Акафист преподобным Оптинским старцам

Текст утвержден Священным Синодом Русской Православной Церкви 15 июля 2016 года (журнал № 71)

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 24 октября (11 октября ст. ст.)

Утвержден для общецерковного использования.

Конда́к 1.

Избра́нным служи́телем Святы́я Тро́ицы, собо́ру преподо́бных ста́рцев О́птинских, наста́вником до́брым и прему́дрым благодаре́ние и похвалы́ прино́сим. Вы́ же, я́ко Христо́вы Це́ркве украше́ние, моли́теся о на́с ко Го́споду, да воспева́ем ва́с любо́вию: Ра́дуйтеся, преподо́бнии ста́рцы О́птинстии, богому́дрии наста́вницы ве́ры и благоче́стия.

И́кос 1.

А́нгелов Творе́ц просла́ви ва́с, отцы́ и ста́рцы преподо́бнии, я́ко сбы́тися на ва́с рече́нному: све́т мона́хом су́ть А́нгели, све́т же все́м челове́ком е́сть мона́шеское житие́. Вои́стину у́бо яви́лися есте́ а́нгели храни́тели стране́ на́шей Росси́йстей: и́ноком наста́вницы, ко спасе́нию путевожди́е все́м ве́рным ча́дом Це́ркве, вопию́щим:

Ра́дуйся, богопросла́вленный собо́ре; ра́дуйся, богоза́рное благода́ти сия́ние.

Ра́дуйся, дре́во ста́рчества многопло́дное; ра́дуйся, во Христе́ еди́нство духо́вное.

Ра́дуйся, по́лче, испо́лненный си́лы Бо́жия; ра́дуйся, во́инство, побежда́ющее де́монов.

Ра́дуйся, ве́нче, Ду́хом Святы́м благоуха́ющий; ра́дуйся, О́птины Пу́стыни сла́во и похвало́.

Ра́дуйся, Христо́в пречу́дный виногра́де; ра́дуйся, мы́сленный раю́ богонасажде́нный.

Ра́дуйся, ликостоя́ние певце́в Святы́я Тро́ицы; ра́дуйся, созве́здие тве́рди Небе́сныя.

Ра́дуйтеся, преподо́бнии ста́рцы О́птинстии, богому́дрии наста́вницы ве́ры и благоче́стия.

Конда́к 2.

Ви́дяще су́етная и привре́менная, я́же в ми́ре се́м, вся́кое жите́йское попече́ние отверго́сте, отцы́ богому́дрии, приидо́сте в Пу́стынь О́птину, иде́же дре́вний о́браз о́бщаго жития́ яви́сте: соу́з любве́ неразруши́мый о Христе́ и ре́вность первохристиа́нскую Заве́та Но́ваго, невозвра́тно ко Го́споду устреми́стеся любо́вию, а́нгельскую пе́снь воспева́юще: Аллилу́ия.

И́кос 2.

Ра́зум спасе́ния взыску́юще, отцы́ пресла́внии, бога́тство, сла́ву и вся́ земна́я я́ко мимотеку́щая презре́вше, еди́но же на потре́бу избра́сте; мно́гими труды́, скорбьми́ и боле́зньми до́брое основа́ние по́двигу положи́сте. Те́мже, Христо́вы за́поведи сотво́рше и святы́х оте́ц сове́ты соблю́дше, доброде́тельми обогати́лися есте́. Сего́ ра́ди вопие́м ва́м:

Ра́дуйтеся, Христо́во смире́ние возлюби́вшии; ра́дуйтеся, кро́тость ду́ха терпе́нием стяжа́вшии.

Ра́дуйтеся, во́ли Бо́жией после́довавшии; ра́дуйтеся, свою́ во́лю отсе́кшии.

Ра́дуйтеся, моли́твою и посто́м Бо́гу служи́вшии; ра́дуйтеся, чи́стым се́рдцем Го́спода зря́щии.

Ра́дуйтеся, стра́сти теле́сныя воздержа́нием умертви́вшии; ра́дуйтеся, пло́ть ва́шу ду́хови покори́вшии.

Ра́дуйтеся, ми́лость я́ко ца́рский пу́ть избра́вшии; ра́дуйтеся, разсужде́ние я́ко ве́рх доброде́телей обре́тшии.

Ра́дуйтеся, благонра́вную жи́знь показа́вшии; ра́дуйтеся, от Бо́га благи́я да́ры прие́мшии.

Ра́дуйтеся, преподо́бнии ста́рцы О́птинстии, богому́дрии наста́вницы ве́ры и благоче́стия.

Конда́к 3.

Си́ла Моя́ в не́мощи соверша́ется, рече́ Госпо́дь. Те́мже и вы́, преподо́бнии, яре́м скорбе́й и боле́зней подъе́мше, си́лою Ду́ха обогати́стеся: да́р разсужде́ния прия́сте, и прему́дрость ста́рчества улучи́сте, воспева́юще Пода́телю вся́ческих: Аллилу́ия.

И́кос 3.

Име́я о спасе́нии челове́ков ди́вное промышле́ние, сла́вимый в Тро́ице Бо́г виногра́д ста́рчества оби́льно во Еги́пте возрасти́, и испо́лни се́й всю́ зе́млю; и отра́сль его́ в после́дняя ле́та дости́же Пу́стыни О́птинския. Сия́ до́брыми виногра́дари отребля́ема и вода́ми пита́емая Святого́рскими и Фиваи́дскими, бога́тый пло́д принесе́. Сие́ до́бре разуме́вше, воззове́м ста́рцем О́птинским си́це:

Ра́дуйся, Моисе́е, избра́нный пустынножи́телю; ра́дуйся, ста́рчества О́птинскаго насади́телю.

Ра́дуйся, Анто́ние, богоуго́дный подви́жниче; ра́дуйся, смире́ния и кро́тости наста́вниче.

Ра́дуйся, о́тче Льве́, по Бо́зе пла́менный ревни́телю; ра́дуйся, ста́рчества О́птинскаго возрасти́телю.

Ра́дуйся, ду́шу свою́ за ча́да положи́ти гото́вый; ра́дуйся, во оби́тель Про́мыслом Бо́жиим приведе́нный.

Ра́дуйся, Мака́рие, высото́ смире́ния; ра́дуйся, глубино́ прему́дрости ста́рческия.

Ра́дуйся, Исаа́кие, вертогра́да ста́рчества храни́телю; ра́дуйся, оте́ческих заве́тов ве́рный исполни́телю.

Ра́дуйтеся, преподо́бнии ста́рцы О́птинстии, богому́дрии наста́вницы ве́ры и благоче́стия.

Конда́к 4.

Бу́рное мо́ре без ко́рмчаго никто́же мо́жет прейти́; изра́ильтяне же, Моисе́ом путеводи́мии, я́ко по су́ху преидо́ша е́. Се́й проо́браз ста́рчества прие́мше, богоно́снии отцы́ О́птинстии, я́коже о́ный Моисе́й, чрез мо́ре жите́йское мно́гим ко спасе́нию путеводи́телие яви́лися есте́, указу́юще еди́н Пу́ть, Христа́ Го́спода, Ему́же при́сно воспева́ем: Аллилу́ия.

И́кос 4.

Слу́шаяй ва́с, Мене́ слу́шает, рече́ Госпо́дь Свои́м ученико́м, на про́поведь я́ посыла́я. И та́ко положе́но бы́сть свята́го ста́рчества основа́ние, да вся́к ве́чныя жи́зни иски́й, вопроша́ет ста́рца своего́, да блага́я позна́ет во спасе́ние. Сие́ Боже́ственное уставле́ние ве́дуще вы́, святи́и Льве́ и Мака́рие, созда́сте ста́рчество на тве́рдем ка́мени смире́ния, те́мже восхва́лим ста́рцев О́птинских си́це:

Ра́дуйтеся, любо́вию к бли́жним озаре́ннии; ра́дуйтеся, благода́тию ста́рчества одаре́ннии.

Ра́дуйтеся, к Бо́гу ве́рнии путеводи́телие; ра́дуйтеся, мно́гих ду́ш просвети́телие.

Ра́дуйтеся, смире́нию Христо́ву науча́ющии; ра́дуйтеся, в пра́вде жи́ти на́с укрепля́ющии.

Ра́дуйтеся, мона́шескаго жития́ ревни́телие; ра́дуйтеся, послуша́ния до́брии учи́телие.

Ра́дуйтеся, на пу́ть покая́ния наставля́ющии; ра́дуйтеся, к любви́ Бо́жией все́х возвыша́ющии.

Ра́дуйтеся, до́брии де́лателие виногра́да Христо́ва; ра́дуйтеся, я́ко отве́рзеся ва́м Ца́рство Небе́сное.

Ра́дуйтеся, преподо́бнии ста́рцы О́птинстии, богому́дрии наста́вницы ве́ры и благоче́стия.

Конда́к 5.

Богоблаже́ннии отцы́ Моисе́е и Исаа́кие, ре́вностию о до́ме Бо́жием дви́жимии, неле́ностнии зижди́телие оби́тели яви́лися есте́, поло́жше во главу́ у́гла ка́мень краеуго́лен. Сего́ ра́ди воздвиго́сте ди́вныя красоты́ хра́мы Бо́жия, иде́же мы́ ны́не воспева́ем: Аллилу́ия.

