Акафист святому преподобному Аврамию (Авраамию), мученику Болгарскому, Владимирскому чудотворцу

Автор: Андрей Федорович Ковалевский. Утвержден решением Св. Синода 7/27 июля 1876 года №1229.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 14 апреля (01 апреля ст. ст.); 29 апреля (16 апреля ст. ст.)

Утвержден для общецерковного использования.

Конда́к 1.

Избра́нный страстоте́рпче Христо́в и чудотво́рче преди́вный, во страда́нии твое́м вене́ц прие́мый от руки́ Вседержи́теля и со а́нгелы предстоя́й Его́ престо́лу, пе́сньми восхваля́ем тя́ любо́вию и мо́лим ти́ ся́, моли́твами твои́ми от вся́ких бе́д и скорбе́й свобожда́й на́с, тебе́ зову́щих:

Ра́дуйся, му́чениче и чудотво́рче Авраа́мие.

И́кос 1.

А́нгелов сожи́тель и челове́ков засту́пник вои́стину яви́лся еси́, му́чениче достохва́льне, благоволе́нием все́х Творца́ Христа́ Бо́га, Его́же возлюби́л еси́ и за Него́ же пострада́л еси́ да́же до кро́ве во испове́дании непоколеби́мем. Те́мже приими́ от на́с сия́ хвале́ния:

Ра́дуйся, звездо́ пресве́тлая благоче́стия; ра́дуйся, свети́ло, во тме́ нече́стия пресла́вно возсия́вшее.

Ра́дуйся, злове́рия магоме́това обличи́телю; ра́дуйся, ве́ры христиа́нския небоя́зненный пропове́дниче.

Ра́дуйся, Ева́нгельскаго уче́ния до́брый послу́шателю; ра́дуйся, зако́на Госпо́дня тепле́йший храни́телю.

Ра́дуйся, ку́плю вре́менную премени́вый на стяжа́ние ве́чное небе́сное; ра́дуйся, ве́ры Христо́вы би́сер многоце́нен стяжа́вый.

Ра́дуйся, Христо́вым уче́нием ду́шу твою́ просвети́вый; ра́дуйся, удосто́ивыйся благода́тнаго осене́ния свы́ше.

Ра́дуйся, яви́выйся доброде́телей жили́ще, преукра́шенное чистото́ю; ра́дуйся, Ду́ха Свята́го оби́тель прекра́сная.

Ра́дуйся, му́чениче и чудотво́рче Авраа́мие.

Конда́к 2.

Ви́дя Христо́с Госпо́дь ду́шу твою́, ко прия́тию се́мени сло́ва Бо́жия чистото́ю и ми́лостынею предугото́ванную, све́том позна́ния Своего́ просвети́ тя́, блаже́нне, я́ко Корни́лия со́тника дре́вле, та́ко и твоя́ доброде́тели преждебы́вшия помяну́в любоблагоутро́бно, спаса́емых ча́сти сотвори́ тя́ о́бщника в Небе́снем Ца́рствии, иде́же со а́нгелы пое́ши Пресвяте́й Тро́ице пе́снь: Аллилу́иа.

И́кос 2.

Ра́зум богопросвеще́нный дарова́ся тебе́, Авраа́мие, и́мже я́сно проразуме́л еси́ тщету́ душепа́губную злове́рия магоме́това, и о́наго уклони́тися, Христа́ же взыска́ти потща́лся еси́ вседу́шно; те́мже взыва́ем ти́:

Ра́дуйся, блаже́нный после́дователю Христо́в; ра́дуйся, люби́телю за́поведей Его́ преи́скренний.

Ра́дуйся, кри́не благоуха́нный рая́ превы́шняго; ра́дуйся, цве́те прекра́сный вертогра́да Иису́сова.

Ра́дуйся, бога́тство земно́е ни во что́ же вмени́вый; ра́дуйся, стяжа́ния тле́нная презре́вый.

Ра́дуйся, ни́щия удовли́вый; ра́дуйся, рука́ми убо́гих сокро́вища твоя́ горе́ предпосла́вый.

Ра́дуйся, я́ко не уклони́лся еси́ в се́ть лихоима́ния; ра́дуйся, я́ко неулови́м пребы́л еси́ мре́жею сребролю́бия.

Ра́дуйся, му́дрый купе́ц Ца́рствия Небе́снаго; ра́дуйся, ве́рный ра́бе, да́нный тебе́ мна́с усугу́бивый.

Ра́дуйся, му́чениче и чудотво́рче Авраа́мие.

Конда́к 3.

Си́ла Вы́шняго укрепи́ тя́ на по́двиг страда́льческий, му́чениче святы́й Авраа́мие; не терпя́ бо ви́дети па́губу ду́ш челове́ческих, ре́вностию разже́глся еси́ по Бо́зе жи́ве, и ста́в посреде́ то́ржища, небоя́зненно обличи́л еси́ магоме́тову пре́лесть, поуча́я собра́тий твои́х благоче́стно ве́ровати во Христа́, за Него́ же и страда́ти не уклони́лся еси́, зовы́й: Аллилу́иа.

И́кос 3.

Име́я злове́рием потемне́нныя ду́ши, не восхоте́ша бо́лгаре прини́кнути в ра́зум слове́с твои́х боже́ственных, но ру́це уби́йственныя на тя́ возложи́вше, бие́нием лю́тым содробля́ху твоя́ соста́вы. Мы́ же, ублажа́я страда́ния твоя́, глаго́лем:

Ра́дуйся, Христа́ вседу́шно возлюби́вый; ра́дуйся, любо́вь к Нему́ я́звами, за Него́ подъя́тыми, яви́вый.

Ра́дуйся, апо́столом поревнова́вый; ра́дуйся, орга́н Свята́го Ду́ха бы́вый.

Ра́дуйся, благове́стия Ева́нгельскаго уста́ благоглаго́ливая; ра́дуйся, словеса́ жи́зни ве́чныя провеща́яй.

Ра́дуйся, бие́ние лю́тое за пресла́дкаго ти́ Иису́са сла́дце претерпе́вый; ра́дуйся, поруга́ние и досажде́ние за Него́ благоду́шно восприя́вый.

Ра́дуйся, я́ко во испове́дании Христо́ве непоколеби́м пребы́л еси́; ра́дуйся, я́ко ласка́ньми и прельще́ньми непрекло́нен яви́лся еси́.

Ра́дуйся, страстоте́рпче, в му́жестве неодоле́нный; ра́дуйся, добропобе́дниче, в терпе́нии непрело́жный.

Ра́дуйся, му́чениче и чудотво́рче Авраа́мие.

Конда́к 4.

Бу́рею зло́бы ды́шуще, нечести́вии бо́лгаре терза́ху тя́, я́ко а́гнца незло́бива зве́рие ди́вии, покуша́яся му́ками отврати́ти тя́ от Христа́ ко своему́ нече́стию; но ничто́же успе́ша потемне́ннии, си́лою бо свы́ше укрепля́емь, посрами́л еси́ о́ных ухищре́ние, посреде́ муче́ний немо́лчно испове́дуя Христа́, еди́наго Творца́ и Бо́га, и вопия́ Ему́: Аллилу́иа.

И́кос 4.

Слы́шав увеща́тельныя твоя́ глаго́лы, мучи́телие твои́, а́спидом глухи́м уподо́бльшеся, сугу́быми ра́нами уязвля́ху те́ло твое́ многотерпели́вое, Авраа́мие свя́те, я́ко не бы́ти на не́м ме́ста це́ла и неуя́звлена. Дивя́щеся у́бо вели́честву терпе́ния твоего́, зове́м ти́:

Ра́дуйся, учи́телю благоче́стия; ра́дуйся, посрами́телю нече́стия.

Ра́дуйся, ра́нами, я́ко у́тварьми многоце́нными укра́шенный; ра́дуйся, кро́вию твое́ю, я́ко багряни́цею, оде́янный.

Ра́дуйся, всесожже́ние ту́чное себе́ Христу́ прине́сший; ра́дуйся, за прелюбе́знаго ти́ Иису́са ду́шу положи́вый.

Ра́дуйся, страда́нием сочета́выйся Христу́, ра́ди на́шего спасе́ния распя́тому; ра́дуйся, ликовству́яй в черто́зе небе́снаго Домовлады́ки.

Ра́дуйся, у Престо́ла Бо́жия предстоя́й с го́рними си́лами; ра́дуйся, открове́нным лице́м созерца́яй сла́ву Трисия́ннаго Божества́.

Ра́дуйся, от ра́йских высо́т приника́яй благосе́рдием твои́м к на́м земноро́дным; ра́дуйся, спаса́яй от бе́д ве́ру и любо́вь к тебе́ иму́щих.

Ра́дуйся, му́чениче и чудотво́рче Авраа́мие.

Конда́к 5.

Богому́дрым пропове́дником апо́столом, за и́мя Христо́во ра́ны ра́достно прие́мшим, подража́л еси́ во страда́нии твое́м, Авраа́мие, вопия́ сопроти́в му́чащих тя́: Христа́ чту́, Его́ еди́наго люблю́ и умре́ти за Него́ преи́скренне жела́ю, да и с Ни́м живу́ во ве́ки, зовы́й: Аллилу́иа.

И́кос 5.

Ви́девше тя́, злочести́вии мучи́телие бо́лгаре, непрекло́нна и непобеди́ма испове́дника Христо́ва, пе́рвее ру́це и но́зе твои́ отсеко́ша, та́же и главу́ твою́ честну́ю мече́м отъя́ша, и та́ко до́блестно тече́ние твое́ сконча́в, преше́л еси́ к оби́телем небе́сным, от на́с же земны́х слы́шиши похвалы́ сия́:

Ра́дуйся, испове́дниче Христо́в непобеди́мый; ра́дуйся, адама́нте терпе́ния крепча́йший.

Ра́дуйся, но́вый му́чениче, дре́вним вели́ким му́чеником равноче́стне; ра́дуйся, пресла́вный венцено́сче, горе́ увенча́нный.

Ра́дуйся, чудотворе́ния благода́тию от Го́спода обогаще́нный; ра́дуйся, целе́б пода́телю всеблаги́й.

Ра́дуйся, во благоуха́нии святы́ни почива́яй; ра́дуйся, арома́ты ра́йскими облагоуха́яй ду́ши ве́рных.

Ра́дуйся, исто́чниче даро́в многоразли́чных; ра́дуйся, реко́ приснотеку́щая чуде́с.

Ра́дуйся, милосе́рдия к стра́ждущим сокро́вище неистощи́мое; ра́дуйся, боля́щих врачевство́ неоску́дное.

Ра́дуйся, му́чениче и чудотво́рче Авраа́мие.

Конда́к 6.

Пропове́стся в стране́ Росси́йстей до́блесть по́двига твоего́ страда́льческаго, му́чениче всехва́льный; те́мже слы́шав твою́ кончи́ну сла́вную и чудотворе́ний твои́х благода́ть, благове́рный вели́кий кня́зь Гео́ргий восхоте́ стяжа́ти тя́ засту́пника сто́льному гра́ду своему́ Влади́миру, в о́нь же мо́щи твоя́ от бо́лгар принести́ потща́ся, зовы́й венча́ющему му́ченики Христу́ Бо́гу: Аллилу́иа.

И́кос 6.

Возсия́л еси́ пресла́вно чудотворе́ния луча́ми, по пренесе́нии моще́й твои́х честны́х, Авраа́мие свя́те, во гра́д Влади́мир, и́же о́ными све́тло красу́ется, я́ко сокро́вищем многоце́нным; мы́ же, чту́щии тя́, ра́ку твою́ многоцеле́бную любе́зне обстоя́ще, зове́м ти́:

Ра́дуйся, гра́да на́шего похвало́ и утвержде́ние; ра́дуйся, оби́тели Богома́терния, в не́йже почива́еши, при́сное заступле́ние.

Ра́дуйся, подвиза́ющимся в не́й благода́тное вспоможе́ние; ра́дуйся, о́ных покро́ве и защище́ние.

