Акафист святой великомученице Варваре

Утвержден: 19 сентября 1836 года

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 17 декабря (04 декабря ст. ст.)

Утвержден для общецерковного использования.

Конда́к 1.

Избра́нной Бо́гом от идолослужи́тельнаго ро́да и призва́нной во язы́к свя́т, в лю́ди обновле́ния, неве́сте Христо́ве, я́ко избавля́ющиися тобо́ю от разли́чных зо́л и обстоя́ния, благода́рственная пе́ния и хвале́ния воспису́ем ти́, моли́твенницы твои́, свята́я и всехва́льная великому́ченице: ты́ же, иму́щи дерзнове́ние ко Го́споду, от вся́ких на́с бе́д свободи́, да с ра́достию зове́м ти́:

Ра́дуйся, Варва́ро, неве́сто Христо́ва прекра́сная.

И́кос 1.

А́нгелов честну́ю и вселюбе́зную чистоту́ непоро́чно сохра́нши, честна́я Варва́ро, а́нгелом сожи́тельница бы́ти сподо́билася еси́, с ни́миже егда́ пое́ши тро́ическую пе́снь Бо́гу на небеси́, услы́ши на́с, пою́щих тебе́ на земли́ похва́льная пе́ния сия́:

Ра́дуйся, отрокови́це, Бо́гом Отце́м предуста́вленная бы́ти сообра́зна в страда́нии о́бразу Сы́на Его́; ра́дуйся, Сы́ном Бо́жиим, Све́том от Све́та, призва́нная из тмы́ в чу́дный све́т ве́ры и благода́ти Его́.

Ра́дуйся, я́ко позва́вшему тя́ Свято́му Ду́ху, и сама́ те́лом и ду́хом свята́ еси́; ра́дуйся, я́ко от скве́рны пло́ти и ду́ха непоро́чну тя́ соблюла́ еси́.

Ра́дуйся, рожде́нному от Де́вы Жениху́ Христу́ де́ву тя́ чи́стую обручи́вшая; ра́дуйся, земна́го обру́чника па́че Небе́снаго зна́ти не восхоте́вшая.

Ра́дуйся, кри́не де́вства, посреде́ те́рния и́дольскаго прора́стший до́ле; ра́дуйся, цве́те чистоты́, в неувяда́емой сла́ве цвету́щий горе́.

Ра́дуйся, в небе́сном вертогра́де Христо́ва благоуха́ния наслажда́ющаяся; ра́дуйся, Красне́йшаго па́че сыно́в челове́ческих зре́нием та́мо утеша́ющаяся.

Ра́дуйся, убели́вшая ри́зы твоя́ в Кро́ви А́гнчей на земли́; ра́дуйся, в ли́це де́вственном после́дующая Бо́жиему А́гнцу на небеси́.

Ра́дуйся, Варва́ро, неве́сто Христо́ва прекра́сная.

Конда́к 2.

Ви́дящи свята́я Варва́ра себе́ на высо́ком столпе́ от отца́ поста́влену, помышля́ше себе́ ма́нием Бо́жиим к небеси́ бы́ти возводи́му. Разу́мная у́бо восхожде́ния в се́рдце свое́м поло́жши, те́ми от тмы́ ко Све́ту и от преле́стных и́долов ко И́стинному Бо́гу у́мне восхожда́ше, пою́щи Ему́: Аллилу́иа.

И́кос 2.

Ра́зум неуразуме́нный о Еди́ном всея́ тва́ри Творце́ разуме́ти де́ва свята́я Варва́ра и́щущи, бесе́доваше со свои́м си́ ра́зумом, глаго́ля: от те́мных куми́ров чу́дным свети́лам небе́сным ка́ко бе́ созда́тися мо́щно, рцы́ ми́? К не́йже о́н со псало́мником рече́: вси́ Бо́зи язы́к бе́сове, Еди́н же е́сть Бо́г и Госпо́дь, И́же небеса́ и вся́ свети́ла и́х сотвори́. Таково́му твоему́, му́драя де́во, ра́зуму дивя́щеся, глаго́лем:

Ра́дуйся, па́че ста́рец идолослужи́тельных разу́мнейшая; ра́дуйся, па́че мудреце́в ми́ра сего́ мудре́йшая.

Ра́дуйся, я́ко тебе́ безве́стная и та́йная прему́дрости Своея́ Бо́г яви́л е́сть; ра́дуйся, я́ко тебе́ и́стиннаго богосло́вия Са́м Бо́г Сло́во научи́л е́сть.

Ра́дуйся, все́х звездоче́тцев умо́м Христо́вым превозше́дшая; ра́дуйся, я́вственнее па́че о́нех небе́сный кру́г прозре́вшая.

Ра́дуйся, я́ко в тва́ри, а́ки в зерца́ле, Самаго́ Творца́ усмотре́ла еси́; ра́дуйся, я́ко в созда́нных свети́лах Несозда́нный Све́т узре́ла еси́.

Ра́дуйся, ны́не уже́ кроме́ зерца́ла све́т лица́ Бо́жия на небеси́ зря́щая; ра́дуйся, те́м све́том неизрече́нно веселя́щаяся.

Ра́дуйся, у́мная звездо́, ея́же озаре́нием лице́ Бо́жие, я́ко со́лнце, све́тло на́м явля́ется; ра́дуйся, мы́сленная луно́, е́юже но́щь заблужде́ния я́ко де́нь просвеща́ется.

Ра́дуйся, Варва́ро, неве́сто Христо́ва прекра́сная.

Конда́к 3.

Си́ла Вы́шняго даде́ тогда́ святе́й Варва́ре, я́коже дре́вле проро́ку Иезеки́илю, лице́ адама́нтово, си́льно пред все́ми идолослужи́тельми, во е́же не убоя́тися е́й от зве́рскаго лица́ и́х, ни ужаса́тися лю́таго преще́ния. Те́мже со дерзнове́нием мужему́дренная де́ва взыва́ше: Тро́ицу чту́, Еди́но Божество́, и То́й ве́рою покланя́ющися, велегла́сно пою́: Аллилу́иа.

И́кос 3.

Иму́щи свята́я Варва́ра свы́ше да́нную себе́ му́дрость, востече́ к де́лателем ба́ни оте́ческия, и о́нем проявля́я та́йну Святы́я Тро́ицы, повеле́ три́ о́кна в ба́не устро́ити. А́ще, — рече́, — идолослужи́телие уста́ и́мут и не глаго́лют сла́вы и́стиннаго Бо́га, то ка́менныя в се́й ба́не сте́ны треми́ о́кнами, а́ки треми́ устна́ми, да свиде́тельствуют, я́ко Еди́н е́сть Бо́г, в Тро́ице Святе́й от всея́ тва́ри сла́вимый и покланя́емый. За таково́е у́бо мудрова́ние, свята́я Варва́ро, приими́ похвалу́ сию́:

Ра́дуйся, в трео́конной ба́не купе́ль свята́го креще́ния, во и́мя Тро́ицы Пресвяты́я, изобрази́вшая; ра́дуйся, в купе́ли воды́ и Ду́ха, к си́м же и кро́ве твоея́ му́ченическия, тебе́ измы́вшая.

Ра́дуйся, я́ко треми́ о́кнами тму́ многобо́жия, Тро́ице Святе́й проти́внаго, прогна́ла еси́; ра́дуйся, я́ко о́кнами треми́ Све́т Тро́ический я́сно узре́ла еси́.

Ра́дуйся, я́ко те́ми треми́ о́кнами призре́ на тя́ Со́лнце Пра́вды, тридне́вно возсия́вшее от гро́ба; ра́дуйся, я́ко те́ми тебе́ возсия́ де́нь Тро́ическаго спасе́ния.

Ра́дуйся, се́рдце твое́ Еди́ному в Тро́ице Бо́гу всегда́ отве́рсто име́вшая; ра́дуйся, чу́вства твоя́ пред бра́нию трие́х враго́в: пло́ти, ми́ра и диа́вола, кре́пко заключи́вшая.

Ра́дуйся, я́ко в души́ твое́й три́ мы́сленная о́кна: ве́ры, наде́жды и любве́, устро́ила еси́; ра́дуйся, я́ко те́ми треми́ о́кнами при Тро́ическом Божестве́ треми́ де́ньми воздви́женную Те́ла Христо́ва Це́рковь усмотре́ла еси́.

Ра́дуйся, я́ко тебе́ небеса́ от трие́х иера́рхий а́нгельских отверзо́шася; ра́дуйся, я́ко тебе́ го́рния оби́тели Тро́ическия ра́достно прия́ша.

Ра́дуйся, Варва́ро, неве́сто Христо́ва прекра́сная.

Конда́к 4.

Бу́ря я́рости ве́лия отца́ твоего́, ды́шущаго преще́нием и уби́йством, возшуме́ на хра́м души́ твоея́, свята́я Варва́ро, но того́ не возмо́же поколеба́ти: основа́н бо бе́ на тве́рдом ве́ры Христо́вы ка́мени, на не́мже ты́, му́драя де́во, неподви́жимо стоя́щи, укрепля́ющему тя́ Иису́су Христу́ пе́снь воспева́ла еси́: Аллилу́иа.

И́кос 4.

Слы́шав от тебе́, му́дрыя дще́ри, оте́ц тво́й Диоско́р неслы́шанная о Святе́й Тро́ице словеса́, я́ко а́спид глухи́й затка́ у́ши своя́ и по подо́бию змии́ну с жа́лом ядоно́сным устреми́ся со о́стрием меча́ на твое́ уби́йство; но ты́, неве́сто Христо́ва Варва́ро, подража́ющи Жениха́ твоего́ Иису́са, бежа́вшаго от меча́ И́родова, бе́гала еси́ от меча́ Диоско́рова, жела́ющи се́рдце его́ от зве́рския я́рости в любо́вь оте́ческую обрати́ти. Мы́ же разу́мное твое́ бе́гство зва́нии почита́ем си́ми:

Ра́дуйся, блаже́нная, изгна́нная из до́му земна́го пра́вды ра́ди; ра́дуйся, бога́тая в Бо́га, лише́нная оте́ческих бога́тств Христа́ ра́ди.

Ра́дуйся, я́ко твоего́ обнища́ния е́сть Ца́рствие небе́сное; ра́дуйся, я́ко тебе́ угото́вася ве́чных бла́г сокро́вище.

Ра́дуйся, слове́сная а́гнице, от зла́го во́лка мучи́теля к До́брому Па́стырю Христу́ прибе́гшая; ра́дуйся, во дво́р пра́ведных ове́ц Его́, одесну́ю стоя́щих, вше́дшая.

Ра́дуйся, незло́бивая голуби́це, от земна́го вра́на в покро́в небе́снаго Орла́ прелете́вшая; ра́дуйся, в кро́ве крилу́ Его́ до́брый тебе́ покро́в обре́тшая.

Ра́дуйся, Небе́снаго Отца́ дщи́ честна́я, я́ко от земна́го роди́теля с безче́стием на сме́рть гони́ма была́ еси́; ра́дуйся, я́ко от безсме́ртнаго Го́спода Сла́вы в жи́знь ве́чную со сла́вою прия́та еси́.

Ра́дуйся, тоя́жде и на́м жи́зни присножела́ющая хода́таице; ра́дуйся, приле́жная о на́с к Бо́гу моли́твеннице.

Ра́дуйся, Варва́ро, неве́сто Христо́ва прекра́сная.

Конда́к 5.

Боготе́чной звезде́ была́ еси́ подо́бна, свята́я великому́ченице Варва́ро: бежа́щи бо пред отце́м твои́м, наставля́ла еси́ того́ та́инственне на пу́ть, веду́щий ко Пра́ведному Со́лнцу, от Де́вы возсия́вшему, Христу́ Бо́гу. Оба́че о́н душе́вныма ослепле́н очи́ма, а́бие и теле́сныма не узре́ тя́ пред собо́ю бежа́щую: ты́ бо сквозе́ ка́менную, тебе́ веле́нием Бо́жиим разступи́вшуюся, го́ру проше́дши, скры́лася еси́ от о́чию его́ в ка́менней пеще́ре, да от среды́ ка́мения, я́ко пти́ца, да́си гла́с Бо́гу, воспева́ющи: Аллилу́иа.

И́кос 5.

Ви́девше тя́ па́стырие, верху́ горы́ о́вцы пасу́щии, в ка́мени кры́ющуюся, дивля́хуся, глаго́люще: что́ сия́ слове́сная а́гница? Ко́его во́лка бе́гает? И се́ Диоско́р, па́че во́лка люте́йший, востече́ на го́ру, и тебе́ та́мо кры́ющуюся обре́т, и похи́тив за деви́ческия твоя́ власы́, влеча́ше ко своему́ до́му по жесто́кому пути́, на не́мже тя́, ве́рнии, срета́ем приве́тствии си́ми:

Ра́дуйся, младо́му еле́ню на гора́х арома́тских уподо́бившаяся; ра́дуйся, го́рняя, па́че до́льних, восхожде́ния в се́рдце твое́м полага́ющи, возлюби́вшая.

Ра́дуйся, избы́вшая поги́бельнаго идолослуже́ния ро́ва; ра́дуйся, на го́ру Тро́ическаго поклоне́ния восте́кшая.

Ра́дуйся, сквозе́ ка́мение проше́дшая, от каменносе́рдаго бе́гающи гоне́ния; ра́дуйся, среде́ ка́мения Ка́мень Христа́, утвержда́ющаго тя́, обре́тшая.

Ра́дуйся, в пеще́ру ка́менную вше́дшая, ви́дети Иису́са во гро́бе ка́менном бы́вша положе́нна; ра́дуйся, уже́ Того́ ви́дящая на престо́ле Сла́вы седя́ща.

Ра́дуйся, я́ко власы́ главы́ твоея́ за Христа́, храня́щаго, да и вла́с главы́ челове́ческия не поги́бнет, исто́ргани су́ть на земли́; ра́дуйся, я́ко ти́и от Христа́ изочте́ни су́ть ко увенча́нию на небеси́.

