Конда́к 1.
Избра́нный от Воево́ды си́л небе́сных и Го́спода Иису́са Христа́, преподо́бне о́тче на́ш Мака́рие, я́ко име́яй ве́лие дерзнове́ние к Бо́гу, моли́ся вы́ну о спасе́нии ду́ш на́ших и избавле́нии на́с от вся́ких бе́д и напа́стей, да зове́м ти́:
Ра́дуйся, Мака́рие, преди́вный чудотво́рче.
И́кос 1.
А́нгела на земли́ яви́ тя Творе́ц небеси́ и земли́, вся́ бо земна́я вмени́л еси́ за уме́ты, да приобря́щеши еди́наго Христа́; те́мже вси́, зря́ще твое́ христоподо́бное на земли́ житие́, вопие́м ти́:
Ра́дуйся, я́ко от утро́бы ма́терния предугото́ванный в чи́стое и непоро́чное жили́ще Пресвяты́я Тро́ицы; ра́дуйся, Бо́гом Отце́м предъизбра́нный.
Ра́дуйся, Бо́гом Сы́ном искупле́нный; ра́дуйся, Бо́гом Ду́хом Святы́м освяще́нный.
Ра́дуйся, Го́спода па́че всего́ возлюби́вый; ра́дуйся, отца́ и ма́терь ра́ди Христа́ оста́вивый.
Ра́дуйся, зва́нию ду́ха благода́ти повину́выйся; ра́дуйся, себе́ отверги́йся ра́ди Христа́ Иису́са.
Ра́дуйся, кре́ст Христо́в на себе́ взе́мый; ра́дуйся, всле́д Христа́ после́довавый.
Ра́дуйся, до конца́ жи́зни твоея́ в терпе́нии и по́двизех неосла́бно пребыва́вый; ра́дуйся, я́ко претерпева́я му́жественно вре́менная и настоя́щая весели́лся еси́ бу́дущими и ве́чными.
Ра́дуйся, Мака́рие, преди́вный чудотво́рче.
Конда́к 2.
Преподо́бне о́тче Мака́рие, ты́, сы́й еще́ младе́нец, егда́ быва́ше зво́н церко́вный, пла́ча и де́тски крича́, я́ко смы́сляй, изъявля́л еси́ жела́ние, да в це́рковь несе́н бу́деши. Соверша́ющуся же церко́вному в хра́ме Бо́жием пе́нию ра́довался и весели́лся еси́. Сего́ ра́ди благове́рнии роди́телие твои́ ноша́ху тя́ на ко́еждо церко́вное пе́ние и прославля́ху о тебе́ Го́спода Бо́га, вопию́ще: Аллилу́иа.
И́кос 2.
Ра́зум, неразумева́емый му́дрствующим плотска́я, стяжа́л еси́, и все́ се́рдце твое́ впери́л еси́ в небе́сная, сего́ ра́ди вопие́м ти́:
Ра́дуйся, я́ко по вся́ дни́ в це́рковь Бо́жию ходи́л еси́; ра́дуйся, я́ко в сла́дость церко́внаго чте́ния и пе́ния послу́шал еси́.
Ра́дуйся, от ю́ности навы́кший богоуго́дному добронра́вию; ра́дуйся, возлюби́вший красоту́ до́ма Бо́жия и ме́сто селе́ния сла́вы Госпо́дни.
Ра́дуйся, изво́ливый примета́тися в дому́ Бо́жии па́че, не́же жи́ти в селе́ниих гре́шничих; ра́дуйся, во дни́ и в нощи́ непреста́нно моли́твы к Бо́гу возноси́вый.
Ра́дуйся, в чи́сту же́ртву Бо́гови не те́ло то́чию, но и ду́шу всю́ принесы́й; ра́дуйся, всего́ себе́ на служе́ние Бо́гу преда́вый.
Ра́дуйся, я́ко превы́ше све́рстник твои́х в разуме́нии сло́ва Бо́жия яви́лся еси́; ра́дуйся, я́ко за́поведи Бо́жия бы́ша па́че ме́да и со́та усто́м твои́м.
Ра́дуйся, я́ко ма́слина в дому́ Бо́жии насажде́нная; ра́дуйся, блаже́нне, я́ко уподо́бился еси́ дре́ву, насажде́нному при исхо́дищих во́д, принося́щему плоды́.
