Конда́к 1.

Избра́нный подви́жниче и и́стинный па́стырю Це́ркве Ру́сския, изря́дный уго́дниче и тве́рдый испове́дниче Христо́в, богоблаже́нне о́тче на́ш Гаврии́ле! Почита́ем тя́ любо́вию и похва́льная воспису́ем ти́: ты́ бо в заточе́нии неотсту́пно пребы́л еси́ ве́рен Христу́, в ско́рбех, тесноте́ и гоне́ниих благодари́вый Бо́га. Не преста́й моли́тися, да спасе́т Госпо́дь взыва́ющих и пою́щих ти́:

Ра́дуйся, о́тче на́ш Гаврии́ле, те́плый моли́твенниче о душа́х на́ших.

И́кос 1.

А́нгельскому житию́ поревнова́вый, от ю́ности чистоту́ и ве́рность Христу́ Бо́гу сохрани́л еси́, Го́сподеви послужи́ти жела́я, вся́ земна́я и вре́менная оста́вил еси́, да приобря́щеши бога́тство неиждива́емое. Сего́ ра́ди зове́м тебе́ си́це:

Ра́дуйся, роди́телей благочести́вых ча́до богоизбра́нное; ра́дуйся, измла́да а́нгельским нра́вом украше́нный.

Ра́дуйся, чи́стое житие́ от ю́ности возлюби́вый; ра́дуйся, в богомы́слии о́трочество твое́ проводи́вый.

Ра́дуйся, от ю́ных ле́т те́ло твое́ к подви́жничеству приучи́вый; ра́дуйся, изде́тска моли́тве и послуша́нию прилежа́вый.

Ра́дуйся, еще́ во о́трочестве к и́ноческому житию́ устреми́выйся; ра́дуйся, во́лю свою́ во́ли Бо́жией покори́вый.

Ра́дуйся, о́тче на́ш Гаврии́ле, те́плый моли́твенниче о душа́х на́ших.

Конда́к 2.

Ви́дя Це́рковь Ру́сскую распужа́ему от безбо́жных и злы́х, не убоя́лся еси́, о́тче Гаврии́ле, угото́вився и ду́шу свою́ за ве́ру положи́ти, те́мже поста́ви тя́ Госпо́дь па́стыря ве́рна и до́бра, да во́диши о́вцы Его́. Мы́ же с благода́рностию взыва́ем Бо́гу: Аллилу́иа.

И́кос 2.

Ра́зумом ти́ свы́ше да́нным, богому́дре Гаврии́ле, поле́зная душа́м я́сно прозрева́ше, те́мже ча́д Христо́вых от ересе́й и раско́лов огражда́ше, и поуче́ньми твои́ми ве́ру и́стинную в сердца́х и́х насажда́ше. Мы́ же, ве́дуще тя́ о спасе́нии все́х пеку́щася, с любо́вию вопие́м ти́:

Ра́дуйся, я́ко я́рость богобо́рцев ни во что́же вмени́л еси́; ра́дуйся, я́ко Це́ркви Бо́жией послужи́ти не убоя́лся еси́.

Ра́дуйся, па́стырю, свы́ше умудре́нный; ра́дуйся, благода́тию Бо́жиею просвеще́нный.

Ра́дуйся, ве́ры и́стинныя ревни́телю; ра́дуйся, христиа́нскаго благоче́стия рачи́телю.

Ра́дуйся, кро́тостию украше́нный; ра́дуйся, смире́нием обогаще́нный.

Ра́дуйся, о́тче на́ш Гаврии́ле, те́плый моли́твенниче о душа́х на́ших.

Конда́к 3.

Си́ла Бо́жия подае́тся с ве́рою призыва́ющим и́мя Его́, тя́ же Госпо́дь сподо́би в годи́ну тя́жкую чи́н а́нгельский прия́ти, и кре́постию Бо́жиею наименова́тися, и облещи́ся во вся́ ору́жия Бо́жия. Ты́ же, прия́в Боже́ственную благода́ть возблагода́ть, вопия́ше Бо́гу: Аллилу́иа.

И́кос 3

Име́яй ве́лию ре́вность о исполне́нии уста́ва церко́внаго, слу́жбу в хра́ме благогове́йно со слеза́ми соверша́л еси́, та́кожде и глаго́лы Бо́жия неуста́нно пропове́дуяй, зело́ усе́рдно па́стырски подвиза́лся еси́, самоотве́рженно Бо́гу и лю́дям служа́. Те́мже и мы́, горе́ние твое́ по Бо́зе ви́дяще, пое́м ти́ такова́я:

Ра́дуйся, чистоты́ а́нгельския испо́лненный челове́че; ра́дуйся, неуста́нный слове́с Бо́жиих пропове́дниче.

