Канон преподобному Кириаку Палестинскому, отшельнику

Припев: Преподо́бне о́тче Кириáче, моли́ Бо́га о на́с

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 12 октября (29 сентября ст. ст.)

Глас 8.

Пе́снь 1.

Ирмо́с: Пе́снь возсле́м, лю́дие, чу́дному Бо́гу на́шему, свободи́вшему Изра́иля от рабо́ты, пе́снь побе́дную пою́ще и вопию́ще: пои́м Тебе́, Еди́ному Влады́це.

Сла́ву боже́ственнаго ра́зума, Христе́, пода́ждь ми́ и благода́ть, преподо́бнаго досто́йно Кириа́ка воспе́ти, того́ моли́твами: Ты́ бо еси́ па́че сло́ва Сокро́вище му́дрых уче́ний.

Пе́снь принося́щаго тебе́ ны́не, Кириа́че блаже́нне, благосе́рдно прии́м, боже́ственней причасти́тися мне́ Христа́ умоли́ лучи́ и светозаре́нию и су́що получи́ти спасе́ния.

Си́лою Влады́чнею кре́пко утвержда́емь, Того́же стопа́м, о́тче, после́довав, нача́льники тмы́, Кириа́че всеблаже́нне, победи́л еси́, и к вы́шнему дости́гл еси́ поко́ю.

Ра́вну показа́л еси́ на земли́ к безпло́тным ре́ть, все́ покори́в плотско́е мудрова́ние живоно́сному ду́ху, те́м в небе́сных ны́не лику́еши с ни́ми дво́рех, богоно́сне.

Богоро́дичен: Пе́сньми Пречи́стую Мари́ю, ве́рнии, похва́лим, Богома́терь облагода́тствованную, покро́в боже́ственный, ти́хое приста́нище, все́х ве́рных спасе́ние.

Пе́снь 3.

Ирмо́с: Не́сть свя́т, я́ко Госпо́дь, и не́сть пра́веден, я́ко Бо́г на́ш, Его́же пое́т вся́ тва́рь: не́сть пра́веден па́че Тебе́, Го́споди.

Непреста́нно ше́ствовав жи́зни стезю́, измла́да бо возлюби́л еси́ Творца́ твоего́, преподо́бне, Его́же жажда́я иска́л еси́, еле́ня подо́бяся тече́нию на исто́чники во́д.

На серде́чней досце́ написа́ние твое́ прие́м, богоглаго́ливе, пе́рстом Ду́ха, я́ко одушевле́нная кни́га, де́йственно соблю́л еси́ Христо́вы живи́тельныя за́поведи.

Удержа́в, преподо́бне, в посте́х чре́во, ла́комственная жела́ния и плотску́ю сла́дость ты́ умертви́л еси́, с чистото́ю, о́тче, пожи́в чре́з все́ житие́.

Веселя́ся, разу́мный Тро́ице хра́м тебе́ сама́го сотвори́л еси́, у́м очища́я, и те́ло, и ду́х, треблаже́нне, и бы́л еси́ прия́телище Трисо́лнечнаго Све́та.

Богоро́дичен: Де́ва родила́ еси́, Неискусобра́чная, и Де́ва пребыла́ еси́, Ма́ти безневе́стная, Богоро́дице Мари́е, Христа́ Бо́га на́шего моли́, спасти́ся на́м.

Конда́к, гла́с 8.

Я́ко побо́рника кре́пкаго и засту́пника чту́щи тя́ свяще́нная ла́вра всегда́, пра́зднует ле́тне па́мяти. Но, я́ко име́я дерзнове́ние ко Го́споду, от враго́в находя́щих соблюди́ ны, да зове́м: ра́дуйся, о́тче треблаже́нне.

Седа́лен, гла́с 5

Воздержа́нием житие́ твое́ украси́л еси́, и у́ды умертви́в, победи́л еси́ вра́жия прило́ги, о́тче преподо́бне, и пусты́ни насе́льник, свети́льник же ми́ра у́мный, Кириа́че, яви́лся еси́. Те́м моли́ся Го́споду поми́ловати ду́ши на́ша.

Богоро́дичен: Тя́ приста́нище, и сте́ну, и прибе́жище, и наде́жду, и покро́в, и предста́тельницу те́плую обре́тше, ве́рнии, к Тебе́ притека́ем, и вопие́м приле́жно, и взыва́ем ве́рно: поми́луй, Богоро́дице, на Тя́ упова́ющия и от прегреше́ний изба́ви.

Крестобогоро́дичен: Кресто́м Сы́на Твоего́, Богора́дованная, и́дольская ле́сть вся́ упраздни́ся, и де́монская кре́пость попра́ся, сего́ ра́ди, ве́рнии, по до́лгу Тя́ всегда́ пое́м, и благослови́м, и Богоро́дицу и́стинно испове́дающе Тя́, велича́ем.

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче.

Ужасе́ся твоего́ со́лнце воздержа́ния и кре́пости, ле́ты мно́гими тя́ гне́вающася не возмо́же отню́д ви́дети, ниже́ во дни́ пи́щи прие́млюща, преподо́бне, благомо́щно песнопою́ща бде́нии непреста́нными: си́ле Твое́й сла́ва, Человеколю́бче.

Зако́ны но́выми и ве́тхим заве́том, му́дре, ра́зумом, блаже́нне, святы́х муже́й поуча́яся, вся́кия доброде́тели ви́д навы́к, му́дрыя пчелы́ нра́ву ревну́я, и сосу́д бы́в избра́нен, вопия́л еси́: си́ле Твое́й сла́ва, Человеколю́бче.

Бога́тство сла́дости, хвала́ и ра́дость преподо́бных еси́, Христе́ Бо́же, того́ ра́ди любя́й Тя́ Кириа́к вся́ в ми́ре уте́шная вмени́ уме́ты, те́м и в пусты́нях непроходи́мых любе́зне наслажда́шеся Твоея́ красоты́.

Ве́м дре́вле Ме́ррския сладча́йшия во́ды проро́ка, зе́лий же го́рькую я́дь преложи́в ты́, Кириа́че, в сла́дкое вкуше́ние, дерзнове́ние показу́я я́ве ко Го́споду, и́стинно Своя́ рабы́ Боже́ственною си́лою сла́вящему.

Я́ко учени́к и подража́тель Влады́ки Христа́, ра́бия лу́нствующася сы́на, о́тче, моли́твою исцеля́еши, благода́ть прие́м неду́ги отгоня́ти и де́монския полки́ низлага́ти о́бразом Боже́ственнаго Креста́.