Ра́дуйся, неду́гующих ско́ро предста́тельный целе́бниче; ра́дуйся, уныва́ющих благонаде́жное возбужде́ние.

Ра́дуйся, скорбя́щих всежела́тельное утеше́ние; ра́дуйся, ни́щих изоби́льное бога́тство.

Ра́дуйся, боля́щих младе́нцев исцеле́ние; ра́дуйся, изнемога́ющих укрепле́ние.

Ра́дуйся, ревну́ющих о благоче́стии помо́щниче; ра́дуйся, пребыва́ющих в посте́ и моли́тве споспе́шниче.

Ра́дуйся, му́чениче и чудотво́рче Авраа́мие.

Конда́к 7.

Хотя́ человеколю́бец Госпо́дь яви́ти щедро́т Свои́х оби́лие стране́ Росси́йстей, дарова́ на́м тебе́ страстоте́рпца но́ваго и моли́твенника богоприя́тнаго, чуде́с благода́ть источа́юща и неду́жных безме́здно врачу́юща; те́мже благодари́м тобо́ю благоде́ющаго на́м Го́спода и све́тло пра́зднуем честны́х моще́й твои́х пренесе́ние, к ни́м с любо́вию припа́дающе и Христу́ зову́ще: Аллилу́иа.

И́кос 7.

Но́ваго тя́ му́ченика и до́бляго страда́льца, Христо́ва испове́дника и чудотво́рца сла́внаго, любо́вию ублажа́ем, и ра́дующеся о твое́м к на́м прише́ствии, глаго́лем:

Ра́дуйся, денни́це лучеза́рная, от бо́лгар во Влади́мир гра́д прите́кшая; ра́дуйся, лучу́ немерца́ющий со́лнца пра́вды Христа́.

Ра́дуйся, уго́дниче Госпо́день, преди́вный в чудесе́х; ра́дуйся, пра́ведниче, просла́вленный на небеси́ и на земли́.

Ра́дуйся, нетле́нием моще́й твои́х в и́стине воскресе́ния ме́ртвых уверя́яй; ра́дуйся, о́браз безсме́ртия в сме́ртнем телеси́ показу́яй.

Ра́дуйся, я́ко тебе́ дана́ бы́сть благода́ть за ны́ моли́тися и возбужда́ти на́с ко благи́м дело́м; ра́дуйся, я́ко и по преставле́нии твое́м благодея́ние тре́бующим подава́еши.

Ра́дуйся, от смертоно́сных я́зв и боле́зней притека́ющих к тебе́ сохраня́яй; ра́дуйся, бе́дствующим и оби́димым помога́яй.

Ра́дуйся, боголюби́вых ду́ш непосты́дное упова́ние; ра́дуйся, лю́бящих тя́ при́сное утеше́ние.

Ра́дуйся, му́чениче и чудотво́рче Авраа́мие.

Конда́к 8.

Стра́нно е́сть ви́дети ме́ртвенное те́ло, жи́знь присносу́щную явля́ющее, во гро́бе лежа́щее и неду́ги врачу́ющее; но, му́чениче Христо́в Авраа́мие, моща́ми твои́ми святы́ми в хра́ме се́м почива́яй, ве́руем несомне́нно, я́ко и ду́хом твои́м не отлуча́ешися от на́с недосто́йных, честну́ю ра́ку твою́ с любо́вию обстоя́щих и Христу́ благода́рне зову́щих: Аллилу́иа.

И́кос 8.

Ве́сь в вы́шних еси́, свя́тче Бо́жий, во све́тлости святы́х торжеству́еши и наслажда́ешися неизрече́нных бла́г небе́сных; ве́мы же, я́ко и на́с земны́х и пе́рстных не забыва́еши, но от го́рних высо́т ми́лостивно к на́м приника́еши, подвиза́я на́с че́ствовати тя́ си́ми похвала́ми:

Ра́дуйся, благоче́стия утвержде́ние; ра́дуйся, правосла́вия похвало́.

Ра́дуйся, земли́ Росси́йския благода́тное осене́ние; ра́дуйся, гра́да Влади́мира све́тлое ра́дование.

Ра́дуйся, многострада́льная розго́ виногра́да Христо́ва; ра́дуйся, граждани́не го́рняго гра́да, Иерусали́ма Небе́снаго.

Ра́дуйся, в пресла́вном му́ченическом ли́це пребыва́яй; ра́дуйся, рая́ жи́телю всеблаже́нный.

Ра́дуйся, Ца́рствия Христо́ва насле́дниче; ра́дуйся, ве́чныя блаже́нныя жи́зни соприча́стниче.

Ра́дуйся, прибе́жище на́ше и защище́ние; ра́дуйся, ско́рое и безме́здное неду́гов врачева́ние.

Ра́дуйся, му́чениче и чудотво́рче Авраа́мие.

Конда́к 9.

Вси́ А́нгели Небе́снии восприя́ша тя́ ра́достно во оби́тели ра́йския, страда́льче богому́дре Авраа́мие, иде́же свята́я твоя́ душа́, огне́м страда́ния искуше́нная, по́честь побе́дную восприя́т от Христа́ Бо́га на́шего, пра́веднаго мздовоздая́теля подвиза́ющихся за и́мя Его́ свято́е на земли́; прославля́я бо и́х на Небеси́, с Го́рними во́и у Престо́ла Своего́ предстоя́ния сподобля́ет, иде́же пое́тся Ему́ немо́лчная пе́снь: Аллилу́иа.

И́кос 9.

Вити́йством злочести́вым и прельще́нием лука́вым неуловле́н пребы́л еси́, страстоте́рпче, изво́ливый па́че умре́ти, не́же Христа́ и ве́ры в Него́ святы́я отрещи́ся, те́мже, я́ко до́бляго испове́дника Христо́ва, ублажа́ем тя́ и зове́м:

Ра́дуйся, пречу́дное му́жество яви́вый; ра́дуйся, я́ко просвеще́н бы́л еси́ заре́ю Пресвята́го Ду́ха.

Ра́дуйся, я́ко стра́х малоду́шный от себе́ отря́сл еси́; ра́дуйся, я́ко щито́м ве́ры огради́лся еси́.

Ра́дуйся, неумолка́ющий благове́стниче си́лы Бо́жия, в не́мощи челове́честей соверша́ющияся; ра́дуйся, и́стинный покло́нниче, ду́хом и и́стиною кла́няяйся Творцу́.

Ра́дуйся, му́жу жела́ний духо́вных, взыска́вый Христа́ в стране́ нече́стия магоме́това; ра́дуйся, отри́нувый богопроти́вную о́ную пре́лесть.

Ра́дуйся, ку́плю де́явый вре́менную, вку́пе же и ве́чную, небе́сную; ра́дуйся, стра́нники и ни́щия пита́вый от трудо́в твои́х пра́ведных.

Ра́дуйся, еле́ем ми́лости умаще́нная главо́; ра́дуйся, горо́ доброде́телей, ороше́нная кро́ве страда́льческия излия́нием.

Ра́дуйся, му́чениче и чудотво́рче Авраа́мие.

Конда́к 10.

Спасти́ся на́м преи́скренне жела́я, мо́лишися за на́с горе́ у Престо́ла Бо́жия, страда́льче Христо́в Авраа́мие, и твои́ми моли́твами посо́бствуеши на́м в стра́нствии многотру́днем земна́го жития́, е́же в покая́нии и благоче́стии сконча́ти, да сподо́бимся с тобо́ю воспева́ти Христу́ и Бо́гу на́шему: Аллилу́иа.

И́кос 10.

Сте́ну защище́ния стяжа́вше твоя́ святы́я моли́твы, Авраа́мие чу́дне, ра́дуемся гре́шнии и чте́м любо́вию па́мять твоего́ усекнове́ния и моще́й твои́х святы́х пренесе́ния, зову́ще:

Ра́дуйся, великоимени́тый на́ш засту́пниче; ра́дуйся, небожи́телю богопросвеще́нный.

Ра́дуйся, чудотво́рче ди́вный и ми́лостивый; ра́дуйся, благи́й послу́шателю су́щих в ско́рбех.

Ра́дуйся, предваря́яй проше́ния призыва́ющих тя́ в беда́х; ра́дуйся, гре́шных ко исправле́нию приведе́ние.

Ра́дуйся, ми́ро враче́бное неду́гом многоразли́чным; ра́дуйся, не то́кмо теле́сных, но и душе́вных боле́зней изря́дный цели́телю.

Ра́дуйся, духо́в нечи́стых от челове́ков прогони́телю; ра́дуйся, даро́в благода́тных незави́стный пода́телю.

Ра́дуйся, благоуха́нием моще́й твои́х услажда́яй ду́ши на́ша; ра́дуйся, чудесы́ твои́ми утвержда́яй на́с во и́стине святы́я правосла́вныя ве́ры.

Ра́дуйся, му́чениче и чудотво́рче Авраа́мие.

Конда́к 11.

Пе́ние моле́бное и похвалу́ сию́ смире́нную не пре́зри, му́чениче; се́ бо ве́рою и любо́вию к тебе́ подвиза́еми, ра́ку моще́й твои́х собо́рне обстоя́ще, ублажа́ем тя́, засту́пника на́шего, и мо́лимся: моли́ся за ны́ вы́ну ко Го́споду, ве́мы бо к Нему́ твое́ невозбра́нное дерзнове́ние и твои́х моли́тв благода́тное де́йство. Иму́ще такова́го предста́теля, благода́рно зове́м ди́вному во святы́х Свои́х Бо́гу на́шему: Аллилу́иа.

И́кос 11.

Светоно́сным Тро́ическим сия́нием горе́ осия́нный, Авраа́мие свя́те, озари́ на́ша сердца́, тьмо́ю грехо́вною покрове́нная; да еле́ем благи́х де́л возже́гши уга́сшия свети́льники на́ша, сподо́бимся бра́чнаго Христо́ва черто́га, иде́же ты́ вселя́ешися со святы́ми и слы́шиши сия́ от на́с благохвале́ния:

Ра́дуйся, Бо́гом да́нный покрови́телю на́ш; ра́дуйся, ангелоподо́бный челове́че.

Ра́дуйся, нищелю́бче благослове́нный; ра́дуйся, странноприи́мниче, дре́внему о́ному пра́отцу Авраа́му уподобля́яйся.

Ра́дуйся, я́ко рука́ твоя́ изоби́льно помога́ше нужда́ющимся; ра́дуйся, я́ко му́дре расточа́л еси́ бога́тство тле́нное.

Ра́дуйся, о́ное премени́вый на нетле́нныя небе́сныя бла́га; ра́дуйся, наслажда́яйся блаже́нства ми́лостивых.

Ра́дуйся, предстоя́й А́гнцу Бо́жию в ли́це му́ченичестем; ра́дуйся, ликовству́яй в селе́нии пра́ведных.

Ра́дуйся, во страда́нии твое́м до́блесть чу́дную яви́вый; ра́дуйся, я́звы Го́спода Иису́са Христа́ на те́ле твое́м носи́вый.

Ра́дуйся, му́чениче и чудотво́рче Авраа́мие.

Конда́к 12.

Благода́ть и ми́лость испроси́ на́м у Христа́ и Бо́га на́шего, святы́й и сла́вный страстоте́рпче Авраа́мие; ве́руем бо несомне́нно, я́ко е́же про́сиши, да́рует ти́ всеблаги́й Влады́ка; те́мже и о на́с гре́шных умоля́ти не преста́й Его́ благоутро́бие и испроси́ на́м да́р коему́ждо благопотре́бен, да зове́м все́х благи́х вино́внику и даропода́телю Бо́гу: Аллилу́иа.

И́кос 12.

Пое́м твою́ страда́льческую кончи́ну, сла́вим твои́х честны́х моще́й от бо́лгар во Влади́мир пренесе́ние, от ни́хже то́ки чуде́с источа́еши непреста́нно, подвиза́я зва́ти тебе́:

Ра́дуйся, Арха́нгелов и А́нгелов сослужи́телю; ра́дуйся, патриа́рхов и проро́ков спредстоя́телю.

