Акафист святому апостолу Андрею Первозванному

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 13 декабря (30 ноября ст. ст.)

Утвержден для общецерковного использования.

Конда́к 1.

Первозва́ннаго апо́стола Христо́ва, Ева́нгелия Свята́го пропове́дника, Росси́йския страны́ богодухнове́ннаго просвети́теля, Андре́я пресла́внаго, пе́сньми восхва́лим, стоя́ще на версе́ холма́, иде́же Кре́ст водрузи́ десни́ца его́, и ему́ я́ко Це́ркве возсле́дователю верхо́вному, в сле́д себе́ указа́вшему е́й пу́ть ко Христу́, во умиле́нии воззове́м:

Ра́дуйся, Андре́е, апо́столе Христо́в Первозва́нный.

И́кос 1.

А́нгел благове́стник А́гнца Христа́, взе́млющаго грехи́ ми́ра, бы́л еси́ Андре́е апо́столе, и с Ни́м во ве́ки пребыва́еши на небеси́; отону́дуже и при́зри на пе́ния, приноси́мая тебе́ во хра́ме твое́м, на ме́сте, иде́же стоя́сте но́зе твои́, и я́ко бога́т сы́й благода́тию Бо́жиею, пода́ждь на́м сло́во бла́го, да зове́м ти́:

Ра́дуйся, денни́це от гра́да Вифсаи́ды на́м возсия́вшая; ра́дуйся, равноче́стный бра́те верхо́внаго Петра́.

Ра́дуйся, учениче́ вели́каго Предте́чи Христо́ва; ра́дуйся, пе́рвее про́чих апо́стол зва́нный ко апо́стольскому служе́нию от Самого́ Го́спода.

Ра́дуйся, я́ко и други́м с ра́достию воззва́л еси́: прииди́те, обрето́хом жела́емаго Месси́ю; ра́дуйся, и на́с к Нему́ же приводя́й.

Ра́дуйся, Андре́е, апо́столе Христо́в Первозва́нный.

Конда́к 2.

Учи́телю, где́ живе́ши? — вопроси́л еси́, Андре́е, Спа́са ду́ш на́ших и, с Ни́м пребы́в де́нь еди́н, возлюби́л еси́ на вся́ дни́ живота́ твоего́ обре́теннаго тобо́ю Месси́ю, и бра́та твоего́ старе́йшаго приве́л еси́ к Нему́. Те́мже и на́с, я́ко ме́ньшую бра́тию твою́, к Нему́ же не преста́й влещи́, да и мы́, после́дующе стопа́м твои́м, вопие́м Бо́гу: Аллилу́иа.

И́кос 2.

Прови́дя в тебе́, святы́й Андре́е, ве́ры и любве́ пла́мень, Госпо́дь па́ки тя́ обре́те на е́зере Геннисаре́тсте, я́ко ры́баря, ку́пно с бра́том твои́м, вмета́юща мре́жи во глубину́, и рече́ ва́ма: гряди́та по Мне́, и А́з сотворю́ вы́ ловца́ челове́ком. — Ты́ же а́бие после́довал еси́ Ему́ и богодухнове́нным сло́вом, я́ко мре́жею, челове́ки улови́л еси́ Христу́, с ни́миже и мы́, уловле́ннии тобо́ю во спасе́ние, веща́ем ти́:

Ра́дуйся, я́ко от Самого́ Го́спода лови́тве духо́вней научи́лся еси́; ра́дуйся, я́ко на то́м же е́зере с про́чими апо́столы обурева́емь бы́в, ве́рою спа́слся еси́ в Го́спода, запреща́ющаго ве́тром и мо́рю.

Ра́дуйся, стяжа́вый ве́лию ве́ру, егда́ ви́дел еси́ пречу́дное насыще́ние пяти́ ты́сящ пятию́ хле́бами; ра́дуйся, да́р прия́вый от Го́спода цели́ти вся́к неду́г и вся́ку боле́знь.

Ра́дуйся, я́ко гла́с с небесе́ слы́шан бы́сть е́ллином, Христа́ тобо́ю узре́вшим; ра́дуйся, я́ко на горе́ Елео́нстей открове́на бы́ша и тебе́ гряду́щая при кончи́не ми́ра.

Ра́дуйся, Андре́е, апо́столе Христо́в Первозва́нный.

Конда́к 3.

Стра́нствия Влады́чня и Безсме́ртныя Трапе́зы на го́рнем ме́сте Сио́на наслади́вся, я́ко ве́рный дру́г Христо́в, вку́пе с про́чими апо́столы узре́л еси́ Го́спода и Бо́га твоего́, от Него́же и Ду́х Свя́т прия́л еси́, во е́же вяза́ти и реши́ти грехи́ людски́я. И па́ки, в то́йжде го́рнице Сио́нстей, оби́льное бы́сть на тя́ излия́ние обетова́ннаго Ду́ха во о́гненных язы́цех. Те́мже вся́ племена́ удиви́шася, ка́ко язы́ком и́х глаго́лал еси́ вели́чия Бо́жия, поя́: Аллилу́иа.

И́кос 3.

От Го́спода за́поведь прии́м пропове́дати Ева́нгелие все́й тва́ри, обте́кл еси́ мно́гия гра́ды и страны́, апо́столе Андре́е, призыва́я лю́ди к позна́нию И́стиннаго Бо́га и крестя́ и́х во и́мя Отца́ и Сы́на и Свята́го Ду́ха; с ни́миже и мы́ сподо́бихомся благода́ти креще́ния. Сего́ ра́ди благода́рственная воспису́ем ти́:

Ра́дуйся, чуде́с Христо́вых провозве́стниче ве́рный; ра́дуйся, свята́го Ева́нгелия пропове́дниче громогла́сный.

Ра́дуйся, и́дольскаго служе́ния потреби́телю; ра́дуйся, и́стиннаго благоче́стия насади́телю.

Ра́дуйся, я́ко по сло́ву твоему́ лю́дие водо́ю и Ду́хом возрожда́ются; ра́дуйся, я́ко тобо́ю ве́рнии Безсме́ртныя Трапе́зы причаща́ются.

Ра́дуйся, Андре́е, апо́столе Христо́в Первозва́нный.

Конда́к 4.

Си́ла Бо́жия осени́ тя́, апо́столе Первозва́нный, во е́же благовести́ти си́лу и сла́ву Сы́на Бо́жия и утвержда́ти вся́ ве́ровати во Святу́ю Тро́ицу призва́нныя. Те́мже у́бо и на́с, покланя́ющихся Еди́ному в Трие́х Ипоста́сех Бо́гу, на зла́чней па́жити ве́ры Христо́вы соблюди́, да благода́тию Свята́го Ду́ха вы́ну освяща́емии, велегла́сно пое́м Ему́: Аллилу́иа.

И́кос 4.

Приве́д ко Христу́ бра́та твоего́ Си́мона Петра́, Первозва́нне, с ни́м изше́л еси́ и на апо́стольское служе́ние твое́, пе́рвее во Антиохи́ю и Сино́п, и та́мо победи́в де́монов полки́, от у́з темни́чных спу́тника твоего́ апо́стола Матфи́я свободи́л еси́, и ю́зники с ни́м бы́вшия крести́л, верхо́вному Петру́ отту́ду в за́падныя страны́ теку́щу, ты́ бра́тнее целова́ние да́л еси́ ему́, са́м же до́бре подвиза́лся еси́ на восто́цех. Те́мже и мы́, лю́дие Це́ркве Восто́чныя, блажи́м тя́:

Ра́дуйся, си́ло Бо́жия, полки́ де́монов прогоня́ющая и у́зы темни́ц сокруша́ющая; ра́дуйся, прия́телище благода́ти апо́стольския, от а́довых у́з тайноде́йственне на́с свобожда́ющия.

Ра́дуйся, за́пад и восто́к с бра́том твои́м богому́дрым, про́поведи ра́ди сло́ва Бо́жия, жре́бием раздели́вый; ра́дуйся, во гра́де Сино́пе неве́рие иуде́ев си́лою чуде́с твои́х обличи́вый.

Ра́дуйся, я́ко та́мо от безбо́жных Христа́ ра́ди бие́н бы́л еси́; ра́дуйся, я́ко от Самого́ я́вльшагося ти́ Го́спода исцеле́ние я́зв тебе́ дарова́ся.

Ра́дуйся, Андре́е, апо́столе Христо́в Первозва́нный.

Конда́к 5.

Двукра́ты возвра́щся во Святы́й Гра́д, да ку́пно со апо́столы пятидеся́тный де́нь пра́зднуеши та́мо, двукра́ты па́ки ше́ствовал еси́ от свята́го Сио́на, во е́же Христа́ пропове́дати вселе́нней, пе́рвее со Иоа́нном напе́рсником Госпо́дним, посе́м же с Си́моном Канани́том и Матфи́ем, и́же жре́бием назна́менован бы́сть во апо́стола, и вся́ преде́лы Аси́и и По́нта обте́кл еси́, сло́вом спасе́ния все́х оглаша́я, да Бо́гу пою́т: Аллилу́иа.

И́кос 5.

От мо́ря Галиле́йскаго до По́нта Евкси́нскаго а́постольския мре́жи твоя́ распростры́й и все́ помо́рие о́крест огласи́вый благове́стием твои́м, восте́кл еси́, Первозва́нне, и в страны́ Ски́фии, Кре́ст Христо́в всю́ду водружа́я в зна́мение на́шего спасе́ния. Сего́ ра́ди и мы́, а́ще и по́зднии ро́ди, вне́млюще благове́стию твоему́ и воспомина́юще по́двиги твоя́, зове́м ти́:

Ра́дуйся, в Нике́и лю́тыя разбо́йники укроти́вый и люте́йшаго драко́на умертви́вый; ра́дуйся, Кре́ст Христо́в посреде́ гра́да сего́ водрузи́вый, я́ко Предте́ча сы́й двукра́ты собра́нных та́мо оте́ц богоно́сных.

Ра́дуйся, я́ко во Аси́и и По́нте тобо́ю све́т Христо́в возсия́; ра́дуйся, я́ко апо́стольский же́зл тво́й предго́рие Кавка́са све́ту Христо́ву отве́рзе.

Ра́дуйся, и́мже мра́к Киммери́йский озари́ся; ра́дуйся, и́мже вселе́нная струя́ми воды́ жи́вы напои́ся.

Ра́дуйся, Андре́е, апо́столе Христо́в Первозва́нный.

Конда́к 6.

Бу́рею страсте́й одержи́мая и, я́ко во́ды океа́на, волну́емая, племена́ челове́ков, я́же не ве́дяху Бо́га И́стиннаго, приве́л еси́, апо́столе, к ти́хому приста́нищу Христо́ву и те́х сердца́, а́ки у́тлую ладию́ неве́рием обурева́емая, на я́кори ве́ры Правосла́вныя утверди́л еси́. Те́мже и мы́, я́ко ча́да Правосла́вныя ве́ры, благода́рным се́рдцем и благода́рными усты́ вопие́м Бо́гу: Аллилу́иа.

И́кос 6.

На горе́ Елео́нстей Боже́ственнаго Учи́теля твоего́ иногда́ со про́чими апо́столы вопроси́л еси́, Андре́е: Рцы́ на́м, что́ е́сть зна́мение прише́ствия Твоего́? — На гора́х же Ки́евских, я́ко орга́н сы́й благода́ти Ду́ха Свята́го, ты́ предвозвести́л еси́ гряду́щую сла́ву ме́ста сего́; мы́ же, предрече́нныя на́м ми́лости сея́ сподо́бльшеся, умиле́нно взыва́ем ти́:

Ра́дуйся, я́ко с горы́ Сио́на зако́н на́м ева́нгельский прине́сл еси́; ра́дуйся, я́ко по вода́м Ворисфе́на апо́стол Бо́жий к на́м восте́кл еси́.

