Конда́к 1.

Избра́ннии уго́дницы Госпо́дни, духо́вно благоуха́ющии цве́ти са́да Иису́сова, от Святы́я Горы́ Афо́нския в вертогра́д небе́сный вознесе́ннии, и дерзнове́ние ко Го́споду стяжа́вшии, мо́лим ва́с, отцы́ богоно́снии, моли́твами ва́шими от вся́ких на́с бе́д свободи́те, да зове́м ва́м хвале́бно:

Ра́дуйтеся, преподо́бнии отцы́ Афо́нстии, усе́рднии о душа́х на́ших моли́твенницы.

И́кос 1.

А́нгели во пло́ти и челове́цы небе́снии вои́стину бы́сте, отцы́ богоно́снии, равноа́нгельное житие́ в пусты́нях Афо́на пожи́вше, равностоя́телие А́нгелов на небеси́ яви́стеся, отону́дуже све́тлыми луча́ми моли́тв ва́ших мра́к ду́ш на́ших вы́ну благода́тию озаря́ете, о́бразом же ва́шего богоуго́днаго жития́ на спасе́ния стезю́ на́с путеводи́те, зову́щих ва́м от души́:

Ра́дуйтеся, свети́льницы немерца́ющии Бо́жия благода́ти; ра́дуйтеся, столпи́ непоколеби́мии Святы́я Правосла́вныя Це́ркве.

Ра́дуйтеся, подви́жницы до́блии, по́двиги ва́шими Афо́н удобри́вшии; ра́дуйтеся, по́стницы богому́дрии, во всю́ вселе́нную чудесы́ сия́ющии.

Ра́дуйтеся, би́серие духо́внии, от удо́лий Афо́на в Сио́не го́рнем возблиста́вшии; ра́дуйтеся, добро́тою ду́ш ва́ших Го́споду Иису́су благоуго́дни я́вльшиися.

Ра́дуйтеся, преподо́бнии отцы́ Афо́нстии, усе́рднии о душа́х на́ших моли́твенницы.

Конда́к 2.

Ви́дим ва́с, преподо́бнии отцы́ Пе́тре и Афана́сие, в собо́ре преподо́бных Афо́нских пе́рвенство прие́мших, и явле́ние ва́м Пресвяты́я Богоро́дицы зело́ облагода́тствованных; те́мже, я́ко дво́ицу богому́друю, Тро́ице Боже́ственней до́бре послужи́вшую, ублажа́ем ва́с пе́сньми хвале́бными, отцы́ досточу́днии, и вопие́м просла́вльшему ва́с Триеди́ному Бо́гу: Аллилу́иа.

И́кос 2.

Ра́зум небе́сный стяжа́сте, отцы́ богому́дрии, и вся́ кра́сная ми́ра сего́ презре́вше, в Горе́ Афо́нстей ми́р душе́вный о Христе́ обрето́сте, и со Христо́м во Ца́рствии Небе́снем пребыва́ете; отону́дуже и на́с, треволне́нием мо́ря жите́йскаго обурева́емых, моли́твами ва́шими благода́тно умири́те, да в тишине́ ду́ха воспое́м ва́м, засту́пником на́шим, пе́сни таковы́я:

Ра́дуйтеся, мо́ря стра́стнаго пучи́ну окормле́нием Христо́вым до́бре премину́вшии; ра́дуйтеся, в при́стань спасе́ния благополу́чно дости́гшии.

Ра́дуйтеся, ве́трилом ве́ры, наде́жды и любве́ кора́бль ду́ш ва́ших от бу́ри страсте́й неви́димо сохра́ншии; ра́дуйтеся, ко́твою поста́ и моли́твы кре́пце его́ утверди́вшии.

Ра́дуйтеся, зве́зды богосве́тлыя, но́щь грехо́вную на́шу благода́тно озаря́ющия; ра́дуйтеся, све́том доброде́телей ва́ших и на́ша мра́чныя ду́ши духо́вно просвеща́ющии.

Ра́дуйтеся, преподо́бнии отцы́ Афо́нстии, усе́рднии о душа́х на́ших моли́твенницы.

Конда́к 3.

