Канон святому преподобному Иову Анзерскому

Пе́снь 1.

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зныма Моисе́овыма рука́ма Амали́кову си́лу в пусты́ни победи́л е́сть.

И́ове преподо́бне, проле́й моли́тву твою́ ко Христу́ Бо́гу, да сподо́бит мя́, недосто́йнаго, пе́снь хвале́бную тебе́ воспе́ти и по́двиги твоя́ досто́йно просла́вити.

От ю́ности Бо́га возлюби́в, блаже́нне, до конца́ Тому́ порабо́тал еси́ и, благода́тию Того́ обогати́вся, мно́гия духо́вныя да́ры приходя́щим раздава́л еси́.

Ви́дя Госпо́дь от младе́нства ре́вность твою́, чи́на иере́йскаго удосто́и тя́, преподо́бне, и па́стве твое́й во спасе́ние дарова́, я́ко служи́теля благогове́йна и моли́твенника те́пла.

Богоро́дичен: Не и́мам словесе́ досто́йнаго просла́вити Тя́, Богоро́дице, ни ра́зума воспе́ти Тя́, Влады́чице, но то́кмо в ско́рбех усе́рдно вопию́ Ти́: изба́ви мя́ рабо́ты вра́жия и в не́мощи мое́й Помо́щница ми́ бу́ди.

Пе́снь 3.

Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Еще́ сы́й в ми́ре, по́стническому житию́, моли́тве и богомы́слию прилежа́л еси́, досточу́дне, целому́дрием же укра́шен, чистото́ю души́ твоея́ Бо́гови прибли́жился еси́. Моли́ Того́ усе́рдно, вся́кия скве́рны на́м изба́витися.

Благода́ть смире́нием и ве́рою стяжа́в, тишину́ и ра́дость души́ твое́й обре́л еси́ и, благодаре́ние вознося́ Царю́ Небе́сному, от си́лы в си́лу восходи́л еси́, преподо́бне.

Пе́нием благоле́пным Го́спода прославля́я, мно́гия лю́ди сла́дким гла́сом твои́м во умиле́ние приводи́л еси́, И́ове преблаже́нне, и, усе́рдне боже́ственную слу́жбу соверша́я, те́плыя моли́твы за па́ству твою́ возноси́л еси́.

Богоро́дичен: Ма́ти Бо́жия Пречи́стая, преподо́бным похвало́ и утвержде́ние, ду́ш святы́х Невестокраси́тельнице сла́вная, моли́ со преподо́бным И́овом Сы́на Твоего́, Христа́ Бо́га на́шего, вся́кия грехо́вныя скве́рны на́м совлещи́ся и слеза́ми покая́ния омы́тися.

Седа́лен, гла́с 2:

Земна́я оста́вль, Небе́сная обре́л еси́, пло́тию обложе́н, безпло́тным подо́бился еси́, свя́те И́ове, Боже́ственным же Ду́хом просвеще́н, сердца́ челове́ков прозрева́л еси́. Ны́не, я́ко звезда́, сия́еши на Небеси́ и зри́ши сла́ву Святы́я Тро́ицы, Ю́же моли́, преподо́бне, да исцели́т не́мощи на́ша и сподо́бит Ца́рствия Своего́.

Богоро́дичен: Истаява́ет се́рдце мое́, Пречи́стая, тща́щееся воспе́ти непости́жную та́йну Рождества́ Твоего́, Сло́во бо О́тчее несказа́нно во утро́бу Твою́ вмести́ла еси́, и Ма́ти спасе́ния яви́лася еси́ на́м.

Пе́снь 4.

Ирмо́с: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Моли́твенниче пла́менный, та́йный с Бо́гом собесе́дниче и Ду́ха Боже́ственнаго соприча́стниче, преподо́бне о́тче И́ове! Ты́, слеза́ми лице́ свое́ ороша́я, из глубины́ серде́чныя взыва́л еси́: Го́споди, поми́луй мя́! Испроси́ и на́м твое́ю моли́твою благода́ть Его́ и ми́лость.

