Конда́к 1.

Избра́нный от Царя́ си́л Го́спода Иису́са Христа́, кре́пкий победи́тель враго́в неви́димых показа́лся еси́, преди́вне Алекси́е. Во смире́нии мно́гия труды́ и по́двиги подъя́л еси́, и сего́ ра́ди ве́лие дерзнове́ние пред Бо́гом стяжа́в, неду́гов душе́вных и теле́сных цели́тель яви́лся еси́; и ны́не Престо́лу Святы́я Тро́ицы в весе́лии предстоя́, от вся́ких на́с бе́д свободи́, зову́щих:

Ра́дуйся, пра́ведне Алекси́е, преди́вный чудотво́рче.

И́кос 1.

А́нгельскими доброде́тельми укра́шенный, небожи́телем еще́ на земли́ уподо́бился еси́, и я́ко звезда́ пресве́тлая в земли́ Росси́йстей просия́л еси́. Те́мже смире́нное житие́ твое́ воспомина́юще и вели́чию по́двига твоего́ дивя́щеся, глаго́лем ти́ сицева́я:

Ра́дуйся, пресла́вный избра́нниче Бо́жий; ра́дуйся, подви́жниче преизря́дный.

Ра́дуйся, все́ю душе́ю Го́спода возлюби́вый; ра́дуйся, любо́вию ко Христу́ пе́щь страсте́й угаси́вый.

Ра́дуйся, покая́нием плотски́я собла́зны отри́нувый; ра́дуйся, непреста́нно в се́рдце Бо́га сла́вивый.

Ра́дуйся, о́бразе кро́тости и смире́ния; ра́дуйся, усе́рдный ревни́телю поста́ и воздержа́ния.

Ра́дуйся, ми́ра духо́внаго умиле́нный тайнозри́телю; ра́дуйся, жития́ доброде́тельнаго учи́телю.

Ра́дуйся, посыла́яй на́м от Го́спода пречу́дное поможе́ние; ра́дуйся, в печа́лех су́щим да́руяй ско́рое утеше́ние.

Ра́дуйся, пра́ведне Алекси́е, преди́вный чудотво́рче.

Конда́к 2.

Ви́дев Госпо́дь, я́ко ве́лию зло́бу лука́вый воздви́же на тя́, мирски́ми собла́зны тебе́ улови́ти жела́я, возбрани́ тому́ соверши́тися, и виде́нием А́нгела с ча́шею от пути́ ги́бельнаго отврати́ тебе́, и отсе́ле, о́тче свя́те, в непреста́нной моли́тве подвиза́лся еси́, до́брыми де́лы лю́дем стра́ждущим послужи́ти тща́ся. Прославля́юще моли́твенныя по́двиги и доброде́тели твоя́, спаса́ющему гре́шных Бо́гу воспои́м, ве́рнии: Аллилу́иа.

И́кос 2.

Ра́зум име́я благода́тию просвеще́нный, вся́ тле́нная бла́га ни во что́же вмени́л еси́, и ре́вностию по Бо́зе разжиза́ем, яви́л еси́ себе́ де́лателя за́поведей Бо́жиих неле́ностна, о́тче на́ш Алекси́е. Взира́юще на сла́вная твоя́ дея́ния, восхва́лим тя́ та́ко:

Ра́дуйся, честны́й сосу́де Ду́ха Свята́го; ра́дуйся, нра́ва кро́ткаго богому́дрый облада́телю.

Ра́дуйся, по́стниче изря́днейший Го́спода ра́ди; ра́дуйся, моли́твенниче тепле́йший за ро́д на́ш.

Ра́дуйся, наста́вниче в мо́ри жите́йском обурева́емым; ра́дуйся, во вся́ких обстоя́ниих боле́знующим предста́телю.

Ра́дуйся, ско́рый засту́пниче в беда́х су́щим; ра́дуйся, ще́дрый пода́телю ми́лостыни неиму́щим.

Ра́дуйся, немощству́ющих благода́тная кре́посте; ра́дуйся, ско́рбных неиждива́емая ра́досте.

