Акафист святому праведному Артемию, Веркольскому чудотворцу

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 06 июля (23 июня ст. ст.); 02 ноября (20 октября ст. ст.)

Утвержден для общецерковного использования.

Конда́к 1.

Избра́нному пра́веднику, ди́вному предста́телю пред Бо́гом, пресве́тлому свети́льнику се́верныя страны́ на́шея, боголюби́вому и боголюбе́зному о́троку Арте́мию, благоде́тельными чудотворе́нии утеша́ющему и наставля́ющему покланя́ющихся с ве́рою святе́й ра́це твое́й, благода́рственная воспису́юще, ра́достно и торже́ственно взыва́ем:

Ра́дуйся, предста́телю на́ш, Арте́мие пра́ведный.

И́кос 1.

А́нгельский нра́в и ду́шу непоро́чную име́я от святы́я купе́ли креще́ния, избе́гл еси́ обы́чных све́та сего́ су́етств и собла́знов, чу́жд бы́л еси́ претыка́ний и паде́ний, вта́йне чи́стым се́рдцем моля́ся к Еди́ному Всеблаго́му Бо́гу ми́лостиво взира́ющему на кро́тких и смире́нных. Сего́ ра́ди единогла́сно вопие́м ти́:

Ра́дуйся, между́ челове́ки ди́вное явле́ние святы́ни; Ра́дуйся, Отцу́ Небе́сному возлю́бленный.

Ра́дуйся, Сы́ну Бо́жию вожделе́нный; ра́дуйся, Свято́му Ду́ху сосу́де драги́й и чи́стый.

Ра́дуйся, Цари́цы Небе́сныя пла́менный почита́телю; ра́дуйся, святы́м А́нгелом и́стинный дру́же и единонра́вниче.

Ра́дуйся, пра́ведником святы́м все́м слико́вниче; Ра́дуйся, Це́ркве Христо́вой украше́ние.

Ра́дуйся, де́лателю благи́й, в ма́ле ве́рный, над мно́гим поста́вленный: ра́дуйся, вше́дый в ра́дость Го́спода твоего́.

Ра́дуйся, нося́й вене́ц нетле́ния: ра́дуйся, просла́вленный от Го́спода Бо́га дарова́нием исцеле́ний.

Ра́дуйся, предста́телю на́ш, Арте́мие пра́ведный.

Конда́к 2.

Ви́дя чистоту́ се́рдца твоего́ благопромысли́тель Бо́г, призира́ющий всеви́дящим о́ком Свои́м на всю́ тва́рь, испо́лни ду́шу твою́ благода́ти Своея́ от чре́ва ма́тере. Прославля́я у́бо Его́ ди́вное и благо́е о тебе́ промышле́ние, пое́м о тебе́ хвале́бно: Аллилу́иа.

И́кос 2.

Вкуси́в во мла́дости блаже́ннаго жития́ твоего́ сла́дость Боже́ственныя благода́ти, чу́ждый мирски́я уте́хи отроко́в, ты́ бы́л еси́ потае́нный се́рдца челове́к в нетле́нном украше́нии кро́ткаго и молчали́ваго ду́ха, е́же е́сть, по Апо́столу, пред Бо́гом многоце́нно. Приими́ у́бо от певце́в твои́х хвалу́ сию́:

Ра́дуйся, смире́ннаго и благода́тнаго о́трочества Христо́ва подража́телю: ра́дуйся, благода́ти Бо́жией храни́телю.

Ра́дуйся, роди́телей твои́х почита́телю: ра́дуйся, в дому́ о́тчем о́браз кро́тости и послуша́ния.

Ра́дуйся, све́рстников твои́х приме́р благонра́вия: ра́дуйся, храни́телю чистоты́ се́рдца.

Ра́дуйся, сокруше́ния серде́чнаго таи́нниче: ра́дуйся, прия́тное благоуха́ние духо́внаго умиле́ния.

Ра́дуйся, не прии́мший иску́са мирски́х сласте́й: ра́дуйся, от грехо́вных страсте́й свобо́ду улучи́вый.

Ра́дуйся, благогове́йное отроча́, стяжа́вшее ду́ха стра́ха Бо́жия: ра́дуйся, боголюбе́зное ча́до, па́че жи́зни твоя́ возлюби́вшее Христа́ Бо́га.

Ра́дуйся, предста́телю на́ш, Арте́мие пра́ведный.

Конда́к 3.

Си́лою Всесвята́го Ду́ха укрепле́нный, блаже́нне Арте́мие, прия́в несокруши́мый щи́т ве́ры, и непобеди́мое ору́жие животворя́щий Кре́ст Христо́в, зна́мение стра́шное для злы́х духо́в, сохрани́л еси́ себе́ це́ла и невреди́ма от злоко́зненных си́х враго́в, поя́ Бо́гу: Аллилу́иа.

И́кос 3.

Име́я всегда́ и во все́м упова́ние на Бо́га промысли́теля, и в убо́зем о́тчем дому́ пребыва́я, в по́те лица́ твоего́ приобре́л еси́ пропита́ние; но лише́нный земны́х бла́г, по во́ли Бо́жией, яви́лся еси́ прича́стником ве́чных Небе́сных бла́г, пра́ведне Арте́мие. Похваля́я у́бо твою́ нищету́, лише́ния и ну́жды, приве́тственно вопие́м ти́:

Ра́дуйся, о́бразе кро́тости и трудолю́бия: ра́дуйся, нищету́, на́с ра́ди обнища́вшаго, Христа́ Бо́га возлюби́вый.

Ра́дуйся, жите́йских зо́л неприча́стный: ра́дуйся, грехолю́бных коры́стей чу́ждый.

Ра́дуйся, за лише́ние земно́е уте́шенный ра́йскими наслажде́нии: ра́дуйся, за кро́тость и смире́ние, насле́дниче Ца́рствия Небе́снаго.

Ра́дуйся, за ну́жды вре́менныя сподо́бивыйся изоби́лия бла́г ве́чной несконча́емой ра́дости: ра́дуйся, за чистоту́ се́рдца удосто́ивыйся лицезре́ти Бо́га вме́сте со святы́ми А́нгелы.

Ра́дуйся, не прилага́вый се́рдца к благо́м ми́ра сего́ непостоя́нным: ра́дуйся, иска́вый Небе́сных нетле́нных бла́г в моли́тве дома́шней и церко́вней, и в обще́нии Та́ин Христо́вых.

Ра́дуйся, испо́лненный Боже́ственныя любве́: ра́дуйся, прича́стниче безсме́ртныя трапе́зы.

Ра́дуйся, стяжа́вшый смире́нием высо́кая и нището́ю бога́тая, по подража́нию святи́телю Никола́ю: ра́дуйся, хра́ма его́ в жи́зни твое́й моли́твенник бы́вый.

Ра́дуйся, я́ко мзду́ мно́гу прие́мый от Го́спода Бо́га на Небесе́х.

Ра́дуйся, предста́телю на́ш, Арте́мие пра́ведный.

Конда́к 4.

Бу́ря страсте́й и треволне́ний жите́йских не пости́же тя́, име́ющаго в се́рдцы твое́м ми́р Бо́жий, всели́выйся бога́тно в тя́, блаже́нне Арте́мие; ве́три непостоя́нных уче́ний, не волнова́ли ми́рной души́ твоея́. Сего́ ра́ди явля́я я́ко Ио́сиф, ми́р бра́тии твое́й, прове́л еси́ дни́ живота́ твоего́ в ми́ре, тишине́ и безмо́лвии, и ми́р Бо́жий, обита́яй в глубине́ ду́ха твоего́, возбужда́л пе́ти тя́ непреста́нно Бо́гу: Аллилу́иа.

И́кос 4.

Слу́шая от зако́на Бо́жия словеса́ жи́зни ве́чныя, име́я пома́зание от Свята́го Ду́ха, ве́дал еси́ благи́м чу́вством вся́, не тре́буя, да кто́ учи́т тя́, но я́ко то́ само́ пома́зание уча́ше тя́ о все́м, по сло́ву возлю́бленнаго ученика́ Христо́ва; воскрили́вся же Боже́ственным дарова́нием отроча́ мла́до, возне́слся еси́ на высоту́ христиа́нскаго благоче́стия и кро́тости, Бо́гу возлю́бленне Арте́мие. Сего́ ра́ди ди́вное о тебе́ смотре́ние Бо́жие сла́вяще, со дерзнове́нием вопие́м ти́:

Ра́дуйся, спаси́тельнаго внима́ния себе́ ди́вный на́м приме́ре: ра́дуйся, молча́ния о́бразе.

Ра́дуйся, му́дрости духо́вныя све́тлое зерца́ло: ра́дуйся, исто́чниче исцеле́ний.

Ра́дуйся, чудотво́рче преди́вный: ра́дуйся, сокро́вище целому́дрия.

Ра́дуйся, цве́те чистоты́ и незло́бия: ра́дуйся, неви́нности сосу́де.

Ра́дуйся, цве́те а́нгельския пра́ведности: ра́дуйся, многоце́нный ка́меню ра́йския жи́зни.

Ра́дуйся, сия́ние небе́сных све́тлостей.

Ра́дуйся, предста́телю на́ш, Арте́мие пра́ведный.

Конда́к 5.

Живоно́сный то́к благода́ти Христо́вой восприя́в благи́м и до́брым се́рдцем, пра́ведне Арте́мие, устреми́лся еси́ соверше́нно в сле́д Христа́ Спаси́теля на́шего, и восхища́яся бога́тством бла́гости, прему́дрости и человеколю́бия Бо́жия, явле́ннаго в искупле́нии гре́шнаго челове́чества, пламене́л еси́ любо́вию к Спаси́телю на́шему, и во умиле́нии се́рдца воспева́л еси́ Ему́: Аллилу́иа.

