<?xml version="1.0" encoding="UTF-8" ?> <csml Language="CsmlCivil"> <Section Type="title"> <p Style="h4">А҆ка́ѳїстъ сщ҃енномч҃нкꙋ а҆нтѵ́пѣ, є҆пі́скопꙋ перга́мскомꙋ.</p> </Section> <Section Type="kondak"> <p Style="h4">Конда́къ а҃.</p> <p Style="p">Возбра́нный чꙋдотво́рче и҆ и҆зрѧ́дный недꙋ́гѡвъ цѣле́бниче, по да́ннѣй тѝ ѿ гдⷭ҇а бл҃года́ти, ꙗ҆́кѡ и҆мѣ́ѧй дерзнове́нїе къ пода́телю здра́вїѧ, ѿ всѧ́кихъ на́съ бѣ́дъ и҆ недꙋ́гѡвъ свободѝ, да зове́мъ тѝ:</p> <p Style="p">Ра́дꙋйсѧ, а҆нтѵ́по, ско́рый помо́щниче въ болѣ́знехъ на́шихъ.</p> </Section> <Section Type="ikos"> <p Style="h4">І҆́косъ а҃.</p> <p Style="p">А҆́гг҃лѡвъ и҆ всеѧ̀ тва̑ри содѣ́тель, ꙗ҆ви́вый тѧ̀ цр҃квѣ ст҃ѣ́й всесвѣ́тлаго свѣти́льника вѣ́ры и҆ за вѣ́рꙋ твердѣ́йшаго а҆дама́нта сщ҃енномч҃нка, наꙋча́етъ на́съ восхвалѧ́ти по́двиги твоѧ̑ и҆ воспѣва́ти тѧ̀, сщ҃енномч҃ниче а҆нтѵ́по, си́це:</p> <p Style="p">Ра́дꙋйсѧ, бг҃омꙋ́дрый наста́вниче правосла́вныѧ вѣ́ры: ра́дꙋйсѧ, ꙗ҆́кѡ и҆сточи́лъ є҆сѝ рѣ́ки ᲂу҆че́нїѧ, вѣ́рныхъ напаѧ́ющыѧ.</p> <p Style="p">Ра́дꙋйсѧ, ꙗ҆́кѡ мꙋ́тныѧ во́ды многобо́жїѧ потреби́лъ є҆сѝ: ра́дꙋйсѧ, ꙗ҆́кѡ де́монѡмъ слꙋжа́щїѧ чествова́ти бг҃а и҆́стиннаго наꙋчи́лъ є҆сѝ.</p> <p Style="p">Ра́дꙋйсѧ, ꙗ҆́кѡ и҆з̾ глꙋбины̀ безбо́жїѧ и҆звле́клъ є҆сѝ заблꙋ́ждшїѧ человѣ́ки и҆ наста́вилъ є҆сѝ и҆́хъ на пꙋ́ть сп҃се́нїѧ: ра́дꙋйсѧ, ꙗ҆́кѡ дрема́нїемъ нече́стїѧ ѡ҆держи́мыѧ возбꙋди́лъ є҆сѝ къ ра́зꙋмꙋ и҆́стиннагѡ бг҃овѣ́дѣнїѧ.</p> <p Style="p">Ра́дꙋйсѧ, а҆нтѵ́по, ско́рый помо́щниче въ болѣ́знехъ на́шихъ.</p> </Section> <Section Type="kondak"> <p Style="h4">Конда́къ в҃.</p> <p Style="p">Ви́дѧ лю́тое гоне́нїе непра́ведныхъ на бл҃гочести́выѧ хрⷭ҇тїа́ны, не ᲂу҆боѧ́лсѧ є҆сѝ преще́нїѧ и҆́хъ и҆ мꙋчи́тельства, бг҃оизбра́нне, но дерзнове́ннѡ пред̾ лицє́мъ и҆̀хъ и҆́стиннаго бг҃а и҆сповѣ́далъ є҆сѝ, вразꙋмлѧ́ѧ тѣ́хъ ѡ҆брати́тисѧ ѿ сꙋ́етныхъ і҆́дѡлъ ко хрⷭ҇тꙋ̀ сп҃си́телю и҆ вы́нꙋ пѣ́ти є҆мꙋ̀: А҆ллилꙋ́їа.</p> </Section> <Section Type="ikos"> <p Style="h4">І҆́косъ в҃.