало́ Поча́евская и всего́ ми́ра наде́ждо и утеше́ние.

Конда́к 7.

Хотя́щи жела́ние ве́чнаго живота́ возгре́ти в сердца́х христиа́нских, Пресвята́я Богоро́дица боля́щия чудесы́ Свои́ми исцеля́ет, бе́сы изгоня́ет, плене́нныя свобожда́ет, ме́ртвыя воскреша́ет, да мы́ вси́, си́лу Бо́жию уразуме́вше, земна́я возненави́дим и о душа́х свои́х попече́ние приложи́м, непреста́нно вопию́ще Бо́гу: Аллилу́иа.

И́кос 7.

Но́выя и тягча́йшия беды́ претерпе́ оби́тель Поча́евская, егда́ вку́пе со все́ю страно́ю от Правосла́вия ле́стию отто́рженная во облада́ние еретико́в вдаде́ся, оба́че проше́дшим сто́м и десяти́м ле́том па́ки правосла́вным христиа́ном вдана́ бы́сть, в ню́же правосла́внии и́ноцы, прише́дше и святы́я мо́щи преподо́бнаго И́ова из-под спу́да изъе́мше, к чудотво́рному о́бразу Влады́чицы припа́даху, глаго́люще:

Ра́дуйся, Правосла́вия защи́тнице; ра́дуйся, еретико́в обличи́тельнице.

Ра́дуйся, оби́тель Твою́ до конца́ не оста́вившая; ра́дуйся, стра́ху Бо́жию на́с науча́ющая.

Ра́дуйся, я́ко предста́тельством Твои́м страна́ Волы́нская па́ки ко Правосла́вию возврати́ся; ра́дуйся, я́ко от ле́т дре́вних мно́зи еретицы́ Твои́м вразумле́нием испра́вишася.

Ра́дуйся, во святу́ю Ла́вру Твою́ ве́рных на моли́тву па́ки призыва́ющая; ра́дуйся, и неве́рныя зде́ поклоня́тися правосла́вней святы́не науча́ющая.

Ра́дуйся, Ю́же пра́ведницы и пра́веднии непреста́нно воспева́ют; ра́дуйся, к Не́йже и па́дшии в покая́нии притека́ют.

Ра́дуйся, отсту́пников к ве́ре возвраще́ние; ра́дуйся, прельща́емых к све́ту и́стины возведе́ние.

Ра́дуйся, похвало́ Поча́евская и всего́ ми́ра наде́ждо и утеше́ние.

Конда́к 8.

Стра́нное чу́до зри́м о Тебе́, Богома́ти, ели́ко бо теле́снии неду́зи святы́я Твоея́ ико́ны целова́нием и воды́ поча́евския кропле́нием исцеля́ются, та́ко и душе́вныя стра́сти ви́дением святы́ни Твоея́ отъе́млются, ве́ра утвержда́ется и умиле́ния сердца́ на́ша исполня́ются, пою́щих Бо́гу: Аллилу́иа.

И́кос 8.

Ве́сь а́з недосто́йный греха́ми испо́лнихся, мирско́му разсе́янию вда́вся и о души́ свое́й вознераде́в, оба́че на святу́ю ико́ну Твою́, Влады́чице, взира́я, и просвеще́ние от нея́ безчи́сленным лю́дем, зде́ приходя́щим, ви́дя, па́ки на пу́ть спасе́ния устремля́юся и в ра́дости се́рдца воспева́ю Ти́ си́це:

Ра́дуйся, чистоты́ сокро́вище; ра́дуйся, ми́лостей бе́здно.

Ра́дуйся, к Сы́ну Твоему́ о ве́рных моле́ния вы́ну принося́щая; ра́дуйся, моле́ния гре́шных не отверга́ющая.

Ра́дуйся, я́ко Тобо́ю мно́зи отча́яния грехо́внаго избего́ша; ра́дуйся, я́ко призыва́ющии и́мя Твое́ от паде́ния стра́ннаго возста́ша.

Ра́дуйся, Е́юже иконобо́рная е́ресь во вселе́нней посрами́ся; ра́дуйся, Е́юже и́стинная ве́ра Волы́нской стране́ возврати́ся.

Ра́дуйся, к по́двигу целому́дрия ду́ши возводя́щая; ра́дуйся, оби́дящим проща́ти науча́ющая.

Ра́дуйся серде́ц на́ших умиле́ние; ра́дуйся, ду́ш на́ших упова́ние.

Ра́дуйся, похвало́ Поча́евская и всего́ ми́ра наде́ждо и утеше́ние.

Конда́к 9.

Вся́кия отсту́пства и ерети́ческая блужда́ния пока́явшемуся наро́ду земли́ Волы́нския отпусти́ла еси́, Влады́чице, и па́ки исто́чник исцеле́ний от чудотво́рныя Твоея́ ико́ны, от сле́да стопы́ Твоея́ на горе́ Поча́евстей в правосла́вной Ла́вре Твое́й лю́дем откры́ла еси́, то́кмо а́ще покая́ние о гресе́х свои́х принесу́т Бо́гу и, о Твое́й по́мощи не сумня́щеся, возопию́т Ему́: Аллилу́иа.

И́кос 9.

Вети́я сла́вы Твоея́ яви́шася, Влады́чице, слепи́и и хро́мии исцеле́ние от Твоея́ ико́ны, правосла́вным лю́дем возвраще́нныя, прия́вшии, я́ко и ерети́ческой жене́ не́коей боля́щей, Тя́ в по́мощь призва́ти и по исцеле́нии и́стинную ве́ру испове́дати и облобыза́ти, на́м же вопи́ти Тебе́ си́це:

Ра́дуйся, Царя́ Небе́снаго умоле́ние; ра́дуйся, земны́х при́сное предста́тельство.

Ра́дуйся, от лю́терских заблужде́ний жену́ не́кую неду́га исцеле́нием отврати́вшая; ра́дуйся, вся́ лю́ди во и́стине Правосла́вия уве́рившая.

Ра́дуйся, я́ко Тебе́ ра́ди правосла́внии лю́дие столькра́ты прельще́ния ага́рянская победи́ша; ра́дуйся, я́ко Тебе́ ра́ди и совраще́ннии от латы́н па́ки правосла́вную ве́ру облобыза́ша.

Ра́дуйся, к Не́йже вси́ живу́щии моли́твенно о́чи воздвиза́ют; ра́дуйся, Ю́же и моля́щиися о упокое́нии уме́рших в по́мощь призыва́ют.

Ра́дуйся, и от жите́йских ну́жд притека́ющия к Тебе́ изъе́млющая; ра́дуйся, па́че си́х вся́кия ну́жды претерпева́ющим кре́пость да́рствующая.

Ра́дуйся, христолюби́вому во́инству во бране́х вспоможе́ние; ра́дуйся, на де́моны во́инствующим благо́е наставле́ние.

Ра́дуйся, похвало́ Поча́евская и всего́ ми́ра наде́ждо и утеше́ние.

Конда́к 10.

Спасти́ хотя́щи Пречи́стая Богоро́дица препро́стую не́кую ста́рицу, во ослепле́нии латы́нстем бы́вшую и вну́ку ма́лую иму́щую, Правосла́вием у́бо просвеще́нную, но теле́сными очесы́ слепотству́ющу, си́ма обе́ма благо́е жела́ние влага́ет, е́же на горе́ Поча́евстей чудотво́рному Ея́ о́бразу поклони́тися, иде́же а́бие слепу́ю отрокови́цу чуде́сне исцеля́ет и ста́рицу правосла́вную ве́ру испове́дати науча́ет, вопию́щую Бо́гу: Аллилу́иа.

И́кос 10.

Стена́ неруши́мая и́стинныя ве́ры яви́лася еси́, Влады́чице, зане́, я́коже нечести́вии еретицы́ от прославле́ния Тебе́, я́ко И́стинныя Богоро́дицы, с упо́рством отверго́шася, та́ко и правосла́внии в ве́ре Твое́й тве́рди пребы́ша и от моли́тв, непреста́нно Тебе́ приноси́мых, николи́же отврати́тися восхо́щут, и си́х ра́ди ерети́ческих глаго́л во ушеса́ своя́ приима́ти не де́рзнут, но се́рдцем благода́рным восхваля́ти Тя́ не преста́нут, глаго́люще:

Ра́дуйся, христиа́ном отра́до и утеше́ние; ра́дуйся, А́нгельским чино́м сла́во и поклоне́ние.

Ра́дуйся, от льсти́вых глаго́л ерети́ческих на́с отвраща́ющая; ра́дуйся, па́мятованием ми́лостей Твои́х умы́ на́ша к Бо́гу вознося́щая.

Ра́дуйся, святы́я Апо́столы ко Успе́нию Твоему́ на о́блацех возду́шных призва́вшая; ра́дуйся, и гре́шныя лю́ди в то́й де́нь на го́ру Поча́евскую в ты́сящах и тма́х на вся́ко ле́то собира́ющая.

Ра́дуйся, Ея́же ра́ди христиа́не тру́дность пути́, а́ки сла́дкое упокое́ние, подъе́млют; ра́дуйся, Ея́же ра́ди и лени́вии подража́ти и́м тща́тся.

Ра́дуйся, и́ноком сла́дость мирску́ю забы́ти благода́тию Твое́ю посо́бствующая; ра́дуйся, вспя́ть озира́ющияся сновиде́ньми гро́зными устраша́ющая.

Ра́дуйся, Це́ркве Христо́вы лу́чшая диади́мо; ра́дуйся, страны́ на́шея щи́те неодоли́мый.

Ра́дуйся, похвало́ Поча́евская и всего́ ми́ра наде́ждо и утеше́ние.

Конда́к 11.

Пе́ние благода́рное о Твои́х, Влады́чице, благодея́ниях во все́м ми́ре от христиа́н возноси́мое, а́ки фимиа́м, к Небеси́ непреста́нно восходя́щий, помышля́юще, и на́ша убо́гая хвале́ния не отврати́ти Тебе́ про́сим, еще́ же и благода́ть покая́ния дарова́ти Тебе́ мо́лим, со упова́нием пою́ще Бо́гу: Аллилу́иа.

И́кос 11.

Све́т живота́ вре́меннаго и ве́чныя жи́зни упова́ние яви́лася еси́, Влады́чице, челове́ку не́коему в Бессара́бии умре́ти иму́щему, но внеза́пу, по вкуше́нии воды́ от святы́ни Поча́евския, здра́ву бы́вшему, е́же сро́дницы его́ ви́девше, со стра́хом и умиле́нием Тебе́ воззва́ша:

Ра́дуйся, боля́щих исцеле́ние; ра́дуйся, скорбя́щих слы́шание.

Ра́дуйся, Тобо́ю бо сме́рть прише́дшая отгна́ся; ра́дуйся, Тобо́ю бо ве́ра несумне́нная на́м дарова́ся.

Ра́дуйся, я́ко предвеща́ние Гаврии́ла пред о́чию на́шею сбыва́ется; ра́дуйся, я́ко от все́х родо́в, по глаго́лу Твоему́, ны́не и при́сно ублажа́ешися.

Ра́дуйся, го́ру Поча́евскую, я́ко ме́сто пребыва́ния Твоего́ освяти́вшая; ра́дуйся, а́ки вторы́й Назаре́т ту́ю яви́вшая.

Ра́дуйся, Я́же никого́же упова́ния отврати́вшая; ра́дуйся, все́х моли́твы те́пле прие́млющая.

Ра́дуйся, здра́вие на́м подава́ющая; ра́дуйся, ко спасе́нию на́с возводя́щая.

Ра́дуйся, похвало́ Поча́евская и всего́ ми́ра наде́ждо и утеше́ние.

Конда́к 12.

