Акафист святому преподобному Стилиану Пафлагонскому

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 09 декабря (26 ноября ст. ст.)

Не утвержден для общецерковного использования.

Конда́к 1.

Избра́нный чудотво́рче и уго́дниче Христо́в, ско́рый помо́щниче и моли́твенниче на́ш, преподо́бне о́тче Стилиа́не, прославля́я просла́вльшаго тя́ Го́спода, похва́льная пе́ния прино́сим ти́, чту́щии святу́ю па́мять твою́. Ты́ же, предстоя́ пред Престо́лом Вседержи́теля, воздви́гни о на́с, гре́шных, многомо́щныя моли́твы твоя́, взыва́ющих ти́: Ра́дуйся, преподо́бне о́тче Стилиа́не, пресла́вный чудотво́рче.

И́кос 1.

А́нгелов Творе́ц и всея́ тва́ри Созда́тель еще́ от утро́бы ма́терния избра́ тя́, преподо́бне Стилиа́не, чу́дным житие́м свои́м на земли́ прославля́ти Тро́ицу Святу́ю, по блаже́нней же кончи́не твое́й учини́ тя́ со святы́ми А́нгелы воспева́ти Ему́ пе́снь сладча́йшую на небеси́. Мы́ же, таково́му Бо́жию благоволе́нию о тебе́ ра́дуяся, песносло́вим тя́:

Ра́дуйся, Святы́я Це́ркви похвало́.

Ра́дуйся, Пафлаго́нии кре́пкий сто́лпе.

Ра́дуйся, до́браго воспита́ния цве́те благоуха́нный.

Ра́дуйся, Боже́ственнаго избра́ния сосу́де благослове́нный.

Ра́дуйся, Го́спода от ю́ности возлюби́вый.

Ра́дуйся, ве́ру и любо́вь в се́рдце свое́м возрасти́вый.

Ра́дуйся, целому́дрие души́ своея́ сохрани́вый.

Ра́дуйся, смире́ние вели́кое стяжа́вый.

Ра́дуйся, пусты́ни вели́кий моли́твенниче.

Ра́дуйся, благода́тный и́ноков путевождю́ и наста́вниче.

Ра́дуйся, о́тче Стилиа́не, пресла́вный чудотво́рче.

Конда́к 2.

Ви́дя чистоту́ се́рдца твоего́, о́тче Стилиа́не, Всеви́дец Госпо́дь испо́лни ду́шу твою́ благода́ти Своея́ и освяти́ ю́ в сосу́д Ду́ха Свята́го, да ви́дящии тя́ восхва́лят Бо́га Вседержи́теля и, взе́мши на ра́мо ки́йждо кре́ст сво́й, во сле́д Ему́ гряде́т, воспева́я: Аллилу́иа.

И́кос 2.

Ра́зумом, просвеще́нным от Го́спода, испо́лнен бы́в, преподо́бне, не попусти́л еси́ страсте́м в души́ твое́й воцари́тися, си́лою Бо́жиею вся́ хи́трости тле́ннаго и вре́меннаго жития́ отража́я. Те́мже, усе́рдие твое́ похваля́юще, вопие́м ти́:

Ра́дуйся, земли́ Пафлаго́нския похвало́.

Ра́дуйся, Це́ркви Христо́вы зерца́ло.

Ра́дуйся, на земли́, я́ко на небеси́ пожи́вый.

Ра́дуйся, невозвра́тно за Го́сподом после́довавый.

Ра́дуйся, моли́твы, поста́ и воздержа́ния храни́телю.

Ра́дуйся, и́стиннаго богопочита́ния насади́телю.

Ра́дуйся, смире́нием ми́р души́ своея́ стяжа́вый.

Ра́дуйся, тле́нная и вре́менная ми́ра сего́ презре́вый.

Ра́дуйся, от Го́спода да́р чудотворе́ния получи́вый.

Ра́дуйся, врага́ злоко́зненнаго низложи́вый.

Ра́дуйся, о́тче Стилиа́не, пресла́вный чудотво́рче.

Конда́к 3.

Си́лою Боже́ственныя любве́, е́юже испо́лнено бы́сть се́рдце твое́, укрепля́емый, свя́те Стилиа́не, вся́ име́ния твоя́ ни́щей бра́тии разда́л еси́ и, ко бра́тии и́ноческой сопричте́нный, сла́дце воспева́л еси́ Бо́гу: Аллилу́иа.

И́кос 3.

Име́я в се́рдце свое́м жела́ние ве́лие к непреста́нному восхожде́нию ле́ствицею духо́вною и уедине́ние возлюби́в, бра́тию свою́ оста́вил еси́, подви́жниче многотру́дный, и в пеще́ру пресели́вся, дни́ и но́щи в славосло́вии Бо́га пребыва́л еси́. Таково́му твоему́ дерзнове́нию дивя́щеся, восхваля́ем тя́:

Ра́дуйся, Го́спода все́м се́рдцем возлюби́вый.

Ра́дуйся, Ца́рствия Небе́снаго взыска́вый.

Ра́дуйся, му́дре ко спасе́нию стопы́ своя́ напра́вивый.

Ра́дуйся, Бо́га доброде́тельным житие́м просла́вивый.

Ра́дуйся, вели́ких дарова́ний вмести́лище.

Ра́дуйся, трезве́ния и воздержа́ния храни́лище.

Ра́дуйся, я́ко житию́ безпло́тных поревнова́л еси́.

Ра́дуйся, я́ко по́двигом дре́вних отце́в пустынножи́телей подража́л еси́.

Ра́дуйся, Боже́ственною благода́тию сердца́ моля́щихся тебе́ напая́яй.

Ра́дуйся, благода́тныя исцеле́ния де́тем ма́лым источа́яй.

Ра́дуйся, о́тче Стилиа́не, пресла́вный чудотво́рче.

Конда́к 4.

Бу́рю по́мыслов и страсте́й безбе́дно претерпе́л еси́, о́тче преподо́бне, и приста́нище ти́хое Христа́ обре́л еси́, Ему́же во мно́зе долготерпе́нии неле́ностно рабо́тая воспева́л еси́: Аллилу́иа.

И́кос 4

Слы́шавше о богоуго́днем житии́ твое́м, о́тче Стилиа́не, мно́гия стра́ждущия и немощны́я к пеще́ре твое́й прихожда́ху и, наставле́нием твои́м внима́я, в и́стинней ве́ре укрепля́хуся, в печа́лех утеше́ние обрета́ху и во гресе́х сле́зное покая́ние приноша́ху. Сего́ ра́ди ублажа́ем тя́:

Ра́дуйся, свети́льниче присногоря́щий, пу́ть спасе́ния освеща́яй.

Ра́дуйся, кри́не пусты́нный, свя́тостию благоуха́яй.

Ра́дуйся, ра́бе Госпо́день, благи́й и ве́рный.

Ра́дуйся, небе́сными дарова́нии обогаще́нный.

Ра́дуйся, я́ко пред Престо́лом Царя́ Небе́снаго предстои́ши.

Ра́дуйся, я́ко Бо́гу моли́твы о на́с прино́сиши.

Ра́дуйся, Го́спода кро́ткий и смире́нный служи́телю.

Ра́дуйся, за́поведей Бо́жиих ре́вностный исполни́телю.

Ра́дуйся, я́ко милосе́рдие Отца́ Небе́снаго к на́м приклоня́еши.

Ра́дуйся, я́ко любо́вию к Бо́гу сердца́ на́ша исполня́еши.

Ра́дуйся, о́тче Стилиа́не, пресла́вный чудотво́рче.

Конда́к 5.

Боготе́чней звезде́ уподо́бился еси́, преподо́бне о́тче, све́том благочести́ваго жития́ твоего́ пусты́ню освяща́я и вся́ приходя́щия к тебе́ уче́нием Христо́вым просвеща́я и ве́ровати во Еди́наго и́стиннаго Бо́га науча́я, да ку́пно с тобо́ю воспева́ют: Аллилу́иа.

И́кос 5.

Ви́девше, я́ко ча́да ма́лыя незло́биви су́ть, и словесе́м Ева́нгельским внима́я: «Ами́нь глаго́лю ва́м, а́ще не обратите́ся и бу́дете я́ко де́ти, не вни́дете в Ца́рство Небе́сное», ве́ру такову́ю стяжа́л еси́, преподо́бне о́тче, и благода́ть от Го́спода моли́тися о ча́дех восприя́л еси́. Мы́ же, воспева́я вели́чия Бо́жия, на тебе́ явле́нная, глаго́лем ти́ си́це:

Ра́дуйся, младе́нцев бла́гостный попечи́телю.