Си́лою Христо́вою преиспо́лненнии святи́телие богому́дрии, Афана́сие, Ка́ллисте, Ни́фонте, Фео́но, Григо́рие и ини́и мно́зи, во Афо́не просия́вшии, па́стырие Христо́вы Це́ркве, моли́те, мо́лим вы́, Пастыренача́льника Христа́, да на́с, ове́ц заблу́ждших, упасе́т во спасе́ние и сподо́бит ны́ богому́дрию ва́шему подража́ти, богоуго́дне же и пра́ведно в ве́це се́м пожи́ти, благу́ю живота́ кончи́ну улучи́ти и вку́пе с ва́ми пе́ти Ему́: Аллилу́иа.

И́кос 3.

Иму́ще еди́но раче́ние, е́же еди́ному Христу́ благоугожда́ти, преподо́бием же и пра́вдою ве́рно Ему́ служи́ти, отцы́ всеблаже́ннии, Афо́ну похвала́ и утвержде́ние яви́стеся и жре́бий Богома́тере святы́ми по́двиги ва́шими духо́вно благоукраси́сте, с Не́ю же вку́пе помоли́теся ко Го́споду, Сы́ну Ея́ и Бо́гу, не лише́нным бы́ти и на́м благи́я ча́сти спаса́емых человеколю́бием Христо́вым, да зове́м ва́м благода́рственно и хвале́бно:

Ра́дуйтеся, Царя́ Небе́снаго во́ини непобеди́мии, под зна́мением Креста́ со враги́ неви́димыми ра́товавшии; ра́дуйтеся, Цари́цы Небе́сныя служи́телие избра́ннии, жре́бий Ея́ земны́й доброде́тельми ва́шими до́бре просла́вльшии.

Ра́дуйтеся, ра́дости небе́сныя и сла́вы святы́х досто́йнии насле́дницы; ра́дуйтеся, блаже́нства ра́йскаго и све́та невече́рняго соприча́стницы.

Ра́дуйтеся, от го́рних высо́т сла́вы ва́шея к земноро́дным ми́лостивно приника́ющии; ра́дуйтеся, на́с, ча́д ва́ших и ове́ц слове́сных па́ствы ва́шея, оте́чески посеща́ющии.

Ра́дуйтеся, преподо́бнии отцы́ Афо́нстии, усе́рднии о душа́х на́ших моли́твенницы.

Конда́к 4.

Бу́ри жите́йския му́дре избежа́сте, и ца́рствие земно́е на Ца́рствие Небе́сное до́бре премени́сте, мироточи́ве Симео́не и святи́телю Са́вво, се́рбская похвало́ и Хиланда́рския оби́тели кти́торы изря́днии; те́мже Христо́с чудесы́ пресла́вными ва́с просла́ви, и вме́сто вре́менных бла́г, ва́ми оста́вленных любве́ Его́ ра́ди, бла́гами нетле́нными и ве́чными ва́с обогати́, Ему́же моли́теся приле́жно, отцы́ достохва́льнии, спасе́ние о Христе́ улучи́ти и на́м, гре́шным, благоумиле́нно Ему́ зову́щим: Аллилу́иа.

И́кос 4.

Слы́шавше о по́двизех ва́ших, диви́мся, преподо́бнии отцы́ Афо́нстии, Го́ру Святу́ю жи́тельством ва́шим не́бо друго́е соде́лавшии, и от нея́ на го́ру небе́сную удо́бь восте́кшии, иде́же душа́ми ва́шими в Иерусали́ме го́рнем ны́не обита́ете и сла́дкаго лицезре́ния Христо́ва вы́ну наслажда́етеся. Но я́ко до́брии подража́телие милосе́рдия Спа́сова, на́с, смире́нных и гре́шных, моли́твами ва́шими ми́лостивно осени́те, и на спасе́ния стезю́ наста́вите, да ва́м зове́м всера́достно:

Ра́дуйтеся, орли́ небопа́рнии, от удо́лий Афо́на на го́ру небе́сную возлете́вшии; ра́дуйтеся, ла́стовицы сладкопе́сеннии, пусты́ню Афо́на пе́нии моли́твенными огласи́вшии.

Ра́дуйтеся, трисо́лнечным све́том горе́ озаре́ннии; ра́дуйтеся, чуде́с благода́тию и исцеле́ния дарова́нием до́лу от Го́спода просла́вленнии.

