Конда́к 1.

Избра́нный Бо́гом Всеви́дящим в слуги́ Себе́ пре́жде рожде́ния твоего́, пло́де кра́сный роди́телей бесча́дных, и́мя нося́й утеше́нию тезоимени́тое и вои́стину яви́выйся утеше́ние мно́гим, моли́ Го́спода, Ему́же послужи́л еси́ ве́рне, изба́вити ны́ от вся́каго зла́, да ра́достно вопие́м ти́:

Ра́дуйся, о́тче преподо́бне, вели́кий Евфи́мие.

И́кос 1.

А́нгельскому чи́ну посвяти́ти тя́ обеща́ша роди́тели твоя́, Евфи́мие, еще́ пре́жде рожде́ния твоего́: се́й вели́кий обе́т соверша́ющи ма́терь твоя́ Диони́сия, приведе́ тя́, о́трока бы́вша, ко бра́ту своему́ пресви́теру Евдокси́ю: се́й же отведе́ тя́ ко Мелити́йскому епи́скопу Евтро́пию, сказу́юще ему́ о виде́нии и гла́се Боже́ственнем, возвести́вшим рожде́ние твое́. Возра́довася же епи́скоп сему́, возопи́:

Ра́дуйся, блаже́нное отроча́, я́ко вои́стину Ду́х Бо́жий почи́ на тебе́; ра́дуйся, ди́вным промышле́нием Бо́жиим от ю́ности ми́р оста́вивый.

Ра́дуйся, возлюби́вый тишину́ и безмо́лвие; ра́дуйся, учи́телей твои́х Ака́кия и Сино́дия вели́кое утеше́ние.

Ра́дуйся, украше́ние Це́ркве на́шея яви́выйся; ра́дуйся, я́ко ма́терь твоя́ блаже́нная Диони́сия, ве́рне Це́ркве послужи́вшая, диакони́сса поста́вися.

Ра́дуйся, в чистоте́ душе́вней и теле́сней воспита́выйся; ра́дуйся, жи́знь свою́ безразде́льне Го́сподеви вручи́вый.

Ра́дуйся, о́тче преподо́бне, вели́кий Евфи́мие.

Конда́к 2.

Ви́дя епи́скоп Мелити́йския Це́ркви усе́рдное твое́, Евфи́мие, к науче́нию боже́ственных кни́г, та́же де́вственное и доброде́тельное житие́ твое́, поста́ви тя́ пресви́тера, и вручи́ ти́ старе́йшество и попече́ние о монастыре́х. Ты́ же, блаже́нне, возскорбе́л еси́ о се́м, возлюби́вый безмо́лвие и е́же в тишине́ пе́ти Бо́гу а́нгельски: Аллилу́иа.

И́кос 2.

Ра́зумом му́дрости боже́ственныя просвеще́нный, Евфи́мие, уясня́я, я́ко ра́ди спасе́ния души́ твоея́ поле́знее е́сть безмо́лвное уедине́ние, не́же нача́льствовати, укры́лся еси́ в приста́нище небу́рное в Ла́вре Фара́нстей, и та́мо Го́сподеви угожда́л еси́, сего́ ра́ди зове́м ти́ такова́я:

Ра́дуйся, смире́ннейший па́че все́х и́ноков; ра́дуйся, поста́вленный старе́йшим над ни́ми.

Ра́дуйся, о монастыре́х попечи́телю; ра́дуйся, мона́шескаго жития́ рачи́телю.

Ра́дуйся, похвалы́ челове́ческия возненави́девый; ра́дуйся, си́х ра́ди в Ла́вру Фара́нскую бежа́вый.

Ра́дуйся, всели́выйся в ке́ллии уедине́нней; ра́дуйся, та́мо от трудо́в ру́к свои́х пита́выйся, Бо́гу непреста́нную хвалу́ воздава́л еси́.

Ра́дуйся, о́тче преподо́бне, вели́кий Евфи́мие.

Конда́к 3.

