<?xml version="1.0" encoding="UTF-8" ?> <csml Language="CsmlCivil"> <Section Type="song"> <p Style="h4">Пѣ́снь а҃. </p> <Section Style="Span" Type="irmos"> <p>І҆рмо́съ: </p> <p>Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть, препросла́вленный гдⷭ҇ь, сла́внѡ бо просла́висѧ.</p> </Section> <p Style="p">Высоко̀ житїѐ и҆мѣ́ѧ, и҆ восхождє́нїи бжⷭ҇твенными ве́сь свѣ́телъ бы́въ, просвѣще́нїе мѝ и҆спросѝ, восхвалѧ́ющꙋ честны̑ѧ твоѧ̑ по́двиги, и҆́миже до́брѣ пожи́въ, ᲂу҆лꙋчи́лъ є҆сѝ, все́володе, и҆́хже надѣ́ѧлсѧ є҆сѝ.</p> <p Style="p">Мѷроꙋха̑ннаѧ любѧ̀ ᲂу҆чє́нїѧ, и҆ во чте́нїи свѧще́нныхъ писа́нїй ᲂу҆пражнѧ́ѧсѧ, сласте́й ᲂу҆клони́лсѧ є҆сѝ, блаже́нне, смра́дныхъ и҆ безче́стныхъ, и҆ ѡ҆благово́нилсѧ є҆сѝ, бж҃е́ственными добро́тами ᲂу҆краша́емь.</p> <p Style="p">Дрема́нїе ѻ҆́чїю ѿ дꙋшѝ, блаже́нне, ѿгна́лъ є҆сѝ, бдѧ̀ и҆ бг҃ови прїединева́ѧсѧ всено́щными стоѧ̑нїи, непрекло́ненъ нꙋ́ждами є҆стества̀: тѣ́мже ко дню̀ невече́рнемꙋ дости́глъ є҆сѝ.</p> <Section Style="Span" Type="tropar"> <p>Бг҃оро́диченъ: </p> <p>Ꙗ҆́кѡ черто́гъ ѡ҆дꙋшевле́нъ бж҃їй, и҆ кади́льницꙋ мы́сленнагѡ и҆ свѣтоно́снагѡ ᲂу҆́глѧ, приснобл҃года́тнꙋю ᲂу҆блажа́емъ бцⷣꙋ, зовꙋ́ще: ра́дꙋйсѧ, хода́таице спаси́тельнагѡ воскр҃се́нїѧ.</p> </Section> </Section> <Section Type="song"> <p Style="h4">И҆́нъ. гла́съ д҃.</p> <Section Style="Span" Type="irmos"> <p>І҆рмо́съ: </p> <p>Нѣ́сть тебѣ̀ подо́бенъ, препросла́вленный гдⷭ҇и: рꙋко́ю бо крѣ́пкою и҆зба́вилъ є҆сѝ лю́ди, ꙗ҆̀же стѧжа́лъ є҆сѝ, чл҃вѣколю́бче.</p> </Section> <p Style="p">Нѣ́смь подо́бенъ ка́кѡ воспѣ́ти ѿ ча́сти, нбⷭ҇номꙋ воево́дѣ тезоимени́таго вели́каго кнѧ́зѧ все́волода, возсїѧ́вша въ словѧ́нѣхъ насе́льшихсѧ, и҆дѣ́же первозва́нный во а҆пⷭ҇лѣхъ же́злъ водрꙋзѝ.</p> <p Style="p">Въ лѣ̑та вели́кагѡ кн҃зѧ влади́мїра, ца́рскою дїади́мою ѿ монома́ха че́стнѡ почте́нъ возсїѧ́въ, пе́рвомꙋ же вели́комꙋ влади́мїрꙋ подража́въ, ꙗ҆́кѡ ѿ ко́рене и҆́хъ честна̀ вѣ́твь и҆зра́слъ є҆сѝ.</p> <p Style="p">Цр҃ѧ̀ нбⷭ҇нагѡ, сла́вима въ трⷪ҇цѣ, и҆зъ мла́да ꙗ҆ви́лсѧ є҆сѝ сосꙋ́дъ чи́стъ и҆ непоро́ченъ: є҆мꙋ́же ны́нѣ предстоѧ̀ дерзнове́ннѡ, ѡ҆ на́съ помоли́сѧ, блаже́нне кнѧ́же гаврїи́ле.</p> <Section Style="Span" Type="tropar"> <p>Бг҃оро́диченъ: </p> <p>Чтⷭ҇ꙋю тѧ̀ и҆ непоро́чнꙋю а҆рха́гг҃лъ гаврїи́лъ ꙗ҆́кѡ ᲂу҆зрѣ̀, ра́дꙋйсѧ, тебѣ̀, влⷣчце, свѣ́тлѡ возопѝ, неискꙋсобра́чнаѧ, человѣ́кѡмъ спасе́нїе, кнѧзє́мъ и҆ царє́мъ похвала̀ и҆ честносло́вїе.</p> </Section> </Section> <Section Type="song"> <p Style="h4">Пѣ́снь г҃. </p> <Section Style="Span" Type="irmos"> <p>І҆рмо́съ: </p> <p>На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́ бо сѧ дꙋ́хъ мо́й, внегда̀ пѣ́ти: нѣ́сть свѧ́тъ, ꙗ҆́коже бг҃ъ на́шъ, и҆ нѣ́сть пра́веденъ па́че тебє̀, гдⷭ҇и.</p> </Section> <p Style="p">Глаго́лѡмъ животѡ́чнымъ внима́ѧ, и҆спи́лъ є҆сѝ во́дꙋ спасе́нїѧ, возгнꙋша́всѧ го́рькагѡ грѣха̀, и҆ поѧ̀ глаго́лалъ є҆сѝ бг҃ови, все́володе: ꙗ҆́кѡ нѣ́сть ст҃а па́че тебє̀, гдⷭ҇и.