И́кос 5.

Ви́девше купножи́тели твои́ преспева́юща тя́ благоче́стием и ра́зумом, пра́ведне Арте́мие, прославля́ху благоволе́ние Бо́жие, утаева́ющее от прему́дрых и разу́мных бога́тство благода́ти и ве́дения ея́, по сло́ву Спаси́теля, и открыва́ющее та́ младе́нцем. Те́мже и мы́, ра́дующеся написа́нию и́мени твоего́ на Небесе́х, с утеше́нием возно́сим тебе́ хвале́бныя пе́сни:

Ра́дуйся, избра́нный сосу́де Бо́жия благода́ти: ра́дуйся, прия́телище даро́в Ду́ха Свята́го.

Ра́дуйся, испо́лненный дарова́ния чуде́с исцеле́ний: ра́дуйся, Вы́шния Прему́дрости Бо́жия прие́мниче.

Ра́дуйся, ра́зума духо́внаго сокро́вище: ра́дуйся, благи́й для на́с сове́тниче.

Ра́дуйся, испо́лненный спаси́тельнаго ве́дения: ра́дуйся, пла́меню неугаса́яй любве́.

Ра́дуйся, всесве́тлая звездо́, блиста́ющая на тве́рди церко́вней: ра́дуйся, отра́до печа́льным.

Ра́дуйся, немощству́ющих врачу́: ра́дуйся, обурева́емых помо́щниче.

Ра́дуйся, предста́телю на́ш, Арте́мие пра́ведный.

Конда́к 6.

Пропове́дник пе́рвый просла́вленнаго те́ла твоего́, кли́рик це́ркви святи́теля Никола́я, ища́ в лесно́й ча́щи плодо́в земны́х, обре́те сокро́вище неоцене́нное, нетле́нныя мо́щи твоя́, пра́ведне Арте́мие, чрез три́десять три́ ле́та не поврежде́нныя преме́нами стихи́й, и с благода́рным чу́вством прекло́нь коле́на, восклица́ше к Бо́гу: Аллилу́иа.

И́кос 6.

Возсия́л еси́ в пусты́ннем ме́сте де́бри лесны́я, я́коже у́тренняя звезда́ по́сле мра́ка нощна́го, и просвети́л еси́ ско́ро населе́ние градо́в, дре́вния Кевро́ли, Пине́ги, Арха́нгельска, Во́логды и дале́ких стра́н, сия́нием благоде́тельных чуде́с твои́х. И ны́не никто́же умолчи́т вопи́ти тебе́:

Ра́дуйся, вели́кое свети́ло, просвеща́ющее тму́ неве́дения: ра́дуйся, сокро́вище духо́вное, ве́рных богатя́щее.

Ра́дуйся, чи́стая струе́ благода́ти Бо́жия: ра́дуйся, стране́ твое́й се́верной сла́во и утвержде́ние.

Ра́дуйся, я́коже чи́стый А́нгел, поя́й пе́сни Богокра́сныя, и руководя́й к тому́ оби́тель твою́: ра́дуйся, чи́стая пти́це, в гне́зда небе́сная прия́тая.

Ра́дуйся, я́блоко благово́нное, ве́рных ду́шы благоуха́ющее: ра́дуйся, прекра́сная ли́лие услажда́ющая сердца́ ве́рных.

Ра́дуйся, млада́я ве́тве ра́йскаго дре́ва, израсти́вшая сла́дкий пло́д духо́вный Пресвяте́й Тро́ице: ра́дуйся, немерца́ющая луче́ Правосла́внаго уче́ния.

Ра́дуйся, ма́слино Це́ркве Христо́вы, источа́ющая на́м ди́вный еле́й ми́лости Бо́жией: ра́дуйся, виногра́дная лозо́, напая́ющая на́с отра́дным упова́нием на спаси́тельная обетова́ния.

Ра́дуйся, смоко́внице, сла́достию свое́ю грехо́вную го́речь отража́ющая.

Ра́дуйся, предста́телю на́ш, Арте́мие пра́ведный.

Конда́к 7.

Хотя́щу Всевы́шнему мироправи́телю призва́ти своего́ пра́ведника в небе́сныя ски́нии, ма́нием от престо́ла велеле́пныя Его́ сла́вы, возшуме́ над земле́ю бу́ря, стра́шно возгреме́ли гро́ми, возблиста́ и разлия́ся ужа́сно, я́ко пла́мень, мо́лния, и в прикоснове́нии у́жаса ко вну́тренним чу́вством ю́наго о́трока, взята́ А́нгелы душа́ пра́ведника, срета́емая Безпло́тными Си́лами, ра́дующимися о дру́зе свое́м, и в весе́лии воспе́вшими Бо́гу: Аллилу́иа.

И́кос 7.

Ди́вно бы́сть твое́ призва́ние в Небе́сный Иерусали́м; от земна́го бо труда́ на ло́но Авраа́мово, и от малолю́днаго ме́ста в преми́рную сла́ву вели́чественно пренесена́ бы́сть блаже́нная душа́ твоя́, пра́ведне Арте́мие, возду́ху шумя́щу, гро́мом и мо́лниям свирепе́ющым, и вода́м от движе́ния ве́тра, я́ко рука́ми, пле́щущым. Те́мже и мы́ лику́юще, воспое́м:

Ра́дуйся, но́вый о на́с к Бо́гу предста́телю: ра́дуйся, в ве́чный покро́в Присноде́вствующия Цари́цы вше́дый.

Ра́дуйся, А́нгелом собесе́дниче: ра́дуйся, Рая́ Небе́снаго жи́телю.

Ра́дуйся, безстра́стия насле́дниче пра́ведный: ра́дуйся, све́детелю на́м жи́зни безсме́ртныя.

Ра́дуйся, избежа́вый возду́шных истяза́телей, пораже́нных стрела́ми мо́лний при твое́м отше́ствии на Не́бо: ра́дуйся, не узре́вый ме́рзких де́монских зра́ков.

Ра́дуйся, ра́йская ве́тве, благоуха́нием веселя́щая: ра́дуйся, благово́нная еде́мская ро́зо, ду́шы на́ша благоуха́ющая.

Ра́дуйся, прекра́сный гро́зде, на трапе́зе царе́вой положе́нный: ра́дуйся, те́плый на́ш моли́твенниче.

Ра́дуйся, предста́телю на́ш, Арте́мие пра́ведный.

Конда́к 8.

Стра́нно и недоуме́нно твое́ воспита́ние, пра́ведниче; ра́зума бо Бо́жия испо́лнился еси́, святы́ни ду́ха дости́гл еси́, ни от кого́ же из челове́к учи́выйся; сокрове́нно бы́ло от совреме́нников и для ни́х ди́вно твое́ в ю́ных ле́тех благоче́стие и преставле́ние твое́. Но чу́дная твоя́ исцеле́ния, и разли́чная чудоде́йствия возно́сят на́ша гла́сы к славосло́вию о тебе́ Бо́жию, е́же непреста́нно и ра́достно пе́ти: Аллилу́иа.

И́кос 8.

Ве́сь бы́л еси́ в Бо́зе богомы́слием, и укрепля́емый Бо́жией благода́тию, непристу́пен яви́лся еси́ кова́рному зми́ю, наблюда́ющему пя́ту ше́ствующих те́сным путе́м. Руководи́ у́бо и на́с непреткнове́нно ходи́ти путе́м за́поведей Христо́вых, да благода́рно вопие́м ти́:

Ра́дуйся, путеводи́телю на́ш ди́вный: ра́дуйся, кро́ткий наста́вниче все́х спаса́емых.

Ра́дуйся, пе́рсте Бо́жий, указу́яй на́м го́рняя: ра́дуйся, гла́се Небе́сный, зовы́й все́х на по́двиги спасе́ния.

Ра́дуйся, чи́стая голуби́це, иму́щая ве́твь ра́йскую: ра́дуйся, духо́вная ла́стовице, показу́ющая в нетле́нии весну́ гряду́щаго ве́ка.

Ра́дуйся, предста́телю на́ш, Арте́мие пра́ведный.

Конда́к 9.

Все́ естество́ А́нгельское, в ра́достный тре́пет прише́д, воздаде́ хвалу́ Бо́гу: Свя́т, Свя́т, Свя́т Госпо́дь Савао́ф, егда́ неви́нная и чи́стая душа́ твоя́, неврежде́нно от мно́гих страхова́ний бесо́вских, и перенесе́нная в преми́рную жи́знь, поклони́ся Триипоста́сному Божеству́, воспе́вши Ему́ со все́ми святы́ми: Аллилу́иа.

И́кос 9.

Вети́и многослове́снии, не могу́щии усмотре́ти о́ком ра́зума, омраче́ннаго го́рдостию и страстьми́, прему́дрости Тво́рческия в устрое́нии вселе́нныя, не мо́гут уразуме́ти прославле́ния моще́й свята́го уго́дника Бо́жия. Мы́ же соверше́нною ве́рою в простоте́ се́рдца возглаша́ем тебе́, просла́вленный моли́твенниче на́ш:

Ра́дуйся, преда́вый ве́рным в зало́г любве́ нетле́нныя своя́ мо́щи: ра́дуйся, уверя́я на́с в и́стине Воскресе́ния и жи́зни ве́чныя.

Ра́дуйся, испо́лнивый на себе́ сло́во Бо́жие: храни́т Госпо́дь вся́ ко́сти пра́ведных: ра́дуйся, утверди́вый исполне́нием сло́во Христа́ Бо́га: вла́с главы́ ва́шея не поги́бнет.

Ра́дуйся, с че́стию принесе́нный из де́бри в правосла́вный хра́м для о́бщаго чествова́ния и поклоне́ния: ра́дуйся, свиде́тельствуемый от Го́спода Бо́га да́ром чудотворе́ний.