Си́лою бра́тнея любви́ свя́зани бы́ша, преподо́бнии Евфи́мие и Феокти́сте, я́кобы в дву́х телесе́х еди́ну ду́шу и еди́ну во́лю име́вшии, навыко́ша на вся́кий го́д во осьмы́й де́нь по пра́зднице Богоявле́ния Госпо́дня исходи́ти в пусты́ню Кутилли́йскую, иде́же да́же до све́тлаго Христо́ва Воскресе́ния пребыва́ху посто́м пло́ть свою́ изнуря́я, ду́ши же веселя́ще пе́снию: Аллилу́иа.

И́кос 3.

Иму́ще жела́ние соверше́ннаго уедине́ния, обрето́ста святи́и дру́зи пеще́ру и возра́довастася о не́й, я́ко о Госпо́днем указа́нии и́ма ме́ста, и па́ки не возвраща́яся в Ла́вру, всели́стася в то́й пеще́ре, бы́лием пита́ющеся. Ви́дяще таково́е му́дрое устрое́ние мона́шеское взыва́ем ти́, преподо́бне о́тче Евфи́мие, си́це:

Ра́дуйся, ра́ди уедине́ния оста́вивый Ла́вру; ра́дуйся, у́зами святы́я дру́жбы с Феокти́стом сочета́нный, ку́пно с ни́м в моли́тве ко Еди́ному Бо́гу пребыва́вый.

Ра́дуйся, я́ко убе́жище ва́ше ве́домо сотвори́шася лю́дем и потеко́ша к ва́м жа́ждущия спасе́ния и от боле́зней исцеле́ния; ра́дуйся, я́ко приходя́щих к тебе́, о́тче Евфи́мие, направля́л еси́ к дру́гу твоему́ Феокти́сту, не хотя́й лиши́тися безмо́лвия.

Ра́дуйся, я́ко в ма́лом вре́мени кинови́я зде́ учреди́ся, я́ко пеще́ра ва́ша пе́рвее звере́м приста́нище бы́вшая в Це́рковь претвори́ся; ра́дуйся, я́ко бра́тия по́мыслы своя́ тебе́ открыва́ти навыко́ша.

Ра́дуйся, я́ко поуча́л еси́ и́стинному мона́шескому пути́; ра́дуйся, я́ко полага́л еси́ спасе́ние наипа́че в смире́нии и послуша́нии.

Ра́дуйся, науча́вый отсече́нию во́ли своея́.

Ра́дуйся, о́тче преподо́бне, вели́кий Евфи́мие.

Конда́к 4.

Бу́ри и мяте́жа мирска́го бежа́вшии блаже́нни су́ть, и́же под покро́в Евфи́миевой кинови́и укры́шася! И́бо обрето́ша ту́ ми́р и безмо́лвие, па́че же тебе́, о́тче преподо́бне, наста́вника прему́драго, поуча́ющаго о все́м благода́рне к Бо́гу взыва́ти: Аллилу́иа.

И́кос 4.

Слы́шаще бра́тия поуче́ния твоя́, о́тче Евфи́мие, умиля́шася се́рдцем, ду́хом же к небеси́ устремля́шася, тебе́ же, врачу́ ду́ш и́х, вопию́ще:

Ра́дуйся, наста́вниче прему́дрый; ра́дуйся, врачу́ющий духо́вныя не́мощи безме́здно.

Ра́дуйся, призыва́яй все́х храни́ти воздержа́ние; ра́дуйся, науча́яй укрепля́ти па́мять сме́ртную.

Ра́дуйся, повеле́вый и́ноком не отмета́тися трудо́в теле́сных; ра́дуйся, науча́яй подража́ти все́м свято́му апо́столу Па́влу.

Ра́дуйся, поуча́яй боя́тися огня́ ве́чнаго; ра́дуйся, призыва́яй наипа́че люби́ти сла́ву Ца́рствия Небе́снаго.

Ра́дуйся, о́тче преподо́бне, вели́кий Евфи́мие.

Конда́к 5.