</p> <p Style="p">Ми́лованїе стѧжа́лъ є҆сѝ хрⷭ҇топодража́тельнѡ, разда́лъ є҆сѝ бога́тство тре́бꙋющымъ, нбⷭ҇ное бога́тство хода́тайствꙋющее тебѣ̀, є҆́же и҆ полꙋчи́лъ є҆сѝ, поѧ̀, все́володе: ꙗ҆́кѡ нѣ́сть свѧ́та па́че тебє̀, гдⷭ҇и.</p> <p Style="p">Присво́ивсѧ зижди́телю, любо́вїю бжⷭ҇твенною прїѧ́тъ нбⷭ҇ное наслѣ́дїе, и҆ дре́ва живо́тнагѡ прича́стникъ бы́лъ є҆сѝ, ѻ҆бще́нїемъ ѡ҆божа́емь, и҆ поѧ̀, сла́вне: ꙗ҆́кѡ нѣ́сть ст҃а па́че тебє̀, гдⷭ҇и.</p> <Section Style="Span" Type="tropar"> <p>Бг҃оро́диченъ: </p> <p>Сꙋ́щи а҆́гг҃лъ честнѣ́йши, зижди́телѧ а҆́гг҃лѡвъ во ᲂу҆тро́бѣ носи́ла є҆сѝ, и҆ родила̀ є҆сѝ неизрече́ннѡ. є҆мꙋ́же всѝ пое́мъ: ты̀ є҆сѝ бг҃ъ на́шъ, нѣ́сть ст҃а па́че тебє̀, гдⷭ҇и.</p> </Section> </Section> <Section Type="song"> <p Style="h4">И҆́нъ. </p> <Section Style="Span" Type="irmos"> <p>І҆рмо́съ: </p> <p>Не мꙋ́дростїю, и҆ си́лою, и҆ бога́тствомъ хва́лимсѧ, но тобо́ю, ѻ҆́ч҃ею ѵ҆поста́сною мꙋ́дростїю, хрⷭ҇тѐ: нѣ́сть бо ст҃ъ па́че тебє̀, чл҃вѣколю́бче.</p> </Section> <p Style="p">Сла́внагѡ стрⷭ҇тоте́рпца геѡ́ргїа хра́мъ и҆ ѻ҆би́тель прече́стнꙋ со блаже́ннымъ кѷрїа́комъ воздви́глъ є҆сѝ, и҆ въ не́й мно́жество и҆́нѡкъ ѡ҆ тебѣ̀, бг҃омꙋ́дре, хва́лѧтсѧ, и҆ мольбꙋ̀ бг҃ови прино́сѧтъ.</p> <p Style="p">Бори́са цѣломꙋ́драго прароди́телѧ своего̀ поревнова́въ, зако́нное сочета́нїе, ꙗ҆́коже вели́кїй мѡѷсе́й и҆ и҆са́їа и҆мѣ́ста, бг҃овидѣ́нїѧ сподо́бистасѧ, терпѣ́нїемъ до конца̀ блаже́нство и҆ бж҃їе бл҃гослове́нїе полꙋчи́ша.</p> <p Style="p">Всеѧ̀ рѡссі́и вели́каѧ кнѧги́нѧ бг҃омꙋ́драѧ ѻ҆́льга, ви́дѣ трисо́лнєчныѧ лꙋчы̀ сїѧ́ющѧ на ᲂу҆́сть пле́сковы, назна́менꙋѧ гра́дъ и҆ хра́мъ прест҃ы́ѧ трⷪ҇цы, въ не́мъ бо и҆ ты̀, досточꙋ́дне, чꙋдеса̀ содѣ́ѧ, съ не́юже ѡ҆ на́съ моли́сѧ.</p> <Section Style="Span" Type="tropar"> <p></p> <p></p> </Section> <p Style="p">Сказꙋ́ѧ є҆́же дре́вле сокрове́нное та́инство, ѻ҆трокови́це, тебѣ̀ и҆ногда̀ гаврїи́лъ взыва́ѧ: ра́дꙋйсѧ, бж҃їѧ пала́то, въ ню́же всели́всѧ, всѧ̑ человѣ́ки ѡ҆божи́лъ є҆́сть, ꙗ҆́кѡ милосе́рдъ.</p> </Section> <Section Type="sedalen"> <p Style="h4">Сѣда́ленъ, гла́съ д҃:</p> <p Style="p">Бл҃говоли́въ бл҃ги́ми дѣѧ̑нїи, и҆скꙋси́лсѧ є҆сѝ ꙗ҆́кѡ зла́то въ пещѝ напа́стьми, все́володе сла́вне: тѣ́мже и҆ по сме́рти и҆сточа́еши бога́тнѡ чꙋдеса̀ ꙗ҆́кѡ во́ды, и҆ недꙋ́ги и҆сцѣлѧ́еши ѡ҆ на́съ при́снѡ молѧ́сѧ, ꙗ҆́кѡ да согрѣше́нїй проще́нїе прїи́мемъ.</p> <p Style="h4">И҆́нъ сѣда́ленъ, гла́съ г҃. </p> <p Style="p">И҆мꙋ́щи дх҃ъ и҆́стинный, премꙋ́дре, и҆́же въ тебѣ̀ пожи́лъ є҆́сть, сосꙋ́дъ и҆ жили́ще прест҃ѣ́й трⷪ҇цѣ содѣ́ла, стро́ити и҆ соблюда́ти це́рквамъ бл҃голѣ́пїе и҆ ᲂу҆твержде́нїе. сегѡ̀ ра́ди и҆ мы̀, соше́дшесѧ, въ па́мѧть твою̀, бг҃омꙋ́дре кнѧ́же гаврїи́ле, мо́лимъ тѧ̀: хрⷭ҇то́ви моли́сѧ дарова́ти на́мъ ве́лїю ми́лость.