Акафист Божественным Страстям Христовым (Пассия)

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Утвержден для общецерковного использования.

Конда́к 1.

Взбра́нный Воево́до и Го́споди Небесе́ и земли́, Тебе́, Царя́ Безсме́ртнаго, зря́щи на Кресте́ ви́сяща, вся́ тва́рь измени́ся, не́бо ужасе́ся, основа́ния земли́ восколеба́шася. Мы́ же, недосто́йнии, благода́рственное поклоне́ние Твоему́ на́с ра́ди страда́нию принося́ще, с разбо́йником вопие́м Ти́:

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

И́кос 1.

А́нгелов ликостоя́ния восполня́я, не от А́нгел восприя́л еси́, но мене́ ра́ди, Бо́г сы́й, челове́к бы́в, челове́ка уме́рша грехми́ животворя́щим Те́лом и Кро́вию Твое́ю оживи́л еси́; те́мже, толи́цей любви́ Твое́й благода́рни су́ще, вопие́м Ти́:

Иису́се Бо́же, Любы́ Предве́чная, та́ко о на́с, земноро́дных, возблаговоли́вый;

Иису́се, ми́лосте безме́рная, к челове́ком па́дшим до́лу низше́дый.

Иису́се, в пло́ть на́шу оболки́йся, и сме́ртию Свое́ю сме́рти держа́ву разруши́вый;

Иису́се, Боже́ственными Твои́ми Та́йнами на́с обожи́вый.

Иису́се, страда́ньми и Кресто́м Твои́м ве́сь ми́р искупи́вый;

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Конда́к 2.

Ви́дев Тя́ А́нгел в вертогра́де Гефсимани́йстем до по́та крова́ва в моли́тве подвиза́ющася, предста́в укрепля́ше Тя́, егда́ я́ко бре́мя тя́жкое грехи́ на́ши отяготе́ша на Тебе́: ты́ бо, Ада́ма поги́бшаго на ра́мо восприи́м, Отцу́ предста́вил еси́, прекло́нь коле́на моля́ся. О се́м у́бо с ве́рою и любо́вию пою́ Тебе́: Аллилу́иа.

И́кос 2.

Ра́зума неуразуме́нна во́льнаго Твоего́ страда́ния не уразуме́ша иуде́е: сего́ ра́ди егда́ в нощи́ со свети́льники и́щущим Тя́ ре́кл еси́: А́з е́смь, а́ще и падо́ша на земли́, но по се́м связа́вше Тя́, ведо́ша на суди́ще; мы́ же на се́м пути́, припа́дающе к Тебе́, с любо́вию зове́м:

Иису́се, Све́те ми́ра, от ми́ра лука́ваго возненави́денный;

Иису́се, живы́й во Све́те Непристу́пнем, от о́бласти те́мныя я́тый.

Иису́се, Сы́не Бо́жий Безсме́ртный, от сы́на поги́бели на сме́рть ука́занный;

Иису́се, в Не́мже льсти́ не́сть, от преда́теля ле́стию лобза́нный.

Иису́се, ту́не Себе́ все́м подава́яй, за сре́бреники про́данный;

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Конда́к 3.

Си́лою Божества́ Твоего́ проре́кл еси́ трикра́тное отверже́ние ученику́. О́н же посе́м, а́ще и отрече́ся Тебе́ с кля́твою, оба́че, егда́ узре́ Тя́ во дворе́ архиере́йстем, Го́спода своего́ и Учи́теля, умили́вся се́рдцем, изше́д во́н пла́кася го́рько: «При́зри у́бо и на мя́, Го́споди, и порази́ жесто́кое се́рдце мое́, да слеза́ми мои́ми омы́ю грехи́ моя́, поя́ Тебе́: Аллилу́иа».

И́кос 3.

Име́яй вои́стинну вла́сть по чи́ну Мелхиседе́кову, я́ко Архиере́й во ве́ки, ста́л еси́ пред беззако́нным первосвяще́нником Каиа́фою, Влады́ка и Госпо́дь все́х; от Твои́х у́бо рабо́в прия́вый муче́ние, приими́ от на́с сицева́я:

Иису́се безце́нный, цено́ю ку́пленный, стяжи́ мя в Твое́ ве́чное насле́дие;

Иису́се, жела́ние все́х, от Петра́ стра́ха ра́ди отве́рженный, не отве́ржи мя́, гре́шнаго.

Иису́се, А́гнче незло́биве, от лю́тых ве́прей терза́емый, изми́ мя от вра́г мои́х;

Иису́се, Архиере́ю, Свое́ю Кро́вию вше́дый во Свята́я Святы́х, очи́сти мя́ от скве́рн плотски́х.

Иису́се свя́занный, име́яй вла́сть вяза́ти и реши́ти, разреши́ моя́ тя́жкая прегреше́ния;

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Конда́к 4.

Бу́рею христоуби́йства ды́шуще иуде́е, послу́шавше гла́са отца́ лжи́ и человекоуби́йцы искони́, диа́вола, отверго́ша Тебе́, пра́вый Пу́ть, И́стину и Живо́т; мы́ же Тя́, Христа́, Бо́жию си́лу, в Не́мже вся́ сокро́вища прему́дрости и ра́зума сокрове́на су́ть, испове́дующе, вопие́м: Аллилу́иа.

И́кос 4.

Слы́ша Пила́т кро́ткия Твоя́ глаго́лы, а́ки досто́йнаго сме́рти предаде́ Тя на пропя́тие, а́ще и са́м свиде́тельствоваше, я́ко ни еди́ныя вины́ обре́те в Тебе́: ру́це у́бо свои́ умы́, но се́рдце оскверни́; мы́ же, чудя́щеся та́йне во́льнаго страда́ния Твоего́, со умиле́нием зове́м:

Иису́се, Сы́не Бо́жий и Сы́не Де́вы, от сыно́в беззако́ния уму́ченный;

Иису́се, пору́ганный и обнаже́нный, дая́й ле́поту кри́ном се́льным и одева́яй не́бо о́блаки.

Иису́се, насыще́нный ра́нами, пятию́ хле́бы пя́ть ты́сящ насы́тивый;

Иису́се, Царю́ все́х, вме́сто да́ни любве́ и благодаре́ния жесто́кия му́ки прие́мый.

Иису́се, на́с ра́ди ве́сь де́нь я́звленный, уврачу́й я́звы ду́ш на́ших;

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Конда́к 5.

Богото́чною Кро́вию Твое́ю ве́сь обле́клся еси́, одея́йся све́том, я́ко ри́зою. Ве́м, вои́стину ве́м со проро́ком, почто́ червле́ны ри́зы Твоя́: а́з, Го́споди, а́з греха́ми мои́ми уязви́х Тя́: Тебе́ у́бо, мене́ ра́ди уя́звленному, благода́рственно зову́: Аллилу́иа.

И́кос 5.

Прови́дев Тя́ в ду́се Богоглаго́ливый Иса́ия, безче́стием и ра́нами испо́лненна, ужа́сся вопия́ше: «Ви́дехом Его́, и не име́яше ви́да, ни добро́ты»; мы́ же, зря́ще Тя́ на Кресте́, с ве́рою и удивле́нием зове́м:

Иису́се, безче́стие терпя́й, челове́ка сла́вою и че́стию венча́вый;

Иису́се, на Него́же А́нгели зре́ти не мо́гут, по лани́тома зауше́нный.

Иису́се, по главе́ тро́стию ударе́нный, преклони́ во смире́ние главу́ мою́;

Иису́се, све́тлая Твоя́ очеса́ кро́вию омраче́нная име́вый, отврати́ о́чи моя́, е́же не ви́дети суеты́.

Иису́се, от но́г до главы́ не име́вый це́лости, всего́ це́ла и здра́ва сотвори́ мя́;

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Конда́к 6.

Пропове́дник Твоего́ незло́бия я́влься Пила́т, показа́ наро́ду ничто́же бы́ти в Тебе́ досто́йно сме́рти; но иуде́е, я́ко зве́рие ди́вии кро́вь узре́вше, скрежета́ху на Тя́ зубы́ свои́ми, «распни́, распни́ Его́», вопию́ще; мы́ же, лобыза́юще пречи́стыя я́звы Твоя́, зове́м: Аллилу́иа.

И́кос 6.