Богоизбра́нная звезда́ яви́лся еси́, святы́й Евфи́мие, егда́ нача́льник сараци́н Аспеве́т с боля́щим сы́ном о́троком Терево́ном е́ллини су́ще, возжела́вше восприя́ти святу́ю Христо́ву ве́ру: яви́лся бо еси́, преподо́бне, спя́щу и пове́дал еси́ тому́, да прии́дет к тебе́ в пусты́ню и исцеле́ние обря́щет. Прише́дшим же и́м, с во́и сараци́нскими к тебе́, исцели́л еси́ боля́щаго о́трока Терево́на, уве́ровавше же вси́ во Христа́ и креще́ние свято́е от тебе́ прии́мше, Бо́гу ра́достно воспе́ша: Аллилу́иа.

И́кос 5.

Ви́деша и слы́шаша сия́ боля́щия, мно́зи нача́ша стека́тися к тебе́, врачу́ безме́здный блаже́нне Евфи́мие, и исцеле́ние получа́я, прославля́ху тя́ по все́й стране́ то́й. Ты́ же, святы́й, не терпя́ще сла́вы, оста́вил еси́ кинови́ю та́й, взе́м с собо́ю еди́наго от учени́к свои́х Дометиа́на, изыдо́ша в пу́стынь при Ме́ртвом мо́ре и обре́тше ке́ллию ве́тхую при горе́ Ма́рда, всели́лся еси́ с Дометиа́ном, отту́ду пресели́лся в пеще́ру, иде́же иногда́ Дави́д скрыва́шеся от лица́ Сау́ла, и созда́л еси́, Евфи́мие, та́мо монасты́рь, чудесе́м же тобо́ю твори́мым умно́жися сла́ва твоя́ и па́ки отше́л еси́, обре́тше пеще́ру ма́лу бли́з кинови́и Феокти́стовы, всели́лся еси́ в не́й до кончи́ны своея́. Мы́ же ви́дяще такову́ю любо́вь твою́ к безмо́лвию, со умиле́нием восклица́ем ти́:

Ра́дуйся, пусты́нное житие́ наипа́че возлюби́вый; ра́дуйся, мно́гия неве́рныя к ве́ре Христо́вой обрати́вый.

Ра́дуйся, манихе́йскаго злове́рия обличи́телю; ра́дуйся, правосла́вныя христиа́ны в и́стинней ве́ре укрепи́телю.

Ра́дуйся, чудесы́ твои́ми просла́вивый Бо́га; ра́дуйся, свое́й си́ сла́ве проти́вник бы́вый.

Ра́дуйся, мно́ги монастыри́ та́же и Ла́вру вели́кую созда́вый; ра́дуйся, я́ко воспо́лни Госпо́дь оскуде́ние хле́ба, вина́ и еле́я по благослове́нии твое́м.

Ра́дуйся, о́тче преподо́бне, вели́кий Евфи́мие.

Конда́к 6.

Пропове́дник и́стиннаго покая́ния, и послуша́ния бы́л еси́, вели́кий Евфи́мие, та́же увещава́тель е́же непотре́бно е́сть от своего́ монастыря́ бе́гати, и́щущи лу́чшаго, но бла́го е́сть пребыва́ти в ке́ллии свое́й, терпя́ще вся́ тяготы́ жития́ и́ноческаго, Бо́гу же поя́: Аллилу́иа.

И́кос 6.

Возсия́в ду́хом проро́ческим, Евфи́мие, прозре́л еси́ Анаста́сия сосудохрани́теля Патриа́рха бы́ти, егда́ то́й прии́де к тебе́, та́кожде и ины́я чудеса́ сотвори́л еси́: поуче́нием же мно́гим бра́тию наставля́л еси́ и вразумля́л. И на́с гре́шных и непотре́бных вразуми́ и научи́ о́бразом жития́ твоего́ богоуго́дная твори́ти, пою́щих ти́ си́це:

Ра́дуйся, прозорли́вче, бу́дущая, а́ки настоя́щая зре́вый; ра́дуйся, мно́гия боля́щия исцели́вый.