Ра́дуйся, апо́столов единоревни́телю; ра́дуйся, му́чеников красото́.

Ра́дуйся, святи́телей и преподо́бных собесе́дниче; ра́дуйся, пра́ведных и все́х святы́х сожи́телю.

Ра́дуйся, я́ко свы́ше чуде́с дея́нии украси́лся еси́; ра́дуйся, в честны́х и многоцеле́бных моще́х свои́х вы́ну с на́ми пребыва́яй.

Ра́дуйся, о́ными пресла́вно чудоде́йствуяй; ра́дуйся, отра́до на́ша и в ско́рбех утеше́ние.

Ра́дуйся, неду́гующих исцеле́ние; ра́дуйся, согреша́ющих исправле́ние.

Ра́дуйся, му́чениче и чудотво́рче Авраа́мие.

Конда́к 13.

О пресла́вный страстоте́рпче Христо́в Авраа́мие, ми́лостиво прие́мши сие́ ма́лое моле́ние на́ше, умоли́ Царя́ ца́рствующих и Го́спода госпо́дствующих, Христа́ Бо́га на́шего, изба́вити на́с от вся́кия ско́рби и ну́жды в жи́зни се́й и муче́ний ве́чных по сконча́нии на́шем, да сподо́бимся в Ца́рствии Небе́снем вку́пе с тобо́ю пе́ти Ему́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов сожи́тель и челове́ков засту́пник вои́стину яви́лся еси́, му́чениче достохва́льне, благоволе́нием все́х Творца́ Христа́ Бо́га, Его́же возлюби́л еси́ и за Него́ же пострада́л еси́ да́же до кро́ве во испове́дании непоколеби́мем. Те́мже приими́ от на́с сия́ хвале́ния:

Ра́дуйся, звездо́ пресве́тлая благоче́стия; ра́дуйся, свети́ло, во тме́ нече́стия пресла́вно возсия́вшее.

Ра́дуйся, злове́рия магоме́това обличи́телю; ра́дуйся, ве́ры христиа́нския небоя́зненный пропове́дниче.

Ра́дуйся, Ева́нгельскаго уче́ния до́брый послу́шателю; ра́дуйся, зако́на Госпо́дня тепле́йший храни́телю.

Ра́дуйся, ку́плю вре́менную премени́вый на стяжа́ние ве́чное небе́сное; ра́дуйся, ве́ры Христо́вы би́сер многоце́нен стяжа́вый.

Ра́дуйся, Христо́вым уче́нием ду́шу твою́ просвети́вый; ра́дуйся, удосто́ивыйся благода́тнаго осене́ния свы́ше.

Ра́дуйся, яви́выйся доброде́телей жили́ще, преукра́шенное чистото́ю; ра́дуйся, Ду́ха Свята́го оби́тель прекра́сная.

Ра́дуйся, му́чениче и чудотво́рче Авраа́мие.

Конда́к 1.

Избра́нный страстоте́рпче Христо́в и чудотво́рче преди́вный, во страда́нии твое́м вене́ц прие́мый от руки́ Вседержи́теля и со а́нгелы предстоя́й Его́ престо́лу, пе́сньми восхваля́ем тя́ любо́вию и мо́лим ти́ ся́, моли́твами твои́ми от вся́ких бе́д и скорбе́й свобожда́й на́с, тебе́ зову́щих:

Ра́дуйся, му́чениче и чудотво́рче Авраа́мие.

Моли́тва.

Святы́й му́чениче Авраа́мие, до́блий во́ине Христа́ Царя́ Небе́снаго, в ско́рбех и напа́стех пресла́вный на́ш помо́щниче и защи́тниче! Ничто́же возмо́же отлучи́ти тя́ от любве́ ко Го́споду Иису́су: ни ле́стныя обеща́ния бла́г вре́менных, ни преще́ния, ни му́ки от злы́х враго́в святе́йшия Христо́вы ве́ры; ты́, я́ко ле́в, изше́л еси́ на бра́нь проти́ву волко́в мы́сленных, духо́в зло́бы, подви́гших на тя́, ра́ди до́браго твоего́ испове́дания, единоплеме́нный тебе́ наро́д бо́лгарский, и, я́ко о́гненная стрела́, те́х порази́л еси́ си́лою благода́ти Свята́го Ду́ха, и кре́пкия, я́ко сме́рть, любве́ твоея́ к Бо́гу. А́ще и пролия́л еси́ кро́вь твою́ за Христа́ Бо́га на́шего, погуби́в вре́менную жи́знь, оба́че безсме́ртною душе́ю, я́ко оре́л, воспари́л еси́ в го́рния оби́тели Отца́ на́шего, насле́довав та́м ве́чную жи́знь, сла́ву и блаже́нство неизрече́нное, и оста́вив на́м нетле́нныя мо́щи твоя́, я́ко кри́н многоце́нный и благоуха́нный. Ве́руем, страстоте́рпче святы́й, я́ко предстоя́ со а́нгелы и все́ми святы́ми Престо́лу Сла́вы Триипоста́снаго Бо́га, усе́рдныя и богоприя́тныя возно́сиши моли́твы не то́кмо о на́с, о святе́й оби́тели се́й и гра́де на́шем, но и о все́й святе́й Христо́вей Це́ркви и о правосла́вней Ру́сской держа́ве. Ве́руем, пресла́вный чудотво́рче, я́ко ты́, си́лою всемогу́щаго Го́спода Иису́са Христа́, чрез святы́я мо́щи твоя́, источа́еши оби́льныя да́ры благода́тныя по́мощи во спасе́ние все́м с ве́рою к тебе́ притека́ющим, наипа́че же испра́шиваеши кончи́ну с покая́нием тебе́ чту́щим, и благосе́рдно помога́еши немощны́м младе́нцем, да вси́ от ма́ла до вели́ка единоду́шно прославля́ем неисповеди́мое вели́чие бла́гости Бо́жией. Те́м же ве́рою и любо́вию ко святы́м моще́м твои́м припа́дающе и благогове́йно о́ныя лобыза́юще, умоля́ем тя́, до́брый на Небеси́ на́ш моли́твенниче и засту́пниче, помога́й на́м гре́шным и смире́нным твои́ми моли́твами во все́х ско́рбех, ну́ждах и обстоя́ниих на́ших, сохраня́й на́с, святу́ю оби́тель сию́ и гра́д се́й от вся́каго зла́ и вся́кия напа́сти, наипа́че же споспешеству́й ве́чному спасе́нию на́шему и все́х прося́щих от тебе́ по́мощи и заступле́ния. Е́й, смире́нно мо́лим тя́, уго́дниче Бо́жий, моли́ Христа́ Бо́га на́шего, да да́ст О́н ми́р и тишину́ все́м правосла́вным христиа́ном и да отврати́т от на́с вся́кий гне́в, на ны́ дви́жимый, да изба́вит на́с от сете́й вра́жиих, томле́ния во у́зах греха́ и муче́ний а́довых, и да сподо́бит на́с недосто́йных одесну́ю Себе́ ста́ти на суде́ Свое́м пра́веднем и вни́ти в ве́чный поко́й святы́х Его́, иде́же пра́зднующих гла́с непреста́нный и неизрече́нная сла́дость зря́щих добро́ту лица́ Его́; и та́ко возмо́жем с тобо́ю и все́ми святы́ми прославля́ти Отца́ и Сы́на и Свята́го Ду́ха, Тро́ицу Единосу́щную и Неразде́льную. Ами́нь.

А҆ка́ѳїстъ ст҃о́мꙋ прпⷣбномꙋ а҆вра́мїю мч҃нкꙋ бо́лгарскомꙋ, влади́мїрскомꙋ чꙋдотво́рцꙋ.

Конда́къ а҃.

И҆збра́нный страстоте́рпче хрⷭ҇то́въ и҆ чꙋдотво́рче преди́вный, во страда́нїи твое́мъ вѣне́цъ прїе́мый ѿ рꙋкѝ вседержи́телѧ и҆ со а҆́гг҃лы предстоѧ́й є҆гѡ̀ прⷭ҇то́лꙋ, пѣ́сньми восхвалѧ́емъ тѧ̀ любо́вїю и҆ мо́лимтисѧ: мл҃твами твои́ми ѿ всѧ́кихъ бѣ́дъ и҆ скорбе́й свобожда́й на́съ, тебѣ̀ зовꙋ́щихъ:

Ра́дꙋйсѧ, мч҃ниче и҆ чꙋдотво́рче а҆враа́мїе.

І҆́косъ а҃.

А҆́гг҃лѡвъ сожи́тель и҆ человѣ́кѡвъ застꙋ́пникъ вои́стиннꙋ ꙗ҆ви́лсѧ є҆сѝ, мч҃ниче достохва́льне, бл҃говоле́нїемъ всѣ́хъ творца̀ хрⷭ҇та̀ бг҃а, є҆го́же возлюби́лъ є҆сѝ и҆ за него́же пострада́лъ є҆сѝ да́же до кро́ве во и҆сповѣ́данїи непоколеби́мѣмъ. Тѣ́мже прїимѝ ѿ на́съ сїѧ̑ хвалє́нїѧ:

Ра́дꙋйсѧ, ѕвѣздо̀ пресвѣ́тлаѧ бл҃гоче́стїѧ: ра́дꙋйсѧ, свѣти́ло, во тмѣ̀ нече́стїѧ пресла́внѡ возсїѧ́вшее.

Ра́дꙋйсѧ, ѕловѣ́рїѧ магоме́това ѡ҆бличи́телю: ра́дꙋйсѧ, вѣ́ры хрⷭ҇тїа́нскїѧ небоѧ́зненный проповѣ́дниче.

Ра́дꙋйсѧ, є҆ѵⷢ҇льскагѡ ᲂу҆че́нїѧ до́брый послꙋ́шателю: ра́дꙋйсѧ, зако́на гдⷭ҇нѧ теплѣ́йшїй храни́телю.

Ра́дꙋйсѧ, кꙋ́плю вре́меннꙋю премѣни́вый на стѧжа́нїе вѣ́чное нбⷭ҇ное: ра́дꙋйсѧ, вѣ́ры хрⷭ҇то́вы би́серъ многоцѣ́ненъ стѧжа́вый.

Ра́дꙋйсѧ, хрⷭ҇то́вымъ ᲂу҆че́нїемъ дꙋ́шꙋ твою̀ просвѣти́вый: ра́дꙋйсѧ, ᲂу҆досто́ивыйсѧ бл҃года́тнагѡ ѡ҆сѣне́нїѧ свы́ше.

Ра́дꙋйсѧ, ꙗ҆ви́выйсѧ добродѣ́телей жили́ще, преꙋкра́шенное чистото́ю: ра́дꙋйсѧ, дх҃а ст҃а́гѡ ѡ҆би́тель прекра́снаѧ.

Ра́дꙋйсѧ, мч҃ниче и҆ чꙋдотво́рче а҆враа́мїе.

Конда́къ в҃.

Ви́дѧ хрⷭ҇то́съ гдⷭ҇ь дꙋ́шꙋ твою̀, ко прїѧ́тїю сѣ́мени сло́ва бж҃їѧ чистото́ю и҆ ми́лостынею пред̾ꙋгото́ваннꙋю, свѣ́томъ позна́нїѧ своегѡ̀ просвѣти́ тѧ, блаже́нне, ꙗ҆́кѡ корни́лїа со́тника дре́вле, та́кѡ и҆ твоѧ̀ добродѣ́тєли преждебы́вшыѧ помѧнꙋ́въ любобл҃гоꙋтро́бнѡ, сп҃са́емыхъ ча́сти сотвори́ тѧ ѻ҆́бщника въ нбⷭ҇нѣмъ црⷭ҇твїи, и҆дѣ́же со а҆́гг҃лы пое́ши прест҃ѣ́й трⷪ҇цѣ пѣ́снь: А҆ллилꙋ́їа.