Возсия́л еси́ в позо́р и удивле́ние А́нгелом и челове́ком глаго́лющу о Тебе́ Пила́ту: «Се́, челове́к». Прииди́те у́бо, пору́ганному на́с ра́ди Иису́су поклони́мся, вопию́ще:

Иису́се, Тво́рче и Судие́ все́х, от тва́ри Своея́ суди́мый и му́чимый;

Иису́се, прему́дрости Пода́телю, отве́та безу́мным не да́вый.

Иису́се, Врачу́ уя́звленных грехми́, да́ждь ми́ врачевство́ покая́ния;

Иису́се, Па́стырю пораже́нный, порази́ бесо́в, искуша́ющих мя́.

Иису́се, пло́ть имы́й сокруше́нну, сокруши́ се́рдце мое́ стра́хом Твои́м;

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Конда́к 7.

Хотя́й челове́ка от рабо́ты вра́жия изба́вити, смири́л еси́ Себе́ пред враги́ Твои́ми, Иису́се, и, я́ко а́гнец безгла́сен на заколе́ние веде́н бы́л еси́, везде́ я́звы терпя́й, да всего́ исцели́ши челове́ка, зову́ща: Аллилу́иа.

И́кос 7.

Ди́вное показа́л еси́ долготерпе́ние, егда́ во́ини, руга́ющеся Тебе́, по глаго́лу непра́веднаго судии́, люте́йшими ра́нами уязвля́ху Пречи́стое Те́ло Твое́, я́ко обагри́тися ему́ от но́г до главы́ кро́вию. Сего́ ра́ди со слеза́ми вопие́м Ти́:

Иису́се человеколюби́вый, от челове́к те́рнием увенча́нный;

Иису́се, Божество́м безстра́стный, стра́сти терпя́й, да на́с от страсте́й свободи́ши.

Иису́се, Спа́се мо́й, спаси́ мя, пови́ннаго все́м му́кам;

Иису́се, все́ми оста́вленный, Утвержде́ние мое́, утверди́ мя.

Иису́се, от все́х оскорбле́нный, Ра́досте моя́, возвесели́ мя:

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Конда́к 8.

Ди́вно и стра́нно яви́стася Тебе́ Моисе́й и Илия́ на Фаво́ре, глаго́люща о исхо́де Твое́м, его́же ны́не скончава́еши во Иерусали́ме. Та́мо у́бо ви́девша сла́ву Твою́, зде́ же спасе́ние на́ше узре́вше, зову́т: Аллилу́иа.

И́кос 8.

Везде́ от иуде́й гони́мый, мно́гия, ра́ди мно́жества грехо́в мои́х, претерпе́л еси́ поноше́ния и му́ки: еди́ни бо Тя́ проти́вна бы́ти ке́сарю глаго́лют, друзи́и я́ко злоде́я осужда́ют, ини́и же: «Возми́, возми́ и распни́», — вопию́т. От все́х у́бо осужде́нному, и на пропя́тие ведо́мому, Тебе́, Го́споду, из глубины́ души́ глаго́лем:

Иису́се, непра́ведно осужде́нный, Судие́ на́ш, не осуди́ на́с по дело́м на́шим;

Иису́се, изнемога́яй на пути́ под Кресто́м, си́ло моя́, в ча́с ско́рби и озлобле́ния моего́ не оста́ви мене́.

Иису́се, взыва́яй о по́мощи ко Отцу́, Подвигополо́жниче мо́й, в не́мощи мое́й укрепи́ мя;

Иису́се, безче́стие прие́мый, Сла́во моя́, от Сла́вы Твоея́ не отри́ни мене́.

Иису́се, О́бразе Пресве́тлыя Ипоста́си О́тчия, преобрази́ мое́ нечи́стое и мра́чное житие́;

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Конда́к 9.

Все́ естество́ смяте́ся, зря́ Тебе́ на Кресте́ пове́шена, на небеси́ со́лнце лучи́ своя́ скры́, земля́ потрясе́ся, заве́са хра́ма раздра́ся, ка́мение распаде́ся, а́д уме́рших изве́рже: мы́ же покланя́емся на ме́сте, иде́же стоя́сте пречи́стеи но́зе Твои́, пою́ще: Аллилу́иа.

И́кос 9.

Вети́я многовеща́ннии, а́ще и мно́го глаго́лют, но не мо́гут досто́йнаго благодаре́ния возда́ти Боже́ственным страсте́м Твои́м, Человеколю́бче: на́ша же душа́ и те́ло, се́рдце и вся́ соста́вы, со умиле́нием к Тебе́ взыва́ют:

Иису́се, пригвожде́йся на Кресте́, пригвозди́ и упраздни́ рукописа́ние грехо́в на́ших;

Иису́се, ру́це со Креста́ простира́яй ко все́м, привлецы́ и мя́, заблу́ждшаго.

Иису́се, Две́ре овца́м, в ре́бра прободе́нный, введи́ мя я́звами Твои́ми в черто́г Тво́й;

Иису́се, Пло́тию распя́тый, распни́ пло́ть мою́ со страстьми́ и похотьми́.

Иису́се, скончава́яйся в му́ках, да́ждь ми́, да се́рдце мое́ не су́дит и́но что́ ве́дети, то́чию Тебе́ ра́спята;

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Конда́к 10.

Спасти́ хотя́й ми́р, слепы́х, хромы́х, прокаже́нных, немы́х и глухи́х исцели́л еси́, духо́в лука́вых отгна́л еси́; неразу́мнии же иуде́е, зло́бою ды́шуще и за́вистию му́чими, пригвозди́ша Тя́ ко Кресту́, не ве́дуще пе́ти: Аллилу́иа.

И́кос 10.

Царю́ Преве́чный, Иису́се, ве́сь стра́ждеши за мое́ невоздержа́ние, да всего́ мя́ чи́ста сотвори́ши, во все́м о́браз на́м подая́й, да после́дуем стопа́м Твои́м, зову́ще:

Иису́се, Любы́ неизсле́димая, распе́ншим Тя́ греха́ не поста́вивый;

Иису́се, с во́плем кре́пким и со слеза́ми в вертогра́де моля́йся, научи́ и на́с моли́тися.

Иису́се, вся́ проро́чествия о Тебе́ испо́лнивый, испо́лни во благи́х жела́ния се́рдца на́шего;

Иису́се, ду́х Тво́й в ру́це Отцу́ преда́вый, в ча́с исхо́да моего́ приими́ ду́х мо́й.

Иису́се, ри́зы Твоя́ раздели́ти не возбрани́вый, кро́тко ду́шу мою́ от те́ла отдели́;

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Конда́к 11.

Пе́ние всеумиле́нное приноша́ше Тебе́ Всенепоро́чная Ма́терь Твоя́, глаго́люще: «А́ще и стра́ждеши на Кресте́, но ве́м Тя́ из чре́ва пре́жде денни́цы от Отца́ рожде́нна, ви́жду бо, я́ко тва́рь вся́ состра́ждет Тебе́; предае́ши ду́х Тво́й Отцу́, и Мо́й ду́х приими́ и не оста́ви Мене́, зову́щую: Аллилу́иа».

И́кос 11.

Я́ко светоприе́мная свеща́, у Креста́ Твоего́ горя́ще любо́вию к Тебе́, и Ма́тернею Де́ва Пренепоро́чная обдержа́шеся боле́знию, заходя́щу Тебе́ во гро́б и́стинному Со́лнцу Пра́вды, с Не́юже и се́рдца на́шего моли́твы приими́ сицевы́я:

Иису́се, вознесы́йся на дре́во, да на́с, па́дших, совознесе́ши ко Отцу́ Своему́;

Иису́се, де́вственнику Присноде́ву в Ма́терь дарова́вый, да на́с де́вству и чистоте́ научи́ши.

Иису́се, Тебе́, Бо́га Сло́ва ро́ждшей, ученика́ Богосло́ва вручи́вый, вручи́ и на́с все́х Ея́ Ма́тернему заступле́нию;

Иису́се, ми́ра и а́да победи́телю, победи́ неве́рие, го́рдость жите́йскую и по́хоть оче́с, в на́с живу́щия.

Иису́се, сме́рти держа́вы разруши́телю, ве́чныя сме́рти изба́ви мя́;

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Конда́к 12.

