Канон святому священномученику Косме Петриченко

Припев: Священному́чениче Космó, моли́ Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 16 ноября (03 ноября ст. ст.)

Глас 4.

Пе́снь 1.

Ирмо́с: Отве́рзу уста́ моя́ и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Космы́ па́мять восхвали́ти, иере́йства красоту́ и испове́дания украше́ние, ра́зум да́ждь ми́, Христе́, да Тебе́ послужи́вша и за Тя́ пострада́вшаго просла́влю.

О́браз па́стырства неуко́рна и́мамы тя́, о́тче Космо́, в де́лании бо се́м изря́ден показа́лся еси́, о́вцы ста́да твоего́ собира́я и уча́, за ни́х же и живо́т сво́й положи́ти не отре́клся еси́.

Сла́вы го́рния прича́стника соде́ла тя́ Госпо́дь, Космо́ му́чениче, зде́ до́бре подвиза́вся за Сло́во Его́, та́мо на Небесе́х венце́м све́тлым венча́ешися.

Богоро́дичен: Му́ченик ли́цы Тя́ основа́ние бы́ти вменя́ют, Де́во, по́двигу си́х. У Креста́ Ти́ стоя́щей, ору́жие про́йде Твою́ непоро́чную ду́шу, Ю́же боже́ственная Любы́ от рождества́ распали́.

Пе́снь 3.

Ирмо́с: Твоя́ песносло́вцы, Богоро́дице, живы́й и незави́стный исто́чниче, ли́к себе́ совоку́пльшия, духо́вно утверди́, в Боже́ственней Твое́й сла́ве венце́в сла́вы сподо́би.

Утверди́л еси́ ду́шу твою́ на ка́мени веростоя́тельном, от млады́х ногте́й в пра́вой ве́ре стоя́ти науче́н бы́в, от нея́же и в ста́рости масти́тей не подви́глся еси́, Космо́ прему́дре.

Пасы́й и тружда́яйся я́ко патриа́рси от ю́ности твоея́, Космо́ пресви́тере, пасти́ наро́ды жезло́м свяще́нства призыва́ешися промышле́нием боже́ственным, я́коже дре́вле купиноглаше́нием Моисе́й.

Оте́чества Небе́снаго жела́я, оте́честву земно́му спострада́ти не отве́рглся еси́, о́тче Космо́, но бе́дствий сего́ ча́шу ку́пно пия́ше ве́ру и любо́вь свою́ не оста́вльшим отце́м.

Богоро́дичен: Ю́нице чи́стая, Ма́ти нескве́рная, скве́рну ду́ш на́ших омы́й, отъими́, я́ко вси́ согреша́ем мно́го от не́мощи и произволе́ния, но Ты́, я́ко Блага́я, премене́ния бу́ди Хода́таица.

Седа́лен, гла́с 6:

И́же Авраа́ма на се́чу царе́м укрепля́ше, И́же Нави́нови со́лнцем послу́шавый, Бо́же, Моисе́овы ру́це воздея́ннии на сокруше́ние Амали́ка укрепи́вый, возвы́си и ру́це твои́, в труде́х и моле́ниих состаре́вшии, на сокруше́ние Амали́ковых вну́ков непра́во ходя́щих, и ру́це твои́ в селе́ниих го́рних не и́мут осла́бнути.

Богоро́дичен: Е́ва прама́терь преще́ния пло́д принесе́ на́м, его́же вкуше́нием сме́рти и сра́ма позна́ние обрето́хом, Де́ва же ны́не спасе́ния пло́д израсти́, живота́ и сла́вы вкуше́ние произволя́ющим плодоприне́сши. О се́м торжеству́юще, ка́ко Тя́ Ма́терь не нарече́м все́м живу́щим, Но́выя Жи́зни нача́льную челове́ком.

Пе́снь 4.

Ирмо́с: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный нетле́нною дла́нию и спасе́ зову́щия: сла́ва, Христе́, си́ле Твое́й.

Распя́таго за ны́ вы́ну в се́рдцы твое́м нося́ па́мятованием непреста́нным, о́тче Космо́, страда́ния путе́м восте́кл еси́ во свята́я нерукотворе́нная, иде́же пре́жде вни́де Христо́с, ве́чныя кро́вы на́м устроя́яй.

Естества́ не́мощь, ниже́ ле́т преутружде́ние к теле́сному упокое́нию сове́тники не избра́л еси́, Космо́ терпели́ве, оба́че ду́ха бо́дростию пло́ти дебельство́ отгоня́я, на де́лание свое́ до ве́чера жи́зни поспеша́ше.

Яви́ся му́ж кре́пок ты́, о́тче, земли́ Сара́товстей благослове́нное прозябе́ние, пра́ведным в ве́ре стоя́нием сто́лп кре́пости ея́ созида́я, да не подви́жится от основа́ния И́стиннаго Живота́.

Богоро́дичен: Иса́иа сла́вы Твоея́ гряду́щия, Де́во, предзре́нием ужасе́ся, зна́мение спребыва́ния Боже́ственнаго лю́дем Сию́ полага́ет, я́ко николи́же си́це бы́сть в челове́цех, е́же се́й Де́вы ражда́ющия чревоноше́ния пло́д несказу́ема Бо́га яви́.

