Каноны святому преподобному Александру Свирскому

Припев: Преподо́бне о́тче Алекса́ндре, моли́ Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 30 апреля (17 апреля ст. ст.); 12 сентября (30 августа ст. ст.)

Глас 4.

Пе́снь 1.

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Боже́ственнаго и Пресвята́го Ду́ха блиста́яся благода́тию, светоно́сное, Алекса́ндре, и честно́е соверша́ющих твое́ успе́ние, све́тлою моли́твою твое́ю страсте́й мглу́ очи́сти.

От ю́ности, преподо́бне, яре́м Госпо́день восприе́м, в бразда́х твоего́ се́рдца пшени́цу се́ял еси́ духо́вну и кла́с пожа́л еси́, утвержда́ющь ду́ши, богоблаже́нне.

Светоно́сная па́мять твоя́ на́м дне́сь возсия́, я́ко со́лнечная луча́, Алекса́ндре, исправле́ний твои́х, страсте́й на́ших отъе́млющи о́блак, ю́же сотворя́юще, ве́рою тя́ и любо́вию ублажа́ем.

Богоро́дичен: Зачала́ еси́, Пречи́стая, неизрече́нным сло́вом содержа́щаго земны́я концы́ и Сего́ родила́ еси́, Его́же моли́ приле́жно поми́ловати на́с.

И́н. гла́с 2.

Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Боже́ственную па́мять твою́, богому́дре о́тче, ве́рно пра́зднующе, вся́ческих Го́спода при́сно сла́вим, тя́ просла́вльшаго мно́гими чудесы́.

Безстра́стия жела́нием те́плым, о́тче, одержи́мь, ве́щныя увяди́л еси́ страсте́й во́лны, Алекса́ндре, и дости́гл еси́, любо́вию вперя́емь, присносу́щнаго сия́ния, преблаже́нне, Божества́.

Доброде́тельно изнача́ла прие́м житие́, пребога́те, ба́нею, о́тче, пакибытия́, да́р духо́вный от младе́нства боже́ственне, твоея́ души́ благоле́пие, Алекса́ндре, показа́л еси́, со́лнца светле́йше.

Богоро́дичен: Мла́до Отроча́ па́че сло́ва родила́ еси́, Ве́тхаго Де́ньми, но́ву на земли́ стезю́ доброде́телей показа́вша. Те́м уго́дник Тво́й при́сный Алекса́ндр, Отрокови́це, любо́вию снеда́емь, се́й хра́м Тебе́ созда́.

Пе́снь 3.

Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Жезло́м воздержа́ния страстно́е мо́ре, о́тче, раздели́в, преше́л еси́ неистопле́н, и преде́л дости́гл еси́ и́стиннаго безстра́стия, и Бо́гу предстоя́, бесе́довал еси́ ума́ чистото́ю.

Кто́ твоя́ по́двиги, Алекса́ндре, по достоя́нию изрещи́ возмо́жет? Ты́ бо, пути́ жесто́кия в пусты́ни ше́ствуя, су́рово бы́лие я́л еси́, вкуше́ние же отлага́л еси́ пи́щи боле́зньми воздержа́ния.

Я́ко ма́слина плодови́та в дому́ Госпо́дни, прозя́бл еси́, ма́слом трудо́в твои́х, Алекса́ндре, умаща́я на́ша ли́ца; пою́щия тя́, преподо́бне и богоблаже́нне, вся́ ны́ посети́, моля́ся Человеколю́бцу.

Богоро́дичен: Из Тебе́, Чи́стая, Цве́т неувяда́емый, благоуха́я все́ челове́чество Боже́ственным ми́ром естества́ Своего́, И́же Отцу́ Собезнача́льный, из Тебе́ бы́в под ле́том, Де́во Всенепоро́чная.

И́н.

Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

По́том воздержа́ния твоего́ пла́мень страсте́й погаси́л еси́, и одожде́нием моли́тв струи́ чуде́с источи́л еси́, боле́зньми разжже́ния погаша́я я́ве, преблаже́нне Алекса́ндре.

И́же к честне́й ра́це твое́й притека́юще, прему́дре, от сея́ почерпа́ем исцеле́ния сокро́вище, и чуде́с пучи́ну, и да́р незави́стный, Алекса́ндре. Те́мже, пою́ще, тя́ восхваля́ем.

Душе́вная чу́вства от ужа́снаго, преподо́бне о́тче, просве́щь виде́ния, я́ко чу́ден ра́зум благи́х стяжа́л еси́, и́ночества житие́ иму́щим, Алекса́ндре, небла́знено житие́ показа́л еси́.

Богоро́дичен: И́же пре́жде ве́к ро́ждься от Отца́ неизрече́нно, напосле́док из утро́бы Твоея́ про́йде, и обожи́ на́ше естество́, Ма́ти Де́во, И́же преподо́бных ли́ки я́ве изводя́й.

Седа́лен, гла́с 8.

От ю́ности вся́ оста́вль жите́йская, кра́сная же и ле́потная, и в пусты́ню всели́вся, усе́рдно после́довал еси́ Зва́вшему тебе́, преподо́бне, в труде́х же и посте́х, о́тче, те́ло твое́ изнури́л еси́. Отону́дуже тя́ па́стыря свои́м овца́м до́бре устроя́ет всебога́тый Госпо́дь, Алекса́ндре блаже́нне. Моли́ Христа́ Бо́га прегреше́ний оставле́ние дарова́ти, чту́щим любо́вию святу́ю па́мять твою́.

Богоро́дичен: Я́ко Де́ву и еди́ну в жена́х, Тя́, без се́мене ро́ждшую Бо́га пло́тию, вси́ ублажа́ем, ро́ди челове́честии: о́гнь бо всели́ся в Тя́ Божества́, и я́ко Младе́нца млеко́м пита́еши Зижди́теля и Го́спода. Те́м, а́нгельский и челове́ческий ро́д, досто́йно сла́вим пресвято́е рождество́ Твое́, и согла́сно вопие́м Ти́: моли́ Христа́ Бо́га, согреше́ний оставле́ние дарова́ти, покланя́ющимся ве́рою пресвято́му Рождеству́ Твоему́.

Пе́снь 4.

Ирмо́с: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Ве́трилом, о́тче, Креста́, душе́вный тво́й кора́бль окорми́в, благоути́шно же и легко́ жите́йскаго лю́таго потопле́ния избе́гл еси́ и к тишине́ боже́ственных извле́кл еси́ приста́нищь, ра́дуяся.

Обрета́я, о́тче, са́м себе́, всеблаже́нне, всю́ но́щь стоя́л еси́, я́ко безпло́тен, недрема́нно о́ко име́л еси́, и чи́сто, я́коже зерца́ло, духо́вною заре́ю, и Боже́ственная явле́ния чи́стым по́мыслом прие́мля.

Я́ко Боже́ственный зри́тся ра́й, прему́дре, хра́м, име́я в себе́ твои́х моще́й ра́ку, цве́ты принося́ чуде́сныя, и́миже сердца́ наслажда́ются ве́рою, Алекса́ндре, при́сно хва́лящих тя́.

Богоро́дичен: Свята́я Богоро́дице, освяти́ на́с, Я́же Пресвята́го Бо́га ро́ждши пло́тию, уподо́битися восхоте́вша челове́ком, и небе́снаго жития́ вся́ покажи́, Пречи́стая, прича́стники моли́твами Твои́ми.

И́н.

Ирмо́с: Прише́л еси́ от Де́вы, не хода́тай, ни а́нгел, но Са́м, Го́споди, вопло́щся, и спа́сл еси́ всего́ мя челове́ка. Те́м зову́ Ти: сла́ва си́ле Твое́й, Го́споди.

Житие́ твое́, богоно́се преблаже́нне Алекса́ндре, пра́вило изве́стно мона́шествующих бы́сть, ему́же ны́не ревну́юще, спаса́емся, и́же твои́м после́дующе, о́тче, боже́ственным уче́нием.

Ду́ха Свята́го зарю́ прие́м, звезда́ пресве́тлая, о́тче Алекса́ндре, сия́я благода́тию, бы́л еси́ все́м, и́хже наста́вил еси́ к спасе́ния приста́нищу твои́ми уче́нии.

Пребы́ти вну́трь ника́коже ми́ра восхоте́л еси́, прему́дре о́тче Алекса́ндре, име́я наставля́ющаго тя́ Бо́жия Ду́ха си́лу, в непроходи́мых пусты́нях живы́й и со зверьми́ ходя́ без боя́зни, ю́ноша сы́й, и боле́зньми пита́лся еси́ теле́сными.

Богоро́дичен: Плещми́ херуви́мскими стра́шными носи́мь, Влады́ко, я́ко на престо́ле о́гненне, в Твою́, Чи́стая, всели́ся утро́бу, и пло́ти прия́тием челове́ческое обожи́ существо́, я́ко учи́т изря́дный в преподо́бных Алекса́ндр, еди́на Всепе́тая.

Пе́снь 5.

Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Просвеща́емь заре́ю, о́тче, невече́рнею и Боже́ственным блиста́нием, бесо́вский мра́к и стра́стную мглу́ отгна́л еси́, и яви́лся еси́ сто́лп светоза́рен, и ле́ствица вои́стинну, к Бо́гу ве́рныя возводя́щи.

Бо́др у́м всегда́ име́я, о́тче богому́дре Алекса́ндре, стра́сти успи́л еси́ душетле́нныя, к Боже́ственному светозаре́нию хотя́ дости́гнути, к незаходи́маго Све́та све́тлости, иде́же е́сть веселя́щихся жили́ще.

Я́ко очи́стившу помышле́ния, преподо́бне, благода́ть тебе́ даде́ся, я́ко проро́ку: я́ко настоя́щая, глаго́леши бу́дущая, зри́ши же да́льняя, я́ко бли́жняя, Алекса́ндре, Бо́жие оби́телище.

Богоро́дичен: Ро́ждши, Пренепоро́чная, Бо́га Емману́ила, и Челове́ка я́ве за милосе́рдие бы́вша, Его́же моли́, я́ко Человеколю́бца, Чи́стая, уще́дрити лю́ди согре́шшия.

И́н.

Ирмо́с: Хода́тай Бо́гу и челове́ком бы́л еси́, Христе́ Бо́же: Тобо́ю бо, Влады́ко, к Светонача́льнику, Отцу́ Твоему́, от но́щи неве́дения приведе́ние и́мамы.