Благода́ть Твою́ пода́ждь мне́, Иису́се, Бо́же мо́й, приими́ мя, я́коже прия́л еси́ Ио́сифа с Никоди́мом, да, я́ко чи́стую плащани́цу, ду́шу мою́ принесу́ Тебе́ и воня́ми доброде́телей пома́жу Пречи́стое Те́ло Твое́, и, я́ко во гро́бе, в се́рдце мое́м име́ю Тя́, зовы́й: Аллилу́иа.

И́кос 12.

Пою́ще Твое́ во́льное распя́тие, покланя́емся страсте́м Твои́м, Христе́, ве́руем с со́тником, я́ко вои́стинну Бо́жий Сы́н еси́, приити́ име́яй на о́блацех с си́лою и сла́вою мно́гою; тогда́ у́бо не посрами́ на́с, Кро́вию Твое́ю искупле́нных и та́ко вопию́щих:

Иису́се многострада́льный, рыда́нием Де́вы Ма́тере Твоея́ ве́чнаго пла́ча исхити́ ны;

Иису́се, от все́х оста́вленный, не оста́ви мя́ еди́наго в ча́с сме́рти моея́.

Иису́се, с Магдали́ною нога́м Твои́м каса́ющася, приими́ мя;

Иису́се, с преда́телем и распе́ншими Тя́ не осуди́ мя.

Иису́се, с разбо́йником благоразу́мным в ра́й введи́ мя;

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Конда́к 13.

О Иису́се Христе́, А́гнче Бо́жий, взе́мляй грехи́ ми́ра, приими́ ма́лое сие́ от всея́ души́ на́шея приноси́мое Тебе́ благодаре́ние и исцели́ ны спаси́тельными Твои́ми страда́ньми от вся́кия боле́зни душе́вныя и теле́сныя, огради́ ны Кресто́м Твои́м от вра́г ви́димых и неви́димых и при кончи́не живота́ на́шего не оста́ви на́с, да сме́ртию Твое́ю изба́вльшеся ве́чныя сме́рти, вы́ну зове́м Тебе́: Аллилу́иа.

Этот конда́к чита́ется три́жды, зате́м и́кос 1-й и конда́к 1-й.

И́кос 1.

А́нгелов ликостоя́ния восполня́я, не от А́нгел восприя́л еси́, но мене́ ра́ди, Бо́г сы́й, челове́к бы́в, челове́ка уме́рша грехми́ животворя́щим Те́лом и Кро́вию Твое́ю оживи́л еси́; те́мже, толи́цей любви́ Твое́й благода́рни су́ще, вопие́м Ти́:

Иису́се Бо́же, Любы́ Предве́чная, та́ко о на́с, земноро́дных, возблаговоли́вый;

Иису́се, ми́лосте безме́рная, к челове́ком па́дшим до́лу низше́дый.

Иису́се, в пло́ть на́шу оболки́йся, и сме́ртию Свое́ю сме́рти держа́ву разруши́вый;

Иису́се, Боже́ственными Твои́ми Та́йнами на́с обожи́вый.

Иису́се, страда́ньми и Кресто́м Твои́м ве́сь ми́р искупи́вый;

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Конда́к 1.

Взбра́нный Воево́до и Го́споди Небесе́ и земли́, Тебе́, Царя́ Безсме́ртнаго, зря́щи на Кресте́ ви́сяща, вся́ тва́рь измени́ся, не́бо ужасе́ся, основа́ния земли́ восколеба́шася. Мы́ же, недосто́йнии, благода́рственное поклоне́ние Твоему́ на́с ра́ди страда́нию принося́ще, с разбо́йником вопие́м Ти́:

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Моли́тва.

На Кресте́ пригвожде́нный за ны́, Иису́се Христе́, Единоро́дный Бо́га Отца́ Сы́не, ми́лости, любве́ и щедро́т неизчерпа́емая бе́здно! Ве́м, я́ко грехо́в ра́ди мои́х, от неизрече́ннаго человеколю́бия, Кро́вь Твою́ пролия́ти на Кресте́ изво́лил еси́, ю́же а́з, окая́нный и неблагода́рный, досе́ле скве́рными мои́ми де́лы попира́х и нивочто́же вменя́х. Те́м у́бо из глубины́ беззако́ния и нечистоты́ моея́ у́мныма очи́ма на Распя́таго Тя́ на Кресте́ Искупи́теля моего́ воззре́в, со смире́нием и ве́рою во глубину́ я́зв, Твоего́ милосе́рдия испо́лненных, себе́ поверга́ю, грехо́в проще́ния и скве́рнаго жития́ моего́ исправле́ния прося́. Ми́лостив бу́ди мне́, Влады́ко и Судие́ мо́й, не отри́ни мя́ от лица́ Твоего́, но всеси́льною Твое́ю руко́ю Са́м мя́ к Тебе́ обрати́ и на пу́ть и́стиннаго покая́ния наста́ви, да отны́не положу́ спасе́ния моего́ нача́ло. Боже́ственными страда́ньми Твои́ми укроти́ моя́ плотски́я стра́сти; излия́нною Твое́ю Кро́вию очи́сти моя́ душе́вныя скве́рны; распя́тием Твои́м распни́ мя ми́ру с собла́знами его́ и похотьми́; Кресто́м Твои́м огради́ мя от неви́димых вра́г, ловя́щих ду́шу мою́. Прободе́нными нога́ми Твои́ми от вся́каго пути́ лука́ваго возбрани́ нога́м мои́м; прободе́нными рука́ми Твои́ми ру́це мои́ от вся́каго неуго́днаго Тебе́ де́ла воздержи́. Пригвожде́нный пло́тию, пригвозди́ стра́ху Твоему́ пло́ть мою́, да уклони́вся от зла́, творю́ бла́го пред Тобо́ю. Преклони́вый главу́ Твою́ на Кресте́, к земли́ смире́ния приклони́ вознесе́нную мою́ горды́ню; венце́м Твои́м терно́вым огради́ моя́ ушеса́, во е́же не слы́шати неполе́знаго; же́лчь уста́ми вкуси́вый, положи́ хране́ние нечи́стым усто́м мои́м; отве́рстое копие́м име́яй се́рдце, се́рдце чи́сто во мне́ сози́жди; все́ми Твои́ми я́звами, всего́ мя сла́дце в любо́вь Твою́ уязви́, да Тебе́, Го́спода моего́, возлюблю́ все́ю душе́ю, все́м се́рдцем, все́ю кре́постию и все́м помышле́нием. Да́ждь ми́ Себе́ стра́нна и неиму́ща, где́ главы́ подклони́ти; да́ждь ми́ Себе́ Всеблага́го, избавля́ющаго ду́шу мою́ от сме́рти; да́ждь мне́ Себе́ Всесла́дкаго, услажда́ющаго мя́ в ско́рбех и напа́стех Свое́ю любо́вию, да Его́же пе́рвее ненави́дех, прогневля́х, от себе́ изгоня́х и ко Кресту́ пригвожда́х, сего́ ны́не возлюблю́, ра́дуяся прииму́ и сла́дце Кре́ст Его́ до конца́ жи́зни мое́й понесу́. Не да́ждь отсе́ле, о всеблаги́й Искупи́телю мо́й, ни еди́ной мое́й во́ле соверша́тися, поне́же зла́ е́сть и непотре́бна, да не па́ки впаду́ в тя́жкую рабо́ту ца́рствовавшаго во мне́ греха́; но Твоя́ во́ля блага́я, спасти́ мя хотя́щая, да соверша́ется во мне́ всегда́, е́йже мя́ вруча́я, Тебе́, Распя́таго Го́спода моего́, у́мным очесе́м моего́ се́рдца представля́ю и молю́ из глубины́ души́, да и в разлуче́нии мое́м от бре́ннаго моего́ те́ла, Тебе́ Еди́наго на Кресте́ Твое́м узрю́, в ру́це мя́ защище́ния Своего́ прие́млюща, и от возду́шных духо́в зло́бы храня́ща, вселя́юща же со гре́шники, покая́нием Тебе́ благоугоди́вшими. Ами́нь.

А҆ка́ѳїстъ бжⷭ҇твеннымъ стрⷭ҇тє́мъ хрⷭ҇тѡ́вымъ.

Конда́къ а҃.

