Канон равноапостольной Фекле Иконийской, Селевкийской, первомученице

Припев: Свята́я первому́ченице ма́ти Фéкло, моли́ Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 07 октября (24 сентября ст. ст.)

Глас 8.

Пе́снь 1.

Ирмо́с: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко еди́н сла́вно просла́вися.

Гла́с язы́ка не мо́жет всесла́вных первому́ченицы пове́дати страда́льчеств, изнемога́ет бо к похвале́ досто́йней.

Преста́ мучи́телево суесло́вие прего́рдое, на того́ бо жены́ благоче́стно во Христе́ му́жествоваша.

Глаго́лы неизрече́нными ева́нгельски огласи́вшися твои́ми, всеблаже́нне Па́вле, Христу́ де́ва уневе́стися.

Богоро́дичен: Гро́зд Тя́ жизноно́сный, всеми́рнаго точа́щ сла́дость спасе́ния, Де́ва, Христе́, породи́.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

О́ле любве́ твоея́, па́че ума́, всечестна́я! И́мже о Христе́ Па́влу привяза́лася еси́, соедини́вшися ду́хом.

Уязви́ти тя́, сла́вная, уя́звльшуюся жела́нием духо́вным, мы́сль не возмо́же, земны́х наслажде́ние.

Все́х отсту́пльши плотски́х пристра́стий, бесе́дами ма́терними не умягчи́лася еси́, страстоте́рпице всехва́льная.

Богоро́дичен: Е́вы прама́тере Ты́ исправле́ние была́ еси́, Нача́льника жи́зни ми́ру, Богоро́дице, ро́ждши.

Конда́к, гла́с 8.

Де́вства добро́тою просия́ла еси́, и му́ченичества венце́м украси́лася еси́, апо́стольству вверя́ешися, де́во, я́ко пресла́вная, и огня́ у́бо пла́мень в ро́су преложи́ла еси́, юнца́ же я́рость моли́твою твое́ю укроти́ла еси́, я́ко первострада́льная.

Седа́лен, гла́с 8.

В му́жество же́нство доброде́тельми преложи́вши любо́вию Христо́вою, Бо́жие жили́ще обою́ду была́ еси́, страсте́й бо мра́к поще́нием ума́ливши, му́ченически показа́лася еси́ страда́ния хвала́. Те́м и ми́ру, я́ко свети́ло, све́тиши сугу́бо, возсия́ющи лучи́ Ду́ха, первому́ченице всехва́льная. Моли́ Христа́ Бо́га, прегреше́ний оставле́ние пода́ти, чту́щим любо́вию святу́ю па́мять твою́.

Богоро́дичен: Я́ко Де́ву и еди́ну в жена́х, Тя́, безсе́менно ро́ждшую Бо́га пло́тию, вси́ ублажа́ем, ро́ди челове́честии: о́гнь бо всели́ся в Тебе́ Божества́, и, я́ко младе́нца, дои́ши Зижди́теля и Го́спода. Те́мже, а́нгельский и челове́ческий ро́д, досто́йно сла́вим всесвято́е Рождество́ Твое́, и согла́сно вопие́м Ти́: моли́ Христа́ Бо́га прегреше́ний оставле́ние дарова́ти, досто́йно пою́щим сла́ву Твою́.

Крестобогоро́дичен: А́гнца и Па́стыря и Изба́вителя А́гница зря́щи на Кресте́, восклица́ше, пла́чущи, и го́рько рыда́ющи, вопия́ше: ми́р у́бо ра́дуется, прие́мляй Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости; долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй прегреше́ний оставле́ние, ве́рою пою́щим Боже́ственныя Стра́сти Твоя́.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Обруче́нную Фами́ру, невестово́дец Па́вел тя́ сочета́ Жениху́ Небе́сному, я́ко непоро́чную, Фе́кло всечестна́я.

Приве́силася еси́ любо́вию благоче́стия, Па́вловыми словесы́, и Фами́ровы глаго́лы, я́ко буесло́вие, му́ченице, укори́ла еси́.

Кропле́нием боже́ственныя кро́ве Ада́мский ро́д благослови́ся: Е́ва ра́дуется, ви́дящи у́бо жена́ми льсти́ваго зми́я па́дающа.

Чистоту́ возлюби́вши, вся́ кра́сная жития́ отве́рже, бога́тство, ро́д, красоту́ и сла́дости обру́чника, первому́ченица.

Богоро́дичен: Богоро́дицу Тя́, Всечи́стая, просвеще́ннии, вси́ зна́ем: Со́лнце бо родила́ еси́ Пра́вды, Присноде́во.

Пе́снь 5.

Ирмо́с: У́тренююще, вопие́м Ти́: Го́споди, спаси́ ны́, Ты́ бо еси́ Бо́г на́ш, ра́зве Тебе́, ино́го не ве́мы.