</p> <p Style="p">Средѝ ꙗ҆зы̑къ, сѣдѧ́щихъ во тмѣ̀ и҆ сѣ́ни сме́ртнѣй, сохрани́въ непоро́чность житїѧ̀ твоегѡ̀, свѧ́тѣ а҆нтѵ́по, а҆́гг҃лѡмъ сожи́тель бы́ти сподо́билсѧ є҆сѝ и҆ съ ни́ми воспѣва́ти трⷪ҇ческꙋю пѣ́снь бг҃ꙋ на нб҃сѝ. ᲂу҆слы́ши на́съ, пою́щихъ тѝ на землѝ похва̑льнаѧ пѣ̑нїѧ сїѧ̑:</p> <p Style="p">Ра́дꙋйсѧ, житїю̀ безпло́тныхъ поревнова́вый: ра́дꙋйсѧ, чистото́ю а҆́гг҃лѡмъ ᲂу҆подо́бивыйсѧ.</p> <p Style="p">Ра́дꙋйсѧ, во пло́ти ꙗ҆ви́выйсѧ а҆́ки безпло́тенъ: ра́дꙋйсѧ, въ тѣ́лѣ пожи́вый дꙋхо́внѡ, на землѝ небе́снѡ.</p> <p Style="p">Ра́дꙋйсѧ, нбⷭ҇ный чл҃вѣ́че: ра́дꙋйсѧ, земны́й а҆́гг҃ле.</p> <p Style="p">Ра́дꙋйсѧ, а҆нтѵ́по, ско́рый помо́щниче въ болѣ́знехъ на́шихъ.</p> </Section> <Section Type="kondak"> <p Style="h4">Конда́къ г҃.</p> <p Style="p">Си́лою бл҃года́ти бж҃їей, є҆щѐ сы́й въ тѣлесѝ возсїѧ́лъ є҆сѝ ꙗ҆́кѡ со́лнце, всѣ́хъ просвѣща́ѧ и҆ разгонѧ́ѧ глꙋбо́кꙋю но́щь безбо́жїѧ. сегѡ̀ ра́ди почита́ѧ тѧ̀ ꙗ҆́кѡ сопресто́льника а҆пⷭ҇лѡвъ и҆ цѣле́бъ пода́телѧ воспѣва́емъ бг҃ꙋ: А҆ллилꙋ́їа.</p> </Section> <Section Type="ikos"> <p Style="h4">І҆́косъ г҃.</p> <p Style="p">И҆мѣ́ѧ неꙋсы́пное попече́нїе ѡ҆ сп҃се́нїи дꙋ́шъ во тмѣ̀ і҆дѡлослꙋже́нїѧ погиба́ющихъ, бг҃омꙋ́дре а҆нтѵ́по, не престава́лъ є҆сѝ призыва́ти тѣ́хъ къ бг҃оꙋго́днѣй жи́зни, подава́ѧ собо́ю примѣ́ръ соверше́ннагѡ бл҃гоче́стїѧ хрⷭ҇тїа́нскагѡ: сегѡ̀ ра́ди ᲂу҆се́рднѡ прино́симъ тѝ похвалы̑ сїѧ̑:</p> <p Style="p">Ра́дꙋйсѧ, ѻ҆́бразе житїѧ̀ првⷣнагѡ: ра́дꙋйсѧ, ᲂу҆каза́телю невѣ̑рнымъ стезѝ, ведꙋ́щей къ нб҃сѝ.</p> <p Style="p">Ра́дꙋйсѧ, вѣ̑рнымъ ко сп҃се́нїю пꙋтеводи́телю: ра́дꙋйсѧ, прилѣ́жный вразꙋми́телю заблꙋ́ждшихъ.</p> <p Style="p">Ра́дꙋйсѧ, во ѡ҆браще́нїи і҆дѡлопокло́нникѡвъ къ вѣ́рѣ во хрⷭ҇та̀ ꙗ҆ви́вый самоѿверже́нїе всецѣ́лое: ра́дꙋйсѧ, а҆рхїере́ю бж҃їй, до́брѣ ᲂу҆па́сшїй слове́сное ста́до твоѐ.</p> <p Style="p">Ра́дꙋйсѧ, а҆нтѵ́по, ско́рый помо́щниче въ болѣ́знехъ на́шихъ.</p> </Section> <Section Type="kondak"> <p Style="h4">Конда́къ д҃.</p> <p Style="p">Ве́лїѧ бꙋ́рѧ ꙗ҆́рости дометїа́на, ды́шꙋщагѡ ᲂу҆бі́йствомъ, возшꙋмѣ̀ на хра́мъ дꙋшѝ твоеѧ̀, ст҃е а҆нтѵ́по, но того̀ не возмо́же поколеба́ти, ѡ҆снова́нъ бо бѣ̀ на тве́рдомъ вѣ́ры хрⷭ҇то́вы ка́мени, на не́мже ты̀, бг҃оизбра́нне, неподви́жнѡ пребыва́ѧ, ᲂу҆крѣплѧ́ющемꙋ тѧ̀ гдⷭ҇ꙋ і҆и҃сꙋ воспѣва́лъ є҆сѝ: А҆ллилꙋ́їа.</p> </Section> <Section Type="ikos"> <p Style="h4">І҆́косъ д҃.