Акафист святителю Тихону, патриарху Московскому и всея России чудотворцу

Составил архимандрит Владимир (Кучерявый). Одобрен 20 октября 1992 года.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 22 февраля (09 февраля ст. ст.); 07 апреля (25 марта ст. ст.); 09 октября (26 сентября ст. ст.); 18 октября (05 октября ст. ст.); 18 ноября (05 ноября ст. ст.)

Утвержден для общецерковного использования.

Конда́к 1.

Избра́нный архиере́ю, преди́вный уго́дниче и испове́дниче Христо́в, Ру́сския Це́ркве кре́пкое огражде́ние, оте́честву на́шему хода́таю и засту́пниче, прославля́юще просла́вльшаго тя́ Го́спода, дарова́вшаго на́м в тебе́ но́ваго и вели́каго предста́теля, похва́льное пе́ние воспису́ем ти́; ты́ же, име́яй ве́лие дерзнове́ние ко Влады́це Небесе́ и земли́, от вся́ких на́с бе́д свободи́, зову́щих:

Ра́дуйся, святи́телю Ти́хоне, Це́ркве Правосла́вныя похвало́ и утвержде́ние.

И́кос 1

А́нгелов Творе́ц и Госпо́дь в бурено́сныя дни́ мяте́жа и нестрое́ния ве́лия, восхоте́в лю́дем стра́ждущим утеше́ние дарова́ти, яви́ тя́, патриа́рше прети́хий и предо́брый, я́ко свети́ло светоза́рное, све́том Трисия́ннаго Божества́ озаря́ющее ду́ши ве́рных, да и ны́не гряду́т по тебе́ вси́ жела́ющии со Христо́м бы́ти; сего́ ра́ди во умиле́нии вопие́м ти́:

Ра́дуйся, от жре́бия патриа́ршества а́ки от мона́шескаго послуша́ния не уклони́выйся; ра́дуйся, ре́вностному исполне́нию Боже́ственных хоте́ний научи́выйся.

Ра́дуйся, на престо́л патриа́рший, две́сте ле́т пустова́вый, в де́нь Введе́ния во хра́м Пресвяты́я Богоро́дицы возше́дый; ра́дуйся, в де́нь Благове́щения со престо́ла первосвяти́тельскаго ко Престо́лу Пресвяты́я Тро́ицы преше́дый.

Ра́дуйся, первосвяти́тельством и испове́дничеством укра́шенный; ра́дуйся, для Бо́га живы́й и Бо́гом просветле́нный.

Ра́дуйся, я́ко по́двигом свои́м патриа́ршество непрело́жно утверди́вый; ра́дуйся, о́браз па́стыря до́браго собо́ю яви́вый.

Ра́дуйся, Донски́я оби́тели сугу́бое прославле́ние; ра́дуйся, Правосла́вныя Це́ркве во Аме́рице утвержде́ние.

Ра́дуйся, росси́йския па́ствы богови́дное насле́дие; ра́дуйся, богоначерта́нный сви́ток пра́выя ве́ры.

Ра́дуйся, святи́телю Ти́хоне, Це́ркве Правосла́вныя похвало́ и утвержде́ние.

Конда́к 2.

Ви́дя лю́ди росси́йстии о попра́нии святы́нь правосла́вных зело́ скорбя́щия и стра́хом объя́тыя, упова́нием полага́л еси́ ве́рным живо́т ве́чный, а не сме́рть име́ти; те́мже све́том богоразу́мия твоего́, Ти́хоне благосе́рде, и на́с озари́, да ку́пно с тобо́ю вопие́м Творцу́ вся́ческих: Аллилу́иа.

И́кос 2.

Ра́зум богопросвеще́н име́я, богому́дре Ти́хоне, отве́ргл еси́ вся́ческое пло́ти мудрова́ние, с ра́зумом же и во́лю повину́л еси́ Го́сподеви, те́мже сосу́д чи́ст и селе́ние Ду́ха И́стины яви́лся еси́. Сего́ ра́ди, я́ко богому́драго наста́вника тя́ ублажа́юще, воспева́ем:

Ра́дуйся, с ю́ношеских ле́т патриа́рх именова́нный; ра́дуйся, де́лателю виногра́да Христо́ва избра́нный.

Ра́дуйся, я́ко благосты́нным святи́тельством утвержде́нию Правосла́вия во Аме́рице споспешествова́л еси́; ра́дуйся, я́ко всегда́ к высоте́ доброде́телей пасо́мых тобо́ю ве́л еси́.

Ра́дуйся, ста́до, тебе́ от Христа́ вруче́нное, во спасе́ние наста́вивый; ра́дуйся, и са́м вседу́шно Ца́рствия Го́рняго вожделе́вый.

Ра́дуйся, прему́дрости Бо́жией созерца́телю и пропове́дниче; ра́дуйся, ра́зума Апо́стольския Це́ркве храни́телю.

Ра́дуйся, златоу́стый благове́стниче правосла́вныя пра́вды; ра́дуйся, небоя́зненный обличи́телю суему́дрия и непра́вды.

Ра́дуйся, пра́ведности ди́вное благоуха́ние; ра́дуйся, не посрамля́яй на́шего упова́ния.

Ра́дуйся, святи́телю Ти́хоне, Це́ркве Правосла́вныя похвало́ и утвержде́ние.

Конда́к 3.

Си́ла Вы́шняго я́ве показа́ тя́, священнопропове́дниче Ти́хоне, в труде́х крестоноше́ния су́ща, егда́ всеору́жием Бо́жия благода́ти ко́зни тьмочи́сленных вра́г правосла́вныя ве́ры разруша́л еси́, Бо́гу поя́ победи́тельно: Аллилу́иа.

И́кос 3.

Име́я ве́ру несумне́нну и по́мысл чи́ст, вся́ кра́сная ми́ра сего́ презре́л еси́, Ти́хоне богоблаже́нне, и в чи́не святи́тельстем Го́сподеви неле́ностно послужи́л еси́. Те́мже бла́гостию укра́шенный и ве́дением свы́ше озаре́нный, а́ки звезда́ путево́дная све́тиши все́м, вопию́щим тебе́:

Ра́дуйся, Еди́наго Христа́ все́м се́рдцем возлюби́вый; ра́дуйся, дарова́нный тала́нт приумно́живый.

Ра́дуйся, я́ко угожда́л еси́ Бо́гу вся́ческим благоугожде́нием; ра́дуйся, вооруже́нный му́дростию, кро́тостию и смире́нием.

Ра́дуйся, пра́вды и и́стины пре́жде всего́ иска́вый; ра́дуйся, и́стину дерзнове́нно веща́вый.

Ра́дуйся, заточе́ние пра́вды ра́ди небоя́зненно претерпе́вый; ра́дуйся, смиренному́дрием вознесе́нный.

Ра́дуйся, ве́чную мзду́ доброде́тельми стяжа́вый; ра́дуйся, я́ко о́ными и противля́ющихся во́ле Бо́жией удивля́вый.

Ра́дуйся, о утвержде́нии па́ствы твоея́ при́сный хода́таю; ра́дуйся, те́плый к Бо́гу о на́с предста́телю.

Ра́дуйся, святи́телю Ти́хоне, Це́ркве Правосла́вныя похвало́ и утвержде́ние.

Конда́к 4.

Бу́рю вну́трь име́я помышле́ний су́етных, не возмо́жем, Ти́хоне всему́дре, вели́чие испове́дничества твоего́ пропове́дати, оба́че твои́ми моли́твами у Престо́ла Всевы́шняго в правове́рии и благоче́стии укрепля́еми, воспева́ем Ему́: Аллилу́иа.

И́кос 4.

Слы́шавше лю́дие о благопло́дных добро́тах души́ твоея́, богоно́сне Ти́хоне, жела́нием вожделе́ша тя́ ви́дети на престо́ле первосвяти́тельстем, а́бие свы́ше свиде́тельствован бы́л еси́ я́ко сосу́д Боже́ственнаго изволе́ния. Те́мже дивя́щеся чу́дному Бо́жию промышле́нию, прино́сим ти́ благохвале́ния сицева́я:

Ра́дуйся, первосвяти́телю, от Сама́го Го́спода проначерта́нный; ра́дуйся, му́жу жела́ний, пасти́ ста́до Христо́во избра́нный.

Ра́дуйся, Пастыренача́льника Иису́са Христа́ благоволе́ние; ра́дуйся, незы́блемости ве́чных христиа́нских и́стин подтвержде́ние.

Ра́дуйся, Апо́столом соприча́стниче; ра́дуйся, вели́ким святи́телем сопресто́льниче.

Ра́дуйся, я́ко первопресто́льником богому́дрым равноче́стен яви́лся еси́; ра́дуйся, я́ко прее́мником твои́м ве́рный путеводи́тель ко спасе́нию соде́лался еси́.

Ра́дуйся, ду́хови повину́вый плотска́я мудрова́ния; ра́дуйся, спаси́тельнаго Правосла́вия немо́лчное назида́ние.

Ра́дуйся, чуде́с приснотеку́щий исто́чниче; ра́дуйся, моли́твенниче наро́дный, ста́рче и люби́мче всея́ Руси́.

Ра́дуйся, святи́телю Ти́хоне, Це́ркве Правосла́вныя похвало́ и утвержде́ние.

Конда́к 5.

Боготе́чную звезду́ яви́ тя́ Госпо́дь, досточу́дне о́тче на́ш Ти́хоне; зане́ па́ству твою́ до́бре осия́л еси́ све́том Правосла́вия, пра́вы стези́ указу́я к Ца́рствию Христо́ву и науча́я при́сно взыва́ти к Бо́гу: Аллилу́иа.

И́кос 5.