Возжеле́в у́м тво́й храни́ти соблюде́ньми за́поведей, Алекса́ндре, и плотско́е взыгра́ние твои́м воздержа́нием увяди́л еси́, и па́стырь показа́лся еси́ боголюбе́зному твоему́ совокупле́нию.

Зако́ном Боже́ственным после́дуя, прему́дре Алекса́ндре, и повеле́нием повину́яся Сотво́ршаго, законополо́жник яви́лся еси́ мона́хов и пра́вило изве́стнейшее, наказа́тель безу́мных, и наста́вник заблу́ждших, и свети́льник во тме́ неве́дения, пресла́вне.

О́гнь искуше́ний и страсте́й пе́щь слеза́ми твои́х, о́тче, тече́ний и духо́вною росо́ю бога́тно угаси́л еси́, соблю́дся неопали́мь: опаля́емь бо любо́вию все́х Царя́, ве́щная увяди́л еси́ жела́ния.

Богоро́дичен: Жите́йская не мо́гут уста́ по достоя́нию Тя́ пе́ти, Всепе́тая, вы́шшу су́щу херуви́м и вся́кия тва́ри. Те́мже с боже́ственным Алекса́ндром Влады́ку о все́х на́с умоли́.

Пе́снь 6.

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Неболе́зненную жи́знь в боле́знех восприя́л еси́ и боле́зней лю́тых уставля́еши озлобле́ния, ве́рою прося́щим прия́ти исцеле́ние, Алекса́ндре всече́стне. Те́мже разреши́ боле́зни на́ша душе́вныя и теле́сныя.

К ра́це твое́й свяще́нней приступа́юще, благоуха́ния боже́ственнаго ра́зума исполня́емся, преблаже́нне Алекса́ндре, смра́да избавля́ющеся страсте́й, любо́вию тя́ чту́щии, о́тче преподо́бне.

Исправля́еши, о́тче, хромы́х и о́чи просвеща́еши слепы́х, ходи́ти же твори́ши разсла́бленных о Христе́, и отго́ниши ду́хи лука́выя, Алекса́ндре преподо́бне.

Богоро́дичен: На Тя́, я́ко до́ждь на руно́, сше́д, Богоро́дице, Спа́с изсуши́ я́ве пото́ки безбо́жия, ду́ши же на́ша напая́я всегда́, при́сно чту́щия Тя́.

И́н.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Смы́сленно ты́ вре́менная проразсуди́в, Алекса́ндре блаже́нне, ве́чнующая боле́зньми воздержа́ния дости́гл еси́, о́тче, душа́м строи́тель бы́в, преподо́бне.

Я́ко терпя́щу ти́ вельми́ по́ты трудо́в твои́х, преподо́бне Алекса́ндре, удо́бь воздержа́нием, чу́дный о́тче, я́влься, Влады́ка тебе́ Христо́с, вруча́ет си́лу боже́ственну, и си́м ти́ неду́ги повелева́ет цели́ти.

Мона́шествующих наста́вник бы́в, прему́дре Алекса́ндре, су́щих ти́ единообра́зных ла́вры, и о́браз и начерта́ние доброде́тельных дея́ний сы́й, украси́л еси́ вся́, я́же во оби́тели супру́жных пребыва́ния.

Богоро́дичен: Но́в, я́коже Моисе́й, я́влься, устро́ил еси́, я́ко ски́нию, огра́ду, всече́стне, ю́же и превозрасти́л еси́ боле́зньми и по́ты твои́ми, ве́сь возложи́вся Пречи́стей Ма́тери Бо́жии.

Конда́к, гла́с 8:

Я́ко многосве́тлая звезда́, дне́сь в страна́х Росси́йских возсия́л еси́, о́тче, всели́вся в пусты́ню, Христо́вым стопа́м после́довати усе́рдно возжеле́л еси́, и Того́ свято́е и́го на ра́мо твое́ взе́м — Честны́й Кре́ст, умертви́л еси́ труды́ по́двиг твои́х теле́сная взыгра́ния. Те́мже вопие́м ти́: спаси́ ста́до твое́, е́же собра́л еси́, му́дре, да зове́м ти́: ра́дуйся, преподо́бне Алекса́ндре, о́тче на́ш.

И́кос:

Ка́ко восхвалю́ твоя́ по́двиги и боре́ния, преподо́бне Алекса́ндре? Я́ко невеще́ствен ра́зум стяжа́в смире́нием, житие́ твое́ препроводи́л еси́ зе́льным воздержа́нием трудо́в твои́х. А́ще у́бо и челове́к бы́л еси́ естество́м, но Вы́шняго Иерусали́ма яви́лся еси́ граждани́н: с пло́тию бо на земли́ пожи́л еси́, но а́нгельское пребыва́ние проше́д и бы́л еси́ сто́лп, страстьми́ непотрясо́м. Те́м вся́ Росси́йская земля́, тобо́ю обога́щшися, хва́лит тя́ и ве́рою велича́ет, взыва́ющи тебе́ такова́я: ра́дуйся, оте́честву твоему́ похвала́, Вели́кому же Нову́граду и все́й стране́ Росси́йстей пресве́тлый свети́льниче; ра́дуйся, и́же благочести́ва отца́ пресла́вная о́трасль и благогове́йны ма́тере ве́твь многопло́дна; ра́дуйся, целому́дрия непрекло́нный сто́лпе и мона́хов пресве́тлая сла́ва; ра́дуйся, па́стырю Христо́вы огра́ды слове́сных ове́ц, и́хже к Бо́жию приводя́ ра́зуму; ра́дуйся, ты́ бо многоча́дну пусты́ню возде́лал еси́ высото́ю смире́ния твоего́; ра́дуйся, мона́шествующих все́х о́браз доброде́тели и единообра́зных ла́вры спасе́ние; ра́дуйся, кра́сное доброде́телей храни́лище и все́м, в печа́ли уныва́ющим, утеше́ние; ра́дуйся, я́ко вся́ ми́ра сего́ мудрова́ния презре́в, стра́сти плотски́я умертви́л еси́; ра́дуйся, я́ко а́нгелом собесе́дник бы́ти сподо́бился еси́ и вся́ бесо́вския полки́ посрами́л еси́; ра́дуйся, ты́ бо во все́х страна́х просла́влен бы́л еси́, о Христе́ бо мно́га чудеса́ сотвори́л еси́; ра́дуйся, я́ко вои́стинну обре́л еси́ Бо́жию благода́ть и со а́нгелы при́сно зре́ти сподо́бился еси́ лице́м к лицу́ Святу́ю Тро́ицу; ра́дуйся, я́ко второ́е со́лнце, сия́я чудесы́, все́м да́руеши благода́ть исцеле́ний; ра́дуйся, преподо́бне Алекса́ндре, о́тче на́ш.

Пе́снь 7.

Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Освя́щся от младе́нства доброгла́сною трубо́ю моли́твы твоея́, и непло́дныя утро́бы многопло́дны сотвори́л еси́, слепы́м подае́ши прозре́ние и хромы́м благотече́ние, Алекса́ндре преблаже́нне.

Сле́зными излия́нии погаси́л еси́ страсте́й разжже́ния, Алекса́ндре блаже́нне, чуде́с источи́л еси́ струи́ присноживо́тны, и́миже омыва́ются ду́ш же и теле́с неду́зи, пресла́вне.

Терпе́ние стяжа́в мно́гое прему́дре, воздержа́ние, ве́ру и любо́вь и́стинну, яви́лся еси́ оте́ц си́рым, вдови́цам — засту́пник ми́лостив и смире́н, Алекса́ндре, мона́хом — сла́ва и похвала́.

Богоро́дичен: Ка́ко дои́ши млеко́м Сы́на, Чи́стая, без отца́, пита́ющаго вся́кое дыха́ние, Ма́ти Пречи́стая? Ка́ко на руку́ но́сиши вся́ содержа́щаго? Па́че ума́ чу́до Твое́. Те́м пое́м вели́чия Твоя́.

И́н.

Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть, Христо́с же простре́ богочести́вым отроко́м ро́су духо́вную, Сы́й благослове́н и препросла́влен.

Кре́постию оде́явся, Алекса́ндре, Влады́чнею, и я́ко пра́х, сладостра́стие жития́ попра́л еси́, любо́вию побежда́емь нетле́нныя жи́зни, е́йже ны́не и причасти́лся еси́, с ли́ки а́нгел, о́тче, сочета́вся.

Крестообра́зно простира́я дла́ни твоя́, Алекса́ндре прему́дре, и моли́твы твоя́ возсыла́я Вы́шнему, я́ко Христа́, Царя́ сла́вы, со а́нгелы, очи́ма явле́нно, богоно́се, узре́л еси́, и в пусты́нях непрохо́дных водворя́яся, ища́й Го́спода, Боже́ственною тя́ благода́тию соблюда́юща.

Я́ко звезду́ тя́, Алекса́ндре, всеми́рну, мона́хов свети́ло незаходи́мое, помо́щника в беда́х и гре́шником вели́кое прибе́жище ве́дый, хода́тая и моли́твенника тя́ предлага́ю Влады́це Христу́, всече́стне.

Богоро́дичен: Ви́дети жела́я Тво́й уго́дник Твоего́ Сы́на и Бо́га неизрече́нную сла́ву, Богороди́тельнице, Сего́ Честны́й Кре́ст на ра́мо взе́м, после́дова живоно́сным Его́ стопа́м.

Пе́снь 8.

Ирмо́с: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Умо́м безстра́стия очище́н, бесе́довал еси́ Го́сподеви Вседержи́телю, от Него́же неизглаго́ланно, преподо́бне, науча́емь, проро́чески предглаго́лал еси́, просвеща́я ду́ши, я́ко вели́к, всеблаже́нне, проро́к. Те́м тя́ согла́сно, Алекса́ндре прему́дре, ве́рнии, похваля́ем, пою́ще: благослови́те, вся́ дела́ Госпо́дня, Го́спода.

Подава́я тебе́, я́же проти́ву любве́, Зижди́тель и от ю́ности соблюда́я тя́ десни́цею, ма́лым бы́лием, самовозра́стшим от земли́, пита́ет тя́ боголе́пно, я́ко от младе́нства вся́ко похоте́ние попра́вша и пою́ща: благослови́те, вся́ дела́ Госпо́дня, Го́спода.

Я́ко струя́ боже́ственна исцеле́ний, происходя́щи от ра́ки твоея́, вся́ исцеля́ет, и омыва́ет скве́рны страсте́й, и гное́ние лю́тых очища́ет, и ве́рных напая́ет все́х сердца́, Алекса́ндре прему́дре, любо́вию пою́щих: благослови́те, вся́ дела́ Госпо́дня, Го́спода.