И́кос 5.

Виде́ния и созерца́ния та́ин Боже́ственных сподо́бльшеся, яви́стеся благочи́ния церко́внаго приле́жнии ревни́телие и благоле́пия богослуже́ния рачи́телие, е́же жи́ти ва́м в дому́ Госпо́дни и зре́ти красоту́ его́. Те́мже и мы́ ны́не, услажда́ющеся красото́ю оби́тели О́птинския и разуме́юще изря́дное попече́ние ва́ше о не́й, благода́рно ва́м взыва́ем:

Ра́дуйся, Анто́ние, усе́рдный скита́ строи́телю; ра́дуйся, уде́ла Предте́чи Госпо́дня попечи́телю.

Ра́дуйся, Мака́рие, писа́ньми мно́гих просвети́вый; ра́дуйся, слу́жбы церко́вныя украси́вый.

Ра́дуйся, Амвро́сие, ди́вно на возду́се моли́выйся; ра́дуйся, в моли́тве сла́ву Бо́жию созерца́вый.

Ра́дуйся, богому́дрый наста́вниче и учи́телю; ра́дуйся, Ша́мординския оби́тели созда́телю и окорми́телю.

Ра́дуйся, Иларио́не, заблу́ждших обраща́яй; ра́дуйся, те́х к та́инством церко́вным привлека́яй.

Ра́дуйся, Исаа́кие, оби́тели до́брый упра́вителю; ра́дуйся, и́ноков ве́рный путеводи́телю.

Ра́дуйтеся, преподо́бнии ста́рцы О́птинстии, богому́дрии наста́вницы ве́ры и благоче́стия.

Конда́к 6.

Пропове́дницы и́стины яви́стеся, богоно́снии ста́рцы О́птинстии, наставля́юще вся́ бли́жняя и да́льняя, я́ко сто́лп е́сть и утвержде́ние и́стины Це́рковь Правосла́вная, ея́же вне́ никто́же мо́жет спасе́ние улучи́ти и жи́знь ве́чную насле́дити. Си́це ва́ми науче́ннии, ко Го́споду взыва́ем ра́достно: Аллилу́ия.

И́кос 6.

Возсия́сте све́том доброде́тельнаго жития́ и све́т и́стиннаго богопозна́ния уясни́сте, изъясне́ние слове́с святы́х оте́ц на́м яви́вше, к си́м же и своя́ писа́ния оста́вивше. Сего́ ра́ди, уподо́бльшеся челове́ку домови́ту, и́же изно́сит от сокро́вища своего́ но́вая и ве́тхая, умно́жили есте́ тала́нты Влады́це Христу́ и просла́вистеся от Него́; мы́ же тщи́мся пе́ти ва́м такова́я:

Ра́дуйтеся, зако́на Бо́жия ревни́телие; ра́дуйтеся, и́стиннаго любому́дрия рачи́телие.

Ра́дуйтеся, клю́ч разуме́ния на́м подава́ющии; ра́дуйтеся, две́ри и́стины отверза́ющии.

Ра́дуйтеся, прему́дрости Бо́жия сокро́вище; ра́дуйтеся, слове́с Боже́ственных исто́чниче.

Ра́дуйтеся, све́та ева́нгельскаго сия́ние; ра́дуйтеся, за́поведей Христо́вых соблюде́ние.

Ра́дуйтеся, писа́ний оте́ческих изъясни́телие; ра́дуйтеся, благоче́стия насади́телие.

Ра́дуйтеся, да́нный ва́м тала́нт возрасти́вшии; ра́дуйтеся, в ра́дость Влады́ки Христа́ вше́дшии.

Ра́дуйтеся, преподо́бнии ста́рцы О́птинстии, богому́дрии наста́вницы ве́ры и благоче́стия.

Конда́к 7.

Хотя́й угоди́ти Бо́гови, веле́ний Его́ яви́лся еси́ усе́рдный храни́тель, преподо́бне Мака́рие, соблюда́я за́поведь Госпо́дню: а́ще кто́ тя́ уда́рит в лани́ту десну́ю, обрати́ тому́ и другу́ю. Си́лою толи́каго смире́ния исхожда́ху ду́си нечи́стии от одержи́мых те́ми. Мы́ же, о́браз зря́ще се́й смиренному́дрия, сла́вим Бо́га: Аллилу́ия.

И́кос 7.

Но́вых ви́дяще избра́нников Бо́жиих, притека́ху к ва́м люде́й мно́жества, ча́юще сове́та и благослове́ния, утеше́ния же и исцеле́ния. Вы́ же все́м вся́ яви́лися есте́: гре́шныя на пу́ть покая́ния наста́вльше, малове́рныя утверди́вше, стра́ждущим спострада́вше, немощны́м исцеле́ния дарова́вше. Те́мже и на́с укрепля́ете пе́ти ва́м:

Ра́дуйся, Мака́рие, зло́бу диа́волю победи́вый; ра́дуйся, того́ смире́нием низложи́вый.

Ра́дуйся, Амвро́сие, в боле́знех долготерпели́вый; ра́дуйся, сле́зы стра́ждущих изсуши́вый.

Ра́дуйся, Ио́сифе, свята́го Амвро́сия прее́мниче; ра́дуйся, по до́брем учи́тели мона́хов наста́вниче.

Ра́дуйся, Цари́цы Небе́сныя люби́миче блаже́нный; ра́дуйся, Е́ю от одра́ боле́зни возста́вленный.

Ра́дуйся, Варсоно́фие, сла́ву земну́ю презре́вый; ра́дуйся, во́инству Царя́ Небе́снаго причте́нный.

Ра́дуйся, незри́мых враго́в победи́телю; ра́дуйся, прозорли́вый ду́ш врачева́телю.

Ра́дуйтеся, преподо́бнии ста́рцы О́птинстии, богому́дрии наста́вницы ве́ры и благоче́стия.

Конда́к 8.

Стра́нников и прише́льцев себе́ на земли́ бы́ти помышля́юще, святы́й Амвро́сие со ученики́, те́сный пу́ть служе́ния бли́жним избра́сте. Сего́ ра́ди яви́шася на ва́с дарова́ния духо́внаго разсужде́ния, теле́с исцеле́ния, суде́б Бо́жиих тайнозре́ния, ду́ш изнемога́ющих врачева́ния. Си́ми да́ры а́ки мре́жами мно́жество ду́ш уловля́юще, Святе́й Тро́ице воспева́ли есте́ пе́снь: Аллилу́ия.

И́кос 8.

Все́м се́рдцем, душе́ю и мы́слию Бо́га возлюби́вше, не то́кмо утеше́ния тре́бующих николи́же оставля́сте, поле́зная на потре́бу коему́ждо подаю́ще, но и все́ вре́мя жития́ моли́тве прилежа́ще, и́стиннаго богомы́слия сподо́билися есте́, преподо́бнии, посто́м и моли́твою, нестяжа́нием и чистото́ю, разсужде́нием и ми́лостию украше́ннии, слы́шите от на́с сицева́я:

Ра́дуйтеся, всегда́ пред Го́сподем ходи́вшии; ра́дуйтеся, от дея́ния к созерца́нию восте́кшии.

Ра́дуйтеся, тяготы́ мно́гих поне́сшии; ра́дуйтеся, та́ко зако́н Христо́в испо́лнившии.

Ра́дуйтеся, бли́жнему блага́я иска́вшии; ра́дуйтеся, те́х не́мощи любо́вию покрыва́вшии.

Ра́дуйтеся, си́лу вра́жию низложи́вшии; ра́дуйтеся, ко́зни бесо́в сокруши́вшии.

Ра́дуйтеся, лю́ди Бо́жия до́бре спаса́ющии; ра́дуйтеся, мы́сленныя та́ти от те́х отгоня́ющии.

Ра́дуйтеся, со́весть от грехо́в очища́ющии; ра́дуйтеся, ско́рбь серде́чную облегча́ющии.

Ра́дуйтеся, преподо́бнии ста́рцы О́птинстии, богому́дрии наста́вницы ве́ры и благоче́стия.

Конда́к 9.

Вся́к язы́к, вся́к во́зраст, вся́ко сосло́вие хва́лит вы́, собо́ре досточу́дный преподо́бных ста́рцев: упасли́ бо есте́ ста́до Христо́во усе́рдно и неувяда́емыя венцы́ сла́вы от Пастыренача́льника прия́ли есте́. Те́мже и на́с науча́ете повинова́тися ста́рцем и па́стырем, да смиренному́дрие стяжа́вше, благода́ть обря́щем пе́ти Бо́гу: Аллилу́ия.

И́кос 9.

Ка́ко боже́ственную ва́шу к челове́ком любо́вь изглаго́лем: до кро́ве бо подвиза́ющеся и ду́ши своя́ за ча́да полага́юще, служе́ния своего́ ника́коже оста́вили есте́. Мы́ же, предста́тельством ва́шим у Царя́ ца́рствующих оби́тели О́птинския узре́вше возрожде́ние, ча́ем и хра́мов ду́ш на́ших обновле́ние улучи́ти, со умиле́нием ва́м глаго́люще:

Ра́дуйся, Некта́рие, блаже́нный наста́вниче; ра́дуйся, гряду́щих прозорли́вый прови́дче.