Пе́снь 5.

Ирмо́с: Ужасо́шася вся́ческая о Боже́ственней сла́ве Твое́й, Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая.

Маккаве́и свяще́ннейшии кро́тость и стра́х для Еди́наго Бо́га сохра́ньше, на гу́бящия Изра́иля до́бле вооружи́шася, и́х же о́бразом и ты́, о́тче, сту́дныя разврати́тели ненаказу́емы зре́ти не восхоте́в, ве́рныя на противуста́ние си́м сподвига́ше.

У́з утесне́ние темни́чных у́зами благове́стия свя́занна не сотвори́т несвобо́дна, но́сит бо в се́рдцы и во усте́х ми́ру всему́ необъиме́нное Сло́во.

Че́сти нетле́нныя иере́йства свята́го чре́во бо́гом иму́щим не уступи́л еси́, а́ще и суему́дрию своему́ о́бщника тя́ сотвори́ти жела́ху, безу́мнии, оба́че растли́ти не возмого́ша тверде́йшаго испове́дника.

Богоро́дичен: Елисаве́тино сла́дкое проглаго́лание сбы́стся, и́мже благословля́ше Тя́, Го́спода Ма́терь и́стинную, и ны́не се́ вси́ ро́ди челове́честии блажи́м Тя́, я́ко херуви́м сла́внейшую.

Пе́снь 6.

Ирмо́с: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Не́сть премене́ния в ве́це гряду́щем душа́м боголю́бцев, Ка́мене ве́ры, Христа́, не подви́жутся, Его́же пред челове́ки испове́даша на земли́, Того́ обрета́ют пред а́нгелы небе́сное испове́дание, вню́дуже дости́гнути поспеши́л еси́, о́тче, от ве́ка сего́ преме́ннаго.

Искуша́еми, я́ко зла́то в горни́ле, сребро́ чи́стое принесо́стеся, святи́и, в сокро́вищницы небе́сныя, с ни́миже и до́брый Косма́ ны́не тала́нт причте́, и́же в души́ свое́й испове́данием приумно́жи.

Космо́, о́тче свяще́ннейше, ты́ побе́дныя му́ченик ли́ки свое́ю побе́дою дости́гл еси́, е́же е́сть ве́ра твоя́, е́юже утвержда́шеся, помози́ на́м, грехо́м побежда́емым, да не всу́е на ны́ и́мя Христо́во нарица́ется.

Богоро́дичен: А́нгелом пе́нии Тя́ велича́ющим челове́цы сподража́ти тща́тся, а́ще и гре́шни есмы́, немощно́е на́ше славосло́вие от серде́ц возноси́мое не пре́зри.

Конда́к, гла́с 2:

О́тче, отце́в украше́ние, вои́стинну житие́ твое́ украси́ся, Космо́, и́стинной ве́ре после́дованием, и да́же до сме́рти испове́данием ея́.

И́кос:

Тя́, о́тче, моли́твенника земли́ на́шея позна́хом, ея́же и порожде́ние бы́л еси́, тобо́ю ны́не украша́ется и о тебе́ ра́дуется, я́ко души́ твоея́ красоту́ Госпо́дь на све́щнице церко́вном утверди́, да све́т испове́дания твоего́ на ны́, ча́да твоя́, возсия́ет, и мра́к уны́ния дале́че отжене́т от серде́ц благоче́стно почита́ющих по́двиги и дела́ твоя́, и́хже ра́ди с любо́вию вопие́м ти́: Ра́дуйся, о́тче Космо́, иере́ю и му́чениче хва́льный!

Пе́снь 7.

Ирмо́с: Не послужи́ша тва́ри, богому́дрии па́че Созда́вшаго, но о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Цве́ты доброде́телей нося́, отсе́ле го́рних садо́в уха́ние предвосхи́тил еси́, и в си́х же ны́не я́ко кри́н благоуха́нный, при́сно ра́достию цвете́ши неизглаго́ланною.

Еди́ною челове́цы умира́ют, а́ще ду́шу без поро́ка соблюду́т, посему́ те́ло убива́ющих не боя́тися Сло́во Бо́жие глаго́лет, и сему́ Косма́ му́ченик бы́сть послу́шатель ве́рнейший.

Враги́ челове́ку дома́шния его́ зло́ба ми́ра сего́ содева́ет, си́це и тебе́, о́тче, го́рькое напое́ние от руку́ бли́жних и зна́емых твои́х прия́ти Госпо́дь попусти́, е́же ты́ испи́л еси́ терпеливоду́шне.

Богоро́дичен: У́тро ми́рови возсия́ но́вое в Рождестве́ Твое́м, Преблага́я, о́чи слепы́м просвеща́ющее, и ра́дости серде́чныя исполня́ющее, я́ко взы́де Со́лнце Пра́вды Христо́с Бо́г, и не за́йдет во ве́к, ниже́ помрачи́тися и́мать.

Пе́снь 8.

Ирмо́с: О́троки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте дела́ и превозноси́те Его́ во вся́ ве́ки.

Кла́сы спе́лыя ру́це твои́ пожина́ша, егда́ зе́млю, от нея́же я́ко вся́к челове́к изы́де, возде́ловаше, и се́ я́ко кла́с златы́й душа́ твоя́ восхище́на бы́сть в жи́тницу Христо́ву, и я́ко хле́бное приноше́ние на алта́рь возложи́ся.