Ра́дуйся, неду́гов на́ших цели́телю; ра́дуйся, и́стиннаго благоче́стия подви́жниче.

Ра́дуйся, пра́ведне Алекси́е, преди́вный чудотво́рче.

Конда́к 3.

Си́ла Вы́шняго осени́ тя́, ве́лия искуше́ния от де́монов претерпе́вшаго, и дарова́ся ти́ е́же печа́ль вся́кую от ду́ш стра́ждущих отгоня́ти. И та́ко пу́ть живота́ твоего́ в служе́нии лю́дем соверша́я, оби́телей ра́йских жи́телем уподо́бился еси́, иде́же ны́не любо́вию Бо́гу взыва́еши: Аллилу́иа.

И́кос 3.

Име́яй се́рдце горя́щее любо́вию ко Го́споду, еди́но помышля́л еси́, ка́ко спасти́ся и со Христо́м в Ца́рствии Небе́снем пребы́ти, посто́м и до́брыми де́лы, а наипа́че моли́твою Тому́ послужи́ти потща́лся еси́, о́тче Алекси́е; ду́хом у́бо тя́ ве́дый преподо́бный Серафи́м, вели́каго моли́твенника тя́ провозгласи́. Те́мже сла́вим тя́ та́ко:

Ра́дуйся, свеще́, в моли́тве к Бо́гу пламене́ющая; ра́дуйся, звездо́, сия́ющая ве́рным.

Ра́дуйся, благово́нное моли́твы кади́ло; ра́дуйся, я́ко тобо́ю Госпо́дь прославля́ется.

Ра́дуйся, в ми́ру мона́шескому жи́тельству прилежа́вый; ра́дуйся, гла́су Боже́ственному со тре́петом внима́вый.

Ра́дуйся, послу́шниче Христо́в соверше́нный; ра́дуйся, соверши́телю слу́жбы Бо́жия усе́рдный.

Ра́дуйся, о́браз и подо́бие Бо́жие в бли́жнем возлюби́вый; ра́дуйся, ве́ру дела́ми любве́ утверди́вый.

Ра́дуйся, чистоты́ душе́вныя и теле́сныя сокро́вище; ра́дуйся, милосе́рдия пучи́но.

Ра́дуйся, пра́ведне Алекси́е, преди́вный чудотво́рче.

Конда́к 4.

Бу́рю нападе́ний де́монских претерпе́л еси́, егда́ вра́г ро́да челове́ческаго, зави́стник искони́, умы́сли погуби́ти тя́, о́тче, и мно́гое мно́жество духо́в нечи́стых снидо́шася, да тя́ устраша́т. Ты́ же, Святы́м Ду́хом укрепля́ем, и́менем Го́спода на́шего Иису́са Христа́ си́м противля́лся еси́, и заступи́ тя́ Сама́ Пресвята́я Богоро́дица со А́нгелы, воспева́ющими: Аллилу́иа.

И́кос 4.

Слы́шавше свято́е житие́ твое́, о́тче пра́ведне, дивля́хуся лю́дие доброде́телем твои́м, и притека́ху в ве́сь твою́, да тя́ я́ве у́зрят. Отону́дуже исходя́ще, благодари́ша Го́спода, я́ко воздвиза́ет рабо́в Свои́х на утеше́ние ве́рным. Мы́ же с ни́ми воззове́м ти́:

Ра́дуйся, к до́му Отца́ Небе́снаго все́м се́рдцем устреми́выйся; ра́дуйся, на высоту́ безстра́стия еще́ на земли́ возше́дый.

Ра́дуйся, весе́лия Боже́ственнаго в юдо́ли ско́рбной сподо́бивыйся; ра́дуйся, виде́ния ли́ка Христо́ва и Пречи́стыя Богома́тере удосто́енный.

Ра́дуйся, сокро́вища духо́вная возлюби́вый; ра́дуйся, пло́ть ду́ху покори́вый.

Ра́дуйся, нестяжа́телю преди́вный; ра́дуйся, челове́че Бо́жий и до́блий во́ине Христо́в.