Претя́жким страда́нием на три́знищи подвиза́лася еси́, Фе́кло всеблаже́нная, и по́чести удосто́илася еси́.

Окра́деся зми́й лука́вый, де́ва бо боже́ственными Страстьми́ послуша́нию науча́шеся.

Побежда́шеся стыде́ние твое́ боже́ственным дерзнове́нием: о́гнь бо тя́ серде́чный, су́щий Тро́ицы, разжже́.

Богоро́дичен: Мари́е, Богоро́дице Безневе́стная, наде́жды враго́в осуети́ и пою́щия Тя́ возвесели́.

Пе́снь 6.

Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя́.

Отрокови́ца естества́ сла́бость, кре́постию Креста́ укрепи́вшися, ю́ношеское украше́ние боже́ственною любо́вию отве́ргши, но́щию бо дерзне́ и потече́, жела́емаго благово́нная и́щущи уче́ния.

Черто́гов преесте́ственно неве́стных самово́льною измени́ любо́вию, благосла́вная и первому́ченица Фе́кла, е́же злоде́ев обита́ти во узи́лищи: жела́ние бо Творца́ зда́ний побежда́ше жела́ния.

В ду́се облобыза́ше у́зы боже́ственнаго учи́теля, му́ченица, в темни́це я́ко в боже́ственном цве́тнице напая́ема словесы́, и возраста́ше, и приноша́ше, я́ко и́стинно Влады́це, пло́д красне́йший.

Богоро́дичен: Я́ко шипо́к, я́ко чисте́йший кри́н, я́ко благово́нную воню́, Отрокови́це, Творе́ц, от кра́сных удо́лий мирски́х Тя́ избра́в, всели́ся во утро́бу Твою́, и роди́вся, благово́ния вся́ испо́лни.

Конда́к, гла́с 2.

Уязви́вши твое́ се́рдце, доброде́во, любо́вию Христо́вою, обру́чника вре́меннаго, я́ко небрего́ма, преоби́дела еси́, и на о́гнь дерзну́ла еси́, звере́й же уста́ загради́ла еси́, и спа́сшися от ни́х, прилежа́ше, Па́вла и́щущи, Фе́кло первострада́льная.

И́кос:

От Па́вла научи́вшися пути́ и́стины, по нему́же неукло́нно ше́ствовала еси́, пречу́дная, и твои́х оста́вивши, я́ко стра́нная, Стра́нному после́довала еси́ му́жественным ра́зумом и о́бразом. Те́мже и Влады́ка тя́ же́н страстоте́рпиц первострада́льну показа́ в конце́х, в ни́хже обше́дши пребыла́ еси́, Па́вла и́щущи, Фе́кло первострада́льная.

Пе́снь 7.

Ирмо́с: От Иуде́и доше́дше, о́троцы в Вавило́не иногда́, ве́рою тро́ическою пла́мень пе́щный попра́ша, пою́ще: отце́в Бо́же, благослове́н еси́.

Я́ко у́знику, Па́влу привяза́лася еси́ любо́вию, о всеблаже́нная! У́зами нереши́мыми, ве́рою соглаша́ющи благоче́стно, и спою́щи: отце́в на́ших Бо́же, благослове́н еси́.

Спредста́ла еси́ Па́влу пред суди́щи непра́ведными, о доброде́во! И жела́нием Влады́чним вопия́ла еси́ во у́жасе, сту́д отве́ргши: отце́в на́ших Бо́же, благослове́н еси́.

За любо́вь боже́ственную пе́щи те́ло, му́ченице, отдала́ еси́, и Жела́емаго пребыла́ еси́ неопа́льна си́лою, вопию́щи: отце́в на́ших Бо́же, благослове́н еси́.

Тучено́сный о́блак, дожде́м и гра́дом пла́мень погаси́в, пра́ведно попаля́ет неразу́мныя и спаса́ет песнопою́щую му́ченицу: отце́в на́ших Бо́же, благослове́н еси́.

Богоро́дичен: Же́зл была́ еси́, Де́во, из Иессе́ева ко́рене, Преблаже́нная, Пло́д цветонося́щий спасе́ния ве́рою Сы́ну Твоему́ зову́щим: отце́в на́ших Бо́же, благослове́н еси́

Пе́снь 8.

Ирмо́с: Царя́ Небе́снаго, Его́же пою́т во́и а́нгельстии, хвали́те и превозноси́те Его́ во ве́ки.

Странноявле́нен тво́й по́мысл, во гро́б бо, я́ко во Еде́м, де́во, всели́лася еси́, му́ченице, пою́щи Христа́ во ве́ки.

Помрачи́тися благоле́пию де́вства све́тлости не терпя́щи, твоея́ добро́ты, умре́ти изво́лила еси́ и жи́ти во ве́ки.

Животворя́щему и преесте́ственному сочета́вшися Христу́, первому́ченице, Жениху́, зве́ри изво́лила еси́ бы́ти храни́тели де́вства.

