Акафист святому преподобному Алексию, человеку Божию

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 30 марта (17 марта ст. ст.)

Утвержден для общецерковного использования.

Конда́к 1.

Избра́нный уго́дниче Христо́в, свы́ше нарече́нный челове́че Бо́жий, свя́те Алекси́е, похва́льное пе́ние прино́сим ти́, любо́вию чту́щии твоя́ по́двиги, терпе́ние и многострада́ние, и́миже Бо́гу угоди́л еси́ и яви́лся еси́ равноа́нгелен на земли́; ты́ же, я́ко име́яй дерзнове́ние ко Го́споду, моли́твами твои́ми от вся́ких на́с бе́д свобожда́й, да зове́м ти́:

Ра́дуйся, челове́че Бо́жий Алекси́е, моли́твенниче о душа́х на́ших.

И́кос 1.

А́нгел земны́й и челове́к небе́сный бы́л еси́, Алекси́е блаже́нне, от млады́х бо ле́т жития́ твоего́ чистоту́ души́ и те́ла соблю́л еси́ и Христу́ любо́вию усе́рдною после́довал еси́, Его́же взыску́я, вся́ кра́сная ми́ра сего́ оста́вил еси́ и дости́гл еси́ соверше́нства духо́внаго. Сего́ ра́ди слы́шиши от на́с сия́ достодо́лжныя тебе́ похвалы́:

Ра́дуйся, ве́тхаго Ри́ма рожде́ние; ра́дуйся, безча́дных роди́телей непло́дия разреше́ние.

Ра́дуйся, моли́тв усе́рдных пло́д богодарова́нный; ра́дуйся, от младе́нчества на богоугожде́ние свы́ше предызбра́нный.

Ра́дуйся, в стра́се Бо́жием до́бре воспита́нный; ра́дуйся, Зако́ну Госпо́дню ве́рно науче́нный.

Ра́дуйся, о небе́сных па́че, не́же о земны́х, помышля́вый; ра́дуйся, самоотверже́ние чу́дное показа́вый.

Ра́дуйся, чистоту́ де́вственную Христа́ ра́ди непоро́чно сохрани́вый; ра́дуйся, обру́чницу, красото́ю цвету́щую, Иису́са ра́ди оста́вивый.

Ра́дуйся, му́дрый стра́нниче, оте́чества го́рняго взыска́вый; Ра́дуйся. Бо́жий избра́нниче, вся́ прило́ги ми́ра, пло́ти и диа́вола победи́вый.

Ра́дуйся, челове́че Бо́жий Алекси́е, моли́твенниче о душа́х на́ших.

Конда́к 2.

Ви́дев непостоя́нство красо́т ми́ра сего́, тле́нию прича́стных, Алекси́е богому́дре, возлюби́л еси́ бла́га нетле́нная ве́чная, Христо́м обетова́нная во Ева́нгелии ве́рным рабо́м Его́; сего́ ра́ди до́м роди́телей твои́х и все́ бога́тство и́х оста́вил еси́, нищету́ же во́льную избра́л еси́, да Христу́ уго́ден бу́деши и возмо́жеши невозбра́нно пе́ти Ему́: Аллилу́иа.

И́кос 2.

Разуме́л еси́ до́бре, Алекси́е блаже́нне, я́ко живя́ в ми́ре, в супру́жестве и бога́тстве, неудо́бь обря́щеши спасе́ние; те́мже торжеству́ бра́чному приспе́вшу, ты́ бра́ка внеза́пно уклони́лся еси́, предпочита́я в де́вственней чистоте́ Бо́гу благоугожда́ти. О се́м диви́мся и тебе́ зове́м хвале́бно:

Ра́дуйся, Христо́в люби́телю, мре́жею любве́ к ми́ру сему́ неуловле́нный; ра́дуйся, Иису́сов после́дователю, пло́ти угожде́ния избежа́вый.

Ра́дуйся, высото́ю по́двига твоего́ А́нгелы удиви́вый; ра́дуйся, кре́постию произволе́ния твоего́ де́моны посрами́вый.

Ра́дуйся, гра́д оте́чествия твоего́ оста́вивый, да Вы́шняго Гра́да насле́дие обря́щеши; ра́дуйся, в пу́ть дале́кий и многоско́рбный потеки́й, да пути́ спаси́тельнаго прича́стник бу́деши.

Ра́дуйся, нищету́ самоизво́льную себе́ усво́ивый; ра́дуйся, гла́дом и жа́ждею мно́гажды томи́мый.

Ра́дуйся, в моли́твах денноно́щных пребыва́вый; ра́дуйся, слеза́ми умиле́ния лице́ твое́ ороша́вый.

Ра́дуйся, терпе́ния сто́лпе непоколеби́мый; ра́дуйся, ве́ры адама́нте кре́пкий.

Ра́дуйся, челове́че Бо́жий Алекси́е, моли́твенниче о душа́х на́ших.

Конда́к 3.

Си́лою Бо́жиею укрепле́нный, пу́ть дале́кий соверши́л еси́ и гра́да Еде́са дости́гл еси́, Алекси́е достохва́льне, в не́мже, я́ко еди́н от ни́щих, пребыва́л еси́ в злострада́нии и нищете́, ко хра́му Бо́жию вы́ну примета́яся и моли́твы усе́рдныя со мно́гими слеза́ми принося́ Христу́, Царю́ и Бо́гу, зовы́й: Аллилу́иа.

И́кос 3.

Име́л еси́, свя́тче Бо́жий, не́бо покро́вом и зе́млю одро́м упокое́ния, ру́бища же убо́гая одея́нием многоподви́жному твоему́ те́лу, зно́ем опаля́ему и мра́зом померза́ему, ему́же ни ма́лаго угожде́ния не попуска́л еси́, да не возоблада́ет пло́ть над ду́хом твои́м, любо́вию ко Го́споду пламене́вшим. В такове́м по́двизе твое́м еди́но утеше́ние Христа́ име́л еси́, И́же и на́м внуша́ет вопи́ти тебе́:

Ра́дуйся, от за́пада на восто́к прише́дый взыска́ти Со́лнца Пра́вды, Све́т Невече́рний; ра́дуйся, Того́ во глубине́ твоего́ боголюби́ваго се́рдца обреты́й.

Ра́дуйся, свети́льниче Боже́ственнаго сия́ния, ми́ра концы́ озари́вый; ра́дуйся, твои́ми христопосле́довательными стопа́ми Еде́с освяти́вый.

Ра́дуйся, пра́вило ве́ры и́стинныя; ра́дуйся, о́бразе нищеты́ духо́вныя.

Ра́дуйся, в душе́ твое́й доброде́тели высо́кия возрасти́вый; ра́дуйся, целому́дрия сокро́вище драго́е сохрани́вый.

Ра́дуйся, Ева́нгелия Христо́ва до́брый храни́телю; ра́дуйся, за́поведей Иису́совых усе́рдный исполни́телю.

Ра́дуйся, на земли́ небе́сно пожи́вый; ра́дуйся, Бо́гу соверше́нно угоди́вый.

Ра́дуйся, челове́че Бо́жий Алекси́е, моли́твенниче о душа́х на́ших.

Конда́к 4.

Бу́рю страсте́й ю́ношеских воздержа́нием укроти́л еси́, свя́те Алекси́е, и посто́м сугу́бым увяди́л еси́ красоту́ лица́ твоего́; те́мже возсия́ в души́ твое́й нетле́нная красота́ благода́тнаго безстра́стия, благоуго́дная красне́йшему па́че сыно́в челове́ческих Христу́, Ему́же во умерщвле́ннем телеси́ сла́дце воспева́л еси́ пе́снь хвалы́ и благодаре́ния: Аллилу́иа.

И́кос 4.

Слы́шав кли́рик це́ркве Еде́сския в виде́нии гла́с от ико́ны Богома́тере, челове́ком Бо́жиим тя́ нарица́ющ, досто́йным Ца́рствия Небе́снаго, его́же моли́тва, я́ко кади́ло благово́нное, восхо́дит пред Лице́ Бо́жие, и повелева́ющ ввести́ тя вну́трь це́ркве от притво́ра, иде́же ни́щетно пребыва́л еси́, удиви́ся зело́ такове́й свя́тости твое́й, Алекси́е богоблаже́нне, и вве́д тя́ в це́рковь Госпо́дню, ублажа́ше тя́ зва́нии си́ми:

Ра́дуйся, Ду́ха Свята́го жили́ще, преукра́шенное чистото́ю; ра́дуйся, Бо́жия благода́ти прия́телище, сия́ющее доброде́телей красото́ю.

Ра́дуйся, Бо́жия Ма́тере словесы́ похвале́нный; ра́дуйся, Цари́цею небесе́ и земли́ челове́ком Бо́жиим наименова́нный.

Ра́дуйся, и́мя но́вое и та́инственное от Влады́чицы ми́ра получи́вый; ра́дуйся, смире́нием высо́кая стяжа́вый.

Ра́дуйся, нището́ю бога́тство нетле́нное сниска́вый; ра́дуйся, по́честь вы́шняго зва́ния досто́йно восприя́вый.

Ра́дуйся, моли́тв благоприя́тное кади́ло; ра́дуйся, Ца́рствия Го́рняго ре́вностный иска́телю.

Ра́дуйся, в притво́ре церко́внем дни́ и но́щи моли́твенно провожда́вый; ра́дуйся, вну́трь хра́ма Бо́жия повеле́нием Богома́тере че́стно введе́нный.

Ра́дуйся, челове́че Бо́жий Алекси́е, моли́твенниче о душа́х на́ших.

Конда́к 5.

Боготе́чней звезде́ уподо́бился еси́, Алекси́е свя́те, егда́ избега́я сла́вы челове́ческия, от Еде́са удали́лся еси́ во ины́я страны́, оба́че Бо́жиим Про́мыслом кора́бль, на не́мже плы́л еси́, ко оте́чественному твоему́ гра́ду Ри́му принесе́ся. Ты́ же, позна́в в се́м во́лю Госпо́дню та́мо тебе́ подвиза́тися, прите́кл еси́ к до́му роди́телей твои́х, и я́ко еди́н от ни́щих, у вра́т его́ водвори́лся еси́, слеза́ми омыва́я лице́ твое́ и вопия́ ко Го́споду: Аллилу́иа.

И́кос 5.

Ви́дев тя́ боголюби́вый роди́тель тво́й, свя́те Алекси́е, стра́нна и ни́ща о́бразом, милосе́рдова о тебе́ и хи́жину ма́лу повеле́ сооруди́ти тебе́ у вра́т своего́ до́ма, в не́йже пита́ше тя́ Христа́ ра́ди, отню́д не познава́я в тебе́ своего́ сы́на; ты́ же, ни́щетно в до́ме роди́тельстем пребыва́я, вся́кую ну́жду стра́нническую и поноше́ние ни́щенское претерпе́л еси́, подвиза́я ны́ благохвали́ти тя́ си́це:

Ра́дуйся, му́жество вели́кое показа́вый; ра́дуйся, в терпе́нии мно́зем преуспе́вый.

Ра́дуйся, в до́ме роди́телей твои́х незна́емь пребыва́вый; ра́дуйся, ско́рбь и́х о лише́нии твое́м всегда́ созерца́вый.

Ра́дуйся, се́тования отца́ твоего́ слы́шавый; ра́дуйся, сле́зы ма́тере твоея́ ви́девый.

Ра́дуйся, пла́ч обру́чницы твоея́ позна́вый; ра́дуйся, се́рдце твое́ си́ми боле́зненно уязвля́вый.

Ра́дуйся, поноше́ния и укори́зны от слу́г роди́телей твои́х незло́бно восприя́вый; ра́дуйся, бие́ния и зауше́ния от ни́х молчали́во переноси́вый.

Ра́дуйся, за оби́девшия тя́ непреста́нно Бо́га умоля́вый; ра́дуйся, самоизво́лен му́ченик вои́стину бы́вый.

Ра́дуйся, челове́че Бо́жий Алекси́е, моли́твенниче о душа́х на́ших.

Конда́к 6.