Ра́дуйся, власы́ твоя́ кро́вию до́ле, я́ко цвета́ми, обагри́вшая; ра́дуйся, заплете́ние власо́в твои́х окровавле́нных в вене́ц тебе́ златы́й обрати́вшая.

Ра́дуйся, Варва́ро, неве́сто Христо́ва прекра́сная.

Конда́к 6.

Пропове́дником богоно́сным, апо́столом Христо́вым, поревнова́вши дерзнове́нно, пред лице́м мучи́телей пропове́дала еси́ Христа́ И́стиннаго Бо́га: и Его́ ра́ди лю́тыя ра́ны, власяны́ми ру́бы и о́стрым чре́пием боле́зненно потира́емыя, му́жественно претерпе́ла еси́, свята́я Варва́ро. Та́же в темни́цу всажде́на, в не́й а́ки в черто́зе о Христе́ Иису́се ликова́ла еси́, пою́щи Ему́: Аллилу́иа.

И́кос 6.

Возсия́вый в се́рдце твое́м просвеще́ние и́стиннаго богоразу́мия, возсия́ и во очесе́х твои́х све́т Боже́ственнаго лица́ Своего́ Христо́с Госпо́дь: То́й бо, я́ко возлю́бленный тво́й Жени́х, в полу́нощи к тебе́, непоро́чней Свое́й неве́сте, в темни́цу прише́д, любе́зно тя́ посети́, от ра́н исцели́ и све́тлостию лица́ Своего́ неизрече́нно ду́шу твою́ возвесели́, на́с же, ве́рных, научи́ пе́ти тебе́ сицева́я:

Ра́дуйся, за страда́вшаго бие́ние Христа́ неща́дно бие́нная; ра́дуйся, бие́ния терпе́нием неви́димаго врага́ уби́вшая.

Ра́дуйся, я́звы Го́спода Твоего́ на те́ле твое́м носи́вшая; ра́дуйся, от все́х я́зв, Те́мжде Го́сподем, на те́ле твое́м исцеле́вшая.

Ра́дуйся, я́ко Са́м Госпо́дь, Све́т ми́ра, тебе́ в темни́це бы́вшей Себе́ яви́л е́сть; ра́дуйся, я́ко Са́м души́ и те́ла Вра́ч тебе́ больну́ю посети́л е́сть.

Ра́дуйся, чрез земну́ю темни́цу в небе́сный черто́г све́тло вше́дшая; ра́дуйся, от крове́й твои́х бра́чную тебе́ оде́жду истка́вшая.

Ра́дуйся, я́ко тобо́ю от мно́гих ра́н гре́шнии исцеля́ются; ра́дуйся, я́ко тобо́ю от все́х боле́зней с ве́рою тя́ призыва́ющии уздравля́ются.

Ра́дуйся, у́з грехо́вных ско́рая реши́тельнице; ра́дуйся, я́зв многозло́бных до́брая целе́бнице.

Ра́дуйся, Варва́ро, неве́сто Христо́ва прекра́сная.

Конда́к 7.

Хотя́щу безу́мному мучи́телю жела́ние свое́ улучи́ти, и еще́ покуша́ющемуся ласка́тельными словесы́ тебе́, свята́я Варва́ро, от И́стиннаго Бо́га отврати́ти ко преле́стным и́долом, ты́, я́ко му́драя де́ва, отвеща́ла еси́ тому́: пе́рвее тве́рдый адама́нт в мя́гкий во́ск претвори́ши, не́жели мене́ отврати́ши от Христа́ Бо́га моего́; Того́ бо, со Отце́м и Святы́м Ду́хом, Еди́наго И́стиннаго Бо́га испове́дую, сла́влю, хвалю́, и пою́ Ему́: Аллилу́иа.

И́кос 7.

Но́вую показа́ безчелове́чия я́рость зверообра́зный мучи́тель, егда́ тебе́, свята́я великому́ченице Варва́ро, повеле́ на дре́ве пове́сити, и ногтьми́ желе́зными те́ло твое́ строга́ти, и свеща́ми горя́щими твоя́ опаля́ти ре́бра, еще́ же и мла́том во главу́ тя́жко би́ти. Сие́ пачеесте́ственное терпе́ние твое́ благогове́йно воспомина́юще, похвала́ми блажи́м тя́ си́ми:

Ра́дуйся, я́ко пове́шена была́ еси́ на дре́ве, Христа́ ра́ди на Кресте́ распя́таго; ра́дуйся, стро́гана по ре́бром Иису́са ра́ди, копие́м в ре́бра прободе́ннаго.

Ра́дуйся, я́ко о́гнь любве́ к Бо́гу в се́рдце твое́м возжегла́ еси́; ра́дуйся, я́ко за Того́ о́гненными свеща́ми пали́ма была́ еси́.

Ра́дуйся, тверде́йшая адама́нта в терпе́нии невреди́мом; ра́дуйся, крепча́йшая ка́меннаго столпа́ в му́жестве непоколеби́мом.

Ра́дуйся, я́ко мла́том, би́вшим тя́ по главе́, вене́ц Ца́рствия тебе́ искова́ся; ра́дуйся, я́ко те́мже мла́том глава́ врага́ твоего́ сокруши́ся.

Ра́дуйся, я́ко со Христо́м, Его́ ра́ди, на земли́ страда́ла еси́; ра́дуйся, я́ко с Ни́м и о Не́м на небеси́ прославля́ешися.

Ра́дуйся, все́х враго́в на́ших кре́пкая победи́тельнице; ра́дуйся, во все́х беда́х на́ших ско́рая помо́щнице.

Ра́дуйся, Варва́ро, неве́сто Христо́ва прекра́сная.

Конда́к 8.

Стра́нное и стра́шное святы́я Варва́ры страда́ние ви́дящи, благове́рная в жена́х Иулиани́я удиви́ся зело́, ка́ко млада́ отрокови́ца в ю́ностнем телеси́ таковы́я му́жественно за Христа́ терпи́т му́ки? Та́же, сле́знаго испо́лнившися умиле́ния, благода́рственно и та́ возопи́ Христу́ Бо́гу: Аллилу́иа.

И́кос 8.

Ве́сь Сладча́йший Иису́с сла́дость, ве́сь жела́ние тебе́ бы́сть, свята́я Варва́ро; сла́дце бо Его́ ра́ди го́рькия терпе́ла еси́ му́ки, глаго́лющи: ча́шу страда́ний, ю́же даде́ ми́ Возлю́бленный мо́й Жени́х, не и́мам ли пи́ти? Те́мже и сама́ показа́лася еси́ ча́ша, сла́дость чуде́сных исцеле́ний излива́ющая все́м вопию́щим к тебе́ сицева́я:

Ра́дуйся, отве́ргшая во а́дское го́ре и́дольскую го́ресть; ра́дуйся, возлюби́вшая небе́сную Иису́сову сла́дость.

Ра́дуйся, мы́сленная ста́мно, ма́нну бра́шна творе́ния во́ли Бо́жия в себе́ иму́щая; ра́дуйся, ве́рных во благи́х жела́ние исполня́ющая.

Ра́дуйся, реко́ испо́лненная благода́ти Бо́жия вода́ми; ра́дуйся, исто́чниче, кипя́щий чуде́с излия́нии.

Ра́дуйся, я́ко пчела́, от злово́ннаго и́дольских же́ртв ды́ма отлете́вшая; ра́дуйся, во благоуха́нную ми́ра Христо́ва воню́ сла́дце прите́кшая.

Ра́дуйся, я́ко твои́ми во все́м те́ле я́звами была́ еси́ подо́бна со́ту; ра́дуйся, я́ко кро́ве твоея́ ка́пли сладча́йшия па́че ме́да бы́ша Пресла́дкому Иису́су.

Ра́дуйся, я́ко все́м ве́рным воспомина́ние твое́ пресла́дко; ра́дуйся, я́ко все́й Це́ркви Христо́вой и́мя твое́ прече́стно.

Ра́дуйся, Варва́ро, неве́сто Христо́ва прекра́сная.

Конда́к 9.

Все́ естество́ а́нгельское ве́лиею возра́довася ра́достию, узре́вши му́жественную кре́пость твою́, свята́я и непобеди́мая му́ченице Варва́ро: ви́девше бо а́нгельстии чи́нове ве́тхаго врага́, прего́рдаго кня́зя тмы́, со все́м его́ бесо́вским и и́дольским по́лчищем от тебе́, еди́ныя млады́я де́вы, посра́мленнаго, побежде́ннаго же и под но́зе твои́ пове́рженнаго, ве́лиим гла́сом возопи́ша Бо́гу: Аллилу́иа.

И́кос 9.

Вети́и многовеща́ннии ри́торскими свои́ми язы́ки не возмо́гут изрещи́ вели́чества твои́х боле́зненных страда́ний, о Варва́ро! Кто́ бо ска́жет боле́знь твою́, коли́ка бе́, егда́ сосца́ твоя́ уре́зана бы́ша? Кто́ изрече́т сту́д лица́ деви́ческаго, егда́ обнаже́на по всему́ гра́ду от беззако́нных мучи́телей води́ма была́ еси́? Сицеву́ю боле́знь и безче́стие твое́ мы́ то́чию воспомяну́вше, содрога́емся и со умиле́нием глаго́лем си́це:

Ра́дуйся, до́брая ле́торасле са́да Иису́сова; ра́дуйся, и́стинная лозо́ виногра́да Христо́ва.

Ра́дуйся, два́ сосца́ твоя́ отре́занная, а́ки два́ гре́зна в че́сть Го́сподеви твоему́ прине́сшая; ра́дуйся, кро́вь твою́, а́ки вино́ умиле́ния, от те́х источи́вшая.

Ра́дуйся, я́ко Христа́ ра́ди обнаже́ннаго и ты́ ри́з твои́х совлече́на была́ еси́; ра́дуйся, я́ко Его́ ра́ди, во Иерусали́ме руга́тельне води́маго, и ты́ по гра́ду на поруга́ние води́ма была́ еси́.

Ра́дуйся, от а́нгела све́тлою оде́ждою в наготе́ твое́й оде́янная; ра́дуйся, то́ю от сту́дных оче́с неви́димо покрове́нная.

Ра́дуйся, чу́дный а́нгелом и челове́ком позо́р бы́вшая; ра́дуйся, и саме́х мучи́телей терпе́нием твои́м удиви́вшая.

Ра́дуйся, я́ко Са́м Госпо́дь свы́ше призре́ на твоя́ страда́ния; ра́дуйся, я́ко Са́м То́й Подвигополо́жник похвали́ по́двиги твоя́.

Ра́дуйся, Варва́ро, неве́сто Христо́ва прекра́сная.

Конда́к 10.

Спасти́ хотя́ ду́шу твою́, о те́ле твое́м вся́чески неради́ла еси́, свята́я Варва́ро: егда́ бо на тя́ ме́чное на сме́рть осужде́ние изы́де, ты́ под ме́чь о́стрый, а́ки под вене́ц, кра́сный, ра́достно иду́щи, Бо́гу, в му́ченическом по́двизе тебе́ укрепля́ющему, воспева́ла еси́ пе́снь: Аллилу́иа.

И́кос 10.

Стены́ ка́менныя тве́рдее окамене́нный се́рдцем бы́сть Диоско́р, тво́й, свята́я Варва́ро, не уже́ роди́тель, но лю́тый мучи́тель: то́й бо, я́ко услы́ша твое́ ме́чное на сме́рть осужде́ние, не то́чию о сме́рти твое́й не поболе́, но и са́м свои́м мече́м на ме́сте осужде́ния твою́ святу́ю усече́ главу́, и та́ко, по предрече́нию Госпо́дню, окая́нный оте́ц предаде́ на сме́рть свое́ ча́до. В то́й у́бо блаже́нней твое́й кончи́не приими́ от на́с пе́ния сия́:

Ра́дуйся, за главу́ Це́ркве — Христа́ под ме́чь главу́ твою́ прекло́ншая; ра́дуйся, за любо́вь к небе́сному человеколюби́вому Отцу́ Безсме́ртному на сме́рть от земна́го безчелове́чнаго отца́ тле́ннаго пре́данная.

Ра́дуйся, тече́ние му́ченическаго пути́ сконча́вшая до́бре; ра́дуйся, ве́ру безсме́ртному Обру́чнику Христу́ до сме́рти сохра́ншая бо́дре.

Ра́дуйся, си́лою свы́ше на бра́нь проти́ву си́л преиспо́дних препоя́санная; ра́дуйся, победоно́сною сла́вою в вы́шних от Христа́ Победи́теля оде́янная.

Ра́дуйся, ору́жием благоволе́ния Бо́жия венча́нная на земли́; ра́дуйся, цве́том нетле́ния украше́нная на небеси́.

Ра́дуйся, де́вам добро́то и похвале́ние; ра́дуйся, му́чеником красото́ и ра́дование.

Ра́дуйся, христиа́ном кре́пкое прибе́жище; ра́дуйся, ве́рным тве́рдое заступле́ние.

Ра́дуйся, Варва́ро, неве́сто Христо́ва прекра́сная.

Конда́к 11.

Пе́ние на́ше похва́льное, а́ще бы и тмочи́сленное, ве́мы, я́ко не́сть дово́льно по достоя́нию восхвали́ти тя́, свята́я и всехва́льная му́ченице Варва́ро; оба́че мы́, Бо́жиих тобо́ю на́м оби́льно подава́емых дарова́ний благода́рни су́ще, Бо́гу, в тебе́ Свои́ми благодея́нии прославля́емому, благода́рственными усты́ пое́м: Аллилу́иа.

И́кос 11.