Ра́дуйся, ма́терей боле́знующих о ча́дех свои́х уте́шителю.

Ра́дуйся, возложе́нием ру́к не́мощи младе́нцев исцеля́вый.

Ра́дуйся, ве́ру чи́стую и и́скреннюю в себе́ стяжа́вый.

Ра́дуйся, я́ко ча́дом ма́лым покрови́тельствуеши.

Ра́дуйся, я́ко за безча́дных роди́телей о дарова́нии и́м ча́д Бо́га умоля́еши.

Ра́дуйся, душе́вныя и теле́сныя неду́ги исцеля́яй.

Ра́дуйся, ко благочести́вому житию́ побужда́яй.

Ра́дуйся, те́плый на́ш моли́твенниче.

Ра́дуйся, ми́лостивый на́ш засту́пниче.

Ра́дуйся, о́тче Стилиа́не, пресла́вный чудотво́рче.

Конда́к 6.

Пропове́дником ева́нгельския кро́тости бы́л еси́, преподо́бне о́тче, о́бразом жития́ твоего́ все́м показу́я, я́ко вся́ возмо́жна челове́ку о укрепля́ющем Бо́зе, Его́же благода́тию и на́ша сердца́ во и́стинней ве́ре укрепи́ и бу́ди на́м ско́рый помо́щник и те́плый моли́твенник, вопию́щим о тебе́ Бо́гу: Аллилу́иа.

И́кос 6.

Возсия́л еси́ я́ко свети́льник, на све́щнице церко́вней поста́вленный, свя́те Стилиа́не, да вси́ ви́дящии мно́гая чудеса́ исцеле́ний тобо́ю твори́мая и при́сно явля́емая, восхва́лят Бо́га, ди́внаго во святы́х Свои́х, тебе́ же воспою́т сицева́я:

Ра́дуйся, равноа́нгельный слуго́ Госпо́день.

Ра́дуйся, обита́лище Ду́ха Свята́го.

Ра́дуйся, благоче́стием себе́ украси́вый.

Ра́дуйся, в сосу́д благоуха́нный ду́шу твою́ обрати́вый.

Ра́дуйся, я́ко на земли́ и́мя твое́ прославля́ется.

Ра́дуйся, я́ко сла́достию небе́сною наслажда́ешися.

Ра́дуйся, жа́жду духо́вную утоли́вый.

Ра́дуйся, на небесе́х оби́тель себе́ сотвори́вый.

Ра́дуйся, я́ко со А́нгелы Го́спода воспева́еши.

Ра́дуйся, я́ко в ли́це преподо́бных пребыва́еши.

Ра́дуйся, о́тче Стилиа́не, пресла́вный чудотво́рче.

Конда́к 7.

Хотя́ яви́ти ми́ру но́ваго исто́чника ми́лости Своея́ неоскудева́ющия, Христе́ Бо́же на́ш, дарова́л еси́ на́м предста́теля и моли́твенника к Тебе́ дерзнове́ннаго – преподо́бнаго Стилиа́на, да Тя́, Всеблага́го Бо́га на́шего сла́вяще, во умиле́нии серде́чнем зове́м: Аллилу́иа.

И́кос 7.

Но́ваго хода́тая и засту́пника и́мамы тя́ пред Бо́гом, блаже́нне Стилиа́не, ты́ бо душе́ю кро́ткою и ми́лостивою непреста́нно мо́лишися Го́сподеви, о е́же ниспосла́ти благода́тную по́мощь все́м лю́дем, сла́вящим Его́, Всеблага́го Отца́ на́шего Небе́снаго, и вопию́щим ти́ си́це:

Ра́дуйся, арома́ты ра́йскими благоуха́яй.

Ра́дуйся, неисчерпа́емый исто́чниче исцеле́ний.

Ра́дуйся, усе́рдный о на́с моли́твенниче.

Ра́дуйся, оби́димых кре́пкий засту́пниче.

Ра́дуйся, доброде́тельнаго жития́ учи́телю.

Ра́дуйся, немощны́х иску́сный цели́телю.

Ра́дуйся, в любви́ к Бо́гу пламене́вый.

Ра́дуйся, небе́сных бла́г возжеле́вый.

Ра́дуйся, пра́ведности на́с науча́яй.

Ра́дуйся, люби́ти Бо́га и бли́жняго своего́ на́с наставля́яй.

Ра́дуйся, о́тче Стилиа́не, пресла́вный чудотво́рче.

Конда́к 8.

Стра́нника и прише́льца помышля́л еси́ себе́ бы́ти в ми́ре се́м, преблаже́нне о́тче, оте́чествия го́рняго взыску́я и Небе́снаго Иерусали́ма граждани́ном бы́ти жела́я, в не́мже ны́не сла́дце воспева́еши Бо́гу пе́снь: Аллилу́иа.

И́кос 8.

Ве́сь распали́лся еси́ любо́вию к Сладча́йшему Иису́су, преподо́бне о́тче, дни́ и но́щи в моли́тве и по́двигах пребыва́я и, Ду́ха Свята́го испо́лнився, всему́ ми́ру моли́твенник изря́ден показа́лся еси́, ре́ки чуде́с источа́яй. Сего́ ра́ди, почита́я святу́ю па́мять твою́, во умиле́нии зове́м:

Ра́дуйся, на по́мощь тя́ призыва́ющих спаса́яй.

Ра́дуйся, неду́жных и стра́ждущих исцеля́яй.

Ра́дуйся, вра́жиих стре́л прогони́телю.

Ра́дуйся, диа́вольских наве́тов разори́телю.

Ра́дуйся, я́ко А́нгелы труды́ твои́ми возвесели́л еси́.

Ра́дуйся, я́ко диа́вола по́двигами твои́ми посрами́л еси́.

Ра́дуйся, непоколеби́мый сто́лпе и́ночествующих.

Ра́дуйся, ми́лостивый покрови́телю в супру́жестве живу́щих.

Ра́дуйся, при́сный о на́с к Бо́гу моли́твенниче.

Ра́дуйся, в беда́х ско́рый на́ш засту́пниче.

Ра́дуйся, о́тче Стилиа́не, пресла́вный чудотво́рче.

Конда́к 9.

Вся́кое естество́ удиви́л еси́, преди́вне о́тче, еди́наго бо Бо́га возлюби́в, в пусты́ни взыска́л еси́ Того́ равноа́нгельным житие́м твои́м, ны́не же на небесе́х блаже́нства ра́йскаго наслажда́ешися и воспева́еши Пресвяте́й Тро́ице: Аллилу́иа.

И́кос 9.

Вети́я многовеща́нныя не мо́гут по достоя́нию воспе́ти вся́ по́двиги и труды́ твоя́, преподо́бне о́тче, во сла́ву Го́спода тобо́ю твори́мыя. Мы́ же, душа́ми умиля́яся, богоуго́дное житие́ твое́ восхваля́ем пе́нии таковы́ми:

Ра́дуйся, и́стинному служе́нию Бо́гу на́с науча́яй.

Ра́дуйся, сердца́ на́ша ра́дости исполня́яй.

Ра́дуйся, я́ко безро́потному несе́нию креста́ на́с науча́еши.

Ра́дуйся, я́ко неду́ги на́ша душе́вныя и теле́сныя исцеля́еши.

Ра́дуйся, благоче́стия вода́ми жа́ждущия спасе́ния напои́вый.

Ра́дуйся, све́том Богопозна́ния ве́рныя просвети́вый.

Ра́дуйся, во бране́х со страстьми́ помо́щниче.

Ра́дуйся, младе́нцев от неду́гов защи́тниче.

Ра́дуйся, лампа́до любве́ неугаси́мая.

Ра́дуйся, ле́ствице на небеса́ возводя́щая.

Ра́дуйся, о́тче Стилиа́не, пресла́вный чудотво́рче.

Конда́к 10.

Спасти́ся хотя́щии от разли́чных напа́стей, бе́д и скорбе́й, тебе́, преподо́бне о́тче, предста́теля кре́пкаго и побо́рника непосты́днаго име́ют: прия́л бо еси́ от Бо́га благода́ть во вся́ких беда́х заступа́ти призыва́ющия на по́мощь и́мя твое́, да моли́твами твои́ми огражда́еми, благода́рно воспева́ем о тебе́ Спаси́телю на́шему: Аллилу́иа.