</p> <Section Style="Span" Type="tropar"> <p>Бг҃оро́диченъ: </p> <p>Красотѣ̀ дѣ́вства твоегѡ̀, и҆ пресвѣ́тлой чистотѣ̀ твое́й гаврїи́лъ ᲂу҆диви́всѧ, вопїѧ́ше тѝ, бцⷣе: кꙋ́ю тѝ похвалꙋ̀ принесꙋ̀ досто́йнꙋю; что́ же воз̾именꙋ́ю тѧ̀; недоꙋмѣва́ю и҆ ᲂу҆жаса́юсѧ. тѣ́мже ꙗ҆́кѡ повелѣ́нъ бы́хъ, вопїю́ ти: ра́дꙋйсѧ, бл҃года́тнаѧ.</p> </Section> </Section> <Section Type="song"> <p Style="h4">Пѣ́снь д҃. </p> <Section Style="Span" Type="irmos"> <p>І҆рмо́съ: </p> <p>Прише́лъ є҆сѝ ѿ дв҃ы не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.</p> </Section> <p Style="p">Оу҆чє́нїѧ ѻ҆те́чєскаѧ хранѧ̀ невреди́мѡ, правосла́вно мꙋдрова́нїе ты̀ ѿ младе́нства и҆мѣ́лъ є҆сѝ, житїѐ нескве́рно, и҆ ми́лостивенъ нра́въ, досточꙋ́дне.</p> <p Style="p">Ни молва̀ мїрска́ѧ, ни вла́сти держа́нїе, ни сла́ва тлѣ́ннаѧ, твоѐ є҆́же къ бг҃ꙋ жела́нїе ᲂу҆ста́виша, все́володе: но бл҃говоли́лъ є҆сѝ вои́стиннꙋ бжⷭ҇твенными дѣѧ̑нїи.</p> <p Style="p">Возвыша́емь бжⷭ҇твенными поꙋчє́нїи всегда̀, врага̀ смири́лъ є҆сѝ, и҆ и҆сцѣле́нїй дѣ́йство прїѧ́тъ, все́володе, сꙋдо́мъ пра́веднымъ всѧ̑ ᲂу҆правлѧ́ющагѡ.</p> <p Style="p">И҆ска́пающи сла́дость ра́ка моще́й твои́хъ бога́тыхъ и҆сцѣле́нїй, стра̑сти ѿгонѧ́етъ, все́володе, вѣ́рою чтꙋ́щихъ тѧ̀, и҆ попалѧ́етъ бѣсѡ́въ всѧ̑ полкѝ.</p> <Section Style="Span" Type="tropar"> <p>Бг҃оро́диченъ: </p> <p>Всепѣ́таѧ, во́инствы го́рними пѣва́емаго бг҃а породила̀ є҆сѝ, чл҃вѣ́ка вои́стиннꙋ бы́вша: є҆го́же ѡ҆ рабѣ́хъ твои́хъ молѧ́щи не преста́й, приснодв҃о.</p> </Section> </Section> <Section Type="song"> <p Style="h4">И҆́нъ. </p> <Section Style="Span" Type="irmos"> <p>І҆рмо́съ: </p> <p>Неизслѣ́дный бж҃їй совѣ́тъ, є҆́же ѿ дв҃ы, воплоще́нїѧ тебє̀ вы́шнѧгѡ, прⷪ҇ро́къ а҆ввакꙋ́мъ ᲂу҆смотрѧ́ѧ, зовѧ́ше: сла́ва си́лѣ твое́й, гдⷭ҇и. </p> </Section> <p Style="p">По благослове́нїю а҆рхїере́а, со ѻ҆тце́мъ свои́мъ, бг҃омꙋ́дре, подви́гшесѧ, мно́гъ трꙋ́дъ показа́ша, вели́кїй но́въградъ многомꙋ́дреннѡ содѣ́ласта, на ᲂу҆твержде́нїе вѣ́рою зовꙋ́щымъ: сла́ва си́лѣ твое́й, гдⷭ҇и.</p> <p Style="p">Є҆пі́скопа вели́кагѡ нова́града сщ҃е́нїемъ це́рковь многочꙋ́днꙋ, вели́комꙋ і҆ѡа́ннꙋ прⷣте́чи, въ па́мѧть сы́нꙋ твоемꙋ̀, премꙋ́дре гаврїи́ле, воздви́глъ є҆сѝ, съ ни́мже поѧ̀: сла́ва си́лѣ твое́й, гдⷭ҇и.</p> <p Style="p">Генна́дїа патрїа́рха бг҃осло́вїю послѣ́довалъ є҆сѝ, бг҃омꙋ́дре гаврїи́ле, трїѷпоста́снагѡ сꙋщества̀ въ со́бствѣхъ, ѻ҆ц҃а̀ и҆ сн҃а, и҆ ст҃а́го дх҃а, во є҆ди́номъ бж҃ествѣ̀ покланѧ́ема бы́ти вѣ́ровавъ, є҆мꙋ́же съ ни́мъ поѧ̀: сла́ва си́лѣ твое́й, гдⷭ҇и.</p> <Section Style="Span" Type="tropar"> <p>Бг҃оро́диченъ: </p> <p>Всю́ тѧ дх҃омъ гаврїи́лъ ѡ҆чиствова́ннꙋ, всенепоро́чнаѧ, разꙋмѣ́въ, вопїе́тъ тѝ ꙗ҆́вственнѡ: ѽ ра́дꙋйсѧ, клѧ́твы и҆збавле́нїе, и҆ пра́ѻтцєвъ воззва́нїе.</p> </Section> </Section> <Section Type="song"> <p Style="h4">Пѣ́снь є҃. </p> <Section Style="Span" Type="irmos"> <p>І҆рмо́съ: </p> <p>Просвѣще́нїе во тьмѣ̀ лежа́щихъ, спасе́нїе ѿча́ѧнныхъ, хрⷭ҇тѐ, сп҃се мо́й, къ тебѣ̀ ᲂу҆́тренюю, цр҃ю̀ ми́ра, просвѣти́ мѧ сїѧ́нїемъ твои́мъ, и҆но́гѡ бо ра́звѣ тебє̀ бо́га не зна́ю.