Светоприе́мную свещу́, на небе́сном све́щнице пред престо́лом Святы́я Тро́ицы поста́вленную, зри́м у́мныма очи́ма тебе́, свята́я де́во Варва́ро: отону́дуже, егда́ нощны́й грехо́в на́ших мра́к луча́ми моли́тв твои́х просвеща́еши и на́с на све́тлую спасе́ния стезю́ наставля́еши, по до́лгу досто́йна еси́ от на́с зва́нием бы́ти почита́ема си́м:

Ра́дуйся, светоу́мная луче́, во све́тлость немерца́ющую прилуче́нная; ра́дуйся, мы́сленная денни́це, де́нь невече́рний озаря́ти возше́дшая.

Ра́дуйся, благово́нная сми́рно, Це́рковь Христо́ву благоуха́ющая; ра́дуйся, злата́я кади́льнице, фимиа́м моли́твы о на́с к Бо́гу принося́щая.

Ра́дуйся, мирополо́жнице исцеле́ний неоску́дная; ра́дуйся, сокро́вище Бо́жиих даро́в неиждиви́тельное.

Ра́дуйся, ча́ше, от оби́лия до́му Бо́жия че́рплющая ра́дость; ра́дуйся, сосу́де, от исполне́ния Христо́ва прие́млющий все́х бла́г небе́сных сла́дость.

Ра́дуйся, адама́нте, пе́рстень безсме́ртнаго со Христо́м обруче́ния украси́вый; ра́дуйся, ве́нче добро́ты, в руце́ Госпо́дней держи́мый.

Ра́дуйся, я́ко на тя́ Ца́рь Сла́вы, Госпо́дь си́л, сла́ву и велеле́пие возложи́л е́сть; ра́дуйся, я́ко тебе́ Ца́рь ца́рствующих и Госпо́дь госпо́дствующих Ца́рство Свое́ и госпо́дствие дарова́л е́сть.

Ра́дуйся, Варва́ро, неве́сто Христо́ва прекра́сная.

Конда́к 12.

Благода́ть от Бо́га дана́ ти́ е́сть, храни́ти и соблюда́ти от внеза́пныя боле́зни и на́глыя сме́рти вся́каго челове́ка, ве́рою, любо́вию и благогове́нием честна́я твоя́ страда́ния воспомина́ющаго и почита́ющаго; тоя́ благода́ти не лиши́ и на́с, до́брая де́во Варва́ро, да и мы́, здра́ви су́ще те́лом и ду́хом в ны́нешней и бу́дущей жи́зни о тебе́ пое́м Бо́гу: Аллилу́иа.

И́кос 12.

Пое́м твоя́ кре́пкия по́двиги, почита́ем страда́ния, хва́лим долготерпе́ние, ублажа́ем святу́ю твою́ кончи́ну, сла́вим твое́ в немощно́м те́ле показа́вшееся непобеди́мое му́жество, и́мже на земли́ и на небеси́ просла́вилася еси́, свята́я и добропобе́дная великому́ченице Варва́ро, и в че́сть твои́х победоно́сных по́двигов и страда́ний похва́льная воспису́ем ти́ сия́:

Ра́дуйся, от а́нгельских чино́в в сожи́тельство и́х любе́зно прия́тая; ра́дуйся, от де́вственных лико́в в черто́г небе́сный ра́достно введе́нная.

Ра́дуйся, от му́ченических полко́в под вене́ц сла́вы провожда́емая во гла́се ра́дования; ра́дуйся, от все́х жи́телей небе́сных прие́мшая о Го́споде целова́ние.

Ра́дуйся, я́ко мзда́ твоя́ мно́га е́сть на небесе́х; ра́дуйся я́ко ра́дость твоя́ ве́чна е́сть во све́тлости святы́х.

Ра́дуйся, от вра́г ви́димых и неви́димых кре́пкая на́м засту́пнице; ра́дуйся, ра́дости на́м, благода́ти же и сла́вы ве́чныя хода́таице.

Ра́дуйся, душе́вных и теле́сных неду́гов на́ших цели́тельнице; ра́дуйся, спаси́тельных бла́г земны́х и небе́сных пода́тельнице.

Ра́дуйся, я́ко тобо́ю от неча́янныя и ве́чныя сме́рти сохране́ни бы́ти упова́ем; ра́дуйся, я́ко тобо́ю ве́чную жи́знь улучи́ти благонаде́жно ча́ем.

Ра́дуйся, Варва́ро, неве́сто Христо́ва прекра́сная.

Конда́к 13.

О, многострада́льная и всехва́льная свята́я великому́ченице Варва́ро! Ны́нешнее на́ше моле́ние прие́мши, от вся́ких боле́зней душе́вных и теле́сных, и вра́г ви́димых и неви́димых на́с изба́ви, и от ве́чнаго муче́ния твои́м богоприя́тным хода́тайством сохрани́, да с тобо́ю на земли́ живы́х во ве́ки пое́м Бо́гу: Аллилу́иа.

Этот конда́к читается трижды, затем 1-й и конда́к 1-й.

Моли́тва ко святе́й великому́ченице Варва́ре.

Свята́я сла́вная и всехва́льная великому́ченице Христо́ва Варва́ро! Со́браннии дне́сь в хра́ме твое́м Боже́ственном лю́ди, и ра́це моще́й твои́х покланя́ющиися и любо́вию целу́ющии, страда́ния же твоя́ му́ченическая, и в ни́х Сама́го Страстополо́жника Христа́, да́вшаго тебе́ не то́чию е́же в Него́ ве́ровати, но и е́же по Не́м страда́ти, похвала́ми ублажа́ющии, мо́лим тя́, изве́стная жела́ния на́шего хода́таице: моли́ с на́ми и о на́с умоля́емаго от своего́ благоутро́бия Бо́га, да ми́лостивно услы́шит на́с, прося́щих Его́ благосты́ню, и не отста́вит от на́с вся́ ко спасе́нию и житию́ ну́ждная проше́ния, и да́рует христиа́нскую кончи́ну животу́ на́шему безболе́зненну, непосты́дну, ми́рну, Боже́ственных Та́ин прича́стну, и все́м на вся́ком ме́сте, во вся́кой ско́рби и обстоя́нии, тре́бующим Его́ человеколю́бия и по́мощи, вели́кую Свою́ пода́ст ми́лость, да благода́тию Бо́жиею и твои́м те́плым предста́тельством, душе́ю и те́лом всегда́ здра́ви пребыва́юще, сла́вим ди́внаго во святы́х Свои́х Бо́га Изра́илева, не удаля́ющаго по́мощи Своея́ от на́с всегда́, ны́не и при́сно и во ве́ки веко́в. Ами́нь.

Моли́тва втора́я ко святе́й великому́ченице Варва́ре.

Прему́драя и всекра́сная свята́я великому́ченице Христо́ва Варва́ро! Блаже́нна еси́, я́ко преми́рная му́дрости Бо́жия пло́ть и кро́вь не яви́ тебе́, но Са́м Бо́г Оте́ц Небе́сный, И́же тебе́, ве́ры ра́ди от неве́рнаго отца́ оста́вленную, изгна́нную и умерщвле́нную, в дще́рь Себе́ возлю́бленную прия́т: за тле́нное земна́го име́ния насле́дие пло́ти нетле́ние дарова́; труды́ му́ченическия упокое́нием небе́снаго измени́ Ца́рствия; вре́менное твое́ житие́, сме́ртию Его́ ра́ди пресече́нное, сицево́ю возпросла́ви по́честию, я́ко ду́шу с ли́ки небе́сных вчини́ духо́в, те́ло же, на земли́ в хра́ме и́х а́нгельском положе́нное, а́нгелом запове́да сохрани́ти це́ло, че́стно и многочуде́сно. Блаже́нна еси́, Христу́ Сы́ну Бо́жию, Жениху́ небе́сному уневеще́нная де́во, Его́же добро́ты твоея́ рачи́теля име́ти жела́ющи, всю́ себе́ страда́нием, ра́нами, у́дов ре́занием и са́мыя главы́ усече́нием, а́ки у́тварьми дража́йшими потща́лася еси́ украси́ти; да та́ко, я́ко жена́ ве́рна главе́ свое́й му́жу, Христу́ ду́хом и те́лом соедини́шися неразлу́чно, глаго́лющи: обрето́х, Его́же возлюби́ душа́ моя́, удержа́х Его́, и не оста́вих Его́. Блаже́нна еси́, я́ко Святы́й Ду́х на тебе́ почи́л е́сть, и́мже духо́вными духо́вная разсужда́ти науче́на, вся́ ду́хи лука́вствия во и́долах, я́ко па́губныя отри́нула еси́, и еди́наго Бо́га Ду́ха позна́вши, я́ко и́стинная покло́нница, ду́хом и и́стиною кла́нятися изво́лила еси́, пропове́днически глаго́лющи: Тро́ицу чту́, еди́но Божество́. Сию́ Святу́ю Тро́ицу, Ю́же в животе́ и сме́рти испове́данием и страда́нием свои́м просла́вила еси́, умоли́ о мне́, предста́тельнице моя́, я́ко да и а́з всегда́ тро́йственною, ве́ры, любве́ и наде́жды, ту́южде Святу́ю Тро́ицу почита́ю доброде́телию. И́мам свети́льник ве́ры, но пра́зден благи́х де́л еле́я, ты́, му́драя де́во, страда́льческую пло́ть твою́, кро́ве испо́лненну и ра́нами прелива́ющуся, а́ки свети́льник иму́щая, да́ждь от еле́я твоего́, да те́м душе́вную мою́ свещу́ украси́вши, сподо́блюся по тебе́ вни́ти в черто́г небе́сный. Пресе́льник а́з е́смь на земли́ и пришле́ц, я́коже вси́ отцы́ мои́; бла́г ве́чных насле́днице и, блаже́нная, обе́да в Ца́рствии небе́сном прича́стнице, я́ко в стра́нствии жития́, трапе́зы боже́ственныя угоще́ния, си́це и во исхо́де от ми́ра, жела́емаго сподо́би мя́ напу́тствования; и егда́ в коне́ц сно́м сме́рти начну́ усыпа́ти, косни́ся тогда́ изнемога́ющия пло́ти моея́, я́ко иногда́ а́нгел Илии́, глаго́лющи: воста́ни, я́ждь и пи́й, я́ко да благода́тию боже́ственных Те́ла и Кро́ве та́ин укрепле́н, преиду́ в кре́пости я́ди тоя́ дале́кий пу́ть сме́рти, да́же до горы́ небе́сныя; и та́мо, Его́же ты́ чрез три́ о́кна ба́нныя пре́жде ве́рою Бо́га Тро́ицу узре́ла еси́, Сего́ ку́пно с тобо́ю лице́м к лицу́ да удосто́юся ви́дети, и сла́вити Его́ в несконча́емыя ве́ки, ами́нь.

А҆ка́ѳїстъ ст҃ѣ́й великомч҃нцѣ варва́рѣ.

Конда́къ а҃.

И҆збра́нной бг҃омъ ѿ і҆дѡлослꙋжи́тельнагѡ ро́да и҆ призва́нной во ꙗ҆зы́къ ст҃ъ, въ лю́ди ѡ҆бновле́нїѧ, невѣ́стѣ хрⷭ҇то́вѣ, ꙗ҆́кѡ и҆збавлѧ́ющїисѧ тобо́ю ѿ разли́чныхъ ѕѡ́лъ и҆ ѡ҆бстоѧ́нїѧ, бл҃года́рствєннаѧ пѣ̑нїѧ и҆ хвалє́нїѧ восписꙋ́емъ тѝ моли́твєнницы твоѝ, ст҃а́ѧ и҆ всехва́льнаѧ великомч҃нце, ты́ же и҆мꙋ́щи дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ свободѝ, да съ ра́достїю зове́мъ тѝ:

Ра́дꙋйсѧ, варва́ро, невѣ́сто хрⷭ҇то́ва прекра́снаѧ.

І҆́косъ а҃.

А҆́гг҃лѡвъ чⷭ҇тнꙋ́ю и҆ вселюбе́знꙋю чистотꙋ̀ непоро́чнѡ сохра́нши, чтⷭ҇на́ѧ варва́ро, а҆́гг҃лѡмъ сожи́тельница бы́ти сподо́биласѧ є҆сѝ, съ ни́миже є҆гда̀ пое́ши трⷪ҇ческꙋю пѣ́снь бг҃ꙋ на нб҃сѝ, ᲂу҆слы́ши на́съ, пою́щихъ тебѣ̀ на землѝ похва̑льнаѧ пѣ̑нїѧ сїѧ̑:

Ра́дꙋйсѧ, ѻ҆трокови́це, бг҃омъ ѻ҆ц҃е́мъ пред̾ꙋста́вленнаѧ бы́ти соѻбра́зна въ страда́нїи ѻ҆́бразꙋ сн҃а є҆гѡ̀: ра́дꙋйсѧ, сн҃омъ бж҃їимъ, свѣ́томъ ѿ свѣ́та, призва́ннаѧ и҆з̾ тмы̀ въ чꙋ́дный свѣ́тъ вѣ́ры и҆ бл҃года́ти є҆гѡ̀.

Ра́дꙋйсѧ, ꙗ҆́кѡ позва́вшемꙋ тѧ̀ ст҃о́мꙋ дх҃ꙋ, и҆ сама̀ тѣ́ломъ и҆ дх҃омъ ст҃а̀ є҆сѝ: ра́дꙋйсѧ, ꙗ҆́кѡ ѿ скве́рны пло́ти и҆ дꙋ́ха непоро́чнꙋ тѧ̀ соблюла̀ є҆сѝ.

Ра́дꙋйсѧ, рожде́нномꙋ ѿ дв҃ы женихꙋ̀ хрⷭ҇тꙋ̀ дв҃ꙋ тѧ̀ чи́стꙋю ѡ҆брꙋчи́вшаѧ: ра́дꙋйсѧ, земна́гѡ ѡ҆брꙋ́чника па́че нбⷭ҇нагѡ зна́ти не восхотѣ́вшаѧ.

