Пе́снь 1.

Ирмо́с: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

В Ца́рство небе́сное у́зким и приско́рбным путе́м по за́поведи Влады́ки своего́ Христа́, преподо́бне о́тче Михаи́ле, ше́д, широ́кий и простра́нный пу́ть возненави́дел еси́. Распросте́ршийся мра́к ума́ моего́ отжени́, да возмогу́ ма́лое сие́ моле́ние принести́ в пресве́тлую па́мять твою́.

Благочести́ваго ко́рене пресве́тлая о́трасль, всю́ мы́сль твою́ Бо́гу возложи́л еси́ от младе́нства и, кре́ст тво́й взе́м, невозвра́тным путе́м Тому́ после́довал еси́, и, по апо́столу, духо́вную му́дрость стяжа́в, е́же е́сть бу́йство Христа́ ра́ди, вся́чески отрева́я от себе́ тщесла́вие.

Христолюби́ваго царя́ в жи́зни се́й богомо́лец бы́л еси́: ны́не предстоя́ Святе́й Тро́ице во мно́зе дерзнове́нии, моли́ся, преподо́бне о́тче, о держа́ве его́, изба́витися от нахожде́ния иноплеме́нных вели́кия Росси́и христолюби́вым лю́дем, пе́снь Бо́гу возсыла́ющим.

Иоа́нна, списа́вшаго Ле́ствицу, нра́вом уподо́бился еси́, мона́шеский чи́н возлюби́в, на безстра́стия го́ру возше́д, и сего́ ра́ди невозбра́нен восхо́д к небеси́ обре́л еси́ и, в небе́сная врата́ дости́г, в го́рнем Иерусали́ме всели́лся еси́, иде́же веселя́щихся все́х жили́ще, пе́снь Бо́гу возсыла́ющих.

Тро́ичен: Рече́ния Боже́ственная и проро́чествия, я́же издре́вле по́мняще я́ве, Богонача́льное Естество́ еди́нственное сла́вим, Присносу́щное, Безнача́льное, в Тре́х Ли́цех: Отце́, и Сы́не, и Ду́се соде́тельное, всеси́льное.

Богоро́дичен: Неискусобра́чно Христа́ родила́ еси́, е́же по на́м, на́с ра́ди восприе́мша естество́, Пречи́стая, и непрело́жна во обою́ пребы́вша. Его́же моли́ непреста́нно грехо́в мои́х дарова́ти и искуше́ний избавле́ние.

Пе́снь 3.

Ирмо́с: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т па́че Тебе́, Еди́не Человеколю́бче.

Всея́ Росси́и ве́лий чудотво́рец, преподо́бне, бы́л еси́ и проро́ческаго вели́каго да́ра сподо́бился еси́, сказа́в безве́стная и та́йная. Изба́ви ны́ от та́йных прегреше́ний и помышле́ний лука́вых, да чи́стым се́рдцем Христу́ возопие́м: я́ко не́сть свя́т, па́че Тебе́, Человеколю́бче.

Самоде́ржца, — ре́кл еси́, — благочести́ваго вели́каго кня́зя во́ли покори́теся, — проро́чески веща́в, блаже́нне, — о му́жие Вели́каго Нова́града! Та́ко бо подоба́ет, и та́ко угоди́ся судьба́м Бо́жиим бы́ти: а́ще же не послу́шаете, зле́ поги́бнете. Е́же и бы́сть от Бо́га на́м в наказа́ние.

Повеле́нием Влады́ки Христа́, о́тче, после́дствуя, кро́ток и смире́н и все́м вся́к бы́л еси́ подо́бник, вселе́нныя учи́телю, и пред кня́зи, не стыдя́ся, е́же о благоче́стии и е́же судьба́м Бо́жиим го́де, предвари́в бу́дущее, я́сно сказа́л еси́.