</p> </Section> <p Style="p">Заре́ю честно́ю ст҃ы́ѧ трⷪ҇цы просвѣще́нъ, зако́номъ же сеѧ̀ ѡ҆гражде́нъ, но́щь житїѧ̀ непреткнове́ннѡ ты̀ преминꙋ́лъ є҆сѝ, видѣ̑нїи бжⷭ҇твенными ѡ҆крилѧ́емь, бл҃же́нне, и҆ въ бжⷭ҇твеннꙋю жи́знь всели́лсѧ є҆сѝ.</p> <p Style="p">Ны́нѣ на тебѣ̀ чꙋ́до ве́лїе зри́тсѧ, и҆ ᲂу҆́жаса и҆спо́лнь: ка́кѡ по погребе́нїи вои́стиннꙋ мно́гѡ лѣ́тъ соблюде́сѧ нерꙋши́мо, бл҃же́нне, твоѐ тѣ́ло во гро́бѣ лежа́щее, сꙋдьба́ми и҆́миже вѣ́сть са́мъ прославлѧ́ѧй тѧ̀.</p> <p Style="p">Бл҃гоже твоемꙋ̀ є҆́же къ бг҃ꙋ дерзнове́нїю, бла́гоже жела́нїю, є҆́же въ се́рдцы къ немꙋ̀ и҆мѣ́лъ є҆сѝ, бла́гѡ пожи́въ, гаврїи́ле, просїѧ́лъ є҆сѝ пресла́внѡ бж҃е́ственными свѣтлостьмѝ, и҆ ᲂу҆ѧсни́лъ є҆сѝ вѣ́рныхъ совокꙋплє́нїѧ. </p> <Section Style="Span" Type="tropar"> <p>Бг҃оро́диченъ: </p> <p>Ѡ҆ на́съ и҆зъ тебє̀ воплоще́ннаго, дв҃о мт҃и, всегда̀ молѝ, бл҃гоче́стнѡ тѧ̀ блажа́щихъ, и҆зба́витисѧ бѣ́дъ, дꙋшетлѣ́нныхъ страсте́й, и҆ печа́лей, и҆ вѣ́чнꙋющагѡ пла́мене мꙋче́нїѧ.</p> </Section> </Section> <Section Type="song"> <p Style="h4">И҆́нъ. </p> <Section Style="Span" Type="irmos"> <p>І҆рмо́съ: </p> <p>Ны́нѣ воста́нꙋ, проро́чески речѐ бг҃ъ, ны́нѣ просла́влюсѧ, ны́нѣ вознесꙋ́сѧ, па́дшаго прїе́мъ ѿ дв҃ы, и҆ къ свѣ́тꙋ ᲂу҆́мномꙋ возносѧ́й моегѡ̀ бж҃ества̀.</p> </Section> <p Style="p">Пско́ва гра́да и҆ ла́дожане и҆збра́ннїи лю́дїе, при́звани новогоро́дскими мꙋ́жи, ᲂу҆мы́слившими на и҆згна́нїе твоѐ, свѧ́те, совѣ́тъ и҆́хъ разверго́ша, возврати́ша тѧ̀ ра́достїю, ми́ръ подаю́ща.</p> <p Style="p">Рꙋко́ю твое́ю честно́ю написа́въ, премꙋ́дре гаврїи́ле, твоегѡ̀ строе́нїѧ вели́кагѡ і҆ѡа́нна крⷭ҇ти́телѧ це́ркви, пребога́тое твоегѡ̀ пра́веднагѡ даѧ́нїѧ законоположе́нїе вѣ́чно, ми́ръ всѣ̑мъ да́рꙋѧ.</p> <p Style="p">Многоразсꙋ́дное вселе́нскихъ ᲂу҆чи́телей ѡ҆ цр҃кви хрⷭ҇то́вѣ разсмотри́въ, и҆ твои́хъ ст҃олѣ́пныхъ прароди́телей зако́нное завѣща́нїе, и҆ ᲂу҆ста́вы сꙋдо́мъ ѻ҆ч҃ескимъ, преда́въ цр҃ю̀ сла́вы, бг҃омꙋ́дре, а҆рхїере́ѡмъ непоколеби́мѡ соблюда́ти.</p> <Section Style="Span" Type="tropar"> <p>Бг҃оро́диченъ: </p> <p>Хра́мъ сꙋ́щи сщ҃е́нїѧ, пренепоро́чнаѧ, вѣща́нїемъ гаврїи́ла а҆рха́гг҃ла, во ст҃ы́хъ почива́ющаго родила̀ є҆сѝ прест҃а́го бг҃а, всѣ́хъ ѡ҆сщ҃а́ющаго, и҆ лю́тыхъ и҆зима́юща.</p> </Section> </Section> <Section Type="song"> <p Style="h4">Пѣ́снь ѕ҃. </p> <Section Style="Span" Type="irmos"> <p>І҆рмо́съ: </p> <p>Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.</p> </Section> <p Style="p">Точе́нїѧ сла̑дка и҆ска́пахꙋ, бл҃же́нне, по́тове твоѝ и҆ ра́дованїе, и҆ и҆сцѣле́нїй сїѧ́нїе, въ хвалꙋ̀ хрⷭ҇та̀ бг҃а на́шегѡ.</p> <p Style="p">Во дво́рѣхъ бж҃їихъ процвѣ́лъ є҆сѝ, вїногра́дъ многопло́денъ прозѧ́бшїй, добродѣ́телей гро́здїе, дѣ́лателю дꙋша́мъ ѻ҆би́лїе пода́въ.</p> <p Style="p">Ца́рства бж҃їѧ возжелѣ́лъ є҆сѝ, и҆ надъ страстьмѝ ца́рствовавъ, все́володе, по благоволе́нїю лꙋ́чшемꙋ, ра́дость пра́ведныхъ полꙋчи́лъ є҆сѝ.