Ра́дꙋйсѧ, крі́не двⷭ҇тва, посредѣ̀ те́рнїѧ і҆́дѡльскагѡ прора́стшїй до́лѣ: ра́дꙋйсѧ, цвѣ́те чⷭ҇тоты̀, въ неꙋвѧда́емой сла́вѣ цвѣтꙋ́щїй горѣ̀.

Ра́дꙋйсѧ, въ нбⷭ҇номъ вертогра́дѣ хрⷭ҇то́ва бл҃гоꙋха́нїѧ наслажда́ющаѧсѧ: ра́дꙋйсѧ, краснѣ́йшагѡ па́че сынѡ́въ чл҃вѣ́ческихъ зрѣ́нїемъ та́мѡ ᲂу҆тѣша́ющаѧсѧ.

Ра́дꙋйсѧ, ᲂу҆бѣли́вшаѧ ри̑зы твоѧ̑ въ кро́ви а҆́гнчей на землѝ: ра́дꙋйсѧ, въ ли́цѣ дѣ́вственномъ послѣ́дꙋющаѧ бж҃їемꙋ а҆́гнцꙋ на нб҃сѝ.

Ра́дꙋйсѧ, варва́ро, невѣ́сто хрⷭ҇то́ва прекра́снаѧ.

Конда́къ в҃.

Ви́дѧщи ст҃а́ѧ варва́ра себѐ на высо́комъ столпѣ̀ ѿ ѻ҆тца̀ поста́вленꙋ, помышлѧ́ше себѐ ма́нїемъ бж҃їимъ къ нб҃сѝ бы́ти возводи́мꙋ. разꙋ́мнаѧ ᲂу҆́бѡ восхождє́нїѧ въ се́рдцѣ свое́мъ поло́жши, тѣ́ми ѿ тмы̀ ко свѣ́тꙋ и҆ ѿ преле́стныхъ і҆́дѡлѡвъ ко и҆́стинномꙋ бг҃ꙋ ᲂу҆́мнѣ восхожда́ше, пою́щи є҆мꙋ̀: А҆ллилꙋ́їа.

І҆́косъ в҃.

Ра́зꙋмъ неꙋразꙋмѣ́нный ѡ҆ є҆ди́номъ всеѧ̀ тва́ри творцѣ̀ разꙋмѣ́ти дѣ́ва ст҃а́ѧ варва́ра и҆́щꙋщи, бесѣ́доваше со свои́мъ сѝ ра́зꙋмомъ, гл҃ѧ: ѿ те́мныхъ кꙋмі́рѡвъ чꙋ́днымъ свѣти́ламъ нб҃снымъ ка́кѡ бѣ̀ созда́тисѧ мо́щно, рцы̀ мѝ. къ не́йже ѻ҆́нъ со ѱало́мникомъ речѐ: всѝ бо́зи ꙗ҆зы̑къ, бѣ́сове, є҆ди́нъ же є҆́сть бг҃ъ и҆ гдⷭ҇ь, и҆́же нб҃са̀ и҆ всѧ̑ свѣти́ла и҆́хъ сотворѝ. таково́мꙋ твоемꙋ̀, мꙋ́драѧ дв҃о, ра́зꙋмꙋ дивѧ́щесѧ, глаго́лемъ:

Ра́дꙋйсѧ, па́че ста́рєцъ і҆дѡлослꙋжи́тельныхъ разꙋ́мнѣйшаѧ: ра́дꙋйсѧ, па́че мꙋдрецє́въ мі́ра сегѡ̀ мꙋдрѣ́йшаѧ.

Ра́дꙋйсѧ, ꙗ҆́кѡ тебѣ̀ безвѣ̑стнаѧ и҆ та̑йнаѧ премꙋ́дрости своеѧ̀ бг҃ъ ꙗ҆ви́лъ є҆́сть: ра́дꙋйсѧ, ꙗ҆́кѡ тебѐ и҆́стиннагѡ бг҃осло́вїѧ са́мъ бг҃ъ сло́во наꙋчи́лъ є҆́сть.

Ра́дꙋйсѧ, всѣ́хъ ѕвѣздоче́тцєвъ ᲂу҆мо́мъ хрⷭ҇то́вымъ превозше́дшаѧ: ра́дꙋйсѧ, ꙗ҆́вственнѣе па́че ѻ҆́нѣхъ нбⷭ҇ный крꙋ́гъ прозрѣ́вшаѧ.

Ра́дꙋйсѧ, ꙗ҆́кѡ въ тва́ри, а҆́ки въ зерца́лѣ, самагѡ̀ творца̀ ᲂу҆смотрѣ́ла є҆сѝ: ра́дꙋйсѧ, ꙗ҆́кѡ въ созда́нныхъ свѣти́лахъ несозда́нный свѣ́тъ ᲂу҆зрѣ́ла є҆сѝ.

Ра́дꙋйсѧ, ны́нѣ ᲂу҆жѐ кромѣ̀ зерца́ла свѣ́тъ лица̀ бж҃їѧ на нб҃сѝ зрѧ́щаѧ: ра́дꙋйсѧ, тѣ́мъ свѣ́томъ неизрече́ннѡ веселѧ́щаѧсѧ.

Ра́дꙋйсѧ, ᲂу҆́мнаѧ ѕвѣздо̀, є҆ѧ́же ѡ҆заре́нїемъ лицѐ бж҃їе, ꙗ҆́кѡ сл҃нце, свѣ́тлѡ на́мъ ꙗ҆влѧ́етсѧ: ра́дꙋйсѧ, мы́сленнаѧ лꙋно̀, є҆́юже но́щь заблꙋжде́нїѧ ꙗ҆́кѡ де́нь просвѣща́етсѧ.

Ра́дꙋйсѧ, варва́ро, невѣ́сто хрⷭ҇то́ва прекра́снаѧ.

Конда́къ г҃.

Си́ла вы́шнѧго дадѐ тогда̀ ст҃ѣ́й варва́рѣ, ꙗ҆́коже дре́влѣ прⷪ҇ро́кꙋ і҆езекі́илю, лицѐ а҆дама́нтово, си́льно пред̾ всѣ́ми і҆дѡлослꙋжи́тельми, во є҆́же не ᲂу҆боѧ́тисѧ є҆́й ѿ ѕвѣ́рскагѡ лица̀ и҆́хъ, ни ᲂу҆жаса́тисѧ лю́тагѡ преще́нїѧ. тѣ́мже со дерзнове́нїемъ мꙋжемꙋ́дреннаѧ дв҃а взыва́ше: трⷪ҇цꙋ чтꙋ̀, є҆ди́но бж҃ество̀, и҆ то́й вѣ́рою покланѧ́ющисѧ, велегла́снѡ пою̀: А҆ллилꙋ́їа.

І҆́косъ г҃.

И҆мꙋ́щи ст҃а́ѧ варва́ра свы́ше да́ннꙋю себѣ̀ мⷣрость, востечѐ къ дѣ́лателємъ ба́ни ѻ҆те́ческїѧ, и҆ ѻ҆́нѣмъ проѧвлѧ́ѧ та́йнꙋ ст҃ы́ѧ трⷪ҇цы, повелѣ̀ трѝ ѻ҆́кна въ ба́нѣ ᲂу҆стро́ити. а҆́ще, речѐ, і҆дѡлослꙋжи́телїє ᲂу҆ста̀ и҆́мꙋтъ и҆ не глаго́лютъ сла́вы и҆́стиннагѡ бг҃а, то ка́менныѧ въ се́й ба́нѣ стѣ́ны тремѝ ѻ҆́кнами, а҆́ки тремѝ ᲂу҆стна́ми, да свидѣ́тельствꙋютъ, ꙗ҆́кѡ є҆ди́нъ є҆́сть бг҃ъ, въ трⷪ҇цѣ ст҃ѣ́й ѿ всеѧ̀ тва́ри сла́вимый и҆ покланѧ́емый. за таково́е ᲂу҆̀бо мꙋдрова́нїе, ст҃а́ѧ варва́ро, прїимѝ похвалꙋ̀ сїю̀:

Ра́дꙋйсѧ, въ треѻ́конной ба́нѣ кꙋпѣ́ль ст҃а́гѡ кр҃ще́нїѧ, во и҆́мѧ трⷪ҇цы прест҃ы́ѧ, и҆зѻбрази́вшаѧ: ра́дꙋйсѧ, въ кꙋпѣ́ли воды̀ и҆ дх҃а, къ си́мъ же и҆ кро́ве твоеѧ̀ мꙋ́ченическїѧ, тебѐ и҆змы́вшаѧ.

Ра́дꙋйсѧ, ꙗ҆́кѡ тремѝ ѻ҆́кнами тмꙋ̀ многобо́жїѧ, трⷪ҇цѣ ст҃ѣ́й проти́внагѡ, прогна́ла є҆сѝ: ра́дꙋйсѧ, ꙗ҆́кѡ ѻ҆́кнами тремѝ свѣ́тъ трⷪ҇ческїй ꙗ҆́снѡ ᲂу҆зрѣ́ла є҆сѝ.

Ра́дꙋйсѧ, ꙗ҆́кѡ тѣ́ми тремѝ ѻ҆́кнами призрѣ̀ на тѧ̀ сл҃нце пра́вды, тридне́внѡ возсїѧ́вшее ѿ гро́ба: ра́дꙋйсѧ, ꙗ҆́кѡ тѣ́ми тебѣ̀ возсїѧ̀ де́нь трⷪ҇ческагѡ спасе́нїѧ.

Ра́дꙋйсѧ, срⷣце твоѐ є҆ди́номꙋ въ трⷪ҇цѣ бг҃ꙋ всегда̀ ѿве́рсто и҆мѣ́вшаѧ: ра́дꙋйсѧ, чꙋ̑вства твоѧ̑ пред̾ бра́нїю трїе́хъ врагѡ́въ, пло́ти, мі́ра и҆ дїа́вола, крѣ́пкѡ заключи́вшаѧ.

Ра́дꙋйсѧ, ꙗ҆́кѡ въ дꙋшѝ твое́й трѝ мы́слєннаѧ ѻ҆́кна, вѣ́ры, наде́жды и҆ любвѐ, ᲂу҆стро́ила є҆сѝ: ра́дꙋйсѧ, ꙗ҆́кѡ тѣ́ми тремѝ ѻ҆́кнами при трⷪ҇ческомъ бж҃ествѣ̀ тремѝ де́ньми воздви́женнꙋю тѣ́ла хрⷭ҇то́ва цр҃ковь ᲂу҆смотрѣ́ла є҆сѝ.

Ра́дꙋйсѧ, ꙗ҆́кѡ тебѣ̀ нб҃са̀ ѿ трїе́хъ і҆ера́рхїй а҆́гг҃льскихъ ѿверзо́шасѧ: ра́дꙋйсѧ, ꙗ҆́кѡ тебѐ гѡ́рнїѧ ѻ҆би́тєли трⷪ҇чєскїѧ ра́достнѡ прїѧ́ша.

Ра́дꙋйсѧ, варва́ро, невѣ́сто хрⷭ҇то́ва прекра́снаѧ.

Конда́къ д҃.

Бꙋ́рѧ ꙗ҆́рости ве́лїѧ ѻ҆тца̀ твоегѡ̀, ды́шꙋщагѡ преще́нїемъ и҆ ᲂу҆бі́йствомъ, возшꙋмѐ на хра́мъ дꙋшѝ твоеѧ̀, ст҃а́ѧ варва́ро, но тогѡ̀ не возмо́же поколеба́ти: ѡ҆снова́нъ бо бѣ̀ на тве́рдомъ вѣ́ры хрⷭ҇то́вы ка́мени, на не́мже ты̀, мꙋ́драѧ дв҃о, неподви́жимѡ стоѧ́щи, ᲂу҆крѣплѧ́ющемꙋ тѧ̀ і҆и҃сꙋ хрⷭ҇тꙋ̀ пѣ́снь воспѣва́ла є҆сѝ: А҆ллилꙋ́їа.

І҆́косъ д҃.

Слы́шавъ ѿ тебє̀, мꙋ́дрыѧ дще́ри, ѻ҆те́цъ тво́й дїоско́ръ неслы́шаннаѧ ѡ҆ ст҃ѣ́й трⷪ҇цѣ словеса̀, ꙗ҆́кѡ а҆́спїдъ глꙋхі́й затка̀ ᲂу҆́ши своѧ̑ и҆ по подо́бїю ѕмїи́нꙋ съ жа́ломъ ꙗ҆доно́снымъ, ᲂу҆стреми́сѧ со ѻ҆́стрїемъ меча̀ на твоѐ ᲂу҆бі́йство: но ты̀, невѣ́сто хрⷭ҇то́ва варва́ро, подража́ющи жениха̀ твоего̀ і҆и҃са, бѣжа́вшаго ѿ меча̀ и҆́родова, бѣ́гала є҆сѝ ѿ меча̀ дїоско́рова, жела́ющи се́рдце є҆гѡ̀ ѿ ѕвѣ́рскїѧ ꙗ҆́рости въ любо́вь ѻ҆те́ческꙋю ѡ҆брати́ти. мы́ же разꙋ́мное твоѐ бѣ́гство зва́нїи почита́емъ си́ми:

Ра́дꙋйсѧ, бл҃же́ннаѧ, и҆згна́ннаѧ и҆з̾ до́мꙋ земна́гѡ пра́вды ра́ди: ра́дꙋйсѧ, бога́таѧ въ бг҃а, лише́ннаѧ ѻ҆те́ческихъ бога́тствъ хрⷭ҇та̀ ра́ди.

Ра́дꙋйсѧ, ꙗ҆́кѡ твоегѡ̀ ѡ҆бнища́нїѧ є҆́сть црⷭ҇твїе нбⷭ҇ное: ра́дꙋйсѧ, ꙗ҆́кѡ тебѣ̀ ᲂу҆гото́васѧ вѣ́чныхъ бла̑гъ сокро́вище.