Ра́дуйтеся, я́ко мзда́ ва́ша мно́га е́сть на небесе́х; ра́дуйтеся, я́ко ду́ши ва́ша подо́бне со́лнцу сия́ют во све́тлостех святы́х.

Ра́дуйтеся, преподо́бнии отцы́ Афо́нстии, усе́рднии о душа́х на́ших моли́твенницы.

Конда́к 5.

Богосве́тлыя зве́зды яви́стеся, Иоа́нне, Гео́ргие и Евфи́мие И́верстии, Неофи́те и Евфи́мие Дохиа́рстии, Симео́не, Па́вле, Диони́сие и Григо́рие, оби́телей Афо́нских первонача́льницы и основа́телие всечестни́и, к ва́м же Григо́рий Синаи́т, Диони́сий Олимпи́йский, Симео́н, Феофа́н и Евдоки́м чудотво́рцы, Генна́дий и Некта́рий по́стницы, я́ко сия́ющии доброде́тельми, да сопричту́тся. Мо́лим ва́с, отцы́ всеблаже́ннии, во оби́телех ве́чных ны́не обита́ющии: не преста́йте моли́твами ва́шими сохраня́ти и соблюда́ти ны́, ча́да ва́ша духо́вная, от лови́твы и сете́й врага́ диа́вола, да, спаса́еми святы́м предста́тельством ва́шим, зове́м Спаси́телю Бо́гу: Аллилу́иа.

И́кос 5.

Ви́дим ва́с, отцы́ богоно́снии, вся́ за́поведи Христо́вы до́бре сохра́нших, и любому́дрию духо́вному усе́рдно прилежа́вших, и ва́шим о́бразом наставля́еми, ле́ность душевре́дную от себе́ оттрясе́м, на по́двиги же духо́вныя простира́емся, иму́ще ва́с к подви́жничеству духо́вному учи́телей и руководи́телей. Сего́ ра́ди благода́рственно ва́м зове́м:

Ра́дуйтеся, сле́знии иска́телие блаже́нства ра́йскаго; ра́дуйтеся, неусы́пнии моли́твенницы к Бо́гу о ми́ре всего́ ми́ра.

Ра́дуйтеся, посто́м ду́ши ва́ша во спасе́ние напита́вшии; ра́дуйтеся, бде́нии всено́щными и долулега́нии врага́ неви́димаго кре́пце низложи́вшии.

Ра́дуйтеся, пла́чем умиле́нным разжже́нныя стре́лы диа́вольских искуше́ний угаси́вшии; ра́дуйтеся, и́же из глубины́ воздыха́ньми пусты́ню Афо́на духо́вно уплодоноси́вшии.

Ра́дуйтеся, преподо́бнии отцы́ Афо́нстии, усе́рднии о душа́х на́ших моли́твенницы.

Конда́к 6.

Пропове́дником святы́я ве́ры, Апо́столом Христо́вым, усе́рдне подража́сте в про́поведи Ева́нгелия пра́вды, Космо́ равноапо́стольне, Дамиа́не, Ники́то, Киприа́не и Иа́кове с двема́ ученико́ма твои́ма, за и́мя Христо́во до кро́ве подвиза́вшеся, му́ченическую кончи́ну получи́сте, венцено́сцы добропобе́днии, и ны́не со Христо́м ве́чно ца́рствуете в оби́телех ра́йских, Его́же приле́жно моли́те, не лише́нным бы́ти и на́м насле́дия небе́снаго, вопию́щим Ему́: Аллилу́иа.

И́кос 6.

Возсия́сте на Афо́не, я́ко свети́льницы богосия́ннии, отцы́ преблаже́ннии, и всю́ вселе́нную озаря́ете чудесы́ ва́шими, от восто́ка бо и до се́вера прославля́ются хвале́бно, святи́и, имена́ ва́ша и ублажа́ются по́двиги равноа́нгельскаго жития́ ва́шего благохвале́нии таковы́ми:

Ра́дуйтеся, всера́достнии ве́стницы Христо́ва всемогу́щества и си́лы; ра́дуйтеся, крепкоду́шнии подви́жницы, сокруши́вшии главу́ прего́рдаго велиа́ра.