Богоро́дичен: Ты́ ве́рных хвала́ еси́, Безневе́стная, Ты́ предста́тельница, Ты́ и прибе́жище христиа́н, стена́ и приста́нище, к Сы́ну бо Твоему́ мольбы́ но́сиши, Всенепоро́чная, и от бе́д спаса́еши ве́рою и любо́вию Богоро́дицу Чи́стую Тя́ сла́вящия.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́, окая́ннаго? Но обрати́ мя, и к све́ту за́поведей Твои́х, пути́ моя́ напра́ви, молю́ся.

От Христа́ прие́мь непобеди́мую благода́ть Ду́ха, низложи́л еси́ у́бо держа́вно лю́таго мироде́ржца, душе́вныя стра́сти удержа́в, Кириа́че, безстра́стия венце́м венча́лся еси́.

Кре́пок яви́лся еси́, боле́зньми поще́ния терпе́в тве́рдо, до ста́рости пребы́в глубоча́йшия неосла́блен, преподо́бне, в пусты́нях, я́ко ца́рских дворо́в в черто́зех, со мно́гим весе́лием живя́.

Всено́щная соверша́я, блаже́нне, бде́ния и к Бо́гу исходя́ не го́рдостно, моли́твою Невеще́ственному бесе́дуеши Уму́ и све́тлыя приима́л еси́, Кириа́че, све́та лучи́, светода́тельне умо́м просвеща́емь.

Светоно́сия испо́лнився и проро́ческаго дарова́ния, преподо́бне, чи́стый тво́й язы́к провозвести́ му́чащаго дре́вле неду́га Ориге́нова, вредоу́мнаго и душетле́ннаго, отню́д соверше́нное истребле́ние.

Богоро́дичен: Разу́мно уве́де проро́ков сосло́вие Твоя́ та́инства: небе́сную бо две́рь Влады́ка Тя́ показа́, Чи́стая, и из Тебе́, Де́во, воплоти́вся, пра́вды су́щим во тме́ возсия́ Со́лнце.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Бо́г положе́нием бы́в Христа́ обоже́нием, су́щаго естество́м Бо́га, есте́ственныя ра́ны неможе́ния исправля́л еси́, блаже́нне, неду́жныя исцеля́я, де́монствующияся а́бие леча́ боже́ственною благода́тию.

Избежа́л еси́ к тебе́ приходя́щаго мно́жества наро́да и па́ки стра́шныя пото́ки пости́гл еси́, уклоня́яся, приснопа́мятне, тщи́х похва́л челове́ческих сла́виц.

Я́ко сна́ тле́ннаго ми́ра всю́ сла́ву зря́, Еди́наго Живу́щаго Бо́га лу́чшия сла́вы возлюби́л еси́ прича́стник бы́ти, ея́же, му́дре, пра́ведно сподо́бился еси́.

Богоро́дичен: Я́ко одушевле́нный киво́т, прия́ла еси́ Сло́во Безнача́льное, я́ко свято́е святи́лище, Созда́теля вмести́ла еси́, я́ко престо́л огнеобра́зный, но́сиши Влады́ку, Богома́ти, всея́ тва́ри.

Конда́к, гла́с 2.

Чистото́ю душе́вною боже́ственно вооружи́вся и непреста́нную моли́тву, я́ко копие́, вручи́в кре́пко, ссе́кл еси́ де́монская ополче́ния, Кириа́че, о́тче на́ш, моли́ся непреста́нно о все́х на́с.

И́кос:

Ка́ко восхвалю́ окая́нный а́з твоя́ по́двиги, преподо́бне о́тче? Сле́з же ка́ко пучи́ну отры́гну? Ты́ бо, в житии́ преизя́ществуя, а́нгельский пости́гл еси́ ли́к. Вся́ не́гли воздержа́нием стра́сти умертви́л еси́, му́дре, и пло́ть порабо́тив, покори́л еси́ сию́ ду́ху, моли́тву же име́я, я́ко ме́чь, тмы́ предста́теля низложи́л еси́, моли́ся непреста́нно о все́х на́с.

Пе́снь 7.

Ирмо́с: О́троцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Зако́нов и слове́с богодохнове́нных наслади́ горта́нь поуче́нием па́че ме́да Тво́й ве́рнейший уго́дник: благослове́н еси́, Го́споди, песнопоя́, Бо́же, во ве́ки.

Блаже́нне богоглаго́ливе, приво́диши пою́щия тя́ Христу́, очище́ны от ти́ны страсте́й моли́твами твои́ми, вопию́щия, Кириа́че, и глаго́лющия: благослове́н еси́, Го́споди Бо́же, во ве́ки.

Льво́в избежа́в свире́пства, Дании́л просла́вися, слуги́ же те́х имя́ше повелева́я Кириа́к, зовы́й Тебе́: благослове́н еси́, Го́споди Бо́же, во ве́ки.

Всю́ Ду́ха благода́ть всели́, Христе́, рачи́тель бо Твоея́ пречи́стыя добро́ты бы́сть, вседу́шно Кириа́к, зовя́й Тебе́: благослове́н еси́, Го́споди Бо́же, во ве́ки.

Тро́ичен: Дея́нию приложи́в виде́ние, Триипоста́сное пропове́дал еси́ Существо́, во Отце́ и Сы́не и Ду́се, зовя́й, Кириа́че богоприя́тне: благослове́н еси́, Го́споди Бо́же, во ве́ки.

Богоро́дичен: Угаси́ пла́мень страсте́й мои́х и укроти́ ересе́й бу́рю, Богома́ти: Тя́ бо име́ем предста́тельницу христиа́не и побо́рницу, и Тя́ ве́рою воспева́ем во ве́ки.

Пе́снь 8.

Ирмо́с: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те, вся́ дела́ Госпо́дня, Го́спода.

Тече́ньми сле́з напои́л еси́, блаже́нне, свяще́нную твою́ ду́шу умиле́нием боже́ственным, и многопло́дну показа́л еси́, поя́: благослови́те, вся́ дела́, Го́спода и превозноси́те Его́ во ве́ки.

Фесви́тянин дре́вле су́шею пресуши́ ту́чныя ка́пли, ты́ же дождя́ проли́тие на во́зраст жа́твы низве́л еси́, всеблаже́нне, поя́: благослови́те, вся́ дела́, Го́спода и превозноси́те Его́ во ве́ки.

Ты́ злосла́вных ле́сть обличи́л еси́, Ориге́на ученико́в бу́ияго и басносло́вца, до́блими по́двиги: благослови́те, поя́, правосла́вно Го́спода и превозноси́те Его́ во ве́ки.

