Акафист святому мученику Вонифатию

Одобрен: 27 декабря 1994 года

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 01 января (19 декабря ст. ст.)

Утвержден для общецерковного использования.

Конда́к 1.

Избра́нный во́ине Христо́в, венце́м сла́вы украше́нный, му́ченическою сме́ртию ве́чныя сме́рти изба́вивыйся, от мра́ка грехо́внаго отврати́выйся и к ве́чному све́ту прише́дый, приими́ моле́ние на́ше, в похвалу́ тебе́ приноси́мое, и на́с изба́ви от сете́й лука́ваго врага́ на́шего, да тебе́ с ра́достию побе́дною зове́м:

Ра́дуйся, Вонифа́тие, му́чениче многострада́льный.

И́кос 1.

А́нгелом све́тлым, о́гнь муче́ний твои́х росо́ю благода́ти угаси́вшим, огражде́н бы́л еси́, страда́льче Христо́в Вонифа́тие, да не когда́ я́ко гре́шник нераска́янный поги́бнеши, и пред Го́сподем в оде́жде бра́чней предста́неши. Научи́ и на́с облещи́ся в све́тлыя ри́зы свя́тости, тебе́ зову́щих:

Ра́дуйся, жи́знь за Христа́ отда́вый; ра́дуйся, страда́нием Его́ подража́вый.

Ра́дуйся, о́чи своя́ к Бо́гу обрати́вый; ра́дуйся, во́лю свою́ в доброде́телех укрепи́вый.

Ра́дуйся, ра́бе Христо́в ве́рный; ра́дуйся, святы́й коне́ц жития́ своего́ прие́мый.

Ра́дуйся, к покая́нию сердца́ обраща́яй; ра́дуйся, ко Христу́, Пути́ и́стинному, приводя́й.

Ра́дуйся, Ду́хом Святы́м просвеще́нный; ра́дуйся, собла́знами ми́ра сего́ не прельще́нный.

Ра́дуйся, зми́я лука́ваго посрами́вый; ра́дуйся, святы́х ли́к возвесели́вый.

Ра́дуйся, Вонифа́тие, му́чениче многострада́льный.

Конда́к 2.

Ви́дя многомяте́жие ми́ра сего́ и печа́ли земны́я, и сия́ вся́, я́ко пра́х вмени́в, к преми́рным возве́л еси́ у́м тво́й, страда́льче Христо́в. На высоту́ богоразу́мия возше́д, Христа́ Бо́га пред все́ми испове́дал еси́. И ны́не ду́ши все́х во гресе́х погиба́ющих к милосе́рдому Го́споду зове́ши, да во смире́нии пока́ются и во слеза́х умиле́нно Ему́ вопию́т: Аллилу́ия.

И́кос 2.

Ра́зум трезве́нием укрепи́л еси́ и страсте́й пла́мень покая́нием угаси́л еси́, Вонифа́тие преди́вный. От За́пада на Восто́к из Ри́ма прише́л еси́, спострада́ти Го́споду Иису́су Христу́ наме́рение свято́е нося́, да благода́ть в тебе́ преизоби́лует. И на́с ны́не в хра́м Бо́жий привле́кл еси́, тебе́ глаго́лющих:

Ра́дуйся, стра́сти побора́ти науча́яй; ра́дуйся, отча́янным наде́жду спасе́ния подава́яй.

Ра́дуйся, суету́ жи́зни земны́я позна́вый; ра́дуйся страда́ния своя́ предсказа́вый.

Ра́дуйся, трезвя́щихся отра́до и ободре́ние; ра́дуйся, немощны́х во́лею укрепле́ние.

Ра́дуйся, я́ко тобо́ю от пия́нства отвраща́емся; ра́дуйся, я́ко тобо́ю к Бо́гу обраща́емся.

Ра́дуйся, исцеле́ний исто́чниче неисчерпа́емый; ра́дуйся, чуде́с сокро́вище неоскудева́емое.

Ра́дуйся, науча́яй на́с при́сно возноси́ти у́м на́ш к Бо́гу; ра́дуйся, обреты́й и́стинную от грехо́в свобо́ду.

Ра́дуйся, Вонифа́тие, му́чениче многострада́льный.

Конда́к 3.

Си́ла милосе́рдия Бо́жия неизрече́нная на тебе́ откры́ся, и́бо жития́ твоего́, му́чениче, ди́вное повествова́ние я́вно на́м сказу́ет, ка́ко ве́лии гре́шницы ми́лостиво Отце́м на́шим Бо́гом прие́млются, егда́ Ему́ покая́ние принесу́т. Та́ко и ты́ Бо́гу угоди́л еси́, и вме́сто го́рькия сме́рти ве́чную жи́знь прия́л еси́. Научи́ и на́с Бо́гу пе́ти всегда́: Аллилу́ия.

И́кос 3.

Име́я ны́не ра́дость ве́чную в небе́сных селе́ниях, и на́с гре́шных на земли́ не забыва́еши, му́чениче Христо́в Вонифа́тие. Мы́ же, тружда́ющиися и обремене́ннии, к тебе́ прибега́ем: не оста́ви на́с си́рых и неду́жных, по́мощи у тебе́ прося́щих, но мольбы́ на́ша на олта́рь небе́сный принеси́, да ра́достно тебе́ зове́м:

Ра́дуйся, бли́жняго, я́ко себе́ сама́го, возлюби́вый; ра́дуйся, во гресе́х се́рдце свое́ не ожесточи́вый.

Ра́дуйся, стра́нником и пу́тником со вся́ким тща́нием служи́вый; ра́дуйся, я́ко сего́ ра́ди но́щию сто́гны гра́да обходи́вый.

Ра́дуйся, бога́тыя милосе́рдию науча́яй; ра́дуйся, си́рыя и вдови́цы защища́яй.

Ра́дуйся, бе́дствующим до́брый предста́телю; ра́дуйся, за оби́димых и уничижа́емых при́сный хода́таю.

Ра́дуйся, нестерпи́мою жа́ждою пия́нства пали́мыя трезве́нием прохлажда́яй; ра́дуйся, вина́ ра́ди обнища́вшия к трезве́нию призыва́яй.

Ра́дуйся, же́ны рыда́ющия утеша́яй; ра́дуйся, сле́зы и́х ко Го́споду принося́й.

Ра́дуйся, Вонифа́тие, му́чениче многострада́льный.

Конда́к 4.

Бу́ри грехо́вныя тебе́ не потопи́ша, ниже́ во́лны страсте́й покры́ша, му́чениче Христо́в: не поги́бл еси́, но ко Христу́ прише́л еси́ и жи́знь свою́, я́ко же́ртву благово́нную, Ему́, Сладча́йшему Спаси́телю на́шему, прине́сл еси́. Моли́ся у́бо, да и мы́, в жите́йском мо́ри су́щии, к ти́хому приста́нищу, Го́споду Спаси́телю, притеце́м, во умиле́нии зову́ще: Аллилу́ия.

И́кос 4.

Слы́шим и мы́ ева́нгельскую при́тчу, ка́ко блу́дный сы́н на стране́ дале́че име́ние свое́ ижди́вый, от гла́да душе́внаго в себе́ прише́д, во объя́тия о́тчи притече́, в покая́нии зовы́й: «О́тче, согреши́х на не́бо и пред тобо́ю»; та́ко и ты́, му́чениче Вонифа́тие, не погуби́в себе́, но от роже́ц греха́ отврати́вся, ко Христу́ обрати́лся еси́. Мы́ же, исправле́нию твоему́ ра́дующеся, пое́м ти́ си́це:

Ра́дуйся, гла́д кре́пок в рабо́те страсте́м испыта́вый; ра́дуйся, Христа́ Бо́га, я́ко Хле́ба жива́го, взалка́вый.

Ра́дуйся, пречи́стыя Кро́ви Его́, я́ко и́стиннаго пития́ приобщи́выйся; ра́дуйся, я́ко пресла́вным му́чеником приложи́выйся.

Ра́дуйся, на крыле́х трезве́ния к Бо́гу возлете́вый; ра́дуйся, се́рдце свое́ горе́ име́вый.

Ра́дуйся, ко Го́споду си́лою Животворя́щаго Креста́ прише́дый; ра́дуйся, я́ко прия́л еси́ вене́ц побе́ды.

Ра́дуйся, души́ на́шея сокро́вище нетле́нное; ра́дуйся, Це́ркве на́шея украше́ние многоце́нное.

Ра́дуйся, красоты́ ми́ра сего́ отверги́й; ра́дуйся, грехо́вную оде́жду с себе́ совлеки́й.

Ра́дуйся, Вонифа́тие, му́чениче многострада́льный.

Конда́к 5.

Богото́чную Кро́вь Христо́ву за все́х на́с, недосто́йных, и кро́вь му́ченическую за Христа́ пролия́нную па́мятующи, си́це тебе́ веща́ше Аглаи́да: «Са́м ве́си, ско́ль мно́гими грехми́ оскверне́ни есмы́, и о бу́дущем жития́ на́шего небреже́м. А́з же от боже́ственнаго му́жа слы́шах, я́ко му́чеников мо́щи спасе́ние да́руют, и́же му́ченика я́ко храни́теля и хода́тая пред Бо́гом и́мать». — И мы́ тебе́ глаго́лем: «Ты́ еси́ на́ш храни́тель и хода́тай пред Го́сподем на́шим», и́бо со а́нгелы предстои́ши Пресвяте́й Тро́ице, поя́: Аллилу́ия.

И́кос 5.

Ви́дим ны́не и разуме́ем, ка́ко сии́ глаго́лы Аглаи́ды ду́шу твою́ пробуди́ша, и ты́ к воздержа́нию призва́л еси́ себе́, му́чениче Вонифа́тие. И на́м помози́ подража́ти тебе́, да не поги́бнем в пучи́не беззако́ния потопля́еми, но ра́достно тебе́ зове́м:

Ра́дуйся, от страсте́й, я́ко от поги́бельнаго сна́, пробуди́выйся; ра́дуйся, от у́з грехо́вных свободи́выйся.

Ра́дуйся, сомнева́ющихся в милосе́рдии Бо́жием обличе́ние; ра́дуйся, безконе́чныя ра́досте утвержде́ние.

Ра́дуйся, зовы́й на́с к по́двигу воздержа́ния; ра́дуйся, ты́ бо зна́мением Креста́ посе́кл еси́ страсте́й взыгра́ния.

Ра́дуйся, стяжа́вый себе́ ве́чное име́ние; ра́дуйся, и на́с пробужда́яй к труду́ спасе́ния.

Ра́дуйся, я́ко ви́нное весе́лие презре́л еси́; ра́дуйся, я́ко плотски́я ра́ны, я́ко безпло́тен, претерпе́л еси́.

Ра́дуйся, за испове́дание Христа́ от враго́в избие́нный; ра́дуйся, нестерпи́мым огне́м за Него́ опале́нный.

Ра́дуйся, Вонифа́тие, му́чениче многострада́льный.

Конда́к 6.

Пропове́дница поклоне́ния святы́м моще́м яви́ся Аглаи́да, госпожа́ твоя́, страда́льче Христо́в, егда́ посла́ тя́ на Восто́к святы́я мо́щи му́чеников, за ве́ру Христо́ву пострада́вших, принести́, и́миже благодея́ния источа́ются оби́льно, и ве́чное спасе́ние подае́тся все́м, к му́ченическому ли́ку усе́рдно притека́ющим. Да́ждь и на́м утеше́ние от Го́спода прия́ти, Ему́же а́нгельскую пе́снь прино́сим: Аллилу́ия.

И́кос 6.

