Акафист святым преподобным отцам, на святой горе Афонской просиявшим

Одобрен: 1913 год.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 18 июня (05 июня ст. ст.)

Утвержден для общецерковного использования.

Кондак 1

Избраннии угодницы Господни, духовно благоухающии цвети сада Иисусова, от Святыя Горы Афонския в вертоград небесный вознесеннии, и дерзновение ко Господу стяжавшии, молим вас, отцы богоноснии, молитвами вашими от всяких нас бед свободите, да зовем вам хвалебно: Радуйтеся, преподобнии отцы Афонстии, усерднии о душах наших молитвенницы.

Икос 1

Ангели во плоти и человецы небеснии воистину бысте, отцы богоноснии, равноангельное житие в пустынях Афона поживше, равностоятелие Ангелов на небеси явистеся, отнюдуже светлыми лучами молитв ваших мрак душ наших выну благодатию озаряете, образом же вашего богоугоднаго жития на спасения стезю нас путеводите, зовущих вам от души:

Радуйтеся, светильницы немерцающии Божия благодати.

Радуйтеся, столпи непоколебимии Святыя Православныя Церкве.

Радуйтеся, подвижницы доблии, подвиги вашими Афон удобрившии.

Радуйтеся, постницы богомудрии, во всю вселенную чудесы сияющии.

Радуйтеся, бисерие духовнии, от удолий Афона в Сионе горнем возблиставшии.

Радуйтеся, добротою душ ваших Господу Иисусу благоугоднии явльшиися.

Радуйтеся, преподобнии отцы Афонстии, усерднии о душах наших молитвенницы.

Кондак 2

Видим вас, преподобнии отцы Петре и Афанасие, в соборе преподобных Афонских первенство приемших, и явление вам Пресвятыя Богородицы зело облагодатствованных; темже, яко двоицу богомудрую, Троице Божественней добре послужившую, ублажаем вас песньми хвалебными, отцы досточуднии, и вопием прославльшему вас Триединому Богу: Аллилуиа.

Икос 2

Разум небесный стяжасте, отцы богомудрии, и вся красная мира сего презревше, в Горе Афонстей мир душевный о Христе обретосте, и со Христом во Царствии Небеснем пребываете; отнюдуже и нас, треволнением моря житейскаго обуреваемых, молитвами вашими благодатно умирите, да в тишине духа воспоем вам, заступником нашим, песни таковыя:

Радуйтеся, моря страстнаго пучину окормлением Христовым добре преминувшии.

Радуйтеся, в пристань спасения благополучно достигшии.

Радуйтеся, ветрилом веры, надежды и любве корабль душ ваших от бури страстей невидимо сохраншии.

Радуйтеся, котвою поста и молитвы крепце его утвердившии.

Радуйтеся, звезды богосветлыя, нощь греховную нашу благодатно озаряющия.

Радуйтеся, светом добродетелей ваших и наша мрачныя души духовно просвещающии.

Радуйтеся, преподобнии отцы Афонстии, усерднии о душах наших молитвенницы.

Кондак 3

Силою Христовою преисполненнии святителие богомудрии, Афанасие, Каллисте, Нифонте, Феоно, Григорие и инии мнози, во Афоне просиявшии, пастырие Христовы Церкве, молите, молим вы, Пастыреначальника Христа, да нас, овец заблуждших, упасет во спасение и сподобит ны богомудрию вашему подражати, богоугодне же и праведно в веце сем пожити, благую живота кончину улучити и вкупе с вами пети Ему: Аллилуиа.

Икос 3

Имуще едино рачение, еже единому Христу благоугождати, преподобием же и правдою верно Ему служити, отцы всеблаженнии, Афону похвала и утверждение явистеся и жребий Богоматере святыми подвиги вашими духовно благоукрасисте, с Нею же вкупе помолитеся ко Господу, Сыну Ея и Богу, не лишенным быти и нам благия части спасаемых человеколюбием Христовым, да зовем вам благодарственно и хвалебно:

Радуйтеся, Царя Небеснаго воини непобедимии, под знамением Креста со враги невидимыми ратовавшии.

Радуйтеся, Царицы Небесныя служителие избраннии, жребий Ея земный добродетельми вашими добре прославльшии.

Радуйтеся, радости небесныя и славы святых достойнии наследницы.

Радуйтеся, блаженства райскаго и света невечерняго сопричастницы.

Радуйтеся, от горних высот славы вашея к земнородным милостивно приникающии.

Радуйтеся, нас, чад ваших и овец словесных паствы вашея, отечески посещающии.

Радуйтеся, преподобнии отцы Афонстии, усерднии о душах наших молитвенницы.

Кондак 4

Бури житейския мудре избежасте, и царствие земное на Царствие Небесное добре изменисте, мироточиве Симеоне и святителю Савво, сербская похвало и Хилендарския обители ктитори изряднии; темже Христос чудесы преславными вас прослави, и вместо временных благ, вами оставленных любве Его ради, благами нетленными и вечными вас обогати, Емуже молитеся прилежно, отцы достохвальнии, спасение о Христе улучити и нам, грешным, благоумиленно Ему зовущим: Аллилуиа.

Икос 4

Слышавше о подвизех ваших, дивимся, преподобнии отцы Афонстии, Гору Святую жительством вашим небо другое соделавшии, и от нея на гору небесную удобь востекшии, идеже душами вашими в Иерусалиме горнем ныне обитаете и сладкаго лицезрения Христова выну наслаждаетеся. Но яко добрии подражателие милосердия Спасова, нас, смиренных и грешных, молитвами вашими милостивно осените, и на спасения стезю наставите, да вам зовем все радостно:

Радуйтеся, орли небопарнии, от удолий Афона на гору небесную возлетевшии.

Радуйтеся, ластовицы сладкопесненнии, пустыню Афона пении молитвенными огласившии.

Радуйтеся, трисолнечным светом горе озареннии.

Радуйтеся, чудес благодатию и исцеления дарованием долу от Господа прославленнии.

Радуйтеся, яко мзда ваша многа есть на небесех.

Радуйтеся, яко души ваша подобне солнцу сияют во светлостех святых.

Радуйтеся, преподобнии отцы Афонстии, усерднии о душах наших молитвенницы.

Кондак 5

Богосветлыя звезды явистеся, Иоанне, Георгие и Евфимие Иверстии, Неофите и Евфимие Дохиарстии, Симеоне, Павле, Дионисие и Григорие, обителей Афонских первоначальницы и основателие всечестнии, к вам же Григорий Синаит, Дионисий Олимпийский, Симеон, Феофан и Евдоким чудотворцы, Геннадий и Нектарий постницы, яко сияющии добродетельми, да сопричтутся. Молим вас, отцы всеблаженнии, во обителех нерукотворных и вечных ныне обитающии: не престайте молитвами вашими сохраняти и соблюдати ны, чада ваша духовная, от ловитвы и сетей врага диавола, да, спасаеми святым небесным предстательством вашим, зовем Спасителю Богу: Аллилуиа.

Икос 5

Видим вас, отцы богоноснии, вся заповеди Христовы добре сохранших, и любомудрию духовному усердно прилежавших, и вашим образом наставляеми, леность душевредную от себе оттрясаем, на подвиги же духовныя простираемся, имуще вас к подвижничеству духовному учителей и руководителей. Сего ради благодарственно вам зовем:

Радуйтеся, слезнии искателие блаженства райскаго.

Радуйтеся, неусыпнии молитвенницы к Богу о мире всего мира.

Радуйтеся, постом души ваша во спасение напитавшии.

Радуйтеся, бдении всенощными и долулегании врага невидимаго крепце низложившии.

Радуйтеся, плачем умиленным разжженныя стрелы диавольских искушений угасившии.

Радуйтеся, иже из глубины воздыханьми пустыню Афона духовно уплодоносившии.

Радуйтеся, преподобнии отцы Афонстии, усерднии о душах наших молитвенницы.

Кондак 6

Проповедником святыя веры, Апостолом Христовым, усердне подражасте в проповеди Евангелия правды, Космо равноапостольне, Дамиане, Никито, Киприане и Иакове с двема ученикома твоима, за имя Христово до крове подвизавшеся, мученическую кончину получисте, венценосцы добропобеднии, и ныне со Христом вечно царствуете в обителех райских, Егоже прилежно молите, нелишенным быти и нам наследия небеснаго, вопиющим Ему: Аллилуиа.

Икос 6

Возсиясте на Афоне, яко светильницы богосияннии, отцы преблаженнии, и всю вселенную озаряете чудесы вашими, от востока бо и до севера прославляются хвалебно, святии, имена ваша и ублажаются подвиги раноангельскаго жития вашего благохвалении таковыми:

Радуйтеся, всерадостнии вестницы Христова всемогущества и силы.

Радуйтеся, крепкодушнии подвижницы, сокрушившии главу прегордаго велиара.

Радуйтеся, добрии целебницы недугов душевных и телесных.

Радуйтеся, известнии умилостивителие Царя Небеснаго Христа Бога.

Радуйтеся, одеяннии в преподобие и правду ратоборцы духовнии.

Радуйтеся, приемшии власть от Господа на духи нечистыя.

Радуйтеся, преподобнии отцы Афонстии, усерднии о душах наших молитвенницы.

Кондак 7

Хоящим благочестно о Христе жити, образ богоугоднаго и безмолвнаго жития являете в себе, преподобнии пустынножителие Максиме, Космо и Акакие, и мироточцы Ниле и Феофиле, в пустынях Афона подвизавшиися равноангельно, к вам же и преподобный Антоний Печерский, во Афоне духовно воспитанный, достойно сопричтеся, иже и первоначальник иноческаго в Руси жития соделася. Молитеся ко Господу, отцы богоноснии, да вкупе с вами сподобимся и мы, смиреннии, Царствие Небесное унаследити и в радости святых воспевати Создателю нашему во веки: Аллилуиа.

Икос 7

Новый Сион явися Святая Гора Афонская, в нейже от востока, севера и юга приидоша чада духовная, благословляющая в ней Господа в песнех хвалебных: се бо собор богосветлый преподобных отец, во Афоне свято поживших, созывает нас днесь чествовати их подвиги и труды и вопити к ним сице:

Радуйтеся, велиции угодницы Божии, величием подвигов ваших Ангелов удивившии.

Радуйтеся, преславнии чудотворцы, в бедах и скорбех человеком помогающии.

Радуйтеся, пустыни Афона благодатная прозябения.