Ра́дуйся, Мака́рие, преди́вный чудотво́рче.
Конда́к 3.
Согрева́ющу Ду́ху Свято́му се́рдце твое́, преподо́бне о́тче, возжела́л еси́ вельми́ и́ноческаго чи́на, возлюби́в Отца́ Небе́снаго па́че земны́х роди́телей твои́х, и изше́л еси́ о́тай из до́му роди́телей во и́ноческую оби́тель; обре́т же на пути́ ни́ща, ху́ду оде́жду нося́ща, испроси́л еси́ ту́ себе́, да́в ему́ свое́ до́брое одея́ние ра́ди Го́спода Бо́га Иису́са Христа́, на́с ра́ди обнища́вшаго, да мы́ нището́ю Его́ обогати́мся и вопие́м Ему́ вы́ну: Аллилу́иа.
И́кос 3.
Прише́д во святу́ю оби́тель, преподо́бне о́тче на́ш Мака́рие, моли́л еси́ свята́го Диони́сия Архимандри́та, да прия́т бу́деши в чи́н и́ноческий, сказу́я себе́ безро́дна, сиро́тствующа, ни́ща, жела́юща рабо́тати Бо́гу. Архимандри́т же проразуме́ в тебе́ иму́ща бы́ти сосу́д избра́нный Свято́му Ду́ху, прия́ и облече́ тя́ во а́нгельский о́браз. Ты́ же вся́ доброде́тели, подоба́ющия и́ноком, исполня́л и во все́м угожда́л еси́ Бо́гу и наста́внику твоему́, я́коже самому́ Христу́, та́кожде и бра́тиям, и показа́лся еси́ в новонача́лии свое́м соверше́н бы́ти и́нок и до́брый подви́жник. Те́мже досто́йно вопие́м ти́:
Ра́дуйся, от ру́к свята́го Диони́сия и́ночество любе́зне прие́мый; ра́дуйся, сожи́тельство и собесе́дничество с преподо́бными избра́вый.
Ра́дуйся, и́ноческаго жития́ ско́рби и тесноту́ возлюби́вый па́че утеше́ний и сла́достей ми́ра; ра́дуйся, поревнова́вый житию́ и по́двигом дре́вних преподо́бных оте́ц.
Ра́дуйся, и́стиннаго послуша́ния настоя́телю и все́й во Христе́ бра́тии о́браз показа́вый; ра́дуйся, вся́кое послуша́ние со смире́нием и кро́тостию соверши́вый.
Ра́дуйся, чистоты́ душе́вныя и теле́сныя кре́пкий ревни́телю и храни́телю; ра́дуйся, бде́нием, посто́м и коленопреклоне́ньми пло́ть свою́ умертви́вый.
Ра́дуйся, безмо́лвию и богомы́слию от ю́ности научи́выйся; ра́дуйся, вы́ну молча́ние с незло́бием храни́вый.
Ра́дуйся, сло́вом Бо́жиим, а́ки мече́м, сопроти́вныя си́лы побежда́вый; ра́дуйся, по́стничеством и доброде́тельми превозше́дый бы́вших с тобо́ю и́ноков.
Ра́дуйся, Мака́рие, преди́вный чудотво́рче.
Конда́к 4.
Бу́ря по́мыслов смуща́ше роди́тели твоя́, о́тче на́ш Мака́рие, егда́ внеза́пу оста́вил еси́ о́тай до́м и́х; чрез три́ же ле́та обре́тше тя́ во святе́й оби́тели, ра́довахуся и сла́вляху Бо́га, вопию́ще Ему́: Аллилу́иа.
И́кос 4.
Слы́шавше, преподо́бне о́тче Мака́рие, бли́жнии и да́льнии, я́же о по́стническом житии́ твое́м, удивля́хуся и прославля́ху тя́ всю́ду, ты́ же, я́ко ища́й сла́вы еди́наго Бо́га, бе́гал еси́ сла́вы, я́же от челове́к, скрыва́яся в пусты́нях. Вся́ же на по́льзу стро́яй, Бо́г просла́ви тебе́, раба́ Своего́, не то́чию в христиа́нех, но и во ага́рянех. Те́мже мы́ вопие́м ти́:
Ра́дуйся, гра́де верху́ стоя́й, не моги́й укры́тися; ра́дуйся, свети́льниче, вся́ озаря́яй чудесы́ и по́двиги твои́ми.
