Конда́к 1.

Избра́нней уго́днице Христо́вой, всеблаже́нней великому́ченице Анастаси́и похва́льное пе́ние прино́сим, я́ко иму́щей мно́гое дерзнове́ние ко Го́споду е́же от вся́ких бе́д, скорбе́й и боле́зней свобожда́ти ве́рныя, и с любо́вию взыва́ем си́це:

Ра́дуйся, всеблаже́нная великому́ченице Анастаси́е, у́зников свята́я посети́тельнице и моли́твеннице о душа́х на́ших.

И́кос 1.

А́нгелом уподо́билася еси́ ра́зумом чи́стым, позна́вши Того́, И́же е́сть всего́ ви́димаго и неви́димаго ве́чное нача́ло и еди́ный коне́ц жела́ний все́х благочести́вых. Мы́ же, восхваля́юще му́дрое обуче́ние твое́ от свята́го му́ченика Хрисого́на, с любо́вию вопие́м ти́:

Ра́дуйся, возлюби́вшая ве́ру Христо́ву; ра́дуйся, после́довавшая благоче́стию ма́тере твоея́ Фа́всты.

Ра́дуйся, соблю́дшая чистоту́ де́вства твоего́; ра́дуйся, всегда́ неви́димо охраня́емая а́нгелами.

Ра́дуйся, чистото́ю твое́ю к Бо́гу прибли́зившаяся.

Ра́дуйся, всеблаже́нная великому́ченице Анастаси́е, у́зников свята́я посети́тельнице и моли́твеннице о душа́х на́ших.

Конда́к 2.

Ви́дящи свята́я Анастаси́я, я́ко мно́зи христиа́не стра́ждут в темни́цех за и́мя и уче́ние Иису́с Христо́во, нача́т со усе́рдием служи́ти и́м, утеша́ти же и цели́ти я́ соде́йствующу Бо́гу, со благогове́нием пою́щи: Аллилу́иа.

И́кос 2.

Уразуме́ богому́драя Анастаси́я, я́ко вся́ ми́ра сего́ кра́сная тле́нию прича́стна су́ть, и того́ ра́ди презре́вши све́тлыя оде́жды и у́твари многоце́нны, та́йно обо́лкшеся во оде́жды ни́щих, вхожда́ше в темни́цы послужи́ти испове́дником Христо́вым. Мы́ же, мы́сленно спосле́дствующе е́й, взыва́ем к не́й с любо́вию:

Ра́дуйся, подража́тельнице Христо́ва; ра́дуйся, посети́тельнице заключе́нных в темни́це.

Ра́дуйся, уте́шительнице испове́дников Христо́вых; ра́дуйся, зла́то и сребро́ твое́ на ни́х расточи́вшая.

Ра́дуйся, те́ми стяжа́вшая Ца́рствие небе́сное; ра́дуйся, ру́це и но́зе святы́х омыва́вшая и власы́ и́х очища́вшая.

Ра́дуйся, неду́ги и́х врачева́вшая и телеса́ и́х че́стне погреба́вшая.

Ра́дуйся, всеблаже́нная великому́ченице Анастаси́е, у́зников свята́я посети́тельнице и моли́твеннице о душа́х на́ших.

Конда́к 3.

Си́лою укрепля́ема свы́ше, свята́я му́ченице, послужи́ благоче́стно святы́м и посрами́ ненави́стника вся́кия доброде́тели, диа́вола, наусти́вшаго рабы́ню оклевета́ти ю́ пред му́жем неве́рным. Мы́ же, восхваля́юще благотворе́ния твоя́, Анастаси́е, пое́м вку́пе с тобо́ю: Аллилу́иа.

И́кос 3.

Иму́щи вели́кую любо́вь о Го́споде ко все́м, в темни́цах стра́ждущим за и́мя Христо́во, ея́ же ра́ди мно́жицею бие́на бы́вши от неве́рнаго му́жа, напосле́док в дому́ его́ себе́ темни́цу обре́те. Те́мже, му́жеству ея́ дивя́щеся, вопие́м к не́й:

Ра́дуйся, избра́нная неве́сто Христо́ва; ра́дуйся, за́поведей Христо́вых усе́рдная храни́тельнице.

Ра́дуйся, не сло́вом то́чию, но и де́лом сия́ испо́лнившая; ра́дуйся, ду́шу свою́ за дру́ги твоя́ положи́ти гото́вая.

Ра́дуйся, мно́гое озлобле́ние за Христа́ прия́вшая; ра́дуйся, терпе́нием свои́м адама́нту кре́пкому уподо́бившаяся.