Возсия́л еси́ на́м, я́ко звезда́ незаходи́мая, ди́вным житие́м твои́м, му́чениче преблаже́нне, и́го Христо́во ле́гкое и вседраго́е на себе́ прие́мый и спасе́ние получи́вый, пути́ бо благоче́стия без Христа́ Го́спода обрести́ ника́коже возмо́жно е́сть. Те́мже и на́с моли́твами твои́ми в го́рняя оби́тели приведи́, тя́ восхваля́ющих си́це:

Ра́дуйся, зако́на Христо́ва скрижа́ль богоначерта́нная; ра́дуйся, моли́тв ко Го́споду ми́ро благоуха́нное.

Ра́дуйся, пра́выя ве́ры Христо́вой сто́лпе о́гненный; ра́дуйся, честны́й ве́нче от за́поведей Бо́жиих, я́коже от ка́мений драги́х, устро́енный.

Ра́дуйся, трезве́ния ле́ствице небовосхо́дная; ра́дуйся, боле́зни и ра́ны врачу́яй грехо́вныя.

Ра́дуйся, я́ко от Го́спода Иису́са Христа́ благода́ть и си́лу прия́л еси́; ра́дуйся, я́ко све́т Христо́в на́м возсия́л еси́.

Ра́дуйся, воздержа́нием от грехо́в освяща́ти пра́здники на́с науча́яй; ра́дуйся, от сме́ртнаго вина́ на́с охраня́яй.

Ра́дуйся, умерщвле́нныя страстьми́ све́том Христо́вым оживля́яй; ра́дуйся, ты́я к но́вому житию́ призыва́яй.

Ра́дуйся, Вонифа́тие, му́чениче многострада́льный.

Конда́к 7.

Хотя́ отъити́ от до́му своего́ в пу́ть на Восто́к, кончи́ну жития́ твоего́ предре́кл еси́, достохва́льне, Аглаи́де глаго́ля: «Госпоже́ моя́, приими́ мое́ те́ло, за Христа́ му́чимое, егда́ его́ принесу́т ти́»; в души́ твое́й мы́сль за Христа́ пострада́ти тая́, Ему́ сокрове́нно моли́лся еси́. И на́шу ве́ру укрепи́, да бу́дем гото́вы и мы́ ея́ ра́ди страда́ти, Го́споду пою́ще: Аллилу́ия.

И́кос 7.

Ди́вному и пресла́вному исправле́нию твоему́ не ве́руя, помы́сли лука́вое в се́рдце свое́м Аглаи́да, грехо́м бо хуле́ния оболга́ти тя́ хотя́щи, та́ко отвеща́ ти́: «Ны́не не глумле́ния вре́мя, бра́те, но благогове́ния; ве́дый бу́ди, я́ко мо́щи святы́я и́маши носи́ти. Госпо́дь же да по́слет а́нгела Своего́ пред тобо́ю и напра́вит стопы́ твоя́ милосе́рдием Свои́м». Мы́ же чистоту́ се́рдца твоего́, ди́вный Вонифа́тие, зря́ще, вопие́м ти́:

Ра́дуйся, святы́х моще́й почита́телю; ра́дуйся, благогове́ния о́браза на́м пода́телю.

Ра́дуйся, безчи́нств храни́тися на́м повеле́вый; ра́дуйся, вся́, о ни́хже сы́нове ве́ка сего́ ра́дуются, презре́вый.

Ра́дуйся, изве́стный на́ш помо́щниче; ра́дуйся, благи́х наме́рений таи́нниче.

Ра́дуйся, все́м борю́щимся со грехми́ покрови́телю; ра́дуйся, покая́ния на́шего пред Бо́гом поручи́телю.

Ра́дуйся, я́ко твои́ми моли́твами Госпо́дь оставля́ет прегреше́ния; ра́дуйся, помога́яй на́м терпе́ти ско́рби и поноше́ния.

Ра́дуйся, лико́м а́нгельским сотвори́вый ра́дость и удивле́ние; ра́дуйся, духо́в зло́бы приведы́й в посрамле́ние.

Ра́дуйся, Вонифа́тие, му́чениче многострада́льный.

Конда́к 8.

Стра́нно тебе́ бы́сть язы́ческое и́долом служе́ние, и ты́, святы́й му́чениче, в Та́рс прише́д, не преклони́л еси́ коле́н пред бога́ми чужди́ми, но апо́столом показа́лся еси́ ревни́тель. Те́мже моли́ся за ны́, да возгори́мся и мы́ огне́м любве́ ко Влады́це Христу́, пою́ще всегда́: Аллилу́ия.

И́кос 8.

Ве́сь распали́лся еси́ ре́вностию свято́ю, хуле́ния на Го́спода не терпя́, и испо́лнился еси́ Ду́ха Бо́жия, ослепле́ние и безу́мие покланя́ющихся ло́жным бого́м облича́я. Сего́ ра́ди ца́рь нечести́вый ка́знь наведе́ на тя́, му́чениче, го́рькую, бичми́ нестерпи́мо бия́ и ра́ны нанося́ неисце́льныя. Мы́ же тебе́ похвалу́ пое́м:

Ра́дуйся, злове́рия обличи́телю дерзнове́нный; ра́дуйся, в пра́вду Бо́жию, а́ки в броню́ облече́нный.

Ра́дуйся, я́ко ко́сти твоя́ от ра́н за Христа́ обнажа́хуся; ра́дуйся, я́ко чистота́ души́ твоея́ тогда́ откры́шася.

Ра́дуйся, я́ко насле́довал еси́ небе́сная селе́ния; ра́дуйся, я́ко и ны́не облича́еши злы́х челове́к на Христа́ хуле́ния.

Ра́дуйся, за Христа́ о́стрыми тростьми́ пробода́емый; ра́дуйся, са́да ра́йскаго цве́те неувяда́емый.

Ра́дуйся, я́ко зла́то горни́лом я́зв очище́нный; ра́дуйся, за Христа́ ударе́нный.

Ра́дуйся, кончи́ною свое́ю Бо́гу угоди́вый; ра́дуйся, да́же до сме́рти му́ченическия Его́ возлюби́вый.

Ра́дуйся, Вонифа́тие, му́чениче многострада́льный.

Конда́к 9.

Всего́ себе́ Го́споду Бо́гу преда́в, страстоте́рпче Христо́в, егда́ нечести́вый ца́рь повеле́ раскры́ти уста́ твоя́ и о́лово кипя́щее вли́ти, ру́це свои́ воздви́гл еси́ к не́бу, та́ко моля́ся: «Го́споди, Бо́же мо́й, Иису́се Христе́, укрепи́вый мене́ в му́ках, пребу́ди и ны́не со мно́ю, моя́ страда́ния облегчи́ и не оста́ви мене́ одоле́ну бы́ти лука́вым кня́зем». Те́м и на́с любви́ ко Христу́ науча́еши, пою́щих Бо́гу: Аллилу́ия.

И́кос 9.

Вети́и суему́дреннии да реку́т на́м, ка́ко о́лово разжже́нное горта́ни твоея́ не опали́, ниже́ ина́го вреда́ тебе́ сотвори́, му́чениче Вонифа́тие. От Го́спода бо зна́мение побе́ды над мучи́телем проси́л еси́, и сие́ зна́мение тебе́ дано́ бы́сть. Сего́ ра́ди вси́ чудя́щеся восклица́ху: «Ве́лий е́сть Иису́с Христо́с, ве́руем в Тя́, Го́споди». Мы́ же сла́вим тя́, му́чениче, си́це:

Ра́дуйся, я́ко тобо́ю ве́рнии просвеща́ются; ра́дуйся, я́ко тобо́ю от посты́дныя сме́рти избавля́ются.

Ра́дуйся, во еди́нем Христе́ утеше́ние полага́яй; ра́дуйся, во страда́ниях призыва́ти Бо́га науча́яй.

Ра́дуйся, я́ко мучи́телие тебе́ не превозмого́ша; ра́дуйся, я́ко стра́сти тебе́ не поборо́ша.

Ра́дуйся, ты́ бо те́рния грехо́в в себе́ попали́л еси́; ра́дуйся, ты́ бо огне́м неопале́н пребы́л еси́.

Ра́дуйся, при́сно живы́й страстоте́рпче ра́достный; ра́дуйся, моли́твенниче на́ш бла́гостный.

Ра́дуйся, я́ко тобо́ю очеса́, грехми́ ослепле́нныя, отверза́ются; ра́дуйся, я́ко по́мощию твое́ю печа́ли на ра́дость прелага́ются.

Ра́дуйся, Вонифа́тие, му́чениче многострада́льный.

Конда́к 10.

Спасе́н бы́ти восхоте́в, пла́менне возжеле́л еси́ до конца́ за Го́спода пострада́ти, му́чениче Вонифа́тие, Ему́же и возопи́л еси́: «Го́споди, Го́споди, Бо́же мо́й, сподо́би мя́ ми́лостей Твои́х и бу́ди ми́ помо́щник, да за беззако́ния моя́, безу́мно соде́янныя, вра́г не прегради́т ми́ пути́ к небеси́; приими́ с ми́ром ду́шу мою́, вчини́ мя́ с му́чениками, кро́вь за Тя́ пролия́вшими и ве́ру до конца́ соблю́дшими», и ны́не вопию́щими Ти́: Аллилу́ия.

И́кос 10.

Стена́ кре́пкая, ко́зньми врага́ неодоле́нная, пребы́л еси́ до конца́, му́чениче Христо́в. Егда́ же глава́ твоя́ от телесе́ отсече́на бы́сть, о чудесе́! а́бие кро́вь и млеко́ из ра́ны твоея́ истеко́ша, я́ко и неве́рным, чу́до сие́ зря́щим, Христа́ просла́вити и с на́ми зва́ти тебе́:

Ра́дуйся, я́ко муче́ния твоя́ зря́ще, мно́жество люде́й ко Христу́ обрати́шася; ра́дуйся, я́ко тебе́ ра́ди на кня́зя зло́бы они́ устреми́шася.

Ра́дуйся, твоя́ бо кончи́на просвети́ умы́ помраче́нныя; ра́дуйся, твоя́ бо сла́вная сме́рть воскреси́ со́вести во гресе́х погребе́нныя.

Ра́дуйся, нераска́янных гре́шников обличе́ние; ра́дуйся, во́лею разсла́бленных от вина́ исцеле́ние.

Ра́дуйся, в нощи́ неве́дения блужда́ющих вразумле́ние; ра́дуйся, злата́я у́дице, из глубины́ грехо́в влеку́щая ко спасе́нию.

Ра́дуйся, я́ко от Бо́га в моли́твах услы́шан бы́л еси́; ра́дуйся, я́ко в небе́снем Ца́рствие всели́лся еси́.

Ра́дуйся, порфи́рою от крове́й твои́х облече́нный; ра́дуйся, я́ко зри́ши ны́не све́т неизрече́нный.

Ра́дуйся, Вонифа́тие, му́чениче многострада́льный.

Конда́к 11.

Пе́ние немо́лчное прино́сиши Го́сподеви, му́чениче Вонифа́тие, с му́ченическими ли́ки Пресвяте́й Тро́ице предстоя́, за Ню́же себе́ преда́л еси́, да и мы́, ду́ши своя́, а́ки неве́сты, украси́вше, нетле́нному Жениху́ Христу́, предста́вим со свяще́нною пе́снию: Аллилу́ия.

И́кос 11.

Све́т любве́ и по сме́рти возсия́л еси́, Вонифа́тие ди́вный, егда́ бо дру́зи твою́ усече́нную главу́ обре́тше, пла́кахуся го́рько, глаго́люще: «Ра́бе Христо́в, забу́ди на́м гре́х непра́веднаго осужде́ния и безразсу́дных руга́ний на́ших». Тогда́ ли́к тво́й, я́ко луча́ми живы́ми просвети́ся, проще́ние и́м явля́я. Сего́ ра́ди с любо́вию тебе́ зове́м:

Ра́дуйся, име́яй уста́ кро́тости сладковеща́нныя; ра́дуйся, любве́ вмести́лище простра́нное.

