Акафист святому великомученику Меркурию Кесарийскому

Одобрен: решение Св. Синода от 25 декабря 2012 года, журнал №131

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 07 декабря (24 ноября ст. ст.)

Утвержден для общецерковного использования.

Конда́к 1.

Избра́нному от во́инства земна́го в небе́сное, предстоя́щу Престо́лу Царя́ Сла́вы, великому́ченику Мерку́рию благогове́йное пе́ние прино́сим: моли́ся усе́рдно ко Го́споду за лю́ди, почита́ющия и во умиле́нии воспева́ющия тя́: Ра́дуйся, Мерку́рие, изря́дный уго́дниче Христо́в и во́ине непобеди́мый.

И́кос 1.

А́нгел Госпо́день, еще́ язы́чнику ти́ су́щу, Мерку́рие, предуказа́ твое́ служе́ние ко сла́ве и́мене Бо́жия, егда́ призва́ тя́ от Арме́нии в Ри́м и даде́ ти́ ме́ч на побе́ду, и́мже ди́вная сотвори́л еси́. Сего́ ра́ди приле́жно вопие́м:

Ра́дуйся, сосу́де, Бо́гом избра́нный;

Ра́дуйся, десни́цею Бо́жиею незри́мо води́мый.

Ра́дуйся, Сла́вою Бо́жиею прославля́емый;

Ра́дуйся, вре́менным ве́чному послужи́вый.

Ра́дуйся, А́нгелы укрепля́емый;

Ра́дуйся, в страда́нии вене́ц сла́вы получи́вый.

Ра́дуйся, всели́выйся в черто́ги ми́ра Го́рняго;

Ра́дуйся, моли́твенно не оставля́яй ми́ра до́льняго.

Ра́дуйся, Мерку́рие, изря́дный уго́дниче Христо́в и во́ине непобеди́мый.

Конда́к 2.

Ви́дя о́ком теле́сным ду́ха безпло́тнаго и уши́ма слы́ша глаго́лы: "Не забу́ди Го́спода Бо́га твоего́, егда́ победи́ши враго́в!", се́рдцем прия́л еси́, Мерку́рие, повеле́ние сие́ а́нгельское и во умиле́нии ре́кл еси́: Аллилу́иа.

И́кос 2.

Разуме́ти тща́щеся толи́кую си́лу твою́, дивля́хуся во́ини, о́крест тебе́ стоя́щии, толи́цей си́ле твое́й, не ве́дуще ору́жия, от А́нгела тебе́ вруче́ннаго; мы́ же, Ду́хом Святы́м позна́вше си́лу Бо́жию, в тебе́ явле́нную, навыко́хом пе́ти:

Ра́дуйся, ме́ч, вве́ренный Бо́гом, сохрани́вый;

Ра́дуйся, зало́г благода́ти в себе́ возрасти́вый.

Ра́дуйся, мече́м а́нгельским полки́ ва́рварския порази́вый;

Ра́дуйся, ве́рою пре́лесть и́дольскую низложи́вый.

Ра́дуйся, ра́дости ми́ра сего́ ни во что́же вмени́вый;

Ра́дуйся, ве́чней ра́дости себе́ угото́вавый.

Ра́дуйся, си́лу Бо́жию в себе́ яви́вый;

Ра́дуйся, повеле́ние а́нгелово испо́лнивый.

Ра́дуйся, Мерку́рие, изря́дный уго́дниче Христо́в и во́ине непобеди́мый.

Конда́к 3.

Си́лы Бо́жия в тебе́ не ве́дая, сла́вне Мерку́рие, Де́кий нечести́вый поста́ви тя́ над во́йском свои́м нача́льствовати: ты́ же, ни во что́ вменя́я ми́лости и да́ры его́, в нищете́ духо́вней Исто́чнику ми́лостей вся́ческих и щедро́т взыва́л еси́: Аллилу́иа.

И́кос 3.

Име́я А́нгела попече́ние о тебе́, свя́те Мерку́рие, воздвиза́юща тя́ не то́кмо от сна́ теле́снаго, но подвиза́юща на бо́дрствование духо́вное и по́прище страда́льческое, благода́рне подъя́л еси́ служе́ние сие́. Сего́ ра́ди вопие́м ти́ сицева́я:

Ра́дуйся, зре́нием А́нгелов небе́сных почте́нный;

Ра́дуйся, попече́нием и́х не оста́вленный.

Ра́дуйся, ко спасе́нию и́ми побужда́емый;

Ра́дуйся, Ду́ха Свята́го хра́ме освяще́нный.

Ра́дуйся, све́том нетле́нным сия́яй;

Ра́дуйся, пу́ть к жи́зни ве́чней освеща́яй.

Ра́дуйся, благове́стие Бо́жие прие́мляй;

Ра́дуйся, благодаре́ние о не́м воздая́й.

Ра́дуйся, Мерку́рие, изря́дный уго́дниче Христо́в и во́ине непобеди́мый.

Конда́к 4.

Бу́ря жите́йских смяте́ний не устраши́ тя́, до́блий во́ине Христо́в, егда́ воспомяну́л еси́ словеса́ роди́телева: блаже́нни во́ини Царя́ Небе́снаго, и устреми́лся еси́ се́рдцем твои́м в во́инство сие́, отреша́яся от по́честей земны́х, вопия́ Бо́гу: Аллилу́иа.

И́кос 4

Слы́ша вразумле́ние а́нгельское, воспомяну́л еси́ наставле́ние роди́телево, и, умили́вся се́рдцем, рыда́л еси́: "Увы́ мне́, гре́шному, ка́ко и́зсше душа́ моя́, не ве́дящи ко́рене богопозна́ния! Ка́ко предста́ну Ти́, Бо́же, в ча́с после́дний и сме́ртный, ко́е сло́во изреку́ во оправда́ние гре́шныя души́ моея́?" Мы́ же, таковы́м покая́нием вразумля́еми, глаго́лем ти́:

Ра́дуйся, слеза́ми ду́шу омы́вый;

Ра́дуйся, чи́ста себе́ Бо́гу яви́вый.

Ра́дуйся, покая́нию на́с науча́яй;

Ра́дуйся, ру́це к Бо́гу за ны́ воздева́яй.

Ра́дуйся, моли́твами твои́ми на́с спаса́яй;

Ра́дуйся, житие́м твои́м на́с вразумля́яй.

Ра́дуйся, о́браз чистоты́ в себе́ яви́вый;

Ра́дуйся, Це́рковь Христо́ву украси́вый.

Ра́дуйся, Мерку́рие, изря́дный уго́дниче Христо́в и во́ине непобеди́мый.

Конда́к 5.

Звездо́ю богоразу́мия наставля́емь, не прине́сл еси́ же́ртвы богоме́рзкия, жела́я после́довати пути́ Христо́ву и сподо́битися пи́ти ча́шу Его́. Сего́ ра́ди пре́дан, оклевета́н и зауше́н бы́л еси́, я́коже и Госпо́дь тво́й, во смире́нии прие́мля сия́ и вопия́: Аллилу́иа.

И́кос 5.

