Канон священномученику Дионисию Ареопагиту, Афинскому

Припев: Священному́чениче Диони́сие, моли́ Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 16 октября (03 октября ст. ст.)

Глас 8.

Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Па́влом боже́ственным науче́н, небе́сных, Диони́сие, ви́дцем, небе́сный таи́нник а́бие и боговеща́тель бы́л еси́.

И́же благода́тию Бо́жиею озари́вся, просвети́, блаже́нне, пою́щих тя́ ду́ши твоя́ разуме́ти богодухнове́нная уче́ния, Диони́сие.

Умо́м преочище́нным и душе́ю, небе́сных удобре́ний сия́ния уве́дети сподо́бился еси́, и те́х ликостоя́ния, Диони́сие.

Богоро́дичен: Черто́г светоно́сный, па́че ума́ воплоще́ния яви́лася еси́ все́х Соде́теля: из Тебе́ бо пло́ть, Богома́ти, на́шу оде́ял е́сть.

Пе́снь 3.

Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Небе́сных круго́в превозше́д, о́тче, преми́рных чи́ны, и во́инства, и све́тлости, высоковеща́ньми слове́с и всему́дрыми уче́нии все́м изъясни́л еси́.

Высо́каго виде́ния насы́щся, преподо́бне, име́н Боже́ственных Боже́ственное разуме́ние богосло́вил еси́, Тро́ичный богосло́в бы́в благода́тию, богоблаже́нне Диони́сие.

Умертви́вся ны́нешним жела́нием, е́же к Бо́гу, и любому́дрию кре́пко научи́вся, су́щим па́че ума́ животво́рным дарова́нием богоно́сный орга́н, о́тче, бы́л еси́.

Богоро́дичен: Дея́нием, Де́во, Вседе́тельнаго Ду́ха, те́ло Влады́це все́х плодоноси́ла еси́, в Не́мже осуди́ся ми́ра гре́х и Жи́знь источи́ся ве́чнующая.

Седа́лен, гла́с 8.

В пучи́не прему́дрости уча́, Ду́ха глубины́, Тро́ицы еди́но Божество́ пропове́дал еси́, преподо́бне, списа́в вся́ а́нгельския чи́ны и та́йная те́х сия́ния, богому́дре. Те́м и ни́жнюю иера́рхию счиня́я, ко еди́ному вся́ возве́л еси́ еди́нству, иера́рше Диони́сие. Моли́ Христа́ Бо́га прегреше́ний оставле́ние дарова́ти честву́ющим любо́вию святу́ю па́мять твою́.

Богоро́дичен: Со́лнца о́блаче разу́мнаго, Боже́ственнаго Све́та свети́льниче златокова́нный, нескве́рная, небла́зная, всенепоро́чная Влады́чице, омраче́нную ду́шу мою́ ослепле́нием страсте́й безстра́стия заре́ю просвети́, молю́ся. И оскверне́нное мое́ се́рдце омы́й пото́ки умиле́ния, покая́ния же слеза́ми, и от тиме́ния мя́ очи́сти де́л мои́х, да любо́вию зову́ Ти́: Богоро́дице Присноде́во, моли́ Христа́ Бо́га, прегреше́ний оставле́ние пода́ти ми́, Тебе́ бо име́ю наде́жду, ра́б Тво́й.

Крестобогоро́дичен: А́гнца, и Па́стыря, и Изба́вителя, А́гница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мляй Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние, ве́рою пою́щим Боже́ственныя Стра́сти Твоя́.

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче.

Церко́вное благочи́ние украси́л еси́: в ни́х бо, о́тче, живописа́л еси́ зра́чныя о́бразы я́вственно священнописа́нием безобра́зных си́л; и́миже тайново́дятся и просвеща́ются вся́ ве́рных, богому́дре, собо́ры.

Струи́ твоего́ богосло́вия, богоприя́тне, цветники́ напая́ют слове́сныя, присноцве́тущия зело́ и насажде́нныя на пра́вости богосло́вия: еди́нство бо Существа́ в Трие́х Ли́цех, честно́е Единонача́лие пропове́дал еси́.

А́нгельскаго священнонача́льства си́льное, святи́телю, жела́ние и раче́ние, е́же к Бо́гу, и неукло́нное ма́ние к высоте́ боже́ственней и непостижи́мей, научи́л еси́ богому́дренно, ве́рою вопию́щия: си́ле Твое́й сла́ва, Человеколю́бче.

Богоро́дичен: Священноде́йствитель спасе́ния бы́сть Сы́н Тво́й все́м пою́щим Тя́, и наста́вник, и просвети́тель, и пра́вда, Де́во, и избавле́ние. Те́м Тя́, Богоро́дицу, и́стинно и госпо́дьственно ве́рнии единому́дренно сла́вим.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя́, и к све́ту за́поведей Твои́х пути́ моя́ напра́ви, молю́ся.

Глаго́л твои́х веща́ние, я́ко не́кий небе́сный шу́м носи́мь, безбо́жныя ра́зумы огроми́ сло́вом благода́ти и веле́ний боже́ственных заря́ми светле́йшими ве́рных сердца́ просвети́.

Уподо́бился еси́ купцу́, и́щущему до́брыя би́серы, всебога́те, и обре́л еси́ еди́н Би́сер, и́стинно многоце́нен, и, уди́влься его́ боготво́рну световерже́нию, святи́телю, Бо́га испове́дал еси́.