Радуйтеся, святыя Православныя Церкве духовная красото и радование.

Радуйтеся, радости нам и славы вечныя усерднии ходатаи.

Радуйтеся, во благих желаний наших скории исполнителие.

Радуйтеся, преподобнии отцы Афонстии, усерднии о душах наших молитвенницы.

Кондак 8

Странно и преславно по морю немокренно прошел еси, Гаврииле преподобне, и икону Божественныя Вратарницы Афону пренесл еси в благословение и освящение; тебе же, богоносе Иоанне Кукузеле, Пресвятая Богородица Сама явися и от рук Своих пречистых златницу дивно подаде, да поеши Ей немолчно песни хвалебныя. О толиких чудесех Божиих дивящеся, вопием Богу: Аллилуиа.

Икос 8

Вся Святая Гора Афонская и вся пустыня ея и удолия благословение Божие в себе проявляют: из них бо древеса благоплодная рая Иисусова прозябоша, собор великий преподобных отец наших Афонских, ихже плодами духовными насыщающеся, благодарным сердцем и усты глаголем к ним таковая:

Радуйтеся, ангели земнии и человецы небеснии.

Радуйтеся, крини благоуханнии пустыннаго прозябения.

Радуйтеся, онебесившии Гору Афонскую добродетельми вашими небесными.

Радуйтеся, выну ходатайствующии пред Господем за весь мир христианский.

Радуйтеся, избраницы Божии, избрание ваше чудесы многими засвидетельствовавшии.

Радуйтеся, венценосцы добропобеднии, от Христовы десницы увенчаннии.

Радуйтеся, преподобнии отцы Афонстии, усерднии о душах наших молитвенницы.

Кондак 9

Вси Ангели небеснии удивишася величеству подвига и терпения вашего, преподобномученицы Зографстии, предоблии Фомо с дружиною твоею, от латинян за Православную веру сожженнии, и жертва благоприятна Богу явльшиися: ваша бо имена написана суть на небесех, в книзе живота вечнаго, и исповедаются от Христа Бога пред Отцем Небесным, Емуже в лице мученичестем радостно поете: Аллилуиа.

Икос 9

Витии суемудрии человечествии, глаголющии буйство быти подвижничество духовное, посрамишася подвиги вашими и чудесы, преподобнии отцы наши Афонстии: кто бо не умилится видя, како вы земная вся пренебрегше, к небесным вседушно устремистеся и егоже искасте, того и достигосте, пресветлаго лицезрения Христова. Сего ради восхваляем вас сице:

Радуйтеся, язык свят, царское священие, людие обновления.

Радуйтеся, соль духовная всея земли, яже не обуяет во веки.

Радуйтеся, провозвестницы правды Христовы, изшедшия от мира на служение Богу.

Радуйтеся, от всякаго рода призваннии в сладкую работу Господню.

Радуйтеся, ярем благий на ся вземшии и вслед Владыки Христа последовавшии Ему искренно.

Радуйтеся, покой душам вашим вечный на небесех от Христа Подвигоположника восприявшии.

Радуйтеся, преподобнии отцы Афонстии, усерднии о душах наших молитвенницы.

Кондак 10

Спасителю Богу, изведшему вы от горькия работы греховныя, песнь хвалебную возсылающе, за Христа пострадати устремистеся, преподобномученицы вседоблии Макарие, Иларионе, Пахомие, Константине, Онуфрие, Прокопие, Луко, Тимофее, Агафангеле и инии мнозии, от Афона изшедшии и Христа пред агаряны исповедавшии, за Негоже до крове пострадасте и души ваша положисте, ныне же с мученики радуетеся и сладце поете Ему: Аллилуиа.

Икос 10

Царя Небеснаго Христа доблии оружницы явистеся, отцы богоноснии, от Негоже мзду трудом вашим восприемше, духовных чад ваших по вере образом вашим путеводствуете к Нему неложно, от нас же слышите достойныя вам песни сицевыя:

Радуйтеся, о нихже радуются Ангели и Бога славят человецы.

Радуйтеся, о нихже духовно красуется Святая Гора Афонская от рода в род.

Радуйтеся, облацы росоноснии, зной страстей наших прохлаждающии.

Радуйтеся, маслины благоплоднии, елеем трудов ваших сердца наша умащающии.

Радуйтеся, адаманты терпения, сияющии лучами Божия благодати.

Радуйтеся, столпи Православия, чудесы вашими утверждающии колеблющихся в вере.

Радуйтеся, преподобнии отцы Афонстии, усерднии о душах наших молитвенницы.

Кондак 11

Пение Пресвятей Троице приносяще, троица новых новомучеников во Афоне духовно возсия: Евфимий, Игнатий и Акакий вседоблии, агарянское злочестие посрамившии и имя Христово пред агаряны исповедавшии преславно, от нихже мученическую кончину восприемше, со Христом ныне обитают, воспевая Ему победную песнь: Аллилуиа.

Икос 11

Светлыми лучами чудес ваших, отцы всеблаженнии, Гора Афонская духовно озаряется и блажит вас по долгу, яко небесных ея заступников и покровителей; мы же, чтуще подвиги ваша и страдания, от любве душевныя приносим вам со смирением и верою сия похвалы:

Радуйтеся, миро целебное Божия благодати обильно нам источающии.

Радуйтеся, недугов душевных и телесных врачеве предобрии.

Радуйтеся, единыя токмо веры ко уврачеванию недугов от нас требующии.

Радуйтеся, туне приемшии, туне подающии нам благодать исцеления.

Радуйтеся, даров духовных и душеспасительных блазии нам подателие.

Радуйтеся, в бедах и скорбех скории нам помощницы и утешителие.

Радуйтеся, преподобнии отцы Афонстии, усерднии о душах наших молитвенницы.

Кондак 12

Благодати Божией сосуди избраннии, вси преподобнии отцы наши Афонстии, поименованнии и непоименованнии, светлым собором вашим на помощь к нам ускорите во время безпомощия нашего и от напрасныя и наглыя смерти чтущия вы избавите благоприятным предстательством вашим ко Господу, да благодарственно зовем Ему: Аллилуиа.

Икос 12

Поюще святое и равноангельное житие ваше и многая ваша чудеса, преподобнии отцы наши Афонстии, хвалим, славим и величаем прославльшаго вас Христа Бога, Освятителя святых и Творца чудотворцев, излившаго на вас обилие Своих даров благодатных, вас же, святых и многомощных предстателей наших, ублажаем звании сими:

Радуйтеся, наставницы монахов и собеседницы Ангелов.

Радуйтеся, всех святых друзи и приснии Богу.

Радуйтеся, граждане сияющаго града Иерусалима горняго.

Радуйтеся, обителей ваших земных покровителие небеснии.

Радуйтеся, иноков православных утверждение и заступление.

Радуйтеся, о всем мире неусыпнии ходатаи.

Радуйтеся, преподобнии отцы Афонстии, усерднии о душах наших молитвенницы.

Кондак 13

О преподобнии отцы наши Афонстии, Богом дарованнии нам заступницы и покровителие, вы горе, на небеси, мы же долу, на земли, удаленнии от вас не толико местом, колико греховною нечистотою нашею, обаче дерзаем приносити вам сие малое похвальное пение, и о едином вас молим и просим: умолите Спаса Христа избавити нас вечныя муки и сподобити царства небеснаго, да с вами воспоем Ему во веки: Аллилуиа.

(Этот кондак читается трижды, затем икос 1 и кондак 1)

Молитва всем преподобным и богоносным отцам, во Святой Горе Афонской просиявшим

О блаженнии и святии отцы, преподобнии, святителие, священномученицы и преподобномученицы, мироточивии и чудотворцы, земнии Ангели и Небеснии человецы, сея Святыя Горы насельницы и украсителие, по Богородице наши предстателие пред Господем, благодетелие и назирателие, царское победоносное ополчение, в телесех победившее безтелесныя демоны, Царицы Небесныя Пречистыя Богородицы мироуханнии цвети, светлоплодовитая древеса мысленнаго сего рая Приснодевы, реки приснотекущия дарований духовных! Приимите похвальная словеса сия, яже вам приносим, якоже Господь прият вдовицы две лепте, и общее празднество, совершаемое нами в честь и память вашу, объимите, яко воню благоухания и жертву благоприятну: не имамы бо ино что принести по долгу благодетелем нашим за великая благодеяния, яже прияхом и имамы приити от вас. Ей, исповедуем, яко мы грех ради наших несмы достойни жити на месте сем и именоватися сынми вашими, но вы за благосердие ваше не отрицайтеся быти нам отцы. Не забывайте нас, смиренных, но соблюдайте священныя монастыри ваша и вся скиты и келлии и нас, живущих в них, сохраняйте и избавляйте от всякаго искушения и напасти в житии сем, в будущем же веце да сподобимся святыми вашими молитвами блаженства купно с вами, сынове со отцы своими, стадо с пастыри своими, ученицы со учители своими, и да услышим от вас оный блаженный глас ко Господу: се мы и дети, яже дал еси нам, Господи! И, радующеся, воздадим всякую славу, честь и поклонение Отцу и Сыну и Святому Духу во веки веков. Аминь.

Конда́къ а҃.

И҆збра́ннїи ᲂу҆гѡ́дницы гдⷭ҇ни, дꙋхо́внѡ бл҃гоꙋха́ющїи цвѣ́ти са́да і҆и҃сова, ѿ ст҃ы́ѧ горы̀ а҆ѳѡ́нскїѧ въ вертогра́дъ нбⷭ҇ный вознесе́ннїи, и҆ дерзнове́нїе ко гдⷭ҇ꙋ стѧжа́вшїи, мо́лимъ ва́съ, ѻ҆тцы̀ бг҃оно́снїи, мл҃твами ва́шими ѿ всѧ́кихъ на́съ бѣ́дъ свободи́те, да зове́мъ ва́мъ хвале́бнѡ:

Ра́дꙋйтесѧ, прпⷣбнїи ѻ҆тцы̀ а҆ѳѡ́нстїи, ᲂу҆се́рднїи ѡ҆ дꙋша́хъ на́шихъ мл҃твєнницы.

І҆́косъ а҃.