Пропове́дник ева́нгельския кро́тости бы́л еси́, свя́те Алекси́е, о́бразом жития́ твоего́ многотерпели́ваго все́м показу́яй, я́ко вся́ возмо́жна челове́ку о укрепля́ющем Бо́зе, Его́же си́лою в немощне́й пло́ти вели́кия по́двиги соверши́л еси́ и мно́гия страда́ния претерпе́л еси́ любве́ ра́ди Христо́вы, досто́йно и пра́ведно воспева́я Пресвяте́й Тро́ице Серафи́мскую пе́снь: Аллилу́иа.

И́кос 6.

Возсия́л еси́ в дре́внем Ри́ме необыча́йными по́двиги твои́ми, Алекси́е блаже́нне, и си́ми озари́л еси́ благода́тно всю́ Це́рковь Христо́ву: кто́ бо не умили́тся, слы́ша твое́ пачеесте́ственное терпе́ние и мно́гая злострада́ния, в до́ме роди́телей твои́х восприя́тая самоизво́льно, и ка́ко, насле́дник сы́й того́ до́ма, от слу́г его́ укори́зны и ра́ны преноси́л еси́ ра́достно. Сего́ ра́ди прино́сим ти́ от усе́рдия на́шего сия́ песноглаше́ния:

Ра́дуйся, вели́кий уго́дниче Христо́в, в ми́ре преми́рно пожи́вый; ра́дуйся, равноа́нгельный слуго́ Госпо́день, многоболе́зненно жи́знь твою́ препроводи́вый.

Ра́дуйся, безче́стие в сла́ву себе́ вмени́вый; ра́дуйся, ра́ны на те́ле твое́м терпели́во носи́вый.

Ра́дуйся, лани́ты твоя́ от зауше́ний не уклони́вый; ра́дуйся, плещи́ твоя́ на ударе́ния преда́вый.

Ра́дуйся, оплева́ния христоподража́тельно принима́вый; ра́дуйся, молча́нием на укори́зны отвеща́вый.

Ра́дуйся, во Христе́ утеше́ние еди́но обреты́й; ра́дуйся, воспомина́нием кре́стных страда́ний Иису́совых ско́рби твоя́ услажда́вый.

Ра́дуйся, великоду́шный многострада́льче; ра́дуйся, добропобе́дный подви́жниче.

Ра́дуйся, челове́че Бо́жий Алекси́е, моли́твенниче о душа́х на́ших.

Конда́к 7.

Хоте́ние еди́но име́л еси́, челове́че Бо́жий, е́же благоугожда́ти Бо́гу; те́мже вся́ вре́менная в уме́ты вмени́л еси́, и насле́дник мно́гаго бога́тства бы́в, сие́ оста́вил еси́, ни́щ и стра́нен пребыва́я, в роди́тельстем до́ме непознава́ем и зело́ уничижа́ем, при́сно воздыха́я ко Го́споду и сле́зно моля́ся, да сподо́бит тя́ в стране́ блаже́нства ве́чнаго пе́ти Ему́ со святы́ми: Аллилу́иа.

И́кос 7.

Но́во и необыча́йно тече́ние соверши́л еси́ жития́ твоего́, свя́те Алекси́е, среди́ ми́ра чу́ждо мирски́х пристра́стий и вся́кия скве́рны грехо́вныя; те́мже прия́л еси́ в души́ твое́й богове́дения да́р соверше́н и бы́л еси́ одушевле́нный хра́м Трисия́ннаго Божества́, в не́мже Христо́с со Отце́м и Ду́хом оби́тель Себе́ сотвори́, на́с же научи́ зва́ти тебе́:

Ра́дуйся, А́нгелов подо́бниче и челове́ков красото́; ра́дуйся, ри́зу душе́вную де́вства чистото́ю убели́вый.

Ра́дуйся, в ра́дость Го́спода твоего́ вше́дый; ра́дуйся, доброво́льною нището́ю превозвы́шенный.

Ра́дуйся, терпе́нием твои́м с многострада́льным И́овом сравни́выйся; ра́дуйся, уничиже́нием твои́м ева́нгельскому Ла́зарю подража́вый.

Ра́дуйся, боле́зньми мно́гими здра́вие души́ стяжа́вый; ра́дуйся, страда́ньми неисче́тными Ца́рствие Христо́во приобреты́й.

Ра́дуйся, ве́тхаго Ри́ма благода́тное обновле́ние; ра́дуйся, Це́ркве Христо́вы Боже́ственное удобре́ние.

Ра́дуйся, обетова́ний Иису́совых насле́дниче; ра́дуйся, Пресвяты́я Тро́ицы таи́нниче.

Ра́дуйся, челове́че Бо́жий Алекси́е, моли́твенниче о душа́х на́ших.

Конда́к 8.

Стра́нник и пришле́ц, бы́л еси́ во гра́де оте́чествия твоего́, свя́те, вы́ну взыску́я Вы́шняго Гра́да, Иерусали́ма Небе́снаго; егда́же приспе́ вре́мя отше́ствия твоего́ к Бо́гу, ты́ на хартии́ та́йну жития́ твоего́ начерта́л еси́, в позна́ние твои́м роди́телем, и неосла́бно пребыва́л еси́ в по́двизех поста́ и моли́твы, приуготовля́яся ко исхо́ду умиле́нным пе́нием Бо́гу: Аллилу́иа.

И́кос 8

Ве́сь в Бо́зе бы́в, Алекси́е свя́те, моли́тве бы́вшей на уста́х твои́х, преда́л еси́ пра́ведную ду́шу твою́ в ру́це Бо́жии ми́рно и безмяте́жно, я́ко усну́л еси́; сме́рть бо тебе́ вои́стину упокое́ние бы́сть от страда́ний и подвиго́в непреста́нных, и прохожде́ние от ху́ждшаго на лу́чшее. О такове́м блаже́ннем успе́нии твое́м мы́ ра́дующеся, сия́ прикла́дныя тебе́ прино́сим глаго́лы:

Ра́дуйся, свя́тче Бо́жий, свя́то и пра́ведно жи́знь земну́ю соверши́вый; ра́дуйся, во благоуха́нии святы́ни сно́м сме́ртным опочи́вый.

Ра́дуйся, на ло́но Авраа́ма А́нгелы несе́нный; ра́дуйся, пе́нием неземны́м от святы́х Небожи́телей встре́ченный.

Ра́дуйся, венце́м безсме́ртныя жи́зни от Го́спода увенча́нный; ра́дуйся, во оби́тели ра́йския со сла́вою восприя́тый.

Ра́дуйся, Пресве́тлое Лице́ Влады́ки Христа́ вы́ну созерца́яй; ра́дуйся, Пресвяте́й Тро́ице Трисвяту́ю пе́снь немо́лчно возглаша́яй.

Ра́дуйся, Созда́теля го́рних и до́льних моли́твами твои́ми умилостивля́яй; ра́дуйся, ве́сь ми́р христиа́нский предста́тельством твои́м объе́мляй.

Ра́дуйся, А́нгелов и челове́ков ра́дование; ра́дуйся, почита́ющим святу́ю па́мять твою́ ве́рный хода́таю.

Ра́дуйся, челове́че Бо́жий Алекси́е, моли́твенниче о душа́х на́ших.

Конда́к 9.

Вси́ лю́дие ри́мстии в тре́пет приидо́ша, слы́шавше гла́с в собо́рней це́ркви гра́да своего́, во вре́мя Боже́ственныя литурги́и свы́ше от олтаря́ глаго́лющ и повелева́ющ поиска́ти тя́, челове́че Бо́жий, да моли́тв твои́х сподо́бятся. Те́мже во удивле́нии и у́жасе бы́вше, моли́твенно возопи́ша они́ ко Го́споду, да яви́т и́м тебе́, Своего́ избра́нника, зову́ще ди́вному во святы́х Свои́х Влады́це: Аллилу́иа.

И́кос 9.

Вети́йство челове́ческое не довле́ет к похвале́нию тебе́, свя́те Алекси́е, свы́ше похвале́нному Гла́сом Боже́ственным, Его́же извеще́нием лю́дие ри́мстии обрето́ша тя́, ме́ртва лежа́ща на одре́, с хартие́ю на лице́, е́же сия́ше солнцеподо́бными луча́ми, и благоуха́ние ве́лие исхожда́ше от многоподви́жнаго твоего́ телесе́. Те́мже обре́тением твои́м обра́довани, ца́рь, святи́тель и ве́сь наро́д возгласи́ша тебе́:

Ра́дуйся, све́тлый луче́ Трисо́лнечнаго Све́та, оживля́ющаго ве́сь ми́р; ра́дуйся, денни́це, возше́дшая просвеща́ти Це́рковь Христо́ву мно́гими чудесы́.

Ра́дуйся, свя́тости и чистоты́ кри́не благоуха́нный; ра́дуйся, дарова́ний Боже́ственных сокро́вище.

Ра́дуйся, роди́телем твои́м хартие́ю себе́ яви́вый; ра́дуйся, пла́ч и́х го́рестный на сла́достный преложи́вый.

Ра́дуйся, седи́ны отца́ твоего́ прославле́нием твои́м просла́вивый; ра́дуйся, сле́зы ма́тере твоея́ благода́тно вознагради́вый.

Ра́дуйся, честну́ю обру́чницу твою́, ве́рность тебе́ сохра́ншую, духо́вно уте́шивый; ра́дуйся, ве́сь наро́д ри́мский обре́тением твои́м зело́ возвесели́вый.

Ра́дуйся, исцеле́ния чуде́сная от святы́х моще́й твои́х оби́льно источи́вый; ра́дуйся, на небеси́ и на земли́ по́честь посме́ртную досто́йно восприя́вый.

Ра́дуйся, челове́че Бо́жий Алекси́е, моли́твенниче о душа́х на́ших.

Конда́к 10.

Спасти́ся хотя́щим приме́р благи́й житие́ твое́, свя́те Алекси́е, и́мже вся́ ны́ поуча́еши отреша́тися суе́т ми́ра, иска́ти же еди́но на потре́бу, е́же е́сть богоугожде́ние. Помози́ у́бо на́м, челове́че Бо́жий, в се́м тебе́ подража́ти, укрепи́ немощно́е произволе́ние на́ше, вдохни́ в на́с му́жество душе́вное, украси́ на́с доброде́тельми и яви́ бы́ти насле́дники Ца́рствия Небе́снаго, да с тобо́ю на земли́ живы́х воспое́м Созда́телю на́шему: Аллилу́иа.

И́кос 10.

Царя́ Небе́снаго Христа́ ве́рный после́дователь бы́л еси́, Алекси́е блаже́нне, Его́же Стра́шному Престо́лу ны́не предстои́ши во сла́ве небе́сней, о не́йже мы́, земни́и и пе́рстнии, ниже́ помы́слити мо́жем; оба́че любо́вию усе́рдною к тебе́ понужда́еми, мы́сленно созерца́ем тя́, горе́ за ны́ моля́щагося пред лице́м Бо́жиим, и бре́нными усты́ возсыла́ем ти́ пе́ние таково́е:

Ра́дуйся, ве́рно чту́щим тя́ ско́рый помо́щниче; ра́дуйся, моли́твенно призыва́ющих тя́ усе́рдный засту́пниче.

Ра́дуйся, пра́ведниче Госпо́день, Его́же Пра́вда возсия́ немерца́емо; ра́дуйся, со́ль земли́, я́же никогда́же обуя́ет.

Ра́дуйся, до́брыми де́лы твои́ми Бо́га просла́вивый и челове́ки удиви́вый; ра́дуйся, житие́м твои́м А́нгелы возвесели́вый и ду́хи тьмы́ посрами́вый.

Ра́дуйся, Го́рняго Ми́ра украше́ние; ра́дуйся, до́льняго ми́ра защище́ние.

Ра́дуйся, Ри́ма сла́во и похвало́; ра́дуйся, христиа́нскаго ро́да возвыше́ние.

Ра́дуйся, в чудесе́х просия́вый; ра́дуйся, в ми́лостех неистощи́мый.

Ра́дуйся, челове́че Бо́жий Алекси́е, моли́твенниче о душа́х на́ших.

Конда́к 11.