Внегда́ поста́влен бы́л еси́ на све́щнице служе́ния первосвяти́тельскаго, всему́дре Ти́хоне, потща́лся вседу́шно Бо́гу благоугоди́ти и не вотще́ потруди́лся еси́, просвеща́я омраче́нныя страстьми́. Мы́ же, ве́дяще тя́ архипа́стыря богому́дра и строи́теля до́му Бо́жия ве́рна и предо́бра, похва́льная возсыла́ем ти́:

Ра́дуйся, у корми́ла правле́ния церко́внаго тве́рдо стоя́вый; ра́дуйся, све́т Христо́в ве́рным возсия́вый.

Ра́дуйся, ну́жды духо́вно окра́дуемых предваря́яй; ра́дуйся, в попече́нии о Це́ркви на вся́к де́нь умира́ние подъе́мляй.

Ра́дуйся, душетле́нному зве́рю ста́до твое́ расхища́ти не попусти́вый; ра́дуйся, Це́рковь, в гоне́ниях су́щую, ве́рную Христу́ сохрани́вый.

Ра́дуйся, я́ко тобо́ю сете́й мироде́ржца избавля́емся; ра́дуйся, я́ко тобо́ю ре́вности по Бо́зе исполня́емся.

Ра́дуйся, я́ко красе́н яви́лся еси́ богосло́вием и благи́ми дея́ньми; ра́дуйся, я́ко ме́рзкаго неи́стовства потреби́л еси́ мудрова́ние.

Ра́дуйся, я́ко пресе́кл еси́ пре́лести гное́ние; ра́дуйся, наро́ду правосла́вному похвале́ние.

Ра́дуйся, святи́телю Ти́хоне, Це́ркве Правосла́вныя похвало́ и утвержде́ние.

Конда́к 6.

Пропове́дник благоче́стия вои́стину яви́лся еси́, де́лателю непосты́дный и пра́во пра́вящий сло́во и́стины, священнонача́льниче Ти́хоне, я́ко до́брый во́ин Христо́в огражда́я па́ству твою́ в годи́ну сме́ртных искуше́ний и подвиза́я взыва́ти И́стинному Бо́гу: Аллилу́иа.

И́кос 6.

Возсия́л еси́ в первопресто́льней я́ко звезда́ лучеза́рная, блиста́нием уче́ний твои́х и испове́дничества озаря́я ду́ши ве́рных и разгоня́я тьму́ нече́стия. И ны́не плоды́ се́яния твоего́ насыща́еши вся́, я́же со удивле́нием и любо́вию взыва́ют к тебе́:

Ра́дуйся, на престо́л первосвяти́тельский Про́мыслом Бо́жиим возше́дый; ра́дуйся, кре́стный пу́ть с па́ствою свое́ю проше́дый.

Ра́дуйся, я́ко жезло́м благоволе́ния ста́до Христо́во па́сл еси́; ра́дуйся, я́ко ове́ц заблу́ждших и обрече́нных на закла́ние не оста́вил еси́.

Ра́дуйся, поте́рянную о́вцу отыска́вый, угна́нную возврати́вый; ра́дуйся, пораже́нную перевяза́вый, больну́ю укрепи́вый.

Ра́дуйся, утолсте́вшее и бу́йное овча́ истреби́вый; ра́дуйся, богоме́рзких е́ресей воста́ние отрази́вый.

Ра́дуйся, от ра́спрей церко́вных мно́го скорбе́вый; ра́дуйся, непра́ведное лише́ние са́на и мона́шескаго зва́ния претерпе́вый.

Ра́дуйся, я́ко для наро́да ру́сскаго его́ драгоце́нное сокро́вище – Це́рковь и свято́е Правосла́вие – сохрани́вый; ра́дуйся, я́ко твои́ми труды́ и ны́не живе́м и дви́жими есмы́.

Ра́дуйся, святи́телю Ти́хоне, Це́ркве Правосла́вныя похвало́ и утвержде́ние.

Конда́к 7.

Жела́я невозбра́нно па́стырем до́брым бы́ти, ему́же су́ть о́вцы своя́, потща́лся еси́, богоно́сне Ти́хоне, на по́льзу ду́ш ста́да твоего́ все́м вся́ бы́ти, да вси́ взы́щут Еди́наго Бо́га. Мы́ же, упова́юще дости́гнути спасе́ния пресла́вным хода́тайством твои́м, со дерзнове́нием воспева́ем: Аллилу́иа.

И́кос 7.

Но́ваго и ди́внаго попечи́теля Це́ркве Росси́йския ве́мы тя́, святи́телю Ти́хоне, поне́же во испове́дании твое́м не устраши́лся еси́ челове́ческих преще́ний, и святооте́ческия заве́ты соблю́л еси́. Сего́ ра́ди и кре́пость духо́вную подаде́ ти́ Подвигополо́жник Христо́с; мы́ же недосто́йнии возно́сим ти́ сицева́я:

Ра́дуйся, самоотверже́ние всеце́лое показа́вый; ра́дуйся, спасе́ния мно́гих взыска́вый.

Ра́дуйся, я́ко волко́в хи́щных от па́ствы твоея́ отгна́л еси́; ра́дуйся, я́ко кова́рство и́х му́дро распозна́л еси́.

Ра́дуйся, над все́ми ко́знями сатани́нскими восторжествова́вый; ра́дуйся, всеору́жие благоче́стия подъя́вый.

Ра́дуйся, Про́мысла Бо́жия о лю́дех провозве́стниче; ра́дуйся, ди́вное нра́вов очисти́лище.

Ра́дуйся, сокро́вищ правосла́вныя ве́ры усе́рдный храни́телю; ра́дуйся, Бо́жия благоволе́ния к лю́дем исполни́телю.

Ра́дуйся, таи́нниче Бо́жий, еще́ на земли́ небе́сных бла́г вкуси́вый; ра́дуйся, свя́тость души́ твоея́ житие́м яви́вый.

Ра́дуйся, святи́телю Ти́хоне, Це́ркве Правосла́вныя похвало́ и утвержде́ние.

Конда́к 8.

Стра́нное и пресла́вное чу́до е́сть малове́рным и малоду́шным зре́ти, богоявле́нне Ти́хоне, ка́ко в лю́тых гоне́ниих престо́л первосвяти́тельский име́я, свяще́нную жи́знь стяжава́я, правосла́вную утверди́л еси́ ве́ру и прему́дростию твое́ю и слове́с благода́тию научи́л еси́ ста́до твое́ богоуго́дно воспева́ти: Аллилу́иа.

И́кос 8.

Ве́сь испо́лнь любве́ Христо́вы, Ти́хоне благосе́рде, па́ству свою́ не оста́вил еси́; я́ко А́нгел храни́тель ча́дом свои́м пребыва́еши, моли́твы Всевы́шнему о ни́х возсыла́я; сего́ ра́ди усе́рдно чте́м све́тлую па́мять твою́, благода́рственное хвале́ние воспева́я ти́:

Ра́дуйся, оби́лием любве́ твоея́ ми́р удиви́вый; ра́дуйся, в чи́не власти́теля кро́тость и мя́гкость яви́вый.

Ра́дуйся, сла́ву предо́браго и преблага́го влады́ки сниска́вый; ра́дуйся, све́т Ца́рства Небе́снаго на земли́ показа́вый.

Ра́дуйся, апо́стольских преда́ний ревни́телю; ра́дуйся, церко́вных кано́нов прему́дрый насади́телю.

Ра́дуйся, в святи́тельстем служе́нии свое́м тру́д и по́двиг, а не сла́ву и поче́т прозре́вый; ра́дуйся, и́стинно правове́рныя повеле́ния подава́вый.

Ра́дуйся, я́ко Боже́ственнаго свяще́нства пра́вило бы́л еси́; ра́дуйся, я́ко вели́кое воздая́ние первосвяти́тельства прия́л еси́.

Ра́дуйся, ка́меню драги́й, зе́млю Ру́сскую всю́ украша́яй; ра́дуйся, на славосло́вие Бо́жие на́с немощны́х созыва́яй.

Ра́дуйся, святи́телю Ти́хоне, Це́ркве Правосла́вныя похвало́ и утвержде́ние.

Конда́к 9.

По́двигом до́брым подвиза́лся еси́, всече́стне Ти́хоне, непреткнове́нно тече́ние ле́т соверши́л еси́: благосты́нною и боголюбе́зною душе́ю твое́ю к ве́чному животу́ пресели́лся еси́, иде́же с чи́нми небе́сными и собо́ром святы́х ку́пно пое́ши Бо́гу побе́дную пе́снь: Аллилу́иа.

И́кос 9.

Вити́и многовеща́ннии не возмо́гут по достоя́нию изрещи́ пречу́днаго прославле́ния па́мяти твоея́, богогла́се Ти́хоне; мы́ же к покая́нию тобо́ю подвига́еми и благосе́рдию твоему́ подража́ти хотя́ще, пе́сньми похва́льными тя́ ублажа́ем си́це:

Ра́дуйся, до́брый твоего́ ста́да наста́вниче и прави́телю; ра́дуйся, коле́блющихся в ве́ре тве́рдый огради́телю.

Ра́дуйся, свире́пство иму́щих вла́сть небоя́зненно претерпе́вый; ра́дуйся, ке́сарю то́кмо ке́сарево возда́вый.

Ра́дуйся, во сла́ву Царя́ ца́рствующих и Го́спода госпо́дствующих му́жественно во́инствовавый; ра́дуйся, спаси́тельная преда́ния на́м преда́вый.

Ра́дуйся, я́ко тобо́ю свято́е правосла́вие ре́вностно охраня́ется; ра́дуйся, я́ко тобо́ю вся́кий поры́в к небе́сному благословля́ется.

Ра́дуйся, во мра́це нече́стия пра́вую ве́ру утвержда́яй; ра́дуйся, гне́в Бо́жий на ми́лость к на́м гре́шным прелага́яй.

Ра́дуйся, вели́кими моско́вскими святи́тели вспомоществу́емый; ра́дуйся, покро́вом Пречи́стыя Богоро́дицы осеня́емый.