Ра́дуйся, Исаа́кие, сла́вный преподобному́чениче; ра́дуйся, тве́рдый крестоно́сче.

Ра́дуйся, Анато́лие, наро́да Бо́жия окормле́ние; ра́дуйся, в годи́ну искуше́ний все́х укрепле́ние.

Ра́дуйся, за ве́ру поруга́ния прие́мый; ра́дуйся, в ми́ре ду́х тво́й Бо́гу преда́вый.

Ра́дуйся, Ни́коне, мона́хов кро́ткое утеше́ние; ра́дуйся, испове́дниче многострада́льный.

Ра́дуйся, мно́жество скорбе́й претерпе́вый; ра́дуйся, сумня́щихся в Правосла́вии утверди́вый.

Ра́дуйтеся, преподо́бнии ста́рцы О́птинстии, богому́дрии наста́вницы ве́ры и благоче́стия.

Конда́к 10.

Спа́са ми́ра ве́рнии ученицы́ яви́стеся, богоблаже́ннии, благоче́стно во Христе́ пожи́вшии: о́ви у́бо в труде́х зижди́тельных, о́ви же в не́мощех многоболе́зненных, о́ви же в гоне́ниих непра́ведных; проидо́сте пу́ть притру́днаго сего́ жития́ и многоплаче́внаго, о́браз на́м подаю́ще, ка́ко достои́т в ско́рбех пе́ти Го́споду Си́л: Аллилу́ия.

И́кос 10.

Стена́ есте́ Це́ркве Правосла́вныя, забра́ло же неруши́мое честна́го и́ночества: вся́ бо ору́жия Бо́жия прие́мше и обо́лкшеся в броня́ пра́вды, и на́с ве́рно науча́ете, ка́ко щи́т ве́ры, шле́м спасе́ния и ме́ч духо́вный, глаго́л Бо́жий обоюдуо́стрый, восприима́ти подоба́ет. Помина́юще ва́с я́ко наста́вников, усе́рдно мо́лимся, да сподо́бит Госпо́дь подража́ти ве́ре ва́шей и вопи́ти:

Ра́дуйтеся, му́дрости Бо́жией науча́ющии; ра́дуйтеся, вода́ми жи́зни напая́ющии.

Ра́дуйтеся, мона́шествующих укрепле́ние; ра́дуйтеся, священнои́ноков вспоможе́ние.

Ра́дуйтеся, во оби́тели ва́шей незри́мо пребыва́ющии; ра́дуйтеся, ча́д свои́х не оставля́ющии.

Ра́дуйтеся, ско́рии в ско́рбех помо́щницы; ра́дуйтеся, неусы́пнии оби́тели охрани́телие.

Ра́дуйтеся, покро́вом Всецари́цы осене́ннии; ра́дуйтеся, Ду́ха Свята́го сосу́ди избра́ннии.

Ра́дуйтеся, снасле́дницы Ца́рствия Христо́ва; ра́дуйтеся, по благода́ти сы́нове Отца́ Небе́снаго.

Ра́дуйтеся, преподо́бнии ста́рцы О́птинстии, богому́дрии наста́вницы ве́ры и благоче́стия.

Конда́к 11.

Пе́ние от серде́ц на́ших износи́мое сподо́бльшеся приноси́ти ва́м, отцы́ преподо́бнии, пред честны́ми моща́ми ва́шими, недоумева́ем, ка́ко досто́йно просла́вити просла́вльшаго ва́с, ди́внаго во святы́х Свои́х Бо́га на́шего. То́чию моли́твами ва́шими укрепля́еми, немо́лчно вопие́м Ему́: Аллилу́ия.

И́кос 11.

Светоза́рнии лучи́ Со́лнца Пра́вды, столпи́ благоче́стия, достиза́ющии Небесе́, вои́стину яви́лися есте́, отцы́ на́ши преподо́бнии! Ны́не же во Оби́телех Небе́сных наслажда́ющеся, Престо́лу Святы́я Тро́ицы предстоите́, но и на́с недосто́йных не оставля́ете, да́р многоце́нен на́м яви́вше цельбоно́сныя мо́щи ва́ша, к ни́мже притека́юще, зове́м:

Ра́дуйтеся, Моисе́е со Анто́нием, опло́те ста́рчества; ра́дуйся, о́тче Льве́, ста́рчества ко́реню кре́пкий.

Ра́дуйся, Мака́рие, о́бразе смиренному́дрия; ра́дуйся, Исаа́кие, домоправи́телю Влады́ки Христа́.

Ра́дуйся, Иларио́не, ду́ш и теле́с целе́бниче; ра́дуйся, Анато́лие, моли́твы свети́льниче.

Ра́дуйся, Амвро́сие, благоуха́нный кри́не ста́рчества; ра́дуйся, Ио́сифе, блага́го ко́рене о́трасле до́брая.

Ра́дуйся, Варсоно́фие, до́блий стратила́те Христо́в; ра́дуйся, Анато́лие, уте́шителю скорбя́щих.

Ра́дуйся, Некта́рие, прозорли́вче и те́плый моли́твенниче; Ра́дуйтеся, Исаа́кие со Ни́коном, сла́внии му́ченицы и испове́дницы.

Ра́дуйтеся, преподо́бнии ста́рцы О́птинстии, богому́дрии наста́вницы ве́ры и благоче́стия.

Конда́к 12.

Благода́ть Бо́жию прие́мшии, ста́рцы преподо́бнии, тече́ние жития́ проидо́сте в по́двизех и доброде́телех, не иму́ще зде́ пребыва́ющаго гра́да, но гряду́щаго взыску́юще, его́же и достиго́сте, Го́рняго о́наго прекра́снаго Иерусали́ма, иде́же с ли́ки А́нгелов во све́тлости неизрече́нней пое́те Бо́гу: Аллилу́иа.

И́кос 12.

Пою́ще и пра́зднующе всесве́тлую па́мять ва́шу, отцы́ пресла́внии, почита́ем труды́ и лише́ния, ско́рби и боле́зни, гоне́ния и страда́ния ва́ша: не то́чию бо о́вцы ста́да Христо́ва укрепи́сте, но и ве́ры Христо́вы испове́дницы бы́сте. Те́мже и блаже́нств ева́нгельских прича́стницы яви́вшеся, слы́шите воспева́емая ва́м сицева́я:

Ра́дуйтеся, нището́ю ду́ха бога́тии; ра́дуйтеся, мно́гаго ра́ди пла́ча уте́шеннии.

Ра́дуйтеся, насле́дницы земли́ кро́тких; ра́дуйтеся, обре́тшии пра́вду Христо́ву.

Ра́дуйтеся, я́ко поми́лование улучи́вшии; ра́дуйтеся, чи́стым се́рдцем Бо́га зря́щии.

Ра́дуйтеся, ду́х ми́рен стяжа́вшии; ра́дуйтеся, мно́жество ду́ш те́м спаса́вшии.

Ра́дуйтеся, гоне́ние за пра́вду Бо́жию претерпе́вшии; ра́дуйтеся, в Небе́сное Ца́рствие возше́дшии.

Ра́дуйтеся, гони́мии от неве́рных на земли́; ра́дуйтеся, я́ко мзда́ ва́ша мно́га на Небесе́х.

Ра́дуйтеся, преподо́бнии ста́рцы О́птинстии, богому́дрии наста́вницы ве́ры и благоче́стия.

Конда́к 13.

О вели́цыи уго́дницы Бо́жии, преподо́бнии ста́рцы О́птинстии! Ми́лостивно приими́те от на́с сие́ хвале́ние, с любо́вию ва́м ны́не приноси́мое, и те́плым ва́шим хода́тайством ко Го́споду испроси́те на́м в ве́ре утвержде́ние, покая́ние и во́ли Бо́жией после́дование, да изба́вленнии му́ки ве́чныя, ку́пно с ва́ми воспева́ем Бо́гу: Аллилу́ия.

Этот конда́к читается трижды, затем и́кос 1-й и конда́к 1-й.

Моли́тва.

О преподо́бнии и богоно́снии отцы́ на́ши, ста́рцы О́птинстии, богому́дрии учи́телие ве́ры и благоче́стия, столпи́ и свети́льницы все́м взыску́ющим спасе́ния и жи́зни ве́чныя: Льве́, Мака́рие, Моисе́е, Анто́ние, Иларио́не, Амвро́сие, Исаа́кие, Анато́лие, Ио́сифе, Варсоно́фие, Анато́лие, Некта́рие, Ни́коне испове́дниче и преподобному́чениче Исаа́кие, мо́лим ва́с при́сно мы́ недосто́йнии, да сохрани́т Христо́с Бо́г предста́тельством ва́шим Це́рковь Свою́ Святу́ю, страну́ Росси́йскую, оби́тель О́птинскую и вся́кий гра́д и страну́, иде́же сла́вится и правосла́вно испове́дуется и́мя Его́ Боже́ственное. Моли́теся о на́с, о преподо́бнии ста́рцы О́птинстии, да у́зрим беззако́ния на́ша и принесе́м пред Го́сподом на́шим Иису́сом Христо́м покая́ние многосле́зное, да очи́стит мно́гия грехи́ на́ша и да́рует на́м времена́ ми́рная и ко спасе́нию благоуспе́шная, да укроти́тся суета́ ве́ка сего́ под кре́пкую ру́ку Бо́жию, я́ко да стя́жем ду́х ми́ра, кро́тости, братолю́бия и милосе́рдия ко стра́ждущим. О преподо́бнии, моли́те и Ма́терь Све́та, Цари́цу Небе́сную, Пречи́стую Богоро́дицу, да отве́рзет две́ри милосе́рдия Сы́на Своего́ и Бо́га на́шего и да сподо́бит и на́с до́браго отве́та на Стра́шнем Суди́щи, ве́чных му́к да изба́вит и ку́пно с ва́ми да удосто́ит во Ца́рствии Небе́снем сла́вити и воспева́ти пречестно́е и великоле́пое и́мя Отца́, и Сы́на, и Свята́го Ду́ха, во ве́ки веко́в. Ами́нь.

