Акафистник

Помочь сайту
·
·
·
·

Канон святой мученице Гликерии Новгородской, деве

Память: 26 (13) мая

Глас 8.

Припев: Свята́я му́ченице Глике́рие, моли́ Бо́га о на́с.

Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Го́рести мя́ изба́ви страсте́й твои́ми, Глике́рие, к Бо́гу моли́твами, я́ко да твою́ па́мять воспою́ и до́блия сла́влю по́двиги твоя́.

Уязви́вшися любо́вию Христо́вою, кре́стным всеору́жием победи́ла еси́ врага́ и побе́ды прия́ла еси́ вене́ц, о Глике́рие, де́во прехва́льная!

Ка́мению приноша́ющии че́сть тя́ ка́мением побива́ют, взира́ющую от души́ к живо́му Ка́меню — Влады́це, тебе́ дарова́вшему побе́ду, богоневе́сто.

Богоро́дичен: Вои́стинну ро́ждши естество́м Бо́га, и́стинно слы́шишися Богоро́дица, вои́стинну именова́ние по коему́ждо Боже́ственным рождество́м, Чи́стая, нося́щи.

Пе́снь 3.

Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Не щи́т, ни копие́, но кре́стную побе́ду ве́рою несумне́нною прие́мши, усе́рдно возшла́ еси́ к боре́нием и до́блим подвиго́м к мироде́ржца ко́знем.

Тя́, Женише́, жела́ющи, не ужаса́юся сме́рти, Твои́ми добро́тами наслажда́ема, го́ресть отлага́ю, ра́дующися, му́ку и лю́тая томле́ния, — Глике́рия, стра́ждущи, и́стинно взыва́ше.

За власы́ пове́шена и желе́зными ноготьми́ стру́жема, те́лом боле́зни терпя́ше, наслажде́ние неболе́зненное и Жениха́ добро́ту прозря́щи всечестна́я ума́ чистото́ю.

Богоро́дичен: Умерщвле́на мя́ дре́вле к животу́, Пречи́стая, па́ки возвела́ еси́ еди́на, Ипоста́сную Жи́знь ро́ждшая, Е́йже прирази́вшися, разсе́деся я́ве сме́рть вражде́бная.

Седа́лен, гла́с 4.

Оде́ждами све́тло укра́шена свяще́нных и чу́дных по́двиг твои́х, я́коже неве́ста, де́во Христо́ва, к нетле́нному Сего́ возшла́ еси́ черто́гу и красоты́ Его́ наслажда́ешися. Но моли́ спасти́ся на́м от вся́кия ну́жды, любо́вию пою́щим тя́.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Блаже́нную стра́сть Твою́ му́ченица богому́драя изобража́ющи, претерпева́ет пове́шение и я́зв боле́зни, Всеси́льне.

Ка́плями крове́й твои́х о́гнь угасе́ су́етства, потопле́ни же бы́ша пото́цы многобо́жия, всеблаже́нная!

Зауше́нием лани́т твои́х ли́ца де́монов, му́ченице, зауши́ла еси́, сокруше́ние же лица́ твоего́, я́ко пра́х, пре́лести истни́.

Те́ло ураня́ющии твое́, ревнова́вшей житию́ безпло́тну, па́дше, уморе́ни бы́ша безпло́тных боже́ственными манове́нии.

Богоро́дичен: Страсте́й мои́х смуще́ние, ко́рмчию ро́ждшая Го́спода, и бу́рю утиши́ мои́х прегреше́ний, Богоневе́стная.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя́, и к све́ту за́поведей Твои́х пути́ моя́ напра́ви, молю́ся.

Добро́тами услажда́ема, добротвори́теля Иису́са красото́ю, в благово́ние ми́ра Того́ востекла́ еси́ страда́ньми, опаля́ема жела́нием, разжига́ема любо́вию Того́, Глике́рие, све́тлостию.

От исто́чник спасе́ния поче́рпши присноживо́тно исцеле́ние, распали́лася еси́ жа́ждею муче́ния и, ускори́вши, потекла́ еси́, и, пи́вши, ста́ла еси́, упоко́ившися жела́нием любве́ кра́йния, богоневе́сто.

Небе́сною пи́щею тя́, му́ченице, в темни́це пита́ют а́нгели: пи́щи бо ми́ра и живы́х жи́зни возжела́ла еси́, е́йже предста́ вои́стинну в ря́снах, укра́шена я́звами твоего́ страда́ния.

Богоро́дичен: Ма́тернее дерзнове́ние, е́же к Сы́ну Твоему́, иму́щи, Всечи́стая, сро́днаго промышле́ния, е́же о на́с, не пре́зри, мо́лимся, я́ко Тебе́ и еди́ну христиа́не ко Влады́це очище́ние ми́лостивно предлага́ем.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Я́ко со́лнце, от за́пад му́ченица возсия́вши, просвеща́ет ве́рных сердца́ благода́тию и попаля́ет полки́ мра́чных бесо́в заря́ми страда́ния.

Кре́стными заря́ми освеща́ема, неразу́мия тмы́ отбежа́ла еси́, сердца́ же ве́рою вопию́щих, Глике́рие страстоте́рпице, просвети́ла еси́.