Ра́дꙋйсѧ, слове́снаѧ а҆́гнице, ѿ ѕла́гѡ во́лка мꙋчи́телѧ къ до́бромꙋ па́стырю хрⷭ҇тꙋ̀ прибѣ́гшаѧ: ра́дꙋйсѧ, во дво́ръ пра́вѣдныхъ ѻ҆ве́цъ є҆гѡ̀, ѡ҆деснꙋ́ю стоѧ́щихъ, вше́дшаѧ.

Ра́дꙋйсѧ, неѕло́биваѧ голꙋби́це, ѿ земна́го вра́на въ покро́въ нбⷭ҇нагѡ ѻ҆рла̀ прелетѣ́вшаѧ: ра́дꙋйсѧ, въ кро́вѣ крилꙋ̀ є҆гѡ̀ до́брый тебѣ̀ покро́въ ѡ҆брѣ́тшаѧ.

Ра́дꙋйсѧ, нбⷭ҇нагѡ ѻ҆ц҃а̀ дщѝ чтⷭ҇на́ѧ, ꙗ҆́кѡ ѿ земна́гѡ роди́телѧ съ безче́стїемъ на сме́рть гони́ма была̀ є҆сѝ: ра́дꙋйсѧ, ꙗ҆́кѡ ѿ безсме́ртнагѡ гдⷭ҇а сла́вы въ жи́знь вѣ́чнꙋю со сла́вою прїѧ́та є҆сѝ.

Ра́дꙋйсѧ, тоѧ́жде и҆ на́мъ жи́зни присножела́ющаѧ хода́таице: ра́дꙋйсѧ, прилѣ́жнаѧ ѡ҆ на́съ къ бг҃ꙋ моли́твеннице.

Ра́дꙋйсѧ, варва́ро, невѣ́сто хрⷭ҇то́ва прекра́снаѧ.

Конда́къ є҃.

Бг҃оте́чной ѕвѣздѣ̀ была̀ є҆сѝ подо́бна, ст҃а́ѧ великомꙋ́ченице варва́ро: бѣжа́щи бо пред̾ ѻ҆тце́мъ твои́мъ, наставлѧ́ла є҆сѝ того̀ та́инственнѣ на пꙋ́ть, ведꙋ́щїй ко првⷣномꙋ сл҃нцꙋ, ѿ дв҃ы возсїѧ́вшемꙋ, хрⷭ҇тꙋ̀ бг҃ꙋ. ѻ҆ба́че ѻ҆́нъ дꙋше́вныма ѡ҆слѣпле́нъ ѻ҆чи́ма, а҆́бїе и҆ тѣле́сныма не ᲂу҆зрѣ́ тѧ пред̾ собо́ю бѣжа́щꙋю: ты́ бо сквозѣ̀ ка́меннꙋю, тебѣ̀ велѣ́нїемъ бж҃їимъ разстꙋпи́вшꙋюсѧ го́рꙋ проше́дши, скры́ласѧ є҆сѝ ѿ ѻ҆́чїю є҆гѡ̀ въ ка́меннѣй пеще́рѣ, да ѿ среды̀ ка́менїѧ, ꙗ҆́кѡ пти́ца, да́си гла́съ бг҃ꙋ, воспѣва́ющи: А҆ллилꙋ́їа.

І҆́косъ є҃.

Ви́дѣвше тѧ̀ па́стырїе, верхꙋ̀ горы̀ ѻ҆́вцы пасꙋ́щїи, въ ка́мени кры́ющꙋюсѧ, дивлѧ́хꙋсѧ, глаго́люще: что̀ сїѧ̀ слове́снаѧ а҆́гница; ко́егѡ во́лка бѣ́гаетъ; и҆ сѐ дїоско́ръ, па́че во́лка лютѣ́йшїй, востечѐ на го́рꙋ, и҆ тебѐ та́мѡ кры́ющꙋюсѧ ѡ҆брѣ́тъ, и҆ похи́тивъ за дѣви́чєскїѧ твоѧ̑ власы̑, влеча́ше ко своемꙋ̀ до́мꙋ по жесто́комꙋ пꙋтѝ, на не́мже тѧ̀ вѣ́рнїи срѣта́емъ привѣ́тствїи си́ми:

Ра́дꙋйсѧ, младо́мꙋ є҆ле́ню на гора́хъ а҆рѡма́тскихъ ᲂу҆подо́бившаѧсѧ: ра́дꙋйсѧ, гѡ́рнѧѧ, па́че до́лнихъ восхожде́нїѧ въ срⷣцѣ твое́мъ полага́ющи, возлюби́вшаѧ.

Ра́дꙋйсѧ, и҆збы́вшаѧ поги́бельнагѡ і҆дѡлослꙋже́нїѧ ро́ва: ра́дꙋйсѧ, на го́рꙋ трⷪ҇ческагѡ поклоне́нїѧ восте́кшаѧ.

Ра́дꙋйсѧ, сквозѣ̀ ка́менїе проше́дшаѧ, ѿ каменносе́рдагѡ бѣ́гающи гоне́нїѧ: ра́дꙋйсѧ, средѣ̀ ка́менїѧ ка́мень хрⷭ҇та̀, ᲂу҆твержда́ющаго тѧ̀, ѡ҆брѣ́тшаѧ.

Ра́дꙋйсѧ, въ пеще́рꙋ ка́меннꙋю вше́дшаѧ, ви́дѣти і҆и҃са во гро́бѣ ка́менномъ бы́вша положе́нна: ра́дꙋйсѧ, ᲂу҆жѐ того̀ ви́дѧщаѧ на престо́лѣ сла́вы сѣдѧ́ща.

Ра́дꙋйсѧ, ꙗ҆́кѡ власы̀ главы̀ твоеѧ̀, за хрⷭ҇та̀ хранѧ́щаго, да и҆ вла́съ главы̀ человѣ́ческїѧ не поги́бнетъ, и҆сто́ргани сꙋ́ть на землѝ: ра́дꙋйсѧ, ꙗ҆́кѡ ті́и ѿ хрⷭ҇та̀ и҆зочте́ни сꙋ́ть ко ᲂу҆вѣнча́нїю на нб҃сѝ.

Ра́дꙋйсѧ, власы̀ твоѧ̑ кро́вїю до́лѣ, ꙗ҆́кѡ цвѣта́ми, ѡ҆багри́вшаѧ: ра́дꙋйсѧ, заплете́нїе власѡ́въ твои́хъ ѡ҆кровавле́нныхъ въ вѣне́цъ тебѣ̀ златы́й ѡ҆брати́вшаѧ.

Ра́дꙋйсѧ, варва́ро, невѣ́сто хрⷭ҇то́ва прекра́снаѧ.

Конда́къ ѕ҃.

Проповѣ́дникѡмъ бг҃оно́снымъ, а҆пⷭ҇лѡмъ хрⷭ҇то́вымъ, поревнова́вши дерзнове́ннѡ, пред̾ лице́мъ мꙋчи́телей проповѣ́дала є҆сѝ хрⷭ҇та̀ и҆́стиннаго бг҃а: и҆ є҆гѡ̀ ра́ди лю̑тыѧ ра̑ны, власѧны́ми рꙋ́бы и҆ ѻ҆́стрымъ чре́пїемъ болѣ́зненнѡ потира́ємыѧ, мꙋ́жественнѡ претерпѣ́ла є҆сѝ, ст҃а́ѧ варва́ро. та́же въ темни́цꙋ всажде́на, въ не́й а҆́ки въ черто́зѣ ѡ҆ хрⷭ҇тѣ̀ і҆и҃сѣ ликова́ла є҆сѝ, пою́щи є҆мꙋ̀: А҆ллилꙋ́їа.

І҆́косъ ѕ҃.

Возсїѧ́вый въ срⷣцѣ твое́мъ просвѣще́нїе и҆́стиннагѡ бг҃оразꙋ́мїѧ, возсїѧ̀ и҆ во ѻ҆чесѣ́хъ твои́хъ свѣ́тъ бж҃е́ственнагѡ лица̀ своегѡ̀ хрⷭ҇то́съ гдⷭ҇ь: то́й бо, ꙗ҆́кѡ возлю́бленный тво́й жени́хъ, въ полꙋ́нощи къ тебѣ̀, непоро́чнѣй свое́й невѣ́стѣ, въ темни́цꙋ прише́дъ, любе́знѡ тѧ̀ посѣтѝ, ѿ ра́нъ и҆сцѣлѝ, и҆ свѣ́тлостїю лица̀ своегѡ̀ неизрече́ннѡ дꙋ́шꙋ твою̀ возвеселѝ, на́съ же вѣ́рныхъ наꙋчѝ пѣ́ти тебѣ̀ сицева̑ѧ:

Ра́дꙋйсѧ, за страда́вшаго бїе́нїе хрⷭ҇та̀ неща́днѡ бїе́ннаѧ: ра́дꙋйсѧ, бїє́нїѧ терпѣ́нїемъ неви́димаго врага̀ ᲂу҆би́вшаѧ.

Ра́дꙋйсѧ, ꙗ҆́звы гдⷭ҇а твоегѡ̀ на тѣ́лѣ твое́мъ носи́вшаѧ: ра́дꙋйсѧ, ѿ всѣ́хъ ꙗ҆́звъ, тѣ́мжде гдⷭ҇емъ, на тѣ́лѣ твое́мъ и҆сцѣле́вшаѧ.

Ра́дꙋйсѧ, ꙗ҆́кѡ са́мъ гдⷭ҇ь, свѣ́тъ мі́ра, тебѣ̀ въ темни́цѣ бы́вшей себѐ ꙗ҆ви́лъ є҆́сть: ра́дꙋйсѧ, ꙗ҆́кѡ са́мъ дꙋшѝ и҆ тѣ́ла вра́чъ, тебѐ больнꙋ́ю посѣти́лъ є҆́сть.

Ра́дꙋйсѧ, чрез̾ земнꙋ́ю темни́цꙋ въ нбⷭ҇ный черто́гъ свѣ́тлѡ вше́дшаѧ: ра́дꙋйсѧ, ѿ крове́й твои́хъ бра́чнꙋю тебѣ̀ ѻ҆де́ждꙋ и҆стка́вшаѧ.

Ра́дꙋйсѧ, ꙗ҆́кѡ тобо́ю ѿ мно́гихъ ра́нъ грѣ́шнїи и҆сцѣлѧ́ютсѧ: ра́дꙋйсѧ, ꙗ҆́кѡ тобо́ю ѿ всѣ́хъ болѣ́зней съ вѣ́рою тѧ̀ призыва́ющїи ᲂу҆здравлѧ́ютсѧ.

Ра́дꙋйсѧ, ᲂу҆́зъ грѣхо́вныхъ ско́раѧ рѣши́тельнице: ра́дꙋйсѧ, ꙗ҆́звъ многоѕло́бныхъ до́браѧ цѣле́бнице.

Ра́дꙋйсѧ, варва́ро, невѣ́сто хрⷭ҇то́ва прекра́снаѧ.

Конда́къ з҃.

Хотѧ́щꙋ безꙋ́мномꙋ мꙋчи́телю жела́ніе своѐ ᲂу҆лꙋчи́ти, и҆ є҆щѐ покꙋша́ющемꙋсѧ ласка́тельными словесы̀ тебѐ, ст҃а́ѧ варва́ро, ѿ и҆́стиннагѡ бг҃а ѿврати́ти ко прелє́стнымъ і҆́дѡлѡмъ, ты̀, ꙗ҆́кѡ мꙋ́драѧ дв҃а, ѿвѣща́ла є҆сѝ томꙋ̀: пе́рвѣе тве́рдый а҆дама́нтъ въ мѧ́гкїй во́скъ претвори́ши, не́жели менѐ ѿврати́ши ѿ хрⷭ҇та̀ бг҃а моегѡ̀: того́ бо, со ѻ҆ц҃е́мъ и҆ ст҃ы́мъ дх҃омъ, є҆ди́наго и҆́стиннаго бг҃а и҆сповѣ́дꙋю, сла́влю, хвалю̀, и҆ пою̀ є҆мꙋ̀: А҆ллилꙋ́їа.

І҆́косъ з҃.

Но́вꙋю показа̀ безчеловѣ́чїѧ ꙗ҆́рость ѕвѣроѻбра́зный мꙋчи́тель, є҆гда̀ тебѐ, ст҃а́ѧ великомꙋ́ченице варва́ро, повелѣ̀ на дре́вѣ повѣ́сити, и҆ ногтьмѝ желѣ́зными тѣ́ло твоѐ строга́ти, и҆ свѣща́ми горѧ́щими твоѧ̑ ѡ҆палѧ́ти ре́бра, є҆ще́ же и҆ мла́томъ во главꙋ̀ тѧ́жко би́ти. сїѐ пачеесте́ственное терпѣ́нїе твоѐ благоговѣ́йнѡ воспомина́юще, похвала́ми блажи́мъ тѧ̀ си́ми:

Ра́дꙋйсѧ, ꙗ҆́кѡ повѣ́шена была̀ є҆сѝ на дре́вѣ, хрⷭ҇та̀ ра́ди на крⷭ҇тѣ̀ распѧ́тагѡ: ра́дꙋйсѧ, стро́гана по ре́брѡмъ, і҆и҃са ра́ди, копїе́мъ въ ре́бра прободе́ннагѡ.

Ра́дꙋйсѧ, ꙗ҆́кѡ ѻ҆́гнь любвѐ къ бг҃ꙋ въ срⷣцѣ твое́мъ возжегла̀ є҆сѝ: ра́дꙋйсѧ, ꙗ҆́кѡ за тогѡ̀ ѻ҆́гненными свѣща́ми пали́ма была̀ є҆сѝ.

Ра́дꙋйсѧ, твердѣ́йшаѧ а҆дама́нта въ терпѣ́нїи невреди́момъ: ра́дꙋйсѧ, крѣпча́йшаѧ ка́меннагѡ столпа̀ въ мꙋ́жествѣ непоколеби́момъ.