Ра́дуйся, звездо́, показу́ющая со́лнце пра́вды; ра́дуйся, заре́ Боже́ственнаго Све́та.
Ра́дуйся, до́брыми де́лы твои́ми все́х, зря́щих тя́, подвиза́яй к прославле́нию Отца́, И́же на небесе́х; ра́дуйся, я́ко пре́жде са́м потща́лся еси́ сотвори́ти Во́лю Бо́жию и по́сле научи́ти други́х.
Ра́дуйся, тве́рдый сто́лпе и́ночества; ра́дуйся, я́ко му́др во́ждь, приведы́й мно́гих к ве́чному спасе́нию.
Ра́дуйся, по́стничества, терпе́ния, жа́жды и а́лчбы, и наготы́ о́бразе преди́вный; ра́дуйся, благо́е и́го и ле́гкое бре́мя Христо́во измла́да возлюби́вый.
Ра́дуйся, на земли́ а́нгельски пожи́вый; ра́дуйся, земны́й А́нгеле и небе́сный челове́че.
Ра́дуйся, Мака́рие, преди́вный чудотво́рче.
Конда́к 5.
Боготе́чная звезда́ всея́ страны́ яви́лся еси́, преподо́бне о́тче Мака́рие, все́м бы́в о́браз сло́вом, житие́м, любо́вию, ду́хом, ве́рою, чистото́ю, воспева́я Го́споду Бо́гу: Аллилу́иа.
И́кос 5.
Госпо́дь Бо́г, очища́яй скорбьми́ и напа́стьми избра́нныя Своя́, я́ко зла́то и сребро́, попусти́ разори́тися созда́нней тобо́ю оби́тели, на ню́же внеза́пу напа́дше, ага́ряне все́х, в не́й бы́вших, ме́чным посече́нием, а́ки кла́сы на ни́ве, пожа́ша, тебе́ же, преподо́бне о́тче на́ш, жи́ва приведо́ша к воево́де своему́. Се́й же, узре́в ангелоподо́бное лице́ твое́ и уве́дев, я́ко ты́ никому́же зла́ соде́лал еси́, но все́м еди́но добро́ твори́л еси́, Бо́гу сараци́нское жесто́кое се́рдце его́ умягча́ющу, даде́ свобо́ду тебе́ и еще́ же тебе́ ра́ди свободи́ про́чия плене́нныя до четы́редесяти муже́й, ра́зве же́н и дете́й. Те́мже вопие́м ти́ сицева́я:
Ра́дуйся, кро́тостию и бла́гостию свое́ю сердца́ неве́рных победи́вый; ра́дуйся, зло́бу на жа́лость преложи́вый.
Ра́дуйся, благочести́выя лю́ди от пле́на ага́рянскаго свободи́вый; ра́дуйся, мно́гия от тя́жких напа́стей и скорбе́й изба́вивый.
Ра́дуйся, я́ко честно́му погребе́нию преда́л еси́ бра́тию оби́тели, срацы́нами избие́нную, я́коже избие́нни бы́ша дре́вле о́нии преподо́бнии отцы́, и́же в Сина́и и Раи́фе; ра́дуйся, я́ко еди́ною уме́рый ми́рови не о себе́, но о бли́жних печа́лился еси́.
Ра́дуйся, я́ко лю́ди, с тобо́ю отпуще́нныя из пле́на, тщали́ве охраня́л еси́, да не па́ки во ага́рянския ру́це впаду́т; ра́дуйся, я́ко научи́л еси́ изведе́нныя тобо́ю лю́ди возложи́ти всю́ наде́жду на еди́наго Бо́га.
Ра́дуйся, я́ко бы́л еси́ и́м в пути́ и во́ждь, и учи́тель, и уте́шитель; ра́дуйся, я́ко с моли́твою изше́л еси́ во страну́ Га́лическую.
Ра́дуйся, я́ко, ше́ствуя путе́м, положи́л еси́ основа́ние Свия́жския оби́тели; ра́дуйся, я́ко ре́вностию поревнова́л еси́ о спасе́нии ду́ш, искупле́нных Иису́сом Христо́м.
Ра́дуйся, Мака́рие, преди́вный чудотво́рче.
Конда́к 6.