И́кос 10.

Стена́ тве́рдая и огражде́ние кре́пкое яви́лся еси́ ми́ру, преподо́бне о́тче Стилиа́не, хода́тайством бо твои́м Це́рковь Свята́я укрепля́ется, ми́р водворя́ется и вся́ во бла́го устроя́ется. Сего́ ра́ди приими́ от на́с сицева́я:

Ра́дуйся, от па́губных ересе́й отвраща́яй.

Ра́дуйся, о́чи на́ша душе́вныя просвеща́яй.

Ра́дуйся, я́ко благода́тию Бо́жиею сердца́ на́ша укрепля́еши.

Ра́дуйся, я́ко о проще́нии грехо́в на́ших Го́спода умоля́еши.

Ра́дуйся, спасе́нию ду́ш на́ших посо́бствуяй.

Ра́дуйся, на пу́ть пра́ведный на́с направля́яй.

Ра́дуйся, от ко́зней вра́жиих защи́тниче.

Ра́дуйся, на Стра́шнем Суде́ засту́пниче.

Ра́дуйся, щедро́т Бо́жиих ми́лостивый пода́телю.

Ра́дуйся, у Престо́ла Вседержи́теля предста́телю.

Ра́дуйся, о́тче Стилиа́не, пресла́вный чудотво́рче.

Конда́к 11.

Пе́снь хвале́бную прино́сим ти́, преблаже́нне о́тче, почита́ющии святу́ю па́мять твою́, ты́ же усе́рдно моли́ Святу́ю Тро́ицу о е́же изба́витися на́м от паде́ний грехо́вных и жи́знь ве́чную насле́довати, да непреста́нно зове́м Бо́гу: Аллилу́иа.

И́кос 11.

Светоза́рный свети́льник, от И́стиннаго Све́та озаря́емый, су́щим на земли́ явля́ешися, преподо́бне о́тче Стилиа́не, сердца́ бо ве́рных просвеща́еши и к ра́зуму Боже́ственному вся́ наставля́еши, да со умиле́нием зову́т ти́ сицева́я:

Ра́дуйся, на земли́ я́ко А́нгел пожи́вый.

Ра́дуйся, на небеси́ со святы́ми пребыва́яй.

Ра́дуйся, Го́споду житие́м свои́м угоди́вый.

Ра́дуйся, после́дователем стопа́м Его́ себе́ показа́вый.

Ра́дуйся, я́ко вене́ц безсме́ртия от Бо́га прия́л еси́.

Ра́дуйся, я́ко ра́йское блаже́нство со святы́ми унасле́довал еси́.

Ра́дуйся, во бде́нии пребыва́ти на́с наставля́яй.

Ра́дуйся, моли́твенно на́с покрыва́яй.

Ра́дуйся, в тя́жких обстоя́ниих на́ш помо́щниче.

Ра́дуйся, си́рых и немощны́х засту́пниче.

Ра́дуйся, о́тче Стилиа́не, пресла́вный чудотво́рче.

Конда́к 12.

Благода́ть да́нную ти́ от Го́спода ве́мы, преподо́бне о́тче, во е́же не то́кмо неду́жныя младе́нцы исцеля́ти и засту́пником и покрови́телем и́м бы́ти, оба́че и всему́ христиа́нскому ро́ду ми́лости своя́ низпосыла́ти; ве́руем, я́ко и по сме́рти вся́ сия́ твори́ши все́м, с ве́рою к чудотво́рным ико́нам твои́м припа́дающим, Бо́гу же о тебе́ вопию́щим: Аллилу́иа.

И́кос 12.

Пою́ще сла́вное житие́ твое́ и о блаже́ннем отше́ствии твое́м на небеса́ ра́дующеся, пречу́дне о́тче Стилиа́не, ублажа́ем тя́, я́ко уго́дника Бо́жия и ди́внаго чудотво́рца. Ты́ же, Бо́гу предстоя́, при́сно помина́й на́с, соверша́ющих любо́вию па́мять твою́ и со умиле́нием зову́щих ти́ такова́я:

Ра́дуйся, житие́ твое́ благочести́во сконча́вый.

Ра́дуйся, в ра́дость Го́спода твоего́ вше́дый.

Ра́дуйся, Го́рняго Иерусали́ма честне́йший граждани́не.

Ра́дуйся, ра́йских оби́телей досто́йный обита́телю.

Ра́дуйся, чту́щих тя́ благода́тный наста́вниче.

Ра́дуйся, притека́ющих к тебе́ бла́гостный покрови́телю.

Ра́дуйся, младе́нцев цели́телю.

Ра́дуйся, ю́ных наста́вниче.

Ра́дуйся, все́х призыва́ющих тя́ ми́луяй и пита́яй.

Ра́дуйся, и по кончи́не твое́й исцеле́ния оби́льно источа́яй.

Ра́дуйся, о́тче Стилиа́не, пресла́вный чудотво́рче.

Конда́к 13.

О всехва́льный и преди́вный уго́дниче Христо́в, преподо́бне о́тче Стилиа́не! Приими́ сие́ ма́лое моле́ние, от усе́рдия на́шего в похвалу́ тебе́ приноси́мое, и покры́й моли́твами твои́ми все́х притека́ющих к тебе́ с ве́рою и любо́вию, да покая́ние на́ше прии́мше, Госпо́дь и Бо́г на́ш прости́т на́м вся́ грехи́ на́ша и соприча́стники Ца́рствия Своего́ соде́лает, да вы́ну с тобо́ю и со все́ми святы́ми воспева́ем Ему́: Аллилу́иа.

Этот конда́к читается трижды, затем и́кос 1-й и конда́к 1-й.

Моли́тва.

О свяще́нная главо́, преподо́бне о́тче Стилиа́не! По́двигом до́брым подвиза́вся на земли́, на небесе́х восприя́л еси́ вене́ц пра́вды от Христа́ Бо́га на́шего. Те́мже на тво́й святы́й о́браз взира́юще, о пресла́внем сконча́нии жи́тельства твоего́ ра́дуемся и чти́м святу́ю па́мять твою́. Почита́юще же твое́ ве́лие дерзнове́ние пред Го́сподем, со смире́нием мо́лим тя́, преподо́бне о́тче: воззри́ у́бо благосе́рдым о́ком любве́ твоея́ на на́с, недосто́йных рабо́в твои́х, и потщи́ся богоприя́тным твои́м хода́тайством испроси́ти у Царя́ ца́рствующих и Го́спода госпо́дствующих, да проба́вит вели́кия и бога́тыя ми́лости Своя́ на на́с, гре́шных, да пода́ст на́м ду́х пра́выя ве́ры, ду́х любве́, ми́ра и ра́дости о Ду́се Свя́те, да изба́вит ны́ от вся́ких бе́д и напа́стей, да ниспо́слет вся́ поле́зная ко спасе́нию ду́ш на́ших. Е́й, свя́тче Бо́жий, не посрами́ упова́ния на́шего, е́же на тя́ по Бо́зе и Богоро́дице возлага́ем, но бу́ди на́м помо́щник и покрови́тель во спасе́ние, да сподо́бимся сконча́ти житие́ на́ше в покая́нии и восприи́мем ве́чная блага́я во Ца́рствии Христа́ Бо́га на́шего, и просла́вим человеколю́бие Отца́ и Сы́на и Свята́го Ду́ха, и твое́ свято́е заступле́ние, ны́не и при́сно и во ве́ки веко́в. Ами́нь.

А҆ка́ѳїстъ ст҃о́мꙋ прпⷣбномꙋ стилїа́нꙋ пафлаго́нскомꙋ.

Конда́къ а҃.

И҆збра́нный чꙋдотво́рче и҆ ᲂу҆го́дниче хрⷭ҇то́въ, ско́рый помо́щниче и҆ моли́твенниче на́шъ, прпⷣбне ѻ҆́тче стилїа́не, прославлѧ́ѧ просла́вльшаго тѧ̀ гдⷭ҇а, похва̑льнаѧ пѣ̑нїѧ прино́симъ тѝ, чтꙋ́щїи ст҃ꙋ́ю па́мѧть твою̀. Ты́ же, предстоѧ̀ пред̾ прⷭ҇то́ломъ вседержи́телѧ, воздви́гни ѡ҆ на́съ, грѣ́шныхъ, многомѡ́щныѧ моли̑твы твоѧ̑, взыва́ющихъ тѝ:

Ра́дꙋйсѧ, прпⷣбне ѻ҆́тче стилїа́не, пресла́вный чꙋдотво́рче.