Ра́дуйся, всеблаже́нная великому́ченице Анастаси́е, у́зников свята́я посети́тельнице и моли́твеннице о душа́х на́ших.

Конда́к 4.

Бу́рю я́рости своея́ воздви́же на тя́ нечести́вый мучи́тель, му́ж тво́й, я́ко пле́нницу и рабу́ вмени́ тя́, свята́я Анастаси́е. Мы́ же, воспомина́юще озлобле́ния от него́ и страда́ния твоя́, пое́м укрепля́вшему тя́ Го́споду: Аллилу́иа.

И́кос 4.

Слы́ша блаже́нная Анастаси́я, я́ко мно́го претерпе́ святы́й учи́тель ея́ Хрисого́н за Христа́, ему́же и после́дова страда́ньми свои́ми и та́йно восписа́ ему́ си́це: «учи́телю! ча́ю умре́ти и ничто́же и́но остае́тся, то́чию да испусти́вши ду́х, паду́ ме́ртва». Мы́ же, чудя́щеся терпе́нию твоему́, глаго́лем си́це:

Ра́дуйся, не пощади́вшая пло́ти своея́ честны́я; ра́дуйся, во дни́ и в нощи́ поверга́вшаяся к стопа́м Христо́вым.

Ра́дуйся, жела́вшая расточи́ти бога́тство твое́ Бо́га ра́ди неиму́щим; ра́дуйся, му́дро ку́плю де́ющая.

Ра́дуйся, еди́но иму́щая попече́ние о стра́ждущих во у́зах; ра́дуйся, невозбра́нно вше́дшая в черто́г небе́сный.

Ра́дуйся, всеблаже́нная великому́ченице Анастаси́е, у́зников свята́я посети́тельнице и моли́твеннице о душа́х на́ших.

Конда́к 5.

Я́ко боготе́чная звезда́ яви́лася еси́ в Ри́мстей стране́, великому́ченице Анастаси́е, посеща́ющи стра́ждущих за Христа́ в темни́цах и сердца́ и́х в ве́ре утвержда́ющи, да при́сно взыва́ют с тобо́ю Спаси́телю все́х Бо́гу: Аллилу́иа.

И́кос 5.

Ви́де тя́ богоно́сный учи́тель тво́й Хрисого́н в смуще́нии и волне́нии ми́ра сего́ су́щу, повеле́ с проро́ком взыва́ти тебе́: «вску́ю приско́рбна еси́, душе́ моя́, и вску́ю смуща́еши мя́? упова́й на Бо́га!» Мы́ же, помина́юще ско́рбь и печа́ль твою́ я́же по Бо́зе, зове́м ти́:

Ра́дуйся, возложи́вшая все́ упова́ние твое́ на Го́спода; ра́дуйся, претерпе́вшая тесноту́ Ца́рствия ра́ди небе́снаго.

Ра́дуйся, чистото́ю твое́ю со а́нгелы жи́ти на небесе́х сподо́бившаяся; ра́дуйся, скорбьми́ твои́ми к Бо́гу прибли́зившаяся.

Ра́дуйся, моли́твами твои́ми избавля́ющая на́с от мно́гих скорбе́й; ра́дуйся, хода́тайством твои́м свобожда́ющая от искуше́ний.

Ра́дуйся, всеблаже́нная великому́ченице Анастаси́е, у́зников свята́я посети́тельнице и моли́твеннице о душа́х на́ших.

Конда́к 6.

Пропове́дует ве́сь ми́р христиа́нский честны́я по́двиги твоя́, великому́ченице Анастаси́е, и страда́ния твоя́ сла́вит, му́ченическую кончи́ну твою́ ублажа́ет и пое́т Бо́гу: Аллилу́иа.

И́кос 6.

Возсия́ла еси́ па́че со́лнца доброде́тельми твои́ми в вели́ком гра́де Ри́ме, егда́ испо́лнися предрече́ние учи́теля твоего́, свята́го Хрисого́на, о поги́бели безбо́жнаго му́жа твоего́. Свобо́дна бо су́щи, с вя́щшим усе́рдием начала́ еси́ пещи́ся о му́ченицех Христо́вых. Мы́ же, взира́юще с любо́вию на дея́ния твоя́, глаго́лем ти́ си́це:

Ра́дуйся, усе́рдная помо́щнице стра́ждущим. Ра́дуйся, боже́ственными словесы́ утеша́вшая друзе́й Христо́вых.

Ра́дуйся, име́вшая ве́лие попече́ние о тре́х де́вах: Ага́пии, Хиони́и и Ири́не; ра́дуйся, те́х на по́двиг му́ченичества укрепи́вшая.

