Акафист Пресвятой Богородице пред иконой «Тихвинская»

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 09 июля (26 июня ст. ст.)

Утвержден для общецерковного использования.

Конда́к 1.

Взбра́нной Воево́де, Влады́чице на́шей Богоро́дице благода́рственная пе́ния воспису́ем о явле́нии чу́дныя Ея́ ико́ны, к не́йже притека́ющии при́сно избавля́ются от вра́г ви́димых и неви́димых. Ты́ же, Госпоже́ не́ба и земли́, я́ко милосе́рдая Ма́ти, приими́ ны́не ма́лое сие́ моле́ние на́ше и неотсту́пну никогда́же сотвори́ ми́лость Твою́ от на́с и заступле́ние, охраня́ющи от все́х бе́д и напа́стей на́с, зову́щих Ти́:

Ра́дуйся, Влады́чице, ми́лостивая о на́с пред Бо́гом Засту́пнице.

И́кос 1.

А́нгелов ли́цы ликовству́юще слу́жат Тебе́, Влады́чице, и почита́юще Тя́, на руку́ Твое́ю носи́вшую Творца́ ви́димыя и неви́димыя тва́ри, ико́ну Твою́ с ме́ста на ме́сто прено́сят. Мы́ же, земноро́днии, дивя́щеся чу́дному явле́нию ико́ны Твоея́, А́нгелы носи́мыя, вопие́м Ти́ си́це:

Ра́дуйся, все́х Небе́сных Си́л вы́сшая; ра́дуйся, вся́ а́нгельския чи́ны превосходя́щая.

Ра́дуйся, честне́йшая Херуви́м; ра́дуйся, сла́внейшая без сравне́ния Серафи́м.

Ра́дуйся, ра́дование А́нгелов; ра́дуйся, похвале́ние лико́в небе́сных.

Ра́дуйся, от А́нгелов воспева́емая; ра́дуйся, от Серафи́мов прославля́емая.

Ра́дуйся, от Арха́нгел покланя́емая; ра́дуйся, от во́инств небе́сных почита́емая.

Ра́дуйся, в ико́не Твое́й от А́нгел чти́мая; ра́дуйся, в ви́димом о́бразе Твое́м от неви́димых си́л носи́мая.

Ра́дуйся, Влады́чице, ми́лостивая о на́с пред Бо́гом Засту́пнице.

Конда́к 2.

Ви́дяще ры́барие над пучи́ною во́д носи́мую неви́димою си́лою и све́том подо́бно со́лнцу сия́ющую Твою́, Богома́ти, ико́ну с Предве́чным Младе́нцем, ры́барей призва́вшим на уловле́ние ми́ра в се́ти спасе́ния, возопи́ша: Аллилу́иа.

И́кос 2.

Ра́зум недоразуме́нный ди́внаго явле́ния ико́ны Твоея́ разуме́ти лю́дие и́щуще, уве́деша, я́ко чти́мая в Царегра́де пречестна́я ико́на в насле́дие Росси́йскому ро́ду дарова́ся. Те́мже мы́, благодаря́ще за ми́лость Твою́ к ро́ду на́шему, вопие́м Ти́:

Ра́дуйся, Ма́ти и́стинныя Жи́зни; ра́дуйся, послуша́нием Твои́м преслуша́ние Е́вы исцели́вшая.

Ра́дуйся, затво́ренный Еде́м отве́рзшая; ра́дуйся, ми́ру яви́вшая Сокруши́теля главы́ зми́евой.

Ра́дуйся, ковче́же, Умири́теля ми́ра носи́вший; ра́дуйся, ми́р спа́сшая от потопле́ния грехо́внаго.

Ра́дуйся, ле́ствице, Е́юже сни́де Бо́г; ра́дуйся, земны́х возводя́щая на не́бо.

Ра́дуйся, мо́ре, фарао́на мы́сленнаго потопи́вшее; ра́дуйся, купино́, неопали́вшаяся все́льшимся в Тя́ огне́м Божества́.

Ра́дуйся, скрижа́ле Богопи́санная; ра́дуйся, ка́меню, во́ду жи́зни источи́вший жа́ждущим.

Ра́дуйся, Влады́чице, ми́лостивая о на́с пред Бо́гом Засту́пнице.

Конда́к 3.

Си́ла Вы́шняго осеня́ше страну́ Ти́хвинскую, егда́ ико́на Пречи́стыя Богома́тере, многоча́стне явля́ющися и вре́менным пребыва́нием освяща́ющи зе́млю, к воздвиза́нию хра́мов святы́х возбужда́ше, да сла́вится и́мя Влады́чицы во сла́ву Триипоста́снаго Бо́га, Ему́же вопие́м: Аллилу́иа.

И́кос 3.

Иму́ще благоутро́бное изволе́ние, да лю́дие страны́ Ти́хвинския вожделе́ют пребыва́ния Твоего́ с ни́ми да па́мятуют вы́ну покро́в Тво́й, ико́ну Твою́ явля́ла еси́ многоча́стне, до́ндеже указа́ла еси́ богоизбра́нное ме́сто вселе́ния ея́. Те́мже чудя́щеся вопие́м Ти́:

Ра́дуйся, ски́ние, в Не́йже всели́ся Божество́ теле́сне; ра́дуйся, свята́я святы́х, в Ню́же еди́ною вни́де ве́чный Архиере́й.

Ра́дуйся, киво́те позлаще́нный Ду́хом, Законода́теля носи́вший; ра́дуйся, свети́льниче, огне́м Боже́ственным возжже́нный.

Ра́дуйся, ста́мно, носи́вшая ма́нну жи́зни Христа́; ра́дуйся, трапе́зо, Хле́б живо́тный вмести́вшая.

Ра́дуйся, кади́льнице у́гль Божества́ иму́щая, ми́р ве́сь облагоуха́вшая; ра́дуйся, же́зле, Цве́т прозя́бший Христа́.

Ра́дуйся, сто́лпе, к ве́чному насле́дию руководя́й; ра́дуйся, о́блаче, от вра́г ви́димых и неви́димых покрыва́яй.

Ра́дуйся, земле́ обетова́ния; ра́дуйся, руно́, на Не́же Христо́с, я́ко до́ждь сни́де с небесе́.

Ра́дуйся, Влады́чице, ми́лостивая о на́с пред Бо́гом Засту́пнице.

Конда́к 4.

Бу́рю смуще́ния и ско́рби утоли́ти тща́щеся, благове́рнии лю́дие взыва́ша ко Го́споду: яви́ на́м боже́ственный да́р, его́же человеколю́бно стране́ Росси́йстей посла́л еси́, не скры́й сокро́вища, и́мже душе́вную нищету́ на́шу обогати́ти наде́яхомся, претвори́ печа́ль на́шу в ра́дость, отри́ сле́зы и рыда́ния. И улучи́вше жела́емое, возопи́ша: Аллилу́иа.

И́кос 4.

Слы́шав па́стырь па́ствы своея́ ра́достное обре́тение и Ма́терь Пастыренача́льника, упа́сшуюся в страна́х Ти́хвинских, устроя́ет хра́м в че́сть новоявле́нныя ико́ны Ея́, и пресви́теры учрежда́ет, да вы́ну прославля́я Богома́терь, вопию́т Е́й:

Ра́дуйся, Дщи́, у́хо приклони́вшая ко гла́су Отца́ Небе́снаго; ра́дуйся, я́ко прама́тернее се́тование разруши́ся рождество́м Твои́м.

Ра́дуйся, Неве́сто, Ея́же добро́ты вожделе́ Ца́рь Небе́сный; ра́дуйся, Цари́це, одесну́ю Царя́ предста́вшая.

Ра́дуйся, ря́сны златы́ми украше́нная и всю́ сла́ву вну́трь иму́щая; ра́дуйся, вводя́щая мно́гих в черто́г Ца́рства Небе́снаго.

Ра́дуйся, я́блоко, его́же благово́ние обоня́ет ве́сь ми́р; ра́дуйся, кри́не чистоты́, блиста́нием светя́щийся.

Ра́дуйся, ми́ро благово́нное, всему́ ми́ру излия́нное; ра́дуйся, ца́рскую порфи́ру, пло́ть Творца́ все́х, из де́вственных крове́й Твои́х истка́вшая.

Ра́дуйся, живы́й запечатле́нный исто́чниче, источи́вший Во́ду жи́зни; ра́дуйся, мы́сленный виногра́де, Гро́здь Боже́ственный возрасти́вший.

Ра́дуйся, Влады́чице, ми́лостивая о на́с пред Бо́гом Засту́пнице.

Конда́к 5.

Боготе́чная звезда́ яви́ся ико́на Твоя́, Богома́ти, всю́ страну́ Ти́хвинскую обтека́ющи и су́щих во тьме́ неве́жествия све́том богове́дения озаря́ющи, скорбя́щих ра́достию осиява́ющи, заблужда́ющих же на пу́ть де́лания за́поведей Сы́на Твоего́ и Бо́га наставля́ющи, Ему́ же благода́рственне вопие́м: Аллилу́иа.

И́кос 5.

Ви́дев Гео́ргий на кла́де дре́ва седя́щу Жену́, же́зл червле́ный в рука́х иму́щу и све́том неизрече́нным сия́ющу, Е́йже, предстоя́, бесе́доваше ди́вный Святи́тель, позна́ чрез благоуха́ние благода́ти Тя́, Богоро́дицу, чу́вственный зра́к прии́мшую и Святи́теля Никола́я предстоя́ща Тебе́, и возопи́ со тре́петом:

Ра́дуйся, до́ме, его́же созда́ Себе́ для вселе́ния Прему́дрость Бо́жия; ра́дуйся, Де́во, Емману́ила роди́вшая.

Ра́дуйся, же́зле Иессе́ов, от него́же прозябе́ Цве́т Христо́с Бо́г; ра́дуйся, Неневе́стная Неве́сто, осене́нием Ду́ха заче́ншая Сы́на.

Ра́дуйся, сви́тче, в не́мже пе́рстом О́тчим написа́ся Сло́во; ра́дуйся, кни́го де́вства запечатле́нная, Ио́сифу на хране́ние вруче́нная.

Ра́дуйся, клеще́ та́инственная, у́гль Божества́ во чре́ве прии́мшая; ра́дуйся, престо́ле превознесе́нный, на не́мже пло́тию возсе́де Христо́с.

Ра́дуйся, о́блаче ле́гкий, на не́мже прии́де Госпо́дь сла́вы; ра́дуйся, врата́ затворе́нная, и́миже еди́н Христо́с про́йде.

Ра́дуйся, горо́ несеко́мая, от нея́же краеуго́льный ка́мень отсече́ся, Христо́с; ра́дуйся, огнеро́сная пе́ще, неопа́льно прии́мшая о́гнь Божества́.

Ра́дуйся, Влады́чице, ми́лостивая о на́с пред Бо́гом Засту́пнице.

Конда́к 6.

Пропове́дник бы́в ви́димаго Твоего́ пребыва́ния в стране́ Ти́хвинстей и ди́внаго промышле́ния о не́й, благочести́вый Гео́ргий явле́ние Твое́ и во́лю Твою́ лю́дем возвести́, е́йже неповину́ющиися чудесы́ вразумля́ются сла́вити Тя́, Влады́чице, и пе́ти Бо́гу: Аллилу́иа.

И́кос 6.

Возсия́ти све́ту Богопозна́ния явле́нием ико́ны Твоея́ изво́лившая, и све́т и́ноческия жи́зни возжещи́ благоволи́ла еси́, Богома́ти, на ме́сте явле́ния Твоея́ ико́ны, да и́ноков ли́цы вопию́т Ти́ непреста́нно:

Ра́дуйся, непло́днаго ко́рене благопло́дное прозябе́ние; ра́дуйся, от младе́нства Бо́гу посвяще́нная.