Ви́дя тя́, долготерпели́ве Мерку́рие, совле́кшася, по словеси́ апо́стольскому, ве́тхаго челове́ка с дея́ньми его́ и обле́кшася чрез очисти́тельная страда́ния в но́ваго, по о́бразу Бо́жию и подо́бию сотворе́ннаго, во умиле́нии пое́м ти́:

Ра́дуйся, же́ртву себе́ живу́ю Бо́гу яви́вый;

Ра́дуйся, зауше́нием стра́сти грехо́вныя умертви́вый.

Ра́дуйся, кро́вию креще́ние прия́вый;

Ра́дуйся, в не́м Ду́ха Бо́жия стяжа́вый.

Ра́дуйся, ве́рою житие́ преобрази́вый;

Ра́дуйся, ея́ ра́ди страда́ти изво́ливый.

Ра́дуйся, служе́нию любве́ поревнова́вый;

Ра́дуйся, наде́ждою ду́шу испо́лнивый.

Ра́дуйся, Мерку́рие, изря́дный уго́дниче Христо́в и во́ине непобеди́мый.

Конда́к 6.

Пропове́дника си́лы Бо́жия, я́же в тебе́, не ве́дая, Де́кий безбо́жный ужасе́ся. Мы́ же, благода́ти Бо́жия тя́ испо́лнена, я́ко ча́до Бо́жие, испове́дующе, вопие́м Творцу́ на́шему: Аллилу́иа.

И́кос 6.

Возсия́ све́т в души́ твое́й, страда́льче, егда́, отве́ржену ми́ром, в темни́цу ве́дому и опеча́лену, А́нгел яви́ся ти́ и глаго́ла: "Мужа́йся! Разреша́яй печа́ли вся́кия Госпо́дь зри́т тя́!" Мы́ же, толи́кому о тебе́ попече́нию дивя́щеся, зове́м:

Ра́дуйся, я́ко апо́стол Пе́тр, А́нгелом укрепля́емый;

Ра́дуйся, печа́ли вся́кия избавля́емый.

Ра́дуйся, христиа́нина себе́ испове́давый;

Ра́дуйся, ра́зумом Боже́ственным просвеще́нный.

Ра́дуйся, у́з теле́сных разреши́тися возжеле́вый;

Ра́дуйся, в ру́це Бо́жии себе́ преда́вый.

Ра́дуйся, Го́спода ве́рный служи́телю;

Ра́дуйся, Го́рняго Иерусали́ма жи́телю.

Ра́дуйся, Мерку́рие, изря́дный уго́дниче Христо́в и во́ине непобеди́мый.

Конда́к 7.

Хотя́ вразуми́ти нечести́ваго царя́, яви́лся еси́ тому́, великому́чениче, ре́к: "Исцеле́ние от Го́спода прия́х, да побежду́ тя́ и отца́ твоего́ диа́вола", – и та́ко глаго́ля, вопия́л еси́ в Тро́ице сла́вимому и покланя́емому Еди́ному Бо́гу: Аллилу́иа.

И́кос 7.

Но́вая муче́ния изобрете́ тебе́ науча́емый от диа́вола Де́кий нечести́вый: повеле́ истяза́ти тя́ мече́м и огне́м; ты́ же, ве́дая, я́ко гони́тель се́й не и́мать вла́сти над душе́ю твое́ю, смире́нно претерпе́л еси́ вся́, о ни́хже тебе́ пое́м:

Ра́дуйся, до́блестне истяза́ния терпе́вый;

Ра́дуйся, а́нгельскую пе́снь в страда́ниих воспе́вый.

Ра́дуйся, муче́нием вре́менным ве́чнаго изба́вленный;

Ра́дуйся, небе́снаго венца́ удосто́енный.

Ра́дуйся, кро́вию му́ченическою пла́мень угаси́вый;

Ра́дуйся, темни́цу я́ко черто́г Бо́жий вмени́вый.

Ра́дуйся, Го́спода пред собо́ю зря́й;

Ра́дуйся, ны́не одесну́ю его́ предстоя́й.

Ра́дуйся, Мерку́рие, изря́дный уго́дниче Христо́в и во́ине непобеди́мый.

Конда́к 8.

Стра́нное чу́до зри́м тя́, му́чениче Мерку́рие, неопа́льна и неврежде́нна стоя́ща, исцеле́нна су́ща, и Христа́ Бо́га и́стинна испове́дающа, и благода́рне взыва́юща Ему́: Аллилу́иа.

И́кос 8.

Ве́сь бы́в подо́бен отроко́м в пещи́ халде́йстей, му́чениче Христо́в, в пла́мени горя́щем неопале́н пребыва́я и ро́су благода́ти от Го́спода восприи́м, научи́л еси́ на́с со умиле́нием воспева́ти си́це:

Ра́дуйся, све́том Ева́нгельским озаре́нный;

Ра́дуйся, Враче́м ду́ш и теле́с исцеле́нный.

Ра́дуйся, в му́ченических по́двизех И́стину возвеща́яй;

Ра́дуйся, воскресе́ния, по словеси́ Христо́ву, ча́яй.

Ра́дуйся, сла́вен в со́нме святы́х явле́нный;

Ра́дуйся, мно́гими ра́нами испещре́нный.

Ра́дуйся, Христо́во благоуха́ние источа́яй;

Ра́дуйся, его́же и на́с сподобля́яй.

Ра́дуйся, Мерку́рие, изря́дный уго́дниче Христо́в и во́ине непобеди́мый.

Конда́к 9.

Вся́кое естество́ ужасе́ся, ви́дя тя́, страда́льче, на сме́рть ведо́ма, смире́нна и незло́бива, проще́ния мучи́телем от Бо́га прося́ща, небе́сных селе́ний дости́гнути жела́юща, во е́же пе́ти: Аллилу́иа.

И́кос 9.

Вети́и суему́дреннии ничесо́же изрещи́ возмо́гут о явле́нии тебе́ Творца́ вся́ческих, И́же Са́м рече́: "Мерку́рие, прииди́ ко Мне́, и А́з упоко́ю тя́, приими́ вене́ц по́двига твоего́". Мы́ же в похвалу́ тебе́ прино́сим:

Ра́дуйся, водо́ю живо́ю напое́нный;

Ра́дуйся, доброде́тельми, я́ко би́сером, укра́шенный.

Ра́дуйся, главу́ на усече́ние подклони́вый;

Ра́дуйся, вене́ц сла́вы прие́мый.

Ра́дуйся, и́дольскую пре́лесть низложи́вый;

Ра́дуйся, предста́тельством твои́м на́с уте́шивый.

Ра́дуйся, Со́лнца Пра́вды луче́ не угаса́ющая;

Ра́дуйся, свеще́ в неразу́мии су́щих просвеща́ющая.

Ра́дуйся, Мерку́рие, изря́дный уго́дниче Христо́в и во́ине непобеди́мый.

Конда́к 10.

Спасе́ние дарова́ ти́ Госпо́дь, во́ине Христо́в непобеди́ме, и возра́довася Це́рковь торжеству́ющая, ви́дящи Го́спода я́ко Отца́ чадолюби́ва, во объя́тия Своя́ прие́мшаго чи́стую ду́шу твою́, и гла́сом ве́лиим возгласи́: Аллилу́иа.

И́кос 10.