Благослове́нием твои́м то́щия жи́тницы испо́лнил еси́ жи́та, и ктому́ про́чее не истощи́шася; и олядене́вшия иногда́ люде́й ни́вы душе́вныя очи́стил еси́ и плодоно́сны сотвори́л еси́, и непло́дный у́м мо́й плодоно́сен сотвори́.

Тро́ичен: От Еди́наго Отца́, я́ко от ума́ рожде́ннаго Сло́ва, и Ду́ха, происходя́ща неизглаго́ланно, по коему́ждо помышле́нии и пи́сменными уче́нии пости́гше, Еди́наго Бо́га Трисо́лнечнаго почита́ем.

Богоро́дичен: Хра́м яви́лася еси́ чи́ст, Де́во Ма́ти Мари́е, вся́ всеси́льно и мудрососта́вльшаго Христа́ и в чину́ поло́жшаго и нося́щаго. Его́же ми́лостива мне́ сотвори́ ма́терними Твои́ми моли́твами.

Седа́лен, гла́с 8.

От земны́х на небе́сная помы́слив и де́лом соверши́в ко Христу́ любо́вь, и, подо́бно мо́лнии, от восто́ка до за́пада восходя́щей ско́ростию, я́ко и́ный Авваку́м, о́тче, несе́нный а́нгелом с пи́щею в Вавило́н прекорми́ти Дании́ла проро́ка, в ро́ве затворе́на, дости́гл еси́, преподо́бне, оби́тели Святы́я Тро́ицы, и промышля́л еси́ в жи́зни се́й о поле́зных мно́жественных, и, а́лчущия ду́ши накорми́в мона́хов пи́щею неги́блющею, в Ца́рствие небе́сное руково́дствовал еси́, иде́же пра́ведно пресве́тлым венце́м венча́лся еси́, блаже́нне. И ны́не, о́тче Михаи́ле, моли́ Христа́ Бо́га согреше́ний оставле́ние дарова́ти пра́зднующим любо́вию святу́ю па́мять твою́.

Сла́ва, и ны́не: Иорда́н струя́ми слу́жит, и Иоа́нн простира́ет ру́ку тле́нную, я́вльшуся Тебе́, Неви́диме, пло́тию ко креще́нию. Но о́в у́бо возвраща́шеся вспя́ть стра́хом, о́в же а́бие держа́ше с тре́петом Тя́, Нетле́ннаго. Вои́стинну А́гнец Бо́жий, Исто́чник присноживо́тный, исто́чники же, и моря́, и челове́ки освяти́в: Тро́ица бо просия́, свы́ше Сы́на Тя́ имену́ет Роди́тель, и Святы́й Ду́х снизхо́дит.

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Мака́рия Вели́каго, па́че естества́ а́нгельское житие́ на земли́ пожи́вшаго, сего́ посту́ и бде́нию, и на земли́ лега́нию, и про́чим доброде́телем, о́тче Михаи́ле, поревнова́л еси́ и, я́ко со́лнце, в Росси́йстей земли́ возсия́л еси́, моли́ о на́с Еди́наго Человеколю́бца.

Святе́йшаго архиепи́скопа Евфи́мия поуче́нием и духо́вным наказа́нием вельми́ внима́я, но скрыва́яся юро́дством Христа́ ра́ди в жи́зни се́й, блаже́нне, ра́зума духо́внаго испо́лненный, Христу́ взыва́л еси́: си́ле Твое́й сла́ва, Человеколю́бче.

Богоспаса́емых христолюби́вых люде́й и мона́хов мно́жества ра́дости испо́лнил еси́ и духо́внаго весе́лия твои́м ди́вным и чрезъесте́ственным, я́ко во еди́ном часе́ прихожде́нием во оби́тель Святы́я Тро́ицы, богоно́сный Михаи́ле, Христу́ взыва́я: си́ле Твое́й сла́ва, Человеколю́бче.

Градо́в высоча́йшаго Вели́каго Нова́града наро́ди моли́твенника тя́ те́пла иму́ще, и ско́раго помо́щника, и я́ко сте́ну тве́рду, и забра́ло необори́мо, и воево́ду кре́пка и непобеди́ма, мо́лят: не забу́ди моли́твенник твои́х, избавля́я ны́ от вся́кия ну́жды и печа́ли.