Ра́дость печа́ли насле́дует в путе́х непоро́чных, и весе́лия де́нь но́щи обстоя́ний и тя́гот, та́же и ско́рби и ра́ны полу́нощи жития́ твоего́, о́тче Космо́, дне́м несконча́емым преидо́ша в оби́телех Све́та.

А́ще и подвиго́шася а́довы врата́ на Це́рковь Христо́ву, мня́ше вотще́ в земли́ на́шей потреби́ти Ю́, не поколеба́шеся до́блий Косма́ иере́й от Ка́мене Ве́ры, и утверди́ ны́ вопи́ти: отце́в и на́ш Бо́же, благослове́н еси́.

Богоро́дичен: Ше́дше, наро́ди, Горе́ святе́й Бо́жией поклони́мся, от Нея́же Спасе́ние на́м нерукосе́чно изы́де и ми́р Собо́ю испо́лни, Христо́с Бо́г, отце́в и на́ш Бо́же, благослове́н еси́.

Пе́снь 9.

Ирмо́с: Вся́к земноро́дный да взыгра́ется, Ду́хом просвеща́емь, да торжеству́ет же Безпло́тных умо́в естество́, почита́юще свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Ева́нгельски на земли́ пожи́ти сподо́би тя́ Христо́с Госпо́дь, о́тче Космо́ му́дре, ле́ствицею за́поведей Его́ восхо́д сотвори́ти, нището́ю духо́вною основа́ние положи́в, ра́достию в поноше́ниих наверши́л еси́ блаже́нства.

Но́ваго страстоте́рпца от со́нма ве́лия святы́х сро́дник на́ших прославля́ем тя́, о́тче, обрето́х бо Госпо́дь тя́ ве́рна во все́х де́лех твои́х, я́же в Дому́ Его́ я́ко до́брый слуга́ творя́ше, живо́т сво́й о ча́дех церко́вных полага́юще.

Изба́ви моли́твами твои́ми, о́тче Космо́, ча́да твоя́ от вся́кия лю́тости противобо́рца и Ца́рствия Бо́жия ны́ доведи́, моля́щияся тебе́ те́пле, да возмо́жем ловле́ния лука́ваго избе́гнути и коне́чнаго осужде́ния предста́тельством твои́м.

Богоро́дичен: Е́же соде́яхом зла́я, не помяни́ на́м, Блага́я су́щи, егда́ душа́ на́ша разлуча́тися бу́дет настоя́щаго сего́ жития́, не возгнуша́тися мо́лим Тя́ на́шего недосто́инства, а́ще и мно́го согреша́ем вси́, бу́ди на́м, Ма́ти, Засту́пница.

Свети́лен:

Све́тлости жития́ твоего́ поучи́тися душа́ми и умы́ подвиза́ющеся, просвеще́ния очесе́м на́шим серде́чным взыску́ем и коллу́рием моли́тв твои́х исцеле́ния.

Богоро́дичен: Све́тлую Царе́ву Пала́ту и Черто́г Присносу́щнаго Све́та Тя́ ве́мы, Де́во Пресве́тлая, и отку́ду серафи́мския о́чи обря́щем, во е́же воззре́ти к Тебе́.

Пѣ́снь а҃.

І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цари́цѣ мт҃ри, и҆ ꙗ҆влю́сѧ свѣ́тло торжествꙋ́ѧ, и҆ воспою̀, ра́дꙋѧсѧ, тоѧ̀ чꙋдеса̀.

Космы̀ па́мѧть восхвали́ти, і҆ере́йства красотꙋ̀ и҆ и҆сповѣ́данїѧ ᲂу҆краше́нїе ра́зꙋмъ да́ждь мѝ, хрⷭ҇тѐ, да тебѣ̀ послꙋжи́вша и҆ за тѧ̀ пострада́вшаго просла́влю.

Ѻ҆́бразъ па́стырства неꙋко́рна и҆́мамы тѧ̀ ѻ҆́тче космо̀, въ дѣ́ланїи бо се́мъ и҆зрѧ́денъ показа́лсѧ є҆сѝ, ѻ҆́вцы ста́да твоегѡ̀ собира́ѧ и҆ ᲂу҆ча̀, за ни́хъ же и҆ живо́тъ сво́й положи́ти не ѿре́клсѧ є҆сѝ.

Сла́вы гѡ́рнїѧ прича́стника содѣ́ла тѧ̀ гдⷭ҇ь, космо̀ мч҃нче, здѣ̀ до́брѣ подвиза́всѧ за сло́во є҆гѡ̀, та́мѡ на нб҃сѣ́хъ вѣнце́мъ свѣ́тлымъ вѣнча́ешисѧ.

Бг҃оро́диченъ: Мч҃нкъ ли́цы тѧ̀ ѡ҆снова́нїе бы́ти вмѣнѧ́ютъ, дв҃о, по́двигꙋ си́хъ. Оу҆ крⷭ҇та̀ тѝ стоѧ́щей, ѻ҆рꙋ́жїе про́йде твою̀ непоро́чнꙋю дꙋ́шꙋ, ю҆́же бжⷭ҇твеннаѧ любы̀ ѿ ржⷭ҇тва̀ распалѝ.

