Канон святому преподобному Макарию Римлянину, Новгородскому чудотворцу

Пе́снь 1.

Ирмо́с: Мо́ре огусти́л еси́, погрузи́вый со ору́жием го́рдаго фарао́на, и лю́ди спа́сл еси́ немо́кренно, Го́споди, и вве́л еси́ я́ в Го́ру Святы́ни, вопию́щия: пои́м Тебе́, Бо́гу на́шему, пе́снь побе́дную, я́ко просла́вися.

Мо́ря жите́йскаго волна́ми обурева́еми, к Тебе́, Иису́се Всеблаги́й, прибега́юще, вопие́м: от ти́ны страсте́й на́с изба́ви, да в тишине́ ду́ха уго́днику Твоему́, преподо́бному Мака́рию, пе́снь хвале́бную принесе́м, его́же чудесы́ сла́вно просла́вил еси́.

Мо́ря песо́к преде́л положи́вый, Госпо́дь избра́ тя́ от ри́мскаго ро́да, преподо́бне о́тче Мака́рие, служи́ти Ему́ в преподо́бии и чистоте́ и в Росси́йстей стране́ показа́ тя́ чудотво́рца изря́дна: в чудесе́х бо мно́гих сла́вно просла́вился еси́.

Мо́ря жите́йскаго треволне́ние не потопи́ ладии́ твоея́, о́тче Мака́рие, но, ве́янием Ду́ха Бо́жия управля́емь, в ти́хое приста́нище спасе́ния вше́л еси́ и чуде́с дарова́нием от Го́спода просла́вился еси́.

Богоро́дичен: Мо́ре сле́з испроси́ на́м, Влады́чице Преблага́я, у Ми́лостиваго Сы́на Твоего́ и Бо́га на́шего, да, и́ми угаси́вше пе́щь страсте́й, омы́ем скве́рну грехо́вную ду́ш на́ших и, спасе́ние ве́чное получи́вше, воспое́м Христу́ пе́снь побе́дную, я́ко просла́вися.

Пе́снь 3.

Ирмо́с: Утверди́ся се́рдце мое́ во Го́споде, вознесе́ся ро́г мо́й в Бо́зе мое́м, разшири́шася на враги́ моя́ уста́ моя́, возвесели́хся о спасе́нии Твое́м.

Утверди́л еси́ на ка́мени за́поведей Христо́вых се́рдце твое́, преподо́бне о́тче Мака́рие, у́зким и приско́рбным путе́м ше́ствовал еси́, а́лчбою, и жа́ждою, и вери́гами желе́зными пло́ть твою́ изнуря́я блаже́ннаго ра́ди бу́дущаго поко́я, его́же получи́в, весели́шися ве́чно со святы́ми.

Житию́ дре́вних богоно́сных оте́ц поревнова́в, в пусты́ню бла́тную и суро́вую удали́лся еси́, о́тче Мака́рие, не име́вшую никоего́же челове́ческаго утеше́ния, в не́йже многоле́тне потруди́вся, оби́тель и́ноком созда́л еси́, во спасе́ние мно́гим.

Утвержда́л еси́ бра́тию твою́ словесы́ богодухнове́нными, о́тче Мака́рие, па́че же о́бразом святоподви́жнаго твоего́ жития́; ти́и же, тобо́ю наставля́еми, подража́тели бы́ша подвиго́м твои́м и вку́пе с тобо́ю получи́ша спасе́ние.

Богоро́дичен: Утвержде́ние на Тя́ наде́ющихся, Пресвята́я Богоро́дице Влады́чице, не посрами́ упова́ния на́шего, е́же по Бо́зе на Тя́ возлага́ем, но бу́ди на́м Засту́пница от нападе́ний диа́вольских, да, Тобо́ю помоществу́еми, возвесели́мся о спасе́нии на́шем.

Седа́лен, гла́с 4.

Ско́рый помо́щник явля́ешися, преподо́бне о́тче Мака́рие, с ве́рою в моли́твах Тя́ призыва́ющим, и ме́сто пусты́нное твои́х по́двигов от запусте́ния коне́чнаго соблю́л еси́ ди́вно, на не́мже с любо́вию честву́ем святу́ю и всера́достную па́мять твою́.

Пе́снь 4.

Ирмо́с: Проро́к Авваку́м у́мныма очи́ма прови́де, Го́споди, прише́ствие Твое́, те́м и вопия́ше: от ю́га прии́дет Бо́г. Сла́ва си́ле Твое́й, сла́ва снизхожде́нию Твоему́!