Ра́дуйся, Све́та Невече́рняго прича́стниче; ра́дуйся, святы́х подража́телю и насле́дниче.

Ра́дуйся, я́ко ве́лия искуше́ния му́жески претерпе́л еси́; ра́дуйся, я́ко благода́тныя да́ры преизоби́льно стяжа́л еси́.

Ра́дуйся, пра́ведне Алекси́е, преди́вный чудотво́рче.

Конда́к 5.

Боготе́чней звезде́ подо́бяся, светоза́рный пу́ть спасе́ния показу́ющей, во тьме́ грехо́вней блужда́ющим пу́ть пра́вый житие́м твои́м показа́л еси́, о́тче Алекси́е, да спасе́ннии тобо́ю вопию́т Бо́гу: Аллилу́иа.

И́кос 5.

Ви́девше лю́дие пресла́вная чудеса́, я́же благода́тию Бо́жиею сотвори́л еси́, вси́ в ско́рбех твоего́ предста́тельства проша́ху, ты́ же моли́твою и кро́тким вразумле́нием те́х укрепля́л еси́, сего́ ра́ди воспева́ем ти́ сицева́я:

Ра́дуйся, святы́я Це́ркве похвало́ и ра́дование; ра́дуйся, доброде́тельми Христа́ вы́ну прославля́яй.

Ра́дуйся, дара́ми благода́тными преиспо́лненный; ра́дуйся, избра́нниче Христо́в, чудеса́ми просла́вленный.

Ра́дуйся, Пресвяты́я Богоро́дицы благогове́йный почита́телю; ра́дуйся, чистоты́ ума́ и се́рдца храни́телю.

Ра́дуйся, покая́ния пресла́вный пропове́дниче; ра́дуйся, благода́тную си́лу смире́ния позна́вый.

Ра́дуйся, Бо́гу и бли́жним нелицеме́рно служи́вый; ра́дуйся, пред святы́м престо́лом за вся́ лю́ди сле́зно воздыха́вый.

Ра́дуйся, о́тче пра́ведный, любо́вию твое́ю не́мощи на́ша покрыва́яй; ра́дуйся, бе́дствующим защи́тниче.

Ра́дуйся, пра́ведне Алекси́е, преди́вный чудотво́рче.

Конда́к 6.

Пропове́дник чуде́с Бо́жиих яви́лся еси́, соверше́нную любо́вь, я́ко да́р Свята́го Ду́ха прие́м, не́мощи немощны́х подъя́л еси́. Лю́дие же ве́рнии, неду́гов многообра́зных исцеле́ние прия́вше, благода́рственно взыва́ют Бо́гу: Аллилу́иа.

И́кос 6.

Возсия́ чрез тебе́ милосе́рдие Бо́жие к лю́дем ру́сским, егда́ два́десять язы́ков на Оте́чество на́ше ополчи́шася, гра́ды и ве́си на́ша пожго́ша, святы́я це́ркви оскверни́ша, и мно́ги уби́ша. Ты́ же, о́тче, я́ко и вси́ пра́ведницы земли́ Ру́сския, моли́лся еси́ ко Го́споду о спасе́нии Оте́чества на́шего, и возвести́ А́нгел тебе́ пресла́вную побе́ду во́инства правосла́внаго, небе́сными во́и споспешеству́ема. Те́мже ублажа́ем тя́ си́це:

Ра́дуйся, святы́й уго́дниче Бо́жий, земли́ Ру́сския красото́ и сла́во; ра́дуйся, христолюби́ваго во́инства при́сный хода́таю.

Ра́дуйся, держа́вы Росси́йския кре́пкое забра́ло; ра́дуйся, до́брым во́ином ея́ несокруши́мый щи́те.

Ра́дуйся, духо́вными ору́жии изря́дно вооруже́нный; ра́дуйся, покро́вом Богома́тере осене́нный.

Ра́дуйся, во́ине, со ду́хи зло́бы ратобо́рствовавый; ра́дуйся, и́менем Христо́вым те́х победи́вый.