Ко́жных ри́з тле́ния совлече́ся му́ченица сла́вная, копие́м убие́на в лице́ и главу́ суровство́м му́чащаго, Тебе́, Христе́, даю́щему кре́пость, пою́щи благода́рно.

Богоро́дичен: Но́во нося́щи Отроча́, пре́жде ве́к Бо́га, Всенепоро́чная, из Тебе́ вопло́щшася, не преста́й моля́щи спасти́ пою́щия Тя́.

Конда́к, гла́с 3.

Де́ву лю́бящи Богоро́дицу Мари́ю, соблюла́ еси́ нетле́нно твое́ де́вство, любо́вию же ко Го́споду усе́рдствовавши, пострада́ла еси́ мужему́дренно да́же до сме́рти. Сего́ ра́ди и сугу́бым тя́, де́во му́ченице, венце́м венча́ет Христо́с Бо́г.

Пе́снь 7.

Ирмо́с: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Пучи́ну невре́дно преплыла́ еси́ страда́ния и волну́ боле́зней премину́ла еси́ небу́рно, во приста́нища дости́гла еси́ ти́хая, боже́ственными прохлажде́ньми благопреплы́вши, пою́щи: оте́ц на́ших Бо́же, благослове́н еси́.

Па́влова гоне́ния, богому́драя, изобража́ющи повеле́нием мучи́тельским, от гра́да во гра́д прихо́диши ча́сто, подвиза́ющися проти́ву нача́л тмы́, и вы́шний гра́д дости́гла еси́, пою́щи: оте́ц на́ших Бо́же, благослове́н еси́.

В пе́щь вве́ржена бы́вши, не опали́ся, и́бо на ро́су преложи́ о́гнь ю́ноши три́ в Вавило́не Спасы́й, пресла́вная.

Богоро́дичен: Я́ко одушевле́н ковче́г, прия́ла еси́ Сло́во Безнача́льное, я́ко свя́т Хра́м, Зижди́теля вмести́ла еси́, я́ко престо́л огнезра́чен, но́сиши Влады́ку, Богома́ти, всея́ тва́ри.

Пе́снь 8.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Насади́теля тва́ри ты́ многопло́ден виногра́д яви́лася еси́, Глике́рие, вои́стинну, нося́щи страда́ния гро́здия, изгнете́ны, му́ченице, точи́лы му́ченическими, и умиле́ния вино́ пролива́ющи, ве́рою Христу́ пою́щим: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

По́стланым, сла́вная, о́стрым ка́мением терпе́ла еси́ порева́ния неукло́нным умо́м, уловля́еши же блюсти́теля, и, связа́вши боже́ственными плени́цами и́дольския разре́шшася льсти́, и му́ченика приво́диши сло́вом пра́ведно пе́ти: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Я́коже Дании́л загради́ звере́й уста́ боже́ственными пе́сньми, моли́тв твои́х, всечестна́я, о́гнь угаси́ла еси́, беззако́ннующих обличи́вши, те́лом ме́ртвенным безсме́ртие стяжа́ла еси́, а́нгелом уподо́бившися, с ни́миже пое́ши: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Богоро́дичен: Глаго́лом Твои́м после́дующе, ублажа́ем, Пречи́стая, Тя́, Блаже́нную, пло́тию ро́ждшую вои́стинну Блаже́ннаго, во све́те живу́щаго незаходи́мем, и Светода́теля, и Жизнода́вца, и Влады́ку. Его́же о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Пе́снь 9.

Ирмо́с: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

У́м тво́й, зре́нием к Бо́гу услажда́емь, соблюда́ла еси́ себе́ безболе́зненно, твое́ многострада́льное те́ло, де́во, егда́ пред суди́щем уязвля́ема мучи́телей, страда́ла еси́ тве́рдо, побежда́ющи безтеле́сныя враги́ с те́лом.

Обручи́лася еси́, нетле́нная де́во, Рожде́нному от Де́вы Богоотрокови́цы и принесла́ еси́ я́ко да́р Сему́, му́ченице, страда́ние многови́дными ра́нами, непра́ведную сме́рть. Те́мже черто́га тя́ небе́снаго вои́стинну сподо́би.

Иму́щи криле́ зла́ты, сия́ющия заре́ю Ду́ха, му́ченице, возлете́ла еси́, цве́ты укра́шена, боже́ственными светлостьми́, и в са́мых небе́сных боже́ственных жили́щах вои́стинну почи́ла еси́, наслажда́ющися я́сно обоже́ния.

Лику́еши ны́не ра́достно со а́нгелы, пред лице́м Зижди́теля твоего́, уясня́ема заря́ми, отту́ду истека́ющими всегда́, но помина́й на́с, ве́рою соверша́ющих твою́ па́мять сла́вную, Глике́рие, страстоте́рпице прехва́льная.

Богоро́дичен: Селе́ние была́ еси́ Бо́жие, Невмести́маго в ложесна́ вме́щши, пре́жде Безпло́тнаго, воплоще́нна ужа́сно ро́ждши. Его́же моли́, Чи́стая, согреше́ний проще́ние все́м дарова́ти, ве́рою Тя́ всегда́ велича́ющим.

Yandex Metrika