Канон святым преподобным Дамиану, пресвитеру, целебнику, Иеремии и Матфею прозорливым, Печерским, в Ближних пещерах

Пе́снь 1.

Ирмо́с: Спаси́телю Бо́гу, в мо́ри лю́ди немо́крыми нога́ми наста́вльшему и фарао́на со всево́инством пото́пльшему, Тому́ Еди́ному пои́м, я́ко просла́вися.

Спаси́телю Бо́гу хвале́ние принесе́м, славосло́вяще уго́дника Его́ преблаже́ннаго Дамиа́на, неду́жным му́драго врача́, и возопии́м Да́вшему такова́я дарова́ния, я́ко просла́вися.

Наста́вника своего́ равноа́нгельному житию́ подража́л еси́ ре́вностию непреста́нною, от него́же наста́влен, украси́лся еси́ доброде́телию, немо́лчно во хвале́нии по вся́ но́щи без сна́ пребыва́я и взыва́я Бо́гу, я́ко просла́вися.

С проро́ки предстоя́ ны́не Спаси́телю Бо́гу, я́ко дерзнове́ние имы́й, моли́ся благода́тию облиста́ти сердца́, с ве́рою тя́, Богодухнове́нне Иереми́е, блажа́щих и Спаси́телю вопию́щих, я́ко просла́вися.

Разу́мное о́ко Бо́жие всеви́дящее, ви́дя твое́ чи́стое се́рдце, блаже́нне Матфе́е, даде́ тебе́ да́р та́йны челове́ческия ве́дати и открыва́ти на по́льзу все́м, да тобо́ю наставля́еми пою́т Бо́гу, я́ко просла́вися.

Богоро́дичен: Разу́мное со́лнце су́щи Тричи́сленнаго Божества́ Де́во Чи́стая, на́ша умы́ помраче́нныя страстьми́ и сластьми́ озари́, да Тобо́ю просвеща́еми, пое́м Бо́гу, я́ко просла́вися.

Пе́снь 3.

Ирмо́с: Си́лою Креста́ Твоего́, Христе́, утверди́ мое́ помышле́ние, во е́же пе́ти и сла́вити спаси́тельное Твое́ вознесе́ние.

Си́лою Бо́жиею укрепля́ем, бы́л еси́, блаже́нне, кро́ток и молчали́в, к Бо́гу бесе́дуя те́плыми моли́твами, и упражня́яся приле́жным чте́нием Святы́х Писа́ний, и те́м утвержда́яся о Го́споде, я́коже сожи́тельствующии о тебе́ я́сно пове́даху.

Бра́шно твое́ и питие́ бы́сть Сло́во Бо́жие, и́мже пита́л еси́ ду́шу твою́, преподо́бне, те́ло же твое́ хле́бом то́кмо и водо́ю, и си́м пита́лся еси́ до дне́ сме́рти своея́, вся́ ду́ху покоря́я востаю́щия стра́сти.

В ста́рости масти́те, испо́лнив ле́та своя́, Иереми́е, прия́л еси́ да́р прови́дети та́йны серде́чныя, и облича́л еси́ на едине́ лука́вая челове́ческая помышле́ния, и наставля́л блюсти́ся от диа́воля сове́та.

К первонача́льным отце́м Пече́рским прише́д, всели́лся еси́ с ни́ми, и и́ночествуя, вся́ по́хоти теле́сныя победи́л еси́, те́мже прия́л еси́ от Бо́га дарова́ние, я́ве зре́ти ли́ца подзе́мных ефио́пов, Матфе́е чу́дне.

Богоро́дичен: Преобразу́ющияся в разли́чныя ви́ды лука́выя ефио́пы и де́йствующия мы́сленне во удесе́х на́ших, Богоро́дице, посеще́нием лица́ Твоего́ устрани́ и прожени́, да без смуще́ния пое́м Твою́ спаси́тельную си́лу.