Ра́дуйся, о тебе́ бо весели́тся Це́рковь со свои́ми ча́ды; ра́дуйся, ты́ бо преше́л еси́ к вы́шнему небе́сному гра́ду.

Ра́дуйся, в сме́рти свое́й апо́столом ра́вный; ра́дуйся, ре́вностию по Бо́зе пресла́вный.

Ра́дуйся, жите́йския молвы́ облича́яй злы́я сплете́ния; ра́дуйся, все́х на́с от вра́жия избавля́яй ловле́ния.

Ра́дуйся, ты́ бо защища́еши непра́ведно гони́мыя; ра́дуйся, пред престо́лом Госпо́дним лампа́до неугаси́мая.

Ра́дуйся, по за́поведи Христо́вой и враго́в возлюби́вый; ра́дуйся, злосло́вия и клеветы́ нивочто́же вмени́вый.

Ра́дуйся, Вонифа́тие, му́чениче многострада́льный.

Конда́к 12.

Благода́ть исцеле́ний точа́щия мо́щи твоя́, егда́ к Ри́му приближа́хуся, А́нгел Госпо́день яви́ся Аглаи́де, глаго́ля: «Бы́вшаго ти́ дре́вле раба́, ны́не же на́шего бра́та и сослуже́бника приими́, я́коже влады́ку, и упоко́й до́бре, да греси́ твоя́ оста́вятся», то́й бо с на́ми ны́не в небесе́х пое́т Всевы́шнему: Аллилу́ия.

И́кос 12.

Пою́ще чудеса́ твоя́, хра́м ди́вный созда́ тебе́, во́ине Христо́в, Аглаи́да, в не́мже и мо́щи твоя́ положи́, и сама́, бога́тство ни́щим разда́вши и пятьна́десят ле́т в по́двизех поста́ и покая́ния пожи́вши, ли́ка святы́х дости́же. Те́мже, велича́юще чудеса́ твоя́, прославля́ем тя́ си́це:

Ра́дуйся, ду́шу свою́ сотвори́вый, хра́м Бо́гу прекра́сный; ра́дуйся, чу́дных Бо́жиих де́л кни́го я́сная.

Ра́дуйся, от внеза́пныя сме́рти избавля́яй; ра́дуйся, ско́рбныя же́ны от злы́х пия́ниц огражда́яй.

Ра́дуйся, па́дшия к возста́нию от грехо́в призыва́яй; ра́дуйся, све́т чистоты́ и́м подава́яй.

Ра́дуйся, ты́ бо укроща́еши страсте́й огне́вицу; ра́дуйся, тобо́ю бо оставля́ем грехо́вную темни́цу.

Ра́дуйся, ма́лыя ча́да от собла́знов ми́ра соблюда́яй; ра́дуйся, ты́я Христо́ву уче́нию наставля́яй.

Ра́дуйся, ве́стниче тре́звости, во ве́ки прославля́емый; ра́дуйся, уго́дниче Христо́в, при́сно почита́емый.

Ра́дуйся, Вонифа́тие, му́чениче многострада́льный.

Конда́к 13.

О, пресла́вный му́чениче Христо́в Вонифа́тие! Приими́ от на́с сие́ ма́лое похва́льное приноше́ние, е́же пред ико́ною твое́ю коле́на прекло́ньше, и ру́це свои́ к тебе́ просте́рши, тебе́ ны́не прино́сим; и да́руй на́м твое́ пред Го́сподем заступле́ние, наипа́че же погиба́ющим от пия́нства бра́тиям на́шим исцеле́ние ниспосли́ и жития́ блага́го нача́ло положи́ти все́х на́с сподо́би, да спасе́ние улучи́вше моли́твами твои́ми, во ве́ки восхва́лим Бо́га, пою́ще Ему́: Аллилу́ия.

Этот конда́к читается трижды, затем и́кос 1-й и конда́к 1-й.

Моли́тва пе́рвая.

О, многострада́льный и всехва́льный му́чениче Вонифа́тие! Ко твоему́ заступле́нию ны́не прибега́ем, моле́ний на́с, пою́щих тебе́, не отве́ржи, но ми́лостиво услы́ши на́с. Ви́ждь бра́тия и се́стры на́ша, тя́жким неду́гом пия́нства одержи́мыя, ви́ждь того́ ра́ди от ма́тери своея́ Це́ркви Христо́вой и ве́чнаго спасе́ния отпа́дающия. О, святы́й му́чениче Христо́в Вонифа́тие, косни́ся серде́ц и́х да́нною ти́ от Бо́га благода́тию, ско́ро возста́ви от паде́ний грехо́вных и ко спаси́тельному воздержа́нию приведи́ и́х. Умоли́ Го́спода Бо́га, Его́же ра́ди страда́л еси́, да, прости́в на́м согреше́ния на́ша, не отврати́т ми́лости Своея́ от сыно́в Свои́х, но да укрепи́т на́с в трезве́нии и целому́дрии, да помо́жет Свое́ю десни́цею трезвя́щимся спаси́тельный обе́т сво́й до конца́ сохрани́ти, во дни́ и в нощи́ о не́м бо́дрствующе, и до́брый отве́т о не́м возда́ти на стра́шнем Суди́ще.

Приими́, уго́дниче Бо́жий, моли́твы ма́терей, о ча́дех свои́х сле́зы пролива́ющих; же́н честны́х, о муже́х свои́х рыда́ющих; ча́д си́рых и убо́гих, от пия́ниц оста́вленных; и все́х на́с, и да прии́дет се́й во́пль на́ш моли́твами твои́ми ко престо́лу Всевы́шняго, дарова́ти все́м, по моли́твам и́х, здра́вие и спасе́ние ду́ш и теле́с, наипа́че же Ца́рствие Небе́сное.

Покры́й и соблюди́ на́с от лука́ваго ловле́ния и все́х ко́зней вра́жиих, в стра́шный же ча́с исхо́да на́шего помози́ прейти́ непреткнове́нно возду́шныя мыта́рства, и моли́твами твои́ми изба́ви ве́чнаго осужде́ния.

Умоли́ же Го́спода дарова́ти на́м ко оте́честву на́шему любо́вь нелицеме́рную и непоколеби́мую, пред врага́ми Це́ркви святы́я, ви́димыми и неви́димыми, да покры́ет на́с ми́лость Бо́жия в несконча́емыя ве́ки веко́в. Ами́нь.

Моли́тва втора́я.

О, всехва́льный му́чениче Вонифа́тие! Ки́я пе́сни воспое́м ти́, ве́чною красото́ю украше́нному? Ки́й вене́ц сплете́м, све́тлостию оде́янному? Ки́и да́ры принесе́м ти́, все́ми бла́гами обогаще́нному? Вся́ у́бо с любо́вию прие́млеши: и слове́с кра́сная и сла́дкая пе́ния, и честны́я да́ры – свещи́, еле́й и кади́ло благоуха́нное. Но ничто́же та́ко ти́ уго́дно быва́ет, я́ко житие́ непоро́чное, нра́в благи́й, душа́ чи́стая, се́рдце кро́ткое, те́ло чистото́ю освяще́нное, любо́вь к Бо́гу те́плая и ко бли́жнему нелицеме́рная, моли́тва ча́стая и приле́жная, воздыха́ния умиле́нная, страсте́й умерщвле́ние, оче́с целому́дрие, язы́ка воздержа́ние, настоя́щих бла́г презре́ние и бу́дущих жела́ние, о сме́рти поуче́ние, воскресе́ния ча́яние, ве́чных му́к трепета́ние, Ца́рства небе́снаго всера́достная наде́жда. Си́ми дарми́ на́м ниспосли́, святы́й му́чениче, угоди́ти Го́сподеви во и́мя твое́ вседраго́е, да сподо́бимся от Всеще́драго Бо́га бога́тыя ми́лости.

Твои́м предста́тельством и те́плым заступле́нием от озлобле́ния ви́димых и неви́димых вра́г на́с изба́ви, да в настоя́щем ве́це ми́рное и безмяте́жное житие́ поживе́м, в бу́дущем же всера́достнаго и безконе́чнаго Ца́рствия прича́стницы бу́дем во ве́ки веко́в. Ами́нь.

Моли́тва тре́тия.

О, святы́й уго́дниче Христо́в, страстоте́рпче и му́чениче Вонифа́тие! Душе́ю на небеси́ предстоя́й престо́лу Бо́жию, и Триипоста́сныя Сла́вы Бо́жия наслажда́яйся, ико́ною свято́ю на земли́ в Боже́ственных хра́мех пребыва́яй, и да́нною ти́ свы́ше благода́тию разли́чныя источа́яй чудеса́. При́зри ми́лостивым твои́м о́ком на предстоя́щия лю́ди и честне́й твое́й ико́не уми́льно моля́щияся и прося́щия от тебе́ целе́бныя по́мощи и заступле́ния, и испроси́ душа́м на́шим оставле́ние согреше́ний. Се́рдцем сокруше́ным и ду́хом смире́нным, тебе́, хода́тая ми́лостива ко Влады́це и моли́твенника за ны́ гре́шныя призыва́ем, я́ко прия́л еси́ от Него́ неду́ги отгоня́ти и стра́сти исцеля́ти. Тебе́ у́бо про́сим: не пре́зри на́с недосто́йных, моля́щихся ти́ и твоея́ по́мощи тре́бующих; бу́ди на́м в печа́лех уте́шитель, стра́ждущим от пия́нства вра́чь и исцели́тель, во сла́ву Бо́жию трезвя́щимся ско́рый покрови́тель и гото́вейший предста́тель; исхода́тайствуй все́м вся́, я́же ко спасе́нию поле́зная, я́ко да твои́ми ко Го́споду Бо́гу моли́твами получи́вше благода́ть и ми́лость, просла́вим все́х благи́х Исто́чника и Дарода́теля Бо́га, Еди́наго в Тро́ице Святе́й сла́вимаго, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

А҆ка́ѳїстъ ст҃о́мꙋ мꙋ́ченикꙋ вонїфа́тїю.

Конда́къ а҃.

И҆збра́нный во́ине хрⷭ҇то́въ, вѣнце́мъ сла́вы ᲂу҆краше́нный, мч҃ническою сме́ртїю вѣ́чныѧ сме́рти и҆зба́вивыйсѧ, ѿ мра́ка грѣхо́внагѡ ѿврати́выйсѧ и҆ къ вѣ́чномꙋ свѣ́тꙋ прише́дый, прїимѝ моле́нїе на́ше, въ похвалꙋ̀ тебѣ̀ приноси́мое, и҆ на́съ и҆зба́ви ѿ сѣте́й лꙋка́вагѡ врага̀ на́шегѡ, да тебѣ̀ съ ра́достїю побѣ́дною зове́мъ:

Ра́дꙋйсѧ, вонїфа́тїе, мч҃ниче многострада́льный.

І҆́косъ а҃.

А҆́гг҃лѡмъ свѣ́тлымъ, ѻ҆́гнь мꙋче́нїй твои́хъ росо́ю блгⷣти ᲂу҆гаси́вшимъ, ѡ҆гражде́нъ бы́лъ є҆сѝ, страда́льче хрⷭ҇то́въ вонїфа́тїе, да не когда̀ ꙗ҆́кѡ грѣ́шникъ нераска́ѧнный поги́бнеши и҆ пред̾ гдⷭ҇емъ въ ѻ҆де́ждѣ бра́чнѣй предста́неши, наꙋчѝ и҆ на́съ ѡ҆блещи́сѧ въ свѣ́тлыѧ ри́зы ст҃ости, тебѣ̀ зовꙋ́щихъ:

Ра́дꙋйсѧ, жи́знь за хрⷭ҇та̀ ѿда́вый: ра́дꙋйсѧ, страда́нїемъ є҆гѡ̀ подража́вый.