Совле́кши твою́ тле́ния оде́жду, благооде́ждна Христо́ва стадиоте́чница, прешла́ еси́ к нестаре́ющей жи́зни во ве́ки.

Богоро́дичен: Преесте́ственно Соде́теля и Спа́са, Бо́га Сло́ва, родила́ еси́, Де́во. Те́м Тя́ чти́м, Чи́стая, во ве́ки.

Пе́снь 9.

Ирмо́с: Тя́, неискусобра́чную Ма́терь Бо́га Вы́шняго, Тя́, па́че ума́ ро́ждшую сло́вом вои́стинну Бо́га, вы́шшую пречи́стых си́л, немо́лчными славословле́нии велича́ем.

Кто́ твоему́ непобе́дному, о первому́ченице, не подиви́тся? Зве́ри бо мы́сленныя, стра́сти души́, укроти́вши, и неудержа́нных звери́ных стремле́ний не убоя́лася еси́, но пребыла́ еси́ посреде́ си́х нерастли́ма.

Не прохо́дный тве́рдый Бо́жиим повеле́нием разсе́деся тебе́ ка́мень, богоно́сней му́ченице, ба́нею возрожде́ния запеча́тствовану боже́ственную неве́сту, я́ко черто́г, бежа́щу вну́трь прия́т.

Исцели́, первому́ченице, я́звы души́ моея́, ми́ру ми́р пода́ждь, Ве́рному во́инству на́шему на ва́рвары враги́ побе́дная даю́щи, и ми́р Це́рквам твои́ми моли́твами.

Богоро́дичен: Тебе́, Пресла́вную и Всесвяту́ю Богоро́дицу, вси́ ве́рнии, сла́вим немо́лчными пе́сньми и пое́м, я́ко ро́ждшую Го́спода все́х, на спасе́ние пою́щих Тя́.

Свети́лен:

Же́н сла́ву, наста́вницу страда́льцев, отве́рзшую все́м муче́ния пути́, равноапо́стольную Фе́клу и первострада́льную благопохва́лим.

Богоро́дичен: Кре́пким Твои́м кро́вом от наве́та враго́в, Чи́стая, Твоя́ рабы́, сохрани́ ны́ вся́ невре́дны, Тя́ бо стяжа́хом еди́ну прибе́жище в ну́ждах.

Пѣ́снь а҃.

І҆рмо́съ: Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.

Гла́съ ѧ҆зы́ка не мо́жетъ всесла́вныхъ первомч҃ницы повѣ́дати страда́льчествъ, и҆знемога́етъ бо къ похвалѣ̀ досто́йнѣй.

Преста̀ мꙋчи́телево сꙋесло́вїе прего́рдое, на того́ бо жєны̀ благоче́стнѡ во хрⷭ҇тѣ̀ мꙋ́жествоваша.

Глагѡ́лы неизрече́нными є҆ѵⷢ҇льски ѡ҆гласи́вшисѧ твои́ми, всебл҃же́нне па́ѵле, хрⷭ҇тꙋ̀ дѣ́ва ᲂу҆невѣ́стисѧ.

Бг҃оро́диченъ: Гро́здъ тѧ̀ жизноно́сный всемі́рнагѡ точа́щъ сла́дость спасе́нїѧ, дв҃а, хрⷭ҇тѐ, породѝ.

Пѣ́снь г҃.

І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.

Ѽле любвѐ твоеѧ̀, па́че ᲂу҆ма̀ всечестна́ѧ! и҆́мже ѡ҆ хрⷭ҇тѣ̀ па́ѵлꙋ привѧза́ласѧ є҆сѝ, соедини́вшисѧ дꙋ́хомъ.

Оу҆ѧзви́ти тѧ̀, сла́внаѧ, ᲂу҆ѧ́звльшꙋюсѧ жела́нїемъ дꙋхо́внымъ, мы́сль не возмо́же, земны́хъ наслажде́нїе.

Всѣ́хъ ѿстꙋ́пльши плотски́хъ пристра́стїй, бесѣ́дами ма́терними не ᲂу҆мѧгчи́ласѧ є҆сѝ, страстоте́рпице всехва́льнаѧ.

Бг҃оро́диченъ: Є҆́ѵы прама́тере ты̀ и҆справле́нїе была̀ є҆сѝ, нача́льника жи́зни мі́рꙋ, бцⷣе, ро́ждши.

Конда́къ, гла́съ и҃.

Дѣ́вства добро́тою просїѧ́ла є҆сѝ, и҆ мч҃ничества вѣнце́мъ ᲂу҆краси́ласѧ є҆сѝ, а҆пⷭ҇льствꙋ ввѣрѧ́ешисѧ дв҃о ꙗ҆́кѡ пресла́внаѧ, и҆ ѻ҆гнѧ̀ ᲂу҆́бѡ пла́мень въ ро́сꙋ преложи́ла є҆сѝ: ю҆нца́ же ꙗ҆́рость моли́твою твое́ю ᲂу҆кроти́ла є҆сѝ, ꙗ҆́кѡ первострада́льнаѧ.