Ра́дуйтеся, до́брии целе́бницы неду́гов душе́вных и теле́сных; ра́дуйтеся, изве́стнии умилостиви́телие Царя́ Небе́снаго Христа́ Бо́га.

Ра́дуйтеся, оде́яннии в преподо́бие и пра́вду ратобо́рцы духо́внии; ра́дуйтеся, прие́мшии вла́сть от Го́спода на ду́хи нечи́стыя.

Ра́дуйтеся, преподо́бнии отцы́ Афо́нстии, усе́рднии о душа́х на́ших моли́твенницы.

Конда́к 7.

Хотя́щим благоче́стно о Христе́ жи́ти, о́браз богоуго́днаго и безмо́лвнаго жития́ явля́ете в себе́, преподо́бнии пустынножи́телие Макси́ме, Космо́ и Ака́кие, и мирото́чцы Ни́ле и Фео́филе, в пусты́нях Афо́на подвиза́вшиися равноа́нгельно, к ва́м же и преподо́бный Анто́ний Пече́рский, во Афо́не духо́вно воспита́нный, досто́йно сопричте́ся, и́же и первонача́льник и́ноческаго в Руси́ жития́ соде́лася. Моли́теся ко Го́споду, отцы́ богоно́снии, да вку́пе с ва́ми сподо́бимся и мы́, смире́ннии, Ца́рствие Небе́сное унасле́дити и в ра́дости святы́х воспева́ти Созда́телю на́шему во ве́ки: Аллилу́иа.

И́кос 7.

Но́вый Сио́н яви́ся Свята́я Гора́ Афо́нская, в не́йже от восто́ка, се́вера и ю́га приидо́ша ча́да духо́вная, благословля́ющая в не́й Го́спода в пе́снех хвале́бных: се́ бо собо́р богосве́тлый преподо́бных оте́ц, во Афо́не свя́то пожи́вших, созыва́ет на́с дне́сь чествова́ти и́х по́двиги и труды́ и вопи́ти к ни́м си́це:

Ра́дуйтеся, вели́ции уго́дницы Бо́жии, вели́чием по́двигов ва́ших А́нгелов удиви́вшии; ра́дуйтеся, пресла́внии чудотво́рцы, в беда́х и ско́рбех челове́ком помога́ющии.

Ра́дуйтеся, пусты́ни Афо́на благода́тная прозябе́ния; ра́дуйтеся, святы́я Правосла́вныя Це́ркве духо́вная красото́ и ра́дование.

Ра́дуйтеся, ра́дости на́м и сла́вы ве́чныя усе́рднии хода́таи; ра́дуйтеся, благи́х жела́ний на́ших ско́рии исполни́телие.

Ра́дуйтеся, преподо́бнии отцы́ Афо́нстии, усе́рднии о душа́х на́ших моли́твенницы.

Конда́к 8.

Стра́нно и пресла́вно по мо́рю немо́кренно проше́л еси́, Гаврии́ле преподо́бне, и ико́ну Боже́ственныя Врата́рницы Афо́ну прене́сл еси́ в благослове́ние и освяще́ние; тебе́ же, богоно́се Иоа́нне Кукузе́ле, Пресвята́я Богоро́дица Сама́ яви́ся и от ру́к Свои́х пречи́стых златни́цу ди́вно подаде́, да пое́ши Е́й немо́лчно пе́сни хвале́бныя. О толи́ких чудесе́х Бо́жиих дивя́щеся, вопие́м Бо́гу: Аллилу́иа.

И́кос 8.

Вся́ Свята́я Гора́ Афо́нская и вся́ пу́стыня ея́ и удо́лия благослове́ние Бо́жие в себе́ проявля́ют: от ни́х бо древеса́ благопло́дная рая́ Иису́сова прозябо́ша, собо́р ве́лий преподо́бных оте́ц на́ших Афо́нских, и́хже плода́ми духо́вными насыща́ющеся, благода́рным се́рдцем и усты́ глаго́лем к ни́м такова́я:

Ра́дуйтеся, а́нгели земни́и и челове́цы небе́снии; ра́дуйтеся, кри́ни благоуха́ннии пусты́ннаго прозябе́ния.

