Акафист святым благоверным князю Петру и княгине Февронии, Муромским чудотворцам

Одобрен: решение Св. Синода 22 апреля 1885 года №755

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 08 июля (25 июня ст. ст.); 17 сентября (04 сентября ст. ст.)

Утвержден для общецерковного использования.

Конда́к 1.

Избра́ннии чудотво́рцы и вели́цыи уго́дницы Госпо́дни, гра́да Му́рома засту́пницы и при́снии о душа́х на́ших моли́твенницы, святи́и благове́рнии кня́же Пе́тре и княги́не Февро́ние! Пе́ние похва́льное ва́м принося́ще, мо́лим вы́ усе́рдно: я́ко иму́щии дерзнове́ние ко Го́споду, предста́тельством ва́шим от вся́ких бе́д на́с свободи́те, и насле́дники Ца́рствия Небе́снаго на́с соде́лайте, да зове́м ва́м ра́достно:

Ра́дуйтеся, святи́и и пресла́внии чудотво́рцы Пе́тре и Февро́ние.

И́кос 1.

А́нгели земни́и и челове́цы небе́снии вои́стинну яви́стеся, блаже́ннии Пе́тре и Февро́ние, от ю́ности ва́шея чи́стую со́весть иму́щии к Бо́гу, и до́бре во благоче́стии и чистоте́ вку́пе пожи́вшии, на́м же оста́вльшии в приме́р подража́ния житие́ ва́ше богоуго́дное, ему́же чудя́щеся и чудесы́ ва́шими озаря́еми, зове́м ва́м гла́сы хвале́бными си́це:

Ра́дуйтеся, от ю́ности ва́шея Христа́ возлюби́вшии и Тому́ от души́ порабо́тавшии; ра́дуйтеся, целому́дрия храни́тели и душе́вныя и теле́сныя чистоты́ рачи́тели.

Ра́дуйтеся, ду́ши ва́ша и телеса́ на земли́ в обита́лище Ду́ха Свята́го угото́вившии; ра́дуйтеся, испо́лненнии прему́дрости и ра́зума боже́ственнаго.

Ра́дуйтеся, я́ко во пло́ти, я́ко безпло́тни, вку́пе пожи́сте; ра́дуйтеся, я́ко равноа́нгельную че́сть досто́йно прия́сте.

Ра́дуйтеся, я́ко от земли́ на Не́бо преидо́сте и та́мо со А́нгелы Тро́ице предстои́те; ра́дуйтеся, я́ко со безпло́тными ли́ки трисвяту́ю пе́снь Е́й воспева́ете.

Ра́дуйтеся, на Небеси́ и на земли́ от Го́спода просла́вленнии; ра́дуйтеся, обре́тшии ве́чное всесве́тлое ме́сто упокое́ния.

Ра́дуйтеся, гра́да Му́рома сокро́вища пребога́тая; ра́дуйтеся, исто́чницы неистощи́мии чуде́с.

Ра́дуйтеся, святи́и и пресла́внии чудотво́рцы Пе́тре и Февро́ние.

Конда́к 2.

Ви́дев кня́зь Пе́тр в возвра́тной боле́зни свое́й, зна́мение гне́ва Бо́жия, за неисполне́ние обе́та своего́, поя́ти в супру́ги себе́ прему́друю Февро́нию, потща́ся сие́ испо́лнити и сочета́ся с не́ю бра́ком зако́нным. Оба́че и в супру́жестве целому́дренно и богоуго́дно пожи́сте, блаже́ннии, иму́ще еди́ну мы́сль во двою́ те́лу, е́же благоугожда́ти Бо́гу; те́мже вы́ну пое́те Ему́ ны́не со А́нгелы пе́снь: Аллилу́иа.

И́кос 2.

Ра́зумом богопросвеще́нным свы́ше одаре́ннии, Пе́тре и Февро́ние святи́и, любо́вь и милосе́рдие к бе́дным и си́рым яви́сте, оби́димым и безпомо́щным засту́пницы бы́сте, и ины́ми доброде́тельми мно́гими украси́сте княже́ние свое́ земно́е. Сего́ ра́ди вопие́м к ва́м си́це:

Ра́дуйтеся, блаже́ннии и треблаже́ннии, в боголю́бии пожи́вшии и благове́рие сохра́ншии; ра́дуйтеся, ми́лости и сострада́ния преиспо́лненнии.

Ра́дуйтеся, безпомо́щных ско́рии помо́щницы; ра́дуйтеся, печа́льных блази́и уте́шители.

Ра́дуйтеся, сиро́т и вдови́ц корми́тели; ра́дуйтеся, су́щих в беда́х предста́тели.

Ра́дуйтеся, боле́зней душе́вных и теле́сных иску́снии цели́тели; ра́дуйтеся, ско́рбных серде́ц радостотво́рнии посети́тели.

Ра́дуйтеся, любо́вь ва́шу к Бо́гу, любо́вию к бли́жним свои́м показа́вшии; ра́дуйтеся, княже́ние ва́ше земно́е пра́ведно и богоуго́дно содержа́вшии.

Ра́дуйтеся, князе́й правосла́вных похвало́ и гра́да Му́рома утвержде́ние; ра́дуйтеся, всея́ земли́ Росси́йския заступле́ние.

Ра́дуйтеся, святи́и и пресла́внии чудотво́рцы Пе́тре и Февро́ние.

Конда́к 3.

Си́лою благода́ти Бо́жия укрепля́емь, блаже́нне кня́же Пе́тре, восхоте́л еси́ па́че оста́вити гра́д оте́чества твоего́ и княже́ние Му́ромское, не́же бракоразвести́ся с прему́дрою Февро́ниею по настоя́нию го́рдых боля́р твои́х. Сего́ ра́ди Бо́г тя́ просла́ви и сотвори́, да те́миже боля́ры возвраще́нный вку́пе с супру́жницею твое́ю, на престо́ле княже́ния Му́ромскаго па́ки утверди́лся еси́, на́м же приме́р хране́ния зако́на Бо́жия показу́еши по́двигом твои́м, да подража́юще тебе́ в свя́тости хране́ния соу́за бра́чнаго, воспева́ем подвигополо́жнику Христу́: Аллилу́иа.

И́кос 3.

Иму́ще попече́ние о лю́дех свои́х, преблаже́ннии Пе́тре и Февро́ние, неусы́пно подвиза́стеся ко бла́гу и́х, благоче́стие насажда́я, нече́стие искореня́я и вражду́ умиротворя́я. Те́мже и Госпо́дь, ви́дя таковы́я по́двиги ва́ша, зе́млю Му́ромскую плодоно́сием благослови́ и ми́р глубо́к княже́нию ва́шему дарова́, подвиза́я лю́ди ва́ша благода́рственно воспева́ти ва́м си́це:

Ра́дуйтеся, уго́дницы Бо́жии, житию́ вели́ких святы́х соприча́стницы; ра́дуйтеся, прави́телие предо́брии, лю́ди му́ромския ко спасе́нию путеводи́вшии.

Ра́дуйтеся, христиа́нскаго благоче́стия блюсти́тели; ра́дуйтеся, нестрое́ния, раздо́ров и вся́каго нече́стия искорени́тели.

Ра́дуйтеся, супру́гов христиа́н ко благоче́стному житию́ наста́вницы; ра́дуйтеся, целому́дрия и воздержа́ния супру́жескаго о́брази преизя́щнии.

Ра́дуйтеся, пра́веднаго суда́ рачи́тели; ра́дуйтеся, немздои́мства и безкоры́стия ревни́тели.

Ра́дуйтеся, святы́х царе́й Константи́на и Еле́ны доброде́телей стяжа́тели; ра́дуйтеся, равноапо́стольнаго кня́зя Влади́мира и блаже́нныя княги́ни О́льги досто́йнии прее́мницы.

Ра́дуйтеся, дво́ице пречестна́я и благо́е сочета́ние, луча́ми чуде́с немерца́емо сия́ющии; ра́дуйтеся, оте́чества ва́шего пресве́тлии свети́льницы.

Ра́дуйтеся, святи́и и пресла́внии чудотво́рцы Пе́тре и Февро́ние.

Конда́к 4.

Бу́ря скорбе́й и напа́стей, воздвиза́емая зло́бою ми́ра сего́, не осла́би кре́пкия любве́ ва́шея я́же к Бо́гу, Пе́тре и Февро́ние блаже́ннии, но па́че научи́ ва́с благоиску́сно отража́ти разжже́нныя стре́лы искуше́ний диа́вольских: вы́ бо обо́лкшеся в броню́ ве́ры Христо́вы, в ми́ре глубо́це преидо́сте многомяте́жную пучи́ну жите́йскаго мо́ря, и достиго́сте в ти́хую при́стань спасе́ния, к не́йже и на́с моли́твами ва́шими приведи́те, да вку́пе с ва́ми пое́м Бо́гу: Аллилу́иа.

И́кос 4.

Слы́шавше бли́жнии и да́льнии благоче́стное житие́ ва́ше, благове́рнии Пе́тре и Февро́ние, прославля́ху человеколю́бца Бо́га, дарова́вшаго ва́м кре́пость на вся́ дела́ блага́я, и́миже я́ко луча́ми пресве́тлыми, просия́сте в оте́честве ва́шем, иде́же и доны́не имена́ ва́ша че́стны, и по́двиги ва́ша воспева́ются похвала́ми си́ми:

Ра́дуйтеся, дво́ице пресве́тлая, Бо́гом совокупле́нная; ра́дуйтеся, све́том благоче́стнаго жития́ ва́шего, я́ко свети́ла богосве́тлая, просия́вшии.

Ра́дуйтеся, ми́лостынею и моли́твами Небе́сное Ца́рствие стяжа́вшии; ра́дуйтеся, смире́нием и поще́нием ве́чное блаже́нство улучи́вшии.

Ра́дуйтеся, я́ко мзда́ ва́ша мно́га на Небесе́х е́сть; ра́дуйтеся, я́ко ра́дость ва́ша ве́чна во све́тлостех святы́х.

Ра́дуйтеся, раби́ Христо́вы возлю́бленнии; ра́дуйтеся, святы́х все́х при́снии дру́зи.

Ра́дуйтеся, звезды́ непреле́стнии, пу́ть супру́жескаго жития́ богоуго́днаго ве́рно указу́ющии; ра́дуйтеся, о́блацы росоно́снии, зно́й страсте́й и нече́стия прогоня́ющии.

Ра́дуйтеся, Бо́жиих ми́лостей и щедро́т на́м пода́тели; ра́дуйтеся, оте́чества ва́шего украше́ние неотъе́млемое. Ра́дуйтеся, святи́и и пресла́внии чудотво́рцы Пе́тре и Февро́ние.

Конда́к 5.

Богопросвеще́ннии свети́льницы благоче́стия и преди́внии чудотво́рцы Пе́тре и Февро́ние, Бо́га от всея́ души́ возлюби́вше, вся́ за́поведи Его́ сохрани́сте; те́мже и Христо́с, я́ко со́лнце и луну́ пресве́тлыя, показа́ ва́с, преблаже́ннии, чуде́с мно́гих заре́ю озаря́ющия о́бласть Му́ромскую и всю́ страну́ Росси́йскую, просла́вив нетле́нием святы́я и многоцеле́бныя мо́щи ва́ша, к ни́мже припа́дающе, по достоя́нию ублажа́ем ва́с и вы́ну благода́рственно пое́м ди́вному во святы́х Свои́х Бо́гу: Аллилу́иа.

И́кос 5.