Взбра́нный воево́до, и҆ гдⷭ҇и нб҃сѐ и҆ землѝ, тебѐ, цр҃ѧ̀ безсме́ртнагѡ, зрѧ̀ на крⷭ҇тѣ̀ ви́сѧща, всѧ̀ тва́рь и҆змѣни́сѧ, нб҃о ᲂу҆жасе́сѧ, ѡ҆снова̑нїѧ землѝ восколеба́шасѧ. Мы́ же, недосто́йнїи, бл҃года́рственное поклоне́нїе твоемꙋ̀ на́съ ра́ди страда́нїю приносѧ́ще, съ разбо́йникомъ вопїе́мъ тѝ:

І҆и҃се, сн҃е бж҃їй, помѧнѝ на́съ, є҆гда̀ прїи́деши во црⷭ҇твїи твое́мъ.

І҆́косъ а҃.

А҆́гг҃лѡвъ ликостоѧ̑нїѧ восполнѧ́ѧ, не ѿ а҆́гг҃лъ воспрїѧ́лъ є҆сѝ, но менє̀ ра́ди, бг҃ъ сы́й, чл҃вѣ́къ бы́въ, человѣ́ка грѣ̑хъ ра́ди ᲂу҆ме́рша, животворѧ́щимъ тѣ́ломъ и҆ кро́вїю твое́ю ѡ҆живи́лъ є҆сѝ. Тѣ́мже, толи́цѣй любвѝ твое́й бл҃года́рни сꙋ́ще, вопїе́мъ тѝ:

І҆и҃се, бж҃е, любы̀ предвѣ́чнаѧ, та́кѡ ѡ҆ на́съ, земноро́дныхъ, возбл҃говоли́вый: і҆и҃се, млⷭ҇те безмѣ́рнаѧ, къ человѣ́кѡмъ па́дшымъ до́лꙋ низше́дый.

І҆и҃се, въ пло́ть на́шꙋ ѡ҆болкі́йсѧ и҆ сме́ртїю свое́ю сме́рти держа́вꙋ разрꙋши́вый: і҆и҃се, бж҃е́ственными твои́ми та́йнами на́съ ѡ҆божи́вый.

І҆и҃се, страда́ньми и҆ крⷭ҇то́мъ твои́мъ ве́сь мі́ръ и҆скꙋпи́вый.

І҆и҃се, сн҃е бж҃їй, помѧнѝ на́съ, є҆гда̀ прїи́деши во црⷭ҇твїи твое́мъ.

Конда́къ в҃.

Ви́дѣвъ тѧ̀ а҆́гг҃лъ въ вертогра́дѣ геѳсїмані́йстѣмъ, до по́та крова́ва въ мл҃твѣ подвиза́ющасѧ, предста́въ ᲂу҆крѣплѧ́ше тѧ̀, є҆гда̀ ꙗ҆́кѡ бре́мѧ тѧ́жкое грѣсѝ на́шѧ ѡ҆тѧготѣ́ша на тебѣ̀: ты́ бо а҆да́ма поги́бшаго, на ра́мо воспрїи́мъ, ѻ҆ц҃ꙋ̀ предста́вилъ є҆сѝ, прекло́нь колѣ́на молѧ́сѧ. Ѡ҆ се́мъ ᲂу҆́бѡ съ вѣ́рою и҆ любо́вїю пою̀ тебѣ̀: А҆ллилꙋ́їа.

І҆́косъ в҃.

Ра́зꙋма неꙋразꙋмѣ́нна во́льнагѡ твоегѡ̀ страда́нїѧ не ᲂу҆разꙋмѣ́ша і҆ꙋде́є: сегѡ̀ ра́ди є҆гда̀ въ нощѝ со свѣти́льники и҆́щꙋщымъ тѧ̀ ре́клъ є҆сѝ: а҆́зъ є҆́смь, а҆́ще и҆ падо́ша на землѝ, но по се́мъ, свѧза́вше тѧ̀, ведо́ша на сꙋди́ще. Мы́ же на се́мъ пꙋтѝ, припа́дающе къ тебѣ̀, съ любо́вїю зове́мъ:

І҆и҃се, свѣ́те мі́ра, ѿ мі́ра лꙋка́вагѡ возненави́дѣнный: і҆и҃се, живы́й во свѣ́тѣ непристꙋ́пнѣмъ, ѿ ѻ҆́бласти те́мныѧ ꙗ҆́тый.

І҆и҃се, сн҃е бж҃їй безсме́ртный, ѿ сы́на поги́бели на сме́рть ᲂу҆ка́занный: і҆и҃се, въ не́мже льстѝ нѣ́сть, ѿ преда́телѧ ле́стїю лобза́нный.

І҆и҃се, тꙋ́не себѐ всѣ́мъ подава́ѧй, за сре́бреники про́данный.

І҆и҃се, сн҃е бж҃їй, помѧнѝ на́съ, є҆гда̀ прїи́деши во црⷭ҇твїи твое́мъ.

Конда́къ г҃.

Си́лою бжⷭ҇тва̀ твоегѡ̀ проре́клъ є҆сѝ трикра́тное ѿверже́нїе ᲂу҆ченикꙋ̀: ѻ҆́нъ же посе́мъ а҆́ще и҆ ѿрече́сѧ тебє̀ съ клѧ́твою, ѻ҆ба́че є҆гда̀ ᲂу҆зрѣ̀ тѧ̀ во дворѣ̀ а҆рхїере́йстѣмъ, гдⷭ҇а своего̀ и҆ ᲂу҆чи́телѧ, ᲂу҆мили́всѧ се́рдцемъ, и҆зше́дъ во́нъ, пла́касѧ го́рькѡ. При́зри ᲂу҆́бѡ и҆ на мѧ̀, гдⷭ҇и, и҆ поразѝ жесто́кое се́рдце моѐ, да слеза́ми мои́ми ѡ҆мы́ю грѣхѝ моѧ̑, поѧ̀ тебѣ̀: А҆ллилꙋ́їа.

І҆́косъ г҃.

И҆мѣ́ѧй вои́стиннꙋ вла́сть по чи́нꙋ мелхїседе́ковꙋ, ꙗ҆́кѡ а҆рхїере́й во вѣ́ки, ста́лъ є҆сѝ пред̾ беззако́ннымъ первосщ҃е́нникѡмъ каїа́фою, влⷣка и҆ гдⷭ҇ь всѣ́хъ: ѿ твои́хъ ᲂу҆́бѡ рабѡ́въ прїѧ́вый мꙋче́нїе, прїимѝ ѿ на́съ сицева̑ѧ:

І҆и҃се безцѣ́нный, цѣно́ю кꙋ́пленный, стѧжи́ мѧ въ твоѐ вѣ́чное наслѣ́дїе: і҆и҃се, жела́нїе всѣ́хъ, ѿ петра̀ стра́ха ра́ди ѿве́рженный, не ѿве́ржи мѧ̀, грѣ́шнаго.

І҆и҃се, а҆́гнче неѕло́биве, ѿ лю́тыхъ ве́прей терза́емый, и҆зми́ мѧ ѿ вра̑гъ мои́хъ: і҆и҃се, а҆рхїере́ю, свое́ю кро́вїю вше́дый во ст҃а̑ѧ ст҃ы́хъ, ѡ҆чи́сти мѧ̀ ѿ скве́рнъ плотски́хъ.

І҆и҃се свѧ́занный, и҆мѣ́ѧй вла́сть вѧза́ти и҆ рѣши́ти, разрѣшѝ моѧ̑ тѧ̑жкаѧ прегрѣшє́нїѧ.

І҆и҃се, сн҃е бж҃їй, помѧнѝ на́съ, є҆гда̀ прїи́деши во црⷭ҇твїи твое́мъ.

Конда́къ д҃.

Бꙋ́рею хрⷭ҇тоꙋбі́йства ды́шꙋще і҆ꙋде́є, послꙋ́шавше гла́са ѻ҆тца̀ лжѝ и҆ чл҃вѣкоꙋбі́йцы и҆сконѝ, дїа́вола, ѿверго́ша тебѐ, пра́вый пꙋ́ть, и҆́стинꙋ и҆ живо́тъ. Мы́ же тѧ̀, хрⷭ҇та̀, бж҃їю си́лꙋ, въ не́мже всѧ̑ сокрѡ́вища премꙋ́дрости и҆ ра́зꙋма сокрове́на сꙋ́ть, и҆сповѣ́дꙋюще вопїе́мъ: А҆ллилꙋ́їа.