А҆́гг҃ли во пло́ти и҆ человѣ́цы нбⷭ҇нїи вои́стиннꙋ бы́сте, ѻ҆тцы̀ бг҃оно́снїи, равноа́гг҃льное житїѐ въ пꙋсты́нѧхъ а҆ѳѡ́на пожи́вше, равностоѧ́телїе а҆́гг҃лѡвъ на нб҃сѝ ꙗ҆ви́стесѧ, ѿѻнꙋ́дꙋже свѣ́тлыми лꙋча́ми мл҃твъ ва́шихъ мра́къ дꙋ́шъ на́шихъ вы́нꙋ бл҃года́тїю ѡ҆зарѧ́ете: ѡ҆́бразомъ же ва́шегѡ бг҃оꙋго́днагѡ житїѧ̀ на сп҃се́нїѧ стезю̀ на́съ пꙋтеводи́те, зовꙋ́щихъ ва́мъ ѿ дꙋшѝ:

Ра́дꙋйтесѧ, свѣти́льницы немерца́ющїи бж҃їѧ блгⷣти: ра́дꙋйтесѧ, столпѝ непоколеби́мїи ст҃ы́ѧ правосла́вныѧ цр҃кве.

Ра́дꙋйтесѧ, подви́жницы до́блїи, пѡ́двиги ва́шими а҆ѳѡ́нъ ᲂу҆добри́вшїи: ра́дꙋйтесѧ, по́стницы бг҃омꙋ́дрїи, во всю̀ вселе́ннꙋю чꙋдесы̀ сїѧ́ющїи.

Ра́дꙋйтесѧ, би́серїе дх҃о́внїи, ѿ ᲂу҆до́лїй а҆ѳѡ́на въ сїѡ́не го́рнѣмъ возблиста́вшїи: ра́дꙋйтесѧ, добро́тою дꙋ́шъ ва́шихъ гдⷭ҇ꙋ і҆и҃сꙋ бл҃гоꙋго́дни ꙗ҆́вльшїисѧ.

Ра́дꙋйтесѧ, прпⷣбнїи ѻ҆тцы̀ а҆ѳѡ́нстїи, ᲂу҆се́рднїи ѡ҆ дꙋша́хъ на́шихъ мл҃твєнницы.

Конда́къ в҃.

Ви́димъ ва́съ, прпⷣбнїи ѻ҆тцы̀ пе́тре и҆ а҆ѳана́сїе, въ собо́ре прпⷣбныхъ а҆ѳѡ́нскихъ пе́рвенство прїе́мшихъ, и҆ ꙗ҆вле́нїе ва́мъ прест҃ы́ѧ бг҃оро́дицы ѕѣлѡ̀ ѡ҆благода́тствованныхъ: тѣ́мже, ꙗ҆́кѡ дво́ицꙋ бг҃омꙋ́дрꙋю, трⷪ҇цѣ бжⷭ҇твеннѣй до́брѣ послꙋжи́вшꙋю, ᲂу҆блажа́емъ ва́съ пѣ́сньми хвале́бными, ѻ҆тцы̀ досточꙋ́днїи, и҆ вопїе́мъ просла́вльшемꙋ ва́съ трїеди́номꙋ бг҃ꙋ: А҆ллилꙋ́їа.

І҆́косъ в҃.

Ра́зꙋмъ нбⷭ҇ный стѧжа́сте, ѻ҆тцы̀ бг҃омꙋ́дрїи, и҆ всѧ̑ кра̑снаѧ мі́ра сегѡ̀ презрѣ́вше, въ горѣ̀ а҆ѳѡ́нстѣй ми́ръ дꙋше́вный ѡ҆ хрⷭ҇тѣ̀ ѡ҆брѣто́сте, и҆ со хрⷭ҇то́мъ во црⷭ҇твїи нбⷭ҇нѣмъ пребыва́ете. ѿѻнꙋ́дꙋже и҆ на́съ, треволне́нїемъ мо́рѧ жите́йскагѡ ѡ҆бꙋрева́емыхъ, мл҃твами ва́шими бл҃года́тнѡ ᲂу҆мири́те, да въ тишинѣ̀ дꙋ́ха воспое́мъ ва́мъ, застꙋ́пникѡмъ на́шымъ, пѣ̑сни таковы́ѧ:

Ра́дꙋйтесѧ, мо́рѧ стра́стнагѡ пꙋчи́нꙋ ѡ҆кормле́нїемъ хрⷭ҇то́вымъ до́брѣ преминꙋ́вшїи: ра́дꙋйтесѧ, въ при́стань сп҃се́нїѧ бл҃гополꙋ́чнѡ дости́гшїи.

Ра́дꙋйтесѧ, вѣтри́ломъ вѣ́ры, наде́жды и҆ любвѐ кора́бль дꙋ́шъ ва́шихъ ѿ бꙋ́ри страсте́й неви́димѡ сохра́ншїи: ра́дꙋйтесѧ, ко́твою поста̀ и҆ мл҃твы крѣ́пцѣ є҆гѡ̀ ᲂу҆тверди́вшїи.

Ра́дꙋйтесѧ, ѕвѣ̑зды бг҃освѣ̑тлыѧ, но́щь грѣхо́внꙋю на́шꙋ бл҃года́тнѡ ѡ҆зарѧ́ющїѧ: ра́дꙋйтесѧ, свѣ́томъ добродѣ́телей ва́шихъ и҆ на́шѧ мра́чныѧ дꙋ́ши дꙋхо́внѡ просвѣща́ющїи.

Ра́дꙋйтесѧ, прпⷣбнїи ѻ҆тцы̀ а҆ѳѡ́нстїи, ᲂу҆се́рднїи ѡ҆ дꙋша́хъ на́шихъ мл҃твєнницы.

Конда́къ г҃.

Си́лою хрⷭ҇то́вою преиспо́лненнїи ст҃и́телїе бг҃омꙋ́дрїи, а҆ѳана́сїе, ка́ллїсте, ни́фѡнте, ѳеѡ́но, григо́рїе и҆ и҆ні́и мнѡ́зи, во а҆ѳѡ́нѣ просїѧ́вшїи, па́стырїе хрⷭ҇то́вы цр҃кве, моли́те, мо́лимъ вы̀, пастыренача́льника хрⷭ҇та̀, да на́съ, ѻ҆ве́цъ заблꙋ́ждшихъ, ᲂу҆пасе́тъ во сп҃се́нїе и҆ сподо́битъ ны̀ бг҃омꙋ́дрїю ва́шемꙋ подража́ти, бг҃оꙋго́днѣ же и҆ пра́веднѡ въ вѣ́цѣ се́мъ пожи́ти, бл҃гꙋ́ю живота̀ кончи́нꙋ ᲂу҆лꙋчи́ти и҆ вкꙋ́пѣ съ ва́ми пѣ́ти є҆мꙋ̀: А҆ллилꙋ́їа.

І҆́косъ г҃.

И҆мꙋ́ще є҆ди́но раче́нїе, є҆́же є҆ди́номꙋ хрⷭ҇тꙋ̀ бл҃гоꙋгожда́ти, преподо́бїемъ же и҆ пра́вдою вѣ́рнѡ є҆мꙋ̀ слꙋжи́ти, ѻ҆тцы̀ всебл҃же́ннїи, похвала̀ и҆ ᲂу҆твержде́нїе ꙗ҆ви́стесѧ, и҆ жре́бїй бг҃омт҃ре ст҃ы́ми пѡ́двиги ва́шими дꙋхо́внѡ бл҃гоꙋкраси́сте, съ не́ю же вкꙋ́пѣ помоли́тесѧ ко гдⷭ҇ꙋ, сн҃ꙋ є҆ѧ̀ и҆ бг҃ꙋ, не лишє́ннымъ бы́ти и҆ на́мъ бл҃гі́ѧ ча́сти сп҃са́емыхъ человѣколю́бїемъ хрⷭ҇то́вымъ, да зове́мъ ва́мъ бл҃года́рственнѡ и҆ хвале́бнѡ:

Ра́дꙋйтесѧ, цр҃ѧ̀ нбⷭ҇нагѡ во́ини непобѣди́мїи, под̾ зна́менїемъ креста̀ со враги̑ неви́димыми ра́товавшїи: ра́дꙋйтесѧ, цр҃и́цы нбⷭ҇ныѧ слꙋжи́телїе и҆збра́ннїи, жре́бїй є҆ѧ̀ земны́й добродѣ́тельми ва́шими до́брѣ просла́вльшїи.

Ра́дꙋйтесѧ, ра́дости нбⷭ҇ныѧ и҆ сла́вы ст҃ы́хъ досто́йнїи наслѣ̑дницы: ра́дꙋйтесѧ, бл҃же́нства ра́йскагѡ и҆ свѣ́та невече́рнѧгѡ соприча́стницы.

Ра́дꙋйтесѧ, ѿ го́рнихъ высо́тъ сла́вы ва́шеѧ къ земнорѡ́днымъ ми́лостивнѡ приника́ющїи: ра́дꙋйтесѧ, на́съ, ча̑дъ ва́шихъ и҆ ѻ҆ве́цъ слове́сныхъ па́ствы ва́шеѧ, ѻ҆те́чески посѣща́ющїи.

Ра́дꙋйтесѧ, прпⷣбнїи ѻ҆тцы̀ а҆ѳѡ́нстїи, ᲂу҆се́рднїи ѡ҆ дꙋша́хъ на́шихъ мл҃твєнницы.

Конда́къ д҃.

Бꙋ́ри жите́йскїѧ мꙋ́дре и҆збѣжа́сте, и҆ ца́рствїе земно́е на црⷭ҇твїе нбⷭ҇ное до́брѣ премѣни́сте, мѷроточи́ве сѷмеѡ́не и҆ ст҃и́телю са́вво, се́рбскаѧ похвало̀ и҆ хїланда́рскїѧ ѡ҆би́тели кти́торы и҆зрѧ́днїи: тѣ́мже хрⷭ҇то́съ чꙋдесы̀ пресла́вными ва́съ просла́ви, и҆ вмѣ́стѡ вре́менныхъ бла̑гъ, ва́ми ѡ҆ста́вленныхъ любвѐ є҆гѡ̀ ра́ди, бл҃гами нетлѣ́нными и҆ вѣ́чными ва́съ ѡ҆богатѝ. є҆мꙋ́же мо́литесѧ прилѣ́жнѡ, ѻ҆тцы̀ достохва́льнїи, сп҃се́нїе ѡ҆ хрⷭ҇тѣ̀ ᲂу҆лꙋчи́ти и҆ на́мъ, грѣ́шнымъ, бл҃гоꙋмиле́ннѡ є҆мꙋ̀ зовꙋ́щымъ: А҆ллилꙋ́їа.