Исто́чник му́дрости, любому́дрейше о́тче, возлюби́л еси́, и, тоя́ раче́нием и любо́вию одержи́мь, вели́к бы́л еси́, и ре́ки боже́ственных веле́ний всегда́ то́чиши, богогла́се.

Богоро́дичен: Я́ко Обра́дованная, добротворя́щее прия́ла еси́ благоле́пие, вся́ еди́нем хоте́нием Сотво́ршаго, и боже́ственною добро́тою и просвеще́нием благове́рия, Богома́ти, на́с Удобри́вшаго.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Зако́нно любому́дрствуя, му́дрости да́р получи́л еси́, боже́ственне богосло́вя правосла́вныя догма́ты, всеблаже́нне, оста́вил еси́, и́хже наслажда́ющеся, ве́рнии, тя́ блажи́м.

Ра́зумом боголе́пным, богому́дре, удобря́емь, боже́ственному учи́телю слу́х тво́й приклони́л еси́, и преми́рную от него́ му́дрость навы́кл еси́, Диони́сие.

Житие́ твое́ чу́дно, сло́во же ди́внейше, язы́к тво́й светоза́рен, уста́ огнедухнове́нна и духодви́жима, у́м же тво́й испы́тен, о́тче, богоблаже́нне.

Богоро́дичен: Гла́с Ти́ Гаврии́лов ра́достно, Де́во, взыва́ем ве́рнии, из Тебе́ бо неизрече́нно на́м живонача́льный Творе́ц изше́л е́сть и примеси́ся челове́ком, Человеколю́бец.

Конда́к, гла́с 8.

Небе́сная врата́ проше́д ду́хом, я́ко учени́к, до тре́тияго небесе́ дости́гшаго апо́стола, Диони́сие, неизрече́нных обогати́лся еси́ вся́ким ра́зумом и озари́л еси́ во тме́ неве́дения седя́щия. Те́мже зове́м: ра́дуйся, о́тче всеми́рный.

И́кос:

А́нгел от челове́ков, доброде́тельми бы́в вели́кий Диони́сий, ве́сь, я́ко крила́т, навы́че умо́м небе́сныя ра́зумы. Те́м пе́сньми, я́ко а́нгела, почти́м, вопию́ще к нему́ такова́я: ра́дуйся, уве́девый Христа́ Па́влом; ра́дуйся, мно́гия ко Христу́ обрати́вый; ра́дуйся, многобо́жия храмо́в губи́телю; ра́дуйся, богоразу́мнаго сове́та смотре́ние; ра́дуйся, кни́го богоначерта́нная та́йных сокро́вищ; ра́дуйся, скрижа́ль богозра́чная и зерца́ло небе́сное; ра́дуйся, я́ко Стра́сть Госпо́дню ви́дел еси́; ра́дуйся, я́ко усе́рдно Того́ ра́ди закала́ешися; ра́дуйся, исто́чниче, источа́я ра́зум; ра́дуйся, ка́пле, угаша́ющи безу́мие; ра́дуйся, стезе́ неле́стная спасе́ния; ра́дуйся, прегра́до нечести́вых прехо́да; ра́дуйся, о́тче всеми́рный.

Пе́снь 7.

Ирмо́с: Бо́жия снисхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице, лику́юще поя́ху: благослове́н еси́, Бо́же оте́ц на́ших.

Я́ко ту́ча небе́сная зе́млю жа́ждущую, твоя́ уче́ния ве́рных сердца́ при́сно жела́ющая умаща́ют и несы́тно вопи́ти науча́т: оте́ц на́ших Бо́же, благослове́н еси́.

Ра́зумом богому́дренным безпло́тныя умы́ расписа́л еси́ и те́х, преблаже́нне, песносло́вия, боже́ствен бы́в, Це́рковь пе́ти наказа́л еси́: благослове́н Бо́г оте́ц на́ших.

Прия́телище Ду́ха Всесвята́го яви́лся еси́ благоключи́мое, и Того́ вдохнове́ния и явле́ния проро́чески провозглаша́я, му́дре Диони́сие, вопия́ше ве́село: благослове́н Бо́г оте́ц на́ших.

Богоро́дичен: Се́ ны́не испо́лнися Иса́ии богоглаго́ливаго прорече́ние: Де́ва бо во чре́ве Бо́га Сло́ва име́ и породила́ е́сть Жизнода́вца; Ему́же вси́ зове́м: благослове́н Бо́г оте́ц на́ших.

Пе́снь 8.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся́ ве́ки.

Све́тел, я́ко зерца́ло, бы́в, Диони́сие, и вмести́телен чи́стых явле́ний у́м соде́лав, доброде́телию, всебога́те, лучи́ па́че ума́ сия́ния прие́мля, вопия́л еси́: свяще́нницы благослови́те, лю́дие превозноси́те во вся́ ве́ки.

Оби́льнейшая благода́ть излия́ся во устна́х твои́х, те́м боже́ственная уче́ния предложи́л еси́, и те́х ра́зумы па́че смы́сла на́м простира́я и ясне́е и све́тло отверза́я, ве́рою пою́щим: свяще́нницы благослови́те, лю́дие превозноси́те во вся́ ве́ки.