Ви́девше житие́ ва́ше пра́ведное и щедро́ты ва́ша, лю́дие му́ромстии сла́вляху ва́с, свои́х прави́телей ми́лостивых, благове́рнии Пе́тре и Февро́ние, вы́ же смире́ние и́стинное возлюби́вше и похвалы́ челове́ческия небре́гше, горды́нею неуя́звлени пребы́сте, и те́м показа́сте на́м о́браз вы́шшаго смире́ния, ему́же поуча́яся, с любо́вию вопие́м ва́м такова́я:

Ра́дуйтеся, сла́ву челове́чу ни во что́ же вмени́вшии; ра́дуйтеся, смире́ние Христо́во усе́рдно возлюби́вшии.

Ра́дуйтеся, за́поведей Госпо́дних ве́рнии исполни́тели; ра́дуйтеся, уче́ния Ева́нгельскаго и́стиннии после́дователи.

Ра́дуйтеся, раби́ Бо́га Вы́шняго, во́лю Его́ сотво́ршии; ра́дуйтеся, ве́ру Христо́ву до конца́ соблю́дшии.

Ра́дуйтеся, христоимени́тым лю́дем благоче́стия учи́тели; ра́дуйтеся, хотя́щих богоуго́дно жи́ти богому́дрии наста́вницы.

Ра́дуйтеся, моли́твами ва́шими спаса́ющии на́с от вся́ких бе́д; ра́дуйтеся, вся́ блага́я проше́ния на́ша исполня́ющии.

Ра́дуйтеся, в неду́зех стра́ждущих благода́тнии вра́чеве; ра́дуйтеся, ми́лостивии страны́ Му́ромския покрови́телие.

Ра́дуйтеся, святи́и и пресла́внии чудотво́рцы Пе́тре и Февро́ние.

Конда́к 6.

Пропове́дницы ве́ры правосла́вныя и ревни́тели благоче́стия не сло́вом то́кмо, но все́м житие́м свои́м бы́сте во гра́де Му́роме, прехва́льнии Пе́тре и Февро́ние; те́мже и свята́я Це́рковь досто́йне почита́ет по́двиги и труды́ ва́ша, и́миже труди́стеся во сла́ву Бо́га Вы́шняго, немо́лчно воспева́я Ему́: Аллилу́иа.

И́кос 6.

Возсия́сте во гра́де Му́роме све́том доброде́тельнаго жития́ ва́шего, я́ко зве́зды богосве́тлыя, преблаже́ннии Пе́тре и Февро́ние, и па́мять ва́ша в не́м с похвала́ми до дне́сь, я́ко и по сме́рти свое́й не престае́те озаря́ти на́с, мно́гая чудеса́ соверша́юще, и те́ми све́тлую зарю́ безсме́ртия на́м от моще́й ва́ших возсиява́юще, да ублажа́ем ва́с благохвале́ниями сицевы́ми:

Ра́дуйтеся, чи́на и уста́вов святы́я Це́ркве ве́рнии храни́тели; ра́дуйтеся, служи́телей олтаря́ Госпо́дня благогове́йнии почита́тели.

Ра́дуйтеся, благи́х обы́чаев и преда́ний святооте́ческих ревни́тели; ра́дуйтеся, обы́чаев злы́х и суему́дрий язы́ческих искорени́тели.

Ра́дуйтеся, суды́ нелицеприя́тны лю́дем ва́шим твори́вшии; ра́дуйтеся, суды́ ва́ша с ми́лостию соедини́вшии.

Ра́дуйтеся, кро́тцыи и незло́бивии после́дователи Христо́вы; ра́дуйтеся, зло́бу добро́м препобежда́вшии.

Ра́дуйтеся, нетле́ния благоуха́ющии цве́ти; ра́дуйтеся, безсме́ртия немерца́ющии лучи́.

Ра́дуйтеся, на земли́ вели́чием чуде́с блиста́ющии; ра́дуйтеся, на Небеси́ со А́нгелы Бо́га сла́вящии.

Ра́дуйтеся, святи́и и пресла́внии чудотво́рцы Пе́тре и Февро́ние.

Конда́к 7.

Хотя́й человеколю́бец Госпо́дь яви́ти в житии́ ва́шем, Пе́тре и Февро́ние, о́браз назида́ния не то́кмо лю́дем мирски́м, но и лико́м и́ноческим, внуши́ ва́м в ста́рости масти́тей оста́вити сла́ву княже́ния земна́го, и восприя́ти о́браз и́ноческий, в не́мже подвиза́стеся до́бре посто́м, бде́нием и моли́твою, воспева́юще непреста́нно Триеди́ному Бо́гу а́нгельскую пе́снь: Аллилу́иа.

И́кос 7.

Но́вую благода́ть Бо́жию во и́ночестем постриже́нии прие́мше, преподо́бнии, но́выми по́двигами украси́сте равноа́нгельное житие́ ва́ше и та́ко сугу́б пло́д соверше́нства духо́внаго Христу́ принесо́сте, и мзду́ преподо́бных досто́йне от Него́ восприя́сте. Помина́я у́бо такову́ю ре́вность ва́шу к подвиго́м духо́вным, прославля́ем ва́с си́ми достодо́лжными похвала́ми:

Ра́дуйтеся, я́ко любве́ ра́ди Го́спода, ми́ра сего́ княже́ние и сла́ву оста́висте; ра́дуйтеся, я́ко и́ноческое равноа́нгельное житие́ усе́рдно восприя́сте.

Ра́дуйтеся, соверше́ннаго терпе́ния подви́жницы; ра́дуйтеся, во́льныя нищеты́ блаже́ннии стяжа́тели.

Ра́дуйтеся, пре́жде кончи́ны ва́шея вся́ стра́сти умертви́вшии воздержа́нием; ра́дуйтеся, восприя́вшии святу́ю схи́му в броню́ спасе́ния.

Ра́дуйтеся, багряни́цу кня́жескую на власяни́цу и́ноческую премени́вшии; ра́дуйтеся, посто́м, бде́нием и непреста́нными моли́твами Бо́гу до́бре угоди́вшии.

Ра́дуйтеся, боголюбе́знаго уедине́ния взыска́тели; ра́дуйтеся, спаси́тельнаго безмо́лвия люби́тели.

Ра́дуйтеся, слеза́ми моли́твенными ороше́ннии; ра́дуйтеся, в со́нме преподо́бных на Небеси́ просла́вленнии.

Ра́дуйтеся, святи́и и пресла́внии чудотво́рцы Пе́тре и Февро́ние.

Конда́к 8.

Стра́нное и ди́вное бе́ чу́до, егда́ ты́, блаже́нне Пе́тре, на кончи́не живота́ твоего́, проше́ния ра́ди супру́жницы твоея́, святы́я Февро́нии, исхо́дом свои́м уме́длил еси́, до́ндеже сконча́ она́ пелену́ церко́вную, е́ю сшива́ему и вку́пе с тобо́ю к исхо́ду сме́ртному приспе́, и та́ко неразлу́чнии в житии́, неразлу́чнии и в кончи́не яви́стеся, и во еди́н де́нь и ча́с святы́я ду́ши своя́ в ру́це Бо́жии преда́сте, зову́ще при́сно живы́ми и ме́ртвыми облада́ющему Влады́це Бо́гу: Аллилу́иа.

И́кос 8.

Вси́ чудя́хуся и сла́вляху ди́внаго во святы́х Свои́х Бо́га, егда́ свята́я ва́ша телеса́, в ра́зных гробе́х положе́нная, чуде́сно обрето́шася лежа́ща в о́бщей гробни́це, ю́же угото́васте себе́, преподо́бнии, в собо́рней це́ркви гра́да Му́рома, иде́же и доны́не неразлу́чно почива́ете, чудотво́рцы святи́и, неоску́дная источа́юще исцеле́ния все́м, с ве́рою прибега́ющим к ва́м и зову́щим:

Ра́дуйтеся, сою́з любве́ ва́шея до гро́ба и за гро́бом ве́рно сохра́ншии; ра́дуйтеся, не то́кмо в жи́зни, но и по сме́рти, о Го́споде соедине́ннии.

Ра́дуйтеся, в супру́жестем благоче́стнем житии́ ва́м подража́ющим кре́пцыи помо́щницы; ра́дуйтеся, теплото́ю любве́ ва́шея и на́с согрева́ющии.

Ра́дуйтеся, сме́ртию вре́менною преше́дшии к жи́зни ве́чней; ра́дуйтеся, от Го́спода нетле́нием и чудесы́ просла́вленнии.

Ра́дуйтеся, я́ко па́мять ва́ша с похвала́ми и успе́ние со святы́ми; ра́дуйтеся, я́ко имена́ ва́ша че́стна су́ть и благослове́нна в оте́честве ва́шем.

Ра́дуйтеся, Росси́йския страны́ удобре́ние благода́тное; ра́дуйтеся, гра́да Му́рома огражде́ние несокруши́мое.

Ра́дуйтеся, о лю́бящих и чту́щих ва́с небе́снии предста́тели; ра́дуйтеся, приснопрося́щии на́м у Го́спода да́ры бла́гости Его́.

Ра́дуйтеся, святи́и и пресла́внии чудотво́рцы Пе́тре и Февро́ние.

Конда́к 9.

Вси́ А́нгели и святы́х ли́ки ра́довахуся ра́достию ве́лию, егда́ святы́я ду́ши ва́ша достиго́ша ве́чнаго в оби́телех ра́йских селе́ния, и Са́м Творе́ц А́нгелов и Святе́йший святы́х Ца́рь Сла́вы Христо́с, безсме́ртия венцы́ увенча́ ва́с и дарова́ ва́м благода́ть моли́тися Ему́ со дерзнове́нием мно́гим о все́х и́щущих ва́шего заступле́ния, его́же не лиши́те и на́с гре́шных, Пе́тре и Февро́ние достохва́льнии, смиренному́дренно воспева́ющих просла́вльшему ва́с Бо́гу хвале́бную пе́снь: Аллилу́иа.

И́кос 9.

Вети́йство челове́ческое не довле́ет к досто́йному прославле́нию жития́ ва́шего, святи́и чудотво́рцы Пе́тре и Февро́ние; кто́ бо испове́сть вся́ моле́ния и поще́ния, боле́зни и труды́ ва́ша? кто́ изочте́т вся́ сле́зы и воздыха́ния ва́ша я́же к Бо́гу? Оба́че мы́ любо́вию к ва́м подвиза́еми, дерза́ем воспева́ти ва́м сия́ ма́лыя и нехи́тростныя похвалы́:

Ра́дуйтеся, благода́ти Свята́го Ду́ха избра́ннии сосу́ди; ра́дуйтеся, ра́дости на́м ве́чныя благоприя́тнии хода́таи.

Ра́дуйтеся, богобоя́зненных супру́гов в благоче́стии утвержде́ние; ра́дуйтеся, наруши́телей супру́жескаго целому́дрия и согла́сия гро́зное обличе́ние.

Ра́дуйтеся, гне́в Бо́жий, пра́ведно дви́жимый на на́с, моли́твами ва́шими утоля́ющии; ра́дуйтеся, о ми́ре всего́ ми́ра непреста́нно Го́спода умоля́ющии.

Ра́дуйтеся, на враги́ ви́димыя и неви́димыя кре́пцыи на́м спобо́рницы; ра́дуйтеся, ангелонра́внии челове́цы.

Ра́дуйтеся, преподо́бных и пра́ведных сонасле́дницы; ра́дуйтеся, Пресвяты́я Тро́ицы ве́рнии уго́дницы.

Ра́дуйтеся, блаже́ннии обита́тели го́рняго гра́да Иерусали́ма Небе́снаго; ра́дуйтеся, со святы́ми торжеству́ющии в ски́ниях ра́йских.