Проро́ком Бо́жиим Илии́ и Крести́телю поревнова́л еси́, преподо́бне о́тче Мака́рие, пусты́нное житие́ возлюби́в, я́ко го́рлица уедине́нная, славосло́вия же еди́н Еди́ному Христу́ возноси́л еси́, воспева́я Того́ Боже́ственное снизхожде́ние.

Проро́чески, о́тче Мака́рие, по́мыслы челове́ческия прозрева́л еси́, чистоты́ ра́ди твоея́ серде́чныя, и бра́тию твою́ ве́рно поуча́л еси́ в моли́твах бо́дрствовати и немо́лчно воспева́ти гла́сы преподо́бными Спа́сово Боже́ственное снизхожде́ние.

Проро́ка и царя́ Дави́да пе́снь во усте́х твои́х всегда́ име́л еси́, преподо́бне Мака́рие, и се́ю Бо́га немо́лчно славосло́вил еси́, о́браз тобо́ю бра́тии твоея́ подава́я, да во псалме́х и пе́снех духо́вных воспева́ют при́сно Христо́во Боже́ственное снизхожде́ние.

Богоро́дичен: Проро́ческая рече́ния на Тебе́ сбы́шася, Де́во Богоро́дице: Ты́ бо Сло́во Бо́жие нетле́нно воплоти́ла еси́ и Невмести́маго во утро́бе Твое́й де́вственней нете́сно вмести́ла еси́. Те́мже Тя́ хвале́бно ублажа́ем и воспева́ем спаси́тельное Христо́во снизхожде́ние.

Пе́снь 5.

Ирмо́с: Го́споди Бо́же на́ш, ми́р да́ждь на́м, Го́споди Бо́же на́ш, стяжи́ ны́, Го́споди, ра́зве Тебе́, ино́го не ве́мы, и́мя Твое́ имену́ем.

Го́спода Бо́га освяти́л еси́ в души́ твое́й, преподо́бне о́тче Мака́рие, и же́ртвенник мы́сленный ду́шу твою́ соде́лал еси́, на не́мже же́ртву хвалы́ Го́сподеви возноси́л еси́, во смире́нии ду́ха немо́лчно призыва́я и́мя Бо́жие спаси́тельное.

Госпо́дни за́поведи животво́рныя име́л еси́, напи́саны на скрижа́лех се́рдца твоего́, преподо́бне о́тче Мака́рие, и пропове́дник бра́тии твое́й бы́л еси́ Ева́нгельскаго уче́ния, к небеси́ возводя́щаго челове́ки, и́же, послу́шающе сего́, моли́твенно призыва́ют Боже́ственное Христо́во и́мя.

Госпо́день ра́б бы́л еси́, Мака́рие богому́дре, де́нь и но́щь труди́вся во сла́ву Бо́жию и на по́льзу душе́вную бли́жним твои́м, и́хже, я́ко сама́го себе́, возлюби́л еси́, усе́рдно подвиза́я и́х сла́вити о тебе́ Христо́во и́мя.

Богоро́дичен: Го́спода Ма́ти и Влады́чица всея́ тва́ри яви́лася еси́, Богоро́дице Мари́е, нетле́нно пло́тию ро́ждши Еди́наго от Тро́ицы, Бо́га Сло́ва. Его́же моли́, Чи́стая, от безслове́сных страсте́й на́с изба́вити, да в тишине́ безстра́стия се́рдцем и усты́ воспева́ем свято́е и́мя Его́.

Пе́снь 6.

Ирмо́с: Я́ко во́ды морски́я, Человеколю́бче, волна́ми жите́йскими обурева́юся. Те́мже, я́ко Ио́на, та́ко вопию́ Ти́: возведи́ от тли́ живо́т мо́й, Благоутро́бне Го́споди.

Я́ко кипари́с высокове́рхий, возра́сл еси́, преподо́бне Мака́рие, в пусты́ни бла́тней и непло́дней и плодоноше́нии духо́вными просла́вился еси́ в не́й, я́ко и́стинный уго́дник Христа́ Бо́га, к Нему́же и на́ша стопы́ напра́ви и моли́твами твои́ми от тле́ния грехо́внаго на́с изба́ви, мо́лимся.

Я́ко и́стинный после́дователь Иису́сов, во смире́нии глубо́це жи́знь твою́ провожда́л еси́, Мака́рие блаже́нне, власяны́ми ру́бы и вери́гами желе́зными утесня́я твое́ те́ло, да свободи́шися от тле́ния грехо́внаго и получи́ши спасе́ние.

Я́ко во́ин благоиску́сный, о́тче Мака́рие, стре́лы вра́жия изощре́нныя со у́гльми пусты́нными сле́зными пото́ки устуди́л еси́ и победоно́сец показа́лся еси́ во бране́х со враги́ неви́димыми, и́же не возмого́ша тя́ низри́нути в про́пасть и тле́ние грехо́вное, си́лою Христа́ утвержде́ннаго.