І҆́косъ д҃.

Слы́ша пїла́тъ крѡ́ткїѧ твоѧ̑ гл҃го́лы, а҆́ки досто́йнаго сме́рти предаде́ тѧ на пропѧ́тїе, а҆́ще и҆ са́мъ свидѣ́тельствоваше, ꙗ҆́кѡ ни є҆ди́ныѧ вины̀ ѡ҆брѣ́те въ тебѣ̀: рꙋ́цѣ ᲂу҆́бѡ своѝ ᲂу҆мы̀, но се́рдце ѡ҆сквернѝ. Мы́ же, чꙋдѧ́щесѧ та́йнѣ во́льнагѡ страда́нїѧ твоегѡ̀, со ᲂу҆миле́нїемъ зове́мъ:

І҆и҃се, сн҃е бж҃їй и҆ сн҃е дв҃ы, ѿ сынѡ́въ беззако́нїѧ ᲂу҆мꙋ́ченный: і҆и҃се, порꙋ́ганный и҆ ѡ҆бнаже́нный, даѧ́й лѣ́потꙋ крі́нѡмъ сє́льнымъ и҆ ѡ҆дѣва́ѧй не́бо ѻ҆́блаки.

І҆и҃се, насыще́нный ра́нами, пѧтїю̀ хлѣ́бы пѧ́ть ты́сѧщъ насы́тивый: і҆и҃се, цр҃ю̀ всѣ́хъ, вмѣ́стѡ да́ни любвѐ и҆ бл҃годаре́нїѧ жестѡ́кїѧ мꙋ̑ки прїе́мый.

І҆и҃се, на́съ ра́ди ве́сь де́нь ꙗ҆́звленный, ᲂу҆врачꙋ́й ꙗ҆́звы дꙋ́шъ на́шихъ.

І҆и҃се, сн҃е бж҃їй, помѧнѝ на́съ, є҆гда̀ прїи́деши во црⷭ҇твїи твое́мъ.

Конда́къ є҃.

Бг҃ото́чною кро́вїю твое́ю ве́сь ѡ҆бле́клсѧ є҆сѝ, ѡ҆дѣѧ́йсѧ свѣ́томъ ꙗ҆́кѡ ри́зою: вѣ́мъ, вои́стиннꙋ вѣ́мъ со прⷪ҇ро́комъ почто̀ червле́ны ри̑зы твоѧ̑: а҆́зъ, гдⷭ҇и, а҆́зъ грѣхи̑ мои́ми ᲂу҆ѧзви́хъ тѧ̀. Тебѣ̀ ᲂу҆́бѡ, менє̀ ра́ди ᲂу҆ѧ́звленномꙋ, бл҃года́рственнѡ зовꙋ̀: А҆ллилꙋ́їа.

І҆́косъ є҃.

Прови́дѣвъ тѧ̀ въ дꙋ́сѣ бг҃оглаго́ливый и҆са́їа безче́стїемъ и҆ ра́нами и҆спо́лненна, ᲂу҆жа́ссѧ вопїѧ́ше: ви́дѣхомъ є҆го̀, и҆ не и҆мѣ́ѧше ви́да, ни добро́ты. Мы́ же, зрѧ́ще тѧ̀ на крⷭ҇тѣ̀ съ вѣ́рою и҆ ᲂу҆дивле́нїемъ зове́мъ:

І҆и҃се, безче́стїе терпѧ́й, чл҃вѣ́ка сла́вою и҆ че́стїю вѣнча́вый: і҆и҃се, на него́же а҆́гг҃ли зрѣ́ти не мо́гꙋтъ, по лани́тома заꙋше́нный.

І҆и҃се, по главѣ̀ тро́стїю ᲂу҆даре́нный, преклонѝ во смире́нїе главꙋ̀ мою̀: і҆и҃се, свѣ̑тлаѧ твоѧ̑ ѻ҆чеса̀ кро́вїю ѡ҆мрачє́ннаѧ и҆мѣ́вый, ѿвратѝ ѻ҆́чи моѧ̑, є҆́же не ви́дѣти сꙋеты̀.

І҆и҃се, ѿ но́гъ до главы̀ не и҆мѣ́вый цѣ́лости, всегѡ̀ цѣ́ла и҆ здра́ва сотвори́ мѧ.

І҆и҃се, сн҃е бж҃їй, помѧнѝ на́съ, є҆гда̀ прїи́деши во црⷭ҇твїи твое́мъ.

Конда́къ ѕ҃.

Проповѣ́дникъ твоегѡ̀ неѕло́бїѧ ꙗ҆́вльсѧ пїла́тъ, показа̀ наро́дꙋ ничто́же бы́ти въ тебѣ̀ досто́йно сме́рти: но і҆ꙋде́є, ꙗ҆́кѡ ѕвѣ́рїе ди́вїи, кро́вь ᲂу҆зрѣ́вше, скрежета́хꙋ на тѧ̀ зꙋбы̀ свои́ми: распнѝ, распнѝ є҆го̀, вопїю́ще. Мы́ же, лобыза́юще пречⷭ҇тыѧ ꙗ҆́звы твоѧ̑, зове́мъ: А҆ллилꙋ́їа.

І҆́косъ ѕ҃.

Возсїѧ́лъ є҆сѝ въ позо́ръ и҆ ᲂу҆дивле́нїе а҆́гг҃лѡмъ и҆ чл҃вѣ́кѡмъ, глаго́лющꙋ ѡ҆ тебѣ̀ пїла́тꙋ: сѐ чл҃вѣ́къ. Прїиди́те ᲂу҆́бѡ, порꙋ́ганномꙋ на́съ ра́ди і҆и҃сꙋ поклони́мсѧ, вопїю́ще:

І҆и҃се, тво́рче и҆ сꙋдїѐ всѣ́хъ, ѿ тва́ри своеѧ̀ сꙋди́мый и҆ мꙋ́чимый: і҆и҃се, премꙋ́дрости пода́телю, ѿвѣ́та безꙋ̑мнымъ не да́вый.

І҆и҃се, врачꙋ̀ ᲂу҆ѧ́звленныхъ грѣхмѝ, да́ждь мѝ врачевство̀ покаѧ́нїѧ: і҆и҃се, па́стырю пораже́нный, поразѝ бѣсѡ́въ, и҆скꙋша́ющихъ мѧ̀.

І҆и҃се, пло́ть и҆мы́й сокрꙋше́ннꙋ, сокрꙋшѝ се́рдце моѐ стра́хомъ твои́мъ.

І҆и҃се, сн҃е бж҃їй, помѧнѝ на́съ, є҆гда̀ прїи́деши во црⷭ҇твїи твое́мъ.

Конда́къ з҃.

Хотѧ́й человѣ́ка ѿ рабо́ты вра́жїѧ и҆зба́вити, смири́лъ є҆сѝ себѐ пред̾ враги̑ твои́ми, і҆и҃се, и҆ ꙗ҆́кѡ а҆́гнецъ безгла́сенъ на заколе́нїе веде́нъ бы́лъ є҆сѝ, вездѣ̀ ꙗ҆́звы терпѧ́й, да всего̀ и҆сцѣли́ши чл҃вѣ́ка, зовꙋ́ща: А҆ллилꙋ́їа.

І҆́косъ з҃.

Ди́вное показа́лъ є҆сѝ долготерпѣ́нїе, є҆гда̀ во́ини, рꙋга́ющесѧ тебѐ, по глаго́лꙋ непра́веднагѡ сꙋдїѝ лютѣ́йшими ра́нами ᲂу҆ѧзвлѧ́хꙋ пречтⷭ҇ое тѣ́ло твоѐ, ꙗ҆́кѡ ѡ҆багри́тисѧ є҆мꙋ̀ ѿ но́гъ до главы̀ кро́вїю. Сегѡ̀ ра́ди со слеза́ми вопїе́мъ тѝ:

І҆и҃се чл҃вѣколюби́вый, ѿ человѣ́къ те́рнїемъ ᲂу҆вѣнча́нный: і҆и҃се, бжⷭ҇тво́мъ безстра́стный, стрⷭ҇ти терпѧ́й, да на́съ ѿ страсте́й свободи́ши.