</p> <Section Style="Span" Type="tropar"> <p>Бг҃оро́диченъ: </p> <p>И҆збра́нна бг҃ꙋ бы́вши ꙗ҆́кѡ прекра́сна, село̀ простра́нно семꙋ̀, дв҃о, была̀ є҆сѝ, и҆ черто́гъ и҆ свѣ́щникъ и҆ трапе́за.</p> </Section> </Section> <Section Type="song"> <p Style="h4">И҆́нъ. </p> <Section Style="Span" Type="irmos"> <p>І҆рмо́съ: </p> <p>Возопи́ша съ весе́лїемъ пра́ведныхъ дꙋ́си, ны́нѣ мі́рꙋ завѣ́тъ но́вый завѣща́етсѧ, и҆ кропле́нїемъ да ѡ҆бновѧ́тсѧ лю́дїе бж҃їѧ кро́ве.</p> </Section> <p Style="p">Бꙋ́ѧгѡ наро́да де́рзость на сꙋ́ждаль, не послꙋ́шавша ст҃и́телѧ бг҃онаказа́тельныхъ слове́съ, чꙋжда́гѡ достоѧ́нїѧ не жела́ти: ты́ же, пра́ведниче, пра́вдꙋ возлюби́въ, въ ми́ръ си́хъ преложи́лъ є҆сѝ.</p> <p Style="p">Оу҆мо́мъ разсꙋди́тельнымъ ѡ҆би́дѧщыѧ достоѧ́нїе, премꙋ́дрости бж҃їѧ цр҃кве, и҆новѣ̑рныѧ ꙗ҆зы́ки побѣди́въ, и҆ во гра́дѣ ю҆́рїевѣ, прароди́телѧ твоегѡ̀, вѣ́рꙋ правосла́внꙋю па́ки предложи́лъ є҆сѝ.</p> <p Style="p">Въ человѣ́цѣхъ бг҃олюбе́зенъ, и҆ ве́лїй властоде́ржецъ, и҆ це́ркве прест҃ы́ѧ трⷪ҇цы строе́нїю спосо́бникъ, и҆ ꙗ҆́кѡ проꙋвѣ́дѣвъ въ не́й положи́тисѧ: є҆́йже предстоѧ̀, сла́вне гаврїи́ле, ѡ҆ на́съ моли́сѧ.</p> <Section Style="Span" Type="tropar"> <p></p> <p></p> </Section> <p Style="p">Глаго́лѡмъ бж҃е́ствєннымъ послꙋшли́ва гаврїи́лѡвымъ была̀ є҆сѝ, безнача́льнаго сло́ва пло́тїю породила̀ є҆сѝ, всѣ́хъ ѡ҆сщ҃а́ющаго, и҆ лю́тыхъ и҆зима́юща.</p> </Section> <Section Type="kondak"> <p Style="h4">Конда́къ, гла́съ и҃. </p> <p Style="p">Многомꙋ́дреннѡ пресели́всѧ во гра́дъ пско́въ, бл҃же́нне кнѧ́же гаврїи́ле, пло́дъ благі́й бг҃ови въ жи́зни се́й бы́лъ є҆сѝ, присноцвѣтꙋ́щь добродѣ́тельми, и҆ ꙗ҆́коже дв҃дъ, неѕло́бїемъ: тогѡ̀ ра́ди полꙋчи́лъ є҆сѝ жи́знь вѣ́чнꙋю на нб҃сѣ́хъ: всегда̀ зрѧ̀ ст҃ꙋ́ю трⷪ҇цꙋ, молѝ и҆зба́витисѧ на́мъ ѿ всѧ́кихъ бѣ́дъ, да зове́мъ тѝ: ра́дꙋйсѧ, ᲂу҆твержде́нїе гра́дꙋ на́шемꙋ.</p> </Section> <Section Type="ikos"> <p Style="h4">І҆́косъ:</p> <p Style="p">Всечестнꙋ́ю па́мѧть почти́мъ ᲂу҆го́дника хрⷭ҇то́ва вели́кагѡ кнѧ́зѧ все́волода, ѻ҆те́ческою дїади́мою ѿ ю҆́ности ᲂу҆кра́шена, хра́брагѡ во́ина на сꙋпоста́ты, и҆ вла́стелѧ благоꙋти́шна, и҆ ра́дѡстныѧ глаго́лы ѿ се́рдца воззове́мъ къ немꙋ̀ си́це вопїю́ще: ра́дꙋйсѧ, ꙗ҆́кѡ и҆зъ млады́хъ ногте́й бг҃а возлюби́въ: ра́дꙋйсѧ, ꙗ҆́кѡ за́повѣдей є҆гѡ̀ нело́жный храни́тель. ра́дꙋйсѧ, землѝ слове́нстѣй ᲂу҆краше́нїе: ра́дꙋйсѧ, церко́вный строи́телю и҆ ѡ҆богати́телю нескꙋ́дный. ра́дꙋйсѧ, це́рквамъ ᲂу҆краше́нїе, и҆ и҆́стинный побо́рниче: ра́дꙋйсѧ, нело́жный прави́телю ѻ҆те́ческихъ преда́нїй. ра́дꙋйсѧ, бл҃гоче́стїѧ сто́лпъ, непоколеби́мь вра́жїими прилѡ́ги: ра́дꙋйсѧ, ꙗ҆́кѡ во вре́мѧ вели́кагѡ гла́да, преизоби́льный ни́щымъ и҆ си̑рымъ пита́телю. ра́дꙋйсѧ, бѣ̑днымъ ᲂу҆тѣше́нїе и҆ застꙋ́пникъ: ра́дꙋйсѧ и҆ весели́сѧ, ꙗ҆́кѡ сꙋгꙋ́бꙋ мздꙋ̀ нбⷭ҇нꙋю сꙋгꙋ́ба ра́ди и҆згна́нїѧ ѿ бг҃а ѡ҆брѣ́лъ є҆сѝ. ра́дꙋйсѧ, ꙗ҆́кѡ сподо́билсѧ є҆сѝ воспрїѧ́ти сꙋгꙋ́быѧ благода́ти вѣне́цъ пресвѣ́телъ и҆ и҆сто́чникъ и҆сцѣле́нїѧ: ра́дꙋйсѧ, пресла́вный кнѧ́же гаврїи́ле, кнѧзє́мъ рѡссі̑йскимъ похвала̀: ра́дꙋйсѧ, ᲂу҆твержде́нїе гра́дꙋ на́шемꙋ.