Акафист священномученику Антипе, епископу Пергамскому

Конда́к 1.

Возбра́нный чудотво́рче и изря́дный неду́гов целе́бниче, по да́нней ти́ от Го́спода благода́ти, я́ко име́яй дерзнове́ние к Пода́телю здра́вия, от вся́ких на́с бе́д и неду́гов свободи́, да зове́м ти́:

Ра́дуйся, Анти́по, ско́рый помо́щниче в боле́знех на́ших.

И́кос 1.

А́нгелов и всея́ тва́ри Соде́тель, яви́вый тя́ Це́ркве Святе́й всесве́тлаго свети́льника ве́ры и за ве́ру тверде́йшаго адама́нта священному́ченика, науча́ет на́с восхваля́ти по́двиги твоя́ и воспева́ти тя́, священному́чениче Анти́по, си́це:

Ра́дуйся, богому́дрый наста́вниче правосла́вныя ве́ры; ра́дуйся, я́ко источи́л еси́ ре́ки уче́ния, ве́рных напая́ющия.

Ра́дуйся, я́ко му́тныя во́ды многобо́жия потреби́л еси́; ра́дуйся, я́ко де́моном служа́щия чествова́ти Бо́га И́стиннаго научи́л еси́.

Ра́дуйся, я́ко из глубины́ безбо́жия извле́кл еси́ заблу́ждшия челове́ки и наста́вил еси́ и́х на пу́ть спасе́ния; ра́дуйся, я́ко дрема́нием нече́стия одержи́мыя возбуди́л еси́ к ра́зуму и́стиннаго Богове́дения.

Ра́дуйся, Анти́по, ско́рый помо́щниче в боле́знех на́ших.

Конда́к 2.

Ви́дя лю́тое гоне́ние непра́ведных на благочести́выя христиа́ны, не убоя́лся еси́ преще́ния и́х и мучи́тельства, богоизбра́нне но дерзнове́нно пред лице́м и́х и́стиннаго Бо́га испове́дал еси́, вразумля́я те́х обрати́тися от су́етных и́дол ко Христу́ Спаси́телю и вы́ну пе́ти Ему́: Аллилу́иа.

И́кос 2.

Среди́ язы́к, седя́щих во тьме́ и се́ни сме́ртней, сохрани́в непоро́чность жития́ твоего́, свя́те Анти́по, А́нгелом сожи́тель бы́ти сподо́бился еси́ и с ни́ми воспева́ти Тро́ическую пе́снь Бо́гу на Небеси́. Услы́ши на́с, пою́щих ти́ на земли́ похва́льная пе́ния сия́:

Ра́дуйся, житию́ безпло́тных поревнова́вый; ра́дуйся, чистото́ю А́нгелом уподо́бивыйся.

Ра́дуйся, во пло́ти яви́выйся а́ки безпло́тен; ра́дуйся, в те́ле пожи́вый духо́вно, на земли́ небе́сно.

Ра́дуйся, небе́сный челове́че; ра́дуйся, земны́й А́нгеле.

Ра́дуйся, Анти́по, ско́рый помо́щниче в боле́знех на́ших.

Конда́к 3.

Си́лою благода́ти Бо́жией, еще́ сы́й в телеси́ возсия́л еси́ я́ко со́лнце, все́х просвеща́я и разгоня́я глубо́кую но́щь безбо́жия. Сего́ ра́ди почита́я тя́ я́ко сопресто́льника Апо́столов и целе́б пода́теля воспева́ем Бо́гу: Аллилу́иа.

И́кос 3.

Име́я неусы́пное попече́ние о спасе́нии ду́ш во тьме́ идолослуже́ния погиба́ющих, богому́дре Анти́по, не престава́л еси́ призыва́ти те́х к Богоуго́дней жи́зни, подава́я собо́ю приме́р соверше́ннаго благоче́стия христиа́нскаго; сего́ ра́ди усе́рдно прино́сим ти́ похвалы́ сия́:

Ра́дуйся, о́бразе жития́ пра́веднаго; ра́дуйся, указа́телю неве́рным стези́, веду́щей к Небеси́.

Ра́дуйся, ве́рным ко спасе́нию путеводи́телю; ра́дуйся, приле́жный вразуми́телю заблу́ждших.