І҆и҃се, сп҃се мо́й, сп҃си́ мѧ, пови́ннаго всѣ́мъ мꙋ́камъ: і҆и҃се, всѣ́ми ѡ҆ста́вленный, ᲂу҆твержде́нїе моѐ, ᲂу҆тверди́ мѧ.

І҆и҃се, ѿ всѣ́хъ ѡ҆скорбле́нный, ра́досте моѧ̀, возвесели́ мѧ.

І҆и҃се, сн҃е бж҃їй, помѧнѝ на́съ, є҆гда̀ прїи́деши во црⷭ҇твїи твое́мъ.

Конда́къ и҃.

Ди́внѡ и҆ стра́ннѡ ꙗ҆ви́стасѧ тебѣ̀ мѡѷсе́й и҆ и҆лїа̀ на ѳавѡ́рѣ, глагѡ́люща ѡ҆ и҆схо́дѣ твое́мъ, є҆го́же ны́нѣ скончава́еши во і҆ерⷭ҇ли́мѣ: та́мѡ ᲂу҆́бѡ ви́дѣвша сла́вꙋ твою̀, здѣ̀ же сп҃се́нїе на́ше ᲂу҆зрѣ́вше, зовꙋ́тъ: А҆ллилꙋ́їа.

І҆́косъ и҃.

Вездѣ̀ ѿ і҆ꙋдє́й гони́мый, мнѡ́гїѧ, ра́ди мно́жества грѣхѡ́въ мои́хъ, претерпѣ́лъ є҆сѝ поношє́нїѧ и҆ мꙋ̑ки: є҆ди́ни бо тѧ̀ проти́вна бы́ти ке́сарю гл҃го́лютъ, дрꙋзі́и ꙗ҆́кѡ ѕлодѣ́ѧ ѡ҆сꙋжда́ютъ, и҆ні́и же: воз̾мѝ, воз̾мѝ и҆ распнѝ, вопїю́тъ. Ѿ всѣ́хъ ᲂу҆́бѡ ѡ҆сꙋжде́нномꙋ и҆ на пропѧ́тїе ведо́момꙋ, тебѣ̀, гдⷭ҇ꙋ, и҆з̾ глꙋбины̀ дꙋшѝ гл҃го́лемъ:

І҆и҃се, непра́вѣднѡ ѡ҆сꙋжде́нный сꙋдїѐ на́шъ, не ѡ҆сꙋдѝ на́съ по дѣлѡ́мъ на́шымъ: і҆и҃се, и҆знемога́ѧй на пꙋтѝ под̾ крⷭ҇то́мъ си́ло моѧ̀, въ ча́съ ско́рби и҆ ѡ҆ѕлобле́нїѧ моегѡ̀ не ѡ҆ста́ви менѐ.

І҆и҃се, взыва́ѧй ѡ҆ по́мощи ко ѻ҆ц҃ꙋ̀, подвигополо́жниче мо́й, въ не́мощи мое́й ᲂу҆крѣпи́ мѧ: і҆и҃се, безче́стїе прїе́мый, сла́во моѧ̀, ѿ сла́вы твоеѧ̀ не ѿри́ни менѐ.

І҆и҃се, ѻ҆́бразе пресвѣ́тлыѧ ѵ҆поста́си ѻ҆́ч҃їѧ, преѡбразѝ моѐ нечи́стое и҆ мра́чное житїѐ.

І҆и҃се, сн҃е бж҃їй, помѧнѝ на́съ, є҆гда̀ прїи́деши во црⷭ҇твїи твое́мъ.

Конда́къ ѳ҃.

Всѐ є҆стество̀ смѧте́сѧ, зрѧ̀ тебѐ на крⷭ҇тѣ̀ повѣ́шена: на небесѝ со́лнце лꙋчѝ своѧ̑ скры̀, землѧ̀ потрѧсе́сѧ, завѣ́са хра́ма раздра́сѧ, ка́менїе распаде́сѧ, а҆́дъ ᲂу҆ме́ршыѧ и҆зве́рже: мы́ же покланѧ́емсѧ на мѣ́стѣ, и҆дѣ́же стоѧ́стѣ пречⷭ҇тѣи но́зѣ твоѝ, пою́ще: А҆ллилꙋ́їа.

І҆́косъ ѳ҃.

Вѣті̑ѧ многовѣща́ннїи, а҆́ще и҆ мно́гѡ глаго́лютъ, но не мо́гꙋтъ досто́йнагѡ благодаре́нїѧ возда́ти бж҃е́ствєннымъ стрⷭ҇те́мъ твои̑мъ, чл҃вѣколю́бче. На́ша же дꙋша̀ и҆ тѣ́ло, се́рдце и҆ всѧ̑ соста́вы, со ᲂу҆миле́нїемъ къ тебѣ̀ взыва́ютъ:

І҆и҃се, пригвожде́йсѧ на крⷭ҇тѣ̀, пригвоздѝ и҆ ᲂу҆празднѝ рꙋкописа́нїе грѣхѡ́въ на́шихъ: і҆и҃се, рꙋ́цѣ со крⷭ҇та̀ простира́ѧй ко всѣ̑мъ, привлецы̀ и҆ мѧ̀, заблꙋ́ждшаго.

І҆и҃се, две́ре ѻ҆вца́мъ, въ рє́бра прободе́нный, введи́ мѧ ꙗ҆́звами твои́ми въ черто́гъ тво́й: і҆и҃се, пло́тїю распѧ́тый, распнѝ пло́ть мою̀ со страстьмѝ и҆ похотьмѝ.

І҆и҃се, скончава́ѧйсѧ въ мꙋ́кахъ, да́ждь мѝ, да се́рдце моѐ не сꙋ́дитъ и҆́но что̀ вѣ́дѣти, то́чїю тебѐ ра́спѧта.

І҆и҃се, сн҃е бж҃їй, помѧнѝ на́съ, є҆гда̀ прїи́деши во црⷭ҇твїи твое́мъ.

Конда́къ і҃.

Спастѝ хотѧ́й мі́ръ, слѣпы́хъ, хромы́хъ, прокаже́нныхъ, нѣмы́хъ и҆ глꙋхи́хъ и҆сцѣли́лъ є҆сѝ, дꙋхѡ́въ лꙋка́выхъ ѿгна́лъ є҆сѝ: неразꙋ́мнїи же і҆ꙋде́є, ѕло́бою ды́шꙋще и҆ за́вистїю мꙋ́чими, пригвозди́ша тѧ̀ ко крⷭ҇тꙋ̀, не вѣ́дꙋще пѣ́ти: А҆ллилꙋ́їа.

І҆́косъ і҃

Цр҃ю̀ превѣ́чный, і҆и҃се, ве́сь стра́ждеши за моѐ невоздержа́нїе, да всего́ мѧ чи́ста сотвори́ши, во все́мъ ѻ҆́бразъ на́мъ подаѧ́й, да послѣ́дꙋемъ стопа́мъ твои́мъ, зовꙋ́ще:

І҆и҃се, любы̀ неизслѣ́димаѧ, распе́ншымъ тѧ̀ грѣха̀ не поста́вивый: і҆и҃се, съ во́племъ крѣ́пкимъ и҆ со слеза́ми въ вертогра́дѣ молѧ́йсѧ, наꙋчѝ и҆ на́съ моли́тисѧ.

І҆и҃се, всѧ̑ проро́чєствїѧ ѡ҆ тебѣ̀ и҆спо́лнивый, и҆спо́лни во бл҃ги́хъ жела̑нїѧ се́рдца на́шегѡ: і҆и҃се, дх҃ъ тво́й въ рꙋ́цѣ ѻ҆ц҃ꙋ̀ преда́вый, въ ча́съ и҆схо́да моегѡ̀ прїимѝ дꙋ́хъ мо́й.

І҆и҃се, ри̑зы твоѧ̑ раздѣли́ти не возбрани́вый, кро́ткѡ дꙋ́шꙋ мою̀ ѿ тѣ́ла ѿдѣлѝ.

І҆и҃се, сн҃е бж҃їй, помѧнѝ на́съ, є҆гда̀ прїи́деши во црⷭ҇твїи твое́мъ.

Конда́къ а҃і.