І҆́косъ а҃.

А҆́гг҃лѡвъ творе́цъ и҆ всеѧ̀ тва̑ри созда́тель є҆щѐ ѿ ᲂу҆тро́бы мт҃рнїѧ и҆збра̀ тѧ̀, прпⷣбне стилїа́не, чꙋ́днымъ житїе́мъ свои́мъ на землѝ прославлѧ́ти трⷪ҇цꙋ ст҃ꙋ́ю, по бл҃же́ннѣй же кончи́нѣ твое́й ᲂу҆чинѝ тѧ̀ со ст҃ы́ми а҆́гг҃лы воспѣва́ти є҆мꙋ̀ пѣ́снь сладча́йшꙋю на нб҃сѝ. Мы́ же, таково́мꙋ бж҃їю бл҃говоле́нїю ѡ҆ тебѣ̀ ра́дꙋѧсѧ, пѣсносло́вимъ тѧ̀:

Ра́дꙋйсѧ, ст҃ы́ѧ цр҃кви похвало̀.

Ра́дꙋйсѧ, пафлаго́нїи крѣ́пкїй сто́лпе.

Ра́дꙋйсѧ, до́брагѡ воспита́нїѧ цвѣ́те бл҃гоꙋха́нный.

Ра́дꙋйсѧ, боже́ственнагѡ и҆збра́нїѧ сосꙋ́де благослове́нный.

Ра́дꙋйсѧ, гдⷭ҇а ѿ ю҆́ности возлюби́вый.

Ра́дꙋйсѧ, вѣ́рꙋ и҆ любо́вь въ се́рдце свое́мъ возрасти́вый.

Ра́дꙋйсѧ, цѣломꙋ́дрїе дꙋшѝ своеѧ̀ сохрани́вый.

Ра́дꙋйсѧ, смире́нїе вели́кое стѧжа́вый.

Ра́дꙋйсѧ, пꙋсты́ни вели́кїй моли́твенниче.

Ра́дꙋйсѧ, благода́тный и҆́нокѡвъ пꙋтевождю̀ и҆ наста́вниче.

Ра́дꙋйсѧ, ѻ҆́тче стилїа́не, пресла́вный чꙋдотво́рче.

Конда́къ в҃.

Ви́дѧ чистотꙋ̀ се́рдца твоегѡ̀, ѻ҆́тче стилїа́не, всеви́децъ гдⷭ҇ь и҆спо́лни дꙋ́шꙋ твою̀ благода́ти своеѧ̀ и҆ ѡ҆свѧтѝ ю҆̀ въ сосꙋ́дъ дх҃а ст҃а́гѡ, да ви́дѧщїи тѧ̀ восхва́лѧтъ бг҃а вседержи́телѧ и҆, взе́мши на ра́мо кі́йждо крⷭ҇тъ сво́й, во слѣ́дъ є҆мꙋ̀ грѧде́тъ, воспѣва́ѧ: А҆ллилꙋ́їа.

І҆́косъ в҃.

Ра́зꙋмомъ, просвѣще́ннымъ ѿ гдⷭ҇а, и҆спо́лненъ бы́въ, прпⷣбне, не попꙋсти́лъ є҆сѝ страсте́мъ въ дꙋшѝ твое́й воцари́тисѧ, си́лою бж҃їею всѧ̑ хи́трѡсти тлѣ́ннагѡ и҆ вре́меннагѡ житїѧ̀ ѿража́ѧ. Тѣ́мже, ᲂу҆се́рдїе твоѐ похвалѧ́юще, вопїе́мъ тѝ:

Ра́дꙋйсѧ, землѝ пафлаго́нскїѧ похвало̀.

Ра́дꙋйсѧ, цр҃кви хрⷭ҇то́вы зерца́ло.

Ра́дꙋйсѧ, на землѝ, ꙗ҆́кѡ на нб҃сѝ пожи́вый.

Ра́дꙋйсѧ, невозвра́тнѡ за гдⷭ҇омъ послѣ́довавый.

Ра́дꙋйсѧ, моли́твы, поста̀ и҆ воздержа́нїѧ храни́телю.

Ра́дꙋйсѧ, и҆́стиннагѡ бг҃опочита́нїѧ насади́телю.

Ра́дꙋйсѧ, смире́нїемъ ми́ръ дꙋшѝ своеѧ̀ стѧжа́вый.

Ра́дꙋйсѧ, тлѣ̑ннаѧ и҆ вре́мєннаѧ ми́ра сегѡ̀ презрѣ́вый.

Ра́дꙋйсѧ, ѿ гдⷭ҇а да́ръ чꙋдотворе́нїѧ полꙋчи́вый.

Ра́дꙋйсѧ, врага̀ ѕлоко́зненнагѡ низложи́вый.

Ра́дꙋйсѧ, ѻ҆́тче стилїа́не, пресла́вный чꙋдотво́рче.

Конда́къ г҃.

Си́лою бжⷭ҇твенныѧ любвѐ, є҆́юже и҆спо́лнено бы́сть се́рдце твоѐ, ᲂу҆крѣплѧ́емый, ст҃е стилїа́не, всѧ̑ и҆мѣ̑нїѧ твоѧ̑ ни́щей бра́тїи разда́лъ є҆сѝ и҆, ко бра́тїи и҆́ноческой сопричте́нный, сла́дцѣ воспѣва́лъ є҆сѝ бг҃ꙋ: а҆ллилꙋ́їа.

І҆́косъ г҃.

И҆мѣ́ѧ въ се́рдце свое́мъ жела́нїе ве́лїе къ непреста́нномꙋ восхожде́нїю лѣ́ствицею дꙋхо́вною и҆ ᲂу҆едине́нїе возлюби́въ, бра́тїю свою̀ ѡ҆ста́вилъ є҆сѝ, подви́жниче многотрꙋ́дный, и҆ въ пеще́рꙋ пресели́всѧ, днѝ и҆ но́щи въ славосло́вїи бг҃а пребыва́лъ є҆сѝ. Таково́мꙋ твоемꙋ̀ дерзнове́нїю дивѧ́щесѧ, восхвалѧ́емъ тѧ̀:

Ра́дꙋйсѧ, гдⷭ҇а всѣ́мъ се́рдцемъ возлюби́вый.

Ра́дꙋйсѧ, црⷭ҇твїѧ нбⷭ҇нагѡ взыска́вый.

Ра́дꙋйсѧ, мꙋ́дре ко сп҃се́нїю стѡпы̀ своѧ̑ напра́вивый.

Ра́дꙋйсѧ, бг҃а добродѣ́тельнымъ житїе́мъ просла́вивый.

Ра́дꙋйсѧ, вели́кихъ дарова́нїй вмести́лище.

Ра́дꙋйсѧ, трезвѣ́нїѧ и҆ воздержа́нїѧ храни́лище.

Ра́дꙋйсѧ, ꙗ҆́кѡ житїю̀ безпло́тныхъ поревнова́лъ є҆сѝ.

Ра́дꙋйсѧ, ꙗ҆́кѡ подвигѡ́мъ дре́внихъ ѻ҆тцє́въ пꙋстынножи́телей подража́лъ є҆сѝ.

Ра́дꙋйсѧ, бжⷭ҇твенною бл҃года́тїю сердца̀ молѧ́щихсѧ тебѣ̀ напаѧ́ѧй.

Ра́дꙋйсѧ, блгⷣтныѧ и҆сцѣле́нїѧ дѣ́темъ ма́лымъ и҆сточа́ѧй.

Ра́дꙋйсѧ, ѻ҆́тче стилїа́не, пресла́вный чꙋдотво́рче.

Конда́къ д҃.

Бꙋ́рю по́мыслѡвъ и҆ страсте́й безбѣ́днѡ претерпѣ́лъ є҆сѝ, ѻ҆́тче прпⷣбне, и҆ приста́нище ти́хое хрⷭ҇та̀ ѡ҆брѣ́лъ є҆сѝ, є҆мꙋ́же во мно́зѣ долготерпѣ́нїи нелѣ́ностнѡ рабо́таѧ воспѣва́лъ є҆сѝ: а҆ллилꙋ́їа.

І҆́косъ д҃.