Тро́ичен: Содержи́тельная все́х су́щих, Неви́димая, Всеще́драя, Благоутро́бная, Человеколюби́вая, Тро́ице Честна́я и Богонача́льная, не забу́ди мене́, Твоего́ раба́, Бо́же, вконе́ц, ниже́ разори́, и́же завеща́л еси́ Твои́м рабо́м заве́т за неизрече́нную ми́лость.

Богоро́дичен: Кра́сную Тя́, Всечи́стая, еди́ну обре́т от ве́ка добро́ту Иа́ковлю, Пребезнача́льное Сло́во и всели́ся в Тя́ благоутро́бия ра́ди, обнови́ челове́ческое естество́. Его́же моли́ непреста́нно от вся́кия мне́ изба́витися ско́рби.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Вели́каго Нова́града наро́ди, в пречестну́ю па́мять богоно́снаго отца́ Михаи́ла моли́твы со слеза́ми пролива́юще, глаго́лют: о пречестны́й о́тче, я́коже не да́л еси́ в расхище́ние оби́тели, та́ко и оклевета́ющия на́с смири́ и пути́ на́ша напра́ви, мо́лимся!

Иоа́нна Крести́теля у́зким и приско́рбным путе́м ходи́ти произво́лил еси́, жесто́кое на земли́ житие́ пожи́в, я́ко безпло́тен, во юро́дство преложи́лся еси́ Христа́ ра́ди. Его́же моли́, преподо́бне, во тме́ греха́ низлежа́щаго мя́ воздви́гнути.

Преподо́бно и свя́то на земли́ житие́ пожи́в, посто́м и бде́нием, и на земли́ лега́нием, и про́чими доброде́тельми мона́шеское житие́ проше́д, о́браз бы́л еси́ яре́м Госпо́день на ся́ взе́мшим и Христу́ после́довавшим, пу́ть мо́й напра́ви, молю́ся.

Ско́ростию, богоно́сный о́тче, явля́яся, от бе́д избавля́я, подо́бяся светоза́рному со́лнцу, на безме́рной высоте́ сия́ющу и обходя́щу всю́ вселе́нную во еди́ном дни́, ты́, преподо́бне, па́че челове́ка в жи́зни се́й Бо́гу, су́щему в вы́шних, тва́рь всю́ созда́вшему, послужи́л еси́.

Тро́ичен: Дрема́нием отягче́на мя́ грехо́вным и порева́ема в со́н сме́ртный, я́ко Человеколюби́вая, и Всеблага́я, и Всеми́лостивая, Богонача́льная Тро́ице Свята́я, уще́дри и возста́ви мя́.

Богоро́дичен: Ма́ти Де́во Отрокови́це, Пречи́стая, Всенепоро́чная, Богоблагода́тная, Твои́ми моли́твами Сы́на и Бо́га и Го́спода ми́лостива сотвори́ мне́ и страсте́й и прегреше́ний Твоего́ раба́ изба́ви вско́ре.

Пе́снь 6.

Ирмо́с: Бе́здна грехо́в и прегреше́ний бу́ря мя́ смуща́ет и во глубину́ ну́жднаго ре́ет мя́ отча́яния, но Твою́ кре́пкую ру́ку мне́ простри́, я́ко Петро́ви, о Упра́вителю! и спаси́.

Васи́лия Вели́каго поуче́ние в се́рдцы твое́м восприя́л еси́, бу́рею греха́ не погрузи́вся и в ти́хое приста́нище дости́г Ца́рствия небе́снаго, кора́бль душе́вный с некра́домым бога́тством соблю́л еси́, о́тче, и на́с от сме́ртныя глубины́ возведи́.