Ра́дуйся, я́ко чи́стая ра́ка святы́х моще́й, и ны́не привлека́ет сердца́ обе́тных страннолю́бцев на поклоне́ние тебе́: ра́дуйся, яви́вый и́стину слове́с Писа́ния: в па́мять ве́чную бу́дет пра́ведник, и пра́ведник я́ко фи́никс процвете́т, и я́ко ке́др и́же в Лива́не умно́жится.

Ра́дуйся, загражда́яй уста́ пререка́ющая: ра́дуйся, обуздова́яй язы́к неве́рия и хулы́.

Ра́дуйся, смиря́яй горды́ню дерза́ющым на святы́ню: ра́дуйся, ра́зум кичли́вый пленя́яй в послуша́ние Христо́вой ве́ры.

Ра́дуйся, в ду́се блаже́нныя простоты́ и незло́бия дости́гнувый Не́ба.

Ра́дуйся, предста́телю на́ш, Арте́мие пра́ведный.

Конда́к 10.

Спасти́ хотя́щаго вся́каго челове́ка, и́скренно моли́л еси́ наста́вити тя́ на пу́ть спасе́ния, и благода́тию Бо́жиею озари́вшею тя́, прише́л еси́ в Небе́сный Иерусали́м, иде́же узре́в лице́м к лицу́ Того́, Его́же И́мя, я́ко ми́ро излия́нное, та́мо воспева́еши непреста́нно сла́ву Бо́гу: Аллилу́иа.

И́кос 10.

Стена́ тве́рда и несокруши́ма огра́да оби́тели, свято́му и́мени твоему́ посвяще́нней, су́ть неусы́пныя твоя́ к Бо́гу моли́твы, святы́й пра́ведный Арте́мие. Те́мже живу́щии в не́й благода́рно возно́сят к тебе́ гла́сы:

Ра́дуйся, храни́телю на́ш кре́пкий: ра́дуйся, неусы́пный защи́тниче на́ш.

Ра́дуйся, наста́вников на́ших охраня́яй от па́губных бе́дствий: ра́дуйся, испуща́яй на враго́в стре́лы стра́ха.

Ра́дуйся, щи́те тве́рдый па́че ме́дянаго: ра́дуйся, броне́ пра́вды, отража́ющая каменомета́ния а́дских му́ринов.

Ра́дуйся, оби́тели мона́хов и все́й стране́ на́шей похвало́ и утвержде́ние: ра́дуйся, тружда́ющихся по́моще.

Ра́дуйся, молчали́вых и кро́тких ра́досте: ра́дуйся, больны́х исцеле́ние.

Ра́дуйся, немощны́х укрепле́ние: ра́дуйся, уны́лых бо́дросте.

Ра́дуйся, скорбя́щих утеше́ние.

Ра́дуйся, предста́телю на́ш, Арте́мие пра́ведный.

Конда́к 11.

Пе́ние на́ше хвале́бное тебе́, живу́щему во сла́ве Отца́ све́тов, ны́не возсыла́емое, недосто́йно е́сть, я́ко от нечи́стых усте́н возноси́мое; но са́м прииди́ посреде́ на́с, неиждива́емый исто́чниче чистоты́ и целому́дрия, очи́сти на́ша сердца́ и ду́ши помышле́ния, да тебе́ ра́ди благоприя́тно бу́дет совоку́пное на́ше восклица́ние Всеще́дрому Бо́гу: Аллилу́иа.

И́кос 11.

Све́том за́поведей Бо́жиих озаре́нный измла́да, ско́ро возше́л еси́ к Триипоста́сному Све́ту, пред Ни́мже хода́тайствуеши и о на́шем просвеще́нии, о не́мже умоля́юще, с любо́вию вопие́м ти́:

Ра́дуйся, звездо́ невече́рняго све́та: ра́дуйся, луче́ све́та, согрева́ющая на́шу хла́дность.

Ра́дуйся, свеще́, просвеща́ющая на́шу темноту́: ра́дуйся, я́ко о́гнь возгрева́яй на́с к любви́ возлюби́вшаго на́с Христа́ Бо́га.

Ра́дуйся, мы́сленно прикаса́яйся, я́ко у́гль, хла́дным сердца́м: ра́дуйся, злата́я лампа́до, возжже́нная для умилостивле́ния Пра́веднаго Судии́.

Ра́дуйся, свети́льниче духо́вный, освеща́яй ве́рным пу́ть спасе́ния: ра́дуйся, о́гненная пе́щь, пожига́ющая те́рние грехо́в на́ших.

Ра́дуйся, горни́ло, куря́щее моли́твенный арома́т: ра́дуйся, кади́ло издаю́щее ди́вное смире́ния благоуха́ние.

Ра́дуйся, горя́яй пла́меню, истребля́яй нече́стие.

Ра́дуйся, предста́телю на́ш, Арте́мие пра́ведный.

Конда́к 12.

Благода́ть Боже́ственную испроси́ на́м святы́й уго́дниче Бо́жий, да при́сно покрыва́ет на́с от враго́в ви́димых и неви́димых, да научи́т ны́ подража́ти тебе́ в чистоте́ а́нгельской и незло́бии, да напра́вит сердца́ на́ша к смире́нию, покая́нию и неосла́бному исполне́нию за́поведей Христо́вых; да да́рует на́м христиа́нскую кончи́ну и безбе́дно проведе́т на́с чрез возду́шный пу́ть, да сподо́бимся та́мо узре́ти сла́ву Вели́каго Бо́га, ве́чно пе́ти Ему́: Аллилу́иа.

И́кос 12.

Пою́ще тебе́ ны́не, а́ще и недосто́йныя, но усе́рдныя хвалы́ бре́нными и нечи́стыми усты́, благогове́йно мо́лим тя́, святы́й пра́ведный Арте́мие: при́зри на мно́гия на́ша не́мощи душе́вныя и теле́сныя, и пода́ждь на́м по́мощь к соверше́нию до́брых де́л, и ко всегда́шнему прославле́нию свята́го твоего́ и́мени, вопию́щым ти́:

Ра́дуйся, во́ине Царя́ ца́рствующих: ра́дуйся, слуго́ Го́спода госпо́дствующих.

Ра́дуйся, ра́бе ве́рный Владе́ющаго вся́ким созда́нием: ра́дуйся, венча́нный венце́м нетле́ния от Сама́го нетле́ннаго Бо́га.

Ра́дуйся, укра́шенный нетле́нною диади́мою Ца́рствия Христо́ва: ра́дуйся, облече́нный в блестя́щую порфи́ру за чистоту́ се́рдца и незло́бие.

Ра́дуйся, прие́мый от руки́ Бо́жия пе́рстень сыноположе́ния: ра́дуйся, насле́дниче Небе́снаго Ца́рствия.

Ра́дуйся, предста́телю мо́щный, спобо́рствуяй правосла́вному царю́ на́шему на ра́тующих: ра́дуйся, вождю́, спосо́бствуяй неви́димо во бране́х на́шему во́инству.

Ра́дуйся, защища́яй преде́лы на́шего Оте́чествия тве́рдым щито́м твоего́ покро́ва: ра́дуйся, спасе́ния на́шего споспе́шниче и хода́таю твои́ми ко Го́споду Бо́гу о на́с гре́шных моли́твами.

Ра́дуйся, предста́телю на́ш, Арте́мие пра́ведный.

Конда́к 13.

О преди́вный уго́дниче Бо́жий и прелюби́мый чудотво́рче, Арте́мие! Ра́ди ми́лости Бо́жия и предста́тельства Влады́чицы, мо́лим твою́ святы́ню, ми́лостив бу́ди святе́й оби́тели твое́й, и все́м призыва́ющым тя́ с любо́вию и упова́нием. По свое́й чистоте́ и пра́ведности, испроси́ у Го́спода Бо́га проще́ние на́ших прегреше́ний и ре́вность к до́брым дело́м, да про́чее вре́мя живота́ на́шего поживе́м во вся́ком благоче́стии и чистоте́, и сподо́бимся на Стра́шнем Суде́ одесну́ю ста́ти Судии́, Христа́ Бо́га на́шего, и во ве́ки веко́в с тобо́ю пе́ти Человеколю́бцу Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

Моли́тва.

Святы́й уго́дниче Бо́жий, пра́ведный Арте́мие, при́сный храни́телю святы́я оби́тели, твои́м и́менем укра́шенной, и бли́зкий защи́тниче всего́ се́вернаго кра́я Росси́йския страны́! При́зри ми́лостивно на усе́рдную моли́тву на́с гре́шных, и твои́м благомо́щным предста́телством испроси́ на́м у Го́спода проще́ние согреше́ний на́ших, преспе́яние в ве́ре благоче́стии, и огражде́ние от ко́зней диа́вольских. Моли́ Го́спода, стра́ждущую страну́ Росси́йскую от лю́тых безбо́жник и вла́сти и́х да свободи́т, и да возста́вит престо́л правосла́вных царе́й; ве́рных рабо́в Его́, в ско́рби и печа́ли де́нь и но́щь вопию́щих к Нему́, многоболе́зный во́пль да услы́шит и да изведе́т от поги́бели живо́т на́ш, да пода́ст и все́м лю́дем ми́р, тишину́ и нелицеме́рное послуша́ние, да сподо́бит все́х на́с получи́ти, по христиа́нской кончи́не, Небе́сное Ца́рствие, иде́же вси́ пра́веднии, вме́сте с тобо́ю, ве́чно сла́вят Отца́ и Сы́на и Свята́го Ду́ха. Ами́нь.

А҆ка́ѳїстъ ст҃о́мꙋ првⷣномꙋ а҆рте́мїю, ве́ркольскомꙋ чꙋдотво́рцꙋ.