Богоро́дичен: Вопло́щся Безпло́тный из Тебе́ боголе́пно, Его́же моли́, Пречи́стая, стра́сти пло́ти моея́ умертви́ти и оживи́ти мою́ умерщвле́нную ду́шу грехми́.

И́н.

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те, вся́ дела́ Госпо́дня, Го́спода.

Я́коже мо́лния вели́кими блиста́нии, житие́ сия́ющее все́м возсия́ воздержа́ния твоего́, Алекса́ндре прему́дре, благоче́стно Зижди́телю зову́щим: благослови́те, вся́ дела́ Госпо́дня, Го́спода.

На земли́ я́ко челове́к ходя́, о́тче Алекса́ндре, житие́ себе́ на небесе́х я́ко вои́стинну стяжа́л еси́, а́нгелом собесе́дник я́влься, житие́ же и жи́знь соверша́я о́нех. С ни́миже воспева́еши ны́не: благослови́те, вся́ дела́ Госпо́дня, Го́спода.

Тя́, па́че ума́ из нерожде́нна Отца́, пре́жде ве́к рожде́нна Сы́на, сла́вный пропове́да Алекса́ндр, и Ду́ха Пресвята́го, Еди́ну Тро́ицу естество́м ве́дый Божества́.

Богоро́дичен: Я́коже Илия́ пе́рвее в Карми́ле всели́ся, та́ко и ты́, в пусты́нях непрохо́дных упражня́яся, возжела́л еси́ осо́бь с Бо́гом жи́ти, и богонача́льными озари́вся виде́нии, уго́дник яви́лся еси́ Богоро́дице, вопия́ Е́й: ра́дуйся, Обра́дованная.

Пе́снь 9.

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся, Христо́с, совокупи́вый разстоя́щаяся естества́. Те́м веселя́щеся, Тя́, Богоро́дице, велича́ем.

Твоя́ свяще́нныя и святы́я мо́щи, во гро́бе лежа́ще, многоразли́чныя неду́ги исцеля́ют и попаля́ют полки́ бесо́вския всегда́, му́дре Алекса́ндре: Бо́жиею бо благода́тию то́чиши все́м исцеле́ния, ве́рно тя́ при́сно блажа́щим.

Струи́ на́м исцеле́ний всегда́ честна́я твоя́ ра́ка яви́ся, о́тче, страсте́й излия́ние вся́ческих изсуша́ющи и вся́ напоя́ющи ду́ши ко благопло́дию боже́ственному, прему́дре Алекса́ндре, Христо́в уго́дниче.

Па́мять твоя́ дне́сь, я́ко со́лнце, возсия́, Алекса́ндре преблаже́нне, благочести́вых сердца́ озаря́ющи боле́зней твои́х и чуде́с сия́нием, я́ко вои́стинну просвеща́ющи, о́тче, в ню́же вся́ ны́ помяни́, ве́рно чту́щия тя́.

Богоро́дичен: Гла́с прино́сим Ти́ Гаврии́лов, ра́дующеся: ра́дуйся, глаго́люще, ме́сто свяще́ния, ра́дуйся, преподо́бных сла́во и все́х ве́рных спасе́ние, ея́же ра́ди обожи́хомся, Богоро́дице Присноде́во.

И́н.

Ирмо́с: Безнача́льна Роди́теля Сы́н, Бо́г и Госпо́дь, вопло́щся от Де́вы, на́м яви́ся, омраче́нная просвети́ти, собра́ти расточе́нная. Те́м Всепе́тую Богоро́дицу велича́ем.

Стопа́м после́дуя, преподо́бне и богоно́се, Влады́ки Христа́, благоче́стно пожи́в на земли́, кро́ток, незло́бив яви́лся еси́, ми́лостив и смире́н, Алекса́ндре, и любве́ испо́лнен боже́ственныя, сего́ ра́ди тя́ ве́рно восхваля́ем.

Исплете́ся тебе́ вене́ц, я́ко победи́телю, Алекса́ндре, живоно́сною и вседержи́тельною десни́цею, о́тче, и ны́не пою́щия па́мять твою́ сподо́би, блаже́нне, улучи́ти оставле́ние согреше́ний, пресла́вне.

Совокупи́лся еси́ со безпло́тными во́инствы, и преподо́бным лико́м сочта́лся еси́, и со избра́нными все́ми лику́еши, претво́рся и́стинным обоже́нием и безсме́ртною, о́тче, жи́знию, с ни́миже непреста́нно о на́с твоего́ Влады́ку умоли́.

Богоро́дичен: Хра́ме освяще́нный, вме́стен Еди́ному от Тро́ицы сы́й, хра́м Тво́й, Влады́чице, уго́дник Тво́й Алекса́ндр че́стен воздви́же в сла́ву Твою́ и че́сть, в не́мже не преста́й моля́ся, да́тися на́м по́мощи моли́твами Твои́ми.

Свети́лен.

Благода́ть преизбы́сть Бо́жия в души́ твое́й, прему́дре Алекса́ндре, и я́ко безпло́тен, на земли́ пожи́л еси́. Те́м почита́ющих тя́ страсте́й изба́ви те́мных о́блак, и к ти́хому приста́нищу приводя́ и отгоня́я ополче́ния бесо́вская Боже́ственною си́лою.

Богоро́дичен: Сотво́рь вои́стинну с Тобо́ю вели́чия Сы́н Преве́чный О́тчим сове́том: Жи́знь бо нетле́нную без стра́сти родила́ еси́ и пребыла́ еси́, я́коже пре́жде рождества́, Де́ва, ма́терских избе́гши боле́зней и по рождестве́ Де́вою пребы́вши.

Пѣ́снь а҃.

І҆рмо́съ: Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.

Бжⷭ҇твеннагѡ и҆ прест҃а́гѡ дх҃а блиста́ѧсѧ бл҃года́тїю, свѣтоно́сное, а҆леѯа́ндре, и҆ честно́е соверша́ющихъ твоѐ ᲂу҆спе́нїе, свѣ́тлою моли́твою твое́ю, страсте́й мглꙋ̀ ѡ҆чи́сти.

Ѿ ю҆́ности, прпⷣбне, ꙗ҆ре́мъ гдⷭ҇ень воспрїе́мъ, въ бразда́хъ твоегѡ̀ се́рдца пшени́цꙋ сѣ́ѧлъ є҆сѝ дꙋхо́внꙋ, и҆ кла́съ пожа́лъ є҆сѝ ᲂу҆твержда́ющь дꙋ́шы, бг҃облаже́нне.

Свѣтоно́снаѧ па́мѧть твоѧ̀ на́мъ дне́сь возсїѧ̀, ꙗ҆́кѡ со́лнечнаѧ лꙋча̀, а҆леѯа́ндре, и҆справле́нїй твои́хъ, страсте́й на́шихъ ѿе́млющи ѻ҆́блакъ: ю҆́же сотворѧ́юще вѣ́рою тѧ̀ и҆ любо́вїю ᲂу҆блажа́емъ.

Бг҃оро́диченъ: Зачала̀ є҆сѝ, пречⷭ҇таѧ, неизрече́ннымъ сло́вомъ содержа́щаго земны̑ѧ концы̀, и҆ сего̀ родила̀ є҆сѝ: є҆го́же молѝ прилѣ́жнѡ поми́ловати на́съ.

И҆́нъ. Гла́съ в҃.

І҆рмо́съ: Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть: препросла́вленный гдⷭ҇ь, сла́внѡ бо просла́висѧ.

Бж҃е́ственнꙋю па́мѧть твою̀, бг҃омꙋ́дре ѻ҆́тче, вѣ́рнѡ пра́зднꙋюще, всѧ́ческихъ гдⷭ҇а при́снѡ сла́вимъ, тѧ̀ просла́вльшаго мно́гими чꙋдєсы̀.

Безстра́стїѧ жела́нїемъ те́плымъ, ѻ҆́тче, ѡ҆держи́мь, вє́щныѧ ᲂу҆вѧди́лъ є҆сѝ страсте́й во́лны, а҆леѯа́ндре, и҆ дости́глъ є҆сѝ любо́вїю вперѧ́емь, присносꙋ́щнагѡ сїѧ́нїѧ, преблаже́нне, бж҃ества̀.

Добродѣ́тельно и҆знача́ла прїе́мъ житїѐ, пребога́те, ба́нею, ѻ҆́тче, пакибытїѧ̀, да́ръ дꙋхо́вный ѿ младе́нства бжⷭ҇твеннѣ, твоеѧ̀ дꙋшѝ благолѣ́пїе, а҆леѯа́ндре, показа́лъ є҆сѝ, со́лнца свѣтлѣ́йше.

Бг҃оро́диченъ: Мла́до ѻ҆троча̀ па́че сло́ва родила̀ є҆сѝ, ве́тхаго де́ньми, но́вꙋ на землѝ стезю̀ добродѣ́телей показа́вша. тѣ́мъ ᲂу҆го́дникъ тво́й при́сный а҆леѯа́ндръ, ѻ҆трокови́це, любо́вїю снѣда́емь, се́й хра́мъ тебѣ̀ созда̀.

Пѣ́снь г҃.

І҆рмо́съ: Весели́тсѧ ѡ҆ тебѣ̀ цр҃ковь твоѧ̑, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.

Жезло́мъ воздержа́нїѧ страстно́е мо́ре, ѻ҆́тче, раздѣли́въ, преше́лъ є҆сѝ неистопле́нъ, и҆ предѣ̑лъ дости́глъ є҆сѝ и҆́стиннагѡ безстра́стїѧ, и҆ бг҃ꙋ предстоѧ̀ бесѣ́довалъ є҆сѝ ᲂу҆ма̀ чистото́ю.

Кто̀ твоѧ̑ по́двиги, а҆леѯа́ндре, по достоѧ́нїю и҆зрещѝ возмо́жетъ; ты́ бо пꙋти̑ жестѡ́кїѧ въ пꙋсты́ни ше́ствꙋѧ, сꙋ́рово бы́лїе ꙗ҆́лъ є҆сѝ, вкꙋше́нїе же ѿлага́лъ є҆сѝ пи́щи, болѣ́зньми воздержа́нїѧ.

