Канон святым преподобномученикам Александру Пересвету и Андрею Ослябе Радонежским

Пе́снь 1.

Ирмо́с: Мо́ря чермну́ю пучи́ну, невла́жными стопа́ми, дре́вний пешеше́ствовав Изра́иль, крестообра́зныма Моисе́овыма рука́ма, Амали́кову си́лу в пусты́ни победи́л е́сть.

Кре́пцыи столпи́ и забра́ла благоче́стия яви́стеся, сла́внии преподобному́ченицы Алекса́ндре и Андре́е. Те́х моли́твами, Христе́ Бо́же, уще́дри все́х на́с.

О всехва́льнии Госпо́дни преподобному́ченицы Алекса́ндре и Андре́е, ни беда́, ни ме́ч, ниже́ са́мая сме́рть возмого́ша разлучи́ти ва́с от Христа́, Его́же все́м се́рдцем возлюби́ли есте́.

Честна́ пред Го́сподем сме́рть ва́ша бы́сть, святи́и преподобному́ченицы Алекса́ндре и Андре́е, ю́же за дру́ги своя́ прия́ли есте́ и безче́стнаго врага́ посрами́ли есте́.

Богоро́дичен: Иму́щи, Ма́ти Чи́стая, дерзнове́ние ко Христу́ Бо́гу, моли́ при́сно от враго́в ви́димых и неви́димых и вся́каго вре́да изба́витися на́м и благода́рно сла́вити Его́, Пренепоро́чная, утверди́.

Пе́снь 3.

Ирмо́с: Не му́дростию и си́лою, и бога́тством хва́лимся, но Тобо́ю, О́тчею ипоста́сною му́дростию, Христе́, не́сть бо свя́т, па́че Тебе́, Человеколю́бче.

Сме́ртию вре́менною жи́знь ве́чную приобре́тше, преподобному́ченицы Алекса́ндре и Андре́е сла́внии, Ца́рствия Небе́снаго сподо́бистеся. Сего́ ра́ди прославля́ем ва́с и ублажа́ем.

Правосла́вия защи́тницы, неве́рных посрами́телие, благоче́стия столпи́, Госпо́дни преподобному́ченицы Алекса́ндре и Андре́е, мы́слию чи́стою пе́сненно ва́с ублажа́ем.

Христо́ви во́ини, схи́мницы Алекса́ндре и Андре́е, безпло́тных сожи́телие, вы́ Кресто́м, я́ко броне́ю, обо́лкшеся, на сопротивобо́рца ополчи́стеся и того́ му́жески попра́сте.

Богоро́дичен: Покро́ве и Избавле́ние на́ше, Стено́ и Держа́во благохва́лящих Тя́, Многопе́тая, изми́ на́с скорбе́й вся́ческих и обстоя́ний жите́йских, вы́ну соблюда́ющи, я́ко да сла́вим Тя́.

Седа́лен, гла́с 4:

В Небе́сныя оби́тели все́льшеся, преподобному́ченицы Алекса́ндре и Андре́е, сла́ву присносу́щную прия́ли есте́, и ны́не помина́йте на́с, чту́щих ве́рою свяще́нную и честну́ю ва́шу па́мять, схимона́си во́ини присносла́внии.

Богоро́дичен: Всесвята́я Де́во, Влады́чице, ту́не уще́дри ны́, не и́мамы бо ины́я наде́жды на спасе́ние, а́ще не Твое́ заступле́ние и покро́в Тво́й.

Пе́снь 4.

Ирмо́с: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не Свое́м, досто́йно взыва́ющи: сла́ва си́ле Твое́й, Го́споди.

О святи́и преподобному́ченицы Алекса́ндре и Андре́е, вы́, ду́ши своя́ за дру́ги положи́ти восхоте́вше, кро́вь пролия́ли есте́ и ра́дость Небе́сную восприя́ли есте́.

Вои́стину добра́ ва́ша ку́пля, святи́и преподобному́ченицы Алекса́ндре и Андре́е, тле́нная бо презре́вше, нетле́нная восприя́сте, ны́не же, со А́нгелы ликовству́юще, воспева́ете Тро́ицу Единосу́щную.