Ра́дуйся, я́ко моле́ние твое́ ми́лость Бо́жию привлека́ет; ра́дуйся, я́ко заступле́ние твое́ от ве́лия напа́сти избавля́ет.

Ра́дуйся, щедро́т Бо́жиих сокро́вище; ра́дуйся, благоутро́бия Его́ изоби́лие.

Ра́дуйся, пра́ведне Алекси́е, преди́вный чудотво́рче.

Конда́к 7.

Хотя́й Всеве́дец Госпо́дь ми́лость гре́шным яви́ти, смире́нней моли́тве твое́й вня́ти благоволи́, и о́трока уме́рша пред все́ми людьми́ воскреси́. Мы́ же, дивя́щеся таково́му твоему́ дерзнове́нию, просла́вльшему тя́ Го́споду пое́м: Аллилуиа.

И́кос 7.

Но́ваго и ди́внаго чудотво́рца в земли́ Росси́йстей яви́ тя́ Госпо́дь, о́тче Алекси́е, ве́рна Го́споду на́шему Иису́су Христу́ себе́ показа́вша и ве́лия искуше́ния претерпе́вша, сего́ ра́ди вели́кия да́ры от Го́спода прия́ти сподо́бился еси́, и вся́ сия́ на служе́ние бли́жним пре́дал еси́. Восхваля́юще пресла́вная чудеса́ твоя́, воспева́ем тебе́:

Ра́дуйся, боля́щих здра́вие и хромы́х хожде́ние; ра́дуйся, разсла́бленных возставле́ние.

Ра́дуйся, из мно́гих бе́сных духо́в нечи́стых изгна́вый; ра́дуйся, я́ко николи́же ве́ра посты́жена бу́дет, показа́вший.

Ра́дуйся, лю́дем ма́лым си́м, по за́поведи Бо́жией, себе́ отве́ргнувся, служи́вый; ра́дуйся, все́ упова́ние твое́ на Го́спода возложи́вый.

Ра́дуйся, терпе́ние и наде́жду на Бо́га не оставля́ти па́ству твою́ науча́вый; ра́дуйся, ве́рность Тому́ в искуше́ниях яви́ти призыва́вый.

Ра́дуйся, предзре́вый бу́дущая я́ко настоя́щая; ра́дуйся, ве́девый да́льняя я́ко бли́жняя.

Ра́дуйся, я́ко сокры́тая я́ве облича́л еси́; ра́дуйся, я́ко и́мя Христо́во, и́мже чудотвори́л еси́, возвели́чил еси́.

Ра́дуйся, пра́ведне Алекси́е, преди́вный чудотво́рче.

Конда́к 8.

Стра́нное А́нгелом и челове́ком яви́ся, о́тче пра́ведне, житие́ твое́: бы́в челове́к, те́ло нося́й, ду́х тво́й, я́ко безтеле́сен, в го́рняя устреми́л еси́, пренебре́г вся́ тле́нная, в Бо́га богате́я: щедро́ты милосе́рдия твоего́ на вся́ с ве́рою притека́ющия к тебе́ излия́л еси́. Сла́вяще Го́спода, дарова́вшаго ти́ благода́ть сию́, воспое́м лю́дие: Аллилу́иа.

И́кос 8.

Всего́ себе́ на служе́ние Бо́гу упра́вил еси́, о́тче, во́лю Бо́жию вы́ну творя́ и умо́м на небесе́х пребыва́я; сего́ ра́ди духо́внаго ми́ра созерца́тель сподо́бился еси́ бы́ти, сия́ же виде́ния та́йно пи́сменам преда́л еси́, то́кмо ма́лое не́что блаже́нной игу́мении Мари́и пове́дав. Дивя́щеся же сему́ и устраша́ющеся, с ве́рою воззове́м:

Ра́дуйся, пречу́дный ли́к Христо́в созерца́вый; ра́дуйся, гла́су Боже́ственному пресла́дкому внима́вый.

Ра́дуйся, я́ко стра́жа Це́ркве восхоте́ тя́ Госпо́дь нарещи́; ра́дуйся, я́ко о́вцы Своя́ слове́сныя тебе́ поручи́.