</p> <p Style="p">Слы́шавше ѿ тебє̀ нечести́вый и҆ге́мѡнъ и҆ жрецы̀ і҆́дѡльстїи словеса̀ премꙋ́дрости, распыха́хꙋсѧ на тѧ̀ ѕло́бою, па́че же є҆гда̀ ре́клъ є҆сѝ: є҆ди́но то̀ вѣ́ждь, ѽ и҆ге́мѡне, ꙗ҆́кѡ хрⷭ҇тїа́нинъ а҆́зъ є҆́смь, ца́рскомꙋ же велѣ́нїю безꙋ́мномꙋ и҆ нечести́вомꙋ повинꙋ́тисѧ ѿню́дь не и҆зволѧ́ю. сїѐ ᲂу҆́бѡ воспомина́ѧ, взыва́емъ тѝ си́це:</p> <p Style="p">Ра́дꙋйсѧ, вѣ́рꙋ во хрⷭ҇та̀ до сме́рти сохрани́вый до́брѣ: ра́дꙋйсѧ, си́лою свы́ше на бра́нь проти́вꙋ мꙋчи́телей препоѧ́санный.</p> <p Style="p">Ра́дꙋйсѧ, побѣдоно́сною сла́вою ѿ хрⷭ҇та̀ побѣди́телѧ ѡ҆блече́нный: ра́дꙋйсѧ, а҆пⷭ҇лѡвъ во и҆сповѣ́данїи хрⷭ҇та̀ подража́телю.</p> <p Style="p">Ра́дꙋйсѧ, страстє́мъ хрⷭ҇то́вымъ соприча́стниче: ра́дꙋйсѧ, кро́вїю свое́ю ᲂу҆тверди́вый правовѣ́рїе.</p> <p Style="p">Ра́дꙋйсѧ, а҆нтѵ́по, ско́рый помо́щниче въ болѣ́знехъ на́шихъ.</p> </Section> <Section Type="kondak"> <p Style="h4">Конда́къ є҃.</p> <p Style="p">Бг҃ото́чный и҆сто́чникъ ди́вныхъ чꙋде́съ ꙗ҆ви́лсѧ є҆сѝ, достосла́вне а҆нтѵ́по: прїѧ́лъ є҆сѝ ѿ гдⷭ҇а да́ръ недꙋ́ги врачева́ти, да позна́ютъ невѣ́рꙋющїе бг҃а, ꙗ҆́вѣ тобо́ю чꙋдодѣ́йствꙋюща, и҆ воспою́тъ є҆мꙋ̀: А҆ллилꙋ́їа.</p> </Section> <Section Type="ikos"> <p Style="h4">І҆́косъ є҃.</p> <p Style="p">Ви́дѣвше лю́дїе гра́да перга́ма, ꙗ҆́кѡ даде́сѧ тѝ бл҃года́ть немощны́хъ и҆сцѣлѧ́ти, и҆ ѿ всѧ́кихъ тѣле́сныхъ и҆ дꙋше́вныхъ скорбе́й и҆збавлѧ́ти, ᲂу҆диви́шасѧ. мы́ же за мнѡ́гаѧ и҆сцѣлє́нїѧ тобо́ю на ны̀ и҆злива̑емаѧ, ᲂу҆блажа́емъ тѧ̀ похвала́ми си́ми:</p> <p Style="p">Ра́дꙋйсѧ, болѧ́щихъ и҆сцѣле́нїе: ра́дꙋйсѧ, разсла́бленныхъ ᲂу҆крѣпле́нїе.</p> <p Style="p">Ра́дꙋйсѧ, недꙋ́гꙋющихъ врачꙋ̀ бл҃года́тный: ра́дꙋйсѧ, скорбѧ́щымъ непосты́дное прибѣ́жище.</p> <p Style="p">Ра́дꙋйсѧ, ꙗ҆́кѡ тобо́ю ѿ мно́гихъ ра́нъ грѣ́шнїи и҆сцѣлѧ́ютсѧ: ра́дꙋйсѧ, ꙗ҆́кѡ тобо́ю ѿ всѧ́кихъ болѣ́зней съ вѣ́рою призыва́ющїи тѧ̀ и҆збавлѧ́ютсѧ.</p> <p Style="p">Ра́дꙋйсѧ, а҆нтѵ́по, ско́рый помо́щниче въ болѣ́знехъ на́шихъ.</p> </Section> <Section Type="kondak"> <p Style="h4">Конда́къ ѕ҃.