Зна́емейша бы́сть тобо́ю, Диони́сие, Афи́нская всесла́вная митропо́лия, Христу́ прине́сшая тя́ нача́ток всесвяще́нный Всецарю́, всегда́ пою́щи: о́троцы благослови́те, свяще́нницы воспо́йте, лю́дие превозноси́те во вся́ ве́ки.

Богоро́дичен: Ма́ти Бо́жия Всенепоро́чная, души́ моея́ стру́пы и грехо́вныя я́звы потреби́: Сы́на бо родила́ еси́, вла́сть иму́щаго свя́занныя плени́цами грехо́вными удо́бь осла́бити от у́з нереши́мых, еди́наго Благоде́теля и еди́наго Жизнода́вца.

Пе́снь 9.

Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, А́нгелов и челове́к чинонача́лия велича́ют.

Святы́х апо́стол сподо́бился еси́ ви́дитель бы́ти и сострада́лец, и соо́бщник бы́л еси́ сла́вы, и с те́ми на виде́ние потща́лся еси́ телесе́ и́стинно живонача́льныя еди́ныя Богоро́дицы и честне́йшия, Ю́же досто́йно велича́ем.

Боже́ственнаго Ца́рствия на небесе́х насле́дник бы́л еси́, я́ко зако́нен архиере́й, о́тче, я́ко непобеди́мь страда́лец, свяще́нства ма́стию кро́вь сраствори́л еси́ му́ченическую. Те́м сугу́бым венце́м сподо́бился еси́ досто́йно, священнотаи́нниче Диони́сие.

Я́ко име́я дерзнове́ние ко Христу́, иера́рше, му́дре Диони́сие, всегда́ моли́ изба́витися от искуше́ния благоче́стно пою́щим тя́, учениче́ неизрече́нных виде́ний, я́ко тайноуче́нныя и богонача́льныя священноявле́нник бла́гости.

Богоро́дичен: Победи́вшу е́реси хра́брски, честну́ю Це́рковь яви́, ю́же Христо́с честно́ю Свое́ю кро́вию я́ко Бла́г стяжа́, Обра́дованная, Сы́н Тво́й и́стинно, и спаси́ от бе́д и от обстоя́ния, одержа́щаго на́с, Влады́чице.

Свети́лен.

Доброде́тельми восходя́, возвы́сився на небеса́, богоприя́тне, и позна́л еси́ а́нгелов чи́ны, и все́х вы́шних стоя́ния, и Трисо́лнечную Зарю́, навы́к от Па́вла.

Богоро́дичен: И́же жи́зни боже́ственней и блаже́нней позави́дев ми́ дре́вле в раи́, вра́г прелука́вый и злоко́зненный, и от Еде́ма изгна́в мя́, умерщвля́ется Рождество́м Твои́м, Богоро́дице.

Пѣ́снь а҃.

І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.

Па́ѵломъ бжⷭ҇твеннымъ наꙋче́нъ, нбⷭ҇ныхъ, дїонѵ́сїе, ви́дцемъ, нбⷭ҇ный таи́нникъ а҆́бїе и҆ бг҃овѣща́тель бы́лъ є҆сѝ.

И҆́же бл҃года́тїю бж҃їею ѡ҆зари́всѧ, просвѣтѝ, бл҃же́нне, пою́щихъ тѧ̀ дꙋ́шы, твоѧ̑ разꙋмѣ́ти бг҃одꙋхновє́ннаѧ ᲂу҆чє́нїѧ, дїонѵ́сїе.

Оу҆мо́мъ преѡчище́ннымъ и҆ дꙋше́ю, нбⷭ҇ныхъ ᲂу҆добре́нїй сїѧ̑нїѧ ᲂу҆вѣ́дѣти сподо́билсѧ є҆сѝ, и҆ тѣ́хъ ликостоѧ̑нїѧ, дїонѵ́сїе.

Бг҃оро́диченъ: Черто́гъ свѣтоно́сный, па́че ᲂу҆ма̀ воплоще́нїѧ ꙗ҆ви́ласѧ є҆сѝ всѣ́хъ содѣ́телѧ: и҆зъ тебє́ бо пло́ть, бг҃ома́ти, на́шꙋ ѡ҆дѣ́ѧлъ є҆́сть.

Пѣ́снь г҃.

І҆рмо́съ: Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.

Нбⷭ҇ныхъ крꙋгѡ́въ превозше́дъ, ѻ҆́ч҃е, премі́рныхъ чи́ны, и҆ вѡ́инства и҆ свѣ́тлѡсти, высоковѣща́ньми слове́съ и҆ всемꙋ́дрыми ᲂу҆чє́нїи всѣ̑мъ и҆з̾ѧсни́лъ є҆сѝ.

Высо́кагѡ видѣ́нїѧ насы́щсѧ, прпⷣбне, и҆ме́нъ бжⷭ҇твенныхъ, бжⷭ҇твенное разꙋмѣ́нїе бг҃осло́вилъ є҆сѝ, трⷪ҇чный бг҃осло́въ бы́въ бл҃года́тїю, бг҃облаже́нне дїонѵ́сїе.