Ра́дуйся, мно́гими наставле́ниями ученико́м твои́м о́бразы покая́ния показа́вый; ра́дуйся, уверя́яй, я́ко не ме́сто, но душе́вное устрое́ние ко спасе́нию приво́дит хотя́щих спасти́ся.

Ра́дуйся, я́ко моли́твою твое́ю до́ждь низве́л еси́ с небеси́; ра́дуйся, я́ко послу́ша Госпо́дь вы́ну моли́твы твоя́.

Ра́дуйся, я́ко мольба́ми твои́ми подаде́ Госпо́дь плодоро́дие ве́лие земли́ то́й; ра́дуйся, я́ко поуче́нии твои́ми умно́жися и́ноцы и́стинныя в Ла́вре твое́й.

Ра́дуйся, о́тче преподо́бне, вели́кий Евфи́мие.

Конда́к 7.

Хотя́ укрепи́ти и́стинную правосла́вную ве́ру, прия́л еси́, о́тче Евфи́мие, от учени́к свои́х Епи́скопов Стефа́на и Иоа́нна, написа́ние дея́ний четве́ртаго Вселе́нскаго Собо́ра и́же в Халкидо́не, обличи́вшаго злоче́стие Диоско́ра, патриа́рха Александри́йскаго. Те́мже возвести́ся по все́й пусты́ни Палести́нстей, я́ко вели́кий Евфи́мий после́дует Халкидо́нскому Собо́ру. Сему́ ра́дующеся, воспе́ша и́ноцы: Аллилу́иа.

И́кос 7.

Но́вый вра́г и́стины, ерети́к Феодо́сий, лжи́выми словесы́ оклевета́в Халкидо́нский Собо́р, привлече́ к себе́ мно́гия, та́же цари́цу Евдоки́ю, и мно́гим лука́вством взы́де на престо́л патриа́рший, отню́дуже нача́т гна́ти держа́щия правосла́вную ве́ру, наипа́че же хотя́й привлещи́ в се́ти своея́ е́реси преподо́бнаго Евфи́мия. Мы́ же тя́, о́тче, а́ки сте́ну незы́блему правосла́вия зря́ще, та́ко зове́м ти́:

Ра́дуйся, сто́лпе правосла́вия; ра́дуйся, стено́ непоколеби́мая ерети́ческими ве́тры.

Ра́дуйся, пусты́нника Гера́сима заблу́ждшаго к и́стинней ве́ре па́ки обрати́вый; ра́дуйся, удали́выйся со мно́гими бра́тиями в пусты́ню.

Ра́дуйся, возврати́выйся па́ки в Ла́вру по паде́нии лжепатриа́рха Феодо́сия; ра́дуйся, я́ко объя́тый Боже́ственным огне́м со а́нгелом литургиса́ющий, ви́ден бы́л еси́.

Ра́дуйся, приле́жно бра́тию свою́ наставля́яй чи́стою со́вестию и стра́хом Бо́жиим ко святы́м Христо́вым Та́йнам приступа́ти; ра́дуйся, прови́дяй ка́ко ки́йждо от бра́тий причаща́тися прихо́дит.

Ра́дуйся, о́тче преподо́бне, вели́кий Евфи́мие.

Конда́к 8.

Стра́нно и неразу́мливо Евти́хиевою е́ресию прельще́нная цари́ца Евдоки́я, нача́ колеба́тися умо́м, не ве́дуще, ко́его держа́тися испове́дания. По́сланная же от преподо́бнаго Симео́на сто́лпника ко Евфи́мию и прии́мши поуче́ния его́, я́ко подоба́ше держа́тися четы́рех Вселе́нских Собо́ров, просвети́ся ра́зумом, Бо́гу воспева́я: Аллилу́иа.

И́кос 8.