Ра́дуйся, во святе́м хра́ме воспита́вшаяся; ра́дуйся, Бо́гу уневе́стившаяся.

Ра́дуйся, все́ми доброде́тельми преукраше́нная; ра́дуйся, светоно́сная пала́то, Влады́це угото́ванная.

Ра́дуйся, благода́тию Бо́жиею предочище́нная; ра́дуйся, от нача́ла веко́в во глави́зну на́шего спасе́ния предъизбра́нная.

Ра́дуйся, Неве́сто Архите́ктона небе́снаго, земно́му те́ктону на хране́ние вруче́нная; ра́дуйся, ма́лый Назаре́т Свои́м пребыва́нием возвели́чившая.

Ра́дуйся, го́рних си́л похвало́; ра́дуйся, все́х земноро́дных сла́ва.

Ра́дуйся, Влады́чице, ми́лостивая о на́с пред Бо́гом Засту́пнице.

Конда́к 7.

Хотя́щим преподо́бным Марти́рию и Кири́ллу во уедине́нии подвиза́тися и труды́ и по́двиги и́ноческими Бо́гу угожда́ти, пу́ть в ме́сто вожделева́емаго по́двига в столпе́ о́гненнем и гла́се указа́ла еси́. Они́ же позна́вше Тя́, я́ко Одиги́трию благу́ю, спутьше́ствующую и́м, возопи́ша Бо́гу: Аллилу́иа.

И́кос 7.

Но́вый исто́чник чуде́с в стране́ се́верней яви́ся ико́на Твоя́ Ти́хвинская, Пресвята́я Влады́чице, незави́стно точа́щий исцеле́ния все́м притека́ющим с ве́рою: слепи́и бо прозира́ют, неми́и благоглаго́ливи быва́ют, глуси́и слы́шат, разсла́бленнии возстаю́т, разли́чными неду́ги одержи́мии здра́ви быва́ют, беснова́тии от у́з де́монских свобожда́ются. Те́мже сла́вяще Тя́, вопие́м:

Ра́дуйся, я́ко на Тебе́ почи́ благоволе́ние О́тчее; ра́дуйся, Ду́хом Святы́м осене́нная.

Ра́дуйся, я́ко в Тебе́ воплоти́ся Сы́н Бо́жий, Спа́с ми́ру; ра́дуйся, сове́та неизрече́ннаго Таи́ннице.

Ра́дуйся, от А́нгела благове́стие прии́мшая; ра́дуйся, а́нгельским, е́же ра́дуйся, ве́сь ми́р обра́довавшая.

Ра́дуйся, я́ко Госпо́дь с Тобо́ю; ра́дуйся, я́ко Тобо́ю вси́ земноро́днии Бо́гу прибли́жишася.

Ра́дуйся, Благослове́нная в жена́х; ра́дуйся, все́м жена́м благослове́ние дарова́вшая.

Ра́дуйся, Ма́ти, до рождества́ и по рождестве́ пребы́вшая Де́вою; ра́дуйся, нача́ток че́сти и сла́вы де́вства.

Ра́дуйся, Влады́чице, ми́лостивая о на́с пред Бо́гом Засту́пнице.

Конда́к 8.

Стра́нно чу́до явле́ния о́браза Твоего́, Влады́чице, и несказа́нно, удивля́ет преми́рная и ужаса́ет земна́я, вку́пе же и просвеща́ет благода́тию ро́ждшагося от Тебе́ Христа́ Бо́га на́шего. Стра́нно и заступле́ние оби́тели от враго́в, хвали́вшихся разори́ти достоя́ние Твое́. Сего́ ра́ди вопие́м Бо́гу: Аллилу́иа.

И́кос 8.

Вся́ еси́ в вы́шних, Влады́чице, но и ни́жних не оставля́еши, защища́ющи, а́ки стено́ю и забра́лом, честно́ю ико́ною Твое́ю оби́тель Твою́. Рекла́ бо еси́, егда́ бы́сть наше́ствие вра́жие, да во́змут лю́дие ико́ну Твою́ и обы́дут по стена́м о́крест, и у́зрят ми́лость Бо́жию. Те́мже изба́вленнии Тобо́ю от вра́г возопи́ша Тебе́:

Ра́дуйся, Ма́ти Творца́ и Го́спода Своего́; ра́дуйся, Ея́же ра́ди младе́нец Иоа́нн взыгра́ся во чре́ве Елисаве́ты.

Ра́дуйся, смире́нием возвы́шенная; ра́дуйся, от все́х родо́в ублажа́емая.

Ра́дуйся, небе́сным ра́дование и земны́м ми́р рожде́нием Твои́м дарова́вшая; ра́дуйся, от А́нгелов славосло́вие, от па́стырей велича́ние, от волхво́в поклоне́ние о рожде́нии Твое́м прии́мшая.

Ра́дуйся, млеко́м пита́вшая го́рняя и до́льняя благода́тию Свое́ю Пита́ющаго; ра́дуйся, пелена́ми пови́вшая Одева́ющагося све́том, я́ко ри́зою.

Ра́дуйся, носи́вшая на руку́ Твое́ю Нося́щаго ве́сь ми́р дла́нию; ра́дуйся, во хра́м прине́сшая Свяще́ние хра́ма.

Ра́дуйся, Симео́ном благослове́нная; ра́дуйся, А́нною проро́чицею возвели́ченная.

Ра́дуйся, Влады́чице, ми́лостивая о на́с пред Бо́гом Засту́пнице.

Конда́к 9.

Вся́каго естества́ а́нгельскаго чисте́йши су́щи, Влады́чице, оби́тель, ра́ди прише́ствия Твоея́ ико́ны созда́нную, от нечистоты́ грехо́вной бли́з поги́бели бы́вшую, но покая́нием очи́стившуюся, я́ко о́бщая Моле́бница о ро́де христиа́нстем, изба́вила еси́ от враго́в, по подо́бию нечи́стых живо́тных подкопа́ти ю́ труди́вшихся. Те́мже вопие́м Бо́гу: Аллилу́иа.

И́кос 9.

Вети́я многовеща́нныя недоуме́ют воспе́ти по достоя́нию мно́жество чуде́с Твои́х, Влады́чице, и та́йны Твоего́ строе́ния спасе́ния челове́ков: о́во бо бла́гостию, о́во же посеще́нием наказа́ний руково́диши люде́й на пу́ть спасе́ния. Зане́ необори́му оби́тель сохрани́вши от враго́в ви́димых, о́гненным очище́нием благоволи́ла еси́ очи́стити от уязвле́ний врага́ неви́димаго, вразумля́я, я́ко чистота́, воздержа́ние и моли́твы серде́чныя уго́днее Тебе́ па́че хвалы́ еди́ных то́чию у́ст. Те́мже вопие́м Ти́:

Ра́дуйся, Еги́пет освяти́вшая прише́ствием Твои́м; ра́дуйся, Галиле́йскую страну́ просла́вившая пребыва́нием Твои́м.

Ра́дуйся, по всему́ Иерусали́му иска́вшая Отроча́ Твое́, Его́же возлюби́ душа́ Твоя́; ра́дуйся, в дому́ Отца́ Его́ обре́тшая Его́.

Ра́дуйся, вся́ глаго́лы о Сы́не Твое́м слага́вшая в се́рдце Свое́м; ра́дуйся, в Сы́не Твое́м пре́жде все́х позна́вшая Бо́га.

Ра́дуйся, Сы́ну Твоему́ послужи́вшая в земне́м житии́ Его́; ра́дуйся, страда́нием Его́ спострада́вшая.

Ра́дуйся, при Кресте́ Сы́на Твоего́ усыновле́ние Иоа́нна апо́стола и все́х ве́рующих прии́мшая; ра́дуйся, Матери́нски возлюби́вшая искупле́нных кро́вию Его́.

Ра́дуйся, пе́рвее все́х уразуме́вшая та́йну воскресе́ния Сы́на Твоего́; ра́дуйся, премно́гия ра́дости наслади́вшаяся в вознесе́нии Сы́на Твоего́ на небеса́.

Ра́дуйся, Влады́чице, ми́лостивая о на́с пред Бо́гом Засту́пнице.

Конда́к 10.

Спасти́ хотя́щи мно́гия лю́ди от обдержа́щих и́х скорбе́й и боле́зней и ве́ру и́х утверди́ти во всеси́льное заступле́ние Твое́, Влады́чице, во мно́гих граде́х, оби́телех, ве́сех правосла́вныя страны́ си́лу чудотворе́ния дарова́ла еси́ изображе́нием честны́я ико́ны Твоея́, да ви́дяще явля́емую Тобо́ю ми́лость, вопию́т со умиле́нием Бо́гу: Аллилу́иа.

И́кос 10.

Стена́ и щи́т была́ еси́, Влады́чице, правосла́вному во́инству, под зна́менем Твоея́ ико́ны проти́ву два́десяти язы́к во́инствовавшему, сохраня́я его́ от стре́л вра́жиих. Те́мже бу́ди стена́ и покро́в от все́х враго́в ви́димых и неви́димых и на́м, ко пречестне́й ико́не Твое́й с ве́рою и любо́вию припа́дающим и вопию́щим Тебе́:

Ра́дуйся, утеше́ние ве́рным по вознесе́нии Сы́на Твоего́; ра́дуйся, учи́тельнице и споспе́шнице Апо́столом.

Ра́дуйся, извеще́нием Твоего́ к Бо́гу отше́ствия обра́дованная; ра́дуйся, ли́к учени́ческий о́блаком к погребе́нию Ти́ совоку́пльшая.

Ра́дуйся, от земли́ дла́ньми Сы́на Твоего́ восприе́млемая; ра́дуйся, от все́х а́нгельских чинонача́лий провожда́емая.

Ра́дуйся, земно́е не́бо к го́рнему селе́нию возвыше́нное; ра́дуйся, престо́ле Госпо́день, от земли́ вознесе́нный в Ца́рствие Небе́сное.

Ра́дуйся, возду́х освяти́вшая восхожде́нием Твои́м; ра́дуйся, чрез Фому́ уве́рившая Твое́ на не́бо с пло́тию преселе́ние.

Ра́дуйся, учени́ческому ли́ку обеща́ние храни́ти его́ испо́лньшая; ра́дуйся, присеще́нием Твои́м от Сы́на Твоего́ и Бо́га ми́р тому́ пода́вшая.

Ра́дуйся, Влады́чице, ми́лостивая о на́с пред Бо́гом Засту́пнице.

Конда́к 11.

Пе́ние вся́кое побежда́ется, спростре́тися тща́щееся ко мно́жеству чуде́с, приснобыва́емых от святы́я Твоея́ и чудотво́рныя ико́ны. Я́коже бо ско́рая Помо́щница неду́ги исцеля́еши, от бе́д избавля́еши, от муче́ния де́монов свобожда́еши, на вся́ком ме́сте с ве́рою Тя́ призыва́ющих и вопию́щих Бо́гу: Аллилу́иа.

И́кос 11.

Светоприе́мную свещу́ зри́м святу́ю ико́ну Твою́, Богома́ти, во страна́х Ти́хвинских благода́тию Твое́ю возже́нную, всю́ страну́ просвеща́ющую и мно́гих ко све́ту своему́ привлека́ющую на спасе́ние ду́ш. Те́мже вопие́м Ти́:

Ра́дуйся, сохраня́ти и спаса́ти все́х призыва́ющих Тя́ обеща́вшая; ра́дуйся, прославля́ющих Тя́ прославля́ющая.

Ра́дуйся, к Сы́ну Твоему́ и Бо́гу моли́твы ве́рных принося́щая; ра́дуйся, и Сама́ непреста́нно у престо́ла Сы́на Твоего́ и Бо́га моля́щаяся о все́х.