Ра́дꙋйсѧ, ѻ҆́чи своѧ̑ къ бг҃ꙋ ѡ҆брати́вый: ра́дꙋйсѧ, во́лю свою̀ въ добродѣ́телехъ ᲂу҆крѣпи́вый.

Ра́дꙋйсѧ, ра́бе хрⷭ҇то́въ вѣ́рный: ра́дꙋйсѧ, ст҃ы́й коне́цъ житїѧ̀ своегѡ̀ прїе́мый.

Ра́дꙋйсѧ, къ покаѧ́нїю сердца̀ ѡ҆браща́ѧй: ра́дꙋйсѧ, ко хрⷭ҇тꙋ̀, пꙋтѝ и҆́стинномꙋ, приводѧ́й.

Ра́дꙋйсѧ, дх҃омъ ст҃ы́мъ просвѣще́нный: ра́дꙋйсѧ, собла́знами мі́ра сегѡ̀ не прельще́нный.

Ра́дꙋйсѧ, ѕмі́ѧ лꙋка́вагѡ посрами́вый: ра́дꙋйсѧ, ст҃ы́хъ ли́къ возвесели́вый.

Ра́дꙋйсѧ, вонїфа́тїе, мч҃ниче многострада́льный.

Конда́къ в҃.

Ви́дѧ многомѧте́жїе мі́ра сегѡ̀ и҆ печа́ли зємны́ѧ, и҆ сїѧ̀ всѧ̑ ꙗ҆́кѡ пра́хъ вмѣни́въ, къ премі́рнымъ возве́лъ є҆сѝ ᲂу҆́мъ тво́й, страда́льче хрⷭ҇то́въ, на высотꙋ̀ бг҃оразꙋ́мїѧ возше́дъ, хрⷭ҇та̀ бг҃а пред̾ всѣ́ми и҆сповѣ́далъ є҆сѝ, и҆ ны́нѣ дꙋ́ши всѣ́хъ, во грѣсѣ́хъ погиба́ющихъ, къ милосе́рдомꙋ гдⷭ҇ꙋ зове́ши, да во смире́нїи пока́ютсѧ и҆ во слеза́хъ ᲂу҆миле́ннѡ є҆мꙋ̀ вопїю́тъ: А҆ллилꙋ́їа.

І҆́косъ в҃.

Ра́зꙋмъ трезве́нїемъ ᲂу҆крѣпи́лъ є҆сѝ и҆ страсте́й пла́мень покаѧ́нїемъ ᲂу҆гаси́лъ є҆сѝ, вонїфа́тїе преди́вный, ѿ за́пада на восто́къ и҆з̾ ри́ма прише́лъ є҆сѝ, спострада́ти гдⷭ҇ꙋ і҆и҃сꙋ хрⷭ҇тꙋ̀ намѣ́ренїе ст҃о́е носѧ̀, да блгⷣть въ тебѣ̀ преиз̾ѡби́лꙋетъ: и҆ на́съ ны́нѣ въ хра́мъ бж҃їй привле́клъ є҆сѝ, тебѣ̀ глаго́лющихъ:

Ра́дꙋйсѧ, стра́сти побора́ти наꙋча́ѧй: ра́дꙋйсѧ, ѿча̑ѧннымъ наде́ждꙋ сп҃се́нїѧ подава́ѧй.

Ра́дꙋйсѧ, сꙋетꙋ̀ жи́зни земны́ѧ позна́вый: ра́дꙋйсѧ, страда̑нїѧ своѧ̑ предсказа́вый.

Ра́дꙋйсѧ, трезвѧ́щихсѧ ѿра́до и҆ ѡ҆бодре́нїе: ра́дꙋйсѧ, немощны́хъ во́лею ᲂу҆крѣпле́нїе.

Ра́дꙋйсѧ, ꙗ҆́кѡ тобо́ю ѿ пїѧ́нства ѿвраща́емсѧ: ра́дꙋйсѧ, ꙗ҆́кѡ тобо́ю къ бг҃ꙋ ѡ҆браща́емсѧ.

Ра́дꙋйсѧ, и҆сцѣле́нїй и҆сто́чниче неисчерпа́емый: ра́дꙋйсѧ, чꙋде́съ сокро́вище неѡскꙋдѣва́емое.

Ра́дꙋйсѧ, наꙋча́ѧй на́съ при́снѡ возноси́ти ᲂу҆́мъ на́шъ къ бг҃ꙋ: ра́дꙋйсѧ, ѡ҆брѣты́й и҆́стиннꙋю ѿ грѣхѡ́въ свобо́дꙋ.

Ра́дꙋйсѧ, вонїфа́тїе, мч҃ниче многострада́льный.

Конда́къ г҃.

Си́ла милосе́рдїѧ бж҃їѧ неизрече́ннаѧ на тебѣ̀ ѿкры́сѧ, и҆́бо житїѧ̀ твоегѡ̀, мч҃ниче, ди́вное повѣствова́нїе ꙗ҆́внѡ на́мъ сказꙋ́етъ, ка́кѡ ве́лїи грѣ́шницы ми́лостивѡ ѻ҆ц҃е́мъ на́шимъ бг҃омъ прїе́млютсѧ, є҆гда̀ є҆мꙋ̀ покаѧ́нїе принесꙋ́тъ. Та́кѡ и҆ ты̀ бг҃ꙋ ᲂу҆годи́лъ є҆сѝ и҆ вмѣ́стѡ го́рькїѧ сме́рти вѣ́чнꙋю жи́знь прїѧ́лъ є҆сѝ: наꙋчѝ и҆ на́съ бг҃ꙋ пѣ́ти вы́нꙋ: А҆ллилꙋ́їа.

І҆́косъ г҃.

И҆мѣ́ѧ ны́нѣ ра́дость вѣ́чнꙋю въ нбⷭ҇ныхъ селе́нїихъ, и҆ на́съ, грѣ́шныхъ, на землѝ не забыва́еши, мч҃ниче хрⷭ҇то́въ вонїфа́тїе. Мы́ же, трꙋжда́ющїисѧ и҆ ѡ҆бремене́ннїи, къ тебѣ̀ прибѣга́емъ: не ѡ҆ста́ви на́съ си́рыхъ и҆ недꙋ́жныхъ, по́мощи ᲂу҆ тебє̀ просѧ́щихъ, но мольбы̑ на́ша на ѻ҆лта́рь нбⷭ҇ный принесѝ, да ра́достнѡ тебѣ̀ зове́мъ:

Ра́дꙋйсѧ, бли́жнѧгѡ ꙗ҆́кѡ себѐ сама́гѡ возлюби́вый: ра́дꙋйсѧ, во грѣсѣ́хъ се́рдце своѐ не ѡ҆жесточи́вый.

Ра́дꙋйсѧ, стра́нникѡмъ и҆ пꙋ́тникѡмъ со всѧ́кимъ тща́нїемъ слꙋжи́вый: ра́дꙋйсѧ, ꙗ҆́кѡ сегѡ̀ ра́ди но́щїю сто́гны гра́да ѡ҆бходи́вый.

Ра́дꙋйсѧ, бѡга́тыѧ милосе́рдїю наꙋча́ѧй: ра́дꙋйсѧ, си̑рыѧ и҆ вдови̑цы защища́ѧй.

Ра́дꙋйсѧ, бѣ́дствꙋющымъ до́брый предста́телю: ра́дꙋйсѧ, за ѡ҆би́димыхъ и҆ ᲂу҆ничижа́емыхъ при́сный хода́таю.

Ра́дꙋйсѧ, нестерпи́мою жа́ждою пїѧ́нства пали́мыѧ трезве́нїемъ прохлажда́ѧй: ра́дꙋйсѧ, вина̀ ра́ди ѡ҆бнища́вшыѧ къ трезве́нїю призыва́ѧй.

Ра́дꙋйсѧ, же́ны рыда́ющыѧ ᲂу҆тѣша́ѧй: ра́дꙋйсѧ, сле́зы и҆̀хъ ко гдⷭ҇ꙋ приносѧ́й.

Ра́дꙋйсѧ, вонїфа́тїе, мч҃ниче многострада́льный.

Конда́къ д҃.

Бꙋ́ри грѣхѡ́вныѧ тебѣ̀ не потопи́ша, нижѐ во́лны страсте́й покры́ша, мч҃ниче хрⷭ҇то́въ, не поги́блъ є҆сѝ, но ко хрⷭ҇тꙋ̀ прише́лъ є҆сѝ и҆ жи́знь свою̀, ꙗ҆́кѡ же́ртвꙋ бл҃гово́ннꙋю, є҆мꙋ̀, сладча́йшемꙋ сп҃си́телю на́шемꙋ, прине́слъ є҆сѝ. Моли́сѧ ᲂу҆̀бо, да и҆ мы̀, въ жите́йскомъ мо́ри сꙋ́щїи, къ ти́хомꙋ приста́нищꙋ, гдⷭ҇ꙋ сп҃си́телю, притеце́мъ, во ᲂу҆миле́нїи зовꙋ́ще: А҆ллилꙋ́їа.

І҆́косъ д҃.

Слы́шимъ и҆ мы̀ є҆ѵⷢ҇льскꙋю при́тчꙋ, ка́кѡ блꙋ́дный сы́нъ на странѣ̀ дале́че и҆мѣ́нїе своѐ и҆жди́вый, ѿ гла́да дꙋше́внагѡ въ себѐ прише́дъ, во ѡ҆б̾ѧ́тїѧ ѻ҆́ч҃и притечѐ, въ покаѧ́нїи зовы́й: ѻ҆́ч҃е, согрѣши́хъ на нб҃о и҆ пред̾ тобо́ю. Та́кѡ и҆ ты̀, мч҃ниче вонїфа́тїе, не погꙋби́въ себѐ, но ѿ рожє́цъ грѣха̀ ѿврати́всѧ, ко хрⷭ҇тꙋ̀ ѡ҆брати́лсѧ є҆сѝ. Мы́ же, и҆справле́нїю твоемꙋ̀ ра́дꙋющесѧ, пое́мъ тѝ си́це:

Ра́дꙋйсѧ, гла́дъ крѣ́покъ въ рабо́тѣ страсте́мъ и҆спыта́вый: ра́дꙋйсѧ, хрⷭ҇та̀ бг҃а, ꙗ҆́кѡ хлѣ́ба жива́гѡ, взалка́вый.

Ра́дꙋйсѧ, пречⷭ҇тыѧ кро́ви є҆гѡ̀, ꙗ҆́кѡ и҆́стиннагѡ питїѧ̀ прїѡбщи́выйсѧ: ра́дꙋйсѧ, ꙗ҆́кѡ пресла́внымъ мч҃никѡмъ приложи́выйсѧ.

Ра́дꙋйсѧ, на крылѣ́хъ трезве́нїѧ къ бг҃ꙋ возлетѣ́вый: ра́дꙋйсѧ, се́рдце своѐ горѣ̀ и҆мѣ́вый.

Ра́дꙋйсѧ, ко гдⷭ҇ꙋ си́лою животворѧ́щагѡ крⷭ҇та̀ прише́дый: ра́дꙋйсѧ, ꙗ҆́кѡ прїѧ́лъ є҆сѝ вѣне́цъ побѣ́ды.

Ра́дꙋйсѧ, дꙋшѝ на́шеѧ сокро́вище нетлѣ́нное: ра́дꙋйсѧ, це́ркве на́шеѧ ᲂу҆краше́нїе многоцѣ́нное.