Тро́ичен: Тро́ицы Еди́но благоче́стно научи́л еси́, о́тче, Существо́, в тре́х со́лнцех я́ко еди́ну зарю́ же и све́тлость: благослови́те, глаго́ля, правосла́вно Го́спода и превозноси́те Его́ во ве́ки.

Богоро́дичен: Ада́ма, Де́во, па́дшаго яви́лася еси́ дщи́, Бо́жия же Ма́ти Обнови́вшаго мое́ существо́, Его́же пое́м, вся́ дела́, я́ко Го́спода и превозно́сим во вся́ ве́ки.

Пе́снь 9.

Ирмо́с: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от Деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Верте́п тя́, му́дре, прия́т, прие́мшаго исто́чник благода́тный, чудоде́йствовавша боже́ственнаго дре́вле отца́ Харито́на Моисе́йски, Кириа́че, и стена́ незы́бленна па́стве о́наго бы́л еси́ и храни́тель тверде́йший.

Су́що раче́нием жи́зни кре́ст на ра́мена взе́м, житие́, Кириа́че, поуче́ние положи́л еси́ сме́рти, те́м и ны́не к нестаре́ющейся преста́вился еси́ сла́дости нетле́нней, небе́сным лико́м во све́те при Бо́зе сликовству́еши при́сно.

Облиста́в заре́ю, разже́гся Ду́ха, и яви́лся еси́ превы́шним ликостоя́нием све́тел, но озари́ мо́й у́м, блаже́нне, разу́мным и трисия́нным све́том Божества́, моли́твами твои́ми и от страсте́й мя́ и прегреше́ний спаси́.

Венча́вшеся победи́тельною диади́мою, Харито́не богоглаго́ливе и Кириа́че блаже́нне, и предстоя́ще в высоча́йших Христу́, па́ству свою́ оте́чески от бе́д избавля́юще, ны́не призира́йте пра́зднующую ва́ша па́мяти.

Богоро́дичен: Напрязи́, и благопу́тствуй, и ца́рствуй, Сы́не Богома́тере, исма́ильтянина врага́ покаря́я, ра́тующаго ны́, христолюби́вому во́инству, моли́твами, мо́лимся, Ро́ждшия Тя́ неискусому́жно, я́ко Бо́г и Человеколю́бец.

Свети́лен.

Ду́шу очи́стив, преподо́бне, страсте́й омраче́ния зе́льным посто́м и моли́твою непреста́нною, зерца́ло, о́тче, бы́л еси́ боже́ственных осия́ний, возвожде́ния посыла́я на́м ны́не, свети́льниче мона́хов, Кириа́че богоно́се.

Богоро́дичен: И́стинно Богоро́дицу Тя́ испове́дуем, Влады́чице, Тобо́ю спа́сшиися, и́бо Бо́га неизрече́нно родила́ еси́, разруши́вшаго Кресто́м сме́рть, к Себе́ же привле́кши преподо́бных собо́ры, с ни́миже Тя́ восхваля́ем, Де́во.

Пѣ́снь а҃.

І҆рмо́съ: Пѣ́снь возсле́мъ, лю́дїе, чꙋ́дномꙋ бг҃ꙋ на́шемꙋ, свободи́вшемꙋ і҆и҃лѧ ѿ рабо́ты, пѣ́снь побѣ́днꙋю пою́ще и҆ вопїю́ще, пои́мъ тебѣ̀ є҆ди́номꙋ влⷣцѣ.

Сла́вꙋ бжⷭ҇твеннагѡ ра́зꙋма, хрⷭ҇тѐ, пода́ждь мѝ и҆ бл҃года́ть, прпⷣбнаго досто́йнѡ кѷрїа́ка воспѣ́ти, тогѡ̀ моли́твами: ты́ бо є҆сѝ па́че сло́ва сокро́вище мꙋ́дрыхъ ᲂу҆че́нїй.

Пѣ́снь приносѧ́щаго тебѣ̀ ны́нѣ, кѷрїа́че бл҃же́нне, благосе́рднѡ прїи́мъ, бжⷭ҇твеннѣй причасти́тисѧ мнѣ̀ хрⷭ҇та̀ ᲂу҆молѝ лꙋчѝ и҆ свѣтозаре́нїю, и҆ сꙋ́щѡ полꙋчи́ти спасе́нїѧ.

Си́лою влⷣчнею крѣ́пкѡ ᲂу҆твержда́емь, тогѡ́же стопа́мъ, ѻ҆́тче, послѣ́довавъ, нача́льники тмы̀, кѷрїа́че всебл҃же́нне, побѣди́лъ є҆сѝ, и҆ къ вы́шнемꙋ дости́глъ є҆сѝ поко́ю.

Ра́внꙋ показа́лъ є҆сѝ на землѝ къ безпло́тнымъ ре́ть, всѐ покори́въ плотско́е мꙋдрова́нїе живоно́сномꙋ дх҃ꙋ. тѣ́мъ въ нбⷭ҇ныхъ ны́нѣ ликꙋ́еши съ ни́ми дво́рѣхъ, бг҃оно́сне.

Бг҃оро́диченъ: Пѣ́сньми пречи́стꙋю марі́ю вѣ́рнїи похва́лимъ, бг҃омт҃рь ѡ҆благода́тствованнꙋю, покро́въ бжⷭ҇твенный, ти́хое приста́нище, всѣ́хъ вѣ́рныхъ спасе́нїе.

Пѣ́снь г҃.

І҆рмо́съ: Нѣ́сть свѧ́тъ ꙗ҆́кѡ гдⷭ҇ь, нѣ́сть пра́веденъ ꙗ҆́кѡ бг҃ъ на́шъ є҆го́же пое́тъ всѧ̑ тва́рь: нѣ́сть пра́веденъ па́че тебє̀ гдⷭ҇и.

Непреста́ннѡ ше́ствовавъ жи́зни стезю̀, и҆змла́да бо возлюби́лъ є҆сѝ творца̀ твоего̀, прпⷣбне: є҆гѡ́же жажда́ѧ и҆ска́лъ є҆сѝ, є҆ле́нѧ подо́бѧсѧ тече́нїю на и҆сто́чники во́дъ.

На серде́чнѣй досцѣ̀ написа́нїе твоѐ прїе́мъ, бг҃оглаго́ливе, пе́рстомъ дх҃а, ꙗ҆́кѡ ѡ҆дꙋшевле́ннаѧ кни́га, дѣ́йственнѡ соблю́лъ є҆сѝ хрⷭ҇тѡ́вы живи́тєльныѧ за́пѡвѣди.

Оу҆держа́въ, прпⷣбне, въ постѣ́хъ чре́во, ла́комствєннаѧ жела̑нїѧ, и҆ плотскꙋ́ю сла́дость ты̀ ᲂу҆мертви́лъ є҆сѝ, съ чистото́ю, ѻ҆́тче, пожи́въ чре́зъ всѐ житїѐ.