</p> </Section> <Section Type="song"> <p Style="h4">Пѣ́снь з҃. </p> <Section Style="Span" Type="irmos"> <p>І҆рмо́съ: </p> <p>Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й благослове́нъ и҆ препросла́вленъ.</p> </Section> <p Style="p">Крѣ́постїю вжили́всѧ живода́вца, пло́ти ᲂу҆держа́лъ є҆сѝ жела̑нїѧ, пребога́те, и҆ ᲂу҆́мъ впери́лъ є҆сѝ къ нбⷭ҇нымъ, поѧ̀ въ крѣ́пости: бл҃гослове́нъ бг҃ъ ѻ҆тє́цъ на́шихъ.</p> <p Style="p">Са́мъ сѧ̀ бл҃горо́денъ сотвори́лъ є҆сѝ, благорѡ́дны ѻ҆́бразы стѧжа́въ ᲂу҆ма̀ цѣ́лостїю: поꙋче́нїемъ же ᲂу҆пражнѧ́ѧсѧ бг҃одохнове́нныхъ писа́нїй, всѐ твоѐ жела́нїе на бг҃а всеви́дца, блаже́нне, возложи́лъ є҆сѝ.</p> <p Style="p">Вы́шнѧгѡ црⷭ҇тва, вы́шнѧгѡ гра́да бж҃їѧ раѧ̀, пра́ведныхъ наслажде́нїѧ, пи́щи нетлѣ́нныѧ, бога́тства некра́домагѡ, свѣ́та невече́рнѧгѡ сподо́билсѧ є҆сѝ, блаже́нне все́володе.</p> <Section Style="Span" Type="tropar"> <p>Бг҃оро́диченъ: </p> <p>Є҆го́же родила̀ є҆сѝ, влⷣчце, при́снѡ молѝ, рабо́ты и҆зба́вити мѧ̀ страсте́й, и҆ ѡ҆сꙋжде́нїѧ, и҆ ѡ҆держа́щагѡ мѧ̀ лю́тагѡ ѿча́ѧнїѧ, и҆ ѡ҆скорблѧ́ющихъ мѧ̀ ᲂу҆держа́нїѧ, чⷭ҇таѧ бг҃ора́дованнаѧ.</p> </Section> </Section> <Section Type="song"> <p Style="h4">И҆́нъ. І҆рмо́съ:</p> <p Style="p">Въ нача́лѣ безнача́льное сло́во, со ѻ҆ц҃е́мъ и҆ дх҃омъ, сн҃ъ є҆диноро́дный, бл҃гослове́нъ є҆сѝ и҆ превозноси́мый бж҃е ѻ҆тє́цъ на́шихъ.</p> <p Style="p">Въ ско́рбехъ па́ки пребыва́ѧ, бл҃же́нне гаврїи́ле, ѿ разсвирѣ́пившихсѧ мꙋже́й, совѣ́тꙋющихъ на тѧ̀ на коне́чное и҆згна́нїе, но въ крѣ́пости дꙋшѝ благода́рнѡ поѧ̀: бл҃гослове́нъ бг҃ъ ѻ҆тє́цъ на́шихъ.</p> <p Style="p">Пѣсносло́вивша тѧ̀ бг҃омꙋ́дреннѡ по хрⷭ҇то́вѣ цр҃кви, бж҃е́ствєннаѧ преда̑нїѧ и҆ ѻ҆ч҃ескїй ᲂу҆ста́въ, прїе́мъ вели́кїй но́въградъ содержи́тъ, поѧ̀: бл҃гослове́нъ бг҃ъ ѻ҆тє́цъ на́шихъ.</p> <p Style="p">Гри́внꙋ зла́тꙋ ѡ҆ твое́й вы́и носѧ̀, и҆ вѣне́цъ терпѣ́нїѧ ѿ вседержи́телѧ воспрїе́млѧ, вы́нꙋ зрѧ̀ ᲂу҆́мныма ѻ҆чи́ма, трⷪ҇чнымъ свѣ́томъ, гаврїи́ле, просвѣща́емь, въ весе́лїи поѧ̀: бл҃гослове́нъ бг҃ъ ѻ҆тє́цъ на́шихъ.</p> <Section Style="Span" Type="tropar"> <p>Бг҃оро́диченъ: </p> <p>Гаврїи́лъ а҆рхїстрати́гъ по́сланъ бы́сть, ра́дость возвѣща́етъ тѝ, дв҃о мт҃и чⷭ҇таѧ, є҆ѧ́же ра́ди печа́ль преста̀, и҆ клѧ́тва непло́ды бы́сть, бл҃гослове́нїе же вѣ̑рнымъ кнѧзє́мъ процвѣтѐ во вѣ́ки.</p> </Section> </Section> <Section Type="song"> <p Style="h4">Пѣ́снь и҃. </p> <Section Style="Span" Type="irmos"> <p>І҆рмо́съ: </p> <p>Въ пещѝ ѻ҆́трочестѣй проѡбрази́лъ є҆сѝ и҆ногда̀ твою̀ мт҃рь, гдⷭ҇и, ѻ҆́бразъ же сїѧ̑ и҆з̾ ѻ҆гнѧ̀ и҆з̾има́ше, неѡпа́льнѡ входѧ́щыѧ, ю҆́же пое́мъ ꙗ҆́вльшꙋюсѧ тобо́ю концє́мъ дне́сь, и҆ превозно́симъ во всѧ̑ вѣ́ки.</p> </Section> <p Style="p">Ѻ҆́гнь помышлѧ́ѧ стра́шный, предъ прⷭ҇то́ломъ хрⷭ҇то́вымъ хотѧ́щь пали́ти, ᲂу҆миле́нїемъ се́рдца теплы̑ и҆злива́еши ка̑пли сле́зъ, погаша́ѧ тѣ́ми пе́щь страсте́й, все́володе бг҃омꙋ́дре.