Пѣ́снь г҃.

І҆рмо́съ: Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльщыѧ, дꙋхо́внѡ ᲂу҆твердѝ, въ бжⷭ҇твеннѣй твое́й сла́вѣ вѣнцє́въ сла́вы сподо́би.

Оу҆тверди́лъ є҆сѝ дꙋ́шꙋ твою̀ на ка́мени вѣростоѧ́тельномъ, ѿ млады́хъ ногте́й въ пра́вой вѣ́рѣ стоѧ́ти наꙋче́нъ бы́въ, ѿ неѧ́же и҆ въ ста́рости масти́тѣй не подви́глсѧ є҆сѝ, космо̀ премꙋ́дрѣ.

Пасы́й и҆ трꙋжда́ѧйсѧ ꙗ҆́кѡ патрїа́рси ѿ ю҆́ности твоеѧ̀, космо̀ пресвѵ́тере, пастѝ наро́ды жезло́мъ сщ҃е́нства призыва́ешисѧ промышле́нїємъ бжⷭ҇твеннымъ, ꙗ҆́коже дре́вле кꙋпиноглаше́ніемъ мѡѷсе́й.

Ѻ҆те́чества нбⷭ҇нагѡ жела́ѧ, ѻ҆те́чествꙋ земно́мꙋ спострада́ти не ѿве́рглсѧ є҆сѝ, ѻ҆́тче космо̀, но бѣ́дствїй сегѡ̀ ча́шꙋ кꙋ́пнѡ пїѧ́ше вѣ́рꙋ и҆ любо́вь свою̀ не ѡ҆ста́вльшимъ ѻ҆ц҃е́мъ.

Бг҃оро́диченъ: Ю҆́нице чⷭ҇таѧ, мт҃и нескве́рнаѧ, скве́рнꙋ дꙋ́шъ на́шихъ ѡ҆мы́й, ѿимѝ, ꙗ҆́кѡ всѝ согрѣша́емъ мно́гѡ ѿ не́мѡщи и҆ произволе́нїѧ, но ты̀, ꙗ҆́кѡ бл҃га́ѧ, премѣне́нїѧ бꙋ́ди хода́таица.

Сѣда́ленъ, гла́съ ѕ҃.

И҆́же а҆враа́ма на сѣ́чꙋ царе́мъ ᲂу҆крѣплѧ́ше, и҆́же наѵи́нови со́лнцемъ послꙋ́шавый, бж҃е, мѡѷсе́овы рꙋ́цѣ воздѣѧ́ннїи на сокрꙋше́нїе а҆мали́ка ᲂу҆крѣпи́вый, возвы́си и҆ рꙋ́цѣ твоѝ, въ трꙋдѣ́хъ и҆ моле́нїихъ состарѣ́вшїи, на сокрꙋше́нїе а҆мали́ковыхъ внꙋ́кѡвъ непра́вѡ ходѧ́щихъ, и҆ рꙋ́цѣ твоѝ въ селе́нїихъ го́рнихъ не и҆́мꙋтъ ѡ҆сла́бнꙋти.

Бг҃оро́диченъ: Є҆́ѵа прама́терь преще́нїѧ пло́дъ принесѐ на́мъ, є҆го́же вкꙋше́нїемъ сме́рти и҆ сра́ма позна́нїе ѡ҆брѣто́хомъ, дв҃а же ны́нѣ спⷭ҇нїѧ пло́дъ и҆зрастѝ, живота̀ и҆ сла́вы вкꙋше́нїе произволѧ́ющымъ плодоприне́сши. Ѡ҆ се́мъ торжествꙋ́юще, ка́кѡ тѧ̀ мт҃рь не нарече́мъ всѣ̑мъ живꙋ́щимъ, но́выѧ жи́зни нача́льнꙋю человѣ́кѡмъ.

Пѣ́снь д҃.

І҆рмо́съ: Сѣдѧ́й въ сла́вѣ на прⷭ҇то́лѣ бжⷭ҇тва̀ во ѻ҆́блацѣ ле́гцѣ, прїи́де і҆и҃съ пребжⷭ҇твенный нетлѣ́нною дла́нїю и҆ сп҃сѐ зовꙋ́щыѧ: сла́ва, хрⷭ҇тѐ, си́лѣ твое́й.

Распѧ́таго за ны̀ вы́нꙋ въ се́рдцы твое́мъ носѧ̀ па́мѧтованїемъ непреста́ннымъ, ѻ҆́тче космо̀, страда́нїѧ пꙋтє́мъ восте́клъ є҆сѝ во ст҃а̑ѧ нерꙋкотворе́ннаѧ, и҆дѣ́же пре́жде вни́де хрⷭ҇то́съ, вѣ̑чныѧ кро́вы на́мъ ᲂу҆строѧ́ѧй.

Є҆стєства̀ не́мощь, нижѐ лѣ́тъ преꙋтрꙋжде́нїе къ тѣле́сномꙋ ᲂу҆покое́нїю совѣ́тники не и҆збра́лъ є҆сѝ, космо̀ терпѣли́ве, ѻ҆ба́че дх҃а бо́дростїю пло́ти дебельство̀ ѿгонѧ́ѧ, на дѣ́ланїе своѐ до ве́чера жи́зни поспѣша́ше.