А҆ка́ѳїстъ прпⷣбнымъ ѻ҆́птинскимъ ста́рцємъ.

Конда́къ а҃.

И҆збра̑ннымъ слꙋжи́телємъ ст҃ы́ѧ трⷪ҇цы, собо́рꙋ прпⷣбныхъ ста́рцєвъ ѻ҆́птинскихъ, наста́вникѡмъ дѡ́брымъ и҆ премꙋ̑дрымъ бл҃годаре́нїе и҆ похвалы̑ прино́симъ. Вы́ же, ꙗ҆́кѡ хрⷭ҇то́вы цр҃кве ᲂу҆краше́нїе, моли́тесѧ ѡ҆ на́съ ко гдⷭ҇ꙋ, да воспѣва́емъ ва́съ любо́вїю: Ра́дꙋйтесѧ, прпⷣбнїи ста́рцы ѻ҆́птинстїи, бг҃омꙋ́дрїи наста̑вницы вѣ́ры и҆ бл҃гоче́стїѧ.

І҆́косъ а҃.

А҆́гг҃лѡвъ творе́цъ просла́ви ва́съ, ѻ҆тцы̀ и҆ ста́рцы прпⷣбнїи, ꙗ҆́кѡ сбы́тисѧ на ва́съ рече́нномꙋ: свѣ́тъ мона́хѡмъ сꙋ́ть а҆́гг҃ли, свѣ́тъ же всѣ̑мъ человѣ́кѡмъ є҆́сть мона́шеское житїѐ. Вои́стиннꙋ ᲂу҆́бѡ ꙗ҆ви́лисѧ є҆стѐ а҆́гг҃ли храни́телїе странѣ̀ на́шей рѡссі́йстѣй: и҆́нокѡмъ наста̑вницы, ко сп҃се́нїю пꙋтевожді́е всѣ̑мъ вѣ̑рнымъ ча́дѡмъ цр҃кве, вопїю́щымъ:

Ра́дꙋйсѧ, бг҃опросла́вленный собо́ре: ра́дꙋйсѧ, бг҃оза́рное бл҃года́ти сїѧ́нїе.

Ра́дꙋйсѧ, дре́во ста́рчества многопло́дное: ра́дꙋйсѧ, во хрⷭ҇тѣ̀ є҆ди́нство дꙋхо́вное.

Ра́дꙋйсѧ, по́лче, и҆спо́лненный си́лы бж҃їѧ: ра́дꙋйсѧ, во́инство, побѣжда́ющее де́монѡвъ.

Ра́дꙋйсѧ, вѣ́нче, дх҃омъ ст҃ы́мъ бл҃гоꙋха́ющїй: ра́дꙋйсѧ, ѻ҆́птины пꙋ́стыни сла́во и҆ похвало̀.

Ра́дꙋйсѧ, хрⷭ҇то́въ пречꙋ́дный вїногра́де: ра́дꙋйсѧ, мы́сленный раю̀ бг҃онасажде́нный.

Ра́дꙋйсѧ, ликостоѧ́нїе пѣвцє́въ ст҃ы́ѧ трⷪ҇цы: ра́дꙋйсѧ, соѕвѣ́здїе тве́рди нбⷭ҇ныѧ.

Ра́дꙋйтесѧ, прпⷣбнїи ста́рцы ѻ҆́птинстїи, бг҃омꙋ́дрїи наста̑вницы вѣ́ры и҆ бл҃гоче́стїѧ.

Конда́къ в҃.

Ви́дѧще сꙋ́єтнаѧ и҆ привре́мєннаѧ, ꙗ҆̀же въ мі́рѣ се́мъ, всѧ́кое жите́йское попече́нїе ѿверго́сте, ѻ҆тцы̀ бг҃омꙋ́дрїи, прїидо́сте въ пꙋ́стынь ѻ҆́птинꙋ, и҆дѣ́же дре́внїй ѻ҆́бразъ ѻ҆́бщагѡ житїѧ̀ ꙗ҆ви́сте: соꙋ́зъ любвѐ неразрꙋши́мый ѡ҆ хрⷭ҇тѣ̀ и҆ ре́вность первохрⷭ҇тїа́нскꙋю завѣ́та но́вагѡ, невозвра́тнѡ ко гдⷭ҇ꙋ ᲂу҆стреми́стесѧ любо́вїю, а҆́гг҃льскꙋю пѣ́снь воспѣва́юще: А҆ллилꙋ́їа.

І҆́косъ в҃.

Ра́зꙋмъ сп҃се́нїѧ взыскꙋ́юще, ѻ҆тцы̀ пресла́внїи, бога́тство, сла́вꙋ и҆ всѧ̑ земна̑ѧ ꙗ҆́кѡ мимотекꙋ̑щаѧ презрѣ́вше, є҆ди́но же на потре́бꙋ и҆збра́сте: мно́гими трꙋды̑, скорбьмѝ и҆ болѣ́зньми до́брое ѡ҆снова́нїе по́двигꙋ положи́сте. Тѣ́мже, хрⷭ҇тѡ́вы за́пѡвѣди сотво́рше и҆ ст҃ы́хъ ѻ҆тє́цъ совѣ́ты соблю́дше, добродѣ́тельми ѡ҆богати́лисѧ є҆стѐ. Сегѡ̀ ра́ди вопїе́мъ ва́мъ:

Ра́дꙋйтесѧ, хрⷭ҇то́во смире́нїе возлюби́вшїи: ра́дꙋйтесѧ, кро́тость дꙋ́ха терпѣ́нїемъ стѧжа́вшїи.

Ра́дꙋйтесѧ, во́ли бж҃їей послѣ́довавшїи: ра́дꙋйтесѧ, свою̀ во́лю ѿсѣ́кшїи.

Ра́дꙋйтесѧ, мл҃твою и҆ посто́мъ бг҃ꙋ слꙋжи́вшїи: ра́дꙋйтесѧ, чи́стымъ се́рдцемъ гдⷭ҇а зрѧ́щїи.

Ра́дꙋйтесѧ, стра̑сти тѣлє́сныѧ воздержа́нїемъ ᲂу҆мертви́вшїи: ра́дꙋйтесѧ, пло́ть ва́шꙋ дꙋ́хови покори́вшїи.

Ра́дꙋйтесѧ, млⷭ҇ть ꙗ҆́кѡ ца́рскїй пꙋ́ть и҆збра́вшїи: ра́дꙋйтесѧ, разсꙋжде́нїе ꙗ҆́кѡ ве́рхъ добродѣ́телей ѡ҆брѣ́тшїи.

Ра́дꙋйтесѧ, бл҃гонра́внꙋю жи́знь показа́вшїи: ра́дꙋйтесѧ, ѿ бг҃а бл҃гі̑ѧ да́ры прїе́мшїи.

Ра́дꙋйтесѧ, прпⷣбнїи ста́рцы ѻ҆́птинстїи, бг҃омꙋ́дрїи наста̑вницы вѣ́ры и҆ бл҃гоче́стїѧ.

Конда́къ г҃.

Си́ла моѧ̀ въ не́мощи соверша́етсѧ, речѐ гдⷭ҇ь. Тѣ́мже и҆ вы̀, прпⷣбнїи, ꙗ҆ре́мъ скорбе́й и҆ болѣ́зней под̾е́мше, си́лою дх҃а ѡ҆богати́стесѧ: да́ръ разсꙋжде́нїѧ прїѧ́сте, и҆ премꙋ́дрость ста́рчества ᲂу҆лꙋчи́сте, воспѣва́юще пода́телю всѧ́ческихъ: А҆ллилꙋ́їа.

І҆́косъ г҃.

И҆мѣ́ѧ ѡ҆ сп҃се́нїи человѣ́кѡвъ ди́вное промышле́нїе, сла́вимый въ трⷪ҇цѣ бг҃ъ вїногра́дъ ста́рчества ѻ҆би́льнѡ во є҆гѵ́птѣ возрастѝ, и҆ и҆спо́лни се́й всю̀ зе́млю: и҆ ѿра́сль є҆гѡ̀ въ послѣ̑днѧѧ лѣ̑та дости́же пꙋ́стыни ѻ҆́птинскїѧ. Сїѧ̀ до́брыми вїногра̑дари ѡ҆треблѧ́ема и҆ вода́ми пита́емаѧ ст҃ого́рскими и҆ ѳѷваі́дскими, бога́тый пло́дъ принесѐ. Сїѐ до́брѣ разꙋмѣ́вше, воззове́мъ ста́рцємъ ѻ҆́птинскимъ си́це:

Ра́дꙋйсѧ, мѡѷсе́е, и҆збра́нный пꙋстынножи́телю: ра́дꙋйсѧ, ста́рчества ѻ҆́птинскагѡ насади́телю.