Слы́шавше ѡ҆ бг҃оꙋго́днѣмъ житїѝ твое́мъ, ѻ҆́тче стилїа́не, мно́гїѧ стра́ждꙋщїѧ и҆ немощны́ѧ къ пеще́рѣ твое́й прихожда́хꙋ и҆, наставлє́нїемъ твои̑мъ внима́ѧ, въ и҆́стиннѣй вѣ́рѣ ᲂу҆крѣплѧ́хꙋсѧ, въ печа́лехъ ᲂу҆тѣше́нїе ѡ҆брѣта́хꙋ и҆ во грѣсѣ́хъ сле́зное покаѧ́нїе приноша́хꙋ. Сегѡ̀ ра́ди ᲂу҆блажа́емъ тѧ̀:

Ра́дꙋйсѧ, свѣти́льниче присногорѧ́щїй, пꙋ́ть спⷭ҇нїѧ ѡ҆свѣща́ѧй.

Ра́дꙋйсѧ, крі́не пꙋсты́нный, ст҃остїю бл҃гоꙋха́ѧй.

Ра́дꙋйсѧ, ра́бе гдⷭ҇ень, бл҃гі́й и҆ вѣ́рный.

Ра́дꙋйсѧ, нбⷭ҇ными дарова̑нїи ѡ҆богаще́нный.

Ра́дꙋйсѧ, ꙗ҆́кѡ пред̾ прⷭ҇то́ломъ цр҃ѧ̀ нбⷭ҇нагѡ предстои́ши.

Ра́дꙋйсѧ, ꙗ҆́кѡ бг҃ꙋ моли́твы ѡ҆ на́съ прино́сиши.

Ра́дꙋйсѧ, гдⷭ҇а кро́ткїй и҆ смире́нный слꙋжи́телю.

Ра́дꙋйсѧ, за́повѣдей бж҃їихъ ре́вностный и҆сполни́телю.

Ра́дꙋйсѧ, ꙗ҆́кѡ млⷭ҇рдїе ѻ҆ц҃а̀ нбⷭ҇нагѡ къ на́мъ приклонѧ́еши.

Ра́дꙋйсѧ, ꙗ҆́кѡ любо́вїю къ бг҃ꙋ сердца̀ на́ша и҆сполнѧ́еши.

Ра́дꙋйсѧ, ѻ҆́тче стилїа́не, пресла́вный чꙋдотво́рче.

Конда́къ є҃.

Бг҃оте́чнѣй ѕвѣздѣ̀ ᲂу҆подо́билсѧ є҆сѝ, прпⷣбне ѻ҆́тче, свѣ́томъ бл҃гочести́вагѡ житїѧ̀ твоегѡ̀ пꙋсты́ню ѡ҆сщ҃а́ѧ и҆ всѧ̑ приходѧ́щыѧ къ тебѣ̀ ᲂу҆че́нїемъ хрⷭ҇то́вымъ просвѣща́ѧ и҆ вѣ́ровати во є҆ди́наго и҆́стиннаго бг҃а наꙋча́ѧ, да кꙋ́пнѡ съ тобо́ю воспѣва́ютъ: а҆ллилꙋ́їа.

І҆́косъ є҃.

Ви́дѣвше, ꙗ҆́кѡ ча́да ма́лыѧ неѕло́биви сꙋ́ть, и҆ словесє́мъ є҆ѵⷢ҇льскимъ внима́ѧ: а҆ми́нь гл҃го́лю ва́мъ, а҆́ще не ѡ҆братите́сѧ и҆ бꙋ́дете ꙗ҆́кѡ дѣ́ти, не вни́дете въ црⷭ҇тво нбⷭ҇ное, вѣ́рꙋ таковꙋ́ю стѧжа́лъ є҆сѝ, прпⷣбнѣ ѻ҆́тче, и҆ блгⷣть ѿ гдⷭ҇а моли́тисѧ ѡ҆ ча́дѣхъ воспрїѧ́лъ є҆сѝ. Мы́ же, воспѣва́ѧ вели̑чїѧ бж҃їѧ, на тебѣ̀ ꙗ҆влє́ннаѧ, глаго́лемъ тѝ си́це:

Ра́дꙋйсѧ, младе́нцєвъ бла́гостный попечи́телю.

Ра́дꙋйсѧ, ма́терей болѣ́знꙋющихъ ѡ҆ ча́дѣхъ свои́хъ ᲂу҆тѣ́шителю.

Ра́дꙋйсѧ, возложе́нїемъ рꙋ́къ не́мѡщи младе́нцєвъ и҆сцѣлѧвый.

Ра́дꙋйсѧ, вѣ́рꙋ чи́стꙋю и҆ и҆́скреннюю въ себѣ̀ стѧжа́вый.

Ра́дꙋйсѧ, ꙗ҆́кѡ ча́дѡмъ ма́лымъ покрови́тельствꙋеши.

Ра́дꙋйсѧ, ꙗ҆́кѡ за безча́дныхъ роди́телей ѡ҆ дарова́нїи и҆̀мъ ча́дъ бг҃а ᲂу҆молѧ́еши.

Ра́дꙋйсѧ, дꙋшє́вныѧ и҆ тѣлє́сныѧ недꙋ́ги и҆сцѣлѧ́ѧй.

Ра́дꙋйсѧ, ко благочести́вомꙋ житїю̀ побꙋжда́ѧй.

Ра́дꙋйсѧ, те́плый на́шъ моли́твенниче.

Ра́дꙋйсѧ, ми́лостивый на́шъ застꙋ́пниче.

Ра́дꙋйсѧ, ѻ҆́тче стилїа́не, пресла́вный чꙋдотво́рче.

Конда́къ ѕ҃.

Проповѣ́дникомъ є҆ѵа́нгельскїѧ кро́тости бы́лъ є҆сѝ, прпⷣбне ѻ҆́тче, ѡ҆́бразомъ житїѧ̀ твоегѡ̀ всѣ̑мъ показꙋ́ѧ, ꙗ҆́кѡ всѧ̑ возмо́жна человѣ́кꙋ ѡ҆ ᲂу҆крѣплѧ́ющемъ бз҃ѣ, є҆го́же бл҃года́тїю и҆ на́ша сердца̀ во и҆́стиннѣй вѣ́рѣ ᲂу҆крѣпѝ и҆ бꙋ́ди на́мъ ско́рый помо́щникъ и҆ те́плый моли́твенникъ, вопїю́щымъ ѡ҆ тебѐ бг҃ꙋ: А҆ллилꙋ́їа.

І҆́косъ ѕ҃.

Возсїѧ́лъ є҆сѝ ꙗ҆́кѡ свѣти́льникъ, на свѣ́щницѣ цр҃ко́внѣй поста́вленный, свѧ́те стилїа́не, да всѝ ви́дѧщїи мнѡ́гаѧ чꙋдеса̀ и҆сцѣле́нїй тобо́ю твори̑маѧ и҆ при́снѡ ꙗ҆влѧ́ємаѧ, восхва́лѧтъ бо́га, ди́внаго во ст҃ы́хъ свои́хъ, тебѣ̀ же воспою́тъ сицєва́ѧ:

Ра́дꙋйсѧ, равноа́гг҃льный слꙋго̀ гдⷭ҇ень.

Ра́дꙋйсѧ, ѡ҆бита́лище дх҃а ст҃а́гѡ.

Ра́дꙋйсѧ, бл҃гоче́стїемъ себѣ̀ ᲂу҆краси́вый.

Ра́дꙋйсѧ, въ сосꙋ́дъ бл҃гоꙋха́нный дꙋ́шꙋ твою̀ ѡ҆брати́вый.

Ра́дꙋйсѧ, ꙗ҆́кѡ на землѝ и҆́мѧ твоѐ прославлѧ́етсѧ.

Ра́дꙋйсѧ, ꙗ҆́кѡ сла́достїю нбⷭ҇ною наслажда́ешисѧ.

Ра́дꙋйсѧ, жа́ждꙋ дх҃о́внꙋю ᲂу҆толи́вый.

Ра́дꙋйсѧ, на нб҃сѣ́хъ ѡ҆би́тель себѣ̀ сотвори́вый.

Ра́дꙋйсѧ, ꙗ҆́кѡ со а҆́гг҃лы гдⷭ҇а воспѣва́еши.

Ра́дꙋйсѧ, ꙗ҆́кѡ въ ли́цѣ прпⷣбныхъ пребыва́еши.