Ра́дуйся, во обраще́нии идолопокло́нников к ве́ре во Христа́ яви́вый самоотверже́ние всеце́лое; ра́дуйся, архиере́ю Бо́жий, до́бре упа́сший слове́сное ста́до твое́.

Ра́дуйся, Анти́по, ско́рый помо́щниче в боле́знех на́ших.

Конда́к 4.

Ве́лия бу́ря я́рости Дометиа́на, ды́шущаго уби́йством, возшуме́ на хра́м души́ твоея́, свя́те Анти́по, но того́ не возмо́же поколеба́ти, основа́н бо бе́ на тве́рдом ве́ры Христо́вы ка́мени, на не́мже ты́, богоизбра́нне, неподви́жно пребыва́я, укрепля́ющему тя́ Го́споду Иису́су воспева́л еси́: Аллилу́иа.

И́кос 4.

Слы́шавше от тебе́ нечести́вый иге́мон и жрецы́ и́дольстии словеса́ прему́дрости, распыха́хуся на тя́ зло́бою, па́че же егда́ ре́кл еси́: «Еди́но то́ ве́ждь, о иге́моне, я́ко христиа́нин а́з е́смь, ца́рскому же веле́нию безу́мному и нечести́вому повину́тися отню́дь не изволя́ю». Сие́ у́бо воспомина́я, взыва́ем ти́ си́це:

Ра́дуйся, ве́ру во Христа́ до сме́рти сохрани́вый до́бре; ра́дуйся, си́лою свы́ше на бра́нь проти́ву мучи́телей препоя́санный.

Ра́дуйся, победоно́сною сла́вою от Христа́ Победи́теля облече́нный; ра́дуйся, Апо́столов во испове́дании Христа́ подража́телю.

Ра́дуйся, страсте́м Христо́вым соприча́стниче; ра́дуйся, кро́вию свое́ю утверди́вый правове́рие.

Ра́дуйся, Анти́по, ско́рый помо́щниче в боле́знех на́ших.

Конда́к 5.

Богото́чный исто́чник ди́вных чуде́с яви́лся еси́, достосла́вне Анти́по: прия́л еси́ от Го́спода да́р неду́ги врачева́ти, да позна́ют неве́рующие Бо́га, я́ве тобо́ю чудоде́йствующа, и воспою́т Ему́: Аллилу́иа.

И́кос 5.

Ви́девше лю́дие гра́да Перга́ма, я́ко даде́ся ти́ благода́ть немощны́х исцеля́ти, и от вся́ких теле́сных и душе́вных скорбе́й избавля́ти, удиви́шася. Мы́ же за мно́гая исцеле́ния тобо́ю на ны́ излива́емая, ублажа́ем тя́ похвала́ми си́ми:

Ра́дуйся, боля́щих исцеле́ние; ра́дуйся, разсла́бленных укрепле́ние.

Ра́дуйся, неду́гующих врачу́ благода́тный; ра́дуйся, скорбя́щим непосты́дное прибе́жище.

Ра́дуйся, я́ко тобо́ю от мно́гих ра́н гре́шнии исцеля́ются; ра́дуйся, я́ко тобо́ю от вся́ких боле́зней с ве́рою призыва́ющии тя́ избавля́ются.

Ра́дуйся, Анти́по, ско́рый помо́щниче в боле́знех на́ших.

Конда́к 6.

Пропове́дником и́стины, Христо́вым Апо́столом поревнова́в, не убоя́лся еси́ зверонра́вных мучи́телей, не ужасну́лся еси́ преще́ния, но со дерзнове́нием пропове́дал еси́ и́м Христа́ Бо́га, Его́ же ра́ди в разжже́н сосу́д ме́дян вве́ржен бы́л еси́, да просла́вится тебе́ ра́ди ди́вный во святы́х Госпо́дь, Ему́же ты́ и в огни́ взыва́л еси́: Аллилу́иа.

И́кос 6.

Име́я ве́лию ре́вность о лю́дех Бо́жиих, ты́ боле́зновал еси́ о погря́зших в бе́здне идолопокло́нства, и ра́ди спасе́ния неве́рных гото́в бы́л еси́, я́коже боже́ственный Па́вел, са́м отлуче́н бы́ти от Христа́, возлю́бленнаго тобо́ю. Сего́ ра́ди со умиле́нием взыва́ем ти́ си́це:

Ра́дуйся, отцу́ ве́рующих Авраа́му в хода́тайстве о гре́шницех подража́вый; ра́дуйся, Богови́дцу Моисе́ю в пла́менней моли́тве о спасе́нии неве́рующих поревнова́вый.