Оу҆мертви́всѧ ны́нѣшнимъ жела́нїемъ, є҆́же къ бг҃ꙋ, и҆ любомꙋ́дрїю крѣ́пкѡ наꙋчи́всѧ, сꙋ́щымъ па́че ᲂу҆ма̀ животвѡ́рнымъ дарова́нїємъ, бг҃оно́сный ѻ҆рга́нъ, ѻ҆́ч҃е, бы́лъ є҆сѝ.

Бг҃оро́диченъ: Дѣѧ́нїемъ дв҃о, вседѣ́тельнагѡ дх҃а, тѣ́ло влⷣцѣ всѣ́хъ плодоноси́ла є҆сѝ, въ не́мже ѡ҆сꙋди́сѧ мі́ра грѣ́хъ и҆ жи́знь и҆сточи́сѧ вѣ́чнꙋющаѧ.

Сѣда́ленъ, гла́съ и҃.

Въ пꙋчи́нѣ премꙋ́дрости ᲂу҆чѧ̀, дх҃а глꙋбины̀, трⷪ҇цы є҆ди́но бж҃ество̀ проповѣ́далъ є҆сѝ, прпⷣбне, списа́въ всѧ̑ а҆́гг҃льскїѧ чи́ны, и҆ та̑йнаѧ тѣ́хъ сїѧ̑нїѧ, бг҃омꙋ́дре. тѣ́мъ и҆ ни́жнюю і҆ера́рхїю счинѧ́ѧ, ко є҆ди́номꙋ всѧ̑ возве́лъ є҆сѝ є҆ди́нствꙋ, і҆ера́рше дїонѵ́сїе. молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти чествꙋ́ющымъ любо́вїю свѧтꙋ́ю па́мѧть твою̀.

Бг҃оро́диченъ: Сл҃нца ѻ҆́блаче разꙋ́мнагѡ, бжⷭ҇твеннагѡ свѣ́та свѣти́льниче златокова́нный, нескве́рнаѧ, небла́знаѧ, всенепоро́чнаѧ влⷣчце, ѡ҆мраче́ннꙋю дꙋ́шꙋ мою̀ ѡ҆слѣпле́нїемъ страсте́й, безстра́стїѧ заре́ю просвѣтѝ, молю́сѧ. и҆ ѡ҆скверне́нное моѐ се́рдце ѡ҆мы́й потѡ́ки ᲂу҆миле́нїѧ, покаѧ́нїѧ же слеза́ми, и҆ ѿ тимѣ́нїѧ мѧ̀ ѡ҆чи́сти дѣ́лъ мои́хъ, да любо́вїю зовꙋ́ ти: бцⷣе приснодв҃о, молѝ хрⷭ҇та̀ бг҃а, прегрѣше́нїй ѡ҆ставле́нїе пода́ти мѝ: тебе́ бо и҆мѣ́ю наде́ждꙋ ра́бъ тво́й.

Крⷭ҇тобг҃оро́диченъ: А҆́гнца и҆ па́стырѧ и҆ и҆зба́вителѧ а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи вопїѧ́ше: мі́ръ ᲂу҆́бѡ ра́дꙋетсѧ, прїе́млѧй тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости, долготерпѣли́ве гдⷭ҇и, ми́лости бе́здно и҆ и҆сто́чниче неисчерпа́емый, ᲂу҆милосе́рдисѧ и҆ да́рꙋй согрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стра̑сти твоѧ̑.

Пѣ́снь д҃.

І҆рмо́съ: Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Церко́вное благочи́нїе ᲂу҆краси́лъ є҆сѝ: въ ни́хъ бо, ѻ҆́ч҃е, живописа́лъ є҆сѝ зра̑чныѧ ѻ҆́бразы ꙗ҆́вственнѡ свѧщеннописа́нїемъ без̾ѻбра́зныхъ си́лъ: и҆́миже тайново́дѧтсѧ, и҆ просвѣща́ютсѧ всѧ̑ вѣ́рныхъ, бг҃омꙋ́дре, собо́ры.

Стрꙋи̑ твоегѡ̀ бг҃осло́вїѧ, бг҃опрїѧ́тне, цвѣтникѝ напаѧ́ютъ словє́сныѧ, присноцвѣтꙋ́щыѧ ѕѣлѡ̀, и҆ насаждє́нныѧ на пра́вости бг҃осло́вїѧ: є҆ди́нство бо сꙋщества̀ въ трїе́хъ ли́цѣхъ, честно́е є҆динонача́лїе проповѣ́далъ є҆сѝ.

А҆́гг҃льскагѡ свѧщеннонача́льства си́льное, ст҃и́телю, жела́нїе и҆ раче́нїе, є҆́же къ бг҃ꙋ, и҆ неꙋкло́нное ма́нїе къ высотѣ̀ бжⷭ҇твеннѣй и҆ непостижи́мѣй, наꙋчи́лъ є҆сѝ бг҃омꙋ́дреннѡ вѣ́рою вопїю́щыѧ: си́лѣ твое́й сла́ва, чл҃вѣколю́бче.

Бг҃оро́диченъ: Сщ҃еннодѣ́йствитель спасе́нїѧ бы́сть сн҃ъ тво́й всѣ̑мъ пою́щымъ тѧ̀, и҆ наста́вникъ и҆ просвѣти́тель, и҆ пра́вда, дв҃о, и҆ и҆збавле́нїе. тѣ́мъ тѧ̀ бцⷣꙋ и҆́стиннѡ и҆ гдⷭ҇ьственнѡ вѣ́рнїи є҆диномꙋ́дреннѡ сла́вимъ.