Любве́ Христо́вы испо́лнено бе́ чи́стое се́рдце твое́, досточу́дне, бли́жния твоя́ па́че себе́ возлюби́вый, зло́бы чу́ждь бы́в и мще́ния, благодея́нии мно́гими лю́дем угожда́л еси́, ра́дуяся о вся́кой души́ христиа́нстей.

Не оскуде́ десни́ца твоя́, пита́вшая а́лчущих, ниже́ преста́ по́мощь твоя́ стра́ждущим и обремене́нным, сло́во твое́ благода́тное малоду́шным ве́ры утвержде́ние бы́сть, все́м бо подава́л еси́, о́тче, душеполе́зная.

Богоро́дичен: К Тебе́ простира́ю ру́це мои́, Предста́тельнице все́м христиа́ном, и из глубины́ взыва́ю: уте́ши мя́ в печа́ли мое́й, мучи́тельства страсте́й изба́ви, Све́том Боже́ственным мра́к души́ моея́ просвети́ и прегреше́ния моя́ прости́ ми́, Ма́ти Де́во.

Пе́снь 5.

Ирмо́с: Ты́, Го́споди мо́й, Све́т в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Уве́дев ца́рь земны́й добро́ту твою́ духо́вную, о́тче И́ове, избра́ тя́ наста́вника себе́, му́дростию твое́ю назида́яся, ты́ же со смире́нием ца́рское повеле́ние прие́м, си́рых и убо́гих попече́нием свои́м не оста́вил еси́, в простоте́ се́рдца служе́ние свое́ соверша́я.

Царю́ Небе́сному зело́ че́стен дру́г яви́лся еси́, преподо́бне, То́й бо, я́ко зла́то в горни́ле, очи́сти тя́ испыта́нии кре́пкими. За словеса́ Госпо́дня ве́рою тве́рдою сохрани́л еси́ пути́ же́стоки, о́тче, исполня́яся благи́х преизоби́льно.

За́вистию вра́жиею, уничиже́н бы́л еси́ клевето́ю челове́ческою, И́ове, изгна́н бо от оте́ческаго гра́да бы́в, во стране́ полу́нощней обре́л еси́ приста́нище во оби́тель и́ноческую пресели́вся.

Богоро́дичен: От ю́ности моея́ Го́спода грехопаде́нии прогне́вах, не и́мам дерзнове́ния к Тому́, де́л бо, досто́йных покая́ния, не сотвори́х, оба́че Еди́ну Тебе́ стяжа́х Спору́чницу спасе́ния моего́, Пренепоро́чная, Ты́ в тесноте́ и ско́рби помози́ ми́, да ско́рби вре́менныя прие́мля в житии́ мое́м, муче́ния ве́чнаго избе́гну.

Пе́снь 6.

Ирмо́с: Пожру́ Ти́ со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися ра́ди ми́лости от ре́бр Твои́х исте́кшею Кро́вию.

Егда́ всели́лся еси́ в кинови́ю, о́тче И́ове, по́стническим житие́м бра́тию удиви́л еси́, и́гу Христо́ву смире́нно подклоня́яся, те́мже Христо́с ри́зою ра́дования украси́ тя́, пу́ть преподо́бия и кончи́ну че́стну ти́ уготовля́я.

Словеси́ Госпо́дню неуста́нно поуча́шеся се́рдце твое́ чи́стое, Ду́хом бо Святы́м душа́ твоя́ при́сно жива́ бе́, благода́ть смире́нием стяжа́л еси́, прему́дре, Ца́рству Бо́жию, еще́ на земли́ сы́й, я́ко небожи́тель приобща́яся.

Безмо́лвия ча́яше душа́ твоя́, блаже́нне, и Бо́гу предстоя́ния несмуща́емаго. Сего́ ра́ди во ото́к А́нзерский всели́лся еси́, иде́же предте́ча тво́й, Елеаза́р богому́дрый, первонача́льник ски́тский, вдохнове́нныя Бо́гу моли́твы принося́, дара́ми боже́ственныя благода́ти пусты́ню освяти́л е́сть.