Ра́дуйся, Це́ркве Христо́вы во́ине до́блий; ра́дуйся, ра́бе благи́й и ве́рный.

Ра́дуйся, апо́стольских преда́ний храни́телю; ра́дуйся, церко́внаго уста́ва блюсти́телю.

Ра́дуйся, Правосла́вия испове́дниче непрело́жный; ра́дуйся, Го́спода Вы́шняго служи́телю благогове́йный.

Ра́дуйся, о́тче на́ш Гаврии́ле, те́плый моли́твенниче о душа́х на́ших.

Конда́к 4.

Бу́ря я́рости и гоне́ний нападе́ на Це́рковь Ру́сскую и погрузи́ в пучи́ну ско́рби лю́ди Бо́жия: мно́зи бо ве́рныя в заточе́нии томля́хуся. Ты́ же, о́тче любвеоби́льне, о те́х печа́луя, о́тай с духо́вными ча́ды твои́ми, христиа́нския любве́ испо́лненными, приноше́ния собира́ше и в темни́цы посыла́ше. Мы́ же, и́стинное твое́ братолю́бие ублажа́юще, взыва́ем Бо́гу: Аллилу́иа.

И́кос 4.

Слы́шаху безбо́жницы, я́ко па́стырь почита́ем еси́ ты́, ло́жными свиде́тельствы наведо́ша на тя́ чреду́ гоне́ний долговре́менную. Ты́ же, помышля́я, я́ко сие́ е́сть любве́ и ве́рности твоея́ испыта́ние, со смире́нием прия́л еси́ кре́ст тво́й, ра́дуяся, я́ко сподо́би тя́ Госпо́дь пострада́ти и проити́ сквозе́ ско́рби, правосла́вным вы́павшия. Те́мже, му́жество твое́ сла́вяще, велича́ем тя́ словесы́ таковы́ми:

Ра́дуйся, па́стырю благи́й и любо́вию бога́тый; ра́дуйся, ми́лости и сострада́ния испо́лненный.

Ра́дуйся, христиа́нскаго милосе́рдия ве́рный учи́телю; ра́дуйся, та́йных де́л любве́ неуста́нный де́лателю.

Ра́дуйся, ве́рный ра́бе, Христу́ после́довавый; ра́дуйся, кре́ст Его́ на ра́мо твое́ взе́мый.

Ра́дуйся, клеветы́ со смире́нием прия́вый; ра́дуйся, поноше́ния с кро́тостию претерпе́вый.

Ра́дуйся, о́тче на́ш Гаврии́ле, те́плый моли́твенниче о душа́х на́ших.

Конда́к 5.

Боже́ственныя ми́лости испо́лненный, преди́вный о́тче Гаврии́ле, а́ки ве́рный па́стырь Христо́вы Це́ркве, и в заточе́нии твое́ служе́ние не оста́вил еси́, оба́че в тя́жких испыта́ниих усе́рднее бли́жним помога́я, просвеща́ше вся́ све́том ве́ры Правосла́вныя. Мы́ же, любо́вию твое́ю согрева́емии, благода́рне вопие́м Бо́гу: Аллилу́иа.

И́кос 5.

Ви́девше в заточе́нии пребыва́ющии е́же по Бо́зе житие́ твое́, преподо́бне, не то́кмо благогове́йнии к тебе́ стица́хуся, Ца́рствие Небе́сное твои́м хода́тайством улучи́ти жела́юще, но и разбо́йницы, по дело́м свои́м восприе́мшии, познава́ху тя́ отца́, любо́вию преиспо́лненнаго, и по́мощи моли́твенныя проша́ху. Те́мже, вои́стину тя́ па́стыря до́бра почита́юще, прино́сим ти́ такова́я:

Ра́дуйся, па́стырскаго до́лга непоколеби́мый исполни́телю; ра́дуйся, ми́ра Бо́жия мироуха́нный пода́телю.

Ра́дуйся, Бо́жия благода́ти ди́вный таи́нниче; ра́дуйся, обремене́нных и озло́бленных ско́рый помо́щниче.

Ра́дуйся, скорбя́щим ве́лие утеше́ние подава́яй; ра́дуйся, незло́бием твои́м жестокосе́рдых умягча́яй.