Ра́дуйся, но́вый Самуи́ле, в моли́тве о беззако́нницех глаго́лавый: «Не бу́ди мне́, е́же не вопи́ти о ва́с с моле́нием ко Го́споду»; ра́дуйся, подража́телю архидиа́кона Стефа́на, во вре́мя страда́ния в ме́дяном воле́ о мучи́телех сотвори́вый сицеву́ю моли́тву: «Го́споди! не поста́ви и́м греха́ сего́».

Ра́дуйся, я́ко незло́бив сы́й, за убива́ющих тя́ моли́лся еси́, я́ко за благотво́рцев; ра́дуйся, па́стырю любвеоби́льный, положи́вый ду́шу свою́ за слове́сныя о́вцы твоя́.

Ра́дуйся, Анти́по, ско́рый помо́щниче в боле́знех на́ших.

Конда́к 7.

Хотя́щу беззако́нному мучи́телю ле́стными словесы́ отврати́ти тя́, Анти́по, от И́стиннаго Бо́га ко и́долом безду́шным, ты́, богому́дре, отвеща́л еси́: прише́д в после́днюю ста́рость и к сме́рти прибли́жився, не изменю́ ве́ры моея́ в Иису́са Христа́, Бо́га моего́, Ему́же со Отце́м и Святы́м Ду́хом при́сно пою́ и во ве́ки веко́в и́мам пе́ти: Аллилу́иа.

И́кос 7.

Но́вое чу́до показа́ Госпо́дь тобо́ю, егда́ ты́ по веле́нию злочести́ваго мучи́теля вве́ржен бы́л еси́ в разжже́н ме́дян коно́б, в не́мже я́ко хле́б сла́дкий испе́клся еси́ и в воню́ благоуха́ния Святе́й Тро́ице прине́слся еси́. Благогове́йне у́бо воспомина́я сие́ преве́лие терпе́ние твое́, блажи́м тя́ похвала́ми си́ми:

Ра́дуйся, позо́рищным вверже́нием в разжже́нный сосу́д горды́ню мучи́теля низложи́вый; ра́дуйся, я́ко о́гнь любве́ к Бо́гу в се́рдце твое́м до конца́ жи́зни сохрани́вый.

Ра́дуйся, я́ко Христа́ ра́ди огне́м кончи́ну прия́вый; ра́дуйся, тверде́е ка́мене в терпе́нии яви́выйся.

Ра́дуйся, я́ко укрепля́емый Христо́м Бо́гом, пресла́вно жи́знь на земли́ сконча́л еси́; ра́дуйся, пресве́тлому му́ченическому ли́ку сопричте́нный.

Ра́дуйся, Анти́по, ско́рый помо́щниче в боле́знех на́ших.

Конда́к 8.

Стра́нно бе́ ви́дети язы́ком, неве́дущим Бо́жией си́лы, ка́ко в сла́бом ста́рческом те́ле возмо́гл еси́, святи́телю Анти́по, претерпе́ти за Христа́ люте́йшия му́ки. Мы́ же, благодаря́ о се́м Бо́га, дарова́вшаго ти́ такову́ю кре́пость, с любо́вию взыва́ем: Аллилу́иа.

И́кос 8.

Ве́сь пре́дан бы́л еси́ Иису́су Пресла́дкому, святи́телю Анти́по, и сла́дце Его́ ра́ди го́рькия му́ки в огни́ претерпе́л еси́, глаго́лал бо еси́: «Ча́шу страда́ний, ю́же даде́ ми Госпо́дь, не и́мам ли пи́ти»; те́мже и са́м показа́лся еси́ а́ки ча́ша, сла́дость чуде́сных исцеле́ний излива́ющая все́м вопию́щим к тебе́ такова́я:

Ра́дуйся, все́ю душе́ю возлюби́вый Иису́са Пресла́дкаго; ра́дуйся, па́стырю, слове́сным овца́м во Свята́я святы́х пу́ть показа́вый.