Конда́къ а҃.

И҆збра́нномꙋ првⷣникꙋ, ди́вномꙋ предста́телю пред̾ бг҃омъ, пресвѣ́тломꙋ свѣти́льникꙋ сѣ́верныѧ страны̀ на́шеѧ, бг҃олюби́вомꙋ и҆ бг҃олюбе́зномꙋ ѻ҆́трокꙋ а҆рте́мїю, бл҃годѣ́тельными чꙋдотворє́нїи ᲂу҆тѣша́ющемꙋ и҆ наставлѧ́ющемꙋ покланѧ́ющихсѧ съ вѣ́рою ст҃ѣ́й ра́цѣ твое́й, бл҃года́рствєннаѧ восписꙋ́юще, ра́достнѡ и҆ торже́ственнѡ взыва́емъ:

Ра́дꙋйсѧ, предста́телю на́шъ, а҆рте́мїе првⷣный.

І҆́косъ а҃.

А҆́гг҃льскїй нра́въ и҆ дꙋ́шꙋ непоро́чнꙋю и҆мѣ́ѧ ѿ ст҃ы́ѧ кꙋпѣ́ли кр҃ще́нїѧ, и҆збѣ́глъ є҆сѝ ѻ҆бы́чныхъ свѣ́та сегѡ̀ сꙋ́етствъ и҆ собла́знѡвъ, чꙋ́ждъ бы́лъ є҆сѝ претыка́нїй и҆ паде́нїй, вта́йнѣ чⷭ҇тымъ срⷣцемъ молѧ́сѧ къ є҆ди́номꙋ всеблаго́мꙋ бг҃ꙋ ми́лостивѡ взира́ющемꙋ на кро́ткихъ и҆ смире́нныхъ. сегѡ̀ ра́ди є҆диногла́снѡ вопїе́мъ тѝ:

Ра́дꙋйсѧ, междꙋ̀ человѣ́ки ди́вное ꙗ҆вле́нїе ст҃ы́ни: ра́дꙋйсѧ, ѻ҆ц҃ꙋ̀ нбⷭ҇номꙋ возлю́бленный.

Ра́дꙋйсѧ, сн҃ꙋ бж҃їю вожделѣ́нный: ра́дꙋйсѧ, ст҃о́мꙋ дх҃ꙋ сосꙋ́де драгі́й и҆ чи́стый.

Ра́дꙋйсѧ, цр҃и́цы нбⷭ҇ныѧ пла́менный почита́телю: ра́дꙋйсѧ, ст҃ы̑мъ а҆́гг҃лѡмъ и҆́стинный дрꙋ́же и҆ є҆динонра́вниче.

Ра́дꙋйсѧ, пра́ведникѡмъ ст҃ы̑мъ всѣ̑мъ слико́вниче: ра́дꙋйсѧ, цр҃кве хрⷭ҇то́вой ᲂу҆краше́нїе.

Ра́дꙋйсѧ, дѣ́лателю благі́й, въ ма́лѣ вѣ́рный, над̾ мно́гимъ поста́вленный: ра́дꙋйсѧ, вше́дый въ ра́дость гдⷭ҇а твоегѡ̀.

Ра́дꙋйсѧ, носѧ́й вѣне́цъ нетлѣ́нїѧ: ра́дꙋйсѧ, просла́вленный ѿ гдⷭ҇а бг҃а дарова́нїемъ и҆сцѣле́нїй.

Ра́дꙋйсѧ, предста́телю на́шъ, а҆рте́мїе првⷣный.

Конда́къ в҃.

Ви́дѧ чистотꙋ̀ се́рдца твоегѡ̀ бл҃гопромысли́тель бг҃ъ, призира́ющїй всеви́дѧщимъ ѻ҆́комъ свои́мъ на всю̀ тва́рь, и҆спо́лни дꙋ́шꙋ твою̀ бл҃года́ти своеѧ̀ ѿ чре́ва ма́тере. прославлѧ́ѧ ᲂу҆́бѡ є҆гѡ̀ ди́вное и҆ бл҃го́е ѡ҆ тебѣ̀ промышле́нїе, пое́мъ ѡ҆ тебѣ̀ хвале́бнѡ: А҆ллилꙋ́їа.

І҆́косъ в҃.

Вкꙋси́въ во мла́дости бл҃же́ннагѡ житїѧ̀ твоегѡ̀ сла́дость бжⷭ҇твенныѧ бл҃года́ти, чꙋ́ждый мїрскі́ѧ ᲂу҆тѣ́хи ѻ҆трокѡ́въ, ты̀ бы́лъ є҆сѝ потае́нный се́рдца чл҃вѣ́къ въ нетлѣ́нномъ ᲂу҆краше́нїи кро́ткагѡ и҆ молчали́вагѡ дꙋ́ха, є҆́же є҆́сть, по а҆пⷭ҇лꙋ, пред̾ бг҃омъ многоцѣ́ннѡ. прїимѝ ᲂу҆́бѡ ѿ пѣвцє́въ твои́хъ хвалꙋ̀ сїю̀:

Ра́дꙋйсѧ, смире́ннагѡ и҆ бл҃года́тнагѡ ѻ҆́трочества хрⷭ҇то́ва подража́телю: ра́дꙋйсѧ, бл҃года́ти бж҃їей храни́телю.

Ра́дꙋйсѧ, роди́телей твои́хъ почита́телю: ра́дꙋйсѧ, въ домꙋ̀ ѻ҆́тчемъ ѡ҆́бразъ кро́тости и҆ послꙋша́нїѧ.

Ра́дꙋйсѧ, све́рстникѡвъ твои́хъ примѣ́ръ бл҃гонра́вїѧ: ра́дꙋйсѧ, храни́телю чистоты̀ се́рдца.

Ра́дꙋйсѧ, сокрꙋше́нїѧ серде́чнагѡ таи́нниче: ра́дꙋйсѧ, прїѧ́тное бл҃гоꙋха́нїе дꙋхо́внагѡ ᲂу҆миле́нїѧ.

Ра́дꙋйсѧ, не прїи́мшїй и҆скꙋ́са мїрски́хъ сласте́й: ра́дꙋйсѧ, ѿ грѣхо́вныхъ страсте́й свобо́дꙋ ᲂу҆лꙋчи́вый.

Ра́дꙋйсѧ, бл҃гоговѣ́йное ѻ҆троча̀, стѧжа́вшее дх҃а стра́ха бж҃їѧ: ра́дꙋйсѧ, бг҃олюбе́зное ча́до, па́че жи́зни твоѧ̀ возлюби́вшее хрⷭ҇та̀ бг҃а.

Ра́дꙋйсѧ, предста́телю на́шъ, а҆рте́мїе првⷣный.

Конда́къ г҃.

Си́лою всест҃а́гѡ дх҃а ᲂу҆крѣпле́нный, бл҃же́нне а҆рте́мїе, прїѧ́въ несокрꙋши́мый щи́тъ вѣ́ры, и҆ непобѣди́мое ѡ҆рꙋ́жїе животворѧ́щїй крⷭ҇тъ хрⷭ҇то́въ, зна́менїе стра́шное длѧ ѕлы́хъ дꙋхѡ́въ, сохрани́лъ є҆сѝ себѐ цѣ́ла и҆ невреди́ма ѿ ѕлоко́зненныхъ си́хъ врагѡ́въ, поѧ̀ бг҃ꙋ: А҆ллилꙋ́їа.

І҆́косъ г҃.

И҆мѣ́ѧ всегда̀ и҆ во все́мъ ᲂу҆пова́нїе на бг҃а промысли́телѧ, и҆ въ ᲂу҆бо́зѣмъ ѻ҆́тчемъ домꙋ̀ пребыва́ѧ, въ по́тѣ лица̀ твоегѡ̀ прїѡбрѣ́лъ є҆сѝ пропита́нїе: но лише́нный земны́хъ бла̑гъ, по во́ли бж҃їей, ꙗ҆ви́лсѧ є҆сѝ прича́стникомъ вѣ́чныхъ нбⷭ҇ныхъ бла̑гъ, првⷣне а҆рте́мїе. похвалѧ́ѧ ᲂу҆̀бо твою̀ нищетꙋ̀, лишє́нїѧ и҆ нꙋ́жды, привѣ́тственнѡ вопїе́мъ тѝ:

Ра́дꙋйсѧ, ѡ҆́бразе кро́тости и҆ трꙋдолю́бїѧ: ра́дꙋйсѧ, нищетꙋ̀, на́съ ра́ди ѡ҆бнища́вшагѡ, хрⷭ҇та̀ бг҃а возлюби́вый.

Ра́дꙋйсѧ, жите́йскихъ ѕѡ́лъ неприча́стный: ра́дꙋйсѧ, грѣхолю́бныхъ коры́стей чꙋ́ждый.

Ра́дꙋйсѧ, за лише́нїе земно́е ᲂу҆тѣ́шенный ра́йскими наслаждє́нїи: ра́дꙋйсѧ, за кро́тость и҆ смире́нїе, наслѣ́дниче црⷭ҇твїѧ нбⷭ҇нагѡ.

Ра́дꙋйсѧ, за нꙋ́жды вре́мєнныѧ сподо́бивыйсѧ и҆з̾ѻби́лїѧ бла̑гъ вѣ́чной несконча́емой ра́дости: ра́дꙋйсѧ, за чистотꙋ̀ се́рдца, ᲂу҆досто́ивыйсѧ лицезрѣ́ти бг҃а вмѣ́стѣ со ст҃ы́ми а҆́гг҃лы.