Ра́дꙋйсѧ, а҆нтѡ́нїе, бг҃оꙋго́дный подви́жниче: ра́дꙋйсѧ, смире́нїѧ и҆ кро́тости наста́вниче.

Ра́дꙋйсѧ, ѻ҆́тче львѐ, по бз҃ѣ пла́менный ревни́телю: ра́дꙋйсѧ, ста́рчества ѻ҆́птинскагѡ возрасти́телю.

Ра́дꙋйсѧ, дꙋ́шꙋ свою̀ за ча̑да положи́ти гото́вый: ра́дꙋйсѧ, во ѻ҆би́тель про́мысломъ бж҃їимъ приведе́нный.

Ра́дꙋйсѧ, мака́рїе, высото̀ смире́нїѧ: ра́дꙋйсѧ, глꙋбино̀ премꙋ́дрости ста́рческїѧ.

Ра́дꙋйсѧ, і҆саа́кїе, вертогра́да ста́рчества храни́телю: ра́дꙋйсѧ, ѻ҆те́ческихъ завѣ́тѡвъ вѣ́рный и҆сполни́телю.

Ра́дꙋйтесѧ, прпⷣбнїи ста́рцы ѻ҆́птинстїи, бг҃омꙋ́дрїи наста̑вницы вѣ́ры и҆ бл҃гоче́стїѧ.

Конда́къ д҃.

Бꙋ́рное мо́ре без̾ ко́рмчагѡ никто́же мо́жетъ прейтѝ: і҆и҃льтѧне же, мѡѷсе́омъ пꙋтеводи́мїи, ꙗ҆́кѡ по сꙋ́хꙋ преидо́ша є҆̀. Се́й проѻ́бразъ ста́рчества прїе́мше, бг҃оно́снїи ѻ҆тцы̀ ѻ҆́птинстїи, ꙗ҆́коже ѻ҆́ный мѡѷсе́й, чрез̾ мо́ре жите́йское мнѡ́гимъ ко сп҃се́нїю пꙋтеводи́телїе ꙗ҆ви́лисѧ є҆стѐ, ᲂу҆казꙋ́юще є҆ди́нъ пꙋ́ть, хрⷭ҇та̀ гдⷭ҇а, є҆мꙋ́же при́снѡ воспѣва́емъ: А҆ллилꙋ́їа.

І҆́косъ д҃.

Слꙋ́шаѧй ва́съ, менѐ слꙋ́шаетъ, речѐ гдⷭ҇ь свои̑мъ ᲂу҆ч҃нкѡ́мъ, на про́повѣдь ѧ҆̀ посыла́ѧ. И҆ та́кѡ положе́но бы́сть ст҃а́гѡ ста́рчества ѡ҆снова́нїе, да всѧ́къ вѣ́чныѧ жи́зни и҆скі́й, вопроша́етъ ста́рца своего̀, да бл҃га̑ѧ позна́етъ во сп҃се́нїе. Сїѐ бжⷭ҇твенное ᲂу҆ставле́нїе вѣ́дꙋще вы̀, ст҃і́и львѐ и҆ мака́рїе, созда́сте ста́рчество на тве́рдѣмъ ка́мени смире́нїѧ, тѣ́мже восхва́лимъ ста́рцєвъ ѻ҆́птинскихъ си́це:

Ра́дꙋйтесѧ, любо́вїю къ бли̑жнимъ ѡ҆заре́ннїи: ра́дꙋйтесѧ, бл҃года́тїю ста́рчества ѡ҆даре́ннїи.

Ра́дꙋйтесѧ, къ бг҃ꙋ вѣ́рнїи пꙋтеводи́телїе: ра́дꙋйтесѧ, мно́гихъ дꙋ́шъ просвѣти́телїе.

Ра́дꙋйтесѧ, смире́нїю хрⷭ҇то́вꙋ наꙋча́ющїи: ра́дꙋйтесѧ, въ пра́вдѣ жи́ти на́съ ᲂу҆крѣплѧ́ющїи.

Ра́дꙋйтесѧ, мона́шескагѡ житїѧ̀ ревни́телїе: ра́дꙋйтесѧ, послꙋша́нїѧ до́брїи ᲂу҆чи́телїе.

Ра́дꙋйтесѧ, на пꙋ́ть покаѧ́нїѧ наставлѧ́ющїи: ра́дꙋйтесѧ, къ любвѝ бж҃їей всѣ́хъ возвыша́ющїи.

Ра́дꙋйтесѧ, до́брїи дѣ́лателїе вїногра́да хрⷭ҇то́ва: ра́дꙋйтесѧ, ꙗ҆́кѡ ѿве́рзесѧ ва́мъ црⷭ҇тво нбⷭ҇ное.

Ра́дꙋйтесѧ, прпⷣбнїи ста́рцы ѻ҆́птинстїи, бг҃омꙋ́дрїи наста̑вницы вѣ́ры и҆ бл҃гоче́стїѧ.

Конда́къ є҃.

Бг҃обл҃же́ннїи ѻ҆тцы̀ мѡѷсе́е и҆ і҆саа́кїе, ре́вностїю ѡ҆ до́мѣ бж҃їемъ дви́жимїи, нелѣ́ностнїи зижди́телїе ѻ҆би́тели ꙗ҆ви́лисѧ є҆стѐ, поло́жше во главꙋ̀ ᲂу҆́гла ка́мень краеꙋго́ленъ. Сегѡ̀ ра́ди воздвиго́сте ди́вныѧ красоты̀ хра́мы бж҃їѧ, и҆дѣ́же мы̀ ны́нѣ воспѣва́емъ: А҆ллилꙋ́їа.

І҆́косъ є҃.

Видѣ́нїѧ и҆ созерца́нїѧ та̑инъ бжⷭ҇твенныхъ сподо́бльшесѧ, ꙗ҆ви́стесѧ бл҃гочи́нїѧ цр҃ко́внагѡ прилѣ́жнїи ревни́телїе и҆ бл҃голѣ́пїѧ бг҃ослꙋже́нїѧ рачи́телїе, є҆́же жи́ти ва́мъ въ домꙋ̀ гдⷭ҇ни и҆ зрѣ́ти красотꙋ̀ є҆гѡ̀. Тѣ́мже и҆ мы̀ ны́нѣ, ᲂу҆слажда́ющесѧ красото́ю ѻ҆би́тели ѻ҆́птинскїѧ и҆ разꙋмѣ́юще и҆зрѧ́дное попече́нїе ва́ше ѡ҆ не́й, бл҃года́рнѡ ва́мъ взыва́емъ:

Ра́дꙋйсѧ, а҆нтѡ́нїе, ᲂу҆се́рдный скита̀ строи́телю: ра́дꙋйсѧ, ᲂу҆дѣ́ла прⷣте́чи гдⷭ҇нѧ попечи́телю.

Ра́дꙋйсѧ, мака́рїе, писа́ньми мно́гихъ просвѣти́вый: ра́дꙋйсѧ, слꙋ̑жбы цр҃кѡ́вныѧ ᲂу҆краси́вый.

Ра́дꙋйсѧ, а҆мвро́сїе, ди́внѡ на воздꙋ́сѣ моли́выйсѧ: ра́дꙋйсѧ, въ мл҃твѣ сла́вꙋ бж҃їю созерца́вый.

Ра́дꙋйсѧ, бг҃омꙋ́дрый наста́вниче и҆ ᲂу҆чи́телю: ра́дꙋйсѧ, ша́мординскїѧ ѻ҆би́тели созда́телю и҆ ѡ҆корми́телю.

Ра́дꙋйсѧ, і҆ларїѡ́не, заблꙋ́ждшихъ ѡ҆браща́ѧй: ра́дꙋйсѧ, тѣ́хъ къ та́инствѡмъ цр҃кѡ́внымъ привлека́ѧй.

Ра́дꙋйсѧ, і҆саа́кїе, ѻ҆би́тели до́брый ᲂу҆пра́вителю: ра́дꙋйсѧ, и҆́нокѡвъ вѣ́рный пꙋтеводи́телю.

Ра́дꙋйтесѧ, прпⷣбнїи ста́рцы ѻ҆́птинстїи, бг҃омꙋ́дрїи наста̑вницы вѣ́ры и҆ бл҃гоче́стїѧ.

Конда́къ ѕ҃.

Проповѣ̑дницы и҆́стины ꙗ҆ви́стесѧ, бг҃оно́снїи ста́рцы ѻ҆́птинстїи, наставлѧ́юще всѧ̑ бли̑жнѧѧ и҆ да̑льнѧѧ, ꙗ҆́кѡ сто́лпъ є҆́сть и҆ ᲂу҆твержде́нїе и҆́стины цр҃ковь правосла́внаѧ, є҆ѧ́же внѣ̀ никто́же мо́жетъ сп҃се́нїе ᲂу҆лꙋчи́ти и҆ жи́знь вѣ́чнꙋю наслѣ́дити. Си́це ва́ми наꙋче́ннїи, ко гдⷭ҇ꙋ взыва́емъ ра́достнѡ: А҆ллилꙋ́їа.