Ра́дуйся, благода́ть Твою́ ико́нам Твои́м честны́м дарова́вшая; ра́дуйся, всю́ вселе́нную луча́ми Твоея́ благода́ти озари́вшая.

Ра́дуйся, честне́йшая Херуви́м и сла́внейшая Серафи́м; ра́дуйся, всея́ тва́ри вы́сшая.

Ра́дуйся, Цари́це Не́ба и земли́; ра́дуйся, я́ко мно́го мо́жет моли́тва Твоя́ пред Сы́ном Твои́м.

Ра́дуйся, всего́ ро́да христиа́нскаго ско́рое заступле́ние; ра́дуйся, все́х ве́рных тве́рдое упова́ние.

Ра́дуйся, Влады́чице, ми́лостивая о на́с пред Бо́гом Засту́пнице.

Конда́к 12.

Благода́ти Твоея́ но́вое зна́мение да́ти восхоте́в, Петро́ву гра́ду исто́чник чуде́с отве́рзла еси́, Богома́ти, в ико́не Твое́й, да ве́рующии вразумля́ются, тружда́ющиися и скорбя́щии обрета́ют гото́вое прибе́жище и заступле́ние и, прославля́ющи Бо́га дарова́вшаго такова́я, вопию́т Ему́: Аллилу́иа.

И́кос 12.

Пою́ще чудеса́ Твоя́ и ми́лости ро́ду на́шему явле́нныя, уми́льно припа́даем к пречи́стому о́бразу Твоему́, Влады́чице, и лобыза́юще, со стра́хом и любо́вию мо́лим Тя́: наста́ви на́с на пу́ть спасе́ния, да досто́йни бу́дем вы́ну Твоего́ ми́лостиваго заступле́ния, бу́ди при́сно Засту́пница и Хода́таица о на́с, вопию́щих Ти́:

Ра́дуйся, ве́рных утвержде́ние и защище́ние; ра́дуйся, неве́рных вразумле́ние и просвеще́ние.

Ра́дуйся, отча́янных наде́ждо; ра́дуйся, гре́шных спасе́ние.

Ра́дуйся, печа́льных утеше́ние; ра́дуйся, больны́х исцеле́ние.

Ра́дуйся, вдо́в и сиро́т покро́ве; ра́дуйся, оби́димых прибе́жище.

Ра́дуйся, царе́й укрепле́ние; ра́дуйся, святи́телей удобре́ние.

Ра́дуйся, де́вствующих похвало́; ра́дуйся, все́х благочести́вых весе́лие.

Ра́дуйся, Влады́чице, ми́лостивая о на́с пред Бо́гом Засту́пнице.

Конда́к 13.

О Всепе́тая Ма́ти, ро́ждшая все́х святы́х Святе́йшее Сло́во, бу́ди на́м покро́в и защище́ние в жи́зни се́й от враго́в ви́димых и неви́димых, от бе́д и скорбе́й, сохрани́ от искуше́ний и грехопаде́ний, и в бу́дущей жи́зни, на суде́ Сы́на Твоего́ и Бо́га на́шего, бу́ди Засту́пница и Хода́таица, избавля́ющи на́с от ве́чнаго осужде́ния, да спасе́ннии Тобо́ю, с ли́ки а́нгельскими вопие́м Бо́гу: Аллилу́иа.

Этот конда́к чита́ется три́жды, зате́м и́кос 1- й и конда́к 1-й.

И́кос 1.

А́нгелов ли́цы ликовству́юще слу́жат Тебе́, Влады́чице, и почита́юще Тя́, на руку́ Твое́ю носи́вшую Творца́ ви́димыя и неви́димыя тва́ри, ико́ну Твою́ с ме́ста на ме́сто прено́сят. Мы́ же, земноро́днии, дивя́щеся чу́дному явле́нию ико́ны Твоея́, А́нгелы носи́мыя, вопие́м Ти́ си́це:

Ра́дуйся, все́х Небе́сных Си́л вы́сшая; ра́дуйся, вся́ а́нгельския чи́ны превосходя́щая.

Ра́дуйся, честне́йшая Херуви́м; ра́дуйся, сла́внейшая без сравне́ния Серафи́м.

Ра́дуйся, ра́дование А́нгелов; ра́дуйся, похвале́ние лико́в небе́сных.

Ра́дуйся, от А́нгелов воспева́емая; ра́дуйся, от Серафи́мов прославля́емая.

Ра́дуйся, от Арха́нгел покланя́емая; ра́дуйся, от во́инств небе́сных почита́емая.

Ра́дуйся, в ико́не Твое́й от А́нгел чти́мая; ра́дуйся, в ви́димом о́бразе Твое́м от неви́димых си́л носи́мая.

Ра́дуйся, Влады́чице, ми́лостивая о на́с пред Бо́гом Засту́пнице.

Конда́к 1.

Взбра́нной Воево́де, Влады́чице на́шей Богоро́дице благода́рственная пе́ния воспису́ем о явле́нии чу́дныя Ея́ ико́ны, к не́йже притека́ющии при́сно избавля́ются от вра́г ви́димых и неви́димых. Ты́ же, Госпоже́ не́ба и земли́, я́ко милосе́рдая Ма́ти, приими́ ны́не ма́лое сие́ моле́ние на́ше и неотсту́пну никогда́же сотвори́ ми́лость Твою́ от на́с и заступле́ние, охраня́ющи от все́х бе́д и напа́стей на́с, зову́щих Ти́:

Ра́дуйся, Влады́чице, ми́лостивая о на́с пред Бо́гом Засту́пнице.

Моли́тва пе́рвая.

О Пресвята́я Де́во, Ма́ти Го́спода вы́шних си́л, Небесе́ и земли́ Цари́це, гра́да и страны́ на́шея Всемо́щная Засту́пнице. Приими́ хвалебноблагода́рственное пе́ние сие́ от на́с, недосто́йных ра́б Твои́х, и вознеси́ моли́твы на́ша ко престо́лу Бо́га Сы́на Твоего́, да ми́лостив бу́дет непра́вдам на́шим и проба́вит бла́гость Свою́ чту́щим всечестно́е и́мя Твое́ и с ве́рою и любо́вию покланя́ющимся чудотво́рному о́бразу Твоему́. Не́смы бо досто́йни от Него́ поми́ловани бы́ти, а́ще не Ты́ уми́лостивиши Его́ о на́с, Влады́чице, я́ко вся́ Тебе́ от Него́ возмо́жна су́ть. Сего́ ра́ди к Тебе́ прибега́ем, я́ко к несомне́нней и ско́рой Засту́пнице на́шей: услы́ши на́с моля́щихся Тебе́, осени́ на́с вседержа́вным покро́вом Твои́м и испроси́ у Бо́га Сы́на Твоего́ па́стырем на́шим ре́вность и бде́ние о душа́х, градоправи́телем му́дрость и си́лу, судия́м пра́вду и нелицеприя́тие, наста́вником ра́зум и смиренному́дрие, супру́гом любо́вь и согла́сие, ча́дом послуша́ние, оби́димым терпе́ние, оби́дящим стра́х Бо́жий, скорбя́щим благоду́шие, ра́дующимся воздержа́ние, все́м же на́м ду́х ра́зума и благоче́стия, ду́х милосе́рдия и кро́тости, ду́х чистоты́ и пра́вды. Е́й, Госпоже́ Пресвята́я, умилосе́рдися на немощны́я лю́ди Твоя́, разсе́янныя собери́, заблу́ждшия на пу́ть пра́вый наста́ви, ста́рость поддержи́, ю́ныя уцелому́дри, младе́нцы воспита́й, и при́зри на все́х на́с призре́нием ми́лостиваго Твоего́ заступле́ния, воздви́гни на́с из глубины́ грехо́вныя и просвети́ серде́чныя о́чи на́ша к зре́нию спасе́ния, ми́лостива на́м бу́ди зде́ и та́мо, в стране́ земна́го прише́льствия и на Стра́шнем Суде́ Сы́на Твоего́; преста́вльшияся же в ве́ре и покая́нии от жития́ сего́ отцы́ и бра́тию на́шу в ве́чней жи́зни со а́нгелы и со все́ми святы́ми жи́ти сотвори́. Ты́ бо еси́, Госпоже́, сла́ва небе́сных и упова́ние земны́х, Ты́ по Бо́зе на́ша Наде́жда и Засту́пница все́х, притека́ющих к Тебе́ с ве́рою. Тебе́ у́бо мо́лимся, и Тебе́, я́ко Всемогу́щей Помо́щнице, са́ми себе́ и дру́г дру́га и ве́сь живо́т на́ш предае́м, ны́не и при́сно и во ве́ки веко́в. Ами́нь.

Моли́тва втора́я.

Благодари́м Тя́, о Преблага́я и Пречи́стая, Преблагослове́нная Де́во, Влады́чице, Ма́ти Христа́ Бо́га на́шего, о все́х благодея́ниях Твои́х, я́же показа́ла еси́ ро́ду челове́ческому, наипа́че же на́м, христоимени́тым лю́дем Росси́йскаго наро́да, о ни́хже ниже́ са́мый а́нгельский язы́к к похвале́нию дово́лен бу́дет, я́коже и ны́не удиви́ла еси́ неизрече́нную Свою́ ми́лость на на́с, недосто́йных рабе́х Твои́х, преесте́ственным самоприше́ствием пречи́стыя Твоея́ ико́ны, е́юже всю́ просвети́ла еси́ Росси́йскую страну́. Те́мже и мы́, гре́шнии, со стра́хом и ра́достию покланя́ющеся, вопие́м Ти́: о Пресвята́я Де́во, Цари́це и Богоро́дице, спаси́ и поми́луй Святе́йшаго Патриа́рха Моско́вскаго и всея́ Руси́, архиере́и же и вся́ лю́ди, и пода́ждь стране́ побе́ды на вся́ враги́, и сохрани́ вся́ гра́ды и страны́ христиа́нския, и се́й святы́й хра́м от вся́каго наве́та вра́жия изба́ви, и все́м вся́ на по́льзу да́руй, ны́не прише́дшим с ве́рою и моля́щимся рабо́м Твои́м, и покланя́ющимся пресвято́му о́бразу Твоему́, я́ко благослове́нна еси́ с ро́ждшимся от Тебе́ Сы́ном и Бо́гом ны́не, и при́сно, и во ве́ки веко́в. Ами́нь.

А҆ка́ѳїстъ ко прест҃ѣ́й бцⷣѣ, ꙗ҆вле́нїѧ ра́ди чꙋдотво́рныѧ є҆ѧ̀ і҆кѡ́ны тѵ́хфинскїѧ.

Конда́къ а҃.

Взбра́нной воево́дѣ, влⷣчцѣ на́шей бцⷣѣ бл҃года́рствєннаѧ пѣ̑нїѧ восписꙋ́емъ ѡ҆ ꙗ҆вле́нїи чꙋ́дныѧ є҆ѧ̀ і҆кѡ́ны, къ не́йже притека́ющїи при́снѡ и҆збавлѧ́ютсѧ ѿ вра̑гъ ви́димыхъ и҆ неви́димыхъ. Ты́ же, гпⷭ҇жѐ не́ба и҆ землѝ, ꙗ҆́кѡ млⷭ҇рдаѧ мт҃и, прїимѝ ны́нѣ ма́лое сїѐ моле́нїе на́ше и҆ неѿстꙋ́пнꙋ никогда́же сотворѝ млⷭ҇ть твою̀ ѿ на́съ и҆ застꙋпле́нїе, ѡ҆хранѧ́ющи ѿ всѣ́хъ бѣ́дъ и҆ напа́стей на́съ, зовꙋ́щихъ тѝ:

Ра́дꙋйсѧ, влⷣчце, млⷭ҇тиваѧ ѡ҆ на́съ пред̾ бг҃омъ застꙋ́пнице.

І҆́косъ а҃.