</p> <p Style="p">Проповѣ́дникѡмъ и҆́стины, хрⷭ҇то́вымъ а҆пⷭ҇лѡмъ поревнова́въ, не ᲂу҆боѧ́лсѧ є҆сѝ ѕвѣронра́вныхъ мꙋчи́телей, не ᲂу҆жаснꙋ́лсѧ є҆сѝ преще́нїѧ, но со дерзнове́нїемъ проповѣ́далъ є҆сѝ и҆́мъ хрⷭ҇та̀ бг҃а, є҆го́же ра́ди въ разжже́нъ сосꙋ́дъ мѣ́дѧнъ вве́рженъ бы́лъ є҆сѝ, да просла́витсѧ тебє̀ ра́ди ди́вный во ст҃ы́хъ гдⷭ҇ь, є҆мꙋ́же ты̀ и҆ въ ѻ҆гнѝ взыва́лъ є҆сѝ: А҆ллилꙋ́їа.</p> </Section> <Section Type="ikos"> <p Style="h4">І҆́косъ ѕ҃.</p> <p Style="p">И҆мѣ́ѧ ве́лїю ре́вность ѡ҆ лю́дѣхъ бж҃їихъ, ты̀ болѣ́зновалъ є҆сѝ ѡ҆ погрѧ́зшихъ въ бе́зднѣ і҆дѡлопокло́нства, и҆ ра́ди сп҃се́нїѧ невѣ́рныхъ гото́въ бы́лъ є҆сѝ, ꙗ҆́кѡже бжⷭ҇твенный па́ѵелъ, са́мъ ѿлꙋче́нъ бы́ти ѿ хрⷭ҇та̀, возлю́бленнагѡ тобо́ю. сегѡ̀ ра́ди со ᲂу҆миле́нїемъ взыва́емъ тѝ си́це:</p> <p Style="p">Ра́дꙋйсѧ, ѻ҆тцꙋ̀ вѣ́рꙋющихъ а҆враа́мꙋ въ хода́тайствѣ ѡ҆ грѣ́шницѣхъ подража́вый: ра́дꙋйсѧ, бг҃ови́дцꙋ мѡѷсе́ю въ пла́меннѣй моли́твѣ ѡ҆ спасе́нїи невѣ́рꙋющихъ поревнова́вый.</p> <p Style="p">Ра́дꙋйсѧ, но́вый самꙋи́лѣ, въ мл҃твѣ ѡ҆ беззако́нницѣхъ гл҃го́лавый: не бꙋ́ди мнѣ̀, є҆́же не вопи́ти ѡ҆ ва́съ съ моле́нїемъ ко гдⷭ҇ꙋ: ра́дꙋйсѧ, подража́телю а҆рхїдїа́кона стефа́на, во вре́мѧ страда́нїѧ въ мѣ́дѧномъ волѣ̀ ѡ҆ мꙋчи́телѣхъ сотвори́вый сицевꙋ́ю мл҃твꙋ: гдⷭ҇и! не поста́ви и҆́мъ грѣха̀ сегѡ̀.</p> <p Style="p">Ра́дꙋйсѧ, ꙗ҆́кѡ неѕло́бивъ сы́й, за ᲂу҆бива́ющихъ тѧ̀ моли́лсѧ є҆сѝ, ꙗ҆́кѡ за бл҃готво́рцевъ: ра́дꙋйсѧ, па́стырю любвеѡби́льный, положи́вый дꙋ́шꙋ свою̀ за словє́сныѧ ѻ҆́вцы твоѧ̑.</p> <p Style="p">Ра́дꙋйсѧ, а҆нтѵ́по, ско́рый помо́щниче въ болѣ́знехъ на́шихъ.</p> </Section> <Section Type="kondak"> <p Style="h4">Конда́къ з҃.</p> <p Style="p">Хотѧ́щꙋ беззако́нномꙋ мꙋчи́телю ле́стными словесы̀ ѿврати́ти тѧ̀, а҆нтѵ́по, ѿ и҆́стиннагѡ бг҃а ко і҆́дѡлѡмъ бездꙋ́шнымъ, ты̀, бг҃омꙋ́дре, ѿвѣща́лъ є҆сѝ: прише́дъ въ послѣ́днюю ста́рость и҆ къ сме́рти прибли́живсѧ, не и҆змѣню̀ вѣ́ры моеѧ̀ въ і҆и҃са хрⷭ҇та̀, бг҃а моего̀, є҆мꙋ́же со ѻ҆ц҃е́мъ и҆ ст҃ы́мъ дх҃омъ при́снѡ пою̀ и҆ во вѣ́ки вѣкѡ́въ и҆́мамъ пѣ́ти: А҆ллилꙋ́їа.</p> </Section> <Section Type="ikos"> <p Style="h4">І҆́косъ з҃.