І҆́косъ д҃.

Слы́шавше ѡ҆ по́двизѣхъ ва́шихъ, диви́мсѧ, прпⷣбнїи ѻ҆тцы̀ а҆ѳѡ́нстїи, го́рꙋ ст҃ꙋ́ю жи́тельствомъ ва́шимъ не́бо дрꙋго́е содѣ́лавшїи, и҆ ѿ неѧ̀ на го́рꙋ нбⷭ҇нꙋю ᲂу҆до́бь восте́кшїи, и҆дѣ́же дꙋша́ми ва́шими въ і҆ерⷭ҇ли́ме го́рнѣмъ ны́нѣ ѡ҆бита́ете и҆ сла́дкагѡ лицезрѣ́нїѧ хрⷭ҇то́ва вы́нꙋ наслажда́етесѧ. но ꙗ҆́кѡ до́брїи подража́телїе милосе́рдїѧ сп҃сова, на́съ, смире́нныхъ и҆ грѣ́шныхъ, мл҃твами ва́шими ми́лостивнѡ ѡ҆сѣни́те, и҆ на сп҃се́нїѧ стезю̀ наста́вите, да ва́мъ зове́мъ всера́достнѡ:

Ра́дꙋйтесѧ, ѻ҆рлѝ нб҃опа́рнїи, ѿ ᲂу҆до́лїй а҆ѳѡ́на на го́рꙋ нбⷭ҇нꙋю возлетѣ́вшїи: ра́дꙋйтесѧ, ла́стѡвицы сладкопѣ́сеннїи, пꙋсты́ню а҆ѳѡ́на пѣ̑нїи мл҃твенными ѡ҆гласи́вшїи.

Ра́дꙋйтесѧ, трисо́лнечнымъ свѣ́томъ горѣ̀ ѡ҆заре́ннїи: ра́дꙋйтесѧ, чꙋде́съ бл҃года́тїю и҆ и҆сцѣле́нїѧ дарова́нїемъ до́лꙋ ѿ гдⷭ҇а просла́вленнїи.

Ра́дꙋйтесѧ, ꙗ҆́кѡ мзда̀ ва́шѧ мно́га є҆́сть на нб҃сѣ́хъ: ра́дꙋйтесѧ, ꙗ҆́кѡ дꙋ́ши ва̑ша подо́бнѣ со́лнцꙋ сїѧ́ютъ во свѣ́тлостехъ ст҃ы́хъ.

Ра́дꙋйтесѧ, прпⷣбнїи ѻ҆тцы̀ а҆ѳѡ́нстїи, ᲂу҆се́рднїи ѡ҆ дꙋша́хъ на́шихъ мл҃твєнницы.

Конда́къ є҃.

Бг҃освѣ̑тлыѧ ѕвѣ̑зды ꙗ҆ви́стесѧ, і҆ѡа́нне, геѡ́ргїе и҆ є҆ѵѳѵ́мїе і҆́верстїи, неофѵ́те и҆ є҆ѵѳѵ́мїе дохїа́рстїи, сѷмеѡ́не, па́ѵле, дїонѵ́сїе и҆ григо́рїе, ѻ҆би́телей а҆ѳѡ́нскихъ первонача̑льницы и҆ ѡ҆снова́телїе всечтⷭ҇ні́и, къ ва́мъ же григо́рїй сїнаи́тъ, дїонѵ́сїй ѻ҆лѷмпі́йскїй, сѷмеѡ́нъ, ѳеофа́нъ и҆ є҆ѵдокі́мъ чꙋдотво́рцы, генна́дїй и҆ некта́рїй пѡ́стницы, ꙗ҆́кѡ сїѧ́ющїи добродѣ́тельми, да сопричтꙋ́тсѧ. мо́лимъ ва́съ, ѻ҆тцы̀ всебл҃же́ннїи, во ѻ҆би́телехъ вѣ́чныхъ ны́нѣ ѡ҆бита́ющїи: не преста́йте мл҃твами ва́шими сохранѧ́ти и҆ соблюда́ти ны̀, ча́да ва̑ша дх҃о́внаѧ, ѿ лови́твы и҆ сѣте́й врага̀ дїа́вола, да, сп҃са́еми ст҃ы́мъ предста́тельствомъ ва́шимъ, зове́мъ сп҃си́телю бг҃ꙋ: А҆ллилꙋ́їа.

І҆́косъ є҃.

Ви́димъ ва́съ, ѻ҆тцы̀ бг҃оно́снїи, всѧ̑ за́пѡвѣди хрⷭ҇то́вы до́брѣ сохра́ншихъ, и҆ любомꙋ́дрїю дх҃о́вномꙋ ᲂу҆се́рднѡ прилѣжа́вшихъ, и҆ ва́шимъ ѡ҆́бразомъ наставлѧ́еми, лѣ́ность дꙋшевре́днꙋю ѿ себє̀ ѿтрѧсе́мъ, на пѡ́двиги же дх҃ѡ́вныѧ простира́емсѧ, и҆мꙋ́ще ва́съ къ подви́жничествꙋ дх҃о́вномꙋ ᲂу҆чи́телей и҆ рꙋководи́телей. сегѡ̀ ра́ди бл҃года́рственнѡ ва́мъ зове́мъ:

Ра́дꙋйтесѧ, сле́знїи и҆ска́телїе бл҃же́нства ра́йскагѡ: ра́дꙋйтесѧ, неꙋсы́пнїи мл҃твєнницы къ бг҃ꙋ ѡ҆ ми́рѣ всегѡ̀ мі́ра.

Ра́дꙋйтесѧ, посто́мъ дꙋ́шы ва́шѧ во сп҃се́нїе напита́вшїи: ра́дꙋйтесѧ, бдѣ́нїи всено́щными и҆ долꙋлега́нїи врага̀ неви́димаго крѣ́пцѣ низложи́вшїи.

Ра́дꙋйтесѧ, пла́чемъ ᲂу҆миле́ннымъ разжє́нныѧ стрѣ̑лы дїа́вольскихъ и҆скꙋше́нїй ᲂу҆гаси́вшїи: ра́дꙋйтесѧ, и҆́же и҆з̾ глꙋбины̀ воздыха́ньми пꙋсты́ню а҆ѳѡ́на дх҃о́внѡ ᲂу҆плодоноси́вшїи.

Ра́дꙋйтесѧ, прпⷣбнїи ѻ҆тцы̀ а҆ѳѡ́нстїи, ᲂу҆се́рднїи ѡ҆ дꙋша́хъ на́шихъ мл҃твєнницы.

Конда́къ ѕ҃.

Проповѣ́дникѡмъ ст҃ы́ѧ вѣ́ры, а҆пⷭ҇лѡмъ хрⷭ҇тѡ́вымъ, ᲂу҆се́рднѣ подража́сте въ про́повѣди є҆ѵⷢ҇лїа пра́вды, космо̀ равноапⷭ҇льне, дамїа́не, нїки́то, кѷпрїа́не и҆ і҆а́кѡве съ двѣма̀ ᲂу҆ченико́ма твои́ма, за и҆́мѧ хрⷭ҇то́во до кро́ве подвиза́вшесѧ, мꙋ́ченическꙋю кончи́нꙋ полꙋчи́сте, вѣнцено́сцы добропобѣ́днїи, и҆ ны́нѣ со хрⷭ҇то́мъ вѣ́чнѡ ца́рствꙋете въ ѻ҆би́телехъ ра́йскихъ: є҆го́же прилѣ́жнѡ моли́те, не лишє́ннымъ бы́ти и҆ на́мъ наслѣ́дїѧ нбⷭ҇нагѡ, вопїю́щымъ є҆мꙋ̀: А҆ллилꙋ́їа.

І҆́косъ ѕ҃.

Возсїѧ́сте на а҆ѳѡ́нѣ, ꙗ҆́кѡ свѣти́льницы бг҃осїѧ́ннїи, ѻ҆тцы̀ пребл҃же́ннїи, и҆ всю̀ вселе́ннꙋю ѡ҆зарѧ́ете чꙋдесы̀ ва́шими, ѿ восто́ка бо и҆ до сѣ́вера прославлѧ́ютсѧ хвале́бнѡ ст҃і́и и҆мена̀ ва̑ша и҆ ᲂу҆бл҃жа́ютсѧ по́двиги равноа́гг҃льскагѡ житїѧ̀ ва́шегѡ бл҃гохвалє́нїи таковы́ми:

Ра́дꙋйтесѧ, всера́достнїи вѣ̑стницы хрⷭ҇то́ва всемогꙋ́щества и҆ си́лы: ра́дꙋйтесѧ, крѣпкодꙋ́шнїи подви̑жницы, сокрꙋши́вшїи главꙋ̀ прего́рдагѡ велїа́ра.

Ра́дꙋйтесѧ, до́брїи цѣле́бницы недꙋ́гѡвъ дꙋше́вныхъ и҆ тѣле́сныхъ: ра́дꙋйтесѧ, и҆звѣ́стнїи ᲂу҆милостиви́телїе цр҃ѧ̀ нбⷭ҇нагѡ хрⷭ҇та̀ бг҃а.

Ра́дꙋйтесѧ, ѡ҆дѣ́ѧннїи въ преподо́бїи и҆ пра́вдꙋ ратобо́рцы дх҃о́внїи: ра́дꙋйтесѧ, прїе́мшїи вла́сть ѿ гдⷭ҇а на дꙋ̑хи нечи̑стыѧ.

Ра́дꙋйтесѧ, прпⷣбнїи ѻ҆тцы̀ а҆ѳѡ́нстїи, ᲂу҆се́рднїи ѡ҆ дꙋша́хъ на́шихъ мл҃твєнницы.

Конда́къ з҃.