А҆́гг҃лѡвъ ли́цы ликовствꙋ́юще слꙋ́жатъ тебѣ̀, влⷣчце, и҆ почита́юще тѧ̀, на рꙋкꙋ̀ твоє́ю носи́вшꙋю творца̀ ви́димыѧ и҆ неви́димыѧ тва́ри, і҆кѡ́нꙋ твою̀ съ мѣ́ста на мѣ́сто прено́сѧтъ. Мы́ же, земноро́днїи, дивѧ́щесѧ чꙋ́дномꙋ ꙗ҆вле́нїю і҆кѡ́ны твоеѧ̀, а҆́гг҃лы носи́мыѧ, вопїе́мъ тѝ си́це:

Ра́дꙋйсѧ, всѣ́хъ нбⷭ҇ныхъ си́лъ вы́сшаѧ: ра́дꙋйсѧ, всѧ̑ а҆́гг҃льскїѧ чи́ны превосходѧ́щаѧ.

Ра́дꙋйсѧ, чтⷭ҇нѣ́йшаѧ херꙋві̑мъ: ра́дꙋйсѧ сла́внѣйшаѧ без̾ сравне́нїѧ серафі̑мъ.

Ра́дꙋйсѧ, ра́дованїе а҆́гг҃лѡвъ: ра́дꙋйсѧ похвале́нїе ликѡ́въ нбⷭ҇ныхъ.

Ра́дꙋйсѧ, ѿ а҆́гг҃лѡвъ воспѣва́емаѧ: ра́дꙋйсѧ, ѿ серафі́мѡвъ прославлѧ́емаѧ.

Ра́дꙋйсѧ, ѿ а҆рха̑гг҃лъ покланѧ́емаѧ: ра́дꙋйсѧ, ѿ во́инствъ нбⷭ҇ныхъ почита́емаѧ.

Ра́дꙋйсѧ, въ і҆кѡ́нѣ твое́й ѿ а҆́гг҃лъ чти́маѧ: ра́дꙋйсѧ, въ ви́димомъ ѻ҆́бразѣ твое́мъ ѿ неви́димыхъ си́лъ носи́маѧ.

Ра́дꙋйсѧ, влⷣчце, млⷭ҇тиваѧ ѡ҆ на́съ пред̾ бг҃омъ застꙋ́пнице.

Конда́къ в҃.

Ви́дѧще ры́барїе над̾ пꙋчи́ною во́дъ носи́мꙋю неви́димою си́лою и҆ свѣ́томъ подо́бнѡ со́лнцꙋ сїѧ́ющꙋю твою̀, бг҃омт҃и, і҆кѡ́нꙋ съ предвѣ́чнымъ млⷣнцемъ, ры́барей призва́вшимъ на ᲂу҆ловле́нїе мі́ра въ сѣ̑ти спⷭ҇нїѧ, возопи́ша: А҆ллилꙋ́їа.

І҆́косъ в҃.

Ра́зꙋмъ недоразꙋмѣ́нный ди́внагѡ ꙗ҆вле́нїѧ і҆кѡ́ны твоеѧ̀ разꙋмѣ́ти лю́дїе и҆́щꙋще ᲂу҆вѣ́дѣша, ꙗ҆́кѡ чти́маѧ въ царегра́дѣ пречⷭ҇тна́ѧ і҆кѡ́на въ наслѣ́дїе рѡссі́йскомꙋ ро́дꙋ дарова́сѧ. Тѣ́мже мы̀, бл҃годарѧ́ще за млⷭ҇ть твою̀ къ ро́дꙋ на́шемꙋ, вопїе́мъ тѝ:

Ра́дꙋйсѧ, мт҃и и҆́стинныѧ жи́зни: ра́дꙋйсѧ, послꙋша́нїемъ твои́мъ преслꙋша́нїе є҆́ѵы и҆сцѣли́вшаѧ.

ра́дꙋйсѧ, затво́ренный є҆де́мъ ѿве́рзшаѧ: ра́дꙋйсѧ, мі́рꙋ ꙗ҆ви́вшаѧ сокрꙋши́телѧ главы̀ ѕмі́евой.

Ра́дꙋйсѧ, ковче́же, ᲂу҆мири́телѧ мі́ра носи́вшїй: ра́дꙋйсѧ, мі́ръ сп҃сшаѧ ѿ потопле́нїѧ грѣхо́внагѡ.

Ра́дꙋйсѧ, лѣ́ствице, є҆́юже сни́де бг҃ъ: ра́дꙋйсѧ, земны́хъ возводѧ́щаѧ на нб҃о.

Ра́дꙋйсѧ, мо́ре, фараѡ́на мы́сленнаго потопи́вшее: ра́дꙋйсѧ, кꙋпино̀, неѡпали́вшаѧсѧ все́льшимсѧ въ тѧ̀ ѻ҆гне́мъ бжⷭ҇тва̀.

Ра́дꙋйсѧ, скрижа́ле бг҃опи́саннаѧ: ра́дꙋйсѧ, ка́меню, во́дꙋ жи́зни и҆сточи́вшїй жа́ждꙋщымъ.

Ра́дꙋйсѧ, влⷣчце, млⷭ҇тиваѧ ѡ҆ на́съ пред̾ бг҃омъ застꙋ́пнице.

Конда́къ г҃.

Си́ла вы́шнѧгѡ ѡ҆сѣнѧ́ше странꙋ̀ тѵ́хфинскꙋю, є҆гда̀ і҆кѡ́на пречⷭ҇тыѧ бг҃омт҃ре, многоча́стнѣ ꙗ҆влѧ́ющисѧ и҆ вре́меннымъ пребыва́нїемъ ѡ҆свѧща́ющи зе́млю, къ воздвиза́нїю хра́мѡвъ ст҃ы́хъ возбꙋжда́ше, да сла́витсѧ и҆́мѧ влⷣчцы во сла́вꙋ трїѷпоста́снагѡ бг҃а, є҆мꙋ́же вопїе́мъ: А҆ллилꙋ́їа.

І҆́косъ г҃.

И҆мꙋ́ще бл҃гоꙋтро́бное и҆зволе́нїе, да лю́дїе страны̀ тѵ́хфинскїѧ вожделѣ́ютъ пребыва́нїѧ твоегѡ̀ съ ни́ми да па́мѧтꙋютъ вы́нꙋ покро́въ тво́й, і҆кѡ́нꙋ твою̀ ꙗ҆влѧ́ла є҆сѝ многоча́стнѣ, до́ндеже ᲂу҆каза́ла є҆сѝ бг҃оизбра́нное мѣ́сто вселе́нїѧ є҆ѧ̀. Тѣ́мже чꙋдѧ́щесѧ вопїе́мъ тѝ:

Ра́дꙋйсѧ, ски́нїе, въ не́йже всели́сѧ бжⷭ҇тво̀ тѣле́снѣ: ра́дꙋйсѧ, ст҃а́ѧ ст҃ы́хъ, въ ню́же є҆ди́ною вни́де вѣ́чный а҆рхїере́й.

Ра́дꙋйсѧ, кївѡ́те, позлаще́нный дх҃омъ, законода́телѧ носи́вшїй: ра́дꙋйсѧ, свѣти́льниче, ѻ҆гне́мъ бжⷭ҇твеннымъ возжже́нный.

Ра́дꙋйсѧ, ста́мно, носи́вшаѧ ма́ннꙋ жи́зни, хрⷭ҇та̀: ра́дꙋйсѧ, трапе́зо, хлѣ́бъ живо́тный вмѣсти́вшаѧ.

Ра́дꙋйсѧ, кади́льнице, ᲂу҆́гль бжⷭ҇тва̀ и҆мꙋ́щаѧ, мі́ръ ве́сь ѡ҆бл҃гоꙋха́вшаѧ: ра́дꙋйсѧ, же́зле цвѣ́тъ прозѧ́бшїй, хрⷭ҇та̀.

Ра́дꙋйсѧ, сто́лпе, къ вѣ́чномꙋ наслѣ́дїю рꙋководѧ́й: ра́дꙋйсѧ, ѻ҆́блаче, ѿ вра̑гъ ви́димыхъ и҆ неви́димыхъ покрыва́ѧй.

Ра́дꙋйсѧ, землѐ ѻ҆бѣтова́нїѧ: ра́дꙋйсѧ, рꙋно̀, на не́же хрⷭ҇то́съ, ꙗ҆́кѡ до́ждь, сни́де съ нб҃сѐ.

Ра́дꙋйсѧ, влⷣчце, млⷭ҇тиваѧ ѡ҆ на́съ пред̾ бг҃омъ застꙋ́пнице.

Конда́къ д҃.

Бꙋ́рю смꙋще́нїѧ и҆ ско́рби ᲂу҆толи́ти тща́щесѧ, бл҃говѣ́рнїи лю́дїе взыва́ша ко гдⷭ҇ꙋ: ꙗ҆вѝ на́мъ бжⷭ҇твенный да́ръ, є҆го́же человѣколю́бнѡ странѣ̀ рѡссі́йстѣй посла́лъ є҆сѝ, не скры́й сокро́вища, и҆́мже дꙋше́внꙋю нищетꙋ̀ на́шꙋ ѡ҆богати́ти надѣ́ѧхомсѧ, претворѝ печа́ль на́шꙋ въ ра́дость, ѡ҆трѝ сле́зы и҆ рыда̑нїѧ: и҆ ᲂу҆лꙋчи́вше жела́емое, возопи́ша: А҆ллилꙋ́їа.

І҆́косъ д҃.

Слы́шавъ па́стырь па́ствы своеѧ̀ ра́достное ѡ҆брѣ́тенїе и҆ мт҃рь пастыренача́льника ᲂу҆па́сшꙋюсѧ въ страна́хъ тѵ́хфинскихъ, ᲂу҆строѧ́етъ хра́мъ въ че́сть новоѧвле́нныѧ і҆кѡ́ны є҆ѧ̀, и҆ пресвѵ́теры ᲂу҆чрежда́етъ, да вы́нꙋ прославлѧ́ѧ бг҃омт҃рь вопїю́тъ є҆́й:

Ра́дꙋйсѧ, дщѝ, ᲂу҆́хо приклони́вшаѧ ко гла́сꙋ ѻ҆ц҃а̀ нбⷭ҇нагѡ: ра́дꙋйсѧ, ꙗ҆́кѡ прама́тернее сѣ́тованїе разрꙋши́сѧ ржⷭ҇тво́мъ твои́мъ.

Ра́дꙋйсѧ, невѣ́сто, є҆ѧ́же добро́ты вожделѣ̀ цр҃ь нбⷭ҇ный: ра́дꙋйсѧ, цр҃и́це, ѡ҆деснꙋ́ю цр҃ѧ̀ предста́вшаѧ.

Ра́дꙋйсѧ, рѧ́сны златы́ми ᲂу҆краше́ннаѧ и҆ всю̀ сла́вꙋ внꙋ́трь и҆мꙋ́щаѧ: ра́дꙋйсѧ, вводѧ́щаѧ мно́гихъ въ черто́гъ црⷭ҇тва нбⷭ҇нагѡ.

Ра́дꙋйсѧ, ꙗ҆́блоко, є҆гѡ́же бл҃гово́нїе ѡ҆бонѧ́етъ ве́сь мі́ръ: ра́дꙋйсѧ, крі́не чтⷭ҇оты̀, блиста́нїемъ свѣтѧ́щїйсѧ.

Ра́дꙋйсѧ, мѵ́ро бл҃гово́нное, всемꙋ̀ мі́рꙋ и҆злїѧ́нное: ра́дꙋйсѧ, ца́рскꙋю порфѵ́рꙋ, пло́ть творца̀ всѣ́хъ и҆з̾ двⷭ҇твенныхъ крове́й твои́хъ и҆стка́вшаѧ.