І҆́косъ ѕ҃.

Возсїѧ́сте свѣ́томъ добродѣ́тельнагѡ житїѧ̀ и҆ свѣ́тъ и҆́стиннагѡ бг҃опозна́нїѧ ᲂу҆ѧсни́сте, и҆з̾ѧсне́нїе слове́съ ст҃ы́хъ ѻ҆тє́цъ на́мъ ꙗ҆ви́вше, къ си̑мъ же и҆ своѧ̑ писа̑нїѧ ѡ҆ста́вивше. Сегѡ̀ ра́ди, ᲂу҆подо́бльшесѧ человѣ́кꙋ домови́тꙋ, и҆́же и҆зно́ситъ ѿ сокро́вища своегѡ̀ нѡ́ваѧ и҆ вє́тхаѧ, ᲂу҆мно́жили є҆стѐ тала́нты влⷣцѣ хрⷭ҇тꙋ̀ и҆ просла́вистесѧ ѿ негѡ̀: мы́ же тщи́мсѧ пѣ́ти ва́мъ такова̑ѧ:

Ра́дꙋйтесѧ, зако́на бж҃їѧ ревни́телїе: ра́дꙋйтесѧ, и҆́стиннагѡ любомꙋ́дрїѧ рачи́телїе.

Ра́дꙋйтесѧ, клю́чь разꙋмѣ́нїѧ на́мъ подава́ющїи: ра́дꙋйтесѧ, двє́ри и҆́стины ѿверза́ющїи.

Ра́дꙋйтесѧ, премⷣрости бж҃їѧ сокро́вище: ра́дꙋйтесѧ, слове́съ бжⷭ҇твенныхъ и҆сто́чниче.

Ра́дꙋйтесѧ, свѣ́та є҆ѵⷢ҇льскагѡ сїѧ́нїе: ра́дꙋйтесѧ, за́повѣдей хрⷭ҇то́выхъ соблюде́нїе.

Ра́дꙋйтесѧ, писа́нїй ѻ҆те́ческихъ и҆з̾ѧсни́телїе: ра́дꙋйтесѧ, бл҃гоче́стїѧ насади́телїе.

Ра́дꙋйтесѧ, да́нный ва́мъ тала́нтъ возрасти́вшїи: ра́дꙋйтесѧ, въ ра́дость влⷣки хрⷭ҇та̀ вше́дшїи.

Ра́дꙋйтесѧ, прпⷣбнїи ста́рцы ѻ҆́птинстїи, бг҃омꙋ́дрїи наста̑вницы вѣ́ры и҆ бл҃гоче́стїѧ.

Конда́къ з҃.

Хотѧ́й ᲂу҆годи́ти бг҃ови, велѣ́нїй є҆гѡ̀ ꙗ҆ви́лсѧ є҆сѝ ᲂу҆се́рдный храни́тель, прпⷣбне мака́рїе, соблюда́ѧ за́повѣдь гдⷭ҇ню: а҆́ще кто̀ тѧ̀ ᲂу҆да́ритъ въ лани́тꙋ деснꙋ́ю, ѡ҆братѝ томꙋ̀ и҆ дрꙋгꙋ́ю. Си́лою толи́кагѡ смире́нїѧ и҆схожда́хꙋ дꙋ́си нечи́стїи ѿ ѡ҆держи́мыхъ тѣ́ми. Мы́ же, ѻ҆́бразъ зрѧ́ще се́й смиренномꙋ́дрїѧ, сла́вимъ бг҃а: А҆ллилꙋ́їа.

І҆́косъ з҃.

Но́выхъ ви́дѧще и҆збра́нникѡвъ бж҃їихъ, притека́хꙋ къ ва́мъ люде́й мно́жєства, ча́юще совѣ́та и҆ бл҃гослове́нїѧ, ᲂу҆тѣше́нїѧ же и҆ и҆сцѣле́нїѧ. Вы́ же всѣ̑мъ всѧ̑ ꙗ҆ви́лисѧ є҆стѐ: грѣ̑шныѧ на пꙋ́ть покаѧ́нїѧ наста́вльше, маловѣ̑рныѧ ᲂу҆тверди́вше, стра́ждꙋщымъ спострада́вше, немощны̑мъ и҆сцѣлє́нїѧ дарова́вше. Тѣ́мже и҆ на́съ ᲂу҆крѣплѧ́ете пѣ́ти ва́мъ:

Ра́дꙋйсѧ, мака́рїе, ѕло́бꙋ дїа́волю побѣди́вый: ра́дꙋйсѧ, того̀ смире́нїемъ низложи́вый.

Ра́дꙋйсѧ, а҆мвро́сїе, въ болѣ́знехъ долготерпѣли́вый: ра́дꙋйсѧ, сле́зы стра́ждꙋщихъ и҆зсꙋши́вый.

Ра́дꙋйсѧ, і҆ѡ́сифе, ст҃а́гѡ а҆мвро́сїа прее́мниче: ра́дꙋйсѧ, по до́брѣмъ ᲂу҆чи́тели мона́хѡвъ наста́вниче.

Ра́дꙋйсѧ, цр҃и́цы нбⷭ҇ныѧ люби́миче бл҃же́нный: ра́дꙋйсѧ, є҆́ю ѿ ѻ҆дра̀ болѣ́зни возста́вленный.

Ра́дꙋйсѧ, варсоно́фїе, сла́вꙋ земнꙋ́ю презрѣ́вый: ра́дꙋйсѧ, во́инствꙋ цр҃ѧ̀ нбⷭ҇нагѡ причте́нный.

Ра́дꙋйсѧ, незри́мыхъ врагѡ́въ побѣди́телю: ра́дꙋйсѧ, прозорли́вый дꙋ́шъ врачева́телю.

Ра́дꙋйтесѧ, прпⷣбнїи ста́рцы ѻ҆́птинстїи, бг҃омꙋ́дрїи наста̑вницы вѣ́ры и҆ бл҃гоче́стїѧ.

Конда́къ и҃.

Стра́нникѡвъ и҆ прише́льцєвъ себѐ на землѝ бы́ти помышлѧ́юще, ст҃ы́й а҆мвро́сїе со ᲂу҆ченики̑, тѣ́сный пꙋ́ть слꙋже́нїѧ бли̑жнимъ и҆збра́сте. Сегѡ̀ ра́ди ꙗ҆ви́шасѧ на ва́съ дарова̑нїѧ дꙋхо́внагѡ разсꙋжде́нїѧ, тѣле́съ и҆сцѣле́нїѧ, сꙋде́бъ бж҃їихъ тайнозрѣ́нїѧ, дꙋ́шъ и҆знемога́ющихъ врачева́нїѧ. Си́ми да̑ры а҆́ки мре́жами мно́жество дꙋ́шъ ᲂу҆ловлѧ́юще, ст҃ѣ́й трⷪ҇цѣ воспѣва́ли є҆стѐ пѣ́снь: А҆ллилꙋ́їа.

І҆́косъ и҃.

Всѣ́мъ се́рдцемъ, дꙋше́ю и҆ мы́слїю бг҃а возлюби́вше, не то́кмѡ ᲂу҆тѣше́нїѧ тре́бꙋющихъ николи́же ѡ҆ставлѧ́сте, полє́знаѧ на потре́бꙋ коемꙋ́ждо подаю́ще, но и҆ всѐ вре́мѧ житїѧ̀ мл҃твѣ прилѣжа́ще, и҆́стиннагѡ бг҃омы́слїѧ сподо́билисѧ є҆стѐ, прпⷣбнїи, посто́мъ и҆ мл҃твою, нестѧжа́нїемъ и҆ чистото́ю, разсꙋжде́нїемъ и҆ млⷭ҇тїю ᲂу҆краше́ннїи, слы́шите ѿ на́съ сицева̑ѧ:

Ра́дꙋйтесѧ, всегда̀ пред̾ гдⷭ҇емъ ходи́вшїи: ра́дꙋйтесѧ, ѿ дѣѧ́нїѧ къ созерца́нїю восте́кшїи.

Ра́дꙋйтесѧ, тѧготы̑ мно́гихъ поне́сшїи: ра́дꙋйтесѧ, та́кѡ зако́нъ хрⷭ҇то́въ и҆спо́лнившїи.

Ра́дꙋйтесѧ, бли́жнемꙋ бл҃га̑ѧ и҆ска́вшїи: ра́дꙋйтесѧ, тѣ́хъ не́мѡщи любо́вїю покрыва́вшїи.

Ра́дꙋйтесѧ, си́лꙋ вра́жїю низложи́вшїи: ра́дꙋйтесѧ, кѡ́зни бѣсѡ́въ сокрꙋши́вшїи.

Ра́дꙋйтесѧ, лю́ди бж҃їѧ до́брѣ сп҃са́ющїи: ра́дꙋйтесѧ, мы́слєнныѧ та̑ти ѿ тѣ́хъ ѿгонѧ́ющїи.