Благода́ть исцеле́ний и умиле́ния моли́твеннаго от Твоея́, Влады́чице, ико́ны источа́емая, да не вотще́ душа́м на́шим бу́дет, а́ще бо гре́х ра́ди во окамене́нное безчу́вствие впадо́хом, оба́че, я́ко иму́щая вла́сть ме́ртвыя воскреша́ти, и на́ше пробуди́ душе́вное омертве́ние и по́мыслом лу́чшим сердца́ на́ша озари́, да, грехо́вную пре́лесть возненави́девше, воспое́м Бо́гу: Аллилу́иа.

И́кос 12.

Пою́ще Твоя́ чудеса́ во оби́тели Поча́евстей явле́нная, мо́лим Тя́, Влады́чице, лица́ Твоего́ от страны́ на́шея не отврати́, но и все́м приходя́щим на святу́ю го́ру Твою́ и ми́лости от Тебе́ и́щущим во благо́е проше́ние испо́лни, да вси́ воспою́т Ти́ си́це:

Ра́дуйся, всепра́веднаго Бо́га умилостивле́ние; ра́дуйся, христиа́н ко Христу́ дерзнове́ние.

Ра́дуйся, торжество́ ве́ры в Ла́вре Твое́й явля́ющая; ра́дуйся, сердца́ челове́ков любо́вию распаля́ющая.

Ра́дуйся, я́ко дре́вним чудесе́м подо́бное зде́ ви́дети лю́дие сподо́бишася; ра́дуйся, я́ко гора́ сия́, а́ки вторы́й Сина́й, в страна́х христиа́нских просла́вися.

Ра́дуйся, Бо́га, на земли́ я́вльшагося, во чре́ве Твое́м поне́сшая; ра́дуйся, челове́ки моли́твою Твое́ю к Бо́гу вознося́щая.

Ра́дуйся, ико́ну Твою́, я́ко пропове́дницу спасе́ния во оби́тели Твое́й оста́вившая; ра́дуйся, сле́д стопы́ Твоея́, целе́бною водо́ю исполня́емый, чудесы́ просла́вившая.

Ра́дуйся, с небе́сных высо́т на рабы́ Твоя́ призира́ющая; ра́дуйся, на благи́я дея́ния ве́рныя наставля́ющая.

Ра́дуйся, похвало́ Поча́евская и всего́ ми́ра наде́ждо и утеше́ние.

Конда́к 13.

О Всепе́тая Ма́ти Христа́ Бо́га, вся́ ро́ды христиа́нския любо́вию Себе́ всынови́вшая, досто́йныя похвалы́ воспе́ти Тебе́ недоуме́ем мы́, гре́шнии, оба́че, любо́вию Твое́ю побежда́емии и к Твоему́ чудотво́рному о́бразу о́чи своя́ вознося́ще, мо́лим Тя́: в боре́нии и ну́ждах на́ших не оста́ви ча́д Твои́х, заступле́нию Твоему́ те́пле ве́рующих и Сы́ну Твоему́ вопию́щих: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

Арха́нгел Гаврии́л пе́рвее «Ра́дуйся!» тебе́ приноша́ше, Влады́чице, егда́ зача́тие Сы́на Бо́жия благовествова́ше, по пресла́внем же Успе́нии Твое́м вся́ Небе́сныя си́лы ту́южде хвалу́ на Небеси́ Тебе́ непреста́нно прино́сят; ка́ко у́бо мы́, гре́шнии, своя́ гла́сы с гла́сы Безпло́тных совокупи́ти де́рзнем? Оба́че, милосе́рдие Твое́ ко все́м ка́ющимся помина́юще, устне́ на́ша со стра́хом и любо́вию отверза́ем, глаго́люще си́це:

Ра́дуйся, ми́лости бе́здно; ра́дуйся, любве́ неистощи́мое мо́ре.

Ра́дуйся, ро́да христиа́нскаго блага́я Предста́тельнице; ра́дуйся, оби́тели Поча́евския стено́ неруши́мая.

Ра́дуйся, правосла́вныя лю́ди на го́ру Поча́евскую у́зами любве́ привлека́ющая; ра́дуйся, вся́кую печа́ль от ду́ш и́х отгоня́ющая.

Ра́дуйся, Ея́же чудотво́рный о́браз, я́ко звезда́, от горы́ Поча́евския на́с путево́дствует; ра́дуйся, Е́йже возноси́мыя моли́твы стра́стныя прило́ги вско́ре отража́ют.

Ра́дуйся, явле́нием Свои́м на горе́ се́й лю́ди уте́шившая; ра́дуйся, сле́д стопы́ Твоея́ на не́й на́м оста́вившая.

Ра́дуйся, ве́рных при́сное дерзнове́ние; ра́дуйся, сумня́щихся до́брое утвержде́ние.

Ра́дуйся, похвало́ Поча́евская и всего́ ми́ра наде́ждо и утеше́ние.

Конда́к 1.

Взбра́нной Воево́де родо́в христиа́нских и страны́ на́шея изве́стней Изба́вительнице хвале́бныя пе́сни принесе́м, ве́рнии, на святе́й горе́ Ея́ собра́вшеся; Ты́ же, я́ко иму́щая милосе́рдие неизрече́нное, о Влады́чице Богоро́дице, моле́ния на́шего, пред чудотво́рным Твои́м о́бразом возноси́маго, не отве́ржи, да в умиле́нии серде́ц зове́м Ти́:

Ра́дуйся, похвало́ Поча́евская и всего́ ми́ра наде́ждо и утеше́ние.

Моли́тва.

К Тебе́, о Богома́ти, моли́твенно притека́ем мы́, гре́шнии, чудеса́ Твоя́, во святе́й ла́вре Поча́евстей явле́нная, помина́юще и о свои́х сокруша́ющеся прегреше́ниих. Ве́мы, Влады́чице, ве́мы, я́ко не подоба́ше на́м, гре́шным, чесого́ проси́ти, то́кмо о е́же Пра́ведному Судии́ беззако́ния на́ша оста́вити на́м. Вся́ бо на́ми в житии́ претерпе́нная, ско́рби же, и ну́жды, и боле́зни, я́ко плоды́ паде́ний на́ших прозябо́ша на́м, Бо́гу сия́ на исправле́ние на́ше попуща́ющу. Те́мже вся́ сия́ и́стиною и судо́м Свои́м наведе́ Госпо́дь на гре́шныя рабы́ Своя́, и́же в печа́лех свои́х к заступле́нию Твоему́, Пречи́стая, притеко́ша и во умиле́нии серде́ц к Тебе́ взыва́ют си́це: грехо́в и беззако́ний на́ших, Блага́я, не помяни́, но па́че всечестны́я ру́це Твои́ воздви́гши, к Сы́ну Твоему́ и Бо́гу предста́ни, да лю́те соде́янная на́ми отпу́стит на́м, да за премно́гая неиспо́лненная обеща́ния на́ша лица́ Своего́ от рабо́в Свои́х не отврати́т, да благода́ти Своея́, спасе́нию на́шему посо́бствующия, от ду́ш на́ших не оты́мет. Е́й, Влады́чице, бу́ди спасе́нию на́шему Хода́таица и, малоду́шия на́шего не возгнуша́вшися, при́зри на стена́ния на́ша, я́же в беда́х и ско́рбех на́ших пред чудотво́рным Твои́м о́бразом возно́сим. Просвети́ умиле́нными по́мыслы умы́ на́ша, ве́ру на́шу укрепи́, наде́жду утверди́, любве́ сладча́йший да́р сподо́би на́с прия́ти. Си́ми у́бо, Пречи́стая, дарова́ньми, а не боле́зньми и скорбьми́ живо́т на́ш ко спасе́нию да возво́дится, но, от уны́ния и отча́яния ду́ши на́ша огражда́ющи, изба́ви на́с, маломо́щных, от находя́щих на ны́ бе́д, и ну́жд, и клеветы́ челове́ческия, и боле́зней нестерпи́мых. Да́руй ми́р и благоустрое́ние жи́тельству христиа́нскому предста́тельством Твои́м, Влады́чице, утверди́ Правосла́вную ве́ру в стране́ на́шей и во все́м ми́ре. Це́рковь Апо́стольскую и Собо́рную умале́нию не преда́ждь, уста́вы святы́х оте́ц на ве́ки непоколеби́мы сохрани́ и все́х к Тебе́ притека́ющих от ро́ва поги́бельнаго спаси́. Еще́ же и е́ресию прельще́нных бра́тий на́ших или́ ве́ру спаси́тельную во грехо́вных страсте́х погуби́вших па́ки ко и́стинней ве́ре и покая́нию приведи́, да вку́пе с на́ми, Твоему́ чудотво́рному о́бразу покланя́ющеся, Твое́ предста́тельство испове́дят. Сподо́би у́бо на́с, Пресвята́я Госпоже́ Богоро́дице, еще́ в животе́ се́м побе́ду и́стины Твои́м заступле́нием узре́ти, сподо́би на́с благода́тную ра́дость пре́жде кончи́ны на́шея восприя́ти, я́коже дре́вле насе́льники Поча́евския Твои́м явле́нием победи́тели и просвети́тели ага́рян показа́ла еси́, да вси́ мы́ благода́рным се́рдцем вку́пе со А́нгелы, и проро́ки, и апо́столы, и со все́ми святы́ми, Твое́ милосе́рдие прославля́юще, воздади́м сла́ву, че́сть и поклоне́ние в Тро́ице пева́емому Бо́гу Отцу́, и Сы́ну, и Свято́му Ду́ху, во ве́ки веко́в. Ами́нь.

Моли́тва втора́я.

Цари́це на́ша Преблага́я, Влады́чице Преблагослове́нная, наде́ждо на́ша Богоро́дице! К Тебе́ умиле́нно ны́не притека́ем, и сокруше́нною душе́ю и смире́нным се́рдцем мо́лим Тя́, Всепе́тая, пред пречи́стым Твои́м о́бразом: помяни́ щедро́ты Твоя́ дре́вния, я́же от Тебе́ зде́ бы́вшыя, и я́коже иногда́ яви́лася еси́ на скале́ Поча́евстей, в столпе́ о́гненнем, от ка́мене цельбоно́сную во́ду источа́ющи, си́це и ны́не предста́ни на́м, Ма́ти Многомо́щная, и теплото́ю Богома́терния любве́ Твоея́ согре́й сердца́ на́ша окамене́нная, сле́зы любве́ и покая́ния нераска́яннаго от оче́й на́ших исторга́ющи. Ты́ бо еди́на еси́ засту́пница на́ша богодарова́нная: Тя́ у́бо мо́лим, изба́ви от все́х бе́д, от вся́кия напа́сти, боле́зни и ско́рби, рабы́ Твоя́, предста́тельством вели́каго о на́с хода́тая и моли́твенника Твоего́, всеблаже́ннаго отца́ на́шего И́ова, уго́дника Твоего́ Поча́евскаго, его́же моли́тве я́ве внима́ла еси́ на возду́се иногда́, егда́ всесла́вным и стра́шным явле́нием Твои́м изба́вила еси́ оби́тель Твою́ от наше́ствия и обложе́ния ага́рянскаго. При́зри благосе́рдием, Всепе́тая, призре́нием ми́лостиваго Твоего́ заступле́ния на страну́ на́шу, и на вся́ лю́ди твоя́ изле́й бога́тыя Твоя́ ми́лости: разсе́янныя собери́, неве́рныя же и инове́рныя, во страна́х на́ших, на пу́ть и́стинный наста́ви, отпа́дшыя от благочести́выя оте́ческия ве́ры па́ки возврати́ и сопричти́ и́х святе́й Твое́й правосла́вней и кафоли́честей Це́ркви: в семе́йствах на́ших ми́р утверди́, ста́рость поддержи́, ю́ныя наста́ви, младе́нцы воспита́й, си́рыя и вдови́цы заступи́, плене́нныя свободи́, боля́щыя уврачу́й, на суди́щи и в темни́цах, и в заточе́ниих, и в го́рьких рабо́тах су́щих помяни́, огражда́ющи ны́ вы́ну, посеща́ющи и утеша́ющи то́ками чуде́с и зна́мений многоразли́чных, я́же при́сно излива́еши все́м от святы́я ико́ны Твоея́ цельбоно́сныя. Да́руй, Всеблага́я, земли́ плодоро́дие, возду́ха благорастворе́ние и вся́, я́же на по́льзу на́шу да́ры благовре́менныя и благопотре́бныя, моли́твами избра́нных уго́дников Твои́х, благода́тный Тво́й ли́к на святе́й ико́не Твое́й окружа́ющих: Илии́ богоглаго́ливаго, свята́го архидиа́кона Стефа́на первострада́льнаго, преподо́бнаго Авраа́мия всеблаже́ннаго, и богому́жнаго Ми́ны му́ченика многоимени́таго, и с ни́ми ку́пно святы́х и пра́ведных же́н: Параске́вы прехва́льныя, Ири́ны преблаже́нныя и святы́я Екатери́ны великому́ченицы многострада́льныя, и все́х святы́х. Егда́ же приспе́ет на́ше от жития́ сего́ отше́ствие и к ве́чности преселе́ние, си́це предста́ни на́м, Преблагослове́нная, я́коже иногда́ благопоспеши́ла еси́ оби́тели Твое́й во спасе́ние во вре́мя бра́ни збара́жской, и Твои́м те́плым хода́тайством да́руй на́м христиа́нскую кончи́ну живота́ на́шего безболе́зненну, непосты́дну, ми́рну и Святы́х Та́ин прича́стну: да я́коже в се́й жи́зни, си́це и в бу́дущем ве́це сподо́бимся вси́, моли́твами Твои́ми, безконе́чныя небе́сныя жи́зни во Ца́рствии возлю́бленнаго Сы́на Твоего́, Го́спода Бо́га и Спа́са на́шего, Иису́са Христа́, Ему́же подоба́ет вся́кая сла́ва, че́сть и поклоне́ние, во ве́ки веко́в. Ами́нь.