Ра́дꙋйсѧ, живы́й запечатлѣ́нный и҆сто́чниче, и҆сточи́вшїй во́дꙋ жи́зни: ра́дꙋйсѧ, мы́сленный вїногра́де, гро́здь бжⷭ҇твенный возрасти́вшїй.

Ра́дꙋйсѧ, влⷣчце, млⷭ҇тиваѧ ѡ҆ на́съ пред̾ бг҃омъ застꙋ́пнице.

Конда́къ є҃.

Бг҃оте́чнаѧ ѕвѣзда̀ ꙗ҆ви́сѧ і҆кѡ́на твоѧ̀, бг҃омт҃и, всю̀ странꙋ̀ тѵ́хфинскꙋю ѡ҆бтека́ющи и҆ сꙋ́щихъ во тмѣ̀ невѣ́жествїѧ свѣ́томъ бг҃овѣ́дѣнїѧ ѡ҆зарѧ́ющи, скорбѧ́щихъ ра́достїю ѡ҆сїѧва́ющи, заблꙋжда́ющихъ же на пꙋ́ть дѣ́ланїѧ за́повѣдей сн҃а твоегѡ̀ и҆ бг҃а наставлѧ́ющи: є҆мꙋ́же бл҃года́рственнѣ вопїе́мъ: А҆ллилꙋ́їа.

І҆́косъ є҃.

Ви́дѣвъ геѡ́ргїй на кла́дѣ дре́ва сѣдѧ́щꙋ женꙋ̀, же́злъ червле́ный въ рꙋка́хъ и҆мꙋ́щꙋ и҆ свѣ́томъ неизрече́ннымъ сїѧ́ющꙋ, є҆́йже предстоѧ̀ бесѣ́доваше ди́вный ст҃и́тель, позна̀ чрез̾ бл҃гоꙋха́нїе блгⷣти тѧ̀, бцⷣꙋ, чꙋ́вственный зра́къ прїи́мшꙋю, и҆ ст҃и́телѧ нїкола́а, предстоѧ́ща тебѣ̀, и҆ возопѝ со тре́петомъ:

ра́дꙋйсѧ, до́ме, є҆го́же созда̀ себѣ̀ длѧ вселе́нїѧ премⷣрость бж҃їѧ: ра́дꙋйсѧ, дв҃о, є҆мманꙋ́ила роди́вшаѧ.

Ра́дꙋйсѧ, же́зле і҆ессе́овъ, ѿ негѡ́же прозѧбѐ цвѣ́тъ хрⷭ҇то́съ бг҃ъ: ра́дꙋйсѧ, неневѣ́стнаѧ невѣ́сто, ѡ҆сѣне́нїемъ дх҃а заче́ншаѧ сн҃а.

Ра́дꙋйсѧ, сви́тче, въ не́мже пе́рстомъ ѻ҆́ч҃имъ написа́сѧ сло́во: ра́дꙋйсѧ, кни́го двⷭ҇тва запечатлѣ́ннаѧ, і҆ѡ́сифꙋ на хране́нїе врꙋче́ннаѧ.

Ра́дꙋйсѧ, клещѐ та́инственнаѧ, ᲂу҆́гль бжⷭ҇тва̀ во чре́вѣ прїи́мшаѧ: ра́дꙋйсѧ, прⷭ҇то́ле превознесе́нный, на не́мже пло́тїю возсѣ́де хрⷭ҇то́съ.

Ра́дꙋйсѧ, ѻ҆́блаче ле́гкїй, на не́мже прїи́де гдⷭ҇ь сла́вы: ра́дꙋйсѧ, врата̀ затворє́ннаѧ, и҆́миже є҆ди́нъ хрⷭ҇то́съ про́йде.

Ра́дꙋйсѧ, горо̀ несѣко́маѧ, ѿ неѧ́же краеꙋго́льный ка́мень ѿсѣче́сѧ, хрⷭ҇то́съ: ра́дꙋйсѧ, ѻ҆гнеро́снаѧ пе́ще, неѡпа́льнѡ прїи́мшаѧ ѻ҆́гнь бжⷭ҇тва̀.

Ра́дꙋйсѧ, влⷣчце, млⷭ҇тиваѧ ѡ҆ на́съ пред̾ бг҃омъ застꙋ́пнице.

Конда́къ ѕ҃.

Проповѣ́дникъ бы́въ ви́димагѡ твоегѡ̀ пребыва́нїѧ въ странѣ̀ тѵ́хфинстѣй и҆ ди́внагѡ промышле́нїѧ ѡ҆ не́й, бл҃гочести́вый геѡ́ргїй, ꙗ҆вле́нїе твоѐ и҆ во́лю твою̀ лю́демъ возвѣстѝ, є҆́йже неповинꙋ́ющїисѧ чꙋдесы̀ вразꙋмлѧ́ютсѧ сла́вити тѧ̀, влⷣчце, и҆ пѣ́ти бг҃ꙋ: А҆ллилꙋ́їа.

І҆́косъ ѕ҃.

Возсїѧ́ти свѣ́тꙋ бг҃опозна́нїѧ ꙗ҆вле́нїемъ і҆кѡ́ны твоеѧ̀ и҆зво́лившаѧ и҆ свѣ́тъ и҆́ноческїѧ жи́зни возжещѝ бл҃говоли́ла є҆сѝ, бг҃омт҃и, на мѣ́стѣ ꙗ҆вле́нїѧ твоеѧ̀ і҆кѡ́ны, да и҆́нокѡвъ ли́цы вопїю́тъ тѝ непреста́ннѡ:

Ра́дꙋйсѧ, непло́днагѡ ко́рене бл҃гопло́дное прозѧбе́нїе: ра́дꙋйсѧ, ѿ млⷣнства бг҃ꙋ посщ҃е́ннаѧ.

Ра́дꙋйсѧ, во ст҃ѣ́мъ хра́мѣ воспита́вшаѧсѧ: ра́дꙋйсѧ, бг҃ꙋ ᲂу҆невѣ́стившаѧсѧ.

Ра́дꙋйсѧ, всѣ́ми добродѣ́тельми преꙋкраше́ннаѧ: ра́дꙋйсѧ, свѣтоно́снаѧ пала́то, влⷣцѣ ᲂу҆гото́ваннаѧ.

Ра́дꙋйсѧ, блгⷣтїю бж҃їею пред̾ѡчи́щеннаѧ: ра́дꙋйсѧ, ѿ нача́ла вѣкѡ́въ во глави́знꙋ на́шегѡ спⷭ҇нїѧ пред̾избра́ннаѧ.

Ра́дꙋйсѧ, невѣ́сто а҆рхїте́ктона нбⷭ҇нагѡ, земно́мꙋ те́ктонꙋ на хране́нїе врꙋче́ннаѧ: ра́дꙋйсѧ, ма́лый назаре́тъ свои́мъ пребыва́нїемъ возвели́чившаѧ.

Ра́дꙋйсѧ, го́рнихъ си́лъ похвало̀: ра́дꙋйсѧ, всѣ́хъ земноро́дныхъ сла́ва.

Ра́дꙋйсѧ, влⷣчце, млⷭ҇тиваѧ ѡ҆ на́съ пред̾ бг҃омъ застꙋ́пнице.

Конда́къ з҃.

Хотѧ́щымъ прпⷣбнымъ мартѵ́рїю и҆ кѷрі́ллꙋ во ᲂу҆едине́нїи подвиза́тисѧ и҆ трꙋды̑ и҆ пѡ́двиги и҆́ноческими бг҃ꙋ ᲂу҆гожда́ти, пꙋ́ть въ мѣ́сто вожделѣва́емагѡ по́двига въ столпѣ̀ ѻ҆́гненнѣмъ и҆ гла́сѣ ᲂу҆каза́ла є҆сѝ. Ѻ҆ни́ же позна́вше тѧ̀ ꙗ҆́кѡ ѻ҆диги́трїю бл҃гꙋ́ю, спꙋтьше́ствꙋющꙋю и҆̀мъ, возопи́ша бг҃ꙋ: А҆ллилꙋ́їа.

І҆́косъ з҃.

Но́вый и҆сто́чникъ чꙋде́съ въ странѣ̀ сѣ́вернѣй ꙗ҆ви́сѧ і҆кѡ́на твоѧ̀ тѵ́хфинскаѧ, прест҃а́ѧ влⷣчце, незави́стнѡ точа́щїй и҆сцѣлє́нїѧ всѣ̑мъ притека́ющымъ съ вѣ́рою: слѣпі́и бо прозира́ютъ, нѣмі́и бл҃гоглаго́ливи быва́ютъ, глꙋсі́и слы́шатъ, разсла́бленнїи возстаю́тъ, разли́чными недꙋ̑ги ѡ҆держи́мїи здра́ви быва́ютъ, бѣснова́тїи ѿ ᲂу҆́зъ де́монскихъ свобожда́ютсѧ. Тѣ́мже сла́вѧще тѧ̀, вопїе́мъ:

Ра́дꙋйсѧ, ꙗ҆́кѡ на тебѣ̀ почѝ бл҃говоле́нїе ѻ҆́ч҃ее: ра́дꙋйсѧ, дх҃омъ ст҃ы́мъ ѡ҆сѣне́ннаѧ.

Ра́дꙋйсѧ, ꙗ҆́кѡ въ тебѣ̀ вопл҃ти́сѧ сн҃ъ бж҃їй, сп҃съ мі́рꙋ: ра́дꙋйсѧ, совѣ́та неизрече́ннагѡ таи́ннице.

Ра́дꙋйсѧ, ѿ а҆́гг҃ла бл҃говѣ́стїе прїи́мшаѧ: ра́дꙋйсѧ, а҆́гг҃льскимъ, є҆́же ра́дꙋйсѧ, ве́сь мі́ръ ѡ҆бра́довавшаѧ.

Ра́дꙋйсѧ, ꙗ҆́кѡ гдⷭ҇ь съ тобо́ю: ра́дꙋйсѧ, ꙗ҆́кѡ тобо́ю всѝ земноро́днїи бг҃ꙋ прибли́жишасѧ.

Ра́дꙋйсѧ, блгⷭ҇ве́ннаѧ въ жена́хъ: ра́дꙋйсѧ, всѣ̑мъ жена́мъ блгⷭ҇ве́нїе дарова́вшаѧ.

Ра́дꙋйсѧ, мт҃и, до ржⷭ҇тва̀ и҆ по ржⷭ҇твѣ̀ пребы́вшаѧ дв҃ою: ра́дꙋйсѧ, нача́токъ чтⷭ҇и и҆ сла́вы двⷭ҇тва.

Ра́дꙋйсѧ, влⷣчце, млⷭ҇тиваѧ ѡ҆ на́съ пред̾ бг҃омъ застꙋ́пнице.

Конда́къ и҃.

Стра́нно чꙋ́до ꙗ҆вле́нїѧ ѻ҆́браза твоегѡ̀, влⷣчце, и҆ несказа́нно, ᲂу҆дивлѧ́етъ премі̑рнаѧ и҆ ᲂу҆жаса́етъ земна̑ѧ, вкꙋ́пѣ же и҆ просвѣща́етъ блгⷣтїю ро́ждшагѡсѧ ѿ тебє̀ хрⷭ҇та̀ бг҃а на́шегѡ. Стра́нно и҆ застꙋпле́нїе ѻ҆би́тели ѿ врагѡ́въ, хвали́вшихсѧ разори́ти достоѧ́нїе твоѐ. Сегѡ̀ ра́ди вопїе́мъ бг҃ꙋ: А҆ллилꙋ́їа.

І҆́косъ и҃.