Пѣ́снь є҃.

І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Глагѡ́лъ твои́хъ вѣща́нїе, ꙗ҆́кѡ нѣ́кїй небе́сный шꙋ́мъ носи́мь, безбѡ́жныѧ ра́зꙋмы ѡ҆громѝ сло́вомъ бл҃года́ти, и҆ велѣ́нїй бжⷭ҇твенныхъ зарѧ́ми свѣтлѣ́йшими вѣ́рныхъ сердца̀ просвѣтѝ.

Оу҆подо́билсѧ є҆сѝ кꙋпцꙋ̀, и҆́щꙋщемꙋ дѡ́брыѧ би́серы, всебога́те, и҆ ѡ҆брѣ́лъ є҆сѝ є҆ди́нъ би́серъ и҆́стиннѡ многоцѣ́ненъ: и҆ ᲂу҆ди́вльсѧ є҆гѡ̀ бг҃отво́рнꙋ свѣтоверже́нїю, ст҃и́телю, бг҃а и҆сповѣ́далъ є҆сѝ.

И҆сто́чникъ мꙋ́дрости, любомꙋ́дрѣйше ѻ҆́ч҃е, возлюби́лъ є҆сѝ, и҆ тоѧ̀ раче́нїемъ и҆ любо́вїю ѡ҆держи́мь, вели́къ бы́лъ є҆сѝ, и҆ рѣ́ки бжⷭ҇твенныхъ велѣ́нїй всегда̀ то́чиши, бг҃огла́се.

Бг҃оро́диченъ: Ꙗ҆́кѡ ѡ҆бра́дованнаѧ, добротворѧ́щее прїѧ́ла є҆сѝ бл҃голѣ́пїе, всѧ̑ є҆ди́нѣмъ хотѣ́нїемъ сотво́ршагѡ, и҆ бжⷭ҇твенною добро́тою, и҆ просвѣще́нїемъ благовѣ́рїѧ, бг҃ома́ти, на́съ ᲂу҆добри́вшагѡ.

Пѣ́снь ѕ҃.

І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

Зако́ннѡ любомꙋ́дрствꙋѧ, мꙋ́дрости да́ръ полꙋчи́лъ є҆сѝ. бжⷭ҇твеннѣ бг҃осло́вѧ, правосла̑вныѧ догма́ты, всебл҃же́нне, ѡ҆ста́вилъ є҆сѝ, и҆́хже наслажда́ющесѧ вѣ́рнїи тѧ̀ блажи́мъ.

Ра́зꙋмомъ бг҃олѣ́пнымъ, бг҃омꙋ́дре, ᲂу҆добрѧ́емь, бжⷭ҇твенномꙋ ᲂу҆чи́телю слꙋ́хъ тво́й приклони́лъ є҆сѝ, и҆ премі́рнꙋю ѿ негѡ̀ мꙋ́дрость навы́клъ є҆сѝ, дїонѵ́сїе.

Житїѐ твоѐ чꙋ́дно, сло́во же ди́внѣйше, ѧ҆зы́къ тво́й свѣтоза́ренъ, ᲂу҆ста̀ ѻ҆гнедꙋхновє́нна и҆ дꙋходви̑жима, ᲂу҆́мъ же тво́й и҆спы́тенъ ѻ҆́ч҃е, бг҃облаже́нне.

Бг҃оро́диченъ: Гла́съ тѝ гаврїи́ловъ ра́достнѡ, дв҃о, взыва́емъ вѣ́рнїи: и҆зъ тебе́ бо неизрече́ннѡ на́мъ живонача́льный творе́цъ и҆зше́лъ є҆́сть, и҆ примѣси́сѧ человѣ́кѡмъ, чл҃вѣколю́бецъ.

Конда́къ, гла́съ и҃.

Нбⷭ҇наѧ врата̀ проше́дъ дꙋ́хомъ, ꙗ҆́кѡ ᲂу҆чени́къ, до тре́тїѧгѡ нб҃сѐ дости́гшагѡ а҆пⷭ҇ла, дїонѵ́сїе, неизрече́нныхъ ѡ҆богати́лсѧ є҆сѝ всѧ́кимъ ра́зꙋмомъ, и҆ ѡ҆зари́лъ є҆сѝ во тмѣ̀ невѣ́дѣнїѧ сѣдѧ́щыѧ. тѣ́мже зове́мъ: ра́дꙋйсѧ, ѻ҆́ч҃е всемі́рный.