Ра́дꙋйсѧ, ѻ҆́тче стилїа́не, пресла́вный чꙋдотво́рче.

Конда́къ з҃.

Хотѧ̀ ꙗ҆ви́ти мі́рꙋ но́ваго и҆сто́чника млⷭ҇ти своеѧ̀ неѡскꙋдѣва́ющїѧ, хрⷭ҇тѐ бж҃е на́шъ, дарова́лъ є҆сѝ на́мъ предста́телѧ и҆ моли́твенника къ тебѣ̀ дерзнове́ннагѡ прпⷣбнаго стилїа́на, да тѧ̀, всебл҃га́гѡ бг҃а на́шегѡ сла́вѧще, во ᲂу҆миле́нїи серде́чнѣмъ зове́мъ: А҆ллилꙋ́їа.

І҆́косъ з҃.

Но́ваго хода́таѧ и҆ застꙋ́пника и҆́мамы тѧ̀ пред̾ бг҃омъ, блаже́нне стилїа́не, ты́ бо дꙋше́ю кро́ткою и҆ ми́лостивою непреста́ннѡ мо́лишисѧ гдⷭ҇ви, ѡ҆ є҆́же ниспосла́ти бл҃года́тнꙋю по́мощь всѣ̑мъ лю́демъ, сла́вѧщымъ є҆го̀, всебл҃га́гѡ ѻ҆ц҃а̀ на́шегѡ нбⷭ҇нагѡ, и҆ вопїю́щымъ тѝ си́це:

Ра́дꙋйсѧ, а҆рѡма́ты ра́йскими бл҃гоꙋха́ѧй.

Ра́дꙋйсѧ, неисчерпа́емый и҆сто́чниче и҆сцѣле́нїй.

Ра́дꙋйсѧ, ᲂу҆се́рдный ѡ҆ на́съ моли́твенниче.

Ра́дꙋйсѧ, ѡ҆би́димыхъ крѣ́пкїй застꙋ́пниче.

Ра́дꙋйсѧ, добродѣ́тельнагѡ житїѧ̀ ᲂу҆чи́телю.

Ра́дꙋйсѧ, немощны́хъ и҆скꙋ́сный цѣли́телю.

Ра́дꙋйсѧ, въ любвѝ къ бг҃ꙋ пламенѣ́вый.

Ра́дꙋйсѧ, нбⷭ҇ныхъ бл҃гъ возжелѣ́вый.

Ра́дꙋйсѧ, пра́ведности на́съ наꙋча́ѧй.

Ра́дꙋйсѧ, люби́ти бг҃а и҆ бли́жнѧго своегѡ̀ на́съ наставлѧ́ѧй.

Ра́дꙋйсѧ, ѻ҆́тче стилїа́не, пресла́вный чꙋдотво́рче.

Конда́къ и҃.

Стра́нника и҆ прише́льца помышлѧ́лъ є҆сѝ себѐ бы́ти въ мі́рѣ се́мъ, пребл҃же́нне ѻ҆́тче, ѻ҆те́чествїѧ го́рнѧгѡ взыскꙋ́ѧ и҆ нбⷭ҇нагѡ і҆ерⷭ҇ли́ма граждани́номъ бы́ти жела́ѧ, въ не́мже ны́нѣ сла́дцѣ воспѣва́еши бг҃ꙋ пѣ́снь: А҆ллилꙋ́їа.

І҆́косъ и҃.

Ве́сь распали́лсѧ є҆сѝ любо́вїю къ сладча́йшемꙋ і҆и҃сꙋ, прпⷣбне ѻ҆́тче, днѝ и҆ но́щи въ моли́твѣ и҆ по́двигахъ пребыва́ѧ и҆, дх҃а ст҃а́гѡ и҆спо́лнивсѧ, всемꙋ̀ мі́рꙋ моли́твенникъ и҆зрѧ́денъ показа́лсѧ є҆сѝ, рѣ́ки чꙋде́съ и҆сточа́ѧй. Сегѡ̀ ра́ди, почита́ѧ ст҃ꙋ́ю па́мѧть твою̀, во ᲂу҆миле́нїи зове́мъ:

Ра́дꙋйсѧ, на по́мощь тѧ̀ призыва́ющихъ сп҃са́ѧй.

Ра́дꙋйсѧ, недꙋ́жныхъ и҆ стра́ждꙋщихъ и҆сцѣлѧ́ѧй.

Ра́дꙋйсѧ, вра́жїихъ стрѣ́лъ прогони́телю.

Ра́дꙋйсѧ, дїа́вольскихъ навѣ́тѡвъ разори́телю.

Ра́дꙋйсѧ, ꙗ҆́кѡ а҆́гг҃лы трꙋды̑ твои́ми возвесели́лъ є҆сѝ.

Ра́дꙋйсѧ, ꙗ҆́кѡ дїа́вола по́двигами твои́ми посрами́лъ є҆сѝ.

Ра́дꙋйсѧ, непоколеби́мый сто́лпе и҆́ночествꙋющихъ.

Ра́дꙋйсѧ, ми́лостивый покрови́телю въ сꙋпрꙋ́жествѣ живꙋ́щихъ.

Ра́дꙋйсѧ, при́сный ѡ҆ на́съ къ бг҃ꙋ моли́твенниче.

Ра́дꙋйсѧ, въ бѣда́хъ ско́рый на́шъ застꙋ́пниче.

Ра́дꙋйсѧ, ѻ҆́тче стилїа́не, пресла́вный чꙋдотво́рче.

Конда́къ ѳ҃.

Всѧ́кое є҆стество̀ ᲂу҆диви́лъ є҆сѝ, преди́вне ѻ҆́тче, є҆ди́наго бо бг҃а возлюби́въ, въ пꙋсты́ни взыска́лъ є҆сѝ того̀ равноа́гг҃льнымъ житїе́мъ твои́мъ, ны́нѣ же на нб҃сѣ́хъ бл҃же́нства ра́йскаго наслажда́ешисѧ и҆ воспѣва́еши прест҃ѣ́й трⷪ҇цѣ: А҆ллилꙋ́їа.

І҆́косъ ѳ҃.

Вѣті̑ѧ многовѣща̑нныѧ не мо́гꙋтъ по достоѧ́нїю воспѣ́ти всѧ̑ по́двиги и҆ трꙋды̑ твоѧ̑, прпⷣбне ѻ҆́тче, во сла́вꙋ гдⷭ҇а тобо́ю твори̑мыѧ. Мы́ же, дꙋша́ми ᲂу҆милѧ́ѧсѧ, бг҃оꙋго́дное житїѐ твоѐ восхвалѧ́емъ пѣ̑нїи таковы́ми:

Ра́дꙋйсѧ, и҆́стинномꙋ слꙋже́нїю бг҃ꙋ на́съ наꙋча́ѧй.

Ра́дꙋйсѧ, сердца̀ на́ша ра́дости и҆сполнѧ́ѧй.

Ра́дꙋйсѧ, ꙗ҆́кѡ безро́потномꙋ несе́нїю крⷭ҇та̀ на́съ наꙋча́еши.

Ра́дꙋйсѧ, ꙗ҆́кѡ недꙋ̑ги на́ша дꙋшє́вныѧ и҆ тѣлє́сныѧ и҆сцѣлѧ́еши.

Ра́дꙋйсѧ, бл҃гоче́стїѧ вода́ми жа́ждꙋщыѧ спⷭ҇нїѧ напои́вый.

Ра́дꙋйсѧ, свѣ́томъ бг҃опозна́нїѧ вѣ̑рныѧ просвѣти́вый.

Ра́дꙋйсѧ, во бранѣ́хъ со страстьмѝ помо́щниче.

Ра́дꙋйсѧ, младе́нцєвъ ѿ недꙋ́гѡвъ защи́тниче.

Ра́дꙋйсѧ, лампа́до любвѐ неꙋгаси́маѧ.

Ра́дꙋйсѧ, лѣ́ствице на нб҃са̀ возводѧ́щаѧ.

Ра́дꙋйсѧ, ѻ҆́тче стилїа́не, пресла́вный чꙋдотво́рче.

Конда́къ і҃.