</p> <p Style="p">Но́вое чꙋ́до показа̀ гдⷭ҇ь тобо́ю, є҆гда́ ты по велѣ́нїю ѕлочести́вагѡ мꙋчи́телѧ вве́рженъ бы́лъ є҆сѝ въ разжже́нъ мѣ́дѧнъ коно́бъ, въ не́мже ꙗ҆́кѡ хлѣ́бъ сла́дкїй и҆спе́клсѧ є҆сѝ и҆ въ воню̀ бл҃гоꙋха́нїѧ свѧтѣ́й трⷪ҇цѣ прине́слсѧ є҆сѝ. Бл҃гоговѣ́йнѣ ᲂу҆́бѡ воспомина́ѧ сїѐ преве́лїе терпѣ́нїе твоѐ, блажи́мъ тѧ̀ похвала́ми си́ми:</p> <p Style="p">Ра́дꙋйсѧ, позо́рищнымъ вверже́нїемъ въ разжже́нный сосꙋ́дъ горды́ню мꙋчи́телѧ низложи́вый: ра́дꙋйсѧ, ꙗ҆́кѡ ѻ҆́гнь любвѐ къ бг҃ꙋ въ се́рдцѣ твое́мъ до конца̀ жи́зни сохрани́вый.</p> <p Style="p">Ра́дꙋйсѧ, ꙗ҆́кѡ хрⷭ҇та̀ ра́ди ѻ҆гне́мъ кончи́нꙋ прїѧ́вый: ра́дꙋйсѧ, твердѣ́е ка́мене въ терпѣ́нїи ꙗ҆ви́выйсѧ.</p> <p Style="p">Ра́дꙋйсѧ, ꙗ҆́кѡ ᲂу҆крѣплѧ́емый хрⷭ҇то́мъ бг҃омъ, пресла́внѡ жи́знь на землѝ сконча́лъ є҆сѝ: ра́дꙋйсѧ, пресвѣ́тломꙋ мч҃ническомꙋ ли́кꙋ сопричте́нный.</p> <p Style="p">Ра́дꙋйсѧ, а҆нтѵ́по, ско́рый помо́щниче въ болѣ́знехъ на́шихъ.</p> </Section> <Section Type="kondak"> <p Style="h4">Конда́къ и҃.</p> <p Style="p">Стра́ннѡ бѣ̀ ви́дѣти ꙗ҆зы́комъ, невѣ́дꙋщимъ бж҃їей си́лы, ка́кѡ въ сла́бомъ ста́рческомъ тѣ́лѣ возмо́глъ є҆сѝ, ст҃и́телю а҆нтѵ́по, претерпѣ́ти за хрⷭ҇та̀ лютѣ́йшїѧ мꙋ̑ки. мы́ же, благодарѧ̀ ѡ҆ се́мъ бг҃а, дарова́вшаго тѝ таковꙋ́ю крѣ́пость, съ любо́вїю взыва́емъ: А҆ллилꙋ́їа.</p> </Section> <Section Type="ikos"> <p Style="h4">І҆́косъ и҃.</p> <p Style="p">Ве́сь пре́данъ бы́лъ є҆сѝ і҆и҃сꙋ пресла́дкомꙋ, ст҃и́телю а҆нтѵ́по, и҆ сла́дцѣ є҆гѡ̀ ра́ди го́рькїѧ мꙋ̑ки въ ѻ҆гнѝ претерпѣ́лъ є҆сѝ, глаго́лалъ бо є҆сѝ: ча́шꙋ страда́нїй, ю҆́же даде́ ми гдⷭ҇ь, не и҆́мамъ ли пи́ти; тѣ́мже и҆ са́мъ показа́лсѧ є҆сѝ а҆́ки ча́ша, сла́дость чꙋде́сныхъ и҆сцѣле́нїй и҆злива́ющаѧ, всѣ̑мъ вопїю́щымъ къ тебѣ̀ такова̑ѧ:</p> <p Style="p">Ра́дꙋйсѧ, все́ю дꙋше́ю возлюби́вый і҆и҃са пресла́дкаго: ра́дꙋйсѧ, па́стырю, словє́снымъ ѻ҆вца́мъ во свѧта́ѧ свѧты́хъ пꙋ́ть показа́вый.</p> <p Style="p">Ра́дꙋйсѧ, рѣко̀, ѡ҆роша́ющаѧ мі́ръ вода́ми бл҃года́ти бж҃їей: ра́дꙋйсѧ, неисчерпа́емый и҆сто́чниче чꙋде́сныхъ и҆сцѣле́нїй.</p> <p Style="p">Ра́дꙋйсѧ, сосꙋ́де, на всѧ̑ недꙋ̑ги врачєва́нїѧ неѡскꙋ́днѡ и҆злива́ющїй: ра́дꙋйсѧ, ꙗ҆́кѡ гдⷭ҇ь си́лъ ди́внаѧ на тебѣ̀ ꙗ҆ви́лъ є҆́сть.</p> <p Style="p">Ра́дꙋйсѧ, а҆нтѵ́по, ско́рый помо́щниче въ болѣ́знехъ на́шихъ.</p> </Section> <Section Type="kondak"> <p Style="h4">Конда́къ ѳ҃.