Седа́лен, гла́с 8:

Я́ко сугу́бую прие́мый благода́ть от Бо́га, Дамиа́не, сугу́быя исцеля́еши стра́сти: душе́вныя приле́жными моли́твами, теле́сныя же возложе́нием руки́ и пома́занием свята́го еле́а; на́с, стра́ждущих обои́ми неду́ги, уврачу́й, и отжени́ ураня́ющия ны́ стра́сти, и моли́ся Христу́ Бо́гу получи́ти ве́чный живо́т почита́ющим свято́е успе́ние твое́.

Богоро́дичен: Всенепоро́чная Неве́сто, простра́нное селе́ние Бо́жия Сло́ва, страсте́й мя́, су́ща скве́рное селе́ние, очи́сти и све́тлое обита́лище доброде́телем покажи́, прожени́ тьму́ беззако́ний и прича́стия сподо́би Све́та невече́рняго, моли́твами Твои́ми, да пою́ Твою́ несказа́нную ми́лость.

Пе́снь 4.

Ирмо́с: Услы́шах слу́х си́лы Креста́, я́ко ра́й отве́рзеся и́м, и возопи́х: сла́ва си́ле Твое́й, Го́споди.

Благово́нный гро́зд виногра́да Бо́жия Ма́тере показа́лся еси́, напое́н росо́ю уче́ний преподо́бных оте́ц, и иска́паеши вино́ исцеле́ний все́м, к тебе́ с ве́рою притека́ющим, Дамиа́не, Бо́жий служи́телю.

Ору́жием ве́ры и любве́ пла́менем огражде́н бы́в, блаже́нне, отгна́л еси́ враго́в, вредя́щих неду́гами челове́ки; приле́жная бо твоя́ моли́тва, о́блаки проходя́щи, прогоня́ше боле́зни, досточу́дне Дамиа́не.

Я́ко прови́дец челове́ческих помышле́ний, предзре́л еси́ плещи́ даю́щих враго́м и хотя́щих изы́ти от святы́я сея́ огра́ды, растворе́нным любве́ сло́вом нака́зовал еси́, Иереми́е, ста́ти к боре́нию кре́пко и про́тиву враго́в непоколеби́му бы́ти.

Открове́нными очи́ма я́ве узре́л еси́ еди́ною в це́ркви обходя́ща бе́са во о́бразе во́ина и мета́юща на бра́тию от воскри́лия ри́з, лепко́выя цве́тцы, да исхо́дят пре́жде благослове́ния сно́м омраче́нны, те́х, о́тче, нака́зовал еси́ стоя́ти неле́ностно и кре́стным ору́жием себе́ огражда́ти.

Богоро́дичен: Обстои́ма мя́ де́монскими полки́ и устреля́ема ласкосе́рдствующими страстьми́, Ма́ти Бо́жия, укрепи́ и пода́ждь ми́ благода́ть победи́ти те́х ле́стныя ко́зни, да пребу́ду поя́ Твою́, Чи́стая, по́мощь.

Пе́снь 5.

Ирмо́с: У́треннююще, вопие́м Ти́: Го́споди, спаси́ ны́. Ты́ бо еси́ Бо́г на́ш, ра́зве бо Тебе́ ино́го не зна́ем.

О все́х, в боле́зни приходя́щих, блаже́нный тво́й наста́вник Феодо́сий повелева́ше тебе́ моли́тву твори́ти, ты́ же смире́н сы́й и благопокори́в недосто́йна себе́ вменя́л еси́ исцеле́ния да́ра, но повеле́ние творя́ отца́ своего́, моли́твою и еле́ем подава́л еси́ здра́вие боля́щим.

Я́ко до́бр пу́тник, до́бре ше́ствовал еси́ жи́зни сея́ пу́ть, подтвержда́я себе́ и́ноческими по́двиги, егда́ же доспе́л еси́ кончи́ны своея́, недоста́точное боле́знию наверши́в, чи́ст па́че зла́та отше́л еси́ в поко́й безболе́зненный.