Ра́дуйся, святи́телю Ти́хоне, Це́ркве Правосла́вныя похвало́ и утвержде́ние.

Конда́к 10.

Спасти́ хотя́ Це́рковь Ру́сскую, пресла́вне о́тче на́ш Ти́хоне, скве́рная уче́ния беззако́нных анафема́тствовал еси́, богобо́рцем проти́вяся та́ко, я́ко убоя́шася тя́, вторы́м Ермоге́ном нарица́юще. Мы́ же, почита́юще всечестну́ю па́мять страда́ний твои́х, вопие́м просла́вльшему тя́ Бо́гу: Аллилу́иа.

И́кос 10.

Забра́ло незы́блемо и благонаде́жно Це́ркве яви́лся еси́, показу́я собо́ю му́жественнаго боре́ния о́браз и утвержда́я де́лы и словесы́ кре́пко стоя́ти за пра́вую ве́ру, священнонача́льниче Ти́хоне. И ны́не све́том твои́м тьма́ отгоня́ется и обнажа́ется плете́ние лука́ваго сове́та, боже́ственныя твоея́ му́дрости сия́ньми, да вси́ вопие́м ти́ си́це:

Ра́дуйся, я́ко обрета́тели злочести́вых ересе́й посра́млены показа́л еси́; ра́дуйся, я́ко нра́в де́рзкаго безбо́жия всенаро́дно облича́л еси́.

Ра́дуйся, новому́чеников росси́йских и су́щих в гоне́ниих за Це́рковь удобре́ние; ра́дуйся, я́ко и са́м прия́л еси́ за Христа́ заточе́ние.

Ра́дуйся, во́льным Христо́вым страда́нием подража́вый; ра́дуйся, страда́ния за Христа́ и Це́рковь Его́ ра́достию почита́вый.

Ра́дуйся, страда́нием испове́дание соверши́вый; ра́дуйся, на Бо́га Промысли́теля все́ упова́ние возложи́вый.

Ра́дуйся, я́ко облича́еши пре́лести сокрове́ния; ра́дуйся, я́ко ужаса́еши нечести́вых помышле́ния.

Ра́дуйся, пра́вую ве́ру чрез мно́ги по́двиги непрело́жно утверди́вый; ра́дуйся, благочести́вую о́трасль труды́ твои́ми возрасти́вый.

Ра́дуйся, святи́телю Ти́хоне, Це́ркве Правосла́вныя похвало́ и утвержде́ние.

Конда́к 11.

Пе́ние умиле́нное прино́сим ти́, таи́нниче Христо́в, сия́еши бо ны́не на Небеси́, благоле́пия венце́м укра́шен, я́ко ве́рен святи́тель пра́вдою оде́ялся еси́ и в раи́ сла́дости лику́еши; о песносло́вящих тя́ Отца́ Небе́снаго приле́жно моли́, вопию́щих Ему́: Аллилу́иа.

И́кос 11.

Всеми́рнаго свети́льника яви́ тя́ Христо́с, богодухнове́нне о́тче на́ш Ти́хоне: ве́дый се́рдца твоего́ смире́ние, на престо́ле святи́тельстем тя́ посади́. Ты́ же благово́ния же́ртву всего́ себе́ Ему́ принося́, иере́й бы́л еси́ и же́ртва; сего́ ра́ди немо́лчными гла́сы глаго́лем ти́:

Ра́дуйся, све́тлостию жития́ возсия́вый; ра́дуйся, живо́т нестаре́ющийся досто́йно прия́вый.

Ра́дуйся, и́стины держа́вный побо́рниче; ра́дуйся, покая́ния рачи́тельный пропове́дниче.

Ра́дуйся, лжеучи́телей лука́вство разори́вый; ра́дуйся, малове́рных в правосла́вной ве́ре утверди́вый.

Ра́дуйся, за ве́ру правосла́вную и благоче́стие росси́йское заточе́ние от безбо́жных прия́вый; ра́дуйся, муче́ние за Христа́ благоду́шно претерпе́вый.

Ра́дуйся, я́ко си́лою Бо́жией в по́двизе непобеди́мь яви́лся еси́; ра́дуйся, я́ко хра́м всече́стен Бо́гу бы́л еси́.

Ра́дуйся, па́ствы твоея́ изря́дный душепопечи́телю; ра́дуйся, на по́мощь тя́ призыва́ющим ско́рый пособи́телю.

Ра́дуйся, святи́телю Ти́хоне, Це́ркве Правосла́вныя похвало́ и утвержде́ние.

Конда́к 12.

Благода́ть восхоте́в восприя́ти от Щедрода́теля Влады́ки все́х и Го́спода, пре́жде конца́ яви́лся еси́, всехва́льне о́тче Ти́хоне, ме́ртвенностию жизнено́сною ко греху́ оде́ян, Христа́ чти́ти науча́я богоприя́тне. То́й же дарова́нием чуде́с обогати́ тя́, освяти́ и просла́ви на Небеси́ и на земли́, науча́я о тебе́ воспева́ти: Аллилу́иа.

И́кос 12.

Пою́ще вене́ц испове́дничества, прия́тый тобо́ю, Ти́хоне досточу́дне, недоуме́ем, ка́ко вои́стину нарече́м тя́, и́бо тобо́ю в Тро́ице сла́вимый Бо́г на́ш сла́вно просла́вися. Сего́ ра́ди прино́сим ти́ похвале́ния сицева́я:

Ра́дуйся, тру́д крестоноше́ния богоуго́дно подъя́вый; ра́дуйся, то́кмо благоволе́ния, Бо́жия иска́вый.

Ра́дуйся, сосу́де, Ду́ха Свята́го испо́лненный; ра́дуйся, дара́ми Ду́ха Влады́чня обогаще́нный.

Ра́дуйся, ве́чное прие́мый от Бо́га благослове́ние; ра́дуйся, лю́дем твои́м испроси́вый Бо́жие благоволе́ние.

Ра́дуйся, многоцеле́бныя мо́щи твоя́ во огни́ яви́вый; ра́дуйся, си́ми хра́м от огня́ сохрани́вый.

Ра́дуйся, сла́вы Бо́жия ве́лий ревни́телю; ра́дуйся, моли́тв на́ших ско́рый исполни́телю.

Ра́дуйся, па́ствы твоея́ при́сное ра́дование; ра́дуйся, во все́м житии́ твое́м Правосла́вия путевождю́.

Ра́дуйся, святи́телю Ти́хоне, Це́ркве Правосла́вныя похвало́ и утвержде́ние.

Конда́к 13.

О па́стырю на́ш предо́брый, святы́й патриа́рше Ти́хоне, приими́ сие́ ма́лое тебе́ хвале́ние и моли́ венча́вшаго тя́ сла́вою Го́спода си́л, да возроди́т Росси́ю во Христе́; да да́рует ми́р жи́тельству на́шему и Це́ркве святе́й Свое́й, огражда́я ю́ от все́х душепа́губных и безбо́жных ве́яний; да обрати́т в любо́вь к Себе́ и бли́жнему се́рдца все́х челове́к; да да́рует позна́ти Себе́ Ду́хом Святы́м Свои́м ве́лию мно́жеству сооте́чественников на́ших, ве́ре не науче́нных и от ве́ры отвраще́нных; да сподо́бимся ны́не и при́сно и во ве́ки веко́в еди́нем се́рдцем и еди́неми усты́ воспева́ти Ему́: Аллилу́иа.

Этот конда́к чита́ется три́жды, зате́м 1-й и́кос и 1-й конда́к.

Моли́тва.

О па́стырю на́ш до́брый, святы́й вели́кий патриа́рше Ти́хоне, я́ко гра́д го́рний, ты́ яви́лся еси́, до́брая дела́ твоя́ и доны́не све́тятся пред челове́ки. Ве́мы, я́ко ты́, предстоя́ Престо́лу Пресвяты́я Тро́ицы, ве́лие и́маши дерзнове́ние в моли́твах пред Го́сподем. Воззри́ и ны́не на на́с гре́шных и недосто́йных ча́д твои́х, к тебе́ бо, я́ко иму́щему ве́лие дерзнове́ние пред Творце́м вся́ческих, ны́не припа́даем и усе́рдно мо́лимся: умоли́ Го́спода, да пода́ст на́м реши́мость стяжа́ти благоче́стие отце́в на́ших, его́же ты́ стяжа́л еси́ от ю́ности твоея́. Ты́ в житии́ свое́м ре́вностный защи́титель и храни́тель и́стинныя ве́ры бы́л еси́, помози́ и на́м незы́блему соблюсти́ ве́ру правосла́вную. Ти́хая бо душа́ твоя́ зело́ преуспе́ла в боже́ственном смиренному́дрии, научи́ и на́с ра́зум на́ш пита́ти не многомяте́жною му́дростию челове́ческою, но смире́нным позна́нием во́ли Бо́жией. Ты́ пред лице́м лю́тых враго́в Христо́вых И́стиннаго Бо́га дерзнове́нно испове́дал еси́, моли́твою свое́ю укрепи́ на́с, малоду́шных, да и мы́ всегда́ и всю́ду противоста́нем ду́ху безбо́жия и льсти́. Е́й, уго́дниче Бо́жий, не пре́зри на́с, моля́щихся тебе́, и́бо не то́кмо от бе́д и скорбе́й избавле́ние про́сим, но си́лы и тве́рдости, великоду́шия и любве́ про́сим, дабы́ переноси́ти о́ныя напа́сти, возстаю́щия на ны́. Испроси́ на́м неосла́бное терпе́ние да́же до конца́ жития́ на́шего, ми́р с Го́сподом и грехо́в отпуще́ние. О́тче святы́й! Укроти́ в стране́ на́шей ве́тры неве́рия и сму́ты, да водвори́т Госпо́дь на земли́ Росси́йстей тишину́ и благоче́стие и любо́вь нелицеме́рную, моли́твами твои́ми да сохрани́т ю́ от междоусо́бныя бра́ни, да укрепи́т святу́ю Це́рковь на́шу Правосла́вную, да не оскуде́ет она́ и́стинными па́стырями, до́брыми де́лательми, пра́во пра́вящими сло́во ева́нгельския и́стины. Упаси́ и заблу́ждшия о́вцы ста́да Христо́ва. Наипа́че же моли́ Го́спода си́л, да возроди́тся Ру́сская земля́ святы́м покая́нием и еди́ным се́рдцем и еди́ными усты́ просла́вит ди́внаго во святы́х Свои́х Бо́га, в Тро́ице сла́вимаго Отца́ и Сы́на и Свята́го Ду́ха во ве́ки веко́в. Ами́нь.