Сте́ну непоколеби́му воздви́же тя́ ве́рным Госпо́дь, не то́кмо ду́шу твою́ просла́ви, но и те́ло страда́льческое сла́вою украси́ и облагоуха́, досточу́дне му́чениче. Мы́ же, Сла́ву Бо́жию ви́дяще на тебе́, зове́м:

Ра́дуйся, кади́ло благоуха́нное;

Ра́дуйся, ми́ро драгоце́нное.

Ра́дуйся, бога́тство нетле́нное да́руяй;

Ра́дуйся, от нищеты́ избавля́яй.

Ра́дуйся, исцеле́ния оби́льно источа́яй;

Ра́дуйся, душе́вных обстоя́ний свобожда́яй.

Ра́дуйся, спаси́тельнаго терпе́ния о́браз яви́вый;

Ра́дуйся, тве́рдому стоя́нию в ве́ре Христо́ве научи́вый.

Ра́дуйся, Мерку́рие, изря́дный уго́дниче Христо́в и во́ине непобеди́мый.

Конда́к 11.

Пе́ние моли́твенное принесе́ святи́тель Васи́лий пред ико́ною Пречи́стыя Богоро́дицы, иде́же и ты́, я́ко стра́ж вели́чия Ея́, изображе́н бы́л еси́: и а́бие о́браз тво́й сокры́ся и посе́м с копие́м, кро́вию обагре́нным, па́ки яви́ся. В се́м святи́тель Христо́в уразуме́в сверше́ние во́ли Бо́жия о избавле́нии Це́ркве от Иулиа́на отсту́пника, рече́: Аллилу́иа.

И́кос 11.

Све́т Христо́в возсия́ в Це́ркви святе́й, егда́ чуде́сне повеле́ ти́ Госпо́дь порази́ти прего́рдаго отсту́пника копие́м твои́м, и та́ко положи́ коне́ц гоне́нием на Це́рковь Свою́ от о́наго. Мы́ же, сла́вяще смотре́ние Прему́дрости Бо́жия, тебе́ пое́м:

Ра́дуйся, благоче́стием, я́ко мо́лния, блиста́яй;

Ра́дуйся, гро́ме, злоче́стие поража́яй.

Ра́дуйся, поклоне́ние тва́ри упраздни́вый;

Ра́дуйся, кресто́м побе́ду возвести́вый.

Ра́дуйся, во́ине благознамени́тый;

Ра́дуйся, венцено́сче наро́читый.

Ра́дуйся, моли́твам на́шим внима́яй;

Ра́дуйся, вся́каго зла́ избавля́яй.

Ра́дуйся, Мерку́рие, изря́дный уго́дниче Христо́в и во́ине непобеди́мый.

Конда́к 12.

Благода́тию Бо́жиею спасы́й ду́шу твою́, страстоте́рпче святы́й, не преста́й и о на́с, грехми́ до́лу пове́рженных, возноси́ти моле́ния те́плая к Престо́лу Царя́ ца́рствующих и Го́спода госпо́дствующих, да возмо́жем во сла́ве взыва́ти Ему́: Аллилу́иа.

И́кос 12.

Пою́щим твое́ заступле́ние и притека́ющим к тебе́, му́чениче Мерку́рие, предста́тель ве́рный бу́ди и не отве́ржи на́с, ны́не моля́щихся тебе́ и из глубины́ души́ взыва́ющих:

Ра́дуйся, Творцу́ вселе́нныя предстоя́й;

Ра́дуйся, за лю́ди Бо́га прося́й.

Ра́дуйся, сто́лпе церко́вный, ве́ру утвержда́яй;

Ра́дуйся, сове́ты нечести́вых разруша́яй.

Ра́дуйся, све́те, благоче́стие возраща́яй;

Ра́дуйся, мглу́ грехо́вную истребля́яй.

Ра́дуйся, к покая́нию на́с призыва́яй;

Ра́дуйся, наде́жду на спасе́ние полага́яй.

Ра́дуйся, Мерку́рие, изря́дный уго́дниче Христо́в и во́ине непобеди́мый.

Конда́к 13.

О страстоте́рпче до́блий, му́чениче сла́вный, свя́те Мерку́рие! Ны́нешнее на́ше прие́м приноше́ние, не преста́й Го́спода моли́ти, да изба́вит на́с твои́м хода́тайством гее́нны о́гненныя и сподо́бит воспева́ти с ли́ки а́нгельскими побе́дную пе́снь: Аллилу́иа.

Этот конда́к чита́ется три́жды, зате́м и́кос 1-й и конда́к 1-й.

Моли́тва.

О великому́чениче святы́й и до́блий во́ине Христо́в Мерку́рие, страда́нием, кро́вию и сме́ртию свое́ю ве́рность Христу́ и Це́ркви Его́ свиде́тельствовавый и сего́ ра́ди вене́ц жи́зни от Него́ прие́мый! Ны́не в хвале́бных пе́снех тебе́ прославля́юще, смире́нно к тебе́ припа́даем и усе́рдно мо́лим: предста́тель бу́ди пред Бо́гом о душа́х на́ших неусы́пный, умоли́ Влады́ку Го́спода, да сохрани́т Святу́ю Це́рковь Свою́ и все́х ча́д ея́ в сою́зе любве́ и единомы́слии, да утверди́тся ми́р и безмяте́жие в лю́дех, во оте́честве на́шем живу́щих, да позна́ют вси́, я́ко Христо́с е́сть Пу́ть, И́стина и Жи́знь, и да прии́дут к Нему́ вси́ тружда́ющиися и обремене́ннии, и упоко́ит и́х. О вели́кий уго́дниче Бо́жий! Кре́пкое стоя́ние в ве́ре на́шей да́руй на́м, благода́тную по́мощь на́м низпосли́, да ми́рное, ти́хое и богоуго́дное житие́ поживе́м в ве́це се́м и досто́йно с тобо́ю в де́нь о́ный восхва́лим Пресвяту́ю Тро́ицу, Отца́ и Сы́на и Свята́го Ду́ха, во ве́ки веко́в.Ами́нь.

Конда́къ а҃.

И҆збра́нномꙋ ѿ во́инства земна́гѡ въ нбⷭ҇ное, предстоѧ́щемꙋ прⷭ҇то́лꙋ цр҃ѧ̀ сла́вы, великомч҃нкꙋ меркꙋ́рїю бл҃гоговѣ́йное пѣ́нїе прино́симъ: мол́исѧ ᲂу҆се́рднѡ ко гдⷭ҇ꙋ за лю́ди, почита́ющыѧ и҆ во ᲂу҆миле́нїи воспѣва́ющыѧ тѧ̀: Ра́дꙋйсѧ, меркꙋ́рїе, и҆зрѧ́дный ᲂу҆го́дниче хрⷭ҇то́въ и҆ во́ине непобѣди́мый.

І҆́косъ а҃.

А҆́гг҃лъ гдⷭ҇ень, є҆щѐ ꙗ҆зы́чникꙋ ти сꙋ́щꙋ, меркꙋ́рїе, предꙋказа̀ твоѐ слꙋже́нїе ко сла́вѣ и҆́мене бж҃їѧ, є҆гда̀ призва́ тѧ ѿ а҆рме́нїи въ ри́мъ и҆ даде́ ти ме́чь на побѣ́дꙋ, и҆́мже ди̑внаѧ сотвори́лъ є҆сѝ. Сегѡ̀ ра́ди прилѣ́жнѡ вопїе́мъ:

Ра́дꙋйсѧ, сосꙋ́де, бг҃омъ и҆збра́нный:

Ра́дꙋйсѧ, десни́цею бж҃їею незри́мѡ води́мый.