</p> <p Style="p">Всѧ́кꙋю стѧжа́лъ є҆сѝ чꙋдодѣ́йствїѧ си́лꙋ бл҃года́тїю ди́внагѡ во ст҃ы́хъ свои́хъ бг҃а, свѧти́телю а҆нтѵ́по: не то́кмѡ бо мл҃твами твои́ми ᲂу҆страши́лъ є҆сѝ бѣ́сы, но и҆ соверше́ннѡ и҆з̾ гра́да перга́ма и҆згна́лъ є҆сѝ ѧ҆̀. воспомина́ѧ сїю̀ побѣ́дꙋ твою̀ над̾ ѕлы́ми дꙋ̑хи, бл҃года́рнѣ вопїе́мъ бг҃ꙋ: А҆ллилꙋ́їа.</p> </Section> <Section Type="ikos"> <p Style="h4">І҆́косъ ѳ҃.</p> <p Style="p">Виті́йство человѣ́ческое не довлѣ́етъ и҆зрещѝ, коли́кꙋю прїѧ́лъ є҆сѝ, свѧ́тѣ а҆нтѵ́по, ѿ гдⷭ҇а вла́сть и҆згонѧ́ти ѿ люде́й дїа́вола съ лꙋка́выми де́моны, за є҆́же мы̀ восхвалѧ́емъ тѧ̀ си́це:</p> <p Style="p">Ра́дꙋйсѧ, всѧ́ческихъ ко́зней дїа́вола разрꙋши́телю: ра́дꙋйсѧ, сатаны̀ посрами́телю.</p> <p Style="p">Ра́дꙋйсѧ, стꙋжа́емыхъ ѿ бѣсѡ́въ свободи́телю: ра́дꙋйсѧ, де́монѡвъ ѿгна́телю.</p> <p Style="p">Ра́дꙋйсѧ, те́мныхъ а҆́дскихъ си́лъ ᲂу҆страши́телю: ра́дꙋйсѧ, ѿ негѡ́же дꙋ̑хи ѕло́бы, ꙗ҆́кѡже ды́мъ, и҆счеза́ютъ.</p> <p Style="p">Ра́дꙋйсѧ, а҆нтѵ́по, ско́рый помо́щниче въ болѣ́знехъ на́шихъ.</p> </Section> <Section Type="kondak"> <p Style="h4">Конда́къ і҃.</p> <p Style="p">Спастѝ хотѧ̀ дꙋ́шꙋ твою̀, презрѣ́лъ є҆сѝ пло́ть и҆ не ᲂу҆боѧ́лсѧ є҆сѝ ѿ ᲂу҆бива́ющихъ тѣ́ло, свѧ́тѣ а҆нтѵ́по, є҆гда̀ бо ᲂу҆слы́шалъ є҆сѝ ѡ҆сꙋжде́нїе на сожже́нїе въ мѣ́дѧномъ волѣ̀, ты̀ ра́достнѡ прїѧ́лъ є҆сѝ ѻ҆́ное, воспѣва́ѧ гдⷭ҇еви: Аллилꙋ́їа.</p> </Section> <Section Type="ikos"> <p Style="h4">І҆́косъ і҃.</p> <p Style="p">Стѣна̀ є҆сѝ ѡ҆гражда́ющаѧ ѿ всѧ́кихъ ѕѡ́лъ ᲂу҆се́рднѡ тѧ̀ въ по́мощь призыва́ющихъ, свѧ́тѣ а҆нтѵ́по, не то́кмѡ бо во а҆сі́и живꙋ́щымъ, но и҆ во всѣ́хъ мѣ́стѣхъ сꙋ́щимъ хрⷭ҇тїа́нѡмъ твое́ю дѣ́йственною мл҃твою подае́ши дꙋхо́внаѧ дарова̑нїѧ: и҆́хже ра́ди и҆ мы̀, ѻ҆́ч҃е ст҃ы́й, ᲂу҆блажа́емъ тѧ̀ си́це:</p> <p Style="p">Ра́дꙋйсѧ, сосꙋ́де, и҆сточа́ѧй є҆ле́й бж҃їѧ млⷭ҇рдїѧ: ра́дꙋйсѧ, живоно́сный и҆сто́чниче, стрꙋи̑ и҆сцѣле́нїй и҆злива́ющий на́мъ.</p> <p Style="p">Ра́дꙋйсѧ, ско́рый возста́вителю здра́вїѧ въ не́мощи лежа́щихъ: ра́дꙋйсѧ, всѣ́хъ лю́тыхъ болѣ́зней, па́че же лю́тыѧ зꙋбны́ѧ болѣ̑зни, цѣли́телю.</p> <p Style="p">Ра́дꙋйсѧ, безме́здный врачꙋ̀ болѣ̑зни дꙋшє́вныѧ и҆ тѣлє́сныѧ: ра́дꙋйсѧ, пода́телю врачева́нїй всѣ̑мъ, притека́ющымъ къ тебѣ̀ съ вѣ́рою.