Сѣда́ленъ, гла́съ и҃.

Въ мꙋ́жество же́нство добродѣ́тельми преложи́вши любо́вїю хрⷭ҇то́вою, бж҃їе жили́ще ѻ҆бою́дꙋ была̀ є҆сѝ: страсте́й бо мра́къ поще́нїемъ ᲂу҆ма́ливши, мч҃нически показа́ласѧ є҆сѝ страда́нїѧ хвала̀. тѣ́мъ и҆ мі́рꙋ ꙗ҆́кѡ свѣти́ло свѣ́тиши сꙋгꙋ́бѡ, возсїѧ́ющи лꙋчы̀ дх҃а, первомч҃нице всехва́льнаѧ. молѝ хрⷭ҇та̀ бг҃а, прегрѣше́нїй ѡ҆ставле́нїе пода́ти, чтꙋ́щымъ любо́вїю ст҃ꙋ́ю па́мѧть твою̀.

Бг҃оро́диченъ: Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безсѣ́меннѡ ро́ждшꙋю бг҃а пло́тїю, всѝ ᲂу҆бл҃жа́емъ ро́ди чл҃вѣ́честїи: ѻ҆́гнь бо всели́сѧ въ тебѣ̀ бжⷭ҇тва̀, и҆ ꙗ҆́кѡ младе́нца дои́ши зижди́телѧ и҆ гдⷭ҇а. тѣ́мже а҆́гг҃льскїй и҆ человѣ́ческїй ро́дъ, досто́йнѡ сла́вимъ всест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти, досто́йнѡ пою́щымъ сла́вꙋ твою̀.

Крⷭ҇тобг҃оро́диченъ: А҆́гнца и҆ па́стырѧ и҆ и҆зба́вителѧ а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи вопїѧ́ше: мі́ръ ᲂу҆́бѡ ра́дꙋетсѧ прїе́млѧй тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости: долготерпѣли́ве гдⷭ҇и, ми́лости бе́здно, и҆ и҆сто́чниче неисчерпа́емый, ᲂу҆милосе́рдисѧ, и҆ да́рꙋй прегрѣше́нїй ѡ҆ставле́нїе, вѣ́рою пою́щымъ бжⷭ҇твєнныѧ стра̑сти твоѧ̑.

Пѣ́снь д҃.

І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.

Ѻ҆брꙋче́ннꙋю ѳамѵ́рꙋ, невѣстово́децъ па́ѵелъ тѧ̀ сочета̀ женихꙋ̀ нбⷭ҇номꙋ, ꙗ҆́кѡ непоро́чнꙋю, ѳе́кло всечестна́ѧ.

Привѣ́силасѧ є҆сѝ любо́вїю бл҃гоче́стїѧ, па́ѵловыми словесы̀, и҆ ѳамѵ́ровы глаго́лы ꙗ҆́кѡ бꙋесло́вїе мч҃нице, ᲂу҆кори́ла є҆сѝ.

Кропле́нїемъ бжⷭ҇твенныѧ кро́ве а҆да́мскїй ро́дъ благослови́сѧ: є҆́ѵа ра́дꙋетсѧ ви́дѧщи ᲂу҆́бѡ жена́ми льсти́ваго ѕмі́ѧ па́дающа.

Чистотꙋ̀ возлюби́вши, всѧ̑ кра̑снаѧ житїѧ̀ ѿве́рже, бога́тство, ро́дъ, красотꙋ̀, и҆ сла́дѡсти ѡ҆брꙋ́чника первомч҃ница.

Бг҃оро́диченъ: Бцⷣꙋ тѧ̀, всечⷭ҇таѧ, просвѣще́ннїи всѝ зна́емъ: сл҃нце бо родила̀ є҆сѝ пра́вды, приснодв҃о.

Пѣ́снь є҃.

І҆рмо́съ: Оу҆́тренююще, вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ тебє̀ и҆но́гѡ не вѣ́мы.

Претѧ́жкимъ страда́нїемъ на три́знищи подвиза́ласѧ є҆сѝ, ѳе́кло всебл҃же́ннаѧ, и҆ по́чести ᲂу҆досто́иласѧ є҆сѝ.

Ѡ҆кра́десѧ ѕмі́й лꙋка́вый: дѣ́ва бо бжⷭ҇твенными стрⷭ҇тьмѝ послꙋша́нїю наꙋча́шесѧ.

Побѣжда́шесѧ стыдѣ́нїе твоѐ, бжⷭ҇твеннымъ дерзнове́нїемъ: ѻ҆́гнь бо тѧ̀ серде́чный, сꙋ́щїй трⷪ҇цы, разжжѐ.