Ꙗ҆́кѡ ма́слина плодови́та въ домꙋ̀ гдⷭ҇ни прозѧ́блъ є҆сѝ, ма́сломъ трꙋдѡ́въ твои́хъ, а҆леѯа́ндре, ᲂу҆маща́ѧ на́шѧ ли́ца: пою́щыѧ тѧ̀, прпⷣбне и҆ бг҃облаже́нне, всѧ̑ ны̀ посѣтѝ молѧ́сѧ чл҃вѣколю́бцꙋ.

Бг҃оро́диченъ: И҆зъ тебє̀, чⷭ҇таѧ, цвѣ́тъ неꙋвѧда́емый, благоꙋха́ѧ всѐ человѣ́чество, бжⷭ҇твеннымъ мѵ́ромъ є҆стества̀ своегѡ̀, и҆́же ѻ҆ц҃ꙋ̀ собезнача́льный, и҆зъ тебє̀ бы́въ подъ лѣ́томъ, дв҃о всенепоро́чнаѧ.

И҆́нъ.

І҆рмо́съ: На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ мо́й, внегда̀ пѣ́ти: нѣ́сть свѧ́тъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и.

По́томъ воздержа́нїѧ твоегѡ̀ пла́мень страсте́й погаси́лъ є҆сѝ, и҆ ѡ҆дожде́нїемъ моли́твъ, стрꙋи̑ чꙋде́съ и҆сточи́лъ є҆сѝ, болѣ́зньми разжжє́нїѧ погаша́ѧ ꙗ҆́вѣ, преблаже́нне а҆леѯа́ндре.

И҆̀же къ честнѣ́й ра́цѣ твое́й притека́юще, премꙋ́дре, ѿ сеѧ̀ почерпа́емъ и҆сцѣле́нїѧ сокро́вище, и҆ чꙋде́съ пꙋчи́нꙋ, и҆ да́ръ незави́стный, а҆леѯа́ндре, тѣ́мже пою́ще тѧ̀ восхвалѧ́емъ.

Дꙋшє́внаѧ чꙋ̑вства, ѿ ᲂу҆жа́снагѡ. прпⷣбне ѻ҆́тче, просвѣ́щь видѣ́нїѧ, ꙗ҆́кѡ чꙋ́денъ ра́зꙋмъ благи́хъ стѧжа́лъ є҆сѝ, и҆́ночества житїѐ и҆мꙋ́щымъ, а҆леѯа́ндре, небла́знено житїѐ показа́лъ є҆сѝ.

Бг҃оро́диченъ: И҆́же пре́жде вѣ̑къ ро́ждьсѧ ѿ ѻ҆ц҃а̀ неизрече́ннѡ, напослѣ́докъ и҆з̾ ᲂу҆тро́бы твоеѧ̀ про́йде, и҆ ѡ҆божѝ на́ше є҆стество̀, мт҃и дв҃о, и҆́же прпⷣбныхъ ли́ки ꙗ҆́вѣ и҆зводѧ́й.

Сѣда́ленъ, гла́съ и҃.

Ѿ ю҆́ности всѧ̑ ѡ҆ста́вль житє́йскаѧ, кра̑снаѧ же и҆ лѣ́пѡтнаѧ, и҆ въ пꙋсты́ню всели́всѧ, ᲂу҆се́рднѡ послѣ́довалъ є҆сѝ зва́вшемꙋ тебѐ, прпⷣбне: въ трꙋдѣ́хъ же и҆ постѣ́хъ, ѻ҆́тче, тѣ́ло твоѐ и҆знꙋри́лъ є҆сѝ. ѿѻнꙋ́дꙋже тѧ̀ па́стырѧ свои̑мъ ѻ҆вца́мъ до́брѣ ᲂу҆строѧ́етъ всебога́тый гдⷭ҇ь, а҆леѯа́ндре блаже́нне. молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти, чтꙋ́щымъ любо́вїю свѧтꙋ́ю па́мѧть твою̀.

Бг҃оро́диченъ: Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бжⷭ҇тва̀, и҆ ꙗ҆́кѡ млⷣнца млеко́мъ пита́еши зижди́телѧ и҆ гдⷭ҇а. тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.

Пѣ́снь д҃.

І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.

Вѣ́триломъ, ѻ҆́тче, крⷭ҇та̀, дꙋше́вный тво́й кора́бль ѡ҆корми́въ, благоꙋти́шнѡ же и҆ легкѡ̀ жите́йскагѡ лю́тагѡ потопле́нїѧ и҆збѣ́глъ є҆сѝ, и҆ къ тишинѣ̀ бжⷭ҇твенныхъ и҆звле́клъ є҆сѝ приста́нищь ра́дꙋѧсѧ.

Ѡ҆брѣта́ѧ, ѻ҆́тче, са́мъ себѐ, всеблаже́нне, всю̀ но́щь стоѧ́лъ є҆сѝ ꙗ҆́кѡ безпло́тенъ, недрема́нно ѻ҆́ко и҆мѣ́лъ є҆сѝ, и҆ чи́сто ꙗ҆́коже зерца́ло дꙋхо́вною заре́ю, и҆ бжⷭ҇твеннаѧ ꙗ҆вле́нїѧ, чи́стымъ по́мысломъ прїе́млѧ.

Ꙗ҆́кѡ бжⷭ҇твенный зри́тсѧ ра́й, премꙋ́дре, хра́мъ, и҆мѣ́ѧ въ себѣ̀ твои́хъ моще́й ра́кꙋ, цвѣ́ты приносѧ̀ чꙋдє́сныѧ, и҆́миже сердца̀ наслажда́ютсѧ вѣ́рою, а҆леѯа́ндре, при́снѡ хва́лѧщихъ тѧ̀.

Бг҃оро́диченъ: Ст҃а́ѧ бцⷣе, ѡ҆свѧтѝ на́съ, ꙗ҆́же прест҃а́го бг҃а ро́ждши пло́тїю, ᲂу҆подо́битисѧ восхотѣ́вша человѣ́кѡмъ, и҆ небе́снагѡ житїѧ̀ всѧ̑ покажѝ, пречⷭ҇таѧ, прича́стники моли́твами твои́ми.

И҆́нъ.

І҆рмо́съ: Прише́лъ є҆сѝ ѿ дв҃ы не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.

Житїѐ твоѐ, бг҃оно́се преблаже́нне а҆леѯа́ндре, пра́вило и҆звѣ́стно мона́шествꙋющихъ бы́сть, є҆мꙋ́же ны́нѣ ревнꙋ́юще спаса́емсѧ, и҆̀же твои̑мъ послѣ́дꙋюще, ѻ҆́тче, бжⷭ҇твєннымъ ᲂу҆че́нїємъ.

Дх҃а ст҃а́гѡ зарю̀ прїе́мъ, ѕвѣзда̀ пресвѣ́тлаѧ, ѻ҆́тче а҆леѯа́ндре, сїѧ́ѧ бл҃года́тїю бы́лъ є҆сѝ всѣ̑мъ, и҆̀хже наста́вилъ є҆сѝ къ спасе́нїѧ приста́нищꙋ твои́ми ᲂу҆чє́нїи.

Пребы́ти внꙋ́трь ника́коже мі́ра восхотѣ́лъ є҆сѝ, премꙋ́дре ѻ҆́тче а҆леѯа́ндре, и҆мѣ́ѧ наставлѧ́ющагѡ тѧ̀ бж҃їѧ дх҃а си́лꙋ, въ непроходи́мыхъ пꙋсты́нѧхъ живы́й, и҆ со ѕвѣрьмѝ ходѧ̀ безъ боѧ́зни ю҆́ноша сы́й, и҆ болѣ́зньми пита́лсѧ є҆сѝ тѣле́сными.

Бг҃оро́диченъ: Плещмѝ херꙋві́мскими стра́шными носи́мь, влⷣко, ꙗ҆́кѡ на престо́лѣ ѻ҆́гненнѣ, въ твою̀, чⷭ҇таѧ, всели́сѧ ᲂу҆тро́бꙋ, и҆ пло́ти прїѧ́тїемъ человѣ́ческое ѡ҆божѝ сꙋщество̀, ꙗ҆́кѡ ᲂу҆чи́тъ и҆зрѧ́дный въ прпⷣбныхъ а҆леѯа́ндръ, є҆ди́на всепѣ́таѧ.

Пѣ́снь є҃.

І҆рмо́съ: Ты̀, гдⷭ҇и, мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.

Просвѣща́емь заре́ю, ѻ҆́тче, невече́рнею, и҆ бжⷭ҇твеннымъ блиста́нїемъ, бѣсо́вскїй мра́къ, и҆ стра́стнꙋю мглꙋ̀ ѿгна́лъ є҆сѝ, и҆ ꙗ҆ви́лсѧ є҆сѝ сто́лпъ свѣтоза́ренъ, и҆ лѣ́ствица вои́стиннꙋ, къ бг҃ꙋ вѣ̑рныѧ возводѧ́щи.

Бо́дръ ᲂу҆́мъ всегда̀ и҆мѣ́ѧ, ѻ҆́тче бг҃омꙋ́дре а҆леѯа́ндре, стра̑сти ᲂу҆спи́лъ є҆сѝ дꙋшетлѣ̑нныѧ, къ бжⷭ҇твенномꙋ свѣтозаре́нїю хотѧ̀ дости́гнꙋти къ незаходи́магѡ свѣ́та свѣ́тлости, и҆дѣ́же є҆́сть веселѧ́щихсѧ жили́ще.

Ꙗ҆́кѡ ѡ҆чи́стившꙋ помышлє́нїѧ, прпⷣбне, благода́ть тебѣ̀ даде́сѧ ꙗ҆́кѡ прⷪ҇ро́кꙋ: ꙗ҆́кѡ настоѧ̑щаѧ глаго́леши бꙋ̑дꙋщаѧ, зри́ши же да̑льнѧѧ ꙗ҆́кѡ бли̑жнѧѧ, а҆леѯа́ндре, бж҃їе ѻ҆би́телище.

Бг҃оро́диченъ: Ро́ждши, пренепоро́чнаѧ, бг҃а є҆мманꙋ́ила, и҆ чл҃вѣ́ка ꙗ҆́вѣ за милосе́рдїе бы́вша, є҆го́же молѝ ꙗ҆́кѡ человѣколю́бца, чⷭ҇таѧ, ᲂу҆ще́дрити лю́ди согрѣ́шшыѧ.

И҆́нъ.