Богоро́дичен: Пучи́ну беззако́ний мои́х в пучи́не милосе́рдия Твоего́ потопи́, Пречи́стая, бу́рю страсте́й мои́х разгоня́ющи, и на стези́ покая́ния наста́ви мя́.

Конда́к, гла́с 8:

Боже́ственная восхожде́ния в се́рдце стяжа́в, и́хже ра́ди мно́ги ско́рби претерпе́л еси́, приста́нище обре́л еси́ в морсте́м ото́це, преподо́бнаго Елеаза́ра прее́мник заве́тов бы́в, Покро́вом Бо́жия Ма́тере осеня́емь, достоблаже́нне о́тче И́ове, помина́й на́с чту́щих святу́ю па́мять твою́.

И́кос:

От ю́ности избра́нник Бо́жий яви́лся еси́, и Того́ путе́м после́довал еси́ невозбра́нно, гоне́ния, поноше́ния и ско́рби не поколеба́ша тя́, преподо́бне, ве́рою Христо́вою окриля́ема. Те́мже от ца́рских черто́гов отве́ржен бы́в, во оби́тель Солове́цкую преселе́ние я́ко от Десни́цы Бо́жия восприя́л еси́, устреми́лся еси́ к пусты́нному ото́ку А́нзерскому, иде́же ду́х тво́й, безмо́лвия ча́я, жела́емое обре́те. та́можде и повеле́ние Бо́жия Ма́тере прие́м, оби́тель Распя́тию Сы́на Ея́, Христа́ Бо́га на́шего, воздви́гл еси́. Сего́ ра́ди по́двиг любве́ и милосе́рдия в подража́ние Го́споду до конца́ испо́лнивый, во оби́телех Боже́ственныя Любве́ ны́не пребыва́еши, достоблаже́нне о́тче И́ове, помина́й на́с чту́щих святу́ю па́мять твою́.

Пе́снь 7.

Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Ски́тскаго жития́ нача́льник яви́лся еси́, преподо́бне о́тче И́ове, в доброде́телех и́ноков наставля́я, наипа́че свято́е послуша́ние блюсти́ увещава́я: И та́ко оте́ческою любо́вию ча́д духо́вных окормля́л еси́, попече́нием о па́стве твое́й заве́т Христо́в исполня́яй.

Покая́ния пропове́дниче и Ца́рствия Небе́снаго насле́дниче! Ты́, на кончи́ну жития́ своего́ и на ча́с Стра́шнаго суда́ взира́я, сокруше́нныя моли́твы Распя́тому за ны́ возноси́л еси́, смире́нными слеза́ми ду́шу омыва́яй.

Служе́нию лю́дем па́че пре́жняго посвяти́л еси́ себе́, преподо́бне, попече́нию о боля́щих вельми́ прилежа́в, на ра́ны и́х еле́й возлива́я, любо́вию Христо́вою неду́ги цели́л еси́. Те́мже и мы́, грехо́вными я́звами ура́нени, во благовре́менную по́мощь тя́ призыва́ем.

Богоро́дичен: Напа́стьми лю́тыми бори́мь, и стрела́ми вра́жиими уязвля́емь, во гно́ищи грехо́в мои́х лежу́, стеня́й, но Ты́, Влады́чице, терпе́ние мое́ и упова́ние, от во́лн безме́рных искуше́ний изми́ мя́ и во страда́ниих пода́ждь ми́ утеше́ние.

Пе́снь 8.

Ирмо́с: Ру́це распросте́р, Дании́л льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те, вся́ дела́ Госпо́дня, Го́спода.

Ду́хом приобща́яся Страда́нием Госпо́дним, посто́м и бде́нием моли́твенным пло́ть свою́ удруча́л еси́, преподо́бне, и се́рдце всено́щными моле́нии усоверша́л еси́, о́ком же приснобо́дренным та́йны Боже́ственныя созерца́я, Ду́ху Свято́му оби́тель непоро́чну себе́ сотвори́л еси́.