Я́ко до́блии во́ини единому́дренно ве́ровавше, сме́рти не убоя́лися есте́, святи́и, и, сконча́вше тече́ние, с Небесе́ побе́ду прия́ли есте́.

Богоро́дичен: Души́ та́йная прегреше́ния лечбо́ю милосе́рдия исцели́, Пресвята́я Богоро́дице, и утиши́ плотско́е стремле́ние, враго́в ухищре́ния посрамля́ющи.

Пе́снь 5.

Ирмо́с: Ты́, Го́споди мо́й, Све́т в ми́р прише́л еси́, Све́т Святы́й, обраща́яй из мра́чна неве́дения, ве́рою воспева́ющия Тя́.

Щито́м ве́ры и благоче́стия вооружи́вшеся, боже́ственнии преподобному́ченицы, устреми́стеся ко бра́ни и су́етную си́лу врага́ погуби́сте, пе́снь побе́дную Христу́ пою́ще.

Пове́ржен бы́сть льсте́ц при нога́х нельсти́вых преподобному́ченик, во́инов Христо́вых, ти́и же ны́не со А́нгелы ликовству́ют, ра́дости неизрече́нныя исполня́ющеся.

Ору́жие крепча́йшее, святы́й Кре́ст, взе́мше, преподобному́ченицы Алекса́ндре и Андре́е, всю́ си́лу губи́теля врага́ до конца́ победи́ли есте́.

Богоро́дичен: Мно́гия щедро́ты Твоя́ спаса́ют на́с, Пречи́стая Де́во, от грехо́в и напа́стей разли́чных. Ты́ бо, ро́ждшая Бо́га, спаса́еши ми́р ве́сь.

Пе́снь 6.

Ирмо́с: Пожру́ Ти́ со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею Кро́вию.

Благослове́нием и моли́твою а́ввы Се́ргия огражде́ни, непобеди́мии ору́жницы, схимона́си во́ини, до́блественно на супоста́ты вооружи́стеся, ле́стная и лука́вая те́х разори́вше.

Си́лою боже́ственною немощно́е ва́ше укре́пльше, до́блии преподобному́ченицы Алекса́ндре и Андре́е, кре́пость борца́ всеконе́чней па́губе преда́сте.

Я́ко смире́ннии послу́шницы, добротво́рному и кра́сному по́двигу сочета́вшеся, дерзнове́ние пред Бо́гом улучи́сте о во́инстве правосла́внем при́сно хода́тайствовати.

Богоро́дичен: Ты́, Пречи́стая Де́во Богоро́дице, си́лою Креста́ Сы́на Твоего́ и моли́твами Твои́ми вооружа́еши рабы́ Твоя́. Те́мже воспева́ем сла́ву Твою́.

Конда́к, гла́с 7:

На по́ли Кулико́ве враги́ нечести́выя победи́сте и венцы́ сла́вы увенча́стеся, преподобному́ченицы Алекса́ндре и Андре́е, моли́те Христа́ Бо́га и на́м врага́ ро́да челове́ческаго побежда́ти, Правосла́вие храни́ти, душа́м же на́шим улучи́ти ве́лию ми́лость.

И́кос:

Преподобному́ченик Христо́вых Алекса́ндра и Андре́я, прииди́те, лю́дие вси́, почти́м пе́ньми и пе́сньми духо́вными, свети́льники ми́ра и ве́ры пропове́дники, исто́чники исцеле́ний приснотеку́щия, из ни́хже ве́рнии благода́тныя да́ры почерпа́ют. Те́х моли́твами, Христе́ Бо́же, ми́р да́руй Оте́честву на́шему и душа́м на́шим ве́лию ми́лость.

Пе́снь 7.

Ирмо́с: В пещи́ Авраа́мстии о́троцы Перси́дстей, любо́вию благоче́стия па́че, не́жели пла́менем опаля́еми, взыва́ху: благослове́н еси́ в хра́ме сла́вы Твоея́, Го́споди.