Ра́дуйся, в заточе́нии па́ству твою́ не оста́вивый; ра́дуйся, милосе́рдный о́тче, в моли́тве се́рдцем горе́вый.

Ра́дуйся, о́тче на́ш Гаврии́ле, те́плый моли́твенниче о душа́х на́ших.

Конда́к 6.

Про́поведь ве́ры христиа́нския яви́ся само́ житие́ твое́, досточу́дне Гаврии́ле, его́же не могу́ще терпе́ти богобо́рцы, не взира́юще на седи́ны твоя́ и боле́зни, вся́кая преще́ния тебе́ творя́ху, ты́ же, святы́й о́тче, вся́ страда́ния безро́потно и му́жественно претерпева́яй, в благи́й Про́мысл Бо́жий непоколеби́мо ве́ровал еси́, взыва́я Творцу́: Аллилу́иа.

И́кос 6.

Возсия́ на тебе́ Бо́жия благода́ть, преподо́бне, за всеце́лое себе́ отрече́ние бли́жняго ра́ди, те́мже и просла́ви тя́ Госпо́дь дарми́ Ду́ха Свята́го, е́же боле́зни исцеля́ти и суды́ Бо́жии прозрева́ти. Мы́ же, дивя́щеся таково́му о тебе́ Бо́жию произволе́нию, приле́жно вопие́м тебе́ си́це:

Ра́дуйся, дарми́ Ду́ха Свята́го обогаще́нный; ра́дуйся, сосу́де Бо́жия благода́ти испо́лненный.

Ра́дуйся, свети́льниче ве́ры, горя́й и светя́й; ра́дуйся, сострада́нием к бли́жнему на́с воспламеня́яй.

Ра́дуйся, в не́мощи твое́й тя́жкия труды́ понесы́й; ра́дуйся, лю́тый мра́з, бие́ния и поруга́ния претерпе́вый.

Ра́дуйся, сме́ртное испи́в, по глаго́лу Бо́жию, неврежде́н бы́вый; ра́дуйся, за враги́ твоя́ по за́поведи Христо́ве моли́выйся.

Ра́дуйся, о́тче на́ш Гаврии́ле, те́плый моли́твенниче о душа́х на́ших.

Конда́к 7.

Хотя́ все́м се́рдцем твои́м, блаже́нне Гаврии́ле, еди́ному Го́споду рабо́тати, себе́ ни во что́же вмени́л еси́, труды́ к трудо́м в ду́се кро́тости и смире́ния прилага́я, посто́м и бде́нием пло́ть свою́ умерщвля́я, дерзнове́ние в моли́тве стяжа́л еси́, все́х призыва́я ве́рно сла́вити Бо́га, в Тро́ице Еди́наго, и воспева́ти Ему́: Аллилу́иа.

И́кос 7.

Но́ваго показа́ тя́ Госпо́дь засту́пника и моли́твенника о на́с, гре́шных, я́ко по́мощию безме́рною и любо́вию неисчерпа́емою мно́гия упа́сл еси́ ко спасе́нию. Мы́ же, чту́ще святу́ю па́мять твою́, со умиле́нием взыва́ем ти́:

Ра́дуйся, стезю́ мона́шескую усе́рдно проходи́вый; ра́дуйся, на ни́ве Христо́ве изря́дно потруди́выйся.

Ра́дуйся, всеце́лое послуша́ние архипа́стырем твои́м име́вый; ра́дуйся, посто́м и бде́нием пло́ть твою́ изнури́вый.

Ра́дуйся, о́тче чадолюби́вый, о де́тех твои́х те́пле моли́выйся; ра́дуйся, о бли́жних твои́х приле́жно пеки́йся.

Ра́дуйся, виногра́да Христо́ва ве́рный де́лателю; ра́дуйся, за ны́ пред Бо́гом усе́рдный хода́таю.

Ра́дуйся, о́тче на́ш Гаврии́ле, те́плый моли́твенниче о душа́х на́ших.

Конда́к 8.

Стра́нен бы́в и бездо́мен, из заточе́ния в ве́сь свою́ прише́л еси́, блаже́нне, не име́яй где́ главу́ приклони́ти, во все́м уподо́бивыйся Христу́, я́коже дру́зи и и́скреннии твои́ дале́че от тебе́ ста́ша и боя́хуся у́бо к себе́ прия́ти, науще́нием клеветни́к безбо́жных тя́ врага́ наро́да имену́юще. Но ве́рен Бо́г лю́бящим Его́, и́бо не оста́ви тя́, и Тому́ пое́м: Аллилу́иа.