Всѧ̀ є҆сѝ въ вы́шнихъ, влⷣчце, но и҆ ни́жнихъ не ѡ҆ставлѧ́еши, защища́ющи, а҆́ки стѣно́ю и҆ забра́ломъ, чтⷭ҇но́ю і҆кѡ́ною твое́ю ѻ҆би́тель твою̀. Рекла́ бо є҆сѝ, є҆гда̀ бы́сть наше́ствїе вра́жїе, да во́змꙋтъ лю́дїе і҆кѡ́нꙋ твою̀ и҆ ѡ҆бы́дꙋтъ по стѣна́мъ ѻ҆́крестъ, и҆ ᲂу҆́зрѧтъ млⷭ҇ть бж҃їю. Тѣ́мже и҆зба́вленнїи тобо́ю ѿ вра̑гъ возопи́ша тебѣ̀:

Ра́дꙋйсѧ, мт҃и творца̀ и҆ гдⷭ҇а своегѡ̀: ра́дꙋйсѧ, є҆ѧ́же ра́ди млⷣнцъ і҆ѡа́ннъ взыгра́сѧ во чре́вѣ є҆лїсаве́ты.

Ра́дꙋйсѧ, смире́нїемъ возвы́шеннаѧ: ра́дꙋйсѧ, ѿ всѣ́хъ родѡ́въ ᲂу҆бл҃жа́емаѧ.

Ра́дꙋйсѧ, нбⷭ҇нымъ ра́дованїе и҆ земны̑мъ ми́ръ рожде́нїемъ твои́мъ дарова́вшаѧ: ра́дꙋйсѧ, ѿ а҆́гг҃лѡвъ славосло́вїе, ѿ па́стырей велича́нїе, ѿ волхвѡ́въ поклоне́нїе ѡ҆ рожде́нїи твое́мъ прїи́мшаѧ.

Ра́дꙋйсѧ, млеко́мъ пита́вшаѧ гѡ́рнѧѧ и҆ дѡ́льнѧѧ блгⷣтїю свое́ю пита́ющаго: ра́дꙋйсѧ, пелена́ми пови́вшаѧ ѡ҆дѣва́ющагосѧ свѣ́томъ, ꙗ҆́кѡ ри́зою.

Ра́дꙋйсѧ, носи́вшаѧ на рꙋкꙋ̑ твоє́ю носѧ́щаго ве́сь мі́ръ дла́нїю: ра́дꙋйсѧ, во хра́мъ прине́сшаѧ сщ҃е́нїе хра́ма.

Ра́дꙋйсѧ, сѷмеѡ́номъ бл҃гослове́ннаѧ: ра́дꙋйсѧ, а҆́нною прⷪ҇ро́чицею возвели́ченнаѧ.

Ра́дꙋйсѧ, влⷣчце, млⷭ҇тиваѧ ѡ҆ на́съ пред̾ бг҃омъ застꙋ́пнице.

Конда́къ ѳ҃.

Всѧ́кагѡ є҆стества̀ а҆́гг҃льскагѡ чистѣ́йши сꙋ́щи, влⷣчце, ѻ҆би́тель, ра́ди прише́ствїѧ твоеѧ̀ і҆кѡ́ны созда́ннꙋю, ѿ нечистоты̀ грѣхо́вной бли́з̾ поги́бели бы́вшꙋю, но покаѧ́нїемъ ѡ҆чтⷭ҇ившꙋюсѧ, ꙗ҆́кѡ ѻ҆́бщаѧ моле́бница ѡ҆ ро́дѣ хрⷭ҇тїа́нстѣмъ, и҆зба́вила є҆сѝ ѿ врагѡ́въ, по подо́бїю нечи́стыхъ живо́тныхъ подкопа́ти ю҆̀ трꙋди́вшихсѧ. Тѣ́мже вопїе́мъ бг҃ꙋ: А҆ллилꙋ́їа.

І҆́косъ ѳ҃.

Вѣті̑ѧ многовѣща̑нныѧ недоꙋмѣ́ютъ воспѣ́ти по достоѧ́нїю мно́жество чꙋде́съ твои́хъ, влⷣчце, и҆ та́йны твоегѡ̀ строе́нїѧ спⷭ҇нїѧ человѣ́кѡвъ: ѻ҆́во бо бл҃гостїю, ѻ҆́во же посѣще́нїемъ наказа́нїй рꙋково́диши люде́й на пꙋ́ть спⷭ҇нїѧ. Занѐ неѡбори́мꙋ ѻ҆би́тель сохрани́вши ѿ врагѡ́въ ви́димыхъ, ѻ҆́гненнымъ ѻ҆чище́нїемъ бл҃говоли́ла є҆сѝ ѡ҆чтⷭ҇ити ѿ ᲂу҆ѧзвле́нїй врага̀ неви́димагѡ, вразꙋмлѧ́ѧ, ꙗ҆́кѡ чтⷭ҇ота̀, воздержа́нїе и҆ моли̑твы сердє́чныѧ, ᲂу҆го́днѣе тебѣ̀ па́че хвалы̀ є҆ди́ныхъ то́чїю ᲂу҆́стъ. Тѣ́мже вопїе́мъ тѝ:

Ра́дꙋйсѧ, є҆гѵ́петъ ѡ҆ст҃и́вшаѧ прише́ствїемъ твои́мъ: ра́дꙋйсѧ, галїле́йскꙋю странꙋ̀ просла́вившаѧ пребыва́нїемъ твои́мъ.

Ра́дꙋйсѧ, по всемꙋ̀ і҆ерⷭ҇ли́мꙋ и҆ска́вшаѧ ѻ҆троча̀ твоѐ, є҆го́же возлюбѝ дꙋша̀ твоѧ̀: ра́дꙋйсѧ, въ домꙋ̀ ѻ҆ц҃а̀ є҆гѡ̀ ѡ҆брѣ́тшаѧ є҆го̀.

Ра́дꙋйсѧ, всѧ̑ глаго́лы ѡ҆ сн҃ѣ твое́мъ слага́вшаѧ въ срⷣцѣ свое́мъ: ра́дꙋйсѧ, въ сн҃ѣ твое́мъ пре́жде всѣ́хъ позна́вшаѧ бг҃а.

Ра́дꙋйсѧ, сн҃ꙋ твоемꙋ̀ послꙋжи́вшаѧ въ земнѣ́мъ житїѝ є҆гѡ̀: ра́дꙋйсѧ, страда́нїємъ є҆гѡ̀ спострада́вшаѧ.

Ра́дꙋйсѧ, при крⷭ҇тѣ̀ сн҃а твоегѡ̀ ᲂу҆сн҃овле́нїе і҆ѡа́нна а҆пⷭ҇ла и҆ всѣ́хъ вѣ́рꙋющихъ прїи́мшаѧ: ра́дꙋйсѧ, мт҃ри́нски возлюби́вшаѧ и҆скꙋпле́нныхъ кро́вїю є҆гѡ̀.

Ра́дꙋйсѧ, пе́рвѣе всѣ́хъ ᲂу҆разꙋмѣ́вшаѧ та́йнꙋ воскрⷭ҇нїѧ сн҃а твоегѡ̀: ра́дꙋйсѧ, премно́гїѧ ра́дости наслади́вшаѧсѧ въ вознесе́нїи сн҃а твоегѡ̀ на нб҃са̀.

Ра́дꙋйсѧ, влⷣчце, млⷭ҇тиваѧ ѡ҆ на́съ пред̾ бг҃омъ застꙋ́пнице.

Конда́къ і҃.

Сп҃стѝ хотѧ́щи мнѡ́гїѧ лю́ди ѿ ѡ҆бдержа́щихъ и҆̀хъ скорбе́й и҆ болѣ́зней и҆ вѣ́рꙋ и҆́хъ ᲂу҆тверди́ти во всеси́льное застꙋпле́нїе твоѐ, влⷣчце, во мно́гихъ градѣ́хъ, ѻ҆би́телехъ, ве́сехъ правосла́вныѧ страны̀ си́лꙋ чꙋдотворе́нїѧ дарова́ла є҆сѝ и҆з̾ѡбраже́нїємъ чтⷭ҇ны́ѧ і҆кѡ́ны твоеѧ̀, да, ви́дѧще ꙗ҆влѧ́емꙋю тобо́ю млⷭ҇ть, вопїю́тъ со ᲂу҆миле́нїемъ бг҃ꙋ: А҆ллилꙋ́їа.

І҆́косъ і҃.

Стѣна̀ и҆ щи́тъ была̀ є҆сѝ, влⷣчце, правосла́вномꙋ во́инствꙋ, под̾ зна́менемъ твоеѧ̀ і҆кѡ́ны проти́вꙋ два́десѧти ꙗ҆зы̑къ во́инствовавшемꙋ, сохранѧ́ѧ є҆го̀ ѿ стрѣ́лъ вра́жїихъ. Тѣ́мже бꙋ́ди стѣна̀ и҆ покро́въ ѿ всѣ́хъ врагѡ́въ ви́димыхъ и҆ неви́димыхъ и҆ на́мъ, ко пречтⷭ҇нѣ́й і҆кѡ́нѣ твое́й съ вѣ́рою и҆ любо́вїю припа́дающымъ и҆ вопїю́щымъ тебѣ̀:

Ра́дꙋйсѧ, ᲂу҆тѣше́нїе вѣ̑рнымъ по вознесе́нїи сн҃а твоегѡ̀: ра́дꙋйсѧ, ᲂу҆чт҃льнице и҆ споспѣ́шнице а҆пⷭ҇лѡмъ.

Ра́дꙋйсѧ, и҆звѣще́нїемъ твоегѡ̀ къ бг҃ꙋ ѿше́ствїѧ ѡ҆бра́дованнаѧ: ра́дꙋйсѧ, ли́къ ᲂу҆чн҃ческїй ѻ҆́блакомъ къ погребе́нїю тѝ совокꙋ́пльшаѧ.

Ра́дꙋйсѧ, ѿ землѝ дла́ньми сн҃а твоегѡ̀ воспрїе́млемаѧ: ра́дꙋйсѧ, ѿ всѣ́хъ а҆́гг҃льскихъ чинонача́лїй провожда́емаѧ.

Ра́дꙋйсѧ, земно́е не́бо къ го́рнемꙋ селе́нїю возвыше́нное: ра́дꙋйсѧ, прⷭ҇то́ле гдⷭ҇нь, ѿ землѝ вознесе́нный въ црⷭ҇твїе нбⷭ҇ное.

Ра́дꙋйсѧ, воздꙋ́хъ ѡ҆ст҃и́вшаѧ восхожде́нїемъ твои́мъ: ра́дꙋйсѧ, чрез̾ ѳѡмꙋ̀ ᲂу҆вѣ́рившаѧ твоѐ на нб҃о съ пл҃тїю преселе́нїе.

Ра́дꙋйсѧ, ᲂу҆чн҃ческомꙋ ли́кꙋ ѻ҆бѣща́нїе храни́ти є҆го̀ и҆спо́лньшаѧ: ра́дꙋйсѧ, присѣще́нїемъ твои́мъ ѿ сн҃а твоегѡ̀ и҆ бг҃а ми́ръ томꙋ̀ пода́вшаѧ.

Ра́дꙋйсѧ, влⷣчце, млⷭ҇тиваѧ ѡ҆ на́съ пред̾ бг҃омъ застꙋ́пнице.

Конда́къ а҃і.

Пѣ́нїе всѧ́кое побѣжда́етсѧ, спростре́тисѧ тща́щеесѧ ко мно́жествꙋ чꙋде́съ, приснобыва́емыхъ ѿ ст҃ы́ѧ твоеѧ̀ и҆ чꙋдотво́рныѧ і҆кѡ́ны. Ꙗ҆́коже бо ско́раѧ помо́щница недꙋ́ги и҆сцѣлѧ́еши, ѿ бѣ́дъ и҆збавлѧ́еши, ѿ мꙋче́нїѧ де́монѡвъ свобожда́еши, на всѧ́комъ мѣ́стѣ съ вѣ́рою тѧ̀ призыва́ющихъ и҆ вопїю́щихъ бг҃ꙋ: А҆ллилꙋ́їа.