</p> <p Style="p">Ра́дꙋйсѧ, а҆нтѵ́по, ско́рый помо́щниче въ болѣ́знехъ на́шихъ.</p> </Section> <Section Type="kondak"> <p Style="h4">Конда́къ а҃і.</p> <p Style="p">Пѣ́нїе бл҃гопрїѧ́тное прест҃ѣ́й трⷪ҇цѣ прине́слъ є҆сѝ, досто́йный прее́мниче а҆пⷭ҇лѡвъ, а҆нтѵ́по, не то́чїю ᲂу҆мо́мъ, сло́вомъ и҆ дꙋ́хомъ, но живы́мъ всегѡ̀ себѧ̀ въ же́ртвꙋ принесе́нїемъ. тѣ́мъ же, а҆́ще и҆ не дово́льны є҆смы̀ къ похвале́нїю таковы́хъ твои́хъ по́двигѡвъ, ѻ҆ба́че бл҃года́рни сꙋ́щи, пое́мъ ди́вномꙋ во ст҃ы́хъ бг҃ꙋ: А҆ллилꙋ́їа.</p> </Section> <Section Type="ikos"> <p Style="h4">І҆́косъ а҃і</p> <p Style="p">Свѣтоза́рный свѣти́льникъ, ѿ и҆́стиннагѡ свѣ́та ѡ҆зарѧ́емый, сꙋ́щимъ на землѝ ꙗ҆влѧ́ешисѧ, равноапⷭ҇льный а҆нтѵ́по, просвѣща́еши бо се́рдца вѣ́рныхъ и҆ къ ра́зꙋмꙋ бжⷭ҇твенномꙋ всѧ̑ наставлѧ́еши, поꙋча́ѧ и҆ на́съ со ᲂу҆миле́нїемъ взыва́ти:</p> <p Style="p">Ра́дꙋйсѧ, зарѐ бж҃їѧ свѣ́та: ра́дꙋйсѧ, денни́цѣ со́лнца пра́вды.</p> <p Style="p">Ра́дꙋйсѧ, сїѧ́нїе є҆ѵⷢ҇льскагѡ ᲂу҆че́нїѧ: ра́дꙋйсѧ, свѣти́ло нбⷭ҇нагѡ блиста́нїѧ.</p> <p Style="p">Ра́дꙋйсѧ, просвѣща́ѧй дꙋ́ши вѣ́рныхъ: ра́дꙋйсѧ, ѡ҆зарѧ́ѧй сердца̀ и҆́щꙋщихъ пра́вды.</p> <p Style="p">Ра́дꙋйсѧ, а҆нтѵ́по, ско́рый помо́щниче въ болѣ́знехъ на́шихъ.</p> </Section> <Section Type="kondak"> <p Style="h4">Конда́къ в҃і.</p> <p Style="p">Бл҃года́ть, да́ннꙋю тѝ ѿ бг҃а вѣ́дꙋще, ра́достнѡ и҆́мѧ твоѐ воспомина́емъ, свѧти́телю а҆нтѵ́по, и҆ съ те́плымъ моле́нїемъ къ всечестно́мꙋ ѡ҆́бразꙋ твоемꙋ̀ притека́юще, прилѣ́жнѡ мо́лимъ тѧ̀: пода́ждь цѣльбꙋ̀ стра́ждꙋщымъ лю́тою зꙋбно́ю болѣ́знїю и҆ и҆зба́ви всѣ́хъ на́съ ѿ всѧ́кїѧ нꙋ́жды и҆ печа̑ли, да пое́мъ бг҃ꙋ: А҆ллилꙋ́їа.</p> </Section> <Section Type="ikos"> <p Style="h4">І҆́косъ в҃і.</p> <p Style="p">Сла́внꙋю кончи́нꙋ твою̀ пою́ще, а҆рхїере́ю бж҃їй, и҆ те́плꙋю мл҃твꙋ твою̀ къ бг҃ꙋ ѡ҆ хрⷭ҇тїа́нахъ воспомина́юще, восхвалѧ́емъ гдⷭ҇а си́лъ, ди́внаѧ на тебѣ̀ сотво́ршагѡ: ты́ же ᲂу҆слы́ши на́съ, ᲂу҆ми́льнѡ вопїю́щихъ тѝ:</p> <p Style="p">Ра́дꙋйсѧ, те́плый пред̾ гдⷭ҇емъ ѡ҆ на́съ моли́твенниче: ра́дꙋйсѧ, при́сный пред̾ бг҃омъ на́шъ застꙋ́пниче.</p> <p Style="p">Ра́дꙋйсѧ, до́брый на́шъ наста́вниче: ра́дꙋйсѧ, ѡ҆ спасе́нїи на́съ грѣ́шныхъ си́льный хода́таю.