И́кос 8.

Все́м бы́л еси́ вся́, да мно́гия ко Христу́ приведе́ши, те́мже ча́да твоя́, све́том ве́ры, наде́жды и любве́ твоея́ озаря́емии, стица́хуся к тебе́, досточу́дне Гаврии́ле, со всея́ страны́ на́шея. Ты́ же, я́ко чадолюби́вый оте́ц, неду́ги своя́ превозмога́я, без у́стали дне́м и но́щию две́ри твоея́ души́ стра́ждущим отверза́л еси́. Мы́ же ти́, я́ко благоде́телю, с любо́вию те́пле вопие́м такова́я:

Ра́дуйся, мно́ги ско́рби и боле́зни Бо́га ра́ди понесы́й; ра́дуйся, стра́нничеством твои́м Христу́ уподо́бивыйся.

Ра́дуйся, неисчерпа́емый кла́дязю ве́ры, наде́жды и любве́; ра́дуйся, се́рдце твое́ уподо́бивый неопали́мей купине́.

Ра́дуйся, о си́рых и убо́гих с любо́вию попече́ние име́вый; ра́дуйся, бе́дных вдови́ц в ну́ждах и́х заступа́вый.

Ра́дуйся, в беда́х и напа́стех по́мощи ско́рый пода́телю; ра́дуйся, о все́х притека́ющих к тебе́ ве́рный предста́телю.

Ра́дуйся, о́тче на́ш Гаврии́ле, те́плый моли́твенниче о душа́х на́ших.

Конда́к 9.

Вся́кия страда́ния и тяготы́ в жи́зни твое́й непоколеби́мо претерпе́л еси́, в се́рдце твое́м Еди́наго Го́спода име́яй, те́мже ми́рныя, блаже́нныя и христиа́нския кончи́ны от Бо́га сподо́бился еси́, стра́нствие земно́е соверши́л еси́ и в Го́рния оби́тели всели́лся еси́, вознося́ пе́снь Бо́гу: Аллилу́иа.

И́кос 9.

Вети́ям многовеща́нным не довле́ет слове́с во е́же изрещи́ вся́ чу́вствия, и́миже испо́лнишася сердца́ ве́рных, с любо́вию к честны́м оста́нком твои́м стека́ющихся, и со слеза́ми ко гро́бу твоему́ припа́дающих, и помина́ющих тя́ словесы́ таковы́ми:

Ра́дуйся, кри́не, благоуха́ннаго ми́ра Христо́ва испо́лненный; ра́дуйся, свети́льниче лучеза́рный, Боже́ственным еле́ем напо́лненный.

Ра́дуйся, лозо́ неувяда́емая, мно́г пло́д прине́сшая; ра́дуйся, кади́льнице злата́я, фимиа́м моли́твы к Бо́гу возне́сшая.

Ра́дуйся, адама́нте, кре́пость в терпе́нии на́м показа́вый; ра́дуйся, ка́меню, о́браз тве́рдости в ве́ре на́м яви́вый.

Ра́дуйся, сто́лпе непоколеби́мый Це́ркве Правосла́вныя; ра́дуйся, све́тлая заре́ незаходи́маго Со́лнца пра́вды.

Ра́дуйся, о́тче на́ш Гаврии́ле, те́плый моли́твенниче о душа́х на́ших.

Конда́к 10.

Спасе́ние души́ твоея́ от Бо́га улучи́вый, преди́вне Гаврии́ле, в ра́дость Го́спода вше́л еси́, и ны́не, венце́м нетле́нным венча́нный, со А́нгелы лику́еши, взира́я на Всецаря́ Творца́; Того́ моли́, да сподо́бит Госпо́дь и на́с ку́пно с тобо́ю воспева́ти Ему́: Аллилу́иа.

И́кос 10.

Стена́ бы́в при жи́зни все́м приходя́щим к тебе́, та́кожде и по сме́рти на́с не оставля́еши твои́м заступле́нием; ду́хом ны́не пребыва́яй у Престо́ла Вы́шняго, за все́х с ве́рою и любо́вию тебе́ моля́щихся те́пле предста́тельствуеши и по́мощь неоску́дную подае́ши. Мы́ же тебе́ я́ко мо́щному засту́пнику о душа́х на́ших благода́рственно пое́м сицева́я:

Ра́дуйся, от ле́т ра́нних Бо́га все́м се́рдцем возлюби́вый; ра́дуйся, ве́рен Тому́ до конца́ дни́й твои́х пребы́вый.