Ра́дꙋйсѧ, не прилага́вый се́рдца къ бла́гѡмъ мі́ра сегѡ̀ непостоѧ̑ннымъ: ра́дꙋйсѧ, и҆ска́вый нбⷭ҇ныхъ нетлѣ́нныхъ бла̑гъ въ моли́твѣ дома́шней и҆ цр҃ко́внѣй, и҆ въ ѡ҆бще́нїи та̑инъ хрⷭ҇то́выхъ.

Ра́дꙋйсѧ, и҆спо́лненный бжⷭ҇твенныѧ любвѐ: ра́дꙋйсѧ, прича́стниче безсме́ртныѧ трапе́зы.

Ра́дꙋйсѧ, стѧжа́вшый смире́нїемъ высѡ́каѧ и҆ нището́ю бога̑таѧ, по подража́нїю ст҃и́телю нїкола́ю: ра́дꙋйсѧ, хра́ма є҆гѡ̀ въ жи́зни твое́й мл҃твенникъ бы́вый.

Ра́дꙋйсѧ, ꙗ҆́кѡ мздꙋ̀ мно́гꙋ прїе́мый ѿ гдⷭ҇а бг҃а на нб҃сѣ́хъ.

Ра́дꙋйсѧ, предста́телю на́шъ, а҆рте́мїе првⷣный.

Конда́къ д҃.

Бꙋ́рѧ страсте́й и҆ треволне́нїй жите́йскихъ не пости́же тѧ̀, и҆мѣ́ющаго въ се́рдцы твое́мъ ми́ръ бж҃їй, всели́выйсѧ бога́тнѡ въ тѧ̀, блаже́нне а҆рте́мїе: вѣ́три непостоѧ́нныхъ ᲂу҆че́нїй, не волнова́ли ми́рной дꙋшѝ твоеѧ̀. сегѡ̀ ра́ди ꙗ҆влѧ́ѧ ꙗ҆́кѡ і҆ѡ́сифъ, ми́ръ бра́тїи твое́й, прове́лъ є҆сѝ днѝ живота̀ твоегѡ̀ въ ми́рѣ, тишинѣ̀ и҆ безмо́лвїи, и҆ ми́ръ бж҃їй, ѡ҆бита́ѧй въ глꙋбинѣ̀ дх҃а твоегѡ̀, возбꙋжда́лъ пѣ́ти тѧ̀ непреста́ннѡ бг҃ꙋ: А҆ллилꙋ́їа.

І҆́косъ д҃.

Слꙋ́шаѧ ѿ зако́на бж҃їѧ словеса̀ жи́зни вѣ́чныѧ, и҆мѣ́ѧ пома́занїе ѿ ст҃а́гѡ дх҃а, вѣ́далъ є҆сѝ бл҃ги́мъ чꙋ́вствомъ всѧ̑, не тре́бꙋѧ, да кто̀ ᲂу҆чи́тъ тѧ̀, но ꙗ҆́кѡ то̀ само̀ пома́занїе ᲂу҆ча́ше тѧ̀ ѡ҆ все́мъ, по сло́вꙋ возлю́бленнагѡ ᲂу҆ченика̀ хрⷭ҇то́ва: воскрили́всѧ же бжⷭ҇твеннымъ дарова́нїемъ ѻ҆троча̀ мла́до, возне́слсѧ є҆сѝ на высотꙋ̀ хрⷭ҇тїа́нскагѡ бл҃гоче́стїѧ и҆ кро́тости, бг҃ꙋ возлю́бленне а҆рте́мїе. сегѡ̀ ра́ди ди́вное ѡ҆ тебѣ̀ смотрѣ́нїе бж҃їе сла́вѧще, со дерзнове́нїемъ вопїе́мъ тѝ:

Ра́дꙋйсѧ, спаси́тельнагѡ внима́нїѧ себѣ̀ ди́вный на́мъ примѣ́ре: ра́дꙋйсѧ, молча́нїѧ ѡ҆́бразе.

Ра́дꙋйсѧ, мꙋ́дрости дꙋхо́вныѧ свѣ́тлое зерца́ло: ра́дꙋйсѧ, и҆сто́чниче и҆сцѣле́нїй.

Ра́дꙋйсѧ, чꙋдотво́рче преди́вный: ра́дꙋйсѧ, сокро́вище цѣломꙋ́дрїѧ.

Ра́дꙋйсѧ, цвѣ́те чистоты̀ и҆ неѕло́бїѧ: ра́дꙋйсѧ, неви́нности сосꙋ́де.

Ра́дꙋйсѧ, цвѣ́те а҆́гг҃льскїѧ пра́ведности: ра́дꙋйсѧ, многоцѣ́нный ка́меню ра́йскїѧ жи́зни.

Ра́дꙋйсѧ, сїѧ́нїе нбⷭ҇ныхъ свѣ́тлостей.

Ра́дꙋйсѧ, предста́телю на́шъ, а҆рте́мїе првⷣный.

Конда́къ є҃.

Живоно́сный то́къ бл҃года́ти хрⷭ҇то́вой воспрїѧ́въ бл҃ги́мъ и҆ до́брымъ се́рдцемъ, пра́ведне а҆рте́мїе, ᲂу҆стреми́лсѧ є҆сѝ соверше́ннѡ въ слѣ́дъ хрⷭ҇та̀ сп҃си́телѧ на́шегѡ, и҆ восхища́ѧсѧ бога́тствомъ бл҃гости, премⷣрости и҆ человѣколю́бїѧ бж҃їѧ, ꙗ҆вле́ннагѡ въ и҆скꙋпле́нїи грѣ́шнагѡ человѣ́чества, пламенѣ́лъ є҆сѝ любо́вїю къ сп҃си́телю на́шемꙋ, и҆ во ᲂу҆миле́нїи се́рдца воспѣва́лъ є҆сѝ є҆мꙋ̀: А҆ллилꙋ́їа.

І҆́косъ є҃.

Ви́дѣвше кꙋпножи́тели твоѝ преспѣва́юща тѧ̀ бл҃гоче́стїемъ и҆ ра́зꙋмомъ, пра́ведне а҆рте́мїе, прославлѧ́хꙋ бл҃говоле́нїе бж҃їе, ᲂу҆таева́ющее ѿ премꙋ́дрыхъ и҆ разꙋ́мныхъ бога́тство бл҃года́ти и҆ вѣ́дѣнїѧ є҆ѧ̀, по сло́вꙋ сп҃си́телѧ, и҆ ѿкрыва́ющее та̑ младе́нцємъ. тѣ́мже и҆ мы̀, ра́дꙋющесѧ написа́нїю и҆́мени твоегѡ̀ на нб҃сѣ́хъ, съ ᲂу҆тѣше́нїемъ возно́симъ тебѣ̀ хвалє́бныѧ пѣ̑сни:

Ра́дꙋйсѧ, и҆збра́нный сосꙋ́де бж҃їѧ бл҃года́ти: ра́дꙋйсѧ, прїѧ́телище дарѡ́въ дх҃а ст҃а́гѡ.

Ра́дꙋйсѧ, и҆спо́лненный дарова́нїѧ чꙋде́съ и҆сцѣле́нїй: ра́дꙋйсѧ, вы́шнїѧ премꙋ́дрости бж҃їѧ прїе́мниче.

Ра́дꙋйсѧ, ра́зꙋма дꙋхо́внагѡ сокро́вище: ра́дꙋйсѧ, бл҃гі́й длѧ на́съ совѣ́тниче.

Ра́дꙋйсѧ, и҆спо́лненный спаси́тельнагѡ вѣ́дѣнїѧ: ра́дꙋйсѧ, пла́меню неꙋгаса́ѧй любвѐ.

Ра́дꙋйсѧ, всесвѣ́тлаѧ ѕвѣздо̀, блиста́ющаѧ на тве́рди цр҃ко́внѣй: ра́дꙋйсѧ, ѿра́до печа̑льнымъ.

Ра́дꙋйсѧ, немощствꙋ́ющихъ врачꙋ̀: ра́дꙋйсѧ, ѡ҆бꙋрева́емыхъ помо́щниче.

Ра́дꙋйсѧ, предста́телю на́шъ, а҆рте́мїе првⷣный.

Конда́къ ѕ҃.

Проповѣ́дникъ пе́рвый просла́вленнагѡ тѣ́ла твоегѡ̀, кли́рїкъ цр҃кви ст҃и́телѧ нїкола́а, и҆ща̀ въ лѣсно́й ча́щи плодѡ́въ земны́хъ, ѡ҆брѣ́те сокро́вище неѡцѣне́нное, нетлѣ̑нныѧ мо́щи твоѧ̑, пра́ведне а҆рте́мїе, чрез̾ три́десѧть трѝ лѣ́та не повреждє́нныѧ премѣ́нами стїхі́й, и҆ съ бл҃года́рнымъ чꙋ́вствомъ прекло́нь колѣ̑на, восклица́ше къ бг҃ꙋ: А҆ллилꙋ́їа.

І҆́косъ ѕ҃.

Возсїѧ́лъ є҆сѝ въ пꙋсты́ннѣмъ мѣ́стѣ де́бри лѣсны́ѧ, ꙗ҆́коже ᲂу҆́треннѧѧ ѕвѣзда̀ по́слѣ мра́ка нощна́гѡ, и҆ просвѣти́лъ є҆сѝ ско́рѡ населе́нїе градѡ́въ, дре́внїѧ кевро́ли, пине́ги, а҆рха́нгельска, во́логды и҆ дале́кихъ стра́нъ, сїѧ́нїемъ бл҃годѣ́тельныхъ чꙋде́съ твои́хъ. и҆ ны́нѣ никто́же ᲂу҆молчи́тъ вопи́ти тебѣ̀:

Ра́дꙋйсѧ, вели́кое свѣти́ло, просвѣща́ющее тмꙋ̀ невѣ́дѣнїѧ: ра́дꙋйсѧ, сокро́вище дꙋхо́вное, вѣ́рныхъ богатѧ́щее.