Бг҃оро́диченъ: Марі́е бцⷣе безневѣ́стнаѧ, надє́жды врагѡ́въ ѡ҆сꙋетѝ, и҆ пою́щыѧ тѧ̀ возвеселѝ.

Пѣ́снь ѕ҃.

І҆рмо́съ: Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ ꙗ҆́кѡ і҆ѡ́на: ѿ тлѝ, бж҃е, возведи́ мѧ.

Ѻ҆трокови́ца є҆стества̀ сла́бость, крѣ́постїю крⷭ҇та̀ ᲂу҆крѣпи́вшисѧ, ю҆́ношеское ᲂу҆краше́нїе бжⷭ҇твенною любо́вїю ѿве́ргши, но́щїю бо дерзнѐ и҆ потечѐ, жела́емагѡ благовѡ́ннаѧ и҆́щꙋщи ᲂу҆чє́нїѧ.

Черто́гѡвъ преесте́ственнѡ невѣ́стныхъ самово́льною и҆змѣнѝ любо́вїю, благосла́внаѧ и҆ первомч҃ница ѳе́кла, є҆́же ѕлодѣ́євъ ѡ҆бита́ти во ᲂу҆зи́лищи: жела́нїе бо творца̀ зда́нїй побѣжда́ше жела̑нїѧ.

Въ дꙋ́сѣ ѡ҆блобыза́ше ᲂу҆́зы бжⷭ҇твеннагѡ ᲂу҆чи́телѧ мч҃ница, въ темни́цѣ ꙗ҆́кѡ въ бжⷭ҇твенномъ цвѣ́тницѣ напаѧ́ема словесы̀, и҆ возраста́ше, и҆ приноша́ше, ꙗ҆́кѡ и҆́стиннѡ влⷣцѣ пло́дъ краснѣ́йшїй.

Бг҃оро́диченъ: Ꙗ҆́кѡ шипо́къ, ꙗ҆́кѡ чистѣ́йшїй крі́нъ, ꙗ҆́кѡ бл҃гово́ннꙋю воню̀, ѻ҆трокови́це, творе́цъ ѿ кра́сныхъ ᲂу҆до́лїй мїрски́хъ тѧ̀ и҆збра́въ, всели́сѧ во ᲂу҆тро́бꙋ твою̀, и҆ роди́всѧ, благово́нїѧ всѧ̑ и҆спо́лни.

Конда́къ, гла́съ в҃.

Оу҆ѧзви́вши твоѐ се́рдце, добродѣ́во, любо́вїю хрⷭ҇то́вою, ѡ҆брꙋ́чника вре́меннаго, ꙗ҆́кѡ небрего́ма преѡби́дѣла є҆сѝ, и҆ на ѻ҆́гнь дерзнꙋ́ла є҆сѝ, ѕвѣре́й же ᲂу҆ста̀ загради́ла є҆сѝ: и҆ спа́сшисѧ ѿ ни́хъ, прилѣжа́ше па́ѵла и҆́щꙋщи, ѳе́кло первострада́льнаѧ.

І҆́косъ:

Ѿ па́ѵла наꙋчи́вшисѧ пꙋтѝ и҆́стины, по немꙋ́же неꙋкло́ннѡ ше́ствовала є҆сѝ, пречꙋ́днаѧ, и҆ твои́хъ ѡ҆ста́вивши, ꙗ҆́кѡ стра́ннаѧ, стра́нномꙋ послѣ́довала є҆сѝ, мꙋ́жественнымъ ра́зꙋмомъ и҆ ѻ҆́бразомъ. тѣ́мже и҆ влⷣка тѧ̀ же́нъ страстоте́рпицъ первострада́льнꙋ показа̀ въ концѣ́хъ, въ ни́хже ѡ҆бше́дши пребыла̀ є҆сѝ, па́ѵла и҆́щꙋщи, ѳе́кло первострада́льнаѧ.

Пѣ́снь з҃.

І҆рмо́съ: Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ.

Ꙗ҆́кѡ ᲂу҆́зникꙋ па́ѵлꙋ привѧза́ласѧ є҆сѝ любо́вїю, ѽ всебл҃же́ннаѧ. ᲂу҆́зами нерѣши́мыми, вѣ́рою соглаша́ющи благоче́стнѡ, и҆ спою́щи: ѻ҆тцє́въ на́шихъ бж҃е, бл҃гослове́нъ є҆сѝ.

Спредста́ла є҆сѝ па́ѵлꙋ предъ сꙋди́щи непра́ведными, ѽ добродѣ́во. и҆ жела́нїемъ влⷣчнимъ, вопїѧ́ла є҆сѝ во ᲂу҆́жасѣ, стꙋ́дъ ѿве́ргши: ѻ҆тцє́въ на́шихъ бж҃е, бл҃гослове́нъ є҆сѝ.