Ра́дуйся, безразде́льне се́рдце свое́ Го́сподеви вручи́вый; ра́дуйся, те́мже Ца́рствие Небе́сное унасле́дивый.

Ра́дуйся, все́х к тебе́ прибега́ющих ско́рый услы́шателю; ра́дуйся, о все́х тебе́ с ве́рою моля́щихся приле́жный попечи́телю.

Ра́дуйся, помо́щниче все́м в беда́х и напа́стех су́щим; ра́дуйся, цели́телю душе́ю и те́лом боле́знующих.

Ра́дуйся, о́тче на́ш Гаврии́ле, те́плый моли́твенниче о душа́х на́ших.

Конда́к 11.

Пе́снь благода́рственную воспису́ют лю́дие правосла́внии, ра́дующеся о толи́ком благодея́нии Бо́жием, я́ко Це́рковь Ру́сская ны́не украси́ся со́нмом но́вых му́чеников и испове́дников, с ни́миже и ты́, о́тче Гаврии́ле, вку́пе веселя́ся в черто́зех ра́йских, воспева́еши Бо́гу: Аллилу́иа.

И́кос 11.

Све́т ве́лий ве́ры христиа́нския си́ливыйся сатана́ затми́ти, се́дмьдесят ле́т му́чаше люди́й правосла́вных, те́мже у́бо возсия́ неви́данное досе́ле му́ченическое во́инство Христа́ Бо́га на́шего, и́мже кня́зь тьмы́ посра́млен бы́сть. Тебе́ же, о́тче Гаврии́ле, я́ко ве́рному ра́тнику во́инства сего́, воспева́ем си́це:

Ра́дуйся, преще́ний нечести́выя вла́сти не убоя́выйся; ра́дуйся, в ро́де се́м Го́спода испове́дати не постыди́выйся.

Ра́дуйся, и́го Христо́во на ра́мена своя́ взе́мый; ра́дуйся, всле́д Го́спода те́сными враты́ вше́дый.

Ра́дуйся, вме́сто сла́дости земны́я те́рния избра́вый; ра́дуйся, нетле́нным венце́м от Бо́га украси́выйся.

Ра́дуйся, я́ко Христа́ ра́ди и Ева́нгелия себе́ отве́рглся еси́; ра́дуйся, я́ко нището́ю духо́вною бога́тство неиждива́емое стяжа́л еси́.

Ра́дуйся, о́тче на́ш Гаврии́ле, те́плый моли́твенниче о душа́х на́ших.

Конда́к 12.

Благода́ть Бо́жия излия́ мо́ре чуде́с от честны́х моще́й твои́х, преди́вне Гаврии́ле, и собра́ вся́ ве́рныя, с благогове́нием и любо́вию чту́щия святу́ю па́мять твою́, не оставля́еши бо и ны́не на́с предста́тельством твои́м, оби́димыя заступа́еши, боля́щия исцеля́еши, в беду́ впа́дшия свобожда́еши и все́х на́с сохраня́еши моли́твами твои́ми, да вы́ну пое́м Бо́гу: Аллилу́иа.

И́кос 12.

Пою́ще пе́снь благодаре́ния Всеще́дрому и Человеколю́бцу Бо́гу, просла́вльшему тя́ я́ко ве́рнаго испове́дника Це́ркве Ру́сския, ублажа́ем боле́зни и поноше́ния твоя́, я́же за Христа́ претерпе́ти сподо́бился еси́, восхваля́ем по́двиги и труды́ твоя́, и́миже во сла́ву Бо́жию порабо́тал еси́, почита́ем па́стырскую кро́тость и смире́ние твое́, я́ко до́бре упа́сл еси́ ча́да правосла́вная, и воспева́ем тя́ хвале́ньми сицевы́ми:

Ра́дуйся, служи́телю Христо́в и люби́миче Бо́жий; ра́дуйся, па́стырю благи́й, смире́нный и кро́ткий.

Ра́дуйся, ну́ждным и отягоще́нным нело́жное вспоможе́ние; ра́дуйся, скорбя́щим и обурева́емым при́сное утеше́ние.

Ра́дуйся, архимандри́те, духо́вныя о́вцы до́бре храни́вый; ра́дуйся, дру́же Бо́жий, Кре́ст Христо́в до́блестне носи́вый.

Ра́дуйся, люби́маго Го́спода ли́к пресве́тлый ви́дети сподо́бивыйся; ра́дуйся, я́ко во све́тлостех святы́х Его́ ны́не пребыва́еши.