Ра́дуйся, реко́, ороша́ющая ми́р вода́ми благода́ти Бо́жией; ра́дуйся, неисчерпа́емый исто́чниче чуде́сных исцеле́ний.

Ра́дуйся, сосу́де, на вся́ неду́ги врачева́ния неоску́дно излива́ющий; ра́дуйся, я́ко Госпо́дь си́л ди́вная на тебе́ яви́л е́сть.

Ра́дуйся, Анти́по, ско́рый помо́щниче в боле́знех на́ших.

Конда́к 9.

Вся́кую стяжа́л еси́ чудоде́йствия си́лу благода́тию ди́внаго во святы́х Свои́х Бо́га, святи́телю Анти́по: не то́кмо бо моли́твами твои́ми устраши́л еси́ бе́сы, но и соверше́нно из гра́да Перга́ма изгна́л еси́ я́. Воспомина́я сию́ побе́ду твою́ над злы́ми ду́хи, благода́рне вопие́м Бо́гу: Аллилу́иа.

И́кос 9.

Вити́йство челове́ческое не довле́ет изрещи́, коли́кую прия́л еси́, свя́те Анти́по, от Го́спода вла́сть изгоня́ти от люде́й диа́вола с лука́выми де́моны, за е́же мы́ восхваля́ем тя́ си́це:

Ра́дуйся, вся́ческих ко́зней диа́вола разруши́телю; ра́дуйся, сатаны́ посрами́телю.

Ра́дуйся, стужа́емых от бесо́в свободи́телю; ра́дуйся, де́монов отгна́телю.

Ра́дуйся, те́мных а́дских си́л устраши́телю; ра́дуйся, от него́же ду́хи зло́бы, я́коже ды́м, исчеза́ют.

Ра́дуйся, Анти́по, ско́рый помо́щниче в боле́знех на́ших.

Конда́к 10.

Спасти́ хотя́ ду́шу твою́, презре́л еси́ пло́ть и не убоя́лся еси́ от убива́ющих те́ло, свя́те Анти́по, егда́ бо услы́шал еси́ осужде́ние на сожже́ние в ме́дяном воле́, ты́ ра́достно прия́л еси́ о́ное, воспева́я Го́сподеви: Аллилу́иа.

И́кос 10.

Стена́ еси́ огражда́ющая от вся́ких зо́л усе́рдно тя́ в по́мощь призыва́ющих, свя́те Анти́по, не то́кмо бо во Аси́и живу́щим, но и во все́х ме́стех су́щим христиа́ном твое́ю де́йственною моли́твою подае́ши духо́вная дарова́ния; и́хже ра́ди и мы́, о́тче святы́й, ублажа́ем тя́ си́це:

Ра́дуйся, сосу́де, источа́яй еле́й Бо́жия милосе́рдия; ра́дуйся, живоно́сный исто́чниче, струи́ исцеле́ний излива́ющий на́м.

Ра́дуйся, ско́рый возста́вителю здра́вия в не́мощи лежа́щих; ра́дуйся, все́х лю́тых боле́зней, па́че же лю́тыя зубны́я боле́зни, цели́телю.

Ра́дуйся, безме́здный врачу́ боле́зни душе́вныя и теле́сныя; ра́дуйся, пода́телю врачева́ний все́м, притека́ющим к тебе́ с ве́рою.

Ра́дуйся, Анти́по, ско́рый помо́щниче в боле́знех на́ших.

Конда́к 11.

Пе́ние благоприя́тное Пресвяте́й Тро́ице прине́сл еси́, досто́йный прее́мниче Апо́столов, Анти́по, не то́чию умо́м, сло́вом и ду́хом, но живы́м всего́ себя́ в же́ртву принесе́нием. Те́м же, а́ще и не дово́льны есмы́ к похвале́нию таковы́х твои́х по́двигов, оба́че благода́рни су́щи, пое́м ди́вному во святы́х Бо́гу: Аллилу́иа.

И́кос 11.

Светоза́рный свети́льник, от И́стиннаго Све́та озаря́емый, су́щим на земли́ явля́ешися, равноапо́стольный Анти́по, просвеща́еши бо се́рдца ве́рных и к ра́зуму Боже́ственному вся́ наставля́еши, поуча́я и на́с со умиле́нием взыва́ти:

Ра́дуйся, заре́ Бо́жия све́та; ра́дуйся, денни́це Со́лнца Пра́вды.