І҆́косъ:

А҆́гг҃лъ ѿ человѣ́кѡвъ, добродѣ́тельми бы́въ вели́кїй, дїонѵ́сїй, ве́сь ꙗ҆́кѡ крила́тъ навы́че ᲂу҆мо́мъ нбⷭ҇ныѧ ра́зꙋмы. тѣ́мъ пѣ́сньми ꙗ҆́кѡ а҆́гг҃ла почти́мъ, вопїю́ще къ немꙋ̀ такѡва́ѧ: ра́дꙋйсѧ, ᲂу҆вѣ́дѣвый хрⷭ҇та̀ па́ѵломъ. ра́дꙋйсѧ, мнѡ́гїѧ ко хрⷭ҇тꙋ̀ ѡ҆брати́вый. ра́дꙋйсѧ, многобо́жїѧ храмѡ́въ гꙋби́телю. ра́дꙋйсѧ, бг҃оразꙋ́мнагѡ совѣ́та смотре́нїе. ра́дꙋйсѧ, кни́го бг҃оначерта́ннаѧ та́йныхъ сокро́вищъ. ра́дꙋйсѧ, скрижа́ль бг҃озра́чнаѧ, и҆ зерца́ло нбⷭ҇ное. ра́дꙋйсѧ, ꙗ҆́кѡ стрⷭ҇ть гдⷭ҇ню ви́дѣлъ є҆сѝ. ра́дꙋйсѧ, ꙗ҆́кѡ ᲂу҆се́рднѡ тогѡ̀ ра́ди закала́ешисѧ. ра́дꙋйсѧ, и҆сто́чниче, и҆сточа́ѧ ра́зꙋмъ. ра́дꙋйсѧ, ка́пле, ᲂу҆гаша́ющи безꙋ́мїе. ра́дꙋйсѧ, стезѐ неле́стнаѧ спасе́нїѧ. ра́дꙋйсѧ, прегра́до нечести́выхъ прехо́да. ра́дꙋйсѧ, ѻ҆́ч҃е всемі́рный.

Пѣ́снь з҃.

І҆рмо́съ: Бж҃їѧ снисхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Ꙗ҆́кѡ тꙋ́ча нбⷭ҇наѧ, зе́млю жа́ждꙋщꙋю, твоѧ̑ ᲂу҆чє́нїѧ вѣ́рныхъ сердца̀ при́снѡ жела́ющаѧ ᲂу҆маща́ютъ, и҆ несы́тнѡ вопи́ти наꙋча́тъ: ѻ҆тє́цъ на́шихъ бж҃е, бл҃гослове́нъ є҆сѝ.

Ра́зꙋмомъ бг҃омꙋ́дреннымъ безплѡ́тныѧ ᲂу҆мы̀ расписа́лъ є҆сѝ, и҆ тѣ́хъ, пребл҃же́нне, пѣсносло́вїѧ, бжⷭ҇твенъ бы́въ, цр҃ковь пѣ́ти наказа́лъ є҆сѝ: бл҃гослове́нъ бг҃ъ ѻ҆тє́цъ на́шихъ.

Прїѧ́телище дх҃а всест҃а́гѡ ꙗ҆ви́лсѧ є҆сѝ бл҃гоключи́мое, и҆ тогѡ̀ вдохновє́нїѧ и҆ ꙗ҆влє́нїѧ проро́чески провозглаша́ѧ, мꙋ́дре дїонѵ́сїе, вопїѧ́ше ве́селѡ: бл҃гослове́нъ бг҃ъ ѻ҆тє́цъ на́шихъ.

Бг҃оро́диченъ: Сѐ ны́нѣ и҆спо́лнисѧ и҆са́їи бг҃оглаго́ливагѡ прорече́нїе: дв҃а бо во чре́вѣ бг҃а сло́ва и҆мѣ̀, и҆ породила̀ є҆́сть жизнода́вца, є҆мꙋ́же всѝ зове́мъ: бл҃гослове́нъ бг҃ъ ѻ҆тє́цъ на́шихъ.

Пѣ́снь и҃.

І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Свѣ́телъ ꙗ҆́кѡ зерца́ло бы́въ, дїонѵ́сїе, и҆ вмѣсти́теленъ чи́стыхъ ꙗ҆вле́нїй ᲂу҆́мъ содѣ́лавъ, добродѣ́телїю, всебога́те, лꙋчы̀ па́че ᲂу҆ма̀ сїѧ́нїѧ прїе́млѧ, вопїѧ́лъ є҆сѝ: свѧще́нницы, благослови́те, лю́дїе, превозноси́те во всѧ̑ вѣ́ки.

Ѻ҆би́льнѣйшаѧ бл҃года́ть и҆злїѧ́сѧ во ᲂу҆стна́хъ твои́хъ, тѣ́мъ бжⷭ҇твєннаѧ ᲂу҆чє́нїѧ предложи́лъ є҆сѝ, и҆ тѣ́хъ ра́зꙋмы па́че смы́сла на́мъ простира́ѧ, и҆ ꙗ҆снѣ́е и҆ свѣ́тлѡ ѿверза́ѧ, вѣ́рою пою́щымъ: свѧще́нницы, благослови́те, лю́дїе, превозноси́те во всѧ̑ вѣ́ки.

Зна́емѣйша бы́сть тобо́ю, дїонѵ́сїе, а҆ѳи́нскаѧ всесла́внаѧ митропо́лїа, хрⷭ҇тꙋ̀ прине́сшаѧ тѧ̀ нача́токъ всесщ҃е́нный всецр҃ю̀, всегда̀ пою́щи: ѻ҆́троцы, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Бг҃оро́диченъ: Мт҃и бж҃їѧ всенепоро́чнаѧ, дꙋшѝ моеѧ̀ стрꙋ́пы, и҆ грѣхѡ́вныѧ ꙗ҆́звы потребѝ: сн҃а бо родила̀ є҆сѝ, вла́сть и҆мꙋ́щаго, свѧ̑занныѧ плени́цами грѣхо́вными, ᲂу҆до́бь ѡ҆сла́бити ѿ ᲂу҆́зъ нерѣши́мыхъ, є҆ди́наго бл҃годѣ́телѧ и҆ є҆ди́наго жизнода́вца.