Ра́дуйся, благода́ть Иорда́нову, креще́ния на́шего ра́ди, реце́ се́й дарова́вый; ра́дуйся, на гора́х Ки́евских Кре́ст на́шего спасе́ния водрузи́вый.

Ра́дуйся, и́мже оби́льное излия́ние благода́ти Бо́жией зде́ предрече́ся; ра́дуйся, и́мже бытие́ гра́да вели́ка и церкве́й мно́гих зде́ предвозвести́ся.

Ра́дуйся, Андре́е, апо́столе Христо́в Первозва́нный.

Конда́к 7.

Дне́сь, во исполне́ние проро́ческаго гла́са твоего́, хра́м пресла́вный красу́ется на ме́сте, иде́же не су́щая я́ко су́щая прови́дел еси́ по да́ру Ду́ха Свята́го; о́крест же его́ гра́д ве́лий с це́рквами златове́рхими и́стину слове́с твои́х свиде́тельствует, ему́же и доны́не ты́, я́ко с го́рния кафе́дры, ми́р благовеству́еши. Те́мже и мы́, сбытие́ богодухнове́нных глаго́л твои́х зря́ще, ве́лиим гла́сом взыва́ем Бо́гу: Аллилу́иа.

И́кос 7.

От светоно́сныя зари́, Первозва́ннаго апо́стола, све́т богове́дения восприи́мши, свята́я О́льга возсия́ Росси́йстей земли́ я́ко денни́ца на́шего спасе́ния, возводя́ всле́д себе́, я́ко светоза́рное свети́ло, вну́ка своего́ Влади́мира, просвети́теля всея́ полу́нощныя страны́. Те́мже и мы́, возве́дше о́чи на́ша к тебе́, Андре́е богому́дре, я́ко к нача́льному благове́стнику на́шего спасе́ния, воспису́ем ти́ похва́льная сия́:

Ра́дуйся, я́ко денни́це на́шего спасе́ния, О́льзе святе́й, све́та Боже́ственнаго позна́ние дарова́ся; ра́дуйся, я́ко благове́рию ея́ Христо́во Ца́рствие отве́рзеся.

Ра́дуйся, я́ко благослове́нием твои́м пресла́вное свети́ло от сея́ денни́цы на́м произы́де; ра́дуйся, я́ко по твоему́ предвозве́стию апо́стольскому равноапо́стольный кня́зь на́м яви́ся.

Ра́дуйся, я́ко тобо́ю свята́го Влади́мира ца́рствие земно́е к небе́сному приобщи́ся; ра́дуйся, я́ко Дне́пр и Поча́йна, ре́ки Ки́евския, спаси́тельною купе́лию на́м бы́ша.

Ра́дуйся, Андре́е, апо́столе Христо́в Первозва́нный.

Конда́к 8.

Пропове́дуют пресла́внаго гра́да Ки́ева и всея́ Росси́йския страны́ па́стырие и пасо́мии па́мять дея́ний твои́х, богому́дре Андре́е апо́столе; в не́драх же пеще́рных нетле́нно почива́ющии уго́дницы Бо́жии, со Анто́нием и Феодо́сием, немо́лчными усты́, я́ко жи́ви су́ще, сла́ву твою́ веко́м и родо́м возглаша́ют, тобо́ю бо водруже́нный зде́ Кре́ст, я́ко благосенноли́ственное дре́во, произрасте́, во е́же изнести́ на́м плоды́ благоче́стия и святы́ни. Мы́ же ра́йскаго вертогра́да твоего́, а́ки птенцы́ духо́внии, тобо́ю науче́ни есмы́ воспева́ти Бо́гу: Аллилу́иа.

И́кос 8.

Не то́чию Руси́ еди́ныя бы́л еси́ спасе́ния провозве́стник, Первозва́нный апо́столе Христо́в, но и вся́ слове́нская племена́, я́коже ко́кош, птенцы́ своя́ под криле́ собира́яй, приве́л еси́ я́ ко Христу́; ты́ бо от Херсо́ниса во мра́к полу́нощныя страны́ прозира́я, су́щим та́мо лю́дем, да Бо́жию науча́тся сло́ву, прему́дрыя учи́тели, Кири́лла и Мефо́дия, про́поведию твое́ю за мно́гия ве́ки предугото́вал еси́; мы́ же, а́ки уста́ми си́х просвети́телей на́ших, велегла́сно вопие́м ти́:

Ра́дуйся, слове́нская племена́ искони́ благослови́вый; ра́дуйся, сло́во и́х разу́мное сло́вом Бо́жиим умудри́вый.

Ра́дуйся, я́ко глаго́лу Бо́жию послушли́вии, Це́ркве ча́да слове́сная бы́ша; ра́дуйся, я́ко в Херсо́нисе, иде́же пропове́дал еси́, пе́рвая ру́сская пи́смена Кири́лл святы́й обре́те и прия́т я́.

Ра́дуйся, я́ко те́ми А́лфу и Оме́гу, Нача́ток и Коне́ц — Христа́ Бо́жию прему́дрость возвести́л еси́ и́м; ра́дуйся, я́ко и вся́ богодухнове́нная писа́ния учи́телие сии́ на язы́к слове́нск на́м преложи́ша.

Ра́дуйся, Андре́е, апо́столе Христо́в Первозва́нный.

Конда́к 9.

Пусты́нныя Ски́фии не убоя́вся, во глубину́ полу́нощныя страны́ просте́рл еси́ апо́стольская стра́нствия твоя́, Первозва́нне, отону́дуже и в ве́тхий Ри́м прише́л еси́, и́же тогда́ глава́ ми́ру язы́ческому бы́сть; оба́че тмы́ ра́ди и́дольския оста́вль его́, и на кра́сный бре́г Воспо́ра прише́д, та́мо во гра́де Византи́и, и́же но́вый Ри́м и ма́терь христиа́ном бы́сть, апо́стольский престо́л тво́й утверди́л еси́, да от него́ восто́к и се́вер ве́сь све́том ве́ры озари́тся, ве́рнии же ча́да Це́ркве Христо́вы Бо́гу единомы́сленно воззову́т: Аллилу́иа.

И́кос 9.

Ма́ти Сио́н, — псало́мски рече́т челове́к, я́ко челове́к духо́вно роди́ся в не́м, но́вый же Сио́н на́м бы́сть Ки́ев: в не́м бо све́т и благода́ть Бо́жия яви́ся все́м сыново́м росси́йстим от кафе́дры, ю́же ты́, Первозва́нне апо́столе, в Византи́и утверди́л еси́. Те́мже и мы́, Невече́рним Све́том озаря́емии, благода́рне взыва́ем ти́:

Ра́дуйся, от горы́ Сио́нския снизше́дый и го́рним све́том Ки́ев многохо́лмный озари́вый; ра́дуйся, гра́ду сему́ многопло́дие духо́вное благослове́нием твои́м, низпосла́вый.

Ра́дуйся, я́ко посреде́ вселе́нныя апо́стольский престо́л тво́й утверди́л еси́; ра́дуйся, я́ко под се́нь его́, в но́вом Ри́ме, вся́ просвеще́нныя тобо́ю язы́ки собра́л еси́.

Ра́дуйся, и́мже Правосла́вие в душа́х и́х утвержда́ется; ра́дуйся, и́мже от восто́ка тма́ за́пада отрева́ется.

Ра́дуйся, Андре́е, апо́столе Христо́в Первозва́нный.

Конда́к 10.

Егда́ наста́ вре́мя преставле́ния твоего́, блаже́нне апо́столе, в дре́вния Па́тры Аха́йския прише́л еси́, да та́мо жре́н бу́деши, тече́ние бо сконча́л еси́, по́двигом до́брым подвиза́лся еси́, все́м пропове́дав Христа́ ра́спята, иуде́ем собла́зн, е́ллином же безу́мие, на́м же, зва́нным и спаса́емым, — Христа́, Бо́жию Си́лу и Бо́жию Прему́дрость, от Нея́же и научи́хомся пе́ти Бо́гу: Аллилу́иа.

И́кос 10.

Всю́ду и́менем Го́спода Иису́са боля́щия исцеля́я, ме́ртвыя воскреша́я, бе́сы изгоня́я, и во Па́трах предсме́ртную про́поведь твою́ чудеса́ми утверди́л еси́, апо́столе Христо́в, и анфипа́та Ле́звия обрати́л еси́ к позна́нию и́стины, егда́ противле́ния ра́ди я́звою пораже́н бы́в, тобо́ю от одра́ боле́зни воздви́жен бы́сть, лю́дие же вси́, ви́девше в тебе́ си́лу Бо́жию, и́долы своя́ сокруши́ша, посе́м и Госпо́дь яви́ся тебе́, я́коже Па́влу иногда́ в Кори́нфе, и повеле́ взя́ти кре́ст тво́й, назна́меновав си́м твое́ в Па́трах, Его́ ра́ди, страда́ние. Те́мже и мы́, дивя́щеся ве́лией благода́ти в тебе́, благогове́йно взыва́ем:

Ра́дуйся, ве́лия Бо́га всемогу́щаго си́ло; ра́дуйся, многоце́нное чуде́с сокро́вище.

Ра́дуйся, дре́вних Па́тр просвеще́ние и украше́ние; ра́дуйся, неве́рие анфипа́та в ве́ру премени́вый.

Ра́дуйся, я́ко та́мо па́ки яви́ся тебе́ Госпо́дь, на по́двиг кре́стный тя́ призва́вый; ра́дуйся, я́ко угото́вася тебе́ вене́ц пра́вды.

Ра́дуйся, Андре́е, апо́столе Христо́в Первозва́нный.

Конда́к 11.

Неро́н ке́сарь, я́коже иногда́ И́род, гоне́ние на вся́ ве́рныя воздви́гнувый, в Ри́ме Па́вла мече́м усе́кну, Петра́ же на кресте́ распя́, подо́бне и тебе́ дости́же в Па́трах рука́ мучи́телева, егда́ вме́сто кро́ткаго Ле́звия судию́ поста́ви Егеа́та лю́таго, и́же не терпя́й креще́ния бра́та своего́, ниже́ исцеле́нием жены́ своея́ умягче́н бы́в, в темни́цу вве́рже тя́ и, я́коже верхо́внаго Петра́, на кре́ст осуди́. Ты́ же ю́зник сы́й, в темни́це мра́чней, я́ко во све́тлем хра́ме, бра́та анфипа́това Стратокли́са во епи́скопа Па́тром проро́чествовал еси́, Бо́гу со все́ми ве́рными посреде́ узи́лища воспева́я: Аллилу́иа.

И́кос 11.

На ме́сте ло́бнем кре́ст воздвиза́ем узре́в, на не́мже име́л еси́ ра́спят бы́ти, не убоя́лся еси́, апо́столе, да́же до сме́рти свиде́тельствовати возлю́бльшаго тя́ и возлю́бленнаго тобо́ю Христа́, и к сему́ зна́мению спасе́ния ру́це простира́я, умиле́нно взыва́л еси́:

Ра́дуйся, Кре́сте Всечестны́й, пред ни́мже с весе́лием предстою́, ве́дая тя́, упова́ние мое́; ра́дуйся, Кре́сте Животворя́щий, его́же глава́ до небе́с дости́же, подно́жие же врата́ а́да сокруши́.

Ра́дуйся, Кре́сте достопокланя́емый, восприе́мый Влады́ку моего́, я́ко гро́здие сладча́йшее, источи́вшее на́м спасе́ние; ра́дуйся, Кре́сте благослове́нный, разбо́йника спасы́й и тому́ плоды́ испове́дания дарова́вый.

Ра́дуйся, я́ко и моея́ ра́дости исполне́ние бы́л еси́; — те́мже ра́дуйся и ты́, страстоте́рпче, на Кресте́ ве́ру твою́ во Христа́ запечатле́вый.