Ра́дꙋйсѧ, сла́вою бж҃їею прославлѧ́емый:

Ра́дꙋйсѧ, вре́меннымъ вѣ́чномꙋ послꙋжи́вый.

Ра́дꙋйсѧ, а҆́гг҃лы ᲂу҆крѣплѧ́емый:

Ра́дꙋйсѧ, въ страда́нїи вѣне́цъ сла́вы полꙋчи́вый.

Ра́дꙋйсѧ, всели́выйсѧ въ черто́ги мі́ра го́рнѧгѡ:

Ра́дꙋйсѧ, мл҃твеннѡ не ѡ҆ставлѧ́ѧй мі́ра до́льнѧгѡ.

Ра́дꙋйсѧ, меркꙋ́рїе, и҆зрѧ́дный ᲂу҆го́дниче хрⷭ҇то́въ и҆ во́ине непобѣди́мый.

Конда́къ в҃.

Ви́дѧ ѻ҆́комъ тѣлес́нымъ дꙋ́ха безпло́тнаго и҆ ᲂу҆ши́ма слы́ша глаго́лы: не забꙋ́ди гдⷭ҇а бг҃а твоегѡ̀, є҆гда̀ побѣди́ши врагѡ́въ. Се́рдцемъ прїѧ́лъ є҆сѝ, меркꙋ́рїе, повелѣ́нїе сїѐ а҆́гг҃льское и҆ во ᲂу҆миле́нїи ре́клъ є҆сѝ: А҆ллилꙋ́їа.

І҆́косъ в҃.

Разꙋмѣ́ти тща́щесѧ толи́кꙋю си́лꙋ твою̀, дивлѧ́хꙋсѧ во́ини, ѡ҆́крестъ тебє̀ стоѧ́щїи, толи́цѣй си́лѣ твое́й, не вѣ́дꙋще ѻ҆рꙋ́жїѧ, ѿ а҆́гг҃ла тебѣ̀ врꙋче́ннагѡ, мы́ же, дх҃омъ ст҃ы́мъ позна́вше си́лꙋ бж҃їю, въ тебѣ̀ ꙗ҆вле́ннꙋю, навыко́хомъ пѣ́ти:

Ра́дꙋйсѧ, ме́чь, ввѣ́ренный бг҃омъ, сохрани́вый:

Ра́дꙋйсѧ, зало́гъ бл҃года́ти въ себѣ̀ возрасти́вый.

Ра́дꙋйсѧ, мече́мъ а҆́гг҃льскимъ полкѝ ва̑рварскїѧ порази́вый:

Ра́дꙋйсѧ, вѣ́рою пре́лесть і҆́дѡльскꙋю низложи́вый.

Ра́дꙋйсѧ, ра́дѡсти ми́ра сегѡ̀ нивочто́же вмѣни́вый:

Ра́дꙋйсѧ, вѣ́чнѣй ра́дости себѐ ᲂу҆гото́вавый.

Ра́дꙋйсѧ, си́лꙋ бж҃їю въ себѣ̀ ꙗ҆ви́вый:

Ра́дꙋйсѧ, повелѣ́нїе а҆́гг҃лово и҆спо́лнивый.

Ра́дꙋйсѧ, меркꙋ́рїе, и҆зрѧ́дный ᲂу҆го́дниче хрⷭ҇то́въ и҆ во́ине непобѣди́мый.

Конда́къ г҃.

Си́лы бж҃їѧ въ тебѣ̀ не вѣ́даѧ, сла́вне меркꙋ́рїе, де́кїй нечести́вый поста́ви тѧ̀ над̾ во́йскомъ свои́мъ нача́льствовати: ты́ же, ни во что̀ вмѣнѧ́ѧ ми́лѡсти и҆ да́ры є҆гѡ̀, въ нищетѣ̀ дꙋхо́внѣй и҆сто́чникꙋ млⷭ҇тей всѧ́ческихъ и҆ щедро́тъ взыва́лъ є҆сѝ: А҆ллилꙋ́їа.

І҆́косъ г҃.

И҆мѣ́ѧ а҆́гг҃ла попече́нїе ѡ҆ тебѣ̀, ст҃е меркꙋ́рїе, воздвиза́юща тѧ̀ не то́кмѡ ѿ сна̀ тѣле́снагѡ, но подвиза́юща на бо́дрствованїе дꙋхо́вное и҆ по́прище страда́льческое, бл҃агода́рнѣ под̾ѧ́лъ є҆сѝ слꙋже́нїе сїѐ. Сегѡ̀ ра́ди вопїе́мъ тѝ сицева̑ѧ:

Ра́дꙋйсѧ, зрѣ́нїемъ а҆́гг҃лѡвъ нбⷭ҇ныхъ почте́нный:

Ра́дꙋйсѧ, попече́нїемъ и҆́хъ не ѡ҆ста́вленный.

Ра́дꙋйсѧ, ко сп҃се́нїю и҆́ми побꙋжда́емый:

Ра́дꙋйсѧ, дх҃а ст҃а́гѡ хра́ме ѡ҆сщ҃е́нный.

Ра́дꙋйсѧ, свѣ́томъ нетлѣ́ннымъ сїѧ́ѧй:

Ра́дꙋйсѧ, пꙋ́ть къ жи́зни вѣ́чнѣй ѡ҆свѣща́ѧй.

Ра́дꙋйсѧ, бл҃говѣ́стїе бж҃їе прїе́млѧй:

Ра́дꙋйсѧ, бл҃годаре́нїе ѡ҆ не́мъ воздаѧ́й.

Ра́дꙋйсѧ, меркꙋ́рїе, и҆зрѧ́дный ᲂу҆го́дниче хрⷭ҇то́въ и҆ во́ине непобѣди́мый.

Конда́къ д҃.

Бꙋ́рѧ жите́йскихъ смѧте́нїй не ᲂу҆страши́ тѧ, до́блїй во́ине хрⷭ҇то́въ, є҆гда̀ воспомѧнꙋ́лъ є҆сѝ словеса̀ роди́телєва: бл҃же́нни во́ини цр҃ѧ̀ нбⷭ҇нагѡ, и҆ ᲂу҆стреми́лсѧ є҆сѝ се́рдцемъ твои́мъ въ во́инство сїѐ, ѿрѣша́ѧсѧ ѿ по́честей земны́хъ, вопїѧ̀ бг҃ꙋ: А҆ллилꙋ́їа.

І҆́косъ д҃.

Слы́ша вразꙋмле́нїе а҆́гг҃льское, воспомѧнꙋ́лъ є҆сѝ наставле́нїе роди́телево, и҆ ᲂу҆мили́всѧ се́рдцемъ, рыда́лъ є҆сѝ: ᲂу҆вы̀ мнѣ̀, грѣ́шномꙋ, ка́кѡ и҆́зсше дꙋша̀ моѧ̀, не вѣ́дѧщи ко́рене бг҃опозна́нїѧ! Ка́кѡ предста́нꙋ тѝ, бж҃е, въ ча́съ послѣ́днїй и҆ сме́ртный, ко́е сло́во и҆зрекꙋ̀ во ѡ҆правда́нїе грѣ́шныѧ дꙋшѝ моеѧ̀; Мы́ же, таковы́мъ покаѧ́нїемъ вразꙋмлѧ́еми, глаго́лемъ тѝ:

Ра́дꙋйсѧ, слеза́ми дꙋ́шꙋ ѡ҆мы́вый:

Ра́дꙋйсѧ, чи́ста себѐ бг҃ꙋ ꙗ҆ви́вый.