Ра́дуйтеся, святи́и и пресла́внии чудотво́рцы Пе́тре и Февро́ние.

Конда́к 10.

Спасе́ние ве́чное унасле́довавше богоблаже́ннии Пе́тре и Февро́ние, душа́ми ва́шими в оби́телех го́рних неразлу́чно в Бо́зе пребыва́ете, святы́ми же моща́ми ва́шими в хра́ме Бо́жием нетле́нно вку́пе почива́ете, и оби́льная исцеле́ния источа́ете, да чудесы́ ва́шими благода́тно озаря́еми, хвале́бно взыва́ем Верхо́вному Творцу́ чуде́с Бо́гу: Аллилу́иа.

И́кос 10.

Сте́ну заступле́ния, благоприя́тныя моли́твы ва́ша к Бо́гу, обре́тше, святи́и чудотво́рцы Пе́тре и Февро́ние, благодаре́ние Отцу́ Небе́сному усе́рдно возсыла́ем за вся́ благодея́ния Его́, ва́ми все́м на́м оби́льно явля́емая, ва́м же, предста́телем на́шим, сицево́е прино́сим пе́ние:

Ра́дуйтеся, всесве́тлаго Ца́рствия Христо́ва насле́дницы; ра́дуйтеся, а́нгельских лико́в собесе́дницы.

Ра́дуйтеся, Бо́га во сла́ве непристу́пней созерца́ющии; ра́дуйтеся, Трисия́ннаго Божества́ таи́нницы.

Ра́дуйтеся, со святы́ми на Небеси́ ве́чно ца́рствующии; ра́дуйтеся, от го́рних высо́т к земноро́дным ми́лостивно приника́ющии.

Ра́дуйтеся, кри́ни благоуха́ннии небе́снаго прозябе́ния; ра́дуйтеся, кипари́си чудото́чнии рая́ Иису́сова.

Ра́дуйтеся, пода́тели незави́стнии безме́зднаго врачева́ния; ра́дуйтеся, соверши́тели достохва́льнии мно́гих чуде́с.

Ра́дуйтеся, благодея́ний мно́жество на́м источа́ющии; ра́дуйтеся, ми́лостию сострада́ния ва́шего все́х объе́млющии.

Ра́дуйтеся, святи́и и пресла́внии чудотво́рцы Пе́тре и Февро́ние.

Конда́к 11.

Пе́ние моле́бное прино́сим ва́м, уго́дницы Бо́жии Пе́тре и Февро́ние, и с любо́вию припа́даем к ра́це святы́х и многоцеле́бных моще́й ва́ших, прославля́я житие́ ва́ше богоуго́дное и по́двиги мно́ги. Мо́лимся ва́м усе́рдно, чудотво́рцы святи́и, помози́те на́м подража́ти ва́шим доброде́телем, да возмо́жем богоуго́дно пе́ти Созда́телю на́шему: Аллилу́иа.

И́кос 11.

Све́та небе́снаго испо́лнен бе́ собо́рный хра́м гра́да Му́рома, егда́ благоволе́нием Бо́жиим святы́я мо́щи ва́ша Пе́тре и Февро́ние, це́лы и благоуха́нны обрето́шася в не́м, и из не́др земны́х, я́ко сокро́вище драгоце́нное, изнесе́ны бы́ша, иде́же и до ны́не почива́ют, исцеле́ния неоску́дная источа́юще неду́жным и боля́щим. Сего́ ра́ди пе́сненно вопие́м ва́м:

Ра́дуйтеся, зла́то нетле́нное, в не́дрех земны́х обре́тенное; ра́дуйтеся, би́сери сия́ющии и благода́тно просвеща́ющии челове́ков.

Ра́дуйтеся, святы́я Правосла́вныя Це́ркве похвало́; ра́дуйтеся, ересе́й и раско́лов обличе́ние.

Ра́дуйтеся, све́ти у́мнии, заре́ю Свята́го Ду́ха облиста́ющии; ра́дуйтеся, ми́ра благоуха́ния Христо́ва преиспо́лненнии.

Ра́дуйтеся, облече́ннии в ри́зу благода́тнаго нетле́ния; ра́дуйтеся, препоя́саннии си́лою мно́гих чуде́с.

Ра́дуйтеся, я́ко ра́ка ва́ша честна́я враче́бница яви́ся неду́гом челове́ческим; ра́дуйтеся, я́ко от нея́ вся́к с ве́рою приходя́й да́ры целе́бныя прие́млет.

Ра́дуйтеся, све́тлостию чуде́с ва́ших мра́к ду́ш на́ших озаря́ющии; ра́дуйтеся, нетле́нием святы́х моще́й ва́ших зарю́ о́бщаго все́х воскресе́ния на́м показу́ющии.

Ра́дуйтеся, святи́и и пресла́внии чудотво́рцы Пе́тре и Февро́ние.

Конда́к 12.

Благода́ть свы́ше ва́м дарова́нную, позна́вше, святи́и чудотво́рцы Пе́тре и Февро́ние, с благогове́нием и любо́вию покланя́емся нетле́нным и многоцеле́бным моще́м ва́шим и от ни́х прие́млем в неду́зех исцеле́ние, в ско́рбех утеше́ние, в беда́х благода́тную по́мощь: те́мже и прославля́ем ва́с по достоя́нию, небе́сных предста́телей и засту́пников на́ших, воспева́юще хвалы́ и благодаре́ния ва́ми благотворя́щему на́м Влады́це Бо́гу: Аллилу́иа.

И́кос 12.

Пою́ще мно́гая и пресла́вная ва́ша чудеса́, вели́цыи уго́дницы Бо́жии Пе́тре и Февро́ние, ублажа́ем ва́с, я́ко цели́телей, уте́шителей и помо́щников от Го́спода на́м дарова́нных, и моли́твенно торжеству́ем святу́ю па́мять ва́шу, от любве́ серде́чныя воспева́юще ва́м благода́рственно и хвале́бно:

Ра́дуйтеся, во благоуха́нии святы́ни нетле́нно почива́ющии; ра́дуйтеся, с ве́рою приходя́щих к ра́це моще́й ва́ших благода́тно освяща́ющии.

Ра́дуйтеся, призыва́ющих моли́твенно честна́я имена́ ва́ша ско́рии услы́шатели; ра́дуйтеся, упова́ние на ва́с по Бо́зе возлага́ющих ди́внии помо́щницы.

Ра́дуйтеся, изве́стнии умилостиви́тели Царя́ Небе́снаго; ра́дуйтеся, си́льнии защи́тницы на́ши от враго́в неви́димых.

Ра́дуйтеся, при́снии все́м хода́таи спасе́ния; ра́дуйтеся, неотсту́пнии храни́тели гра́да Му́рома.

Ра́дуйтеся, князе́й росси́йских пречу́дная добро́то; ра́дуйтеся, оте́чества ва́шего Бо́гом дарова́ннии покрови́тели.

Ра́дуйтеся, теле́с на́ших благода́тнии целе́бницы; ра́дуйтеся, о душа́х на́ших усе́рднии ко Го́споду моли́твенницы.

Ра́дуйтеся, святи́и и пресла́внии чудотво́рцы Пе́тре и Февро́ние.

Конда́к 13.

О святи́и и пресла́внии чудотво́рцы, благове́рнии кня́же Пе́тре и княги́не Февро́ние! Приими́те ми́лостивно сие́ похва́льное пе́ние от на́с недосто́йных во умиле́нии ва́м приноси́мое, и ва́шим предста́тельством у Го́спода испроси́те на́м утвержде́ние в ве́ре и до́брых де́лех, и избавле́ние от все́х скорбе́й и боле́зней вре́менных и ве́чных, да сподо́бимся вку́пе с ва́ми и все́ми святы́ми во Ца́рствии Небе́снем пе́ти Пресвяте́й Тро́ице ве́чно хвале́бную пе́снь: Аллилу́иа.

Этот конда́к чита́ется три́жды, зате́м и́кос 1-й и конда́к 1-й.

Моли́тва пе́рвая.

О вели́цыи уго́дницы Бо́жии и преди́внии чудотво́рцы благове́рнии кня́же Пе́тре и княги́не Февро́ние, гра́да Му́рома предста́тели и храни́тели, и о все́х на́с усе́рднии ко Го́споду моли́твенницы! К ва́м прибега́ем и ва́м мо́лимся с упова́нием кре́пким: принеси́те за на́с гре́шных святы́я моли́твы ва́ша ко Го́споду Бо́гу и испроси́те на́м у бла́гости Его́ вся́ благопотре́бная душа́м и телесе́м на́шим: ве́ру пра́ву, наде́жду бла́гу, любо́вь нелицеме́рну, благоче́стие непоколеби́мое, в до́брых де́лех преуспе́яние, ми́ра умире́ние, земли́ плодоно́сие, возду́ха благорастворе́ние, душа́м и телесе́м здра́вие и ве́чное спасе́ние. Исхода́тайствуйте у Царя́ Небе́снаго: ве́рных рабо́в Его́, в ско́рби и печа́ли де́нь и но́щь вопию́щих к Нему́, многоболе́зный во́пль да услы́шит и да изведе́т от поги́бели живо́т на́ш. Испроси́те Це́ркви святе́й и все́й держа́ве Росси́йстей ми́р, тишину́ и благоустрое́ние, и все́м на́м житие́ благополу́чное и до́брую христиа́нскую кончи́ну. Огради́те оте́чество ва́ше, гра́д Му́ром, и вся́ гра́ды Росси́йския от вся́каго зла́ и вся́ правове́рныя лю́ди, к ва́м приходя́щия и моще́м покланя́ющияся, осени́те благода́тным де́йством благоприя́тных моли́тв ва́ших, и вся́ проше́ния и́х во бла́го испо́лните. Е́й, чудотво́рцы святи́и! Не пре́зрите моли́тв на́ших, со умиле́нием ва́м возноси́мых, но бу́дите о на́с при́снии предста́тели ко Го́споду и сподо́бите на́с по́мощию ва́шею свято́ю спасе́ние ве́чное получи́ти и Ца́рствие Небе́сное унасле́довати; да славосло́вим неизрече́нное человеколю́бие Отца́, и Сы́на, и Свята́го Ду́ха, в Тро́ице покланя́емаго Бо́га, во ве́ки веко́в. Ами́нь.

Моли́тва втора́я.

О уго́дницы Бо́жии, благове́рнии кня́же Пе́тре и княги́не Февро́ние, к ва́м прибега́ем и к ва́м со упова́нием кре́пким мо́лимся: вознеси́те о на́с, гре́шных (имена́), святы́я моли́твы ва́ши ко Го́споду Бо́гу и испроси́те у бла́гости Его́ вся́ благопотре́бная душа́м и телесе́м на́шим: ве́ру пра́ву, наде́жду бла́гу, любо́вь нелицеме́рну, благоче́стие непоколеби́мо, в до́брых де́лех преуспе́яние. И хода́тайствуйте на́м у Царя́ Небе́снаго житие́ благополу́чное и до́брую христиа́нскую кончи́ну. Е́й, чудотво́рцы святи́и! Не пре́зрите моли́тв на́ших, но бу́дите о на́с при́снии предста́телие ко Го́споду, и сподо́бите на́с по́мощию ва́шею спасе́ние ве́чное получи́ти и Ца́рствие Небе́сное унасле́довати, да славосло́вим неизрече́нное человеколю́бие Отца́ и Сы́на и Свята́го Ду́ха, в Тро́ице покланя́емаго Бо́га во ве́ки веко́в.

А҆ка́ѳїстъ ст҃ы̑мъ бл҃говѣ̑рнымъ кнѧ́зю петрꙋ̀ и҆ кнѧги́ни феѵрѡ́нїи, мꙋ́рѡмскимъ чꙋдотво́рцємъ.