Ра́дꙋйсѧ, ꙗ҆́кѡ мла́томъ би́вшимъ тѧ̀ по главѣ̀, вѣне́цъ црⷭ҇твїѧ тебѣ̀ и҆скова́сѧ: ра́дꙋйсѧ, ꙗ҆́кѡ тѣ́мже мла́томъ глава̀ врага̀ твоегѡ̀ сокрꙋши́сѧ.

Ра́дꙋйсѧ, ꙗ҆́кѡ со хрⷭ҇то́мъ, є҆гѡ̀ ра́ди, на землѝ страда́ла є҆сѝ: ра́дꙋйсѧ, ꙗ҆́кѡ съ ни́мъ и҆ ѡ҆ не́мъ на нб҃сѝ прославлѧ́ешисѧ.

Ра́дꙋйсѧ, всѣ́хъ врагѡ́въ на́шихъ крѣ́пкаѧ побѣди́тельнице: ра́дꙋйсѧ, во всѣ́хъ бѣда́хъ на́шихъ ско́раѧ помо́щнице.

Ра́дꙋйсѧ, варва́ро, невѣ́сто хрⷭ҇то́ва прекра́снаѧ.

Конда́къ и҃.

Стра́нное и҆ стра́шное ст҃ы́ѧ варва́ры страда́нїе ви́дѧщи, бл҃говѣ́рнаѧ въ жена́хъ і҆ꙋлїа́нїа ᲂу҆диви́сѧ ѕѣлѡ̀: ка́кѡ млада̀ ѻ҆трокови́ца въ ю҆́ностнѣмъ тѣлесѝ такѡвы́ѧ мꙋ́жественнѡ за хрⷭ҇та̀ терпи́тъ мꙋ̑ки; та́же, сле́знагѡ и҆спо́лнившисѧ ᲂу҆миле́нїѧ, благода́рственнѡ и҆ та̀ возопѝ хрⷭ҇тꙋ̀ бг҃ꙋ: А҆ллилꙋ́їа.

І҆́косъ и҃.

Ве́сь сладча́йшїй і҆и҃съ сла́дость, ве́сь жела́нїе тебѣ̀ бы́сть, ст҃а́ѧ варва́ро: сла́дцѣ бо є҆гѡ̀ ра́ди гѡ́рькїѧ терпѣ́ла є҆сѝ мꙋ̑ки, глаго́лющи: ча́шꙋ страда́нїй, ю҆́же даде́ ми возлю́бленный мо́й жени́хъ, не и҆́мамъ ли пи́ти; тѣ́мже и҆ сама̀ показа́ласѧ є҆сѝ ча́ша, сла́дость чꙋде́сныхъ и҆сцѣле́нїй и҆злива́ющаѧ всѣ̑мъ вопїю́щимъ къ тебѣ̀ сицєва́ѧ:

Ра́дꙋйсѧ, ѿве́ргшаѧ во а҆́дское го́ре і҆́дѡльскꙋю го́ресть: ра́дꙋйсѧ, возлюби́вшаѧ нбⷭ҇нꙋю і҆и҃совꙋ сла́дость.

Ра́дꙋйсѧ, мы́сленнаѧ ста́мно, ма́ннꙋ бра́шна творе́нїѧ во́ли бж҃їѧ въ себѣ̀ и҆мꙋ́щаѧ: ра́дꙋйсѧ, вѣ́рныхъ во благи́хъ жела́нїе и҆сполнѧ́ющаѧ.

Ра́дꙋйсѧ, рѣко̀, и҆спо́лненнаѧ бл҃года́ти бж҃їѧ вода́ми: ра́дꙋйсѧ, и҆сто́чниче, кипѧ́щїй чꙋде́съ и҆злїѧ́нїи.

Ра́дꙋйсѧ, ꙗ҆́кѡ пчела̀, ѿ ѕлово́ннагѡ і҆́дѡльскихъ же́ртвъ ды́ма ѿлетѣ́вшаѧ: ра́дꙋйсѧ, во бл҃гоꙋха́ннꙋю мѵ́ра хрⷭ҇то́ва воню̀ сла́дцѣ прите́кшаѧ.

Ра́дꙋйсѧ, ꙗ҆́кѡ твои́ми во все́мъ тѣ́лѣ ꙗ҆́звами была̀ є҆сѝ подо́бна со́тꙋ: ра́дꙋйсѧ, ꙗ҆́кѡ кро́вѣ твоеѧ̀ ка̑пли сладча́йшїѧ па́че ме́да бы́ша пресла́дкомꙋ і҆и҃сꙋ.

Ра́дꙋйсѧ, ꙗ҆́кѡ всѣ̑мъ вѣ̑рнымъ воспомина́нїе твоѐ пресла́дко: ра́дꙋйсѧ, ꙗ҆́кѡ всѣ́й цр҃кви хрⷭ҇то́вой и҆́мѧ твоѐ пречⷭ҇тно.

Ра́дꙋйсѧ, варва́ро, невѣ́сто хрⷭ҇то́ва прекра́снаѧ.

Конда́къ ѳ҃.

Всѐ є҆стество̀ а҆́гг҃льское ве́лїею возра́довасѧ ра́достїю, ᲂу҆зрѣ́вши мꙋ́жественнꙋю крѣ́пость твою̀, ст҃а́ѧ и҆ непобѣди́маѧ мꙋ́ченице варва́ро: ви́дѣвше бо а҆́гг҃льстїи чи́нове ве́тхаго врага̀, прего́рдагѡ кнѧ́зѧ тмы̀, со всѣ́мъ є҆гѡ̀ бѣсо́вскимъ и҆ і҆́дѡльскимъ по́лчищемъ ѿ тебє̀, є҆ди́ныѧ млады́ѧ дв҃ы, посра́мленнаго, побѣжде́ннагѡ же и҆ под̾ но́зѣ твоѝ пове́рженнагѡ, ве́лїимъ гла́сомъ возопи́ша бг҃ꙋ: А҆ллилꙋ́їа.

І҆́косъ ѳ҃.

Вѣті̑и многовѣща́ннїи рі́торскими свои́ми ѧ҆зы́ки не возмо́гꙋтъ и҆зрещѝ вели́чества твои́хъ болѣ́зненныхъ страда́нїй, ѽ варва́ро: кто́ бо ска́жетъ болѣ́знь твою̀, коли́ка бѣ̀, є҆гда̀ сосца̀ твоѧ̀ ᲂу҆рѣ́зана бы́ша; кто̀ и҆зрече́тъ стꙋ́дъ лица̀ дв҃и́ческагѡ, є҆гда̀ ѡ҆бнаже́на по всемꙋ̀ гра́дꙋ ѿ беззако́нныхъ мꙋчи́телей води́ма была̀ є҆сѝ; сицевꙋ́ю болѣ́знь и҆ безче́стїе твоѐ мы̀ то́чїю воспомѧнꙋ́вше, содрога́емсѧ и҆ со ᲂу҆миле́нїемъ глаго́лемъ си́це:

Ра́дꙋйсѧ, до́браѧ лѣ́торасле са́да і҆и҃сова: ра́дꙋйсѧ, и҆́стиннаѧ лозо̀ вїногра́да хрⷭ҇то́ва.

Ра́дꙋйсѧ, два̀ сосца̀ твоѧ̑ ѿрѣ̑заннаѧ, а҆́ки два̀ гре́зна, въ че́сть гдⷭ҇еви твоемꙋ̀ прине́сшаѧ: ра́дꙋйсѧ, кро́вь твою̀, а҆́ки вїно̀ ᲂу҆миле́нїѧ, ѿ тѣ́хъ и҆сточи́вшаѧ.

Ра́дꙋйсѧ, ꙗ҆́кѡ хрⷭ҇та̀ ра́ди ѡ҆бнаже́ннаго и҆ ты̀ ри́зъ твои́хъ совлече́на была̀ є҆сѝ: ра́дꙋйсѧ, ꙗ҆́кѡ є҆гѡ̀ ра́ди, во і҆ерⷭ҇ли́мѣ рꙋга́тельнѣ води́магѡ, и҆ ты̀ по гра́дꙋ на порꙋга́нїе води́ма была̀ є҆сѝ.

Ра́дꙋйсѧ, ѿ а҆́гг҃ла свѣ́тлою ѻ҆де́ждою въ наготѣ̀ твое́й ѡ҆дѣ́ѧннаѧ: ра́дꙋйсѧ, то́ю ѿ стꙋ́дныхъ ѻ҆че́съ неви́димѡ покровѣ́ннаѧ.

Ра́дꙋйсѧ, чꙋ́дный а҆́гг҃лѡмъ и҆ человѣ́кѡмъ позо́ръ бы́вшаѧ: ра́дꙋйсѧ, и҆ самѣ́хъ мꙋчи́телей терпѣ́нїемъ твои́мъ ᲂу҆диви́вшаѧ.

Ра́дꙋйсѧ, ꙗ҆́кѡ са́мъ гдⷭ҇ь свы́ше призрѣ̀ на твоѧ̑ страда̑нїѧ: ра́дꙋйсѧ, ꙗ҆́кѡ са́мъ то́й подвигополо́жникъ похвалѝ по́двиги твоѧ̑.

Ра́дꙋйсѧ, варва́ро, невѣ́сто хрⷭ҇то́ва прекра́снаѧ.

Конда́къ і҃.

Спастѝ хотѧ̀ дꙋ́шꙋ твою̀, ѡ҆ тѣ́лѣ твое́мъ всѧ́чески неради́ла є҆сѝ, ст҃а́ѧ варва́ро: є҆гда́ бо на тѧ̀ ме́чное на сме́рть ѡ҆сꙋжде́нїе и҆зы́де, ты̀ под̾ ме́чь ѻ҆́стрый, а҆́ки под̾ вѣне́цъ кра́сный, ра́достнѡ и҆дꙋ́щи, бг҃ꙋ, въ мч҃нческомъ по́двизѣ тебѐ ᲂу҆крѣплѧ́ющемꙋ, воспѣва́ла є҆сѝ пѣ́снь: А҆ллилꙋ́їа.

І҆́косъ і҃.

Стѣны̀ ка́менныѧ тве́рдѣе ѡ҆камене́нный се́рдцемъ бы́сть дїоско́ръ, тво́й ст҃а́ѧ варва́ро, не ᲂу҆жѐ роди́тель, но лю́тый мꙋчи́тель: то́й бо, ꙗ҆́кѡ ᲂу҆слы́ша твоѐ ме́чное на сме́рть ѡ҆сꙋжде́нїе, не то́чїю ѡ҆ сме́рти твое́й не поболѣ̀, но и҆ са́мъ свои́мъ мече́мъ на мѣ́стѣ ѡ҆сꙋжде́нїѧ твою̀ ст҃ꙋ́ю ᲂу҆сѣчѐ главꙋ̀, и҆ та́кѡ, по предрече́нїю гдⷭ҇ню, ѡ҆каѧ́нный ѻ҆те́цъ предадѐ на сме́рть своѐ ча́до. въ то́й ᲂу҆́бѡ бл҃же́ннѣй твое́й кончи́нѣ, прїимѝ ѿ на́съ пѣ̑нїѧ сїѧ̀:

Ра́дꙋйсѧ, за главꙋ̀ цр҃кве хрⷭ҇та̀ под̾ ме́чь главꙋ̀ твою̀ прекло́ншаѧ: ра́дꙋйсѧ, за любо́вь къ нбⷭ҇номꙋ человѣколюби́вомꙋ ѻ҆ц҃ꙋ̀ безсме́ртномꙋ на сме́рть ѿ земна́гѡ безчеловѣ́чнагѡ ѻ҆тца̀ тлѣ́ннагѡ пре́даннаѧ.

Ра́дꙋйсѧ, тече́нїе мꙋ́ченическагѡ пꙋтѝ сконча́вшаѧ до́брѣ: ра́дꙋйсѧ, вѣ́рꙋ безсме́ртномꙋ ѡ҆брꙋ́чникꙋ хрⷭ҇тꙋ̀ до сме́рти сохра́ншаѧ бо́дрѣ.

Ра́дꙋйсѧ, си́лою свы́ше на бра́нь проти́вꙋ си́лъ преиспо́днихъ препоѧ́саннаѧ: ра́дꙋйсѧ, побѣдоно́сною сла́вою въ вы́шнихъ ѿ хрⷭ҇та̀ побѣди́телѧ ѡ҆дѣ́ѧннаѧ.

Ра́дꙋйсѧ, ѻ҆рꙋ́жїемъ бл҃говоле́нїѧ бж҃їѧ вѣнча́ннаѧ на землѝ: ра́дꙋйсѧ, цвѣ́томъ нетлѣ́нїѧ ᲂу҆краше́ннаѧ на нб҃сѝ.

Ра́дꙋйсѧ, дѣ́вамъ добро́то и҆ похвале́нїе: ра́дꙋйсѧ, мꙋ́ченикѡмъ красото̀ и҆ ра́дованїе.

Ра́дꙋйсѧ, хрⷭ҇тїа́нѡмъ крѣ́пкое прибѣ́жище: ра́дꙋйсѧ, вѣ̑рнымъ тве́рдое застꙋпле́нїе.

Ра́дꙋйсѧ, варва́ро, невѣ́сто хрⷭ҇то́ва прекра́снаѧ.

Конда́къ а҃і.

Пѣ́нїе на́ше похва́льное, а҆́ще бы и҆ тмочи́сленное, вѣ́мы, ꙗ҆́кѡ нѣ́сть дово́льнѡ по достоѧ́нїю восхвали́ти тѧ̀, ст҃а́ѧ и҆ всехва́льнаѧ мч҃нце варва́ро: ѻ҆ба́че мы̀, бж҃їихъ тобо́ю на́мъ ѻ҆би́льнѡ подава́емыхъ дарова́нїй бл҃года́рни сꙋ́ще, бг҃ꙋ, въ тебѣ̀ свои́ми бл҃годѣѧ́нїи прославлѧ́емомꙋ, бл҃года́рственными ᲂу҆сты̀ пое́мъ: А҆ллилꙋ́їа.