І҆́косъ в҃.

Ра́зꙋмъ бг҃опросвѣще́нный дарова́сѧ тебѣ̀, а҆враа́мїе, и҆́мже ꙗ҆́снѡ проразꙋмѣ́лъ є҆сѝ тщетꙋ̀ дꙋшепа́гꙋбнꙋю ѕловѣ́рїѧ магоме́това, и҆ ѻ҆́нагѡ ᲂу҆клони́тисѧ, хрⷭ҇та́ же взыска́ти потща́лсѧ є҆сѝ вседꙋ́шнѡ: тѣ́мже взыва́емъ тѝ:

Ра́дꙋйсѧ, бл҃же́нный послѣ́дователю хрⷭ҇то́въ: ра́дꙋйсѧ, люби́телю за́повѣдей є҆гѡ̀ преи́скреннїй.

Ра́дꙋйсѧ, крі́не бл҃гоꙋха́нный раѧ̀ превы́шнѧгѡ: ра́дꙋйсѧ, цвѣ́те прекра́сный вертогра́да і҆и҃сова.

Ра́дꙋйсѧ, бога́тство земно́е ни во что́ же вмѣни́вый: ра́дꙋйсѧ, стѧжа̑нїѧ тлѣ̑ннаѧ презрѣ́вый.

Ра́дꙋйсѧ, ни́щыѧ ᲂу҆довли́вый: ра́дꙋйсѧ, рꙋка́ми ᲂу҆бо́гихъ сокрѡ́вища твоѧ̑ горѣ̀ предпосла́вый.

Ра́дꙋйсѧ, ꙗ҆́кѡ не ᲂу҆клони́лсѧ є҆сѝ въ сѣ́ть лихоима́нїѧ: ра́дꙋйсѧ, ꙗ҆́кѡ неꙋлови́мъ пребы́лъ є҆сѝ мре́жею сребролю́бїѧ.

Ра́дꙋйсѧ, мꙋ́дрый кꙋпе́цъ црⷭ҇твїѧ нбⷭ҇нагѡ: ра́дꙋйсѧ, вѣ́рный ра́бе, да́нный тебѣ̀ мна́съ ᲂу҆сꙋгꙋ́бивый.

Ра́дꙋйсѧ, мч҃ниче и҆ чꙋдотво́рче а҆враа́мїе.

Конда́къ г҃.

Си́ла вы́шнѧгѡ ᲂу҆крѣпѝ тѧ̀ на по́двигъ страда́льческїй, мч҃ниче ст҃ы́й а҆враа́мїе: не терпѧ́ бо ви́дѣти па́гꙋбꙋ дꙋ́шъ человѣ́ческихъ, ре́вностїю разже́глсѧ є҆сѝ по бз҃ѣ жи́вѣ, и҆ ста́въ посредѣ̀ то́ржища, небоѧ́зненнѡ ѡ҆бличи́лъ є҆сѝ магоме́товꙋ пре́лесть, поꙋча́ѧ собра́тїй твои́хъ бл҃гоче́стнѡ вѣ́ровати во хрⷭ҇та̀, за него́же и҆ страда́ти не ᲂу҆клони́лсѧ є҆сѝ, зовы́й: А҆ллилꙋ́їа.

І҆́косъ г҃.

И҆мѣ́ѧ ѕловѣ́рїемъ потемнє́нныѧ дꙋ́шы, не восхотѣ́ша бо́лгаре прини́кнꙋти въ ра́зꙋмъ слове́съ твои́хъ бжⷭ҇твенныхъ, но рꙋ́цѣ ᲂу҆бі́йственныѧ на тѧ̀ возложи́вше, бїе́нїемъ лю́тымъ содроблѧ́хꙋ твоѧ̑ соста́вы. Мы́ же, ᲂу҆блажа́ѧ страда̑нїѧ твоѧ̑, глаго́лемъ:

Ра́дꙋйсѧ, хрⷭ҇та̀ вседꙋ́шнѡ возлюби́вый: ра́дꙋйсѧ, любо́вь къ немꙋ̀ ꙗ҆́звами, за него̀ под̾ѧ́тыми, ꙗ҆ви́вый.

Ра́дꙋйсѧ, а҆пⷭ҇лѡмъ поревнова́вый: ра́дꙋйсѧ, ѻ҆рга́нъ ст҃а́гѡ дх҃а бы́вый.

Ра́дꙋйсѧ, бл҃говѣ́стїѧ є҆ѵⷢ҇льскагѡ ᲂу҆ста̀ бл҃гоглагѡ́ливаѧ: ра́дꙋйсѧ, словеса̀ жи́зни вѣ́чныѧ провѣща́ѧй.

Ра́дꙋйсѧ, бїе́нїе лю́тое за пресла́дкаго тѝ і҆и҃са сла́дцѣ претерпѣ́вый: ра́дꙋйсѧ, порꙋга́нїе и҆ досажде́нїе за него̀ бл҃годꙋ́шнѡ воспрїѧ́вый.

Ра́дꙋйсѧ, ꙗ҆́кѡ во и҆сповѣ́данїи хрⷭ҇то́вѣ непоколеби́мъ пребы́лъ є҆сѝ: ра́дꙋйсѧ, ꙗ҆́кѡ ласка́ньми и҆ прельще́ньми непрекло́ненъ ꙗ҆ви́лсѧ є҆сѝ.

Ра́дꙋйсѧ, страстоте́рпче, въ мꙋ́жествѣ неѡдолѣ́нный: ра́дꙋйсѧ, добропобѣ́дниче, въ терпѣ́нїи непрело́жный.

Ра́дꙋйсѧ, мч҃ниче и҆ чꙋдотво́рче а҆враа́мїе.

Конда́къ д҃.

Бꙋ́рею ѕло́бы ды́шꙋще, нечести́вїи бо́лгаре терза́хꙋ тѧ̀, ꙗ҆́кѡ а҆́гнца неѕло́бива ѕвѣ́рїе ди́вїи, покꙋша́ѧсѧ мꙋ́ками ѿврати́ти тѧ̀ ѿ хрⷭ҇та̀ ко своемꙋ̀ нече́стїю: но ничто́же ᲂу҆спѣ́ша потемне́ннїи, си́лою бо свы́ше ᲂу҆крѣплѧ́емь, посрами́лъ є҆сѝ ѻ҆́ныхъ ᲂу҆хищре́нїе, посредѣ̀ мꙋче́нїй немо́лчнѡ и҆сповѣ́дꙋѧ хрⷭ҇та̀, є҆ди́наго творца̀ и҆ бг҃а, и҆ вопїѧ̀ є҆мꙋ̀: А҆ллилꙋ́їа.

І҆́косъ д҃.

Слы́шавъ ᲂу҆вѣща́тєльныѧ твоѧ̑ глаго́лы, мꙋчи́телїе твоѝ, а҆́спїдѡмъ глꙋхи̑мъ ᲂу҆подо́бльшесѧ, сꙋгꙋ́быми ра́нами ᲂу҆ѧзвлѧ́хꙋ тѣ́ло твоѐ многотерпѣли́вое, а҆враа́мїе ст҃е, ꙗ҆́кѡ не бы́ти на не́мъ мѣ́ста цѣ́ла и҆ неꙋѧ́звлена. дивѧ́щесѧ ᲂу҆̀бо вели́чествꙋ терпѣ́нїѧ твоегѡ̀, зове́мъ тѝ:

Ра́дꙋйсѧ, ᲂу҆чи́телю бл҃гоче́стїѧ: ра́дꙋйсѧ, посрами́телю нече́стїѧ.

Ра́дꙋйсѧ, ра́нами, ꙗ҆́кѡ ᲂу҆́тварьми многоцѣ́нными ᲂу҆кра́шенный: ра́дꙋйсѧ, кро́вїю твое́ю, ꙗ҆́кѡ багрѧни́цею, ѡ҆дѣ́ѧнный.

Ра́дꙋйсѧ, всесожже́нїе тꙋ́чное себє̀ хрⷭ҇тꙋ̀ прине́сшїй: ра́дꙋйсѧ, за прелюбе́знаго тѝ і҆и҃са дꙋ́шꙋ положи́вый.

Ра́дꙋйсѧ, страда́нїемъ сочета́выйсѧ хрⷭ҇тꙋ̀, ра́ди на́шегѡ сп҃се́нїѧ распѧ́томꙋ: ра́дꙋйсѧ, ликовствꙋ́ѧй въ черто́зѣ нбⷭ҇нагѡ домовлⷣки.

Ра́дꙋйсѧ, ᲂу҆ прⷭ҇то́ла бж҃їѧ предстоѧ́й съ го́рними си́лами: ра́дꙋйсѧ, ѿкрове́ннымъ лице́мъ созерца́ѧй сла́вꙋ трисїѧ́ннагѡ бжⷭ҇тва̀.

Ра́дꙋйсѧ, ѿ ра́йскихъ высо́тъ приника́ѧй бл҃госе́рдїемъ твои́мъ къ на́мъ земнорѡ́днымъ: ра́дꙋйсѧ, спаса́ѧй ѿ бѣ́дъ вѣ́рꙋ и҆ любо́вь къ тебѣ̀ и҆мꙋ́щихъ.

Ра́дꙋйсѧ, мч҃ниче и҆ чꙋдотво́рче а҆враа́мїе.

Конда́къ є҃.

Бг҃омꙋ́дрымъ проповѣ́дникѡмъ а҆пⷭ҇лѡмъ, за и҆́мѧ хрⷭ҇то́во ра̑ны ра́достнѡ прїе́мшымъ, подража́лъ є҆сѝ во страда́нїи твое́мъ, а҆враа́мїе, вопїѧ̀ сопроти́въ мꙋ́чащихъ тѧ̀: хрⷭ҇та̀ чтꙋ̀, є҆го̀ є҆ди́наго люблю̀ и҆ ᲂу҆мре́ти за него̀ преи́скреннѣ жела́ю, да и҆ съ ни́мъ живꙋ̀ во вѣ́ки, зовы́й: А҆ллилꙋ́їа.

І҆́косъ є҃.

Ви́дѣвше тѧ̀, ѕлочести́вїи мꙋчи́телїе бо́лгаре, непрекло́нна и҆ непобѣди́ма и҆сповѣ́дника хрⷭ҇то́ва, пе́рвѣе рꙋ́цѣ и҆ но́зѣ твоѝ ѿсѣко́ша, та́же и҆ главꙋ̀ твою̀ честнꙋ́ю мече́мъ ѿ̾ѧ́ша, и҆ та́кѡ до́блестнѡ тече́нїе твоѐ сконча́въ, преше́лъ є҆сѝ къ ѡ҆би́телемъ нбⷭ҇нымъ, ѿ на́съ же земны́хъ слы́шиши похвалы̑ сїѧ̑:

Ра́дꙋйсѧ, и҆сповѣ́дниче хрⷭ҇то́въ непобѣди́мый: ра́дꙋйсѧ, а҆дама́нте терпѣ́нїѧ крѣпча́йшїй.

Ра́дꙋйсѧ, но́вый мч҃ниче, дрє́внимъ вели́кимъ мч҃никѡмъ равноче́стне: ра́дꙋйсѧ, пресла́вный вѣнцено́сче, горѣ̀ ᲂу҆вѣнча́нный.

Ра́дꙋйсѧ, чꙋдотворе́нїѧ блгⷣтїю ѿ гдⷭ҇а ѡ҆богаще́нный: ра́дꙋйсѧ, цѣле́бъ пода́телю всебл҃гі́й.

Ра́дꙋйсѧ, во бл҃гоꙋха́нїи свѧты́ни почива́ѧй: ра́дꙋйсѧ, а҆рѡма́ты ра́йскими ѡ҆бл҃гоꙋха́ѧй дꙋ́шы вѣ́рныхъ.

Ра́дꙋйсѧ, и҆сто́чниче дарѡ́въ многоразли́чныхъ: ра́дꙋйсѧ, рѣко̀ приснотекꙋ́щаѧ чꙋде́съ.