Ра́дꙋйсѧ, покаѧ́нїю на́съ наꙋча́ѧй:

Ра́дꙋйсѧ, рꙋ́цѣ къ бг҃ꙋ за ны̀ воздѣва́ѧй.

Ра́дꙋйсѧ, мл҃твами твои́ми на́съ сп҃са́ѧй:

Ра́дꙋйсѧ, житїе́мъ твои́мъ на́съ вразꙋмлѧ́ѧй.

Ра́дꙋйсѧ, ѻ҆́бразъ чистоты̀ въ себѣ̀ ꙗ҆ви́вый:

Ра́дꙋйсѧ, цр҃ковь хрⷭ҇то́вꙋ ᲂу҆краси́вый.

Ра́дꙋйсѧ, меркꙋ́рїе, и҆зрѧ́дный ᲂу҆го́дниче хрⷭ҇то́въ и҆ во́ине непобѣди́мый.

Конда́къ є҃.

Ѕвѣздо́ю бг҃оразꙋ́мїѧ наставлѧ́емь, не прине́слъ є҆сѝ же́ртвы бг҃оме́рзкїѧ, жела́ѧ послѣ́довати пꙋтѝ хрⷭ҇то́вꙋ и҆ сподо́битисѧ пи́ти ча́шꙋ є҆гѡ̀. Сегѡ̀ ра́ди пре́данъ, ѡ҆клеве́танъ и҆ заꙋше́нъ бы́лъ є҆сѝ, ꙗ҆́коже и҆ гдⷭ҇ь тво́й, во смире́нїи прїе́млѧ сїѧ̑ и҆ вопїѧ̀: А҆ллилꙋ́їа.

І҆́косъ є҃.

Ви́дѧ тѧ̀, долготерпѣли́ве меркꙋ́рїе, совле́кшасѧ, по словесѝ а҆пⷭ҇льскомꙋ, ве́тхагѡ человѣ́ка съ дѣѧ́ньми є҆гѡ̀ и҆ ѡ҆бле́кшасѧ чрез̾ ѡ҆чисти́тєльнаѧ страда̑нїѧ въ но́ваго, по ѻ҆́бразꙋ бж҃їю и҆ подо́бїю сотворе́ннаго, во ᲂу҆миле́нїи пое́мъ тѝ:

Ра́дꙋйсѧ, же́ртвꙋ себѐ живꙋ́ю бг҃ꙋ ꙗ҆ви́вый:

Ра́дꙋйсѧ, заꙋше́нїемъ стра̑сти грѣхѡ́вныѧ ᲂу҆мертви́вый.

Ра́дꙋйсѧ, кро́вїю креще́нїе прїѧ́вый:

Ра́дꙋйсѧ, въ не́мъ дх҃а бж҃їѧ стѧжа́вый.

Ра́дꙋйсѧ, вѣ́рою житїѐ преѡбрази́вый:

Ра́дꙋйсѧ, є҆ѧ̀ ра́ди страда́ти и҆зво́ливый.

Ра́дꙋйсѧ, слꙋже́нїю любвѐ поревнова́вый:

Ра́дꙋйсѧ, наде́ждою дꙋ́шꙋ и҆спо́лнивый.

Ра́дꙋйсѧ, меркꙋ́рїе, и҆зрѧ́дный ᲂу҆го́дниче хрⷭ҇то́въ и҆ во́ине непобѣди́мый.

Конда́къ ѕ҃.

Проповѣ́дника си́лы бж҃їѧ, ꙗ҆́же въ тебѣ̀, не вѣ́даѧ, де́кїй безбо́жный ᲂу҆жасе́сѧ. Мы́ же, бл҃года́ти бж҃їѧ тѧ̀ и҆спо́лнена, ꙗ҆́кѡ ча́до бж҃їе, и҆сповѣ́дꙋюще, вопїе́мъ творцꙋ̀ на́шемꙋ: А҆ллилꙋ́їа.

І҆́косъ ѕ҃.

Возсїѧ̀ свѣ́тъ въ дꙋшѝ твое́й, страда́льче, є҆гда̀, ѿве́рженꙋ мі́ромъ, въ темни́цꙋ ведо́мꙋ и҆ ѡ҆печа́ленꙋ, а҆́гг҃лъ ꙗ҆ви́сѧ тѝ и҆ глаго́ла: мꙋжа́йсѧ! разрѣша́ѧй печа̑ли всѧ̑кїѧ гдⷭ҇ь зри́тъ тѧ̀! Мы́ же, толи́комꙋ ѡ҆ тебѣ̀ попече́нїю дивѧ́щесѧ, зове́мъ:

Ра́дꙋйсѧ, ꙗ҆́кѡ а҆пⷭ҇лъ пе́тръ, а҆́гг҃ломъ ᲂу҆крѣплѧ́емый:

Ра́дꙋйсѧ, печа́ли всѧ́кїѧ и҆збавлѧ́емый.

Ра́дꙋйсѧ, хрⷭ҇тїа́нина себѐ и҆сповѣ́давый:

Ра́дꙋйсѧ, ра́зꙋмомъ бжⷭ҇твеннымъ просвѣще́нный.

Ра́дꙋйсѧ, ᲂу҆́зъ тѣле́сныхъ разрѣши́тисѧ возжелѣ́вый:

Ра́дꙋйсѧ, въ рꙋ́цѣ бж҃їи себѐ преда́вый.

Ра́дꙋйсѧ, гдⷭ҇а вѣ́рный слꙋжи́телю:

Ра́дꙋйсѧ, го́рнѧгѡ і҆ерⷭ҇ли́ма жи́телю.

Ра́дꙋйсѧ, меркꙋ́рїе, и҆зрѧ́дный ᲂу҆го́дниче хрⷭ҇то́въ и҆ во́ине непобѣди́мый.

Конда́къ з҃.

Хотѧ̀ вразꙋми́ти нечести́ваго царѧ̀, ꙗ҆ви́лсѧ є҆сѝ томꙋ̀, великомч҃нче, ре́къ: и҆сцѣле́нїе ѿ гдⷭ҇а прїѧ́хъ, да побѣждꙋ́ тѧ и҆ ѻ҆тца̀ твоего̀ дїа́вола: и҆ та́кѡ глаго́лѧ, вопїѧ́лъ є҆сѝ въ трⷪ҇цѣ сла́вимомꙋ и҆ покланѧ́емомꙋ є҆ди́номꙋ бг҃ꙋ: А҆ллилꙋ́їа.

І҆́косъ з҃.