Ра́дуйся, Андре́е, апо́столе Христо́в Первозва́нный.

Конда́к 12.

Прииди́те, свиде́телие ра́дости моея́! — воззва́л еси́ апо́столе к соверши́телем во́ли Егеа́та, — твори́те во́лю на́ю обою́, распни́те мя́ и, я́ко а́гнца, принеси́те в же́ртву созда́вшему мя́ Творцу́. — И сия́ ре́к, возше́л еси́ на кре́ст, я́ко на го́рнюю кафе́дру, с нея́же три́ дни́ и три́ но́щи пропове́дал еси́ сло́во Бо́жие о́крест стоя́щим лю́дем, да не боя́тся сме́рти, испове́дающе Го́спода Иису́са. Егда́ же све́том небе́сным озари́ся ли́к тво́й, ужасе́ся мучи́тель и тя́ со креста́ взя́ти повеле́; оба́че ты́, страстоте́рпче, не восхоте́л еси́ от кре́стных му́к разреши́тися, до исхо́да твоего́ непреста́нно Бо́гу вопия́: Аллилу́иа.

И́кос 12.

Сла́вяще апо́стольския по́двиги твоя́, Андре́е Первозва́нне, ублажа́ем святу́ю кончи́ну твою́, е́юже Живоно́сную Стра́сть Сы́на Бо́жия просла́вил еси́, и во умиле́нии се́рдца взыва́ем ти́ си́це:

Ра́дуйся, дру́же Христо́в, с ра́достию кре́стная страда́ния за Него́ претерпе́вый; ра́дуйся, апо́столе ве́рный, со креста́ глаго́лы живота́ ве́чнаго лю́дем пропове́давый.

Ра́дуйся, я́ко в ча́с сня́тия со креста́ осени́ тя́ све́т, а́ки мо́лния с небесе́; ра́дуйся, я́ко правосла́вно испове́дающим пропове́даннаго тобо́ю Христа́ Сы́на Бо́жия обеща́л еси́ благода́ть ве́лию.

Ра́дуйся, Го́рняго Иерусали́ма апо́стольское основа́ние; ра́дуйся, седя́й со апо́столы на еди́ном от двоюна́десяте престо́лов, во е́же суди́ти вся́ коле́на Изра́илева.

Ра́дуйся, Андре́е, апо́столе Христо́в Первозва́нный.

Конда́к 13.

О, Первозва́нный апо́столе Христо́в Андре́е! При́зри на благохвале́ния сия́ все́х чту́щих святу́ю па́мять твою́, и я́ко водрузи́л еси́ кре́стное дре́во на гора́х гра́да Ки́ева, при́сно осеня́й и на́с спаси́тельным зна́мением си́м, да, Кресто́м Го́спода Бо́га и Спа́са на́шего охраня́еми, дости́гнем в ме́ру во́зраста исполне́ния Христо́ва и сподо́бимся с тобо́ю и со все́ми святы́ми, во гла́се ра́дования, в безконе́чныя ве́ки пе́ти Бо́гу, Спаси́телю на́шему: Аллилу́иа.

Этот конда́к читается три́жды, затем и́кос 1-й и конда́к 1-й.

Моли́тва.

Первозва́нне апо́столе Бо́га и Спа́са на́шего Иису́са Христа́, Це́ркве после́дователю верхо́вный, всехва́льне Андре́е! Сла́вим и, велича́ем апо́стольския труды́ твоя́, сла́дце помина́ем твое́ благослове́нное к на́м прише́ствие, ублажа́ем честна́я страда́ния твоя́, я́же за Христа́ претерпе́л еси́, лобыза́ем свяще́нныя мо́щи твоя́, чти́м святу́ю па́мять твою́ и ве́руем, я́ко жи́в Госпо́дь, жива́ же и душа́ твоя́ и с Ни́м во ве́ки пребыва́еши на небеси́, иде́же и лю́биши ны́ то́южде любо́вию, е́юже возлюби́л еси́ на́с, егда́ Ду́хом Святы́м прозре́л еси́ на́ше, е́же ко Христу́ обраще́ние, и не то́чию лю́биши, но и мо́лиши о на́с Бо́га, зря́ во Све́те Его́ вся́ ну́жды на́ша. Та́ко ве́руем и та́ко сию́ ве́ру на́шу испове́дуем во хра́ме, и́же во и́мя твое́, святы́й Андре́е, пресла́вно созда́ся, иде́же святы́я мо́щи твоя́ почива́ют; ве́рующе же, про́сим и мо́лим Го́спода и Бо́га и Спа́са на́шего Иису́са Христа́, да моли́твами твои́ми, я́же при́сно послу́шает и прие́млет, пода́ст на́м вся́ потре́бная ко спасе́нию на́с гре́шных; да я́коже ты́ а́бие по гла́су Го́спода, оста́вль мре́жи своя́, неукло́нно Ему́ после́довал еси́, си́це и ки́йждо от на́с да и́щет не свои́х си́, но е́же к созида́нию бли́жняго и о го́рнем зва́нии да помышля́ет. Иму́ще же тя́ предста́теля и моли́твенника о на́с, упова́ем, я́ко моли́тва твоя́ мно́го мо́жет пред Го́сподем и Спаси́телем на́шим Иису́сом Христо́м, Ему́же подоба́ет вся́кая сла́ва, че́сть и поклоне́ние со Отце́м и Святы́м Ду́хом во ве́ки веко́в. Ами́нь.

А҆ка́ѳїстъ ст҃о́мꙋ а҆пⷭ҇лꙋ а҆ндре́ю первозва́нномꙋ.

Конда́къ а҃.

Первозва́ннагѡ а҆пⷭ҇ла хрⷭ҇то́ва, є҆ѵⷢ҇лїѧ ст҃а́гѡ проповѣ́дника, рѡссі́йскїѧ страны̀ бг҃одꙋхнове́ннагѡ просвѣти́телѧ, а҆ндре́ѧ пресла́внагѡ, пѣ́сньми восхва́лимъ, стоѧ́ще на версѣ̀ холма̀, и҆дѣ́же крⷭ҇тъ водрꙋзѝ десни́ца є҆гѡ̀, и҆ є҆мꙋ̀ ꙗ҆́кѡ цр҃кве возслѣ́дователю верхо́вномꙋ, въ слѣ́дъ себѣ̀ ᲂу҆каза́вшемꙋ є҆́й пꙋ́ть ко хрⷭ҇тꙋ̀, во ᲂу҆миле́нїи воззове́мъ: Ра́дꙋйсѧ, а҆ндре́е, а҆пⷭ҇ле хрⷭ҇то́въ первозва́нный.

І҆́косъ а҃.

А҆́гг҃лъ бл҃говѣ́стникъ а҆́гнца хрⷭ҇та̀, взе́млющагѡ грѣхѝ мі́ра, бы́лъ є҆сѝ а҆ндре́е а҆пⷭ҇ле, и҆ съ ни́мъ во вѣ́ки пребыва́еши на нб҃сѝ: ѿѻнꙋ́дꙋже и҆ при́зри на пѣ̑нїѧ, приноси̑маѧ тебѣ̀ во хра́мѣ твое́мъ, на мѣ́стѣ, и҆дѣ́же стоѧ́стѣ но́зѣ твоѝ, и҆ ꙗ҆́кѡ бога́тъ сы́й бл҃года́тїю бж҃їею, пода́ждь на́мъ сло́во бл҃гѡ, да зове́мъ тѝ:

Ра́дꙋйсѧ, денни́це ѿ гра́да виѳсаі́ды на́мъ возсїѧ́вшаѧ: ра́дꙋйсѧ, равноче́стный бра́те верхо́внагѡ петра̀.

Ра́дꙋйсѧ, ᲂу҆ченичѐ вели́кагѡ прⷣте́чи хрⷭ҇то́ва: ра́дꙋйсѧ, пе́рвѣе про́чихъ а҆пⷭ҇лъ зва́нный ко а҆пⷭ҇льскомꙋ слꙋже́нїю ѿ самогѡ̀ гдⷭ҇а.

Ра́дꙋйсѧ, ꙗ҆́кѡ и҆ дрꙋги́мъ съ ра́достїю воззва́лъ є҆сѝ: прїиди́те, ѡ҆брѣто́хомъ жела́емагѡ мессі́ю: ра́дꙋйсѧ, и҆ на́съ къ немꙋ̀ же приводѧ́й.

Ра́дꙋйсѧ, а҆ндре́е, а҆пⷭ҇ле хрⷭ҇то́въ первозва́нный.

Конда́къ в҃.

Оу҆чи́телю, гдѣ̀ живе́ши, вопроси́лъ є҆сѝ, а҆ндре́е, сп҃са дꙋ́шъ на́шихъ и҆, съ ни́мъ пребы́въ де́нь є҆ди́нъ, возлюби́лъ є҆сѝ на всѧ̑ дни̑ живота̀ твоегѡ̀ ѡ҆брѣ́теннагѡ тобо́ю мессі́ю, и҆ бра́та твоегѡ̀ старѣ́йшагѡ приве́лъ є҆сѝ къ немꙋ̀. Тѣ́мже и҆ на́съ, ꙗ҆́кѡ ме́ньшꙋю бра́тїю твою̀, къ немꙋ̀ же не преста́й влещѝ, да и҆ мы̀, послѣ́дꙋюще стопа́мъ твои́мъ, вопїе́мъ бг҃ꙋ: А҆ллилꙋ́їа.

І҆́косъ в҃.

Прови́дѧ въ тебѣ̀, ст҃ы́й а҆ндре́е, вѣ́ры и҆ любвѐ пла́мень, гдⷭ҇ь па́ки тѧ̀ ѡ҆брѣ́те на є҆́зерѣ геннисаре́тстѣ, ꙗ҆́кѡ ры́барѧ, кꙋ́пнѡ съ бра́томъ твои́мъ, вмета́юща мрє́жи во глꙋбинꙋ̀, и҆ речѐ ва́ма: грѧди́та по мнѣ̀, и҆ а҆́зъ сотворю̀ вы̀ ловца̑ чл҃вѣ́кѡмъ. Ты́ же а҆́бїе послѣ́довалъ є҆сѝ є҆мꙋ̀ и҆ бг҃одꙋхнове́ннымъ сло́вомъ, ꙗ҆́кѡ мре́жею, чл҃вѣ́ки ᲂу҆лови́лъ є҆сѝ хрⷭ҇тꙋ̀, съ ни́миже и҆ мы̀, ᲂу҆ловле́ннїи тобо́ю во сп҃се́нїе, вѣща́емъ тѝ:

Ра́дꙋйсѧ, ꙗ҆́кѡ ѿ самогѡ̀ гдⷭ҇а лови́твѣ дꙋхо́внѣй наꙋчи́лсѧ є҆сѝ: ра́дꙋйсѧ, ꙗ҆́кѡ на то́мъ же є҆́зерѣ съ про́чими а҆пⷭ҇лы ѡ҆бꙋрева́емь бы́въ, вѣ́рою спа́слсѧ є҆сѝ въ гдⷭ҇а, запреща́ющагѡ вѣ́тромъ и҆ мо́рю.

Ра́дꙋйсѧ, стѧжа́вый ве́лїю вѣ́рꙋ, є҆гда̀ ви́дѣлъ є҆сѝ пречꙋ́дное насыще́нїе пѧтѝ ты́сѧщъ пѧтїю̀ хлѣ́бами: ра́дꙋйсѧ, да́ръ прїѧ́вый ѿ гдⷭ҇а цѣли́ти всѧ́къ недꙋ́гъ и҆ всѧ́кꙋ болѣ́знь.

Ра́дꙋйсѧ, ꙗ҆́кѡ гла́съ съ нб҃сѐ слы́шанъ бы́сть є҆́ллинѡмъ, хрⷭ҇та̀ тобо́ю ᲂу҆зрѣ́вшимъ: ра́дꙋйсѧ, ꙗ҆́кѡ на горѣ̀ є҆леѡ́нстѣй ѿкрове́на бы́ша и҆ тебѣ̀ грѧдꙋ́щаѧ при кончи́нѣ мі́ра.