А҆ка́ѳїстъ ст҃и́телю тѵ́хѡнꙋ, патрїа́рхꙋ моско́вскомꙋ и҆ всеѧ̀ рѡссі́и чꙋдотво́рцꙋ.

Конда́къ а҃.

И҆збра́нный а҆рхїере́ю, преди́вный ᲂу҆го́дниче и҆ и҆сповѣ́дниче хрⷭ҇то́въ, рꙋ́сскїѧ цр҃кве крѣ́пкое ѡ҆гражде́нїе, ѻ҆те́чествꙋ на́шемꙋ хода́таю и҆ застꙋ́пниче, прославлѧ́юще просла́вльшагѡ тѧ̀ гдⷭ҇а, дарова́вшагѡ на́мъ въ тебѣ̀ но́вагѡ и҆ вели́кагѡ предста́телѧ, похва́льное пѣ́нїе восписꙋ́емъ тѝ: ты́ же и҆мѣ́ѧй ве́лїе дерзнове́нїе ко влⷣцѣ нб҃сѐ и҆ землѝ, ѿ всѧ́кихъ на́съ бѣ́дъ свободѝ зовꙋ́щихъ:

Ра́дꙋйсѧ, ст҃и́телю тѵ́хѡне, цр҃кве правосла́вныѧ похвало̀ и҆ ᲂу҆твержде́нїе.

І҆́косъ а҃.

А҆́гг҃лѡвъ творе́цъ и҆ гдⷭ҇ь въ бꙋренѡ́сныѧ днѝ мѧте́жа и҆ нестрое́нїѧ ве́лїѧ, восхотѣ́въ лю́демъ стра́ждꙋщимъ ᲂу҆тѣше́нїе дарова́ти, ꙗ҆вѝ тѧ̀, патрїа́рше прети́хїй и҆ предо́брый, ꙗ҆́кѡ свѣти́ло свѣтоза́рное, свѣ́томъ трисїѧ́ннагѡ бжⷭ҇тва̀ ѡ҆зарѧ́ющее дꙋ́ши вѣ́рныхъ, да и҆ ны́нѣ грѧдꙋ́тъ по тебѣ̀ всѝ жела́ющїи со хрⷭ҇то́мъ бы́ти, сегѡ̀ ра́ди во ᲂу҆миле́нїи вопїе́мъ тѝ:

Ра́дꙋйсѧ, ѿ жре́бїѧ патрїа́ршества а҆́ки ѿ мона́шескагѡ послꙋша́нїѧ не ᲂу҆клони́выйсѧ. Ра́дꙋйсѧ, ре́вностномꙋ и҆сполне́нїю бжⷭ҇твенныхъ хотѣ́нїй наꙋчи́выйсѧ. Ра́дꙋйсѧ, на престо́лъ патрїа́ршїй, двѣ́стѣ лѣ́тъ пꙋстова́вый, въ де́нь введе́нїѧ во хра́мъ прест҃ы́ѧ бцⷣы возше́дый. Ра́дꙋйсѧ, въ де́нь бл҃говѣ́щенїѧ со престо́ла первост҃и́тельскагѡ ко прⷭ҇то́лꙋ прест҃ы́ѧ трⷪ҇цы преше́дый. Ра́дꙋйсѧ, первост҃и́тельствомъ и҆ и҆сповѣ́дничествомъ ᲂу҆кра́шенный. Ра́дꙋйсѧ, длѧ бг҃а жи́вый и҆ бг҃омъ просвѣтле́нный. Ра́дꙋйсѧ, ꙗ҆́кѡ по́двигомъ свои́мъ патрїа́ршество непрело́жнѡ ᲂу҆тверди́вый. Ра́дꙋйсѧ, ѻ҆́бразъ па́стырѧ до́брагѡ собо́ю ꙗ҆ви́вый. Ра́дꙋйсѧ, донскі́ѧ ѻ҆би́тели сꙋгꙋ́бое прославле́нїе. Ра́дꙋйсѧ, правосла́вныѧ цр҃кве во а҆ме́рицѣ ᲂу҆твержде́нїе. Ра́дꙋйсѧ, рѡссі́йскїѧ па́ствы бг҃ови́дное наслѣ́дїе. Ра́дꙋйсѧ, бг҃оначерта́нный сви́токъ пра́выѧ вѣ́ры.

Ра́дꙋйсѧ, ст҃и́телю тѵ́хѡне, цр҃кве правосла́вныѧ похвало̀ и҆ ᲂу҆твержде́нїе.

Конда́къ в҃.

Ви́дѧ лю́ди рѡссі́йстїи ѡ҆ попра́нїи ст҃ы́нь правосла́вныхъ ѕѣлѡ̀ скорбѧ́щыѧ и҆ стра́хомъ ѡ҆б̾ѧ̑тыѧ, ᲂу҆пова́нїемъ полага́лъ є҆сѝ вѣ̑рнымъ живо́тъ вѣ́чный, а҆ не сме́рть и҆мѣ́ти: тѣ́мже свѣ́томъ бг҃оразꙋ́мїѧ твоегѡ̀, тѵ́хѡне бл҃госе́рде, и҆ на́съ ѡ҆зарѝ, да кꙋ́пнѡ съ тобо́ю вопїе́мъ творцꙋ̀ всѧ́ческихъ: А҆ллилꙋ́їа.

І҆́косъ в҃.

Ра́зꙋмъ бг҃опросвѣще́нъ и҆мѣ́ѧ, бг҃омꙋ́дре тѵ́хѡне, ѿве́рглъ є҆сѝ всѧ́ческое пло́ти мꙋдрова́нїе, съ ра́зꙋмомъ же и҆ во́лю повинꙋ́лъ є҆сѝ гдⷭ҇еви, тѣ́мже сосꙋ́дъ чи́стъ и҆ селе́нїе дх҃а и҆́стины ꙗ҆ви́лсѧ є҆сѝ. Сегѡ̀ ра́ди ꙗ҆́кѡ бг҃омꙋ́драгѡ наста́вника тѧ̀ ᲂу҆бл҃жа́юще, воспѣва́емъ:

Ра́дꙋйсѧ, ѿ лѣ́тъ ю҆́ношескихъ патрїа́рхъ прозва́нный. Ра́дꙋйсѧ, дѣ́лателю вїногра́да хрⷭ҇то́ва и҆збра́нный. Ра́дꙋйсѧ, ꙗ҆́кѡ бл҃госты́ннымъ ст҃и́тельствомъ ᲂу҆твержде́нїю правосла́вїѧ во а҆ме́рицѣ споспѣшествова́лъ є҆сѝ. Ра́дꙋйсѧ, ꙗ҆́кѡ всегда̀ къ высотѣ̀ добродѣ́телей пасо́мыхъ тобо́ю ве́лъ є҆сѝ. Ра́дꙋйсѧ, ста́до, тебѣ̀ ѿ хрⷭ҇та̀ врꙋче́нное, во сп҃се́нїе наста́вивый. Ра́дꙋйсѧ, и҆ са́мъ вседꙋ́шнѡ црⷭ҇твїѧ го́рнѧгѡ вожделѣ́вый. Ра́дꙋйсѧ, премꙋ́дрости бж҃їей созерца́телю и҆ проповѣ́дниче. Ра́дꙋйсѧ, ра́зꙋма а҆пⷭ҇льскїѧ цр҃кве храни́телю. Ра́дꙋйсѧ, златоꙋ́стый бл҃говѣ́стниче правосла́вныѧ пра́вды. Ра́дꙋйсѧ, небоѧ́зненный ѻ҆бличи́телю сꙋемꙋ́дрїѧ и҆ непра́вды. Ра́дꙋйсѧ, пра́ведности ди́вное бл҃гоꙋха́нїе. Ра́дꙋйсѧ, не посрамлѧ́ѧй на́шегѡ ᲂу҆пова́нїѧ.

Ра́дꙋйсѧ, ст҃и́телю тѵ́хѡне, цр҃кве правосла́вныѧ похвало̀ и҆ ᲂу҆твержде́нїе.

Конда́къ г҃.

Си́ла вы́шнѧгѡ ꙗ҆́вѣ показа̀ тѧ̀, сщ҃еннопроповѣ́дниче тѵ́хѡне, въ трꙋдѣ́хъ крестоноше́нїѧ сꙋ́ща, є҆гда̀ всеѻрꙋ́жїемъ бж҃їѧ бл҃года́ти кѡ́зни тьмочи́сленныхъ вра̑гъ правосла́вныѧ вѣ́ры разрꙋша́лъ є҆сѝ, бг҃ꙋ поѧ̀ побѣди́тельнѡ: А҆ллилꙋ́їа.

І҆́косъ г҃.