Хотѧ́щымъ бл҃гоче́стнѡ ѡ҆ хрⷭ҇тѣ̀ жи́ти, ѡ҆́бразъ бг҃оꙋго́днагѡ и҆ безмо́лвнагѡ житїѧ̀ ꙗ҆влѧ́ете въ себѣ̀, прпⷣбнїи пꙋстынножи́телїе маѯі́ме, космо̀ и҆ а҆ка́кїе, и҆ мѷрото́чцы ні́ле и҆ ѳео́фїле, въ пꙋсты́нѧхъ а҆ѳѡ́на подвиза́вшїисѧ равноа́гг҃льнѡ, къ ва́мъ же и҆ прпⷣбный а҆нто́нїй пече́рскїй, во а҆ѳѡ́нѣ дꙋхо́внѡ воспита́нный, досто́йнѡ сопричте́сѧ, и҆́же и҆ первонача́льникъ и҆́ноческагѡ въ рѡссі́и житїѧ̀ содѣ́ласѧ. моли́тесѧ ко гдⷭ҇ꙋ, ѻ҆тцы̀ бг҃оно́снїи, да вкꙋ́пѣ съ ва́ми сподо́бимсѧ и҆ мы̀, смире́ннїи, црⷭ҇твїе нбⷭ҇ное ᲂу҆наслѣ́дити, и҆ въ ра́дости ст҃ы́хъ воспѣва́ти созда́телю на́шемꙋ во вѣ́ки: А҆ллилꙋ́їа.

І҆́косъ з҃.

Но́вый сїѡ́нъ ꙗ҆ви́сѧ ст҃а́ѧ гора̀ а҆ѳѡ́нскаѧ, въ не́йже ѿ восто́ка, сѣ́вера и҆ ю҆́га прїидо́ша ча̑да дх҃ѡ́внаѧ, бл҃гословлѧ̑ющаѧ въ не́й гдⷭ҇а въ пѣ́снехъ хвалє́бныхъ: сѐ бо собо́ръ бг҃освѣ́тлый прпⷣбныхъ ѻ҆тє́цъ, во а҆ѳѡ́нѣ свѧ́тѡ пожи́вшихъ, созыва́етъ на́съ дне́сь че́ствовати и҆́хъ по́двиги и҆ трꙋды̀ и҆ вопи́ти къ ни́мъ си́це:

Ра́дꙋйтесѧ, вели́цїи ᲂу҆го́дницы бж҃їи, вели́чїемъ по́двигѡвъ ва́шихъ а҆́гг҃лѡвъ ᲂу҆диви́вшїи: ра́дꙋйтесѧ, пресла́внїи чꙋдотво́рцы, въ бѣда́хъ и҆ ско́рбехъ человѣ́кѡмъ помога́ющїи.

Ра́дꙋйтесѧ, пꙋсты́ни а҆ѳѡ́на бл҃года̑тнаѧ прозѧбє́нїѧ: ра́дꙋйтесѧ, ст҃ы́ѧ правосла́вныѧ цр҃кве дх҃о́внаѧ красото̀ и҆ ра́дованїе.

Ра́дꙋйтесѧ, ра́дости на́мъ и҆ сла́вы вѣ́чныѧ ᲂу҆се́рднїи хода́таи: ра́дꙋйтесѧ, бл҃ги́хъ жела́нїй на́шихъ ско́рїи и҆сполни́телїе.

Ра́дꙋйтесѧ, прпⷣбнїи ѻ҆тцы̀ а҆ѳѡ́нстїи, ᲂу҆се́рднїи ѡ҆ дꙋша́хъ на́шихъ мл҃твєнницы.

Конда́къ и҃.

Стра́ннѡ и҆ пресла́внѡ по мо́рю немо́креннѡ проше́лъ є҆сѝ, гаврїи́ле прпⷣбне, и҆ і҆кѡ́нꙋ бжⷭ҇твенныѧ врата́рницы а҆ѳѡ́нꙋ прене́слъ є҆сѝ въ бл҃гослове́нїе и҆ ѡ҆сщ҃е́нїе; тебѣ̀ же, бг҃оно́се і҆ѡа́нне кꙋкꙋзе́ле, прест҃а́ѧ бцⷣа сама̀ ꙗ҆ви́сѧ и҆ ѿ рꙋ́къ свои́хъ пречи́стыхъ златни́цꙋ ди́внѡ подадѐ, да пое́ши є҆́й немо́лчнѡ пѣ̑сни хвалє́бныѧ. ѡ҆ толи́кихъ чꙋдесѣ́хъ бж҃їихъ дивѧ́щесѧ, вопїе́мъ бг҃ꙋ: А҆ллилꙋ́їа.

І҆́косъ и҃.

Всѧ̀ ст҃а́ѧ гора̀ а҆ѳѡ́нскаѧ и҆ всѧ̀ пꙋ́стынѧ є҆ѧ̀ и҆ ᲂу҆дѡ́лїѧ бл҃гослове́нїе бж҃їе въ себѣ̀ проѧвлѧ́ютъ, ѿ ни́хъ бо древеса̀ бл҃гоплѡ́днаѧ раѧ̀ і҆и҃сова прозѧбо́ша, собо́ръ ве́лїй прпⷣбныхъ ѻ҆тє́цъ на́шихъ а҆ѳѡ́нскихъ, и҆́хже плода́ми дꙋхо́вными насыща́ющесѧ, бл҃года́рнымъ се́рдцемъ и҆ ᲂу҆сты̀ глаго́лемъ къ ни́мъ такѡва́ѧ:

Ра́дꙋйтесѧ, а҆́гг҃ли земні́и и҆ человѣ́цы нбⷭ҇нїи: ра́дꙋйтесѧ, крі́ни бл҃гоꙋха́ннїи пꙋсты́ннагѡ прозѧбе́нїѧ.

Ра́дꙋйтесѧ, ѡ҆небеси́вшїи го́рꙋ а҆ѳѡ́нскꙋю добродѣ́тельми ва́шими нбⷭ҇ными: ра́дꙋйтесѧ, вы́нꙋ хода́тайствꙋющїи пред̾ гдⷭ҇емъ за ве́сь мі́ръ хрⷭ҇тїа́нскїй.

Ра́дꙋйтесѧ, и҆збра́нницы бж҃їи, и҆збра́нїе ва́ше чꙋдесы̑ мнѡ́гими засвидѣ́тельствовавшїи: ра́дꙋйтесѧ, вѣнцено́сцы добропобѣ́днїи, ѿ хрⷭ҇то́вы десни́цы ᲂу҆вѣнча́ннїи.

Ра́дꙋйтесѧ, прпⷣбнїи ѻ҆тцы̀ а҆ѳѡ́нстїи, ᲂу҆се́рднїи ѡ҆ дꙋша́хъ на́шихъ мл҃твєнницы.

Конда́къ ѳ.

Всѝ нбⷭ҇нїи ᲂу҆диви́шасѧ вели́чествꙋ по́двига ва́шегѡ, прпⷣбномч҃ницы зогра́фстїи, предо́блїи ѳѡмо̀ съ дрꙋжи́ною твое́ю, ѿ латі́нѧнъ за правосла́внꙋю вѣ́рꙋ сожже́ннїи, и҆ же́ртва бл҃гопрїѧ́тна бг҃ꙋ ꙗ҆́вльшїисѧ: ва̑ша бо и҆мена̀ напи̑сана сꙋ́ть на нб҃сѣ́хъ, въ кни́зѣ живота̀ вѣ́чнагѡ, и҆ и҆сповѣ́даютсѧ ѿ хрⷭ҇та̀ бг҃а пред̾ ѻ҆ц҃е́мъ нбⷭ҇нымъ, є҆мꙋ́же въ ли́цѣ мꙋ́ченичестѣмъ ра́достнѡ пое́те: А҆ллилꙋ́їа.

І҆́косъ ѳ҃.

Виті́и сꙋемꙋ́дрїи человѣ́честїи, глаго́лющїи бꙋ́йство бы́ти подви́жничество дх҃о́вное, посрами́шасѧ пѡ́двиги ва́шими и҆ чꙋдесы̀, прпⷣбнїи ѻ҆тцы̀ на́ши а҆ѳѡ́нстїи: кто́ бо не ᲂу҆мили́тсѧ, ка́кѡ вы̀ земна̑ѧ всѧ̑ пренебре́гше, къ нбⷭ҇нымъ вседꙋ́шнѡ ᲂу҆стреми́стесѧ и҆ є҆го́же и҆ска́сте, того̀ и҆ достиго́сте, пресвѣ́тлагѡ лицезрѣ́нїѧ хрⷭ҇то́ва. сегѡ̀ ра́ди восхвалѧ́емъ ва́съ си́це:

Ра́дꙋйтесѧ, ꙗ҆зы́къ свѧ́тъ, ца́рское сщ҃е́нїе, лю́дїе ѡ҆бновле́нїѧ: ра́дꙋйтесѧ, со́ль дх҃о́внаѧ всеѧ̀ землѝ, ꙗ҆́же не ѡ҆бꙋѧ́етъ во вѣ́ки.

Ра́дꙋйтесѧ, провозвѣ́стницы пра́вды хрⷭ҇то́вы, и҆зше́дшїѧ ѿ мі́ра на слꙋже́нїе бг҃ꙋ: ра́дꙋйтесѧ, ѿ всѧ́кагѡ ро́да призва́ннїи въ сла́дкꙋю рабо́тꙋ гдⷭ҇ню.

Ра́дꙋйтесѧ, ꙗ҆ре́мъ благі́й на сѧ̀ взе́мшїи и҆ вслѣ́дъ влⷣки хрⷭ҇та̀ послѣ́довавшїи и҆́скреннѡ: ра́дꙋйтесѧ, поко́й дꙋша́мъ ва́шымъ вѣ́чный на нб҃сѣ́хъ ѿ хрⷭ҇та̀ подвигополо́жника воспрїѧ́вшїи.

Ра́дꙋйтесѧ, прпⷣбнїи ѻ҆тцы̀ а҆ѳѡ́нстїи, ᲂу҆се́рднїи ѡ҆ дꙋша́хъ на́шихъ мл҃твєнницы.

Конда́къ і҃.

Сп҃си́телю бг҃ꙋ, и҆зве́дшемꙋ вы̀ ѿ го́рькїѧ рабо́ты грѣхо́вныѧ, пѣ́снь хвале́бнꙋю возсыла́юще, за хрⷭ҇та̀ пострада́ти ᲂу҆стреми́стесѧ, прпⷣбномч҃ницы вседо́блїи мака́рїе, і҆ларїѡ́не, пахѡ́мїе, кѡнстанті́не, ѻ҆нꙋ́фрїе, проко́пїе, лꙋко̀, тїмоѳе́е, а҆гаѳагге́ле и҆ и҆ні́и мно́зїи, ѿ а҆ѳѡ́на и҆зше́дшїи и҆ хрⷭ҇та̀ пред̾ а҆га̑рѧны и҆сповѣ́давшїи, за него́же до кро́ве пострада́сте и҆ дꙋ́шы ва́шѧ положи́сте, ны́нѣ же съ мч҃нки ра́дꙋетесѧ и҆ сла́дцѣ пое́те є҆мꙋ̀: А҆ллилꙋ́їа.