Ра́дуйтеся, онебеси́вшии Го́ру Афо́нскую доброде́тельми ва́шими небе́сными; ра́дуйтеся, вы́ну хода́тайствующии пред Го́сподем за ве́сь ми́р христиа́нский.

Ра́дуйтеся, избра́нницы Бо́жии, избра́ние ва́ше чудесы́ мно́гими засвиде́тельствовавшии; ра́дуйтеся, венцено́сцы добропобе́днии, от Христо́вы десни́цы увенча́ннии.

Ра́дуйтеся, преподо́бнии отцы́ Афо́нстии, усе́рднии о душа́х на́ших моли́твенницы.

Конда́к 9.

Вси́ А́нгели небе́снии удиви́шася вели́честву по́двига и терпе́ния ва́шего, преподобному́ченицы Зогра́фстии, предо́блии Фомо́ с дружи́ною твое́ю, от лати́нян за Правосла́вную ве́ру сожже́ннии, и же́ртва благоприя́тна Бо́гу я́вльшиися: ва́ша бо имена́ напи́сана су́ть на небесе́х, в кни́зе живота́ ве́чнаго, и испове́даются от Христа́ Бо́га пред Отце́м Небе́сным, Ему́же в ли́це му́ченичестем ра́достно пое́те: Аллилу́иа.

И́кос 9.

Вети́и суему́дрии челове́честии, глаго́лющии бу́йство бы́ти подви́жничество духо́вное, посрами́шася по́двиги ва́шими и чудесы́, преподо́бнии отцы́ на́ши Афо́нстии: кто́ бо не умили́тся ви́дя, ка́ко вы́ земна́я вся́ пренебре́гше, к небе́сным вседу́шно устреми́стеся и его́же иска́сте, того́ и достиго́сте, пресве́тлаго лицезре́ния Христо́ва. Сего́ ра́ди восхваля́ем ва́с си́це:

Ра́дуйтеся, язы́к свя́т, ца́рское свяще́ние, лю́дие обновле́ния; ра́дуйтеся, со́ль духо́вная всея́ земли́, я́же не обуя́ет во ве́ки.

Ра́дуйтеся, провозве́стницы пра́вды Христо́вы, изше́дшия от ми́ра на служе́ние Бо́гу; ра́дуйтеся, от вся́каго ро́да призва́ннии в сла́дкую рабо́ту Госпо́дню.

Ра́дуйтеся, яре́м благи́й на ся́ взе́мшии и всле́д Влады́ки Христа́ после́довавшии и́скренно; ра́дуйтеся, поко́й душа́м ва́шим ве́чный на небесе́х от Христа́ Подвигополо́жника восприя́вшии.

Ра́дуйтеся, преподо́бнии отцы́ Афо́нстии, усе́рднии о душа́х на́ших моли́твенницы.

Конда́к 10.

Спаси́телю Бо́гу, изве́дшему вы́ от го́рькия рабо́ты грехо́вныя, пе́снь хвале́бную возсыла́юще, за Христа́ пострада́ти устреми́стеся, преподобному́ченицы вседо́блии Мака́рие, Иларио́не, Пахо́мие, Константи́не, Ону́фрие, Проко́пие, Луко́, Тимофе́е, Агафанге́ле и ини́и мно́зии, от Афо́на изше́дшии и Христа́ пред ага́ряны испове́давшии, за Него́же до кро́ве пострада́сте и ду́ши ва́ша положи́сте, ны́не же с му́ченики ра́дуетеся и сла́дце пое́те Ему́: Аллилу́иа.

И́кос 10.

Царя́ Небе́снаго Христа́ до́блии ору́жницы яви́стеся, отцы́ богоно́снии, от Него́же мзду́ трудо́м ва́шим восприе́мше, духо́вных ча́д ва́ших по ве́ре о́бразом ва́шим путево́дствуете к Нему́ нело́жно, от на́с же слы́шите досто́йныя ва́м пе́сни сицевы́я:

Ра́дуйтеся, о ни́хже ра́дуются А́нгели и Бо́га сла́вят челове́цы; ра́дуйтеся, о ни́хже духо́вно красу́ется Свята́я Гора́ Афо́нская от ро́да в ро́д.