Веселѧ́сѧ, разꙋ́мный трⷪ҇цѣ хра́мъ тебѐ сама́го сотвори́лъ є҆сѝ, ᲂу҆́мъ ѡ҆чища́ѧ, и҆ тѣ́ло и҆ дꙋ́хъ, требл҃же́нне: и҆ бы́лъ є҆сѝ прїѧ́телище трисо́лнечнагѡ свѣ́та.

Бг҃оро́диченъ: Дв҃а родила̀ є҆сѝ неискꙋсобра́чнаѧ, и҆ дв҃а пребыла̀ є҆сѝ мт҃и безневѣ́стнаѧ, бцⷣе марі́е, хрⷭ҇та̀ бг҃а на́шего молѝ, спасти́сѧ на́мъ.

Конда́къ, гла́съ и҃.

Ꙗ҆́кѡ побо́рника крѣ́пкаго и҆ застꙋ́пника, чтꙋ́щи тѧ̀, свѧще́ннаѧ ла́ѵра всегда̀, пра́зднꙋетъ лѣ́тнѣ па̑мѧти. но ꙗ҆́кѡ и҆мѣ́ѧ дерзнове́нїе ко гдⷭ҇ꙋ, ѿ врагѡ́въ находѧ́щихъ соблюди́ ны, да зове́мъ: ра́дꙋйсѧ, ѻ҆́тче требл҃же́нне.

Сѣда́ленъ, гла́съ є҃.

Воздержа́нїемъ житїѐ твоѐ ᲂу҆краси́лъ є҆сѝ, и҆ ᲂу҆́ды ᲂу҆мертви́въ, побѣди́лъ є҆сѝ вра̑жїѧ прило́ги, ѻ҆́тче прпⷣбне, и҆ пꙋсты́ни насе́льникъ, свѣти́льникъ же мі́ра ᲂу҆́мный, кѷрїа́че, ꙗ҆ви́лсѧ є҆сѝ. тѣ́мъ моли́сѧ гдⷭ҇ꙋ, поми́ловати дꙋ́шы на́шѧ.

Бг҃оро́диченъ: Тѧ̀ приста́нище и҆ стѣ́нꙋ, и҆ прибѣ́жище, и҆ наде́ждꙋ, и҆ покро́въ, и҆ предста́тельницꙋ те́плꙋю ѡ҆брѣ́тше вѣ́рнїи, къ тебѣ̀ притека́емъ, и҆ вопїе́мъ прилѣ́жнѡ, и҆ взыва́емъ вѣ́рнѡ: поми́лꙋй, бцⷣе, на тѧ̀ ᲂу҆пова́ющыѧ, и҆ ѿ прегрѣше́нїй и҆зба́ви.

Крⷭ҇тобг҃оро́диченъ: Крⷭ҇то́мъ сн҃а твоегѡ̀, бг҃ора́дованнаѧ, і҆́дѡльскаѧ ле́сть всѧ̀ ᲂу҆праздни́сѧ, и҆ де́мѡнскаѧ крѣ́пость попра́сѧ, сегѡ̀ ра́ди вѣ́рнїи по до́лгꙋ тѧ̀ всегда̀ пое́мъ и҆ благослови́мъ, и҆ бцⷣꙋ и҆́стиннѡ и҆сповѣ́дающе тѧ̀ велича́емъ.

Пѣ́снь д҃.

І҆рмо́съ: Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Оу҆жасе́сѧ твоегѡ̀ со́лнце воздержа́нїѧ и҆ крѣ́пости, лѣ́ты мно́гими тѧ̀ гнѣ́вающасѧ не возмо́же ѿню́дъ ви́дѣти, нижѐ во днѝ пи́щи прїе́млюща, преподо́бне, благомо́щнѡ пѣснопою́ща бдѣ̑нїи непреста́нными: си́лѣ твое́й сла́ва, чл҃вѣколю́бче.

Закѡ́ны но́выми и҆ ве́тхимъ завѣ́томъ, мꙋ́дре, ра́зꙋмомъ, бл҃же́нне, ст҃ы́хъ мꙋже́й поꙋча́ѧсѧ, всѧ́кїѧ добродѣ́тели ви́дъ навы́къ, мꙋ́дрыѧ пчелы̀ нра́вꙋ ревнꙋ́ѧ, и҆ сосꙋ́дъ бы́въ и҆збра́ненъ, вопїѧ́лъ є҆сѝ: си́лѣ твое́й сла́ва, чл҃вѣколю́бче.

Бога́тство сла́дости, хвала̀ и҆ ра́дость прпⷣбныхъ є҆сѝ, хрⷭ҇тѐ бж҃е: тогѡ̀ ра́ди любѧ́й тѧ̀ кѷрїа́къ, всѧ̑ въ мі́рѣ ᲂу҆тѣ̑шнаѧ вмѣнѝ ᲂу҆ме́ты: тѣ́мъ и҆ въ пꙋсты́нѧхъ непроходи́мыхъ любе́знѣ наслажда́шесѧ твоеѧ̀ красоты̀.

Вѣ́мъ дре́вле, ме́ррскїѧ сладча́йшыѧ во́ды прⷪ҇ро́ка: ѕе́лїй же го́рькꙋю ꙗ҆́дь преложи́въ ты̀, кѷрїа́че, въ сла́дкое вкꙋше́нїе, дерзнове́нїе показꙋ́ѧ ꙗ҆́вѣ ко гдⷭ҇ꙋ, и҆́стиннѡ своѧ̑ рабы̑, бжⷭ҇твенною си́лою сла́вѧщемꙋ.

Ꙗ҆́кѡ ᲂу҆чени́къ и҆ подража́тель влⷣки хрⷭ҇та̀, ра́бїѧ лꙋ́нствꙋющасѧ сы́на, ѻ҆́тче, моли́твою и҆сцѣлѧ́еши, бл҃года́ть прїе́мъ недꙋ́ги ѿгонѧ́ти, и҆ де́мѡнскїѧ полкѝ низлага́ти ѻ҆́бразомъ бжⷭ҇твеннагѡ крⷭ҇та̀.

Бг҃оро́диченъ: Ты̀ вѣ́рныхъ хвала̀ є҆сѝ, безневѣ́стнаѧ, ты̀ предста́тельница, ты̀ и҆ прибѣ́жище хрⷭ҇тїа́нъ, стѣна̀ и҆ приста́нище: къ сн҃ꙋ бо твоемꙋ̀ мольбы̑ но́сиши, всенепоро́чнаѧ, и҆ ѿ бѣ́дъ спаса́еши вѣ́рою и҆ любо́вїю бцⷣꙋ чⷭ҇тꙋю тѧ̀ сла́вѧщыѧ.