Ра́дуйся, Пресвято́ю Богоро́дицею со одра́ боле́зни возста́вленный; ра́дуйся, заступле́ния Ея́ удосто́енный.

Ра́дуйся, благода́тный ми́р в се́рдце свое́м стяжа́вый; ра́дуйся, все́м стра́ждущим незави́стно ми́лость твою́ излива́вый.

Ра́дуйся, очи́ма теле́сныма а́нгельское блиста́ние ви́девый; ра́дуйся, небе́снаго пе́ния безпло́тных наслажда́выйся.

Ра́дуйся, Ца́рствия Бо́жия на земли́ предте́че; ра́дуйся, земны́й А́нгеле и небе́сный челове́че.

Ра́дуйся, пра́ведне Алекси́е, преди́вный чудотво́рче.

Конда́к 9.

Вся́кое естество́ а́нгельское ра́довашеся, егда́ еди́н от А́нгел возвести́ тебе́ в олтаре́ о нача́ле твоего́ а́нгельскаго служе́ния. Ты́ же, о́тче, житие́м твои́м безпло́тным подо́бяся, воспе́л еси́ Бо́гу: Аллилу́иа.

И́кос 9.

Вети́и многовеща́ннии умолка́ют, зря́ще оби́лие чуде́с твои́х, Алекси́е пра́ведне, мы́ же, неиску́сен язы́к иму́ще, оба́че жела́нием просла́вити тя́ побежда́еми, с любо́вию взыва́ем ти́ сицева́я:

Ра́дуйся, Ду́ха Свята́го жили́ще украше́нное; ра́дуйся, от бе́д и скорбе́й прибе́жище благооти́шное.

Ра́дуйся, о́тче вели́кий и смиренному́дрый; ра́дуйся, ду́ши людски́я ко Христу́ приводя́й.

Ра́дуйся, словеса́ Бо́жия на се́рдце твое́м начерта́вый; ра́дуйся, еди́ныя пра́вды Бо́жия взыска́вый.

Ра́дуйся, оправда́ния Бо́жия па́че все́х тле́нных бла́г возлюби́вый; ра́дуйся, в послуша́нии Бо́гови при́сно пребы́вый.

Ра́дуйся, сокрове́нных по́двигов ра́ди Христа́ де́лателю; ра́дуйся, та́йныя ми́лостыни раздая́телю.

Ра́дуйся, я́ко еси́ бесо́в добропобе́дный прогони́тель; ра́дуйся, я́ко еси́ доброде́телей в ча́дех твои́х насади́тель.

Ра́дуйся, пра́ведне Алекси́е, преди́вный чудотво́рче.

Конда́к 10.

Спасти́ хотя́ ду́шу и Ца́рствие Небе́сное насле́довати, о́тче Алекси́е, ве́лиим по́двигом от Го́спода проще́ние грехо́в прия́ти сподо́бился еси́, те́мже улучи́в жи́знь ве́чную, со А́нгелы сла́виши Бо́га: Аллилу́иа.

И́кос 10.

Стена́ несокруши́мая бы́сть моли́тва твоя́ лю́дем правосла́вным, егда́ же призва́ тя́ Госпо́дь в оби́тели небе́сныя, ве́лиею ско́рбию о сиро́тстве свое́м сокруша́ющеся, пла́кашася вся́ ча́да твоя́ духо́вная го́рце; оба́че и ра́достию о ве́чном твое́м блаже́нстве пла́ч растворя́юще, взыва́ху тебе́:

Ра́дуйся, о́тче святы́й, с на́ми на земли́ пожи́вый; ра́дуйся, сро́дниче на́ш, Бо́гу угоди́вый.

Ра́дуйся, моли́тися о на́с пред Престо́лом Бо́жиим при́сно обеща́вый; ра́дуйся, в животе́ богоуго́днем утвержда́тися вы́ну на́с наставля́вый.

Ра́дуйся, я́ко земля́, прия́вшая мо́щи твоя́, освяти́ся; ра́дуйся, я́ко то́ю мно́зи неду́жнии исцели́шася.