Ра́дуйся, у́м тво́й горе́ име́вшая; ра́дуйся, се́рдце твое́ жили́ще Свята́го Ду́ха соде́лавшая.

Ра́дуйся, огне́м любве́ к Бо́гу всеце́ло возгоре́вшая; ра́дуйся, в кро́ве кри́л Его́ небе́сный покро́в обре́тшая.

Ра́дуйся, му́жеством твои́м врага́ спасе́ния до конца́ низложи́вшая.

Ра́дуйся, всеблаже́нная великому́ченице Анастаси́е, у́зников свята́я посети́тельнице и моли́твеннице о душа́х на́ших.

Конда́к 7.

Хоте́ние свята́го Хрисого́на, е́же умре́ти за Христа́, испо́лнися Бо́жиим про́мыслом: егда́ же узре́ла еси́ честны́я мо́щи своего́ учи́теля страстоте́рпца, любе́зно и́х лобыза́ющи, воспла́калася еси́, из глубины́ души́ износя́щи Бо́гу пе́снь: Аллилу́иа.

И́кос 7.

Но́вую благода́ть и си́лу дарова́ тебе́ Госпо́дь на́ш, егда́ восприя́ла еси́ по́двиг преходи́ти из гра́да в гра́д, посеща́юще во у́зах седя́щих. Мы́ же, после́дующе стра́нствованию твоему́, уми́льно вопие́м ти́:

Ра́дуйся, после́довательнице стопа́м Христо́вым; ра́дуйся, служи́тельнице мно́гим святы́м.

Ра́дуйся, чистото́ю уневе́стившаяся Христу́; ра́дуйся, великому́ченице просла́вленная.

Ра́дуйся, узореши́тельницею проименова́нная; ра́дуйся, зла́том твои́м купу́ющая свобо́ду ве́рным от у́з темни́чных.

Ра́дуйся, моли́твами твои́ми избавля́ющая на́с у́з грехо́вных; ра́дуйся, врачева́ние больны́м низпосыла́ющая.

Ра́дуйся, Бо́жиим веле́нием полуме́ртвых возставля́ющая.

Ра́дуйся, всеблаже́нная великому́ченице Анастаси́е, у́зников свята́я посети́тельнице и моли́твеннице о душа́х на́ших.

Конда́к 8.

Стра́нствование твое́ со свято́ю му́ченицею Феодо́тиею мно́гим осла́бу подаде́: боля́щим дарова́ исцеле́ние, мно́гим уме́ршим угото́ва погребе́ние, живы́м на вя́щшия по́двиги доброде́тели укрепле́ние. На́с же недосто́йных сподо́би, свята́я, моли́твами твои́ми пе́ти разу́мно Бо́гу: Аллилу́иа.

И́кос 8.

Вся́ хра́мина темни́цы испо́лнися мно́гим пла́чем и рыда́ниями твои́ми, егда́ ра́но прите́кши в ню́ по обы́чаю твоему́ и не еди́наго же обре́тши от у́зник, за и́мя Христо́во всажде́нных: вси́ бо в но́щь еди́ну повеле́нием злочести́ваго царя́ сме́рти пре́даны бы́ша. Мы́ же, вспомина́юще ско́рбь твою́ о друзе́х Бо́жиих, взыва́ем та́ко:

Ра́дуйся, со усе́рдием поиска́вшая в темни́цах рабо́в Христо́вых. Ра́дуйся, па́ки обре́тшая те́х в небе́сных селе́ниих.

Ра́дуйся, взе́мшая с любо́вию на ра́мо свое́ кре́ст Госпо́день. Ра́дуйся, сподо́бльшаяся всю́ду зре́ти разу́мными очесы́ Го́спода Вседержи́теля. Ра́дуйся, за любо́вь твою́ к бли́жним ве́лие дерзнове́ние к Бо́гу стяжа́вшая.

Ра́дуйся, всеблаже́нная великому́ченице Анастаси́е, у́зников свята́я посети́тельнице и моли́твеннице о душа́х на́ших.

Конда́к 9.

Нечести́вии мучи́телие сове́т сотвори́ша на тя́, страстоте́рпице непобеди́мая, хотя́ще преклони́ти тя́ ко и́дольскому служе́нию. Ты́ же небоя́зненно взыва́ла еси́ к ни́м: «раба́ Христо́ва е́смь, и пою́ Ему́ де́нь и но́щь: Аллилу́иа».

И́кос 9.