Пѣ́снь ѳ҃.

І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.

Ст҃ы́хъ а҆пⷭ҇лъ сподо́билсѧ є҆сѝ ви́дитель бы́ти, и҆ сострада́лецъ, и҆ соѻ́бщникъ бы́лъ є҆сѝ сла́вы: и҆ съ тѣ́ми на видѣ́нїе потща́лсѧ є҆сѝ тѣлесѐ и҆́стиннѡ живонача́льныѧ є҆ди́ныѧ бцⷣы, и҆ чⷭ҇тнѣ́йшїѧ, ю҆́же досто́йнѡ велича́емъ.

Бжⷭ҇твеннагѡ црⷭ҇твїѧ на нб҃сѣ́хъ наслѣ́дникъ бы́лъ є҆сѝ, ꙗ҆́кѡ зако́ненъ а҆рхїере́й ѻ҆́ч҃е, ꙗ҆́кѡ непобѣди́мь страда́лецъ, свѧще́нства ма́стїю кро́вь сраствори́лъ є҆сѝ мч҃ническꙋю: тѣ́мъ сꙋгꙋ̑бымъ вѣнцє́мъ сподо́билсѧ є҆сѝ досто́йнѡ, свѧщеннотаи́нниче дїонѵ́сїе.

Ꙗ҆́кѡ и҆мѣ́ѧ дерзнове́нїе ко хрⷭ҇тꙋ̀, і҆ера́рше мꙋ́дре дїонѵ́сїе, всегда̀ молѝ и҆зба́витисѧ ѿ и҆скꙋше́нїѧ благоче́стнѡ пою́щымъ тѧ̀, ᲂу҆ч҃ничѐ неизрече́нныхъ видѣ́нїй, ꙗ҆́кѡ тайноꙋче́нныѧ и҆ бг҃онача́льныѧ свѧщенноѧвле́нникъ бла́гости.

Бг҃оро́диченъ: Побѣди́вшꙋ є҆́рєси хра́брски, честнꙋ́ю це́рковь ꙗ҆вѝ, ю҆́же хрⷭ҇то́съ чⷭ҇тно́ю свое́ю кро́вїю ꙗ҆́кѡ бл҃гъ стѧжа̀, ѡ҆бра́дованнаѧ, сн҃ъ тво́й и҆́стиннѡ: и҆ спасѝ ѿ бѣ́дъ и҆ ѿ ѡ҆бстоѧ́нїѧ ѡ҆держа́щагѡ на́съ, влⷣчце.

Свѣти́ленъ.

Добродѣ́тельми восходѧ̀, возвы́сивсѧ на небеса̀, бг҃опрїѧ́тне, и҆ позна́лъ є҆сѝ а҆́гг҃лѡвъ чи́ны, и҆ всѣ́хъ вы́шнихъ стоѧ̑нїѧ, и҆ трисо́лнечнꙋю зарю̀ навы́къ ѿ па́ѵла.

Бг҃оро́диченъ: И҆́же жи́зни бжⷭ҇твеннѣй и҆ блаже́ннѣй позави́дѣвъ мѝ дре́вле въ раѝ вра́гъ прелꙋка́вый и҆ ѕлоко́зненный, и҆ ѿ є҆де́ма и҆згна́въ мѧ̀, ᲂу҆мерщвлѧ́етсѧ ржⷭ҇тво́мъ твои́мъ, бцⷣе.

Жития священномучеников Дионисия Ареопагита, епископа, Рустика, пресвитера, и Елевферия, диакона

Свя­щен­но­му­че­ни­ки Ди­о­ни­сий Аре­о­па­гит, епи­скоп Афин­ский, пре­сви­тер Ру­стик и диа­кон Елев­фе­рий уби­ты в Гал­лий­ской Лю­те­ции (древ­нее на­зва­ние Па­ри­жа) в 96 го­ду (по дру­гим дан­ным – в 110 го­ду), во вре­мя го­не­ния при им­пе­ра­то­ре До­ми­ци­ане (81–96). Свя­той Ди­о­ни­сий жил в го­ро­де Афи­ны. Там же вос­пи­ты­вал­ся и по­лу­чил клас­си­че­ское эл­лин­ское об­ра­зо­ва­ние. За­тем от­пра­вил­ся в Еги­пет, где в го­ро­де Илио­по­ле изу­чал аст­ро­но­мию. Вме­сте с дру­гом Апол­ло­фо­ном он был сви­де­те­лем сол­неч­но­го за­тме­ния в мо­мент рас­пя­тия на Кре­сте Гос­по­да Иису­са Хри­ста. "Это или Бог, Со­зда­тель все­го ми­ра, страж­дет, или этот мир ви­ди­мый кон­ча­ет­ся", – ска­зал то­гда Ди­о­ни­сий. В Афи­нах, ку­да он воз­вра­тил­ся из Егип­та, его из­бра­ли чле­ном аре­о­па­га (вер­хов­но­го афин­ско­го су­да).