За любо́вь бжⷭ҇твеннꙋю, пе́щи тѣ́ло, мч҃нице, ѿдала̀ є҆сѝ, и҆ жела́емагѡ пребыла̀ є҆сѝ неѡпа́льна си́лою, вопїю́щи: ѻ҆тцє́въ на́шихъ бж҃е, бл҃гослове́нъ є҆сѝ.

Тꙋчено́сный ѻ҆́блакъ, дожде́мъ и҆ гра́домъ пла́мень погаси́въ, пра́веднѡ попалѧ́етъ неразꙋ̑мныѧ, и҆ спаса́етъ пѣснопою́щꙋю мч҃ницꙋ: ѻ҆тцє́въ на́шихъ бж҃е, бл҃гослове́нъ є҆сѝ.

Бг҃оро́диченъ: Же́злъ была̀ є҆сѝ, дв҃о, и҆зъ і҆ессе́ева ко́рене, преблаже́ннаѧ, пло́дъ цвѣтоносѧ́щїй спасе́нїѧ, вѣ́рою сн҃ꙋ твоемꙋ̀ зовꙋ́щымъ: ѻ҆тцє́въ на́шихъ бж҃е, бл҃гослове́нъ є҆сѝ.

Пѣ́снь и҃.

І҆рмо́съ: Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстїи, хвали́те и҆ превозноси́те є҆го̀ во вѣ́ки.

Странноѧвле́ненъ тво́й по́мыслъ: во гро́бъ бо ꙗ҆́кѡ во є҆де́мъ, дѣ́во, всели́ласѧ є҆сѝ мч҃нице, пою́щи хрⷭ҇та̀ во вѣ́ки.

Помрачи́тисѧ благолѣ́пїю дѣ́вства свѣ́тлости, не терпѧ́щи твоеѧ̀ добро́ты, ᲂу҆мре́ти и҆зво́лила є҆сѝ и҆ жи́ти во вѣ́ки.

Животворѧ́щемꙋ и҆ преесте́ственномꙋ сочета́вшисѧ хрⷭ҇тꙋ̀, первомч҃нице, женихꙋ̀ ѕвѣ́ри и҆зво́лила є҆сѝ бы́ти храни́тели дѣ́вства.

Совле́кши твою̀ тлѣ́нїѧ ѻ҆де́ждꙋ, благоѡде́ждна хрⷭ҇то́ва стадїоте́чница, прешла̀ є҆сѝ къ нестарѣ́ющей жи́зни во вѣ́ки.

Бг҃оро́диченъ: Преесте́ственнѡ содѣ́телѧ, и҆ сп҃са бг҃а сло́ва родила̀ є҆сѝ, дв҃о: тѣ́мъ тѧ̀ чти́мъ, чⷭ҇таѧ, во вѣ́ки.

Пѣ́снь ѳ҃.

І҆рмо́съ: Тѧ̀, неискꙋсобра́чнꙋю мт҃рь бг҃а вы́шнѧгѡ, тѧ̀, па́че ᲂу҆ма̀ ро́ждшꙋю сло́вомъ вои́стиннꙋ бг҃а, вы́шшꙋю пречⷭ҇тыхъ си́лъ, немо́лчными славословлє́нїи велича́емъ.

Кто̀ твоемꙋ̀ непобѣ́дномꙋ, ѽ первомч҃нице! не подиви́тсѧ; ѕвѣ́ри бо мы́слєнныѧ, стра̑сти дꙋшѝ ᲂу҆кроти́вши, и҆ неꙋдержа́нныхъ ѕвѣри́ныхъ стремле́нїй не ᲂу҆боѧ́ласѧ є҆сѝ, но пребыла̀ є҆сѝ посредѣ̀ си́хъ нерастли́ма.

Не прохо́дный тве́рдый бж҃їимъ повелѣ́нїемъ разсѣ́десѧ тебѣ̀ ка́мень бг҃оно́снѣй мч҃ницѣ, ба́нею возрожде́нїѧ, запеча́тствованꙋ бжⷭ҇твеннꙋю невѣ́стꙋ, ꙗ҆́кѡ черто́гъ бѣжа́щꙋ внꙋ́трь прїѧ́тъ.

И҆сцѣлѝ, первомч҃нице, ꙗ҆́звы дꙋшѝ моеѧ̀: мі́рꙋ ми́ръ пода́ждь, вѣ́рномꙋ во́инствꙋ на́шемꙋ на ва́рвары врагѝ побѣ̑днаѧ даю́щи, и҆ ми́ръ цр҃квамъ твои́ми моли́твами.

Бг҃оро́диченъ: Тебѐ пресла́внꙋю и҆ всест҃ꙋ́ю бцⷣꙋ всѝ вѣ́рнїи сла́вимъ немо́лчными пѣ́сньми, и҆ пое́мъ, ꙗ҆́кѡ ро́ждшꙋю гдⷭ҇а всѣ́хъ, на спасе́нїе пою́щихъ тѧ̀.