Все́ житие́ твое́, преподо́бне о́тче Мака́рие, е́сть немо́лчное пропове́дание ве́ры, наде́жды и любве́, я́же к Бо́гу и к бли́жним, влия́нныя в ду́шу твою́ Святы́м Ду́хом, Ему́же вопие́м: Аллилу́иа.
И́кос 6.
Но́ваго Моисе́я показа́ тя, преподо́бне о́тче на́ш Мака́рие, Госпо́дь Бо́г, егда́ лю́ди, свободи́вшияся от пле́на, безбе́дно прове́л еси́ непроходи́мыми ле́сы и бла́ты и изнемога́ющия от гла́да ди́вно препита́л еси́. Сего́ ра́ди вопие́м ти́:
Ра́дуйся, я́ко гла́дным лю́дем возбрани́л еси́ разори́ти по́ст, от Святы́я Це́ркве уста́вленный; ра́дуйся, я́ко уте́шил еси́ о́ныя словесы́ богодухнове́нными, укрепля́я в терпе́нии.
Ра́дуйся, я́ко от ю́ности навы́кший поще́нию, небре́гл еси́ о себе́; ра́дуйся, я́ко о наро́де гла́днем истаева́я печа́лию, твои́ми словесы́ и моли́твами укрепи́л еси́ его́ в изнеможе́нии от неяде́ния.
Ра́дуйся, я́ко гла́днии лю́дие пи́щею духо́вною, а́ки хле́бом, укрепля́еми, му́жествоваху; ра́дуйся, я́ко у Бо́га испроси́л еси́ скота́, и́же бы́сть на дово́льную пи́щу а́лчущим.
Ра́дуйся, я́ко вся́ лю́ди приве́л еси́ безбе́дне в преде́лы Га́лическия страны́, во гра́д У́нжу; ра́дуйся, я́ко благове́рнии лю́дие срето́ша тебе́ че́стне, прия́ша любе́зне, я́ко А́нгела Бо́жия.
Ра́дуйся, я́ко ведо́мии тобо́ю лю́дие испове́даша пред все́ми на себе́ ми́лость Бо́жию; ра́дуйся, я́ко слы́шащии, ка́ко Госпо́дь Бо́г свободи́ благове́рныя лю́ди от плене́ния и гла́дныя насы́ти, просла́виша Бо́га и тебе́, Его́ уго́дника.
Ра́дуйся, я́ко Га́лическую страну́ чудесы́ твои́ми озари́л еси́; ра́дуйся, я́ко свети́льник горя́й и светя́й яви́лся еси́.
Ра́дуйся, Мака́рие, преди́вный чудотво́рче.
Конда́к 7.
Почита́ния и сла́вы, я́же от челове́к, во гра́де не терпя́, па́ки пусты́ннаго безмо́лвия возжела́л еси́, преподо́бне о́тче, и, обре́т пусты́нное ме́сто, возлюби́л еси́ е́, и водрузи́л еси́ та́мо кре́ст, водвори́лся еси́ в созда́нней тобо́ю ке́ллии, да пое́ши вы́ну Бо́гу: Аллилу́иа.
И́кос 7.
В пусты́ни, в ню́же всели́лся еси́, преподо́бне о́тче Мака́рие, по ма́ле вре́мени оби́тель и́ноком в пребыва́ние устро́ися Бо́жиим изволе́нием, и я́коже обы́кл еси́, в преподо́бии и пра́вде дни́ и но́щи рабо́тал еси́ Бо́гови. Мы́ же, прославля́юще о тебе́ Го́спода Бо́га, вопие́м ти́:
Ра́дуйся, еди́ное на потре́бу всегда́ иска́вый; ра́дуйся, и́щущему до́брый би́сер уподо́бивыйся и ра́ди сего́ вся́ земна́я оста́вивый.
Ра́дуйся, о́чи ума́ и се́рдца своего́ на высоту́ небе́сную впери́вый; ра́дуйся, труды́ и по́двиги свои́ми А́нгелов и челове́ков удиви́вый.
Ра́дуйся, нището́ю теле́сною и духо́вною Ца́рствие Бо́жие обреты́й; ра́дуйся, умиле́ния и сокруше́ния слеза́ми на небесе́х ве́чное утеше́ние прия́вый.
Ра́дуйся, я́ко ра́ди а́лчбы и жа́жды на земли́ насыща́ешися блаже́нством на небеси́; ра́дуйся, я́ко кро́тостию твое́ю и незло́бием твои́м насле́довал еси́ ве́чную зе́млю.