Ра́дꙋйсѧ, а҆ндре́е, а҆пⷭ҇ле хрⷭ҇то́въ первозва́нный.

Конда́къ г҃.

Стра̑нствїѧ влады́чнѧ и҆ безсме́ртныѧ трапе́зы на го́рнѣмъ мѣ́стѣ сїѡ́на наслади́всѧ, ꙗ҆́кѡ вѣ́рный дрꙋ́гъ хрⷭ҇то́въ, вкꙋ́пѣ съ про́чими а҆пⷭ҇лы ᲂу҆зрѣ́лъ є҆сѝ гдⷭ҇а и҆ бг҃а твоегѡ̀, ѿ него́же и҆ дх҃ъ ст҃ъ прїѧ́лъ є҆сѝ, во є҆́же вѧза́ти и҆ рѣши́ти грѣхѝ людскі́ѧ. и҆ па́ки, въ то́йжде го́рницѣ сїѡ́нстѣй, ѻ҆би́льное бы́сть на тѧ̀ и҆злїѧ́нїе ѡ҆бѣтова́ннагѡ дх҃а во ѻ҆́гненныхъ ꙗ҆зы́цѣхъ. Тѣ́мже всѧ̑ племена̀ ᲂу҆диви́шасѧ, ка́кѡ ꙗ҆зы́комъ и҆́хъ глаго́лалъ є҆сѝ вели́чїѧ бж҃їѧ, поѧ̀: А҆ллилꙋ́їа.

І҆́косъ г҃.

Ѿ гдⷭ҇а за́повѣдь прїи́мъ проповѣ́дати є҆ѵⷢ҇лїе все́й тва́ри, ѡ҆бте́клъ є҆сѝ мно́гїѧ гра́ды и҆ страны̀, а҆пⷭ҇ле а҆ндре́е, призыва́ѧ лю́ди къ позна́нїю и҆́стиннагѡ бг҃а и҆ крⷭ҇тѧ̀ и҆̀хъ во и҆́мѧ ѻ҆ц҃а̀ и҆ сн҃а и҆ ст҃а́гѡ дх҃а: съ ни́миже и҆ мы̀ сподо́бихомсѧ бл҃года́ти креще́нїѧ. Сегѡ̀ ра́ди бл҃года́рствєннаѧ восписꙋ́емъ тѝ:

Ра́дꙋйсѧ, чꙋде́съ хрⷭ҇то́выхъ провозвѣ́стниче вѣ́рный: ра́дꙋйсѧ, ст҃а́гѡ є҆ѵⷢ҇лїѧ проповѣ́дниче громогла́сный.

Ра́дꙋйсѧ, і҆́дѡльскагѡ слꙋже́нїѧ потреби́телю: ра́дꙋйсѧ, и҆́стиннагѡ бл҃гоче́стїѧ насади́телю.

Ра́дꙋйсѧ, ꙗ҆́кѡ по сло́вꙋ твоемꙋ̀ лю́дїе водо́ю и҆ дх҃омъ возрожда́ютсѧ: ра́дꙋйсѧ, ꙗ҆́кѡ тобо́ю вѣ́рнїи безсме́ртныѧ трапе́зы причаща́ютсѧ.

Ра́дꙋйсѧ, а҆ндре́е, а҆пⷭ҇ле хрⷭ҇то́въ первозва́нный.

Конда́къ д҃.

Си́ла бж҃їѧ ѡ҆сѣнѝ тѧ̀, а҆пⷭ҇ле первозва́нный, во є҆́же бл҃говѣсти́ти си́лꙋ и҆ сла́вꙋ сн҃а бж҃їѧ и҆ ᲂу҆твержда́ти всѧ̑ вѣ́ровати во ст҃ꙋ́ю трⷪ҇цꙋ призва́нныѧ. Тѣ́мже ᲂу҆́бѡ и҆ на́съ, покланѧ́ющихсѧ є҆ди́номꙋ въ трїе́хъ ѵ҆поста́сѣхъ бг҃ꙋ, на ѕла́чнѣй па́жити вѣ́ры хрⷭ҇то́вы соблюдѝ, да бл҃года́тїю ст҃а́гѡ дх҃а вы́нꙋ ѡ҆сщ҃а́емїи, велегла́снѡ пое́мъ є҆мꙋ̀: А҆ллилꙋ́їа.

І҆́косъ д҃.

Приве́дъ ко хрⷭ҇тꙋ̀ бра́та твоегѡ̀ сі́мѡна петра̀, первозва́нне, съ ни́мъ и҆зше́лъ є҆сѝ и҆ на а҆пⷭ҇льское слꙋже́нїе твоѐ, пе́рвѣе во а҆нтїохі́ю и҆ сѷно́пъ, и҆ та́мѡ побѣди́въ де́монѡвъ полкѝ, ѿ ᲂу҆́зъ темни́чныхъ спꙋ́тника твоегѡ̀ а҆пⷭ҇ла матѳі́ѧ свободи́лъ є҆сѝ, и҆ ю҆́зники съ ни́мъ бы́вшїѧ крⷭ҇ти́лъ, верхо́вномꙋ петрꙋ̀ ѿтꙋ́дꙋ въ за́падныѧ страны̀ текꙋ́щꙋ, ты̀ бра́тнее цѣлова́нїе да́лъ є҆сѝ є҆мꙋ̀, са́мъ же до́брѣ подвиза́лсѧ є҆сѝ на восто́цѣхъ. Тѣ́мже и҆ мы̀, лю́дїе цр҃кве восто́чныѧ, бл҃жи́мъ тѧ̀:

Ра́дꙋйсѧ, си́ло бж҃їѧ, полкѝ де́монѡвъ прогонѧ́ющаѧ и҆ ᲂу҆́зы темни́цъ сокрꙋша́ющаѧ: ра́дꙋйсѧ, прїѧ́телище бл҃года́ти а҆пⷭ҇льскїѧ, ѿ а҆́довыхъ ᲂу҆́зъ тайнодѣ́йственнѣ на́съ свобожда́ющїѧ.

Ра́дꙋйсѧ, за́падъ и҆ восто́къ съ бра́томъ твои́мъ бг҃омꙋ́дрымъ, про́повѣди ра́ди сло́ва бж҃їѧ, жре́бїемъ раздѣли́вый: ра́дꙋйсѧ, во гра́дѣ сѷно́пѣ невѣ́рїе і҆ꙋде́євъ си́лою чꙋде́съ твои́хъ ѡ҆бличи́вый.

Ра́дꙋйсѧ, ꙗ҆́кѡ та́мѡ ѿ безбо́жныхъ хрⷭ҇та̀ ра́ди бїе́нъ бы́лъ є҆сѝ: ра́дꙋйсѧ, ꙗ҆́кѡ ѿ самогѡ̀ ꙗ҆́вльшагосѧ тѝ гдⷭ҇а и҆сцѣле́нїе ꙗ҆́звъ тебѣ̀ дарова́сѧ.

Ра́дꙋйсѧ, а҆ндре́е, а҆пⷭ҇ле хрⷭ҇то́въ первозва́нный.

Конда́къ є҃.

Двꙋкра́ты возвра́щсѧ во ст҃ы́й гра́дъ, да кꙋ́пнѡ со а҆пⷭ҇лы пѧтидесѧ́тный де́нь пра́зднꙋеши та́мѡ, двꙋкра́ты па́ки ше́ствовалъ є҆сѝ ѿ ст҃а́гѡ сїѡ́на, во є҆́же хрⷭ҇та̀ проповѣ́дати вселе́ннѣй, пе́рвѣе со і҆ѡа́нномъ напе́рсникомъ гдⷭ҇нимъ, посе́мъ же съ сі́мѡномъ канані́томъ и҆ матѳі́емъ, и҆́же жре́бїемъ назна́менованъ бы́сть во а҆пⷭ҇ла, и҆ всѧ̑ предѣ́лы а҆сі́и и҆ по́нта ѡ҆бте́клъ є҆сѝ, сло́вомъ сп҃се́нїѧ всѣ́хъ ѡ҆глаша́ѧ, да бг҃ꙋ пою́тъ: А҆ллилꙋ́їа.

І҆́косъ є҃.

Ѿ мо́рѧ галїле́йскагѡ до по́нта є҆ѵѯі́нскагѡ а҆пⷭ҇льскїѧ мрє́жи твоѧ̑ распростры́й и҆ всѐ помо́рїе ѡ҆́крестъ ѡ҆гласи́вый бл҃говѣ́стїемъ твои́мъ, восте́клъ є҆сѝ, первозва́нне, и҆ въ страны̀ ски́ѳїи, крⷭ҇тъ хрⷭ҇то́въ всю́дꙋ водрꙋжа́ѧ въ зна́менїе на́шегѡ сп҃се́нїѧ. Сегѡ̀ ра́ди и҆ мы̀, а҆́ще и҆ по́зднїи ро́ди, вне́млюще бл҃говѣ́стїю твоемꙋ̀ и҆ воспомина́юще по́двиги твоѧ̑, зове́мъ тѝ:

Ра́дꙋйсѧ, въ нїке́и лю̑тыѧ разбо́йники ᲂу҆кроти́вый и҆ лютѣ́йшагѡ драко́на ᲂу҆мертви́вый: ра́дꙋйсѧ, крⷭ҇тъ хрⷭ҇то́въ посредѣ̀ гра́да сегѡ̀ водрꙋзи́вый, ꙗ҆́кѡ прⷣте́ча сы́й двꙋкра́ты собра́нныхъ та́мѡ ѻ҆тє́цъ бг҃оно́сныхъ.

Ра́дꙋйсѧ, ꙗ҆́кѡ во а҆сі́и и҆ по́нтѣ тобо́ю свѣ́тъ хрⷭ҇то́въ возсїѧ̀: ра́дꙋйсѧ, ꙗ҆́кѡ а҆пⷭ҇льскїй же́злъ тво́й предго́рїе кавка́са свѣ́тꙋ хрⷭ҇то́вꙋ ѿве́рзе.

Ра́дꙋйсѧ, и҆́мже мра́къ кѷммері́йскїй ѡ҆зари́сѧ: ра́дꙋйсѧ, и҆́мже вселе́ннаѧ стрꙋѧ́ми воды̀ жи́вы напои́сѧ.

Ра́дꙋйсѧ, а҆ндре́е, а҆пⷭ҇ле хрⷭ҇то́въ первозва́нный.

Конда́къ ѕ҃.

Бꙋ́рею страсте́й ѡ҆держи́маѧ и҆, ꙗ҆́кѡ во́ды ѻ҆кеа́на, волнꙋ́емаѧ, племена̀ чл҃вѣ́кѡвъ, ꙗ҆́же не вѣ́дѧхꙋ бг҃а и҆́стиннагѡ, приве́лъ є҆сѝ, а҆пⷭ҇ле, къ ти́хомꙋ приста́нищꙋ хрⷭ҇то́вꙋ и҆ тѣ́хъ сердца̀, а҆́ки ᲂу҆́тлꙋю ладїю̀ невѣ́рїемъ ѡ҆бꙋрева́емаѧ, на ꙗ҆́кѡри вѣ́ры правосла́вныѧ ᲂу҆тверди́лъ є҆сѝ. Тѣ́мже и҆ мы̀, ꙗ҆́кѡ ча̑да правосла́вныѧ вѣ́ры, бл҃года́рнымъ се́рдцемъ и҆ бл҃года́рными ᲂу҆сты̀ вопїе́мъ бг҃ꙋ: А҆ллилꙋ́їа.

І҆́косъ ѕ҃.