І҆́косъ а҃і.

Свѣтопрїе́мнꙋю свѣщꙋ̀ зри́мъ ст҃ꙋ́ю і҆кѡ́нꙋ твою̀, бг҃омт҃и, во страна́хъ тѵ́хфинскихъ блгⷣтїю твое́ю возже́ннꙋю, всю̀ странꙋ̀ просвѣща́ющꙋю и҆ мно́гихъ ко свѣ́тꙋ своемꙋ̀ привлека́ющꙋю на спⷭ҇нїе дꙋ́шъ. Тѣ́мже вопїе́мъ тѝ:

Ра́дꙋйсѧ, сохранѧ́ти и҆ сп҃са́ти всѣ́хъ призыва́ющихъ тѧ̀ ѡ҆бѣща́вшаѧ: ра́дꙋйсѧ, прославлѧ́ющихъ тѧ̀ прославлѧ́ющаѧ.

Ра́дꙋйсѧ, къ сн҃ꙋ твоемꙋ̀ и҆ бг҃ꙋ моли̑твы вѣ́рныхъ приносѧ́щаѧ: ра́дꙋйсѧ, и҆ сама̀ непреста́ннѡ ᲂу҆ прⷭ҇то́ла сн҃а твоегѡ̀ и҆ бг҃а молѧ́щаѧсѧ ѡ҆ всѣ́хъ.

Ра́дꙋйсѧ, блгⷣть твою̀ і҆кѡ́намъ твои̑мъ чтⷭ҇ны̑мъ дарова́вшаѧ: ра́дꙋйсѧ, всю̀ вселе́ннꙋю лꙋча́ми твоеѧ̀ блгⷣти ѡ҆зари́вшаѧ.

Ра́дꙋйсѧ, чтⷭ҇нѣ́йшаѧ херꙋві̑мъ и҆ сла́внѣйшаѧ серафі̑мъ: ра́дꙋйсѧ, всеѧ̀ тва́ри вы́сшаѧ.

Ра́дꙋйсѧ, цр҃и́це нб҃а и҆ землѝ: ра́дꙋйсѧ, ꙗ҆́кѡ мно́гѡ мо́жетъ мл҃тва твоѧ̀ пред̾ сн҃омъ твои́мъ.

Ра́дꙋйсѧ, всегѡ̀ ро́да хрⷭ҇тїа́нскагѡ ско́рое застꙋпле́нїе: ра́дꙋйсѧ, всѣ́хъ вѣ́рныхъ тве́рдое ᲂу҆пова́нїе.

Ра́дꙋйсѧ, влⷣчце, млⷭ҇тиваѧ ѡ҆ на́съ пред̾ бг҃омъ застꙋ́пнице.

Конда́къ в҃і.

Блгⷣти твоеѧ̀ но́вое зна́менїе да́ти восхотѣ́въ, петро́вꙋ гра́дꙋ и҆сто́чникъ чꙋде́съ ѿве́рзла є҆сѝ, бг҃омт҃и, въ і҆кѡ́нѣ твое́й, да вѣ́рꙋющїи вразꙋмлѧ́ютсѧ, трꙋжда́ющїисѧ и҆ скорбѧ́щїи ѡ҆брѣта́ютъ гото́вое прибѣ́жище и҆ застꙋпле́нїе, и҆ прославлѧ́ющи бг҃а, дарова́вшаго такова̑ѧ, вопїю́тъ є҆мꙋ̀: А҆ллилꙋ́їа.

І҆́косъ в҃і.

Пою́ще чꙋдеса̀ твоѧ̑ и҆ млⷭ҇ти ро́дꙋ на́шемꙋ ꙗ҆влє́нныѧ, ᲂу҆ми́льнѡ припа́даемъ къ пречтⷭ҇омꙋ ѻ҆́бразꙋ твоемꙋ̀, влⷣчце, и҆, лобыза́юще, со стра́хомъ и҆ любо́вїю мо́лимъ тѧ̀: наста́ви на́съ на пꙋ́ть спⷭ҇нїѧ, да досто́йни бꙋ́демъ вы́нꙋ твоегѡ̀ млⷭ҇тивагѡ застꙋпле́нїѧ, бꙋ́ди при́снѡ застꙋ́пница и҆ хода́таица ѡ҆ на́съ, вопїю́щихъ тѝ:

Ра́дꙋйсѧ, вѣ́рныхъ ᲂу҆твержде́нїе и҆ защище́нїе: ра́дꙋйсѧ, невѣ́рныхъ вразꙋмле́нїе и҆ просвѣще́нїе.

Ра́дꙋйсѧ, ѿча́ѧнныхъ наде́ждо: ра́дꙋйсѧ, грѣ́шныхъ спⷭ҇нїе.

Ра́дꙋйсѧ, печа́льныхъ ᲂу҆тѣше́нїе: ра́дꙋйсѧ, больны́хъ и҆сцѣле́нїе.

Ра́дꙋйсѧ, вдо́въ и҆ сиро́тъ покро́ве: ра́дꙋйсѧ, ѡ҆би́димыхъ прибѣ́жище.

Ра́дꙋйсѧ, царе́й ᲂу҆крѣпле́нїе: ра́дꙋйсѧ, ст҃и́телей ᲂу҆добре́нїе. ра́дꙋйсѧ, двⷭ҇твꙋющихъ похвало̀: ра́дꙋйсѧ, всѣ́хъ бл҃гочтⷭ҇и́выхъ весе́лїе.

Ра́дꙋйсѧ, влⷣчце, млⷭ҇тиваѧ ѡ҆ на́съ пред̾ бг҃омъ застꙋ́пнице.

Конда́къ г҃і.

Ѽ всепѣ́таѧ мт҃и, ро́ждшаѧ всѣ́хъ ст҃ы́хъ ст҃ѣ́йшее сло́во, бꙋ́ди на́мъ покро́въ и҆ защище́нїе въ жи́зни се́й ѿ врагѡ́въ ви́димыхъ и҆ неви́димыхъ, ѿ бѣ́дъ и҆ скорбе́й, сохранѝ ѿ и҆скꙋше́нїй и҆ грѣхопаде́нїй, и҆ въ бꙋ́дꙋщей жи́зни, на сꙋдѣ̀ сн҃а твоегѡ̀ и҆ бг҃а на́шего, бꙋ́ди застꙋ́пница и҆ хода́таица, и҆збавлѧ́ющи на́съ ѿ вѣ́чнагѡ ѡ҆сꙋжде́нїѧ, да, сп҃се́ннїи тобо́ю, съ ли̑ки а҆́гг҃льскими вопїе́мъ бг҃ꙋ: А҆ллилꙋ́їа.

Се́й конда́къ глаго́ли три́жды, посе́мъ а҃-й і҆́косъ и҆ а҃-й конда́къ.

І҆́косъ а҃.

А҆́гг҃лѡвъ ли́цы ликовствꙋ́юще слꙋ́жатъ тебѣ̀, влⷣчце, и҆ почита́юще тѧ̀, на рꙋкꙋ̀ твоє́ю носи́вшꙋю творца̀ ви́димыѧ и҆ неви́димыѧ тва́ри, і҆кѡ́нꙋ твою̀ съ мѣ́ста на мѣ́сто прено́сѧтъ. Мы́ же, земноро́днїи, дивѧ́щесѧ чꙋ́дномꙋ ꙗ҆вле́нїю і҆кѡ́ны твоеѧ̀, а҆́гг҃лы носи́мыѧ, вопїе́мъ тѝ си́це:

Ра́дꙋйсѧ, всѣ́хъ нбⷭ҇ныхъ си́лъ вы́сшаѧ: ра́дꙋйсѧ, всѧ̑ а҆́гг҃льскїѧ чи́ны превосходѧ́щаѧ.

Ра́дꙋйсѧ, чтⷭ҇нѣ́йшаѧ херꙋві̑мъ: ра́дꙋйсѧ сла́внѣйшаѧ без̾ сравне́нїѧ серафі̑мъ.

Ра́дꙋйсѧ, ра́дованїе а҆́гг҃лѡвъ: ра́дꙋйсѧ похвале́нїе ликѡ́въ нбⷭ҇ныхъ.

Ра́дꙋйсѧ, ѿ а҆́гг҃лѡвъ воспѣва́емаѧ: ра́дꙋйсѧ, ѿ серафі́мѡвъ прославлѧ́емаѧ.

Ра́дꙋйсѧ, ѿ а҆рха̑гг҃лъ покланѧ́емаѧ: ра́дꙋйсѧ, ѿ во́инствъ нбⷭ҇ныхъ почита́емаѧ.

Ра́дꙋйсѧ, въ і҆кѡ́нѣ твое́й ѿ а҆́гг҃лъ чти́маѧ: ра́дꙋйсѧ, въ ви́димомъ ѻ҆́бразѣ твое́мъ ѿ неви́димыхъ си́лъ носи́маѧ.

Ра́дꙋйсѧ, влⷣчце, млⷭ҇тиваѧ ѡ҆ на́съ пред̾ бг҃омъ застꙋ́пнице.

Конда́къ а҃.

Взбра́нной воево́дѣ, влⷣчцѣ на́шей бцⷣѣ бл҃года́рствєннаѧ пѣ̑нїѧ восписꙋ́емъ ѡ҆ ꙗ҆вле́нїи чꙋ́дныѧ є҆ѧ̀ і҆кѡ́ны, къ не́йже притека́ющїи при́снѡ и҆збавлѧ́ютсѧ ѿ вра̑гъ ви́димыхъ и҆ неви́димыхъ. Ты́ же, гпⷭ҇жѐ не́ба и҆ землѝ, ꙗ҆́кѡ млⷭ҇рдаѧ мт҃и, прїимѝ ны́нѣ ма́лое сїѐ моле́нїе на́ше и҆ неѿстꙋ́пнꙋ никогда́же сотворѝ млⷭ҇ть твою̀ ѿ на́съ и҆ застꙋпле́нїе, ѡ҆хранѧ́ющи ѿ всѣ́хъ бѣ́дъ и҆ напа́стей на́съ, зовꙋ́щихъ тѝ:

Ра́дꙋйсѧ, влⷣчце, млⷭ҇тиваѧ ѡ҆ на́съ пред̾ бг҃омъ застꙋ́пнице.

Моли́тва.