Спⷭ҇ти́сѧ хотѧ́щїи ѿ разли́чныхъ напа́стей, бѣ́дъ и҆ скорбе́й, тебѐ, прпⷣбне ѻ҆́тче, предста́телѧ крѣ́пкаго и҆ побо́рника непосты́днаго и҆мѣ́ютъ: прїѧ́лъ бо є҆сѝ ѿ бг҃а блгⷣть во всѧ́кихъ бѣда́хъ застꙋпа́ти призыва́ющыѧ на по́мощь и҆́мѧ твоѐ, да моли́твами твои́ми ѡ҆гражда́еми, бл҃года́рнѡ воспѣва́емъ ѡ҆ тебѣ̀ сп҃си́телю на́шемꙋ: А҆ллилꙋ́їа.

І҆́косъ і҃.

Стѣна̀ тве́рдаѧ и҆ ѡ҆гражде́нїе крѣ́пкое ꙗ҆ви́лсѧ є҆сѝ мі́рꙋ, прпⷣбне ѻ҆́тче стилїа́не, хода́тайствомъ бо твои́мъ цр҃ковь ст҃а́ѧ ᲂу҆крѣплѧ́етсѧ, ми́ръ водворѧ́етсѧ и҆ всѧ̑ во бл҃го ᲂу҆строѧ́етсѧ. Сегѡ̀ ра́ди прїимѝ ѿ на́съ сицєва́ѧ:

Ра́дꙋйсѧ, ѿ па́гꙋбныхъ є҆ресе́й ѿвраща́ѧй.

Ра́дꙋйсѧ, ѻ҆́чи на́ша дꙋшє́вныѧ просвѣща́ѧй.

Ра́дꙋйсѧ, ꙗ҆́кѡ бл҃года́тїю бж҃їею сердца̀ на́ша ᲂу҆крѣплѧ́еши.

Ра́дꙋйсѧ, ꙗ҆́кѡ ѡ҆ проще́нїи грѣхѡ́въ на́шихъ гдⷭ҇а ᲂу҆молѧ́еши.

Ра́дꙋйсѧ, сп҃се́нїю дꙋ́шъ на́шихъ посо́бствꙋѧй.

Ра́дꙋйсѧ, на пꙋ́ть првⷣный на́съ направлѧ́ѧй.

Ра́дꙋйсѧ, ѿ ко́зней вра́жїихъ защи́тниче.

Ра́дꙋйсѧ, на стра́шнѣмъ сꙋдѣ̀ застꙋ́пниче.

Ра́дꙋйсѧ, щедрѡ́тъ бж҃їихъ млⷭ҇тивый пода́телю.

Ра́дꙋйсѧ, ᲂу҆ прⷭ҇то́ла вседержи́телѧ предста́телю.

Ра́дꙋйсѧ, ѻ҆́тче стилїа́не, пресла́вный чꙋдотво́рче.

Конда́къ а҃і.

Пѣ́снь хвале́бнꙋю прино́симъ тѝ, пребл҃же́нне ѻ҆́тче, почита́ющїи ст҃ꙋ́ю па́мѧть твою̀, ты̀ же ᲂу҆се́рднѡ молѝ ст҃ꙋ́ю трⷪ҇цꙋ ѡ҆ є҆́же и҆зба́витисѧ на́мъ ѿ паде́нїй грѣхо́вныхъ и҆ жи́знь вѣ́чнꙋю наслѣ́довати, да непреста́ннѡ зове́мъ бг҃ꙋ: А҆ллилꙋ́їа.

І҆́косъ а҃і.

Свѣтоза́рный свѣти́льникъ, ѿ и҆́стиннагѡ свѣ́та ѡ҆зарѧ́емый, сꙋ́щимъ на землѝ ꙗ҆влѧ́ешисѧ, прпⷣбне ѻ҆́тче стилїа́не, сердца́ бо вѣ́рныхъ просвѣща́еши и҆ къ ра́зꙋмꙋ бжⷭ҇твенномꙋ всѧ̑ наставлѧ́еши, да со ᲂу҆миле́нїемъ зовꙋ́тъ тѝ сицєва́ѧ:

Ра́дꙋйсѧ, на землѝ ꙗ҆́кѡ а҆́гг҃лъ пожи́вый.

Ра́дꙋйсѧ, на нб҃сѝ со ст҃ы́ми пребыва́ѧй.

Ра́дꙋйсѧ, гдⷭ҇ꙋ житїе́мъ свои́мъ ᲂу҆годи́вый.

Ра́дꙋйсѧ, послѣ́дователемъ стопа́мъ є҆гѡ̀ себѐ показа́вый.

Ра́дꙋйсѧ, ꙗ҆́кѡ вѣне́цъ безсме́ртїѧ ѿ бг҃а прїѧ́лъ є҆сѝ.

Ра́дꙋйсѧ, ꙗ҆́кѡ ра́йское бл҃же́нство со ст҃ы́ми ᲂу҆наслѣ́довалъ є҆сѝ.

Ра́дꙋйсѧ, во бдѣ́нїи пребыва́ти на́съ наставлѧ́ѧй.

Ра́дꙋйсѧ, моли́твеннѡ на́съ покрыва́ѧй.

Ра́дꙋйсѧ, въ тѧ́жкихъ ѡ҆бстоѧ́нїихъ на́шъ помо́щниче.

Ра́дꙋйсѧ, си́рыхъ и҆ немощны́хъ застꙋ́пниче.

Ра́дꙋйсѧ, ѻ҆́тче стилїа́не, пресла́вный чꙋдотво́рче.

Конда́къ в҃і.

Блгⷣть да́ннꙋю тѝ ѿ гдⷭ҇а вѣ́мы, прпⷣбне ѻ҆́тче, во є҆́же не то́кмо недꙋ̑жныѧ младе́нцы и҆сцѣлѧ́ти и҆ застꙋ́пникѡмъ и҆ покрови́телемъ и҆̀мъ бы́ти, ѻ҆ба́че и҆ всемꙋ̀ хрⷭ҇тїа́нскомꙋ ро́дꙋ млⷭ҇ти своѧ̑ низпосыла́ти: вѣ́рꙋемъ, ꙗ҆́кѡ и҆ по сме́рти всѧ̑ сїѧ̑ твори́ши всѣ̑мъ, съ вѣ́рою къ чꙋдотвѡ́рнымъ і҆кѡ́намъ твои́мъ припа́дающимъ, бг҃ꙋ же ѡ҆ тебѣ̀ вопїю́щымъ: А҆ллилꙋ́їа.

І҆́косъ в҃і.

Пою́ще сла́вное житїѐ твоѐ и҆ ѡ҆ бл҃же́ннѣмъ ѿше́ствїи твое́мъ на нб҃са̀ ра́дꙋющесѧ, пречꙋ́дне ѻ҆́тче стилїа́не, ᲂу҆блажа́емъ тѧ̀, ꙗ҆́кѡ ᲂу҆го́дника бж҃їѧ и҆ ди́внагѡ чꙋдотво́рца. Ты́ же, бг҃ꙋ предстоѧ̀, при́снѡ помина́й на́съ, соверша́ющихъ любо́вїю па́мѧть твою̀ и҆ со ᲂу҆миле́нїемъ зовꙋ́щихъ тѝ такѡва́ѧ:

Ра́дꙋйсѧ, житїѐ твоѐ бл҃гочести́вѡ сконча́вый.

Ра́дꙋйсѧ, въ ра́дость гдⷭ҇а твоегѡ̀ вше́дый.

Ра́дꙋйсѧ, го́рнѧгѡ і҆ерⷭ҇ли́ма честнѣ́йшїй граждани́не.

Ра́дꙋйсѧ, ра́йскихъ ѡ҆би́телей досто́йный ѡ҆бита́телю.

Ра́дꙋйсѧ, чтꙋ́щихъ тѧ̀ бл҃года́тный наста́вниче.

Ра́дꙋйсѧ, притека́ющихъ къ тебѣ̀ бла́гостный покрови́телю.

Ра́дꙋйсѧ, младе́нцєвъ цѣли́телю.

Ра́дꙋйсѧ, ю҆́ныхъ наста́вниче.

Ра́дꙋйсѧ, всѣ́хъ призыва́ющихъ тѧ̀ ми́лꙋѧй и҆ пита́ѧй.

Ра́дꙋйсѧ, и҆ по кончи́нѣ твое́й и҆сцѣлє́нїѧ ѻ҆би́льнѡ и҆сточа́ѧй.

Ра́дꙋйсѧ, ѻ҆́тче стилїа́не, пресла́вный чꙋдотво́рче.

Конда́къ г҃і.