Конда́къ а҃.

И҆збра́ннїи чꙋдотво́рцы и҆ вели́цыи ᲂу҆го́дницы гдⷭ҇ни, гра́да мꙋ́рома застꙋ́пницы и҆ при́снїи ѡ҆ дꙋша́хъ на́шихъ мл҃твенницы, ст҃і́и бл҃говѣ́рнїи кнѧ́же пе́тре и҆ кнѧги́не феѵрѡ́нїе! пѣ́нїе похва́льное ва́мъ приносѧ́ще, мо́лимъ вы̀ ᲂу҆се́рднѡ: ꙗ҆́кѡ и҆мꙋ́щїи дерзнове́нїе ко гдⷭ҇ꙋ, предста́тельствомъ ва́шимъ ѿ всѧ́кихъ бѣ́дъ на́съ свободи́те, и҆ наслѣ́дники црⷭ҇твїѧ нбⷭ҇нагѡ на́съ содѣ́лайте, да зове́мъ ва́мъ ра́достнѡ:

Ра́дꙋйтесѧ, ст҃і́и и҆ пресла́внїи чꙋдотво́рцы пе́тре и҆ феѵрѡ́нїе.

І҆́косъ а҃.

А҆́гг҃ли земні́и и҆ человѣ́цы нбⷭ҇нїи вои́стиннꙋ ꙗ҆ви́стесѧ, бл҃же́ннїи пе́тре и҆ феѵрѡ́нїе, ѿ ю҆́ности ва́шеѧ чи́стꙋю со́вѣсть и҆мꙋ́щїи къ бг҃ꙋ, и҆ до́брѣ во бл҃гоче́стїи и҆ чистотѣ̀ вкꙋ́пѣ пожи́вшїи, на́мъ же ѡ҆ста́вльшїи въ примѣ́ръ подража́нїѧ житїѐ ва́ше бг҃оꙋго́дное, є҆мꙋ́же чꙋдѧ́щесѧ и҆ чꙋдесы̀ ва́шими ѡ҆зарѧ́еми, зове́мъ ва́мъ гла́сы хвале́бными си́це:

Ра́дꙋйтесѧ, ѿ ю҆́ности ва́шеѧ хрⷭ҇та̀ возлюби́вшїи и҆ томꙋ̀ ѿ дꙋшѝ порабо́тавшїи: ра́дꙋйтесѧ, цѣломꙋ́дрїѧ храни́тели и҆ дꙋше́вныѧ и҆ тѣле́сныѧ чистоты̀ рачи́тели.

Ра́дꙋйтесѧ, дꙋ́шы ва́шѧ и҆ тѣлеса̀ на землѝ въ ѡ҆бита́лище дх҃а ст҃а́гѡ ᲂу҆гото́вившїи: ра́дꙋйтесѧ, и҆спо́лненнїи премꙋ́дрости и҆ ра́зꙋма бж҃е́ственнагѡ.

Ра́дꙋйтесѧ, ꙗ҆́кѡ во пло́ти, ꙗ҆́кѡ безпло́тни, вкꙋ́пѣ пожи́сте: ра́дꙋйтесѧ, ꙗ҆́кѡ равноа́гг҃льнꙋю че́сть досто́йнѡ прїѧ́сте.

Ра́дꙋйтесѧ, ꙗ҆́кѡ ѿ землѝ на нб҃о преидо́сте, и҆ та́мѡ со а҆́гг҃лы трⷪ҇цѣ предстои́те: ра́дꙋйтесѧ, ꙗ҆́кѡ со безпло́тными ли́ки трист҃ꙋ́ю пѣ́снь є҆́й воспѣва́ете.

Ра́дꙋйтесѧ, на нб҃сѝ и҆ на землѝ ѿ гдⷭ҇а просла́вленнїи: ра́дꙋйтесѧ, ѡ҆брѣ́тшїи вѣ́чное всесвѣ́тлое мѣ́сто ᲂу҆покое́нїѧ.

Ра́дꙋйтесѧ, гра́да мꙋ́рома сокрѡ́вища пребога̑таѧ: ра́дꙋйтесѧ, и҆сто́чницы неистощи́мїи чꙋде́съ.

Ра́дꙋйтесѧ, ст҃і́и и҆ пресла́внїи чꙋдотво́рцы пе́тре и҆ феѵрѡ́нїе.

Конда́къ в҃.

Ви́дѣвъ кнѧ́зь пе́тръ въ возвра́тной болѣ́зни свое́й, зна́менїе гнѣ́ва бж҃їѧ, за неисполне́нїе ѡ҆бѣ́та своегѡ̀, поѧ́ти въ сꙋпрꙋ́ги себѣ̀ премꙋ́дрꙋю феѵрѡ́нїю, потща́сѧ сїѐ и҆спо́лнити и҆ сочета́сѧ съ не́ю бра́комъ зако́ннымъ. ѻ҆ба́че и҆ въ сꙋпрꙋ́жествѣ цѣломꙋ́дреннѡ и҆ бг҃оꙋго́днѡ пожи́сте, бл҃же́ннїи, и҆мꙋ́ще є҆ди́нꙋ мы́сль во двою̀ тѣ̑лꙋ, є҆́же бл҃гоꙋгожда́ти бг҃ꙋ: тѣ́мже вы́нꙋ пое́те є҆мꙋ̀ ны́нѣ со а҆́гг҃лы пѣ́снь: А҆ллилꙋ́їа.

І҆́косъ в҃.

Ра́зꙋмомъ бг҃опросвѣще́ннымъ свы́ше ѡ҆даре́ннїи, пе́тре и҆ феѵрѡ́нїе ст҃і́и, любо́вь и҆ млⷭ҇рдїе къ бѣ̑днымъ и҆ си̑рымъ ꙗ҆ви́сте, ѡ҆би̑димымъ и҆ безпомѡ́щнымъ застꙋ́пницы бы́сте, и҆ и҆ны́ми добродѣ́тельми мно́гими ᲂу҆краси́сте кнѧже́нїе своѐ земно́е. сегѡ̀ ра́ди вопїе́мъ къ ва́мъ си́це:

Ра́дꙋйтесѧ, бл҃же́ннїи и҆ требл҃же́ннїи, въ бг҃олю́бїи пожи́вшїи и҆ бл҃говѣ́рїе сохра́ншїи: ра́дꙋйтесѧ, млⷭ҇ти и҆ сострада́нїѧ преиспо́лненнїи.

Ра́дꙋйтесѧ, безпомо́щныхъ ско́рїи помо́щницы: ра́дꙋйтесѧ, печа́льныхъ блазі́и ᲂу҆тѣ́шители.

Ра́дꙋйтесѧ, сиро́тъ и҆ вдови́цъ корми́тели: ра́дꙋйтесѧ, сꙋ́щихъ въ бѣда́хъ предста́тели.

Ра́дꙋйтесѧ, болѣ́зней дꙋше́вныхъ и҆ тѣле́сныхъ и҆скꙋ́снїи цѣли́тели: ра́дꙋйтесѧ, ско́рбныхъ серде́цъ радостотво́рнїи посѣти́тели.

Ра́дꙋйтесѧ, любо́вь ва́шꙋ къ бг҃ꙋ, любо́вїю къ бли̑жнимъ свои̑мъ показа́вшїи: ра́дꙋйтесѧ, кнѧже́нїе ва́ше земно́е пра́веднѡ и҆ бг҃оꙋго́днѡ содержа́вшїи.

Ра́дꙋйтесѧ, кнѧзе́й правосла́вныхъ похвало̀ и҆ гра́да мꙋ́рома ᲂу҆твержде́нїе: ра́дꙋйтесѧ, всеѧ̀ землѝ рѡссі́йскїѧ застꙋпле́нїе.

Ра́дꙋйтесѧ, ст҃і́и и҆ пресла́внїи чꙋдотво́рцы пе́тре и҆ феѵрѡ́нїе.

Конда́къ г҃.

Си́лою бл҃года́ти бж҃їѧ ᲂу҆крѣплѧ́емь, бл҃же́нне кнѧ́же пе́тре, восхотѣ́лъ є҆сѝ па́че ѡ҆ста́вити гра́дъ ѻ҆те́чества твоегѡ̀ и҆ кнѧже́нїе мꙋ́ромское, не́же бракоразвести́сѧ съ премꙋ́дрою феѵрѡ́нїею по настоѧ́нїю го́рдыхъ болѧ́ръ твои́хъ. сегѡ̀ ра́ди бг҃ъ тѧ̀ просла́ви и҆ сотворѝ, да тѣ́миже болѧ́ры возвраще́нный вкꙋ́пѣ съ сꙋпрꙋ́жницею твое́ю, на престо́лѣ кнѧже́нїѧ мꙋ́ромскагѡ па́ки ᲂу҆тверди́лсѧ є҆сѝ, на́мъ же примѣ́ръ хране́нїѧ зако́на бж҃їѧ показꙋ́еши по́двигомъ твои́мъ, да подража́юще тебѣ̀ въ ст҃ости хране́нїѧ соꙋ́за бра́чнагѡ, воспѣва́емъ подвигополо́жникꙋ хрⷭ҇тꙋ̀: А҆ллилꙋ́їа.

І҆́косъ г҃.

И҆мꙋ́ще попече́нїе ѡ҆ лю́дехъ свои́хъ, пребл҃же́ннїи пе́тре и҆ феѵрѡ́нїе, неꙋсы́пнѡ подвиза́стесѧ ко бл҃гꙋ и҆́хъ, бл҃гоче́стїе насажда́ѧ, нече́стїе и҆скоренѧ́ѧ, и҆ враждꙋ̀ ᲂу҆миротворѧ́ѧ. тѣ́мже и҆ гдⷭ҇ь, ви́дѧ такѡвы́ѧ по́двиги ва́шѧ, зе́млю мꙋ́ромскꙋю плодоно́сїемъ бл҃гословѝ и҆ ми́ръ глꙋбо́къ кнѧже́нїю ва́шемꙋ дарова̀, подвиза́ѧ лю́ди ва́шѧ бл҃года́рственнѡ воспѣва́ти ва́мъ си́це:

Ра́дꙋйтесѧ, ᲂу҆го́дницы бж҃їи, житїю̀ вели́кихъ ст҃ы́хъ соприча́стницы: ра́дꙋйтесѧ, прави́телїе предо́брїи, лю́ди мꙋ́рѡмскїѧ ко сп҃се́нїю пꙋтеводи́вшїи.

Ра́дꙋйтесѧ, хрⷭ҇тїа́нскагѡ бл҃гоче́стїѧ блюсти́тели: ра́дꙋйтесѧ, нестрое́нїѧ, раздо́рѡвъ и҆ всѧ́кагѡ нече́стїѧ и҆скорени́тели.

Ра́дꙋйтесѧ, сꙋпрꙋ́гѡвъ хрⷭ҇тїа́нъ ко бл҃гоче́стномꙋ житїю̀ наста́вницы: ра́дꙋйтесѧ, цѣломꙋ́дрїѧ и҆ воздержа́нїѧ сꙋпрꙋ́жескагѡ ѡ҆́брази преизѧ́щнїи.

Ра́дꙋйтесѧ, пра́веднагѡ сꙋда̀ рачи́тели: ра́дꙋйтесѧ, немздои́мства и҆ безкоры́стїѧ ревни́тели.

Ра́дꙋйтесѧ, ст҃ы́хъ царе́й кѡнстанті́на и҆ є҆ле́ны добродѣ́телей стѧжа́тели: ра́дꙋйтесѧ, равноапⷭ҇льнагѡ кнѧ́зѧ влади́мїра и҆ бл҃же́нныѧ кнѧги́ни ѻ҆́льги досто́йнїи прее́мницы.