І҆́косъ а҃і.

Свѣтопрїе́мнꙋю свѣщꙋ̀, на нбⷭ҇номъ свѣ́щницѣ, пред̾ прⷭ҇то́ломъ ст҃ы́ѧ трⷪ҇цы поста́вленнꙋю, зри́мъ ᲂу҆́мныма ѻ҆чи́ма тебѐ, ст҃а́ѧ дв҃о варва́ро: ѿѻнꙋ́дꙋже, є҆гда̀ нощны́й грѣхѡ́въ на́шихъ мра́къ, лꙋча́ми моли́твъ твои́хъ просвѣща́еши, и҆ на́съ на свѣ́тлꙋю спасе́нїѧ стезю̀ наставлѧ́еши, по до́лгꙋ досто́йна є҆сѝ ѿ на́съ зва́нїемъ бы́ти почита́ема си́мъ:

Ра́дꙋйсѧ, свѣтоꙋ́мнаѧ лꙋчѐ, во свѣ́тлость немерца́ющꙋю прилꙋче́ннаѧ: ра́дꙋйсѧ, мы́сленнаѧ денни́це, де́нь невече́рнїй ѡ҆зарѧ́ти возше́дшаѧ.

Ра́дꙋйсѧ, бл҃гово́ннаѧ смѵ́рно, цр҃ковь хрⷭ҇то́вꙋ бл҃гоꙋха́ющаѧ: ра́дꙋйсѧ, злата́ѧ кади́льнице, ѳѷмїа́мъ моли́твы ѡ҆ на́съ къ бг҃ꙋ приносѧ́щаѧ.

Ра́дꙋйсѧ, мѷрополо́жнице и҆сцѣле́нїй неѡскꙋ́днаѧ: ра́дꙋйсѧ, сокро́вище бж҃їихъ дарѡ́въ неиждиви́тельное.

Ра́дꙋйсѧ, ча́ше, ѿ ѻ҆би́лїѧ до́мꙋ бж҃їѧ че́рплющаѧ ра́дость: ра́дꙋйсѧ, сосꙋ́де, ѿ и҆сполне́нїѧ хрⷭ҇то́ва прїе́млющїй всѣ́хъ бла̑гъ нбⷭ҇ныхъ сла́дость.

Ра́дꙋйсѧ, а҆дама́нте, пе́рстень безсме́ртнагѡ со хрⷭ҇то́мъ ѡ҆брꙋче́нїѧ, ᲂу҆краси́вый: ра́дꙋйсѧ, вѣ́нче добро́ты, въ рꙋцѣ̀ гдⷭ҇ней держи́мый.

Ра́дꙋйсѧ, ꙗ҆́кѡ на тѧ̀ цр҃ь сла́вы, гдⷭ҇ь си́лъ, сла́вꙋ и҆ велелѣ́пїе возложи́лъ є҆́сть: ра́дꙋйсѧ, ꙗ҆́кѡ тебѣ̀ цр҃ь црⷭ҇твꙋющихъ и҆ гдⷭ҇ь госпо́дствꙋющихъ црⷭ҇тво своѐ и҆ гдⷭ҇ствїе дарова́лъ є҆́сть.

Ра́дꙋйсѧ, варва́ро, невѣ́сто хрⷭ҇то́ва прекра́снаѧ.

Конда́къ в҃і.

Бл҃года́ть ѿ бг҃а дана́ ти є҆́сть, храни́ти и҆ соблюда́ти ѿ внеза́пныѧ болѣ́зни и҆ на́глыѧ сме́рти всѧ́каго человѣ́ка, вѣ́рою, любо́вїю и҆ бл҃гогове́нїемъ чтⷭ҇на̑ѧ твоѧ̑ страда̑нїѧ воспомина́ющаго и҆ почита́ющаго: тоѧ̀ бл҃года́ти не лишѝ и҆ на́съ, до́браѧ дв҃о варва́ро, да и҆ мы̀, здра́ви сꙋ́ще тѣ́ломъ и҆ дх҃омъ въ ны́нѣшней и҆ бꙋ́дꙋщей жи́зни ѡ҆ тебѣ̀ пое́мъ бг҃ꙋ: А҆ллилꙋ́їа.

І҆́косъ в҃і.

Пое́мъ твоѧ̑ крѣ̑пкїѧ по́двиги, почита́емъ страда́нїѧ, хва́лимъ долготерпѣ́нїе, ᲂу҆бл҃жа́емъ ст҃ꙋ́ю твою̀ кончи́нꙋ, сла́вимъ твоѐ въ немощно́мъ тѣ́лѣ показа́вшеесѧ непобѣди́мое мꙋ́жество, и҆́мже на землѝ и҆ на нб҃сѝ просла́виласѧ є҆сѝ, ст҃а́ѧ и҆ добропобѣ́днаѧ великомꙋ́ченице варва́ро, и҆ въ че́сть твои́хъ побѣдоно́сныхъ по́двигѡвъ и҆ страда́нїй похва̑льнаѧ восписꙋ́емъ тѝ сїѧ̀:

Ра́дꙋйсѧ, ѿ а҆́гг҃льскихъ чинѡ́въ въ сожи́тельство и҆́хъ любе́знѡ прїѧ́таѧ: ра́дꙋйсѧ, ѿ дѣ́вственныхъ ликѡ́въ въ черто́гъ нбⷭ҇ный ра́достнѡ введе́ннаѧ.

Ра́дꙋйсѧ, ѿ мꙋ́ченическихъ полкѡ́въ под̾ вѣне́цъ сла́вы провожда́емаѧ во гла́сѣ ра́дованїѧ: ра́дꙋйсѧ, ѿ всѣ́хъ жи́телей нбⷭ҇ныхъ прїе́мшаѧ ѡ҆ гдⷭ҇ѣ цѣлова́нїе.

Ра́дꙋйсѧ, ꙗ҆́кѡ мзда̀ твоѧ̀ мно́га є҆́сть на нб҃сѣ́хъ: ра́дꙋйсѧ, ꙗ҆́кѡ ра́дость твоѧ̀ вѣ́чна є҆́сть во свѣ́тлости ст҃ы́хъ.

Ра́дꙋйсѧ, ѿ вра̑гъ ви́димыхъ и҆ неви́димыхъ крѣ́пкаѧ на́мъ застꙋ́пнице: ра́дꙋйсѧ, ра́дости на́мъ, бл҃года́ти же и҆ сла́вы вѣ́чныѧ хода́таице.

Ра́дꙋйсѧ, дꙋше́вныхъ и҆ тѣле́сныхъ недꙋ́гѡвъ на́шихъ цѣли́тельнице: ра́дꙋйсѧ, спаси́тельныхъ бла̑гъ земны́хъ и҆ нбⷭ҇ныхъ пода́тельнице.

Ра́дꙋйсѧ, ꙗ҆́кѡ тобо́ю ѿ неча́ѧнныѧ и҆ вѣ́чныѧ сме́рти сохране́ни бы́ти ᲂу҆пова́емъ: ра́дꙋйсѧ, ꙗ҆́кѡ тобо́ю вѣ́чнꙋю жи́знь ᲂу҆лꙋчи́ти бл҃гонаде́жнѡ ча́емъ.

Ра́дꙋйсѧ, варва́ро, невѣ́сто хрⷭ҇то́ва прекра́снаѧ.

Конда́къ г҃і.

ѽ многострада́льнаѧ и҆ всехва́льнаѧ ст҃а́ѧ великомч҃нце варва́ро, ны́нѣшнее на́ше моле́нїе прїе́мши, ѿ всѧ́кихъ болѣ́зней дꙋше́вныхъ и҆ тѣле́сныхъ и҆ вра̑гъ ви́димыхъ и҆ неви́димыхъ на́съ и҆зба́ви, и҆ ѿ вѣ́чнагѡ мꙋче́нїѧ твои́мъ бг҃опрїѧ́тнымъ хода́тайствомъ сохранѝ, да съ тобо́ю на землѝ живы́хъ во вѣ́ки пое́мъ бг҃ꙋ: А҆ллилꙋ́їа.

Се́й конда́къ глаго́ли три́жды, та́же, і҆́косъ а҃-й и҆ конда́къ а҃-й.

Моли́тва ко ст҃ѣ́й великомч҃нцѣ варва́рѣ.

Ст҃а́ѧ сла́внаѧ и҆ всехва́льнаѧ великомч҃нце хрⷭ҇то́ва варва́ро, со́браннїи дне́сь въ хра́мѣ твое́мъ бж҃е́ственнѣмъ лю́ди и҆ ра́цѣ моще́й твои́хъ покланѧ́ющїисѧ, и҆ любо́вїю цѣлꙋ́ющїи: страда̑нїѧ же твоѧ̑ мч҃нчєскаѧ, и҆ въ ни́хъ сама́го стрⷭ҇тополо́жника хрⷭ҇та̀, да́вшаго тебѣ̀, не то́чїю є҆́же въ него̀ вѣ́ровати, но и҆ є҆́же по не́мъ страда́ти, похвала́ми ᲂу҆блажа́ющїи, мо́лимъ тѧ̀ и҆звѣ́стнаѧ жела́нїѧ на́шегѡ хода́таице: молѝ съ на́ми и҆ ѡ҆ на́съ ᲂу҆молѧ́емаго ѿ своегѡ̀ бл҃гоꙋтро́бїѧ бг҃а, да ми́лостивнѡ ᲂу҆слы́шитъ на́съ, просѧ́щихъ є҆гѡ̀ бл҃госты́ню, и҆ не ѿста́витъ ѿ на́съ всѧ̑ ко спасе́нїю и҆ житїю̀ нꙋ̑жднаѧ прошє́нїѧ, и҆ да́рꙋетъ хрⷭ҇тїа́нскꙋю кончи́нꙋ животꙋ̀ на́шемꙋ безболѣ́зненнꙋ, непосты́днꙋ, ми́рнꙋ, бж҃е́ственныхъ та̑инъ прича́стнꙋ, и҆ всѣ̑мъ на всѧ́комъ мѣ́стѣ, во всѧ́кой ско́рби и҆ ѡ҆бстоѧ́нїи тре́бꙋющимъ є҆гѡ̀ человѣколю́бїѧ и҆ по́мощи, вели́кꙋю свою̀ пода́стъ ми́лость. да бл҃года́тїю бж҃їею, и҆ твои́мъ те́плымъ предста́тельствомъ, дꙋше́ю и҆ тѣ́ломъ всегда̀ здра́ви пребыва́юще, сла́вимъ ди́внаго во ст҃ы́хъ свои́хъ бг҃а і҆и҃лева, не ᲂу҆далѧ́ющаго по́мощи своеѧ̀ ѿ на́съ всегда̀, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Мл҃тва втора́ѧ ко ст҃ѣ́й великомч҃нцѣ варва́рѣ.