Пѣ́снь є҃.

І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Ѿ хрⷭ҇та̀ прїе́мь непобѣди́мꙋю бл҃года́ть дх҃а, низложи́лъ є҆сѝ ᲂу҆́бѡ держа́внѡ лю́таго мїроде́ржца, дꙋшє́вныѧ стра̑сти ᲂу҆держа́въ, кѷрїа́че, безстра́стїѧ вѣнце́мъ вѣнча́лсѧ є҆сѝ.

Крѣ́покъ ꙗ҆ви́лсѧ є҆сѝ, болѣ́зньми поще́нїѧ терпѣ́въ тве́рдѡ, до ста́рости пребы́въ глꙋбоча́йшїѧ неѡсла́бленъ, прпⷣбне, въ пꙋсты́нѧхъ ꙗ҆́кѡ ца́рскихъ дворѡ́въ въ черто́зѣхъ, со мно́гимъ весе́лїемъ живѧ̀.

Всенѡ́щнаѧ соверша́ѧ, бл҃же́нне, бдѣ̑нїѧ, и҆ къ бг҃ꙋ и҆сходѧ̀ не го́рдостнѡ, моли́твою невеще́ственномꙋ бесѣ́дꙋеши ᲂу҆мꙋ̀, и҆ свѣ̑тлыѧ прїима́лъ є҆сѝ, кѷрїа́че, свѣ́та лꙋчы̀, свѣтода́тельнѣ ᲂу҆мо́мъ просвѣща́емь.

Свѣтоно́сїѧ и҆спо́лнивсѧ, и҆ прⷪ҇ро́ческагѡ дарова́нїѧ, преподо́бне, чи́стый тво́й ѧ҆зы́къ провозвѣстѝ мꙋ́чащагѡ дре́вле недꙋ́га ѻ҆рїге́нова вредоꙋ́мнагѡ и҆ дꙋшетлѣ́ннагѡ, ѿню́дъ соверше́нное и҆стребле́нїе.

Бг҃оро́диченъ: Разꙋ́мнѡ ᲂу҆вѣ́дѣ прⷪ҇ро́кѡвъ сосло́вїе твоѧ̑ та̑инства: нбⷭ҇нꙋю бо две́рь влⷣка тѧ̀ показа̀, чⷭ҇таѧ, и҆ и҆зъ тебє̀, дв҃о, воплоти́всѧ, пра́вды сꙋ́щымъ во тмѣ̀ возсїѧ̀ сл҃нце.

Пѣ́снь ѕ҃.

І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

Бг҃ъ положе́нїемъ бы́въ, хрⷭ҇та̀ ѡ҆боже́нїемъ сꙋ́щагѡ є҆стество́мъ бг҃а, є҆сте́ствєнныѧ ра̑ны неможе́нїѧ и҆справлѧ́лъ є҆сѝ, бл҃же́нне, недꙋ̑жныѧ и҆сцѣлѧ́ѧ, де́мѡнствꙋющыѧсѧ а҆́бїе лѣчѧ̀ бжⷭ҇твенною бл҃года́тїю.

И҆збѣжа́лъ є҆сѝ къ тебѣ̀ приходѧ́щагѡ мно́жества наро́да: и҆ па́ки стра́шныѧ пото́ки пости́глъ є҆сѝ, ᲂу҆клонѧ́ѧсѧ, приснопа́мѧтне, тщи́хъ похва́лъ чл҃вѣ́ческихъ сла́вицъ.

Ꙗ҆́кѡ сна̀ тлѣ́ннагѡ мі́ра всю̀ сла́вꙋ зрѧ̀, є҆ди́нагѡ живꙋ́щагѡ бг҃а лꙋ́чшїѧ сла́вы возлюби́лъ є҆сѝ прича́стникъ бы́ти: є҆ѧ́же, мꙋ́дре, пра́веднѡ сподо́билсѧ є҆сѝ.

Бг҃оро́диченъ: Ꙗ҆́кѡ ѡ҆дꙋшевле́нный кївѡ́тъ прїѧ́ла є҆сѝ сло́во безнача́льное, ꙗ҆́кѡ ст҃о́е ст҃и́лище созда́телѧ вмѣсти́ла є҆сѝ, ꙗ҆́кѡ престо́лъ ѻ҆гнеѻбра́зный но́сиши влⷣкꙋ, бг҃ома́ти, всеѧ̀ тва́ри.

Конда́къ, гла́съ в҃.

Чистото́ю дꙋше́вною бжⷭ҇твеннѡ воѡрꙋжи́всѧ, и҆ непреста́ннꙋю моли́твꙋ ꙗ҆́кѡ копїѐ врꙋчи́въ, крѣ́пкѡ ссѣ́клъ є҆сѝ дє́мѡнскаѧ ѡ҆полчє́нїѧ, кѷрїа́че ѻ҆́тче на́шъ: моли́сѧ непреста́ннѡ ѡ҆ всѣ́хъ на́съ.

І҆́косъ:

Ка́кѡ восхвалю̀ ѻ҆каѧ́нный а҆́зъ твоѧ̑ по́двиги, преподо́бне ѻ҆́тче; сле́зъ же ка́кѡ пꙋчи́нꙋ ѿры́гнꙋ; ты́ бо въ житїѝ преизѧ́ществꙋѧ, а҆́гг҃льскїй пости́глъ є҆сѝ ли́къ. всѧ̑ не́гли воздержа́нїемъ стра̑сти ᲂу҆мертви́лъ є҆сѝ, мꙋ́дре, и҆ пло́ть порабо́тивъ, покори́лъ є҆сѝ сїю̀ дꙋ́хꙋ: моли́твꙋ же и҆мѣ́ѧ ꙗ҆́кѡ ме́чь, тмы̀ предста́телѧ низложи́лъ є҆сѝ: моли́сѧ непреста́ннѡ ѡ҆ всѣ́хъ на́съ.

Пѣ́снь з҃.

І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.

Зако́нѡвъ и҆ слове́съ бг҃одохнове́нныхъ насладѝ горта́нь поꙋче́нїемъ па́че ме́да тво́й вѣ́рнѣйшїй ᲂу҆го́дникъ, бл҃гослове́нъ є҆сѝ гдⷭ҇и, пѣснопоѧ̀, бж҃е во вѣ́ки.