Ра́дуйся, о́тче на́ш Гаврии́ле, те́плый моли́твенниче о душа́х на́ших.

Конда́к 13.

О пресла́вный и достохва́льный испове́дниче Христо́в, преподо́бне и богоно́сне о́тче на́ш Гаврии́ле, па́стырю кро́ткий и чадолюби́вый! Во умиле́нии моле́бно тебе́ предстоя́щих не пре́зри, но твои́м предста́тельством заступи́ и помози́ богоуго́дно тече́ние жи́зни на́шея сконча́ти, Христа́ Бо́га ве́рно и небоя́зненне испове́дующе, да ны́не и при́сно с тобо́ю вку́пе и все́ми святы́ми пое́м Ему́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельскому житию́ поревнова́вый, от ю́ности чистоту́ и ве́рность Христу́ Бо́гу сохрани́л еси́, Го́сподеви послужи́ти жела́я, вся́ земна́я и вре́менная оста́вил еси́, да приобря́щеши бога́тство неиждива́емое. Сего́ ра́ди зове́м тебе́ си́це:

Ра́дуйся, роди́телей благочести́вых ча́до богоизбра́нное; ра́дуйся, измла́да а́нгельским нра́вом украше́нный.

Ра́дуйся, чи́стое житие́ от ю́ности возлюби́вый; ра́дуйся, в богомы́слии о́трочество твое́ проводи́вый.

Ра́дуйся, от ю́ных ле́т те́ло твое́ к подви́жничеству приучи́вый; ра́дуйся, изде́тска моли́тве и послуша́нию прилежа́вый.

Ра́дуйся, еще́ во о́трочестве к и́ноческому житию́ устреми́выйся; ра́дуйся, во́лю свою́ во́ли Бо́жией покори́вый.

Ра́дуйся, о́тче на́ш Гаврии́ле, те́плый моли́твенниче о душа́х на́ших.

Конда́к 1.

Избра́нный подви́жниче и и́стинный па́стырю Це́ркве Ру́сския, изря́дный уго́дниче и тве́рдый испове́дниче Христо́в, богоблаже́нне о́тче на́ш Гаврии́ле! Почита́ем тя́ любо́вию и похва́льная воспису́ем ти́: ты́ бо в заточе́нии неотсту́пно пребы́л еси́ ве́рен Христу́, в ско́рбех, тесноте́ и гоне́ниих благодари́вый Бо́га. Не преста́й моли́тися, да спасе́т Госпо́дь взыва́ющих и пою́щих ти́:

Ра́дуйся, о́тче на́ш Гаврии́ле, те́плый моли́твенниче о душа́х на́ших.

Моли́тва.

О па́стырю до́брый и до́блий во́ине Христо́в, ско́рый помо́щниче и те́плый засту́пниче, богоблаже́нный уго́дниче Бо́жий и Правосла́вия тве́рдый испове́дниче о́тче Гаврии́ле! Не оста́ви на́с моли́твами твои́ми, с любо́вию к тебе́ притека́ющих, ве́лие бо дерзнове́ние ко Го́споду стяжа́л еси́. Ты́ бо, от ю́ности жи́знь всеце́ло Бо́гу посвяти́в, о́гнь любве́ Боже́ственныя в се́рдце твое́м возже́гл еси́, наипа́че же нищету́ духо́вную стяжа́в, я́ко ра́б благи́й, дела́ богоуго́дная кро́тко и смире́нно твори́л еси́. Те́мже моли́твами твои́ми, всечестны́й о́тче, уврачу́й ду́ши на́ша, грехо́м изъя́звленныя, неду́гующия исцели́, младе́нцы воспита́й, ю́ность наста́ви, ста́рость поддержи́, малоду́шныя уте́ши, вдови́цам предста́ни, си́рых защити́, супру́жество в ми́ре и единомы́слии соблюди́, расточе́ныя собери́, прельще́ныя обрати́ и соедини́ Святе́й Це́ркви. Е́й, свя́тче Бо́жий! Моли́твами твои́ми умягчи́ сердца́ на́ша, помози́ на́м ми́лостивыми бы́ти и бли́жним с любо́вию послужи́ти, по отше́ствии же на́шем от земны́х гла́с от Влады́ки Христа́, Бо́га на́шего, услы́шати: прииди́те, благослове́ннии Отца́ Моего́, насле́дуйте угото́ванное ва́м Ца́рствие от сложе́ния ми́ра. Ами́нь.