Пе́снь 1.

Ирмо́с: Во́ду проше́д я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Богозва́нне, я́ко вои́стину ми́лостив и кро́ток бы́л еси́, о́тче, и вои́стину ти́х ду́хом, и одесну́ю Престо́ла Бо́жия стоя́ния сподо́бился еси́, блаже́нне; и ны́не, на Небесе́х сы́й, тишину́ пода́ждь се́рдцу моему́.

От млады́х ногте́й, святи́телю Иоа́нне, впери́лся еси́ умо́м к Бо́гу и стра́сти теле́сныя зе́льным воздержа́нием увяди́л еси́, вся́кими доброде́тельми украша́лся, прему́дре.

Егда́ иере́йский са́н восприя́т, и Госпо́дня оправда́ния внима́я умо́м, святи́телю Иоа́нне, и от среды́ молвы́ удаля́яся, прему́дре, нечистоте́ не прикаса́лся еси́. Та́ко, святи́телю, нечи́стая помышле́ния отжени́ от се́рдца моего́.

Богоро́дичен: Правосла́вия бы́л еси́ учи́тель и́стинный и к Богоро́дице ве́лий моле́бник. Но и ны́не, святи́телю, при́сно не преста́й посеща́я ча́д твои́х, я́ко к Бо́гу дерзнове́ние име́яй ве́лие.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Я́ко у́бо со́лнце взы́де на восто́це, ты́ же, святи́телю Иоа́нне, на се́вере, на престо́ле седя́ Вели́каго Нова́града, возсия́л еси́ све́тлыми дея́ньми, и лю́ди вся́ просвети́л еси́ уче́нии, и еретико́в уста́ и́стинным сло́вом загради́л еси́.

Благообра́зен обы́чай име́я и ко все́м любо́вь Боже́ственную притяжа́в, прему́дре Иоа́нне, ва́рваром остроту́ притупи́, святи́телю, и до конца́ и́х низложи́.

Предочи́стив се́рдце твое́, моля́щуся тебе́ Бо́гу о по́льзе людсте́й, слы́шал еси́ гла́с Боже́ственный, глаго́лющ ти́, е́же о поле́зных: моли́тва бо твоя́ услы́шана бы́сть, я́коже вели́каго о ста́де твое́м к Бо́гу моле́бника, святи́телю Иоа́нне.

Богоро́дичен: Совокупи́, Пречи́стая, вся́ правосла́вныя, е́же просла́вити Тя́, Цари́це, Царя́ Христа́ ро́ждшую; дале́че же от на́с отжени́ ва́рварское негодова́ние; рабу́ же Твоему́ пода́ждь сло́во, да возмогу́ воспе́ти Твоя́ пресла́вная чудеса́.

Седа́лен, гла́с 4.

Егда́ моля́щуся тебе́ в вели́цей це́ркви Прему́дрости Бо́жия, преблаже́нне Иоа́нне, предочище́нный душе́ю и те́лом, гла́су же Боже́ственному явле́нно тебе́ возгласи́вшу, е́же о чудеси́ Богоро́дицы, и о избавле́нии гра́да, и о украше́нии Це́ркве Христо́вы, и прия́т от слове́с чу́днаго о́наго гла́са и́стинных зна́мений и чуде́с дарова́ния, и Боже́ственная уче́ния излива́еши все́м. Те́мже и с любо́вию, о́тче, пра́зднуем святу́ю па́мять твою́.

Сла́ва, и ны́не: Де́ва Мари́я и Богоро́дица вои́стину, я́ко о́блак све́та, дне́сь возсия́ на́м и от пра́веднику происхо́дит в сла́ву на́шу; не ктому́ Ада́м осужда́ется, и Е́ва от у́з свободи́ся. И сего́ ра́ди зове́м, вопию́ще со дерзнове́нием еди́ней Чи́стей: ра́дость возвеща́ет рождество́ Твое́ все́й вселе́нней.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Законополо́жника вели́ка, я́ко Моисе́я тя́ и Дави́да, вои́стину стяжа́вше, о́тче, ча́да твоя́, я́ко чадолюби́ва отца́, сы́нове Росси́йстии ублажа́ем.