На горѣ̀ є҆леѡ́нстѣй бжⷭ҇твеннагѡ ᲂу҆чи́телѧ твоегѡ̀ и҆ногда̀ со про́чими а҆пⷭ҇лы вопроси́лъ є҆сѝ, а҆ндре́е: рцы̀ на́мъ, что̀ є҆́сть зна́менїе прише́ствїѧ твоегѡ̀; на гора́хъ же кі́евскихъ, ꙗ҆́кѡ ѻ҆рга́нъ сы́й бл҃года́ти дх҃а ст҃а́гѡ, ты̀ предвозвѣсти́лъ є҆сѝ грѧдꙋ́щꙋю сла́вꙋ мѣ́ста сегѡ̀: мы́ же, предрече́нныѧ на́мъ млⷭ҇ти сеѧ̀ сподо́бльшесѧ, ᲂу҆миле́ннѡ взыва́емъ тѝ:

Ра́дꙋйсѧ, ꙗ҆́кѡ съ горы̀ сїѡ́на зако́нъ на́мъ є҆ѵⷢ҇льскїй прине́слъ є҆сѝ: ра́дꙋйсѧ, ꙗ҆́кѡ по вода́мъ ворисѳе́на а҆пⷭ҇лъ бж҃їй къ на́мъ восте́клъ є҆сѝ.

Ра́дꙋйсѧ, бл҃года́ть і҆ѻрда́новꙋ, креще́нїѧ на́шегѡ ра́ди, рѣцѣ̀ се́й дарова́вый: ра́дꙋйсѧ, на гора́хъ кі́евскихъ крⷭ҇тъ на́шегѡ сп҃се́нїѧ водрꙋзи́вый.

Ра́дꙋйсѧ, и҆́мже ѻ҆би́льное и҆злїѧ́нїе бл҃года́ти бж҃їей здѣ̀ предрече́сѧ: ра́дꙋйсѧ, и҆́мже бытїѐ гра́да вели́ка и҆ церкве́й мно́гихъ здѣ̀ предвозвѣсти́сѧ.

Ра́дꙋйсѧ, а҆ндре́е, а҆пⷭ҇ле хрⷭ҇то́въ первозва́нный.

Конда́къ з҃.

Дне́сь, во и҆сполне́нїе прⷪ҇ро́ческагѡ гла́са твоегѡ̀, хра́мъ пресла́вный красꙋ́етсѧ на мѣ́стѣ, и҆дѣ́же не сꙋ́щаѧ ꙗ҆́кѡ сꙋ́щаѧ прови́дѣлъ є҆сѝ по да́рꙋ дх҃а ст҃а́гѡ: ѡ҆́крестъ же є҆гѡ̀ гра́дъ ве́лїй съ це́рквами златове́рхими и҆́стинꙋ слове́съ твои́хъ свидѣ́тельствꙋетъ, є҆мꙋ́же и҆ доны́нѣ ты̀, ꙗ҆́кѡ съ го́рнїѧ каѳе́дры, ми́ръ бл҃говѣствꙋ́еши. Тѣ́мже и҆ мы̀, сбытїѐ бг҃одꙋхнове́нныхъ глаго́лъ твои́хъ зрѧ́ще, ве́лїимъ гла́сомъ взыва́емъ бг҃ꙋ: А҆ллилꙋ́їа.

І҆́косъ з҃.

Ѿ свѣтоно́сныѧ зарѝ, первозва́ннагѡ а҆пⷭ҇ла, свѣ́тъ бг҃овѣ́дѣнїѧ воспрїи́мши, ст҃а́ѧ ѻ҆́льга возсїѧ̀ рѡссі́йстѣй землѝ ꙗ҆́кѡ денни́ца на́шегѡ сп҃се́нїѧ, возводѧ̀ вслѣ́дъ себѣ̀, ꙗ҆́кѡ свѣтоза́рное свѣти́ло, внꙋ́ка своегѡ̀ влади́мїра, просвѣти́телѧ всеѧ̀ полꙋ́нощныѧ страны̀. Тѣ́мже и҆ мы̀, возве́дше ѻ҆́чи на̑ша къ тебѣ̀, а҆ндре́е бг҃омꙋ́дре, ꙗ҆́кѡ къ нача́льномꙋ бл҃говѣ́стникꙋ на́шегѡ сп҃се́нїѧ, восписꙋ́емъ тѝ похва́льнаѧ сїѧ̀:

Ра́дꙋйсѧ, ꙗ҆́кѡ денни́цѣ на́шегѡ сп҃се́нїѧ, ѻ҆́льзѣ ст҃ѣ́й, свѣ́та бжⷭ҇твеннагѡ позна́нїе дарова́сѧ: ра́дꙋйсѧ, ꙗ҆́кѡ бл҃говѣ́рїю є҆ѧ̀ хрⷭ҇то́во црⷭ҇твїе ѿве́рзесѧ.

Ра́дꙋйсѧ, ꙗ҆́кѡ бл҃гослове́нїемъ твои́мъ пресла́вное свѣти́ло ѿ сеѧ̀ денни́цы на́мъ произы́де: ра́дꙋйсѧ, ꙗ҆́кѡ по твоемꙋ̀ предвозвѣ́стїю а҆пⷭ҇льскомꙋ равноапⷭ҇тольный кнѧ́зь на́мъ ꙗ҆ви́сѧ.

Ра́дꙋйсѧ, ꙗ҆́кѡ тобо́ю ст҃а́гѡ влади́мїра ца́рствїе земно́е къ нбⷭ҇номꙋ прїѡбщи́сѧ: ра́дꙋйсѧ, ꙗ҆́кѡ днѣ́пръ и҆ поча́йна, рѣ́ки кі́евскїѧ, сп҃си́тельною кꙋпѣ́лїю на́мъ бы́ша.

Ра́дꙋйсѧ, а҆ндре́е, а҆пⷭ҇ле хрⷭ҇то́въ первозва́нный.

Конда́къ и҃.

Проповѣ́дꙋютъ пресла́внагѡ гра́да кі́ева и҆ всеѧ̀ рѡссі́йскїѧ страны̀ па́стырїе и҆ пасо́мїи па́мѧть дѣѧ́нїй твои́хъ, бг҃омꙋ́дре а҆ндре́е а҆пⷭ҇ле: въ нѣ́драхъ же пеще́рныхъ нетлѣ́ннѡ почива́ющїи ᲂу҆го́дницы бж҃їи, со а҆нтѡ́нїемъ и҆ ѳеодо́сїемъ, немо́лчными ᲂу҆сты̀, ꙗ҆́кѡ жи́ви сꙋ́ще, сла́вꙋ твою̀ вѣкѡ́мъ и҆ родѡ́мъ возглаша́ютъ, тобо́ю бо водрꙋже́нный здѣ̀ крⷭ҇тъ, ꙗ҆́кѡ бл҃госѣнноли́ственное дре́во, произрастѐ, во є҆́же и҆знестѝ на́мъ плоды̀ бл҃гоче́стїѧ и҆ ст҃ы́ни. Мы́ же ра́йскагѡ вертогра́да твоегѡ̀, а҆́ки птенцы̀ дꙋхо́внїи, тобо́ю наꙋче́ни є҆смы̀ воспѣва́ти бг҃ꙋ: А҆ллилꙋ́їа.

І҆́косъ и҃.

Не то́чїю рꙋсѝ є҆ди́ныѧ бы́лъ є҆сѝ сп҃се́нїѧ провозвѣ́стникъ, первозва́нный а҆пⷭ҇ле хрⷭ҇то́въ, но и҆ всѧ̑ слове́нскаѧ племена̀, ꙗ҆́коже ко́кошъ, птенцы̀ своѧ̑ под̾ крилѣ̀ собира́ѧй, приве́лъ є҆сѝ ѧ҆̀ ко хрⷭ҇тꙋ̀: ты́ бо ѿ херсо́ниса во мра́къ полꙋ́нощныѧ страны̀ прозира́ѧ, сꙋ́щимъ та́мѡ лю́демъ, да бж҃їю наꙋча́тсѧ сло́вꙋ, премꙋ́дрыѧ ᲂу҆чи́тели, кѷрі́лла и҆ меѳо́дїѧ, про́повѣдїю твое́ю за мно́гїѧ вѣ́ки предꙋгото́валъ є҆сѝ: мы́ же, а҆́ки ᲂу҆ста́ми си́хъ просвѣти́телей на́шихъ, велегла́снѡ вопїе́мъ тѝ:

Ра́дꙋйсѧ, слове́нскаѧ племена̀ и҆сконѝ бл҃гослови́вый: ра́дꙋйсѧ, сло́во и҆́хъ разꙋ́мное сло́вомъ бж҃їимъ ᲂу҆мꙋдри́вый.

Ра́дꙋйсѧ, ꙗ҆́кѡ глаго́лꙋ бж҃їю послꙋшли́вїи, цр҃кве ча̑да словє́снаѧ бы́ша: ра́дꙋйсѧ, ꙗ҆́кѡ въ херсо́нисѣ, и҆дѣ́же проповѣ́далъ є҆сѝ, пе́рваѧ рꙋ́сскаѧ пи́смена кѷрі́ллъ ст҃ы́й ѡ҆брѣ́те и҆ прїѧ́тъ ѧ҆̀.

Ра́дꙋйсѧ, ꙗ҆́кѡ тѣ́ми а҆́лфꙋ и҆ ѡ҆ме́гꙋ, нача́токъ и҆ коне́цъ, хрⷭ҇та̀ бж҃їю премꙋ́дрость возвѣсти́лъ є҆сѝ и҆́мъ: ра́дꙋйсѧ, ꙗ҆́кѡ и҆ всѧ̑ бг҃одꙋхновє́ннаѧ писа̑нїѧ ᲂу҆чи́телїе сїѝ на ꙗ҆зы́къ слове́нскъ на́мъ преложи́ша.

Ра́дꙋйсѧ, а҆ндре́е, а҆пⷭ҇ле хрⷭ҇то́въ первозва́нный.

Конда́къ ѳ҃.

Пꙋсты́нныѧ скѵ́ѳїи не ᲂу҆боѧ́всѧ, во глꙋбинꙋ̀ полꙋ́нощныѧ страны̀ просте́рлъ є҆сѝ а҆пⷭ҇льскаѧ стра̑нствїѧ твоѧ̑, первозва́нне, ѿѻнꙋ́дꙋже и҆ въ ве́тхїй ри́мъ прише́лъ є҆сѝ, и҆́же тогда̀ глава̀ мі́рꙋ ꙗ҆зы́ческомꙋ бы́сть: ѻ҆ба́че тмы̀ ра́ди і҆́дѡльскїѧ ѡ҆ста́вль є҆гѡ̀, и҆ на кра́сный бре́гъ воспо́ра прише́дъ, та́мѡ во гра́дѣ вѷзанті́и, и҆́же но́вый ри́мъ и҆ ма́терь хрⷭ҇тїа́нѡмъ бы́сть, а҆пⷭ҇льскїй прⷭ҇то́лъ тво́й ᲂу҆тверди́лъ є҆сѝ, да ѿ негѡ̀ восто́къ и҆ сѣ́веръ ве́сь свѣ́томъ вѣ́ры ѡ҆зари́тсѧ, вѣ́рнїи же ча́да цр҃кве хрⷭ҇то́вы бг҃ꙋ є҆диномы́сленнѡ воззовꙋ́тъ: А҆ллилꙋ́їа.

І҆́косъ ѳ҃.