І҆рмо́съ: Хода́тай бг҃ꙋ и҆ человѣ́кѡмъ бы́лъ є҆сѝ, хрⷭ҇тѐ бж҃е: тобо́ю бо, влⷣко, къ свѣтонача́льникꙋ ѻ҆ц҃ꙋ̀ твоемꙋ̀, ѿ но́щи невѣ́дѣнїѧ приведе́нїе и҆́мамы.

Возжелѣ́въ ᲂу҆́мъ тво́й храни́ти соблюде́ньми за́повѣдей, а҆леѯа́ндре, и҆ плотско́е взыгра́нїе твои́мъ воздержа́нїемъ ᲂу҆вѧди́лъ є҆сѝ, и҆ па́стырь показа́лсѧ є҆сѝ, бг҃олюбе́зномꙋ твоемꙋ̀ совокꙋпле́нїю.

Зако́нѡмъ бжⷭ҇твєннымъ послѣ́дꙋѧ, премꙋ́дре а҆леѯа́ндре, и҆ повелѣ́нїємъ повинꙋ́ѧсѧ сотво́ршагѡ, законополо́жникъ ꙗ҆ви́лсѧ є҆сѝ мона́хѡвъ, и҆ пра́вило и҆звѣ́стнѣйшее, наказа́тель безꙋ́мныхъ, и҆ наста́вникъ заблꙋ́ждшихъ, и҆ свѣти́льникъ во тмѣ̀ невѣ́дѣнїѧ пресла́вне.

Ѻ҆́гнь и҆скꙋше́нїй, и҆ страсте́й пе́щь, слеза́ми твои́хъ, ѻ҆́тче, тече́нїй, и҆ дꙋхо́вною росо́ю бога́тнѡ ᲂу҆гаси́лъ є҆сѝ, соблю́дсѧ неѡпали́мь: ѡ҆палѧ́емь бо любо́вїю всѣ́хъ цр҃ѧ̀, вє́щнаѧ ᲂу҆вѧди́лъ є҆сѝ жела̑нїѧ.

Бг҃оро́диченъ: Житє́йскаѧ не мо́гꙋтъ ᲂу҆ста̀ по достоѧ́нїю тѧ̀ пѣ́ти, всепѣ́таѧ, вы́шшꙋ сꙋ́щꙋ херꙋві̑мъ, и҆ всѧ́кїѧ тва́ри. тѣ́мже съ бжⷭ҇твеннымъ а҆леѯа́ндромъ влⷣкꙋ ѡ҆ всѣ́хъ на́съ ᲂу҆молѝ.

Пѣ́снь ѕ҃.

І҆рмо́съ: Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.

Неболѣ́зненнꙋю жи́знь въ болѣ́знехъ воспрїѧ́лъ є҆сѝ, и҆ болѣ́зней лю́тыхъ ᲂу҆ставлѧ́еши ѡ҆ѕлоблє́нїѧ, вѣ́рою просѧ́щымъ прїѧ́ти и҆сцѣле́нїе, а҆леѯа́ндре всече́стне. тѣ́мже разрѣшѝ болѣ̑зни на́шѧ дꙋшє́вныѧ и҆ тѣлє́сныѧ.

Къ ра́цѣ твое́й свѧще́ннѣй пристꙋпа́юще, благоꙋха́нїѧ бжⷭ҇твеннагѡ ра́зꙋма и҆сполнѧ́емсѧ, пребл҃же́нне а҆леѯа́ндре, смра́да и҆збавлѧ́ющесѧ страсте́й, любо́вїю тѧ̀ чтꙋ́щїи, ѻ҆́тче прпⷣбне.

И҆справлѧ́еши, ѻ҆́тче, хромы́хъ, и҆ ѻ҆́чи просвѣща́еши слѣпы́хъ, ходи́ти же твори́ши разсла́бленныхъ ѡ҆ хрⷭ҇тѣ̀, и҆ ѿго́ниши дꙋ́хи лꙋка̑выѧ, а҆леѯа́ндре прпⷣбне.

Бг҃оро́диченъ: На тѧ̀ ꙗ҆́кѡ до́ждь на рꙋно̀ сше́дъ, бцⷣе, сп҃съ, и҆зсꙋшѝ ꙗ҆́вѣ пото́ки безбо́жїѧ: дꙋ́шы же на́шѧ напаѧ́ѧ всегда̀, при́снѡ чтꙋ́щыѧ тѧ̀.

И҆́нъ.

І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

Смы́сленнѡ ты̀ вре́мєннаѧ проразсꙋди́въ, а҆леѯа́ндре бл҃же́нне, вѣ̑чнꙋющаѧ болѣ́зньми воздержа́нїѧ дости́глъ є҆сѝ, ѻ҆́тче, дꙋша́мъ строи́тель бы́въ, прпⷣбне.

Ꙗ҆́кѡ терпѧ́щꙋ тѝ вельмѝ по́ты трꙋдѡ́въ твои́хъ, прпⷣбне а҆леѯа́ндре, ᲂу҆до́бь воздержа́нїемъ, чꙋ́дный ѻ҆́тче, ꙗ҆́вльсѧ влⷣка тебѣ̀ хрⷭ҇то́съ, врꙋча́етъ си́лꙋ бжⷭ҇твеннꙋ, и҆ си́мъ тѝ недꙋ́ги повелѣва́етъ цѣли́ти.

Мона́шествꙋющихъ наста́вникъ бы́въ, премꙋ́дре а҆леѯа́ндре, сꙋ́щихъ тѝ є҆диноѻбра́зныхъ ла́ѵры, и҆ ѻ҆́бразъ и҆ начерта́нїе добродѣ́тельныхъ дѣѧ́нїй сы́й, ᲂу҆краси́лъ є҆сѝ всѧ̑, ꙗ҆̀же во ѻ҆би́тели сꙋпрꙋ́жныхъ пребыва̑нїѧ.

Бг҃оро́диченъ: Но́въ ꙗ҆́коже мѡѷсе́й ꙗ҆́вльсѧ, ᲂу҆стро́илъ є҆сѝ ꙗ҆́кѡ ски́нїю ѡ҆гра́дꙋ, всече́стне, ю҆́же и҆ превозрасти́лъ є҆сѝ болѣ́зньми и҆ пѡ́ты твои́ми, ве́сь возложи́всѧ пречⷭ҇тѣй мт҃ри бж҃їи.

Конда́къ, гла́съ и҃.

Ꙗ҆́кѡ многосвѣ́тлаѧ ѕвѣзда̀, дне́сь въ страна́хъ рѡссі́йскихъ возсїѧ́лъ є҆сѝ, ѻ҆́тче, всели́всѧ въ пꙋсты́ню, хрⷭ҇тѡ́вымъ стопа́мъ послѣ́довати ᲂу҆се́рднѡ возжелѣ́лъ є҆сѝ, и҆ тогѡ̀ ст҃о́е и҆́го на ра́мо твоѐ взе́мъ чⷭ҇тны́й крⷭ҇тъ, ᲂу҆мертви́лъ є҆сѝ трꙋды̑ пѡ́двигъ твои́хъ тѣлє́снаѧ взыгра̑нїѧ. тѣ́мже вопїе́мъ тѝ: спасѝ ста́до твоѐ, є҆́же собра́лъ є҆сѝ, мꙋ́дре, да зове́мъ тѝ: ра́дꙋйсѧ, прпⷣбне а҆леѯа́ндре, ѻ҆́тче на́шъ.

І҆́косъ:

Ка́кѡ восхвалю̀ твоѧ̑ по́двиги и҆ борє́нїѧ, прпⷣбне а҆леѯа́ндре; ꙗ҆́кѡ невеще́ственъ ра́зꙋмъ стѧжа́въ смире́нїемъ, житїѐ твоѐ препроводи́лъ є҆сѝ ѕѣ́льнымъ воздержа́нїемъ трꙋдѡ́въ твои́хъ. а҆́ще ᲂу҆́бѡ и҆ человѣ́къ бы́лъ є҆сѝ є҆стество́мъ но вы́шнѧгѡ і҆ерⷭ҇ли́ма ꙗ҆ви́лсѧ є҆сѝ граждани́нъ: съ пло́тїю бо на землѝ пожи́лъ є҆сѝ, но а҆́гг҃льское пребыва́нїе проше́дъ, и҆ бы́лъ є҆сѝ сто́лпъ страстьмѝ непотрѧсо́мъ. тѣ́мъ всѧ̀ рѡссі́йскаѧ землѧ̀ тобо́ю ѡ҆бога́щшисѧ хва́литъ тѧ̀, и҆ вѣ́рою велича́етъ, взыва́ющи тебѣ̀ такова̑ѧ: ра́дꙋйсѧ, ѻ҆те́чествꙋ твоемꙋ̀ похвала̀, вели́комꙋ же новꙋ́градꙋ и҆ все́й странѣ̀ рѡссі́йстѣй пресвѣ́тлый свѣти́льниче: ра́дꙋйсѧ, и҆́же благочести́ва ѻ҆тца̀ пресла́внаѧ ѻ҆́трасль, и҆ благоговѣ́йны ма́тере вѣ́твь многопло́дна: ра́дꙋйсѧ, цѣломꙋ́дрїѧ непрекло́нный сто́лпе, и҆ мона́хѡвъ пресвѣ́тлаѧ сла́ва: ра́дꙋйсѧ, па́стырю хрⷭ҇то́вы ѡ҆гра́ды слове́сныхъ ѻ҆ве́цъ, и҆̀хже къ бж҃їю приводѧ̀ ра́зꙋмꙋ: ра́дꙋйсѧ, ты́ бо многоча́днꙋ пꙋсты́ню воздѣ́лалъ є҆сѝ высото́ю смире́нїѧ твоегѡ̀: ра́дꙋйсѧ, мона́шествꙋющихъ всѣ́хъ ѻ҆́бразъ добродѣ́тели, и҆ є҆диноѻбра́зныхъ ла́ѵры спасе́нїе: ра́дꙋйсѧ, кра́сное добродѣ́телей храни́лище, и҆ всѣ̑мъ въ печа́ли ᲂу҆ныва́ющымъ ᲂу҆тѣше́нїе: ра́дꙋйсѧ, ꙗ҆́кѡ всѧ̑ мі́ра сегѡ̀ мꙋдрова̑нїѧ презрѣ́въ, стра̑сти плотскі̑ѧ ᲂу҆мертви́лъ є҆сѝ: ра́дꙋйсѧ, ꙗ҆́кѡ а҆́гг҃лѡмъ собесѣ́дникъ бы́ти сподо́билсѧ є҆сѝ, и҆ всѧ̑ бѣсѡ́вскїѧ полкѝ посрами́лъ є҆сѝ: ра́дꙋйсѧ, ты́ бо во всѣ́хъ страна́хъ просла́вленъ бы́лъ є҆сѝ, ѡ҆ хрⷭ҇тѣ́ бо мнѡ́га чꙋдеса̀ сотвори́лъ є҆сѝ: ра́дꙋйсѧ, ꙗ҆́кѡ вои́стиннꙋ ѡ҆брѣ́лъ є҆сѝ бж҃їю благода́ть, и҆ со а҆́гг҃лы при́снѡ зрѣ́ти сподо́билсѧ є҆сѝ лице́мъ къ лицꙋ̀ свѧтꙋ́ю трⷪ҇цꙋ: ра́дꙋйсѧ, ꙗ҆́кѡ второ́е со́лнце сїѧ́ѧ чꙋдєсы̀, всѣ̑мъ да́рꙋеши благода́ть и҆сцѣле́нїй: ра́дꙋйсѧ, прпⷣбне а҆леѯа́ндре ѻ҆́тче на́шъ.