Ра́дуйтеся, о́блацы росоно́снии, зно́й страсте́й на́ших прохлажда́ющии; Ра́дуйтеся, ма́слины благопло́днии, еле́ем трудо́в ва́ших сердца́ на́ша умаща́ющии.

Ра́дуйтеся, адама́нты терпе́ния, сия́ющии луча́ми Бо́жия благода́ти; ра́дуйтеся, столпи́ Правосла́вия, чудесы́ ва́шими утвержда́ющии коле́блющихся в ве́ре.

Ра́дуйтеся, преподо́бнии отцы́ Афо́нстии, усе́рднии о душа́х на́ших моли́твенницы.

Конда́к 11.

Пе́ние Пресвяте́й Тро́ице принося́ще, тро́ица но́вых новому́чеников во Афо́не духо́вно возсия́: Евфи́мий, Игна́тий и Ака́кий вседо́блии, ага́рянское злоче́стие посрами́вшии и и́мя Христо́во пред ага́ряны испове́давшии пресла́вно, от ни́хже му́ченическую кончи́ну восприе́мше, со Христо́м ны́не обита́ют, воспева́я Ему́ побе́дную пе́снь: Аллилу́иа.

И́кос 11.

Све́тлыми луча́ми чуде́с ва́ших, отцы́ всеблаже́ннии, Гора́ Афо́нская духо́вно озаря́ется и блажи́т ва́с по до́лгу, я́ко небе́сных ея́ засту́пников и покрови́телей; мы́ же, чту́ще по́двиги ва́ша и страда́ния, от любве́ душе́вныя прино́сим ва́м со смире́нием и ве́рою похвалы́ сия́:

Ра́дуйтеся, ми́ро целе́бное Бо́жия благода́ти оби́льно на́м источа́ющии; ра́дуйтеся, неду́гов душе́вных и теле́сных вра́чеве предо́брии.

Ра́дуйтеся, еди́ныя то́кмо ве́ры ко уврачева́нию неду́гов от на́с тре́бующии; ра́дуйтеся, ту́не прие́мшии, ту́не подаю́щии на́м благода́ть исцеле́ния.

Ра́дуйтеся, даро́в духо́вных и душеспаси́тельных блази́и на́м пода́телие; ра́дуйтеся, в беда́х и ско́рбех ско́рии на́м помо́щницы и уте́шителие.

Ра́дуйтеся, преподо́бнии отцы́ Афо́нстии, усе́рднии о душа́х на́ших моли́твенницы.

Конда́к 12.

Благода́ти Бо́жией сосу́ди избра́ннии, вси́ преподо́бнии отцы́ на́ши Афо́нстии, поимено́ваннии и непоимено́ваннии, све́тлым собо́ром ва́шим на по́мощь к на́м ускори́те во вре́мя безпомо́щия на́шего и от напра́сныя и на́глыя сме́рти чту́щия вы́ изба́вите благоприя́тным предста́тельством ва́шим ко Го́споду, да благода́рственно зове́м Ему́: Аллилу́иа.

И́кос 12.

Пою́ще свято́е и равноа́нгельное житие́ ва́ше и мно́гая ва́ша чудеса́, преподо́бнии отцы́ на́ши Афо́нстии, хва́лим, сла́вим и велича́ем просла́вльшаго ва́с Христа́ Бо́га, Освяти́теля святы́х и Творца́ чудотво́рцев, изли́вшаго на ва́с оби́лие Свои́х даро́в благода́тных, ва́с же, святы́х и многомо́щных предста́телей на́ших, ублажа́ем зва́нии си́ми:

Ра́дуйтеся, наста́вницы мона́хов и собесе́дницы А́нгелов; ра́дуйтеся, все́х святы́х дру́зи и при́снии Бо́гу.

Ра́дуйтеся, гра́ждане сия́ющаго гра́да Иерусали́ма го́рняго; ра́дуйтеся, оби́телей ва́ших земны́х покрови́телие небе́снии.

Ра́дуйтеся, и́ноков правосла́вных утвержде́ние и заступле́ние; ра́дуйтеся, о все́м ми́ре неусы́пнии хода́таи.

Ра́дуйтеся, преподо́бнии отцы́ Афо́нстии, усе́рднии о душа́х на́ших моли́твенницы.

Конда́к 13.