Ра́дꙋйтесѧ, дво́ице пречестна́ѧ и҆ бл҃го́е сочета́нїе, лꙋча́ми чꙋде́съ немерца́емѡ сїѧ́ющїи: ра́дꙋйтесѧ, ѻ҆те́чества ва́шегѡ пресвѣ́тлїи свѣти́льницы.

Ра́дꙋйтесѧ, ст҃і́и и҆ пресла́внїи чꙋдотво́рцы пе́тре и҆ феѵрѡ́нїе.

Конда́къ д҃.

Бꙋ́рѧ скорбе́й и҆ напа́стей, воздвиза́емаѧ ѕло́бою мі́ра сегѡ̀, не ѡ҆сла́би крѣ́пкїѧ любвѐ ва́шеѧ ꙗ҆́же къ бг҃ꙋ, пе́тре и҆ феѵрѡ́нїе бл҃же́ннїи, но па́че наꙋчѝ ва́съ бл҃гоискꙋ́снѡ ѿража́ти разжжє́нныѧ стрѣ́лы и҆скꙋше́нїй дїа́вольскихъ: вы́ бо ѡ҆бо́лкшесѧ въ броню̀ вѣ́ры хрⷭ҇то́вы, въ ми́рѣ глꙋбо́цѣ преидо́сте многомѧте́жнꙋю пꙋчи́нꙋ жите́йскагѡ мо́рѧ, и҆ достиго́сте въ ти́хꙋю при́стань сп҃се́нїѧ, къ не́йже и҆ на́съ мл҃твами ва́шими приведи́те, да вкꙋ́пѣ съ ва́ми пое́мъ бг҃ꙋ: А҆ллилꙋ́їа.

І҆́косъ д҃.

Слы́шавше бли́жнїи и҆ да́льнїи бл҃гоче́стное житїѐ ва́ше, бл҃говѣ́рнїи пе́тре и҆ феѵрѡ́нїе, прославлѧ́хꙋ чл҃вѣколю́бца бг҃а, дарова́вшаго ва́мъ крѣ́пость на всѧ̑ дѣла̀ бл҃га̑ѧ, и҆́миже, ꙗ҆́кѡ лꙋча́ми пресвѣ́тлыми, просїѧ́сте въ ѻ҆те́чествѣ ва́шемъ, и҆дѣ́же и҆ доны́нѣ и҆мена̀ ва́шѧ чє́стны, и҆ по́двиги ва́шѧ воспѣва́ютсѧ похвала́ми си́ми:

Ра́дꙋйтесѧ, дво́ице пресвѣ́тлаѧ, бг҃омъ совокꙋпле́ннаѧ: ра́дꙋйтесѧ, свѣ́томъ бл҃гоче́стнагѡ житїѧ̀ ва́шегѡ, ꙗ҆́кѡ свѣти̑ла бг҃освѣ̑тлаѧ, просїѧ́вшїи.

Ра́дꙋйтесѧ, млⷭ҇тынею и҆ мл҃твами нбⷭ҇ное црⷭ҇твїе стѧжа́вшїи: ра́дꙋйтесѧ, смире́нїемъ и҆ поще́нїемъ вѣ́чное бл҃же́нство ᲂу҆лꙋчи́вшїи.

Ра́дꙋйтесѧ, ꙗ҆́кѡ мзда̀ ва́ша мно́га на нб҃сѣ́хъ є҆́сть: ра́дꙋйтесѧ, ꙗ҆́кѡ ра́дость ва́ша вѣ́чна во свѣ́тлостехъ ст҃ы́хъ.

Ра́дꙋйтесѧ, рабѝ хрⷭ҇то́ви возлю́бленнїи: ра́дꙋйтесѧ, ст҃ы́хъ всѣ́хъ при́снїи дрꙋ́зи.

Ра́дꙋйтесѧ, ѕвѣзды̑ непреле́стнїи, пꙋ́ть сꙋпрꙋ́жескагѡ житїѧ̀ бг҃оꙋго́днагѡ вѣ́рнѡ ᲂу҆казꙋ́ющїи: ра́дꙋйтесѧ, ѻ҆́блацы росоно́снїи, зно́й страсте́й и҆ нече́стїѧ прогонѧ́ющїи.

Ра́дꙋйтесѧ, бж҃їихъ млⷭ҇тей и҆ щедрѡ́тъ на́мъ пода́тели: ра́дꙋйтесѧ, ѻ҆те́чества ва́шегѡ ᲂу҆краше́нїе неѿе́млемое.

Ра́дꙋйтесѧ, ст҃і́и и҆ пресла́внїи чꙋдотво́рцы пе́тре и҆ феѵрѡ́нїе.

Конда́къ є҃.

Бг҃опросвѣще́ннїи свѣти́льницы бл҃гоче́стїѧ и҆ преди́внїи чꙋдотво́рцы пе́тре и҆ феѵрѡ́нїе, бг҃а ѿ всеѧ̀ дꙋшѝ возлюби́вше, всѧ̑ за́пѡвѣди є҆гѡ̀ сохрани́сте: тѣ́мже и҆ хрⷭ҇то́съ, ꙗ҆́кѡ со́лнце и҆ лꙋнꙋ̀ пресвѣ̑тлыѧ, показа̀ ва́съ, пребл҃же́ннїи, чꙋде́съ мно́гихъ заре́ю ѡ҆зарѧ́ющыѧ ѡ҆́бласть мꙋ́ромскꙋю и҆ всю̀ странꙋ̀ рѡссі́йскꙋю, просла́вивъ нетлѣ́нїемъ ст҃ы̑ѧ и҆ многоцѣлє́бныѧ мо́щи ва́шѧ, къ ни́мже припа́дающе, по достоѧ́нїю ᲂу҆бл҃жа́емъ ва́съ, и҆ вы́нꙋ бл҃года́рственнѡ пое́мъ ди́вномꙋ во ст҃ы́хъ свои́хъ бг҃ꙋ: А҆ллилꙋ́їа.

І҆́косъ є҃.

Ви́дѣвше житїѐ ва́ше пра́ведное и҆ щедрѡ́ты ва́шѧ, лю́дїе мꙋ́ромстїи сла́влѧхꙋ ва́съ, свои́хъ прави́телей ми́лостивыхъ, бл҃говѣ́рнїи пе́тре и҆ феѵрѡ́нїе, вы́ же смире́нїе и҆́стинное возлюби́вше и҆ похвалы̑ человѣ́чєскїѧ небре́гше, горды́нею неꙋѧ́звлени пребы́сте, и҆ тѣ́мъ показа́сте на́мъ ѡ҆́бразъ вы́шшагѡ смире́нїѧ, є҆мꙋ́же поꙋча́ѧсѧ, съ любо́вїю вопїе́мъ ва́мъ такѡва́ѧ:

Ра́дꙋйтесѧ, сла́вꙋ человѣ́чꙋ ни во что́ же вмѣни́вшїи: ра́дꙋйтесѧ, смире́нїе хрⷭ҇то́во ᲂу҆се́рднѡ возлюби́вшїи.

Ра́дꙋйтесѧ, за́повѣдей гдⷭ҇нихъ вѣ́рнїи и҆сполни́тели: ра́дꙋйтесѧ, ᲂу҆че́нїѧ є҆ѵⷢ҇льскагѡ и҆́стиннїи послѣ́дователи.

Ра́дꙋйтесѧ, рабѝ бг҃а вы́шнѧгѡ, во́лю є҆гѡ̀ сотво́ршїи: ра́дꙋйтесѧ, вѣ́рꙋ хрⷭ҇то́вꙋ до конца̀ соблю́дшїи.

Ра́дꙋйтесѧ, хрⷭ҇тоимени̑тымъ лю́демъ бл҃гоче́стїѧ ᲂу҆чи́тели: ра́дꙋйтесѧ, хотѧ́щихъ бг҃оꙋго́днѡ жи́ти бг҃омꙋ́дрїи наста́вницы.

Ра́дꙋйтесѧ, мл҃твами ва́шими сп҃са́ющїи на́съ ѿ всѧ́кихъ бѣ́дъ: ра́дꙋйтесѧ, всѧ̑ бл҃га̑ѧ прошє́нїѧ на̑ша и҆сполнѧ́ющїи.

Ра́дꙋйтесѧ, въ недꙋ́зѣхъ стра́ждꙋщихъ бл҃года́тнїи вра́чеве: ра́дꙋйтесѧ, млⷭ҇тивїи страны̀ мꙋ́ромскїѧ покрови́телїе.

Ра́дꙋйтесѧ, ст҃і́и и҆ пресла́внїи чꙋдотво́рцы пе́тре и҆ феѵрѡ́нїе.

Конда́къ ѕ҃.

Проповѣ́дницы вѣ́ры правосла́вныѧ и҆ ревни́тели бл҃гоче́стїѧ, не сло́вомъ то́кмѡ, но всѣ́мъ житїе́мъ свои́мъ бы́сте во гра́дѣ мꙋ́ромѣ, прехва́льнїи пе́тре и҆ феѵрѡ́нїе: тѣ́мже и҆ ст҃а́ѧ цр҃ковь досто́йнѣ почита́етъ по́двиги и҆ трꙋды̀ ва́шѧ, и҆́миже трꙋди́стесѧ во сла́вꙋ бг҃а вы́шнѧгѡ, немо́лчнѡ воспѣва́ѧ є҆мꙋ̀: А҆ллилꙋ́їа.

І҆́косъ ѕ҃.

Возсїѧ́сте во гра́дѣ мꙋ́ромѣ свѣ́томъ добродѣ́тельнагѡ житїѧ̀, ꙗ҆́кѡ ѕвѣ́зды бг҃освѣ̑тлыѧ, пребл҃же́ннїи пе́тре и҆ феѵрѡ́нїе, и҆ па́мѧть ва́ша въ не́мъ съ похвала́ми до дне́сь, ꙗ҆́кѡ и҆ по сме́рти свое́й не престае́те ѡ҆зарѧ́ти на́съ, мнѡ́гаѧ чꙋдеса̀ соверша́юще, и҆ тѣ́ми свѣ́тлꙋю зарю̀ безсме́ртїѧ на́мъ ѿ моще́й ва́шихъ возсїѧва́юще, да ᲂу҆бл҃жа́емъ ва́съ бл҃гохвалє́нїи сицевы́ми:

Ра́дꙋйтесѧ, чи́на и҆ ᲂу҆ста́вѡвъ ст҃ы́ѧ цр҃кве вѣ́рнїи храни́тели: ра́дꙋйтесѧ, слꙋжи́телей ѻ҆лтарѧ̀ гдⷭ҇нѧ бл҃гоговѣ́йнїи почита́тели.

Ра́дꙋйтесѧ, бл҃ги́хъ ѡ҆бы́чаевъ и҆ преда́нїй ст҃оѻте́ческихъ ревни́тели: ра́дꙋйтесѧ, ѡ҆бы́чаєвъ ѕлы́хъ и҆ сꙋемꙋ́дрїй ꙗ҆зы́ческихъ и҆скорени́тели.

Ра́дꙋйтесѧ, сꙋды̀ нелицепрїѧ̑тны лю́демъ ва́шымъ твори́вшїи: ра́дꙋйтесѧ, сꙋды̀ ва́шѧ съ млⷭ҇тїю соедини́вшїи.

Ра́дꙋйтесѧ, кро́тцыи и҆ неѕлоби́вїи послѣ́дователи хрⷭ҇то́ви: ра́дꙋйтесѧ, ѕло́бꙋ добро́мъ препобѣжда́вшїи.