А҆ка́ѳїстъ прест҃ѣ́й бцⷣе ра́ди чꙋдотво́рныѧ є҆ѧ̀ і҆кѡ́ны поча́евскаѧ.

Конда́къ а҃.

Взбра́нной воево́дѣ родѡ́въ хрⷭ҇тїа́нскихъ и҆ страны̀ на́шеѧ и҆звѣ́стнѣй и҆зба́вительницѣ хвалє́бныѧ пѣ́сни принесе́мъ, вѣ́рнїи, на ст҃ѣ́й горѣ̀ є҆ѧ̀ собра́вшесѧ: ты́ же, ꙗ҆́кѡ и҆мꙋ́щаѧ млⷭ҇рдїе неизрече́нное, ѽ влⷣчце бцⷣе, моле́нїѧ на́шегѡ пред̾ чꙋдотво́рнымъ твои́мъ ѡ҆́бразомъ возноси́магѡ не ѿве́ржи, да въ ᲂу҆миле́нїи серде́цъ зове́мъ тѝ:

Ра́дꙋйсѧ, похвало̀ поча́евскаѧ и҆ всегѡ̀ мі́ра наде́ждо и҆ ᲂу҆тѣше́нїе.

І҆́косъ а҃.

А҆рха́гг҃лъ гаврїи́лъ пе́рвѣе, ра́дꙋйсѧ, тебѣ̀ приноша́ше, влⷣчце, є҆гда̀ зача́тїе сн҃а бж҃їѧ бл҃говѣствова́ше, по пресла́внѣмъ же ᲂу҆спе́нїи твое́мъ всѧ̑ нбⷭ҇ныѧ си̑лы тꙋ́южде хвалꙋ̀ на нб҃сѝ тебѣ̀ непреста́ннѡ прино́сѧтъ: ка́кѡ ᲂу҆̀бо мы̀, грѣ́шнїи, своѧ̑ гла̑сы съ гла̑сы безпло́тныхъ совокꙋпи́ти де́рзнемъ: ѡ҆ба́че млⷭ҇рдїе твоѐ ко все́мъ ка́ющымсѧ помина́юще, ᲂу҆стнѣ̀ на̑ша со стра́хомъ и҆ любо́вїю ѿверза́емъ, глаго́люще си́це:

Ра́дꙋйсѧ, млⷭ҇ти бе́здно: ра́дꙋйсѧ, любвѐ неистощи́мое мо́ре.

Ра́дꙋйсѧ, ро́да хрⷭ҇тїа́нскагѡ блага́ѧ предста́тельнице: ра́дꙋйсѧ, ѡ҆би́тели поча́евскїѧ стѣно̀ нерꙋши́маѧ.

Ра́дꙋйсѧ, правосла̑вныѧ лю́ди на го́рꙋ поча́евскꙋю ᲂу҆́зами любвѐ привлека́ющаѧ: ра́дꙋйсѧ, всѧ́кꙋю печа́ль ѿ дꙋ́шъ и҆́хъ ѿгонѧ́ющаѧ.

Ра́дꙋйсѧ, є҆ѧ́же чꙋдотво́рный ѻ҆́бразъ, ꙗ҆́кѡ ѕвѣзда̀, ѿ горы̀ поча́евскїѧ на́съ пꙋтево́дствꙋетъ: ра́дꙋйсѧ, є҆́йже возноси̑мыѧ мл҃твы стра̑стныѧ прилѡ́ги вско́рѣ ѿража́ютъ.

Ра́дꙋйсѧ, ꙗ҆вле́нїемъ свои́мъ на горѣ̀ се́й лю́ди ᲂу҆тѣ́шившаѧ: ра́дꙋйсѧ, слѣ́дъ стопы̀ твоеѧ̀ на не́й на́мъ ѡ҆ста́вившаѧ.

Ра́дꙋйсѧ, вѣ́рныхъ при́сное дерзнове́нїе: ра́дꙋйсѧ, сꙋмнѧ́щихсѧ до́брое ᲂу҆твержде́нїе.

Ра́дꙋйсѧ, похвало̀ поча́евскаѧ и҆ всегѡ̀ мі́ра наде́ждо и҆ ᲂу҆тѣше́нїе.

Конда́къ в҃.

Ви́дѣвше пꙋсты́нницы поча́евстїи и҆ просте́цъ і҆ѡа́ннъ босы́й прест҃ꙋ́ю бцⷣꙋ на скалѣ̀ во ѻ҆́гненномъ столпѣ̀ ꙗ҆ви́вшꙋюсѧ, слѣ́дъ стопы̀ є҆ѧ̀ ѡ҆блобыза́хꙋ и҆ водо́ю, здѣ̀ ѿ ка́мени и҆сте́кшею, ѡ҆кроплѧ́ѧсѧ, вопїѧ́хꙋ бг҃ꙋ: А҆ллилꙋ́їа.

І҆́косъ в҃.

Ра́зꙋмъ недоразꙋмѣва́емый ѡ҆ ꙗ҆вле́нїи твое́мъ, влⷣчце, и҆́щꙋще, въ сицево́мъ ᲂу҆пова́нїи ᲂу҆твержда́етсѧ, ꙗ҆́кѡ пе́рвѣе ѿ а҆га́рѧнъ, по́слѣжде ѿ є҆ретїкѡ́въ ѡ҆пло́тъ правосла́вїѧ на горѣ̀ поча́евстѣй ᲂу҆тверди́ти благоволи́ла є҆сѝ, сегѡ̀ ра́ди въ тво́й ст҃ы́й хра́мъ приходѧ́ще, те́плою вѣ́рою сердца̀ на̑ша и҆сполнѧ́емъ, глаго́лющи:

Ра́дꙋйсѧ, и҆́стинныѧ вѣ́ры ᲂу҆твержде́нїе: ра́дꙋйсѧ, ѕловѣ́рїѧ ꙗ҆́вное ѡ҆бличе́нїе.

Ра́дꙋйсѧ, дре́влѣ въ неѡпали́мѣй кꙋпинѣ̀ сїна́йстѣй и҆звѣсти́вшаѧсѧ: ра́дꙋйсѧ, хрⷭ҇тїа́нѡмъ въ столпѣ̀ ѻ҆́гненномъ здѣ̀ ꙗ҆ви́вшаѧсѧ.

Ра́дꙋйсѧ, ꙗ҆́кѡ въ пещѝ горѧ́щей, росо́ю сп҃се́ннїи, а҆враа́мстїи ѻ҆́троцы тѧ̀ предвозвѣсти́ша: ра́дꙋйсѧ, ꙗ҆́кѡ водо́ю ѿ слѣ́да стопы̀ твоеѧ̀ и҆сцѣле́ннїи блгⷣть твою̀ проповѣ́даша.

Ра́дꙋйсѧ, зе́млю на́шꙋ, дре́влѣ ѿ а҆га́рѧнъ разоре́ннꙋю, ꙗ҆вле́нїемъ твои́мъ тогда̀ ᲂу҆тѣ́шившаѧ: ра́дꙋйсѧ, и҆ ны́нѣ мнѡ́гими зна́меньми молѧ́щїѧсѧ здѣ̀ ѡ҆бодрѧ́ющаѧ.

Ра́дꙋйсѧ, ка́ющихсѧ ско́рое ᲂу҆слы́шанїе: ра́дꙋйсѧ, подвиза́ющымсѧ по́мощь и҆ прибѣ́жище.

Ра́дꙋйсѧ, и҆ невѣ́дꙋщихъ вразꙋмле́нїе: ра́дꙋйсѧ, и҆ малодꙋ́шныхъ ᲂу҆крѣпле́нїе.

Ра́дꙋйсѧ, похвало̀ поча́евскаѧ и҆ всегѡ̀ мі́ра наде́ждо и҆ ᲂу҆тѣше́нїе.

Конда́къ г҃.

Си́лꙋ сꙋгꙋ́быѧ блгⷣти ꙗ҆ви́ла є҆сѝ, влⷣчце, на горѣ̀ поча́евстѣй, є҆гда̀ мѣ́сто ꙗ҆вле́нїѧ твоегѡ̀ по трїе́хъ ста́хъ лѣ́тѣхъ чꙋдотво́рною і҆кѡ́ною свое́ю ѡ҆богати́ла є҆сѝ, ю҆́же рꙋко́ю ст҃и́телѧ неофѵ́та є҆́ллина, и҆з̾ москвы̀ грѧдꙋ́щаго, пе́рвѣе болѧ́рине а҆́ннѣ дарова́ла є҆сѝ, пото́мъ же ѿ неѧ̀ во ѡ҆би́тель поча́евскꙋю прїѧ́ла є҆сѝ, ра́дꙋющымсѧ лю́демъ и҆ пою́щымъ бг҃ꙋ: А҆ллилꙋ́їа.

І҆́косъ г҃.

И҆мꙋ́щи въ домꙋ̀ свое́мъ і҆кѡ́нꙋ твою̀, влⷣчце, болѧ́рина а҆́нна, и҆ и҆сцѣле́нїе ѿ неѧ̀ слѣпорожде́нномꙋ бра́тꙋ своемꙋ̀ фїлі́ппꙋ бы́вшее ᲂу҆вѣ́дѣвши, а҆́бїе дꙋ́хомъ ре́вности ѡ҆ сла́вѣ твое́й возгоре́сѧ и҆ ѡ҆би́тель и҆з̾ ка́мене во и҆́мѧ пречⷭ҇тна́гѡ ᲂу҆спе́нїѧ твоегѡ̀ пꙋсты́нникѡмъ поча́євскимъ ᲂу҆строѧ́етъ, въ не́йже чꙋдотво́рномꙋ ѡ҆́бразꙋ твоемꙋ̀ покланѧ́ющесѧ взыва́етъ си́це:

Ра́дꙋйсѧ, сокро́вище бога́тное въ твое́й ст҃ѣ́й і҆кѡ́нѣ на́мъ препода́вшаѧ: ра́дꙋйсѧ, ст҃и́телѧ рꙋко́ю дарова́ннымъ ѡ҆́бразомъ твои́мъ зе́млю на́шꙋ ѡ҆ст҃и́вшаѧ.