Ма́ти сїѡ́нъ, ѱало́мски рече́тъ чл҃вѣ́къ, ꙗ҆́кѡ чл҃вѣ́къ дꙋхо́внѡ роди́сѧ въ не́мъ, но́вый же сїѡ́нъ на́мъ бы́сть кі́евъ: въ не́мъ бо свѣ́тъ и҆ бл҃года́ть бж҃їѧ ꙗ҆ви́сѧ всѣ̑мъ сыновѡ́мъ рѡссі́йстимъ ѿ каѳе́дры, ю҆́же ты̀, первозва́нне а҆пⷭ҇ле, въ вѷзанті́и ᲂу҆тверди́лъ є҆сѝ. Тѣ́мже и҆ мы̀, невече́рнимъ свѣ́томъ ѡ҆зарѧ́емїи, бл҃года́рнѣ взыва́емъ тѝ:

Ра́дꙋйсѧ, ѿ горы̀ сїѡ́нскїѧ снизше́дый и҆ го́рнимъ свѣ́томъ кі́евъ многѡхо́лмный ѡ҆зари́вый: ра́дꙋйсѧ, гра́дꙋ семꙋ̀ многѡпло́дїе дꙋхо́вное бл҃гослове́нїемъ твои́мъ, низпосла́вый.

Ра́дꙋйсѧ, ꙗ҆́кѡ посредѣ̀ вселе́нныѧ а҆пⷭ҇льскїй прⷭ҇то́лъ тво́й ᲂу҆тверди́лъ є҆сѝ: ра́дꙋйсѧ, ꙗ҆́кѡ под̾ сѣ́нь є҆гѡ̀, въ но́вомъ ри́мѣ, всѧ̑ просвѣщє́нныѧ тобо́ю ꙗ҆зы́ки собра́лъ є҆сѝ.

Ра́дꙋйсѧ, и҆́мже правосла́вїе въ дꙋша́хъ и҆̀хъ ᲂу҆твержда́етсѧ: ра́дꙋйсѧ, и҆́мже ѿ восто́ка тма̀ за́пада ѿрѣва́етсѧ.

Ра́дꙋйсѧ, а҆ндре́е, а҆пⷭ҇ле хрⷭ҇то́въ первозва́нный.

Конда́къ і҃.

Є҆гда̀ наста̀ вре́мѧ преставле́нїѧ твоегѡ̀, бл҃же́нне а҆пⷭ҇ле, въ дре́внїѧ па́тры а҆ха́йскїѧ прише́лъ є҆сѝ, да та́мѡ жре́нъ бꙋ́деши, тече́нїе бо сконча́лъ є҆сѝ, по́двигѡмъ до́брымъ подвиза́лсѧ є҆сѝ, всѣ̑мъ проповѣ́давъ хрⷭ҇та̀ ра́спѧта, і҆ꙋде́ємъ собла́знъ, є҆́ллинѡмъ же безꙋ́мїе, на́мъ же, зва́ннымъ и҆ сп҃са́ємымъ, хрⷭ҇та̀, бж҃їю си́лꙋ и҆ бж҃їю премꙋ́дрость, ѿ неѧ́же и҆ наꙋчи́хомсѧ пѣ́ти бг҃ꙋ: А҆ллилꙋ́їа.

І҆́косъ і҃.

Всю́дꙋ и҆́менемъ гдⷭ҇а і҆и҃са болѧ́щыѧ и҆сцѣлѧ́ѧ, мє́ртвыѧ воскреша́ѧ, бѣ́сы и҆згонѧ́ѧ, и҆ во па́трахъ предсме́ртнꙋю про́повѣдь твою̀ чꙋдеса́ми ᲂу҆тверди́лъ є҆сѝ, а҆пⷭ҇ле хрⷭ҇то́въ, и҆ а҆нѳѷпа́та ле́звїѧ ѡ҆брати́лъ є҆сѝ къ позна́нїю и҆́стины, є҆гда̀ противле́нїѧ ра́ди ꙗ҆́звою пораже́нъ бы́въ, тобо́ю ѿ ѻ҆дра̀ болѣ́зни воздви́женъ бы́сть, лю́дїе же всѝ, ви́дѣвше въ тебѣ̀ си́лꙋ бж҃їю, і҆́дѡлы своѧ̑ сокрꙋши́ша, посе́мъ и҆ гдⷭ҇ь ꙗ҆ви́сѧ тебѣ̀, ꙗ҆́кѡже па́ѵлꙋ и҆ногда̀ въ корі́нѳѣ, и҆ повелѣ̀ взѧ́ти крⷭ҇тъ тво́й, назна́меновавъ си́мъ твоѐ въ па́трахъ, є҆гѡ̀ ра́ди, страда́нїе. Тѣ́мже и҆ мы̀, дивѧ́щесѧ ве́лїей бл҃года́ти въ тебѣ̀, бл҃гоговѣ́йнѡ взыва́емъ:

Ра́дꙋйсѧ, ве́лїѧ бг҃а всемогꙋ́щагѡ си́ло: ра́дꙋйсѧ, многоцѣ́нное чꙋде́съ сокро́вище.

Ра́дꙋйсѧ, дре́внихъ па́тръ просвѣще́нїе и҆ ᲂу҆краше́нїе: ра́дꙋйсѧ, невѣ́рїе а҆нѳѷпа́та въ вѣ́рꙋ премѣни́вый.

Ра́дꙋйсѧ, ꙗ҆́кѡ та́мѡ па́ки ꙗ҆ви́сѧ тебѣ̀ гдⷭ҇ь, на по́двигъ крⷭ҇тный тѧ̀ призва́вый: ра́дꙋйсѧ, ꙗ҆́кѡ ᲂу҆гото́васѧ тебѣ̀ вѣне́цъ пра́вды.

Ра́дꙋйсѧ, а҆ндре́е, а҆пⷭ҇ле хрⷭ҇то́въ первозва́нный.

Конда́къ а҃і.

Нерѡ́нъ ке́сарь, ꙗ҆́коже и҆ногда̀ и҆́родъ, гоне́нїе на всѧ̑ вѣ̑рныѧ воздви́гнꙋвый, въ ри́мѣ па́ѵла мече́мъ ᲂу҆сѣ́кнꙋ, петра́ же на крⷭ҇тѣ̀ распѧ̀, подо́бнѣ и҆ тебѣ̀ дости́же въ па́трахъ рꙋка̀ мꙋчи́телева, є҆гда̀ вмѣ́стѡ кро́ткагѡ ле́звїѧ сꙋдїю̀ поста́ви є҆геа́та лю́тагѡ, и҆́же не терпѧ́й креще́нїѧ бра́та своегѡ̀, нижѐ и҆сцѣле́нїемъ жены̀ своеѧ̀ ᲂу҆мѧгче́нъ бы́въ, въ темни́цꙋ вве́рже тѧ̀ и҆, ꙗ҆́коже верхо́внагѡ петра̀, на крⷭ҇тъ ѡ҆сꙋдѝ. Ты́ же ю҆́зникъ сы́й, въ темни́цѣ мра́чнѣй, ꙗ҆́кѡ во свѣ́тлѣмъ хра́мѣ, бра́та а҆нѳѷпа́това стратоклі́са во є҆пі́скопа па́тромъ прⷪ҇ро́чествовалъ є҆сѝ, бг҃ꙋ со всѣ́ми вѣ́рными посредѣ̀ ᲂу҆зи́лища воспѣва́ѧ: А҆ллилꙋ́їа.

І҆́косъ а҃і.

На мѣ́стѣ ло́бнѣмъ крⷭ҇тъ воздвиза́емъ ᲂу҆зрѣ́въ, на не́мже и҆мѣ́лъ є҆сѝ ра́спѧтъ бы́ти, не ᲂу҆боѧ́лсѧ є҆сѝ, а҆пⷭ҇ле, да́же до сме́рти свидѣ́тельствовати возлю́бльшагѡ тѧ̀ и҆ возлю́бленнагѡ тобо́ю хрⷭ҇та̀, и҆ къ семꙋ̀ зна́менїю сп҃се́нїѧ рꙋ́цѣ простира́ѧ, ᲂу҆миле́ннѡ взыва́лъ є҆сѝ:

Ра́дꙋйсѧ, крⷭ҇те всечестны́й, пред̾ ни́мже съ весе́лїемъ предстою̀, вѣ́даѧ тѧ̀, ᲂу҆пова́нїе моѐ: ра́дꙋйсѧ, крⷭ҇те животворѧ́щїй, є҆го́же глава̀ до нб҃съ дости́же, подно́жїе же врата̀ а҆́да сокрꙋшѝ.

Ра́дꙋйсѧ, крⷭ҇те достопокланѧ́емый, воспрїе́мый влⷣкꙋ моегѡ̀, ꙗ҆́кѡ гро́здїе сладча́йшее, и҆сточи́вшее на́мъ сп҃се́нїе: ра́дꙋйсѧ, крⷭ҇те бл҃гослове́нный, разбо́йника сп҃сы́й и҆ томꙋ̀ плоды̀ и҆сповѣ́данїѧ дарова́вый.

Ра́дꙋйсѧ, ꙗ҆́кѡ и҆ моеѧ̀ ра́дости и҆сполне́нїе бы́лъ є҆сѝ: тѣ́мже ра́дꙋйсѧ и҆ ты̀, страстоте́рпче, на крⷭ҇тѣ̀ вѣ́рꙋ твою̀ во хрⷭ҇та̀ запечатлѣ́вый.

Ра́дꙋйсѧ, а҆ндре́е, а҆пⷭ҇ле хрⷭ҇то́въ первозва́нный.

Конда́къ в҃і.

Прїиди́те, свидѣ́телїе ра́дости моеѧ̀, воззва́лъ є҆сѝ а҆пⷭ҇ле къ соверши́телемъ во́ли є҆геа́та, твори́те во́лю на́ю ѻ҆бою̀, распни́те мѧ̀ и҆, ꙗ҆́кѡ а҆́гнца, принеси́те въ же́ртвꙋ созда́вшемꙋ мѧ̀ творцꙋ̀. И҆ сїѧ̀ ре́къ, возше́лъ є҆сѝ на крⷭ҇тъ, ꙗ҆́кѡ на го́рнюю каѳе́дрꙋ, съ неѧ́же трѝ днѝ и҆ трѝ но́щи проповѣ́далъ є҆сѝ сло́во бж҃їе ѻ҆́крестъ стоѧ́щымъ лю́демъ, да не боѧ́тсѧ сме́рти, и҆сповѣ́дающе гдⷭ҇а і҆и҃са. Е҆гда́ же свѣ́томъ нбⷭ҇нымъ ѡ҆зари́сѧ ли́къ тво́й, ᲂу҆жасе́сѧ мꙋчи́тель и҆ тѧ̀ со крⷭ҇та̀ взѧ́ти повелѣ̀: ѻ҆ба́че ты̀, страстоте́рпче, не восхотѣ́лъ є҆сѝ ѿ крⷭ҇тныхъ мꙋ́къ разрѣши́тисѧ, до и҆схо́да твоегѡ̀ непреста́ннѡ бг҃ꙋ вопїѧ̀: А҆ллилꙋ́їа.

І҆́косъ в҃і.

Сла́вѧще а҆пⷭ҇льскїѧ пѡ́двиги твоѧ̑, а҆ндре́е первозва́нне, ᲂу҆бл҃жа́емъ ст҃ꙋ́ю кончи́нꙋ твою̀, є҆́юже живоно́снꙋю стра́сть сн҃а бж҃їѧ просла́вилъ є҆сѝ, и҆ во ᲂу҆миле́нїи се́рдца взыва́емъ тѝ си́це:

Ра́дꙋйсѧ, дрꙋ́же хрⷭ҇то́въ, съ ра́достїю крⷭ҇тнаѧ страда́нїѧ за негѡ̀ претерпѣ́вый: ра́дꙋйсѧ, а҆пⷭ҇ле вѣ́рный, со крⷭ҇та̀ глаго́лы живота̀ вѣ́чнагѡ лю́демъ проповѣ́давый.