Ра́дꙋйтесѧ, нетлѣ́нїѧ бл҃гоꙋха́ющїи цвѣ́ти: ра́дꙋйтесѧ, безсме́ртїѧ немерца́ющїи лꙋчѝ.

Ра́дꙋйтесѧ, на землѝ вели́чїемъ чꙋде́съ блиста́ющїи: ра́дꙋйтесѧ, на нб҃сѝ со а҆́гг҃лы бг҃а сла́вѧщїи.

Ра́дꙋйтесѧ, ст҃і́и и҆ пресла́внїи чꙋдотво́рцы пе́тре и҆ феѵрѡ́нїе.

Конда́къ з҃.

Хотѧ́й чл҃вѣколю́бецъ гдⷭ҇ь ꙗ҆ви́ти въ житїѝ ва́шемъ, пе́тре и҆ феѵрѡ́нїе, ѡ҆́бразъ назида́нїѧ, не то́кмѡ лю́демъ мїрски̑мъ, но и҆ ликѡ́мъ и҆́ночєскимъ, внꙋшѝ ва́мъ въ ста́рости масти́тѣй ѡ҆ста́вити сла́вꙋ кнѧже́нїѧ земна́гѡ, и҆ воспрїѧ́ти ѡ҆́бразъ и҆́ноческїй, въ не́мже подвиза́стесѧ до́брѣ посто́мъ, бдѣ́нїемъ и҆ мл҃твою, воспѣва́юще непреста́ннѡ трїеди́номꙋ бг҃ꙋ а҆́гг҃льскꙋю пѣ́снь: А҆ллилꙋ́їа.

І҆́косъ з҃.

Но́вꙋю бл҃года́ть бж҃їю во и҆́ночестѣмъ постриже́нїи прїе́мше, прпⷣбнїи, но́выми по́двигами ᲂу҆краси́сте равноа́гг҃льное житїѐ ва́ше, и҆ та́кѡ сꙋгꙋ́бъ пло́дъ соверше́нства дꙋхо́внагѡ хрⷭ҇тꙋ̀ принесо́сте, и҆ мздꙋ̀ прпⷣбныхъ досто́йнѣ ѿ негѡ̀ воспрїѧ́сте. помина́ѧ ᲂу҆̀бо таковꙋ́ю ре́вность ва́шꙋ къ подвигѡ́мъ дꙋхѡ́внымъ, прославлѧ́емъ ва́съ си́ми достодо́лжными похвала́ми: Ра́дꙋйтесѧ, ꙗ҆́кѡ любвѐ ра́ди гдⷭ҇а, мі́ра сегѡ̀ кнѧже́нїе и҆ сла́вꙋ ѡ҆ста́висте. Ра́дꙋйтесѧ, ꙗ҆́кѡ и҆́ноческое равноа́гг҃льное житїѐ ᲂу҆се́рднѡ воспрїѧ́сте. Ра́дꙋйтесѧ, соверше́ннагѡ терпѣ́нїѧ подви́жницы. Ра́дꙋйтесѧ, во́льныѧ нищеты̀ бл҃же́ннїи стѧжа́тели. Ра́дꙋйтесѧ, пре́жде кончи́ны ва́шеѧ всѧ̑ стра̑сти ᲂу҆мертви́вшїи воздержа́нїемъ. Ра́дꙋйтесѧ, воспрїѧ́вшїи ст҃ꙋ́ю схи́мꙋ въ броню̀ сп҃се́нїѧ. Ра́дꙋйтесѧ, багрѧни́цꙋ кнѧ́жескꙋю на власѧни́цꙋ и҆́ноческꙋю премѣни́вшїи. Ра́дꙋйтесѧ, посто́мъ, бдѣ́нїемъ и҆ непреста́нными мл҃твами бг҃ꙋ до́брѣ ᲂу҆годи́вшїи. Ра́дꙋйтесѧ, бг҃олюбе́знагѡ ᲂу҆едине́нїѧ взыска́тели. Ра́дꙋйтесѧ, сп҃си́тельнагѡ безмо́лвїѧ люби́тели. Ра́дꙋйтесѧ, слеза́ми мл҃твенными ѡ҆роше́ннїи. Ра́дꙋйтесѧ, въ со́нмѣ прпⷣбныхъ на нб҃сѝ просла́вленнїи. Ра́дꙋйтесѧ, ст҃і́и и҆ пресла́внїи чꙋдотво́рцы пе́тре и҆ феѵрѡ́нїе.

Конда́къ и҃.

Стра́нное и҆ ди́вное бѣ̀ чꙋ́до, є҆гда̀ ты̀, бл҃же́нне пе́тре, на кончи́нѣ живота̀ твоегѡ̀, проше́нїѧ ра́ди сꙋпрꙋ́жницы твоеѧ̀, ст҃ы́ѧ феврѡ́нїи, и҆схо́домъ свои́мъ ᲂу҆ме́длилъ є҆сѝ, до́ндеже сконча̀ ѻ҆на̀ пеленꙋ̀ цр҃ко́внꙋю є҆́ю сшива́емꙋ, и҆ вкꙋ́пѣ съ тобо́ю къ и҆схо́дꙋ сме́ртномꙋ приспѣ̀: и҆ та́кѡ неразлꙋ́чнїи въ житїѝ, неразлꙋ́чнїи и҆ въ кончи́нѣ ꙗ҆ви́стесѧ, и҆ во є҆ди́нъ де́нь и҆ ча́съ ст҃ы̑ѧ дꙋ́шы своѧ̑ въ рꙋ́цѣ бж҃їи преда́сте, зовꙋ́ще при́снѡ живы́ми и҆ ме́ртвыми ѡ҆блада́ющемꙋ влⷣцѣ бг҃ꙋ: А҆ллилꙋ́їа.

І҆́косъ и҃.

Всѝ чꙋдѧ́хꙋсѧ и҆ сла́влѧхꙋ ди́внаго во ст҃ы́хъ свои́хъ бг҃а, є҆гда̀ ст҃а̑ѧ ва̑ша тѣлеса̀, въ ра́зныхъ гробѣ́хъ положє́ннаѧ, чꙋде́снѡ ѡ҆брѣто́шасѧ лежа̑ща въ ѻ҆́бщей гробни́цѣ, ю҆́же ᲂу҆гото́васте себѣ̀, прпⷣбнїи, въ собо́рнѣй цр҃кви гра́да мꙋ́рома, и҆дѣ́же и҆ доны́нѣ неразлꙋ́чнѡ почива́ете, чꙋдотво́рцы ст҃і́и, неѡскꙋ̑днаѧ и҆сточа́юще и҆сцѣлє́нїѧ всѣ̑мъ, съ вѣ́рою прибѣга́ющымъ къ ва́мъ и҆ зовꙋ́щымъ:

Ра́дꙋйтесѧ, сою́зъ любвѐ ва́шеѧ до гро́ба и҆ за гро́бомъ вѣ́рнѡ сохра́ншїи: ра́дꙋйтесѧ, не то́кмѡ въ жи́зни, но и҆ по сме́рти, ѡ҆ гдⷭ҇ѣ соедине́ннїи.

Ра́дꙋйтесѧ, въ сꙋпрꙋ́жестѣмъ бл҃гоче́стнѣмъ житїѝ ва́мъ подража́ющымъ крѣ́пцыи помо́щницы: ра́дꙋйтесѧ, теплото́ю любвѐ ва́шеѧ и҆ на́съ согрѣва́ющїи.

Ра́дꙋйтесѧ, сме́ртїю вре́менною преше́дшїи къ жи́зни вѣ́чнѣй: ра́дꙋйтесѧ, ѿ гдⷭ҇а нетлѣ́нїемъ и҆ чꙋдесы̀ просла́вленнїи.

Ра́дꙋйтесѧ, ꙗ҆́кѡ па́мѧть ва́ша съ похвала́ми и҆ ᲂу҆спе́нїе со ст҃ы́ми: ра́дꙋйтесѧ, ꙗ҆́кѡ и҆мена̀ ва̑ша чє́стна сꙋ́ть и҆ бл҃гословє́нна въ ѻ҆те́чествѣ ва́шемъ.

Ра́дꙋйтесѧ, рѡссі́йскїѧ страны̀ ᲂу҆добре́нїе бл҃года́тное: ра́дꙋйтесѧ, гра́да мꙋ́рома ѡ҆гражде́нїе несокрꙋши́мое.

Ра́дꙋйтесѧ, ѡ҆ лю́бѧщихъ и҆ чтꙋ́щихъ ва́съ нбⷭ҇нїи предста́тели: ра́дꙋйтесѧ, приснопросѧ́щїи на́мъ ᲂу҆ гдⷭ҇а да́ры бл҃гости є҆гѡ̀.

Ра́дꙋйтесѧ, ст҃і́и и҆ пресла́внїи чꙋдотво́рцы пе́тре и҆ феѵрѡ́нїе.

Конда́къ ѳ҃.

Всѝ а҆́гг҃ли и҆ ст҃ы́хъ ли́ки ра́довахꙋсѧ ра́достїю ве́лїю, є҆гда̀ ст҃ы̑ѧ дꙋ́шы ва́шѧ достиго́ша вѣ́чнагѡ въ ѡ҆би́телехъ ра́йскихъ селе́нїѧ, и҆ са́мъ творе́цъ а҆́гг҃лѡвъ и҆ ст҃ѣ́йшїй ст҃ы́хъ, цр҃ь сла́вы хрⷭ҇то́съ, безсме́ртїѧ вѣнцы̀ ᲂу҆вѣнча̀ ва́съ и҆ дарова̀ ва́мъ бл҃года́ть, моли́тисѧ є҆мꙋ̀ со дерзнове́нїемъ мно́гимъ ѡ҆ всѣ́хъ и҆́щꙋщихъ ва́шегѡ застꙋпле́нїѧ: є҆гѡ́же не лиши́те и҆ на́съ грѣ́шныхъ, пе́тре и҆ феѵрѡ́нїе достохва́льнїи, смиренномꙋ́дреннѡ воспѣва́ющихъ просла́вльшемꙋ ва́съ бг҃ꙋ хвале́бнꙋю пѣ́снь: А҆ллилꙋ́їа.

І҆́косъ ѳ҃.

Вѣті́йство человѣ́ческое не довлѣ́етъ къ досто́йномꙋ прославле́нїю житїѧ̀ ва́шегѡ, ст҃і́и чꙋдотво́рцы пе́тре и҆ феѵрѡ́нїе: кто́ бо и҆сповѣ́сть всѧ̑ молє́нїѧ и҆ пощє́нїѧ, болѣ̑зни и҆ трꙋды̀ ва́шѧ; кто̀ и҆зочте́тъ всѧ̑ сле́зы и҆ воздыха́нїѧ ва̑ша ꙗ҆́же къ бг҃ꙋ; ѻ҆ба́че мы̀, любо́вїю къ ва́мъ подвиза́еми, дерза́емъ воспѣва́ти ва́мъ сїѧ̑ ма̑лыѧ и҆ нехи́трѡстныѧ похвалы̑:

Ра́дꙋйтесѧ, бл҃года́ти ст҃а́гѡ дх҃а и҆збра́ннїи сосꙋ́ди: ра́дꙋйтесѧ, ра́дости на́мъ вѣ́чныѧ бл҃гопрїѧ́тнїи хода́таи.

Ра́дꙋйтесѧ, бг҃обоѧ́зненныхъ сꙋпрꙋ́гѡвъ въ бл҃гоче́стїи ᲂу҆твержде́нїе: ра́дꙋйтесѧ, нарꙋши́телей сꙋпрꙋ́жескагѡ цѣломꙋ́дрїѧ и҆ согла́сїѧ гро́зное ѡ҆бличе́нїе.