Богоро́дичен: Я́ко вои́стинну прибе́жище непосты́дное христиа́ном, и щи́т, и покро́в, Ма́ти Бо́жия, воспева́ющия Тя́ от бе́д и скорбе́й свободи́: Тя́ бо Еди́ну, благослове́нную в жена́х, Тобо́ю от тле́ния грехо́внаго изба́вльшиися, немо́лчными хвала́ми ублажа́ем.

Конда́к, гла́с 7:

От Ри́ма возсия́л еси́, я́коже звезда́ пресве́тлая, преподо́бне о́тче на́ш Мака́рие, и, в пусты́ни всели́вся, просвети́л еси́ чи́стым житие́м твои́м ве́рно притека́ющия к тебе́. Те́мже и мы́, прославля́юще све́тлую па́мять твою́, вопие́м ти́: ра́дуйся, преподо́бне о́тче Мака́рие.

И́н, гла́с 8:

Я́коже пресве́тлая звезда́, от Ри́ма возсия́л еси́, преподо́бне, и, Бо́гом наставля́емь, Росси́йскую страну́ све́том чуде́с твои́х озари́л еси́ духо́вно, созыва́я ве́рныя к моще́м твои́м, от ни́хже исцеле́ния неду́жным подае́ши. Те́мже мо́лимся тебе́: научи́ на́с, о́тче, твоему́ богоразу́мию и уврачу́й неду́ги на́ша душе́вныя и теле́сныя, да зове́м ти́: ра́дуйся, преподо́бне о́тче Мака́рие.

И́кос:

Возлюби́в Христо́вы Боже́ственныя за́поведи, возненави́дел еси́ ми́ра сего́ наслажде́ние: пло́ть твою́, преподо́бне, посто́м, бде́нием, до́лу лега́нием и вери́гами желе́зными изнури́л еси́ и во умерщвле́ннем телеси́ пе́сни благоприя́тныя, хвалы́ и славосло́вия Триеди́ному Бо́гу немо́лчно приноси́л еси́, о́тче Мака́рие. Сего́ ра́ди приими́ от на́с по достоя́нию такова́я: ра́дуйся, а́нгеле земны́й и челове́че небе́сный, а́нгелы удиви́вый жития́ твоего́ чистото́ю и челове́ки научи́вый благоугожда́ти Бо́гу; ра́дуйся, свети́льниче немерца́яй Боже́ственныя благода́ти, в житии́ и по сме́рти сия́яй чудесы́; ра́дуйся, озаря́яй ду́ши и сердца́ челове́ческая невече́рним све́том твоея́ сла́вы, е́юже и ме́сто по́двигов твои́х прославля́еши преди́вно. Ра́дуйся, преподо́бне о́тче Мака́рие.

Пе́снь 7.

Ирмо́с: Халде́йская пе́щь, огне́м распала́емая, ороша́шеся Ду́хом, Бо́жиим предстоя́нием, о́троцы поя́ху: благослове́н еси́, Бо́же оте́ц на́ших.

В пещи́ искуше́ний пусты́нных, о́тче Мака́рие, благода́ть Госпо́дню, тя́ ороша́ющую, стяжа́л еси́. Те́мже непобеди́м враго́м неви́димым показа́лся еси́ и вся́ прило́ги диа́вольския кре́пко сокруши́л еси́, зовы́й немо́лчно: благослове́н еси́, Бо́же оте́ц на́ших.

Поревнова́л еси́, преподо́бне о́тче, соиме́нному ти́ вели́кому во отце́х Мака́рию, его́же нра́ву и чистоте́ непреста́нно поуча́яся, я́ко безпло́тен, на земли́ подвиза́лся еси́, сего́ ра́ди сосу́д избра́н Ду́ху Свято́му сподо́бился еси́ бы́ти, Его́же де́йством чудеса́ пресла́вная соде́лал еси́ в житии́ и по сме́рти, о ни́хже ве́рнии благословля́ют Бо́га оте́ц на́ших.

Я́ко кри́н, в пусты́ни процве́л еси́, преподо́бне, и благоуха́ния Христо́ва испо́лнил еси́ ме́сто по́двигов твои́х земны́х. Све́том до́брых де́л твои́х озари́л еси́ сердца́ челове́ков, просвеща́я и́х уче́нии твои́ми и науча́я пе́ти Го́сподеви: благослове́н еси́, Бо́же оте́ц на́ших.