Свѣти́ленъ:

Же́нъ сла́вꙋ, наста́вницꙋ страда́льцєвъ, ѿве́рзшꙋю всѣ̑мъ мꙋче́нїѧ пꙋти̑, равноапо́стольнꙋю ѳе́клꙋ, и҆ первострада́льнꙋю благопохва́лимъ.

Бг҃оро́диченъ: Крѣ́пкимъ твои́мъ кро́вомъ, ѿ навѣ́та врагѡ́въ, чи́стаѧ, твоѧ̀ рабы̑ сохрани́ ны всѧ̑ невре́дны: тѧ́ бо стѧжа́хомъ є҆ди́нꙋ прибѣ́жище въ нꙋ́ждахъ.

Жизнь и труды апостолов – Св. равноапостольная первомученица Фекла

Свя­тая пер­во­му­че­ни­ца рав­ноап­о­столь­ная Фек­ла ро­ди­лась в го­ро­де Ико­нии. Она бы­ла до­че­рью знат­ных и бо­га­тых ро­ди­те­лей и от­ли­ча­лась необык­но­вен­ной кра­со­той. В 18 лет ее об­ру­чи­ли знат­но­му юно­ше. Услы­шав про­по­ведь свя­то­го апо­сто­ла Пав­ла о Спа­си­те­ле, свя­тая Фек­ла всем серд­цем воз­лю­би­ла Гос­по­да Иису­са Хри­ста и твер­до ре­ши­ла не всту­пать в брак и по­свя­тить свою жизнь еван­гель­ской про­по­ве­ди. Мать свя­той Фек­лы вос­про­ти­ви­лась на­ме­ре­нию до­че­ри и при­нуж­да­ла ее вый­ти за­муж за об­ру­чен­но­го ей же­ни­ха. Об­руч­ник свя­той Фек­лы по­жа­ло­вал­ся пра­ви­те­лю го­ро­да на апо­сто­ла Пав­ла, об­ви­няя его в том, что он от­вра­тил от него неве­сту. Пра­ви­тель за­клю­чил свя­то­го апо­сто­ла в тем­ни­цу. Свя­тая Фек­ла но­чью тай­но убе­жа­ла из до­ма, под­ку­пи­ла тю­рем­ных стра­жей, от­дав им все свои зо­ло­тые укра­ше­ния, и про­ник­ла к уз­ни­ку в тем­ни­цу. Три дня она си­де­ла у ног апо­сто­ла, вни­мая его оте­че­ским на­став­ле­ни­ям. Ис­чез­но­ве­ние Фек­лы об­на­ру­жи­лось, и по­всю­ду бы­ли разо­сла­ны слу­ги на по­ис­ки про­пав­шей. На­ко­нец ее на­шли в тюрь­ме и на­силь­но при­ве­ли до­мой.