Ра́дꙋйсѧ, чи́стаѧ стрꙋѐ бл҃года́ти бж҃їѧ: ра́дꙋйсѧ, странѣ̀ твое́й сѣ́верной сла́во и҆ ᲂу҆твержде́нїе.

Ра́дꙋйсѧ, ꙗ҆́коже чи́стый а҆́гг҃лъ, поѧ́й пѣ́сни бг҃окра̑сныѧ, и҆ рꙋководѧ́й къ томꙋ̀ ѡ҆би́тель твою̀: ра́дꙋйсѧ, чи́стаѧ пти́це, въ гнѣ̑зда нбⷭ҇наѧ прїѧ́таѧ.

Ра́дꙋйсѧ, ꙗ҆́блоко бл҃гово́нное, вѣ́рныхъ дꙋ́шы благоꙋха́ющее: ра́дꙋйсѧ, прекра́снаѧ ли́лїе ᲂу҆слажда́ющаѧ сердца̀ вѣ́рныхъ.

Ра́дꙋйсѧ, млада́ѧ вѣ́тве ра́йскагѡ дре́ва, и҆зрасти́вшаѧ сла́дкїй пло́дъ дꙋхо́вный прест҃ѣ́й трⷪ҇цѣ: ра́дꙋйсѧ, немерца́ющаѧ лꙋчѐ правосла́внагѡ ᲂу҆че́нїѧ.

Ра́дꙋйсѧ, ма́слино цр҃кве хрⷭ҇то́вы, и҆сточа́ющаѧ на́мъ ди́вный є҆ле́й ми́лости бж҃їей: ра́дꙋйсѧ, вїногра́днаѧ лозо̀, напаѧ́ющаѧ на́съ ѿра́днымъ ᲂу҆пова́нїемъ на спаси́тєльнаѧ ѡ҆бѣтова̑нїѧ.

Ра́дꙋйсѧ, смоко́внице, сла́достїю свое́ю грѣхо́внꙋю го́речь ѿража́ющаѧ.

Ра́дꙋйсѧ, предста́телю на́шъ, а҆рте́мїе првⷣный.

Конда́къ з҃.

Хотѧ́щꙋ всевы́шнемꙋ мїроправи́телю призва́ти своегѡ̀ пра́ведника въ нбⷭ҇ныѧ ски́нїи, ма́нїемъ ѿ прⷭ҇то́ла велелѣ́пныѧ є҆гѡ̀ сла́вы, возшꙋмѣ̀ над̾ земле́ю бꙋ́рѧ, стра́шнѡ возгремѣ́ли гро́ми, возблиста̀ и҆ разлїѧ́сѧ ᲂу҆жа́снѡ, ꙗ҆́кѡ пла́мень, мо́лнїѧ, и҆ въ прикоснове́нїи ᲂу҆́жаса ко внꙋ́треннимъ чꙋ́вствѡмъ ю҆́нагѡ ѻ҆́трока, взѧта̀ а҆́гг҃лы дꙋша̀ пра́ведника, срѣта́емаѧ безпло́тными си́лами, ра́дꙋющимисѧ ѡ҆ дрꙋ́зѣ свое́мъ, и҆ въ весе́лїи воспѣ́вшими бг҃ꙋ: А҆ллилꙋ́їа.

І҆́косъ з҃.

Ди́внѡ бы́сть твоѐ призва́нїе въ нбⷭ҇ный і҆ерⷭ҇ли́мъ. ѿ земна́гѡ бо трꙋда̀ на ло́но а҆враа́мово, и҆ ѿ малолю́днагѡ мѣ́ста въ премі́рнꙋю сла́вꙋ вели́чественнѡ пренесена̀ бы́сть бл҃же́ннаѧ дꙋша̀ твоѧ̀, пра́ведне а҆рте́мїе, воздꙋ́хꙋ шꙋмѧ́щꙋ, громѡ́мъ и҆ мо́лнїѧмъ свирѣпѣ́ющымъ, и҆ вода́мъ ѿ движе́нїѧ вѣ́тра, ꙗ҆́кѡ рꙋка́ми, пле́щꙋщымъ. тѣ́мже и҆ мы̀ ликꙋ́юще, воспое́мъ:

Ра́дꙋйсѧ, но́вый ѡ҆ на́съ къ бг҃ꙋ предста́телю: ра́дꙋйсѧ, въ вѣ́чный покро́въ приснодѣ́вствꙋющїѧ цр҃и́цы вше́дый.

Ра́дꙋйсѧ, а҆́гг҃лѡмъ собесѣ́дниче: ра́дꙋйсѧ, раѧ̀ нбⷭ҇нагѡ жи́телю.

Ра́дꙋйсѧ, безстра́стїѧ наслѣ́дниче пра́ведный: ра́дꙋйсѧ, свѣ́дѣтелю на́мъ жи́зни безсме́ртныѧ.

Ра́дꙋйсѧ, и҆збѣжа́вый воздꙋ́шныхъ и҆стѧза́телей, пораже́нныхъ стрѣла́ми мо́лнїй при твое́мъ ѿше́ствїи на нб҃о: ра́дꙋйсѧ, не ᲂу҆зрѣ́вый ме́рзкихъ де́монскихъ зра́кѡвъ.

Ра́дꙋйсѧ, ра́йскаѧ вѣ́тве, бл҃гоꙋха́нїемъ веселѧ́щаѧ: ра́дꙋйсѧ, благово́ннаѧ є҆де́мскаѧ ро́зо, дꙋ́шы на́шѧ бл҃гоꙋха́ющаѧ.

Ра́дꙋйсѧ, прекра́сный гро́зде, на трапе́зѣ царе́вой положе́нный: ра́дꙋйсѧ, те́плый на́шъ мл҃твенниче.

Ра́дꙋйсѧ, предста́телю на́шъ, а҆рте́мїе првⷣный.

Конда́къ и҃.

Стра́ннѡ и҆ недоꙋмѣ́ннѡ твоѐ воспита́нїе, првⷣниче: ра́зꙋма бо бж҃їѧ и҆спо́лнилсѧ є҆сѝ, ст҃ы́ни дх҃а дости́глъ є҆сѝ, ни ѿ когѡ́ же и҆з̾ человѣ̑къ ᲂу҆чи́выйсѧ: сокрове́ннѡ бы́ло ѿ совреме́нникѡвъ и҆ длѧ ни́хъ ди́вно твоѐ въ ю҆́ныхъ лѣ́тѣхъ бл҃гоче́стїе и҆ преставле́нїе твоѐ. но чꙋ́днаѧ твоѧ̑ и҆сцѣлє́нїѧ, и҆ разли̑чнаѧ чꙋдодѣ̑йствїѧ возно́сѧтъ на́шѧ гла́сы къ славосло́вїю ѡ҆ тебѣ̀ бж҃їю, є҆́же непреста́ннѡ и҆ ра́достнѡ пѣ́ти: А҆ллилꙋ́їа.

І҆́косъ и҃.

Ве́сь бы́лъ є҆сѝ въ бз҃ѣ бг҃омы́слїемъ, и҆ ᲂу҆крѣплѧ́емый бж҃їей бл҃года́тїю, непристꙋ́пенъ ꙗ҆ви́лсѧ є҆сѝ кова́рномꙋ ѕмі́ю, наблюда́ющемꙋ пѧ́тꙋ ше́ствꙋющихъ тѣ́снымъ пꙋте́мъ. рꙋководѝ ᲂу҆́бѡ и҆ на́съ непреткнове́ннѡ ходи́ти пꙋте́мъ за́повѣдей хрⷭ҇то́выхъ, да бл҃года́рнѡ вопїе́мъ тѝ:

Ра́дꙋйсѧ, пꙋтеводи́телю на́шъ ди́вный: ра́дꙋйсѧ, кро́ткїй наста́вниче всѣ́хъ спаса́емыхъ.

Ра́дꙋйсѧ, пе́рсте бж҃їй, ᲂу҆казꙋ́ѧй на́мъ гѡ́рнѧѧ: ра́дꙋйсѧ, гла́се нбⷭ҇ный, зовы́й всѣ́хъ на по́двиги спасе́нїѧ.

Ра́дꙋйсѧ, чⷭ҇таѧ голꙋби́це, и҆мꙋ́щаѧ вѣ́твь ра́йскꙋю: ра́дꙋйсѧ, дꙋхо́внаѧ ла́стовице, показꙋ́ющаѧ въ нетлѣ́нїи веснꙋ̀ грѧдꙋ́щагѡ вѣ́ка.

Ра́дꙋйсѧ, предста́телю на́шъ, а҆рте́мїе првⷣный.

Конда́къ ѳ҃.

Всѐ є҆стество̀ а҆́гг҃льское, въ ра́достный тре́петъ прише́дъ, воздадѐ хвалꙋ̀ бг҃ꙋ: ст҃ъ, ст҃ъ, ст҃ъ гдⷭ҇ь саваѡ́ѳъ, є҆гда̀ неви́ннаѧ и҆ чи́стаѧ дꙋша̀ твоѧ̀, неврежде́ннѡ ѿ мно́гихъ страхова́нїй бѣсо́вскихъ, и҆ перенесе́ннаѧ въ премі́рнꙋю жи́знь, поклони́сѧ трїѷпоста́сномꙋ бжⷭ҇твꙋ̀, воспѣ́вши є҆мꙋ̀ со всѣ́ми ст҃ы́ми: А҆ллилꙋ́їа.

І҆́косъ ѳ҃.