Пѣ́нїе всеꙋмиле́нное приноша́ше тебѣ̀ всенепоро́чнаѧ мт҃рь твоѧ̀, гл҃го́люще: а҆́ще и҆ стра́ждеши на крⷭ҇тѣ̀, но вѣ́мъ тѧ̀ и҆з̾ чре́ва пре́жде денни́цы ѿ ѻ҆ц҃а̀ рожде́нна, ви́ждꙋ бо, ꙗ҆́кѡ тва́рь всѧ̑ состра́ждетъ тебѣ̀: предае́ши дх҃ъ тво́й ѻ҆ц҃ꙋ̀ и҆ мо́й дꙋ́хъ прїимѝ и҆ не ѡ҆ста́ви менѐ, зовꙋ́щꙋю: А҆ллилꙋ́їа.

І҆́косъ а҃і.

Ꙗ҆́кѡ свѣтопрїе́мнаѧ свѣща̀, ᲂу҆ крⷭ҇та̀ твоегѡ̀ горѧ́ще любо́вїю къ тебѣ̀ и҆ мт҃рнею, дв҃а пренепоро́чнаѧ ѡ҆бдержа́шесѧ болѣ́знїю, заходѧ́щꙋ тебѣ̀ во гро́бъ, и҆́стинномꙋ сл҃нцꙋ пра́вды. Съ не́юже и҆ се́рдца на́шегѡ моли́твы прїимѝ сицевы̑ѧ:

І҆и҃се, вознесы́йсѧ на дре́во, да на́съ, па́дшихъ, совознесе́ши ко ѻ҆ц҃ꙋ̀ своемꙋ̀: і҆и҃се, дѣ́вственникꙋ приснодв҃ꙋ въ мт҃рь дарова́вый, да на́съ дѣ́вствꙋ и҆ чистотѣ̀ наꙋчи́ши.

І҆и҃се, тебѣ̀, бг҃а сло́ва ро́ждшей, ᲂу҆ченика̀ бг҃осло́ва врꙋчи́вый, врꙋчѝ и҆ на́съ всѣ́хъ є҆ѧ̀ мт҃рнемꙋ застꙋпле́нїю: і҆и҃се, мі́ра и҆ а҆́да побѣди́телю, побѣдѝ невѣ́рїе, го́рдость жите́йскꙋю и҆ по́хоть ѻ҆че́съ въ на́съ живꙋ́щыѧ.

І҆и҃се, сме́рти держа́вы разрꙋши́телю, вѣ́чныѧ сме́рти и҆зба́ви мѧ̀.

І҆и҃се, сн҃е бж҃їй, помѧнѝ на́съ, є҆гда̀ прїи́деши во црⷭ҇твїи твое́мъ.

Конда́къ в҃і.

Бл҃года́ть твою̀ пода́ждь мнѣ̀, і҆и҃се, бж҃е мо́й, прїими́ мѧ, ꙗ҆́коже прїѧ́лъ є҆сѝ і҆ѡ́сифа съ нїкоди́момъ, да ꙗ҆́кѡ чи́стꙋю плащани́цꙋ дꙋ́шꙋ мою̀ принесꙋ̀ тебѣ̀, и҆ вонѧ́ми добродѣ́телей пома́жꙋ пречⷭ҇тое тѣ́ло твоѐ, и҆ ꙗ҆́кѡ во гро́бѣ, въ се́рдцѣ мое́мъ и҆мѣ́ю тѧ̀, зовы́й: А҆ллилꙋ́їа.

І҆́косъ в҃і.

Пою́ще твоѐ во́льное распѧ́тїе, покланѧ́емсѧ стрⷭ҇тє́мъ твои̑мъ, хрⷭ҇тѣ̀, вѣ́рꙋемъ съ со́тникомъ, ꙗ҆́кѡ вои́стиннꙋ бж҃їй сн҃ъ є҆сѝ, прїитѝ и҆мѣ́ѧй на ѻ҆́блацѣхъ съ си́лою и҆ сла́вою мно́гою: тогда̀ ᲂу҆́бѡ не посрамѝ на́съ, кро́вїю твое́ю и҆скꙋпле́нныхъ и҆ та́кѡ вопїю́щихъ:

І҆и҃се, многострада́льный, рыда́нїемъ дв҃ы, мт҃ре твоеѧ̀, вѣ́чнагѡ пла́ча и҆схити́ ны: і҆и҃се, ѿ всѣ́хъ ѡ҆ста́вленный, не ѡ҆ста́ви мѧ̀ є҆ди́наго въ ча́съ сме́рти моеѧ̀.

І҆и҃се, съ магдали́ною нога́мъ твои̑мъ каса́ющасѧ, прїими́ мѧ: і҆и҃се, съ преда́телемъ и҆ распе́ншыми тѧ̀ не ѡ҆сꙋди́ мѧ.

І҆и҃се, съ разбо́йникомъ бл҃горазꙋ́мнымъ въ ра́й введи́ мѧ.

І҆и҃се, сн҃е бж҃їй, помѧнѝ на́съ, є҆гда̀ прїи́деши во црⷭ҇твїи твое́мъ.

Конда́къ г҃і.

Ѽ і҆и҃се хрⷭ҇тѐ, а҆́гнче бж҃їй, взе́млѧй грѣхѝ мі́ра, прїимѝ ма́лое сїѐ ѿ всеѧ̀ дꙋшѝ на́шеѧ приноси́мое тебѣ̀ бл҃годаре́нїе, и҆ и҆сцѣли́ ны сп҃си́тельными твои́ми страда́ньми ѿ всѧ́кїѧ болѣ́зни дꙋше́вныѧ и҆ тѣле́сныѧ, ѡ҆гради́ ны крⷭ҇то́мъ твои́мъ ѿ вра̑гъ ви́димыхъ и҆ неви́димыхъ, и҆ при кончи́нѣ живота̀ на́шегѡ не ѡ҆ста́ви на́съ, да сме́ртїю твое́ю и҆зба́вльшесѧ вѣ́чныѧ сме́рти, вы́нꙋ зове́мъ тебѣ̀: А҆ллилꙋ́їа.

Се́й конда́къ глаго́ли три́жды. И҆ па́ки і҆́косъ а҃-й и҆ конда́къ а҃-й.

І҆́косъ а҃.

А҆́гг҃лѡвъ ликостоѧ̑нїѧ восполнѧ́ѧ, не ѿ а҆́гг҃лъ воспрїѧ́лъ є҆сѝ, но менє̀ ра́ди, бг҃ъ сы́й, чл҃вѣ́къ бы́въ, человѣ́ка грѣ̑хъ ра́ди ᲂу҆ме́рша, животворѧ́щимъ тѣ́ломъ и҆ кро́вїю твое́ю ѡ҆живи́лъ є҆сѝ. Тѣ́мже, толи́цѣй любвѝ твое́й бл҃года́рни сꙋ́ще, вопїе́мъ тѝ:

І҆и҃се, бж҃е, любы̀ предвѣ́чнаѧ, та́кѡ ѡ҆ на́съ, земноро́дныхъ, возбл҃говоли́вый: і҆и҃се, млⷭ҇те безмѣ́рнаѧ, къ человѣ́кѡмъ па́дшымъ до́лꙋ низше́дый.

І҆и҃се, въ пло́ть на́шꙋ ѡ҆болкі́йсѧ и҆ сме́ртїю свое́ю сме́рти держа́вꙋ разрꙋши́вый: і҆и҃се, бж҃е́ственными твои́ми та́йнами на́съ ѡ҆божи́вый.

І҆и҃се, страда́ньми и҆ крⷭ҇то́мъ твои́мъ ве́сь мі́ръ и҆скꙋпи́вый.

І҆и҃се, сн҃е бж҃їй, помѧнѝ на́съ, є҆гда̀ прїи́деши во црⷭ҇твїи твое́мъ.

Конда́къ а҃.

Взбра́нный воево́до, и҆ гдⷭ҇и нб҃сѐ и҆ землѝ, тебѐ, цр҃ѧ̀ безсме́ртнагѡ, зрѧ̀ на крⷭ҇тѣ̀ ви́сѧща, всѧ̀ тва́рь и҆змѣни́сѧ, нб҃о ᲂу҆жасе́сѧ, ѡ҆снова̑нїѧ землѝ восколеба́шасѧ. Мы́ же, недосто́йнїи, бл҃года́рственное поклоне́нїе твоемꙋ̀ на́съ ра́ди страда́нїю приносѧ́ще, съ разбо́йникомъ вопїе́мъ тѝ:

І҆и҃се, сн҃е бж҃їй, помѧнѝ на́съ, є҆гда̀ прїи́деши во црⷭ҇твїи твое́мъ.