Прозре́нием от Бо́га тебе́ да́нным, что́ ли́бо ви́дел еси́, блаже́нне, нело́жно вся́кому ска́зовал еси́, и сбыва́шеся сло́во твое́ в пра́вду; те́м, я́ко проро́ком сла́ву и преподо́бным состоя́теля, досто́йно тя́ ублажа́ем, Иереми́е.

Никогда́же изходи́л еси́ из це́ркве пре́жде оконча́ния пе́ния, но всегда́ последи́, несы́тное име́я жела́ние во славосло́вии Бо́жии пребыва́ти, сего́ ра́ди Бо́г просла́ви тя́ пред А́нгелы и челове́ки, Богоно́сне Матфе́е.

Богоро́дичен: Святу́ю го́ру Бо́жию и до́м Сла́вы Вы́шняго ве́дуще Тя́, Чи́стая Де́во, во смире́нии припа́дая, молю́ся: возведи́ мя́ на высоту́ доброде́тельнаго жития́ и сотвори́ мя́ чи́стый хра́м к восприя́тию Боже́ственных дарова́ний.

Пе́снь 6.

Ирмо́с: Обы́де мя́ бе́здна, гро́б мне́ ки́т бы́сть, а́з же возопи́х к Тебе́, Человеколю́бцу, и спасе́ мя́ десни́ца Твоя́, Го́споди.

Ше́ствовав на земли́ пра́выя стези́, при кончи́не моли́тву к Венцеда́вцу раствори́л еси́ слеза́ми, прося́ Того́ бла́гость, е́же не лиши́ти тя́ Ца́рствия Небе́снаго и сожи́тия отца́ твоего́ преподо́бнаго Феодо́сия.

В Све́те непристу́пнем с преподо́бными прича́стия не лиши́тися жела́я, со смире́нием ко Христу́ возсыла́л еси́ мольбы́, и получи́л еси́, е́же проси́л: му́дрый бо Соде́тель извести́ тебе́, извеще́нием чу́дным, я́ко да благонаде́жден оти́деши в поко́й пра́ведных почи́ти.

В ста́рости глубо́це обнови́ся ю́ность твоя́ духо́вне, преподо́бне Иереми́е, оста́вль бо ве́тхий покро́в теле́сный, в но́вое отше́л еси́ душе́ю селе́ние, к дре́вним проро́ком на зре́ние Сла́вы Бо́жия.

Седя́й еди́ною под церко́вным би́лом, узре́л еси́ бию́щую во две́ри серде́ц на́ших вели́кую толпу́ мра́чных бесо́в, и вопроси́в, уве́дал еси́ и́х к не́коему бра́ту иду́щих, сего́ ра́ди мно́гих от бра́тии любе́зно са́м нака́зовал еси́, ка́ко о́ных блюсти́ся; научи́ у́бо и на́с, блаже́нне, да не вни́дут в две́ри серде́ц на́ших.

Богоро́дичен: Изба́ви мя́, Влады́чице, бесо́вских страсте́й обстоя́ний, да не вни́дут в до́м души́ моея́ те́х лука́выя то́лпы, загради́ мы́сленныя две́ри се́рдца стра́хом и да́ждь ми́ бо́дрствовати и внима́ти спасе́нию моему́.

Конда́к, гла́с 2:

Я́коже дре́внии проро́цы благода́ть проро́чествия прие́мше и нело́жне ду́хом предзре́вше, прореко́ша наити́ хотя́щая, та́ко и вы́ в жи́зни на́шей зла́я, грехо́в ра́ди на́ших на ны́ гряду́щая, предвозвести́сте; и ны́не да не пости́гнут ны́ зла́я, испроси́те от Христа́ Бо́га исправле́ние дело́м на́шим и ве́лию ми́лость.