Ꙗ҆ви́сѧ мꙋ́жъ крѣ́покъ ты̀, ѻ҆́тче, землѝ сара́товстѣй бл҃гослове́нное прозѧбе́нїе, пра́вєднымъ въ вѣ́рѣ стоѧ́нїемъ сто́лпъ крѣ́пости є҆ѧ̀ созида́ѧ, да не подви́житсѧ ѿ ѡ҆снѡва́нїѧ и҆́стиннагѡ живота̀.

Бг҃оро́диченъ: И҆са́їа сла́вы твоеѧ̀ грѧдꙋ́щїѧ, дв҃о, предзрѣ́нїемъ ᲂу҆жасе́сѧ, зна́менїе спребыва́нїѧ бжⷭ҇твеннагѡ лю́демъ сїю̀ полага́етъ, ꙗ҆́кѡ николи́же си́це бы́сть въ человѣ́цѣхъ, є҆́же се́й дв҃ы ражда́ющїѧ чревоноше́нїѧ пло́дъ несказꙋ́ема бг҃а ꙗ҆вѝ.

Пѣ́снь є҃.

І҆рмо́съ: Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й, ты̀ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а и҆ родила̀ є҆сѝ безлѣ́тнаго сн҃а, всѣ̑мъ воспѣва́ющимъ тѧ̀ мі́ръ подава́ющаѧ.

Маккаве́и сщ҃е́ннѣйшїи кро́тость и҆ стра́хъ длѧ є҆ди́нагѡ бг҃а сохра́ньше, на гꙋ́бѧщыѧ і҆и҃лѧ до́бле воорꙋжи́шасѧ, и҆́хъ же ѻ҆́бразомъ и҆ ты̀, ѻ҆́тче, стꙋ̑дныѧ разврати́тєли ненаказꙋ́ємы зрѣ́ти не восхотѣ́въ, вѣ̑рныѧ на противꙋста́нїе си́мъ сподвига́ше.

Оу҆́зъ ᲂу҆тѣсне́нїе темни́чныхъ ᲂу҆́зами бл҃говѣ́стїѧ свѧ́занна не сотвори́тъ несвобо́дна, но́ситъ бо въ се́рдцы и҆ во ᲂу҆стѣ́хъ мі́рꙋ всемꙋ̀ неѡб̾име́нное сло́во.

Че́сти нетлѣ́нныѧ і҆ере́йства ст҃а́гѡ чре́во бг҃омъ и҆мꙋ́щымъ не ᲂу҆стꙋпи́лъ є҆сѝ, а҆́ще и҆ сꙋемꙋ́дрїю своемꙋ̀ ѻ҆́бщника тѧ̀ сотвори́ти жела́хꙋ, безꙋ́мнїи, ѻ҆ба́че растли́ти не возмого́ша твердѣ́йшаго и҆сповѣ́дника.

Бг҃оро́диченъ: Є҆лїсаве́тино сла́дкое проглаго́ланїе сбы́стсѧ, и҆́мже бл҃гословлѧ́ше тѧ̀, гдⷭ҇а мт҃рь и҆́стиннꙋю, и҆ ны́нѣ сѐ всѝ ро́ди чл҃вѣ́честїи бл҃жи́мъ тѧ̀, ꙗ҆́кѡ херꙋві́мъ сла́внѣйшꙋю.

Пѣ́снь ѕ҃.

І҆рмо́съ: Бжⷭ҇твенное сїѐ и҆ всечⷭ҇тно́е соверша́юще пра́зднество, бг҃омꙋ́дрїи, бг҃омт҃ре, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

Нѣ́сть премѣнє́нїѧ въ вѣ́цѣ грѧдꙋ́щемъ дꙋша́мъ бг҃олю́бцєвъ, ка́мене вѣ́ры, хрⷭ҇та̀, не подви́жꙋтсѧ, є҆го́же пред̾ человѣ́ки и҆сповѣ́даша на землѝ, того̀ ѡ҆брѣта́ютъ пред̾ а҆́гг҃лы нбⷭ҇ное и҆сповѣ́данїе, вню́дꙋже дости́гнꙋти поспѣши́лъ є҆сѝ, ѻ҆́тче, ѿ вѣ́ка сегѡ̀ премѣ́ннагѡ.

И҆скꙋша́еми, ꙗ҆́кѡ зла́то въ горни́лѣ, сребро̀ чⷭ҇тое принесо́стесѧ, ст҃і́и, въ сокрѡ́вищницы нбⷭ҇ныѧ, съ ни́миже и҆ до́брый косма̀ ны́нѣ тала́нтъ причтѐ, и҆́же въ дꙋшѝ свое́й и҆сповѣ́данїемъ прїꙋмно́жи.

Космо̀, ѻ҆́тче сщ҃е́ннѣйше, ты̀ побѣ̑дныѧ мч҃нкъ ли́ки свое́ю побѣ́дою дости́глъ є҆сѝ, є҆́же є҆́сть вѣ́ра твоѧ̀, є҆́юже ᲂу҆твержда́шесѧ, помозѝ на́мъ, грѣхо́мъ побѣжда́ємымъ, да не всꙋ́е на ны̀ и҆́мѧ хрⷭ҇то́во нарица́етсѧ.