Пе́ние надгро́бное со сла́вою тебе́ сотвори́ша, свя́те Алекси́е, ца́рь, святи́тель и ве́сь наро́д ри́мский, роди́телем твои́м и обру́чнице твое́й, возсле́дующим честно́му твоему́ гро́бу, несе́нному благоле́пно в собо́рную це́рковь, от него́же чуде́с мно́жество источи́л еси́: слепи́и прозира́ху, разсла́бленнии укрепля́хуся, неду́жнии здра́ви быва́ху прикоснове́нием к моще́м твои́м святы́м, во е́же все́м ви́дящим такова́я возглаша́ти Бо́гу: Аллилу́иа.

И́кос 11.

Све́тло и ра́достно бы́сть погребе́ние твое́, челове́че Бо́жий, све́тел бо лице́м возлежа́л еси́ во гро́бе и благоуха́ние сла́достное испуща́л еси́ от нетле́ннаго твоего́ телесе́, си́ми зна́менуя све́тлость немерца́ющую святы́я твоея́ души́, в воню́ благоуха́ния Христо́ва прите́кшия и ми́ра Боже́ственнаго преиспо́лненныя, от ея́же полноты́ и в на́ша ду́ши пода́ждь дая́ние благода́тное, да со утеше́нием духо́вным тебе́ возопие́м:

Ра́дуйся, свеще́ неугаси́мая, в моли́твах к Бо́гу горе́ возжже́нная; ра́дуйся, лампа́до злата́я, еле́ем ми́лости до́лу живу́щих умаща́ющая.

Ра́дуйся, алава́стре драги́й, ми́ро целе́бное боля́щим источа́яй; ра́дуйся, реко́ многово́дная чуде́с.

Ра́дуйся, и́ночествующим наста́вниче до́браго по́двига; ра́дуйся, в ми́ре живу́щим о́бразе богоугожде́ния.

Ра́дуйся, зерца́ло чи́стое пра́веднаго жития́; ра́дуйся, приста́нище благооти́шное по Бо́зе упова́ние на тя́ возложи́вших.

Ра́дуйся, враго́в неви́димых кре́пкий противобо́рче; ра́дуйся, и́щущим спасе́ния душе́внаго благи́й споспе́шниче.

Ра́дуйся, от небе́сных высо́т к земноро́дным ми́лостивно приника́яй; ра́дуйся, чту́щих тя́ проше́ния ско́ро исполня́яй.

Ра́дуйся, челове́че Бо́жий Алекси́е, моли́твенниче о душа́х на́ших.

Конда́к 12.

Благода́ть и ми́лость испроси́ на́м у Христа́, Царя́ и Бо́га на́шего, Алекси́е достохва́льне; ве́мы бо, я́ко мно́го мо́жет моли́тва твоя́ пред Лице́м Его́, и благоуве́тливо преклоня́ется О́н к моле́нию твоему́. Те́мже усе́рдно к тебе́ прибега́ем и смире́нно про́сим: окорми́ на́с предста́тельством твои́м в ти́хое приста́нище Христо́во и сподо́би наслажда́тися нетле́нныя ра́дости святы́х, немо́лчно вопию́щих славосло́вия пе́снь Триеди́ному Бо́гу: Аллилу́иа.

И́кос 12.

Пою́ще по́двиги многострада́льнаго и преди́внаго жития́ твоего́, челове́че Бо́жий, хва́лим, сла́вим и ублажа́ем тя́ усе́рдною любо́вию, я́ко небе́снаго многомо́щнаго предста́теля на́шего; ты́ же, свя́те, да́нною ти́ свы́ше благода́тию на́с, гре́шных и мра́чных, освяти́, просвети́ и наста́ви вопи́ти тебе́ неосужде́нно:

Ра́дуйся, восто́ка незаходи́маго присносия́ющая заре́; ра́дуйся, вселе́нную твои́ми чудесы́ испо́лнивый.

Ра́дуйся, моща́ми твои́ми пресла́вно чудотворя́й; ра́дуйся, образми́ подо́бия твоего́ преди́вная соверша́яй.

Ра́дуйся, боля́щих безме́здный врачу́; ра́дуйся, скорбя́щих благи́й уте́шителю.

Ра́дуйся, уныва́ющих благода́тное ободре́ние; ра́дуйся, изнемога́ющих внеза́пное укрепле́ние.

Ра́дуйся, бе́дствующим на по́мощь ускоря́яй; ра́дуйся, от жития́ отходя́щим заступле́ние твое́ многомо́щное явля́яй.

Ра́дуйся, ра́дости духо́вныя боголюби́вым душа́м пода́телю; ра́дуйся, бла́г вре́менных и ве́чных усе́рдный на́м у Го́спода проси́телю.

Ра́дуйся, челове́че Бо́жий Алекси́е, моли́твенниче о душа́х на́ших.

Конда́к 13.

О святы́й и богопросла́вленный челове́че Бо́жий Алекси́е! Тебе́, горе́ за ны́ моля́щемуся пред Престо́лом Го́спода Сла́вы, мы́ гре́шнии, до́лу живу́щии, сие́ ма́лое принося́ще пе́ние, мо́лимся от всея́ души́ и от всего́ помышле́ния: моли́твами твои́ми испроси́ на́м у Христа́ Бо́га проще́ние согреше́ний и по кончи́не на́шея жи́зни прия́тие в блаже́нныя оби́тели Небе́снаго Ца́рствия, да с тобо́ю во ве́ки пое́м Ему́: Аллилу́иа.

Этот конда́к чита́ется три́жды, зате́м и́кос 1 и конда́к 1

И́кос 1.

А́нгел земны́й и челове́к небе́сный бы́л еси́, Алекси́е блаже́нне, от млады́х бо ле́т жития́ твоего́ чистоту́ души́ и те́ла соблю́л еси́ и Христу́ любо́вию усе́рдною после́довал еси́, Его́же взыску́я, вся́ кра́сная ми́ра сего́ оста́вил еси́ и дости́гл еси́ соверше́нства духо́внаго. Сего́ ра́ди слы́шиши от на́с сия́ достодо́лжныя тебе́ похвалы́:

Ра́дуйся, ве́тхаго Ри́ма рожде́ние; ра́дуйся, безча́дных роди́телей непло́дия разреше́ние.

Ра́дуйся, моли́тв усе́рдных пло́д богодарова́нный; ра́дуйся, от младе́нчества на богоугожде́ние свы́ше предызбра́нный.

Ра́дуйся, в стра́се Бо́жием до́бре воспита́нный; ра́дуйся, Зако́ну Госпо́дню ве́рно науче́нный.

Ра́дуйся, о небе́сных па́че, не́же о земны́х, помышля́вый; ра́дуйся, самоотверже́ние чу́дное показа́вый.

Ра́дуйся, чистоту́ де́вственную Христа́ ра́ди непоро́чно сохрани́вый; ра́дуйся, обру́чницу, красото́ю цвету́щую, Иису́са ра́ди оста́вивый.

Ра́дуйся, му́дрый стра́нниче, оте́чества го́рняго взыска́вый; Ра́дуйся. Бо́жий избра́нниче, вся́ прило́ги ми́ра, пло́ти и диа́вола победи́вый.

Ра́дуйся, челове́че Бо́жий Алекси́е, моли́твенниче о душа́х на́ших.

Конда́к 1.

Избра́нный уго́дниче Христо́в, свы́ше нарече́нный челове́че Бо́жий, свя́те Алекси́е, похва́льное пе́ние прино́сим ти́, любо́вию чту́щии твоя́ по́двиги, терпе́ние и многострада́ние, и́миже Бо́гу угоди́л еси́ и яви́лся еси́ равноа́нгелен на земли́; ты́ же, я́ко име́яй дерзнове́ние ко Го́споду, моли́твами твои́ми от вся́ких на́с бе́д свобожда́й, да зове́м ти́:

Ра́дуйся, челове́че Бо́жий Алекси́е, моли́твенниче о душа́х на́ших.

Моли́тва пе́рвая.

О вели́кий Христо́в уго́дниче, святы́й челове́че Бо́жий Алекси́е, душе́ю на небеси́ Престо́лу Госпо́дню предстоя́й, на земли́ же да́нною ти́ свы́ше благода́тию разли́чная соверша́яй чудеса́! При́зри ми́лостивно на предстоя́щия святе́й ико́не твое́й лю́ди, умиле́нно моля́щияся и прося́щия от тебе́ по́мощи и заступле́ния. Простри́ моли́твенно ко Го́споду Бо́гу честни́и ру́це твои́ и испроси́ на́м от Него́ оставле́ние согреше́ний на́ших во́льных и нево́льных, в неду́зех стра́ждущим исцеле́ние, напа́ствуемым заступле́ние, скорбя́щим утеше́ние, бе́дствующим ско́рую по́мощь, все́м же чту́щим тя́ ми́рную и христиа́нскую живота́ кончи́ну и до́брый отве́т на Стра́шнем Суде́ Христо́ве. Е́й, свя́тче Бо́жий, не посрами́ упова́ния на́шего, е́же на тя́ по Бо́зе и Богоро́дице возлага́ем, но бу́ди на́м помо́щник и покрови́тель во спасе́ние, да твои́ми моли́твами получи́вше благода́ть и ми́лость от Го́спода, просла́вим человеколю́бие Отца́ и Сы́на и Свята́го Ду́ха, в Тро́ице сла́вимаго и покланя́емаго Бо́га, и твое́ свято́е заступле́ние ны́не и при́сно, и во ве́ки веко́в. Ами́нь.

А҆ка́ѳїстъ прпⷣбномꙋ а҆леѯі́ю, человѣ́кꙋ бж҃їю.

Конда́къ а҃.

И҆збра́нный ᲂу҆го́дниче хрⷭ҇то́въ, свы́ше нарече́нный чл҃вѣ́че бж҃їй, ст҃е а҆леѯі́е, похва́льное пѣ́нїе прино́симъ тѝ, любо́вїю чтꙋ́щїи твоѧ̀ по́двиги, терпѣ́нїе и҆ многострада́нїе, и҆́миже бг҃ꙋ ᲂу҆годи́лъ є҆сѝ и҆ ꙗ҆ви́лсѧ є҆сѝ равноа́гг҃ленъ на землѝ: ты́ же, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, мл҃твами твои́ми ѿ всѧ́кихъ на́съ бѣ́дъ свобожда́й, да зове́мъ тѝ:

Ра́дꙋйсѧ, чл҃вѣ́че бж҃їй а҆леѯі́е, мл҃твенниче ѡ҆ дꙋша́хъ на́шихъ.

І҆́косъ а҃.

А҆́гг҃лъ земны́й и҆ чл҃вѣ́къ нбⷭ҇ный бы́лъ є҆сѝ, а҆леѯі́е бл҃же́нне, ѿ млады́хъ бо лѣ́тъ житїѧ̀ твоегѡ̀ чⷭ҇тотꙋ̀ дꙋшѝ и҆ тѣ́ла соблю́лъ є҆сѝ и҆ хрⷭ҇тꙋ̀ любо́вїю ᲂу҆се́рдною послѣ́довалъ є҆сѝ, є҆го́же взыскꙋ́ѧ, всѧ̑ кра̑снаѧ мі́ра сегѡ̀ ѡ҆ста́вилъ є҆сѝ и҆ дости́глъ є҆сѝ соверше́нства дх҃о́внагѡ. Сегѡ̀ ра́ди слы́шиши ѿ на́съ сїѧ̑ достодо́лжныѧ тебѣ̀ похвалы̑:

Ра́дꙋйсѧ, ве́тхагѡ ри́ма рожде́нїе: ра́дꙋйсѧ, безча́дныхъ роди́телей непло́дїѧ разрѣше́нїе.

Ра́дꙋйсѧ, мл҃твъ ᲂу҆се́рдныхъ пло́дъ бг҃одарова́нный: ра́дꙋйсѧ, ѿ младе́нчества на бг҃оꙋгожде́нїе свы́ше пред̾избра́нный.

Ра́дꙋйсѧ, въ стра́сѣ бж҃їемъ до́брѣ воспита́нный: ра́дꙋйсѧ, зако́нꙋ гдⷭ҇ню вѣ́рнѡ наꙋче́нный.

Ра́дꙋйсѧ, ѡ҆ нбⷭ҇ныхъ па́че, не́же ѡ҆ земны́хъ, помышлѧ́вый: ра́дꙋйсѧ, самоѿверже́нїе чꙋ́дное показа́вый.