Бл҃же́нне, бг҃оглаго́ливе, приво́диши пою́щыѧ тѧ̀ хрⷭ҇тꙋ̀, ѡ҆чище́ны ѿ ти́ны страсте́й моли́твами твои́ми, вопїю́щыѧ, кѷрїа́че, и҆ глаго́лющыѧ: бл҃гослове́нъ є҆сѝ гдⷭ҇и бж҃е во вѣ́ки.

Львѡ́въ и҆збѣжа́въ свирѣ́пства данїи́лъ просла́висѧ, слꙋги̑ же тѣ́хъ и҆мѧ́ше повелѣва́ѧ кѷрїа́къ, зовы́й тебѣ̀: бл҃гослове́нъ є҆сѝ гдⷭ҇и бж҃е во вѣ́ки.

Всю̀ дх҃а бл҃года́ть вселѝ, хрⷭ҇тѐ, рачи́тель бо твоеѧ̀ пречⷭ҇тыѧ добро́ты бы́сть, вседꙋ́шнѡ кѷрїа́къ зовѧ́й тебѣ̀: бл҃гослове́нъ є҆сѝ гдⷭ҇и бж҃е во вѣ́ки.

Трⷪ҇ченъ: Дѣѧ́нїю приложи́въ видѣ́нїе, трїѷпоста́сное проповѣ́далъ є҆сѝ сꙋщество̀, во ѻ҆ц҃ѣ̀ и҆ сн҃ѣ и҆ дс҃ѣ, зовѧ́й, кѷрїа́че бг҃опрїѧ́тне: бл҃гослове́нъ є҆сѝ гдⷭ҇и бж҃е во вѣ́ки.

Бг҃оро́диченъ: Оу҆гасѝ пла́мень страсте́й мои́хъ, и҆ ᲂу҆кротѝ є҆ресе́й бꙋ́рю, бг҃ома́ти: тѧ́ бо и҆мѣ́емъ предста́тельницꙋ хрⷭ҇тїа́не, и҆ побо́рницꙋ, и҆ тѧ̀ вѣ́рою воспѣва́емъ во вѣ́ки.

Пѣ́снь и҃.

І҆рмо́съ: Побѣди́тели мꙋчи́телѧ и҆ пла́мене бл҃года́тїю твое́ю бы́вше, за́повѣдемъ твои̑мъ ѕѣлѡ̀ прилѣжа́ще, ѻ҆́троцы вопїѧ́хꙋ: благослови́те всѧ̑ дѣла̀ гдⷭ҇нѧ гдⷭ҇а.

Тече́ньми сле́зъ напои́лъ є҆сѝ, бл҃же́нне, свѧще́ннꙋю твою̀ дꙋ́шꙋ, ᲂу҆миле́нїемъ бжⷭ҇твеннымъ, и҆ многопло́днꙋ показа́лъ є҆сѝ, поѧ̀: благослови́те всѧ̑ дѣла̀ гдⷭ҇а, и҆ превозноси́те є҆го̀ во вѣ́ки.

Ѳесві́тѧнинъ дре́вле сꙋ́шею пресꙋшѝ тꙋ́чныѧ ка̑пли: ты́ же дождѧ̀ проли́тїе на во́зрастъ жа́твы низве́лъ є҆сѝ, всебл҃же́нне, поѧ̀: благослови́те всѧ̑ дѣла̀ гдⷭ҇а, и҆ превозноси́те є҆го̀ во вѣ́ки.

Ты̀ ѕлосла́вныхъ ле́сть ѡ҆бличи́лъ є҆сѝ, ѻ҆рїге́на ᲂу҆ченикѡ́въ бꙋ́їѧгѡ и҆ басносло́вца, до́блими пѡ́двиги, бл҃гослови́те, поѧ̀, правосла́внѡ гдⷭ҇а, и҆ превозноси́те є҆го̀ во вѣ́ки.

Трⷪ҇ченъ: Трⷪ҇цы є҆ди́но благоче́стнѡ наꙋчи́лъ є҆сѝ, ѻ҆́тче, сꙋщество̀, въ тре́хъ сл҃нцѣхъ, ꙗ҆́кѡ є҆ди́нꙋ зарю́ же и҆ свѣ́тлость, благослови́те, глаго́лѧ, правосла́внѡ гдⷭ҇а, и҆ превозноси́те є҆го̀ во вѣ́ки.

Бг҃оро́диченъ: А҆да́ма, дв҃о, па́дшагѡ ꙗ҆ви́ласѧ є҆сѝ дщѝ, бж҃їѧ же мт҃и ѻ҆бнови́вшагѡ моѐ сꙋщество̀. є҆го́же пое́мъ всѧ̑ дѣла̀ ꙗ҆́кѡ гдⷭ҇а, и҆ превозно́симъ во всѧ̑ вѣ́ки.

Пѣ́снь ѳ҃.

І҆рмо́съ: Оу҆страши́сѧ всѧ́къ слꙋ́хъ, неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дѣви́ческагѡ чре́ва бы́въ чл҃вѣ́къ. тѣ́мже пречⷭ҇тꙋю бцⷣꙋ, вѣ́рнїи, велича́емъ.

Верте́пъ тѧ̀, мꙋ́дре, прїѧ́тъ, прїе́мшаго и҆сто́чникъ бл҃года́тный чꙋдодѣ́йствовавша бжⷭ҇твеннагѡ дре́вле ѻ҆тца̀ харїтѡ́на мѡѷсе́йски, кѷрїа́че, и҆ стѣна̀ незы́бленна па́ствѣ ѻ҆́нагѡ бы́лъ є҆сѝ, и҆ храни́тель твердѣ́йшїй.

Сꙋ́щѡ раче́нїемъ жи́зни крⷭ҇тъ на ра́мена взе́мъ, житїѐ, кѷрїа́че, поꙋче́нїе положи́лъ є҆сѝ сме́рти. тѣ́мъ и҆ ны́нѣ къ нестарѣ́ющейсѧ преста́вилсѧ є҆сѝ сла́дости нетлѣ́ннѣй, нбⷭ҇нымъ ликѡ́мъ во свѣ́тѣ при бз҃ѣ сликовствꙋ́еши при́снѡ.

Ѡ҆блиста́въ, заре́ю разже́гсѧ дх҃а, и҆ ꙗ҆ви́лсѧ є҆сѝ превы́шнимъ ликостоѧ́нїємъ свѣ́телъ: но ѡ҆зарѝ мо́й ᲂу҆́мъ, бл҃же́нне, разꙋ́мнымъ и҆ трїсїѧ́ннымъ свѣ́томъ бжⷭ҇тва̀, моли́твами твои́ми, и҆ ѿ страсте́й мѧ̀ и҆ прегрѣше́нїй спасѝ.