Ра́дуйся, я́ко ра́ди чистоты́ се́рдца твоего́ сподо́бился еси́ зре́ти вы́ну Бо́га; ра́дуйся, я́ко ми́р Бо́жий и са́м тщи́лся име́ти со все́ми, и водворя́л еси́ среди́ вражду́ющих, и сего́ ра́ди вчине́н еси́ в ли́к сыно́в Бо́жиих.
Ра́дуйся, и́мене ра́ди Христо́ва мно́ги ско́рби, боле́зни, всено́щная бде́ния, коленопреклоне́ния, по́двиги и труды́ понесы́й; ра́дуйся и весели́ся, я́ко мзда́ твоя́ мно́га на Небесе́х.
Ра́дуйся, Мака́рие, преди́вный чудотво́рче.
Конда́к 8.
Ди́вный во святы́х Госпо́дь Бо́г ди́вно прославля́ется в тебе́, преподо́бне о́тче Мака́рие; облече́ бо тя́ си́лою свы́ше цели́ти неду́ги и боле́зни душе́вныя и теле́сныя и подава́ти поле́зная все́м, с ве́рою и любо́вию вопию́щим к Нему́ о тебе́: Аллилу́иа.
И́кос 8.
Благода́ть Бо́жию, су́щую в тебе́, преподо́бне о́тче Мака́рие, неоску́дно подава́я тре́бующим, отрокови́цу не́кую бе́сну и сле́пу кре́стным зна́мением с моли́твою исцели́л еси́. Дивя́щеся си́ле Бо́жией, обита́ющей в тебе́, взыва́ем ти́:
Ра́дуйся, благода́тный исто́чниче исцеле́ний; ра́дуйся, ту́не прия́вый благода́ть от Го́спода Бо́га, ту́не и подава́яй.
Ра́дуйся, име́яй ве́лие дерзнове́ние ко Го́споду Бо́гу; ра́дуйся, я́ко никто́же с ве́рою прося́й то́щь отхо́дит от тебе́.
Ра́дуйся, я́ко всено́щными моли́твами всю́ бесо́вскую пре́лесть посрами́вый; ра́дуйся, слепы́м зре́ние и все́м боля́щим исцеле́ние подава́яй.
Ра́дуйся, сокро́вище дарова́ний боже́ственных; ра́дуйся, я́ко хода́тайством твои́м даро́в Ду́ха Свята́го, укрепля́ющих в бра́ни проти́ву враго́в спасе́ния, сподобля́емся.
Ра́дуйся, я́ко кри́н неувяда́емый, в пусты́ни яви́лся еси́; ра́дуйся, цве́те, благоуха́нием свои́м вся́ исполня́яй.
Ра́дуйся, ре́ки воды́ живы́я источа́яй; ра́дуйся, ве́рных Го́спода рабо́в благу́ю ча́сть избра́вый.
Ра́дуйся, Мака́рие, преди́вный чудотво́рче.
Конда́к 9.
Егда́ преста́вился еси́ от земли́ к небе́сным оби́телем, ли́цы А́нгелов и избра́нных Бо́жиих ра́достно срето́ша тебе́, с ни́миже ты́ вы́ну вопие́ши к Бо́гу: Аллилу́иа.
И́кос 9.
Егда́ прибли́жися вре́мя преставле́ния твоего́ по Бо́жию смотре́нию, ты́, преподо́бне, прише́л еси́ во гра́д У́нжеск, иде́же испо́лнь дне́й и богоугожде́ния, святу́ю ду́шу твою́ пре́дал еси́ в ру́це Бо́жии. А́бие испо́лнися чу́днаго благоуха́ния ве́сь гра́д, и окре́стнии лю́дие обоня́ху благоуха́ние ди́вное, а́ки от фимиа́ма и сми́рны исходя́щее. Вси́ удивля́ющеся, я́ко си́це Госпо́дь Бо́г почти́л е́сть преставле́ние тебе́, уго́дника Своего́, прославля́ху Го́спода Бо́га. Стече́ся к нетле́нному и благоуха́нному те́лу твоему́ мно́жество наро́да, и со свещьми́ и со псалмы́ несо́ша е́ в пусты́нную оби́тель, иде́же погребо́ша че́стно и вопия́ху ти́:
Ра́дуйся, Го́споду до конца́ послужи́вый; ра́дуйся, кончи́ну свою́ предуве́девый.