Ра́дꙋйсѧ, ꙗ҆́кѡ въ ча́съ снѧ́тїѧ со крⷭ҇та̀ ѡ҆сѣни́ тѧ свѣ́тъ, а҆́ки мо́лнїѧ съ нб҃сѐ: ра́дꙋйсѧ, ꙗ҆́кѡ правосла́внѡ и҆сповѣ́дающымъ проповѣ́даннагѡ тобо́ю хрⷭ҇та̀ сн҃а бж҃їѧ ѡ҆бѣща́лъ є҆сѝ бл҃года́ть ве́лїю.

Ра́дꙋйсѧ, го́рнѧгѡ і҆ерⷭ҇ли́ма а҆пⷭ҇льское ѡ҆снова́нїе: ра́дꙋйсѧ, сѣдѧ́й со а҆пⷭ҇лы на є҆ди́номъ ѿ двоюна́десѧте прⷭ҇то́лѡвъ, во є҆́же сꙋди́ти всѧ̑ колѣ̑на і҆и҃лева.

Ра́дꙋйсѧ, а҆ндре́е, а҆пⷭ҇ле хрⷭ҇то́въ первозва́нный.

Конда́къ г҃і.

Ѽ, первозва́нный а҆пⷭ҇ле хрⷭ҇то́въ а҆ндре́е. При́зри на бл҃гохвалє́нїѧ сїѧ̑ всѣ́хъ чтꙋ́щихъ ст҃ꙋ́ю па́мѧть твою̀, и҆ ꙗ҆́кѡ водрꙋзи́лъ є҆сѝ крⷭ҇тное дре́во на гора́хъ гра́да кі́ева, при́снѡ ѡ҆сѣнѧ́й и҆ на́съ сп҃си́тельнымъ зна́менїемъ си́мъ, да, крⷭ҇то́мъ гдⷭ҇а бг҃а и҆ сп҃са на́шегѡ ѡ҆хранѧ́еми, дости́гнемъ въ мѣ́рꙋ во́зраста и҆сполне́нїѧ хрⷭ҇то́ва и҆ сподо́бимсѧ съ тобо́ю и҆ со всѣ́ми ст҃ы́ми, во гла́сѣ ра́дованїѧ, въ безконе́чныѧ вѣ́ки пѣ́ти бг҃ꙋ, сп҃си́телю на́шемꙋ: А҆ллилꙋ́їа.

Се́й конда́къ глаго́ли три́жды. Та́же і҆́косъ а҃-й и҆ конда́къ а҃-й.

Моли́тва.

Первозва́нне а҆пⷭ҇ле бг҃а и҆ сп҃са на́шегѡ і҆и҃са хрⷭ҇та̀, цр҃кве послѣ́дователю верхо́вный, всехва́льне а҆ндре́е. Сла́вимъ и҆, велича́емъ а҆пⷭ҇льскїѧ трꙋды̀ твоѧ̑, сла́дцѣ помина́емъ твоѐ бл҃гослове́нное къ на́мъ прише́ствїе, ᲂу҆бл҃жа́емъ чтⷭ҇на̑ѧ страда̑нїѧ твоѧ̑, ꙗ҆́же за хрⷭ҇та̀ претерпѣ́лъ є҆сѝ, лобыза́емъ сщ҃е́нныѧ мѡ́щи твоѧ̑, чти́мъ ст҃ꙋ́ю па́мѧть твою̀ и҆ вѣ́рꙋемъ, ꙗ҆́кѡ жи́въ гдⷭ҇ь, жива́ же и҆ дꙋша̀ твоѧ̀ и҆ съ ни́мъ во вѣ́ки пребыва́еши на нб҃сѝ, и҆дѣ́же и҆ лю́биши ны̀ то́южде любо́вїю, є҆́юже возлюби́лъ є҆сѝ на́съ, є҆гда̀ дх҃омъ ст҃ы́мъ прозрѣ́лъ є҆сѝ на́ше, є҆́же ко хрⷭ҇тꙋ̀ ѡ҆браще́нїе, и҆ не то́чїю лю́биши, но и҆ мо́лиши ѡ҆ на́съ бг҃а, зрѧ̀ во свѣ́тѣ є҆гѡ̀ всѧ̑ нꙋ́жды на̑ша. Та́кѡ вѣ́рꙋемъ и҆ та́кѡ сїю̀ вѣ́рꙋ на́шꙋ и҆сповѣ́дꙋемъ во хра́мѣ, и҆́же во и҆́мѧ твоѐ, ст҃ы́й а҆ндре́е, пресла́внѡ созда́сѧ, и҆дѣ́же ст҃ы́ѧ мо́щи твоѧ̑ почива́ютъ: вѣ́рꙋюще же, про́симъ и҆ мо́лимъ гдⷭ҇а и҆ бг҃а и҆ сп҃са на́шегѡ і҆и҃са хрⷭ҇та̀, да мл҃твами твои́ми, ꙗ҆́же при́снѡ послꙋ́шаетъ и҆ прїе́млетъ, пода́стъ на́мъ всѧ̑ потрє́бнаѧ ко сп҃се́нїю на́съ грѣ́шныхъ: да ꙗ҆́коже ты̀ а҆́бїе по гла́сꙋ гдⷭ҇а, ѡ҆ста́вль мре́жи своѧ̑, неꙋкло́ннѡ є҆мꙋ̀ послѣ́довалъ є҆сѝ, си́це и҆ кі́йждо ѿ на́съ да и҆́щетъ не свои́хъ сѝ, но є҆́же къ созида́нїю бли́жнѧгѡ и҆ ѡ҆ го́рнемъ зва́нїи да помышлѧ́етъ. И҆мꙋ́ще же тѧ̀ предста́телѧ и҆ мл҃твенника ѡ҆ на́съ, ᲂу҆пова́емъ, ꙗ҆́кѡ мл҃тва твоѧ̀ мно́гѡ мо́жетъ пред̾ гдⷭ҇емъ и҆ сп҃си́телемъ на́шимъ і҆и҃сомъ хрⷭ҇то́мъ, є҆мꙋ́же подоба́етъ всѧ́каѧ сла́ва, че́сть и҆ поклоне́нїе со ѻ҆ц҃е́мъ и҆ ст҃ы́мъ дх҃омъ во вѣ́ки вѣкѡ́въ. А҆ми́нь.

Жизнь и труды апостолов – Святой апостол Андрей Первозванный

Список храмов с престольным праздником в честь апостола Андрея Первозванного

Краткое житие апостола Андрея Первозванного

Свя­той апо­стол Ан­дрей Пер­во­зван­ный пер­вым из апо­сто­лов по­сле­до­вал за Хри­стом, а за­тем при­вел к нему сво­е­го род­но­го бра­та – свя­то­го апо­сто­ла Пет­ра (Ин.1:35-42). С юно­сти бу­ду­щий апо­стол, ко­то­рый был ро­дом из Виф­са­и­ды, всей ду­шой об­ра­тил­ся к Бо­гу. Он не всту­пил в брак и вме­сте со сво­им бра­том за­ни­мал­ся ры­бо­лов­ством. Ко­гда над Из­ра­и­лем про­гре­мел глас свя­то­го про­ро­ка, Пред­те­чи и Кре­сти­те­ля Гос­под­ня Иоан­на, свя­той Ан­дрей стал его бли­жай­шим уче­ни­ком. Свя­той Иоанн Кре­сти­тель сам на­пра­вил двух сво­их уче­ни­ков, бу­ду­щих апо­сто­лов Ан­дрея Пер­во­зван­но­го и Иоан­на Бо­го­сло­ва, ко Хри­сту, ука­зав, что Он есть Аг­нец Бо­жий.

По­сле Со­ше­ствия Свя­то­го Ду­ха на апо­сто­лов свя­той Ан­дрей от­пра­вил­ся с про­по­ве­дью Сло­ва Бо­жия в во­сточ­ные стра­ны. Про­шел Ма­лую Азию, Фра­кию, Ма­ке­до­нию, до­шел до Ду­ная, про­шел по­бе­ре­жье Чер­но­го мо­ря, Крым, При­чер­но­мо­рье и по Дне­пру под­нял­ся до ме­ста, где сто­ит те­перь го­род Ки­ев. Здесь он оста­нав­ли­вал­ся у Ки­ев­ских гор на ноч­лег. Встав утром, он ска­зал быв­шим с ним уче­ни­кам: "Ви­ди­те ли го­ры эти? На этих го­рах вос­си­я­ет бла­го­дать Бо­жия, бу­дет ве­ли­кий го­род, и Бог воз­двигнет мно­го церк­вей". Апо­стол под­нял­ся на го­ры, бла­го­сло­вил их и во­дру­зил крест. По­мо­лив­шись, он под­нял­ся еще вы­ше по Дне­пру и до­шел до по­се­ле­ний сла­вян, где был ос­но­ван Нов­го­род. От­сю­да апо­стол про­шел через зем­ли ва­ря­гов в Рим для про­по­ве­ди и вновь вер­нул­ся во Фра­кию, где в неболь­шом се­ле­нии Ви­зан­тии, бу­ду­щем мо­гу­чем Кон­стан­ти­но­по­ле, ос­но­вал хри­сти­ан­скую Цер­ковь. Имя свя­то­го апо­сто­ла Ан­дрея свя­зы­ва­ет мать – Цер­ковь Кон­стан­ти­но­поль­скую с ее до­че­рью – Рус­ской Цер­ко­вью.

На сво­ем пу­ти Пер­во­зван­ный апо­стол пре­тер­пел мно­го пе­ча­лей и мук от языч­ни­ков: его из­го­ня­ли из го­ро­дов, из­би­ва­ли. В Си­но­пе его по­би­ли кам­ня­ми, но, остав­шись невре­ди­мым, вер­ный уче­ник Хри­стов неустан­но нес лю­дям про­по­ведь о Спа­си­те­ле. По мо­лит­вам апо­сто­ла Гос­подь со­вер­шал чу­де­са. Тру­да­ми свя­то­го апо­сто­ла Ан­дрея воз­ни­ка­ли хри­сти­ан­ские Церк­ви, ко­то­рым он ста­вил епи­ско­пов и свя­щен­ство. По­след­ним го­ро­дом, ку­да при­шел Пер­во­зван­ный апо­стол и где ему суж­де­но бы­ло при­нять му­че­ни­че­скую кон­чи­ну, был го­род Пат­ры.