Ра́дꙋйсѧ, красоты̀ мі́ра сегѡ̀ ѿвергі́й: ра́дꙋйсѧ, грѣхо́внꙋю ѻ҆де́ждꙋ съ себє̀ совлекі́й.

Ра́дꙋйсѧ, вонїфа́тїе, мч҃ниче многострада́льный.

Конда́къ є҃.

Бг҃ото́чнꙋю кро́вь хрⷭ҇то́вꙋ, за всѣ́хъ на́съ, недосто́йныхъ, и҆ кро́вь мч҃ническꙋю, за хрⷭ҇та̀ пролїѧ́ннꙋю, па́мѧтꙋющи, си́це тебѣ̀ вѣща́ше а҆глаі́да: са́мъ вѣ́си, ско́ль мно́гими грѣхмѝ ѡ҆скверне́ни є҆смы̀, и҆ ѡ҆ бꙋ́дꙋщемъ житїѧ̀ на́шегѡ небреже́мъ. А҆́зъ же ѿ бжⷭ҇твеннагѡ мꙋ́жа слы́шахъ, ꙗ҆́кѡ мч҃никѡвъ мо́щи сп҃се́нїе да́рꙋютъ, и҆̀же мч҃ника, ꙗ҆́кѡ храни́телѧ и҆ хода́таѧ пред̾ бг҃омъ и҆́мать. И҆ мы̀ тебѣ̀ глаго́лемъ: ты̀ є҆сѝ на́шъ храни́тель и҆ хода́тай пред̾ гдⷭ҇емъ на́шимъ, и҆́бо со а҆́гг҃лы предстои́ши прест҃ѣ́й трⷪ҇цѣ, поѧ̀: А҆ллилꙋ́їа.

І҆́косъ є҃.

Ви́димъ ны́нѣ и҆ разꙋмѣ́емъ, ка́кѡ сїѝ глаго́лы а҆глаі́ды дꙋ́шꙋ твою̀ пробꙋди́ша, и҆ ты̀ къ воздержа́нїю призва́лъ є҆сѝ себѐ, мч҃ниче вонїфа́тїе: и҆ на́мъ помозѝ подража́ти тебѣ̀, да не поги́бнемъ въ пꙋчи́нѣ беззако́нїѧ потоплѧ́еми, но ра́достнѡ тебѣ̀ зове́мъ:

Ра́дꙋйсѧ, ѿ страсте́й, ꙗ҆́кѡ ѿ поги́бельнагѡ сна̀, пробꙋди́выйсѧ: ра́дꙋйсѧ, ѿ ᲂу҆́зъ грѣхѡ́вныхъ свободи́выйсѧ.

Ра́дꙋйсѧ, сомнѣва́ющихсѧ въ милосе́рдїи бж҃їемъ ѡ҆бличе́нїе: ра́дꙋйсѧ, безконе́чныѧ ра́досте ᲂу҆твержде́нїе.

Ра́дꙋйсѧ, зовы́й на́съ къ по́двигꙋ воздержа́нїѧ: ра́дꙋйсѧ, ты́ бо зна́менїемъ крⷭ҇та̀ посѣ́клъ є҆сѝ страсте́й взыгра́нїѧ.

Ра́дꙋйсѧ, стѧжа́вый себѣ̀ вѣ́чное и҆мѣ́нїе: ра́дꙋйсѧ, и҆ на́съ пробꙋжда́ѧй къ трꙋдꙋ̀ сп҃се́нїѧ.

Ра́дꙋйсѧ, ꙗ҆́кѡ ві́нное весе́лїе презрѣ́лъ є҆сѝ: ра́дꙋйсѧ, ꙗ҆́кѡ плотскі́ѧ ра́ны, ꙗ҆́кѡ безпло́тенъ, претерпѣ́лъ є҆сѝ.

Ра́дꙋйсѧ, за и҆сповѣ́данїе хрⷭ҇та̀ ѿ врагѡ́въ и҆збїе́нный: ра́дꙋйсѧ, нестерпи́мымъ ѻ҆гне́мъ за негѡ̀ ѡ҆пале́нный.

Ра́дꙋйсѧ, вонїфа́тїе, мч҃ниче многострада́льный.

Конда́къ ѕ҃.

Проповѣ́дница поклоне́нїѧ ст҃ы́мъ моще́мъ ꙗ҆ви́сѧ а҆глаі́да, госпожа̀ твоѧ̀, страда́льче хрⷭ҇то́въ, є҆гда̀ посла̀ тѧ́ на восто́къ ст҃ы́ѧ мо́щи мч҃никѡвъ, за вѣ́рꙋ хрⷭ҇то́вꙋ пострада́вшихъ, принестѝ, и҆́миже бл҃годѣѧ́нїѧ и҆сточа́ютсѧ ѡ҆би́льнѡ и҆ вѣ́чное сп҃се́нїе подае́тсѧ всѣ́мъ, къ мч҃ническомꙋ ли́кꙋ ᲂу҆се́рднѡ притека́ющымъ. Да́ждь и҆ на́мъ ᲂу҆тѣше́нїе ѿ гдⷭ҇а прїѧ́ти, є҆мꙋ́же а҆́гг҃льскꙋю пѣ́снь прино́симъ: А҆ллилꙋ́їа.

І҆́косъ ѕ҃.

Возсїѧ́лъ є҆сѝ на́мъ, ꙗ҆́кѡ ѕвѣзда̀ незаходи́маѧ, ди́внымъ житїе́мъ твои́мъ, мч҃ниче пребл҃же́нне, и҆́го хрⷭ҇то́во ле́гкое и҆ вседраго́е на себѐ прїе́мый и҆ сп҃се́нїе полꙋчи́вый, пꙋти́ бо бл҃гоче́стїѧ без̾ хрⷭ҇та̀ гдⷭ҇а ѡ҆брѣстѝ ника́коже возмо́жнѡ є҆́сть. Тѣ́мже и҆ на́съ мл҃твами твои́ми въ гѡ́рнѧѧ ѻ҆би́тели приведѝ, тѧ̀ восхвалѧ́ющихъ си́це:

Ра́дꙋйсѧ, зако́на хрⷭ҇то́ва скрижа́ль бг҃оначерта́ннаѧ: ра́дꙋйсѧ, мл҃твъ ко гдⷭ҇ꙋ мѵ́ро бл҃гоꙋха́нное.

Ра́дꙋйсѧ, пра́выѧ вѣ́ры хрⷭ҇то́вой сто́лпе ѻ҆́гненный: ра́дꙋйсѧ, чтⷭ҇ны́й вѣ́нче ѿ за́повѣдей бж҃їихъ, ꙗ҆́коже ѿ ка́менїй драги́хъ ᲂу҆стро́енный.

Ра́дꙋйсѧ, трезве́нїѧ лѣ́ствице нб҃овосхо́днаѧ: ра́дꙋйсѧ, болѣ́зни и҆ ра́ны врачꙋ́ѧй грѣхѡ́вныѧ.

Ра́дꙋйсѧ, ꙗ҆́кѡ ѿ гдⷭ҇а і҆и҃са хрⷭ҇та̀ блгⷣть и҆ си́лꙋ прїѧ́лъ є҆сѝ: ра́дꙋйсѧ, ꙗ҆́кѡ свѣ́тъ хрⷭ҇то́въ на́мъ возсїѧ́лъ є҆сѝ.

Ра́дꙋйсѧ, воздержа́нїемъ ѿ грѣхѡ́въ ѡ҆сщ҃а́ти пра́здники на́съ наꙋча́ѧй: ра́дꙋйсѧ, ѿ сме́ртнагѡ вина̀ на́съ ѡ҆хранѧ́ѧй.

Ра́дꙋйсѧ, ᲂу҆мерщвле́нныѧ страстьмѝ свѣ́томъ хрⷭ҇то́вымъ ѡ҆живлѧ́ѧй: ра́дꙋйсѧ, ты́ѧ къ но́вомꙋ житїю̀ призыва́ѧй.

Ра́дꙋйсѧ, вонїфа́тїе, мч҃ниче многострада́льный.

Конда́къ з҃.

Хотѧ̀ ѿ̾итѝ ѿ до́мꙋ своегѡ̀ въ пꙋ́ть на восто́къ, кончи́нꙋ житїѧ̀ твоегѡ̀ предре́клъ є҆сѝ, достохва́льне, а҆глаі́дѣ глаго́лѧ: госпожѐ моѧ̀, прїимѝ моѐ тѣ́ло, за хрⷭ҇та̀ мꙋ́чимое, є҆гда̀ є҆гѡ̀ принесꙋ́тъ тѝ: въ дꙋшѝ твое́й мы́сль за хрⷭ҇та̀ пострада́ти таѧ̀, є҆мꙋ̀ сокрове́ннѡ моли́лсѧ є҆сѝ: и҆ на́шꙋ вѣ́рꙋ ᲂу҆крѣпѝ, да бꙋ́демъ гото́вы и҆ мы̀ є҆ѧ̀ ра́ди страда́ти, гдⷭ҇ꙋ пою́ще: А҆ллилꙋ́їа.

І҆́косъ з҃.

Ди́вномꙋ и҆ пресла́вномꙋ и҆справле́нїю твоемꙋ̀ не вѣ́рꙋѧ, помы́сли лꙋка́вое въ се́рдцѣ свое́мъ а҆глаі́да, грѣхо́мъ бо хꙋле́нїѧ ѡ҆болга́ти тѧ̀ хотѧ́щи, та́кѡ ѿвѣща̀ тѝ: ны́нѣ не глꙋмле́нїѧ вре́мѧ, бра́те, но бл҃гоговѣ́нїѧ, вѣ́дый бꙋ́ди, ꙗ҆́кѡ мо́щи ст҃ы́ѧ и҆́маши носи́ти. Гдⷭ҇ь же да по́слетъ а҆́гг҃ла своегѡ̀ пред̾ тобо́ю и҆ напра́витъ стопы̀ твоѧ̀ милосе́рдїемъ свои́мъ. Мы́ же, чⷭ҇тотꙋ̀ се́рдца твоегѡ̀, ди́вный вонїфа́тїе, зрѧ́ще, вопїе́мъ тѝ:

Ра́дꙋйсѧ, ст҃ы́хъ моще́й почита́телю: ра́дꙋйсѧ, бл҃гоговѣ́нїѧ ѻ҆́браза на́мъ пода́телю.

Ра́дꙋйсѧ, ѿ безчи́нствъ храни́тисѧ на́мъ повелѣ́вый: ра́дꙋйсѧ, всѧ̑, ѡ҆ ни́хже сы́нове вѣ́ка сегѡ̀ ра́дꙋютсѧ, презрѣ́вый.

Ра́дꙋйсѧ, и҆звѣ́стный на́шъ помо́щниче: ра́дꙋйсѧ, бл҃ги́хъ намѣ́ренїй таи́нниче.

Ра́дꙋйсѧ, всѣ́мъ борю́щымсѧ со грѣхмѝ покрови́телю: ра́дꙋйсѧ, покаѧ́нїѧ на́шегѡ пред̾ бг҃омъ порꙋчи́телю.

Ра́дꙋйсѧ, ꙗ҆́кѡ твои́ми мл҃твами гдⷭ҇ь ѡ҆ставлѧ́етъ прегрѣше́нїѧ: ра́дꙋйсѧ, помога́ѧй на́мъ терпѣ́ти ско́рби и҆ поноше́нїѧ.

Ра́дꙋйсѧ, ликѡ́мъ а҆́гг҃льскимъ сотвори́вый ра́дость и҆ ᲂу҆дивле́нїе: ра́дꙋйсѧ, дꙋхѡ́въ ѕло́бы приведы́й въ посрамле́нїе.