Бг҃оро́диченъ: А҆́гг҃лѡмъ пѣ́нїи тѧ̀ велича́ющымъ человѣ́цы сподража́ти тща́тсѧ, а҆́ще и҆ грѣ́шни є҆смы̀, немощно́е на́ше славосло́вїе ѿ серде́цъ возноси́мое не пре́зри.

Конда́къ, гла́съ в҃:

Ѻ҆́тче, ѻ҆тцє́въ ᲂу҆краше́нїе, вои́стиннꙋ житїѐ твоѐ ᲂу҆краси́сѧ, космо̀, и҆́стинной вѣ́рѣ послѣ́дованїемъ, и҆ да́же до сме́рти и҆сповѣ́данїемъ є҆ѧ̀.

І҆́косъ:

Тѧ̀, ѻ҆́тче, мл҃твенника землѝ на́шеѧ позна́хомъ, є҆ѧ́же и҆ порожде́нїе бы́лъ є҆сѝ, тобо́ю ны́нѣ ᲂу҆краша́етсѧ и҆ ѡ҆ тебѣ̀ ра́дꙋетсѧ, ꙗ҆́кѡ дꙋшѝ твоеѧ̀ красотꙋ̀ гдⷭ҇ь на свѣ́щницѣ цр҃ко́вномъ ᲂу҆твердѝ, да свѣ́тъ и҆сповѣ́данїѧ твоегѡ̀ на ны̀, ча̑да твоѧ̑, возсїѧ́етъ, и҆ мра́къ ᲂу҆ны́нїѧ дале́че ѿжене́тъ ѿ серде́цъ бл҃гоче́стнѡ почита́ющихъ по́двиги и҆ дѣла̀ твоѧ̑, и҆́хже ра́ди съ любо́вїю вопїе́мъ тѝ: ра́дꙋйсѧ, ѻ҆́тче космо̀, і҆ере́ю и҆ мч҃нче хва́льный!

Пѣ́снь з҃.

І҆рмо́съ: Не послꙋжи́ша тва́ри, бг҃омꙋ́дрїи, па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ, пою́ще: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ. ́́

Цвѣ́ты добродѣ́телей носѧ̀, ѿсе́лѣ го́рнихъ садѡ́въ ᲂу҆ха́нїе предвосхи́тилъ є҆сѝ, и҆ въ си́хъ же ны́нѣ ꙗ҆́кѡ крі́нъ бл҃гоꙋха́нный, прⷭ҇нѡ ра́достїю цвѣте́ши неизглаго́ланною.

Є҆ди́ною человѣ́цы ᲂу҆мира́ютъ, а҆́ще дꙋ́шꙋ без̾ поро́ка соблюдꙋ́тъ, посемꙋ̀ тѣ́ло ᲂу҆бива́ющихъ не боѧ́тисѧ сло́во бж҃їе гл҃го́летъ, и҆ семꙋ̀ косма̀ мч҃нкъ бы́сть послꙋ́шатель вѣ́рнѣйшїй.

Врагѝ человѣ́кꙋ дома́шнїѧ є҆гѡ̀ ѕло́ба мі́ра сегѡ̀ содѣва́етъ, си́це и҆ тебѣ̀, ѻ҆́тче, го́рькое напое́нїе ѿ рꙋкꙋ̀ бли́жнихъ и҆ зна́емыхъ твои́хъ прїѧ́ти гдⷭ҇ь попꙋстѝ, є҆́же ты̀ и҆спи́лъ є҆сѝ терпѣливодꙋ́шне.

Бг҃оро́диченъ: Оу҆́тро мі́рови возсїѧ̀ но́вое въ ржⷭ҇твѣ̀ твое́мъ, пребл҃га́ѧ, ѻ҆́чи слѣпы̑мъ просвѣща́ющее, и҆ ра́дости серде́чныѧ и҆сполнѧ́ющее, ꙗ҆́кѡ взы́де сл҃нце пра́вды хрⷭ҇то́съ бг҃ъ, и҆ не за́йдетъ во вѣ́къ, нижѐ помрачи́тисѧ и҆́мать.

Пѣ́снь и҃.

І҆рмо́съ: Ѻ҆́троки благочести̑выѧ въ пещѝ ржⷭ҇тво̀ бг҃оро́дичо сп҃сло̀ є҆́сть, тогда̀ ᲂу҆̀бо ѻ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀ и҆ превозноси́те є҆го̀ во всѧ̑ вѣ́ки.

Кла́сы спѣ̑лыѧ рꙋ́цѣ твоѝ пожина́ша, є҆гда̀ зе́млю, ѿ неѧ́же ꙗ҆́кѡ всѧ́къ человѣ́къ и҆зы́де, воздѣ́ловаше, и҆ сѐ ꙗ҆́кѡ кла́съ златы́й дꙋша̀ твоѧ̀ восхище́на бы́сть въ жи́тницꙋ хрⷭ҇то́вꙋ, и҆ ꙗ҆́кѡ хлѣ́бное приноше́нїе на а҆лта́рь возложи́сѧ.