Моли́твами преподо́бнаго Се́ргия кре́пцыи во́ини на враги́ я́вльшеся, некре́постную и́х низложи́сте си́лу, преподобному́ченицы Христо́ви достохва́льнии.

Сла́сти ми́ра сего́ отри́нувше, послуша́нием на страда́ние до́блественне устреми́лися есте́ и, кро́вь свою́ за дру́ги пролия́вше, Христу́ усво́илися есте́.

Тве́рдыми ва́шими во́инскими по́двиги, я́ко жи́лами кре́пкими, свире́пство неве́рных ага́рян удави́сте, хотя́щих Оте́чество на́ше злокова́рно погуби́ти. Те́мже и ра́йския жи́зни яви́стеся насле́дницы.

Богоро́дичен: Умири́ ми́р, Христе́, мольба́ми Богоотрокови́цы Чи́стыя, бу́рю грехо́вную низлага́я, и тишину́ неизглаго́ланную в сердца́ на́ша низпосли́.

Пе́снь 8.

Ирмо́с: Ру́це распросте́р Дании́л, льво́в зия́ния в ро́ве затче́, о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те, вся́ дела́ Госпо́дня, Го́спода.

Дру́зи Христо́ви, игу́мена Се́ргия послу́шницы, те́плии челове́ком засту́пницы и во́ином правосла́вным помо́щницы, преподобному́ченицы Алекса́ндр и Андре́й досто́йно ны́не ублажа́ются.

От крове́й свои́х преподобному́ченицы Алекса́ндр и Андре́й пресве́тлую очервлени́ша схи́му и, то́ю украси́вшеся, с Го́сподем при́сно ца́рствуют.

Ополчи́вшеся на сопроти́вных, святи́и преподобному́ченицы боже́ственными ору́жии си́х победи́ша и венцы́ побе́дныя от Бо́га прия́ша.

Богоро́дичен: Богороди́тельнице Пречи́стая, Засту́пнице Усе́рдная, святы́м о́бразом Твои́м укрепи́ла еси́ правосла́вныя в сме́ртней бра́ни на по́ли Кулико́ве, зе́млю на́шу от враго́в спаса́ющи.

Пе́снь 9.

Ирмо́с: Ка́мень Нерукосе́чный, от Несеко́мыя Горы́ Тебе́, Де́во, Краеуго́льный отсече́ся, Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

В ми́ре правосла́внем почита́ема имена́ ва́ша, страда́льцы до́блии, за дру́ги бо своя́ сме́рть прия́ли есте́. Те́мже свяще́нницы ва́м покланя́ются, во́ини восхваля́ют и вси́ лю́дие, ра́дующеся, согла́сно вопию́т: честна́ пред Го́сподем сме́рть преподо́бных Его́.

Кре́пцы на стра́сти, си́льни на враги́ яви́стеся, преподобному́ченицы, схимона́си во́ини прехва́льнии, зако́нно бо пострада́вше, венца́ми нетле́нными от Бо́га венча́стеся.

Кре́ст Христо́в, я́ко Ору́жие непобеди́мое, взе́мше, си́лу диа́волю упраздни́ли есте́ и, венцы́ Небе́сныя прие́мше, предста́телие кре́пцыи на́м яви́лися есте́.

Богоро́дичен: Погуби́ наве́ты вра́жия, я́же на ны́ воздвиза́емыя, и ра́дости испо́лни упова́ющих на Тя́, Ма́ти Бо́га Вы́шняго, да вси́ усе́рдно заступле́ние Твое́ сла́вим.

Свети́лен.

Вооружи́вшеся во всеору́жие доброде́телей Христо́вых, свети́льницы ми́ру яви́стеся и, ополче́ния вра́жия низложи́вше, венцы́ нетле́нныя прия́сте, преподобному́ченицы Христо́ви Алекса́ндре и Андре́е, терпеливоду́шнии.

Сла́ва, и ны́не: Низложи́ Влады́чице, враго́в на́ших шата́ния, Тя́ бо еди́ну и́мамы Предста́тельницу, и Наде́жду и По́мощь кре́пкую. Ты́ на́с соблюди́, Пречи́стая, вся́каго наве́та вра́жия на́с избавля́ющи.