</p> <p Style="p">Всѐ предложи́лъ є҆сѝ къ бг҃ꙋ, мꙋ́дре, дꙋше́вное ѻ҆́ко, и҆ томꙋ̀ прилѣпи́лсѧ є҆сѝ, вопїѧ̀ ѱало́мски: хрⷭ҇тѐ мо́й, ка́ла мѧ̀ и҆зба́ви смертоно́сныхъ страсте́й во вѣ́ки.</p> <p Style="p">Терпѣ́нїемъ пожда́тель, и҆ се́рдцемъ смире́нъ, ты̀ бы́лъ є҆сѝ ми́лостивъ тре́бꙋющымъ, ѻ҆бы́чай приносѧ̀ бла́гъ, и҆ ѻ҆́бразы добродѣ́тєльны, всече́стне, въ ни́хже до́брѣ пожи́въ, чꙋде́съ то́чиши бл҃года́ть.</p> <p Style="p">Ра́зꙋмъ и҆мѣ́ѧ бжⷭ҇твенъ, и҆спо́лнитель влⷣчнихъ ꙗ҆ви́лсѧ є҆сѝ слове́съ, десны̑ѧ любѧ̀ стєзѝ, шꙋ́ихъ же ꙗ҆́вѣ ᲂу҆клонѧ́ѧсѧ, ꙗ҆́кѡ бл҃гоꙋ́менъ и҆ мꙋ́дръ: тѣ́мже тѧ̀ почита́емъ, бг҃омꙋ́дре, во вѣ́ки.</p> <Section Style="Span" Type="tropar"> <p>Бг҃оро́диченъ: </p> <p>А҆да́мовъ содѣ́тель ѿ крове́й твои́хъ чи́стыхъ зи́ждетсѧ, и҆ млеко́мъ пита́етсѧ, пита́ѧй всѧ́ко дыха́нїе, дв҃о бцⷣе: тѣ́мже ꙗ҆́кѡ бж҃їю тѧ̀ сла́вимъ мт҃рь.</p> </Section> </Section> <Section Type="song"> <p Style="h4">И҆́нъ. І҆рмо́съ:</p> <p Style="p">Всѧ̑ дѣла̀ бж҃їѧ и҆ всѧ̀ тва́рь, бл҃гослови́те гдⷭ҇а, преподо́бнїи и҆ смире́ннїи се́рдцемъ, по́йте є҆го̀, и҆ превозноси́те во всѧ̑ вѣ́ки.</p> <p Style="p">Го́рнѧгѡ і҆ерⷭ҇ли́ма жела́ѧ наслѣ́довати, зва́нїемъ почита́емь благонаро́читыхъ люде́й, ѿ вышегра́да прише́лъ є҆сѝ во гра́дъ пско́въ, съ ни́ми поѧ̀, бл҃же́нне, и҆ превозносѧ̀ гдⷭ҇а во вѣ́ки.</p> <p Style="p">Раче́нїе неѕло́биво ко и҆згна́вшымъ тѧ̀, бл҃же́нне, ꙗ҆́коже дв҃дъ ко а҆вессалѡ́мꙋ показа́лъ є҆сѝ, жела́ѧ въ вы́шнихъ кро́ткихъ зе́млю наслѣ́дити, вѣ́чнагѡ селе́нїѧ, бг҃омꙋ́дре, во вѣ́ки. </p> <p Style="p">Тобо́ю, бг҃облаже́нне кнѧ́же гаврїи́ле, гра́дъ пско́въ вельмѝ хва́литсѧ: въ не́мъ бо бл҃гоче́стнѡ пожи́въ, спасе́нїе содѣ́лавъ, трⷪ҇цꙋ чти́ти наꙋчи́лъ є҆сѝ во є҆ди́номъ бжⷭ҇твѣ̀, и҆ покланѧ́тисѧ то́й, и҆ благослови́ти во вѣ́ки.</p> <Section Style="Span" Type="tropar"> <p>Бг҃оро́диченъ: </p> <p>Предвозвѣсти́тель вѣ́чныѧ та́йны а҆рха́гг҃лъ гаврїи́лъ, є҆́же ра́дꙋйсѧ тебѣ̀, бцⷣе, взыва́ѧ, тезоимени́тый же семꙋ̀ ѿ земны́хъ кнѧ́зь, твоегѡ̀ ᲂу҆спе́нїѧ хра́мꙋ, съ бг҃омꙋ́дрымъ ні́фѡнтомъ ѡ҆снова́нїе полага́ютъ, бл҃гословѧ́ще тѧ̀ во вѣ́ки.</p> </Section> </Section> <Section Type="song"> <p Style="h4">Пѣ́снь ѳ҃. </p> <Section Style="Span" Type="irmos"> <p>І҆рмо́съ: </p> <p>Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.</p> </Section> <p Style="p">Ви́дѣти жела́ѧ сла́вꙋ бг҃а на́шегѡ, добродѣ́телей бл҃гоѻбра́зїемъ себѐ ᲂу҆добри́лъ є҆сѝ: и҆ свѣщꙋ̀ носѧ̀ вше́лъ є҆сѝ въ свѣ́тлый черто́гъ, со а҆́гг҃лы живы́й ꙗ҆снѣ́е наслажда́ешисѧ бг҃овидѣ́нїѧ.</p> <p Style="p">Ꙗ҆́кѡ ᲂу҆́тро, ꙗ҆́кѡ со́лнце возсїѧ̀ па́мѧть твоѧ̀, сꙋ̑щаѧ во мра́цѣ сердца̀ просвѣща́ющи: ты́ бо свѣ́та и҆ днѐ ꙗ҆́кѡ вои́стиннꙋ сы́нъ ꙗ҆ви́лсѧ є҆сѝ, бг҃омꙋ́дре все́володе, сегѡ̀ ра́ди тѧ̀ почита́емъ.