Ра́дꙋйсѧ, млⷭ҇рдїѧ къ стра́ждꙋщымъ сокро́вище неистощи́мое: ра́дꙋйсѧ, болѧ́щихъ врачевство̀ неѡскꙋ́дное.

Ра́дꙋйсѧ, мч҃ниче и҆ чꙋдотво́рче а҆враа́мїе.

Конда́къ ѕ҃.

Проповѣ́стсѧ въ странѣ̀ рѡссі́йстѣй до́блесть по́двига твоегѡ̀ страда́льческагѡ, мч҃ниче всехва́льный: тѣ́мже слы́шавъ твою̀ кончи́нꙋ сла́внꙋю и҆ чꙋдотворе́нїй твои́хъ блгⷣть, бл҃говѣ́рный вели́кїй кнѧ́зь геѡ́ргїй восхотѣ̀ стѧжа́ти тѧ̀ застꙋ́пника сто́льномꙋ гра́дꙋ своемꙋ̀ влади́мїрꙋ, во́ньже мо́щи твоѧ̑ ѿ бо́лгаръ принестѝ потща́сѧ, зовы́й вѣнча́ющемꙋ мч҃нки хрⷭ҇тꙋ̀ бг҃ꙋ: А҆ллилꙋ́їа.

І҆́косъ ѕ҃.

Возсїѧ́лъ є҆сѝ пресла́внѡ чꙋдотворе́нїѧ лꙋча́ми, по пренесе́нїи моще́й твои́хъ честны́хъ, а҆враа́мїе ст҃е, во гра́дъ влади́мїръ, и҆́же ѻ҆́ными свѣ́тлѡ красꙋ́етсѧ, ꙗ҆́кѡ сокро́вищемъ многоцѣ́ннымъ: мы́ же, чтꙋ́щїи тѧ̀, ра́кꙋ твою̀ многоцѣле́бнꙋю любе́знѣ ѡ҆бстоѧ́ще, зове́мъ тѝ:

Ра́дꙋйсѧ, гра́да на́шегѡ похвало̀ и҆ ᲂу҆твержде́нїе: ра́дꙋйсѧ, ѡ҆би́тели бг҃омт҃рнїѧ, въ не́йже почива́еши, при́сное застꙋпле́нїе.

Ра́дꙋйсѧ, подвиза́ющымсѧ въ не́й бл҃года́тное вспоможе́нїе: ра́дꙋйсѧ, ѻ҆́ныхъ покро́ве и҆ защище́нїе.

Ра́дꙋйсѧ, недꙋ́гꙋющихъ ско́рѡ предста́тельный цѣле́бниче: ра́дꙋйсѧ, ᲂу҆ныва́ющихъ бл҃гонаде́жное возбꙋжде́нїе.

Ра́дꙋйсѧ, скорбѧ́щихъ всежела́тельное ᲂу҆тѣше́нїе: ра́дꙋйсѧ, ни́щихъ и҆з̾ѡби́льное бога́тство.

Ра́дꙋйсѧ, болѧ́щихъ младе́нцєвъ и҆сцѣле́нїе: ра́дꙋйсѧ, и҆знемога́ющихъ ᲂу҆крѣпле́нїе.

Ра́дꙋйсѧ, ревнꙋ́ющихъ ѡ҆ бл҃гоче́стїи помо́щниче: ра́дꙋйсѧ, пребыва́ющихъ въ постѣ̀ и҆ моли́твѣ споспѣ́шниче.

Ра́дꙋйсѧ, мч҃ниче и҆ чꙋдотво́рче а҆враа́мїе.

Конда́къ з҃.

Хотѧ̀ человѣколю́бецъ гдⷭ҇ь ꙗ҆ви́ти щедро́тъ свои́хъ ѻ҆би́лїе странѣ̀ рѡссі́йстѣй, дарова̀ на́мъ тебѐ страстоте́рпца но́вагѡ и҆ мл҃твенника бг҃опрїѧ́тнаго, чꙋде́съ блгⷣть и҆сточа́юща и҆ недꙋ́жныхъ безме́зднѡ врачꙋ́юща: тѣ́мже бл҃годари́мъ тобо́ю бл҃годѣ́ющаго на́мъ гдⷭ҇а и҆ свѣ́тлѡ пра́зднꙋемъ честны́хъ моще́й твои́хъ пренесе́нїе, къ ни́мъ съ любо́вїю припа́дающе и҆ хрⷭ҇тꙋ̀ зовꙋ́ще: А҆ллилꙋ́їа.

І҆́косъ з҃.

Но́вагѡ тѧ̀ мч҃ника и҆ до́блѧгѡ страда́льца, хрⷭ҇то́ва и҆сповѣ́дника и҆ чꙋдотво́рца сла́внаго, любо́вїю ᲂу҆блажа́емъ, и҆ ра́дꙋющесѧ ѡ҆ твое́мъ къ на́мъ прише́ствїи, глаго́лемъ:

Ра́дꙋйсѧ, денни́це лꙋчеза́рнаѧ, ѿ бо́лгаръ во влади́мїръ гра́дъ прите́кшаѧ: ра́дꙋйсѧ, лꙋчꙋ̀ немерца́ющїй сл҃нца пра́вды хрⷭ҇та̀.

Ра́дꙋйсѧ, ᲂу҆го́дниче гдⷭ҇ень, преди́вный въ чꙋдесѣ́хъ: ра́дꙋйсѧ, првⷣниче, просла́вленный на нб҃сѝ и҆ на землѝ.

Ра́дꙋйсѧ, нетлѣ́нїемъ моще́й твои́хъ въ и҆́стинѣ воскрⷭ҇нїѧ ме́ртвыхъ ᲂу҆вѣрѧ́ѧй: ра́дꙋйсѧ, ѡ҆́бразъ безсме́ртїѧ въ сме́ртнѣмъ тѣлесѝ показꙋ́ѧй.

Ра́дꙋйсѧ, ꙗ҆́кѡ тебѣ̀ дана̀ бы́сть блгⷣть за ны̀ моли́тисѧ и҆ возбꙋжда́ти на́съ ко бл҃ги́мъ дѣлѡ́мъ: ра́дꙋйсѧ, ꙗ҆́кѡ и҆ по преставле́нїи твое́мъ бл҃годѣѧ́нїе тре́бꙋющымъ подава́еши.

Ра́дꙋйсѧ, ѿ смертоно́сныхъ ꙗ҆́звъ и҆ болѣ́зней притека́ющихъ къ тебѣ̀ сохранѧ́ѧй: ра́дꙋйсѧ, бѣ́дствꙋющымъ и҆ ѡ҆би́димымъ помога́ѧй.

Ра́дꙋйсѧ, бг҃олюби́выхъ дꙋ́шъ непосты́дное ᲂу҆пова́нїе: ра́дꙋйсѧ, лю́бѧщихъ тѧ̀ при́сное ᲂу҆тѣше́нїе.

Ра́дꙋйсѧ, мч҃ниче и҆ чꙋдотво́рче а҆враа́мїе.

Конда́къ и҃.

Стра́ннѡ є҆́сть ви́дѣти ме́ртвенное тѣ́ло, жи́знь присносꙋ́щнꙋю ꙗ҆влѧ́ющее, во гро́бѣ лежа́щее и҆ недꙋ́ги врачꙋ́ющее: но, мч҃ниче хрⷭ҇то́въ а҆враа́мїе, моща́ми твои́ми ст҃ы́ми въ хра́мѣ се́мъ почива́ѧй, вѣ́рꙋемъ несомнѣ́ннѡ, ꙗ҆́кѡ и҆ дꙋ́хомъ твои́мъ не ѿлꙋча́ешисѧ ѿ на́съ недосто́йныхъ, чⷭ҇тнꙋ́ю ра́кꙋ твою̀ съ любо́вїю ѡ҆бстоѧ́щихъ и҆ хрⷭ҇тꙋ̀ бл҃года́рнѣ зовꙋ́щихъ: А҆ллилꙋ́їа.

І҆́косъ и҃.

Ве́сь въ вы́шнихъ є҆сѝ, свѧ́тче бж҃їй, во свѣ́тлости ст҃ы́хъ торжествꙋ́еши и҆ наслажда́ешисѧ неизрече́нныхъ бла̑гъ нбⷭ҇ныхъ: вѣ́мы же, ꙗ҆́кѡ и҆ на́съ земны́хъ и҆ пе́рстныхъ не забыва́еши, но ѿ го́рнихъ высо́тъ ми́лостивнѡ къ на́мъ приника́еши, подвиза́ѧ на́съ че́ствовати тѧ̀ си́ми похвала́ми:

Ра́дꙋйсѧ, бл҃гоче́стїѧ ᲂу҆твержде́нїе: ра́дꙋйсѧ, правосла́вїѧ похвало̀.

Ра́дꙋйсѧ, землѝ рѡссі́йскїѧ бл҃года́тное ѡ҆сѣне́нїе: ра́дꙋйсѧ, гра́да влади́мїра свѣ́тлое ра́дованїе.

Ра́дꙋйсѧ, многострада́льнаѧ розго̀ вїногра́да хрⷭ҇то́ва: ра́дꙋйсѧ, граждани́не го́рнѧгѡ гра́да, і҆ерⷭ҇ли́ма нбⷭ҇нагѡ.

Ра́дꙋйсѧ, въ пресла́вномъ мч҃ническомъ ли́цѣ пребыва́ѧй: ра́дꙋйсѧ, раѧ̀ жи́телю всебл҃же́нный.

Ра́дꙋйсѧ, црⷭ҇твїѧ хрⷭ҇то́ва наслѣ́дниче: ра́дꙋйсѧ, вѣ́чныѧ, бл҃же́нныѧ жи́зни соприча́стниче.

Ра́дꙋйсѧ, прибѣ́жище на́ше и҆ защище́нїе: ра́дꙋйсѧ, ско́рое и҆ безме́здное недꙋ́гѡвъ врачева́нїе.

Ра́дꙋйсѧ, мч҃ниче и҆ чꙋдотво́рче а҆враа́мїе.

Конда́къ ѳ҃.

Всѝ а҆́гг҃ли нбⷭ҇нїи воспрїѧ́ша тѧ̀ ра́достнѡ во ѡ҆би́тєли ра̑йскїѧ, страда́льче бг҃омꙋ́дре а҆враа́мїе, и҆дѣ́же ст҃а́ѧ твоѧ̀ дꙋша̀, ѻ҆гне́мъ страда́нїѧ и҆скꙋше́ннаѧ, по́честь побѣ́днꙋю воспрїѧ́тъ ѿ хрⷭ҇та̀ бг҃а на́шегѡ, пра́веднагѡ мздовоздаѧ́телѧ подвиза́ющихсѧ за и҆́мѧ є҆гѡ̀ ст҃о́е на землѝ: прославлѧ́ѧ бо и҆̀хъ на нб҃сѝ, съ го́рними вѡ́и ᲂу҆ прⷭ҇то́ла своегѡ̀ предстоѧ́нїѧ сподоблѧ́етъ, и҆дѣ́же пое́тсѧ є҆мꙋ̀ немо́лчнаѧ пѣ́снь: А҆ллилꙋ́їа.

І҆́косъ ѳ҃.

Виті́йствомъ ѕлочести́вымъ и҆ прельще́нїемъ лꙋка́вымъ неꙋловле́нъ пребы́лъ є҆сѝ, стрⷭ҇тоте́рпче, и҆зво́ливый па́че ᲂу҆мре́ти, не́же хрⷭ҇та̀ и҆ вѣ́ры въ него̀ ст҃ы́ѧ ѿрѣщи́сѧ, тѣ́мже, ꙗ҆́кѡ до́блѧго и҆сповѣ́дника хрⷭ҇то́ва, ᲂу҆блажа́емъ тѧ̀ и҆ зове́мъ:

Ра́дꙋйсѧ, пречꙋ́дное мꙋ́жество ꙗ҆ви́вый: ра́дꙋйсѧ, ꙗ҆́кѡ просвѣще́нъ бы́лъ є҆сѝ заре́ю прест҃а́гѡ дх҃а.