Нѡ́ваѧ мꙋчє́нїѧ и҆зѡбрѣ́те тебѣ̀ наꙋча́емый ѿ дїа́вола де́кїй нечести́вый: повелѣ̀ и҆стѧза́ти тѧ̀ мече́мъ и҆ ѻ҆гне́мъ: ты́ же, вѣ́даѧ, ꙗ҆́кѡ гони́тель се́й не и҆́мать вла́сти над̾ дꙋше́ю твое́ю, смире́ннѡ претерпѣ́лъ є҆сѝ всѧ̑, ѡ҆ ни́хже тебѣ̀ пое́мъ:

Ра́дꙋйсѧ, до́блестнѣ и҆стѧза̑нїѧ терпѣ́вый:

Ра́дꙋйсѧ, а҆́гг҃льскꙋю пѣ́снь въ страда́нїихъ воспѣ́вый.

Ра́дꙋйсѧ, мꙋче́нїемъ вре́меннымъ вѣ́чнагѡ и҆зба́вленный:

Ра́дꙋйсѧ, нбⷭ҇нагѡ вѣнца̀ ᲂу҆досто́енный.

Ра́дꙋйсѧ, кро́вїю мч҃нческою пла́мень ᲂу҆гаси́вый:

Ра́дꙋйсѧ, темни́цꙋ ꙗ҆́кѡ черто́гъ бж҃їй вмѣни́вый.

Ра́дꙋйсѧ, гдⷭ҇а пред̾ собо́ю зрѧ́й:

Ра́дꙋйсѧ, ны́нѣ ѡ҆деснꙋ́ю є҆гѡ̀ предстоѧ́й.

Ра́дꙋйсѧ, меркꙋ́рїе, и҆зрѧ́дный ᲂу҆го́дниче хрⷭ҇то́въ и҆ во́ине непобѣди́мый.

Конда́къ и҃.

Стра́нное чꙋ́до зри́мъ тѧ̀, мч҃нче меркꙋ́рїе, неѡпа́льна и҆ неврежде́нна стоѧ́ща, и҆сцѣле́нна сꙋ́ща, и҆ хрⷭ҇та̀ бг҃а и҆́стинна и҆сповѣ́дающа, и҆ бл҃года́рнѣ взыва́юща є҆мꙋ̀: А҆ллилꙋ́їа.

І҆́косъ и҃.

Ве́сь бы́въ подо́бенъ ѻ҆трокѡ́мъ въ пещѝ халде́йстѣй, мч҃нче хрⷭ҇то́въ, въ пла́мени горѧ́щемъ неѡпа́ленъ пребыва́ѧ и҆ ро́сꙋ бл҃года́ти ѿ гдⷭ҇а воспрїи́мъ, наꙋчи́лъ є҆сѝ на́съ со ᲂу҆миле́нїемъ воспѣва́ти си́це:

Ра́дꙋйсѧ, свѣ́томъ є҆ѵⷢ҇льскимъ ѡ҆заре́нный:

Ра́дꙋйсѧ, враче́мъ дꙋ́шъ и҆ тѣле́съ и҆сцѣле́нный.

Ра́дꙋйсѧ, въ мч҃нческихъ по́двизѣхъ и҆́стинꙋ возвѣща́ѧй:

Ра́дꙋйсѧ, воскрⷭ҇нїѧ, по словесѝ хрⷭ҇то́вꙋ, ча́ѧй.

Ра́дꙋйсѧ, сла́венъ въ со́нмѣ ст҃ы́хъ ꙗ҆вле́нный:

Ра́дꙋйсѧ, мно́гими ра́нами и҆спещре́нный.

Ра́дꙋйсѧ, хрⷭ҇то́во бл҃гоꙋха́нїе и҆сточа́ѧй:

Ра́дꙋйсѧ, є҆гѡ́же и҆ на́съ сподоблѧ́ѧй.

Ра́дꙋйсѧ, меркꙋ́рїе, и҆зрѧ́дный ᲂу҆го́дниче хрⷭ҇то́въ и҆ во́ине непобѣди́мый.

Конда́къ ѳ҃.

Всѧ́кое є҆стество̀ ᲂу҆жасе́сѧ, ви́дѧ тѧ̀, страда́льче, на сме́рть ведо́ма, смире́нна и҆ неѕло́бива, проще́нїѧ мꙋчи́телємъ ѿ бг҃а просѧ́ща, нбⷭ҇ныхъ селе́нїй дости́гнꙋти жела́юща, во є҆́же пѣ́ти: А҆ллилꙋ́їа.

І҆́косъ ѳ҃.

Вѣті̑и сꙋемꙋ́дреннїи ничесо́же и҆зрещѝ возмо́гꙋтъ ѡ҆ ꙗ҆вле́нїи тебѣ̀ творца̀ всѧ́ческихъ, и҆́же са́мъ речѐ: меркꙋ́рїе, прїидѝ ко мнѣ̀, и҆ а҆́зъ ᲂу҆поко́ю тѧ̀, прїимѝ вѣне́цъ по́двига твоегѡ̀. Мы́ же въ похвалꙋ̀ тебѣ̀ прино́симъ:

Ра́дꙋйсѧ, водо́ю живо́ю напое́нный:

Ра́дꙋйсѧ, добродѣ́тельми, ꙗ҆́кѡ би́серомъ, ᲂу҆краше́нный.

Ра́дꙋйсѧ, главꙋ̀ на ᲂу҆сѣче́нїе подклони́вый:

Ра́дꙋйсѧ, вѣне́цъ сла́вый прїе́мый.

Ра́дꙋйсѧ, і҆́дѡльскꙋю пре́лесть низложи́вый:

Ра́дꙋйсѧ, предста́тельствомъ твои́мъ на́съ ᲂу҆тѣ́шивый.

Ра́дꙋйсѧ, сл҃нца пра́вды лꙋчѐ не ᲂу҆гаса́ющаѧ:

Ра́дꙋйсѧ, свѣщѐ, въ неразꙋ́мїи сꙋ́щихъ просвѣща́ющаѧ.

Ра́дꙋйсѧ, меркꙋ́рїе, и҆зрѧ́дный ᲂу҆го́дниче хрⷭ҇то́въ и҆ во́ине непобѣди́мый.

Конда́къ і҃.

Сп҃се́нїе дарова́ ти гдⷭ҇ь, во́ине хрⷭ҇то́въ непобѣди́ме, и҆ возра́довасѧ цр҃ковь торжествꙋ́ющаѧ, ви́дѧщи гдⷭ҇а ꙗ҆́кѡ ѻ҆ц҃а̀ чадолюби́ва, во ѡ҆б̾ѧ̑тїѧ своѧ̑ прїе́мшаго чи́стꙋю дꙋ́шꙋ твою̀, и҆ гла́сомъ ве́лїимъ возгласѝ: А҆ллилꙋ́їа.

І҆́косъ і҃.

Стѣ́нꙋ непоколеби́мꙋ воздви́же тѧ̀ вѣ̑рнымъ гдⷭ҇ь, не то́кмѡ дꙋ́шꙋ твою̀ просла́ви, но и҆ тѣ́ло страда́льческое сла́вою ᲂу҆красѝ и҆ ѡ҆бл҃гоꙋха̀, досточꙋ́дне мч҃нче. Мы́ же, сла́вꙋ бж҃їю ви́дѧще на тебѣ̀, зове́мъ:

Ра́дꙋйсѧ, кади́ло бл҃гоꙋха́нное:

Ра́дꙋйсѧ, мѵ́ро драгоцѣ́нное.