Вети́йствова с тобо́ю нача́льнейший жре́ц и́дольский, хотя́й ле́стию улови́ти святу́ю ду́шу твою́. Ты́ же, позна́вше всю́ хи́трость вра́жию, посрами́ла еси́ мучи́теля и премени́ла вся́ зла́я во блага́я, безтре́петно взира́ющи на ору́дия мучи́тельския и на вся́ му́ки. Мы́ же, дивя́щеся му́жеству твоему́, зове́м ти́ умиле́нными гла́сы:

Ра́дуйся, доброво́льно оста́вившая вся́ ми́ра сего́ кра́сная; ра́дуйся, возжела́вшая прия́ти разли́чныя му́ки за Христа́.

Ра́дуйся, с любо́вию на сме́рть идти́ восхоте́вшая; ра́дуйся, и саме́х мучи́телей терпе́нием твои́м удиви́вшая.

Ра́дуйся, страда́ньми твои́ми Це́рковь Христо́ву украси́вшая; ра́дуйся, де́моны нога́ма твои́ма попра́вшая.

Ра́дуйся, всеблаже́нная великому́ченице Анастаси́е, у́зников свята́я посети́тельнице и моли́твеннице о душа́х на́ших.

Конда́к 10.

Спасти́ся все́м хотя́щим лю́дем споспешеству́й моли́твами твои́ми, великому́ченице, пред Го́сподем и испроси́ разреше́ние грехо́в почита́ющим страда́ния твоя́, да вопие́м с тобо́ю: Аллилу́иа.

И́кос 10.

Царя́ Небе́снаго возлюби́ все́м се́рдцем свои́м свята́я Анастаси́я и в темни́цу вве́ржена бы́сть за сладча́йшаго Иису́са, надо́лзе гла́дом и жа́ждею истаява́ющи и моли́твою укрепля́ющися. Те́мже, прославля́юще тоя́ честна́я страда́ния, возсыла́ем к не́й пе́ние таково́е:

Ра́дуйся, после́довательнице страсте́м Христо́вым; ра́дуйся, украси́вшаяся победоно́сною сла́вою.

Ра́дуйся, благочести́вым жена́м похвало́ и велича́ние; ра́дуйся, земно́ю темни́цею в небе́сный черто́г восте́кшая.

Ра́дуйся, та́мо с му́ченики водвори́вшаяся; ра́дуйся, моли́твою твое́ю у престо́ла Бо́жия воспомина́ющая на́с.

Ра́дуйся, у́зы грехо́вныя ско́ро разреша́ющая; ра́дуйся, де́моны от челове́к прогоня́ющая.

Ра́дуйся, всеблаже́нная великому́ченице Анастаси́е, у́зников свята́я посети́тельнице и моли́твеннице о душа́х на́ших.

Конда́к 11.

Пе́ние всеумиле́нное прино́сим ти́, прославля́юще твоя́ за Христа́ страда́ния, и мо́лим тя́: свята́я страстоте́рпице, испроси́ у Ми́лостиваго Го́спода все́м лю́дем здра́вие, долгоде́нствие и на враги́ побе́ду и одоле́ние. На́м же, восхваля́ющим муче́ния твоя́, пода́ждь ми́р и спасе́ние, да пое́м Бо́гу во ве́ки: Аллилу́иа.

И́кос 11.

Све́тлым и ра́достным лице́м после́довала еси́ на страда́ние, угото́ванное ти́ от мучи́телей, е́же помышля́юще с ра́достию зове́м:

Ра́дуйся, от потопле́ния в мо́ри Бо́жиим смотре́нием изба́вльшаяся; ра́дуйся, протяже́нная мучи́тели к четы́рем столпо́м и те́м уподо́бльшаяся распя́тому на Кресте́ Сы́ну Бо́жию.

Ра́дуйся, жего́мая огне́м да́же до сме́рти; ра́дуйся, сокро́вищнице исцеле́ний неоску́дная.

Ра́дуйся, ча́ше даро́в Бо́жиих преизоби́льная; ра́дуйся, все́х благи́х жела́ний ско́рая исполни́тельнице.

Ра́дуйся, всеблаже́нная великому́ченице Анастаси́е, у́зников свята́я посети́тельнице и моли́твеннице о душа́х на́ших.

Конда́к 12.

Благода́ть свы́ше низпосли́ все́м на́м, притека́ющим с любо́вию к ра́це моще́й твои́х, и испроси́ у Го́спода проще́ние согреше́ний на́ших, боля́щим же и стра́ждущим исцеле́ние, да благода́рственно вси́ вопие́м ди́вному во святы́х Бо́гу: Аллилу́иа.