Ра́дꙋйсѧ, вонїфа́тїе, мч҃ниче многострада́льный.

Конда́къ и҃.

Стра́ннѡ тебѣ̀ бы́сть ꙗ҆зы́ческое і҆́дѡлѡмъ слꙋже́нїе, и҆ ты̀, ст҃ы́й мч҃ниче, въ та́рсъ прише́дъ, не преклони́лъ є҆сѝ колѣ́нъ пред̾ бѡга́ми чꙋжди́ми, но а҆пⷭ҇лѡмъ показа́лсѧ є҆сѝ ревни́тель. Тѣ́мже моли́сѧ за ны̀, да возгори́мсѧ и҆ мы̀ ѻ҆гне́мъ любвѐ ко влⷣцѣ хрⷭ҇тꙋ̀, пою́ще всегда̀: А҆ллилꙋ́їа.

І҆́косъ и҃.

Ве́сь распали́лсѧ є҆сѝ ре́вностїю ст҃о́ю, хꙋле́нїѧ на гдⷭ҇а не терпѧ̀, и҆ и҆спо́лнилсѧ є҆сѝ дх҃а бж҃їѧ, ѡ҆слѣпле́нїе и҆ безꙋ́мїе покланѧ́ющихсѧ ло́жнымъ богѡ́мъ ѡ҆блича́ѧ. Сегѡ̀ ра́ди ца́рь нечести́вый ка́знь наведѐ на тѧ̀, мч҃ниче, го́рькꙋю, бичмѝ нестерпи́мѡ бїѧ̀ и҆ ра́ны наносѧ̀ неисцѣ́льныѧ. Мы́ же тебѣ̀ похвалꙋ̀ пое́мъ:

Ра́дꙋйсѧ, ѕловѣ́рїѧ ѡ҆бличи́телю дерзнове́нный: ра́дꙋйсѧ, въ пра́вдꙋ бж҃їю, а҆́ки въ броню̀, ѡ҆блече́нный.

Ра́дꙋйсѧ, ꙗ҆́кѡ кѡ́сти твоѧ̑ ѿ ра̑нъ за хрⷭ҇та̀ ѡ҆бнажа́хꙋсѧ: ра́дꙋйсѧ, ꙗ҆́кѡ чтⷭ҇ота̀ дꙋшѝ твоеѧ̀ тогда̀ ѿкры́шасѧ.

Ра́дꙋйсѧ, ꙗ҆́кѡ наслѣ́довалъ є҆сѝ нбⷭ҇наѧ селє́нїѧ: ра́дꙋйсѧ, ꙗ҆́кѡ и҆ ны́нѣ ѡ҆блича́еши ѕлы́хъ чл҃вѣ́къ на хрⷭ҇та̀ хꙋлє́нїѧ.

Ра́дꙋйсѧ, за хрⷭ҇та̀ ѻ҆́стрыми тростьмѝ пробода́емый: ра́дꙋйсѧ, са́да ра́йскагѡ цвѣ́те неꙋвѧда́емый.

Ра́дꙋйсѧ, ꙗ҆́кѡ зла́то горни́ломъ ꙗ҆́звъ ѡ҆чище́нный: ра́дꙋйсѧ, за хрⷭ҇та̀ ᲂу҆даре́нный.

Ра́дꙋйсѧ, кончи́ною свое́ю бг҃ꙋ ᲂу҆годи́вый: ра́дꙋйсѧ, да́же до сме́рти мч҃ническїѧ є҆гѡ̀ возлюби́вый.

Ра́дꙋйсѧ, вонїфа́тїе, мч҃ниче многострада́льный.

Конда́къ ѳ҃.

Всегѡ̀ себѐ гдⷭ҇ꙋ бг҃ꙋ преда́въ, страстоте́рпче хрⷭ҇то́въ, є҆гда̀ нечести́вый ца́рь повелѣ̀ раскры́ти ᲂу҆ста̀ твоѧ̀ и҆ ѻ҆́лово кипѧ́щее вли́ти, рꙋ́цѣ своѝ воздви́глъ є҆сѝ къ нб҃ꙋ, та́кѡ молѧ́сѧ: гдⷭ҇и, бж҃е мо́й, і҆и҃се хрⷭ҇тѐ, ᲂу҆крѣпи́вый менѐ въ мꙋ́кахъ, пребꙋ́ди и҆ ны́нѣ со мно́ю, моѧ̑ страда̑нїѧ ѡ҆блегчѝ и҆ не ѡ҆ста́ви менѐ ѡ҆долѣ́нꙋ бы́ти лꙋка́вымъ кнѧ́земъ. Тѣ́мъ и҆ на́съ любвѝ ко хрⷭ҇тꙋ̀ наꙋча́еши, пою́щихъ бг҃ꙋ: А҆ллилꙋ́їа.

І҆́косъ ѳ҃.

Вѣті̑и сꙋемꙋ́дреннїи да рекꙋ́тъ на́мъ: ка́кѡ ѻ҆́лово разжже́нное горта́ни твоеѧ̀ не ѡ҆палѝ, нижѐ и҆на́гѡ вреда̀ тебѣ̀ сотворѝ, мч҃ниче вонїфа́тїе: ѿ гдⷭ҇а бо зна́менїе побѣ́ды над̾ мꙋчи́телемъ проси́лъ є҆сѝ, и҆ сїѐ зна́менїе тебѣ̀ дано̀ бы́сть, сегѡ̀ ра́ди всѝ, чꙋдѧ́щесѧ, восклица́хꙋ: ве́лїй є҆́сть і҆и҃съ хрⷭ҇то́съ. Вѣ́рꙋемъ въ тѧ̀, гдⷭ҇и. Мы́ же сла́вимъ тѧ̀, мч҃ниче, си́це:

Ра́дꙋйсѧ, ꙗ҆́кѡ тобо́ю вѣ́рнїи просвѣща́ютсѧ: ра́дꙋйсѧ, ꙗ҆́кѡ тобо́ю ѿ посты́дныѧ сме́рти и҆збавлѧ́ютсѧ.

Ра́дꙋйсѧ, во є҆ди́нѣмъ хрⷭ҇тѣ̀ ᲂу҆тѣше́нїе полага́ѧй: ра́дꙋйсѧ, во страда́нїѧхъ призыва́ти бг҃а наꙋча́ѧй.

Ра́дꙋйсѧ, ꙗ҆́кѡ мꙋчи́телїе тебѐ не превозмого́ша: ра́дꙋйсѧ, ꙗ҆́кѡ стра́сти тебѐ не поборо́ша.

Ра́дꙋйсѧ, ты́ бо те́рнїѧ грѣхѡ́въ въ себѣ̀ попали́лъ є҆сѝ: ра́дꙋйсѧ, ты́ бо ѻ҆гне́мъ неѡпале́нъ пребы́лъ є҆сѝ.

Ра́дꙋйсѧ, при́снѡ живы́й страстоте́рпче ра́достный: ра́дꙋйсѧ, мл҃твенниче на́шъ бла́гостный.

Ра́дꙋйсѧ, ꙗ҆́кѡ тобо́ю ѻ҆чеса̀, грѣхмѝ ѡ҆слѣпле́нныѧ, ѿверза́ютсѧ: ра́дꙋйсѧ, ꙗ҆́кѡ по́мощїю твое́ю печа́ли на ра́дость прелага́ютсѧ.

Ра́дꙋйсѧ, вонїфа́тїе, мч҃ниче многострада́льный.

Конда́къ і҃.

Сп҃се́нъ бы́ти восхотѣ́въ, пла́меннѣ возжелѣ́лъ є҆сѝ до конца̀ за гдⷭ҇а пострада́ти, мч҃ниче вонїфа́тїе, є҆мꙋ́же и҆ возопи́лъ є҆сѝ: гдⷭ҇и, гдⷭ҇и, бж҃е мо́й, сподо́би мѧ̀ ми́лостей твои́хъ и҆ бꙋ́ди мѝ помо́щникъ, да за беззакѡ́нїѧ моѧ̑, безꙋ́мнѡ содѣ̑ѧнныѧ, вра́гъ не прегради́тъ мѝ пꙋтѝ къ нб҃сѝ, прїимѝ съ ми́ромъ дꙋ́шꙋ мою̀, вчинѝ мѧ̀ съ мч҃никами, кро́вь за тѧ̀ пролїѧ́вшими и҆ вѣ́рꙋ до конца̀ соблю́дшими, и҆ ны́нѣ вопїю́щими тѝ: А҆ллилꙋ́їа.

І҆́косъ і҃.

Стѣна̀ крѣ́пкаѧ, ко́зньми врага̀ неѡдолѣ́ннаѧ, пребы́лъ є҆сѝ до конца̀, мч҃ниче хрⷭ҇то́въ: є҆гда̀ же глава̀ твоѧ̀ ѿ тѣлесѐ ѿсѣче́на бы́сть, ѡ҆ чꙋдесѐ, а҆́бїе кро́вь и҆ млеко̀ и҆з̾ ра́ны твоеѧ̀ и҆стеко́ша, ꙗ҆́кѡ и҆ невѣ́рнымъ, чꙋ́до сїѐ зрѧ́щымъ, хрⷭ҇та̀ просла́вити и҆ съ на́ми зва́ти тебѣ̀:

Ра́дꙋйсѧ, ꙗ҆́кѡ мꙋчє́нїѧ твоѧ̑ зрѧ́ще, мно́жество люде́й ко хрⷭ҇тꙋ̀ ѡ҆брати́шасѧ: ра́дꙋйсѧ, ꙗ҆́кѡ тебѣ̀ ра́ди на кнѧ́зѧ ѕло́бы ѻ҆нѝ ᲂу҆стреми́шасѧ.

Ра́дꙋйсѧ, твоѧ̀ бо кончи́на просвѣтѝ ᲂу҆мы̀ помраче́нныѧ: ра́дꙋйсѧ, твоѧ̀ бо сла́внаѧ сме́рть воскресѝ сѡ́вѣсти во грѣсѣ́хъ погребе́нныѧ.

Ра́дꙋйсѧ, нераска́ѧнныхъ грѣ́шникѡвъ ѡ҆бличе́нїе: ра́дꙋйсѧ, во́лею разсла́бленныхъ ѿ вїна̀ и҆сцѣле́нїе.

Ра́дꙋйсѧ, въ нощѝ невѣ́дѣнїѧ блꙋжда́ющихъ вразꙋмле́нїе: ра́дꙋйсѧ, злата́ѧ ᲂу҆́дице, и҆з̾ глꙋбины̀ грѣхѡ́въ влекꙋ́щаѧ ко сп҃се́нїю.

Ра́дꙋйсѧ, ꙗ҆́кѡ ѿ бг҃а въ мл҃твахъ ᲂу҆слы́шанъ бы́лъ є҆сѝ: ра́дꙋйсѧ, ꙗ҆́кѡ въ нбⷭ҇нѣмъ црⷭ҇твїе всели́лсѧ є҆сѝ.

Ра́дꙋйсѧ, порфѵ́рою ѿ крове́й твои́хъ ѡ҆блече́нный: ра́дꙋйсѧ, ꙗ҆́кѡ зри́ши ны́нѣ свѣ́тъ неизрече́нный.

Ра́дꙋйсѧ, вонїфа́тїе, мч҃ниче многострада́льный.

Конда́къ а҃і.

Пѣ́нїе немо́лчное прино́сиши гдⷭ҇еви, мч҃ниче вонїфа́тїе, съ мч҃ническими ли́ки прест҃ѣ́й трⷪ҇цѣ предстоѧ̀, за ню́же себѐ преда́лъ є҆сѝ, да и҆ мы̀ дꙋ́шы своѧ̑, а҆́ки невѣ́сты ᲂу҆краси́вше, нетлѣ́нномꙋ женихꙋ̀ хрⷭ҇тꙋ̀ предста́вимъ со сщ҃е́нною пѣ́снїю: А҆ллилꙋ́їа.