Ра́дꙋйсѧ, бога́тство нетлѣ́нное да́рꙋѧй:

Ра́дꙋйсѧ, ѿ нищеты̀ и҆збавлѧ́ѧй.

Ра́дꙋйсѧ, и҆сцѣлє́нїѧ ѻ҆би́льнѡ и҆сточа́ѧй:

Ра́дꙋйсѧ, дꙋше́вныхъ ѡ҆бстоѧ́нїй свобожда́ѧй.

Ра́дꙋйсѧ, сп҃си́тельнагѡ терпѣ́нїѧ ѻ҆́бразъ ꙗ҆ви́вый:

Ра́дꙋйсѧ, тве́рдомꙋ стоѧ́нїю въ вѣ́рѣ хрⷭ҇то́вѣ наꙋчи́вый.

Ра́дꙋйсѧ, меркꙋ́рїе, и҆зрѧ́дный ᲂу҆го́дниче хрⷭ҇то́въ и҆ во́ине непобѣди́мый.

Конда́къ а҃і.

Пѣ́нїе мл҃твенное принесѐ ст҃и́тель васі́лїй пред̾ і҆кѡ́ною пречⷭ҇тыѧ бцⷣы, и҆дѣ́же и҆ ты̀, ꙗ҆́кѡ стра́жъ вели́чїѧ є҆ѧ̀, и҆зѡбраже́нъ бы́лъ є҆сѝ: и҆ а҆́бїе ѻ҆́бразъ тво́й сокры́сѧ и҆ посе́мъ съ копїе́мъ, кро́вїю ѡ҆багре́ннымъ, па́ки ꙗ҆ви́сѧ. Въ се́мъ ст҃и́тель хрⷭ҇то́въ ᲂу҆разꙋмѣ́въ сверше́нїе во́ли бж҃їѧ ѡ҆ и҆збавле́нїи цр҃кве ѿ і҆ꙋлїа́на ѿстꙋ́пника, речѐ: А҆ллилꙋ́їа.

І҆́косъ а҃і.

Свѣ́тъ хрⷭ҇то́въ возсїѧ̀ въ цр҃кви ст҃ѣ́й, є҆гда̀ чꙋде́снѣ повелѣ́ ти гдⷭ҇ь порази́ти прего́рдаго ѿстꙋ́пника копїе́мъ твои́мъ, и҆ та́кѡ положѝ коне́цъ гоне́нїємъ на цр҃ковь свою̀ ѿ ѻ҆́нагѡ. Мы́ же, сла́вѧще смотре́нїе премⷣрости бж҃їѧ, тебѣ̀ пое́мъ:

Ра́дꙋйсѧ, бл҃гоче́стїемъ, ꙗ҆́кѡ мо́лнїѧ, блиста́ѧй:

Ра́дꙋйсѧ, гро́ме, ѕлоче́стїе поража́ѧй.

Ра́дꙋйсѧ, поклоне́нїе тва́ри ᲂу҆праздни́вый:

Ра́дꙋйсѧ, крⷭ҇то́мъ побѣ́дꙋ возвѣсти́вый.

Ра́дꙋйсѧ, во́ине бл҃гознамени́тый:

Ра́дꙋйсѧ, вѣнцено́сче наро́читый.

Ра́дꙋйсѧ, мл҃твамъ на́шымъ внима́ѧй:

Ра́дꙋйсѧ, всѧ́кагѡ ѕла̀ и҆збавлѧ́ѧй.

Ра́дꙋйсѧ, меркꙋ́рїе, и҆зрѧ́дный ᲂу҆го́дниче хрⷭ҇то́въ и҆ во́ине непобѣди́мый.

Конда́къ в҃і.

Бл҃года́тїю бж҃їею сп҃сы́й дꙋ́шꙋ твою̀, стрⷭ҇тоте́рпче ст҃ы́й, не преста́й и҆ ѡ҆ на́съ, грѣхмѝ до́лꙋ пове́рженныхъ, возноси́ти молє́нїѧ тє́плаѧ къ прⷭ҇то́лꙋ цр҃ѧ ца́рствꙋющихъ и҆ гдⷭ҇а госпо́дствꙋющихъ, да возмо́жемъ во сла́вѣ взыва́ти є҆мꙋ̀: А҆ллилꙋ́їа.

І҆́косъ в҃і.

Пою́щымъ твоѐ застꙋпле́нїе и҆ притѣка́ющымъ къ тебѣ̀, мч҃нче меркꙋ́рїе, предста́тель вѣ́рный бꙋ́ди и҆ не ѿве́ржи на́съ, ны́нѣ молѧ́щихсѧ тебѣ̀ и҆ и҆з̾ глꙋбины̀ дꙋшѝ взыва́ющихъ:

Ра́дꙋйсѧ, творцꙋ̀ вселе́нныѧ предстоѧ́й:

Ра́дꙋйсѧ, за лю́ди бг҃а просѧ́й.

Ра́дꙋйсѧ, сто́лпе цр҃ко́вный, вѣ́рꙋ ᲂу҆твержда́ѧй:

Ра́дꙋйсѧ, совѣ́ты нечести́выхъ разрꙋша́ѧй.

Ра́дꙋйсѧ, свѣ́те, бл҃гоче́стїе возраща́ѧй:

Ра́дꙋйсѧ, мглꙋ̀ грѣхо́внꙋю и҆стреблѧ́ѧй.

Ра́дꙋйсѧ, къ покаѧ́нїю на́съ призыва́ѧй:

Ра́дꙋйсѧ, наде́ждꙋ на сп҃се́нїе полага́ѧй.

Ра́дꙋйсѧ, меркꙋ́рїе, и҆зрѧ́дный ᲂу҆го́дниче хрⷭ҇то́въ и҆ во́ине непобѣди́мый.

Конда́къ г҃і.

Ѽ стрⷭ҇тоте́рпче до́блїй, мч҃нче сла́вный, ст҃е меркꙋ́рїе! Ны́нѣшнее на́ше прїе́мъ приноше́нїе, не преста́й гдⷭ҇а моли́ти, да и҆зба́витъ на́съ твои́мъ хода́тайствомъ гее́нны ѻ҆́гненныѧ и҆ сподо́битъ воспѣва́ти съ ли̑ки а҆́гг҃льскими побѣ́днꙋю пѣ́снь: А҆ллилꙋ́їа.

Се́й конда́къ глаго́летсѧ три́жды. И҆ па́ки чте́тсѧ і҆́косъ а҃-й, и҆ конда́къ а҃-й.

Мл҃тва.