Ра́дꙋйсѧ, ꙗ҆́кѡ стра́хъ малодꙋ́шный ѿ себє̀ ѡ҆трѧ́слъ є҆сѝ: ра́дꙋйсѧ, ꙗ҆́кѡ щито́мъ вѣ́ры ѡ҆гради́лсѧ є҆сѝ.

Ра́дꙋйсѧ, неꙋмолка́ющїй бл҃говѣ́стниче си́лы бж҃їѧ, въ не́мощи человѣ́честѣй соверша́ющїѧсѧ: ра́дꙋйсѧ, и҆́стинный покло́нниче, дꙋ́хомъ и҆ и҆́стиною кла́нѧѧйсѧ творцꙋ̀.

Ра́дꙋйсѧ, мꙋ́жꙋ жела́нїй дꙋхо́вныхъ, взыска́вый хрⷭ҇та̀ въ странѣ̀ нече́стїѧ магоме́това: ра́дꙋйсѧ, ѿри́нꙋвый бг҃опроти́внꙋю ѻ҆́нꙋю пре́лесть.

Ра́дꙋйсѧ, кꙋ́плю дѣ́ѧвый вре́меннꙋю, вкꙋ́пѣ же и҆ вѣ́чнꙋю, нбⷭ҇нꙋю: ра́дꙋйсѧ, стра́нники и҆ ни́щыѧ пита́вый ѿ трꙋдѡ́въ твои́хъ пра́ведныхъ.

Ра́дꙋйсѧ, є҆ле́емъ ми́лости ᲂу҆маще́ннаѧ главо̀: ра́дꙋйсѧ, горо̀ добродѣ́телей, ѡ҆роше́ннаѧ кро́ве страда́льческїѧ и҆злїѧ́нїемъ.

Ра́дꙋйсѧ, мч҃ниче и҆ чꙋдотво́рче а҆враа́мїе.

Конда́къ і҃.

Сп҃сти́сѧ на́мъ преи́скреннѣ жела́ѧ, мо́лишисѧ за на́съ горѣ̀ ᲂу҆ прⷭ҇то́ла бж҃їѧ, страда́льче хрⷭ҇то́въ а҆враа́мїе, и҆ твои́ми мл҃твами посо́бствꙋеши на́мъ въ стра́нствїи многотрꙋ́днѣмъ земна́гѡ житїѧ̀, є҆́же въ покаѧ́нїи и҆ бл҃гоче́стїи сконча́ти, да сподо́бимсѧ съ тобо́ю воспѣва́ти хрⷭ҇тꙋ̀ и҆ бг҃ꙋ на́шемꙋ: А҆ллилꙋ́їа.

І҆́косъ і҃.

Стѣ́нꙋ защище́нїѧ стѧжа́вше твоѧ̑ ст҃ы̑ѧ мл҃твы, а҆враа́мїе чꙋ́дне, ра́дꙋемсѧ грѣ́шнїи и҆ чте́мъ любо́вїю па́мѧть твоегѡ̀ ᲂу҆сѣкнове́нїѧ и҆ моще́й твои́хъ ст҃ы́хъ пренесе́нїѧ, зовꙋ́ще:

Ра́дꙋйсѧ, великоимени́тый на́шъ застꙋ́пниче: ра́дꙋйсѧ, нб҃ожи́телю бг҃опросвѣще́нный.

Ра́дꙋйсѧ, чꙋдотво́рче ди́вный и҆ ми́лостивый: ра́дꙋйсѧ, бл҃гі́й послꙋ́шателю сꙋ́щихъ въ ско́рбехъ.

Ра́дꙋйсѧ, предварѧ́ѧй прошє́нїѧ призыва́ющихъ тѧ̀ въ бѣда́хъ: ра́дꙋйсѧ, грѣ́шныхъ ко и҆справле́нїю приведе́нїе.

Ра́дꙋйсѧ, мѵ́ро враче́бное недꙋ́гѡмъ многоразли̑чнымъ: ра́дꙋйсѧ, не то́кмѡ тѣле́сныхъ, но и҆ дꙋше́вныхъ болѣ́зней и҆зрѧ́дный цѣли́телю.

Ра́дꙋйсѧ, дꙋхѡ́въ нечи́стыхъ ѿ человѣ́кѡвъ прогони́телю: ра́дꙋйсѧ, дарѡ́въ бл҃года́тныхъ незави́стный пода́телю.

Ра́дꙋйсѧ, бл҃гоꙋха́нїемъ моще́й твои́хъ ᲂу҆слажда́ѧй дꙋ́ши на́шѧ: ра́дꙋйсѧ, чꙋдесы̀ твои́ми ᲂу҆твержда́ѧй на́съ во и҆́стинѣ ст҃ы́ѧ правосла́вныѧ вѣ́ры.

Ра́дꙋйсѧ, мч҃ниче и҆ чꙋдотво́рче а҆враа́мїе.

Конда́къ а҃і.

Пѣ́нїе моле́бное и҆ похвалꙋ̀ сїю̀ смире́ннꙋю не пре́зри, мч҃ниче: се́ бо вѣ́рою и҆ любо́вїю къ тебѣ̀ подвиза́еми, ра́кꙋ моще́й твои́хъ собо́рнѣ ѡ҆бстоѧ́ще, ᲂу҆блажа́емъ тѧ̀, застꙋ́пника на́шего, и҆ мо́лимсѧ: моли́сѧ за ны̀ вы́нꙋ ко гдⷭ҇ꙋ, вѣ́мы бо къ немꙋ̀ твоѐ невозбра́нное дерзнове́нїе и҆ твои́хъ мл҃твъ бл҃года́тное дѣ́йство. И҆мꙋ́ще такова́го предста́телѧ, бл҃года́рнѡ зове́мъ ди́вномꙋ во ст҃ы́хъ свои́хъ бг҃ꙋ на́шемꙋ: А҆ллилꙋ́їа.

І҆́косъ а҃і.

Свѣтоно́снымъ трⷪ҇ческимъ сїѧ́нїемъ горѣ̀ ѡ҆сїѧ́нный, а҆враа́мїе ст҃е, ѡ҆зарѝ на̑ша сердца̀, тьмо́ю грѣхо́вною покровє́ннаѧ: да є҆ле́емъ бл҃ги́хъ дѣ́лъ возже́гши ᲂу҆га́сшыѧ свѣти́льники на́шѧ, сподо́бимсѧ бра́чнагѡ хрⷭ҇то́ва черто́га, и҆дѣ́же ты̀ вселѧ́ешисѧ со ст҃ы́ми и҆ слы́шиши сїѧ̑ ѿ на́съ бл҃гохвалє́нїѧ:

Ра́дꙋйсѧ, бг҃омъ да́нный покрови́телю на́шъ: ра́дꙋйсѧ, а҆гг҃лоподо́бный человѣ́че.

Ра́дꙋйсѧ, нищелю́бче бл҃гослове́нный: ра́дꙋйсѧ, страннопрїи́мниче, дре́внемꙋ ѻ҆́номꙋ пра́ѻтцꙋ а҆враа́мꙋ ᲂу҆подоблѧ́ѧйсѧ.

Ра́дꙋйсѧ, ꙗ҆́кѡ рꙋка̀ твоѧ̀ и҆з̾ѻби́льнѡ помога́ше нꙋжда́ющымсѧ: ра́дꙋйсѧ, ꙗ҆́кѡ мꙋ́дрѣ расточа́лъ є҆сѝ бога́тство тлѣ́нное.

Ра́дꙋйсѧ, ѻ҆́ное премѣни́вый на нетлѣ́нныѧ нбⷭ҇ныѧ бл҃га: ра́дꙋйсѧ, наслажда́ѧйсѧ бл҃же́нства ми́лостивыхъ.

Ра́дꙋйсѧ, предстоѧ́й а҆́гнцꙋ бж҃їю въ ли́цѣ мч҃ничестѣмъ: ра́дꙋйсѧ, ликовствꙋ́ѧй въ селе́нїи пра́ведныхъ.

Ра́дꙋйсѧ, во страда́нїи твое́мъ до́блесть чꙋ́днꙋю ꙗ҆ви́вый: ра́дꙋйсѧ, ꙗ҆́звы гдⷭ҇а і҆и҃са хрⷭ҇та̀ на тѣ́лѣ твое́мъ носи́вый.

Ра́дꙋйсѧ, мч҃ниче и҆ чꙋдотво́рче а҆враа́мїе.

Конда́къ в҃і.

Блгⷣть и҆ млⷭ҇ть и҆спросѝ на́мъ ᲂу҆ хрⷭ҇та̀ и҆ бг҃а на́шегѡ, ст҃ы́й и҆ сла́вный стрⷭ҇тоте́рпче а҆враа́мїе: вѣ́рꙋемъ бо несомнѣ́ннѡ, ꙗ҆́кѡ є҆́же про́сиши, да́рꙋетъ тѝ всебл҃гі́й влⷣка: тѣ́мже и҆ ѡ҆ на́съ грѣ́шныхъ ᲂу҆молѧ́ти не преста́й є҆гѡ̀ бл҃гоꙋтро́бїе и҆ и҆спросѝ на́мъ да́ръ коемꙋ́ждо благопотре́бенъ, да зове́мъ всѣ́хъ бл҃ги́хъ вино́вникꙋ и҆ даропода́телю бг҃ꙋ: А҆ллилꙋ́їа.

І҆́косъ в҃і.

Пое́мъ твою̀ страда́льческꙋю кончи́нꙋ, сла́вимъ твои́хъ честны́хъ моще́й ѿ бо́лгаръ во влади́мїръ пренесе́нїе, ѿ ни́хже то́ки чꙋде́съ и҆сточа́еши непреста́ннѡ, подвиза́ѧ зва́ти тебѣ̀:

Ра́дꙋйсѧ, а҆рха́гг҃лѡвъ и҆ а҆́гг҃лѡвъ сослꙋжи́телю: ра́дꙋйсѧ, патрїа́рхѡвъ и҆ прⷪ҇ро́кѡвъ спредстоѧ́телю.

Ра́дꙋйсѧ, а҆пⷭ҇лѡвъ є҆диноревни́телю: ра́дꙋйсѧ, мч҃никѡвъ красото̀.

Ра́дꙋйсѧ, ст҃и́телей и҆ прпⷣбныхъ собесѣ́дниче: ра́дꙋйсѧ, првⷣныхъ и҆ всѣ́хъ ст҃ы́хъ сожи́телю.

Ра́дꙋйсѧ, ꙗ҆́кѡ свы́ше чꙋде́съ дѣѧ́нїи ᲂу҆краси́лсѧ є҆сѝ: ра́дꙋйсѧ, въ честны́хъ и҆ многоцѣле́бныхъ моще́хъ свои́хъ вы́нꙋ съ на́ми пребыва́ѧй.

Ра́дꙋйсѧ, ѻ҆́ными пресла́внѡ чꙋдодѣ́йствꙋѧй: ра́дꙋйсѧ, ѿра́до на́ша и҆ въ ско́рбехъ ᲂу҆тѣше́нїе.

Ра́дꙋйсѧ, недꙋ́гꙋющихъ и҆сцѣле́нїе: ра́дꙋйсѧ, согрѣша́ющихъ и҆справле́нїе.

Ра́дꙋйсѧ, мч҃ниче и҆ чꙋдотво́рче а҆враа́мїе.

Конда́къ г҃і.