Вѣнча́вшесѧ побѣди́тельною дїадѵ́мою, харїтѡ́не бг҃оглаго́ливе, и҆ кѷрїа́че бл҃же́нне, и҆ предстоѧ́ще въ высоча́йшихъ хрⷭ҇тꙋ̀, па́ствꙋ свою̀ ѻ҆те́чески ѿ бѣ́дъ и҆збавлѧ́юще, ны́нѣ призира́йте пра́зднꙋющꙋю ва́шѧ па̑мѧти.

Бг҃оро́диченъ: Напрѧзѝ, и҆ благопꙋ́тствꙋй, и҆ црⷭ҇твꙋй сн҃е бг҃ома́тере, і҆сма́ильтѧнина врага̀ покарѧ́ѧ ра́тꙋющаго ны̀, хрⷭ҇толюби́вомꙋ во́инствꙋ, моли́твами, мо́лимсѧ, ро́ждшїѧ тѧ̀ неискꙋсомꙋ́жнѡ, ꙗ҆́кѡ бг҃ъ и҆ чл҃вѣколю́бецъ.

Свѣти́ленъ.

Дꙋ́шꙋ ѡ҆чи́стивъ, прпⷣбне, страсте́й ѡ҆мраче́нїѧ, ѕѣ́льнымъ посто́мъ, и҆ моли́твою непреста́нною, зерца́ло, ѻ҆́тче, бы́лъ є҆сѝ бжⷭ҇твенныхъ ѡ҆сїѧ́нїй, возвождє́нїѧ посыла́ѧ на́мъ ны́нѣ, свѣти́льниче мона́хѡвъ, кѷрїа́че бг҃оно́се.

Бг҃оро́диченъ: И҆́стиннѡ бцⷣꙋ тѧ̀ и҆сповѣ́дꙋемъ, влⷣчце, тобо́ю спа́сшїисѧ: и҆́бо бг҃а неизрече́ннѡ родила̀ є҆сѝ, разрꙋши́вшаго крⷭ҇то́мъ сме́рть, къ себѣ́ же привле́кша преподо́бныхъ собо́ры: съ ни́миже тѧ̀ восхвалѧ́емъ, дв҃о.

Пре­по­доб­ный Ки­ри­ак ро­дил­ся в Ко­рин­фе в се­мье пре­сви­те­ра со­бор­ной церк­ви Иоан­на и его су­пру­ги Ев­док­сии. Епи­скоп Ко­ринф­ский Петр, его род­ствен­ник, ви­дя, что Ки­ри­ак рас­тет ти­хим и бла­го­ра­зум­ным от­ро­ком, по­ста­вил его чте­цом в церк­ви. По­сто­ян­ное чте­ние Свя­щен­но­го Пи­са­ния про­бу­ди­ло в его ду­ше лю­бовь к Гос­по­ду и стрем­ле­ние к непо­роч­ной, бо­го­угод­ной жиз­ни. Од­на­жды, ко­гда юно­ше не бы­ло еще 18-ти лет, во вре­мя цер­ков­ной служ­бы он был так глу­бо­ко тро­нут сло­ва­ми Еван­ге­лия: "Аще кто хо­щет по Мне ид­ти, да от­вёр­жет­ся се­бе и воз­мет крест свой и по Мне гря­дет" (Мф.16,24), что тут же, не за­хо­дя до­мой, тай­но ушел на при­стань, сел на ко­рабль и от­пра­вил­ся в Иеру­са­лим. По­се­тив свя­тые ме­ста, Ки­ри­ак несколь­ко ме­ся­цев про­был в мо­на­сты­ре неда­ле­ко от Си­о­на в по­слу­ша­нии у игу­ме­на ав­вы Евстор­гия и по его бла­го­сло­ве­нию на­пра­вил­ся в пу­стын­ную Лав­ру пре­по­доб­но­го Ев­фи­мия Ве­ли­ко­го (па­мять 20 ян­ва­ря). Пре­по­доб­ный Ев­фи­мий, про­ви­дя в юно­ше ве­ли­кие Бо­жии да­ро­ва­ния, по­стриг его в ино­че­ский об­раз и на­пра­вил под на­ча­ло пре­по­доб­но­го Ге­ра­си­ма (па­мять 4 мар­та), под­ви­зав­ше­го­ся на Иор­дане в оби­те­ли свя­то­го Фео­к­ти­ста. Свя­той Ге­ра­сим, ви­дя мо­ло­дость Ки­ри­а­ка, ука­зал ему жить в по­сто­ян­ном об­ще­нии с бра­ти­ей. Мо­ло­дой инок при­леж­но ис­пол­нял мо­на­стыр­ские по­слу­ша­ния, усерд­но мо­лил­ся, ма­ло спал, пи­щу при­ни­мал через день, пи­та­ясь толь­ко хле­бом и во­дой. В Ве­ли­кий пост свя­той Ге­ра­сим, уда­ля­ясь по обык­но­ве­нию в пу­сты­ню Ру­ва, чтобы воз­вра­тить­ся в оби­тель в Неде­лю ва­ий, стал брать с со­бой и Ки­ри­а­ка. В пол­ном уеди­не­нии по­движ­ни­ки усу­губ­ля­ли свои тру­ды. Пре­по­доб­ный Ге­ра­сим каж­дую неде­лю при­ча­щал сво­е­го уче­ни­ка Свя­тых Та­ин. По­сле кон­чи­ны пре­по­доб­но­го Ге­ра­си­ма 27-лет­ний инок Ки­ри­ак вер­нул­ся в Лав­ру пре­по­доб­но­го Ев­фи­мия, но его то­же уже не бы­ло в жи­вых. Пре­по­доб­ный Ки­ри­ак ис­про­сил се­бе уеди­нен­ную кел­лию и там под­ви­зал­ся в без­мол­вии, об­ща­ясь лишь с ино­ком Фо­мой. Но вско­ре Фо­ма был по­слан в Алек­сан­дрию, где его хи­ро­то­ни­са­ли во епи­ско­па, и свя­той Ки­ри­ак в пол­ном без­мол­вии про­вел 10 лет. В 37-лет­нем воз­расте он был по­свя­щен в сан диа­ко­на. Ко­гда меж­ду оби­те­ля­ми пре­по­доб­но­го Ев­фи­мия и пре­по­доб­но­го Фео­к­ти­ста про­изо­шло раз­де­ле­ние, свя­той Ки­ри­ак уда­лил­ся в Су­кий­ский мо­на­стырь пре­по­доб­но­го Ха­ри­то­на (па­мять 28 сен­тяб­ря). В этой оби­те­ли вновь по­сту­па­ю­щих ино­ков при­ни­ма­ли как но­во­на­чаль­ных; так же был при­нят и свя­той Ки­ри­ак, ко­то­рый сми­рен­но тру­дил­ся на об­щих мо­на­стыр­ских по­слу­ша­ни­ях. Через несколь­ко лет пре­по­доб­ный Ки­ри­ак был хи­ро­то­ни­сан во пре­сви­те­ра и на­зна­чен ка­но­нар­хом и тру­дил­ся в этом по­слу­ша­нии 18 лет. В оби­те­ли свя­то­го Ха­ри­то­на пре­по­доб­ный Ки­ри­ак про­вел 30 лет. Стро­жай­ший пост и со­вер­шен­ное незло­бие вы­де­ля­ли пре­по­доб­но­го Ки­ри­а­ка да­же сре­ди ас­ке­тов – по­движ­ни­ков Лав­ры. Каж­дую ночь он чи­тал в кел­лии Псал­тирь, пре­ры­вая чте­ние лишь для то­го, чтобы ид­ти в храм к по­лу­нощ­ни­це, спал по­движ­ник очень ма­ло. Ко­гда пре­по­доб­но­му ис­пол­ни­лось 70 лет, он уда­лил­ся в пу­сты­ню На­ту­фа, взяв с со­бой сво­е­го уче­ни­ка Иоан­на. В пу­стыне от­шель­ни­ки пи­та­лись лишь горь­ки­ми тра­ва­ми, ко­то­рые по мо­лит­ве свя­то­го Ки­ри­а­ка де­ла­лись год­ны­ми в пи­щу. По про­ше­ствии пя­ти лет о пу­стын­ни­ках узнал один из жи­те­лей и при­вел к ним сво­е­го бес­но­ва­то­го сы­на, и свя­той Ки­ри­ак ис­це­лил его. С тех пор мно­го лю­дей ста­ло при­хо­дить к пре­по­доб­но­му со сво­и­ми нуж­да­ми, но он ис­кал пол­но­го уеди­не­ния и уда­лил­ся в пу­сты­ню Ру­ва, где про­был еще пять лет. Од­на­ко и в эту пу­сты­ню к нему при­хо­ди­ли боль­ные и бес­но­ва­тые, и пре­по­доб­ный ис­це­лял их крест­ным зна­ме­ни­ем и мо­лит­вой. На 80-м го­ду жиз­ни пре­по­доб­ный Ки­ри­ак уда­лил­ся в со­кро­вен­ную пу­сты­ню Су­са­ким, где схо­ди­лись рус­ла двух вы­сох­ших рек. По пре­да­нию, о Су­са­ки­ме воз­ве­щал свя­той про­рок Да­вид: "Ты ис­су­шил еси ре­ки Ифам­ские" (Пс.73,15). Через семь лет к нему при­шли бра­тия из Су­кий­ско­го мо­на­сты­ря, про­ся его ду­хов­ной по­мо­щи во вре­мя на­сту­пив­ше­го по по­пуще­нию Бо­жию го­ло­да и гу­би­тель­ных бо­лез­ней. Они умо­ли­ли свя­то­го Ки­ри­а­ка вер­нуть­ся в оби­тель, и пре­по­доб­ный по­се­лил­ся в пе­ще­ре, где рань­ше под­ви­зал­ся пре­по­доб­ный Ха­ри­тон.