Пѣ́снь з҃.

І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Ѡ҆свѧ́щсѧ ѿ младе́нства доброгла́сною трꙋбо́ю моли́твы твоеѧ̀, и҆ неплѡ́дныѧ ᲂу҆трѡ́бы многоплѡ́дны сотвори́лъ є҆сѝ. слѣпы̑мъ подае́ши прозрѣ́нїе, и҆ хрѡмы́мъ благотече́нїе, а҆леѯа́ндре преблаже́нне:

Сле́зными и҆злїѧ̑нїи погаси́лъ є҆сѝ страсте́й разжжє́нїѧ, а҆леѯа́ндре блаже́нне, чꙋде́съ и҆сточи́лъ є҆сѝ стрꙋи̑ присноживо́тны, и҆́миже ѡ҆мыва́ютсѧ дꙋ́шъ же и҆ тѣле́съ недꙋ́зи, пресла́вне.

Терпѣ́нїе стѧжа́въ мно́гое, премꙋ́дре, воздержа́нїе, вѣ́рꙋ и҆ любо́вь и҆́стиннꙋ, ꙗ҆ви́лсѧ є҆сѝ ѻ҆те́цъ си̑рымъ, вдови́цамъ застꙋ́пникъ, ми́лостивъ и҆ смире́нъ а҆леѯа́ндре, мона́хѡмъ сла́ва и҆ похвала̀.

Бг҃оро́диченъ: Ка́кѡ дои́ши млеко́мъ сн҃а, чⷭ҇таѧ, безъ ѻ҆тца̀, пита́ющаго всѧ́кое дыха́нїе, мт҃и пречⷭ҇таѧ; ка́кѡ на рꙋкꙋ̀ но́сиши всѧ̑ содержа́щаго; па́че ᲂу҆ма̀ чꙋ́до твоѐ. тѣ́мъ пое́мъ вели̑чїѧ твоѧ̑.

И҆́нъ.

І҆рмо́съ: Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ.

Крѣ́постїю ѡ҆дѣ́ѧвсѧ, а҆леѯа́ндре, влⷣчнею, и҆ ꙗ҆́кѡ пра́хъ сладостра́стїе житїѧ̀ попра́лъ є҆сѝ, любо́вїю побѣжда́емь нетлѣ́нныѧ жи́зни: є҆́йже ны́нѣ и҆ причасти́лсѧ є҆сѝ, съ ли̑ки а҆́гг҃лъ, ѻ҆́тче, сочета́всѧ.

Крестоѻбра́знѡ простира́ѧ дла̑ни твоѧ̑, а҆леѯа́ндре премꙋ́дре, и҆ моли̑твы твоѧ̑ возсыла́ѧ вы́шнемꙋ, ꙗ҆́кѡ хрⷭ҇та̀ цр҃ѧ̀ сла́вы со а҆́гг҃лы ѻ҆чи́ма ꙗ҆вле́ннѡ, бг҃оно́се, ᲂу҆зрѣ́лъ є҆сѝ, и҆ въ пꙋсты́нѧхъ непрохо́дныхъ водворѧ́ѧсѧ, и҆ща́й гдⷭ҇а бжⷭ҇твенною тѧ̀ благода́тїю соблюда́юща.

Ꙗ҆́кѡ ѕвѣздꙋ̀ тѧ̀, а҆леѯа́ндре, всемі́рнꙋ, мона́хѡвъ свѣти́ло незаходи́мое, помо́щника въ бѣда́хъ, и҆ грѣ́шникѡмъ вели́кое прибѣ́жище вѣ́дый, хода́таѧ и҆ моли́твенника тѧ̀ предлага́ю влⷣцѣ хрⷭ҇тꙋ̀, всече́стне.

Бг҃оро́диченъ: Ви́дѣти жела́ѧ тво́й ᲂу҆го́дникъ твоегѡ̀ сн҃а и҆ бг҃а неизрече́ннꙋю сла́вꙋ, бг҃ороди́тельнице, сегѡ̀ честны́й крⷭ҇тъ на ра́мо взе́мъ, послѣ́дова живонѡ́снымъ є҆гѡ̀ стопа́мъ.

Пѣ́снь и҃.

І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ, ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Оу҆мо́мъ безстра́стїѧ ѡ҆чище́нъ, бесѣ́довалъ є҆сѝ гдⷭ҇еви вседержи́телю: ѿ негѡ́же неизглаго́ланнѡ, прпⷣбне, наꙋча́емь, прⷪ҇ро́чески предглаго́лалъ є҆сѝ просвѣща́ѧ дꙋ́шы, ꙗ҆́кѡ вели́къ, всеблаже́нне, прⷪ҇ро́къ. тѣ́мъ тѧ̀ согла́снѡ, а҆леѯа́ндре премꙋ́дре, вѣ́рнїи похвалѧ́емъ, пою́ще: благослови́те, всѧ̑ дѣла̀ гдⷭ҇нѧ, гдⷭ҇а.

Подава́ѧ тебѣ̀, ꙗ҆̀же проти́вꙋ любвѐ зижди́тель, и҆ ѿ ю҆́ности соблюда́ѧ тѧ̀ десни́цею, ма́лымъ бы́лїемъ самовозра́стшимъ ѿ землѝ, пита́етъ тѧ̀ бг҃олѣ́пнѡ, ꙗ҆́кѡ ѿ младе́нства всѧ́ко похотѣ́нїе попра́вша, и҆ пою́ща: благослови́те, всѧ̑ дѣла̀ гдⷭ҇нѧ, гдⷭ҇а.

Ꙗ҆́кѡ стрꙋѧ̀ бжⷭ҇твенна и҆сцѣле́нїй, происходѧ́щи ѿ ра́ки твоеѧ̀, всѧ̑ и҆сцѣлѧ́етъ, и҆ ѡ҆мыва́етъ сквє́рны страсте́й, и҆ гное́нїе лю́тыхъ ѡ҆чища́етъ, и҆ вѣ́рныхъ напаѧ́етъ всѣ́хъ сердца̀, а҆леѯа́ндре премꙋ́дре, любо́вїю пою́щихъ: благослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ: Вопло́щсѧ безпло́тный и҆зъ тебє̀ бг҃олѣ́пнѡ, є҆го́же молѝ, пречⷭ҇таѧ, стра̑сти пло́ти моеѧ̀ ᲂу҆мертви́ти, и҆ ѡ҆живи́ти мою̀ ᲂу҆мерщвле́ннꙋю дꙋ́шꙋ грѣхмѝ.

И҆́нъ.

І҆рмо́съ: Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а.

Ꙗ҆́коже мо́лнїѧ вели́кими блиста̑нїи житїѐ сїѧ́ющее, всѣ̑мъ возсїѧ̀ воздержа́нїѧ твоегѡ̀, а҆леѯа́ндре премꙋ́дре, благоче́стнѡ зижди́телю зовꙋ́щымъ: благослови́те, всѧ̑ дѣла̀ гдⷭ҇нѧ, гдⷭ҇а.

На землѝ ꙗ҆́кѡ человѣ́къ ходѧ̀, ѻ҆́тче а҆леѯа́ндре, житїѐ себє̀ на нб҃сѣ́хъ ꙗ҆́кѡ вои́стиннꙋ стѧжа́лъ є҆сѝ, а҆́гг҃лѡмъ собесѣ́дникъ ꙗ҆́вльсѧ, житїе́ же и҆ жи́знь соверша́ѧ ѻ҆́нѣхъ. съ ни́миже воспѣва́еши ны́нѣ: благослови́те, всѧ̑ дѣла̀ гдⷭ҇нѧ, гдⷭ҇а.

Тѧ̀ па́че ᲂу҆ма̀ и҆зъ нерожде́нна ѻ҆ц҃а̀, пре́жде вѣ̑къ рожде́нна сн҃а, сла́вный проповѣ́да а҆леѯа́ндръ, и҆ дх҃а прест҃а́гѡ, є҆ди́нꙋ трⷪ҇цꙋ є҆стество́мъ вѣ́дый бж҃ества̀.

Бг҃оро́диченъ: Ꙗ҆́коже и҆лїа̀ пе́рвѣе въ карми́лѣ всели́сѧ, та́кѡ и҆ ты̀ въ пꙋсты́нѧхъ непрохо́дныхъ ᲂу҆пражнѧ́ѧсѧ, возжела́лъ є҆сѝ ѻ҆со́бь съ бг҃омъ жи́ти, и҆ бг҃онача́льными ѡ҆зари́всѧ видѣ̑нїи, ᲂу҆го́дникъ ꙗ҆ви́лсѧ є҆сѝ бцⷣѣ, вопїѧ̀ є҆́й: ра́дꙋйсѧ, ѡ҆бра́дованнаѧ.

Пѣ́снь ѳ҃.

І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀: тѣ́мъ веселѧ́щесѧ, тѧ̀, бцⷣе, велича́емъ.

Твоѧ̑ свѧщє́нныѧ и҆ ст҃ы̑ѧ мо́щи во гро́бѣ лежа́ще, многоразли̑чныѧ недꙋ́ги и҆сцѣлѧ́ютъ, и҆ попалѧ́ютъ полкѝ бѣсѡ́вскїѧ всегда̀, мꙋ́дре а҆леѯа́ндре: бж҃їею бо благода́тїю то́чиши всѣ̑мъ и҆сцѣлє́нїѧ, вѣ́рнѡ тѧ̀ при́снѡ блажа́щымъ.