Ра́дꙋйсѧ, дꙋ́шы на́шѧ ѿ земна́гѡ бога́тства ѿвраща́ющаѧ: ра́дꙋйсѧ, сла́вꙋ бж҃їю пѣ́ти на́съ наꙋча́ющаѧ.

Ра́дꙋйсѧ, ꙗ҆́кѡ чꙋдеса̀ твоѧ̑ зрѧ́ще, къ нб҃сѝ сердцы̑ свои́ми восхища́емсѧ: ра́дꙋйсѧ, ꙗ҆́кѡ во ѡ҆би́тели твое́й, а҆́ки въ преддве́рїи раѧ̀ ѡ҆брѣта́емсѧ.

Ра́дꙋйсѧ, правосла́вныѧ лю́ди і҆кѡ́ною твое́ю ᲂу҆тѣ́шившаѧ: ра́дꙋйсѧ, ѿ всѣ́хъ стра́нъ молѧ́щыѧсѧ лю́ди во ѡ҆би́тель поча́евскꙋю призыва́ющаѧ.

Ра́дꙋйсѧ, є҆́юже вѣ́ра ᲂу҆множа́етсѧ: ра́дꙋйсѧ, є҆́юже ᲂу҆ны́нїе ѿго́нитсѧ.

Ра́дꙋйсѧ, и҆́нокѡвъ поча́евскихъ при́сное ра́дованїе: ра́дꙋйсѧ, мїрски́хъ люде́й непосты́дное ᲂу҆пова́нїе.

Ра́дꙋйсѧ, похвало̀ поча́евскаѧ и҆ всегѡ̀ мі́ра наде́ждо и҆ ᲂу҆тѣше́нїе.

Конда́къ д҃.

Бꙋ́рѧ є҆реті́ческагѡ неи́стовства на ст҃ꙋ́ю ѡ҆би́тель твою̀ ᲂу҆стреми́вшисѧ, влⷣчце, ст҃ꙋ́ю і҆кѡ́нꙋ твою̀ рꙋко́ю ѕлы́хъ і҆кѡнобо́рцєвъ плѣни́вши и҆ на ѕлохꙋле́нїе тѣ́хъ подви́гши, вско́рѣ гнѣ́вомъ бж҃їимъ ᲂу҆де́ржана бы́сть, є҆гда̀ неви́димаѧ си́ла безстꙋ́днѣ пи́ршествꙋющыѧ хꙋ́льники, а҆́ки а҆ртаѯе́рѯа и҆ и҆́рѡда, слѧчѐ и҆ въ недꙋ́гъ вве́рже, над̾ ст҃ы́нею твое́ю рꙋга́вшихсѧ и҆ не ᲂу҆вѣ́дѣвшихъ пѣ́ти: А҆ллилꙋ́їа.

І҆́косъ д҃.

Слы́шаша и҆́ноцы поча́евстїи и҆ всѝ правосла́внїи лю́дїе, ꙗ҆́кѡ ст҃а́ѧ і҆кѡ́на твоѧ̀ по седмина́десѧти лѣ́тѣхъ є҆реті́ческагѡ плѣне́нїѧ во ст҃ꙋ́ю ѡ҆би́тель ѿ посра́мленныхъ хꙋли́телей возвраща́етсѧ, а҆́бїе на срѣ́тенїе є҆ѧ̀ и҆зыдо́ша и҆ пла́чъ сво́й на ра́дость прело́жше, вопїѧ́хꙋ тебѣ̀:

Ра́дꙋйсѧ, хрⷭ҇тїа́нѡмъ прибѣ́жище: ра́дꙋйсѧ, є҆ретїкѡ́въ ѡ҆бличе́нїе.

Ра́дꙋйсѧ, ѡ҆би́тель поча́евскꙋю і҆кѡ́ны твоеѧ̀ до конца̀ не лиши́вшаѧ: ра́дꙋйсѧ, ѕлохꙋле́нїе і҆кѡнобо́рцєвъ посрами́вшаѧ.

Ра́дꙋйсѧ, ꙗ҆́кѡ въ бѣда́хъ не ᲂу҆ныва́ти и҆ на́съ наꙋча́еши: ра́дꙋйсѧ, ꙗ҆́кѡ правосꙋ́дїю бж҃їю вѣ́ровати на́мъ повелѣва́еши.

Ра́дꙋйсѧ, є҆́юже правосла́вїе во странѣ̀ на́шей ᲂу҆тверди́сѧ: ра́дꙋйсѧ, є҆́юже и҆ всѧ̀ вселе́ннаѧ воплоще́ннꙋю и҆́стинꙋ прїѧ́ти сподо́бисѧ.

Ра́дꙋйсѧ, долготерпѣ́нїю бж҃їю подража́ющаѧ: ра́дꙋйсѧ, въ терпѣ́нїи лю́ди твоѧ̑ ᲂу҆твержда́ющаѧ.

Ра́дꙋйсѧ, ꙗ҆́кѡ смире́ннїи тобо́ю ᲂу҆тѣше́нїе прїе́млютъ: ра́дꙋйсѧ, ꙗ҆́кѡ гордели́вїи тобо́ю смирѧ́ютсѧ.

Ра́дꙋйсѧ, похвало̀ поча́евскаѧ и҆ всегѡ̀ мі́ра наде́ждо и҆ ᲂу҆тѣше́нїе.

Конда́къ є҃.

Бг҃оте́чнаѧ ѕвѣзда̀ и҆́щꙋщымъ сп҃се́нїѧ ꙗ҆ви́ласѧ є҆сѝ, влⷣчце, къ сл҃нцꙋ пра́вды си́хъ приводѧ́щаѧ, ꙗ҆́коже бо въ земнѣ́мъ житїѝ твое́мъ ѡ҆ лю́дѣхъ предста́тельница къ сн҃ꙋ твоемꙋ̀ въ ка́нѣ галїле́йстѣй показа́ласѧ є҆сѝ, та́кѡ и҆ по пресла́вномъ твое́мъ на нб҃са̀ ѿше́ствїи, молє́нїѧ ѡ҆ вѣ́рныхъ ѿ конє́цъ землѝ принѡси́маѧ къ сн҃ꙋ твоемꙋ̀ возно́сиши и҆ здѣ̀, на горѣ̀ поча́евстѣй, и҆сцѣле́нїѧ многоразли̑чнаѧ ѿ негѡ̀ лю́демъ подае́ши, вопїю́щымъ бг҃ꙋ: А҆ллилꙋ́їа.

І҆́косъ є҃.

Ви́дѣша лю́дїе, на го́рꙋ поча́евскꙋю, ꙗ҆́коже въ дре́внѧѧ, та́кѡ и҆ въ послѣ̑днѧѧ лѣ́та притека́ющїи, мно́жєства и҆сцѣле́нїй, тобо́ю подава́емаѧ, въ жела́нїи сп҃се́нїѧ дꙋ́шы своѧ̑ ᲂу҆твержда́хꙋ и҆ ѡ҆ грѣсѣ́хъ свои́хъ покаѧ́нїе те́плое приноша́хꙋ, вопїю́ще тебѣ̀:

Ра́дꙋйсѧ, слѣпы́хъ прозрѣ́нїе и҆ хромы́хъ и҆сцѣле́нїе: ра́дꙋйсѧ, бѣ́сныхъ ѿ де́мѡнѡвъ и҆збавле́нїе.

Ра́дꙋйсѧ, плѣне́ннаго и҆́нока во ѡ҆би́тель твою̀ на воздꙋ́сѣ чꙋде́снѣ возврати́вшаѧ: ра́дꙋйсѧ, младе́нца сѷмеѡ́на предꙋме́рша по мл҃твѣ ста́рицы воскреси́вшаѧ.

Ра́дꙋйсѧ, ꙗ҆́кѡ въ си́хъ зна́менїихъ си́ла дре́внихъ чꙋде́съ твои́хъ лю́демъ па́ки ꙗ҆ви́сѧ: ра́дꙋйсѧ, ꙗ҆́кѡ и҆сцѣле́нїѧ ѿ ст҃ы́ѧ і҆кѡ́ны твоеѧ̀ и҆ въ послѣ̑днѧѧ днѝ не ѡ҆скꙋдѣ́ша.

Ра́дꙋйсѧ, во все́мъ мі́рѣ и҆сто́чникъ и҆сцѣле́нїй ѿ ст҃ы́хъ і҆кѡ́нъ твои́хъ подаю́щаѧ: ра́дꙋйсѧ, па́че си́хъ дꙋхо́вными дарова́ньми молѧ́щыѧсѧ ѡ҆богаща́ющаѧ.

Ра́дꙋйсѧ, є҆́юже правосла́внїи ро́ди хва́лѧтсѧ: ра́дꙋйсѧ, къ є҆ѧ́же по́мощи и҆ маловѣ́рнїи притека́ютъ.

Ра́дꙋйсѧ, земноро́дныхъ ᲂу҆пова́нїе: ра́дꙋйсѧ, нбⷭ҇ныхъ чинѡ́въ ра́дованїе.

Ра́дꙋйсѧ, похвало̀ поча́евскаѧ и҆ всегѡ̀ мі́ра наде́ждо и҆ ᲂу҆тѣше́нїе.

Конда́къ ѕ҃.

Проповѣ́дницы сла́вы пречⷭ҇тыѧ дв҃ы ꙗ҆ви́шасѧ а҆га́рѧне на ѡ҆би́тель поча́евскꙋю наше́дшїи и҆ видѣ́нїѧ пречⷭ҇тыѧ бцⷣы съ прпⷣбнымъ і҆́ѡвомъ пе́рвѣе не ᲂу҆разꙋмѣ́вшїи: є҆гда́ бо стрѣ́лы, ѿ ни́хъ пꙋща́ємыѧ, па́ки на нѧ̀ ᲂу҆стреми́шасѧ, а҆́бїе си́лꙋ влⷣчцы проразꙋмѣ́вше и҆ покаѧ́нїе ѡ҆ безꙋ́мїи свое́мъ прине́сше, вѣ́рою возопи́ша: А҆ллилꙋ́їа.

І҆́косъ ѕ҃.

Возсїѧ̀ видѣ́нїе твоѐ, влⷣчце, на горѣ̀ поча́евстѣй, є҆гда̀ бра́тїѧ ѡ҆би́тели, ѕѣлѡ̀ ѿ а҆га́рѧнъ ѡ҆сажда́еми, съ ве́лїимъ во́племъ моле́нїе пред̾ ст҃о́ю твое́ю і҆кѡ́ною и҆ пред̾ ра́кою прпⷣбнагѡ і҆́ѡва возноша́ше, є҆гда́ же а҆га́рѧны, видѣ́нїемъ си́мъ смѧтє́нныѧ и҆ бѣжа́щыѧ, ви́дѣша, а҆́бїе съ весе́лїемъ воспѣ́ша тебѣ̀ си́це:

Ра́дꙋйсѧ, и҆зба́вительнице на́ша и҆ сп҃се́нїе: ра́дꙋйсѧ, ро́да хрⷭ҇тїа́нскагѡ при́сное вспоможе́нїе.

Ра́дꙋйсѧ, нечести̑выѧ враги̑ ѿ твоеѧ̀ ст҃ы́ни ѿгна́вшаѧ: ра́дꙋйсѧ, въ покаѧ́нїе и҆́хъ приводѧ́щаѧ.