Ра́дꙋйсѧ, чистотꙋ̀ дѣ́вственнꙋю хрⷭ҇та̀ ра́ди непоро́чнѡ сохрани́вый: ра́дꙋйсѧ, ѡ҆брꙋ́чницꙋ, красото́ю цвѣтꙋ́щꙋю, і҆и҃са ра́ди ѡ҆ста́вивый.

Ра́дꙋйсѧ, мꙋ́дрый стра́нниче, ѻ҆те́чества го́рнѧгѡ взыска́вый: ра́дꙋйсѧ, бж҃їй и҆збра́нниче, всѧ̀ прилѡ́ги мі́ра, пло́ти и҆ дїа́вола побѣди́вый.

Ра́дꙋйсѧ, чл҃вѣ́че бж҃їй а҆леѯі́е, мл҃твенниче ѡ҆ дꙋша́хъ на́шихъ.

Конда́къ в҃.

Ви́дѣвъ непостоѧ́нство красѡ́тъ мі́ра сегѡ̀, тлѣ́нїю прича́стныхъ, а҆леѯі́е бг҃омꙋ́дре, возлюби́лъ є҆сѝ бл҃га нетлѣ̑ннаѧ вѣ̑чнаѧ, хрⷭ҇то́мъ ѡ҆бѣтова̑ннаѧ во є҆ѵⷢ҇лїи вѣ̑рнымъ рабѡ́мъ є҆гѡ̀: сегѡ̀ ра́ди до́мъ роди́телей твои́хъ и҆ всѐ бога́тство и҆́хъ ѡ҆ста́вилъ є҆сѝ, нищетꙋ̀ же во́льнꙋю и҆збра́лъ є҆сѝ, да хрⷭ҇тꙋ̀ ᲂу҆го́денъ бꙋ́деши и҆ возмо́жеши невозбра́ннѡ пѣ́ти є҆мꙋ̀: А҆ллилꙋ́їа.

І҆́косъ в҃.

Разꙋмѣ́лъ є҆сѝ до́брѣ, а҆леѯі́е бл҃же́нне, ꙗ҆́кѡ живѧ̀ въ мі́рѣ, въ сꙋпрꙋ́жествѣ и҆ бога́тствѣ, неꙋдо́бь ѡ҆брѧ́щеши сп҃се́нїе: тѣ́мже торжествꙋ̀ бра́чномꙋ приспѣ́вшꙋ, ты̀ бра́ка внеза́пнѡ ᲂу҆клони́лсѧ є҆сѝ, предпочита́ѧ въ дѣ́вственнѣй чⷭ҇тотѣ̀ бг҃ꙋ бл҃гоꙋгожда́ти. Ѡ҆ се́мъ диви́мсѧ и҆ тебѣ̀ зове́мъ хвале́бнѡ:

Ра́дꙋйсѧ, хрⷭ҇то́въ люби́телю, мре́жею любвѐ къ мі́рꙋ семꙋ̀ неꙋловле́нный: ра́дꙋйсѧ, і҆и҃совъ послѣ́дователю, пло́ти ᲂу҆гожде́нїѧ и҆збѣжа́вый.

Ра́дꙋйсѧ, высото́ю по́двига твоегѡ̀ а҆́гг҃лы ᲂу҆диви́вый: ра́дꙋйсѧ, крѣ́постїю произволе́нїѧ твоегѡ̀ де́мѡны посрами́вый.

Ра́дꙋйсѧ, гра́дъ ѻ҆те́чествїѧ твоегѡ̀ ѡ҆ста́вивый, да вы́шнѧгѡ гра́да наслѣ́дїе ѡ҆брѧ́щеши: ра́дꙋйсѧ, въ пꙋ́ть дале́кїй и҆ многоско́рбный потекі́й, да пꙋтѝ сп҃си́тельнагѡ прича́стникъ бꙋ́деши.

Ра́дꙋйсѧ, нищетꙋ̀ самоизво́льнꙋю себѣ̀ ᲂу҆сво́ивый: ра́дꙋйсѧ, гла́домъ и҆ жа́ждею мно́гажды томи́мый.

Ра́дꙋйсѧ, въ мл҃твахъ денноно́щныхъ пребыва́вый: ра́дꙋйсѧ, слеза́ми ᲂу҆миле́нїѧ лицѐ твоѐ ѡ҆роша́вый.

Ра́дꙋйсѧ, терпѣ́нїѧ сто́лпе непоколеби́мый: ра́дꙋйсѧ, вѣ́ры а҆дама́нте крѣ́пкїй.

Ра́дꙋйсѧ, чл҃вѣ́че бж҃їй а҆леѯі́е, мл҃твенниче ѡ҆ дꙋша́хъ на́шихъ.

Конда́къ г҃.

Си́лою бж҃їею ᲂу҆крѣпле́нный, пꙋ́ть дале́кїй соверши́лъ є҆сѝ и҆ гра́да є҆де́са дости́глъ є҆сѝ, а҆леѯі́е достохва́льне, въ не́мже, ꙗ҆́кѡ є҆ди́нъ ѿ ни́щихъ, пребыва́лъ є҆сѝ въ ѕлострада́нїи и҆ нищетѣ̀, ко хра́мꙋ бж҃їю вы́нꙋ примета́ѧсѧ и҆ мл҃твы ᲂу҆се́рдныѧ со мно́гими слеза́ми приносѧ̀ хрⷭ҇тꙋ̀, цр҃ю̀ и҆ бг҃ꙋ, зовы́й: А҆ллилꙋ́їа.

І҆́косъ г҃.

И҆мѣ́лъ є҆сѝ, ст҃че бж҃їй, нб҃о покро́вомъ и҆ зе́млю ѻ҆дро́мъ ᲂу҆покое́нїѧ, рꙋ̑бища же ᲂу҆бѡ́гаѧ ѡ҆дѣѧ́нїемъ многоподви́жномꙋ твоемꙋ̀ тѣ́лꙋ, зно́емъ ѡ҆палѧ́емꙋ и҆ мра́зомъ померза́емꙋ, є҆мꙋ́же ни ма́лагѡ ᲂу҆гожде́нїѧ не попꙋска́лъ є҆сѝ, да не воз̾ѡблада́етъ пло́ть над̾ дꙋ́хомъ твои́мъ, любо́вїю ко гдⷭ҇ꙋ пламенѣ́вшимъ. Въ таковѣ́мъ по́двизѣ твое́мъ є҆ди́но ᲂу҆тѣше́нїе хрⷭ҇та̀ и҆мѣ́лъ є҆сѝ, и҆́же и҆ на́мъ внꙋша́етъ вопи́ти тебѣ̀:

Ра́дꙋйсѧ, ѿ за́пада на восто́къ прише́дый взыска́ти со́лнца пра́вды, свѣ́тъ невече́рнїй: ра́дꙋйсѧ, того̀ во глꙋбинѣ̀ твоегѡ̀ бг҃олюби́вагѡ се́рдца ѡ҆брѣты́й.

Ра́дꙋйсѧ, свѣти́льниче бж҃е́ственнагѡ сїѧ́нїѧ, мі́ра концы̀ ѡ҆зари́вый: ра́дꙋйсѧ, твои́ми хрⷭ҇топослѣ́довательными стопа́ми є҆де́съ ѡ҆ст҃и́вый.

Ра́дꙋйсѧ, пра́вило вѣ́ры и҆́стинныѧ: ра́дꙋйсѧ, ѻ҆́бразе нищеты̀ дꙋхо́вныѧ.

Ра́дꙋйсѧ, въ дꙋшѣ̀ твое́й добродѣ̑тели высѡ́кїѧ возрасти́вый: ра́дꙋйсѧ, цѣломꙋ́дрїѧ сокро́вище драго́е сохрани́вый.

Ра́дꙋйсѧ, є҆ѵⷢ҇лїѧ хрⷭ҇то́ва до́брый храни́телю: ра́дꙋйсѧ, за́повѣдей і҆и҃совыхъ ᲂу҆се́рдный и҆сполни́телю.

Ра́дꙋйсѧ, на землѝ нбⷭ҇но пожи́вый: ра́дꙋйсѧ, бг҃ꙋ соверше́ннѡ ᲂу҆годи́вый.

Ра́дꙋйсѧ, чл҃вѣ́че бж҃їй а҆леѯі́е, мл҃твенниче ѡ҆ дꙋша́хъ на́шихъ.

Конда́къ д҃.

Бꙋ́рю страсте́й ю҆́ношескихъ воздержа́нїемъ ᲂу҆кроти́лъ є҆сѝ, ст҃е а҆леѯі́е, и҆ посто́мъ сꙋгꙋ́бымъ ᲂу҆вѧди́лъ є҆сѝ красотꙋ̀ лица̀ твоегѡ̀: тѣ́мже возсїѧ̀ въ дꙋшѝ твое́й нетлѣ́ннаѧ красота̀ бл҃года́тнагѡ безстра́стїѧ, бл҃гоꙋго́днаѧ краснѣ́йшемꙋ па́че сынѡ́въ чл҃вѣ́ческихъ хрⷭ҇тꙋ̀, є҆мꙋ́же во ᲂу҆мерщвле́ннемъ тѣлесѝ сла́дцѣ воспѣва́лъ є҆сѝ пѣ́снь хвалы̀ и҆ бл҃годаре́нїѧ: А҆ллилꙋ́їа.

І҆́косъ д҃.

Слы́шавъ кли́рїкъ цр҃кве є҆де́сскїѧ въ видѣ́нїи гла́съ ѿ і҆кѡ́ны бг҃омт҃ре, чл҃вѣ́комъ бж҃їимъ тѧ̀ нарица́ющъ, досто́йнымъ црⷭ҇твїѧ нбⷭ҇нагѡ, є҆го́же мл҃тва, ꙗ҆́кѡ кади́ло бл҃гово́нное, восхо́дитъ пред̾ лицѣ̀ бж҃їе, и҆ повелѣва́ющъ ввести́ тѧ внꙋ́трь цр҃кве ѿ притво́ра, и҆дѣ́же ни́щетнѡ пребыва́лъ є҆сѝ, ᲂу҆диви́сѧ ѕѣлѡ̀ таковѣ́й ст҃ости твое́й, а҆леѯі́е бг҃обл҃же́нне, и҆ вве́дъ тѧ̀ въ цр҃ковь гдⷭ҇ню, ᲂу҆бл҃жа́ше тѧ̀ зва̑нїи си́ми:

Ра́дꙋйсѧ, дх҃а ст҃а́гѡ жили́ще, преꙋкра́шенное чⷭ҇тото́ю: ра́дꙋйсѧ, бж҃їѧ бл҃года́ти прїѧ́телище, сїѧ́ющее добродѣ́телей красото́ю.

Ра́дꙋйсѧ, бж҃їѧ мт҃ре словесы̑ похвале́нный: ра́дꙋйсѧ, цр҃и́цею нб҃сѐ и҆ землѝ чл҃вѣ́комъ бж҃їимъ наименова́нный.

Ра́дꙋйсѧ, и҆́мѧ но́вое и҆ та́инственное ѿ влⷣчцы мі́ра полꙋчи́вый: ра́дꙋйсѧ, смире́нїемъ высо́каѧ стѧжа́вый.

Ра́дꙋйсѧ, нището́ю бога́тство нетлѣ́нное сниска́вый: ра́дꙋйсѧ, по́честь вы́шнѧгѡ зва́нїѧ досто́йнѡ воспрїѧ́вый.

Ра́дꙋйсѧ, мл҃твъ бл҃гопрїѧ́тное кади́ло: ра́дꙋйсѧ, црⷭ҇твїѧ го́рнѧгѡ ре́вностный и҆ска́телю.

Ра́дꙋйсѧ, въ притво́рѣ цр҃ко́внѣмъ днѝ и҆ но́щи мл҃твеннѡ провожда́вый: ра́дꙋйсѧ, внꙋ́трь хра́ма бж҃їѧ повелѣ́нїемъ бг҃омт҃ре чⷭ҇тнѡ введе́нный.