Мно́ги у́бо це́ркви в сла́ву Бо́жию воздви́гшу ти́, святи́телю, показа́лся еси́ са́м хра́м Бо́гу соверше́н и нескве́рнен, чи́ст душе́ю и те́лом, прему́дре, те́мже и на́с сотвори́ хра́мы Ду́ха Пресвята́го, преблаже́нне.

Дне́ сы́н яви́лся еси́, в нощи́ же моля́щуся тебе́ Бо́гу в просвеще́нии слове́с Бо́жиих, о́тче Иоа́нне. Вра́г ненави́димый хотя́ше постраши́ти тя́, не терпя́ себе́ надо́лзе досажда́ема, но моли́твою твое́ю связа́ся вселука́вый.

Богоро́дичен: Влады́чице Богоро́дице, уста́ви церко́вное смуще́ние, во благостоя́нии же учини́ во ве́ки веко́в, и еретико́в уста́ загради́, возлюби́вших о́гнь негаси́мый, от него́же изба́ви на́с, рабо́в Твои́х, и послужи́ти небла́зненно сподо́би И́же под ле́том бы́вшу и от Отца́ безле́тно возсия́вшу, Богома́ти: Того́ бо на́м родила́ еси́.

Пе́снь 5.

Ирмо́с: У́тренюет ду́х мо́й к Тебе́, Бо́же, зане́ све́т повеле́ния прише́ствия Твоего́: и́миже у́бо озари́ у́м на́ш, Влады́ко, и наста́ви на стезю́ жи́зни.

Честно́е Воскресе́ние и Гро́б Живоно́сный и́скренно узре́л еси́ во Иерусали́ме, две́рем церко́вным о себе́ тебе́ отве́рзшимся манове́нием Свята́го Ду́ха, и сподо́бился еси́ боговиде́ния почерпсти́, святи́телю Иоа́нне, искуси́теля же вся́чески победи́л еси́. И ны́не моли́ся Христу́ Бо́гу, е́же победи́ти вся́ иноплеме́нныя и неве́рныя правосла́вному наро́ду на́шему.

Вели́каго Нова́града насто́льник и архиепи́скоп бы́л еси́ и в Дому́ Прему́дрости Бо́жия, я́ко фи́никс, процве́л еси́, словесы́ благопло́дными и непоро́чным житие́м наслажда́я сердца́, прему́дре и богодухнове́нне. И мы́ у́бо, ча́да твоя́, мо́лим тя́, блаже́нне, да моли́твами твои́ми ми́лость получи́м от Спа́са Христа́, и я́ко на чадолюби́ва отца́ наде́емся.

Бо́жия Це́рковь жива́ и одушевле́на бы́сть, святи́телю вели́кий Иоа́нне, в Це́ркви Бо́жией простира́лся во дни́ и в нощи́, прему́дре, к Прему́дрости Бо́жии прилежа́: служи́тель бо и собесе́дник Бо́жий я́вственнейший бы́л еси́, и Вели́каго Нова́града похвала́, и всея́ Росси́йския земли́ удобре́ние, правосла́вным лю́дем моли́твами твои́ми здра́вие да́руй и на пога́ныя побе́ды и одоле́ния.

Богоро́дичен: Це́рковь Тя́ Бо́жию, и пала́ту одушевле́нну, и ру́чку, в не́йже ма́нна, и же́зл прозя́бший, и го́ру несеко́мую, и вся́ я́же о Тебе́ сбы́вшаяся проро́чества, Богоро́дице, служи́тель Тво́й, вели́кий святи́тель Иоа́нн славосло́вляше, и мо́лим Тя́, еди́ну челове́ческаго ро́да отъе́мшую поноше́ние.

Пе́снь 6.

Ирмо́с: К могу́щему мя́ спасти́ Го́споду из глубины́ грехо́вныя возопи́х, и от тли́ возведе́ живо́т мо́й, я́ко Человеколю́бец.

К могу́щему Бо́гу ру́це простира́я иногда́, и спасе́ние обре́л еси́, вода́м же послужи́вшим тебе́ чрез естество́ Бо́жиим повеле́нием, искуси́тель же посрами́ся, и возрыда́, и до конца́ поги́бе твои́ми моли́твами, Иоа́нне святи́телю.