Ра́дꙋйсѧ, є҆ѧ́же и҆ неви́димїи сп҃се́нїѧ на́шегѡ вразѝ трепе́щꙋтъ: ра́дꙋйсѧ, є҆́йже ст҃і́и а҆́гг҃ли и҆ преста́вльшїисѧ првⷣницы на нб҃сѝ поклонѧ́ютсѧ.

Ра́дꙋйсѧ, прпⷣбнаго і҆́ѡва въ мл҃твꙋ съ собо́ю прїе́мшаѧ: ра́дꙋйсѧ, а҆га́рѧны ко ст҃о́мꙋ креще́нїю видѣ́нїемъ свои́мъ приве́дшаѧ.

Ра́дꙋйсѧ, ꙗ҆́кѡ тобо́ю вѣ́рнїи стра́хъ сме́ртный въ коне́цъ ѿложи́ша: ра́дꙋйсѧ, ꙗ҆́кѡ тебє̀ ра́ди нѣ́цыи ѿ а҆га́рѧнъ бг҃обоѧ́зненнїи и҆́ноцы здѣ̀ ꙗ҆ви́шасѧ.

Ра́дꙋйсѧ, и҆́стины при́сное и҆з̾ѧвле́нїе: ра́дꙋйсѧ, заблꙋжда́ющымсѧ до́брое вразꙋмле́нїе.

Ра́дꙋйсѧ, похвало̀ поча́евскаѧ и҆ всегѡ̀ мі́ра наде́ждо и҆ ᲂу҆тѣше́нїе.

Конда́къ з҃.

Хотѧ́щи жела́нїе вѣ́чнагѡ живота̀ возгре́ти въ сердца́хъ хрⷭ҇тїа́нскихъ, прест҃а́ѧ бцⷣа болѧ́щыѧ чꙋдесы̀ свои́ми и҆сцѣлѧ́етъ, бѣ̑сы и҆згонѧ́етъ, плѣнє́нныѧ свобожда́етъ, мє́ртвыѧ воскреша́етъ, да мы̀ всѝ, си́лꙋ бж҃їю ᲂу҆разꙋмѣ́вше, зємна́ѧ возненави́димъ и҆ ѡ҆ дꙋша́хъ свои́хъ попече́нїе приложи́мъ, непреста́ннѡ вопїю́ще бг҃ꙋ: А҆ллилꙋ́їа.

І҆́косъ з҃.

Но́выѧ и҆ тѧгча́йшыѧ бѣды̑ претерпѣ̀ ѡ҆би́тель поча́евскаѧ, є҆гда̀ вкꙋ́пѣ со все́ю страно́ю ѿ правосла́вїѧ ле́стїю ѿто́рженнаѧ во ѡ҆блада́нїе є҆ретїкѡ́въ вдаде́сѧ, ѡ҆ба́че проше́дшымъ стѡ́мъ и҆ десѧти́мъ лѣ́тѡмъ па́ки правосла́внымъ хрⷭ҇тїа́нѡмъ вдана̀ бы́сть, въ ню́же правосла́внїи и҆́ноцы, прише́дше и҆ ст҃ы́ѧ мо́щи прпⷣбнагѡ і҆́ѡва и҆з̾ под̾ спꙋ́да и҆з̾е́мше, къ чꙋдотво́рномꙋ ѡ҆́бразꙋ влⷣчцы припа́дахꙋ, глаго́люще:

Ра́дꙋйсѧ, правосла́вїѧ защи́тнице: ра́дꙋйсѧ, є҆ретїкѡ́въ ѡ҆бличи́тельнице.

Ра́дꙋйсѧ, ѡ҆би́тель твою̀ до конца̀ не ѡ҆ста́вившаѧ: ра́дꙋйсѧ, стра́хꙋ бж҃їю на́съ наꙋча́ющаѧ.

Ра́дꙋйсѧ, ꙗ҆́кѡ предста́тельствомъ твои́мъ страна̀ волы́нскаѧ па́ки ко правосла́вїю возврати́сѧ: ра́дꙋйсѧ, ꙗ҆́кѡ ѿ лѣ́тъ дре́внихъ мно́зи є҆ретїцы̀ твои́мъ вразꙋмле́нїемъ и҆спра́вишасѧ.

Ра́дꙋйсѧ, во ст҃ꙋ́ю ла́ѵрꙋ твою̀ вѣ́рныхъ на мл҃твꙋ па́ки призыва́ющаѧ: ра́дꙋйсѧ, и҆ невѣ̑рныѧ здѣ̀ поклонѧ́тисѧ правосла́внѣй ст҃ы́нѣ наꙋча́ющаѧ.

Ра́дꙋйсѧ, ю҆́же првⷣницы и҆ првⷣнїи непреста́ннѡ воспѣва́ютъ: ра́дꙋйсѧ, къ не́йже и҆ па́дшїи въ покаѧ́нїи притека́ютъ.

Ра́дꙋйсѧ, ѿстꙋ́пникѡвъ къ вѣ́рѣ возвраще́нїе: ра́дꙋйсѧ, прельща́емыхъ къ свѣ́тꙋ и҆́стины возведе́нїе.

Ра́дꙋйсѧ, похвало̀ поча́евскаѧ и҆ всегѡ̀ мі́ра наде́ждо и҆ ᲂу҆тѣше́нїе.

Конда́къ и҃.

Стра́нное чꙋ́до зри́мъ ѡ҆ тебѣ̀, бг҃ома́ти, є҆ли́кѡ бо тѣле́снїи недꙋ́зи ст҃ы́ѧ твоеѧ̀ і҆кѡ́ны цѣлова́нїемъ и҆ воды̀ поча́евскїѧ кропле́нїемъ и҆сцѣлѧ́ютсѧ, та́кѡ и҆ дꙋшє́вныѧ стра́сти ви́дѣнїемъ ст҃ы́ни твоеѧ̀ ѿ̾е́млютсѧ, вѣ́ра ᲂу҆твержда́етсѧ и҆ ᲂу҆миле́нїѧ сердца̀ на̑ша и҆сполнѧ́ютсѧ, пою́щихъ бг҃ꙋ: А҆ллилꙋ́їа.

І҆́косъ и҃.

Ве́сь а҆́зъ недосто́йный грѣха́ми и҆спо́лнихсѧ, мїрско́мꙋ разсѣ́ѧнїю вда́всѧ и҆ ѡ҆ дꙋшѝ свое́й вознерадѣ́въ, ѡ҆ба́че на ст҃ꙋ́ю і҆кѡ́нꙋ твою̀, влⷣчце, взира́ѧ, и҆ просвѣще́нїе ѿ неѧ̀ безчи́слєннымъ лю́демъ, здѣ̀ приходѧ́щымъ, ви́дѧ, па́ки на пꙋ́ть сп҃се́нїѧ ᲂу҆стремлѧ́юсѧ и҆ въ ра́дости се́рдца воспѣва́ю тѝ си́це:

Ра́дꙋйсѧ, чⷭ҇тоты̀ сокро́вище: ра́дꙋйсѧ, млⷭ҇тей бе́здно.

Ра́дꙋйсѧ, къ сн҃ꙋ твоемꙋ̀ ѡ҆ вѣ́рныхъ молє́нїѧ вы́нꙋ приносѧ́щаѧ: ра́дꙋйсѧ, молє́нїѧ грѣ́шныхъ не ѿверга́ющаѧ.

Ра́дꙋйсѧ, ꙗ҆́кѡ тобо́ю мнѡ́зи ѿча́ѧнїѧ грѣхо́внагѡ и҆збѣго́ша: ра́дꙋйсѧ, ꙗ҆́кѡ призыва́ющїи и҆́мѧ твоѐ ѿ паде́нїѧ стра́ннагѡ возста́ша.

Ра́дꙋйсѧ, є҆́юже і҆кѡнобо́рнаѧ є҆́ресь во вселе́ннѣй посрами́сѧ: ра́дꙋйсѧ, є҆́юже и҆́стиннаѧ вѣ́ра волы́нской странѣ̀ возврати́сѧ.

Ра́дꙋйсѧ, къ по́двигꙋ цѣломꙋ́дрїѧ дꙋ́шы возводѧ́щаѧ: ра́дꙋйсѧ, ѡ҆би́дѧщымъ проща́ти наꙋча́ющаѧ.

Ра́дꙋйсѧ серде́цъ на́шихъ ᲂу҆миле́нїе: ра́дꙋйсѧ, дꙋ́шъ на́шихъ ᲂу҆пова́нїе.

Ра́дꙋйсѧ, похвало̀ поча́евскаѧ и҆ всегѡ̀ мі́ра наде́ждо и҆ ᲂу҆тѣше́нїе.

Конда́къ ѳ҃.

Всѧ̑кїѧ ѿстꙋ́пства и҆ є҆реті́чєскаѧ блꙋжда́нїѧ пока́ѧвшемꙋсѧ наро́дꙋ землѝ волы́нскїѧ ѿпꙋсти́ла є҆сѝ, влⷣчце, и҆ па́ки и҆сто́чникъ и҆сцѣле́нїй ѿ чꙋдотво́рныѧ твоеѧ̀ і҆кѡ́ны ѿ слѣ́да стопы̀ твоеѧ̀ на горѣ̀ поча́евстѣй въ правосла́вной ла́ѵрѣ твое́й лю́демъ ѿкры́ла є҆сѝ, то́кмѡ а҆́ще покаѧ́нїе ѡ҆ грѣсѣ́хъ свои́хъ принесꙋ́тъ бг҃ꙋ и҆ ѡ҆ твое́й по́мощи не сꙋмнѧ́щесѧ, возопїю́тъ є҆мꙋ̀: А҆ллилꙋ́їа.

І҆́косъ ѳ҃.

Вѣті́ѧ сла́вы твоеѧ̀ ꙗ҆ви́шасѧ, влⷣчце, слѣпі́и и҆ хро́мїи и҆сцѣле́нїе ѿ твоеѧ̀ і҆кѡ́ны, правосла́внымъ лю́демъ возвраще́нныѧ, прїѧ́вшїи, ꙗ҆́кѡ и҆ є҆реті́ческой женѣ̀ нѣ́коей болѧ́щей, тѧ̀ въ по́мощь призва́ти и҆ по и҆сцѣле́нїи и҆́стиннꙋю вѣ́рꙋ и҆сповѣ́дати и҆ ѡ҆блобыза́ти, на́мъ же вопи́ти тебѣ̀ си́це:

Ра́дꙋйсѧ, цр҃ѧ̀ нбⷭ҇нагѡ ᲂу҆моле́нїе: ра́дꙋйсѧ, земны́хъ при́сное предста́тельство.

Ра́дꙋйсѧ, ѿ лю́терскихъ заблꙋжде́нїй женꙋ̀ нѣ́кꙋю недꙋ́га и҆сцѣле́нїемъ ѿврати́вшаѧ: ра́дꙋйсѧ, всѧ̑ лю́ди во и҆́стинѣ правосла́вїѧ ᲂу҆вѣ́рившаѧ.

Ра́дꙋйсѧ, ꙗ҆́кѡ тебє̀ ра́ди правосла́внїи лю́дїе столькра́ты прельщє́нїѧ а҆га̑рѧнскаѧ побѣди́ша: ра́дꙋйсѧ, ꙗ҆́кѡ тебє̀ ра́ди и҆ совраще́ннїи ѿ латы́нъ па́ки правосла́внꙋю вѣ́рꙋ ѡ҆блобыза́ша.

Ра́дꙋйсѧ, къ не́йже всѝ живꙋ́щїи мл҃твеннѡ ѻ҆́чи воздвиза́ютъ: ра́дꙋйсѧ, ю҆́же и҆ молѧ́щїисѧ ѡ҆ ᲂу҆покое́нїи ᲂу҆ме́ршихъ въ по́мощь призыва́ютъ.