Стрꙋи̑ на́мъ и҆сцѣле́нїй всегда̀ честна́ѧ твоѧ̀ ра́ка ꙗ҆ви́сѧ, ѻ҆́тче, страсте́й и҆злїѧ́нїе всѧ́ческихъ и҆зсꙋша́ющи, и҆ всѧ̀ напоѧ́ющи дꙋ́шы ко благопло́дїю бжⷭ҇твенномꙋ, премꙋ́дре а҆леѯа́ндре, хрⷭ҇то́въ ᲂу҆го́дниче.

Па́мѧть твоѧ̀ дне́сь ꙗ҆́кѡ со́лнце возсїѧ̀, а҆леѯа́ндре пребл҃же́нне, благочести́выхъ сердца̀ ѡ҆зарѧ́ющи, болѣ́зней твои́хъ, и҆ чꙋде́съ сїѧ́нїемъ, ꙗ҆́кѡ вои́стиннꙋ просвѣща́ющи, ѻ҆́тче, въ ню́же всѧ̑ ны̀ помѧнѝ, вѣ́рнѡ чтꙋ́щыѧ тѧ̀.

Бг҃оро́диченъ: Гла́съ прино́симъ тѝ гаврїи́ловъ ра́дꙋющесѧ: ра́дꙋйсѧ, глаго́люще, мѣ́сто свѧще́нїѧ: ра́дꙋйсѧ, прпⷣбныхъ сла́во, и҆ всѣ́хъ вѣ́рныхъ спасе́нїе, є҆ѧ́же ра́ди ѡ҆божи́хомсѧ, бцⷣе приснодв҃о.

И҆́нъ.

І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.

Стопа́мъ послѣ́дꙋѧ, прпⷣбне и҆ бг҃оно́се, влⷣки хрⷭ҇та̀, благоче́стнѡ пожи́въ на землѝ, кро́токъ, неѕло́бивъ ꙗ҆ви́лсѧ є҆сѝ, ми́лостивъ и҆ смире́нъ, а҆леѯа́ндре, и҆ любвѐ и҆спо́лненъ бжⷭ҇твенныѧ: сегѡ̀ ра́ди тѧ̀ вѣ́рнѡ восхвалѧ́емъ.

И҆сплете́сѧ тебѣ̀ вѣне́цъ ꙗ҆́кѡ побѣди́телю, а҆леѯа́ндре, живоно́сною и҆ вседержи́тельною десни́цею, ѻ҆́тче, и҆ ны́нѣ пою́щыѧ па́мѧть твою̀ сподо́би, блаже́нне, ᲂу҆лꙋчи́ти ѡ҆ставле́нїе согрѣше́нїй, пресла́вне.

Совокꙋпи́лсѧ є҆сѝ со безпло́тными вѡ́инствы, и҆ преподѡ́бнымъ ликѡ́мъ сочта́лсѧ є҆сѝ, и҆ со и҆збра́нными всѣ́ми ликꙋ́еши, претво́рсѧ и҆́стиннымъ ѡ҆боже́нїемъ, и҆ безсме́ртною, ѻ҆́тче, жи́знїю. съ ни́миже непреста́ннѡ ѡ҆ на́съ твоего̀ влⷣкꙋ ᲂу҆молѝ.

Бг҃оро́диченъ: Хра́ме ѡ҆свѧще́нный, вмѣ́стенъ є҆ди́номꙋ ѿ трⷪ҇цы сы́й, хра́мъ тво́й, влⷣчце, ᲂу҆го́дникъ тво́й а҆леѯа́ндръ че́стенъ воздви́же въ сла́вꙋ твою̀ и҆ че́сть. въ не́мже не преста́й молѧ́сѧ, да́тисѧ на́мъ по́мощи моли́твами твои́ми.

Свѣти́ленъ.

Бл҃года́ть преизбы́сть бж҃їѧ въ дꙋшѝ твое́й, премꙋ́дре а҆леѯа́ндре, и҆ ꙗ҆́кѡ безпло́тенъ на землѝ пожи́лъ є҆сѝ. тѣ́мъ почита́ющихъ тѧ̀ страсте́й и҆зба́ви те́мныхъ ѻ҆́блакъ, и҆ къ ти́хомꙋ приста́нищꙋ приводѧ̀, и҆ ѿгонѧ́ѧ ѡ҆полчє́нїѧ бѣсѡ́вскаѧ бжⷭ҇твенною си́лою.

Бг҃оро́диченъ: Сотво́рь вои́стиннꙋ съ тобо́ю вели̑чїѧ сн҃ъ превѣ́чный ѻ҆́ч҃имъ совѣ́томъ: жи́знь бо нетлѣ́ннꙋю безъ стра́сти родила̀ є҆сѝ, и҆ пребыла̀ є҆сѝ ꙗ҆́коже пре́жде ржⷭ҇тва̀ дв҃а, мт҃рскихъ и҆збѣ́гши болѣ́зней, и҆ по ржⷭ҇твѣ̀ дв҃ою пребы́вши.

Труды преподобного Александра Свирского

• Духовная грамота

• Молитвы

Смотреть все труды в библиотеке →

Ро­дил­ся преп. Алек­сандр (в ми­ру Ам­мос) в 1448 г. в пре­де­лах Ве­ли­ко­го Нов­го­ро­да, в неболь­шом ме­стеч­ке Обо­неж­ской пя­ти­ны – Ман­де­рах, по мо­лит­ве пре­ста­ре­лых ро­ди­те­лей, от­ли­чав­ших­ся ис­тин­но хри­сти­ан­ской жиз­нью. Для осво­е­ния гра­мо­ты от­рок по­ру­чен был опыт­но­му на­став­ни­ку, но лишь мо­лит­вой при­об­рел он спо­соб­но­сти к уче­нию, так что вско­ре пре­взо­шел зна­ни­я­ми всех сво­их сверст­ни­ков. С юных лет на­чал он из­ну­рять те­ло бде­ни­ем и по­ста­ми, толь­ко в этом ис­пра­ши­вая сво­бо­ду от ро­ди­тель­ской во­ли. Чужд он был и жи­тей­ских тре­вол­не­ний, и ис­ка­ния удо­воль­ствий, и празд­но­сти. Ко­гда он до­стиг со­вер­шен­но­ле­тия, «вос­хо­те­ша ро­ди­те­ли его со­че­та­ти за­кон­но­му бра­ку, бо­же­ствен­ный же юно­ша небре­жа­ше о сем, но прис­но же­ла­ша и по­мыш­ля­ша, ка­ко бы ми­ра бе­жа­ти». Юно­ша стре­мил­ся в Ва­ла­ам­скую оби­тель, рас­ска­зы о ко­то­рой ему до­во­ди­лось слы­шать. Од­на­жды он встре­тил ино­ков, при­быв­ших с Ва­ла­а­ма в его род­ное се­ле­ние по мо­на­стыр­ским де­лам. Од­но­му из них – уже стар­цу – по­ве­дал он о сво­ем же­ла­нии до­стичь Ва­ла­а­ма и по­лу­чил со­вет не мед­лить с ис­пол­не­ни­ем ду­хов­ной по­треб­но­сти, «по­ка се­я­тель злый не по­се­ял пле­ве­ла в серд­це...»

По­сле усерд­ной мо­лит­вы в 26 лет Ам­мос тай­но оста­вил ро­ди­тель­ский дом. Первую ночь пут­ник про­вел на бе­ре­гу неболь­шо­го кра­си­во­го озе­ра, окру­жен­но­го ве­ко­вы­ми де­ре­вья­ми. В тон­ком сне услы­шал он та­ин­ствен­ный го­лос, ко­то­рый бла­го­сло­вил его в даль­ней­ший путь и про­воз­ве­стил со­ору­же­ние оби­те­ли на этом чуд­ном ме­сте. Воз­бла­го­да­рив Бо­га, юно­ша со­брал­ся ид­ти даль­ше, но до­ро­ги в оби­тель он не знал, и Гос­подь по­слал ему Ан­ге­ла в об­ра­зе слу­чай­но­го пут­ни­ка до са­мых мо­на­стыр­ских во­рот. При­няв по­стриг с име­нем Алек­сандр, про­вел он здесь 13 лет в по­сте и мо­лит­ве. Меж­ду тем его без­утеш­ные ро­ди­те­ли по­лу­чи­ли, на­ко­нец, весть о про­пав­шем сыне. Отец по­се­тил оби­тель и горь­ко пла­кал, уви­дев из­мож­ден­но­го по­стом Алек­сандра. Но по­движ­ник уте­шил его и в ду­хов­ной бе­се­де убе­дил то­же оста­вить мир, чтобы об­ре­сти но­вое по­при­ще. И мать пре­по­доб­но­го дни свои окон­чи­ла в мо­на­сты­ре.

Алек­сандр ре­шил­ся из­брать без­молв­ное жи­тель­ство и про­сил о том на­сто­я­те­ля, но опыт­ный ста­рец счел, что еще не при­шло вре­мя по­ки­дать бра­тию. Од­на­жды во вре­мя ноч­ной мо­лит­вы бла­жен­ный услы­шал небес­ный го­лос, по­веле­ва­ю­щий ему на­пра­вить­ся на ме­сто, ко­то­рое бы­ло ука­за­но преж­де. От­крыв окон­це, уви­дел Алек­сандр ве­ли­кий свет, из­ли­вав­ший­ся с юго-во­сто­ка. На сей раз на­сто­я­тель не от­ка­зал в бла­го­сло­ве­нии и от­пу­стил в на­зна­чен­ный путь. В 1487 г. Алек­сандр при­шел на озе­ро Ро­щин­ское и по­се­лил­ся в пу­стыне, в 6-ти вер­стах от ре­ки Сви­ри. В глу­бине непро­хо­ди­мо­го бо­ра он по­ста­вил неболь­шую хи­жи­ну и пре­дал­ся уеди­нен­ным по­дви­гам.