Ра́дость печа̑ли наслѣ́дꙋетъ въ пꙋте́хъ непоро́чныхъ, и҆ весе́лїѧ де́нь но́щи ѡ҆бстоѧ́нїй и҆ тѧ́готъ, та́же и҆ скѡ́рби и҆ ра̑ны полꙋ́нощи житїѧ̑ твоегѡ̀, ѻ҆́тче космо̀, дне́мъ несконча́емымъ преидо́ша въ ѡ҆би́телехъ свѣ́та.

А҆́ще и҆ подвиго́шасѧ а҆́дѡвы врата̀ на цр҃ковь хрⷭ҇то́вꙋ, мнѧ́ше вотщѐ въ землѝ на́шей потреби́ти ю҆̀, не поколеба́шесѧ до́блїй косма̀ і҆ере́й ѿ ка́мене вѣ́ры, и҆ ᲂу҆твердѝ ны̀ вопи́ти: ѻ҆тцє́въ и҆ на́шъ бж҃е, бл҃гослове́нъ є҆сѝ.

Бг҃оро́диченъ: Ше́дше, наро́ди, горѣ̀ ст҃ѣ́й бж҃їей поклони́мсѧ, ѿ неѧ́же спⷭ҇е́нїе на́мъ нерꙋкосѣ́чнѡ и҆зы́де и҆ мі́ръ собо́ю и҆спо́лни, хрⷭ҇то́съ бг҃ъ, ѻ҆тцє́въ и҆ на́шъ бж҃е, бл҃гослове́нъ є҆сѝ.

Пѣ́снь ѳ҃.

І҆рмо́съ: Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́юще сщ҃е́нное торжество̀ бг҃ома́тере, и҆ да вопїе́тъ: ра́дꙋйсѧ, всебл҃же́ннаѧ бцⷣе чтⷭ҇аѧ приснодв҃о.

Є҆ѵⷢ҇льски на землѝ пожи́ти сподо́би тѧ̀ хрⷭ҇то́съ гдⷭ҇ь, ѻ҆́тче космо̀ мꙋ́дре, лѣ́ствицею за́повѣдей є҆гѡ̀ восхо́дъ сотвори́ти, нището́ю дꙋхо́вною ѡ҆снова́нїе положи́въ, ра́достїю въ поноше́нїихъ наверши́лъ є҆сѝ бл҃же́нства.

Но́вагѡ стрⷭ҇тоте́рпца ѿ со́нма ве́лїѧ ст҃ы́хъ срѡ́дникъ на́шихъ прославлѧ́емъ тѧ̀, ѻ҆́тче, ѡ҆брѣто́хъ бо гдⷭ҇ь тѧ̀ вѣ́рна во всѣ́хъ дѣ́лѣхъ твои́хъ, ꙗ҆́же въ домꙋ̀ є҆гѡ̀ ꙗ҆́кѡ до́брый слꙋга̀ творѧ́ше, живо́тъ сво́й ѡ҆ ча́дѣхъ цр҃ко́вныхъ полага́юще.

И҆зба́ви мл҃твами твои́ми, ѻ҆́тче космо̀, ча̑да твоѧ̑ ѿ всѧ́кїѧ лю́тости противобо́рца и҆ црⷭ҇твїѧ бж҃їѧ ны̀ доведѝ, молѧ́щыѧсѧ тебѣ̀ те́плѣ, да возмо́жемъ ловле́нїѧ лꙋка́вагѡ и҆збѣ́гнꙋти и҆ коне́чнагѡ ѡ҆сꙋждє́нїѧ предста́тельствомъ твои́мъ.

Бг҃оро́диченъ: Є҆́же содѣ́ѧхомъ ѕла̑ѧ, не помѧнѝ на́мъ, бл҃га́ѧ сꙋ́щи, є҆гда̀ дꙋша̀ на́ша разлꙋча́тисѧ бꙋ́детъ настоѧ́щагѡ сегѡ̀ житїѧ̑, не возгнꙋша́тисѧ мо́лимъ тѧ̀ на́шегѡ недосто́инства, а҆́ще и҆ мно́гѡ согрѣша́емъ всѝ, бꙋ́ди на́мъ, мт҃и, застꙋ́пница.

Свѣти́ленъ:

Свѣ́тлости житїѧ̑ твоегѡ̀ поꙋчи́тисѧ дꙋша́ми и҆ ᲂу҆мы̑ подвиза́ющесѧ, просвѣще́нїѧ ѻ҆чесе́мъ на́шымъ сердє́чнымъ взыскꙋ́емъ и҆ коллꙋ́рїемъ мл҃твъ твои́хъ и҆сцѣле́нїѧ.

Бг҃оро́диченъ: Свѣ́тлꙋю царе́вꙋ пала́тꙋ и҆ черто́гъ прⷭ҇носꙋ́щнагѡ свѣ́та тѧ̀ вѣ́мы, дв҃о пресвѣ́тлаѧ, и҆ ѿкꙋ́дꙋ серафі́мскїѧ ѻ҆́чи ѡ҆брѧ́щемъ, во є҆́же воззрѣ́ти къ тебѣ̀.