Ра́дꙋйсѧ, чл҃вѣ́че бж҃їй а҆леѯі́е, мл҃твенниче ѡ҆ дꙋша́хъ на́шихъ.

Конда́къ є҃.

Бг҃оте́чнѣй ѕвѣздѣ̀ ᲂу҆подо́билсѧ є҆сѝ, а҆леѯі́е ст҃е, є҆гда̀, и҆збѣга́ѧ сла́вы чл҃вѣ́ческїѧ, ѿ є҆де́са ᲂу҆дали́лсѧ є҆сѝ во и҆ны́ѧ страны̑, ѻ҆ба́че бж҃їимъ про́мысломъ кора́бль, на не́мже плы́лъ є҆сѝ, ко ѻ҆те́чественномꙋ твоемꙋ̀ гра́дꙋ ри́мꙋ принесе́сѧ: ты́ же, позна́въ въ се́мъ во́лю гдⷭ҇ню та́мѡ тебѐ подвиза́тисѧ, прите́клъ є҆сѝ къ до́мꙋ роди́телей твои́хъ, и҆ ꙗ҆́кѡ є҆ди́нъ ѿ ни́щихъ, ᲂу҆ вра́тъ є҆гѡ̀ водвори́лсѧ є҆сѝ, слеза́ми ѡ҆мыва́ѧ лицѐ твоѐ и҆ вопїѧ̀ ко гдⷭ҇ꙋ: А҆ллилꙋ́їа.

І҆́косъ є҃.

Ви́дѣвъ тѧ̀ бг҃олюби́вый роди́тель тво́й, ст҃е а҆леѯі́е, стра́нна и҆ ни́ща ѻ҆́бразомъ, млⷭ҇рдова ѡ҆ тебѣ̀ и҆ хи́жинꙋ ма́лꙋ повелѣ̀ соѡрꙋди́ти тебѣ̀ ᲂу҆ вра́тъ своегѡ̀ до́ма, въ не́йже пита́ше тѧ̀ хрⷭ҇та̀ ра́ди, ѿню́дъ не познава́ѧ въ тебѣ̀ своегѡ̀ сы́на: ты́ же, ни́щетнѡ въ до́мѣ роди́тельстѣмъ пребыва́ѧ, всѧ́кꙋю нꙋ́ждꙋ стра́нническꙋю и҆ поноше́нїе ни́щенское претерпѣ́лъ є҆сѝ, подвиза́ѧ ны̀ бл҃гохвали́ти тѧ̀ си́це:

Ра́дꙋйсѧ, мꙋ́жество вели́кое показа́вый: ра́дꙋйсѧ, въ терпѣ́нїи мно́зѣмъ преꙋспѣ́вый.

Ра́дꙋйсѧ, въ до́мѣ роди́телей твои́хъ незна́емь пребыва́вый: ра́дꙋйсѧ, ско́рбь и҆̀хъ ѡ҆ лише́нїи твое́мъ всегда̀ созерца́вый.

Ра́дꙋйсѧ, сѣ́тованїѧ ѻ҆тца̀ твоегѡ̀ слы́шавый: ра́дꙋйсѧ, сле́зы ма́тере твоеѧ̀ ви́дѣвый.

Ра́дꙋйсѧ, пла́чъ ѡ҆брꙋ́чницы твоеѧ̀ позна́вый: ра́дꙋйсѧ, се́рдце твоѐ си́ми болѣ́зненнѡ ᲂу҆ѧзвлѧ́вый.

Ра́дꙋйсѧ, поношє́нїѧ и҆ ᲂу҆кори̑зны ѿ слꙋ́гъ роди́телей твои́хъ неѕло́бнѡ воспрїѧ́вый: ра́дꙋйсѧ, бїє́нїѧ и҆ заꙋшє́нїѧ ѿ ни́хъ молчали́вѡ переноси́вый.

Ра́дꙋйсѧ, за ѡ҆би́дѣвшыѧ тѧ̀ непреста́ннѡ бг҃а ᲂу҆молѧ́вый: ра́дꙋйсѧ, самоизво́ленъ мч҃нкъ вои́стиннꙋ бы́вый.

Ра́дꙋйсѧ, чл҃вѣ́че бж҃їй а҆леѯі́е, мл҃твенниче ѡ҆ дꙋша́хъ на́шихъ.

Конда́къ ѕ҃.

Проповѣ́дникъ є҆ѵⷢ҇льскїѧ кро́тости бы́лъ є҆сѝ, ст҃е а҆леѯі́е, ѡ҆́бразомъ житїѧ̀ твоегѡ̀ многотерпѣли́вагѡ всѣ́мъ показꙋ́ѧй, ꙗ҆́кѡ всѧ̑ возмѡ́жна чл҃вѣ́кꙋ ѡ҆ ᲂу҆крѣплѧ́ющемъ бз҃ѣ, є҆го́же си́лою въ немощнѣ́й пло́ти вели́кїѧ по́двиги соверши́лъ є҆сѝ и҆ мнѡ́гїѧ страда̑нїѧ претерпѣ́лъ є҆сѝ любвѐ ра́ди хрⷭ҇то́вы, досто́йнѡ и҆ пра́веднѡ воспѣва́ѧ прест҃ѣ́й трⷪ҇цѣ серафі́мскꙋю пѣ́снь: А҆ллилꙋ́їа.

І҆́косъ ѕ҃.

Возсїѧ́лъ є҆сѝ въ дре́внемъ ри́мѣ неѡбыча́йными пѡ́двиги твои́ми, а҆леѯі́е бл҃же́нне, и҆ си́ми ѡ҆зари́лъ є҆сѝ бл҃года́тнѡ всю̀ цр҃ковь хрⷭ҇то́вꙋ: кто́ бо не ᲂу҆мили́тсѧ, слы́ша твоѐ пачеесте́ственное терпѣ́нїе и҆ мнѡ́гаѧ ѕлострада̑нїѧ, въ до́мѣ роди́телей твои́хъ воспрїѧ́таѧ самоизво́льнѡ, и҆ ка́кѡ, наслѣ́дникъ сы́й тогѡ̀ до́ма, ѿ слꙋ́гъ є҆гѡ̀ ᲂу҆кори́зны и҆ ра́ны преноси́лъ є҆сѝ ра́достнѡ. Сегѡ̀ ра́ди прино́симъ тѝ ѿ ᲂу҆се́рдїѧ на́шегѡ сїѧ̑ пѣсноглашє́нїѧ:

Ра́дꙋйсѧ, вели́кїй ᲂу҆го́дниче хрⷭ҇то́въ, въ ми́рѣ преми́рнѡ пожи́вый: ра́дꙋйсѧ, равноа́гг҃льный слꙋго̀ гдⷭ҇ень, многоболѣ́зненнѡ жи́знь твою̀ препроводи́вый.

Ра́дꙋйсѧ, безче́стїе въ сла́вꙋ себѣ̀ вмѣни́вый: ра́дꙋйсѧ, ра́ны на тѣ́лѣ твое́мъ терпѣли́вѡ носи́вый.

Ра́дꙋйсѧ, лани̑ты твоѧ̑ ѿ заꙋше́нїй не ᲂу҆клони́вый: ра́дꙋйсѧ, плещи̑ твоѧ̑ на ᲂу҆дарє́нїѧ преда́вый.

Ра́дꙋйсѧ, ѡ҆плева́нїѧ хрⷭ҇топодража́тельнѡ принима́вый: ра́дꙋйсѧ, молча́нїемъ на ᲂу҆кори́зны ѿвѣща́вый.

Ра́дꙋйсѧ, во хрⷭ҇тѣ̀ ᲂу҆тѣше́нїе є҆ди́но ѡ҆брѣты́й: ра́дꙋйсѧ, воспомина́нїемъ крⷭ҇тныхъ страда́нїй і҆и҃совыхъ скѡ́рби твоѧ̑ ᲂу҆слажда́вый.

Ра́дꙋйсѧ, великодꙋ́шный многострада́льче: ра́дꙋйсѧ, добропобѣ́дный подви́жниче.

Ра́дꙋйсѧ, чл҃вѣ́че бж҃їй а҆леѯі́е, мл҃твенниче ѡ҆ дꙋша́хъ на́шихъ.

Конда́къ з҃.

Хотѣ́нїе є҆ди́но и҆мѣ́лъ є҆сѝ, чл҃вѣ́че бж҃їй, є҆́же бл҃гоꙋгожда́ти бг҃ꙋ: тѣ́мже всѧ̑ вре́мєннаѧ въ ᲂу҆мє́ты вмѣни́лъ є҆сѝ, и҆ наслѣ́дникъ мно́гагѡ бога́тства бы́въ, сїѐ ѡ҆ста́вилъ є҆сѝ, ни́щъ и҆ стра́ненъ пребыва́ѧ, въ роди́тельстѣмъ до́мѣ непознава́емъ и҆ ѕѣлѡ̀ ᲂу҆ничижа́емъ, при́снѡ воздыха́ѧ ко гдⷭ҇ꙋ и҆ сле́знѡ молѧ́сѧ, да сподо́битъ тѧ̀ въ странѣ̀ бл҃же́нства вѣ́чнагѡ пѣ́ти є҆мꙋ̀ со ст҃ы́ми: А҆ллилꙋ́їа.

І҆́косъ з҃.

Но́во и҆ неѡбыча́йнѡ тече́нїе соверши́лъ є҆сѝ житїѧ̀ твоегѡ̀, ст҃е а҆леѯі́е, средѝ мі́ра чꙋ́ждѡ мїрски́хъ пристра́стїй и҆ всѧ́кїѧ скве́рны грѣхѡ́вныѧ: тѣ́мже прїѧ́лъ є҆сѝ въ дꙋшѝ твое́й бг҃овѣ́дѣнїѧ да́ръ соверше́нъ и҆ бы́лъ є҆сѝ ѡ҆дꙋшевле́нный хра́мъ трисїѧ́ннагѡ бж҃ества̀, въ не́мже хрⷭ҇то́съ со ѻ҆ц҃е́мъ и҆ дх҃омъ ѻ҆би́тель себѣ̀ сотворѝ, на́съ же наꙋчѝ зва́ти тебѣ̀:

Ра́дꙋйсѧ, а҆́гг҃лѡвъ подо́бниче и҆ чл҃вѣ́кѡвъ красото̀: ра́дꙋйсѧ, ри́зꙋ дꙋше́внꙋю дѣ́вства чⷭ҇тото́ю ᲂу҆бѣли́вый.

Ра́дꙋйсѧ, въ ра́дость гдⷭ҇а твоегѡ̀ вше́дый: ра́дꙋйсѧ, доброво́льною нището́ю превозвы́шенный.

Ра́дꙋйсѧ, терпѣ́нїемъ твои́мъ съ многострада́льнымъ і҆́ѡвомъ сравни́выйсѧ: ра́дꙋйсѧ, ᲂу҆ничиже́нїемъ твои́мъ є҆ѵⷢ҇льскомꙋ ла́зарю подража́вый.

Ра́дꙋйсѧ, болѣ́зньми мно́гими здра́вїе дꙋшѝ стѧжа́вый: ра́дꙋйсѧ, страда́ньми неисче́тными црⷭ҇твїе хрⷭ҇то́во прїѡбрѣты́й.

Ра́дꙋйсѧ, ве́тхагѡ ри́ма бл҃года́тное ѡ҆бновле́нїе: ра́дꙋйсѧ, цр҃кве хрⷭ҇то́вы бж҃е́ственное ᲂу҆добре́нїе.

Ра́дꙋйсѧ, ѡ҆бѣтова́нїй і҆и҃совыхъ наслѣ́дниче: ра́дꙋйсѧ, прест҃ы́ѧ трⷪ҇цы таи́нниче.

Ра́дꙋйсѧ, чл҃вѣ́че бж҃їй а҆леѯі́е, мл҃твенниче ѡ҆ дꙋша́хъ на́шихъ.

Конда́къ и҃.