Мл҃тва.

На крⷭ҇тѣ̀ пригвожде́нный за ны̀, і҆и҃се хрⷭ҇тѐ, є҆диноро́дный бг҃а ѻ҆ц҃а̀ сн҃е, млⷭ҇ти, любвѐ и҆ щедро́тъ неизчерпа́емаѧ бе́здно! Вѣ́мъ, ꙗ҆́кѡ грѣхѡ́въ ра́ди мои́хъ, ѿ неизрече́ннагѡ чл҃вѣколю́бїѧ, кро́вь твою̀ пролїѧ́ти на крⷭ҇тѣ̀ и҆зво́лилъ є҆сѝ, ю҆́же а҆́зъ, ѻ҆каѧ́нный и҆ неблагода́рный, досе́лѣ скве́рными мои́ми дѣ́лы попира́хъ и҆ нивочто́же вмѣнѧ́хъ. Тѣ́мъ ᲂу҆́бѡ и҆з̾ глꙋбины̀ беззако́нїѧ и҆ нечистоты̀ моеѧ̀ ᲂу҆́мныма ѻ҆чи́ма на распѧ́таго тѧ̀ на крⷭ҇тѣ̀ и҆скꙋпи́телѧ моегѡ̀ воззрѣ́въ, со смире́нїемъ и҆ вѣ́рою во глꙋбинꙋ̀ ꙗ҆́звъ, твоегѡ̀ млⷭ҇рдїѧ и҆спо́лненныхъ, себє̀ поверга́ю, грѣхѡ́въ проще́нїѧ и҆ скве́рнагѡ житїѧ̀ моегѡ̀ и҆справле́нїѧ просѧ̀. Ми́лостивъ бꙋ́ди мнѣ̀, влⷣко и҆ сꙋдїѐ мо́й, не ѿри́ни мѧ̀ ѿ лица̀ твоегѡ̀, но всеси́льною твое́ю рꙋко́ю са́мъ мѧ̀ къ тебѣ̀ ѡ҆братѝ и҆ на пꙋ́ть и҆́стиннагѡ покаѧ́нїѧ наста́ви, да ѿны́нѣ положꙋ̀ сп҃се́нїѧ моегѡ̀ нача́ло. Бж҃е́ственными страда́ньми твои́ми ᲂу҆кротѝ моѧ̑ плотскі̑ѧ стра̑сти: и҆злїѧ́нною твое́ю кро́вїю ѡ҆чи́сти моѧ̑ дꙋшє́вныѧ сквє́рны: распѧ́тїемъ твои́мъ распни́ мѧ мі́рꙋ съ собла́знами є҆гѡ̀ и҆ похотьмѝ: крⷭ҇то́мъ твои́мъ ѡ҆гради́ мѧ ѿ неви́димыхъ вра̑гъ, ловѧ́щихъ дꙋ́шꙋ мою̀. Прободе́нныма нога́ма твои́ма ѿ всѧ́кагѡ пꙋтѝ лꙋка́вагѡ возбранѝ нога́мъ мои̑мъ: прободе́нныма рꙋка́ма твои́ма рꙋ́цѣ моѝ ѿ всѧ́кагѡ неꙋго́днагѡ тебѣ̀ дѣ́ла воздержѝ. Пригвожде́нный пло́тїю, пригвоздѝ стра́хꙋ твоемꙋ̀ пло́ть мою̀, да ᲂу҆клони́всѧ ѿ ѕла̀, творю̀ бл҃го пред̾ тобо́ю. Преклони́вый главꙋ̀ твою̀ на крⷭ҇тѣ̀, къ землѝ смире́нїѧ приклонѝ вознесе́ннꙋю мою̀ горды́ню: вѣнце́мъ твои́мъ терно́вымъ ѡ҆градѝ моѧ̑ ᲂу҆шеса̀, во є҆́же не слы́шати кромѣ̀ поле́знагѡ: же́лчь ᲂу҆ста́ми вкꙋси́вый, положѝ хране́нїе нечи̑стымъ ᲂу҆стѡ́мъ мои̑мъ: ѿве́рстое копїе́мъ и҆мѣ́ѧй се́рдце, се́рдце чи́сто во мнѣ̀ сози́жди: всѣ́ми твои́ми ꙗ҆́звами всего́ мѧ сла́дцѣ въ любо́вь твою̀ ᲂу҆ѧзвѝ, да тебѐ, гдⷭ҇а моегѡ̀ возлюблю̀ все́ю дꙋше́ю, всѣ́мъ се́рдцемъ, все́ю крѣ́постїю и҆ всѣ́мъ помышле́нїемъ. Да́ждь мѝ себє̀ стра́нна и҆ неимꙋ́ща гдѣ̀ главы̀ подклони́ти: да́ждь мѝ себє̀ всебл҃га́го, и҆збавлѧ́ющаго дꙋ́шꙋ мою̀ ѿ сме́рти: да́ждь мнѣ̀ себє̀ всесла́дкаго, ᲂу҆слажда́ющаго мѧ̀ въ ско́рбѣхъ и҆ напа́стѣхъ свое́ю любо́вїю, да є҆го́же пе́рвѣе ненави́дѣхъ, прогнѣвлѧ́хъ, ѿ себє̀ и҆згонѧ́хъ и҆ ко крⷭ҇тꙋ̀ пригвожда́хъ, сего̀ ны́нѣ возлюблю̀, ра́дꙋѧсѧ прїимꙋ̀ и҆ сла́дцѣ крⷭ҇тъ є҆гѡ̀ до конца̀ жи́зни мое́й понесꙋ̀. Не да́ждь ѿсе́лѣ, ѽ всебл҃гі́й и҆скꙋпи́телю мо́й, ни є҆ди́ной мое́й во́лѣ соверша́тисѧ, поне́же ѕла̀ є҆́сть и҆ непотре́бна, да не па́ки впадꙋ̀ въ тѧ́жкꙋю рабо́тꙋ ца́рствовавшагѡ во мнѣ̀ грѣха̀: но твоѧ̀ во́лѧ бл҃га́ѧ, сп҃сти́ мѧ хотѧ́щаѧ, да соверша́етсѧ во мнѣ̀ всегда̀, є҆́йже мѧ̀ врꙋча́ѧ, тебє̀, распѧ́таго гдⷭ҇а моегѡ̀, ᲂу҆́мнымъ ѻ҆чесе́мъ моегѡ̀ се́рдца представлѧ́ю и҆ молю̀ и҆з̾ глꙋбины̀ дꙋшѝ, да и҆ въ разлꙋче́нїи мое́мъ ѿ бре́ннагѡ моегѡ̀ тѣ́ла, тебѐ є҆ди́наго на крⷭ҇тѣ̀ твое́мъ ᲂу҆зрю̀, въ рꙋ́цѣ мѧ̀ защище́нїѧ своегѡ̀ прїе́млюща и҆ ѿ воздꙋ́шныхъ дꙋхѡ́въ ѕло́бы хранѧ́ща, вселѧ́юща же со грѣ́шники, покаѧ́нїемъ тебѣ̀ бл҃гоꙋгоди́вшими. А҆ми́нь.

Акафист Страстем Христовым читается во время великопостного богослужения, называемого «пассия». Пассия — это особый чин службы воспоминаний гефсиманских и голгофских страданий нашего Господа и Спасителя Иисуса Христа. По акафисте читается Евангелие, повествующее о страстях Христовых, откуда, собственно, и явилось название пассии (лат. раssiо — страдание, страсть). Чин этот, установленный на Руси митрополитом Петром Могилой и совершаемый в наше время Великим постом в неделю вечера (в воскресенье вечером), приобрел особую любовь православного народа. И это не удивительно — ведь в нем с благоговейным трепетом говорится о страданиях и мучениях Невинного — за грешных, Чистого — за нечистых, Сына Божия — за падших людей. Христос Спаситель за всех грешников принял позорнейшие страдания и смерть. На Кресте была принесена жертва умилостивления (Рим. 3, 25) за каждого из нас. И читая этот акафист, вызывающий в наших сердцах священные воспоминания тех отдаленных дней, будем помнить слова Господа, сказанные в Гефсимании апостолам: «Бдите и молитесь, да не внидете в напасть» (Мф. 26, 41).