Богоро́дичен: В пещи́ халде́йстей та́инство Рождества́ Твоего́ проразумева́юще, Богоро́дице, ро́ждшимся от Тебе́ Искупи́телем спасе́ние обрето́хом и, подо́бящеся отроко́м богосло́вцем, Сы́ну Твоему́ и Го́споду благода́рно зове́м: благослове́н еси́, Бо́же оте́ц на́ших.

Пе́снь 8.

Ирмо́с: А́нгели и небеса́, на престо́ле сла́вы седя́щаго, и я́ко Бо́га непреста́нно сла́вимаго, благослови́те, по́йте, и превозноси́те Его́ во ве́ки.

А́нгелы собесе́дники име́л еси́, преподо́бне Мака́рие, и, си́ми укрепля́емь, в пусты́ни безлю́дней и бла́тней многоле́тне пребы́л еси́, еди́н Еди́ному Бо́гу рабо́тая; сего́ ра́ди ны́не со безпло́тными водворя́ешися и пое́ши хвале́бную пе́снь Триеди́ному Бо́гу, препе́тому и превозноси́мому во ве́ки.

А́нгела тя́ пло́тянаго ве́мы, преподо́бне о́тче Мака́рие, ангелоподо́бно бо на земли́ пожи́л еси́ и чистоту́ души́ и те́ла ре́вностно соблю́л еси́, ны́не же водворя́ешися та́мо, иде́же ничто́же скве́рно вхо́дит, и пое́ши немо́лчную пе́снь Бо́гу, препе́тому и превозноси́мому во ве́ки.

А́нгелов Творе́ц и всея́ тва́ри Соде́тель подви́жника доброде́телей яви́ тя́, Мака́рие преподо́бне, Его́же си́лою укрепля́емь, путе́м те́сным ше́ствуя, дости́гл еси́ соверше́нства духо́внаго, Ца́рствие Христо́во унасле́довал еси́ и со святы́ми пое́ши ра́достно: Го́спода по́йте и превозноси́те Его́ во ве́ки.

Богоро́дичен: А́нгельское целова́ние прино́сим Ти́ с любо́вию, Богоро́дице Чи́стая: ра́дуйся, Благода́тная, Госпо́дь с Тобо́ю! Ты́ же ра́дости нетле́нныя сподо́би Тя́ по до́лгу ублажа́ющия, ро́ждшагося же от Тебе́ Го́спода пою́щия и превознося́щия во ве́ки.

Пе́снь 9.

Ирмо́с: Чу́жде ма́терем де́вство, и стра́нно де́вам деторожде́ние, на Тебе́, Богоро́дице, обоя́ устро́ишася. Те́м Тя́, вся́ племена́ земна́я, непреста́нно велича́ем.

Чу́ждь бы́л еси́, преподо́бне Мака́рие, превозноше́ния тщесла́внаго и во смире́нии глубо́це житие́ твое́ провожда́л еси́, о́браз смире́ния бы́л еси́ твои́м ученико́м, и́хже при́сно поуча́л еси́ бе́гати душепа́губныя го́рдости и во смире́нии ду́ха велича́ти Христа́ Жизнода́вца.

Чу́ждь и стра́нен бы́л еси́ во стране́ Росси́йстей, Мака́рие, взыску́яй вы́шняго гра́да, Иерусали́ма небе́снаго, и к нему́ непреста́нно воспаря́яй по́мыслми боголюби́выя твоея́ души́, я́же ны́не со а́нгелы Христа́ велича́ет.

Чу́ждь пра́здности яви́лся еси́, блаже́нне, но при́сно в моли́твах и труде́х пусты́нных подвиза́лся еси́ и вери́гами желе́зными пло́ть твою́ утесня́л еси́, си́лою Го́спода си́л укрепля́емь, Его́же гла́сы хвале́бными немо́лчно велича́л еси́.

Богоро́дичен: Чу́ждих на́с яви́, Влады́чице, вла́сти лю́таго мироде́ржца и в ча́с кончи́ны на́шея на по́мощь ускори́ к на́м, безпомо́щным: мно́го бо мо́жет Ма́терняя моли́тва Твоя́ ко Го́споду, и трепе́щут пред Тобо́ю ду́си тмы́, от и́хже наси́лия на́с изба́ви, Всеблага́я, да Тя́ славосло́вии ра́достными велича́ем.

Свети́лен:

Процве́л еси́ в по́стнических по́двизех, преподо́бне о́тче Мака́рие, и пло́д чудотворе́ния прине́сл еси́ Христо́ве Це́ркви, и о́ную пусты́ню, в не́йже подвиза́лся еси́, благоуха́ния духо́внаго испо́лнил еси́, во утеше́ние с ве́рою и любо́вию к тебе́ притека́ющим.