И҆мѣ́ѧ вѣ́рꙋ несꙋмнѣ́ннꙋ и҆ по́мыслъ чи́стъ, всѧ̑ кра̑снаѧ мі́ра сегѡ̀ презрѣ́лъ є҆сѝ, тѵ́хѡне бг҃обл҃же́нне, и҆ въ чи́нѣ ст҃и́тельстѣмъ гдⷭ҇еви нелѣ́ностнѡ послꙋжи́лъ є҆сѝ. Тѣ́мже бл҃гостїю ᲂу҆кра́шенный и҆ вѣ́дѣнїемъ свы́ше ѡ҆заре́нный, а҆́ки ѕвѣзда̀ пꙋтево́днаѧ свѣ́тиши всѣ̑мъ, вопїю́щымъ тебѣ̀:

Ра́дꙋйсѧ, є҆ди́наго хрⷭ҇та̀ всѣ́мъ се́рдцемъ возлюби́вый. Ра́дꙋйсѧ, дарова́нный тала́нтъ прїꙋмно́живый. Ра́дꙋйсѧ, ꙗ҆́кѡ ᲂу҆гожда́лъ є҆сѝ бг҃ꙋ всѧ́чєскимъ бл҃гоꙋгожде́нїемъ. Ра́дꙋйсѧ, воѻрꙋже́нный мꙋ́дростїю, кро́тостїю и҆ смире́нїемъ. Ра́дꙋйсѧ, пра́вды и҆ и҆́стины пре́жде всегѡ̀ и҆ска́вый. Ра́дꙋйсѧ, и҆́стинꙋ дерзнове́ннѡ вѣща́вый. Ра́дꙋйсѧ, заточе́нїе пра́вды ра́ди небоѧ́зненнѡ претерпѣ́вый. Ра́дꙋйсѧ, смиренномꙋ́дрїемъ вознесе́нный. Ра́дꙋйсѧ, вѣ́чнꙋю мздꙋ̀ добродѣ́тельми стѧжа́вый. Ра́дꙋйсѧ, ꙗ҆́кѡ ѻ҆́ными и҆ противлѧ́ющихсѧ во́лѣ бж҃їей ᲂу҆дивлѧ́вый. Ра́дꙋйсѧ, ѡ҆ ᲂу҆твержде́нїи па́ствы твоеѧ̀ при́сный хода́таю. Ра́дꙋйсѧ, те́плый къ бг҃ꙋ ѡ҆ на́съ предста́телю.

Ра́дꙋйсѧ, ст҃и́телю тѵ́хѡне, цр҃кве правосла́вныѧ похвало̀ и҆ ᲂу҆твержде́нїе.

Конда́къ д҃.

Бꙋ́рю внꙋ́трь и҆мѣ́ѧ помышле́нїй сꙋ́етныхъ не возмо́жемъ, тѵ́хѡне всемꙋ́дре, вели́чїе и҆сповѣ́дничества твоегѡ̀ проповѣ́дати, ѻ҆ба́че твои́ми мл҃твами ᲂу҆ прⷭ҇то́ла всевы́шнѧгѡ въ правовѣ́рїи и҆ бл҃гоче́стїи ᲂу҆крѣплѧ́еми, воспѣва́емъ є҆мꙋ̀: А҆ллилꙋ́їа.

І҆́косъ д҃.

Слы́шавше лю́дїе ѡ҆ бл҃гопло́дныхъ добро́тахъ дꙋшѝ твоеѧ̀, бг҃оно́сне тѵ́хѡне, жела́нїемъ вожделѣ́ша тѧ̀ ви́дѣти на прⷭ҇то́лѣ первост҃и́тельстѣмъ, а҆́бїе свы́ше свидѣ́тельствованъ бы́лъ є҆сѝ ꙗ҆́кѡ сосꙋ́дъ бжⷭ҇твеннагѡ и҆зволе́нїѧ. Тѣ́мже дивѧ́щесѧ чꙋ́дномꙋ бж҃їю промышле́нїю, прино́симъ тѝ бл҃гохвалє́нїѧ сицєва́ѧ:

Ра́дꙋйсѧ, первост҃и́телю, ѿ самагѡ̀ гдⷭ҇а проначерта́нный. Ра́дꙋйсѧ, мꙋ́жꙋ жела́нїй, пастѝ ста́до хрⷭ҇то́во и҆збра́нный. Ра́дꙋйсѧ, пастыренача́льника і҆и҃са хрⷭ҇та̀ бл҃говоле́нїе. Ра́дꙋйсѧ, незы́блемости вѣ́чныхъ хрⷭ҇тїа́нскихъ и҆́стинъ подтвержде́нїе. Ра́дꙋйсѧ, а҆пⷭ҇лѡмъ соприча́стниче. Ра́дꙋйсѧ, вели̑кимъ ст҃и́телємъ сопресто́льниче. Ра́дꙋйсѧ, ꙗ҆́кѡ первопресто́льникомъ бг҃омꙋ́дрымъ равноче́стенъ ꙗ҆ви́лсѧ є҆сѝ. Ра́дꙋйсѧ, ꙗ҆́кѡ прее́мникѡмъ твои̑мъ вѣ́рный пꙋтеводи́тель ко сп҃се́нїю содѣ́лалсѧ є҆сѝ. Ра́дꙋйсѧ, дꙋ́хови повинꙋ́вый плотска̑ѧ мꙋдрѡва́нїѧ. Ра́дꙋйсѧ, сп҃си́тельнагѡ правосла́вїѧ немо́лчное назида́нїе. Ра́дꙋйсѧ, чꙋде́съ приснотекꙋ́щїй и҆сто́чниче. Ра́дꙋйсѧ, мл҃твенниче наро́дный, ста́рче и҆ люби́мче всеѧ̀ рꙋсѝ.

Ра́дꙋйсѧ, ст҃и́телю тѵ́хѡне, цр҃кве правосла́вныѧ похвало̀ и҆ ᲂу҆твержде́нїе.

Конда́къ є҃.

Бг҃оте́чнꙋю ѕвѣздꙋ̀ ꙗ҆вѝ тѧ̀ гдⷭ҇ь, досточꙋ́дне ѻ҆́тче на́шъ тѵ́хѡне: занѐ па́ствꙋ твою̀ до́брѣ ѡ҆сїѧ́лъ є҆сѝ свѣ́томъ правосла́вїѧ, пра̑вы стези̑ ᲂу҆казꙋ́ѧ къ црⷭ҇твїю хрⷭ҇то́вꙋ и҆ наꙋча́ѧ при́снѡ взыва́ти къ бг҃ꙋ: А҆ллилꙋ́їа.

І҆́косъ є҃.

Внегда̀ поста́вленъ бы́лъ є҆сѝ на свѣ́щницѣ слꙋже́нїѧ первост҃и́тельскагѡ, всемꙋ́дре тѵ́хѡне, потща́лсѧ вседꙋ́шнѡ бг҃ꙋ бл҃гоꙋгоди́ти и҆ не вотщѐ потрꙋди́лсѧ є҆сѝ, просвѣща́ѧ ѡ҆мрачє́нныѧ страстьмѝ. Мы́ же, вѣ́дѧще тѧ̀ а҆рхїпа́стырѧ бг҃омꙋ́дра и҆ строи́телѧ до́мꙋ бж҃їѧ вѣ́рна и҆ предо́бра, похва̑льнаѧ возсыла́емъ тѝ:

Ра́дꙋйсѧ, ᲂу҆ корми́ла правле́нїѧ цр҃ко́внагѡ тве́рдѡ стоѧ́вый. Ра́дꙋйсѧ, свѣ́тъ хрⷭ҇то́въ вѣ̑рнымъ возсїѧ́вый. Ра́дꙋйсѧ, нꙋ́жды дꙋхо́внѡ ѡ҆крадꙋ́емыхъ предварѧ́ѧй. Ра́дꙋйсѧ, въ попече́нїи ѡ҆ цр҃кви на всѧ́къ де́нь ᲂу҆мира́нїе под̾е́млѧй. Ра́дꙋйсѧ, дꙋшетлѣ́нномꙋ ѕвѣ́рю ста́до твоѐ расхища́ти не попꙋсти́вый. Ра́дꙋйсѧ, цр҃ковь, въ гоне́нїихъ сꙋ́щꙋю, вѣ́рнꙋю хрⷭ҇тꙋ̀ сохрани́вый. Ра́дꙋйсѧ, ꙗ҆́кѡ тобо́ю мїроде́ржца и҆збавлѧ́емсѧ. Ра́дꙋйсѧ, ꙗ҆́кѡ тобо́ю ре́вности по бз҃ѣ и҆сполнѧ́емсѧ. Ра́дꙋйсѧ, ꙗ҆́кѡ кра́сенъ ꙗ҆ви́лсѧ є҆сѝ бг҃осло́вїемъ и҆ бл҃ги́ми дѣѧ́ньми. Ра́дꙋйсѧ, ꙗ҆́кѡ ме́рзкагѡ неи́стовства потреби́лъ є҆сѝ мꙋдрова́нїе. Ра́дꙋйсѧ, ꙗ҆́кѡ пресѣ́клъ є҆сѝ пре́лести гное́нїе. Ра́дꙋйсѧ, наро́дꙋ правосла́вномꙋ похвале́нїе.

Ра́дꙋйсѧ, ст҃и́телю тѵ́хѡне, цр҃кве правосла́вныѧ похвало̀ и҆ ᲂу҆твержде́нїе.

Конда́къ ѕ҃

Проповѣ́дникъ бл҃гоче́стїѧ вои́стиннꙋ ꙗ҆ви́лсѧ є҆сѝ, дѣ́лателю непосты́дный и҆ пра́во пра́вѧщїй сло́во и҆́стины, сщ҃еннонача́льниче тѵ́хѡне, ꙗ҆́кѡ до́брый во́инъ хрⷭ҇то́въ ѡ҆гражда́ѧ па́ствꙋ твою̀ въ годи́нꙋ сме́ртныхъ и҆скꙋше́нїй и҆ подвиза́ѧ взыва́ти и҆́стинномꙋ бг҃ꙋ: А҆ллилꙋ́їа.