І҆́косъ а҃і.

Свѣ́тъ любвѐ и҆ по сме́рти возсїѧ́лъ є҆сѝ, вонїфа́тїе ди́вный, є҆гда̀ бо дрꙋ́зи твою̀ ᲂу҆сѣче́ннꙋю главꙋ̀ ѡ҆брѣ́тше, пла́кахꙋсѧ го́рькѡ, глаго́люще: ра́бе хрⷭ҇то́въ, забꙋ́ди на́мъ грѣ́хъ непра́веднагѡ ѡ҆сꙋжде́нїѧ и҆ безразсꙋ́дныхъ рꙋга́нїй на́шихъ: тогда̀ ли́къ тво́й, ꙗ҆́кѡ лꙋча́ми живы́ми, просвѣти́сѧ, проще́нїе и҆̀мъ ꙗ҆влѧ́ѧ. Сегѡ̀ ра́ди съ любо́вїю тебѣ̀ зове́мъ:

Ра́дꙋйсѧ, и҆мѣ́ѧй ᲂу҆ста̀ кро́тости сладковѣща́нныѧ: ра́дꙋйсѧ, любвѐ вмѣсти́лище простра́нное.

Ра́дꙋйсѧ, ѡ҆ тебѣ̀ бо весели́тсѧ цр҃ковь со свои́ми ча́ды: ра́дꙋйсѧ, ты́ бо преше́лъ є҆сѝ къ вы́шнемꙋ нбⷭ҇номꙋ гра́дꙋ.

Ра́дꙋйсѧ, въ сме́рти свое́й а҆пⷭ҇лѡмъ ра́вный: ра́дꙋйсѧ, ре́вностїю по бз҃ѣ пресла́вный.

Ра́дꙋйсѧ, жите́йскїѧ молвы̀ ѡ҆блича́ѧй ѕлы́ѧ сплетє́нїѧ: ра́дꙋйсѧ, всѣ́хъ на́съ ѿ вра́жїѧ и҆збавлѧ́ѧй ловле́нїѧ.

Ра́дꙋйсѧ, ты́ бо защища́еши непра́веднѡ гони́мыѧ: ра́дꙋйсѧ, пред̾ прⷭ҇то́ломъ гдⷭ҇нимъ лампа́до неꙋгаси́маѧ.

Ра́дꙋйсѧ, по за́повѣди хрⷭ҇то́вой и҆ врагѡ́въ возлюби́вый: ра́дꙋйсѧ, ѕлослѡ́вїѧ и҆ клеветы̀ нивочто́же вмѣни́вый.

Ра́дꙋйсѧ, вонїфа́тїе, мч҃ниче многострада́льный.

Конда́къ в҃і.

Блгⷣть и҆сцѣле́нїй точа́щыѧ мо́щи твоѧ̑, є҆гда̀ къ ри́мꙋ приближа́хꙋсѧ, а҆́гг҃лъ гдⷭ҇ень ꙗ҆ви́сѧ а҆глаі́дѣ, глаго́лѧ: бы́вшагѡ тѝ дре́влѣ раба̀, ны́нѣ же на́шегѡ бра́та и҆ сослꙋже́бника прїимѝ ꙗ҆́коже влады́кꙋ и҆ ᲂу҆поко́й до́брѣ, да грѣсѝ твоѧ̑ ѡ҆ста́вѧтсѧ, то́й бо съ на́ми ны́нѣ въ нб҃сѣ́хъ пое́тъ всевы́шнемꙋ: А҆ллилꙋ́їа.

І҆́косъ в҃і.

Пою́ще чꙋдеса̀ твоѧ̑, хра́мъ ди́вный созда̀ тебѣ̀, во́ине хрⷭ҇то́въ, а҆глаі́да, въ не́мже и҆ мо́щи твоѧ̑ положѝ, и҆ сама̀, бога́тство ни́щымъ разда́вши, и҆ пѧтьна́десѧтъ лѣ́тъ въ по́двизѣхъ поста̀ и҆ покаѧ́нїѧ пожи́вши, ли́ка ст҃ы́хъ дости́же. Тѣ́мже велича́юще чꙋдеса̀ твоѧ̑, прославлѧ́емъ тѧ̀ си́це:

Ра́дꙋйсѧ, дꙋ́шꙋ свою̀ сотвори́вый хра́мъ бг҃ꙋ прекра́сный: ра́дꙋйсѧ, чꙋ́дныхъ бж҃їихъ дѣ́лъ кни́го ꙗ҆́снаѧ.

Ра́дꙋйсѧ, ѿ внеза́пныѧ сме́рти и҆збавлѧ́ѧй: ра́дꙋйсѧ, скѡ́рбныѧ же́ны ѿ ѕлы́хъ пїѧ́ницъ ѡ҆гражда́ѧй.

Ра́дꙋйсѧ, па́дшыѧ къ возста́нїю ѿ грѣхѡ́въ призыва́ѧй: ра́дꙋйсѧ, свѣ́тъ чⷭ҇тоты̀ и҆̀мъ подава́ѧй.

Ра́дꙋйсѧ, ты́ бо ᲂу҆кроща́еши страсте́й ѻ҆гне́вицꙋ: ра́дꙋйсѧ, тобо́ю бо ѡ҆ставлѧ́емъ грѣхо́внꙋю темни́цꙋ.

Ра́дꙋйсѧ, ма́лыѧ ча̑да ѿ собла́знѡвъ мі́ра соблюда́ѧй: ра́дꙋйсѧ, ты́ѧ хрⷭ҇то́вꙋ ᲂу҆че́нїю наставлѧ́ѧй.

Ра́дꙋйсѧ, вѣ́стниче тре́звости, во вѣ́ки прославлѧ́емый: ра́дꙋйсѧ, ᲂу҆го́дниче хрⷭ҇то́въ, при́снѡ почита́емый.

Ра́дꙋйсѧ, вонїфа́тїе, мч҃ниче многострада́льный.

Конда́къ г҃і.

Ѽ, пресла́вный мч҃ниче хрⷭ҇то́въ вонїфа́тїе, прїимѝ ѿ на́съ сїѐ ма́лое похва́льное приноше́нїе, є҆́же пред̾ і҆кѡ́ною твое́ю, колѣ́на прекло́ньше и҆ рꙋ̑цѣ своѝ къ тебѣ̀ просте́рши, тебѣ̀ ны́нѣ прино́симъ: да́рꙋй на́мъ твоѐ пред̾ гдⷭ҇емъ застꙋпле́нїе, наипа́че же погиба́ющымъ ѿ пїѧ́нства бра́тїѧмъ на́шимъ и҆сцѣле́нїе ниспослѝ и҆ житїѧ̀ бл҃га́гѡ нача́ло положи́ти всѣ́хъ на́съ сподо́би, да сп҃се́нїе ᲂу҆лꙋчи́вше мл҃твами твои́ми, во вѣ́ки восхва́лимъ бг҃а, пою́ще є҆мꙋ̀: А҆ллилꙋ́їа.

Се́й конда́къ глаго́ли три́жды, посе́мъ а҃-й і҆́косъ и҆ а҃-й конда́къ.

Моли́тва.

Ѽ, многострада́льный и҆ всехва́льный мч҃ниче вонїфа́тїе, къ твоемꙋ̀ застꙋпле́нїю ны́нѣ прибѣга́емъ: моле́нїй на́съ, пою́щихъ тебѣ̀, не ѿве́ржи, но ми́лостивѡ ᲂу҆слы́ши на́съ, ви́ждь бра́тїѧ и҆ се́стры на́шѧ тѧ́жкимъ недꙋ́гомъ пїѧ́нства ѡ҆держи́мыѧ, ви́ждь тогѡ̀ ра́ди ѿ ма́тери своеѧ̀, цр҃кви хрⷭ҇то́вой и҆ вѣ́чнагѡ сп҃се́нїѧ ѿпа́дающїѧ. Ѽ, ст҃ы́й мч҃ниче хрⷭ҇то́въ вонїфа́тїе, косни́сѧ серде́цъ и҆̀хъ да́нною тѝ ѿ бг҃а блгⷣтїю, ско́рѡ возста́ви ѿ паде́нїй грѣхо́вныхъ и҆ ко сп҃си́тельномꙋ воздержа́нїю приведѝ и҆̀хъ. Оу҆молѝ гдⷭ҇а бг҃а, є҆гѡ́же ра́ди страда́лъ є҆сѝ, да прости́въ на́мъ согрѣшє́нїѧ на̑ша, не ѿврати́тъ ми́лости своеѧ̀ ѿ сынѡ́въ свои́хъ, но да ᲂу҆крѣпи́тъ на́съ въ трезве́нїи и҆ цѣломꙋ́дрїи, да помо́жетъ свое́ю десни́цею трезвѧ́щимсѧ сп҃си́тельный ѻ҆бѣ́тъ сво́й до конца̀ сохрани́ти, во днѝ и҆ въ нощѝ ѡ҆ не́мъ бо́дрствꙋюще, и҆ до́брый ѿвѣ́тъ ѡ҆ не́мъ возда́ти на стра́шнѣмъ сꙋди́ще.

Прїимѝ, ᲂу҆го́дниче бж҃їй, моли̑твы ма́терей, ѡ҆ ча́дѣхъ свои́хъ слє́зы пролива́ющихъ, же́нъ честны́хъ, ѡ҆ мꙋже́хъ свои́хъ рыда́ющихъ, ча́дъ си́рыхъ и҆ ᲂу҆бо́гихъ, ѿ пїѧ́ницъ ѡ҆ста́вленныхъ, и҆ всѣ́хъ на́съ, и҆ да прїи́детъ се́й во́пль на́шъ мл҃твами твои́ми ко прⷭ҇то́лꙋ всевы́шнѧгѡ, дарова́ти всѣ̑мъ по мл҃твамъ и҆̀хъ здра́вїе и҆ сп҃се́нїе дꙋ́шъ и҆ тѣле́съ, наипа́че же црⷭ҇твїе нбⷭ҇ное.

Покры́й и҆ соблюдѝ на́съ ѿ лꙋка́вагѡ ловле́нїѧ и҆ всѣ́хъ ко́зней вра́жїихъ, въ стра́шный же ча́съ и҆схо́да на́шегѡ помозѝ прейтѝ непреткнове́ннѡ воздꙋ́шныѧ мыта́рства и҆ мл҃твами твои́ми и҆зба́ви вѣ́чнагѡ ѡ҆сꙋжде́нїѧ.

Оу҆моли́ же гдⷭ҇а дарова́ти на́мъ ко ѻ҆те́чествꙋ на́шемꙋ любо́вь нелицемѣ́рнꙋю и҆ во́лю непоколеби́мꙋю пред̾ врага́ми цр҃кви ст҃ы́ѧ, ви́димыми и҆ неви́димыми, да покры́етъ на́съ млⷭ҇ть бж҃їѧ въ несконча́емыѧ вѣ́ки вѣкѡ́въ. А҆ми́нь.

Моли́тва втора́ѧ.