І҆́косъ і҃.

Цр҃ѧ̀ нбⷭ҇нагѡ хрⷭ҇та̀ до́блїи ѡ҆рꙋ́жницы ꙗ҆ви́стесѧ, ѻ҆тцы̀ бг҃оно́снїи, ѿ негѡ́же мздꙋ̀ трꙋдѡ́мъ ва́шимъ воспрїе́мше, дꙋхо́вныхъ ча̑дъ ва́шихъ по вѣ́рѣ ѡ҆́бразомъ ва́шимъ пꙋтево́дствꙋете къ немꙋ̀ нело́жнѡ, ѿ на́съ же слы́шите достѡ́йныѧ ва́мъ пѣ̑сни сицєвы́ѧ:

Ра́дꙋйтесѧ, ѡ҆ ни́хже ра́дꙋютсѧ а҆́гг҃ли и҆ бг҃а сла́вѧтъ человѣ́цы: ра́дꙋйтесѧ, ѡ҆ ни́хже дх҃о́внѡ красꙋ́етсѧ ст҃а́ѧ гора̀ а҆ѳѡ́нскаѧ ѿ ро́да въ ро́дъ.

Ра́дꙋйтесѧ, ѡ҆́блацы росоно́снїи, зно́й страсте́й на́шихъ прохлажда́ющїи: ра́дꙋйтесѧ, ма̑слины бл҃гопло́днїи, є҆ле́емъ трꙋдѡ́въ ва́шихъ сердца̀ на̑ша ᲂу҆маща́ющїи.

Ра́дꙋйтесѧ, а҆дама́нты терпѣ́нїѧ, сїѧ́ющїи лꙋча́ми бж҃їѧ блгⷣти: ра́дꙋйтесѧ, столпѝ правосла́вїѧ, чꙋдесы̑ ва́шими ᲂу҆твержда́ющїи коле́блющихсѧ въ вѣ́рѣ.

Ра́дꙋйтесѧ, прпⷣбнїи ѻ҆тцы̀ а҆ѳѡ́нстїи, ᲂу҆се́рднїи ѡ҆ дꙋша́хъ на́шихъ мл҃твєнницы.

Конда́къ а҃і.

Пѣ́нїе прест҃ѣ́й трⷪ҇цѣ приносѧ́ще, тро́ица но́выхъ новомч҃никѡвъ во а҆ѳѡ́нѣ дх҃о́внѡ возсїѧ̀, є҆ѵѳѵ́мїй, і҆гна́тїй и҆ а҆ка́кїй вседо́блїи, а҆га́рѧнское ѕлоче́стїе посрами́вшїи и҆ и҆́мѧ хрⷭ҇то́во пред̾ а҆га́рѧны и҆сповѣ́давшїи пресла́внѡ, ѿ ни́хже мꙋ́ченическꙋю кончи́нꙋ воспрїе́мше, со хрⷭ҇то́мъ ны́нѣ ѡ҆бита́ютъ, воспѣва́ѧ є҆мꙋ̀ побѣ́днꙋю пѣ́снь: А҆ллилꙋ́їа.

І҆́косъ а҃і.

Свѣ́тлыми лꙋча́ми чꙋде́съ ва́шихъ, ѻ҆тцы̀ всебл҃же́ннїи, гора̀ а҆ѳѡ́нскаѧ дх҃о́внѡ ѡ҆зарѧ́етсѧ и҆ бл҃жи́тъ ва́съ по до́лгꙋ, ꙗ҆́кѡ нбⷭ҇ныхъ є҆ѧ̀ застꙋ́пникѡвъ и҆ покрови́телей. мы́ же, чтꙋ́ще по́двиги ва́шѧ и҆ страда̑нїѧ, ѿ любвѐ дꙋше́вныѧ прино́симъ ва́мъ со смире́нїемъ и҆ вѣ́рою похвалы̑ сїѧ̑:

Ра́дꙋйтесѧ, мѵ́ро цѣле́бное бж҃їѧ блгⷣти ѡ҆би́льнѡ на́мъ и҆сточа́ющїи: ра́дꙋйтесѧ, недꙋ́гѡвъ дꙋше́вныхъ и҆ тѣле́сныхъ вра́чеве предо́брїи.

Ра́дꙋйтесѧ, є҆ди́ныѧ то́кмѡ вѣ́ры ко ᲂу҆врачева́нїю недꙋ́гѡвъ ѿ на́съ тре́бꙋющїи: ра́дꙋйтесѧ, тꙋ́не прїе́мшїи, тꙋ́не подаю́щїи на́мъ бл҃года́ть и҆сцѣле́нїѧ.

Ра́дꙋйтесѧ, дарѡ́въ дх҃о́вныхъ и҆ дꙋшесп҃си́тельныхъ блазі́и на́мъ пода́телїе: ра́дꙋйтесѧ, въ бѣда́хъ и҆ ско́рбехъ ско́рїи на́мъ помѡ́щницы и҆ ᲂу҆те́шителїе.

Ра́дꙋйтесѧ, прпⷣбнїи ѻ҆тцы̀ а҆ѳѡ́нстїи, ᲂу҆се́рднїи ѡ҆ дꙋша́хъ на́шихъ мл҃твєнницы.

Конда́къ в҃і.

Благода́ти бж҃їей сосꙋ́ди и҆збра́ннїи, всѝ прпⷣбнїи ѻ҆тцы̀ на́ши а҆ѳѡ́нстїи, поимено́ваннїи и҆ непоимено́ваннїи, свѣ́тлымъ собо́ромъ ва́шимъ на по́мощь къ на́мъ ᲂу҆скори́те во вре́мѧ безпомо́щїѧ на́шегѡ и҆ ѿ напра́сныѧ и҆ на́глыѧ сме́рти чтꙋ́щыѧ вы̀ и҆зба́вите благопрїѧ́тнымъ предста́тельствомъ ва́шимъ ко гдⷭ҇ꙋ, да бл҃года́рственнѡ зове́мъ є҆мꙋ̀: А҆ллилꙋ́їа.

І҆́косъ в҃і.

Пою́ще ст҃о́е и҆ равноа́гг҃льное житїѐ ва́ше и҆ мнѡ́гаѧ ва̑ша чꙋдеса̀, прпⷣбнїи ѻ҆тцы̀ на́ши а҆ѳѡ́нстїи, хва́лимъ, сла́вимъ и҆ велича́емъ просла́вльшаго ва́съ хрⷭ҇та̀ бг҃а, ѡ҆ст҃и́телѧ ст҃ы́хъ и҆ творца̀ чꙋдотво́рцєвъ, и҆зли́вшаго на ва́съ ѡ҆би́лїе свои́хъ дарѡ́въ бл҃года́тныхъ, ва́съ же, ст҃ы́хъ и҆ многомо́щныхъ предста́телей на́шихъ, ᲂу҆блажа́емъ зва̑нїи си́ми:

Ра́дꙋйтесѧ, наста̑вницы мона́хѡвъ и҆ собесѣ̑дницы а҆́гг҃лѡвъ: ра́дꙋйтесѧ, всѣ́хъ ст҃ы́хъ дрꙋ́зи и҆ при́снїи бг҃ꙋ.

Ра́дꙋйтесѧ, гра́ждане сїѧ́ющагѡ гра́да і҆ерⷭ҇ли́ма го́рнѧгѡ: ра́дꙋйтесѧ, ѻ҆би́телей ва́шихъ земны́хъ покрови́телїе нбⷭ҇нїи.

Ра́дꙋйтесѧ, и҆́нокѡвъ правосла́вныхъ ᲂу҆твержде́нїе и҆ застꙋпле́нїе: ра́дꙋйтесѧ, ѡ҆ всѣ́мъ мі́рѣ неꙋсы́пнїи хода́таи.

Ра́дꙋйтесѧ, прпⷣбнїи ѻ҆тцы̀ а҆ѳѡ́нстїи, ᲂу҆се́рднїи ѡ҆ дꙋша́хъ на́шихъ мл҃твєнницы.

Конда́къ г҃і.

Ѽ преподо́бнїи ѻ҆тцы̀ на́ши а҆ѳѡ́нстїи, бг҃омъ дарова́ннїи на́мъ застꙋ̑пницы и҆ покрови́телїе, вы̀ горѣ̀, на нб҃сѝ, мы́ же до́лꙋ, на землѝ, ᲂу҆дале́ннїи ѿ ва́съ не толи́ко мѣ́стомъ, коли́ко грѣхо́вною нечистото́ю на́шею, ѻ҆ба́че дерза́емъ приноси́ти ва́мъ сїѐ ма́лое похва́льное пѣ́нїе, и҆ ѡ҆ є҆ди́номъ ва́съ мо́лимъ и҆ про́симъ: ᲂу҆моли́те сп҃са хрⷭ҇та̀ и҆зба́вити на́съ вѣ́чныѧ мꙋ́ки и҆ сподо́бити црⷭ҇тва нбⷭ҇нагѡ, да съ ва́ми воспое́мъ є҆мꙋ̀ во вѣ́ки: А҆ллилꙋ́їа.

Се́й конда́къ глаго́ли г҃-жды, та́же і҆́косъ а҃-й, и҆ конда́къ а҃-й.

Моли́тва.