І҆́косъ ѕ҃

Возсїѧ́лъ є҆сѝ въ первопресто́льной ꙗ҆́кѡ ѕвѣзда̀ лꙋчеза́рнаѧ, блиста́нїемъ ᲂу҆че́нїй твои́хъ и҆ и҆сповѣ́дничества ѡ҆зарѧ́ѧ дꙋ́ши вѣ́рныхъ и҆ разгонѧ́ѧ тмꙋ̀ нече́стїѧ. И҆ ны́нѣ плоды̀ сѣ̑ѧнїѧ твоегѡ̀ насыща́еши всѧ̑, ꙗ҆́же со ᲂу҆дивле́нїемъ и҆ любо́вїю взыва́ютъ къ тебѣ̀:

Ра́дꙋйсѧ, на престо́лъ первост҃и́тельскїй про́мысломъ бж҃їимъ возше́дый. Ра́дꙋйсѧ, кре́стный пꙋ́ть съ па́ствою свое́ю проше́дый. Ра́дꙋйсѧ, ꙗ҆́кѡ жезло́мъ бл҃говоле́нїѧ ста́до хрⷭ҇то́во па́слъ є҆сѝ. Ра́дꙋйсѧ, ꙗ҆́кѡ ѻ҆ве́цъ заблꙋ́ждшихъ и҆ ѡ҆брече́нныхъ на закла́нїе не ѡ҆ста́вилъ є҆сѝ. Ра́дꙋйсѧ, поте́рѧннꙋю ѻ҆́вцꙋ ѿ̾иска́вый, ᲂу҆гна́ннꙋю возврати́вый. Ра́дꙋйсѧ, пораже́ннꙋю перевѧза́вый, больнꙋ́ю ᲂу҆крѣпи́вый. Ра́дꙋйсѧ, ᲂу҆толсте́вшее и҆ бꙋ́йное ѻ҆вча̀ и҆стреби́вый. Ра́дꙋйсѧ, бг҃оме́рзкихъ є҆ресе́й воста́нїе ѿрази́вый. Ра́дꙋйсѧ, ѿ ра́спрей церко́вныхъ мно́гѡ скорбѣ́вый. Ра́дꙋйсѧ, непра́ведное лише́нїе са́на и҆ мона́шескагѡ зва́нїѧ претерпѣ́вый. Ра́дꙋйсѧ, ꙗ҆́кѡ длѧ наро́да рꙋ́сскагѡ є҆гѡ̀ драгоцѣ́нное сокро́вище цр҃ковь и҆ ст҃о́е правосла́вїе сохрани́вый. Ра́дꙋйсѧ, ꙗ҆́кѡ твои́ми трꙋды̀ и҆ ны́нѣ живе́мъ и҆ дви́жими є҆смы̀.

Ра́дꙋйсѧ, ст҃и́телю тѵ́хѡне, цр҃кве правосла́вныѧ похвало̀ и҆ ᲂу҆твержде́нїе.

Конда́къ з҃.

Жела́ѧ невозбра́ннѡ па́стыремъ до́брымъ бы́ти, є҆мꙋ́же сꙋ́ть ѻ҆́вцы своѧ̑, потща́лсѧ є҆сѝ, бг҃оно́сне тѵ́хѡне, на по́льзꙋ дꙋ́шъ ста́да твоегѡ̀ всѣ̑мъ всѧ̑ бы́ти, да всѝ взы́щꙋтъ є҆ди́нагѡ бг҃а. Мы́ же, ᲂу҆пова́юще дости́гнꙋти сп҃се́нїѧ пресла́внымъ хода́тайствомъ твои́мъ, со дерзнове́нїемъ воспѣва́емъ: А҆ллилꙋ́їа.

І҆́косъ з҃.

Но́ваго и҆ ди́внаго попечи́телѧ цр҃кве рѡссі́йскїѧ вѣ́мы тѧ̀, ст҃и́телю тѵ́хѡне, поне́же во и҆сповѣ́данїи твое́мъ не ᲂу҆страши́лсѧ є҆сѝ чл҃вѣ́ческихъ преще́нїй, и҆ ст҃оѻте́чєскїѧ завѣ́ты соблю́лъ є҆сѝ. Сегѡ̀ ра́ди и҆ крѣ́пость дꙋхо́внꙋю подадѐ тѝ подвигополо́жникъ хрⷭ҇то́съ: мы́ же недосто́йнїи возно́симъ тѝ сицєва́ѧ:

Ра́дꙋйсѧ, самоѿверже́нїе всецѣ́лое показа́вый. Ра́дꙋйсѧ, сп҃се́нїѧ мно́гихъ взыска́вый. Ра́дꙋйсѧ, ꙗ҆́кѡ волкѡ́въ хи́щныхъ ѿ па́ствы твоеѧ̀ ѿгна́лъ є҆сѝ. Ра́дꙋйсѧ, ꙗ҆́кѡ кова́рство и҆̀хъ мꙋ́дрѡ распозна́лъ є҆сѝ. Ра́дꙋйсѧ, над̾ всѣ́ми ко́знѧми сатани́нскими восторжествова́вый. Ра́дꙋйсѧ, всеѻрꙋ́жїе бл҃гоче́стїѧ под̾ѧ́вый. Ра́дꙋйсѧ, про́мысла бж҃їѧ ѡ҆ лю́дехъ провозвѣ́стниче. Ра́дꙋйсѧ, ди́вное нра́вѡвъ ѡ҆чисти́лище. Ра́дꙋйсѧ, сокро́вищъ правосла́вныѧ вѣ́ры ᲂу҆се́рдный храни́телю. Ра́дꙋйсѧ, бж҃їѧ бл҃говоле́нїѧ къ лю́демъ и҆сполни́телю. Ра́дꙋйсѧ, таи́нниче бж҃їй, є҆щѐ на землѝ нбⷭ҇ныхъ бла́гъ вкꙋси́вый. Ра́дꙋйсѧ, ст҃ость дꙋшѝ твоеѧ̀ житїе́мъ ꙗ҆ви́вый.

Ра́дꙋйсѧ, ст҃и́телю тѵ́хѡне, цр҃кве правосла́вныѧ похвало̀ и҆ ᲂу҆твержде́нїе.

Конда́къ и҃

Стра́нное и҆ пресла́вное чꙋ́до є҆́сть маловѣ̑рнымъ и҆ малодꙋ́шнымъ зрѣ́ти, бг҃оѧвле́нне тѵ́хѡне, ка́кѡ въ лю́тыхъ гоне́нїихъ престо́лъ первост҃и́тельскїй и҆мѣ́ѧ, сщ҃е́ннꙋю жи́знь стѧжава́ѧ, правосла́внꙋю ᲂу҆тверди́лъ є҆сѝ вѣ́рꙋ и҆ премꙋ́дростїю твое́ю и҆ слове́съ бл҃года́тїю наꙋчи́лъ є҆сѝ ста́до твоѐ бг҃оꙋго́днѡ воспѣва́ти: А҆ллилꙋ́їа.

І҆́косъ и҃.

Ве́сь и҆спо́лнь любвѐ хрⷭ҇то́вы, тѵ́хѡне бл҃госе́рде, па́ствꙋ свою̀ не ѡ҆ста́вилъ є҆сѝ: ꙗ҆́кѡ а҆́гг҃лъ храни́тель ча́дѡмъ свои́мъ пребыва́еши, мл҃твы всевы́шнемꙋ ѡ҆ ни́хъ возсыла́ѧ: сегѡ̀ ра́ди ᲂу҆се́рднѡ чти́мъ свѣ́тлꙋю па́мѧть твою̀, бл҃года́рственное хвале́нїе воспѣва́ющи тѝ:

Ра́дꙋйсѧ, ѻ҆би́лїемъ любвѐ твоеѧ̀ мі́ръ ᲂу҆диви́вый. Ра́дꙋйсѧ, въ чи́нѣ власти́телѧ кро́тость и҆ снизхожде́нїе ꙗ҆ви́вый. Ра́дꙋйсѧ, сла́вꙋ предо́браго и҆ пребл҃га́гѡ влⷣки сниска́вый. Ра́дꙋйсѧ, свѣ́тъ црⷭ҇твїѧ нбⷭ҇нагѡ на землѝ показа́вый. Ра́дꙋйсѧ, а҆пⷭ҇льскихъ преда́нїй ревни́телю. Ра́дꙋйсѧ, цр҃ко́вныхъ канѡ́нѡвъ премꙋ́дрый насади́телю. Ра́дꙋйсѧ, въ ст҃и́тельстѣмъ слꙋже́нїи свое́мъ трꙋ́дъ и҆ по́двигъ, а҆ не сла́вꙋ и҆ поче́тъ прозрѣ́вый. Ра́дꙋйсѧ, и҆́стиннѡ правовѣ̑рныѧ повелѣ̑нїѧ пода́вый. Ра́дꙋйсѧ, ꙗ҆́кѡ бжⷭ҇твеннагѡ сщ҃е́нства пра́вило бы́лъ є҆сѝ. Ра́дꙋйсѧ, ꙗ҆́кѡ вели́кое воздаѧ́нїе первосвѧти́тельства прїѧ́лъ є҆сѝ. Ра́дꙋйсѧ, ка́меню драгі́й, зе́млю рꙋ́сскꙋю всю̀ ᲂу҆краша́ѧй. Ра́дꙋйсѧ, на славосло́вїе бж҃їе на́съ, немощны́хъ, созыва́ѧй.

Ра́дꙋйсѧ, ст҃и́телю тѵ́хѡне, цр҃кве правосла́вныѧ похвало̀ и҆ ᲂу҆твержде́нїе.

Конда́къ ѳ҃.

По́двигомъ до́брымъ подвиза́лсѧ є҆сѝ, всече́стне тѵ́хѡне, непреткнове́ннѡ тече́нїе лѣ́тъ соверши́лъ є҆сѝ: бл҃госты́нною и҆ бг҃олюбе́зною дꙋше́ю твое́ю къ вѣ́чномꙋ животꙋ̀ пресели́лсѧ є҆сѝ, и҆дѣ́же съ чи́нми нбⷭ҇ными и҆ собо́ромъ ст҃ы́хъ кꙋ́пнѡ пое́ши бг҃ꙋ побѣ́днꙋю пѣ́снь: А҆ллилꙋ́їа.