Стра́нникъ и҆ пришле́цъ бы́лъ є҆сѝ во гра́дѣ ѻ҆те́чествїѧ твоегѡ̀, ст҃е, вы́нꙋ взыскꙋ́ѧ вы́шнѧгѡ гра́да, і҆ерⷭ҇ли́ма нбⷭ҇нагѡ: є҆гда́же приспѣ̀ вре́мѧ ѿше́ствїѧ твоегѡ̀ къ бг҃ꙋ, ты̀ на хартїѝ та́йнꙋ житїѧ̀ твоегѡ̀ начерта́лъ є҆сѝ, въ позна́нїе твои́мъ роди́телемъ, и҆ неѡсла́бнѡ пребыва́лъ є҆сѝ въ по́двизѣхъ поста̀ и҆ мл҃твы, прїꙋготовлѧ́ѧсѧ ко и҆схо́дꙋ ᲂу҆миле́ннымъ пѣ́нїемъ бг҃ꙋ: А҆ллилꙋ́їа.

І҆́косъ и҃.

Ве́сь въ бз҃ѣ бы́въ, а҆леѯі́е ст҃е, мл҃твѣ бы́вшей на ᲂу҆ста́хъ твои́хъ, преда́лъ є҆сѝ пра́веднꙋю дꙋ́шꙋ твою̀ въ рꙋ́цѣ бж҃їи ми́рнѡ и҆ безмѧте́жнѡ, ꙗ҆́кѡ ᲂу҆снꙋ́лъ є҆сѝ: сме́рть бо тебѣ̀ вои́стиннꙋ ᲂу҆покое́нїе бы́сть ѿ страда́нїй и҆ подвигѡ́въ непреста́нныхъ, и҆ прохожде́нїе ѿ хꙋ́ждшагѡ на лꙋ́чшее. Ѡ҆ таковѣ́мъ бл҃же́ннѣмъ ᲂу҆спе́нїи твое́мъ мы̀ ра́дꙋющесѧ, сїѧ̑ прикла̑дныѧ тебѣ̀ прино́симъ глагѡ́лы:

Ра́дꙋйсѧ, ст҃че бж҃їй, ст҃о и҆ пра́веднѡ жи́знь земнꙋ́ю соверши́вый: ра́дꙋйсѧ, во бл҃гоꙋха́нїи ст҃ы́ни сно́мъ сме́ртнымъ ѡ҆почи́вый.

Ра́дꙋйсѧ, на ло́но а҆враа́ма а҆́гг҃лы несе́нный: ра́дꙋйсѧ, пѣ́нїемъ неземны́мъ ѿ ст҃ы́хъ небожи́телей встрѣ́ченный.

Ра́дꙋйсѧ, вѣнце́мъ безсме́ртныѧ жи́зни ѿ гдⷭ҇а ᲂу҆вѣнча́нный: ра́дꙋйсѧ, во ѻ҆би́тели ра́йскїѧ со сла́вою воспрїѧ́тый.

Ра́дꙋйсѧ, пресвѣ́тлое лицѐ влⷣки хрⷭ҇та̀ вы́нꙋ созерца́ѧй: ра́дꙋйсѧ, прест҃ѣ́й трⷪ҇цѣ трист҃ꙋ́ю пѣ́снь немо́лчнѡ возглаша́ѧй.

Ра́дꙋйсѧ, созда́телѧ го́рнихъ и҆ до́льнихъ мл҃твами твои́ми ᲂу҆милостивлѧ́ѧй: ра́дꙋйсѧ, ве́сь мі́ръ хрⷭ҇тїа́нскїй предста́тельствомъ твои́мъ ѡ҆б̾е́млѧй.

Ра́дꙋйсѧ, а҆́гг҃лѡвъ и҆ чл҃вѣ́кѡвъ ра́дованїе: ра́дꙋйсѧ, почита́ющимъ ст҃ꙋ́ю па́мѧть твою̀ вѣ́рный хода́таю.

Ра́дꙋйсѧ, чл҃вѣ́че бж҃їй а҆леѯі́е, мл҃твенниче ѡ҆ дꙋша́хъ на́шихъ.

Конда́къ ѳ҃.

Всѝ лю́дїе ри́мстїи въ тре́петъ прїидо́ша, слы́шавше гла́съ въ собо́рнѣй цр҃кви гра́да своегѡ̀, во вре́мѧ бж҃е́ственныѧ лїтꙋргі́и свы́ше ѿ ѻ҆лтарѧ̀ глаго́лющъ и҆ повелѣва́ющъ поиска́ти тѧ̀, чл҃вѣ́че бж҃їй, да мл҃твъ твои́хъ сподо́бѧтсѧ. Тѣ́мже во ᲂу҆дивле́нїи и҆ ᲂу҆́жасѣ бы́вше, мл҃твеннѡ возопи́ша ѻ҆нѝ ко гдⷭ҇ꙋ, да ꙗ҆ви́тъ и҆̀мъ тебє̀, своегѡ̀ и҆збра́нника, зовꙋ́ще ди́вномꙋ во ст҃ы́хъ свои́хъ влⷣцѣ: А҆ллилꙋ́їа.

І҆́косъ ѳ҃.

Вѣті́йство чл҃вѣ́ческое не довлѣ́етъ къ похвале́нїю тебє̀, ст҃е а҆леѯі́е, свы́ше похвале́нномꙋ гла́сомъ бж҃е́ственнымъ, є҆го́же и҆звѣще́нїемъ лю́дїе ри́мстїи ѡ҆брѣто́ша тѧ̀, ме́ртва лежа́ща на ѻ҆дрѣ̀, съ хартїе́ю на лицѣ̀, є҆́же сїѧ́ше солнцеподо́бными лꙋча́ми, и҆ бл҃гоꙋха́нїе ве́лїе и҆схожда́ше ѿ многоподви́жнагѡ твоегѡ̀ тѣлесѐ. Тѣ́мже ѡ҆брѣ́тенїемъ твои́мъ ѻ҆бра́довани, ца́рь, ст҃и́тель и҆ ве́сь наро́дъ возгласи́ша тебѣ̀:

Ра́дꙋйсѧ, свѣ́тлый лꙋчѐ трисл҃нечнагѡ свѣ́та, ѡ҆живлѧ́ющагѡ ве́сь мі́ръ: ра́дꙋйсѧ, денни́це, возше́дшаѧ просвѣща́ти цр҃ковь хрⷭ҇то́вꙋ мнѡ́гими чꙋдесы̑.

Ра́дꙋйсѧ, ст҃ости и҆ чⷭ҇тоты̀ крі́не бл҃гоꙋха́нный: ра́дꙋйсѧ, дарова́нїй бж҃е́ственныхъ сокро́вище.

Ра́дꙋйсѧ, роди́телемъ твои́мъ хартїе́ю себє̀ ꙗ҆ви́вый: ра́дꙋйсѧ, пла́чъ и҆̀хъ го́рестный на сла́достный преложи́вый.

Ра́дꙋйсѧ, сѣди̑ны ѻ҆тца̀ твоегѡ̀ прославле́нїемъ твои́мъ просла́вивый: ра́дꙋйсѧ, сле́зы ма́тере твоеѧ̀ бл҃года́тнѡ вознагради́вый.

Ра́дꙋйсѧ, честнꙋ́ю ѡ҆брꙋ́чницꙋ твою̀, вѣ́рность тебѣ̀ сохра́ншꙋю, дꙋхо́внѡ ᲂу҆тѣ́шивый: ра́дꙋйсѧ, ве́сь наро́дъ ри́мскїй ѡ҆брѣ́тенїемъ твои́мъ ѕѣлѡ̀ возвесели́вый.

Ра́дꙋйсѧ, и҆сцѣлє́нїѧ чꙋдє́снаѧ ѿ ст҃ы́хъ моще́й твои́хъ ѡ҆би́льнѡ и҆сточи́вый: ра́дꙋйсѧ, на нб҃сѝ и҆ на землѝ по́честь посме́ртнꙋю досто́йнѡ воспрїѧ́вый.

Ра́дꙋйсѧ, чл҃вѣ́че бж҃їй а҆леѯі́е, мл҃твенниче ѡ҆ дꙋша́хъ на́шихъ.

Конда́къ і҃.

Сп҃сти́сѧ хотѧ́щимъ примѣ́ръ бл҃гі́й житїѐ твоѐ, ст҃е а҆леѯі́е, и҆́мже всѧ̑ ны̀ поꙋча́еши ѿрѣша́тисѧ сꙋє́тъ мі́ра, и҆ска́ти же є҆ди́но на потре́бꙋ, є҆́же є҆́сть бг҃оꙋгожде́нїе. Помозѝ ᲂу҆́бѡ на́мъ, чл҃вѣ́че бж҃їй, въ се́мъ тебѣ̀ подража́ти, ᲂу҆крѣпѝ немощно́е произволе́нїе на́ше, вдохнѝ въ на́съ мꙋ́жество дꙋше́вное, ᲂу҆красѝ на́съ добродѣ́тельми и҆ ꙗ҆вѝ бы́ти наслѣ́дники црⷭ҇твїѧ нбⷭ҇нагѡ, да съ тобо́ю на землѝ живы́хъ воспое́мъ созда́телю на́шемꙋ: А҆ллилꙋ́їа.

І҆́косъ і҃.

Цр҃ѧ̀ нбⷭ҇нагѡ хрⷭ҇та̀ вѣ́рный послѣ́дователь бы́лъ є҆сѝ, а҆леѯі́е бл҃же́нне, є҆го́же стра́шномꙋ прⷭ҇то́лꙋ ны́нѣ предстои́ши во сла́вѣ нбⷭ҇нѣй, ѡ҆ не́йже мы̀, земні́и и҆ пе́рстнїи, нижѐ помы́слити мо́жемъ: ѻ҆ба́че любо́вїю ᲂу҆се́рдною къ тебѣ̀ понꙋжда́еми, мы́сленнѡ созерца́емъ тѧ̀, горѣ̀ за ны̀ молѧ́щагосѧ пред̾ лице́мъ бж҃їимъ, и҆ бре́нными ᲂу҆сты̑ возсыла́емъ тѝ пѣ́нїе таково́е:

Ра́дꙋйсѧ, вѣ́рнѡ чтꙋ́щымъ тѧ̀ ско́рый помо́щниче: ра́дꙋйсѧ, мл҃твеннѡ призыва́ющихъ тѧ̀ ᲂу҆се́рдный застꙋ́пниче.

Ра́дꙋйсѧ, првⷣниче гдⷭ҇ень, є҆го́же пра́вда возсїѧ̀ немерца́емѡ: ра́дꙋйсѧ, со́ль землѝ, ꙗ҆́же никогда́же ѡ҆бꙋѧ́етъ.

Ра́дꙋйсѧ, до́брыми дѣ́лы твои́ми бг҃а просла́вивый и҆ чл҃вѣ́ки ᲂу҆диви́вый: ра́дꙋйсѧ, житїе́мъ твои́мъ а҆́гг҃лы возвесели́вый и҆ дꙋ̑хи тмы̀ посрами́вый.

Ра́дꙋйсѧ, го́рнѧгѡ мі́ра ᲂу҆краше́нїе: ра́дꙋйсѧ, до́льнѧгѡ мі́ра защище́нїе.

Ра́дꙋйсѧ, ри́ма сла́во и҆ похвало̀: ра́дꙋйсѧ, хрⷭ҇тїа́нскагѡ ро́да возвыше́нїе.

Ра́дꙋйсѧ, въ чꙋдесѣ́хъ просїѧ́вый: ра́дꙋйсѧ, въ млⷭ҇техъ неистощи́мый.

Ра́дꙋйсѧ, чл҃вѣ́че бж҃їй а҆леѯі́е, мл҃твенниче ѡ҆ дꙋша́хъ на́шихъ.

Конда́къ а҃і.

Пѣ́нїе надгро́бное со сла́вою тебѣ̀ сотвори́ша, ст҃е а҆леѯі́е, ца́рь, ст҃и́тель и҆ ве́сь наро́дъ ри́мскїй, роди́телємъ твои́мъ и҆ ѡ҆брꙋ́чницѣ твое́й, возслѣ́дꙋющымъ чтⷭ҇но́мꙋ твоемꙋ̀ гро́бꙋ, несе́нномꙋ бл҃голѣ́пнѡ въ собо́рнꙋю цр҃ковь, ѿ него́же чꙋде́съ мно́жество и҆сточи́лъ є҆сѝ: слѣпі́и прозира́хꙋ, разсла́бленнїи ᲂу҆крѣплѧ́хꙋсѧ, недꙋ́жнїи здра́ви быва́хꙋ прикоснове́нїемъ къ мощє́мъ твои́мъ ст҃ы́мъ, во є҆́же всѣ́мъ ви́дѧщымъ такова̑ѧ возглаша́ти бг҃ꙋ: А҆ллилꙋ́їа.