Ѽ великомч҃нче ст҃ы́й и҆ до́блїй во́ине хрⷭ҇то́въ меркꙋ́рїе, страда́нїемъ, кро́вїю и҆ сме́ртїю свое́ю вѣ́рность хрⷭ҇тꙋ̀ и҆ цр҃кви є҆гѡ̀ свидѣ́тельствовавый и҆ сегѡ̀ ра́ди вѣне́цъ жи́зни ѿ негѡ̀ прїе́мый! Ны́нѣ въ хвале́бныхъ пѣ́снехъ тебѐ прославлѧ́юще, смире́ннѡ къ тебѣ̀ припа́даемъ и҆ ᲂу҆се́рднѡ мо́лимъ: предста́тель бꙋ́ди пред̾ бг҃омъ ѡ҆ дꙋша́хъ на́шихъ неꙋсы́пный, ᲂу҆молѝ влⷣкꙋ гдⷭ҇а, да сохрани́тъ цр҃ковь свою̀ и҆ всѣ́хъ ча́дъ є҆ѧ̀ въ сою́зѣ любвѐ и҆ є҆диномы́слїи, да ᲂу҆тверди́тсѧ ми́ръ и҆ безмѧте́жїе въ лю́дехъ, во ѻ҆те́чествѣ на́шемъ живꙋ́щихъ, да позна́ютъ всѝ, ꙗ҆́кѡ хрⷭ҇то́съ є҆́сть пꙋ́ть, и҆́стина и҆ жи́знь, и҆ да прїи́дꙋтъ къ немꙋ̀ всѝ трꙋжда́ющїисѧ и҆ ѡ҆бремене́ннїи, и҆ ᲂу҆поко́итъ и҆̀хъ. ѽ вели́кїй ᲂу҆го́дниче бж҃їй! Крѣ́пкое стоѧ́нїе въ вѣ́рѣ на́шей да́рꙋй на́мъ, бл҃года́тнꙋю по́мощь на́мъ низпослѝ, да ми́рное, ти́хое и҆ бг҃оꙋго́дное житїѐ поживе́мъ въ вѣ́цѣ се́мъ и҆ досто́йнѡ съ тобо́ю въ де́нь ѻ҆́ный восхва́лимъ прест҃ꙋ́ю трⷪ҇цꙋ, ѻ҆ц҃а̀ и҆ сн҃а и҆ ст҃а́го дх҃а, во вѣ́ки вѣкѡ́въ. А҆ми́нь.

Свя­той ве­ли­ко­му­че­ник Мер­ку­рий, скиф по про­ис­хож­де­нию, слу­жил во­и­ном в рим­ской ар­мии. Нече­сти­вые им­пе­ра­то­ры Де­кий (249-251) и Ва­ле­ри­ан (253-259) из­да­ли за­кон, по­веле­вав­ший всем рим­ским граж­да­нам по­кло­нять­ся язы­че­ским бо­гам и осуж­дав­ший на смерть хри­сти­ан.

В это вре­мя на Рим­скую им­пе­рию на­па­ли вар­ва­ры, и им­пе­ра­тор Де­кий вы­сту­пил в по­ход с боль­шим вой­ском. В од­ном из сра­же­ний свя­то­му Мер­ку­рию явил­ся Ан­гел Гос­по­день и по­дал ему меч со сло­ва­ми: "Не бой­ся, сме­ло иди на вра­гов. Ко­гда по­бе­дишь, не за­будь Гос­по­да Бо­га тво­е­го". С этим ме­чом свя­той во­ин про­шел сквозь вар­вар­ские пол­чи­ща, уни­что­жил мно­же­ство вра­гов и убил са­мо­го ца­ря вар­ва­ров, обес­пе­чив по­бе­ду рим­ля­нам. Бла­го­дар­ный им­пе­ра­тор щед­ро на­гра­дил свя­то­го Мер­ку­рия за храб­рость и сде­лал его во­е­на­чаль­ни­ком.

Свя­то­му во­и­ну, по­лу­чив­ше­му ве­ли­кие по­че­сти и бо­гат­ство, вновь явил­ся Ан­гел Гос­по­день, на­по­ми­ная ему, Кем бы­ла да­ро­ва­на по­бе­да, и при­зы­вая к слу­же­нию Гос­по­ду. Свя­той Мер­ку­рий вспом­нил, что и отец его, Гор­диан, ис­по­ве­до­вал хри­сти­ан­скую ве­ру, кре­стил­ся и всей ду­шой устре­мил­ся ко Хри­сту. Он от­ка­зал­ся участ­во­вать в тор­же­ствен­ном жерт­во­при­но­ше­нии язы­че­ским бо­гам и был при­зван к гроз­но­му им­пе­ра­то­ру. От­кры­то на­звав се­бя хри­сти­а­ни­ном, Мер­ку­рий бро­сил к но­гам им­пе­ра­то­ра во­ин­ский по­яс и ман­тию и от­ка­зал­ся от всех по­че­стей. В тем­ни­це свя­то­му Мер­ку­рию сно­ва явил­ся Ан­гел Гос­по­день, укре­пил его и при­звал му­же­ствен­но пре­тер­петь все стра­да­ния за Хри­ста.

Свя­то­го му­че­ни­ка рас­тя­ну­ли над ог­нем, ре­за­ли но­жа­ми, би­ли плетьми так, что кровь из его ран га­си­ла огонь. Но каж­дый раз, ко­гда его бро­са­ли в тем­ни­цу уми­ра­ю­щим от ран, свя­той Мер­ку­рий по­лу­чал от Гос­по­да пол­ное ис­це­ле­ние, утвер­ждая пред нече­стив­ца­ми ве­ли­кую си­лу ве­ры Хри­сто­вой. Осуж­ден­ный на смерт­ную казнь, свя­той спо­до­бил­ся ви­де­ния Са­мо­го Гос­по­да, обе­щав­ше­го ему ско­рое из­бав­ле­ние от му­че­ний. Ве­ли­ко­му­че­ни­ка Мер­ку­рия обез­гла­ви­ли в Ке­са­рии Кап­па­до­кий­ской. Его свя­тое те­ло бла­го­уха­ло ми­ром и фимиа­мом, по­да­вая ис­це­ле­ния мно­гим боль­ным.

Уже по смер­ти сво­ей во­ин Хри­стов, со­еди­нив­ший­ся с Цер­ко­вью Небес­ной, со­слу­жил во­ин­скую служ­бу на бла­го Церк­ви зем­ной. По мо­лит­ве свя­ти­те­ля Ва­си­лия Ве­ли­ко­го пе­ред ико­ной Пре­свя­той Бо­го­ро­ди­цы об осво­бож­де­нии хри­сти­ан от го­ни­те­ля хри­сти­ан­ской ве­ры Юли­а­на От­ступ­ни­ка (361–363) За­ступ­ни­ца ро­да хри­сти­ан­ско­го по­сла­ла свя­то­го во­и­на Мер­ку­рия в по­мощь от Церк­ви тор­же­ству­ю­щей к Церк­ви во­ин­ству­ю­щей. Об­раз свя­то­го ве­ли­ко­му­че­ни­ка Мер­ку­рия, изо­бра­жен­ный на иконе ря­дом с об­ра­зом Пре­чи­стой Бо­го­ро­ди­цы, стал неви­ди­мым, а за­тем вновь по­ка­зал­ся с окро­вав­лен­ным ко­пьем.

В этот са­мый мо­мент Юли­ан От­ступ­ник был прон­зен на Пер­сид­ской войне ко­пьем неиз­вест­но­го во­и­на, тот­час став­ше­го неви­ди­мым. Ока­ян­ный Юли­ан, уми­рая, вос­клик­нул: "Ты по­бе­дил, Га­ли­ле­я­нин!"


См. так­же: "Стра­да­ние свя­то­го ве­ли­ко­му­че­ни­ка Мер­ку­рия" в из­ло­же­нии свт. Ди­мит­рия Ро­стов­ско­го.