Вѣті̑и многослове́снїи, не могꙋ́щїи ᲂу҆смотрѣ́ти ѻ҆́комъ ра́зꙋма, ѡ҆мраче́ннагѡ го́рдостїю и҆ страстьмѝ, премꙋ́дрости тво́рческїѧ въ ᲂу҆строе́нїи вселе́нныѧ, не мо́гꙋтъ ᲂу҆разꙋмѣ́ти прославле́нїѧ моще́й ст҃а́гѡ ᲂу҆го́дника бж҃їѧ. мы́ же соверше́нною вѣ́рою въ простотѣ̀ се́рдца возглаша́емъ тебѣ̀, просла́вленный моли́твенниче на́шъ:

Ра́дꙋйсѧ, преда́вый вѣ̑рнымъ въ зало́гъ любвѐ нетлѣ̑нныѧ своѧ̑ мо́щи: ра́дꙋйсѧ, ᲂу҆вѣрѧ́ѧ на́съ въ и҆́стинѣ воскрⷭ҇нїѧ и҆ жи́зни вѣ́чныѧ.

Ра́дꙋйсѧ, и҆спо́лнивый на себѣ̀ сло́во бж҃їе: храни́тъ гдⷭ҇ь всѧ̑ кѡ́сти пра́ведныхъ: ра́дꙋйсѧ, ᲂу҆тверди́вый и҆сполне́нїемъ сло́во хрⷭ҇та̀ бг҃а: вла́съ главы̀ ва́шеѧ не поги́бнетъ.

Ра́дꙋйсѧ, съ че́стїю принесе́нный и҆з̾ де́бри въ правосла́вный хра́мъ длѧ ѻ҆́бщагѡ чествова́нїѧ и҆ поклоне́нїѧ: ра́дꙋйсѧ, свидѣ́тельствꙋемый ѿ гдⷭ҇а бг҃а да́ромъ чꙋдотворє́нїй.

Ра́дꙋйсѧ, ꙗ҆́кѡ чи́стаѧ ра́ка ст҃ы́хъ моще́й, и҆ ны́нѣ привлека́етъ сердца̀ ѡ҆бѣ́тныхъ страннолю́бцєвъ на поклоне́нїе тебѣ̀: ра́дꙋйсѧ, ꙗ҆ви́вый и҆́стинꙋ слове́съ писа́нїѧ: въ па́мѧть вѣ́чнꙋю бꙋ́детъ првⷣникъ, и҆ првⷣникъ ꙗ҆́кѡ фі́нїѯъ процвѣте́тъ, и҆ ꙗ҆́кѡ ке́дръ и҆́же въ лїва́нѣ ᲂу҆мно́житсѧ.

Ра́дꙋйсѧ, загражда́ѧй ᲂу҆ста̀ прерѣка́ющаѧ: ра́дꙋйсѧ, ѡ҆бꙋздова́ѧй ѧ҆зы́къ невѣ́рїѧ и҆ хꙋлы̀.

Ра́дꙋйсѧ, смирѧ́ѧй горды́ню дерза́ющымъ на ст҃ы́ню: ра́дꙋйсѧ, ра́зꙋмъ кичли́вый плѣнѧ́ѧй въ послꙋша́нїе хрⷭ҇то́вой вѣ́ры.

Ра́дꙋйсѧ, въ дꙋ́сѣ блаже́нныѧ простоты̀ и҆ неѕло́бїѧ дости́гнꙋвый нб҃а.

Ра́дꙋйсѧ, предста́телю на́шъ, а҆рте́мїе првⷣный.

Конда́къ і҃.

Спастѝ хотѧ́щаго всѧ́каго человѣ́ка, и҆́скреннѡ моли́лъ є҆сѝ наста́вити тѧ̀ на пꙋ́ть спасе́нїѧ, и҆ бл҃года́тїю бж҃їею ѡ҆зари́вшею тѧ̀, прише́лъ є҆сѝ въ нбⷭ҇ный і҆ерⷭ҇ли́мъ, и҆дѣ́же ᲂу҆зрѣ́въ лице́мъ къ лицꙋ̀ того̀, є҆гѡ́же и҆́мѧ, ꙗ҆́кѡ мѵ́ро и҆злїѧ́нное, та́мѡ воспѣва́еши непреста́ннѡ сла́вꙋ бг҃ꙋ: А҆ллилꙋ́їа.

І҆́косъ і҃.

Стѣна̀ тверда̀ и҆ несокрꙋши́ма ѡ҆гра́да ѡ҆би́тели, ст҃о́мꙋ и҆́мени твоемꙋ̀ посвѧще́ннѣй, сꙋ́ть неꙋсы̑пныѧ твоѧ̑ къ бг҃ꙋ мл҃твы, ст҃ы́й првⷣный а҆рте́мїе. тѣ́мже живꙋ́щїи въ не́й бл҃года́рнѡ возно́сѧтъ къ тебѣ̀ гла́сы:

Ра́дꙋйсѧ, храни́телю на́шъ крѣ́пкїй: ра́дꙋйсѧ, неꙋсы́пный защи́тниче на́шъ.

Ра́дꙋйсѧ, наста́вникѡвъ на́шихъ ѡ҆хранѧ́ѧй ѿ па́гꙋбныхъ бѣ́дствїй: ра́дꙋйсѧ, и҆спꙋща́ѧй на врагѡ́въ стрѣ́лы стра́ха.

Ра́дꙋйсѧ, щи́те тве́рдый па́че мѣ́дѧнагѡ: ра́дꙋйсѧ, бронѐ пра́вды, ѿража́ющаѧ каменомета̑нїѧ а҆́дскихъ мꙋ́рїнѡвъ.

Ра́дꙋйсѧ, ѡ҆би́тели мона́хѡвъ и҆ все́й странѣ̀ на́шей похвало̀ и҆ ᲂу҆твержде́нїе: ра́дꙋйсѧ, трꙋжда́ющихсѧ по́моще.

Ра́дꙋйсѧ, молчали́выхъ и҆ кро́ткихъ ра́досте: ра́дꙋйсѧ, больны́хъ и҆сцѣле́нїе.

Ра́дꙋйсѧ, немощны́хъ ᲂу҆крѣпле́нїе: ра́дꙋйсѧ, ᲂу҆ны́лыхъ бо́дросте.

Ра́дꙋйсѧ, скорбѧ́щихъ ᲂу҆тѣше́нїе.

Ра́дꙋйсѧ, предста́телю на́шъ, а҆рте́мїе првⷣный.

Конда́къ а҃і.

Пѣ́нїе на́ше хвале́бное тебѣ̀, живꙋ́щемꙋ во сла́вѣ ѻ҆ц҃а̀ свѣ́тѡвъ, ны́нѣ возсыла́емое, недосто́йнѡ є҆́сть, ꙗ҆́кѡ ѿ нечи́стыхъ ᲂу҆сте́нъ возноси́мое: но са́мъ прїидѝ посредѣ̀ на́съ, неиждива́емый и҆сто́чниче чистоты̀ и҆ цѣломꙋ́дрїѧ, ѡ҆чи́сти на̑ша сердца̀ и҆ дꙋшѝ помышлє́нїѧ, да тебє̀ ра́ди благопрїѧ́тнѡ бꙋ́детъ совокꙋ́пное на́ше восклица́нїе всеще́дромꙋ бг҃ꙋ: А҆ллилꙋ́їа.

І҆́косъ а҃і.

Свѣ́томъ за́повѣдей бж҃їихъ ѡ҆заре́нный и҆з̾мла́да, ско́рѡ возше́лъ є҆сѝ къ трїѷпоста́сномꙋ свѣ́тꙋ, пред̾ ни́мже хода́тайствꙋеши и҆ ѡ҆ на́шемъ просвѣще́нїи, ѡ҆ не́мже ᲂу҆молѧ́юще, съ любо́вїю вопїе́мъ тѝ:

Ра́дꙋйсѧ, ѕвѣздо̀ невече́рнѧгѡ свѣ́та: ра́дꙋйсѧ, лꙋчѐ свѣ́та, согрѣва́ющаѧ на́шꙋ хла́дность.

Ра́дꙋйсѧ, свѣщѐ, просвѣща́ющаѧ на́шꙋ темнотꙋ̀: ра́дꙋйсѧ, ꙗ҆́кѡ ѻ҆́гнь возгрѣва́ѧй на́съ къ любвѝ возлюби́вшагѡ на́съ хрⷭ҇та̀ бг҃а.

Ра́дꙋйсѧ, мы́сленнѡ прикаса́ѧйсѧ, ꙗ҆́кѡ ᲂу҆́гль, хла̑днымъ сердца́мъ: ра́дꙋйсѧ, злата́ѧ лампа́до, возжже́ннаѧ длѧ ᲂу҆милостивле́нїѧ пра́веднагѡ сꙋдїѝ.

Ра́дꙋйсѧ, свѣти́льниче дꙋхо́вный, ѡ҆свѣща́ѧй вѣ̑рнымъ пꙋ́ть спасе́нїѧ: ра́дꙋйсѧ, ѻ҆́гненнаѧ пе́щь, пожига́ющаѧ те́рнїе грѣхѡ́въ на́шихъ.

Ра́дꙋйсѧ, горни́ло, кꙋрѧ́щее моли́твенный а҆рѡма́тъ: ра́дꙋйсѧ, кади́ло и҆здаю́щее ди́вное смире́нїѧ бл҃гоꙋха́нїе.

Ра́дꙋйсѧ, горѧ́ѧй пла́меню, и҆стреблѧ́ѧй нече́стїе.

Ра́дꙋйсѧ, предста́телю на́шъ, а҆рте́мїе првⷣный.

Конда́къ в҃і.