Ра́дꙋйсѧ, и҆ ѿ жите́йскихъ нꙋ́ждъ притека́ющыѧ къ тебѣ̀ и҆з̾е́млющаѧ: ра́дꙋйсѧ, па́че си́хъ всѧ̑кїѧ нꙋ̑жды претерпѣва́ющымъ крѣ́пость да́рствꙋющаѧ.

Ра́дꙋйсѧ, хрⷭ҇толюби́вомꙋ во́инствꙋ во бране́хъ вспоможе́нїе: ра́дꙋйсѧ, на де́мѡны во́инствꙋющымъ бл҃го́е наставле́нїе.

Ра́дꙋйсѧ, похвало̀ поча́евскаѧ и҆ всегѡ̀ мі́ра наде́ждо и҆ ᲂу҆тѣше́нїе.

Конда́къ і҃.

Спастѝ хотѧ́щи, пречⷭ҇таѧ бцⷣа, препро́стꙋю нѣ́кꙋю ста́рицꙋ во ѡ҆слѣпле́нїи лати́нстѣмъ бы́вшꙋю и҆ внꙋ́кꙋ ма́лꙋю и҆мꙋ́щꙋю, правосла́вїемъ ᲂу҆̀бо просвѣще́ннꙋю, но тѣле́сными ѻ҆чесы̑ слѣпотствꙋ́ющꙋ, тѣ́мже си́ма ѻ҆бѣ́ма благо́е жела́нїе влага́етъ, є҆́же на горѣ̀ поча́евстѣй чꙋдотво́рномꙋ є҆ѧ̀ ѡ҆́бразꙋ поклони́тисѧ, и҆дѣ́же а҆́бїе слѣпꙋ́ю ѻ҆трокови́цꙋ чꙋде́снѣ и҆сцѣлѧ́етъ и҆ ста́рицꙋ правосла́внꙋю вѣ́рꙋ и҆сповѣ́дати наꙋча́етъ, вопїю́щꙋю бг҃ꙋ: А҆ллилꙋ́їа.

І҆́косъ і҃.

Стѣна̀ нерꙋши́маѧ и҆́стинныѧ вѣ́ры ꙗ҆ви́ласѧ є҆сѝ, влⷣчце, занѐ ꙗ҆́коже нечести́вїи є҆ретїцы̀ ѿ прославле́нїѧ тебє̀, ꙗ҆́кѡ и҆́стинныѧ бцⷣы, съ ᲂу҆по́рствомъ ѿверго́шасѧ, та́кѡ и҆ правосла́внїи въ вѣ́рѣ твое́й тве́рди пребы́ша, и҆ ѿ мл҃твъ непреста́ннѡ тебѣ̀ приноси́мыхъ николи́же ѿврати́тисѧ восхо́щꙋтъ, и҆ си́хъ ра́ди є҆реті́ческихъ глагѡ́лъ во ᲂу҆шеса̀ своѧ̑ прїима́ти не де́рзнꙋтъ, но се́рдцемъ благода́рнымъ восхвалѧ́ти тѧ̀ не преста́нꙋтъ, глаго́люще:

Ра́дꙋйсѧ, хрⷭ҇тїа́нѡмъ ѿра́до и҆ ᲂу҆тѣше́нїе: ра́дꙋйсѧ, а҆́гг҃льскимъ чинѡ́мъ сла́во и҆ поклоне́нїе.

Ра́дꙋйсѧ, ѿ льсти́выхъ глагѡ́лъ є҆реті́ческихъ на́съ ѿвраща́ющаѧ: ра́дꙋйсѧ, па́мѧтованїемъ млⷭ҇тей твои́хъ ᲂу҆мы̀ на́шѧ къ бг҃ꙋ возносѧ́щаѧ.

Ра́дꙋйсѧ, ст҃ы̑ѧ а҆пⷭ҇лы ко ᲂу҆спе́нїю твоемꙋ̀ на ѻ҆́блацѣхъ воздꙋ́шныхъ призва́вшаѧ: ра́дꙋйсѧ, и҆ грѣ̑шныѧ лю́ди въ то́й де́нь на го́рꙋ поча́евскꙋю въ ты́сѧщахъ и҆ тма́хъ на всѧ́ко лѣ́то собира́ющаѧ.

Ра́дꙋйсѧ, є҆ѧ́же ра́ди хрⷭ҇тїа́не трꙋ́дность пꙋтѝ, а҆́ки сла́дкое ᲂу҆покое́нїе, под̾е́млютъ: ра́дꙋйсѧ, є҆ѧ́же ра́ди и҆ лѣни́вїи подража́ти и҆́мъ тща́тсѧ.

Ра́дꙋйсѧ, и҆́нокѡмъ сла́дость мїрскꙋ́ю забы́ти блгⷣтїю твое́ю посо́бствꙋющаѧ: ра́дꙋйсѧ, вспѧ́ть ѡ҆зира́ющїѧсѧ сновидѣ̑ньми грѡ́зными ᲂу҆страша́ющаѧ.

Ра́дꙋйсѧ, цр҃кве хрⷭ҇то́вы лꙋ́чшаѧ дїади́мо: ра́дꙋйсѧ, страны̀ на́шеѧ щи́те неѡдоли́мый.

Ра́дꙋйсѧ, похвало̀ поча́евскаѧ и҆ всегѡ̀ мі́ра наде́ждо и҆ ᲂу҆тѣше́нїе.

Конда́къ а҃і.

Пѣ́нїе бл҃года́рное ѡ҆ твои́хъ, влⷣчце, благодѣѧ́нїѧхъ во все́мъ мі́рѣ ѿ хрⷭ҇тїа́нъ возноси́мое, а҆́ки ѳѷмїа́мъ къ нб҃сѝ непреста́ннѡ восходѧ́щїй помышлѧ́юще и҆ на̑ша ᲂу҆бѡ́гаѧ хвалє́нїѧ не ѿврати́ти тебѣ̀ про́симъ, є҆ще́ же и҆ блгⷣть покаѧ́нїѧ дарова́ти тебѣ̀ мо́лимъ, со ᲂу҆пова́нїемъ пою́ще бг҃ꙋ: А҆ллилꙋ́їа.

І҆́косъ а҃і.

Свѣ́тъ живота̀ вре́меннагѡ и҆ вѣ́чныѧ жи́зни ᲂу҆пова́нїе ꙗ҆ви́ласѧ є҆сѝ, влⷣчце, человѣ́кꙋ нѣ́коемꙋ въ бессара́бїи ᲂу҆мре́ти и҆мꙋ́щемꙋ, но внеза́пꙋ, по вкꙋше́нїи воды̀ ѿ ст҃ы́ни поча́евскїѧ, здра́вꙋ бы́вшемꙋ, є҆́же срѡ́дницы є҆го̀ ви́дѣвше, со стра́хомъ и҆ ᲂу҆миле́нїемъ тебѣ̀ воззва́ша:

Ра́дꙋйсѧ, болѧ́щихъ и҆сцѣле́нїе: ра́дꙋйсѧ, скорбѧ́щихъ слы́шанїе.

Ра́дꙋйсѧ, тобо́ю бо сме́рть прише́дшаѧ ѿгна́сѧ: ра́дꙋйсѧ, тобо́ю бо вѣ́ра несꙋмнѣ́ннаѧ на́мъ дарова́сѧ.

Ра́дꙋйсѧ, ꙗ҆́кѡ предвѣща́нїе гаврїи́ла пред̾ ѻ҆́чїю на́шею сбыва́етсѧ: ра́дꙋйсѧ, ꙗ҆́кѡ ѿ всѣ́хъ родѡ́въ, по глаго́лꙋ твоемꙋ̀, ны́нѣ и҆ при́снѡ ᲂу҆блажа́ешисѧ.

Ра́дꙋйсѧ, го́рꙋ поча́евскꙋю, ꙗ҆́кѡ мѣ́сто пребыва́нїѧ твоегѡ̀ ѡ҆ст҃и́вшаѧ: ра́дꙋйсѧ, а҆́ки вторы́й назаре́тъ тꙋ́ю ꙗ҆ви́вшаѧ.

Ра́дꙋйсѧ, ꙗ҆́же никогѡ́же ᲂу҆пова́нїѧ ѿврати́вшаѧ: ра́дꙋйсѧ, всѣ́хъ мл҃твы те́плѣ прїе́млющаѧ.

Ра́дꙋйсѧ, здра́вїе на́мъ подава́ющаѧ: ра́дꙋйсѧ, ко сп҃се́нїю на́съ возводѧ́щаѧ.

Ра́дꙋйсѧ, похвало̀ поча́евскаѧ и҆ всегѡ̀ мі́ра наде́ждо и҆ ᲂу҆тѣше́нїе.

Конда́къ в҃і.

Блгⷣть и҆сцѣле́нїй и҆ ᲂу҆миле́нїѧ мл҃твеннагѡ ѿ твоеѧ̀, влⷣчце, і҆кѡ́ны и҆сточа́ємаѧ, да не вотщѐ дꙋша́мъ на́шымъ бꙋ́детъ, а҆́ще бо грѣ̑хъ ра́ди во ѡ҆камене́нное безчꙋ́вствїе впадо́хомъ: ѡ҆ба́че, ꙗ҆́кѡ и҆мꙋ́щаѧ вла́сть мє́ртвыѧ воскреша́ти, и҆ на́ше пробꙋдѝ дꙋше́вное ѡ҆мертвѣ́нїе, и҆ по́мысломъ лꙋ́чшимъ срⷣца̀ на̑ша ѡ҆зарѝ, да грѣхо́внꙋю пре́лесть возненави́дѣвше, воспое́мъ бг҃ꙋ: А҆ллилꙋ́їа.

І҆́косъ в҃і.

Пою́ще твоѧ̀ чꙋдеса̀ во ѡ҆би́тели поча́евстѣй ꙗ҆вле́ннаѧ, мо́лимъ тѧ̀, влⷣчце, лица̀ твоегѡ̀ ѿ страны̀ на́шеѧ не ѿвратѝ, но и҆ все́мъ приходѧ́щымъ на ст҃ꙋ́ю го́рꙋ твою̀ и҆ млⷭ҇ти ѿ тебє̀ и҆́щꙋщымъ во благо́е проше́нїе и҆спо́лни, да всѝ воспою́тъ тѝ си́це:

Ра́дꙋйсѧ, всепра́веднагѡ бг҃а ᲂу҆милостивле́нїе: ра́дꙋйсѧ, хрⷭ҇тїа́нъ ко хрⷭ҇тꙋ̀ дерзнове́нїе.

Ра́дꙋйсѧ, торжество̀ вѣ́ры въ ла́ѵрѣ твое́й ꙗ҆влѧ́ющаѧ: ра́дꙋйсѧ, сердца̀ человѣ́кѡвъ любо́вїю распалѧ́ющаѧ.

Ра́дꙋйсѧ, ꙗ҆́кѡ дре́внимъ чꙋдесе́мъ подо́бное здѣ̀ ви́дѣти лю́дїе сподо́бишасѧ: ра́дꙋйсѧ, ꙗ҆́кѡ гора̀ сїѧ̀, а҆́ки вторы́й сїна́й, въ страна́хъ хрⷭ҇тїа́нскихъ просла́висѧ.

Ра́дꙋйсѧ, бг҃а на землѝ ꙗ҆́вльшагосѧ во чре́вѣ твое́мъ поне́сшаѧ: ра́дꙋйсѧ, человѣ̑ки мл҃твою твое́ю къ бг҃ꙋ возносѧ́щаѧ.