Вострепета́ душа́ твоя́ свята́я, и возра́довашася смире́нныя ко́сти твоя́, блаже́нне, егда́ Влады́чица Всепе́тая в виде́нии яви́ся ти́ вку́пе с Елеаза́ром чу́дным, повелева́ющи оби́тель Распя́тию Сы́на Ея́, Христа́ Бо́га на́шего, воздви́гнути и спаси́тельныя Стра́сти Его́ всече́стно просла́вити.

Друга́я Голго́фа гора́ нарече́ся, иде́же юдо́ль после́дняя земна́го по́прища твоего́ бы́сть, И́ове прему́дре, сия́ бо труды́ усе́рдными твои́ми и воздыха́нии сле́зными, попече́нием Пресвяты́я Богоро́дицы храни́ма, во вся́кой святы́ни и пра́вде процвела́ е́сть.

Богоро́дичен: Же́зл си́лы стяжа́вше, Кре́ст Сы́на Твоего́, Богоро́дице, те́м низлага́ем вра́жия шата́ния, любо́вию Тя́ непреста́нно велича́ющии.

Пе́снь 9.

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся, Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Благоче́стнаго жития́ твоего́, о́тче, ра́ди, исто́чник воды́ преизоби́лен даде́ся на потре́бу оби́тели твое́й от Пресвяты́я Богоро́дицы, ку́пно же и да́р прозре́ния и неду́гов исцеле́ния тебе́ от Бо́га да́н бы́сть. Те́мже мо́лим тя́: исцели́ не́мощи на́ша душе́вныя вку́пе и теле́сныя.

Любо́вию Христо́вою испо́лнено бы́сть се́рдце твое́, преподо́бне И́ове, е́юже вы́ну му́дро врачева́л еси́ поро́ки людски́я. Егда́ бо та́тие приидо́ша восхи́тити плоды́ трудо́в бра́тских, и Бо́гом нака́зани бы́ша, Того́ умоли́в, разреше́ние и́м испроси́л еси́, и трудо́м покая́нным на пу́ть пра́веднаго жития́ наста́вил еси́ я́.

Во гла́се ра́дования а́нгельскаго прехожда́ше душа́ твоя́, блаже́нне, от оби́тели земны́я во оби́тели ве́чныя, вся́ бо испо́лнил еси́ от Го́спода ти́ повеле́нная, никогда́же во́ли Его́ преслу́шав. И ны́не предстоя́ Престо́лу Всесвяты́я Тро́ицы, вку́пе с новому́ченики Солове́цкими, возноси́ о на́с моле́ния усе́рдно.

Богоро́дичен: Я́ко испра́вила еси́ пре́жде разсла́бленнаго, та́ко и на́с, душе́ю и те́лом разсла́бленных, те́плым Твои́м предста́тельством испра́ви, да пое́м при́сно вели́чия Твоя́.

Свети́лен:

Свети́льниче, Ду́хом Святы́м возжже́нный, в по́двизех сла́вных пожи́л еси́, о́тче, ми́ру светя́, прича́стники Све́та Боже́ственнаго ученики́ твоя́ сотворя́я, моли́, преподо́бне, Светода́теля Го́спода тьмы́ греха́ и неве́дения на́м избежа́ти, и во све́тлостех повеле́ний Госпо́дних ходи́ти.

Сла́ва, и ны́не: Ма́ти Све́та Невече́рняго, Свети́ло светоза́рнаго сия́ния, Богове́дения све́том серде́чная очеса́ на́ша просвети́, да иму́ще свети́льники при́сно горя́щия, угото́вим себе́ в сре́тение Жениху́ Христу́, И́же мра́ка нощна́го на́с изба́вит, де́нь незаходи́мый на́м да́рует, и сы́ны Све́та Своего́ сотвори́т.