Ѽ прпⷣбнїи и҆ бг҃оно́снїи ѻ҆тцы̀ на́ши а҆ѳѡ́нстїи, свѣти́ла земна́ѧ пресвѣ́тлаѧ, ѿ пꙋсты́нныхъ ᲂу҆до́лїй ст҃ы́ѧ горы̀ а҆ѳѡ́нскїѧ, въ цр҃кви правосла́внѣй сла́внѡ просїѧ́вшїи, и҆ ст҃ꙋ́ю го́рꙋ вселе́нїѧ ва́шегѡ житїѧ̀ добро́тами ѡ҆небеси́вшїи, всю̀ же вселе́ннꙋю высо́кихъ добродѣ́телей свѣ́тлостьми и҆ чꙋде́съ бжⷭ҇твенныхъ блиста́нїи ᲂу҆диви́вшїи. ны́нѣ сме́ртнымъ за́падомъ вы̀ плотскѝ на вре́мѧ во гро́бъ заше́дше, дꙋша́ми ва́шими со хрⷭ҇то́мъ, сл҃нцемъ пра́вды, сꙋ́щѣ пра́вєдницы, просвѣща́етесѧ ꙗ҆́кѡ со́лнце во црⷭ҇твїи нбⷭ҇нѣмъ, и҆дѣ́же моли́твєнныѧ ва́шѧ, къ бг҃ꙋ, свѣ́тꙋ и҆́стинномꙋ, лꙋчѝ простира́юще, не забꙋ́дите и҆ на́съ, ча̑дъ ва́шихъ дꙋхо́вныхъ, въ но́щи страсте́й и҆ скорбе́й пребыва́ющихъ, свы́ше бл҃года́тными призира́ти ѡ҆сїѧ̑нїи, ꙗ҆́кѡ да во свѣ́тѣ добродѣ́тельнагѡ житїѧ̀ ва́шегѡ пра́вѡ ходѧ́щѣ пꙋте́мъ за́повѣдей хрⷭ҇то́выхъ, сподо́бимсѧ зрѣ́ти свѣ́тъ непристꙋ́пныѧ сла́вы бж҃їѧ, хва́лѧще кꙋ́пнѡ съ ва́ми въ трⷪ҇цѣ ст҃ѣ́й сла́вимаго и҆ покланѧ́емаго бг҃а, ѻ҆ц҃а̀ и҆ сн҃а и҆ ст҃а́гѡ дх҃а въ несконча́ємыѧ вѣ́ки. А҆ми́нь.

Тропа́рь, гла́съ а҃.

Пꙋсты́ни а҆ѳѡ́нскїѧ ѻ҆тцы̀, а҆́гг҃лы во пло́ти, и҆сповѣ́дники вкꙋ́пѣ и҆ прпⷣбныѧ, ст҃и́тели же и҆ мч҃ники въ пѣ́снехъ почти́мъ, подража́юще добродѣ́телемъ и҆́хъ, зовꙋ́ще согла́снѡ и҆ глаго́люще: сла́ва просла́вльшемꙋ вы̀, сла́ва вѣнча́вшемꙋ вы̀, сла́ва въ бѣда́хъ предста́тели на́мъ вы̀ показа́вшемꙋ.

Конда́къ, гла́съ д҃.

Ѡ҆небеси́вшыѧ го́рꙋ сїю̀ и҆ показа́вшыѧ въ не́й житїѐ а҆́гг҃льское, и҆ мно́жество мона́хѡвъ собра́вшыѧ ѻ҆тцы̀, прїиди́те, бл҃гохва́лимъ всѝ, къ ни́мъ взыва́юще: всѧ́кїѧ бѣды̀ и҆ и҆скꙋше́нїѧ на́съ и҆зба́вите, мно́жество прпⷣбныхъ, а҆ѳѡ́нскаѧ похвало̀.