Благода́рное сие́ пе́ние, приноси́мое тебе́, не пре́зри, о́тче, но па́че приими́ и ра́дости духо́вныя испо́лни на́с, да без закосне́ния поклони́мся ра́це, иде́же лежа́т честны́я мо́щи твоя́, исцеле́ние все́м да́рующе.

Принесе́ся моли́тва твоя́ и сле́зы к Бо́гу, я́ко благоуха́нный фимиа́м и же́ртва непоро́чна и благоприя́тна, и мене́ не забу́ди хода́тайством твои́м ко Пресвяте́й Тро́ице, и да́ждь ми́лость ненави́дящим мя́ и вражду́ющим ми́, и от сме́ртныя глубины́ изба́ви ны́.

Всепреподо́бному житию́ поревнова́л богоно́сных отце́в, от ве́ка богоуго́дно пожи́вших, о́тче Михаи́ле, и во юро́дстве Христа́ ра́ди всю́ жи́знь твою́ му́ченически сконча́вый, бу́йство неле́пое от мене́ отжени́.

Тро́ичен: Вседержи́телю Бо́же и Еди́не Неопределе́нный, всели́ся в мя́ за неизрече́нную ми́лость, Трисо́лнечный Влады́ко, и озари́ мя, и вразуми́, я́ко Благоутро́бен.

Богоро́дичен: Хра́м яви́лася еси́ Бо́га Невмести́маго, Пречи́стая, хра́м и мене́ Того́ покажи́ Боже́ственныя благода́ти, Пресвята́я Влады́чице, Твои́ми мольба́ми и соблюди́ невреди́ма.

Конда́к, гла́с 8.

Ду́ха Свята́го си́лою уподо́бился еси́ богоглаго́ливым дре́вним проро́ком, сказа́в безве́стная и та́йная, и е́же го́де судьба́м Бо́жиим в сбытие́, и и́на мно́га чудеса́ о Христе́ сотвори́в, и лю́ди удиви́в, торжествова́ти устро́ил еси́ вопию́щия: сла́ва Бо́гу, прославля́ющему святы́я Своя́.

И́кос:

Уподо́бился еси́ проро́ку Авваку́му, о́тче, восхище́н си́лою Бо́жиею, я́ко на о́блаце, от дале́че страны́, и обре́лся еси́ во оби́тели Святы́я Тро́ицы. Он бо от Иерусали́ма а́нгелом несе́н бы́сть с пи́щею в Вавило́н и та́мо прекорми́ Дании́ла проро́ка и вселе́нную удиви́, ты́ же лю́ди твоя́ возвесели́л еси́ чуде́с де́йством, и мно́жество мона́хов твоему́ житию́ удиви́шася, и после́дствующих тебе́ прекорми́л еси́ я́дию неги́блющею, но пребыва́ющею в жи́зни ве́чней, вопию́щия Бо́гу: сла́ва Прославля́ющему святы́я Своя́.

Пе́снь 7.

Ирмо́с: На по́ле Деи́ре иногда́ мучи́тель пе́щь поста́ви на муче́ние богоно́сных, в не́йже три́ о́троки песносло́вяху Еди́наго Бо́га, тро́ично воспева́ху, глаго́люще: отце́в Бо́же, благослове́н еси́.

Михаи́ла, вели́каго архистрати́га, первостоя́теля престо́лу Пресвяты́я Тро́ицы, тезоиме́нство стяжа́в, все́м небе́сным невеще́ственным си́лам сообща́ешися, преподо́бне о́тче, с ни́ми Христу́ взыва́я: отце́в Бо́же, благослове́н еси́.

Кло́пот де́монский креста́ зна́мением нея́вствен сотвори́л еси́, и клоко́щущееся мо́ре жите́йское волна́ми суе́т скоре́е еле́нския бо́рзости прескочи́л еси́, и в пру́дных ме́стех греха́ не потопи́лся еси́, богоно́сный о́тче, поя́ Христу́: отце́в Бо́же, благослове́н еси́.