Ра́дꙋйтесѧ, гнѣ́въ бж҃їй, пра́веднѡ дви́жимый на на́съ, мл҃твами ва́шими ᲂу҆толѧ́ющїи: ра́дꙋйтесѧ, ѡ҆ ми́рѣ всегѡ̀ мі́ра непреста́ннѡ гдⷭ҇а ᲂу҆молѧ́ющїи.

Ра́дꙋйтесѧ, на врагѝ ви̑димыѧ и҆ неви̑димыѧ крѣ́пцыи на́мъ спобо́рницы: ра́дꙋйтесѧ, а҆гг҃лонра́внїи человѣ́цы.

Ра́дꙋйтесѧ, прпⷣбныхъ и҆ првⷣныхъ сонаслѣ́дницы: ра́дꙋйтесѧ, прест҃ы́ѧ трⷪ҇цы вѣ́рнїи ᲂу҆го́дницы.

Ра́дꙋйтесѧ, бл҃же́ннїи ѡ҆бита́тели го́рнѧгѡ гра́да і҆ерⷭ҇ли́ма нбⷭ҇нагѡ: ра́дꙋйтесѧ, со ст҃ы́ми торжествꙋ́ющїи въ ски́нїѧхъ ра́йскихъ.

Ра́дꙋйтесѧ, ст҃і́и и҆ пресла́внїи чꙋдотво́рцы пе́тре и҆ феѵрѡ́нїе.

Конда́къ і҃.

Сп҃се́нїе вѣ́чное ᲂу҆наслѣ́довавше бг҃обл҃же́ннїи пе́тре и҆ феѵрѡ́нїе, дꙋша́ми ва́шими въ ѡ҆би́телехъ го́рнихъ неразлꙋ́чнѡ въ бз҃ѣ пребыва́ете, ст҃ы́ми же моща́ми ва́шими въ хра́мѣ бж҃їемъ нетлѣ́ннѡ вкꙋ́пѣ почива́ете, и҆ ѡ҆би̑льнаѧ и҆сцѣлє́нїѧ и҆сточа́ете, да чꙋдесы̀ ва́шими бл҃года́тнѡ ѡ҆зарѧ́еми, хвале́бнѡ взыва́емъ верхо́вномꙋ творцꙋ̀ чꙋде́съ бг҃ꙋ: А҆ллилꙋ́їа.

І҆́косъ і҃.

Стѣ́нꙋ застꙋпле́нїѧ бл҃гопрїѧ̑тныѧ мл҃твы ва́шѧ къ бг҃ꙋ ѡ҆бре́тше, ст҃і́и чꙋдотво́рцы пе́тре и҆ феѵрѡ́нїе, бл҃годаре́нїе ѻ҆ц҃ꙋ̀ нбⷭ҇номꙋ ᲂу҆се́рднѡ возсыла́емъ за всѧ̑ бл҃годѣѧ́нїѧ є҆гѡ̀, ва́ми всѣ̑мъ на́мъ ѡ҆би́льнѡ ꙗ҆влѧ́ємаѧ, ва́мъ же, предста́телемъ на́шымъ, сицево́е прино́симъ пѣ́нїе:

Ра́дꙋйтесѧ, всесвѣ́тлагѡ црⷭ҇твїѧ хрⷭ҇то́ва наслѣ́дницы: ра́дꙋйтесѧ, а҆́гг҃льскихъ ликѡ́въ собесѣ́дницы.

Ра́дꙋйтесѧ, бг҃а во сла́вѣ непристꙋ́пнѣй созерца́ющїи: ра́дꙋйтесѧ, трисїѧ́ннагѡ бжⷭ҇тва̀ таи́нницы.

Ра́дꙋйтесѧ, со ст҃ы́ми на нб҃сѝ вѣ́чнѡ ца́рствꙋющїи: ра́дꙋйтесѧ, ѿ го́рнихъ высѡ́тъ къ земнорѡ́днымъ ми́лостивнѡ приника́ющїи.

Ра́дꙋйтесѧ, крі́ни бл҃гоꙋха́ннїи нбⷭ҇нагѡ прозѧбе́нїѧ: ра́дꙋйтесѧ, кѷпари́си чꙋдото́чнїи раѧ̀ і҆и҃сова.

Ра́дꙋйтесѧ, пода́тели незави́стнїи безме́зднагѡ врачева́нїѧ: ра́дꙋйтесѧ, соверши́тели достохва́льнїи мно́гихъ чꙋде́съ.

Ра́дꙋйтесѧ, бл҃годѣѧ́нїй мно́жество на́мъ и҆сточа́ющїи: ра́дꙋйтесѧ, млⷭ҇тїю сострада́нїѧ ва́шегѡ всѣ́хъ ѡ҆б̾е́млющїи.

Ра́дꙋйтесѧ, ст҃і́и и҆ пресла́внїи чꙋдотво́рцы пе́тре и҆ феѵрѡ́нїе.

Конда́къ а҃і.

Пѣ́нїе моле́бное прино́симъ ва́мъ ᲂу҆го́дницы бж҃їи пе́тре и҆ феѵрѡ́нїе, и҆ съ любо́вїю припа́даемъ къ ра́цѣ ст҃ы́хъ и҆ многоцѣле́бныхъ моще́й ва́шихъ, прославлѧ́ѧ житїѐ ва́ше бг҃оꙋго́дное и҆ по́двиги мнѡ́ги. мо́лимсѧ ва́мъ ᲂу҆се́рднѡ, чꙋдотво́рцы ст҃і́и, помози́те на́мъ подража́ти ва́шымъ добродѣ́телемъ, да возмо́жемъ бг҃оꙋго́днѡ пѣ́ти созда́телю на́шемꙋ: А҆ллилꙋ́їа.

І҆́косъ а҃і.

Свѣ́та нбⷭ҇нагѡ и҆спо́лненъ бѣ̀ собо́рный хра́мъ гра́да мꙋ́рома, є҆гда̀ бл҃говоле́нїемъ бж҃їимъ ст҃ы̑ѧ мо́щи ва́шѧ пе́тре и҆ феѵрѡ́нїе, цѣ̑лы и҆ бл҃гоꙋха̑нны ѡ҆брѣто́шасѧ въ не́мъ, и҆ и҆з̾ нѣ́дръ земны́хъ, ꙗ҆́кѡ сокро́вище драгоцѣ́нное, и҆знесе́ны бы́ша, и҆дѣ́же и҆ до ны́нѣ почива́ютъ, и҆сцѣлє́нїѧ неѡскꙋ̑днаѧ и҆сточа́юще недꙋ́жнымъ и҆ болѧ́щымъ. сегѡ̀ ра́ди пѣ́сненнѡ вопїе́мъ ва́мъ:

Ра́дꙋйтесѧ, зла́то нетлѣ́нное, въ нѣ́дрѣхъ земны́хъ ѡ҆брѣ́тенное: ра́дꙋйтесѧ, би́сери сїѧ́ющїи и҆ бл҃года́тнѡ просвѣща́ющїи человѣ́кѡвъ.

Ра́дꙋйтесѧ, ст҃ы́ѧ правосла́вныѧ цр҃кве похвало̀: ра́дꙋйтесѧ, є҆ресе́й и҆ раско́лѡвъ ѡ҆бличе́нїе.

Ра́дꙋйтесѧ, свѣ́ти ᲂу҆́мнїи, заре́ю ст҃а́гѡ дх҃а ѡ҆блиста́ющїи: ра́дꙋйтесѧ, мѵ́ра бл҃гоꙋха́нїѧ хрⷭ҇то́ва преиспо́лненнїе.

Ра́дꙋйтесѧ, ѡ҆блече́ннїи въ ри́зꙋ бл҃года́тнагѡ нетлѣ́нїѧ: ра́дꙋйтесѧ, препоѧ́саннїи си́лою мно́гихъ чꙋде́съ.

Ра́дꙋйтесѧ, ꙗ҆́кѡ ра́ка ва́ша честна́ѧ враче́бница ꙗ҆ви́сѧ недꙋ́гѡмъ человѣ́ческимъ: ра́дꙋйтесѧ, ꙗ҆́кѡ ѿ неѧ̀ всѧ́къ съ вѣ́рою приходѧ́й да́ры цѣлє́бныѧ прїе́млетъ.

Ра́дꙋйтесѧ, свѣ́тлостїю чꙋде́съ ва́шихъ мра́къ дꙋ́шъ на́шихъ ѡ҆зарѧ́ющїи: ра́дꙋйтесѧ, нетлѣ́нїемъ ст҃ы́хъ моще́й ва́шихъ зарю̀ ѻ҆́бщагѡ всѣ́хъ воскрⷭ҇нїѧ на́мъ показꙋ́ющїи.

Ра́дꙋйтесѧ, ст҃і́и и҆ пресла́внїи чꙋдотво́рцы пе́тре и҆ феѵрѡ́нїе.

Конда́къ в҃і.

Бл҃года́ть свы́ше ва́мъ дарова́ннꙋю позна́вше, ст҃і́и чꙋдотво́рцы пе́тре и҆ феѵрѡ́нїе, съ бл҃гоговѣ́нїемъ и҆ любо́вїю покланѧ́емсѧ нетлѣ́ннымъ и҆ многоцѣлє́бнымъ моще́мъ ва́шымъ, и҆ ѿ ни́хъ прїе́млемъ въ недꙋ́зѣхъ и҆сцѣле́нїе, въ ско́рбехъ ᲂу҆тѣше́нїе, въ бѣда́хъ бл҃года́тнꙋю по́мощь: тѣ́мже и҆ прославлѧ́емъ ва́съ по достоѧ́нїю, нбⷭ҇ныхъ предста́телей и҆ застꙋ́пникѡвъ на́шихъ, воспѣва́юще хвалы̑ и҆ бл҃годарє́нїѧ ва́ми бл҃готворѧ́щемꙋ на́мъ влⷣцѣ бг҃ꙋ: А҆ллилꙋ́їа.

І҆́косъ в҃і.

Пою́ще мнѡ́гаѧ и҆ пресла̑внаѧ ва̑ша чꙋдеса̀, вели́цыи ᲂу҆го́дницы бж҃їи пе́тре и҆ феѵрѡ́нїе, ᲂу҆бл҃жа́емъ ва́съ, ꙗ҆́кѡ цѣли́телей, ᲂу҆тѣ́шителей и҆ помо́щникѡвъ ѿ гдⷭ҇а на́мъ дарова́нныхъ, и҆ мл҃твеннѡ торжествꙋ́емъ ст҃ꙋ́ю па́мѧть ва́шꙋ, ѿ любвѐ серде́чныѧ воспѣва́юще ва́мъ бл҃года́рственнѡ и҆ хвале́бнѡ:

Ра́дꙋйтесѧ, во бл҃гоꙋха́нїи ст҃ы́ни нетлѣ́ннѡ почива́ющїи: ра́дꙋйтесѧ, съ вѣ́рою приходѧ́щихъ къ ра́цѣ моще́й ва́шихъ бл҃года́тнѡ ѡ҆сщ҃а́ющїи.

Ра́дꙋйтесѧ, призыва́ющихъ мл҃твеннѡ честна̑ѧ и҆мена̀ ва́шѧ ско́рїи ᲂу҆слы́шатели: ра́дꙋйтесѧ, ᲂу҆пова́нїе на ва́съ по бз҃ѣ возлага́ющихъ ди́внїи помо́щницы.