Свя­той свя­щен­но­му­че­ник Кос­ма ро­дил­ся в сло­бо­де Ры­буш­ка Са­ра­тов­ской гу­бер­нии (ныне се­ло в Са­ра­тов­ском рай­оне) в 1869 го­ду в кре­стьян­ской се­мье. До ре­во­лю­ции он за­ни­мал­ся кре­стьян­ским тру­дом и не по­лу­чил ду­хов­но­го об­ра­зо­ва­ния. Бу­дучи глу­бо­ко ве­ру­ю­щим че­ло­ве­ком, Кось­ма Ни­ки­фо­ро­вич при­слу­жи­вал в мест­ной Хри­сто­рож­де­ствен­ской церк­ви и хо­ро­шо изу­чил бо­го­слу­жеб­ный устав. По­сле ре­во­лю­ции, несмот­ря на на­силь­ствен­ную лом­ку ос­нов рус­ской жиз­ни, он про­дол­жал за­ни­мать­ся зем­ле­па­ше­ством, со­дер­жал хо­зяй­ство и в сво­бод­ное вре­мя при­слу­жи­вал в хра­ме. В те го­ды ста­нов­ле­ния но­вой дес­по­тич­ной и ате­и­сти­че­ской вла­сти от­ста­и­ва­ние прин­ци­пов ре­ли­ги­оз­ной жиз­ни са­мо по се­бе бы­ло уже по­движ­ни­че­ством. И Кось­ма Ни­ки­фо­ро­вич ре­ша­ет­ся на та­кой жерт­вен­ный шаг. Он пе­ре­да­ет свое хо­зяй­ство до­че­ри Ана­ста­сии, а сам по­дал про­ше­ние о при­ня­тии свя­щен­но­го са­на. Отец Кос­ма был ру­ко­по­ло­жен во иерея в 1928 го­ду неза­дол­го пе­ред тем на­зна­чен­ным но­вым Са­ра­тов­ским Вла­ды­кой, мит­ро­по­ли­том Се­ра­фи­мом (Алек­сан­дро­вым), к Ры­буш­кин­ско­му Хри­сто­рож­де­ствен­ско­му хра­му.
В 1935 го­ду цер­ковь в сло­бо­де Ры­буш­ка бы­ла за­кры­та. В этих усло­ви­ях уси­лен­ных го­не­ний на Пра­восла­вие отец Кос­ма не пре­кра­щал сво­ей пас­тыр­ской де­я­тель­но­сти. У се­бя на до­му он со­би­рал при­хо­жан, со­вер­шал бо­го­слу­же­ния, чи­тал сель­ча­нам ду­хов­ную ли­те­ра­ту­ру, кре­стил мла­ден­цев - де­лал все, чтобы под­дер­жать ого­нек ве­ры Хри­сто­вой. Его де­я­тель­ность, не мог­ла оста­вать­ся неза­ме­чен­ной для вла­стей. 31 ок­тяб­ря 1937 го­да со­труд­ник рай­он­но­го от­де­ла НКВД по­лу­чил ор­дер на обыск и арест граж­да­ни­на Пет­ри­чен­ко Кузь­мы Ни­ки­фо­ро­ви­ча. В этот же день отец Кос­ма был пре­про­вож­ден в Са­ра­тов­скую тюрь­му. 2 но­яб­ря со­сто­ял­ся пер­вый и един­ствен­ный до­прос, во вре­мя ко­то­ро­го ры­буш­кин­ский на­сто­я­тель ка­те­го­ри­че­ски от­верг все воз­во­ди­мые на него об­ви­не­ния в ан­ти­со­вет­ской де­я­тель­но­сти.
На сле­ду­ю­щий день бы­ли до­про­ше­ны пять сви­де­те­лей, ко­то­рые да­ли нуж­ные "след­ствию" по­ка­за­ния. Вся след­ствен­ная про­це­ду­ра но­си­ла от­кро­вен­но под­лож­ный ха­рак­тер. 14 но­яб­ря бы­ло со­став­ле­но об­ви­ни­тель­ное за­клю­че­ние "по­па-ку­ла­ка Пет­ри­чен­ко Кузь­мы Ни­ки­фо­ро­ви­ча", ко­то­рый "под ви­дом ре­ли­ги­оз­ных мо­леб­нов до­мах кол­хоз­ни­ков про­во­дил ан­ти­со­вет­скую аги­та­цию". В тот же день за­се­да­ние су­деб­ной трой­ки при Управ­ле­нии НКВД по Са­ра­тов­ской об­ла­сти по­ста­но­ви­ло Пет­ри­чен­ко К. Н. - рас­стре­лять. Этот при­го­вор, увен­чав­ший доб­ро­го пас­ты­ря от­ца Кос­му нетлен­ным вен­цем му­че­ни­ка за имя Хри­сто­во, был при­ве­ден в ис­пол­не­ние в Са­ра­то­ве 16 но­яб­ря 1937 го­да ве­че­ром, в 22 ча­са. Ме­сто по­гре­бе­ния му­че­ни­ка оста­лось неиз­вест­ным.


По ма­те­ри­а­лу ста­тьи Мак­си­ма Пля­ки­на «Но­вый са­ра­тов­ский свя­той – свя­щен­но­му­че­ник Кос­ма».

Ис­точ­ник: http://www.newmartyros.ru