</p> <p Style="p">Ра́дꙋйсѧ, цр҃ѧ̀ нбⷭ҇нагѡ ско́рый ᲂу҆милостиви́телю: ра́дꙋйсѧ, бл҃госе́рдый помо́щниче всѣ́хъ бл҃гоче́стнѡ соверша́ющихъ па́мѧть твою̀.</p> <p Style="p">Ра́дꙋйсѧ, а҆нтѵ́по, ско́рый помо́щниче въ болѣ́знехъ на́шихъ.</p> </Section> <Section Type="kondak"> <p Style="h4">Конда́къ г҃і.</p> <p Style="p">Ѽ, пресла́вный и҆ всехва́льный сщ҃енномч҃ниче а҆нтѵ́по! прїимѝ сїѐ похва́льное пѣ́нїе ѿ на́съ недосто́йныхъ во ᲂу҆миле́нїи тебѣ̀ приноси́мое, и҆ бг҃опрїѧ́тнымъ твои́мъ хода́тайствомъ ᲂу҆молѝ гдⷭ҇а дарова́ти болѧ́щымъ здра́вїе дꙋше́вное и҆ тѣле́сное, и҆зба́вити всѣ́хъ на́съ ѿ бѣ́дъ и҆ напа́стей въ жи́зни сѣ́й, по сме́ртномъ же ᲂу҆спе́нїи на́шемъ, въ де́нь стра́шнагѡ сꙋда̀ ѡ҆деснꙋ́ю пра́веднагѡ сꙋдїѝ ста́ти и҆ въ црⷭ҇твїи сла́вы є҆мꙋ̀ воспѣва́ти: А҆ллилꙋ́їа.</p> <p Style="comment">Се́й конда́къ глаго́ли три́жды, посе́мъ а҃-й і҆́косъ и҆ а҃-й конда́къ.</p> </Section> <Section Type="prayer"> <p Style="h4">Моли́тва.</p> <p Style="p">Ѽ, пресла́вный сщ҃енномч҃ниче а҆нтѵ́по, ско́рый помо́щниче хрⷭ҇тїа́нѡмъ въ болѣ́знехъ! вѣ́рꙋю ѿ всеѧ̀ дꙋшѝ и҆ помышле́нїѧ, ꙗ҆́кѡ даде́сѧ тебѣ̀ ѿ гдⷭ҇а да́ръ болѧ́щыѧ и҆сцѣлѧ́ти, недꙋ́гꙋющыѧ врачева́ти и҆ разсла́бленныѧ ᲂу҆крѣплѧ́ти. сегѡ̀ ра́ди къ тебѣ̀, ꙗ҆́кѡ бл҃года́тномꙋ врачꙋ̀ болѣ́зней, а҆́зъ немощны́й [немощна́ѧ] прибѣга́ю и҆ тво́й досточти́мый ѡ҆́бразъ съ бл҃гоговѣ́нїемъ лобыза́ѧ, молю́сѧ: твои́мъ предста́тельствомъ ᲂу҆ цр҃ѧ̀ нбⷭ҇нагѡ и҆спросѝ мнѣ̀ болѧ́щемꙋ [болѧ́щей] и҆сцѣле́нїе ѿ ᲂу҆дрꙋча́ющїѧ мѧ̀ зꙋбны́ѧ болѣ̑зни, а҆́ще бо и҆ недосто́инъ [недосто́йна] є҆́смь тебѣ̀, бл҃гостнѣйшаго ѻ҆тца̀ и҆ при́снаго застꙋ́пника моего̀, но ты̀, бы́въ подража́тель человѣколю́бїѧ бж҃їѧ, сотворѝ мѧ̀ досто́йна [досто́йнꙋ] твоегѡ̀ застꙋпле́нїѧ чрез̾ моѐ ѡ҆браще́нїе ѿ ѕлы́хъ дѣ́лъ къ бл҃го́мꙋ житїю̀, ᲂу҆врачꙋ́й ѡ҆би́льнѡ дарова́нною тебѣ̀ бл҃года́тїю ꙗ҆́звы и҆ стрꙋ́пы дꙋшѝ и҆ тѣ́ла моегѡ̀, да́рꙋй мѝ здра́вїе и҆ спасе́нїе и҆ во всѣ̑мъ бл҃го́е поспѣше́нїе, да та́кѡ ти́хое и҆ безмо́лвное житїѐ пожи́въ во всѧ́комъ бл҃гоче́стїи и҆ чистотѣ̀, сподо́блюсѧ со всѣ́ми свѧты́ми сла́вити всесвѧто́е и҆́мѧ ѻ҆ц҃а̀ и҆ сн҃а и҆ ст҃а́гѡ дх҃а. А҆ми́нь.</p> </Section> </csml>