Непо­да­ле­ку на­хо­ди­лось дво­рян­ское по­ме­стье Ан­дрея За­ва­ли­ши­на, ко­то­рый за­ни­мал­ся охо­той. Од­на­жды, увле­чен­ный по­го­ней за оле­нем, он очу­тил­ся в ча­ще ле­са и на­брел на хи­жи­ну Алек­сандра. По­зна­ко­мив­шись с от­шель­ни­ком, лов­чий при­знал­ся ему, что уже за­ме­чал свет над этим ме­стом и дав­но со­би­рал­ся сю­да. Опе­ча­лил­ся Алек­сандр, что его жи­тель­ство не укры­лось от лю­дей, и по­про­сил при­шель­ца ни­ко­му не ска­зы­вать о нем, по­ве­дал по­том свою по­весть и от­пу­стил с бла­го­сло­ве­ни­ем. Но мол­ва о пу­стын­ни­ке рас­про­стра­ни­лась в окрест­но­стях и до­шла до бра­та Алек­сандра – Иоан­на. С ра­до­стью при­бег он в пу­стынь, чтобы раз­де­лить тя­го­ты от­шель­ни­че­ства. Сми­рив­шись, бла­жен­ный при­нял род­но­го го­стя, вспом­нив, что при на­ча­ле его пу­стын­но­жи­тель­ства бы­ло ему вну­ше­ние свы­ше: не чуж­дать­ся жаж­ду­щих спа­се­ния и ру­ко­во­дить ими. Иоанн же сми­ре­ния не усво­ил и мно­го огор­че­ний до­став­лял бра­ту, то дерз­ко по­учая, то от­ка­зы­ва­ясь стро­ить кел­лии для при­хо­дя­щих.

Слез­ны­ми ноч­ны­ми мо­лит­ва­ми по­беж­дал Алек­сандр в се­бе раз­дра­же­ние и до­са­ду и стя­жал, на­ко­нец, все­по­беж­да­ю­щую лю­бовь к ближ­не­му и ве­ли­кий мир в ду­ше. В ско­ром вре­ме­ни Иоанн скон­чал­ся, и брат по­хо­ро­нил его в пу­сты­ни, к Алек­сан­дру же на­ча­ли со­би­рать­ся жаж­ду­щие оби­тать под се­нью его мо­лит­вы. При­шел и За­ва­ли­шин со сво­и­ми ча­да­ми и при­нес пу­стын­ни­кам мно­го хле­ба. Алек­сандр при­нял жерт­ву, но по­со­ве­то­вал бра­тии не оста­вать­ся празд­ны­ми, а очи­щать лес и воз­де­лы­вать зем­лю, чтобы пи­тать­ся тру­да­ми рук сво­их и снаб­жать убо­гих.

Некто инок Ни­ки­фор, но­сив­ший тя­же­лые вери­ги, при­хо­дил к пу­стын­ни­ку свир­ско­му за бла­го­сло­ве­ни­ем и, по­жив ря­дом с ним, стал со­би­рать­ся на по­кло­не­ние в Ки­ев, а ухо­дя, пред­ска­зал, что Гос­подь со­ору­дит на ме­сте сем оби­тель с ка­мен­ны­ми церк­ва­ми. Ду­хи нечи­стые воз­двиг­ли мно­же­ство ис­ку­ше­ний пре­по­доб­но­му, окру­жая его це­лы­ми пол­чи­ща­ми, и страш­ны­ми угро­за­ми за­став­ля­ли от­сту­пить­ся от ме­ста. Доб­рый же во­ин Хри­стов крест­ным зна­ме­ни­ем рас­се­и­вал все тьмы. Явил­ся то­гда Алек­сан­дру Ан­гел Гос­по­день в глу­бине пу­сты­ни и оси­ял небес­ным све­том, укреп­ляя его дух, чтобы ис­пол­нил он по­ве­лен­ное и по­стро­ил цер­ковь во имя Свя­той Тро­и­цы. Про­жив 25 лет в свир­ской пу­сты­ни, Алек­сандр был уте­шен бо­же­ствен­ным яв­ле­ни­ем та­кой си­лы, что нель­зя бы­ло срав­нить его ни с ка­ки­ми дру­ги­ми вос­хи­ще­ни­я­ми его ду­ха: для него по­вто­ри­лось ви­де­ние, быв­шее неко­гда Ав­ра­аму: свет­лые Ан­ге­лы с по­со­ха­ми в ру­ках изо­бра­жа­ли со­бой Свя­тую Тро­и­цу, и го­лос небес­ный ска­зал ему: «...Дух Свя­тый бла­го­во­лил из­брать те­бя жи­ли­щем ра­ди сер­деч­ной тво­ей чи­сто­ты... ты же со­ору­ди здесь храм Свя­той Тро­и­цы и со­бе­ри бра­тию, да спа­сешь ду­ши их...» Ко­гда же пре­по­доб­ный стал по­мыш­лять, где за­ло­жить храм, явил­ся Ан­гел с про­стер­ты­ми кры­ла­ми, в ку­ко­ле и ино­че­ской ман­тии и ука­зал ме­сто для хра­ма.

Алек­сандр на­чал за­бо­тить­ся о со­ору­же­нии церк­ви, а чис­ло бра­тии меж­ду тем воз­рас­та­ло. Уче­ни­ки умо­ля­ли сво­е­го на­став­ни­ка при­нять сан свя­щен­ства, но сми­рен­ный Алек­сандр укло­нял­ся, по­ка не при­ну­дил его к это­му Нов­го­род­ский ар­хи­епи­скоп Се­ра­пи­он. Ко­гда бы­ла по­стро­е­на де­ре­вян­ная цер­ковь и по­лу­че­на необ­хо­ди­мая утварь, бла­жен­ный Алек­сандр при­сту­пил к свя­щен­но­слу­же­нию, но в то же вре­мя он не остав­лял и чер­ную ра­бо­ту, по­да­вая бра­тии при­мер сми­ре­ния и тру­до­лю­бия. Ни­ко­го не об­ли­чал он су­ро­вым сло­вом, но в ду­хе про­зор­ли­во­сти прит­ча­ми по­учал со­гре­ша­ю­щих. Осо­бо стро­го на­блю­дал он за со­блю­де­ни­ем все­го мо­на­стыр­ско­го уста­ва. Не пре­ры­вал игу­мен бла­го­устра­и­вать оби­тель: по­стро­ил с бра­ти­ей мель­ни­цу и ка­мен­ную цер­ковь вме­сто де­ре­вян­ной. По прось­бе пре­по­доб­но­го ве­ли­кий князь Ва­си­лий Ива­но­вич при­слал ис­кус­ных ка­мен­щи­ков и обиль­ную ми­ло­сты­ню, так что Алек­сандр мог воз­двиг­нуть цер­ковь там, где ука­зал Ан­гел.

Мно­го лю­дей при­те­ка­ло к нему за ду­хов­ным со­ве­том, и в об­ще­нии яв­лял он необы­чай­ную про­зор­ли­вость: от неко­е­го Гри­го­рия не при­нял да­ры, об­ли­чив его в оскорб­ле­нии ма­те­ри; бо­га­то­му по­се­ля­ни­ну Си­мео­ну дал важ­ный со­вет, не по­сле­до­вав ему, тот скон­чал­ся в опре­де­лен­ный день; бо­яри­на Ти­мо­фея Ап­реле­ва на­став­лял, ра­ди рож­де­ния сы­на, под­ра­жать стран­но­при­им­ству Ав­ра­ама и Сар­ры, и через год Ти­мо­фей по­лу­чил про­си­мое. Для сво­их ду­хов­ных чад бла­жен­ный Алек­сандр был ис­тин­ным це­ли­те­лем душ и вра­че­ва­те­лем неду­гов. По мо­лит­ве пре­по­доб­но­го ры­бак умно­жал свой улов. а ку­пец – свое име­ние.

В по­след­ние го­ды жиз­ни преп. Алек­сандр со­ору­дил еще од­ну ка­мен­ную цер­ковь во имя По­кро­ва Пре­свя­тыя Бо­го­ро­ди­цы, опять же не без цар­ско­го уча­стия и по­мо­щи Небес­ной. А вско­ре удо­сто­ил­ся Бо­же­ствен­но­го яв­ле­ния: про­чи­тав в ке­лье ака­фист Бо­жи­ей Ма­те­ри, он ска­зал уче­ни­ку Афа­на­сию: «Трез­вись и бодр­ствуй, ибо бу­дет нам чуд­ное по­се­ще­ние». Вне­зап­но ве­ли­кий свет оси­ял весь мо­на­стырь, и ста­рец уви­дел над ал­та­рем ос­но­ван­ной им церк­ви Ма­терь Бо­жию, как бы си­дя­щую на пре­сто­ле с Мла­ден­цем в ру­ках, в пред­сто­я­нии Ан­гель­ских ли­ков. Пал пред Нею ниц пре­по­доб­ный и услы­шал уте­ши­тель­ное обе­ща­ние, что не оску­де­ет по­кров Ее над со­здан­ной оби­те­лью и по­сле его пре­став­ле­ния. Уче­ник Афа­на­сий ле­жал при этом как мерт­вый от чуд­но­го ви­де­ния.

В глу­бо­кой ста­ро­сти, ко­гда уже при­бли­зил­ся Алек­сандр ко Гос­по­ду по ду­хов­ной лест­ни­це сво­их доб­ро­де­те­лей, пре­по­доб­ный со­брал бра­тию, по­ру­чил их пред­ста­тель­ству Бо­жи­ей Ма­те­ри и на­зна­чил че­ты­рех иеро­мо­на­хов, чтобы свя­ти­тель Ма­ка­рий вы­брал из них игу­ме­на. До са­мой ми­ну­ты сво­е­го от­ше­ствия он непре­стан­но по­учал бра­тию хра­нить сми­рен­но­муд­рие и ни­ще­лю­бие.

По­греб­ли его близ церк­ви Пре­об­ра­же­ния, неда­ле­ко от оби­те­ли, в об­щей брат­ской усы­паль­ни­це. Про­изо­шло это 30 ав­гу­ста (12 сен­тяб­ря н. ст.) 1533 го­да, а 17/30 ап­ре­ля 1641 го­да мо­щи его бы­ли об­ре­те­ны нетлен­ны­ми. По­все­мест­ное празд­но­ва­ние па­мя­ти преп. Алек­сандра бы­ло уста­нов­ле­но уже в 1547г. на день кон­чи­ны. Мест­но па­мять его празд­ну­ет­ся и в день от­кры­тия мо­щей, и в празд­ник Пя­ти­де­сят­ни­цы, в вос­по­ми­на­ние «Три­сол­неч­но­го си­я­ния» – Свя­той Тро­и­цы.

См. так­же: "Па­мять пре­по­доб­но­го от­ца на­ше­го Алек­сандра Свир­ско­го" в из­ло­же­нии свт. Ди­мит­рия Ро­стов­ско­го.