Ра́дуйся, по успе́нии твое́м с лю́бящими тя́ ду́хом пребыва́яй; ра́дуйся, прося́щих с ве́рою николи́же тщи́ отвраща́яй.

Ра́дуйся, и́стинный па́стырю ста́да Христо́ва; ра́дуйся, пра́вило жи́зни благочести́выя.

Ра́дуйся, засту́пниче на́ш богодарова́нный; ра́дуйся, наста́вниче на́ш богопросвеще́нный.

Ра́дуйся, пра́ведне Алекси́е, преди́вный чудотво́рче.

Конда́к 11.

Пе́ние всеумиле́нное приими́ от на́с, о́тче пра́ведне, пред Престо́лом Всесвяты́я Тро́ицы непреста́нно моля́ся за ны́; мы́ же со А́нгелы и все́ми святы́ми ра́дующеся о сла́ве твое́й, пое́м Бо́гу: Аллилу́иа.

И́кос 11.

Светоза́рному свети́льнику уподо́бился еси́, о́тче, сия́ние свя́тости источа́я, благода́ти Ду́ха Свята́го испо́лнен бы́в. Мы́ же, мы́сленныма очи́ма на тя́ взира́юще и луча́ми, от тебе́ исходя́щими, согрева́еми, любо́вию к тебе́ уязвля́емся и взыва́ем ти́ такова́я:

Ра́дуйся, дре́вним вели́ким отце́м в по́двизех подража́вый; ра́дуйся, те́х ре́вности по Бо́зе преиспо́лненный.

Ра́дуйся, невеще́ственным огне́м осиява́емый; ра́дуйся, на возду́се моли́выйся.

Ра́дуйся, я́ко тобо́ю благослови́ся земля́ окре́стная; ра́дуйся, я́ко тобо́ю просла́вися Но́вград Ни́жний.

Ра́дуйся, страны́ на́шея Росси́йския ди́вная добро́то; ра́дуйся, Вселе́нския Це́ркве цве́те благоуха́нный.

Ра́дуйся, кри́не небе́сный, на земли́ процве́тший; ра́дуйся, во пло́ти а́нгельскою чистото́ю блиста́вый.

Ра́дуйся, си́лу пра́выя ве́ры, челове́ки обновля́ющую, все́м яви́вый; ра́дуйся, сла́ву Христа́ Человеколю́бца показа́вый.

Ра́дуйся, пра́ведне Алекси́е, преди́вный чудотво́рче.

Конда́к 12.

Благода́ть от святы́х моще́й твои́х оби́льно излива́я, вся́ неду́жныя с ве́рою к тебе́ притека́ющия здра́вы сотворя́еши, о́тче Алекси́е. Сла́вяще Го́спода, дарова́вшаго на́м о тебе́ таковы́я ми́лости, хвале́бную пе́снь воспое́м Ему́: Аллилу́иа.

И́кос 12.

Пою́ще равноа́нгельное житие́ твое́ и пресла́вная чудотворе́ния, Алекси́е пра́ведне, дивя́щеся доброде́телем твои́м, ублажа́ем тя́ я́ко ди́внаго о на́с моли́твенника пред Бо́гом, те́мже со умиле́нием вопие́м ти́:

Ра́дуйся, исто́чниче исцеле́ний благода́тных; ра́дуйся, сострада́льниче си́рых и стра́ждущих.

Ра́дуйся, ми́лостивый скорбя́щим помо́щниче; ра́дуйся, наста́вниче и́щущим спасе́ния.

Ра́дуйся, Небе́снаго Оте́чества граждани́не; ра́дуйся, Го́рняго Иерусали́ма жи́телю.

Ра́дуйся, доброде́тели ри́зу све́тлую стяжа́вый; ра́дуйся, ра́дости ве́чныя удосто́енный.

Ра́дуйся, я́ко в оби́телех ра́йских наслажда́ешися; ра́дуйся, я́ко Го́споду в весе́лии предстои́ши.