Ѽ всехва́льный и҆ преди́вный ᲂу҆го́дниче хрⷭ҇то́въ, прпⷣбне ѻ҆́тче стилїа́не! прїимѝ сїѐ ма́лое моле́нїе, ѿ ᲂу҆се́рдїѧ на́шего въ похвалꙋ̀ тебѣ̀ приноси́мое, и҆ покры́й моли́твами твои́ми всѣ́хъ притека́ющихъ къ тебѣ̀ съ вѣ́рою и҆ любо́вїю, да покаѧ́нїе на́ше прїи́мше, гдⷭ҇ь и҆ бг҃ъ на́шъ прости́тъ на́мъ всѧ̑ грѣхѝ на́ша и҆ соприча́стники црⷭ҇твїѧ своегѡ̀ содѣ́лаетъ, да вы́нꙋ съ тобо́ю и҆ со всѣ́ми ст҃ы́ми воспѣва́емъ є҆мꙋ̀: А҆ллилꙋ́їа.

Се́й конда́къ гл҃го́ли три́жды, та́же і҆́косъ а҃-й и҆ конда́къ а҃-й.

Моли́тва.

Ѽ сщ҃е́ннаѧ главо̀, прпⷣбне ѻ҆́тче стилїа́не! по́двигомъ до́брымъ подвиза́всѧ на землѝ, на нб҃сѣ́хъ воспрїѧ́лъ є҆сѝ вѣне́цъ пра́вды ѿ хрⷭ҇та̀ бг҃а на́шегѡ. Тѣ́мже на тво́й ст҃ы́й ѻ҆́бразъ взира́юще, ѡ҆ пресла́внѣмъ сконча́нїи жи́тельства твоегѡ̀ ра́дꙋемсѧ и҆ чти́мъ ст҃ꙋ́ю па́мѧть твою̀. Почита́юще же твоѐ ве́лїе дерзнове́нїе пред̾ гдⷭ҇емъ, со смире́нїемъ мо́лимъ тѧ̀, прпⷣбне ѻ҆́тче: воззрѝ ᲂу҆̀бо бл҃госе́рдымъ ѻ҆́комъ любвѐ твоеѧ̀ на на́съ, недосто́йныхъ рабѡ́въ твои́хъ, и҆ потщи́сѧ бг҃опрїѧ́тнымъ твои́мъ хода́тайствомъ и҆спроси́ти ᲂу҆ цр҃ѧ̀ ца́рствꙋющихъ и҆ гдⷭ҇а госпо́дствꙋющихъ, да проба́витъ вели̑кїѧ и҆ бога̑тыѧ млⷭ҇ти своѧ̑ на на́съ, грѣ́шныхъ, да пода́стъ на́мъ дꙋ́хъ пра́выѧ вѣ́ры, дꙋ́хъ любвѐ, ми́ра и҆ ра́дости ѡ҆ дс҃ѣ ст҃ѣ, да и҆зба́витъ ны̀ ѿ всѧ́кихъ бѣ́дъ и҆ напа́стей, да низпо́слетъ всѧ̑ полє́знаѧ ко сп҃се́нїю дꙋ́шъ на́шихъ. Є҆́й, свѧ́тче бж҃їй, не посрамѝ ᲂу҆пова́нїѧ на́шегѡ, є҆́же на тѧ̀ по бз҃ѣ и҆ бцⷣѣ возлага́емъ, но бꙋ́ди на́мъ помо́щникъ и҆ покрови́тель во сп҃се́нїе, да сподо́бимсѧ сконча́ти житїѐ на́ше въ покаѧ́нїи и҆ воспрїи́мемъ вѣ̑чнаѧ бл҃га́ѧ во црⷭ҇твїи хрⷭ҇та̀ бг҃а на́шегѡ, и҆ просла́вимъ чл҃вѣколю́бїе ѻ҆ц҃а̀ и҆ сн҃а и҆ ст҃а́гѡ дх҃а, и҆ твоѐ ст҃о́е застꙋпле́нїе, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Ро­дил­ся в го­ро­де Адри­а­но­по­ле в Па­фла­го­нии, в Ма­лой Азии, в V ве­ке. Он был бла­го­сло­вен от чре­ва ма­те­ри сво­ей, и чем стар­ше ста­но­вил­ся, тем в боль­шей ме­ре по ми­ло­сти Бо­жи­ей Дух Свя­той по­се­лял­ся в нем. С дет­ско­го воз­рас­та он вы­ка­зы­вал ред­кое устрем­ле­ние к свя­той жиз­ни.

До­стиг­нув со­вер­шен­но­ле­тия, он раз­дал свое иму­ще­ство бед­ным. И ко­гда ни­че­го не оста­лось от от­цов­ско­го на­след­ства, пре­ис­пол­нен­ный об­лег­че­ния и ра­до­сти, ска­зал: "Я ски­нул тя­же­лый якорь, ко­то­рый дер­жал ме­ня на при­вя­зи же­ла­ний мо­е­го пад­ше­го те­ла. От­ныне от­крыт пе­ре­до мной путь к ис­тин­ной жиз­ни".

По­сле это­го свя­той при­нял мо­на­ше­ский по­стриг в од­ном из ма­ло­азий­ских мо­на­сты­рей. Бла­го­да­ря су­ро­вой ас­ке­зе он стя­жал доб­ро­де­те­ли нес­тя­жа­тель­но­сти, чи­сто­ты и по­слу­ша­ния. Ни­ка­ко­го иму­ще­ства у него не оста­лось, он жил в про­сто­те и ни­ще­те. Под­чи­няя свою во­лю стар­цу, он успеш­но бо­рол­ся с ис­ку­ше­ни­я­ми от бе­са, ми­ра и пло­ти.

За­тем, же­лая еще бли­же по­дой­ти к со­вер­шен­ству, он рас­про­щал­ся с бра­тья­ми и уда­лил­ся в без­люд­ную пу­сты­ню, где по­се­лил­ся в пе­ще­ре. Дни и но­щи он про­во­дил в мо­лит­ве и сла­во­сло­вии Бо­га. Мно­гие го­ды по­движ­ни­че­ской жиз­ни про­вел он в пу­стыне, до то­го как Гос­подь ре­шил явить лю­дям се­го "све­тиль­ни­ка свет­ла". Со вре­ме­нем в окру­ге раз­нес­лась мол­ва о свя­то­сти от­шель­ни­ка и мно­гие лю­ди, с ве­рой и бла­го­че­сти­ем, по­тя­ну­лись к его пе­ще­ре.

Глу­бо­ко за­па­ли в ду­шу свя­то­му Сти­ли­а­ну еван­гель­ские сло­ва: "ис­тин­но го­во­рю вам, ес­ли не об­ра­ти­тесь и не бу­де­те как де­ти, не вой­де­те в Цар­ство Небес­ное" (Мф.18:1-4). Гос­подь да­ро­вал ему бла­го­дать по­кро­ви­тель­ства ма­лы­шам. Ма­те­ри из близ­ле­жа­щих го­ро­дов и де­ре­вень, из­да­ле­ка при­но­си­ли ему сво­их боль­ных де­тей, и свя­той ис­це­лял их. До­стиг­нув пе­ще­ры, ма­те­ри па­да­ли пе­ред свя­тым на ко­ле­ни, сла­ви­ли Бо­га и мо­ли­ли о сво­ем ре­бен­ке. Свя­той Сти­ли­ан брал его на ру­ки, со сле­за­ми про­сил у Бо­га ис­це­ле­ния, и Гос­подь да­ро­вал его. Кро­ме то­го, по мо­лит­вам свя­то­го бес­плод­ные жен­щи­ны ста­но­ви­лись мно­го­дет­ны­ми ма­те­ря­ми.

Пре­ста­вил­ся свя­той Сти­ли­ан ко Гос­по­ду в глу­бо­кой ста­ро­сти.

По­чи­та­ние пре­по­доб­но­го Сти­ли­а­на рас­про­стра­ни­лось ши­ро­ко за пре­де­лы род­ной об­ла­сти и оста­ёт­ся силь­ным осо­бен­но в Церк­вах гре­че­ской тра­ди­ции. На Ру­си его имя оста­лось ма­ло­из­вест­ным. Как и в го­ды его зем­ной жиз­ни, к нему осо­бен­но при­бе­га­ют в мо­лит­вах об ис­це­ле­нии де­тей и из­бав­ле­ния от бес­пло­дия. На ико­нах свя­той изо­бра­жа­ет­ся дер­жа­щим на ру­ках спе­ле­ну­то­го мла­ден­ца.