І҆́косъ а҃і.

Свѣ́тлѡ и҆ ра́достнѡ бы́сть погребе́нїе твоѐ, чл҃вѣ́че бж҃їй: свѣ́телъ бо лице́мъ возлежа́лъ є҆сѝ во гро́бѣ и҆ бл҃гоꙋха́нїе сла́достное и҆спꙋща́лъ є҆сѝ ѿ нетлѣ́ннагѡ твоегѡ̀ тѣлесѐ, си́ми зна́менꙋѧ свѣ́тлость немерца́ющꙋю ст҃ы́ѧ твоеѧ̀ дꙋшѝ, въ воню̀ бл҃гоꙋха́нїѧ хрⷭ҇то́ва прите́кшїѧ и҆ мі́ра бж҃е́ственнагѡ преиспо́лненныѧ, ѿ є҆ѧ́же полноты̀ и҆ въ на́шѧ дꙋ́шы пода́ждь даѧ́нїе бл҃года́тное, да со ᲂу҆тѣше́нїемъ дꙋхо́внымъ тебѣ̀ возопїе́мъ:

Ра́дꙋйсѧ, свѣщѐ неꙋгаси́маѧ, въ мл҃твахъ къ бг҃ꙋ горѣ̀ возжже́ннаѧ: ра́дꙋйсѧ, лампа́до злата́ѧ, є҆ле́емъ млⷭ҇ти до́лꙋ живꙋ́щихъ ᲂу҆маща́ющаѧ.

Ра́дꙋйсѧ, а҆лава́стре драгі́й, мѵ́ро цѣле́бное болѧ́щимъ и҆сточа́ѧй: ра́дꙋйсѧ, рѣко̀ многово́днаѧ чꙋде́съ.

Ра́дꙋйсѧ, и҆́ночествꙋющымъ наста́вниче до́брагѡ по́двига: ра́дꙋйсѧ, въ мі́рѣ живꙋ́щимъ ѻ҆́бразе бг҃оꙋгожде́нїѧ.

Ра́дꙋйсѧ, зерца́ло чⷭ҇тое пра́веднагѡ житїѧ̀: ра́дꙋйсѧ, приста́нище бл҃гоѡти́шное по бз҃ѣ ᲂу҆пова́нїе на тѧ̀ возложи́вшихъ.

Ра́дꙋйсѧ, врагѡ́въ неви́димыхъ крѣ́пкїй противобо́рче: ра́дꙋйсѧ, и҆́щꙋщымъ сп҃се́нїѧ дꙋше́внагѡ бл҃гі́й споспѣ́шниче.

Ра́дꙋйсѧ, ѿ нбⷭ҇ныхъ высо́тъ къ земнорѡ́днымъ ми́лостивнѡ приника́ѧй: ра́дꙋйсѧ, чтꙋ́щихъ тѧ̀ проше́нїѧ ско́рѡ и҆сполнѧ́ѧй.

Ра́дꙋйсѧ, чл҃вѣ́че бж҃їй а҆леѯі́е, мл҃твенниче ѡ҆ дꙋша́хъ на́шихъ.

Конда́къ в҃і.

Блгⷣть и҆ млⷭ҇ть и҆спросѝ на́мъ ᲂу҆ хрⷭ҇та̀, цр҃ѧ̀ и҆ бг҃а на́шегѡ, а҆леѯі́е достохва́льне: вѣ́мы бо, ꙗ҆́кѡ мно́гѡ мо́жетъ мл҃тва твоѧ̀ пред̾ лице́мъ є҆гѡ̀, и҆ бл҃гоꙋвѣ́тливо преклонѧ́етсѧ ѻ҆́нъ къ моле́нїю твоемꙋ̀. тѣ́мже ᲂу҆се́рднѡ къ тебѣ̀ прибѣга́емъ и҆ смире́ннѡ про́симъ: ѡ҆кормѝ на́съ предста́тельствомъ твои́мъ въ ти́хое приста́нище хрⷭ҇то́во и҆ сподо́би наслажда́тисѧ нетлѣ́нныѧ ра́дости ст҃ы́хъ, немо́лчнѡ вопїю́щихъ славослѡ́вїѧ пѣ́снь трїеди́номꙋ бг҃ꙋ: А҆ллилꙋ́їа.

І҆́косъ в҃і.

Пою́ще пѡ́двиги многострада́льнагѡ и҆ преди́внагѡ житїѧ̀ твоегѡ̀, чл҃вѣ́че бж҃їй, хва́лимъ, сла́вимъ и҆ ᲂу҆бл҃жа́емъ тѧ̀ ᲂу҆се́рдною любо́вїю, ꙗ҆́кѡ нбⷭ҇нагѡ многомо́щнагѡ предста́телѧ на́шегѡ: ты́ же, ст҃е, да́нною тѝ свы́ше бл҃года́тїю на́съ, грѣ́шныхъ и҆ мра́чныхъ, ѡ҆ст҃ѝ, просвѣтѝ и҆ наста́ви вопи́ти тебѣ̀ неѡсꙋжде́ннѡ:

Ра́дꙋйсѧ, восто́ка незаходи́магѡ присносїѧ́ющаѧ зарѐ: ра́дꙋйсѧ, вселе́ннꙋю твои́ми чꙋдесы̑ и҆спо́лнивый.

Ра́дꙋйсѧ, моща́ми твои́ми пресла́внѡ чꙋдотворѧ́й: ра́дꙋйсѧ, ѡ҆бразмѝ подо́бїѧ твоегѡ̀ преди̑внаѧ соверша́ѧй.

Ра́дꙋйсѧ, болѧ́щихъ безме́здный врачꙋ̀: ра́дꙋйсѧ, скорбѧ́щихъ бл҃гі́й ᲂу҆тѣ́шителю.

Ра́дꙋйсѧ, ᲂу҆ныва́ющихъ бл҃года́тное ѡ҆бодре́нїе: ра́дꙋйсѧ, и҆знемога́ющихъ внеза́пное ᲂу҆крѣпле́нїе.

Ра́дꙋйсѧ, бѣ́дствꙋющымъ на по́мощь ᲂу҆скорѧ́ѧй: ра́дꙋйсѧ, ѿ житїѧ̀ ѿходѧ́щымъ застꙋпле́нїе твоѐ многомо́щное ꙗ҆влѧ́ѧй.

Ра́дꙋйсѧ, ра́дости дꙋхо́вныѧ бг҃олюби́вымъ дꙋша́мъ пода́телю: ра́дꙋйсѧ, бл҃гъ вре́менныхъ и҆ вѣ́чныхъ ᲂу҆се́рдный на́мъ ᲂу҆ гдⷭ҇а проси́телю.

Ра́дꙋйсѧ, чл҃вѣ́че бж҃їй а҆леѯі́е, мл҃твенниче ѡ҆ дꙋша́хъ на́шихъ.

Конда́къ г҃і.

Ѽ, ст҃ы́й и҆ бг҃опросла́вленный чл҃вѣ́че бж҃їй а҆леѯі́е. Тебѣ̀, горѣ̀ за ны̀ молѧ́щемꙋсѧ пред̾ прⷭ҇то́ломъ гдⷭ҇а сла́вы, мы̀, грѣ́шнїи, до́лꙋ живꙋ́щїи, сїѐ ма́лое приносѧ́ще пѣ́нїе, мо́лимсѧ ѿ всеѧ̀ дꙋшѝ и҆ ѿ всегѡ̀ помышле́нїѧ: мл҃твами твои́ми и҆спросѝ на́мъ ᲂу҆ хрⷭ҇та̀ бг҃а проще́нїе согрѣше́нїй, и҆ по кончи́нѣ на́шеѧ жи́зни прїѧ́тїе въ бл҃же́нныѧ ѻ҆би́тели нбⷭ҇нагѡ црⷭ҇твїѧ, да съ тобо́ю во вѣ́ки пое́мъ є҆мꙋ̀: А҆ллилꙋ́їа.

Се́й конда́къ гл҃го́ли три́жды, та́же і҆́косъ а҃-й и҆ конда́къ а҃-й.

І҆́косъ а҃.

А҆́гг҃лъ земны́й и҆ чл҃вѣ́къ нбⷭ҇ный бы́лъ є҆сѝ, а҆леѯі́е бл҃же́нне, ѿ млады́хъ бо лѣ́тъ житїѧ̀ твоегѡ̀ чⷭ҇тотꙋ̀ дꙋшѝ и҆ тѣ́ла соблю́лъ є҆сѝ и҆ хрⷭ҇тꙋ̀ любо́вїю ᲂу҆се́рдною послѣ́довалъ є҆сѝ, є҆го́же взыскꙋ́ѧ, всѧ̑ кра̑снаѧ мі́ра сегѡ̀ ѡ҆ста́вилъ є҆сѝ и҆ дости́глъ є҆сѝ соверше́нства дх҃о́внагѡ. Сегѡ̀ ра́ди слы́шиши ѿ на́съ сїѧ̑ достодо́лжныѧ тебѣ̀ похвалы̑:

Ра́дꙋйсѧ, ве́тхагѡ ри́ма рожде́нїе: ра́дꙋйсѧ, безча́дныхъ роди́телей непло́дїѧ разрѣше́нїе.

Ра́дꙋйсѧ, мл҃твъ ᲂу҆се́рдныхъ пло́дъ бг҃одарова́нный: ра́дꙋйсѧ, ѿ младе́нчества на бг҃оꙋгожде́нїе свы́ше пред̾избра́нный.

Ра́дꙋйсѧ, въ стра́сѣ бж҃їемъ до́брѣ воспита́нный: ра́дꙋйсѧ, зако́нꙋ гдⷭ҇ню вѣ́рнѡ наꙋче́нный.

Ра́дꙋйсѧ, ѡ҆ нбⷭ҇ныхъ па́че, не́же ѡ҆ земны́хъ, помышлѧ́вый: ра́дꙋйсѧ, самоѿверже́нїе чꙋ́дное показа́вый.

Ра́дꙋйсѧ, чистотꙋ̀ дѣ́вственнꙋю хрⷭ҇та̀ ра́ди непоро́чнѡ сохрани́вый: ра́дꙋйсѧ, ѡ҆брꙋ́чницꙋ, красото́ю цвѣтꙋ́щꙋю, і҆и҃са ра́ди ѡ҆ста́вивый.

Ра́дꙋйсѧ, мꙋ́дрый стра́нниче, ѻ҆те́чества го́рнѧгѡ взыска́вый: ра́дꙋйсѧ, бж҃їй и҆збра́нниче, всѧ̀ прилѡ́ги мі́ра, пло́ти и҆ дїа́вола побѣди́вый.

Ра́дꙋйсѧ, чл҃вѣ́че бж҃їй а҆леѯі́е, мл҃твенниче ѡ҆ дꙋша́хъ на́шихъ.

Конда́къ а҃.

И҆збра́нный ᲂу҆го́дниче хрⷭ҇то́въ, свы́ше нарече́нный чл҃вѣ́че бж҃їй, ст҃е а҆леѯі́е, похва́льное пѣ́нїе прино́симъ тѝ, любо́вїю чтꙋ́щїи твоѧ̀ по́двиги, терпѣ́нїе и҆ многострада́нїе, и҆́миже бг҃ꙋ ᲂу҆годи́лъ є҆сѝ и҆ ꙗ҆ви́лсѧ є҆сѝ равноа́гг҃ленъ на землѝ: ты́ же, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, мл҃твами твои́ми ѿ всѧ́кихъ на́съ бѣ́дъ свобожда́й, да зове́мъ тѝ:

Ра́дꙋйсѧ, чл҃вѣ́че бж҃їй а҆леѯі́е, мл҃твенниче ѡ҆ дꙋша́хъ на́шихъ.

Моли́тва пе́рваѧ.