Ра́дуйся, о все́х по́мощи твоея́ прося́щих моли́твенниче; ра́дуйся, за вся́ ве́рныя ко Христу́ и Богоро́дице хода́таю.

Ра́дуйся, пра́ведне Алекси́е, преди́вный чудотво́рче.

Конда́к 13.

О, прехва́льный уго́дниче Христо́в и вели́кий чудотво́рче, пра́ведне о́тче Алекси́е, прии́м ма́лое сие́ приноше́ние на́ше, умоли́ Го́спода Иису́са Христа́ дарова́ти на́м в покая́нии усе́рдие, к де́ланию за́поведей Бо́жиих тве́рдое произволе́ние, в пра́вой ве́ре утвержде́ние, во все́х де́лех на́ших благо́е поспеше́ние и по сконча́нии живота́ на́шего души́ спасе́ние, да с тобо́ю вку́пе воспое́м Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельскими доброде́тельми укра́шенный, небожи́телем еще́ на земли́ уподо́бился еси́, и я́ко звезда́ пресве́тлая в земли́ Росси́йстей просия́л еси́. Те́мже смире́нное житие́ твое́ воспомина́юще и вели́чию по́двига твоего́ дивя́щеся, глаго́лем ти́ сицева́я:

Ра́дуйся, пресла́вный избра́нниче Бо́жий; ра́дуйся, подви́жниче преизря́дный.

Ра́дуйся, все́ю душе́ю Го́спода возлюби́вый; ра́дуйся, любо́вию ко Христу́ пе́щь страсте́й угаси́вый.

Ра́дуйся, покая́нием плотски́я собла́зны отри́нувый; ра́дуйся, непреста́нно в се́рдце Бо́га сла́вивый.

Ра́дуйся, о́бразе кро́тости и смире́ния; ра́дуйся, усе́рдный ревни́телю поста́ и воздержа́ния.

Ра́дуйся, ми́ра духо́внаго умиле́нный тайнозри́телю; ра́дуйся, жития́ доброде́тельнаго учи́телю.

Ра́дуйся, посыла́яй на́м от Го́спода пречу́дное поможе́ние; ра́дуйся, в печа́лех су́щим да́руяй ско́рое утеше́ние.

Ра́дуйся, пра́ведне Алекси́е, преди́вный чудотво́рче.

Конда́к 1.

Избра́нный от Царя́ си́л Го́спода Иису́са Христа́, кре́пкий победи́тель враго́в неви́димых показа́лся еси́, преди́вне Алекси́е. Во смире́нии мно́гия труды́ и по́двиги подъя́л еси́, и сего́ ра́ди ве́лие дерзнове́ние пред Бо́гом стяжа́в, неду́гов душе́вных и теле́сных цели́тель яви́лся еси́; и ны́не Престо́лу Святы́я Тро́ицы в весе́лии предстоя́, от вся́ких на́с бе́д свободи́, зову́щих:

Ра́дуйся, пра́ведне Алекси́е, преди́вный чудотво́рче.

Моли́тва.

Святы́й пра́ведный о́тче на́ш Алекси́е, сохрани́ и соблюди́ на́с моли́твами твои́ми от искуше́ний диа́вольских и паде́ний грехо́вных, испроси́ на́м свы́ше по́мощь во вре́мя уны́ния и безпомо́щия на́шего, да не преткне́мся о ка́мень собла́зна, но неукло́нно ше́ствуем путе́м за́поведей Христо́вых, до́ндеже дости́гнем о́ных блаже́нных оби́телей ра́йских, иде́же ты́ ны́не водворя́ешися и весели́шися. И я́ко предуме́ршую ду́шу о́трока моли́твою твое́ю воскреси́л еси́, та́ко и душа́м на́шим испроси́ у Го́спода к усе́рдию воззва́ние, да избежа́вше моли́твами твои́ми мыта́рств возду́шных и вла́сти лю́таго мироде́ржца, унасле́дуем Ца́рство Небе́сное и просла́вим великоле́пое И́мя Отца́, и Сы́на, и Свята́го Ду́ха во ве́ки веко́в. Ами́нь.