Ра́дуйся, к со́нму избра́нных Бо́жиих сопричте́нный; ра́дуйся, воздая́ние от Бо́га по пра́вым дело́м твои́м восприя́вый.
Ра́дуйся, со проро́ки водвори́выйся; ра́дуйся, со апо́столы всели́выйся.
Ра́дуйся, я́ко венце́м нетле́нным увенча́нный; ра́дуйся, я́ко Го́спода Бо́га со все́ми святы́ми о на́с гре́шных умоля́еши.
Ра́дуйся, я́ко на бра́це Небе́снаго Жениха́ бы́ти досто́ин я́вльшийся; ра́дуйся, тле́нную жи́знь на нетле́нную премени́вый.
Ра́дуйся, уго́дниче Христо́в, блаже́нству тезоимени́тый; ра́дуйся, в ра́дость Го́спода твоего́ вше́дый.
Ра́дуйся, Мака́рие, преди́вный чудотво́рче.
Конда́к 10.
Спасти́ хотя́й вся́, Госпо́дь Бо́г исполня́ет Свои́ми вели́кими дарова́ньми избра́нных рабо́в Свои́х, да и́х чудеса́ми, моли́твами и равноа́нгельным житие́м мы́ возбужда́емся от жи́зни грехо́вныя к жи́зни святе́й, воспева́я вы́ну Ему́: Аллилу́иа.
И́кос 10.
Стена́ и помо́щник яви́лся еси́, блаже́нне Мака́рие, все́м прибега́ющим к тебе́; те́мже и на́м, призыва́ющим тя́, бу́ди засту́пник, избавля́я ны́ от искуше́ний, скорбе́й и напа́стей, да восхваля́ем тя́, зову́ще:
Ра́дуйся, я́ко твои́ми моли́твами от грехо́в, паде́ний, страсте́й и злы́х обы́чаев воздвиза́еши на́с гре́шных; ра́дуйся, я́ко при́сно возбужда́еши на́с к подража́нию твоему́ свято́му житию́.
Ра́дуйся, и́стиннаго покая́ния наста́вниче; ра́дуйся, обличи́телю немо́лчный нерадя́щим о ве́чном спасе́нии.
Ра́дуйся, о все́х ве́рных, притека́ющих к тебе́, предста́телю; ра́дуйся, на неви́димыя и ви́димыя враги́ побо́рниче.
Ра́дуйся, в беда́х, напа́стех и ну́ждах душе́вных и теле́сных утеше́ние и по́мощь подава́яй; ра́дуйся, от смертоно́сныя я́звы избавля́яй.
Ра́дуйся, наше́ствие сопроти́вных отгоня́яй; ра́дуйся, пла́мень, губя́щий гра́д, погаша́яй.
Ра́дуйся, у́м и смы́сл враго́в помрача́яй; ра́дуйся, лю́бящия Оте́чество и благочести́выя цари́ на побе́ду умудря́яй.
Ра́дуйся, Мака́рие, преди́вный чудотво́рче.
Конда́к 11.
Пе́ние благода́рственное Го́споду Бо́гу, в Тро́ице покланя́емому и сла́вимому, прино́сим, я́ко дарова́л е́сть на́м в тебе́, преподо́бне о́тче Мака́рие, те́плаго моли́твенника, ско́раго помо́щника и ди́внаго чудотво́рца, воспева́юще Ему́: Аллилу́иа.
И́кос 11.
Светоприе́мна свети́льника яви́ тя Госпо́дь Бо́г, преподо́бне Мака́рие, егда́ обре́тены бы́ша честны́я мо́щи твоя́, благослове́нныя нетле́нием, благоуха́ние испуща́ющия и чудесы́ окре́стныя страны́ озаря́ющия; те́мже вси́ ра́дующеся, вопие́м ти́:
Ра́дуйся, я́ко и по сме́рти жи́в пребыва́еши, явля́я в себе́ си́лы боже́ственныя; ра́дуйся, чудесы́ твои́ми зе́млю наполня́яй.
Ра́дуйся, я́ко благочести́вую жену́ от пле́на ага́рянскаго свободи́л еси́; ра́дуйся, я́ко немо́му уста́ отве́рзл еси́.