Прест҃а́ѧ дв҃о, мт҃и гдⷭ҇а вы́шнихъ си́лъ, нб҃сѐ и҆ землѝ цр҃и́це, гра́да и҆ страны̀ на́шеѧ всемо́щнаѧ застꙋ́пнице! Прїимѝ хвалебнобл҃года́рственное пѣ́нїе сїѐ ѿ на́съ недосто́йныхъ ра̑бъ твои́хъ и҆ вознесѝ мл҃твы на́шѧ ко прⷭ҇то́лꙋ бг҃а сн҃а твоегѡ̀, да млⷭ҇тивъ бꙋ́детъ непра́вдамъ на́шымъ и҆ проба́витъ бл҃гость свою̀ чтꙋ́щымъ всечⷭ҇тно́е и҆́мѧ твоѐ и҆ съ вѣ́рою и҆ любо́вїю покланѧ́ющымсѧ чꙋдотво́рномꙋ ѻ҆́бразꙋ твоемꙋ̀. Нѣ́смы бо досто́йни ѿ негѡ̀ поми́ловани бы́ти, а҆́ще не ты̀ ᲂу҆ми́лостивиши є҆гѡ̀ ѡ҆ на́съ, влⷣчце, ꙗ҆́кѡ всѧ̑ тебѣ̀ ѿ негѡ̀ возмѡ́жна сꙋ́ть. Сегѡ̀ ра́ди къ тебѣ̀ прибѣга́емъ, ꙗ҆́кѡ къ несомнѣ́ннѣй и҆ ско́рѣй застꙋ́пницѣ на́шей: ᲂу҆слы́ши на́съ молѧ́щихсѧ тебѣ̀, ѡ҆сѣнѝ на́съ вседержа́внымъ покро́вомъ твои́мъ и҆ и҆спросѝ ᲂу҆ бг҃а сн҃а твоегѡ̀ па́стырємъ иа́шымъ ре́вность и҆ бдѣ́нїе ѡ҆ дꙋша́хъ, градоправи́телємъ мꙋ́дрость и҆ си́лꙋ, сꙋдїѧ́мъ пра́вдꙋ и҆ нелицепрїѧ́тїе, наста́вникѡмъ ра́зꙋмъ и҆ смиренномꙋ́дрїе, сꙋпрꙋ́гѡмъ любо́вь и҆ согла́сїе, ча́дѡмъ послꙋша́нїе, ѡ҆би́димымъ терпѣ́нїе, ѡ҆би́дѧщымъ стра́хъ бж҃їй, скорбѧ́щымъ бл҃годꙋ́шїе, ра́дꙋющымсѧ воздержа́нїе: всѣ́мъ же на́мъ дꙋ́хъ ра́зꙋма и҆ бл҃гоче́стїѧ, дꙋ́хъ млⷭ҇рдїѧ и҆ кро́тости, дꙋ́хъ чистоты̀ и҆ пра́вды. Є҆́й, гпⷭ҇жѐ прест҃а́ѧ, ᲂу҆милосе́рдисѧ на немощны́ѧ лю́ди твоѧ̑: разсѣ̑ѧнныѧ соберѝ, заблꙋ́ждшыѧ на пꙋ́ть пра́вый наста́ви, ста́рость поддержѝ, ю҆́ныѧ ᲂу҆цѣломꙋ́дри, младє́нцы воспита́й и҆ при́зри на всѣ́хъ на́съ призрѣ́нїемъ млⷭ҇тивагѡ твоегѡ̀ застꙋпле́нїѧ, воздви́гни на́съ и҆з̾ глꙋбины̀ грѣхѡ́вныѧ и҆ просвѣтѝ серде́чныѧ ѻ҆́чи на́ша къ зрѣ́нїю сп҃се́нїѧ, млⷭ҇тива на́мъ бꙋ́ди здѣ̀ и҆ та́мѡ, въ странѣ̀ земна́гѡ прише́льствїѧ и҆ на стра́шнѣмъ сꙋдѣ̀ сн҃а твоегѡ̀: преста́вльшыѧсѧ же въ вѣ́рѣ и҆ покаѧ́нїи ѿ житїѧ̀ сегѡ̀ ѻ҆тцы̑ и҆ бра́тїю на́шꙋ въ вѣ́чнѣй жи́зни со а҆́гг҃лы и҆ со всѣ́ми ст҃ы́ми жи́ти сотворѝ. Ты́ бо є҆сѝ, гпⷭ҇жѐ, сла́ва нбⷭ҇ныхъ и҆ ᲂу҆пова́нїе земны́хъ, ты̀ по бз҃ѣ, на́ша наде́жда и҆ застꙋ́пница всѣ́хъ, притека́ющихъ къ тебѣ̀ съ вѣ́рою. Тебѣ̀ ᲂу҆̀бо мо́лимсѧ, и҆ тебѣ̀, ꙗ҆́кѡ всемогꙋ́щей помо́щницѣ, са́ми себє̀ и҆ дрꙋ́гъ дрꙋ́га и҆ ве́сь живо́тъ на́шъ предае́мъ, ны́нѣ и҆ прⷭ҇нѡ и҆ во вѣ́ки вѣкѡ́въ. А҆ми́нь.

Моли́тва втора́ѧ.

Бл҃годари́мъ тѧ̀, ѽ пребл҃га́ѧ и҆ пречⷭ҇таѧ, пребл҃гослове́ннаѧ дв҃о, влⷣчце, ма́ти хрⷭ҇та̀ бг҃а на́шегѡ, ѡ҆ всѣ́хъ благодѣѧ́нїѧхъ твои́хъ, ꙗ҆̀же показа́ла є҆сѝ ро́дꙋ человѣ́ческомꙋ, наипа́че же на́мъ, хрⷭ҇тоимени̑тымъ лю́демъ рѡссі́йскагѡ наро́да, ѡ҆ ни́хже нижѐ са́мый а҆́гг҃льскїй ѧ҆зы́къ къ похвале́нїю дово́ленъ бꙋ́детъ, ꙗ҆́коже и҆ ны́нѣ ᲂу҆диви́ла є҆сѝ неизрече́ннꙋю свою̀ млⷭ҇ть на на́съ, недосто́йныхъ рабѣ́хъ твои́хъ, преесте́ственнымъ самоприше́ствїемъ пречⷭ҇тыѧ твоеѧ̀ і҆кѡ́ны, є҆́юже всю̀ просвѣти́ла є҆сѝ рѡссі́йскꙋю странꙋ̀. тѣ́мже и҆ мы̀, грѣ́шнїи, со стра́хомъ и҆ ра́достїю покланѧ́ющесѧ, вопїе́мъ тѝ: ѽ прест҃а́ѧ дв҃о, цр҃и́це и҆ бцⷣе, сп҃сѝ и҆ поми́лꙋй ст҃ѣ́йшагѡ патрїа́рха моско́вскаго и҆ всеѧ̀ рꙋсѝ, а҆рхїерє́и же и҆ всѧ̑ лю́ди, и҆ пода́ждь странѣ̀ побѣ̑ды на всѧ̑ врагѝ, и҆ сохранѝ всѧ̑ гра́ды и҆ страны̑ хрⷭ҇тїа́нскїѧ, и҆ се́й ст҃ы́й хра́мъ ѿ всѧ́кагѡ навѣ́та вра́жїѧ и҆зба́ви, и҆ всѣ̑мъ всѧ̑ на по́льзꙋ да́рꙋй, ны́нѣ прише́дшымъ съ вѣ́рою и҆ молѧ́щымсѧ рабѡ́мъ твои́мъ, и҆ покланѧ́ющымсѧ прест҃о́мꙋ ѻ҆́бразꙋ твоемꙋ̀, ꙗ҆́кѡ блгⷭ҇ве́нна є҆сѝ съ ро́ждшимсѧ ѿ тебѣ̀ сн҃омъ и҆ бг҃омъ ны́нѣ, и҆ при́снѡ, и҆ во вѣ́ки вѣкѡ́въ. а҆ми́нь.

Тих­вин­ская ико­на Бо­жи­ей Ма­те­ри, по пре­да­нию, од­на из икон, на­пи­сан­ных свя­тым апо­сто­лом и Еван­ге­ли­стом Лу­кой. В V в. из Иеру­са­ли­ма бы­ла пе­ре­не­се­на в Кон­стан­ти­но­поль, где для нее был по­стро­ен Влахерн­ский храм. В 1383 го­ду, за 70 лет до взя­тия тур­ка­ми Кон­стан­ти­но­по­ля, ико­на ис­чез­ла из хра­ма и в лу­че­зар­ном све­те яви­лась над во­да­ми Ла­дож­ско­го озе­ра. Чу­дес­но но­си­мая с ме­ста на ме­сто, она оста­но­ви­лась близ го­ро­да Тих­ви­на. На ме­сте яв­ле­ния ико­ны был по­стро­ен де­ре­вян­ный храм в честь Успе­ния Бо­го­ро­ди­цы. Усер­ди­ем ве­ли­ко­го кня­зя Ва­си­лия Ива­но­ви­ча (1505–1533) вме­сто де­ре­вян­но­го хра­ма был воз­ве­ден ка­мен­ный. В 1560 го­ду по при­ка­зу ца­ря Иоан­на Гроз­но­го при хра­ме был устро­ен муж­ской мо­на­стырь, об­не­сен­ный ка­мен­ной сте­ной. В 1613–1614 го­дах швед­ские вой­ска, за­хва­тив Нов­го­род, не раз пы­та­лись уни­что­жить мо­на­стырь, но за­ступ­ле­ни­ем Бо­жи­ей Ма­те­ри оби­тель бы­ла спа­се­на. Так, од­на­жды, в ви­ду при­бли­жав­ше­го­ся швед­ско­го вой­ска, ино­ки ре­ши­ли бе­жать из мо­на­сты­ря, взяв чу­до­твор­ную ико­ну, но не мог­ли сдви­нуть ее с ме­ста. Это чу­до оста­но­ви­ло ма­ло­душ­ных, и они оста­лись в мо­на­сты­ре, упо­вая на за­щи­ту Бо­жи­ей Ма­те­ри. Незна­чи­тель­ные по чис­лу за­щит­ни­ки мо­на­сты­ря успеш­но от­ра­жа­ли ата­ки на­мно­го пре­вос­хо­див­ших их сил про­тив­ни­ка. На­сту­па­ю­щим шве­дам то пред­став­ля­лась мно­го­чис­лен­ная рать рус­ских, иду­щая от Моск­вы, то ка­кое-то небес­ное во­ин­ство, и они об­ра­ща­лись в бег­ство. По­сле чу­дес­ной по­бе­ды над шве­да­ми в мо­на­стырь при­бы­ли цар­ские по­слы. Сняв спи­сок с чу­до­твор­ной ико­ны, они от­пра­ви­лись в де­рев­ню Стол­бо­во, в 50 вер­стах от Тих­ви­на, где 10 фев­ра­ля 1617 го­да был за­клю­чен мир со шве­да­ми. Глав­ною по­ру­кою ми­ра с рус­ской сто­ро­ны был при­не­сен­ный спи­сок с чу­до­твор­ной ико­ны. Впо­след­ствии этот спи­сок был при­не­сен в Моск­ву и по­став­лен в Успен­ском со­бо­ре, а за­тем по прось­бе нов­го­род­цев, участ­ни­ков вой­ны со шве­да­ми, от­прав­лен в Нов­го­род и по­став­лен в Со­фий­ском со­бо­ре. Так с на­ча­ла XVII ве­ка на­ча­лось все­рос­сий­ское по­чи­та­ние Тих­вин­ской ико­ны Бо­жьей Ма­те­ри.
В ХХ ве­ке, в го­ды ли­хо­ле­тья и же­сто­ких го­не­ний на Цер­ковь Бо­жию мо­на­стырь был за­крыт. В 1944 го­ду бу­ду­щий ар­хи­епи­скоп Чи­каг­ский и Мин­неа­по­лис­ский Иоанн (Гарк­лавс) и ми­ря­нин по име­ни Сер­гий (впо­след­ствии его при­ём­ный сын), спа­сая чу­до­твор­ную Тих­вин­скую ико­ну, увез­ли её в Ев­ро­пу, а за­тем – в США. Пе­ред сво­ей кон­чи­ной в 1982 го­ду ар­хи­епи­скоп Иоанн за­ве­щал сво­е­му при­ём­но­му сы­ну про­то­и­е­рею Сер­гию Гарк­лав­су за­бо­тить­ся об иконе Бо­го­ро­ди­цы Тих­вин­ская и вер­нуть её Рос­сии то­гда, ко­гда в стране из­ме­нит­ся от­но­ше­ние свет­ской вла­сти к Церк­ви и бу­дет вос­ста­нов­лен Тих­вин­ский мо­на­стырь. Тор­же­ствен­ное воз­вра­ще­ние свя­ты­ни про­изо­шло в 2004 го­ду: 8 июля 2004 го­да, по­сле 60-лет­не­го от­сут­ствия, свя­ты­ня вер­ну­лась в Тихвинский Богородичный Успенский монастырь, ко­то­рый из­бра­ла для сво­е­го по­сто­ян­но­го пре­бы­ва­ния шесть сто­ле­тий на­зад.