Ве́сь бы́л еси́ в Бо́зе, блаже́нне Евфи́мие, сия́нием жития́ твоего́ привлека́я к себе́ но́выя ученики́: та́ко преподо́бный Са́вва, ю́ный бе́, прии́де к тебе́ спасе́ния иски́й и ини́и мно́зи, отвраща́ющия о́чи своя́ от мяте́жа жите́йскаго мо́ря, и к тебе́ небу́рному приста́нищу прите́кшии. Ты́ же оте́ческою любо́вию приима́л еси́ вся́, прозира́я, я́ко столпы́ Це́ркви сии́ бу́дут. Сего́ ра́ди зове́м ти́, о́тче, си́це:

Ра́дуйся, я́ко мно́гия свети́ла к тебе́ стека́хуся; ра́дуйся, собира́яй, а́ки ко́кош под крыле́ своя́, все́х и́щущих и́ноческих подвиго́в.

Ра́дуйся, я́ко в ю́ном Са́вве прозре́л еси́ вели́каго учи́теля мона́шества; ра́дуйся, дву́х пусты́нников Нитри́йских Марти́рия и Илию́ прие́мый.

Ра́дуйся, я́ко в си́х прови́дел еси́ насле́дники Престо́ла Апо́стола Иа́кова бра́та Госпо́дня, Патриа́рха Иерусали́мскаго; ра́дуйся, я́ко си́х вы́ну взе́млющий с собо́ю в пусты́ню.

Ра́дуйся, я́ко та́мо от своея́ руки́ си́х вели́ких муже́й приобщи́л еси́ Святы́х Христо́вых Та́ин; ра́дуйся, возлюби́вый ученики́ своя́, и пе́стунствуяй и́х оте́чески.

Ра́дуйся, о́тче преподо́бне, вели́кий Евфи́мие.

Конда́к 9.

Все́ естество́ а́нгельское ра́дости исполня́шеся, ви́дя равноа́нгельное житие́ твое́, вели́кий Евфи́мие, и умно́жившиися о́крест тебе́ оби́тели и́ноков, в а́нгельском чи́не сла́вящих Бо́га, пою́ще Ему́: Аллилу́иа.

И́кос 9.

Вити́я многовеща́нныя не возмо́гут досто́йно возвели́чити да́ра прозорли́вости твоея́, преподо́бне, вся́ бо бу́дущая я́ко настоя́щая прови́дяй, мно́гая проро́чествовал еси́. Преклоня́я коле́на пред вели́чием Бо́га та́ко просла́вившаго уго́дника Своего́, зове́м благогове́йно:

Ра́дуйся, даро́в многообра́зных от Го́спода сподо́бивыйся; ра́дуйся, прозорли́вче ди́вный.

Ра́дуйся, Анаста́сию сосудохрани́телю са́н Патриа́рха проре́кший; ра́дуйся, я́ко испо́лнившемуся сему́ проро́честву вси́ дивля́хуся.

Ра́дуйся, цари́цу Евдоки́ю в правосла́вии укрепи́л еси́; ра́дуйся, то́й бли́зкую предсказа́в кончи́ну.

Ра́дуйся, повеле́вый то́й пригото́витися ко исхо́ду своему́; ра́дуйся, я́ко проро́чество сие́ испо́лнися и блаже́нная Евдоки́я, мно́гих хра́мов строи́тельница, вско́ре почи́ о Го́споде.

Ра́дуйся, о́тче преподо́бне, вели́кий Евфи́мие.

Конда́к 10.

Спасе́ния жа́ждущим бы́л еси́, Евфи́мие преподо́бне, я́ко сто́лп о́гненный, путеводя́й стра́нствующих во тьме́ жития́ сего́ в зе́млю небе́снаго Ханаа́на, ра́достно Бо́гу вопию́щих: Аллилу́иа.

И́кос 10

Стено́ю моли́тв и поуче́ний твои́х, Евфи́мие, па́че о́бразом жития́ твоего́ равноа́нгельнаго огражда́л еси́ ученико́в твои́х, от искуше́ний пло́ти, ми́ра и диа́вола. Ви́дяще таково́е попече́ние о ча́дех твои́х, с любо́вию зове́м ти́:

Ра́дуйся, до́брый па́стырю ове́ц слове́сных; ра́дуйся, о́тче, о мно́зех ча́дех твои́х веселя́щийся.