О преподо́бнии отцы́ на́ши Афо́нстии, Бо́гом дарова́ннии на́м засту́пницы и покрови́телие, вы́ горе́, на небеси́, мы́ же до́лу, на земли́, удале́ннии от ва́с не толи́ко ме́стом, коли́ко грехо́вною нечистото́ю на́шею, оба́че дерза́ем приноси́ти ва́м сие́ ма́лое похва́льное пе́ние, и о еди́ном ва́с мо́лим и про́сим: умоли́те Спа́са Христа́ изба́вити на́с ве́чныя му́ки и сподо́бити ца́рства небе́снаго, да с ва́ми воспое́м Ему́ во ве́ки: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгели во пло́ти и челове́цы небе́снии вои́стину бы́сте, отцы́ богоно́снии, равноа́нгельное житие́ в пусты́нях Афо́на пожи́вше, равностоя́телие А́нгелов на небеси́ яви́стеся, отону́дуже све́тлыми луча́ми моли́тв ва́ших мра́к ду́ш на́ших вы́ну благода́тию озаря́ете, о́бразом же ва́шего богоуго́днаго жития́ на спасе́ния стезю́ на́с путеводи́те, зову́щих ва́м от души́:

Ра́дуйтеся, свети́льницы немерца́ющии Бо́жия благода́ти; ра́дуйтеся, столпи́ непоколеби́мии Святы́я Правосла́вныя Це́ркве.

Ра́дуйтеся, подви́жницы до́блии, по́двиги ва́шими Афо́н удобри́вшии; ра́дуйтеся, по́стницы богому́дрии, во всю́ вселе́нную чудесы́ сия́ющии.

Ра́дуйтеся, би́серие духо́внии, от удо́лий Афо́на в Сио́не го́рнем возблиста́вшии; ра́дуйтеся, добро́тою ду́ш ва́ших Го́споду Иису́су благоуго́дни я́вльшиися.

Ра́дуйтеся, преподо́бнии отцы́ Афо́нстии, усе́рднии о душа́х на́ших моли́твенницы.

Конда́к 1.

Избра́ннии уго́дницы Госпо́дни, духо́вно благоуха́ющии цве́ти са́да Иису́сова, от Святы́я Горы́ Афо́нския в вертогра́д небе́сный вознесе́ннии, и дерзнове́ние ко Го́споду стяжа́вшии, мо́лим ва́с, отцы́ богоно́снии, моли́твами ва́шими от вся́ких на́с бе́д свободи́те, да зове́м ва́м хвале́бно:

Ра́дуйтеся, преподо́бнии отцы́ Афо́нстии, усе́рднии о душа́х на́ших моли́твенницы.

Моли́тва.

О преподо́бнии и богоно́снии отцы́ на́ши Афо́нстии, свети́ла земна́я пресве́тлая, от пусты́нных удо́лий Святы́я Горы́ Афо́нския, в Це́ркви Правосла́вней сла́вно просия́вшии, и Святу́ю Го́ру вселе́ния ва́шего жития́ добро́тами онебеси́вшии, всю́ же вселе́нную высо́ких доброде́телей све́тлостьми и чуде́с Боже́ственных блиста́нии удиви́вшии. Ны́не сме́ртным за́падом вы́ пло́тски на вре́мя во гро́б заше́дше, душа́ми ва́шими со Христо́м, Со́лнцем пра́вды, су́ще пра́ведницы, просвеща́етеся я́ко со́лнце во Ца́рствии Небе́снем, иде́же моли́твенныя ва́ша, к Бо́гу, Све́ту и́стинному, лучи́ простира́юще, не забу́дите и на́с, ча́д ва́ших духо́вных, в но́щи страсте́й и скорбе́й пребыва́ющих, свы́ше благода́тными призира́ти осия́нии, я́ко да во све́те доброде́тельнаго жития́ ва́шего пра́во ходя́ще путе́м за́поведей Христо́вых, сподо́бимся зре́ти све́т непристу́пныя сла́вы Бо́жия, хва́ляще ку́пно с ва́ми в Тро́ице Святе́й сла́вимаго и покланя́емаго Бо́га, Отца́ и Сы́на и Свята́го Ду́ха в несконча́емыя ве́ки. Ами́нь.