Ра́дуйся, я́ко пока́явшемуся во гресе́х зре́ние возврати́л еси́; ра́дуйся, я́ко разсла́бленному здра́вие дарова́л еси́.
Ра́дуйся, я́ко мно́ги слепы́я и немощству́ющия исцели́л еси́; ра́дуйся, я́ко ве́рныя лю́ди от нападе́ния ля́хов изба́вил еси́.
Ра́дуйся, я́ко моли́твами твои́ми врази́, напа́вшии со ору́жием на оби́тель твою́, слепото́ю пораже́ни и стра́хом смяте́ни бы́ша, и мно́зи в реце́ потопо́ша; ра́дуйся, огражда́яй вы́ну оби́тель твою́ от бе́д и зо́л.
Ра́дуйся, отча́янных наде́ждо и по́моще; ра́дуйся, от Бо́га проси́мая тобо́ю прие́мляй.
Ра́дуйся, Мака́рие, преди́вный чудотво́рче.
Конда́к 12.
По плене́нии и опустоше́нии Желтово́дския оби́тели от ага́рян ле́том мно́гим преше́дшим трикра́ты яви́лся еси́ не́коему и́ноку богоуго́дну Авра́мию, повелева́я, да и́дет в Желтово́дскую пусты́ню и всели́тся на ме́сте, иде́же бе́ оби́тель. И́нок Авра́мий водвори́ся ту́ и хожда́ше во оби́тель У́нжескую, иде́же ико́ну твою́ списа́в, принесе́ ю́ на благослове́ние, и нача́ша быва́ти чудеса́ от сея́ честны́я ико́ны. Те́мже мы́ вопие́м просла́вльшему тя́ Бо́гу: Аллилу́иа.
И́кос 12.
Пою́ще зна́мения и чудеса́, я́же твори́ши живу́щею в тебе́ благода́тию Бо́жиею, блаже́нне Мака́рие, восхваля́ем тя́ си́це:
Ра́дуйся, я́ко и по преставле́нии твое́м возста́вил еси́ запусте́вшую оби́тель твою́; ра́дуйся, я́ко па́ки собра́л еси́ и́щущих спасе́ния и обнови́л еси́ боже́ственную хвалу́.
Ра́дуйся, я́ко свято́е ме́сто, тобо́ю любе́зне избра́нное, не оставля́ти запове́дал еси́ Авра́мию; ра́дуйся, я́ко тобо́ю мона́хов мно́жество в по́двизех и ско́рбех свои́х укрепле́ние прие́млют.
Ра́дуйся, я́ко оби́тели, тобо́ю созда́нныя, моли́твами твои́ми, а́ки покро́вом, покрыва́ются; ра́дуйся, стране́ се́й и Оте́честву на́шему украше́ние.
Ра́дуйся, наде́ждо и прибе́жище в мо́ри жития́ сего́ пла́вающих; ра́дуйся, тве́рдое огражде́ние усе́рдно рабо́тающих Го́споду Бо́гу.
Ра́дуйся, царе́м благочести́вым по́моще; ра́дуйся, патриа́рхов и святи́телей утеше́ние.
Ра́дуйся, все́х, усе́рдно притека́ющих к тебе́, от искуше́ний и бе́д ско́рое избавле́ние; ра́дуйся, я́ко хода́тайством твои́м ве́рнии жи́знь ве́чную получа́ют.
Ра́дуйся, Мака́рие, преди́вный чудотво́рче.
Конда́к 13.
О преподо́бне и богоно́сне о́тче на́ш Мака́рие! Приими́ сие́ ма́лое моли́твенное приноше́ние на́ше и со Пресвято́ю Влады́чицею Богоро́дицею и все́ми святы́ми принеси́ моли́тву ко Го́споду Бо́гу, да изба́вит на́с от вра́г ви́димых и неви́димых, от вся́ких скорбе́й и бе́д, от напра́сныя сме́рти и от бу́дущих му́к, и сподо́бит Своего́ Небе́снаго Ца́рствия, иде́же вси́, при́сно веселя́щеся и торжеству́юще, немо́лчно вопию́т к Бо́гу: Аллилу́иа.
И́кос 1.