И́кос:

Тезоимени́тым свои́м подража́вше и А́нгельски на земли́ пожи́вше, вели́ких дарова́ний сподо́бистеся Иереми́е и Матфе́е, предвозвеща́юще бо бу́дущая, мно́гих ко исправле́нию приведо́сте, бе́сы посрами́сте, челове́ки удиви́сте; и ны́не по вре́менной жи́зни в безконе́чной с А́нгельскими ли́ки живу́ще, проси́те у Христа́ Бо́га исправле́ния дело́м на́шим и ве́лия ми́лости.

Пе́снь 7.

Ирмо́с: В пещи́ о́гненней песносло́вцы спасы́й о́троки: благослове́н Бо́г оте́ц на́ших.

Предста́ тебе́ А́нгел Бо́жий, свя́те Дамиа́не, во о́бразе преподо́бнаго Феодо́сия, и па́д на пе́рси твоя́, лобыза́ше любе́зно, я́ко люби́маго Бо́гу, челове́ком же и А́нгелом, ты́ же воспе́л еси́: благослове́н Бо́г оте́ц на́ших.

Явле́йся ре́кл е́сть: се́ ча́до, о не́мже мо́лишися Го́сподеви, по́слан е́смь извести́ти тебе́, я́ко по проше́нию твоему́ бу́дет ти́, и водвори́шися в Ца́рствии Бо́жии со святы́ми. Сия́ словеса́ слы́шав, ра́достно воспе́л еси́, Дамиа́не: благослове́н Бо́г оте́ц на́ших.

Что́ е́сть сладча́е и что́ е́сть бо́льшее, я́ко е́же жи́ти со святы́ми вку́пе, иде́же живе́т Христо́с, во Све́те невече́рнем, та́мо и тебе́ угото́вася упокое́ния ме́сто, Дамиа́не, е́же и на́м получи́ти, моли́ся, пою́щим: благослове́н Бо́г оте́ц на́ших.

В ли́це со святы́ми, в че́сти с проро́ки, в стоя́нии со А́нгелы сподо́блен еси́, учине́н, Иереми́е, бы́ти от Бо́га, Ему́же моли́ся и на́м чи́сте предста́ти без возду́шных препя́тий пою́щим: благослове́н Бо́г оте́ц на́ших.

Любо́вь име́я ко бра́тии при́сно, Матфе́е, вся́ открове́нная тебе́ открыва́л еси́ на по́льзу все́м и нака́зовал еси́ ке́ллии приседе́ти, пла́катися же о гресе́х свои́х и пе́ти: благослове́н Бо́г оте́ц на́ших.

Богоро́дичен: Изба́вленнии Тобо́ю, Пречи́стая, от все́х бесо́вских наве́тов, непреста́нно Ро́ждшемуся из Тебе́ зове́м: благослове́н Бо́г оте́ц на́ших.

Пе́снь 8.

Ирмо́с: Из Отца́ пре́жде ве́к рожде́ннаго Сы́на и Бо́га, и в после́дняя ле́та воплоще́ннаго от Де́вы Ма́тере, свяще́нницы по́йте, лю́дие превозноси́те во вся́ ве́ки.

Я́вльшагося тебе́ от Отца́ Све́тов по́сланна, разуме́л еси́ бы́ти наста́вника твоего́ Феодо́сия Богоно́снаго, его́же пригласи́в, извести́л еси́, что́ предста́вый глаго́лаше, и что́ тебе́ обеща́, Дамиа́не; то́йже пове́даемым удивля́шеся, и превознося́ше Го́спода во ве́ки.

С весе́лием истя́зовал еси́ обеща́ния от наста́вника твоего́ и отца́, глаго́лющи: бу́дет ли, о́тче, е́же на проше́ние мое́ обеща́л ми́ еси́? То́й же отвеща́: не ве́м, ча́до, о не́мже вопроша́еши мя́, А́нгел бо Бо́жий бы́сть, обеща́вый тебе́, и то́й всели́т тя́ та́мо, иде́же пою́т святи́и Го́сподеви во ве́ки.

Ра́достен и благонаде́жден сы́й от сицева́го извеще́ния, отше́л еси́ в светоно́сная ме́ста светоно́сными проводи́м а́нгелы, с ни́миже и пое́ши Го́спода во ве́ки.