Мно­гие чу­де­са Гос­подь явил через уче­ни­ка Сво­е­го в го­ро­де Пат­ры. Недуж­ные ис­це­ля­лись, сле­пые про­зре­ва­ли. По мо­лит­ве апо­сто­ла вы­здо­ро­вел тя­же­ло боль­ной Со­сий, знат­ный го­ро­жа­нин; на­ло­же­ни­ем апо­столь­ских рук ис­це­ли­лась Мак­си­мил­ла, же­на пра­ви­те­ля Патр­ско­го, и его брат Стра­то­клий. Со­вер­шён­ные апо­сто­лом чу­де­са и его пла­мен­ное сло­во про­све­ти­ли ис­тин­ной ве­рой по­чти всех граж­дан го­ро­да Пат­ры. Немно­го оста­ва­лось языч­ни­ков в Пат­рах, сре­ди них был пра­ви­тель го­ро­да Эге­ат. Апо­стол Ан­дрей не раз об­ра­щал­ся к нему со сло­ва­ми Бла­го­ве­стия. Но да­же чу­де­са апо­сто­ла не вра­зум­ля­ли Эге­а­та. Свя­той апо­стол с лю­бо­вью и сми­ре­ни­ем взы­вал к его ду­ше, стре­мясь от­крыть ему хри­сти­ан­скую тай­ну веч­ной жиз­ни, чу­до­твор­ную си­лу Свя­то­го Кре­ста Гос­под­ня. Раз­гне­ван­ный Эге­ат при­ка­зал рас­пять апо­сто­ла. Языч­ник ду­мал опо­ро­чить про­по­ведь свя­то­го Ан­дрея, ес­ли пре­даст его смер­ти на кре­сте, ко­то­рый про­слав­лял апо­стол. С ра­до­стью при­нял свя­той Ан­дрей Пер­во­зван­ный ре­ше­ние пра­ви­те­ля и с мо­лит­вой ко Гос­по­ду сам взо­шел на ме­сто каз­ни. Чтобы про­длить му­че­ния апо­сто­ла, Эге­ат при­ка­зал не при­би­вать ру­ки и но­ги свя­то­го, а при­вя­зать их ко кре­сту. Два дня апо­стол с кре­ста учил со­брав­ших­ся во­круг го­ро­жан. Лю­ди, слу­шав­шие его, всей ду­шой со­стра­да­ли ему и по­тре­бо­ва­ли снять свя­то­го апо­сто­ла с кре­ста. Ис­пу­гав­шись на­род­но­го воз­му­ще­ния, Эге­ат при­ка­зал пре­кра­тить казнь. Но свя­той апо­стол стал мо­лить­ся, чтобы Гос­подь удо­сто­ил его крест­ной смер­ти. Как ни пы­та­лись во­и­ны снять апо­сто­ла Ан­дрея, ру­ки им не по­ви­но­ва­лись. Рас­пя­тый апо­стол, воз­дав Бо­гу хва­лу, про­из­нес: "Гос­по­ди, Иису­се Хри­сте, при­и­ми дух мой". То­гда яр­кое си­я­ние Бо­же­ствен­но­го све­та осве­ти­ло крест и рас­пя­то­го на нем му­че­ни­ка. Ко­гда си­я­ние ис­чез­ло, свя­той апо­стол Ан­дрей Пер­во­зван­ный уже пре­дал свою свя­тую ду­шу Гос­по­ду († 62). Мак­си­мил­ла, же­на пра­ви­те­ля, сня­ла со кре­ста те­ло апо­сто­ла и с че­стью по­греб­ла его.

Несколь­ко сто­ле­тий спу­стя, при им­пе­ра­то­ре Кон­стан­тине Ве­ли­ком, мо­щи свя­то­го апо­сто­ла Ан­дрея бы­ли тор­же­ствен­но пе­ре­не­се­ны в Кон­стан­ти­но­поль и по­ло­же­ны в хра­ме Свя­тых Апо­сто­лов ря­дом с мо­ща­ми свя­то­го еван­ге­ли­ста Лу­ки и уче­ни­ка апо­сто­ла Пав­ла – апо­сто­ла Ти­мо­фея.

Полное житие апостола Андрея Первозванного

Апо­стол Ан­дрей был ро­дом из Га­ли­леи. Эта се­вер­ная часть Свя­той Зем­ли от­ли­ча­лась пло­до­ро­ди­ем и жи­во­пис­но­стью, а жи­те­ли ее – доб­ро­ду­ши­ем и го­сте­при­им­ством. Га­ли­ле­яне лег­ко ужи­ва­лись с гре­ка­ми, во мно­же­стве на­се­ляв­ши­ми их стра­ну, мно­гие го­во­ри­ли по-гре­че­ски и да­же но­си­ли гре­че­ские име­на. Имя Ан­дрей – гре­че­ское и в пе­ре­во­де зна­чит «му­же­ствен­ный».

Ко­гда Иоанн Кре­сти­тель на­чал про­по­ве­до­вать на бе­ре­гах Иор­да­на, Ан­дрей вме­сте с Иоан­ном Зе­ве­де­е­вым (про­ис­хо­див­шим с ним из од­но­го го­ро­да – Виф­са­и­ды) по­сле­до­вал за про­ро­ком, на­де­ясь в его уче­нии най­ти от­вет на свои ду­хов­ные во­про­сы. Мно­гие на­ча­ли ду­мать, что, мо­жет быть, Иоанн Кре­сти­тель и есть ожи­да­е­мый Мес­сия, но он объ­яс­нил лю­дям, что он не Мес­сия, а по­слан толь­ко при­го­то­вить Ему путь. В то вре­мя Гос­подь Иисус Хри­стос при­шел к Иоан­ну Кре­сти­те­лю на Иор­дан для Кре­ще­ния, и тот, ука­зы­вая на Гос­по­да, ска­зал сво­им уче­ни­кам: «Вот Аг­нец Бо­жий, Ко­то­рый бе­рет на се­бя гре­хи ми­ра». Услы­шав это, Ан­дрей с Иоан­ном по­сле­до­ва­ли за Иису­сом. Гос­подь, уви­дев их, спро­сил: «Что вам на­доб­но?» Они ска­за­ли: «Рав­ви (Учи­тель), где Ты жи­вешь?» – «Пой­ди­те и уви­ди­те», – от­ве­тил Иисус, и с то­го вре­ме­ни они ста­ли Его уче­ни­ка­ми. В этот же день апо­стол Ан­дрей по­шел к сво­е­му бра­ту Си­мо­ну Пет­ру и ска­зал ему: «Мы на­шли Мес­сию». Так Петр при­со­еди­нил­ся к уче­ни­кам Хри­сто­вым.

Од­на­ко апо­сто­лы не сра­зу все­це­ло по­свя­ти­ли се­бя апо­столь­ско­му зва­нию. Из Еван­ге­лия мы зна­ем, что бра­тья Ан­дрей и Си­мон Петр и бра­тья Иоанн и Иа­ков долж­ны бы­ли на ка­кое-то вре­мя вер­нуть­ся к сво­им се­мьям и за­нять­ся сво­ей обыч­ной ра­бо­той – рыб­ной лов­лей. Несколь­ко ме­ся­цев спу­стя Гос­подь, про­хо­дя ми­мо Га­ли­лей­ско­го озе­ра и уви­дев их ло­вя­щи­ми ры­бу, ска­зал: «Иди­те за Мной, и Я сде­лаю вас лов­ца­ми че­ло­ве­ков». То­гда они оста­ви­ли свои лод­ки и се­ти и с то­го дня ста­ли неот­луч­ны­ми уче­ни­ка­ми Хри­сто­вы­ми.

Ан­дрей, ра­нее дру­гих апо­сто­лов по­сле­до­вав­ший за Гос­по­дом, по­лу­чил на­име­но­ва­ние Пер­во­зван­но­го. Он пре­бы­вал с Хри­стом в те­че­нии все­го пе­ри­о­да Его об­ще­ствен­но­го слу­же­ния. По­сле Вос­кре­се­ния Спа­си­те­ля апо­стол Ан­дрей вме­сте с дру­ги­ми уче­ни­ка­ми удо­ста­и­вал­ся встреч с Ним и при­сут­ство­вал на Еле­он­ской го­ре, ко­гда Гос­подь, бла­го­сло­вив их, воз­нес­ся на Небо.

По­сле со­ше­ствия Свя­то­го Ду­ха апо­сто­лы бро­си­ли жре­бий, ко­му в ка­кую стра­ну сле­ду­ет ид­ти для про­по­ве­ди Еван­ге­лия. Свя­то­му Ан­дрею до­ста­лись стра­ны, ле­жа­щие вдоль по­бе­ре­жья Чер­но­го мо­ря, се­вер­ная часть Бал­кан­ско­го по­лу­ост­ро­ва и Ски­фия, т. е. зем­ля, на ко­то­рой позд­нее об­ра­зо­ва­лась Рос­сия. Со­глас­но пре­да­нию, апо­стол Ан­дрей про­по­ве­до­вал на Та­ври­че­ском по­лу­ост­ро­ве, по­том по Дне­пру под­нял­ся на се­вер и до­шел до ме­ста, где впо­след­ствии воз­ник Ки­ев. «Верь­те мне, – ска­зал апо­стол сво­им уче­ни­кам, – что на го­рах сих вос­си­я­ет бла­го­дать Бо­жия: ве­ли­кий го­род бу­дет здесь, Гос­подь про­све­тит сию зем­лю Свя­тым Кре­ще­ни­ем и воз­двигнет здесь мно­го церк­вей». За­тем апо­стол Ан­дрей бла­го­сло­вил ки­ев­ские го­ры и во­дру­зил на од­ной из них крест, пред­воз­ве­щая при­ня­тие ве­ры бу­ду­щи­ми оби­та­те­ля­ми Ру­си.

По­сле воз­вра­ще­ния в Гре­цию апо­стол Ан­дрей оста­но­вил­ся в го­ро­де Па­трос (Пат­ра), рас­по­ло­жен­ном у Ко­ринф­ско­го за­ли­ва. Здесь через воз­ло­же­ние рук он мно­гих лю­дей ис­це­лил от неду­гов, в том чис­ле и знат­ную Мак­си­мил­лу, ко­то­рая от все­го серд­ца уве­ро­ва­ла во Хри­ста и ста­ла уче­ни­цей апо­сто­ла. Так как мно­гие жи­те­ли Пат­ры уве­ро­ва­ли во Хри­ста, мест­ный пра­ви­тель Еге­ат воз­го­рел­ся нена­ви­стью про­тив апо­сто­ла Ан­дрея и при­го­во­рил Его к рас­пя­тию на кре­сте. Апо­стол, ни­сколь­ко не устра­шив­шись при­го­во­ра, во вдох­но­вен­ной про­по­ве­ди рас­крыл пе­ред со­брав­ши­ми­ся ду­хов­ную си­лу и зна­че­ние крест­ных стра­да­ний Спа­си­те­ля.

Пра­ви­тель Еге­ат не по­ве­рил про­по­ве­ди апо­сто­ла, на­звав его уче­ние безу­ми­ем. За­тем он ве­лел рас­пять апо­сто­ла так, чтобы он по­доль­ше стра­дал. Свя­то­го Ан­дрея при­вя­зав ко кре­сту на­по­до­бие бук­вы X, не вби­вая гвоз­дей в его ру­ки и но­ги, чтобы не вы­звать ско­рой смер­ти. Неспра­вед­ли­вый при­го­вор Еге­а­та вы­звал в на­ро­де воз­му­ще­ние, тем не ме­нее этот при­го­вор остал­ся в си­ле.

Ви­ся на кре­сте, апо­стол Ан­дрей непре­стан­но мо­лил­ся. Пе­ред раз­лу­че­ни­ем его ду­ши с те­лом небес­ный свет оси­ял крест Ан­дрея, и в его бли­ста­нии апо­стол ото­шел в веч­ное Цар­ство Бо­жие. Му­че­ни­че­ская кон­чи­на апо­сто­ла Ан­дрея Пер­во­зван­но­го по­сле­до­ва­ла око­ло 62 го­да по­сле Рож­де­ства Хри­сто­ва.

Рус­ская Цер­ковь, при­няв ве­ру из Ви­зан­тии, епи­ско­пы ко­то­рой ве­дут пре­ем­ство от апо­сто­ла Ан­дрея, то­же счи­та­ет се­бя его пре­ем­ни­цей. Вот по­че­му па­мять свя­то­го Ан­дрея Пер­во­зван­но­го так тор­же­ствен­но по­чи­та­лась в до­ре­во­лю­ци­он­ной Рос­сии. Им­пе­ра­тор Петр I учре­дил в честь апо­сто­ла Ан­дрея пер­вый и выс­ший ор­ден, ко­то­рый да­вал­ся в на­гра­ду са­нов­ни­кам го­су­дар­ства. С пет­ров­ских вре­мен рус­ский флот сде­лал сво­им стя­гом Ан­дре­ев­ский флаг, на бе­лом фоне го­лу­бой крест фор­мы X, под се­нью ко­то­ро­го рус­ские одер­жа­ли мно­же­ство по­бед.


См. так­же: "По­дви­ги и стра­да­ния свя­то­го Апо­сто­ла Ан­дрея Пер­во­зван­но­го" в из­ло­же­нии свт. Ди­мит­рия Ро­стов­ско­го.

См. так­же: "Со­бор свя­тых слав­ных и все­х­валь­ных две­на­дца­ти Апо­сто­лов" в из­ло­же­нии свт. Ди­мит­рия Ро­стов­ско­го.