Бл҃года́ть бжⷭ҇твеннꙋю и҆спросѝ на́мъ ст҃ы́й ᲂу҆го́дниче бж҃їй, да при́снѡ покрыва́етъ на́съ ѿ врагѡ́въ ви́димыхъ и҆ неви́димыхъ, да наꙋчи́тъ ны̀ подража́ти тебѣ̀ въ чистотѣ̀ а҆́гг҃льской и҆ неѕло́бїи, да напра́витъ сердца̀ на̑ша къ смире́нїю, покаѧ́нїю и҆ неѡсла́бномꙋ и҆сполне́нїю за́повѣдей хрⷭ҇то́выхъ: да да́рꙋетъ на́мъ хрⷭ҇тїа́нскꙋю кончи́нꙋ и҆ безбѣ́днѡ проведе́тъ на́съ чрез̾ воздꙋ́шный пꙋ́ть, да сподо́бимсѧ та́мѡ ᲂу҆зрѣ́ти сла́вꙋ вели́кагѡ бг҃а, вѣ́чнѡ пѣ́ти є҆мꙋ̀: А҆ллилꙋ́їа.

І҆́косъ в҃і.

Пою́ще тебѣ̀ ны́нѣ, а҆́ще и҆ недостѡ́йныѧ, но ᲂу҆сє́рдныѧ хвалы̑ бре́нными и҆ нечи́стыми ᲂу҆сты̀, бл҃гоговѣ́йнѡ мо́лимъ тѧ̀, ст҃ы́й пра́ведный а҆рте́мїе: при́зри на мнѡ́гїѧ на́шѧ не́мѡщи дꙋшє́вныѧ и҆ тѣлє́сныѧ, и҆ пода́ждь на́мъ по́мощь къ соверше́нїю до́брыхъ дѣ́лъ, и҆ ко всегда́шнемꙋ прославле́нїю ст҃а́гѡ твоегѡ̀ и҆́мени, вопїю́щымъ тѝ:

Ра́дꙋйсѧ, во́ине цр҃ѧ̀ ца́рствꙋющихъ: ра́дꙋйсѧ, слꙋго̀ гдⷭ҇а госпо́дствꙋющихъ.

Ра́дꙋйсѧ, ра́бе вѣ́рный владѣ́ющагѡ всѧ́кимъ созда́нїемъ: ра́дꙋйсѧ, вѣнча́нный вѣнце́мъ нетлѣ́нїѧ ѿ самагѡ̀ нетлѣ́ннагѡ бг҃а.

Ра́дꙋйсѧ, ᲂу҆краше́нный нетлѣ́нною дїади́мою црⷭ҇твїѧ хрⷭ҇то́ва: ра́дꙋйсѧ, ѡ҆блече́нный въ блестѧ́щꙋю порфѵ́рꙋ за чистотꙋ̀ се́рдца и҆ неѕло́бїе.

Ра́дꙋйсѧ, прїе́мый ѿ рꙋкѝ бж҃їѧ пе́рстень сыноположе́нїѧ: ра́дꙋйсѧ, наслѣ́дниче нбⷭ҇нагѡ црⷭ҇твїѧ.

Ра́дꙋйсѧ, предста́телю мо́щный, спобо́рствꙋѧй правосла́вномꙋ цр҃ю̀ на́шемꙋ на ра́тꙋющихъ: ра́дꙋйсѧ, вождю̀, спосо́бствꙋѧй неви́димѡ во бранѣ́хъ на́шемꙋ во́инствꙋ.

Ра́дꙋйсѧ, защища́ѧй предѣ́лы на́шегѡ ѻ҆те́чествїѧ тве́рдымъ щито́мъ твоегѡ̀ покро́ва: ра́дꙋйсѧ, спасе́нїѧ на́шегѡ споспѣ́шниче и҆ хода́таю твои́ми ко гдⷭ҇ꙋ бг҃ꙋ ѡ҆ на́съ грѣ́шныхъ мл҃твами.

Ра́дꙋйсѧ, предста́телю на́шъ, а҆рте́мїе првⷣный.

Конда́къ г҃і.

Ѽ преди́вный ᲂу҆го́дниче бж҃їй и҆ прелюби́мый чꙋдотво́рче, а҆рте́мїе! ра́ди ми́лости бж҃їѧ и҆ предста́тельства влⷣчцы, мо́лимъ твою̀ ст҃ы́ню, ми́лостивъ бꙋ́ди ст҃ѣ́й ѡ҆би́тели твое́й, и҆ всѣ̑мъ призыва́ющымъ тѧ̀ съ любо́вїю и҆ ᲂу҆пова́нїемъ. по свое́й чистотѣ̀ и҆ пра́ведности, и҆спросѝ ᲂу҆ гдⷭ҇а бг҃а проще́нїе на́шихъ прегрѣше́нїй и҆ ре́вность къ дѡ́брымъ дѣлѡ́мъ, да про́чее вре́мѧ живота̀ на́шегѡ поживе́мъ во всѧ́комъ бл҃гоче́стїи и҆ чистотѣ̀, и҆ сподо́бимсѧ на стра́шнѣмъ сꙋдѣ̀ ѡ҆деснꙋ́ю ста́ти сꙋдїѝ, хрⷭ҇та̀ бг҃а на́шегѡ, и҆ во вѣ́ки вѣкѡ́въ съ тобо́ю пѣ́ти человѣколю́бцꙋ бг҃ꙋ: А҆ллилꙋ́їа.

Се́й конда́къ глаго́ли три́жды, та́же і҆́косъ а҃-й и҆ конда́къ а҃-й.

Моли́тва.

Ст҃ы́й ᲂу҆го́дниче бж҃їй, пра́ведный а҆рте́мїе, при́сный храни́телю ст҃ы́ѧ ѡ҆би́тели, твои́мъ и҆́менемъ ᲂу҆кра́шенной, и҆ бли́зкїй защи́тниче всегѡ̀ сѣ́вернагѡ кра́ѧ рѡссі́йскїѧ страны̀! при́зри ми́лостивнѡ на ᲂу҆се́рднꙋю мл҃твꙋ на́съ грѣ́шныхъ, и҆ твои́мъ бл҃гомо́щнымъ предста́телствомъ и҆спросѝ на́мъ ᲂу҆ гдⷭ҇а проще́нїе согрѣше́нїй на́шихъ, преспѣ́ѧнїе въ вѣ́рѣ бл҃гоче́стїи, и҆ ѡ҆гражде́нїе ѿ ко́зней дїа́вольскихъ. молѝ гдⷭ҇а, стра́ждꙋщꙋю странꙋ̀ рѡссі́йскꙋю ѿ лю́тыхъ безбѡ́жникъ и҆ вла́сти и҆́хъ да свободи́тъ, и҆ да возста́витъ престо́лъ правосла́вныхъ царе́й: вѣ́рныхъ рабѡ́въ є҆гѡ̀, въ ско́рби и҆ печа́ли де́нь и҆ но́щь вопїю́щихъ къ немꙋ̀, многоболѣ́зный во́пль да ᲂу҆слы́шитъ и҆ да и҆зведе́тъ ѿ поги́бели живо́тъ на́шъ, да пода́стъ и҆ всѣ̑мъ лю́демъ ми́ръ, тишинꙋ̀ и҆ нелицемѣ́рное послꙋша́нїе, да сподо́битъ всѣ́хъ на́съ полꙋчи́ти, по хрⷭ҇тїа́нстѣй кончи́нѣ, нбⷭ҇ное црⷭ҇твїе, и҆дѣ́же всѝ пра́веднїи, вмѣ́стѣ съ тобо́ю, вѣ́чнѡ сла́вѧтъ ѻ҆ц҃а̀ и҆ сн҃а и҆ ст҃а́го дх҃а. А҆ми́нь.

Свя­той Ар­те­мий Вер­коль­ский ро­дил­ся в 1532 г. в се­ле Вер­ко­ле Двин­ско­го края, в бла­го­че­сти­вой кре­стьян­ской се­мье. Вос­пи­тан­ный в стра­хе Бо­жи­ем и хри­сти­ан­ском бла­го­че­стии, св. Ар­те­мий еще и в дет­стве от­ли­чал­ся кро­то­стью, по­слу­ша­ни­ем и тру­до­лю­би­ем. В воз­расте 12 лет, ра­бо­тая в по­ле, он был убит мол­нией. Суе­вер­ные од­но­сель­чане оста­ви­ли те­ло бла­жен­но­го Ар­те­мия, как умер­ше­го от вне­зап­ной смер­ти, неот­пе­тым и по­ло­жи­ли его ле­су, по­верх зем­ли, при­крыв хво­ро­стом и бе­ре­стой.

Так про­ле­жа­ло оно, все­ми за­бы­тое, 32 го­да. Но в 1577 г. мо­щи св. Ар­те­мия бы­ли чу­дес­но об­ре­те­ны нетлен­ны­ми и про­сла­ви­лись мно­ги­ми чу­де­са­ми и ис­це­ле­ни­я­ми бо­лез­ней. Так, во вре­мя рас­про­стра­нив­шей­ся в Двин­ском краю зло­ка­че­ствен­ной ли­хо­рад­ки вер­коль­ский се­ля­нин Кал­ли­ник, взяв с гро­ба св. Ар­те­мия бе­ре­сту, при­ве­сил ее к кре­сту на гру­ди уми­рав­ше­го сы­на, и тот по­лу­чил ис­це­ле­ние.

Впо­след­ствии бы­ли на­пи­са­ны ико­ны пра­вед­но­го Ар­те­мия. От до­сок, на ко­то­рых их пи­са­ли, оста­ва­лись струж­ки. От них боль­ные так­же по­лу­ча­ли ис­це­ле­ния от сво­их неду­гов. На ме­сте об­ре­те­ния мо­щей св. от­ро­ка был ос­но­ван мо­на­стырь, где и по­ло­жи­ли его свя­тые мо­щи.

См. так­же: "Па­мять пра­вед­но­го Ар­те­мия, Вер­коль­ско­го чу­до­твор­ца" в из­ло­же­нии свт. Ди­мит­рия Ро­стов­ско­го.