Ра́дꙋйтесѧ, и҆звѣ́стнїи ᲂу҆милостиви́тели цр҃ѧ̀ нбⷭ҇нагѡ: ра́дꙋйтесѧ, си́льнїи защи́тницы на́ши ѿ врагѡ́въ неви́димыхъ.

Ра́дꙋйтесѧ, при́снїи всѣ́мъ хода̑таи сп҃се́нїѧ: ра́дꙋйтесѧ, неѿстꙋ́пнїи храни́тели гра́да мꙋ́рома.

Ра́дꙋйтесѧ, кнѧзе́й рѡссі́йскихъ пречꙋ́днаѧ добро́то: ра́дꙋйтесѧ, ѻ҆те́чества ва́шегѡ бг҃омъ дарова́ннїи покрови́тели.

Ра́дꙋйтесѧ, тѣле́съ на́шихъ бл҃года́тнїи цѣле́бницы: ра́дꙋйтесѧ, ѡ҆ дꙋша́хъ на́шихъ ᲂу҆се́рднїи ко гдⷭ҇ꙋ мл҃твенницы.

Ра́дꙋйтесѧ, ст҃і́и и҆ пресла́внїи чꙋдотво́рцы пе́тре и҆ феѵрѡ́нїе.

Конда́къ г҃і.

Ѽ ст҃і́и и҆ пресла́внїи чꙋдотво́рцы, бл҃говѣ́рнїи кнѧ́же пе́тре и҆ кнѧги́не феѵрѡ́нїе! прїими́те ми́лостивнѡ сїѐ похва́льное пѣ́нїе, ѿ на́съ недосто́йныхъ во ᲂу҆миле́нїи ва́мъ приноси́мое, и҆ ва́шимъ предста́тельствомъ ᲂу҆ гдⷭ҇а и҆спроси́те на́мъ ᲂу҆твержде́нїе въ вѣ́рѣ и҆ до́брыхъ дѣ́лѣхъ, и҆ и҆збавле́нїе ѿ всѣ́хъ скорбе́й и҆ болѣ́зней вре́менныхъ и҆ вѣ́чныхъ, да сподо́бимсѧ вкꙋ́пѣ съ ва́ми и҆ всѣ́ми ст҃ы́ми во црⷭ҇твїи нбⷭ҇нѣмъ пѣ́ти прест҃ѣ́й трⷪ҇цѣ вѣ́чнѡ хвале́бнꙋю пѣ́снь: А҆ллилꙋ́їа.

Се́й конда́къ глаго́ли три́жды, та́же і҆́косъ а҃, и҆ конда́къ а҃.

Моли́тва а҃.

Ѽ вели́цыи ᲂу҆го́дницы бж҃їи и҆ преди́внїи чꙋдотво́рцы, бл҃говѣ́рнїи кнѧ́же пе́тре и҆ кнѧги́не феврѡ́нїе, гра́да мꙋ́рома предста́тели и҆ храни́тели, и҆ ѡ҆ всѣ́хъ на́съ ᲂу҆се́рднїи ко гдⷭ҇ꙋ мл҃твенницы! къ ва́мъ прибѣга́емъ и҆ ва́мъ мо́лимсѧ съ ᲂу҆пова́нїемъ крѣ́пкимъ: принеси́те за на́съ грѣ́шныхъ ст҃ы̑ѧ мл҃твы ва́шѧ ко гдⷭ҇ꙋ бг҃ꙋ, и҆ и҆спроси́те на́мъ ᲂу҆ бл҃гости є҆гѡ̀ всѧ̀ бл҃гопотрє́бнаѧ дꙋша́мъ и҆ тѣлесє́мъ на́шымъ: вѣ́рꙋ пра́вꙋ, наде́ждꙋ бл҃гꙋ, любо́вь нелицемѣ́рнꙋ, бл҃гоче́стїе непоколеби́мое, въ до́брыхъ дѣ́лѣхъ преꙋспѣ́ѧнїе, мі́ра ᲂу҆мире́нїе, землѝ плодоно́сїе, воздꙋ́ха бл҃горастворе́нїе, дꙋша́мъ и҆ тѣлесє́мъ здра́вїе и҆ вѣ́чное сп҃се́нїе. и҆схода́тайствꙋйте ᲂу҆ цр҃ѧ̀ нбⷭ҇нагѡ: вѣ́рныхъ рабѡ́въ є҆гѡ̀, въ ско́рби и҆ печа́ли де́нь и҆ но́щь вопїю́щихъ къ немꙋ̀, многоболѣ́зный во́пль да ᲂу҆слы́шитъ и҆ да и҆зведе́тъ ѿ поги́бели живо́тъ на́шъ. и҆спроси́те це́ркви ст҃ѣ́й и҆ все́й держа́вѣ рѡссі́йстѣй ми́ръ, тишинꙋ̀ и҆ бл҃гоꙋстрое́нїе, и҆ всѣ̑мъ на́мъ житїѐ бл҃гополꙋ́чное и҆ до́брꙋю хрⷭ҇тїа́нскꙋю кончи́нꙋ. ѡ҆гради́те ѻ҆те́чество ва́ше, гра́дъ мꙋ́ромъ, и҆ всѧ̑ гра́ды рѡссі̑йскїѧ ѿ всѧ́кагѡ ѕла̀, и҆ всѧ̑ правовѣ̑рныѧ лю́ди, къ ва́мъ приходѧ́щыѧ и҆ моще́мъ покланѧ́ющыѧсѧ, ѡ҆сѣни́те бл҃года́тнымъ дѣ́йствомъ бл҃гопрїѧ́тныхъ мл҃твъ ва́шихъ, и҆ всѧ̑ прошє́нїѧ и҆́хъ во бл҃го и҆спо́лните. є҆́й, чꙋдотво́рцы ст҃і́и! не пре́зрите мл҃твъ на́шихъ, со ᲂу҆миле́нїемъ ва́мъ возноси́мыхъ, но бꙋ́дите ѡ҆ на́съ при́снїи предста́тели ко гдⷭ҇ꙋ, и҆ сподо́бите на́съ по́мощїю ва́шею ст҃о́ю сп҃се́нїе вѣ́чное полꙋчи́ти и҆ црⷭ҇тво нбⷭ҇ное ᲂу҆наслѣ́довати: да славосло́вимъ неизрече́нное чл҃вѣколю́бїе ѻ҆ц҃а̀, и҆ сн҃а, и҆ ст҃а́гѡ дх҃а, въ трⷪ҇цѣ покланѧ́емагѡ бг҃а, во вѣ́ки вѣкѡ́въ. А҆ми́нь.

Моли́тва в҃.

Ѽ ᲂу҆гѡ́дницы бж҃їи, бл҃говѣ́рнїи кнѧ́же пе́тре и҆ кнѧги́не феѵрѡ́нїе, къ ва́мъ прибѣга́емъ и҆ къ ва́мъ со ᲂу҆пова́нїемъ крѣ́пкимъ мо́лимсѧ: вознеси́те ѡ҆ на́съ, грѣ́шныхъ (и҆́мⷬ҇къ), ст҃ы́ѧ моли̑твы ва́ши ко гдⷭ҇ꙋ бг҃ꙋ и҆ и҆спроси́те ᲂу҆ бла́гости є҆гѡ̀ всѧ̑ бл҃гопотрє́бнаѧ дꙋша́мъ и҆ тѣлесє́мъ на́шимъ: вѣ́рꙋ пра́вꙋ, наде́ждꙋ бла́гꙋ, любо́вь нелицемѣ́рнꙋ, бл҃гоче́стїе непоколеби́мѡ, въ до́брыхъ дѣ́лѣхъ преꙋспѣ́ѧнїе. и҆ хода́тайствꙋйте на́мъ ᲂу҆ цр҃ѧ̀ нбⷭ҇нагѡ житїѐ бл҃гополꙋ́чное и҆ до́брꙋю хрⷭ҇тїа́нскꙋю кончи́нꙋ. є҆́й, чꙋдотво́рцы ст҃і́и! не пре́зрите мл҃твъ на́шихъ, но бꙋ́дите ѡ҆ на́съ при́снїи предста́телїе ко гдⷭ҇ꙋ, и҆ сподо́бите на́съ по́мощїю ва́шею сп҃се́нїе вѣ́чное полꙋчи́ти и҆ црⷭ҇твїе нбⷭ҇ное ᲂу҆наслѣ́довати, да славосло́вимъ неизрече́нное чл҃вѣколю́бїе ѻ҆ц҃а̀ и҆ сн҃а и҆ ст҃а́гѡ дх҃а, въ трⷪ҇цѣ покланѧ́емагѡ бг҃а во вѣ́ки вѣкѡ́въ.

Благоверные князь Петр, в иночестве Давид, и княгиня Феврония, в иночестве Евфросиния, Муромские

Бла­го­вер­ный князь Петр был вто­рым сы­ном Му­ром­ско­го кня­зя Юрия Вла­ди­ми­ро­ви­ча. Он всту­пил на Му­ром­ский пре­стол в 1203 го­ду. За несколь­ко лет до это­го свя­той Петр за­бо­лел про­ка­зой, от ко­то­рой ни­кто не мог его из­ле­чить. В сон­ном ви­де­нии кня­зю бы­ло от­кры­то, что его мо­жет ис­це­лить дочь пче­ло­во­да, бла­го­че­сти­вая де­ва Фев­ро­ния, кре­стьян­ка де­рев­ни Лас­ко­вой в Ря­зан­ской зем­ле. Свя­той Петр по­слал в ту де­рев­ню сво­их лю­дей.

Ко­гда князь уви­дел свя­тую Фев­ро­нию, то так по­лю­бил ее за бла­го­че­стие, муд­рость и доб­ро­ту, что дал обет же­нить­ся на ней по­сле ис­це­ле­ния. Свя­тая Фев­ро­ния ис­це­ли­ла кня­зя и вы­шла за него за­муж. Свя­тые су­пру­ги про­нес­ли лю­бовь друг ко дру­гу через все ис­пы­та­ния. Гор­дые бо­яре не за­хо­те­ли иметь кня­ги­ню из про­сто­го зва­ния и по­тре­бо­ва­ли, чтобы князь от­пу­стил ее. Свя­той Петр от­ка­зал­ся, и су­пру­гов из­гна­ли. Они на лод­ке от­плы­ли по Оке из род­но­го го­ро­да. Свя­тая Фев­ро­ния под­дер­жи­ва­ла и уте­ша­ла свя­то­го Пет­ра. Но вско­ре го­род Му­ром по­стиг гнев Бо­жий, и на­род по­тре­бо­вал, чтобы князь вер­нул­ся вме­сте со свя­той Фев­ро­ни­ей.

Свя­тые су­пру­ги про­сла­ви­лись бла­го­че­сти­ем и ми­ло­сер­ди­ем. Скон­ча­лись они в один день и час 25 июня 1228 го­да, при­няв пе­ред этим мо­на­ше­ский по­стриг с име­на­ми Да­вид и Ев­фро­си­ния. Те­ла свя­тых бы­ли по­ло­же­ны в од­ном гро­бе.

Свя­тые Петр и Фев­ро­ния яв­ля­ют­ся об­раз­цом хри­сти­ан­ско­го су­пру­же­ства. Сво­и­ми мо­лит­ва­ми они низ­во­дят Небес­ное бла­го­сло­ве­ние на всту­па­ю­щих в брак.

См. так­же: "Па­мять свя­тых бла­го­вер­ных кня­зя Пет­ра и кня­ги­ни Фев­ро­нии, в ино­че­стве Да­ви­да и Ев­фро­си­нии, Му­ром­ских чу­до­твор­цев" в из­ло­же­нии свт. Ди­мит­рия Ро­стов­ско­го.