Ра́дуйся, сия́ние Ева́нгельскаго уче́ния; ра́дуйся, свети́ло небе́снаго блиста́ния.

Ра́дуйся, просвеща́яй ду́ши ве́рных; ра́дуйся, озаря́яй сердца́ и́щущих пра́вды.

Ра́дуйся, Анти́по, ско́рый помо́щниче в боле́знех на́ших.

Конда́к 12.

Благода́ть, да́нную ти́ от Бо́га ве́дуще, ра́достно и́мя твое́ воспомина́ем, святи́телю Анти́по, и с те́плым моле́нием к всечестно́му о́бразу твоему́ притека́юще, приле́жно мо́лим тя́: пода́ждь цельбу́ стра́ждущим лю́тою зубно́ю боле́знию и изба́ви все́х на́с от вся́кия ну́жды и печа́ли, да пое́м Бо́гу: Аллилу́иа.

И́кос 12.

Сла́вную кончи́ну твою́ пою́ще, архиере́ю Бо́жий, и те́плую моли́тву твою́ к Бо́гу о христиа́нах воспомина́юще, восхваля́ем Го́спода Си́л, ди́вная на тебе́ сотво́ршаго; ты́ же услы́ши на́с, уми́льно вопию́щих ти́:

Ра́дуйся, те́плый пред Го́сподем о на́с моли́твенниче; ра́дуйся, при́сный пред Бо́гом на́ш засту́пниче.

Ра́дуйся, до́брый на́ш наста́вниче; ра́дуйся, о спасе́нии на́с гре́шных си́льный хода́таю.

Ра́дуйся, Царя́ Небе́снаго ско́рый умилостиви́телю; ра́дуйся, благосе́рдый помо́щниче все́х благоче́стно соверша́ющих па́мять твою́.

Ра́дуйся, Анти́по, ско́рый помо́щниче в боле́знех на́ших.

Конда́к 13.

О, пресла́вный и всехва́льный священному́чениче Анти́по! Приими́ сие́ похва́льное пе́ние от на́с недосто́йных во умиле́нии тебе́ приноси́мое, и богоприя́тным твои́м хода́тайством умоли́ Го́спода дарова́ти боля́щим здра́вие душе́вное и теле́сное, изба́вити все́х на́с от бе́д и напа́стей в жи́зни се́й, по сме́ртном же успе́нии на́шем, в де́нь Стра́шнаго Суда́ одесну́ю Пра́веднаго Судии́ ста́ти и в Ца́рствии Сла́вы Ему́ воспева́ти: Аллилу́иа.

Этот конда́к чита́ется три́жды, зате́м и́кос 1-й и конда́к 1-й.

Моли́тва.

О, пресла́вный священному́чениче Анти́по, ско́рый помо́щниче христиа́ном в боле́знех! Ве́рую от всея́ души́ и помышле́ния, я́ко даде́ся тебе́ от Го́спода да́р боля́щия исцеля́ти, неду́гующия врачева́ти и разсла́бленныя укрепля́ти. Сего́ ра́ди к тебе́, я́ко благода́тному врачу́ боле́зней, а́з немощны́й [немощна́я] прибега́ю и тво́й досточти́мый о́браз с благогове́нием лобыза́я, молю́ся: твои́м предста́тельством у Царя́ Небе́снаго испроси́ мне́ боля́щему [боля́щей] исцеле́ние от удруча́ющия мя́ зубны́я боле́зни, а́ще бо и недосто́ин [недосто́йна] е́смь тебе́, бла́гостнейшаго отца́ и при́снаго засту́пника моего́, но ты́, бы́в подража́тель человеколю́бия Бо́жия, сотвори́ мя́ досто́йна [досто́йну] твоего́ заступле́ния чрез мое́ обраще́ние от злы́х де́л к благо́му житию́, уврачу́й оби́льно дарова́нною тебе́ благода́тию я́звы и стру́пы души́ и те́ла моего́, да́руй ми́ здра́вие и спасе́ние и во все́м благо́е поспеше́ние, да та́ко ти́хое и безмо́лвное житие́ пожи́в во вся́ком благоче́стии и чистоте́, сподо́блюся со все́ми святы́ми сла́вити всесвято́е и́мя Отца́ и Сы́на и Свята́го Ду́ха. Ами́нь.