Пре­по­доб­ный Ки­ри­ак ока­зал боль­шую по­мощь Церк­ви в борь­бе с рас­про­стра­нив­шей­ся ере­сью ори­ге­ни­тов, мо­лит­вой и сло­вом об­ра­щал обо­льщен­ных на ис­тин­ный путь, укреп­ляя в ве­ре пра­во­слав­ной. Со­ста­ви­тель жи­тия пре­по­доб­но­го Ки­ри­а­ка, мо­нах Лав­ры пре­по­доб­но­го Ев­фи­мия Ки­рилл, был сви­де­те­лем то­го, как пре­по­доб­ный пред­ска­зал близ­кую смерть ере­се­на­чаль­ни­ков Но­на и Леон­тия, что вско­ре и свер­ши­лось, и ересь пе­ре­ста­ла рас­про­стра­нять­ся. Са­ма Пре­свя­тая Бо­го­ро­ди­ца при­зы­ва­ла пре­по­доб­но­го Ки­ри­а­ка блю­сти в чи­сто­те пра­во­слав­ное уче­ние: явив­шись ему во сне со свя­ты­ми Иоан­ном Пред­те­чей и Иоан­ном Бо­го­сло­вом, Она от­ка­за­лась вой­ти в кел­лию пре­по­доб­но­го, по­то­му что в ней на­хо­ди­лась кни­га со сло­ва­ми ере­ти­ка Несто­рия. "У те­бя в кел­лии – Мой враг", – ска­за­ла Она (па­мять яв­ле­ния Пре­свя­той Бо­го­ро­ди­цы пре­по­доб­но­му Ки­ри­а­ку 8 июня). На 99-м го­ду жиз­ни пре­по­доб­ный Ки­ри­ак опять уда­лил­ся в Су­са­ким и там жил со сво­им уче­ни­ком Иоан­ном. В пу­стыне пре­по­доб­но­му Ки­ри­а­ку слу­жил огром­ный лев, ко­то­рый охра­нял его от раз­бой­ни­ков, но не тро­гал при­хо­див­ших бра­тий и ел из рук пре­по­доб­но­го. Од­на­жды в лет­нюю жа­ру вы­сох­ла вся во­да в яме, ку­да зи­мой пу­стын­ни­ки со­би­ра­ли во­ду, а дру­го­го ис­точ­ни­ка во­ды не бы­ло. Пре­по­доб­ный Ки­ри­ак по­мо­лил­ся, и тут же в пу­стыне про­лил­ся обиль­ный дождь, на­пол­нив­ший яму во­дой. За два го­да до смер­ти пре­по­доб­ный Ки­ри­ак вер­нул­ся в мо­на­стырь и вновь по­се­лил­ся в пе­ще­ре пре­по­доб­но­го Ха­ри­то­на. До кон­ца жиз­ни пра­вед­ный ста­рец со­хра­нял бод­рость, с усер­ди­ем пел стоя, ни­ко­гда не бы­вал без де­ла: или мо­лил­ся, или ра­бо­тал. Пе­ред смер­тью пре­по­доб­ный Ки­ри­ак при­звал бра­тию, бла­го­сло­вил всех и с мо­лит­вой ти­хо ото­шел ко Гос­по­ду, про­жив 109 лет.

См. так­же: "Жи­тие пре­по­доб­но­го от­ца на­ше­го Ки­ри­а­ка" в из­ло­же­нии свт. Ди­мит­рия Ро­стов­ско­го.