Ра́дꙋйтесѧ, со́вѣсть ѿ грѣхѡ́въ ѡ҆чища́ющїи: ра́дꙋйтесѧ, ско́рбь серде́чнꙋю ѡ҆блегча́ющїи.

Ра́дꙋйтесѧ, прпⷣбнїи ста́рцы ѻ҆́птинстїи, бг҃омꙋ́дрїи наста̑вницы вѣ́ры и҆ бл҃гоче́стїѧ.

Конда́къ ѳ҃.

Всѧ́къ ꙗ҆зы́къ, всѧ́къ во́зрастъ, всѧ́ко сосло́вїе хва́литъ вы̀, собо́ре досточꙋ́дный прпⷣбныхъ ста́рцєвъ: ᲂу҆пасли́ бо є҆стѐ ста́до хрⷭ҇то́во ᲂу҆се́рднѡ и҆ неꙋвѧда́ємыѧ вѣнцы̀ сла́вы ѿ пастыренача́льника прїѧ́ли є҆стѐ. Тѣ́мже и҆ на́съ наꙋча́ете повинова́тисѧ ста́рцємъ и҆ па́стырємъ, да смиренномꙋ́дрїе стѧжа́вше, бл҃года́ть ѡ҆брѧ́щемъ пѣ́ти бг҃ꙋ: А҆ллилꙋ́їа.

І҆́косъ ѳ҃.

Ка́кѡ бжⷭ҇твеннꙋю ва́шꙋ къ человѣ́кѡмъ любо́вь и҆зглаго́лемъ: до кро́ве бо подвиза́ющесѧ и҆ дꙋ́шы своѧ̑ за ча̑да полага́юще, слꙋже́нїѧ своегѡ̀ ника́коже ѡ҆ста́вили є҆стѐ. Мы́ же, предста́тельствомъ ва́шимъ ᲂу҆ цр҃ѧ̀ ца́рствꙋющихъ ѻ҆би́тели ѻ҆́птинскїѧ ᲂу҆зрѣ́вше возрожде́нїе, ча́емъ и҆ хра́мѡвъ дꙋ́шъ на́шихъ ѡ҆бновле́нїе ᲂу҆лꙋчи́ти, со ᲂу҆миле́нїемъ ва́мъ глаго́люще:

Ра́дꙋйсѧ, некта́рїе, бл҃же́нный наста́вниче: ра́дꙋйсѧ, грѧдꙋ́щихъ прозорли́вый прови́дче.

Ра́дꙋйсѧ, і҆саа́кїе, сла́вный прпⷣбномч҃нче: ра́дꙋйсѧ, тве́рдый крⷭ҇тоно́сче.

Ра́дꙋйсѧ, а҆нато́лїе, наро́да бж҃їѧ ѡ҆кормле́нїе: ра́дꙋйсѧ, въ годи́нꙋ и҆скꙋше́нїй всѣ́хъ ᲂу҆крѣпле́нїе.

Ра́дꙋйсѧ, за вѣ́рꙋ порꙋга̑нїѧ прїе́мый: ра́дꙋйсѧ, въ ми́рѣ дꙋ́хъ тво́й бг҃ꙋ преда́вый.

Ра́дꙋйсѧ, ні́кѡне, мона́хѡвъ кро́ткое ᲂу҆тѣше́нїе: ра́дꙋйсѧ, и҆сповѣ́дниче многострада́льный.

Ра́дꙋйсѧ, мно́жество скорбе́й претерпѣ́вый: ра́дꙋйсѧ, сꙋмнѧ́щихсѧ въ правосла́вїи ᲂу҆тверди́вый.

Ра́дꙋйтесѧ, прпⷣбнїи ста́рцы ѻ҆́птинстїи, бг҃омꙋ́дрїи наста̑вницы вѣ́ры и҆ бл҃гоче́стїѧ.

Конда́къ і҃.

Сп҃са мі́ра вѣ́рнїи ᲂу҆ченицы̀ ꙗ҆ви́стесѧ, бг҃обл҃же́ннїи, бл҃гоче́стнѡ во хрⷭ҇тѣ̀ пожи́вшїи: ѻ҆́ви ᲂу҆́бѡ въ трꙋдѣ́хъ зижди́тельныхъ, ѻ҆́ви же въ не́мощехъ многоболѣ́зненныхъ, ѻ҆́ви же въ гоне́нїихъ непра́ведныхъ: проидо́сте пꙋ́ть притрꙋ́днагѡ сегѡ̀ житїѧ̀ и҆ многоплаче́внагѡ, ѻ҆́бразъ на́мъ подаю́ще, ка́кѡ достои́тъ въ ско́рбехъ пѣ́ти гдⷭ҇ꙋ си́лъ: А҆ллилꙋ́їа.

І҆́косъ і҃.

Стѣна̀ є҆стѐ цр҃кве правосла́вныѧ, забра́ло же нерꙋши́мое чтⷭ҇на́гѡ и҆́ночества: всѧ̑ бо ѻ҆рꙋ̑жїѧ бж҃їѧ прїе́мше и҆ ѡ҆бо́лкшесѧ въ бронѧ̑ пра́вды, и҆ на́съ вѣ́рнѡ наꙋча́ете, ка́кѡ щи́тъ вѣ́ры, шле́мъ сп҃се́нїѧ и҆ ме́чь дꙋхо́вный, глаго́лъ бж҃їй ѻ҆боюдꙋѻ́стрый, воспрїима́ти подоба́етъ. Помина́юще ва́съ ꙗ҆́кѡ наста́вникѡвъ, ᲂу҆се́рднѡ мо́лимсѧ, да сподо́битъ гдⷭ҇ь подража́ти вѣ́рѣ ва́шей и҆ вопи́ти:

Ра́дꙋйтесѧ, мꙋ́дрости бж҃їей наꙋча́ющїи: ра́дꙋйтесѧ, вода́ми жи́зни напаѧ́ющїи.

Ра́дꙋйтесѧ, мона́шествꙋющихъ ᲂу҆крѣпле́нїе: ра́дꙋйтесѧ, сщ҃еннои́нокѡвъ вспоможе́нїе.

Ра́дꙋйтесѧ, во ѻ҆би́тели ва́шей незри́мѡ пребыва́ющїи: ра́дꙋйтесѧ, ча̑дъ свои́хъ не ѡ҆ставлѧ́ющїи.

Ра́дꙋйтесѧ, ско́рїи въ ско́рбехъ помѡ́щницы: ра́дꙋйтесѧ, неꙋсы́пнїи ѻ҆би́тели ѡ҆храни́телїе.

Ра́дꙋйтесѧ, покро́вомъ всецр҃и́цы ѡ҆сѣне́ннїи: ра́дꙋйтесѧ, дх҃а ст҃а́гѡ сосꙋ́ди и҆збра́ннїи.

Ра́дꙋйтесѧ, снаслѣ̑дницы црⷭ҇твїѧ хрⷭ҇то́ва: ра́дꙋйтесѧ, по бл҃года́ти сы́нове ѻ҆ц҃а̀ нбⷭ҇нагѡ.

Ра́дꙋйтесѧ, прпⷣбнїи ста́рцы ѻ҆́птинстїи, бг҃омꙋ́дрїи наста̑вницы вѣ́ры и҆ бл҃гоче́стїѧ.

Конда́къ а҃і.

Пѣ́нїе ѿ серде́цъ на́шихъ и҆зноси́мое сподо́бльшесѧ приноси́ти ва́мъ, ѻ҆тцы̀ прпⷣбнїи, пред̾ чтⷭ҇ны́ми моща́ми ва́шими, недоꙋмѣва́емъ, ка́кѡ досто́йнѡ просла́вити просла́вльшаго ва́съ, ди́внаго во ст҃ы́хъ свои́хъ бг҃а на́шего. То́чїю мл҃твами ва́шими ᲂу҆крѣплѧ́еми, немо́лчнѡ вопїе́мъ є҆мꙋ̀: А҆ллилꙋ́їа.

І҆́косъ а҃і.

Свѣтоза́рнїи лꙋчи̑ сл҃нца пра́вды, столпѝ бл҃гоче́стїѧ, достиза́ющїи нб҃сѐ, вои́стиннꙋ ꙗ҆ви́лисѧ є҆стѐ, ѻ҆тцы̀ на́ши прпⷣбнїи! Ны́нѣ же во ѻ҆би́телехъ нбⷭ҇ныхъ наслажда́ющесѧ, прⷭ҇то́лꙋ ст҃ы́ѧ трⷪ҇цы предстоитѐ, но и҆ на́съ недосто́йныхъ не ѡ҆ставлѧ́ете, да́ръ многоцѣ́ненъ на́мъ ꙗ҆ви́вше цѣльбонѡ́сныѧ мо́щи ва́шѧ, къ ни̑мже притека́юще, зове́мъ:

Ра́дꙋйтесѧ, мѡѷсе́е со а҆нтѡ́нїемъ, ѡ҆пло́те ста́рчества: ра́дꙋйсѧ, ѻ҆́тче львѐ, ста́рчества ко́реню крѣ́пкїй.

Ра́дꙋйсѧ, мака́рїе, ѻ҆́бразе смиренномꙋ́дрїѧ: ра́дꙋйсѧ, і҆саа́кїе, домоправи́телю влⷣки хрⷭ҇та̀.