А́нгела на земли́ яви́ тя Творе́ц небеси́ и земли́, вся́ бо земна́я вмени́л еси́ за уме́ты, да приобря́щеши еди́наго Христа́; те́мже вси́, зря́ще твое́ христоподо́бное на земли́ житие́, вопие́м ти́:
Ра́дуйся, я́ко от утро́бы ма́терния предугото́ванный в чи́стое и непоро́чное жили́ще Пресвяты́я Тро́ицы; ра́дуйся, Бо́гом Отце́м предъизбра́нный.
Ра́дуйся, Бо́гом Сы́ном искупле́нный; ра́дуйся, Бо́гом Ду́хом Святы́м освяще́нный.
Ра́дуйся, Го́спода па́че всего́ возлюби́вый; ра́дуйся, отца́ и ма́терь ра́ди Христа́ оста́вивый.
Ра́дуйся, зва́нию ду́ха благода́ти повину́выйся; ра́дуйся, себе́ отверги́йся ра́ди Христа́ Иису́са.
Ра́дуйся, кре́ст Христо́в на себе́ взе́мый; ра́дуйся, всле́д Христа́ после́довавый.
Ра́дуйся, до конца́ жи́зни твоея́ в терпе́нии и по́двизех неосла́бно пребыва́вый; ра́дуйся, я́ко претерпева́я му́жественно вре́менная и настоя́щая весели́лся еси́ бу́дущими и ве́чными.
Ра́дуйся, Мака́рие, преди́вный чудотво́рче.
Конда́к 1.
Избра́нный от Воево́ды си́л небе́сных и Го́спода Иису́са Христа́, преподо́бне о́тче на́ш Мака́рие, я́ко име́яй ве́лие дерзнове́ние к Бо́гу, моли́ся вы́ну о спасе́нии ду́ш на́ших и избавле́нии на́с от вся́ких бе́д и напа́стей, да зове́м ти́:
Ра́дуйся, Мака́рие, преди́вный чудотво́рче.
Моли́тва.
О преподо́бне и Богоно́сне о́тче на́ш Мака́рие! Ве́руем, я́ко ты́, предстоя́ престо́лу Пресвяты́я Тро́ицы, ве́лие и́маши дерзнове́ние в моли́твах ко Всеми́лостивому Го́споду Бо́гу, и́же всегда́ послу́шает тебе́, ве́рнаго раба́ и уго́дника Своего́. Сего́ ра́ди со умиле́нием смире́нно припа́даем к тебе́, свя́тче Бо́жий, не премолчи́ о на́с моли́тися ко Го́споду Бо́гу, в Тро́ице покланя́емому и сла́вимому, да ми́лостиво призре́в на ны́, не попу́стит на́м поги́бнути во гресе́х на́ших, но да возста́вит па́дших, да пода́ст исправле́ние зло́му и окая́нному на́шему житию́, от гряду́щих грехопаде́ний восхища́я, и да прости́т на́м вся́, ели́ка са́ми собо́ю или́ чрез други́х кого́, согреши́хом мы́слию, сло́вом и де́лом, от рожде́ния до сего́ часа́. Ты́, подви́жниче доброде́телей, о́тче на́ш Мака́рие, ве́си не́мощь естества́ на́шего и тя́жесть и ско́рбь, време́н настоя́щих, моли́ у́бо вы́ну Го́спода Бо́га, да николи́же на́с оставля́ет Его́ неизрече́нное милосе́рдие, но да храни́т на́с от мирски́х искуше́ний, от диа́вольских сете́й и от плотски́х похоте́й, да прии́мем от Го́спода Бо́га тобо́ю и вся́ потре́бная к жи́зни вре́менней, освобожде́нии от бе́д и напа́стей, неосла́бное терпе́ние до конца́. Испроси́ на́м у Го́спода Бо́га в ми́ре и покая́нии сконча́ти живо́т на́ш и невозбра́нно прейти́ от земли́ на Не́бо, мыта́рств же и бесо́в возду́шных и ве́чныя му́ки изба́витися и сподо́битися Ца́рства Небе́снаго, с тобо́ю и со все́ми святы́ми, угоди́вшими Го́споду Бо́гу и Спаси́телю на́шему Иису́су Христу́, Ему́же подоба́ет вся́кая сла́ва, че́сть и поклоне́ние, со Безнача́льным Его́ Отце́м и с Пресвяты́м, и Благи́м, и Животворя́щим Его́ Ду́хом, ны́не и при́сно и во ве́ки веко́в. Ами́нь.