Вся́кое твое́ ве́дение бя́ше спаса́ющимся в наказа́ние, преподо́бне Матфе́е, ниже́ нача́льствующий отри́ну твое́ наказа́ние, и́мже возбужде́н доспе́ скоре́е блаже́нства, иде́же святи́и превозно́сят Го́спода во ве́ки.

По мно́гих открове́ниих отше́л еси́ в ста́рости глубо́це, Матфе́е, открове́нным лице́м Престо́лу Бо́жию предстоя́ти: моли́ся же и о на́с, свя́те, да с тобо́ю сподо́бимся Го́спода ви́дети и превозноси́ти хвала́ми во ве́ки.

Богоро́дичен: Еди́н Сы́й существо́м от Тро́ицы Бо́г Сло́во, в Твою́, Чи́стая Де́во, утро́бу всели́ся, и на́м соесте́ствен пло́тию яви́ся, Его́же благословя́ще превозно́сим во ве́ки.

Пе́снь 9.

Ирмо́с: Тя́ па́че ума́ и словесе́ Ма́терь Бо́жию, в ле́то Безле́тнаго неизрече́нно ро́ждшую, ве́рнии единому́дренно велича́ем.

Что́ тя́ нареку́, блаже́нное сие́ ме́сто: тве́рдь ли Небе́сную, на не́йже тро́ица оте́ц, а́ки зве́зды, чудесы́ сия́ют и озаря́ют честну́ю и́х па́мять пра́зднующих, и пе́сньми благоче́стно и́х ублажа́ющих.

От вре́меннаго све́та к Ве́чному преста́вльшеся Све́ту, светоноше́нии ва́шими на́ша сердца́ просвети́те и испроси́те моли́твами ва́шими, да в све́те за́поведей Госпо́дних ходя́ще, у́зрим с ва́ми Све́т невече́рний.

Благода́ть исцеле́ний от Бо́га святи́и еще́ в жи́зни се́й прие́мше, на́с страстьми́ одержи́мых ско́ро исцели́те, ве́рно бо притека́ем к моще́м ва́шим и, моля́щеся, пе́сньми велича́ем.

Просла́вим Бо́га, святы́х Свои́х Дамиа́на, Иереми́ю и Матфе́я просла́вльшаго, и́же Его́ в телесе́х, а́ки А́нгелы пожи́вше, просла́виша, Его́же и мо́лим, да па́мять и́х дне́сь хвала́ми велича́ющих, не лиши́т на́с с ни́ми Небе́сныя Своея́ Сла́вы.

Богоро́дичен: Доспе́х кончи́ны стихосло́вия святы́м твои́м в па́мять и помяну́х кончи́ну, егда́ прии́дет вре́мя разреши́тися мне́ от соу́з плотски́х, трепе́щу, я́ко гряде́т де́нь Су́дный, от него́же кто́ мя́ изба́вит, а́ще не Ты́, Чи́стая Де́во? Те́мже к Тебе́ вы́ну во хвале́нии прибега́ю.

Свети́лен:

Свя́то пожи́вше на земли́, свя́ти есте́ и на Небеси́, и с А́нгельскими ли́ки предста́сте Бо́гу; от Него́же прие́мше возме́здие трудо́м свои́м, на́с не забу́дите, но, руководя́ще, наста́вите на пу́ть пра́в, да те́м ходя́ще, обря́щем ми́лость в де́нь Су́дный.

Богоро́дичен: Свя́т хра́м Тво́й зде́ и ди́вен в пра́вду, Сама́ бо, су́щи хра́м Бо́жия сла́вы, Свои́м про́мыслом создала́ еси́ и украси́ла еси́ оте́ц святы́х равноа́нгельным житие́м на́шего ра́ди жи́тельства; злообра́зие на́ше в благоле́пие претвори́, да вожделе́ет Ца́рь добро́ты ду́ш на́ших, и излие́т на ны́ вели́кую Свою́ ми́лость.