Канон Святому Божию Архистратигу Михаилу в воспоминание чуда в Хонех

Пе́снь 1.

Ирмо́с: Отве́рзу уста́ моя́, и напо́лнятся ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Боже́ственными светлостьми́ облистава́емь всегда́, у́м мо́й озари́, е́же воспе́ти тя́, Архистрати́же го́рних во́инств, все́х утвержде́ние притека́ющих к тебе́.

У́м Пребезнача́льный преми́рнаго чинонача́льника показа́ чи́на, тя́ пресла́вне Архистрати́же, и све́т су́щих во тьме́, и Боже́ственное украше́ние Це́ркве Своея́.

Умо́в предваря́я Небе́сных в Ду́се, до́льним же, всеизря́днейшее, Михаи́ле, да́лся еси́ огражде́ние, и утвержде́ние, и ору́жие, враги́ закала́ющее и потребля́ющее.

Богоро́дичен: Де́во Всенепоро́чная, Я́же А́нгелов благоле́пие, челове́ков по́моще, Ты́ мне́ помози́, морепла́вающему и в бу́ри греха́ при́сно впа́дающу и бе́дствующу.

Пе́снь 3.

Ирмо́с: Не му́дростию и си́лою и бога́тством хва́лимся, но Тобо́ю, О́тчею Ипоста́сною Му́дростию, Христе́; не́сть бо свя́т па́че Тебе́, Человеколю́бче.

Кре́постию боже́ственною, воево́до А́нгелов всехва́льне, обхо́диши всю́ зе́млю, от лю́тых ны́ изыма́я, призыва́ющия твое́ боже́ственное и́мя.

Я́ко боже́ствен пропове́дник, я́ко предста́тель ве́рных непосты́ден, заблу́ждших путево́ждь и наказа́тель бы́л еси́, Бо́жий Архистрати́же богови́днейший.

Боже́ственнаго сия́ния чи́стшее зерца́ло бы́л еси́, явле́ния честна́го све́тло прие́м Ду́ха, Михаи́ле Первоа́нгеле досточу́дне.

Богоро́дичен: Невеще́ственныя умы́ Соста́вивый во́лею в веще́ственное Твое́ чре́во всели́ся хоте́нием, Всенепоро́чная, пло́тию зри́мь Незре́нный.

Седа́лен, гла́с 8.

Небе́сных чино́в наста́вник, служи́тель же сла́вы Боже́ственныя, досто́йно бы́в повеле́нием Зижди́теля Твоего́, христиа́ном еси́ хода́тай спаси́тельный, невеще́ственною твое́ю сла́вою земны́я назира́я. Те́мже по до́лгу благохва́лим тя́ вси́, боже́ственное твое́ дне́сь воспева́юще торжество́, Михаи́ле Архистрати́же, моли́ Христа́ Бо́га, грехо́в оставле́ние дарова́ти, пра́зднующим любо́вию боже́ственная твоя́ чудеса́.

Сла́ва: Ли́к а́нгельский Архистрати́га име́я, боже́ственнаго Михаи́ла, с ни́м Святе́й Тро́ице немо́лчное приноша́ет песнопе́ние, из не су́щих бо Соде́тель вся́ческих во́инства огнезра́чных чино́в Сло́вом приведе́.

И ны́не: Упова́ние христиа́н, Пресвята́я Де́во, Его́же родила́ еси́ Бо́га, па́че ума́ же и сло́ва, непреста́нно моли́ с вы́шними Си́лами, пода́ти оставле́ние грехо́в на́ших все́х и исправле́ние жития́ ве́рою и любо́вию при́сно Тя́ сла́вящим.

Крестобогоро́дичен: Нескве́рная А́гница, А́гнца и Па́стыря пове́шена на Дре́ве ме́ртва зря́щи, пла́чущи веща́ше, и Ма́терски восклица́ющи: ка́ко претерплю́ Твое́ е́же па́че сло́ва, Сы́не Мо́й, сни́тие и во́льныя Стра́сти, Бо́же Преблаги́й?

Пе́снь 4.

Ирмо́с: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный, нетле́нною дла́нию и спасе́ зову́щия: сла́ва, Христе́, си́ле Твое́й.

У́м сы́й Пе́рвый, соста́вил еси́ боже́ственныя умы́ хоте́нием, нача́льника посреде́ си́х Михаи́ла соде́ла, всеблаже́нным прича́стием просвеща́ема и у́мными богонача́лии облиста́ема.