Христолюби́вому кня́зю, прише́дшу во оби́тель Святы́я Тро́ицы и мы́сль свою́ испове́давшу ти́, е́же воздви́гнути хра́м Святы́я Тро́ицы во оби́тели твое́й, ему́же, о́тче, я́сно сказа́л еси́: а́ще сотвори́ши сие́, вся́кое жела́ние благо́е получи́ши, е́же и бы́сть. Те́мже Христу́ взыва́л еси́: отце́в Бо́же, благослове́н еси́.

Ско́р помо́щник бы́л еси́, преподо́бне, еще́ в жи́зни се́й во оби́тели Святы́я Тро́ицы: дале́че бо в мо́ри купцу́ с корабле́м потопля́ему и тебе́ призва́вшу на по́мощь, и, я́ко мо́лния, ско́ростию по вода́м ходя́, сего́ изба́вил еси́ от потопле́ния.

Тро́ичен: Ум нерожде́нный Оте́ц, и от Него́ Сло́во ро́ждшееся, и Ду́х Боже́ственный, непости́жне исхо́ден сы́й, Бо́же Единонача́льне Трисо́лнечне, пою́ Тебе́: благослове́н еси́, Бо́же оте́ц на́ших.

Богоро́дичен: Умерщвле́н бы́х, Пречи́стая, грехо́вным я́дом напое́н, и притека́ю к Тебе́ ве́рою, ро́ждшей Нача́льника живота́: Твои́ми моли́твами раба́ Твоего́ оживи́ и искуше́ний и страсте́й изба́ви, Еди́на Чи́стая.

Пе́снь 8.

Ирмо́с: Покрыва́яй вода́ми превы́спренняя Своя́, полага́яй мо́рю преде́л песо́к, и содержа́й вся́, Тя́ пое́т со́лнце, Тя́ сла́вит луна́, Тебе́ прино́сит пе́снь вся́ тва́рь, я́ко Соде́телю все́х во ве́ки.

Волну́ющийся мо́й у́м неле́пыми страстьми́ и помышле́нии исцели́, преподо́бне, и коле́блющееся се́рдце мое́ утверди́, и смуща́ющия ве́тры ду́шу мою́ утиши́, да сла́влю Христа́, Соде́теля все́х во ве́ки.

Руко́ю содержа́щаго всю́ тва́рь Бо́га и челове́ка созда́вшаго, честне́йша всея́ тва́ри, за́поведи, преподо́бне, соверши́л еси́, богоуго́дно на земли́ жи́знь твою́ живя́ и во юро́дство Христа́ ра́ди во́лею преложи́вся, го́рдость и тщесла́вие от себе́ отри́нул еси́, пе́снь воспева́я Соде́телю все́х во ве́ки.

Пресви́тера ди́внаго о́наго во у́жас приве́л еси́ твои́м ди́вным и чрезъесте́ственным прехожде́нием во оби́тель Святы́я Тро́ицы. О, чу́до! Ка́ко обре́лся еси́ вну́трь хра́ма, со вся́ким утвержде́нием заключе́на, Ду́ху Свято́му сия́ де́йствующу?

Илии́ огнено́сному, изря́дному проро́ку, огнедохнове́нному уму́, начерта́вшему Тро́ическую си́лу, уподо́бился еси́, преподо́бне о́тче Михаи́ле, благоче́стия ре́вностию вся́чески, и па́ки во юро́дство Христа́ ра́ди преложи́ся, но доброде́тель утаи́тися не возмо́же.

Тро́ичен: Господонача́лие Безнача́льное, Всеси́льну, и Пребла́гу, Совершеннонача́льну, Благоде́йственну, Неопреде́льну, Вину́ невино́вну, твори́тельну, Присносу́щну, Промысли́тельну и Спаси́тельную все́х Еди́ницу по Существу́ и Тро́ицу Ли́цы, сла́влю Тя́, Бо́же мо́й, ве́рно во ве́ки.