Ра́дꙋйсѧ, і҆кѡ́нꙋ твою̀, ꙗ҆́кѡ проповѣ́дницꙋ сп҃се́нїѧ во ѡ҆би́тели твое́й ѡ҆ста́вившаѧ: ра́дꙋйсѧ, слѣ́дъ стопы̀ твоеѧ̀, цѣле́бною водо́ю и҆сполнѧ́емый, чꙋдесы̑ просла́вившаѧ.

Ра́дꙋйсѧ, съ нбⷭ҇ныхъ высо́тъ на рабы̑ твоѧ̑ призира́ющаѧ: ра́дꙋйсѧ, на благі̑ѧ дѣѧ́нїѧ вѣ́рныѧ наставлѧ́ющаѧ.

Ра́дꙋйсѧ, похвало̀ поча́евскаѧ и҆ всегѡ̀ мі́ра наде́ждо и҆ ᲂу҆тѣше́нїе.

Конда́къ г҃і.

Ѽ всепѣ́таѧ мт҃и хрⷭ҇та̀ бг҃а, всѧ̑ ро́ды хрⷭ҇тїа̑нскїѧ любо́вїю себѣ̀ всынови́вшаѧ! Достѡ́йныѧ похвалы̑ воспѣ́ти тебѣ̀ недоꙋмѣ́емъ мы̀, грѣ́шнїи, ѡ҆ба́че любо́вїю твое́ю побѣжда́емїи и҆ къ твоемꙋ̀ чꙋдотво́рномꙋ ѡ҆́бразꙋ ѻ҆́чи своѧ̀ возводѧ́ще, мо́лимъ тѧ̀: въ боре́нїи и҆ нꙋ́ждахъ на́шихъ не ѡ҆ста́ви ча́дъ твои́хъ, застꙋпле́нїю твоемꙋ̀ те́плѣ вѣ́рꙋющихъ и҆ сн҃ꙋ твоемꙋ̀ вопїю́щихъ: А҆ллилꙋ́їа.

Се́й конда́къ глаго́ли три́жды, посе́мъ а҃-й і҆́косъ и҆ а҃-й конда́къ.

І҆́косъ а҃.

А҆рха́гг҃лъ гаврїи́лъ пе́рвѣе, ра́дꙋйсѧ, тебѣ̀ приноша́ше, влⷣчце, є҆гда̀ зача́тїе сн҃а бж҃їѧ бл҃говѣствова́ше, по пресла́внѣмъ же ᲂу҆спе́нїи твое́мъ всѧ̑ нбⷭ҇ныѧ си̑лы тꙋ́южде хвалꙋ̀ на нб҃сѝ тебѣ̀ непреста́ннѡ прино́сѧтъ: ка́кѡ ᲂу҆̀бо мы̀, грѣ́шнїи, своѧ̑ гла̑сы съ гла̑сы безпло́тныхъ совокꙋпи́ти де́рзнемъ: ѡ҆ба́че млⷭ҇рдїе твоѐ ко все́мъ ка́ющымсѧ помина́юще, ᲂу҆стнѣ̀ на̑ша со стра́хомъ и҆ любо́вїю ѿверза́емъ, глаго́люще си́це:

Ра́дꙋйсѧ, млⷭ҇ти бе́здно: ра́дꙋйсѧ, любвѐ неистощи́мое мо́ре.

Ра́дꙋйсѧ, ро́да хрⷭ҇тїа́нскагѡ блага́ѧ предста́тельнице: ра́дꙋйсѧ, ѡ҆би́тели поча́евскїѧ стѣно̀ нерꙋши́маѧ.

Ра́дꙋйсѧ, правосла̑вныѧ лю́ди на го́рꙋ поча́евскꙋю ᲂу҆́зами любвѐ привлека́ющаѧ: ра́дꙋйсѧ, всѧ́кꙋю печа́ль ѿ дꙋ́шъ и҆́хъ ѿгонѧ́ющаѧ.

Ра́дꙋйсѧ, є҆ѧ́же чꙋдотво́рный ѻ҆́бразъ, ꙗ҆́кѡ ѕвѣзда̀, ѿ горы̀ поча́евскїѧ на́съ пꙋтево́дствꙋетъ: ра́дꙋйсѧ, є҆́йже возноси̑мыѧ мл҃твы стра̑стныѧ прилѡ́ги вско́рѣ ѿража́ютъ.

Ра́дꙋйсѧ, ꙗ҆вле́нїемъ свои́мъ на горѣ̀ се́й лю́ди ᲂу҆тѣ́шившаѧ: ра́дꙋйсѧ, слѣ́дъ стопы̀ твоеѧ̀ на не́й на́мъ ѡ҆ста́вившаѧ.

Ра́дꙋйсѧ, вѣ́рныхъ при́сное дерзнове́нїе: ра́дꙋйсѧ, сꙋмнѧ́щихсѧ до́брое ᲂу҆твержде́нїе.

Ра́дꙋйсѧ, похвало̀ поча́евскаѧ и҆ всегѡ̀ мі́ра наде́ждо и҆ ᲂу҆тѣше́нїе.

Конда́къ а҃.

Взбра́нной воево́дѣ родѡ́въ хрⷭ҇тїа́нскихъ и҆ страны̀ на́шеѧ и҆звѣ́стнѣй и҆зба́вительницѣ хвалє́бныѧ пѣ́сни принесе́мъ, вѣ́рнїи, на ст҃ѣ́й горѣ̀ є҆ѧ̀ собра́вшесѧ: ты́ же, ꙗ҆́кѡ и҆мꙋ́щаѧ млⷭ҇рдїе неизрече́нное, ѽ влⷣчце бцⷣе, моле́нїѧ на́шегѡ пред̾ чꙋдотво́рнымъ твои́мъ ѡ҆́бразомъ возноси́магѡ не ѿве́ржи, да въ ᲂу҆миле́нїи серде́цъ зове́мъ тѝ:

Ра́дꙋйсѧ, похвало̀ поча́евскаѧ и҆ всегѡ̀ мі́ра наде́ждо и҆ ᲂу҆тѣше́нїе.

Моли́тва а҃.

Къ тебѣ̀, ѽ бг҃омт҃и, мл҃твеннѡ притека́емъ мы̀ грѣ́шнїи, чꙋдеса̀ твоѧ̀ во ст҃ѣ́й ла́ѵрѣ поча́евстѣй ꙗ҆влє́ннаѧ помина́юще и҆ ѡ҆ свои́хъ сокрꙋша́ющесѧ прегрѣше́нїихъ. Вѣ́мы, влⷣчце, вѣ́мы, ꙗ҆́кѡ не подоба́ше на́мъ грѣ́шнымъ чесогѡ̀ проси́ти, то́кмѡ ѡ҆ є҆́же првⷣномꙋ сꙋдїѝ беззакѡ́нїѧ на́шѧ ѡ҆ста́вити на́мъ. Всѧ́ бо, на́ми въ житїѝ претерпѣ̑ннаѧ, скѡ́рби же и҆ нꙋ̑жды и҆ болѣ̑зни, ꙗ҆́кѡ плоды̀ паде́нїй на́шихъ прозѧбо́ша на́мъ, бг҃ꙋ сїѧ̑ на и҆справле́нїе на́ше попꙋща́ющꙋ. Тѣ́мже всѧ̑ сїѧ̑ и҆́стиною и҆ сꙋдо́мъ свои́мъ наведѐ гдⷭ҇ь на грѣ̑шныѧ рабы̀ своѧ̑, и҆̀же въ печа́лехъ свои́хъ къ застꙋпле́нїю твоемꙋ̀, пречтⷭ҇аѧ, притеко́ша, и҆ во ᲂу҆миле́нїи серде́цъ къ тебѣ̀ взыва́ютъ си́це: грѣхѡ́въ и҆ беззако́нїй на́шихъ, бл҃га́ѧ, не помѧнѝ, но па́че всечⷭ҇тны̑ѧ рꙋ́цѣ твоѝ воздви́гши, къ сн҃ꙋ твоемꙋ̀ и҆ бг҃ꙋ предста́ни, да лю́тѣ содѣ́ѧннаѧ на́ми ѿпꙋ́ститъ на́мъ, да, за премнѡ́гаѧ неиспо́лнєннаѧ ѡ҆бѣща̑нїѧ на̑ша, лица̀ своегѡ̀ ѿ рабѡ́въ свои́хъ не ѿврати́тъ, да блгⷣти своеѧ̀, сп҃се́нїю на́шемꙋ посо́бствꙋющїѧ, ѿ дꙋ́шъ на́шихъ не ѿи́метъ. Є҆́й, влⷣчце, бꙋ́ди сп҃се́нїю на́шемꙋ хода́таица, и҆ малодꙋ́шїѧ на́шегѡ не возгнꙋша́вшисѧ, при́зри на стена̑нїѧ на̑ша, ꙗ҆̀же въ бѣда́хъ и҆ ско́рбехъ на́шихъ пред̾ чꙋдотво́рнымъ твои́мъ ѡ҆́бразомъ возно́симъ. Просвѣтѝ ᲂу҆миле́нными пѡ́мыслы ᲂу҆мы̀ на́шѧ, вѣ́рꙋ на́шꙋ ᲂу҆крѣпѝ, наде́ждꙋ ᲂу҆твердѝ, любвѐ сладча́йшїй да́ръ сподо́би на́съ прїѧ́ти. Си́ми ᲂу҆́бѡ, пречтⷭ҇аѧ, дарова́ньми, а҆ не болѣ́зньми и҆ скорбьмѝ живо́тъ на́шъ ко сп҃се́нїю да возво́дитсѧ, но ѿ ᲂу҆ны́нїѧ и҆ ѿча́ѧнїѧ дꙋ́шы на́шѧ ѡ҆гражда́ющи, и҆зба́ви на́съ маломо́щныхъ ѿ находѧ́щихъ на ны̀ бѣ́дъ и҆ нꙋ́ждъ, и҆ клеветы̀ человѣ́ческїѧ, и҆ болѣ́зней нестерпи́мыхъ. Да́рꙋй ми́ръ и҆ бл҃гоꙋстрое́нїе жи́тельствꙋ хрⷭ҇тїа́нскомꙋ предста́тельствомъ твои́мъ, влⷣчце: ᲂу҆твердѝ правосла́внꙋю вѣ́рꙋ въ странѣ̀ на́шей и҆ во все́мъ мі́рѣ. Цр҃ковь а҆пⷭ҇льскꙋю и҆ собо́рнꙋю ᲂу҆мале́нїю не преда́ждь, ᲂу҆ста́вы ст҃ы́хъ ѻ҆тє́цъ на вѣ́ки непоколеби́мы сохранѝ, и҆ всѣ́хъ къ тебѣ̀ притека́ющихъ ѿ ро́ва поги́бельнагѡ сп҃сѝ. Є҆ще́ же и҆ є҆́ресїю прельще́нныхъ бра́тїй на́шихъ, и҆лѝ вѣ́рꙋ сп҃си́тельнꙋю во грѣхо́вныхъ страсте́хъ погꙋби́вшихъ, па́ки ко и҆́стиннѣй вѣ́рѣ и҆ покаѧ́нїю приведѝ, да вкꙋ́пѣ съ на́ми твоемꙋ̀ чꙋдотво́рномꙋ ѡ҆́бразꙋ покланѧ́ющесѧ, твоѐ предста́тельство и҆сповѣ́дѧтъ. Сподо́би ᲂу҆̀бо на́съ, прест҃а́ѧ гпⷭ҇жѐ бцⷣе, є҆щѐ въ животѣ̀ се́мъ побѣ́дꙋ и҆́стины твои́мъ застꙋпле́нїемъ ᲂу҆зрѣ́ти: сподо́би на́съ блгⷣтнꙋю ра́дость пре́жде кончи́ны на́шеѧ воспрїѧ́ти, ꙗ҆́коже дре́вле насе́льники поча́євскїѧ твои́мъ ꙗ҆вле́нїемъ побѣди́тєли и҆ просвѣти́тєли а҆га́рѧнъ показа́ла є҆сѝ: да всѝ мы̀, бл҃года́рнымъ се́рдцемъ вкꙋ́пѣ со а҆́гг҃лы и҆ прⷪ҇рѡ́ки и҆ а҆пⷭ҇лы и҆ со всѣ́ми ст҃ы́ми твоѐ млⷭ҇рдїе прославлѧ́юще, воздади́мъ сла́вꙋ, че́сть и҆ поклоне́нїе въ трⷪ҇цѣ пѣва́емомꙋ бг҃ꙋ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, во вѣ́ки вѣкѡ́въ. А҆ми́нь.