Пе́ние свято́е со Престо́лы и Нача́лы, и Си́лами, и Властьми́, и Свяще́нными Госпо́дьствы возглаша́еши Тро́ице, пресла́вне Михаи́ле, спаса́я ны́, пою́щия тя́.

Велича́ем все́х Творца́ же и Го́спода, за благоутро́бие да́вшаго обхране́ние велича́йшее, и необори́му сте́ну, и забра́ло, Михаи́ла на́м, светоза́рнаго Архистрати́га.

Богоро́дичен: Мы́сленно, Де́во, Твоего́ Рождества́ пресла́вное ска́зоваше дре́вле священноявле́нный, Ду́хом го́ру присе́нную ви́дя Тя́ ясне́йше, из Нея́же Святы́й прии́де Бо́г воплоща́емь.

Пе́снь 5.

Ирмо́с: Нечести́вии не у́зрят сла́вы Твоея́, Христе́, но мы́ Тя́, Единоро́дне, Оте́ческия сла́вы сия́ние Божества́, от но́щи у́тренююще, воспева́ем Тя́, Человеколю́бче.

Яви́лся еси́ предводя́щ дре́вняго Изра́иля, повеле́нием Су́щаго из Иа́кова, челове́ком я́вльшагося дебельство́м те́ла, Михаи́ле безтеле́сный, А́нгелов Архистрати́же.

Невеще́ственными сия́нии обожа́емь при́сно, прича́стием богонача́льным, и на́м осия́ние светода́тельное подава́еши, Первоа́нгеле, пресла́вно удивля́емь.

Украси́ся благода́тию боже́ственный тво́й хра́м, в то́й бо прише́д, враче́вств пучи́ну его́ показа́л еси́, Михаи́ле Первоа́нгеле, и страсте́й потреби́теля.

Богоро́дичен: У́мных А́нгелов Тя́ показа́ Бо́г вы́шшую, всели́вся в Твоя́ ложесна́, Чи́стая, Всенепоро́чная, Его́же моли́ всегда́ уще́дрити пою́щия Тя́.

Пе́снь 6.

Ирмо́с: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ Си́л.

Ра́дуется ве́рных мно́жество, благохва́лящее тя́, и сла́вит Всесвята́го Сло́ва, совоку́пльшаго земны́я со А́нгелы, Михаи́ле, Свое́ю бла́гостию.

Во́инства Изра́илева спа́сл еси́, явля́яся и боже́ственная подая́ повеле́ния, Архистрати́же, враги́ низложи́л еси́, и в коне́ц сия́ истреби́л еси́.

Я́ко ви́де тя́ Иису́с Нави́н, поклони́ся, вопроси́в честна́го твоего́ и свята́го и́мене, нача́льниче А́нгелов, благогове́нием и стра́хом держи́мь.

Богоро́дичен: Блаже́ни лю́дие, при́сно блажа́щии Тя́, Блаже́нная, Я́же Бо́га Блаже́ннаго ро́ждшая, земны́я за милосе́рдие неизрече́нным едине́нием обожи́вшаго.

Конда́к, гла́с 2:

Архистрати́же Бо́жий, служи́телю Боже́ственныя сла́вы, А́нгелов нача́льниче и челове́ков наста́вниче, поле́зное на́м проси́, и ве́лию ми́лость, я́ко безпло́тных Архистрати́г.

И́кос:

Ре́кл еси́, Человеколю́бче, в Писа́ниих Твои́х: мно́жеству ра́доватися А́нгелов на Небеси́ о челове́це еди́ном ка́ющемся, Безсме́ртне. Те́мже мы́, и́же в беззако́ниих, Безгре́шне Еди́не Сердцеве́дче, Тя́ моли́ти всегда́ дерза́ем, я́ко Благоутро́бнаго, уще́дрити и низпосла́ти недосто́йным умиле́ние, Влады́ко, подая́ на́м проще́ние, о все́х бо на́с мо́лится Тебе́ безпло́тных Архистрати́г.

Пе́снь 7.

Ирмо́с: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.

Усмотри́в, Дании́л ви́де купностоя́ща тя́, блаже́нне, и умудря́юща того́ в Хова́ре, виде́ние, е́же ви́де, Гаврии́ле молниезра́чне, Михаи́ла чинонача́льника тому́ явля́юща.