І҆́косъ ѳ҃.

Вѣті̑ѧ многовѣща̑нныѧ не возмо́гꙋтъ по достоѧ́нїю и҆зрещѝ пречꙋ́днагѡ прославле́нїѧ па́мѧти твоеѧ̀, бг҃огла́сне тѵ́хѡне: мы́ же, къ покаѧ́нїю тобо́ю подвига́еми и҆ бл҃госе́рдїю твоемꙋ̀ подража́ти хотѧ́ще, пѣ́сньми похва́льными тѧ̀ ᲂу҆бл҃жа́емъ си́це:

Ра́дꙋйсѧ, до́брый твоегѡ̀ ста́да наста́вниче и҆ прави́телю. Ра́дꙋйсѧ, коле́блющихсѧ въ вѣ́рѣ тве́рдый ѡ҆гради́телю. Ра́дꙋйсѧ, сверѣ́пство и҆мꙋ́щихъ вла́сть небоѧ́зненнѡ претерпѣ́вый. Ра́дꙋйсѧ, ке́сарю то́кмѡ ке́сарево возда́вый. Ра́дꙋйсѧ, сла́вꙋ цр҃ѧ̀ ца́рствꙋющихъ и҆ гдⷭ҇а госпо́дствꙋющихъ мꙋ́жественнѣ во́инствовавый. Ра́дꙋйсѧ, сп҃си́тєльнаѧ преда̑нїѧ на́мъ преда́вый. Ра́дꙋйсѧ, ꙗ҆́кѡ тобо́ю ст҃о́е правосла́вїе ре́вностнѡ ѡ҆хранѧ́етсѧ. Ра́дꙋйсѧ, ꙗ҆́кѡ тобо́ю всѧ́кїй поры́въ къ нбⷭ҇номꙋ бл҃гословлѧ́етсѧ. Ра́дꙋйсѧ, во мра́цѣ нече́стїѧ пра́вꙋю вѣ́рꙋ ᲂу҆твержда́ѧй. Ра́дꙋйсѧ, гнѣ́въ бж҃їй на ми́лость къ на́мъ грѣ́шнымъ прелага́ѧй. Ра́дꙋйсѧ, вели́кими москѡ́вскими ст҃и́тели вспомоществꙋ́емый. Ра́дꙋйсѧ, покро́вомъ пречⷭ҇тыѧ бцⷣы ѡ҆сѣнѧ́емый.

Ра́дꙋйсѧ, ст҃и́телю тѵ́хѡне, цр҃кве правосла́вныѧ похвало̀ и҆ ᲂу҆твержде́нїе.

Конда́къ і҃.

Спастѝ хотѧ̀ цр҃ковь рꙋ́сскꙋю, пресла́вне ѻ҆́тче на́шъ тѵ́хѡне, сквє́рнаѧ ᲂу҆чє́нїѧ беззако́нныхъ а҆наѳема́тствовалъ є҆сѝ, бг҃обо́рцємъ проти́вѧсѧ та́кѡ, ꙗ҆́кѡ ᲂу҆боѧ́шасѧ тѧ̀, втора́гѡ є҆рмоге́на. Мы́ же почита́юще всечестнꙋ́ю па́мѧть страда́нїй твои́хъ вопїе́мъ просла́вльшемꙋ тѧ̀ бг҃ꙋ: А҆ллилꙋ́їа.

І҆́косъ і҃.

Забра́ло незы́блемо и҆ бл҃гонаде́жнѡ цр҃кве ꙗ҆ви́лсѧ є҆сѝ, показꙋ́ѧ собо́ю мꙋ́жественнагѡ боре́нїѧ ѻ҆́бразъ и҆ ᲂу҆твержда́ѧ дѣ́лы и҆ словесы̀ крѣ́пкѡ стоѧ́ти за пра́вꙋю вѣ́рꙋ, свѧщенноглаго́льниче тѵ́хѡне. И҆ ны́нѣ свѣ́томъ твои́мъ тма̀ ѿгонѧ́етсѧ и҆ ѡ҆бнажа́етсѧ плете́нїе лꙋка́вагѡ совѣ́та, бжⷭ҇твенныѧ твоеѧ̀ мꙋ́дрости сїѧ́ньми, да всѝ вопїе́мъ тѝ си́це:

Ра́дꙋйсѧ, ꙗ҆́кѡ ѕлоче́стїѧ є҆ресенача́льника посрамлє́ны показа́лъ є҆сѝ. Ра́дꙋйсѧ, ꙗ҆́кѡ нра́въ де́рзкагѡ безбо́жїѧ всенаро́днѡ ѡ҆блича́лъ є҆сѝ. Ра́дꙋйсѧ, новомч҃никѡвъ рѡссі́йскихъ и҆ сꙋ́щихъ въ гоне́нїихъ за цр҃ковь ᲂу҆добре́нїе. Ра́дꙋйсѧ, ꙗ҆́кѡ и҆ са́мъ прїима́лъ є҆сѝ за хрⷭ҇та̀ заточе́нїе. Ра́дꙋйсѧ, во́льнымъ хрⷭ҇то́вымъ страда́нїємъ подража́вый. Ра́дꙋйсѧ, страда́нїѧ за хрⷭ҇та̀ и҆ цр҃ковь є҆гѡ̀ ра́достїю почита́вый. Ра́дꙋйсѧ, страда́нїемъ и҆сповѣ́данїе соверши́вый. Ра́дꙋйсѧ, на бг҃а промысли́телѧ всѐ ᲂу҆пова́нїе возложи́вый. Ра́дꙋйсѧ, ꙗ҆́кѡ ѡ҆блича́еши пре́лести сокровє́ннаѧ. Ра́дꙋйсѧ, ꙗ҆́кѡ ᲂу҆жаса́еши нечести́выхъ помышлє́нїѧ. Ра́дꙋйсѧ, пра́вꙋю вѣ́рꙋ чрез̾ мно́ги по́двиги непрело́жнѡ ᲂу҆тверди́вый. Ра́дꙋйсѧ, бл҃гочести́вꙋю ѿрасль трꙋды̀ твои́ми возрасти́вый.

Ра́дꙋйсѧ, ст҃и́телю тѵ́хѡне, цр҃кве правосла́вныѧ похвало̀ и҆ ᲂу҆твержде́нїе.

Конда́къ а҃і.

Пѣ́нїе ᲂу҆миле́нное прино́симъ тѝ, таи́нниче хрⷭ҇то́въ, сїѧ́еши бо ны́нѣ на нб҃сѝ бл҃голѣ́пїѧ вѣнце́мъ ᲂу҆кра́шенъ: ꙗ҆́кѡ вѣ́ренъ ст҃и́тель пра́вдою ѡ҆дѣ́ѧлсѧ є҆сѝ и҆ въ раѝ сла́дости ликꙋ́еши: ѡ҆ пѣсносло́вѧщихъ тѧ̀ ѻ҆ц҃а̀ нбⷭ҇наго прилѣ́жнѡ молѝ и҆ вопїю́щихъ є҆мꙋ̀: А҆ллилꙋ́їа.

І҆́косъ а҃і.

Всемі́рнаго свѣти́льника ꙗ҆вѝ тѧ̀ хрⷭ҇то́съ, бг҃одꙋхнове́нне ѻ҆́тче на́шъ тѵ́хѡне: вѣ́дый се́рдца твоегѡ̀ смире́нїе, на престо́лѣ ст҃и́тельстѣмъ тѧ̀ посадѝ. Ты́ же бл҃гово́нїѧ же́ртвꙋ всего̀ себѐ є҆мꙋ̀ приносѧ̀, і҆ере́й бы́лъ є҆сѝ и҆ же́ртва: сегѡ̀ ра́ди немо́лчными гла́сы глаго́лемъ тѝ:

Ра́дꙋйсѧ, свѣ́тлостїю житїѧ̀ возсїѧ́вый. Ра́дꙋйсѧ, живо́тъ нестарѣ́ющїйсѧ досто́йнѡ прїѧ́вый. Ра́дꙋйсѧ, и҆́стины держа́вный побо́рниче. Ра́дꙋйсѧ, покаѧ́нїѧ рачи́тельный проповѣ́дниче. Ра́дꙋйсѧ, лжеꙋчи́телей лꙋка́вство разори́вый. Ра́дꙋйсѧ, маловѣ́рныхъ въ правосла́вной вѣ́рѣ ᲂу҆тверди́вый. Ра́дꙋйсѧ, за вѣ́рꙋ правосла́внꙋю и҆ бл҃гоче́стїе рѡссі́йское заточе́нїе ѿ безбо́жныхъ прїѧ́вый. Ра́дꙋйсѧ, мꙋче́нїе за хрⷭ҇та̀ бл҃годꙋ́шнѡ претерпѣ́вый. Ра́дꙋйсѧ, ꙗ҆́кѡ си́лою бж҃їей въ по́двизѣ непобѣди́мъ ꙗ҆ви́лсѧ є҆сѝ. Ра́дꙋйсѧ, ꙗ҆́кѡ хра́мъ всече́стенъ бг҃ꙋ бы́лъ є҆сѝ. Ра́дꙋйсѧ, па́ствы твоеѧ̀ и҆зрѧ́дный дꙋшепопечи́телю. Ра́дꙋйсѧ, на по́мощь тѧ̀ призыва́ющимъ ско́рый пособи́телю.

Ра́дꙋйсѧ, ст҃и́телю тѵ́хѡне, цр҃кве правосла́вныѧ похвало̀ и҆ ᲂу҆твержде́нїе.

Конда́къ в҃і.