Ра́дꙋйсѧ, і҆ларїѡ́не, дꙋ́шъ и҆ тѣле́съ цѣле́бниче: ра́дꙋйсѧ, а҆нато́лїе, мл҃твы свѣти́льниче.

Ра́дꙋйсѧ, а҆мвро́сїе, бл҃гоꙋха́нный крі́не ста́рчества: ра́дꙋйсѧ, і҆ѡ́сифе, бл҃га́гѡ ко́рене ѿрасле до́браѧ.

Ра́дꙋйсѧ, варсоно́фїе, до́блїй стратила́те хрⷭ҇то́въ: ра́дꙋйсѧ, а҆нато́лїе, ᲂу҆тѣ́шителю скорбѧ́щихъ.

Ра́дꙋйсѧ, некта́рїе, прозорли́вче и҆ те́плый мл҃твенниче: ра́дꙋйтесѧ, і҆саа́кїе со ні́кѡномъ, сла́внїи мч҃нцы и҆ и҆сповѣ̑дницы.

Ра́дꙋйтесѧ, прпⷣбнїи ста́рцы ѻ҆́птинстїи, бг҃омꙋ́дрїи наста̑вницы вѣ́ры и҆ бл҃гоче́стїѧ.

Конда́къ в҃і.

Бл҃года́ть бж҃їю прїе́мшїи, ста́рцы прпⷣбнїи, тече́нїе житїѧ̀ проидо́сте въ по́двизѣхъ и҆ добродѣ́телехъ, не и҆мꙋ́ще здѣ̀ пребыва́ющагѡ гра́да, но грѧдꙋ́щагѡ взыскꙋ́юще, є҆гѡ́же и҆ достиго́сте, го́рнѧгѡ ѻ҆́нагѡ прекра́снагѡ і҆ерⷭ҇ли́ма, и҆дѣ́же съ ли̑ки а҆́гг҃лѡвъ во свѣ́тлости неизрече́ннѣй пое́те бг҃ꙋ: А҆ллилꙋ́їа.

І҆́косъ в҃і.

Пою́ще и҆ пра́зднꙋюще всесвѣ́тлꙋю па́мѧть ва́шꙋ, ѻ҆тцы̀ пресла́внїи, почита́емъ трꙋды̀ и҆ лишє́нїѧ, скѡ́рби и҆ болѣ̑зни, гонє́нїѧ и҆ страда̑нїѧ ва́шѧ: не то́чїю бо ѻ҆́вцы ста́да хрⷭ҇то́ва ᲂу҆крѣпи́сте, но и҆ вѣ́ры хрⷭ҇то́вы и҆сповѣ̑дницы бы́сте. Тѣ́мже и҆ бл҃же́нствъ є҆ѵⷢ҇льскихъ прича̑стницы ꙗ҆ви́вшесѧ, слы́шите воспѣва́ємаѧ ва́мъ сицева̑ѧ:

Ра́дꙋйтесѧ, нището́ю дꙋ́ха бога́тїи: ра́дꙋйтесѧ, мно́гагѡ ра́ди пла́ча ᲂу҆тѣ́шеннїи.

Ра́дꙋйтесѧ, наслѣ̑дницы землѝ кро́ткихъ: ра́дꙋйтесѧ, ѡ҆брѣ́тшїи пра́вдꙋ хрⷭ҇то́вꙋ.

Ра́дꙋйтесѧ, ꙗ҆́кѡ поми́лованїе ᲂу҆лꙋчи́вшїи: ра́дꙋйтесѧ, чи́стымъ се́рдцемъ бг҃а зрѧ́щїи.

Ра́дꙋйтесѧ, дꙋ́хъ ми́ренъ стѧжа́вшїи: ра́дꙋйтесѧ, мно́жество дꙋ́шъ тѣ́мъ сп҃са́вшїи.

Ра́дꙋйтесѧ, гоне́нїе за пра́вдꙋ бж҃їю претерпѣ́вшїи: ра́дꙋйтесѧ, въ нбⷭ҇ное црⷭ҇твїе возше́дшїи.

Ра́дꙋйтесѧ, гони́мїи ѿ невѣ́рныхъ на землѝ: ра́дꙋйтесѧ, ꙗ҆́кѡ мзда̀ ва́ша мно́га на нб҃сѣ́хъ.

Ра́дꙋйтесѧ, прпⷣбнїи ста́рцы ѻ҆́птинстїи, бг҃омꙋ́дрїи наста̑вницы вѣ́ры и҆ бл҃гоче́стїѧ.

Конда́къ г҃і.

ѽ вели́цыи ᲂу҆гѡ́дницы бж҃їи, прпⷣбнїи ста́рцы ѻ҆́птинстїи! Млⷭ҇тивнѡ прїими́те ѿ на́съ сїѐ хвале́нїе, съ любо́вїю ва́мъ ны́нѣ приноси́мое, и҆ те́плымъ ва́шимъ хода́тайствомъ ко гдⷭ҇ꙋ и҆спроси́те на́мъ въ вѣ́рѣ ᲂу҆твержде́нїе, покаѧ́нїе и҆ во́ли бж҃їей послѣ́дованїе, да и҆зба́вленнїи мꙋ́ки вѣ́чныѧ, кꙋ́пнѡ съ ва́ми воспѣва́емъ бг҃ꙋ: А҆ллилꙋ́їа.

Се́й конда́къ глаго́летсѧ три́жды. И҆ па́ки чтꙋ́тсѧ і҆́косъ а҃-­й и҆ конда́къ а҃-­й.

Моли́тва.

ѽ прпⷣбнїи и҆ бг҃оно́снїи ѻ҆тцы̀ на́ши, ста́рцы ѻ҆́птинстїи, бг҃омꙋ́дрїи ᲂу҆чи́телїе вѣ́ры и҆ бл҃гоче́стїѧ, столпѝ и҆ свѣти́льницы всѣ̑мъ взыскꙋ́ющымъ сп҃се́нїѧ и҆ жи́зни вѣ́чныѧ: львѐ, мака́рїе, мѡѷсе́е, а҆нтѡ́нїе, і҆ларїѡ́не, а҆мвро́сїе, і҆саа́кїе, а҆нато́лїе, і҆ѡ́сифе, варсоно́фїе, а҆нато́лїе, некта́рїе, ні́кѡне и҆сповѣ́дниче и҆ прпⷣбномч҃нче і҆саа́кїе, мо́лимъ ва́съ при́снѡ мы̀ недосто́йнїи, да сохрани́тъ хрⷭ҇то́съ бг҃ъ предста́тельствомъ ва́шимъ цр҃ковь свою̀ ст҃ꙋ́ю, странꙋ̀ рѡссі́йскꙋю, ѻ҆би́тель ѻ҆́птинскꙋю и҆ всѧ́кїй гра́дъ и҆ странꙋ̀, и҆дѣ́же сла́витсѧ и҆ правосла́внѡ и҆сповѣ́дꙋетсѧ и҆́мѧ є҆гѡ̀ бжⷭ҇твенное.

Моли́тесѧ ѡ҆ на́съ, ѽ прпⷣбнїи ста́рцы ѻ҆́птинстїи, да ᲂу҆́зримъ беззакѡ́нїѧ на̑ша и҆ принесе́мъ пред̾ гдⷭ҇омъ на́шимъ і҆и҃сомъ хрⷭ҇то́мъ покаѧ́нїе многосле́зное, да ѡ҆чи́ститъ мнѡ́гїѧ грѣхѝ на́шѧ и҆ да́рꙋетъ на́мъ времена̀ ми̑рнаѧ и҆ ко сп҃се́нїю бл҃гоꙋспѣ̑шнаѧ, да ᲂу҆кроти́тсѧ сꙋета̀ вѣ́ка сегѡ̀ под̾ крѣ́пкꙋю рꙋ́кꙋ бж҃їю, ꙗ҆́кѡ да стѧ́жемъ дꙋ́хъ ми́ра, кро́тости, братолю́бїѧ и҆ млⷭ҇рдїѧ ко стра́ждꙋщымъ.

Ѽ прпⷣбнїи, моли́те и҆ мт҃рь свѣ́та, цр҃и́цꙋ нбⷭ҇нꙋю, пречⷭ҇тꙋю бцⷣꙋ, да ѿве́рзетъ двє́ри млⷭ҇рдїѧ сн҃а своегѡ̀ и҆ бг҃а на́шегѡ и҆ да сподо́битъ и҆ на́съ до́брагѡ ѿвѣ́та на стра́шнѣмъ сꙋди́щи, вѣ́чныхъ мꙋ́къ да и҆зба́витъ и҆ кꙋ́пнѡ съ ва́ми да ᲂу҆досто́итъ во црⷭ҇твїи нбⷭ҇нѣмъ сла́вити и҆ воспѣва́ти пречтⷭ҇но́е и҆ великолѣ́пое и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, во вѣ́ки вѣкѡ́въ. А҆ми́нь.

24 ок­тяб­ря (11 ок­тяб­ря по ста­ро­му сти­лю) Свя­тая Пра­во­слав­ная Цер­ковь чтит па­мять Со­бо­ра пре­по­доб­ных оп­тин­ских стар­цев: