Акафистник

Помочь сайту
·
·
·
·

Акафист святому преподобноисповеднику Севастиану (Фомину), Карагандинскому

Память: 19 (6) апреля, 22 (9) октября

Не утвержден для общецерковного использования.

Кондак 1

Избранный от Пастыреначальника Христа Иисуса в годину лютых гонений, от безбожныя власти воздвигнутых, преемником быти духовныя благодати старчества Оптинскаго, кроткий за веру православную страдальче и мужественный исповедниче Христов, граду Караганде богодарованный светильниче веры и благочестия, всея Казахстанския страны неусыпный хранителю, Церкви Русския похвало и христоименитых людей радование, преподобне отче Севастиане. Ублажаем подвиги и труды твоя, ради наследия Царства Небеснаго тобою подъятыя и, прославльшаго тя Господа славы прославляюще, с любовию теплою вопием ти: Радуйся, преподобне Севастиане, веры благочестивыя исповедниче и образе кротости духовныя.

Икос 1

Ангелов Творец, предуведивый тя от сотворения мира, в последния сия времена показа тя, преподобне Севастиане, Ангела быти невещественным житием, священнотаинника же и провозвестника благодати, пророка же, яко будущая прозиравшаго, твердаго исповедника, яко за Христа гонения и мучения претерпевшаго, и научи нас воспевати тебе таковая:

Радуйся, родителей благочестивых отрасль благоуханная;

Радуйся, в купели святаго крещения благодатию Духа Святаго просвещенный.

Радуйся, благочестию родительскому измлада поревновавый;

Радуйся, от отца и матери ко преподобному Амвросию в Оптину пустынь на благословение приведенный.

Радуйся, иноческое житие вседушевне возлюбивый;

Радуйся, в творении заповедей Божиих себе чиста издетска утвердивый;

Радуйся, от юности твоея вся мира сего красная, Бога ради, презревый.

Радуйся, Царствия Небеснаго взыскуя, в Оптиной пустыни под осенением духовных старцев поселивыйся;

Радуйся, своея воли исполнения совершенно отвергшися.

Радуйся, послушанию и смирению вседушно покоривыйся;

Радуйся, преподобного старца Иосифа кроткий учениче и послушниче,

Радуйся, богоноснаго старца Нектария сподвижниче и сотаинниче;

Радуйся, преподобне Севастиане, веры благочестивыя исповедниче и образе кротости духовныя.

Кондак 2

Видяще преподобный Нектарий, яко за кротость твою и смирение дарова ти Небесный Дародатель благодать прозрения духовнаго, чадам своим в тебе, преподобне Севастиане, преемника себе быти указа, за сострадание и милосердие твое к страждущим "летом" тя именуя и научая всех благих Промыслителю — Богу пети: Аллилуиа.

Икос 2

Разум, зарями Духа Святаго осияваем, имея, евангельски Бога, в Троице певаемаго Ипостасей, возлюбил еси, досточтиме. Суетную славу мира оставив, спасительныя Оптинскаго старчества достигл еси пристани и, взем крест свой, последовал еси Христу со духовными старцы, постников и воздержников житие держа во смирении. Сего ради вернии научишася воспевати тебе:

Радуйся, тесный и прискорбный путь паче пространнаго возлюбивый;

Радуйся, многомятежие мира презревый.

Радуйся, яко боголюбезную чистоту душевную и телесную сохранил еси;

Радуйся, яко постом и молитвою пременил еси тленная на нетленная.

Радуйся, яко постным воздержанием плоть твою духови покорил еси;

Радуйся, яко послушанием и безмолвием страсти душевныя умертвил еси.

Радуйся, яко слезами покаяния землю сердца твоего напоил еси;

Радуйся, яко земная отринув, ум твой к небесным благам возвел еси.

Радуйся, яко сладчайшее имя Иисусово во уме твоем молитвою присно обносил еси;

Радуйся, Им, яко Святых Святейшим Словом, Превечнаго Бога Отца Духом Святым познал еси.

Радуйся, яко благодать Утешителя Духа Истины чистотою сердца твоего стяжал еси;

Радуйся, яко силу духовнаго прозрения и старчества от Бога приял еси;

Радуйся, преподобне Севастиане, веры благочестивыя исповедниче и образе кротости духовныя.

Кондак 3

Силою благодати Божия чрез духовное окормление старцев Оптинских веден был еси тесным путем иноческаго жития к восприятию жребия пастырскаго в Церкви Святей служения и подвига исповедничества Христа Распята и Воскресша. Ему же во всем житии твоем, преподобне Севастиане, воспевал еси: Аллилуиа.

Икос 3

Имуще в сердце твоем веру твердую, надежду несумненную, любовь истинную к Распятому за ны Христу Богу нашему, во время воздвигнутых богоборческой властию гонений на Церковь Божию, со смирением и кротостию подклонил еси главу твою престолу Благодати, дар священства от рук архиерейских трепетным сердцем приемля ради спасения гибнущих от атеистическаго злосмрадия. Тем же от усердия нашего восписуем ти таковая:

Радуйся, Христу, Доброму Пастырю, усердно послуживый;

Радуйся, священнотаинниче Христов, дарами Духа Святаго сияющий.

Радуйся, душу твою за врученное стадо христовых словесных овец положивый;

Радуйся, ищущим Царствия Небеснаго спасительнаго пути проповедниче.

Радуйся, взыскующим горняго Иерусалима богомудрый вождю;

Радуйся, во благочестии труждающимся богодарованный наставниче.

Радуйся, обуреваемым страстьми греховными добрый кормчий;

Радуйся, немощных и малоискусных терпеливый учителю.

Радуйся, изнемогающим от уныния и печали благоприятное утешение;

Радуйся, беспомощным скоропредстательный помощниче.

Радуйся, черноризцам предивный отец и старец прозорливый;

Радуйся, уставов Оптинских хранителю ревностный.

Радуйся, преподобне Севастиане, веры благочестивыя исповедниче и образе кротости духовныя.

Кондак 4

Бури лютых гонений, от безбожныя власти воздвиженныя, не убоявся, со всеми Новомучениками и Исповедниками Российскими подъял еси на себе благое иго Христово и, горя духом, несл еси легкое бремя Его. Хладных пределов Караганды достигл еси, идеже бесчисленное множество невинных страдальцев души своя Богу предаша. Ты же, отче благосерде, молитвы твоя о упокоении их усердно Агнцу Божию приносил еси, надгробное рыдание творяще песнью: Аллилуиа.

Икос 4

Слыша, яко чада церковная по всему лицу Святой Руси за отцепреданную православную веру лютую смерть и жестокия гонения приемлют, не устрашился еси, блаженне, долготы жестокаго пути, в онь же смиренно пошел еси, от богопротивных гонителей ссылаем. Зиму лютую и пустынный зной летний и ярость огненную лагерных пыток терпением твоим победил еси, теплоту духовную блаженства вечнаго стяжав. За еже мы вопием тебе таковая:

Радуйся, нищетою духовною блаженства Царства Небеснаго унаследовавый;

Радуйся, плачем о грехах утешение Христово приявый.

Радуйся, алчбою и жаждою правды Божия нетленныя пищи небесныя насытивыйся;

Радуйся, милостию сострадания к ближним милость Божию восприявый.

Радуйся, во страданиях твоих чистым сердцем Бога зревый;

Радуйся, во умиротворении озлобленных, яко сын Божий нареченный.

Радуйся, во изгнании правды ради блаженства Царства Небеснаго приобщивыйся;

Радуйся, в ложном поношении и злословии от нечестивых во Христа облекийся.

Радуйся, Божественному Промышлению себе конечне вручивый;

Радуйся, во изгнании от земнаго Отечества отцу верных Аврааму подражавый.

Радуйся, в терпении болезней и скорбей Иовлеву крепость стяжавый;

Радуйся, в кротком терпении гонений Давидово смирение проявивый.

Радуйся, преподобне Севастиане, веры благочестивыя исповедниче и образе кротости духовныя.

Икос 5

Боготечная звезда, Оптинскими старцами возженная, явился еси, отче Севастиане, досточтиме. От Бога священнодействовати положен был еси воистину, умом чистым, сердцем смиренным и душею кроткою службу Тому принося, беды претерпел еси и гонения, и болезни, исповедания ради Божественныя Истины, юже житием и словесы твоими заключенным в тюрьмах и лагерях и всем ссыльным являл еси, немощныя укрепляя и верныя утверждая благодарне пети Богу: Аллилуиа.

Кондак 5

Видевше окружившия тя в лагерных узах людие кротость и любовь твою, чистотою совести твоея сияющия, удивляхуся крайнему терпению твоему. Мы же, ведяще многотрудная страдания твоя и болезни, ублажаем тя, апостольски в заключенных благовестившаго и помраченныя смыслы человеков просветившаго и прежде диавольскую ловитву ко Христу приведшаго, и благодарне зовем ти:

Радуйся, крине благоуханный, в степях Карагандинских процветый;

Радуйся, миром христоподражательных добродетелей иссохшия души исцеливый.

Радуйся, неядением лютым и долготною жаждею в темнице многовременне томимый;

Радуйся, в лишениях сих Христа, пособствующа тебе обретый.

Радуйся, николиже постнаго воздержания оставивый;

Радуйся, молитвою к Богу присно пламенеющий.

Радуйся, благодатию Духа Святаго невидимо укрепляемый;

Радуйся, ея же силою заблудшия от диавольския ловитвы изымаяй.

Радуйся, тех приводяй ко единей, Святей, Соборней и Апостольстей Церкви;

Радуйся, покаянию истинному и благочестивой жизни их научаяй.

Радуйся, тако плач неутешный духовом злобы поднебесныя наведый;

Радуйся, прежде бесовом рабски служившия ко Господу обративый и спасый.

Радуйся, преподобне Севастиане, веры благочестивыя исповедниче и образе кротости духовныя.

Кондак 6

Проповедует Казахстанская страна, приявшая землею своею токи кровей Новомучеников Российских и бесчисленная страдальческая тех телеса многолетне в недрех своих покоящая, равноангельное житие, равноапостольския труды и чудес множество преподобнаго Карагандинскаго старца схиархимандрита Севастиана исповедника, научая верных Подвигоположнику Христу Иисусу пети: Аллилуиа.

Икос 6

Возсия обширным просторам Казахстана из богоспасаемаго града Караганды просвещение совершенных твоих добродетелей, преподобне отче Севастиане. Ты бо, яко облак светел и росоносен явился еси, пламень праведно движимаго на ны за грехи наша гнева небеснаго утишающий и зной страстей душевных и телесных охлаждающий, иссохшия сердца наша оживляющий и плоды добродетелей приносити помогающий всем воспевающим ти таковая:

Радуйся, бесплодную Казахстанскую степь плодами добродетелей твоих облагоухавый;

Радуйся, град Караганду, яко Церкви Русския Голгофу, сердцем твоим возлюбивый.

Радуйся, в нем во образ Оптиной пустыни во имя Пресвятыя Богородицы пречудный храм устроивый;

Радуйся, в том — в память Предтеченского скита в честь Крестителя Иоанна престол благодати воздвигнувый.

Радуйся, в храме сем, яко в новой обители Оптиной вся благолепно устроивый;

Радуйся, в молитве, священстве, душепопечении и старчестве нелестно подвизавыйся.

Радуйся, яко днем бдел еси и нощию не дал еси сна довольно очима твоима;

Радуйся, яко многия священники, монахи и инокини, от лукавых гонителей рассеянныя, на месте сем собрал еси.

Радуйся, яко мирян множество под благодатный кров Царицы Небесныя привел еси;

Радуйся, яко монашествующим явился еси добрый кормчий.

Радуйся, яко и всему стаду твоему пастырь и учитель предобрый был еси;

Радуйся, не яко господствуяй, но яко служай во обращенных тобою пожил еси.

Радуйся, преподобне Севастиане, веры благочестивыя исповедниче и образе кротости духовныя.

Кондак 7

Хотя отечества небеснаго достигнути, перстною плотию обложен, дух твой молитвою воскрилял еси и, к Богу умом твоим восходя, горния доброты зрел еси славу, со всеми ангельскими силами поя Богу: Аллилуиа.

Икос 7

Новаго тя показа гражданина горняго Иерусалима Небесный Домовладыка: мира красоту и яже в нем тленная ни во что же вменившаго, пустынное житие с равноангельными Оптинскими старцами предпочетающа, священства одежды чистотою жития убелившаго, поношения и гонения, Христа ради, с радостию претерпевшаго и многообразными дарами Духа Святаго преукрашеннаго. Сего ради вернии научишася воспевати тебе:

Радуйся, от юности в творении заповедей Господних потрудивыйся;

Радуйся, во иночестем житии невещественным ангельским чинам уподобивыйся.

Радуйся, духоносных Оптинских старцев и всех преподобных отцев сликовниче;

Радуйся, добропобедным мучеником и Христовым исповедником сопричастниче.

Радуйся, Божиих священнотаинников благоговейный сослужителю;

Радуйся, веры православныя утверждение.

Радуйся, церкви непоколебимый столпе;

Радуйся, пастырю, душу за стадо твое положити готовый.

Радуйся, многия муки и злохуления в гонении за Христа претерпевый;

Радуйся, твердым веры исповеданием вернаго служителя Небеснаго Царя себе быти показавый.

Радуйся, скорбми многими в радость Господа вшедый;

Радуйся, оную всем приходящим к тебе обильно подающий.

Радуйся, преподобне Севастиане, веры благочестивыя исповедниче и образе кротости духовныя.

Кондак 8

Страшна бысть демонам твоя, преподобне отче Севастиане, молитва, кротости и смирения исполненная. Тоя бо светом выну озаряем, Христов ум стяжал еси, неизглаголанная таинства познавая и будущая, яко настоящая созерцая. Всех приходящих к тебе от демонскаго дручения свобождал еси и на путь истины и спасения наставлял еси, Богу вопия: Аллилуиа.

Икос 8

Весь желанием божественным объят был еси, священне, житие равноангельное на земли пожил еси и желание получил еси конечное: в светозарныя дни Пасхального торжества богоносною душею твоею в небесныя кровы отлетел еси, и престолу Пресвятыя Троицы в радости святых предстоиши и слышиши от нас похвальная сия:

Радуйся, от земнаго Пасхального торжества в радость Пасхи вечныя восшедый;

Радуйся, на земли всеконечне греху умерый, на небеси нетления бессмертия приобщивыйся.

Радуйся, яко Святых Святейшему Иисусу Сладчайшему во славе вечной предстоиши;

Радуйся, яко о всех чтущих память твою, пред Ним ходатайствуеши.

Радуйся, сугубую благодать от Него приявый ищущим спасения помогати;

Радуйся, даром врачевания недуг душевных и телесных от Него прославленный.

Радуйся, милости Божия струя неизсякаемая;

Радуйся, радости духовныя, тишины же и мира источниче неисчерпаемый.

Радуйся, светлый облаче, зной страстей греховных утоляющий;

Радуйся, роса благодатная, сердца верных орошающая и веселящая.

Радуйся, светильниче, светом добродетелей в нощи мира сего нам присно сияющий;

Радуйся, грозде виноградника Христова, благодатно Духа Всесвятаго питающий нас и веселящий.

Радуйся, преподобне Севастиане, веры благочестивыя исповедниче и образе кротости духовныя.

Кондак 9

Всякое естество ангельское удивися великому свыше тебе дарованию, яко небесная пресветлыя обители восприяша тя, преподобне Севастиане прозорливе, новаго гражданина со бесплотными Силами и богоносных отец соборы водворяющася, со апостолы, пророки и святители ликовствующа, со мученики и праведники торжествующа и вопиюща Богу: Аллилуиа.

Икос 9

Витии суемудреннии, гордынею ослепленныя, послушавша гласа человекоубийцы искони и отца лжи диавола, яко звери дикия, яростию безбожия дышущия, воздвигоша на Невесту Божию — Святую Церковь гонения лютыя, в них же Подвигоположник Христос Господь, яви тя, досточтиме, Православия светильника и изрядна исповедника, научая верных воспевати тебе:

Радуйся, мучений за исповедание истиннаго Бога не устрашивыйся;

Радуйся, душу твою за веру православную положити не отрекийся.

Радуйся, прещений безбожныя власти не убоявыйся;

Радуйся, во изгнании твоем к познанию Бога мучителей привести потщавыйся.

Радуйся, иссохшую пустыню сердец их слезною молитвою твоею удобривый;

Радуйся, кротостию и молчаливым терпением твоим семена слова Евангельскаго в души их посеявый.

Радуйся, грозныя тучи темных их помыслов силою молитв твоих рассеявый;

Радуйся, данною ти от Бога благодатию к покаянию и сокрушению сердечному тех приводивый.

Радуйся, врата Царствия Небеснаго тем отверзавый;

Радуйся, водою ключевою тех напояя, воду нетления вечнаго им подававый.

Радуйся, пост и воздержание храня, пищу и одежду заключенным раздававый;

Радуйся, яко и скоти тебе любляша и в зимний мраз теплом тел своих тебе согреваша.

Радуйся, преподобне Севастиане, веры благочестивыя исповедниче и образе кротости духовныя.

Кондак 10

Спасти хотя род человеческий, Сый со Отцем на престоле святем, пришед на землю, от Неискусобрачныя Девы родися, плотию распныйся и погребыйся и воскресый, и на небеса паки восшедый, глаголя: аще кто хощет в след Мене идти, да отвержется себе и крест свой понесет. Сему усердно последуя, преподобне Севастиане, высоту приял еси небесную, поя Христу: Аллилуиа.

Икос 10

Стену несокрушимую и утверждение непреоборимое обретоша тя, богоносе Севастиане, православнии людие не точию Казахстанския страны, но и всей вселенней, ибо во светозарныя дни Пасхального торжества равноангельное житие твое скончав, священне, по всем концем земли чудеса совершаеши еси изрядна и преславна, предстоя Богу, тебе подавшему залог Божественен и венец нетленен и славу вечную. Сего ради вернии воспевают тебе:

Радуйся, Христа, Божию Силу и Божию Премудрость, стойко пред человеки исповедовавый;

Радуйся, яко и Господь исповеда тя пред Отцем Своим небесным и святыми ангелы Его.

Радуйся, блистанием трисолнечнаго света Божественнаго ныне осиянный;

Радуйся, мощи твоя святыя в знамение твоего с нами пребывания оставивый.

Радуйся, яко твоя мощи исцеляют всякия скорби и болезни;

Радуйся, яко тыя сущим в печали и смущении бывают увеселение.

Радуйся, яко теми немолчно проповедуется будущее всеобщее Воскресение;

Радуйся, яко мощей твоих демоны трепещут.

Радуйся, чаше, многоценныя дары Божии преизобильно изливающая;

Радуйся, сосуде, целебное миро болящим источающий.

Радуйся, светильниче, сущих во тьме и сени смертней светом Христовым озаряющий;

Радуйся, кадило, фимиам молитв богоприятных Богу о нас присно возносящее.

Радуйся, преподобне Севастиане, веры благочестивыя исповедниче и образе кротости духовныя.

Кондак 11

Пение благодарственное Церкви Зиждителю вси православнии взывают, яко дарова тя всем ищущим спасения изрядна помощника и тверда заступника. Тем же и нам, святую память твою, преподобне Севастиане, почитающим, твердую руку помощи твоея подаждь и грехми присно погружаемых от смертоносных глубин изведи и прочее жития время в покаянии истеннем скончати нам помози и от вечнаго гнева спаситися сподоби, поющим: Аллилуиа.

Икос 11

Светозарное светило, зарями немерцающаго света Пресвятыя Троицы сияющее, всей Казахстанстей стране явился еси, досточтиме отче, лучами христоподражательных добродетелей твоих тьму греховную разгоняющее и теплотою богоприятных молитв твоих сердца верных согревающее, иже благодарне восписуют ти таковая:

Радуйся, Казахстанския страны благодатное сокровище и украшение;

Радуйся, России православныя радование и утешение.

Радуйся, Оптиной пустыни благоплодное прозябение;

Радуйся, града Караганды покрове, ширший облака.

Радуйся, многотекущая реко, сердца наша спасительным учением напояющая;

Радуйся, в море многоразличных напастей погибающим надежное пристанище.

Радуйся, злосмрадие страстей от приходящих к тебе прогоняющий;

Радуйся, воздвизаемых от мира, плоти и диавола искушений ходатайством твоим свобождающий.

Радуйся, нераскаянных грешников к совершенному покаянию побуждающий;

Радуйся, духов лукавых прогонителю и полчищ бесовских победителю.

Радуйся, ран греховных врачу благоискуснейший;

Радуйся, сиянием благодати Божия души наша озаряющий.

Радуйся, преподобне Севастиане, веры благочестивыя исповедниче и образе кротости духовныя.

Кондак 12

Благодать, данную ти от Бога, сведуще, тебе милостиваго нашего и скоропослушливаго отца прилежно просим: вознеси дерзновенную твою молитву ко престолу Живоначальныя Троицы о пользе душ наших и невозбранном преитии от земли на небо. Умоли, святе, всеблагаго Бога о граде твоем, о святем храме, преподобническими руками твоими созданном. Приклони ухо твое и ко по предречению твоему сооруженному величественному соборному храму, в нем же чудоточащими мощами твоими почиваеши, подвизая всех с верою, благоговением и страхом Божиим входящих в онь, пети Богу: Аллилуиа.

Икос 12

Поюще дивная дела Божия в путях Церкви Русския в завершении тысячелетняго свидетельства Ею света Святаго Православия явленная, недоумеваем, трепещем, купно же и радуемся. Что убо зрим ?! — Иноческая тихая и безмолвная Оптина пустынь, от богопротивных разоренная и многая лета в поругании и запустении бывшая, ныне радостно веселится: понеже не токмо первообразная красота ея паки возвратися, но и цельбоносныя мощи духоносных старцев яви в ней Бог. С нею же и прежде безвестный и бесплодный град Караганда свеселится: святыя мощи единаго от дивнаго собора преподобных оптинских отец в себе усокровиществовавый. Сему промышлению Божию чудящеся, тебе, преподобне исповедниче, с любовию вопием:

Радуйся, Бога Отца Безначальнаго служителю предызбранный;

Радуйся, Агнца Божия мужественный исповедниче;

Радуйся, Бога Духа Всесвятаго церковь нерукотворная;

Радуйся, честное Пресвятыя Троицы носило и похваление;

Радуйся, в невечернем дни Царствия Божия почивающий;

Радуйся, трисвятую песнь херувимски со Ангелы и всеми святыми воспевающий;

Радуйся, зарями огненными благодати Божия сияющий;

Радуйся, яко светило светозарное в небеснем Царстве Солнца Правды блистающий;

Радуйся, светом благодати твоея всех чтущих память твою просвещающий;

Радуйся, рая Иисусова древо чудоточное, мног плод в пособие православным творящее;

Радуйся, Винограда Христова розго благоплодная, питающая нас и веселящая;

Радуйся, Святаго Православия, непоколебимый столпе и крепкое утверждение;

Радуйся, Преподобне Севастиане, веры благочестивыя исповедниче и образе кротости духовныя.

Кондак 13

О, преподобне отче Севастиане, веры благочестивыя исповедниче и образе кротости духовныя! Нынешнее приими в похвалу твою от усердия нашего приносимое благодарение и дерзновенным твоим ходатайством испроси нам веры непорочны соблюдение, мира умирение, от глада и пагубы избавление, грехов оставление и блаженныя вечныя жизни наследие. Да с тобою и всеми святыми поем вси радостно: Аллилуиа.

Сей кондак глаголи трижды, посем икос 1 и кондак 1.

Yandex Metrika