Богоро́дичен: На земли́ возсия́ Невече́рнее Со́лнце Рождество́м, е́же из Тебе́, де́вственным, Пречи́стая Влады́чице, и челове́ки изба́ви от и́дольскаго помраче́ннаго мра́ка. Те́мже и ны́не мя́ па́че того́ Богонача́лия озари́ луча́ми и соблюди́ Твоего́ раба́.

Пе́снь 9.

Ирмо́с: Благослове́н Госпо́дь Бо́г Изра́илев, воздви́гнувый ро́г спасе́ния на́м в дому́ Дави́дове, О́трока Своего́, в ни́хже посети́ на́с Восто́к с высоты́ и напра́вил ны́ е́сть на пу́ть ми́ра.

Мы́сленное мо́ре страсте́й успи́в поще́нием и чу́вственныя воды́ разлива́ния мно́га, е́зера Ильме́ня свире́по волну́емы во́лны и жестокодыха́ющия ве́тры сло́вом укроти́л еси́, на пу́ть ми́ра напра́ви ны́.

Жи́лами слове́с твои́х удави́л еси́ зми́я, хва́лящагося ве́сь ми́р поглоти́ти, и те́плыми слеза́ми твои́ми к Бо́гу о́гненное его́ дыха́ние погаси́л еси́, и без ве́сти сотвори́л еси́, того́ зия́ния, преподо́бне, изба́ви и на пу́ть ми́ра напра́ви ны́.

Я́ко Моисе́й богови́дец, чудоде́йствуя, преподо́бне, моли́твою во́ду из земли́ изве́л еси́, я́же, я́коже река́, оби́льно всю́ оби́тель напая́ше, и с пли́нфами и ка́мением ладии́, плову́щия на созда́ние це́ркве Святы́я Тро́ицы, в ти́хое приста́нище приве́л еси́, и на пу́ть ми́ра напра́ви ны́.

Преподо́бне богоно́сне о́тче Михаи́ле, я́коже не да́л еси́ муже́м кро́ве и льсти́ в расхище́ние оби́тели, в не́йже мона́шеское житие́ проходи́л еси́, та́ко оклевета́ющия на́с смири́, и грехо́вную печа́ль отжени́, и сердца́ на́ша ра́дости испо́лни, и на пу́ть ми́ра напра́ви ны́.

Тро́ичен: Еди́но Госпо́дство и Трисия́нное, еди́нственное Богонача́лие Трисо́лнечное, певцы́ приими́ Твоя́ боголе́пно, и прегреше́ний изба́ви и искуше́ний лю́тых, и вско́ре ми́р пода́ждь человеколю́бно и Церкве́й соедине́ние, и на пу́ть ми́ра напра́ви ны́.

Богоро́дичен: Во утро́бу, Христе́ Спа́се мо́й, де́вственную всели́вся, яви́лся еси́ ми́ру всему́ богому́жно, Неизме́нен, Неслия́нен вои́стинну, и обеща́л еси́ всегда́ с Твои́ми рабы́ бы́ти я́ве. Те́мже Тебе́ Ро́ждшия моли́твами ми́р ми́ру Твоему́ устро́й и на пу́ть ми́ра напра́ви ны́.

Свети́лен.

Пресве́тлый свети́льник неугаси́мый, от восто́ка мы́сленнаго Со́лнца, Христа́, я́ко светоза́рная луча́, возсия́в, мра́чную страну́ на за́паде и се́вере просвети́л еси́ све́тлостию слове́с и доброде́тели дея́нием, Ему́же не преста́й моля́ся, е́же в ми́ре сохрани́ти, Михаи́ле преподо́бне, па́мять твою́ почита́ющия.

Богоро́дичен: Прему́дрость Ипоста́сную, и Пресу́щное Сло́во, и Врача́ все́х ро́ждшая, Всечи́стая Богоро́дице, гное́ния и я́звы исцели́ ду́ш на́ших и сохраня́й невре́дны вся́каго враго́в нахо́да всегда́ Тя́ моля́щия, Засту́пнице ми́ра Блага́я.