Ѽ пресла́вный стрⷭ҇тоте́рпче хрⷭ҇то́въ а҆враа́мїе, ми́лостивѡ прїе́мши сїѐ ма́лое моле́нїе на́ше, ᲂу҆молѝ цр҃ѧ̀ ца́рствꙋющихъ и҆ гдⷭ҇а госпо́дствꙋющихъ, хрⷭ҇та̀ бг҃а на́шего, и҆зба́вити на́съ ѿ всѧ́кїѧ ско́рби и҆ нꙋ́жды въ жи́зни се́й и҆ мꙋче́нїй вѣ́чныхъ по сконча́нїи на́шемъ, да сподо́бимсѧ въ црⷭ҇твїи нбⷭ҇нѣмъ вкꙋ́пѣ съ тобо́ю пѣ́ти є҆мꙋ̀: А҆ллилꙋ́їа.

Се́й конда́къ глаго́лн три́жды, та́же і҆́косъ а҃-й, и҆ конда́къ а҃-й.

І҆́косъ а҃.

А҆́гг҃лѡвъ сожи́тель и҆ человѣ́кѡвъ застꙋ́пникъ вои́стиннꙋ ꙗ҆ви́лсѧ є҆сѝ, мч҃ниче достохва́льне, бл҃говоле́нїемъ всѣ́хъ творца̀ хрⷭ҇та̀ бг҃а, є҆го́же возлюби́лъ є҆сѝ и҆ за него́же пострада́лъ є҆сѝ да́же до кро́ве во и҆сповѣ́данїи непоколеби́мѣмъ. Тѣ́мже прїимѝ ѿ на́съ сїѧ̑ хвалє́нїѧ:

Ра́дꙋйсѧ, ѕвѣздо̀ пресвѣ́тлаѧ бл҃гоче́стїѧ: ра́дꙋйсѧ, свѣти́ло, во тмѣ̀ нече́стїѧ пресла́внѡ возсїѧ́вшее.

Ра́дꙋйсѧ, ѕловѣ́рїѧ магоме́това ѡ҆бличи́телю: ра́дꙋйсѧ, вѣ́ры хрⷭ҇тїа́нскїѧ небоѧ́зненный проповѣ́дниче.

Ра́дꙋйсѧ, є҆ѵⷢ҇льскагѡ ᲂу҆че́нїѧ до́брый послꙋ́шателю: ра́дꙋйсѧ, зако́на гдⷭ҇нѧ теплѣ́йшїй храни́телю.

Ра́дꙋйсѧ, кꙋ́плю вре́меннꙋю премѣни́вый на стѧжа́нїе вѣ́чное нбⷭ҇ное: ра́дꙋйсѧ, вѣ́ры хрⷭ҇то́вы би́серъ многоцѣ́ненъ стѧжа́вый.

Ра́дꙋйсѧ, хрⷭ҇то́вымъ ᲂу҆че́нїемъ дꙋ́шꙋ твою̀ просвѣти́вый: ра́дꙋйсѧ, ᲂу҆досто́ивыйсѧ бл҃года́тнагѡ ѡ҆сѣне́нїѧ свы́ше.

Ра́дꙋйсѧ, ꙗ҆ви́выйсѧ добродѣ́телей жили́ще, преꙋкра́шенное чистото́ю: ра́дꙋйсѧ, дх҃а ст҃а́гѡ ѡ҆би́тель прекра́снаѧ.

Ра́дꙋйсѧ, мч҃ниче и҆ чꙋдотво́рче а҆враа́мїе.

Конда́къ а҃.

И҆збра́нный страстоте́рпче хрⷭ҇то́въ и҆ чꙋдотво́рче преди́вный, во страда́нїи твое́мъ вѣне́цъ прїе́мый ѿ рꙋкѝ вседержи́телѧ и҆ со а҆́гг҃лы предстоѧ́й є҆гѡ̀ прⷭ҇то́лꙋ, пѣ́сньми восхвалѧ́емъ тѧ̀ любо́вїю и҆ мо́лимтисѧ: мл҃твами твои́ми ѿ всѧ́кихъ бѣ́дъ и҆ скорбе́й свобожда́й на́съ, тебѣ̀ зовꙋ́щихъ:

Ра́дꙋйсѧ, мч҃ниче и҆ чꙋдотво́рче а҆враа́мїе.

Моли́тва.

Ст҃ы́й мч҃ниче а҆враа́мїе, до́блїй во́ине хрⷭ҇та̀ цр҃ѧ̀ нбⷭ҇нагѡ, въ ско́рбехъ и҆ напа́стѣхъ пресла́вный на́шъ помо́щниче и҆ защи́тниче! ничто́же возмо́же ѿлꙋчи́ти тѧ̀ ѿ любвѐ ко гдⷭ҇ꙋ і҆и҃сꙋ, ни лє́стныѧ ѡ҆бѣща̑нїѧ бла̑гъ вре́менныхъ, ни прещє́нїѧ, ни мꙋ̑ки ѿ ѕлы́хъ врагѡ́въ ст҃ѣ́йшїѧ хрⷭ҇то́вы вѣ́ры: ты̀, ꙗ҆́кѡ ле́въ, и҆зше́лъ є҆сѝ на бра́нь проти́вꙋ волкѡ́въ мы́сленныхъ, дꙋхѡ́въ ѕло́бы, подви́гшихъ на тѧ̀, ра́ди до́брагѡ твоегѡ̀ и҆сповѣ̑данїѧ, є҆диноплеме́нный тебѣ̀ наро́дъ бо́лгарскїй, и҆, ꙗ҆́кѡ ѻ҆́гненнаѧ стрѣла̀, тѣ́хъ порази́лъ є҆сѝ си́лою блгⷣти ст҃а́гѡ дх҃а, и҆ крѣ́пкїѧ, ꙗ҆́кѡ сме́рть, любвѐ твоеѧ̀ къ бг҃ꙋ. А҆́ще и҆ пролїѧ́лъ є҆сѝ кро́вь твою̀ за хрⷭ҇та̀ бг҃а на́шего, погꙋби́въ вре́меннꙋю жи́знь, ѻ҆ба́че безсме́ртною дꙋше́ю, ꙗ҆́кѡ ѻ҆ре́лъ, воспари́лъ є҆сѝ въ гѡ́рнїѧ ѡ҆би́тєли ѻ҆ц҃а̀ на́шегѡ, наслѣ́довавъ та́мъ вѣ́чнꙋю жи́знь, сла́вꙋ и҆ бл҃же́нство неизрече́нное, и҆ ѡ҆ста́вивъ на́мъ нетлѣ́нныѧ мѡ́щи твоѧ̑, ꙗ҆́кѡ крі́нъ многоцѣ́нный и҆ бл҃гоꙋха́нный. Вѣ́рꙋемъ, стрⷭ҇тоте́рпче ст҃ы́й, ꙗ҆́кѡ предстоѧ̀ со а҆́гг҃лы и҆ всѣ́ми ст҃ы́ми прⷭ҇то́лꙋ сла́вы трїѷпоста́снагѡ бг҃а, ᲂу҆сє́рдныѧ и҆ бг҃опрїѧ̑тныѧ возно́сиши мл҃твы не то́кмѡ ѡ҆ на́съ, ѡ҆ ст҃ѣ́й ѡ҆би́тели се́й и҆ гра́дѣ на́шемъ, но и҆ ѡ҆ все́й ст҃ѣ́й хрⷭ҇то́вѣй цр҃кви и҆ ѡ҆ правосла́внѣй держа́вѣ рѡссі́йстѣй. Вѣ́рꙋемъ, пресла́вный чꙋдотво́рче, ꙗ҆́кѡ ты̀, си́лою всемогꙋ́щагѡ гдⷭ҇а і҆и҃са хрⷭ҇та̀, чрез̾ ст҃ы̑ѧ мѡ́щи твоѧ̑, и҆сточа́еши ѻ҆би̑льныѧ да́ры бл҃года́тныѧ по́мощи во сп҃се́нїе всѣ̑мъ съ вѣ́рою къ тебѣ̀ притека́ющымъ, наипа́че же и҆спра́шиваеши кончи́нꙋ съ покаѧ́нїемъ тебє̀ чтꙋ́щымъ, и҆ бл҃госе́рднѡ помога́еши немощны̑мъ младе́нцємъ, да всѝ ѿ ма́ла до вели́ка є҆динодꙋ́шнѡ прославлѧ́емъ неисповѣди́мое вели́чїе бл҃гости бж҃їей. Тѣ́мже вѣ́рою и҆ любо́вїю ко свѧты̑мъ моще́мъ твои̑мъ припа́дающе и҆ бл҃гоговѣ́йнѡ ѻ҆́ныѧ лобыза́юще, ᲂу҆молѧ́емъ тѧ̀, до́брый на нб҃сѝ на́шъ мл҃твенниче и҆ застꙋ́пниче, помога́й на́мъ грѣ́шнымъ и҆ смире́ннымъ твои́ми мл҃твами во всѣ́хъ ско́рбехъ, нꙋ́ждахъ и҆ ѡ҆бстоѧ́нїихъ на́шихъ, сохранѧ́й на́съ, ст҃ꙋ́ю ѡ҆би́тель сїю̀ и҆ гра́дъ се́й ѿ всѧ́кагѡ ѕла̀ и҆ всѧ́кїѧ напа́сти, наипа́че же споспѣшествꙋ́й вѣ́чномꙋ сп҃се́нїю на́шемꙋ и҆ всѣ́хъ просѧ́щихъ ѿ тебє̀ по́мощи и҆ застꙋпле́нїѧ. Є҆́й, смире́ннѡ мо́лимъ тѧ̀, ᲂу҆го́дниче бж҃їй, молѝ хрⷭ҇та̀ бг҃а на́шего, да да́стъ ѻ҆́нъ ми́ръ и҆ тишинꙋ̀ всѣ̑мъ правосла̑внымъ хрⷭ҇тїа́нѡмъ и҆ да ѿврати́тъ ѿ на́съ всѧ́кїй гнѣ́въ, на ны̀ дви́жимый, да и҆зба́витъ на́съ ѿ сѣте́й вра́жїихъ, томле́нїѧ во ᲂу҆́захъ грѣха̀ и҆ мꙋче́нїй а҆́довыхъ, и҆ да сподо́битъ на́съ недосто́йныхъ ѡ҆деснꙋ́ю себє̀ ста́ти на сꙋдѣ̀ свое́мъ првⷣнѣмъ и҆ вни́ти въ вѣ́чный поко́й ст҃ы́хъ є҆гѡ̀, и҆дѣ́же пра́зднꙋющихъ гла́съ непреста́нный и҆ неизрече́ннаѧ сла́дость зрѧ́щихъ добро́тꙋ лица̀ є҆гѡ̀: и҆ та́кѡ возмо́жемъ съ тобо́ю и҆ всѣ́ми ст҃ы́ми прославлѧ́ти ѻ҆ц҃а̀ и҆ сн҃а и҆ ст҃а́гѡ дх҃а, трⷪ҇цꙋ є҆диносꙋ́щнꙋю и҆ нераздѣ́льнꙋю. А҆ми́нь.