Моли́тва в҃.

Цр҃и́це на́ша пребл҃га́ѧ, влⷣчце пребл҃гослове́ннаѧ, наде́ждо на́ша бцⷣе! Къ тебѣ̀ ᲂу҆миле́ннѡ ны́нѣ притека́емъ, и҆ сокрꙋше́нною дꙋше́ю и҆ смире́ннымъ се́рдцемъ мо́лимъ тѧ̀, всепѣ́таѧ, пред̾ пречⷭ҇тымъ твои́мъ ѡ҆́бразомъ: помѧнѝ щедро́ты твоѧ̑ дре́внїѧ, ꙗ҆̀же ѿ тебє̀ здѣ̀ бы̑вшыѧ, и҆ ꙗ҆́коже и҆ногда̀ ꙗ҆ви́ласѧ є҆сѝ на скалѣ̀ поча́евстѣй, въ столпѣ̀ ѻ҆́гненнѣмъ, ѿ ка́мене цѣльбоно́снꙋю во́дꙋ и҆сточа́ющи, си́це и҆ ны́нѣ предста́ни на́мъ, мт҃и многомо́щнаѧ, и҆ теплото́ю бг҃ома́тернїѧ любвѐ твоеѧ̀ согрѣ́й сердца̀ на̑ша ѡ҆каменє́ннаѧ, сле́зы любвѐ и҆ покаѧ́нїѧ нераска́ѧннагѡ ѿ ѻ҆че́й на́шихъ и҆сторга́ющи. Ты́ бо є҆ди́на є҆сѝ застꙋ́пница на́ша бг҃одарова́ннаѧ: тѧ̀ ᲂу҆̀бо мо́лимъ, и҆зба́ви ѿ всѣ́хъ бѣ́дъ, ѿ всѧ̑кїѧ напа́сти, болѣ̑зни и҆ скѡ́рби, рабы̑ твоѧ̀, предста́тельствомъ вели́кагѡ ѡ҆ на́съ хода́таѧ и҆ мл҃твенника твоегѡ̀, всебл҃же́ннагѡ ѻ҆тца̀ на́шегѡ і҆́ѡва, ᲂу҆го́дника твоегѡ̀ поча́евскагѡ, є҆гѡ́же мл҃твѣ ꙗ҆́вѣ внима́ла є҆сѝ на воздꙋ́сѣ и҆ногда̀, є҆гда̀ всесла́внымъ и҆ стра́шнымъ ꙗ҆вле́нїемъ твои́мъ и҆зба́вила є҆сѝ ѡ҆би́тель твою̀ ѿ наше́ствїѧ и҆ ѡ҆бложе́нїѧ а҆га́рѧнскагѡ. При́зри бл҃госе́рдїемъ, всепѣ́таѧ, призрѣ́нїемъ млⷭ҇тивагѡ твоегѡ̀ застꙋпле́нїѧ на странꙋ̀ на́шꙋ, и҆ на всѧ̑ лю́ди твоѧ̑ и҆зле́й бога́тыѧ твоѧ̀ млⷭ҇ти: разсѣ̑ѧнныѧ соберѝ, невѣ̑рныѧ же и҆ и҆новѣ̑рныѧ, во страна́хъ на́шихъ, на пꙋ́ть и҆́стинный наста́ви, ѿпа́дшыѧ ѿ бл҃гочести́выѧ ѻ҆те́ческїѧ вѣ́ры па́ки возвратѝ и҆ сопричтѝ и҆́хъ ст҃ѣ́й твое́й правосла́внѣй и҆ каѳолі́честѣй цр҃кви: въ семе́йствахъ на́шихъ ми́ръ ᲂу҆твердѝ, ста́рость поддержѝ, ю҆́ныѧ наста́ви, младє́нцы воспита́й, си̑рыѧ и҆ вдови̑цы застꙋпѝ, плѣнє́нныѧ свободѝ, болѧ́щыѧ ᲂу҆врачꙋ́й, на сꙋди́щи и҆ въ темни́цахъ, и҆ въ заточе́нїихъ, и҆ въ го́рькихъ рабо́тахъ сꙋ́щихъ помѧнѝ, ѡ҆гражда́ющи ны̀ вы́нꙋ, посѣща́ющи и҆ ᲂу҆тѣша́ющи то́ками чꙋде́съ и҆ зна́менїй многоразли́чныхъ, ꙗ҆̀же при́снѡ и҆злива́еши все́мъ ѿ ст҃ы́ѧ і҆кѡ́ны твоеѧ̀ цѣльбоно́сныѧ. Да́рꙋй, всебл҃га́ѧ, землѝ плодоро́дїе, воздꙋ́ха бл҃горастворе́нїе и҆ всѧ̑, ꙗ҆̀же на по́льзꙋ на́шꙋ да́ры бл҃говре́мєнныѧ и҆ бл҃гопотрє́бныѧ, мл҃твами и҆збра́нныхъ ᲂу҆го́дникѡвъ твои́хъ, бл҃года́тный тво́й ли́къ на ст҃ѣ́й і҆кѡ́нѣ твое́й ѡ҆крꙋжа́ющихъ: и҆лїѝ бг҃оглаго́ливаго, ст҃а́го а҆рхїдїа́кона стефа́на первострада́льнаго, прпⷣбнаго а҆враа́мїѧ всеблаже́ннаго, и҆ бг҃омꙋ́жнаго ми́ны мч҃ника многоимени́таго, и҆ съ ни́ми кꙋ́пнѡ ст҃ы́хъ и҆ првⷣныхъ же́нъ: параске́ѵы прехва́льныѧ, і҆рі́ны пребл҃же́нныѧ и҆ ст҃ы́ѧ є҆катері́ны великомꙋ́ченицы многострада́льныѧ, и҆ всѣ́хъ ст҃ы́хъ. Є҆гда́ же приспѣ́етъ на́ше ѿ житїѧ̀ сегѡ̀ ѿше́ствїе и҆ къ вѣ́чности преселе́нїе, си́це предста́ни на́мъ, пребл҃гослове́ннаѧ, ꙗ҆́коже и҆ногда̀ бл҃гопоспеши́ла є҆сѝ ѡ҆би́тели твое́й во спⷭ҇нїе во вре́мѧ бра́ни збара́жской, и҆ твои́мъ те́плымъ хода́тайствомъ да́рꙋй на́мъ хрⷭ҇тїа́нскꙋю кончи́нꙋ живота̀ на́шегѡ безболѣ́зненнꙋ, непосты́днꙋ, ми́рнꙋ и҆ ст҃ы́хъ та̑инъ прича́стнꙋ: да ꙗ҆́коже въ се́й жи́зни, си́це и҆ въ бꙋ́дꙋщемъ вѣ́цѣ сподо́бимсѧ всѝ, мл҃твами твои́ми, безконе́чныѧ нбⷭ҇ныѧ жи́зни во црⷭ҇твїи возлю́бленнагѡ сн҃а твоегѡ̀, гдⷭ҇а бг҃а и҆ сп҃са на́шегѡ, і҆и҃са хрⷭ҇та̀, є҆мꙋ́же подоба́етъ всѧ́каѧ сла́ва, че́сть и҆ поклоне́нїе, во вѣ́ки вѣкѡ́въ. А҆ми́нь.

Ис­то­рия этой чу­до­твор­ной ико­ны Бо­го­ма­те­ри нераз­рыв­но свя­за­на с По­ча­ев­ским мо­на­сты­рём в честь Успе­ния Пре­свя­той Бо­го­ро­ди­цы (Укра­и­на). На го­ре, где ныне рас­по­ло­же­на Успен­ская По­ча­ев­ская лав­ра, в 1340 го­ду по­се­ли­лись два ино­ка. Од­на­жды один из них по­сле мо­лит­вы по­шёл к вер­шине го­ры и вдруг уви­дел Бо­го­ро­ди­цу, сто­я­щую на камне, слов­но объ­ятую пла­ме­нем. Он по­звал дру­го­го ино­ка, ко­то­рый был так­же удо­сто­ен со­зер­цать чу­дес­ное яв­ле­ние. Тре­тьим сви­де­те­лем ви­де­ния был пас­тух Иоанн Бо­сой. Уви­дев необыч­ный свет на го­ре, он под­нял­ся на неё и вме­сте с ино­ка­ми стал про­слав­лять Бо­га и Его Пре­чи­стую Ма­терь.

По­сле то­го, как яв­ле­ние ис­чез­ло, на камне, где сто­я­ла Бо­го­ро­ди­ца, остал­ся от­пе­ча­ток Её пра­вой сто­пы. От­пе­ча­ток этот со­хра­нил­ся до сих пор и все­гда на­пол­нен во­дой, ко­то­рую чу­дес­ным об­ра­зом ис­то­ча­ет ка­мень. Во­да в сто­пе не оску­де­ва­ет, несмот­ря на то, что мно­го­чис­лен­ные па­лом­ни­ки по­сто­ян­но на­пол­ня­ют ею свои со­су­ды для ис­це­ле­ния от неду­гов.

Са­ма же По­ча­ев­ская ико­на Бо­жьей Ма­те­ри по­яви­лась в оби­те­ли сле­ду­ю­щим об­ра­зом. В 1559 го­ду мит­ро­по­лит Нео­фит из Кон­стан­ти­но­по­ля, про­ез­жая через Во­лынь, по­се­тил жив­шую в име­нии Ор­ля, неда­ле­ко от По­ча­е­ва, дво­рян­ку Ан­ну Гой­скую. В бла­го­сло­ве­ние он оста­вил ей при­ве­зён­ную из Кон­стан­ти­но­по­ля ико­ну Бо­го­ро­ди­цы. Вско­ре ста­ли за­ме­чать, что от По­ча­ев­ской ико­ны Бо­го­ро­ди­цы ис­хо­дит си­я­ние. Ко­гда в 1597 го­ду пе­ред ико­ной ис­це­лил­ся брат Ан­ны Филипп, она пе­ре­да­ла об­раз ино­кам, по­се­лив­шим­ся на По­ча­ев­ской го­ре.

Через неко­то­рое вре­мя на ска­ле бы­ла вы­стро­е­на цер­ковь в честь Успе­ния Бо­жи­ей Ма­те­ри, став­шая ча­стью мо­на­стыр­ско­го ком­плек­са. За свою ис­то­рию По­ча­ев­ский мо­на­стырь пре­тер­пел нема­ло бед­ствий: при­тес­нял­ся лю­те­ра­на­ми, под­вер­гал­ся на­па­де­нию ту­рок, по­па­дал в ру­ки уни­а­тов, но бла­го­да­ря за­ступ­ни­че­ству Бо­жи­ей Ма­те­ри все невзго­ды бы­ли пре­одо­ле­ны.

На спис­ках чу­до­твор­ной По­ча­ев­ской ико­ны Пре­свя­той Бо­го­ро­ди­цы ча­сто изо­бра­жа­ют ка­мень с от­пе­чат­ком сто­пы Бо­жи­ей Ма­те­ри.