Премꙋ́драѧ и҆ всекра́снаѧ ст҃а́ѧ великомч҃нце хрⷭ҇то́ва варва́ро, бл҃же́нна є҆сѝ, ꙗ҆́кѡ премі̑рнаѧ мꙋ̑дрости бж҃їѧ пло́ть и҆ кро́вь не ꙗ҆вѝ тебѣ̀, но са́мъ бг҃ъ ѻ҆ц҃ъ нбⷭ҇ный, и҆́же тебѐ вѣ́ры ра́ди ѿ невѣ́рнагѡ ѻ҆тца̀ ѡ҆ста́вленнꙋю, и҆згна́ннꙋю и҆ ᲂу҆мерщвле́ннꙋю, въ дще́рь себѣ̀ возлю́бленнꙋю прїѧ́тъ: за тлѣ́нное земна́гѡ и҆мѣ́нїѧ наслѣ́дїе, пло́ти нетлѣ́нїе дарова̀: трꙋды̀ мꙋ́ченичєскїѧ ᲂу҆покое́нїемъ нбⷭ҇нагѡ и҆змѣнѝ црⷭ҇твїѧ: вре́менное твоѐ житїѐ, сме́ртїю є҆гѡ̀ ра́ди пресѣче́нное, сицево́ю возпросла́ви по́честїю, ꙗ҆́кѡ дꙋ́шꙋ съ ли́ки нбⷭ҇ныхъ вчинѝ дх҃ѡ́въ, тѣ́ло же на землѝ въ хра́мѣ и҆́хъ а҆́гг҃льскомъ положе́нное, а҆́гг҃лѡмъ заповѣ́да сохрани́ти цѣ́ло, чтⷭ҇нѡ и҆ многочꙋде́снѡ. бл҃же́нна є҆сѝ хрⷭ҇тꙋ̀ сн҃ꙋ бж҃їю, женихꙋ̀ нбⷭ҇номꙋ ᲂу҆невѣще́ннаѧ дв҃о, є҆го́же, добро́ты твоеѧ̀ рачи́телѧ и҆мѣ́ти жела́ющи, всю̀ себѐ страда́нїемъ, ра́нами, ᲂу҆́дѡвъ рѣ́занїемъ, и҆ са́мыѧ главы̀ ᲂу҆сѣче́нїемъ, а҆́ки ᲂу҆́тварьми дража́йшими потща́ласѧ є҆сѝ ᲂу҆краси́ти: да та́кѡ, ꙗ҆́кѡ жена̀ вѣ́рна главѣ̀ свое́й, мꙋ́жꙋ хрⷭ҇тꙋ̀, дх҃омъ и҆ тѣ́ломъ соедини́шисѧ неразлꙋ́чнѡ, гл҃ющи: ѡ҆брѣто́хъ, є҆го́же возлюбѝ дꙋша̀ моѧ̀, и҆ ᲂу҆дѣржа́хъ є҆го̀, и҆ не ѡ҆ста́вихъ є҆гѡ̀. бл҃же́нна є҆сѝ, ꙗ҆́кѡ ст҃ы́й дх҃ъ на тебѣ̀ почи́лъ є҆́сть, и҆́мже дх҃о́вными дх҃ѡ́внаѧ разсꙋжда́ти наꙋче́на, всѧ̑ дꙋ́хи лꙋка́вствїѧ во і҆́дѡлахъ, ꙗ҆́кѡ па́гꙋбныѧ ѿри́нꙋла є҆сѝ, и҆ є҆ди́наго бг҃а дх҃а позна́вши, ꙗ҆́кѡ и҆́стиннаѧ покло́нница дх҃омъ и҆ и҆́стиною кла́нѧтисѧ и҆зво́лила є҆сѝ, проповѣ́днически гл҃ющи: трⷪ҇цꙋ чтꙋ̀, є҆ди́но бж҃ество̀. сїю̀ ст҃ꙋ́ю трⷪ҇цꙋ, ю҆́же въ животѣ̀ и҆ сме́рти и҆сповѣ́данїемъ и҆ страда́нїемъ свои́мъ просла́вила є҆сѝ, ᲂу҆молѝ ѡ҆ мнѣ̀ предста́тельнице моѧ̀, ꙗ҆́кѡ да и҆ а҆́зъ всегда̀ тро́йственною, вѣ́ры, любвѐ и҆ наде́жды, тꙋ́южде ст҃ꙋ́ю трⷪ҇цꙋ почита́ю добродѣ́телїю. и҆́мамъ свѣти́льникъ вѣ́ры, но пра́зденъ бл҃ги́хъ дѣ́лъ є҆ле́а: ты̀ мꙋ́драѧ дв҃о, страда́льческꙋю пло́ть твою̀ кро́ве и҆спо́лненнꙋ, и҆ ра́нами прелива́ющꙋсѧ а҆́ки свѣти́льникъ и҆мꙋ́щаѧ, да́ждь ѿ є҆ле́а твоегѡ̀, да тѣ́мъ дꙋше́внꙋю мою̀ свѣщꙋ̀ ᲂу҆краси́вши, сподо́блюсѧ по тебѣ̀ вни́ти въ черто́гъ нбⷭ҇ный. пресе́льникъ а҆́зъ є҆́смь на землѝ и҆ пришле́цъ, ꙗ҆́коже всѝ ѻ҆тцы̀ моѝ: бл҃гъ вѣ́чныхъ наслѣ́днице, и҆ бл҃же́ннаѧ, ѻ҆бѣ́да въ црⷭ҇твїи нбⷭ҇номъ прича́стнице, ꙗ҆́кѡ въ стра́нствїи житїѧ̀, трапе́зы бж҃е́ственныѧ ᲂу҆гоще́нїѧ, си́це и҆ во и҆схо́дѣ ѿ мі́ра, жела́емагѡ сподо́би мѧ̀ напꙋ́тствованїѧ: и҆ є҆гда̀ въ коне́цъ сно́мъ сме́рти начнꙋ̀ ᲂу҆сыпа́ти, косни́сѧ тогда̀ и҆знемога́ющїѧ пло́ти моеѧ̀, ꙗ҆́кѡ и҆ногда̀ а҆́гг҃лъ и҆лїѝ, гл҃ющи: воста́ни, ꙗ҆́ждь и҆ пі́й: ꙗ҆́кѡ да бл҃года́тїю бж҃е́ственныхъ тѣ́ла и҆ кро́ве та̑инъ ᲂу҆крѣпле́нъ, преидꙋ̀ въ крѣ́пости ꙗ҆́ди тоѧ̀ дале́кїй пꙋ́ть сме́рти, да́же до горы̀ нбⷭ҇ныѧ: и҆ та́мѡ, є҆го́же ты̀ чрез̾ трѝ ѻ҆́кна ба́нныѧ пре́жде вѣ́рою бг҃а трⷪ҇цꙋ ᲂу҆зрѣ́ла є҆сѝ, сего̀ кꙋ́пнѡ съ тобо́ю лице́мъ къ лицꙋ̀ да ᲂу҆досто́юсѧ ви́дѣти, и҆ сла́вити є҆го̀ въ несконча́ємыѧ вѣ́ки, а҆ми́нь.

Свя­тая ве­ли­ко­му­че­ни­ца Вар­ва­ра ро­ди­лась в г. Илио­по­ле (ны­неш­ней Си­рии) при им­пе­ра­то­ре Мак­си­мине (305–311 гг.) в знат­ной язы­че­ской се­мье. Отец Вар­ва­ры Ди­о­скор, ра­но ли­шив­шись сво­ей су­пру­ги, был страст­но при­вя­зан к сво­ей един­ствен­ной до­че­ри. Чтобы убе­речь кра­си­вую де­вуш­ку от по­сто­рон­них взо­ров и вме­сте с тем ли­шить ее об­ще­ния с хри­сти­а­на­ми, он по­стро­ил для до­че­ри спе­ци­аль­ный за­мок, от­ку­да она вы­хо­ди­ла толь­ко с раз­ре­ше­ния от­ца (кондак 2). Со­зер­цая с вы­со­ты баш­ни кра­со­ту Бо­жи­его ми­ра, Вар­ва­ра ча­сто ис­пы­ты­ва­ла же­ла­ние узнать его ис­тин­но­го Твор­ца. Ко­гда при­став­лен­ные к ней вос­пи­та­тель­ни­цы го­во­ри­ли, что мир со­здан бо­га­ми, ко­то­рых по­чи­та­ет ее отец, то она мыс­лен­но го­во­ри­ла: «Бо­ги, ко­то­рых по­чи­та­ет мой отец, сде­ла­ны ру­ка­ми че­ло­ве­че­ски­ми. Как эти бо­ги мог­ли со­здать та­кое пре­свет­лое небо и та­кую кра­со­ту зем­ную? Един дол­жен быть та­кой Бог, Ко­то­ро­го со­зда­ла не ру­ка че­ло­ве­че­ская, но Сам Он, име­ю­щий соб­ствен­ное бы­тие». Так свя­тая Вар­ва­ра учи­лась от тво­ре­ний ви­ди­мо­го ми­ра по­зна­вать Твор­ца, и на ней сбы­ва­лись сло­ва про­ро­ка «По­учих­ся во всех де­лех тво­их, в тво­ре­нии ру­ку тво­ею по­учах­ся» (Пс.142:5) (икос 2).

Со вре­ме­нем к Ди­о­ско­ру все ча­ще ста­ли при­хо­дить бо­га­тые и знат­ные же­ни­хи, про­ся ру­ки его до­че­ри. Отец, дав­но меч­тав­ший о за­му­же­стве Вар­ва­ры, ре­шил за­ве­сти с ней раз­го­вор о бра­ке, но, к сво­е­му огор­че­нию, услы­шал от нее ре­ши­тель­ный от­каз ис­пол­нить его во­лю. Ди­о­скор ре­шил, что со вре­ме­нем на­стро­е­ние до­че­ри из­ме­нит­ся и у нее по­явит­ся склон­ность к за­му­же­ству. Для это­го он раз­ре­шил ей вы­хо­дить из баш­ни, на­де­ясь, что в об­ще­нии с по­дру­га­ми она уви­дит дру­гое от­но­ше­ние к за­му­же­ству.

Од­на­жды, ко­гда Ди­о­скор на­хо­дил­ся в дли­тель­ном пу­те­ше­ствии, Вар­ва­ра по­зна­ко­ми­лась с мест­ны­ми хри­сти­ан­ка­ми, ко­то­рые рас­ска­за­ли ей о Три­еди­ном Бо­ге, о неиз­ре­чен­ном Бо­же­стве Иису­са Хри­ста, о Его во­пло­ще­нии от Пре­чи­стой Де­вы и о Его воль­ном стра­да­нии и Вос­кре­се­нии. Слу­чи­лось так, что в то вре­мя в Илио­по­ле про­ез­дом из Алек­сан­дрии на­хо­дил­ся свя­щен­ник, при­няв­ший вид куп­ца. Узнав о нем, Вар­ва­ра при­гла­си­ла пре­сви­те­ра к се­бе и про­си­ла со­вер­шить над ней Та­ин­ство Кре­ще­ния. Свя­щен­ник из­ло­жил ей ос­но­вы свя­той ве­ры и за­тем кре­стил во имя От­ца и Сы­на и Свя­то­го Ду­ха. Про­све­щен­ная бла­го­да­тью Кре­ще­ния, Вар­ва­ра еще с боль­шей лю­бо­вью об­ра­ти­лась к Бо­гу. Она обе­ща­ла по­свя­тить Ему всю свою жизнь.

За вре­мя от­сут­ствия Ди­о­ско­ра при его до­ме ве­лось стро­и­тель­ство ка­мен­ной баш­ни, где ра­бо­чие по при­ка­за­нию хо­зя­и­на на­ме­ре­ва­лись со­ору­дить два ок­на с юж­ной сто­ро­ны. Но Вар­ва­ра, зай­дя од­на­жды по­смот­реть стро­и­тель­ство, упро­си­ла их сде­лать тре­тье ок­но – во об­раз Тро­ич­но­го Све­та (икос 3). Ко­гда же вер­нул­ся отец, то он по­тре­бо­вал у до­че­ри от­че­та о сде­лан­ном, «Три луч­ше чем два, – го­во­ри­ла Вар­ва­ра, – ибо у непри­ступ­но­го, неиз­ре­чен­но­го Све­та Тро­ич­но­го Три Ок­на (Ипо­ста­си или Ли­ца)». Услы­шав от Вар­ва­ры хри­сти­ан­ские ве­ро­учи­тель­ные на­став­ле­ния, Ди­о­скор при­шел в ярость. Он бро­сил­ся на нее с об­на­жен­ным ме­чом, но Вар­ва­ра успе­ла вы­бе­жать из до­ма (икос 4). Она укры­лась в гор­ной рас­се­лине, ко­то­рая чуд­ным об­ра­зом рас­сту­пи­лась пе­ред ней.

К ве­че­ру Ди­о­скор по ука­за­нию од­но­го пас­ту­ха все же на­шел Вар­ва­ру и с по­бо­я­ми при­та­щил му­че­ни­цу в дом (икос 5). На­ут­ро он от­вел Вар­ва­ру к го­род­ско­му пра­ви­те­лю и ска­зал: «Я от­ре­ка­юсь от нее, по­то­му что она от­вер­га­ет бо­гов мо­их, и ес­ли не об­ра­тит­ся к ним сно­ва, то не бу­дет мне до­че­рью. Му­чай ее, дер­жав­ный пра­ви­тель, как бу­дет угод­но тво­ей во­ле». Дол­го уго­ва­ри­вал гра­до­на­чаль­ник Вар­ва­ру не от­сту­пать от древ­них оте­че­ских за­ко­нов и не про­ти­вить­ся во­ле от­ца. Но свя­тая муд­рою ре­чью об­ли­ча­ла за­блуж­де­ния идо­ло­по­клон­ни­ков и ис­по­ве­да­ла Иису­са Хри­ста Бо­гом. То­гда ее на­ча­ли силь­но бить во­ло­вьи­ми жи­ла­ми и по­сле это­го рас­ти­рать глу­бо­кие ра­ны жест­кой вла­ся­ни­цей.

В кон­це дня Вар­ва­ру от­ве­ли в тем­ни­цу. Но­чью, ко­гда ее ум был за­нят мо­лит­вой, ей явил­ся Гос­подь и ска­зал: «Дер­зай, неве­ста Моя, и не бой­ся, ибо Я с то­бою. Я взи­раю на по­двиг твой и об­лег­чаю твои бо­лез­ни. Пре­тер­пи до кон­ца, чтобы вско­ре на­сла­дить­ся веч­ны­ми бла­га­ми в Цар­стве Мо­ем". На сле­ду­ю­щий день все бы­ли удив­ле­ны, уви­дев Вар­ва­ру, – на ее те­ле не оста­лось ни­ка­ких сле­дов недав­них ис­тя­за­ний (икос 6). Ви­дя та­кое чу­до, од­на хри­сти­ан­ка, по име­ни Иули­а­ния, от­кры­то ис­по­ве­да­ла свою ве­ру и объ­яви­ла же­ла­ние по­стра­дать за Хри­ста (кондак 8). Обе­их му­че­ниц на­ча­ли во­дить об­на­жен­ны­ми по го­ро­ду, а за­тем по­ве­си­ли на де­ре­ве и дол­го пы­та­ли (кондак 9). Их те­ла тер­за­ли крю­чья­ми, жгли све­ча­ми, би­ли по го­ло­ве мо­лот­ком (икос 7). От та­ких пы­ток невоз­мож­но бы­ло остать­ся че­ло­ве­ку жи­вым, ес­ли бы му­че­ниц не укреп­ля­ла си­ла Бо­жия. Оста­ва­ясь вер­ны­ми Хри­сту, по при­ка­за­нию пра­ви­те­ля му­че­ни­цы бы­ли обез­глав­ле­ны. Свя­тую Вар­ва­ру каз­нил сам Ди­о­скор (икос 10). Но без­жа­лост­но­го от­ца вско­ре по­ра­зи­ла мол­ния, пре­вра­тив его те­ло в пе­пел.

Мо­щи свя­той ве­ли­ко­му­че­ни­цы Вар­ва­ры в VI ве­ке бы­ли пе­ре­не­се­ны в Кон­стан­ти­но­поль, а в XII ве­ке дочь ви­зан­тий­ско­го им­пе­ра­то­ра Алек­сея Ком­ни­на (1081–1118 гг.), княж­на Вар­ва­ра, всту­пая в брак с рус­ским кня­зем Ми­ха­и­лом Изя­с­ла­ви­чем, при­вез­ла их с со­бой в Ки­ев, где они на­хо­дят­ся и те­перь – в ка­фед­раль­ном со­бо­ре свя­то­го кня­зя Вла­ди­ми­ра.


См. так­же: "Жи­тие и стра­да­ние свя­той ве­ли­ко­му­че­ни­цы Вар­ва­ры" в из­ло­же­нии свт. Ди­мит­рия Ро­стов­ско­го.