Ага­пий Ва­то­пед­ский (Афон­ский), прп.: †?; Мр. 1
Ага­фан­гел Ес­фиг­мен­ский, прмч.: †1819; Ап. 19; Окт. 29
Ака­кий Но­вый, Кав­со­ка­ли­вит (сжи­га­тель ка­лив – ша­ла­шей), прп.: †1730; Ап. 12
Ака­кий Но­вый, Сяр­ский, Афон­ский, прмч.: †1816; М. 1
Ан­то­ний Зо­граф­ский (Афон­ский), прмч.: †1276 (1280); С. 22; Окт. 10
Ан­то­ний Пе­чер­ский, ос­но­ва­тель Ки­е­во-Пе­чер­ской Лав­ры, в Ближ­них (Ан­то­ни­е­вых) пе­ще­рах: †1073; Ил. 10; С. 2 || Пе­чер.; Пе­чер., ближ.
Ар­се­ний Ко­нев­ский, прп.: †1447; Ин. 12 || Ка­рел.; Новг.; Пе­терб.
Ар­се­ний I Серб­ский, ар­хи­еп.: †1266; Окт. 28 || Серб.
Афа­на­сий Афон­ский, игу­мен: †1000; Ил. 5 || Всех прп.
Афа­на­сий I Кон­стан­ти­но­поль­ский, пат­ри­арх: †1311; Окт. 24
Афа­на­сий III Па­те­ла­рий, Кон­стан­ти­но­поль­ский, Лу­бен­ский, пат­ри­арх: †1654; М. 2
Вар­со­но­фий Зо­граф­ский (Афон­ский), прмч.: †1276 (1280); С. 22; Окт. 10
Ва­си­лий Со­лун­ский (Фес­са­ло­ни­кий­ский), ар­хи­еп., исп.: †ок. 870; Ф. 1
Гав­ри­ил Свя­то­го­рец, Ивер­ский (Афон­ский), прп.: †X; М. 13; Ил. 12
Ге­де­он Ка­ра­калль­ский, Афон­ский, прмч.: †1818; Д. 30
Ген­на­дий Ва­то­пед­ский (Афон­ский), до­хи­ар (эко­ном), прп.: †?; Н. 17
Ге­ор­гий Афон­ский, мч.: †1794; Окт. 2
Ге­ор­гий Свя­то­го­рец, Ивер­ский (Афон­ский), кти­тор, пре­ла­га­тель Св. Пи­са­ния на ивер­ский язык: †1066; М. 13; Ин. 27
Ге­ра­сим Но­вый, На­та­рас, Ке­фа­ло­нит, Афон­ский, иером.: †1579; Ав. 15; Окт. 20
Ге­ра­сим Эв­бей­ский, прп.: †XIV; Д. 7
Гри­го­рий Ви­зан­тий­ский, Афон­ский, прп.: †нач. XIV; Ап. 6
Гри­го­рий До­ме­стик (ре­гент), Афон­ский, прп.: †ок. 1360; Окт. 1
Гри­го­рий Па­ла­ма, Со­лун­ский (Фес­са­ло­ни­кий­ский), ар­хи­еп.: †ок. 1360; Н. 14; 2-я Неде­ля Ве­ли­ко­го по­ста
Гри­го­рий Серб, Мол­чаль­ник, Афон­ский, кти­тор: †по­сле 1405; Д. 7
Гри­го­рий Си­на­ит, прп.: †1310 (1346); Ав. 8
Да­мас­кин (в ми­ру Диа­ман­дис) Афон­ский, Кон­стан­ти­но­поль­ский, прмч.: †1681; Н. 13
Да­мас­кин Но­вый, Га­бров­ский, игу­мен, прмч.: †1771; Ян. 16
Да­ми­ан Ес­фиг­мен­ский, прп.: †1280; Ф. 23
Да­ми­ан Но­вый, Фило­фе­ев­ский, Ла­рис­ский, прмч.: †1568; Ф. 23; 3-я Неде­ля по Пя­ти­де­сят­ни­це
Да­ни­ил Афон­ский, прп., зод­чий, уче­ник прп. Афа­на­сия Афон­ско­го: †980; Ил. 5
Да­ни­ил II Серб­ский, ар­хи­еп.: †1338; Д. 20 || Серб.
Ди­о­ни­сий Афон­ский, кти­тор оби­те­ли св. Иоан­на Пред­те­чи: †по­сле 1380; Ин. 25
Ди­о­ни­сий Ва­то­пед­ский, прмч.: †1822; Ил. 31
Ди­о­ни­сий До­хи­ар­ский (Афон­ский), прмч., уче­ник прмч. Иа­ко­ва Ко­стур­ско­го: †ок. 1520; Н. 1
Ди­о­ни­сий Фило­фе­ев­ский, Олим­пий­ский, игу­мен, чу­до­тво­рец: †XVI; Ян. 24
До­ме­ти­ан Зо­граф­ский (Афон­ский), прмч.: †1276 (1280); С. 22; Окт. 10
До­ме­тий Ди­о­ни­си­ат­ский, Афон­ский, игу­мен, спо­движ­ник прп. Ди­о­ни­сия Афон­ско­го: †1380; Ин. 25
До­ме­тий Фило­фе­ев­ский, Афон­ский, прп.: †XVI; Ав. 7
Ев­до­ким Ва­то­пед­ский (Афон­ский), прп.: †XVII; Окт. 5
Ев­ста­фий I Серб­ский, ар­хи­еп.: †ок. 1285; Ян. 4 || Серб.
Ев­фи­мий Ва­то­пед­ский (Афон­ский), игу­мен, прмч.: †1276 (1280); Ян. 4
Ев­фи­мий До­хи­ар­ский (Афон­ский), прп.: †X; Н. 9
Ев­фи­мий Зо­граф­ский (Афон­ский), прмч.: †1276 (1280); С. 22; Окт. 10
Ев­фи­мий Но­вый, Афон­ский, Кон­стан­ти­но­поль­ский, прмч.: †1814; Мр. 22; М. 1
Ев­фи­мий Но­вый, Свя­то­го­рец, Ивер­ский (Афон­ский), прп., сын прп. Иоан­на Свя­то­гор­ца: †1028; М. 13; Ил. 12
Ев­фи­мий Но­вый, Со­лун­ский (Фес­са­ло­ни­кий­ский), иеро­ди­а­кон: †889; Окт. 15
Еф­рем II Серб­ский, пат­ри­арх: †1399; Ин. 15 || Серб.
Иа­ков До­хи­ар­ский (Афон­ский), иеро­ди­а­кон, сщ­мч., уче­ник прмч. Иа­ко­ва Ко­стур­ско­го: †ок. 1520; Н. 1
Иа­ков Зо­граф­ский (Афон­ский), прмч.: †1276 (1280); С. 22; Окт. 10
Иа­ков Зо­граф­ский (Афон­ский), прмч. (дру­гой): †1276 (1280); С. 22; Окт. 10
Иа­ков Ко­стур­ский, До­хи­ар­ский (Афон­ский), прмч.: †ок. 1520; Н. 1
Иг­на­тий Но­вый, Афон­ский, Кон­стан­ти­но­поль­ский, прмч.: †1814; М. 1; Окт. 20
Иеро­фей Но­вый, Ка­лам­ский, Иве­ря­нин, иером.: †1745; С. 13
Ила­ри­он Зо­граф­ский (Афон­ский), прмч.: †1276 (1280); С. 22; Окт. 10
Ила­ри­он (в ми­ру Иоанн) Кри­тя­нин, Афон­ский, прмч.: †1804; С. 20
Илия Ар­ду­нис, прмч.: †1686; Ян. 31
Ин­но­кен­тий Ко­мель­ский, Во­ло­год­ский (в ми­ру князь Ох­ля­би­нин), прп.: †1521; Мр. 19 || Во­лог.; Новг.
Иоанн Бол­га­рин, мч.: †1784; Мр. 5
Иоанн Ку­ку­зель, Афон­ский, до­ме­стик (ре­гент), прп.: †XII; Окт. 1
Иоанн Свя­то­го­рец, Ивер­ский (Афон­ский), прп., отец прп. Ев­фи­мия Но­во­го (Свя­то­гор­ца): †998; М. 13; Ил. 12
Иоан­ни­кий Зо­граф­ский (Афон­ский), прмч.: †1276 (1280); С. 22; Окт. 10
Иоан­ни­кий I Серб­ский, ар­хи­еп.: †по­сле 1272; М. 28 || Серб.
Иоасаф Афон­ский, прмч., уче­ник свт. Ни­фон­та II Кон­стан­ти­но­поль­ско­го: †1536; Окт. 26
Иоасаф Зо­граф­ский (Афон­ский), прмч.: †1276 (1280); С. 22; Окт. 10
Иов Зо­граф­ский (Афон­ский), прмч.: †1276 (1280); С. 22; Окт. 10
Ис­и­хий Хо­ри­вит, без­молв­ник (ис­их­аст), прп.: †VI; Окт. 3
Кал­лист I Кон­стан­ти­но­поль­ский, пат­ри­арх: †ок. 1363; Ин. 20
Кал­лист II Ксан­фо­пу­ла, Кон­стан­ти­но­поль­ский, пат­ри­арх: †по­сле 1397; Н. 22
Ки­при­ан Зо­граф­ский (Афон­ский), прмч.: †1276 (1280); С. 22; Окт. 10
Ки­при­ан Мос­ков­ский и всея Ру­си, митр., чу­до­тво­рец: †1406; М. 27; С. 16 || Во­лын.; Моск.
Ки­при­ан Но­вый, Кон­стан­ти­но­поль­ский, прмч.: †1679; Ил. 5
Ки­рилл Зо­граф­ский (Афон­ский), прмч.: †1276 (1280); С. 22; Окт. 10
Кон­стан­тин Афон­ский, мч.: †1819; Ин. 2
Кон­стан­тин Ро­дос­ский, мч.: †1800; Н. 14
Кон­стан­ций Рус­ский, иером., прмч.: †1743; Д. 26
Кос­ма Зо­граф­ский (Афон­ский), иером., от­шель­ник: †1323; Ф. 23; С. 22
Кос­ма Зо­граф­ский (Афон­ский), прмч.: †1276 (1280); С. 22; Окт. 10
Кос­ма Это­лий­ский, Афон­ский, Ал­бан­ский, рав­но­ап., иером.: †1779; Ав. 24
Леон­тий Про­зор­ли­вый, Афон­ский, прп.: †1605; Ин. 18
Лу­ка Од­рин­ский, Ми­ти­лен­ский, Афон­ский, прмч.: †1802; Мр. 23; 3-я Неде­ля по Пя­ти­де­сят­ни­це
Ма­ка­рий Но­вый, Кий­ский, Афон­ский, прмч.: †1590; Окт. 6
Ма­ка­рий Со­лун­ский (Фес­са­ло­ни­кий­ский), прмч., уче­ник св. Ни­фон­та Кон­стан­ти­но­поль­ско­го: †1523; С. 15
Мак­сим Грек, прп.: †1556; Ян. 21; Ин. 21 || Моск.; Ра­до­неж.; Твер.
Мак­сим Кав­со­ка­ли­вит (сжи­га­тель ка­лив – ша­ла­шей), Афон­ский, прп.: †1354; Ян. 13
Мар­ти­ни­ан Зо­граф­ский (Афон­ский), прмч.: †1276 (1280); С. 22; Окт. 10
Ми­на Зо­граф­ский (Афон­ский), прмч.: †1276 (1280); С. 22; Окт. 10
Ми­хей Зо­граф­ский (Афон­ский), прмч.: †1276 (1280); С. 22; Окт. 10
Нек­та­рий Би­толь­ский, Ка­рей­ский, Афон­ский, прп.: †1500; Д. 5, 15
Нек­та­рий (в ми­ру Ни­ко­лай) Ври­улль­ский, прмч.: †1820; Ил. 11
Нео­фит Ва­то­пед­ский (Афон­ский), про­с­мо­на­рий (непре­стан­ный мо­лит­вен­ник), прп.: †?; Ян. 21
Нео­фит До­хи­ар­ский (Афон­ский), прп.: †X; Н. 9
Ни­ки­та Сла­вя­нин, Афон­ский, иером., прмч.: †1808; Ап. 4
Ни­ки­фор Афон­ский, прп., учи­тель свт. Гри­го­рия Па­ла­мы: †XIV; М. 4
Ни­ко­дим Ал­бан­ский, Охрид­ский, Ми­ро­то­чец, прмч.: †1722; Ил. 11
Ни­ко­дим Ва­то­пед­ский (Афон­ский), прп.: †XIV; Ил. 11
Ни­ко­дим Свя­то­го­рец, прп.: †1809; Ил. 14
Ни­ко­дим Серб­ский, ар­хи­еп.: †1325; М. 11 || Серб.
Нил Ми­ро­то­чи­вый, Афон­ский, иером.: †1651; М. 7; Н. 12
Нил Сор­ский (Май­ков), прп.: †1508; Ап. 7; М. 7 || Во­лог.; Новг.
Ни­фонт (Ни­фон) Афон­ский, прп.: †1330; Ин. 14
Ни­фонт II Кон­стан­ти­но­поль­ский, пат­ри­арх: †1490; Ав. 11
Онуф­рий Хи­лен­дар­ский (Афон­ский), прмч.: †1818
Па­вел Зо­граф­ский (Афон­ский), прмч.: †1276 (1280); С. 22; Окт. 10
Па­вел Кси­ро­по­там­ский, прп.: †820; Ил. 28
Па­и­сий Ве­лич­ков­ский, прп.: †1794; Н. 15
Па­и­сий Хи­лен­дар­ский (Афон­ский), Бол­гар­ский, прп.: †по­сле 1762; Ин. 19
Пар­фе­ний Зо­граф­ский (Афон­ский), прмч.: †1276 (1280); С. 22; Окт. 10
Па­хо­мий Рус­ский, Афон­ский, прмч.: †1730; М. 7, 20 (на Пат­мо­се), 21 (на Афоне)
Петр Афон­ский, прп.: †734; Ин. 12
Про­ко­пий Вар­нен­ский, Смирн­ский, прмч.: †1810; Ин. 25
Ро­ман Кар­пе­ни­сий­ский, прмч.: †1694; Ян. 5; Ф. 16
Ро­мил Бдин­ский, прп.: †по­сле 1375; Ян. 16
Сав­ва Ви­шер­ский, Нов­го­род­ский, прп.: †1461; Окт. 1 || Новг.; Твер.
Сав­ва Зо­граф­ский (Афон­ский), прмч.: †1276 (1280); С. 22; Окт. 10
Сав­ва Кры­пец­кий, Псков­ский, прп., уче­ник прп. Ев­фро­си­на Псков­ско­го: †1495; Ав. 28 || Псков.
Сав­ва I Серб­ский, ар­хи­еп.: †1237; Ян. 12; М. 6 || Серб.
Сав­ва II Серб­ский, ар­хи­еп.: †1271; Ф. 8 || Серб.
Сер­гий Зо­граф­ский (Афон­ский), прмч.: †1276 (1280); С. 22; Окт. 10
Сер­гий Об­нор­ский, Ну­ром­ский, Во­ло­год­ский, прп., уче­ник прп. Сер­гия Ра­до­неж­ско­го: †1412; Окт. 7 || Во­лог.; Ра­до­неж.
Си­лу­ан Афон­ский, прп.: †1938; С. 11 || Тамб.
Си­ме­он Бо­сой, Фило­фе­ев­ский, Фла­му­рий­ский, Афон­ский, игу­мен: †XVI; Ап. 19
Си­ме­он Ми­ро­то­чи­вый (в ми­ру Сте­фан Нема­ня, царь Серб­ский), Хи­лен­дар­ский (Афон­ский), кти­тор: †1200; Ф. 13
Си­мон Зо­граф­ский (Афон­ский), прмч.: †1276 (1280); С. 22; Окт. 10
Си­мон Ми­ро­то­чи­вый, Си­мо­но­петр­ский (Афон­ский), прп.: †1257; Д. 28
Ти­мо­фей Ес­фиг­мен­ский, Афон­ский, прмч.: †1820; Ап. 19; Окт. 29
Фе­о­дор Ми­ти­лен­ский, мч.: †1784; Ян. 30
Фе­о­до­сий Тра­пезунд­ский, митр.: †XIV; Ян. 11
Фе­о­липт Фила­дель­фий­ский, еп.: †ок. 1325
Фео­на Со­лун­ский (Фес­са­ло­ни­кий­ский), митр.: †XVI; Ап. 4
Фе­о­фан Но­вый, Афон­ский, игу­мен: †XV; Ав. 19
Фе­о­фил Ми­ро­то­чи­вый, Афон­ский, прп.: †1548; Ил. 8
Фило­фей (в ми­ру Фе­о­фил) Афон­ский, прп.: †?; Окт. 21
Фило­фей Ка­рей­ский, Афон­ский, прп.: †кон. XV; Д. 5
Фо­ма Зо­граф­ский (Афон­ский), игу­мен, прмч.: †1276 (1280); С. 22; Окт. 10
Фо­ма Ма­ле­ин, прп.: †X; Ил. 7
пре­по­доб­но­му­че­ни­ки Ивер­ские (Афон­ские): †1276 (1280); М. 13
пре­по­доб­но­му­че­ни­ки Ка­рей­ские (Афон­ские): †1260–1281; Д. 5
инок Ка­рей­ский, удо­сто­ив­ший­ся яв­ле­ния Ар­хан­ге­ла Гав­ри­и­ла: †X; Ин. 11
12 пре­по­доб­но­му­че­ни­ков Ва­то­пед­ских (Афон­ских), со сщ­мч. игу­ме­ном Ев­фи­ми­ем Ва­то­пед­ским: †1276 (1280); Ян. 4
4 му­че­ни­ка Зо­граф­ские (Афон­ские), ми­ряне, по­стра­дав­шие с прмч. Зо­граф­ски­ми: †1276 (1280); С. 22; Окт. 10
5 уче­ни­ков прп. Афа­на­сия Афон­ско­го: †980; Ил. 5