Ра́дуйся, Феокти́ста, и́скренняго дру́га и спо́стника твоего́ в боле́зни посети́вый и уте́шивый; ра́дуйся, целова́ние тому́ после́днее с любо́вию да́вый.

Ра́дуйся, пророкова́ннаго тобо́ю патриа́рха Анаста́сия, на погребе́ние Феокти́стово прибы́вшаго, сре́тивый; ра́дуйся, сла́дце с ни́м бесе́ды наслади́выйся.

Ра́дуйся, преподо́бнаго Са́вву с собо́ю в пусты́ню поя́вший; ра́дуйся, тому́ от жа́жды в пути́ изнемо́гшу, от земли́ моли́твою твое́ю во́ду изве́дший.

Ра́дуйся, о́тче преподо́бне, вели́кий Евфи́мие.

Конда́к 11.

Пе́ние моли́твенное по обы́чаю соверша́л еси́, блаже́нный Евфи́мие, удаля́яся в пусты́ню во осьмы́й де́нь по пра́зднице Богоявле́ния Госпо́дня. Приближа́вшейся кончи́не твое́й, преподо́бне, прозира́я ту́, восхоте́л еси́ в Ла́вре пребы́ти, гото́вящися ко исхо́ду своему́, Бо́гу за вся́ благода́рне поя́: Аллилу́иа.

И́кос 11.

Светоза́рное житие́ твое́, вели́кий Евфи́мие, к концу́ прибли́жися, и плоды́ виногра́да своего́ гото́вился еси́ принести́ Домовлады́це, ви́дяще же ся́ бли́з кончи́ны су́ща, собра́л еси́ пресви́теры ла́врския, дабы́ после́днее наставле́ние все́м да́ти. Пла́кахуся же вси́, я́ко ча́да, разлуча́ющися со отце́м свои́м, оба́че реко́ша к тебе́:

Ра́дуйся, вели́кий па́стырю ове́ц мно́гих; ра́дуйся, ве́ру и́стинную соблюды́й и то́й научи́вый заблу́ждшия.

Ра́дуйся, после́днее твое́ поуче́ние да́вый ча́дом твои́м, да сою́з любве́ неруши́м в ни́х пребу́дет; ра́дуйся, реки́й, я́ко не возмо́жно е́сть без любве́ доброде́тели соверша́тися.

Ра́дуйся, па́ки реки́й, я́ко вся́кая доброде́тель любо́вию и смире́нием кре́пка е́сть; ра́дуйся, поуча́вый вся́ преда́ния и уста́вы монасты́рския николи́же оставля́ти.

Ра́дуйся, повеле́вый, да врата́ монасты́рския николи́же затворе́ны бу́дут стра́нных ра́ди; ра́дуйся, повеле́вый та́же о ни́щих пещи́ся.

Ра́дуйся, о́тче преподо́бне, вели́кий Евфи́мие.

Конда́к 12.

«Благода́ть, а́ще обря́щу у Бо́га дерзнове́ние, и́мам проси́ти, да бу́ду с ва́ми ду́хом всегда́» — ре́кл еси́ после́днее сло́во ученико́м свои́м, блаже́нне Евфи́мие, ти́и же, пла́чущи о исхо́де твое́м, си́м сло́вом утеша́хуся и со умиле́нием Го́сподеви взыва́ху: Аллилу́иа.

И́кос 12.

Пою́ще труды́ твоя́, по́двиги и дарова́ния е́же от ма́лых ле́т обре́л еси́ у Бо́га, восхваля́ем тя́, святы́й преподо́бне о́тче, и с любо́вию вопие́м ти́:

Ра́дуйся, от ю́ности ве́сь живо́т сво́й Го́сподеви преда́вый; ра́дуйся, возраста́вший от си́лы в си́лу.

Ра́дуйся, орле́, мы́слию в го́рних паря́й; ра́дуйся, в до́льних оби́тели земны́я а́нгелом созида́вый.