Ѽ, всехва́льный мч҃ниче вонїфа́тїе! кі̑ѧ пѣ́сни воспое́мъ тѝ, вѣ́чною красото́ю ᲂу҆краше́нномꙋ; кі́й вѣне́цъ сплете́мъ, свѣ́тлостїю ѡ҆дѣ́ѧнномꙋ; кі́и да́ры принесе́мъ тѝ, всѣ́ми бл҃гами ѻ҆богаще́нномꙋ; Всѧ̑ ᲂу҆́бѡ съ любо́вїю прїе́млеши: и҆ слове́съ кра̑снаѧ и҆ сла̑дкаѧ пѣ́нїѧ, и҆ честны̑ѧ да́ры свѣщѝ, є҆ле́й и҆ кади́ло бл҃гоꙋха́нное. Но ничто́же та́кѡ тѝ ᲂу҆го́дно быва́етъ, ꙗ҆́кѡ житїѐ непоро́чное, нра́въ бл҃гі́й, дꙋша̀ чⷭ҇таѧ, се́рдце кро́ткое, тѣ́ло чистото́ю ѡ҆свѧще́нное, любо́вь къ бг҃ꙋ те́плаѧ и҆ ко бли́жнемꙋ нелицемѣ́рнаѧ, моли́тва ча́стаѧ и҆ приле́жнаѧ, воздыха̑нїѧ ᲂу҆милє́ннаѧ, страсте́й ᲂу҆мерщвле́нїе, ѻ҆че́съ цѣломꙋ́дрїе, ѧ҆зы́ка воздержа́нїе, настоѧ́щихъ бл҃гъ презрѣ́нїе и҆ бꙋ́дꙋщихъ жела́нїе, ѡ҆ сме́рти поꙋче́нїе, воскресе́нїѧ ча́ѧнїе, вѣ́чныхъ мꙋ́къ трепета́нїе, црⷭ҇тва нбⷭ҇наго всера́достнаѧ наде́жда. Си́ми дармѝ на́мъ ниспослѝ, ст҃ы́й мꙋ́чениче, ᲂу҆годи́ти гдⷭ҇ви во и҆́мѧ твоѐ вседраго́е, да сподо́бимсѧ ѿ всеще́драго бг҃а бога̑тыѧ млⷭ҇ти.

Твои́мъ предста́тельствомъ и҆ те́плымъ застꙋпле́нїемъ ѿ ѡ҆ѕлобле́нїѧ ви́димыхъ и҆ неви́димыхъ вра̑гъ на́съ и҆зба́ви, да въ настоѧ́щемъ вѣ́цѣ ми́рное и҆ безмѧте́жное житїѐ поживе́мъ, въ бꙋ́дꙋщемъ же всера́достнагѡ и҆ безконе́чнагѡ црⷭ҇твїѧ прича́стницы бꙋ́демъ во вѣ́ки вѣкѡ́въ. А҆ми́нь.

Моли́тва тре́тїѧ.

Ѽ, ст҃ы́й ᲂу҆го́дниче хрⷭ҇то́въ, страстоте́рпче и҆ мꙋ́чениче вонїфа́тїе! дꙋше́ю на нб҃сѝ предстоѧ́й прⷭ҇то́лꙋ бж҃їю, и҆ трїѷпоста́сныѧ сла́вы бж҃їѧ наслажда́ѧйсѧ, і҆кѡ́ною ст҃о́ю на землѝ въ бж҃е́ственныхъ хра́мѣхъ пребыва́ѧй, и҆ да́нною тѝ свы́ше бл҃года́тїю разли̑чныѧ и҆сточа́ѧй чꙋдеса̀. При́зри ми́лостивымъ твои́мъ ѻ҆́комъ на предстоѧ́щїѧ лю́ди и҆ честнѣ́й твое́й і҆кѡ́нѣ ᲂу҆ми́льнѡ молѧ́щїѧсѧ и҆ просѧ́щїѧ ѿ тебѣ̀ цѣлє́бныѧ по́мощи и҆ застꙋпле́нїѧ, и҆ и҆спросѝ дꙋша́мъ на́шимъ ѡ҆ставле́нїе согрѣше́нїй. Се́рдцемъ сокрꙋшє́нымъ и҆ дх҃омъ смирє́ннымъ, тебѣ̀, хода́таѧ ми́лостива ко влⷣцѣ и҆ моли́твенника за ны̀ грѣ̑шныѧ призыва́емъ, ꙗ҆́кѡ прїѧ́лъ є҆сѝ ѿ негѡ̀ недꙋ́ги ѿгонѧ́ти и҆ стра́сти и҆сцѣлѧ́ти. Тебѣ̀ ᲂу҆́бѡ про́симъ: не пре́зри на́съ недосто́йныхъ, молѧ́щихсѧ тѝ и҆ твоеѧ̀ по́мощи тре́бꙋющихъ: бꙋ́ди на́мъ въ печа́лехъ ᲂу҆тѣ́шитель, стра́ждꙋщимъ ѿ пїѧ́нства вра́чь и҆ и҆сцѣли́тель, во сла́вꙋ бж҃їю трезвѧ́щимсѧ ско́рый покрови́тель и҆ гото́вѣйшїй предста́тель. И҆схода́тайствꙋй всѣ̑мъ всѧ̑, ꙗ҆̀же ко сп҃се́нїю полє́знаѧ, ꙗ҆́кѡ да твои́ми ко гдⷭ҇ꙋ бг҃ꙋ моли́твами полꙋчи́вше благода́ть и҆ ми́лость, просла́вимъ всѣ́хъ бл҃ги́хъ и҆сто́чника и҆ дарода́телѧ бг҃а, є҆ди́наго въ трⷪ҇цѣ ст҃ѣ́й сла́вимаго, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ прⷭ҇нѡ и҆ во вѣ́ки вѣкѡ́въ. А҆ми́нь.

Свя­той му­че­ник Во­ни­фа­тий был ра­бом бо­га­той мо­ло­дой рим­лян­ки Агла­и­ды и со­сто­ял с ней в без­за­кон­ном со­жи­тель­стве. Но оба они чув­ство­ва­ли угры­зе­ния со­ве­сти и хо­те­ли как-то омыть свой грех. И Гос­подь по­жа­лел их и дал им воз­мож­ность очи­стить гре­хи сво­ей кро­вью и за­кон­чить греш­ную жизнь по­ка­я­ни­ем. Агла­и­да узна­ла, что ес­ли с бла­го­го­ве­ни­ем хра­нить в до­ме мо­щи свя­тых му­че­ни­ков, то их мо­лит­ва­ми лег­че по­лу­чить спа­се­ние, ибо под их бла­го­дат­ным воз­дей­стви­ем ума­ля­ют­ся гре­хи и во­ца­ря­ют­ся доб­ро­де­те­ли. Она сна­ря­ди­ла Во­ни­фа­тия на Во­сток, где в то вре­мя шло же­сто­кое го­не­ние на хри­сти­ан, и про­си­ла при­вез­ти мо­щи ка­ко­го-ли­бо му­че­ни­ка, чтобы он стал их ру­ко­во­ди­те­лем и по­кро­ви­те­лем. Во­ни­фа­тий на про­ща­ние, сме­ясь, спро­сил; «А что, гос­по­жа, ес­ли я не най­ду мо­щей, а сам по­стра­даю за Хри­ста, при­мешь ли ты мое те­ло с че­стью?» Агла­и­да от­нес­лась се­рьез­но к его сло­вам и уко­ри­ла его в том, что он, от­прав­ля­ясь на свя­тое де­ло, поз­во­ля­ет се­бе воль­но­сти. Во­ни­фа­тий за­ду­мал­ся над ее сло­ва­ми и всё вре­мя пу­ти был со­сре­до­то­чен­ным.

При­е­хав в Ки­ли­кию, в го­род Тарс, Во­ни­фа­тий оста­вил в го­сти­ни­це сво­их спут­ни­ков и по­шел на го­род­скую пло­щадь, где му­чи­ли хри­сти­ан. По­тря­сен­ный зре­ли­щем страш­ных пы­ток, ви­дя про­свет­лен­ные бла­го­да­тью Гос­под­ней ли­ца свя­тых му­че­ни­ков, Во­ни­фа­тий по вле­че­нию сво­е­го со­стра­да­тель­но­го серд­ца бро­сил­ся к ним, це­ло­вал им но­ги и про­сил свя­тых мо­литв, чтобы и ему удо­сто­ить­ся по­стра­дать с ни­ми. То­гда су­дья спро­сил Во­ни­фа­тия, кто он. Во­ни­фа­тий от­ве­тил: «Я хри­сти­а­нин», – а за­тем от­ка­зал­ся при­не­сти жерт­ву идо­лам. Его тут же пре­да­ли на му­че­ния: би­ли так, что мя­со от­па­да­ло от ко­стей, вон­за­ли иг­лы под ног­ти, на­ко­нец, вли­ли в гор­ло рас­плав­лен­ное оло­во, но си­лой Гос­под­ней он остал­ся невре­дим. Окру­жав­шие су­ди­ли­ще лю­ди при­шли в воз­му­ще­ние, они ста­ли бро­сать в су­дью кам­ни, а за­тем устре­ми­лись к язы­че­ско­му ка­пи­щу, чтобы низ­верг­нуть идо­лов. На сле­ду­ю­щее утро, ко­гда вол­не­ния несколь­ко за­тих­ли, су­дья рас­по­ря­дил­ся бро­сить свя­то­го му­че­ни­ка в ко­тел с ки­пя­щей смо­лой, но и это не при­чи­ни­ло стра­даль­цу ни­ка­ко­го вре­да: его оро­сил со­шед­ший с небес Ан­гел, а смо­ла вы­ли­лась из кот­ла, вспых­ну­ла и обо­жгла са­мих му­чи­те­лей. То­гда свя­той Во­ни­фа­тий был при­го­во­рен к усе­че­нию ме­чом. Из ра­ны ис­тек­ли кровь и мо­ло­ко; ви­дя та­кое чу­до, око­ло 550 че­ло­век уве­ро­ва­ли во Хри­ста.

Меж­ду тем спут­ни­ки свя­то­го Во­ни­фа­тия, на­прас­но про­ждав его два дня в го­сти­ни­це, ста­ли его разыс­ки­вать, пред­по­ла­гая, что он пре­дал­ся лег­ко­мыс­лен­но­му вре­мя­пре­про­вож­де­нию. Сна­ча­ла по­ис­ки бы­ли без­успеш­ны, но, на­ко­нец, они встре­ти­ли че­ло­ве­ка, быв­ше­го оче­вид­цем му­че­ни­че­ской смер­ти свя­то­го. Этот сви­де­тель и при­вел их ту­да, где еще ле­жа­ло обез­глав­лен­ное те­ло. Спут­ни­ки свя­то­го Во­ни­фа­тия со сле­за­ми про­си­ли у него про­ще­ния за непо­доб­ные мыс­ли о нем и, вы­ку­пив за боль­шие день­ги остан­ки му­че­ни­ка, при­вез­ли их в Рим.

На­ка­нуне их при­бы­тия Агла­и­де во сне явил­ся Ан­гел и ве­лел ей при­го­то­вить­ся при­нять быв­ше­го ра­ба ее, а те­перь гос­по­ди­на и по­кро­ви­те­ля, со­слу­жи­те­ля Ан­ге­лов. Агла­и­да при­зва­ла кли­ри­ков, с ве­ли­ким по­че­том при­ня­ла чест­ные мо­щи, а за­тем по­стро­и­ла на ме­сте его по­гре­бе­ния храм во имя свя­то­го му­че­ни­ка и по­ло­жи­ла там мо­щи, про­сла­вив­ши­е­ся мно­же­ством чу­дес. Раз­дав ни­щим всё свое име­ние, она уда­ли­лась в мо­на­стырь, где про­ве­ла в по­ка­я­нии во­сем­на­дцать лет и при жиз­ни стя­жа­ла чу­дес­ный дар из­го­нять нечи­стых ду­хов. По­хо­ро­ни­ли свя­тую близ мо­ги­лы му­че­ни­ка Во­ни­фа­тия.


См. так­же: "Стра­да­ния свя­то­го му­че­ни­ка Во­ни­фа­тия" в из­ло­же­нии свт. Ди­мит­рия Ро­стов­ско­го.