Суд при­го­во­рил апо­сто­ла Пав­ла к из­гна­нию из го­ро­да. Свя­тую Фек­лу вновь дол­го убеж­да­ли со­гла­сить­ся на брак, но она не из­ме­ни­ла сво­е­го ре­ше­ния. Ни сле­зы ма­те­ри, ни гнев ее, ни угро­зы пра­ви­те­ля не смог­ли от­лу­чить свя­тую Фек­лу от люб­ви к Небес­но­му Же­ни­ху – Гос­по­ду Иису­су Хри­сту. Ее мать в ис­ступ­ле­нии по­тре­бо­ва­ла от судьи смерт­но­го при­го­во­ра непо­кор­ной до­че­ри, и свя­тая Фек­ла бы­ла при­го­во­ре­на к со­жже­нию. Свя­тая му­че­ни­ца бес­тре­пет­но взо­шла на ко­стер и пе­ре­кре­сти­лась. В этот мо­мент ей явил­ся Спа­си­тель, бла­го­слов­ляя на пред­сто­я­щий по­двиг, и неиз­ре­чен­ная ра­дость на­пол­ни­ла ее свя­тую ду­шу. Вы­со­ко взви­лось пла­мя ко­ст­ра, орео­лом окру­жи­ло му­че­ни­цу и не кос­ну­лось ее. Гря­нул гром, и силь­ный ли­вень с гра­дом по­га­сил ко­стер. Му­чи­те­ли в стра­хе раз­бе­жа­лись. Свя­тая Фек­ла, хра­ни­мая Гос­по­дом, по­ки­ну­ла го­род и с по­мо­щью од­но­го юно­ши-хри­сти­а­ни­на отыс­ка­ла апо­сто­ла Пав­ла. Свя­той апо­стол и его спут­ни­ки, сре­ди ко­то­рых был и свя­той апо­стол Вар­на­ва, укры­ва­лись в пе­ще­ре неда­ле­ко от го­ро­да, усерд­но мо­лясь, чтобы Гос­подь укре­пил свя­тую Фек­лу в стра­да­ни­ях. Вме­сте с ни­ми свя­тая Фек­ла про­шла с про­по­ве­дью Еван­ге­лия до Ан­тио­хии. В этом го­ро­де она под­верг­лась пре­сле­до­ва­ни­ям неко­е­го са­нов­ни­ка Алек­сандра, пле­нив­ше­го­ся ее кра­со­той. Свя­тая Фек­ла от­верг­ла его пред­ло­же­ние всту­пить в брак и, как хри­сти­ан­ка, бы­ла осуж­де­на на смерть. Два­жды на нее вы­пус­ка­ли го­лод­ных зве­рей, но они не тро­га­ли свя­тую де­ву, по­кор­но ло­жи­лись у ее ног и ли­за­ли их. Во всех ис­тя­за­ни­ях свя­тая му­че­ни­ца Про­мыс­лом Бо­жи­им со­хра­ня­лась невре­ди­мой. На­ко­нец, ее при­вя­за­ли к двум бы­кам и ста­ли гнать их в раз­ные сто­ро­ны рас­ка­лен­ны­ми пру­тья­ми, но креп­кие ве­рев­ки разо­рва­лись, как па­у­ти­на, и бы­ки раз­бе­жа­лись, а свя­тая Фек­ла оста­лась невре­ди­мой. На­род возо­пил: "Ве­лик Бог хри­сти­ан­ский!" Сам пра­ви­тель устра­шил­ся, ура­зу­мев на­ко­нец, что свя­тую му­че­ни­цу хра­нит Все­силь­ный Бог, Ко­то­ро­му она слу­жит. Он по­ве­лел от­пу­стить Фек­лу, ра­бу Бо­жию, на сво­бо­ду. По бла­го­сло­ве­нию апо­сто­ла Пав­ла Свя­тая Фек­ла по­се­ли­лась в пу­стын­ных окрест­но­стях Селев­кии Ис­аврий­ской и про­жи­ла там дол­гие го­ды, непре­стан­но про­по­ве­дуя Сло­во Бо­жие, ис­це­ляя боль­ных мо­лит­вой. Мно­гих языч­ни­ков свя­тая Фек­ла об­ра­ти­ла ко Хри­сту; Цер­ковь до­стой­но име­ну­ет ее рав­ноап­о­столь­ной. Да­же язы­че­ско­го жре­ца, по­сяг­нув­ше­го на ее чи­сто­ту, она, на­ка­зав за дер­зость, при­ве­ла ко Свя­то­му Кре­ще­нию. Не раз враг ро­да че­ло­ве­че­ско­го пы­тал­ся по­гу­бить свя­тую Фек­лу через ослеп­лен­ных гре­хом лю­дей, но си­ла Бо­жия все­гда хра­ни­ла вер­ную ра­бу Хри­сто­ву.

Ко­гда свя­тая Фек­ла бы­ла уже 90-лет­ней ста­ри­цей, на нее опол­чи­лись язы­че­ские волх­вы за то, что она без­мезд­но ле­чи­ла боль­ных. Они не мог­ли по­стичь, что свя­тая вра­чу­ет бо­лез­ни си­лой бла­го­да­ти Хри­сто­вой, и по­ла­га­ли, что ей осо­бо по­кро­ви­тель­ству­ет бо­ги­ня-дев­ствен­ни­ца Ар­те­ми­да. Из за­ви­сти к свя­той Фек­ле они по­до­сла­ли к ней на­ем­ни­ков, чтобы осквер­нить свя­тую. Ко­гда пре­сле­до­ва­те­ли бы­ли уже со­всем близ­ко, свя­тая Фек­ла возо­пи­ла о по­мо­щи ко Хри­сту Спа­си­те­лю, и рас­сту­пи­лась го­ра, и со­кры­ла свя­тую де­ву, неве­сту Хри­сто­ву. Так пре­да­ла ду­шу Гос­по­ду свя­тая Фек­ла.

Свя­тая Цер­ковь про­слав­ля­ет "пер­во­стра­даль­ную" Фек­лу как "жен сла­ву, на­став­ни­цу стра­даль­цев, от­верз­шую всем му­че­ния пу­ти". Из­древ­ле ей по­свя­ща­лось мно­го хра­мов, один из ко­то­рых был по­стро­ен в Ца­рь­гра­де свя­тым рав­ноап­о­столь­ным Кон­стан­ти­ном (па­мять 21 мая). Имя свя­той пер­во­му­че­ни­цы рав­ноап­о­столь­ной Фек­лы, мо­лит­вен­ни­цы о всех под­ви­за­ю­щих­ся, по­ми­на­ет­ся при по­стри­же­нии жен­щин в мо­на­ше­ство.

См. так­же: "Жи­тие и стра­да­ние свя­той пер­во­му­че­ни­цы, рав­ноап­о­столь­ной Фек­лы" в из­ло­же­нии свт. Ди­мит­рия Ро­стов­ско­го.