И́кос 12.

Пою́ще по́двиги твоего́ во́льнаго муче́ния за Христа́, покланя́емся страда́нию твоему́, великому́ченице досточу́дная, почита́ем святу́ю кончи́ну твою́ и мо́лим тя́: простри́ твою́ с небесе́ по́мощь и на на́с, живу́щих во тме́ страсте́й и искуше́ний и вопию́щих ти́:

Ра́дуйся, великому́ченице свята́я, прине́сшая те́ло свое́ в богоприя́тную же́ртву во многоразли́чных муче́ниих; ра́дуйся, го́рлице, возлете́вшая во Иерусали́м вы́шний.

Ра́дуйся, чи́стая и непоро́чная неве́сто Христо́ва; ра́дуйся, кади́льнице духо́вная, фимиа́м моли́твы о на́с к Бо́гу принося́щая.

Ра́дуйся, почита́ющим па́мять твою́ и страда́ния твоя́ богоуго́днаго жития́ зерца́ло; ра́дуйся, боле́зни душе́вныя и теле́сныя ско́ро исцеля́ющая.

Ра́дуйся, све́тлый о́бразе жития́ все́м, ча́ющим улучи́ти христиа́нскую кончи́ну.

Ра́дуйся, всеблаже́нная великому́ченице Анастаси́е, у́зников свята́я посети́тельнице и моли́твеннице о душа́х на́ших.

Конда́к 13.

О, многострада́льная и преди́вная, свята́я великому́ченице Анастаси́е! Ны́нешнее на́ше ма́лое моле́ние приими́ от недосто́йных ра́б твои́х, с любо́вию приноси́мое тебе́, и испроси́ на́м у Христа́ Бо́га грехо́вных у́з разреше́ние, да изба́вимся моли́твами твои́ми гне́ва Бо́жия и ве́чнаго осужде́ния, и да удосто́имся в небе́снем Ца́рствии ку́пно с тобо́ю во ве́ки пе́ти Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелом уподо́билася еси́ ра́зумом чи́стым, позна́вши Того́, И́же е́сть всего́ ви́димаго и неви́димаго ве́чное нача́ло и еди́ный коне́ц жела́ний все́х благочести́вых. Мы́ же, восхваля́юще му́дрое обуче́ние твое́ от свята́го му́ченика Хрисого́на, с любо́вию вопие́м ти́:

Ра́дуйся, возлюби́вшая ве́ру Христо́ву; ра́дуйся, после́довавшая благоче́стию ма́тере твоея́ Фа́всты.

Ра́дуйся, соблю́дшая чистоту́ де́вства твоего́; ра́дуйся, всегда́ неви́димо охраня́емая а́нгелами.

Ра́дуйся, чистото́ю твое́ю к Бо́гу прибли́зившаяся.

Ра́дуйся, всеблаже́нная великому́ченице Анастаси́е, у́зников свята́я посети́тельнице и моли́твеннице о душа́х на́ших.

Конда́к 1.

Избра́нней уго́днице Христо́вой, всеблаже́нней великому́ченице Анастаси́и похва́льное пе́ние прино́сим, я́ко иму́щей мно́гое дерзнове́ние ко Го́споду е́же от вся́ких бе́д, скорбе́й и боле́зней свобожда́ти ве́рныя, и с любо́вию взыва́ем си́це:

Ра́дуйся, всеблаже́нная великому́ченице Анастаси́е, у́зников свята́я посети́тельнице и моли́твеннице о душа́х на́ших.

Моли́тва.

О, многострада́льная и прему́драя великому́ченице Христо́ва Анастаси́е! Ты́ душе́ю на небеси́ у престо́ла Госпо́дня предстои́ши, на земли́ же, да́нною тебе́ благода́тию, разли́чная соверша́еши исцеле́ния. При́зри у́бо ми́лостивно на предстоя́щия лю́ди и моля́щияся пред ико́ною твое́ю [моща́ми твои́ми], прося́щия твоея́ по́мощи: простри́ ко Го́споду святы́я моли́твы твоя́ о на́с, и испроси́ на́м оставле́ние согреше́ний на́ших, неду́жным — исцеле́ние, скорбя́щим и бе́дствующим — ско́рую по́мощь; умоли́ Го́спода, да пода́ст все́м на́м христиа́нскую кончи́ну и до́брый отве́т на стра́шнем суди́щи Свое́м, да сподо́бимся и мы́ ку́пно с тобо́ю сла́вити Отца́ и Сы́на и Свята́го Ду́ха во ве́ки веко́в. Ами́нь.