Ѽ, вели́кїй хрⷭ҇то́въ ᲂу҆го́дниче, ст҃ы́й чл҃вѣ́че бж҃їй а҆леѯі́е, дꙋше́ю на нб҃сѝ прⷭ҇то́лꙋ гдⷭ҇ню предстоѧ́й, на землѝ же да́нною тѝ свы́ше бл҃года́тїю разли̑чнаѧ соверша́ѧй чꙋдеса̀. При́зри млⷭ҇тивнѡ на предстоѧ́щыѧ ст҃ѣ́й і҆кѡ́нѣ твое́й лю́ди, ᲂу҆миле́ннѡ молѧ́щїѧсѧ и҆ просѧ́щыѧ ѿ тебѣ̀ по́мощи и҆ застꙋпле́нїѧ. Прострѝ мл҃твеннѡ ко гдⷭ҇ꙋ бг҃ꙋ чⷭ҇тні́и рꙋ́цѣ твоѝ и҆ и҆спросѝ на́мъ ѿ негѡ̀ ѡ҆ставле́нїе согрѣше́нїй на́шихъ во́льныхъ и҆ нево́льныхъ, въ недꙋ́зѣхъ стра́ждꙋщимъ и҆сцѣле́нїе, напа́ствꙋемымъ застꙋпле́нїе, скорбѧ́щимъ ᲂу҆тѣше́нїе, бѣ́дствꙋющымъ ско́рꙋю по́мощь, всѣ̑мъ же чтꙋ́щымъ тѧ̀ ми́рнꙋю и҆ хрⷭ҇тїа́нскꙋю живота̀ кончи́нꙋ и҆ до́брый ѿвѣ́тъ на стра́шнѣмъ сꙋдѣ̀ хрⷭ҇то́вѣ. Є҆́й, ст҃че бж҃їй, не посрамѝ ᲂу҆пова́нїѧ на́шегѡ, є҆́же на тѧ̀ по бз҃ѣ и҆ бг҃оро́дицѣ возлага́емъ, но бꙋ́ди на́мъ помо́щникъ и҆ покрови́тель во сп҃се́нїе, да твои́ми мл҃твами полꙋчи́вше бл҃года́ть и҆ млⷭ҇ть ѿ гдⷭ҇а, просла́вимъ человѣколю́бїе ѻ҆ц҃а̀ и҆ сн҃а и҆ ст҃а́гѡ дх҃а, въ трⷪ҇цѣ сла́вимагѡ и҆ покланѧ́емагѡ бг҃а, и҆ твоѐ ст҃о́е застꙋпле́нїе, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Житие преподобного Алексия, человека Божия

Пре­по­доб­ный Алек­сий, че­ло­век Бо­жий, ро­дил­ся в Ри­ме от знат­ных и бла­го­че­сти­вых ро­ди­те­лей. Отец его Ев­фи­ми­ан был се­на­то­ром. Он от­ли­чал­ся ду­шев­ной доб­ро­той, был ми­ло­сер­ден к боль­ным и страж­дущим, еже­днев­но устра­и­вал у се­бя до­ма три сто­ла: для си­рот и вдов, для пут­ни­ков и для ни­щих. У Ев­фи­ми­а­на и же­ны его Агла­и­ды дол­го не бы­ло де­тей, и это омра­ча­ло их сча­стье. Но бла­го­че­сти­вая Агла­и­да не остав­ля­ла на­деж­ды – и услы­шал ее Бог, и по­слал им сы­на. Отец на­звал мла­ден­ца Алек­сий (в пе­ре­во­де с гре­че­ско­го «за­щит­ник»). Свя­той Алек­сий рос здо­ро­вым ре­бен­ком, хо­ро­шо и при­леж­но учил­ся. Ко­гда же он до­стиг со­вер­шен­но­ле­тия, Ев­фи­ми­ан и Агла­и­да ре­ши­ли его же­нить. Они вы­бра­ли для сы­на де­вуш­ку цар­ской кро­ви, очень кра­си­вую и бо­га­тую. Остав­шись по­сле свадь­бы на­едине с мо­ло­дой же­ной, свя­той Алек­сий от­дал ей свой зо­ло­той пер­стень и по­яс­ную пряж­ку со сло­ва­ми: «Со­хра­ни это, и да бу­дет меж­ду то­бой и мной Гос­подь, до­ко­ле не об­но­вит нас Сво­ею бла­го­да­тью». По­том он вы­шел из брач­но­го по­коя и той же но­чью по­ки­нул от­чий дом. Сев на ко­рабль, от­плы­ва­ю­щий на Во­сток, юно­ша при­был в Ла­оди­кию Си­рий­скую. Здесь он при­стал к по­гон­щи­кам ослов и до­брал­ся с ни­ми до го­ро­да Эдес­сы, где хра­нил­ся Неру­ко­твор­ный об­раз Гос­по­да, за­пе­чат­лен­ный на пла­ща­ни­це. Раз­дав остат­ки иму­ще­ства, юно­ша одел­ся в лох­мо­тья и стал про­сить ми­ло­сты­ню в при­тво­ре хра­ма Пре­свя­той Бо­го­ро­ди­цы. Каж­дое вос­кре­се­нье при­об­щал­ся он Свя­тых Хри­сто­вых Тайн. По но­чам Алек­сий бодр­ство­вал и мо­лил­ся. Вку­шал он толь­ко хлеб и во­ду.

Тем вре­ме­нем ро­ди­те­ли и же­на свя­то­го Алек­сия, опе­ча­лен­ные его ис­чез­но­ве­ни­ем, по­сла­ли слуг сво­их на по­ис­ки. Бы­ли они и в Эдес­се, вхо­ди­ли в храм Пре­свя­той Бо­го­ро­ди­цы и по­да­ва­ли ми­ло­сты­ню свя­то­му Алек­сию, не узнав его.

Через неко­то­рое вре­мя слу­ги вер­ну­лись в Рим, так и не най­дя свя­то­го Алек­сия. И ни­ко­му из род­ных не бы­ло от­кро­ве­ния о нем. То­гда они сми­ри­лись и, хо­тя про­дол­жа­ли скор­беть и тос­ко­вать о нем, но по­ло­жи­лись на во­лю Бо­жию.

Пре­по­доб­ный Алек­сий про­вел в Эдес­се, про­ся ми­ло­сты­ню в при­тво­ре хра­ма Бо­го­ро­ди­цы, сем­на­дцать лет. Са­ма Пре­чи­стая, явив­шись во сне цер­ков­но­му сто­ро­жу, от­кры­ла, что ни­щий Алек­сий есть че­ло­век Бо­жий. Ко­гда же жи­те­ли Эдес­сы ста­ли чтить его, пре­по­доб­ный Алек­сий тай­но бе­жал. Он ду­мал от­пра­вить­ся в г. Тарс (в Ма­лой Азии, ро­ди­на свя­то­го апо­сто­ла Пав­ла), но ко­рабль, на ко­то­ром плыл пре­по­доб­ный Алек­сий, в силь­ную бу­рю сбил­ся с кур­са, дол­го блуж­дал и при­стал на­ко­нец к бе­ре­гам Ита­лии, невда­ле­ке от Ри­ма. Свя­той Алек­сий, узрев в этом про­мысл Бо­жий, по­шел к до­му от­ца сво­е­го, ибо был уве­рен, что его не узна­ют. Встре­тив от­ца сво­е­го Ев­фи­ми­а­на, он по­про­сил у него при­ю­та и упо­мя­нул о кров­ных его, пре­бы­ва­ю­щих в стран­ствии. Тот рад был при­нять ни­ще­го, дал ему ме­сто в се­нях сво­е­го до­ма, ве­лел но­сить ему пи­щу с хо­зяй­ско­го сто­ла и при­ста­вил слу­гу для по­мо­щи ему. Осталь­ные слу­ги из за­ви­сти ста­ли ис­под­тиш­ка оскорб­лять ни­ще­го, но пре­по­доб­ный Алек­сий про­зрел в этом дья­воль­ское на­у­ще­ние и при­ни­мал из­де­ва­тель­ства со сми­ре­ни­ем и ра­до­стью. Он по-преж­не­му пи­тал­ся хле­бом и во­дой, а по но­чам бодр­ство­вал и мо­лил­ся. Так про­шло еще сем­на­дцать лет. Ко­гда же при­бли­зил­ся час кон­чи­ны его, пре­по­доб­ный Алек­сий на­пи­сал всю жизнь свою, и то тай­ное, что бы­ло из­вест­но от­цу с ма­те­рью, и сло­ва, ска­зан­ные жене в брач­ном по­кое.

В вос­кре­се­нье по­сле Бо­же­ствен­ной ли­тур­гии в со­бо­ре свя­то­го апо­сто­ла Пет­ра со­вер­ши­лось чу­до. От свя­то­го пре­сто­ла из­шел глас свы­ше: «Ищи­те че­ло­ве­ка Бо­жия, чтобы он по­мо­лил­ся о Ри­ме и всем на­ро­де его». Весь на­род в ужа­се и вос­тор­ге пал ниц. В чет­верг ве­че­ром в со­бо­ре апо­сто­ла Пет­ра мо­ли­ли Гос­по­да от­крыть им че­ло­ве­ка Бо­жия – и с пре­сто­ла из­шел глас: «В до­ме Ев­фи­ми­а­на – че­ло­век Бо­жий, там ищи­те». В хра­ме при­сут­ство­ва­ли рим­ский им­пе­ра­тор Го­но­рий (395–423), а так­же па­па рим­ский Ин­но­кен­тий I (402–417). Они об­ра­ти­лись к Ев­фи­ми­а­ну, но тот ни­че­го не знал. То­гда слу­га, при­став­лен­ный к свя­то­му Алек­сию, рас­ска­зал Ев­фи­ми­а­ну о его пра­вед­но­сти. Ев­фи­ми­ан по­спе­шил к пре­по­доб­но­му Алек­сию, но уже не за­стал его в жи­вых. Лик бла­жен­но по­чив­ше­го свя­то­го си­ял све­том нездеш­ним. В ру­ке пре­по­доб­ный Алек­сий дер­жал креп­ко за­жа­тый сви­ток. Те­ло свя­то­го Алек­сия с по­до­ба­ю­щи­ми по­че­стя­ми пе­ре­нес­ли и по­ло­жи­ли на ло­же. Им­пе­ра­тор и па­па рим­ский пре­кло­ни­ли ко­ле­на, про­ся свя­то­го раз­жать ру­ку. И свя­той Алек­сий ис­пол­нил их прось­бу.

Сви­ток с жиз­не­опи­са­ни­ем свя­то­го был про­чи­тан чте­цом хра­ма во имя свя­то­го апо­сто­ла Пет­ра. Отец, мать и же­на свя­то­го Алек­сия с пла­чем при­па­ли к те­лу свя­то­го, по­кло­ни­лись его чест­ным остан­кам. При ви­де та­ко­го со­бы­тия мно­гие пла­ка­ли. Ло­же с те­лом свя­то­го Алек­сия бы­ло по­став­ле­но по­сре­ди цен­траль­ной пло­ща­ди. К нему стал сте­кать­ся на­род, чтобы очи­стить­ся и раз­ре­шить­ся от неду­гов сво­их. Немые на­чи­на­ли го­во­рить, слеп­цы про­зре­ва­ли, одер­жи­мые и ду­шев­но­боль­ные вы­здо­рав­ли­ва­ли. Ви­дя та­кую бла­го­дать, им­пе­ра­тор Го­но­рий и па­па Ин­но­кен­тий I са­ми по­нес­ли те­ло свя­то­го в по­гре­баль­ной про­цес­сии. Чест­ные остан­ки свя­то­го Алек­сия, че­ло­ве­ка Бо­жия, по­гре­бе­ны в хра­ме во имя свя­то­го Во­ни­фа­тия 17 мар­та 411 го­да. В 1216 го­ду бы­ли об­ре­те­ны мо­щи свя­то­го. Жи­тие его ис­ста­ри бы­ло од­ним из са­мых лю­би­мых на Ру­си.

См. так­же: "Жи­тие пре­по­доб­но­го Алек­сия, че­ло­ве­ка Бо­жия" в из­ло­же­нии свт. Ди­мит­рия Ро­стов­ско­го.