Краткое житие мученика Аврамия (Авраамия) Болгарского, Владимирского чудотворца

Му­че­ник Ав­раа­мий ро­дил­ся в Кам­ской Бол­га­рии (бол­га­ры жи­ли меж­ду ре­ка­ми Вол­гою и Ка­мою, впо­след­ствии по­сте­пен­но утра­ти­ли свою на­род­ность и сме­ша­лись с по­бе­див­ши­ми их та­та­ра­ми) и вос­пи­тан был в ма­го­ме­тан­ской ве­ре, ко­то­рую ис­по­ве­до­ва­ли его со­оте­че­ствен­ни­ки. Он был че­ло­век с боль­ши­ми сред­ства­ми и за­ни­мал­ся тор­гов­лею, был при­стра­стен к су­ет­ным бла­гам ми­ра се­го и чув­ствен­ным удо­воль­стви­ям, ока­зы­вал го­сте­при­им­ство стран­ни­кам и ни­щим. По бла­го­да­ти Бо­жи­ей Ав­ра­амий убе­дил­ся в лжи­во­сти ма­го­ме­тан­ской и в ис­тин­но­сти хри­сти­ан­ской ве­ры и сде­лал­ся ис­тин­ным хри­сти­а­ни­ном. Ис­по­ве­дуя ве­ру Хри­сто­ву, он пре­был непо­ко­ле­бим в пра­ви­лах уче­ния Спа­си­те­ля и за то по­стра­дал от сво­их еди­но­зем­цев. Ко­гда он при­е­хал для тор­гов­ли в их так на­зы­ва­е­мый ве­ли­кий град Бол­га­ры, его скло­ня­ли и по­том при­нуж­да­ли от­речь­ся от Хри­ста. На эти угро­зы бла­жен­ный Ав­раа­мий от­ве­чал от­ка­зом. То­гда бол­га­ры, рас­сви­ре­пев, за­то­чи­ли его в тем­ни­цу на мно­го дней, а за­тем, ви­дя непре­клон­ность его в ве­ре, от­сек­ли ему спер­ва ру­ки, по­том но­ги и го­ло­ву. Му­че­ни­че­ски скон­чал­ся свя­той Ав­раа­мий 1 ап­ре­ля 1229 го­да. Быв­шие на яр­мар­ке хри­сти­ане, ве­ро­ят­но, му­ром­ские куп­цы, бла­го­го­вей­но по­греб­ли те­ло стра­сто­терп­ца на хри­сти­ан­ском клад­би­ще в Бол­га­рах. За­ме­тив со­вер­шав­ши­е­ся над гро­бом его чу­дес­ные ис­це­ле­ния боль­ных хри­сти­ан, они до­нес­ли обо всем бла­го­вер­но­му ве­ли­ко­му кня­зю Ге­ор­гию Все­во­ло­до­ви­чу и через год от­вез­ли те­ло му­че­ни­ка во Вла­ди­мир, где ве­ли­кий князь Ге­ор­гий Все­во­ло­до­вич, су­пру­га его, де­ти, Вла­ди­мир­ский епи­скоп Мит­ро­фан, ду­хо­вен­ство, на­род встре­ти­ли мо­щи Ав­раамия и пе­ре­нес­ли их в оби­тель, на­зы­вав­шу­ю­ся Кня­ги­нин мо­на­стырь, и там по­ло­жи­ли 6 мар­та 1230 г. в церк­ви Успе­ния Пре­свя­той Бо­го­ро­ди­цы.

По­сле кон­чи­ны Ав­раа­мия го­род Бол­га­ры по­чти весь вы­го­рел. Рус­ские ле­то­пис­цы го­во­рят, что эти по­жа­ры Гос­подь по­сы­лал в на­ка­за­ние за непо­вин­ную кровь Ав­раа­мия.

Полное житие мученика Аврамия (Авраамия) Болгарского, Владимирского чудотворца

Этот бо­га­тый и знат­ный ку­пец жил в Волж­ской Бул­га­рии в кон­це XII – на­ча­ле XIII вв. Жизнь это­го че­ло­ве­ка силь­но от­ли­ча­лась от жиз­ни мно­гих его зем­ля­ков и со­пле­мен­ни­ков. Был он че­ло­ве­ком необык­но­вен­но со­стра­да­тель­ным, ми­ло­сти­вым к бед­ству­ю­щим, тра­тил свои бо­гат­ства на нуж­ды страж­ду­щих. По­се­щая рус­ские го­ро­да, об­ща­ясь с рус­ски­ми куп­ца­ми, он глу­бо­ко за­ин­те­ре­со­вал­ся хри­сти­ан­ской ве­рой. По Бо­жию смот­ре­нию бла­го­дать кос­ну­лась его серд­ца и, по­знав ис­ти­ну свя­той ве­ры Хри­сто­вой, он при­нял Свя­тое Кре­ще­ние. Так сей ку­пец ста­но­вит­ся хри­сти­а­ни­ном и по­лу­ча­ет но­вое имя, с ко­то­рым и за­пи­сан на стра­ни­цах Кни­ги жиз­ни, – Ав­ра­амий (ни­где в ле­то­пи­сях не упо­ми­на­ет­ся об име­ни свя­то­го до Кре­ще­ния). По Кре­ще­нии свя­той еван­гель­ским сло­вом, а глав­ное – хри­сти­ан­ским об­ра­зом жиз­ни несет апо­столь­скую про­по­ведь сре­ди сво­е­го на­ро­да. И как до при­ня­тия хри­сти­ан­ства со­стра­дал Ав­ра­амий бед­стви­ям и ли­ше­ни­ям ближ­них, так по при­ня­тии спа­си­тель­ной ве­ры Хри­сто­вой стал бо­лез­но­вать ду­хом и скор­беть о ду­хов­ных бед­стви­ях сво­их еди­но­зем­цев, о незна­нии ими ис­тин­но­го Бо­га неба и зем­ли, от­крыв­ше­го­ся нам через Еди­но­род­но­го Сы­на Сво­е­го во Свя­том Ду­хе, и о про­ис­хо­дя­щем от се­го незна­ния неустрой­стве и бес­по­ря­доч­но­сти нра­вов (Ин.17:3; Рим.25:31). Оду­шев­лен­ный свя­тою рев­но­стью по свя­той ве­ре и брат­скою лю­бо­вью к нече­сти­вым со­пле­мен­ни­кам сво­им, Ав­ра­амий, бу­дучи по тор­го­вым де­лам в сто­ли­це Волж­ской Бул­га­рии – Ве­ли­ких Бул­га­рах, во вре­мя яр­мар­ки (ага-ба­за­ра) вме­сто то­го, чтобы за­ни­мать­ся тор­гов­лею и при­об­ре­тать бла­га вре­мен­ные, зем­ные, на­чи­на­ет бла­го­вест­во­вать сво­им еди­но­пле­мен­ни­кам о бла­гах веч­ных, нетлен­ных, и пред­ла­га­ет им про­по­ведь о Хри­сте бо­го­че­ло­ве­ке, «рас­пен­шем­ся за ны во­лею, вос­крес­ше­му из мерт­вых и со сла­вою во­с­нес­шем­ся с пло­тию на небо», о без­на­чаль­ном Его От­це и о со­веч­ном От­цу и Сы­ну Все­свя­том Ду­хе.

В изум­ле­ние при­шли бол­га­ры, услы­шав про­по­ведь хри­сти­ан­скую от сво­е­го еди­но­пле­мен­ни­ка и быв­ше­го еди­но­вер­ца. Его со­оте­че­ствен­ни­ки не толь­ко не изъ­яви­ли со­чув­ствия к про­по­ве­ди свя­то­го му­жа, но да­же раз­дра­жи­лись на про­по­вед­ни­ка, осо­бен­но ко­гда уви­да­ли его непре­клон­ность по­сле мно­го­крат­ных уве­ща­ний и со­ве­тов оста­вить хри­сти­ан­скую ве­ру. Они ста­ли Ав­ра­амия пер­во­на­чаль­но, как лю­би­мо­го все­ми, уго­ва­ри­вать, чтоб оста­вил Хри­сто­ву ве­ру. Ко­гда лас­ко­вые убеж­де­ния не по­дей­ство­ва­ли на ис­по­вед­ни­ка Хри­сто­ва име­ни, ему ста­ли угро­жать от­ня­ти­ем име­ния. На эти угро­зы бла­жен­ный от­ве­чал, что за Хри­ста Спа­си­те­ля он го­тов ли­шить­ся не толь­ко име­ния, но не по­жа­ле­ет и са­мой сво­ей жиз­ни. По­сле это­го по­шли по­бои. Би­ли Ав­ра­амия «всем ми­ром», би­ли так же­сто­ко, что на те­ле му­че­ни­ка не оста­лось ни од­но­го непо­вре­жден­но­го ме­ста: «яко не бы­тии на нем ме­ста це­ла и неуязв­лен­на» (из ака­фи­ста му­че­ни­ку). Пы­та­лись за­ста­вить его за­мол­чать, от­речь­ся от Хри­ста, но бы­ло тщет­но. То­гда бол­га­ры, рас­сви­ре­пев, как зве­ри, на ис­по­вед­ни­ка, мно­го дней то­ми­ли его в за­клю­че­нии, мно­ги­ми му­че­ни­я­ми при­нуж­дая от­верг­нуть­ся ве­ры хри­сти­ан­ской. Не из­не­мог в му­ках доб­лест­ный стра­да­лец за ис­тин­ную ве­ру, но, укреп­ля­е­мый бла­го­да­тию Бо­жи­ею, еще боль­ше утвер­дил­ся в свя­той люб­ви к Ис­ку­пи­те­лю ми­ра. То­гда, ви­дя его непре­клон­ность в ве­ре, злоб­ные изу­ве­ры от­ве­ли за го­род и у ко­лод­ца неда­ле­ко от бе­ре­га Вол­ги от­сек­ли ему спер­ва ру­ки, по­том но­ги и гла­ву. Так 1 ап­ре­ля 1229 го­да с ис­по­ве­да­ни­ем ис­тин­ной ве­ры на устах ото­шел к сво­е­му Небес­но­му От­цу этот ми­ло­серд­ный и ис­крен­ний че­ло­век Бо­жий. Му­ром­ские куп­цы, быв­шие то­му сви­де­те­ля­ми, по­греб­ли му­че­ни­ка на осо­бом клад­би­ще, «где по­гре­ба­лись все хри­сти­ане». Гос­подь вско­ре на­ка­зал жи­те­лей Ве­ли­ких Бул­гар за кровь Сво­е­го угод­ни­ка страш­ным по­жа­ром: «... вско­ре вы­го­рел оный град ве­ли­кий со мно­гим и неис­чис­лен­ным бо­гат­ством!»

При гро­бе очень ско­ро на­ча­лись зна­ме­ния, по­слу­жив­шие по­во­дом к по­чи­та­нию свя­то­го, слух о ко­то­рых рас­про­стра­нил­ся по всей Пра­во­слав­ной Ру­си. В 1230 го­ду к бла­го­вер­но­му вла­ди­мир­ско­му кня­зю Ге­ор­гию Все­во­ло­до­ви­чу яви­лись по­слы от волж­ских бул­гар про­сить ми­ра (по­сле ше­сти­лет­ней вой­ны с Русью).

Князь Ге­ор­гий со­гла­сил­ся на их же­ла­ние и, ед­ва за­клю­чен был мир, по­слал в Бул­га­ры по­соль­ство для пе­ре­не­се­ния мо­щей му­че­ни­ка Хри­сто­ва. 9 мар­та 1230 го­да его мо­щи бы­ли пе­ре­не­се­ны во Вла­ди­мир, в Кня­ги­нин мо­на­стырь (где и по­ныне хра­нит­ся уцелев­шая ча­сти­ца).

Неза­дол­го до ре­во­лю­ции в с. Бол­га­ры бы­ли пе­ре­да­ны древ­ний об­раз свя­то­го с ча­сти­цей его мо­щей и ста­рая де­ре­вян­ная ра­ка. Эти свя­ты­ни бы­ли уте­ря­ны в пе­ри­од без­бож­но­го ли­хо­ле­тья. Со­хра­ни­лась лишь фа­лан­га пер­ста пра­вой ру­ки, в без­бож­ное вре­мя сбе­ре­гав­ша­я­ся с бла­го­го­ве­ни­ем жи­те­ля­ми го­ро­да по до­мам, ныне же на­хо­дя­ща­я­ся в Свя­то-Ав­ра­ами­ев­ском хра­ме г. Бол­га­ра. Гос­подь про­сла­вил Сво­е­го угод­ни­ка мно­ги­ми чу­де­са­ми, про­ис­хо­див­ши­ми по его мо­лит­вам у свя­тых мо­щей. Бы­ло за­ме­че­но, что му­че­ник об­ла­да­ет осо­бой бла­го­дат­ной си­лой пред­ста­тель­ство­вать пе­ред Бо­гом о боль­ных де­тях, со­хра­ни­лись за­пи­си об ис­це­ле­нии боль­ных. Ав­ра­амию Бол­гар­ско­му мо­лят­ся о по­кро­ви­тель­стве и успе­хе в тор­гов­ле, лич­ном пред­при­ни­ма­тель­стве.