</p> <p Style="p">Мꙋ́дростїю ᲂу҆кра́шенъ, и҆ ра́зꙋмомъ просвѣще́нъ, смире́нїемъ се́рдца лѣ́потствꙋѧ, высото́ю житїѧ̀ сїѧ́ѧ, къ мы́слєннымъ преше́лъ є҆сѝ дворѡ́мъ, и҆дѣ́же на́съ помина́еши почита́ющихъ тѧ̀, все́володе.</p> <p Style="p">Де́нь пра́зднственный, и҆ по́льзы хода́тайственный, честны́й тво́й соверша́емъ ѿ землѝ преставле́нїѧ: ты́ бо гдⷭ҇ень ᲂу҆го́дникъ, и҆ тогѡ̀ за́повѣдей дѣ́латель ꙗ҆ви́лсѧ є҆сѝ непосты́денъ, досточꙋ́дне все́володе.</p> <Section Style="Span" Type="tropar"> <p>Бг҃оро́диченъ: </p> <p>Свѣ́та прїѧ́телище ᲂу҆тро́ба твоѧ̀ бы́сть, просвѣ́щшагѡ мі́ръ, бг҃ора́дованнаѧ. тѣ́мже молю́ тѧ ѻ҆каѧ́нный: свѣ́тлꙋ зарю̀ пода́ждь мѝ, бг҃оневѣ́сто, мольба́ми все́волода бг҃омꙋ́драгѡ.</p> </Section> </Section> <Section Type="song"> <p Style="h4">И҆́нъ. </p> <Section Style="Span" Type="irmos"> <p>І҆рмо́съ: </p> <p>Сотворѝ держа́вꙋ мы́шцею свое́ю, низложи́ бо си̑льныѧ со престѡ́лъ, и҆ вознесѐ смирє́нныѧ бг҃ъ і҆и҃левъ: въ ни́хже посѣтѝ на́съ восто́къ съ высоты̀, и҆ напра́вилъ ны̀ є҆́сть на пꙋ́ть ми́ра.</p> </Section> <p Style="p">Пи́щи безсме́ртныѧ, тѣ́ла и҆ кро́ве хрⷭ҇то́вы сподо́билсѧ є҆сѝ причасти́тисѧ, бг҃омꙋ́дре, проще́нїе и҆ ми́ръ всѣ̑мъ да́въ, дꙋ́шꙋ твою̀ нбⷭ҇номꙋ цр҃ю̀ и҆ влⷣцѣ пре́далъ є҆сѝ. є҆мꙋ́же со всѣ́ми ст҃ы́ми предстоѧ̀, всеблаже́нне, ѡ҆ на́съ моли́сѧ.</p> <p Style="p">Нова́града наро́ди ми̑рнаѧ ᲂу҆стро́ивше, и҆ ско́рѡ ше́дше въ пле́сковъ, восхотѣ́ша взѧ́ти мо́щи твоѧ̑, свѧ́те, но не возмого́ша, сꙋгꙋ́бо чꙋдодѣ́йствїе показа́въ, ста́ша неподви́жими: и҆ по́далъ є҆сѝ и҆̀мъ ѿ честны́ѧ рꙋкѝ своеѧ̀ но́готь на и҆сцѣле́нїе и҆ въ па́мѧть вѣ́чнꙋю.</p> <p Style="p">Ско́рѡ предвари́вше сщ҃е́нное ѡ҆полче́нїе, вла̑сти же и҆ наро́читїи и҆ всѧ́къ во́зрастъ, въ пресла́внꙋю це́рковь прест҃ы́ѧ трⷪ҇цы, и҆ пристꙋ́пльше къ чꙋдотво́рнѣй ра́цѣ вопїе́мъ: ѽ всеблаже́нне кнѧ́же гаврїи́ле! молѝ цр҃ѧ̀ нбⷭ҇наго вѣ̑рнымъ лю́демъ здра́вїе пода́ти, и҆ во́ємъ побѣ́дꙋ на врагѝ, гра́дꙋ же и҆ на́мъ спасе́нїе и҆ и҆сцѣле́нїе.</p> <Section Style="Span" Type="tropar"> <p>Бг҃оро́диченъ: </p> <p>Гдⷭ҇онача́льный цр҃ю̀, со ѻ҆ц҃е́мъ сѣдѧ́й, и҆ серафі́мы пое́мый, при́зри на мольбꙋ̀ ра̑бъ твои́хъ: пречⷭ҇тыѧ же твоеѧ̀ мт҃ре, и҆ ᲂу҆го́дника твоегѡ̀ кнѧ́зѧ гаврїи́ла, моле́нїемъ спасѝ гра́дъ и҆ лю́ди, и҆ ᲂу҆мно́жи плоды̀ земны̑ѧ, пода́ждь вѣ́рнымъ здра́вїе, и҆ на проти̑вныѧ побѣ̑ды, и҆ ѡ҆чи́сти грѣхѝ на́шѧ и҆́мене твоегѡ̀ ра́ди.</p> </Section> </Section> <Section Type="svetilen"> <p Style="h4">Свѣти́ленъ. </p> <p Style="p">Бжⷭ҇твенною бл҃года́тїю просвѣти́всѧ, и҆ по сме́рти показа́лъ є҆сѝ свѣ́тлость житїѧ̀ твоегѡ̀, и҆сточа́еши мі́рови бл҃года́ть притека́ющымъ къ ра́цѣ моще́й твои́хъ, всеблаже́нне гаврїи́ле, и҆ молѝ спасти́сѧ чтꙋ́щымъ тѧ̀.</p> <Section Style="Span" Type="tropar"> <p>Бг҃оро́диченъ: </p> <p>Въ тѧ̀ всели́сѧ, приснодв҃о бцⷣе, ꙗ҆́вѣ, содѣ́тель и҆ гдⷭ҇ь всѣ́хъ, и҆ є҆ди́нꙋ трисїѧ́ннꙋ зра́кꙋ бжⷭ҇тва̀ покланѧ́тисѧ бл҃гочести́выми кнѧ́зи въ рѡссі́и человѣ́ческїй ро́дъ наꙋчѝ и҆ просвѣтѝ.</p> </Section> </Section> </csml>