Бл҃года́ть восхотѣ́въ воспрїѧ́ти ѿ щедрода́телѧ влⷣки всѣ́хъ и҆ гдⷭ҇а, пре́жде конца̀ ꙗ҆ви́лсѧ є҆сѝ, всехва́льне ѻ҆́тче тѵ́хѡне, ме́ртвеннѡстїю жизнено́сною ко грѣхꙋ̀ ѡ҆дѣ́ѧнъ, хрⷭ҇та̀ чти́ти наꙋча́ѧ бг҃опрїѧ́тне. То́й же дарова́нїемъ чꙋде́съ ѡ҆богатѝ тѧ̀, ѡ҆свѧтѝ и҆ просла́ви на нб҃сѝ и҆ на землѝ, наꙋча́ѧ ѡ҆ тебѣ̀ воспѣва́ти: А҆ллилꙋ́їа.

І҆́косъ в҃і.

Пою́ще вѣне́цъ и҆сповѣ́дничества, прїе́мый тобо́ю, тѵ́хѡне досточꙋ́дне, недоꙋмѣ́емъ, ка́кѡ вои́стиннꙋ нарече́мъ тѧ̀, и҆́бо тобо́ю въ трⷪ҇цѣ сла́вимый бг҃ъ на́шъ сла́внѡ просла́висѧ. Сегѡ̀ ра́ди прино́симъ тѝ похвалє́нїѧ сицєва́ѧ:

Ра́дꙋйсѧ, трꙋ́дъ крестоноше́нїѧ бг҃оꙋго́днѡ под̾ѧ́вый. Ра́дꙋйсѧ, то́кмѡ бл҃говоле́нїѧ бж҃їѧ и҆ска́вый. Ра́дꙋйсѧ, сосꙋ́де, дх҃а ст҃а́гѡ и҆спо́лненный. Ра́дꙋйсѧ, дара́ми дх҃а влⷣчнѧ ѡ҆богаще́нный. Ра́дꙋйсѧ, вѣ́чное прїе́мый ѿ бг҃а бл҃гослове́нїе. Ра́дꙋйсѧ, лю́демъ твои́мъ и҆спроси́вый бж҃їе бл҃говоле́нїе. Ра́дꙋйсѧ, многоцѣлє́бныѧ мо́щи твоѧ̀ во ѻ҆гнѝ ꙗ҆ви́вый. Ра́дꙋйсѧ, си́ми хра́мъ ѿ ѻ҆гнѧ̀ сохрани́вый. Ра́дꙋйсѧ, сла́вы бж҃їѧ ве́лїй ревни́телю. Ра́дꙋйсѧ, мл҃твъ на́шихъ ско́рый и҆сполни́телю. Ра́дꙋйсѧ, па́ствы твоеѧ̀ при́сное ра́дованїе. Ра́дꙋйсѧ, во всѣ́мъ житїѝ твое́мъ правосла́вїѧ пꙋтевождю̀.

Ра́дꙋйсѧ, ст҃и́телю тѵ́хѡне, цр҃кве правосла́вныѧ похвало̀ и҆ ᲂу҆твержде́нїе.

Конда́къ г҃і.

Ѽ па́стырю на́шъ предо́брый, ст҃ы́й патрїа́рше тѵ́хѡне! Прїимѝ сїѐ ма́лое тебѣ̀ хвале́нїе и҆ молѝ вѣнча́вшагѡ тѧ̀ сла́вою гдⷭ҇а си́лъ, да возроди́тъ во хрⷭ҇тѣ̀ странꙋ̀ рѡссі́йскꙋю: да да́рꙋетъ ми́ръ жи́тельствꙋ на́шемꙋ и҆ цр҃кве ст҃ѣ́й свое́й, ѡ҆гражда́ѧ ю҆̀ ѿ всѣ́хъ дꙋшепа́гꙋбныхъ и҆ безбо́жныхъ вѣ́ѧнїй: да ѡ҆брати́тъ въ любо́вь къ себѣ̀ и҆ бли́жнемꙋ сердца̀ всѣ́хъ человѣ̑къ: да да́рꙋетъ позна́ти себѐ дх҃омъ ст҃ы́мъ свои́мъ ве́лїю мно́жествꙋ соѻте́чественникѡвъ на́шихъ, вѣ́рѣ не наꙋче́нныхъ и҆ ѿ вѣ́ры ѿвраще́нныхъ: да сподо́бимсѧ ны́нѣ и҆ при́снѡ и҆ во вѣ́ки вѣкѡ́въ є҆ди́нѣмъ се́рдцемъ и҆ є҆ди́нѣми ᲂу҆сты̀ воспѣва́ти є҆мꙋ̀: А҆ллилꙋ́їа.

Се́й конда́къ глаго́ли три́жды и҆ па́ки і҆́косъ а҃-й и҆ конда́къ а҃-й.

Моли́тва.

Ѽ, па́стырю на́шъ до́брый, ст҃ы́й вели́кїй патрїа́рше тѵ́хѡне, ꙗ҆́кѡ гра́дъ го́рнїй ты̀ ꙗ҆ви́лсѧ є҆сѝ, до́браѧ дѣла̀ твоѧ̀ и҆ доны́нѣ свѣ́тѧтсѧ пред̾ человѣ́ки. Вѣ́мы, ꙗ҆́кѡ ты̀, предстоѧ̀ прⷭ҇то́лꙋ прест҃ы́ѧ трⷪ҇цы, ве́лїе и҆́маши дерзнове́нїе въ мл҃твахъ пред̾ гдⷭ҇емъ. Воззрѝ и҆ ны́нѣ на на́съ грѣ́шныхъ и҆ недосто́йныхъ ча́дъ твои́хъ, къ тебѣ̀ бо ꙗ҆́кѡ и҆мꙋ́щемꙋ ве́лїе дерзнове́нїе пред̾ творце́мъ всѧ́ческихъ, ны́нѣ припа́даемъ и҆ ᲂу҆се́рднѡ мо́лимсѧ: ᲂу҆молѝ гдⷭ҇а, да пода́стъ на́мъ рѣши́мость стѧжа́ти бл҃гоче́стїе ѻ҆тцє́въ на́шихъ, є҆го́же ты̀ стѧжа́лъ є҆сѝ ѿ ю҆́ности твоеѧ̀. Ты̀ въ житїѝ свое́мъ ре́вностный защи́титель и҆ храни́тель и҆́стинныѧ вѣ́ры бы́лъ є҆сѝ, помозѝ и҆ на́мъ незы́блемꙋ соблюстѝ вѣ́рꙋ правосла́внꙋю. Ти́хаѧ бо дꙋша̀ твоѧ̀ ѕѣлѡ̀ преꙋспѣ́ла въ бжⷭ҇твеннѣмъ смиренномꙋ́дрїи, наꙋчѝ и҆ на́съ ра́зꙋмъ на́шъ пита́ти не многомѧте́жною мꙋ́дростїю чл҃вѣ́ческою, но смире́ннымъ позна́нїемъ во́ли бж҃їей. Ты̀ пред̾ лице́мъ лю́тыхъ врагѡ́въ хрⷭ҇то́выхъ и҆́стиннагѡ бг҃а дерзнове́ннѡ и҆сповѣ́далъ є҆сѝ, мл҃твою свое́ю ᲂу҆крѣпѝ на́съ, малодꙋ́шныхъ, да и҆ мы̀ всегда̀ и҆ всю́дꙋ противоста́немъ дꙋ́хꙋ безбо́жїѧ и҆ льстѝ.

Є҆́й, ᲂу҆го́дниче бж҃їй, не пре́зри на́съ, молѧ́щихсѧ тебѣ̀, и҆́бо не то́кмѡ ѿ бѣ́дъ и҆ ско́рбей и҆збавле́нїе про́симъ, но си́лы и҆ тве́рдости, великодꙋ́шїѧ и҆ любвѐ про́симъ, дабы̀ переноси́ти ѻ҆́ныѧ напа̑сти, возстаю́щыѧ на ны̀. И҆спросѝ на́мъ неѡсла́бное терпѣ́нїе да́же до конца̀ житїѧ̀ на́шегѡ, ми́ръ съ гдⷭ҇омъ и҆ грѣхѡ́въ ѿпꙋще́нїе.

Ѻ҆́тче ст҃ы́й. Оу҆кротѝ въ странѣ̀ на́шей вѣ́тры невѣ́рїѧ и҆ смꙋ́ты, да водвори́тъ гдⷭ҇ь на землѝ рѡссі́йстѣй тишинꙋ̀ и҆ бл҃гоче́стїе и҆ любо́вь нелицемѣ́рнꙋю. Мл҃твами твои́ми да сохрани́тъ ю҆̀ ѿ междоꙋсѡ́бныѧ бра́ни, да ᲂу҆крѣпи́тъ ст҃ꙋ́ю цр҃ковь на́шꙋ правосла́внꙋю, да не ѡ҆скꙋдѣ́етъ ѻ҆на̀ и҆́стинными па́стырѧми, до́брыми дѣ́латели, пра́вѡ правѧ́щими сло́во є҆ѵⷢ҇льскїѧ и҆́стины. Оу҆пасѝ и҆ заблꙋ́ждшїѧ ѻ҆́вцы ста́да хрⷭ҇то́ва. Наипа́че же молѝ гдⷭ҇а си́лъ, да возроди́тсѧ рꙋ́сскаѧ землѧ̀ ст҃ы́мъ покаѧ́нїемъ и҆ є҆ди́нымъ се́рдцемъ и҆ є҆ди́ными ᲂу҆сты̀ просла́витъ ди́внагѡ во ст҃ы́хъ свои́хъ бг҃а въ трⷪ҇цѣ сла́вимагѡ ѻ҆ц҃а̀ и҆ сн҃а и҆ ст҃а́гѡ дх҃а во вѣ́ки вѣкѡ́въ. А҆ми́нь.