Бо́гу тя́ просла́вльшу, я́коже дре́вле Моисе́я, прему́дре Иоа́нне, предста́ви бо тя́ па́стыря и вожда́, мо́ре жите́йское преводя́ща небла́зненно лю́ди, и́хже Христо́с искупи́ Свое́ю Кро́вию.

Самоде́ржца ума́ страсте́й сотвори́в, я́ве ца́рствовал еси́, я́ко изря́дный победи́тель, и ра́тных де́рзость покори́л еси́ моле́нием к Бо́гу и к Пречи́стей Богома́тери. Ны́не же спосо́бствуй ве́рным твои́м на проти́вныя, Иоа́нне, вели́кий святи́телю.

Богоро́дичен: Кре́пость ве́рным, и стена́, и утвержде́ние Ты́ еси́, Пречи́стая, даде́ся от пра́ведных Иоаки́ма и А́нны; и по Гаврии́лову благове́щению Бо́г роди́ся из Тебе́. Тобо́ю, Пречи́стая, все́м истека́ют лу́чшая и на земли́ живу́щий к Небеси́ восхо́дят.

Конда́к, гла́с 4.

Возвесели́ся явле́нно честна́я Це́рковь Христо́ва в па́мять дне́сь приснослову́щаго святи́теля Иоа́нна, от Вели́каго Нова́града возсия́вшаго, и всю́ страну́ удиви́вшаго пресла́вными чудодея́нии, и все́ми доброде́тельми украси́вшагося. И по преставле́нии бо честно́е те́ло его́ обре́теся нетле́нно, источа́ющее ве́лия чудеса́. Те́мже зове́м ему́: о всеблаже́нне! Моли́ Христа́ Бо́га непреста́нно о все́х на́с.

И́кос:

Пра́зднуем све́тло дне́сь, к це́ркви теку́ще, ве́сь свяще́нный собо́р, и мона́си, и мно́жество наро́да, и все́ христоимени́тое ста́до, в па́мять отца́ на́шего святи́теля Иоа́нна. Прославля́ем бо просла́вленнаго от Бо́га, его́же житию́ А́нгели удиви́шася, и ненака́занным в наказа́ние бы́сть, и огражде́ние помышле́нием челове́ческим, и Це́ркви основа́ние, непа́дающий бо сто́лп Прему́дрости Бо́жия, и Вели́каго Нова́града стена́ и утвержде́ние, и всея́ Росси́йския земли́ удобре́ние, и вселе́нную удиви́вшаго пресла́вными чудодея́нии, и все́ми доброде́тельми украси́вшагося. Те́мже по достоя́нию блажи́м его́, мо́лит бо Христа́ о все́х на́с.

Пе́снь 7.

Ирмо́с: Халде́йския пе́щи всепа́губную си́лу угаси́вше о́бразом А́нгела снизше́дшаго, Зижди́телю ю́ноши взыва́ху: благослове́н еси́ и хва́льный, Бо́же оте́ц на́ших.

Изнемо́гше иногда́ лю́дие, ору́жия проти́вных ви́дяще; ты́ же тогда́, Иоа́нне блаже́нне, я́рость на гре́х вооружи́л еси́, на моли́тву обрати́вся к ми́лостивому Бо́гу, и услы́шана бы́сть моли́тва твоя́, и лю́ди научи́л еси́ взыва́ти: благослове́н Бо́г отце́в на́ших.

Не се́ни у́бо послужи́л еси́, но но́вей благода́ти и и́стине, зако́н бо богопи́сан вну́трь скрижа́ли се́рдца твоего́ от Бо́га прие́м, святи́телю Иоа́нне пребога́те. Те́мже зако́н на́м Полага́ющему научи́л еси́ взыва́ти: благослове́н Бо́г отце́в на́ших.

Богоро́дичен: Во све́те Госпо́дни ходя́ще, прииди́те, воспои́м Боже́ственную две́рь Царя́ ца́рствующим, Мари́ю, Чи́стую Богоро́дицу, я́ко вои́стину наде́жду ду́ш на́ших, зову́щим: благослове́н Бо́г отце́в на́ших.

Пе́снь 8.

Ирмо́с: На горе́ святе́й просла́вльшася и в купине́ огне́м Присноде́вы Моисе́ови та́йну я́вльшаго Го́спода по́йте и превозноси́те во вся́ ве́ки.