А́нгелов наста́вники, богови́дныя и светоно́сныя, Михаи́ла и Гаврии́ла, на́ша благи́я уте́шители и предста́тели, и храни́тели, восхва́лим ве́рою велегла́сно.

Красе́н и всеблаголе́пен и богови́ден сы́й, во́ждь па́че ума́ невеще́ственных духо́в бы́л еси́, Михаи́ле светоза́рнейше, с ни́ми у́бо о все́х на́с моли́ся.

Богоро́дичен: Ума́ Вели́каго и́стинно Сло́во Присносу́щное, Де́во, в Тя́ неизглаго́ланно и стра́шно всели́вшася ви́дя, возопи́ Гаврии́л Арха́нгел: ра́дуйся, Престо́ле Высоча́йшаго, Благослове́нная.

Пе́снь 8.

Ирмо́с: Изба́вителю все́х, Всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся́ дела́, благослови́те, по́йте Го́спода.

Мы́сленных безтеле́сных чинонача́льник, моли́твенник челове́ков спаси́телен, боже́ствен Бо́жий служи́тель, Михаи́ле, показа́лся еси́, поя́ непреста́нно: вся́ дела́, благослови́те, по́йте Го́спода.

Свети́льника два́ всесве́тлая, Михаи́ле и Гаврии́ле Арха́нгели, Трисве́тлаго Божества́ сия́ньми тва́рь просвеща́ющии, лю́тых мглу́ отгоня́ете.

Я́ко до́брии ко́рмчии, Арха́нгели, ко приста́нищу Боже́ственныя во́ли душе́вный кора́бль мо́й спаса́йте, от бу́ри грехо́в па́дший и бе́дствующий.

Богоро́дичен: Невестокраси́тель боже́ственный Арха́нгел, предста́в, приглаша́ше Тебе́, е́же ра́дуйся, Неве́сто Бо́жия Безневе́стная, А́нгелов сла́во и челове́ков спасе́ние и огражде́ние.

Пе́снь 9.

Ирмо́с: Е́ва у́бо неду́гом преслуша́ния кля́тву всели́ла е́сть; Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Се́ благоле́пие твоего́, Арха́нгеле, боже́ственнаго хра́ма, осия́ющее светоза́рным твои́м прису́тствием, чуде́с мо́лнии испуща́ет и тьмы́ неду́гов всегда́ отгоня́ет Боже́ственною благода́тию.

Я́ко супру́г красе́н и ле́потен су́ще, Влады́чним повеле́нием су́щим на земли́ слу́жите, Арха́нгели, от лю́тых изыма́юще и все́м просвеще́ние посыла́юще спаси́тельное Боже́ственным Ду́хом.

Дне́сь ра́дуются с на́ми безтеле́снии боже́ственнии у́ми, воспева́ема ви́дяще сего́ от все́х, вели́каго и све́тлаго Архистрати́га, и любо́вию с на́ми пра́зднуют, Жизнода́вца велича́юще.

Боже́ственная дво́ице и светоза́рна, Арха́нгели Михаи́ле всече́стне и Гаврии́ле препросла́вленне, Тро́ице Честне́й предстоя́ще, прегреше́ний вины́ и му́ки хва́лящия ва́с изба́вите.

Богоро́дичен: Гла́с Тебе́ боже́ственнаго Гаврии́ла прино́сим ра́достно и взыва́ем: ра́дуйся, раю́, дре́во посреде́ жи́зни име́яй, Пречи́стая, пресла́вная Сло́ва пала́то; ра́дуйся, Де́во Всенепоро́чная.

Свети́лен:

Я́коже дре́вле погрузи́л еси́ реки́ безчи́нная ше́ствия и шуме́ния, Архистрати́же сла́вы, та́ко и ны́не, Арха́нгеле, язы́ков горды́ню и де́монов свере́пства потреби́, я́ко да по до́лгу тя́ чти́м в пе́снех досто́йно.

Богоро́дичен: Почита́ют Рождество́ Твое́ безпло́тных чи́ни: ра́дости бо земна́я Ты́ напо́лнила еси́ еди́на. Те́м Тя́, Всенепоро́чную, ве́рнии, сла́вим, в пе́ниих славосло́вяще: Све́т бо су́щим во тьме́ возсия́ла еси́, я́ко у́тренний возсия́вший де́нь.