Ра́дуйся, прозорли́вости да́ра сподо́бивыйся от Влады́ки Христа́; ра́дуйся, исцеле́ний неоску́дный исто́чниче.

Ра́дуйся, вели́ких муже́й учи́телю; ра́дуйся, и по сме́рти, ча́д твои́х духо́вных ве́рный храни́телю.

Ра́дуйся, о́тче преподо́бне, вели́кий Евфи́мие.

Конда́к 13.

О, пречу́дный и пресла́вный о́тче Евфи́мие! Приими́ от на́с непотре́бных моле́ние сие́ ма́лое, и не осуди́ гре́шных у́ст, дерза́ющих сла́вити твоя́ труды́, по́двиги и чудеса́, да ми́лостивно призира́яй на все́х спасе́ния взыску́ющих, и о на́с Го́сподеви моля́ся да очи́стимся от земны́я суеты́, чи́стым се́рдцем воспое́м Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельскому чи́ну посвяти́ти тя́ обеща́ша роди́тели твоя́, Евфи́мие, еще́ пре́жде рожде́ния твоего́: се́й вели́кий обе́т соверша́ющи ма́терь твоя́ Диони́сия, приведе́ тя́, о́трока бы́вша, ко бра́ту своему́ пресви́теру Евдокси́ю: се́й же отведе́ тя́ ко Мелити́йскому епи́скопу Евтро́пию, сказу́юще ему́ о виде́нии и гла́се Боже́ственнем, возвести́вшим рожде́ние твое́. Возра́довася же епи́скоп сему́, возопи́:

Ра́дуйся, блаже́нное отроча́, я́ко вои́стину Ду́х Бо́жий почи́ на тебе́; ра́дуйся, ди́вным промышле́нием Бо́жиим от ю́ности ми́р оста́вивый.

Ра́дуйся, возлюби́вый тишину́ и безмо́лвие; ра́дуйся, учи́телей твои́х Ака́кия и Сино́дия вели́кое утеше́ние.

Ра́дуйся, украше́ние Це́ркве на́шея яви́выйся; ра́дуйся, я́ко ма́терь твоя́ блаже́нная Диони́сия, ве́рне Це́ркве послужи́вшая, диакони́сса поста́вися.

Ра́дуйся, в чистоте́ душе́вней и теле́сней воспита́выйся; ра́дуйся, жи́знь свою́ безразде́льне Го́сподеви вручи́вый.

Ра́дуйся, о́тче преподо́бне, вели́кий Евфи́мие.

Конда́к 1.

Избра́нный Бо́гом Всеви́дящим в слуги́ Себе́ пре́жде рожде́ния твоего́, пло́де кра́сный роди́телей бесча́дных, и́мя нося́й утеше́нию тезоимени́тое и вои́стину яви́выйся утеше́ние мно́гим, моли́ Го́спода, Ему́же послужи́л еси́ ве́рне, изба́вити ны́ от вся́каго зла́, да ра́достно вопие́м ти́:

Ра́дуйся, о́тче преподо́бне, вели́кий Евфи́мие.

Моли́тва.

Ди́вный и пресла́вный уго́дниче Христо́в, вели́кий о́тче Евфи́мие, от свята́го черто́га, иде́же ты́ со все́ми святы́ми лику́еши, при́зри на на́с, во мра́це жития́ сего́ су́щих, и научи́ ны́ презира́ти вся́, я́же в ми́ре нарица́ются блага́я. Научи́ на́с люби́ти бли́жния своя́, терпе́ти оби́ды и поноше́ния, ско́рби и боле́зни, в смире́нии благодаря́ще Бо́га. Научи́ на́с моли́тися и ка́ятися во гресе́х свои́х, очи́ститися на́м от вся́кия скве́рны. Умоли́ Го́спода, Ему́же послужи́л еси́ от ю́ности своея́ да́же до ста́рости масти́тей, да сподо́бимся и мы́, рабы́ неключи́мии, со свети́льники горя́щими усре́сти Жениха́ Христа́ и с Ни́м вни́ти в черто́г укра́шенный Ца́рствия Его́. Ами́нь.