С Небе́сными чи́нми водворя́яся во дво́рех Госпо́дних, во гра́де Жива́го Бо́га, святи́телю Иоа́нне равноа́нгельный, всено́щными стоя́нии вопи́л еси́ во бде́ниих: хвали́те и превозноси́те Его́ во ве́ки.

Дне́сь све́тло пра́зднует Вели́кий Но́вград па́мять твою́, красу́ется житие́м твои́м преди́вным, Иоа́нне святи́телю. Не помяни́ согреше́ний ча́д твои́х, о́тче, но, я́ко чадолюби́вый оте́ц, на ми́лость обрати́ся, моля́ ми́лостиваго Бо́га, Ему́же пое́м: хвали́те и превозноси́те Его́ во ве́ки.

Хра́м свяще́нная душа́ твоя́ показа́ся Бо́жий, в не́йже Оте́ц и Сы́н и Святы́й Ду́х па́че естества́ всели́ся, ты́ же, святи́телю, пога́ных нахожде́ния отжени́ от достоя́ния твоего́, правосла́вным лю́дем ми́р и здра́вие да́руй, зову́щим: хвали́те, по́йте и превозноси́те Его́ во ве́ки.

Богоро́дичен: Пои́стине вели́ким да́ром от Бо́га почте́н бы́в, святи́телю Иоа́нне, я́ко сподо́бился еси́ послужи́ти чудеси́ Святы́я Богоро́дицы, преди́вному Ея́ зна́мению. Моли́тва бо твоя́ поспешеству́ема к Бо́гу и к Пречи́стей Его́ Богома́тере: пои́стине бо моли́тва пра́веднаго поспешеству́ема.

Пе́снь 9.

Ирмо́с: Ужасе́ся о се́м Не́бо, и земли́ удиви́шася концы́, я́ко Бо́г яви́ся челове́ком пло́тски и чре́во Твое́ бы́сть простра́ннейшее Небе́с. Те́м Тя́, Богоро́дицу, А́нгелов и челове́к чинонача́лия велича́ют.

Удиви́л еси́ челове́ки в животе́ твое́м, преди́вный Иоа́нне, и по преставле́нии твое́м к Бо́гу вы́ше обы́чая вся́ чудеса́ соверши́шася в тебе́, Христу́ тя́ та́ко просла́вльшу, я́ко и́стинна служи́теля Своего́. Мы́ же тя́, я́ко кре́пка, свя́те, помо́щника во бране́х, ублажа́ем.

Ми́р Це́рквам пода́ждь, святи́телю, твои́ми моли́твами и хору́гви правосла́вной по́мощь на враги́ вся́ проти́вныя и ро́г Росси́йския земли́ возвы́си, блаже́нне, предстоя́ Престо́лу Святы́я Тро́ицы. И от на́с неотсту́пен бу́ди, неотсту́пный к Бо́гу моли́твенниче, те́мже тя́ ублажа́ем.

Ма́лое сие́ и смире́нное хвале́ние приими́, святи́телю, от недосто́йных усте́н, и ме́рзкаго моего́ язы́ка, и от се́рдца нечи́ста: ты́ бо, вели́кий святи́телю Иоа́нне, преочище́нный душе́ю и те́лом, па́че со́лнечных лу́ч облиста́л еси́, Бо́жия за́поведи соверши́в, и к Све́ту Невече́рнему преста́вился еси́. Ве́рно тя́ чту́щим моли́ся пода́ти оставле́ние грехо́в, Иоа́нне блаже́нне.

Богоро́дичен: Свята́я Блаже́нная Ма́ти Бо́жия, пою́щия Тя́ любо́вию спаси́, искуше́ний молву́ разоря́ющи ми́лостивно: я́ко Бо́га ро́ждши, вся́, ели́ка хо́щеши, твори́ти мо́жеши, Де́во, те́мже Тя́ велича́ем.

Свети́лен:

От Све́та Трисия́ннаго гла́с услы́шал еси́ Боже́ственный, святи́телю Иоа́нне, и Тро́ицу просла́вил еси́ во Еди́нице и Еди́ницу в Тро́ице, и лю́ди та́кожде научи́л еси́, и просвети́л еси́ мирски́я концы́ твои́м уче́нием. Те́мже тя́ досто́йно почита́ем, творя́ще честну́ю па́мять твою́.