Ко­гда свя­той апо­стол Па­вел про­по­ве­до­вал в афин­ском аре­о­па­ге (Деян.17,16-34), Ди­о­ни­сий при­нял это спа­си­тель­ное бла­го­ве­стие и стал хри­сти­а­ни­ном. В те­че­ние трех лет Ди­о­ни­сий был спо­движ­ни­ком свя­то­го апо­сто­ла Пав­ла в про­по­ве­ди Сло­ва Бо­жия. Впо­след­ствии апо­стол Па­вел по­ста­вил его епи­ско­пом го­ро­да Афин. В 57 го­ду свя­той Ди­о­ни­сий при­сут­ство­вал при по­гре­бе­нии Пре­свя­той Бо­го­ро­ди­цы.

Еще при жиз­ни Ма­те­ри Бо­жи­ей Ди­о­ни­сий Аре­о­па­гит, спе­ци­аль­но при­ез­жав­ший в Иеру­са­лим из Афин, чтобы уви­деть Бо­го­ма­терь, пи­сал сво­е­му учи­те­лю апо­сто­лу Пав­лу: "Сви­де­тель­ству­юсь Бо­гом, что, кро­ме Са­мо­го Бо­га, нет ни­че­го во все­лен­ной, в та­кой ме­ре ис­пол­нен­но­го Бо­же­ствен­ной си­лы и бла­го­да­ти. Ни­кто из лю­дей не мо­жет по­стиг­нуть сво­им умом то, что я ви­дел. Ис­по­ве­дую пред Бо­гом: ко­гда я Иоан­ном, си­я­ю­щим сре­ди апо­сто­лов, как солн­це на небе, был при­ве­ден пред ли­цо Пре­свя­той Де­вы, я пе­ре­жил невы­ра­зи­мое чув­ство. Пре­до мною за­бли­ста­ло ка­кое-то Бо­же­ствен­ное си­я­ние. Оно оза­ри­ло мой дух. Я чув­ство­вал бла­го­уха­ние неопи­су­е­мых аро­ма­тов и был по­лон та­ко­го вос­тор­га, что ни те­ло мое немощ­ное, ни дух не мог­ли пе­ре­не­сти этих зна­ме­ний и на­чат­ков веч­но­го бла­жен­ства и Небес­ной сла­вы. От Ее бла­го­да­ти из­не­мог­ло мое серд­це, из­не­мог мой дух. Ес­ли бы у ме­ня не бы­ли в па­мя­ти твои на­став­ле­ния, я бы счел Ее ис­тин­ным Бо­гом. Нель­зя се­бе и пред­ста­вить боль­ше­го бла­жен­ства, чем то, ко­то­рое я то­гда ощу­тил".

По­сле кон­чи­ны апо­сто­ла Пав­ла, же­лая про­дол­жить его де­ло, свя­ти­тель Ди­о­ни­сий от­пра­вил­ся с про­по­ве­дью в за­пад­ные стра­ны, со­про­вож­да­е­мый пре­сви­те­ром Ру­сти­ком и диа­ко­ном Елев­фе­ри­ем. Мно­гих он об­ра­тил ко Хри­сту в Ри­ме, а за­тем в Гер­ма­нии, Ис­па­нии. В Гал­лии, во вре­мя пре­сле­до­ва­ния хри­сти­ан язы­че­ски­ми вла­стя­ми, все три ис­по­вед­ни­ка бы­ли схва­че­ны и вверг­ну­ты в тем­ни­цу. Но­чью свя­той Ди­о­ни­сий со­вер­шил Бо­же­ствен­ную ли­тур­гию в со­слу­же­нии Ан­ге­лов Бо­жи­их. На­ут­ро му­че­ни­ки бы­ли обез­глав­ле­ны. Свя­той Ди­о­ни­сий взял свою гла­ву, про­ше­ство­вал с ней до хра­ма и толь­ко там пал мерт­вый. Бла­го­че­сти­вая жен­щи­на Ка­тул­ла по­греб­ла остан­ки му­че­ни­ка.

Боль­шое зна­че­ние для Пра­во­слав­ной Церк­ви име­ют тво­ре­ния свя­то­го Ди­о­ни­сия Аре­о­па­ги­та. До на­ше­го вре­ме­ни из них со­хра­ни­лись че­ты­ре кни­ги: "О небес­ной иерар­хии", "О цер­ков­ной иерар­хии", "О Име­нах Бо­жи­их", "О ми­сти­че­ском бо­го­сло­вии", а так­же де­сять по­сла­ний к раз­ным ли­цам.

Кни­га "О небес­ной иерар­хии" на­пи­са­на, ве­ро­ят­но, в од­ной из стран За­пад­ной Ев­ро­пы, где про­по­ве­до­вал свя­той Ди­о­ни­сий. В ней из­ла­га­ет­ся хри­сти­ан­ское уче­ние о ми­ре Ан­гель­ском. Ан­гель­ская (или Небес­ная) иерар­хия со­сто­ит из де­вя­ти Ан­гель­ских чи­нов: Се­ра­фи­мы, Хе­ру­ви­мы, Пре­сто­лы, Гос­под­ства, Си­лы, Вла­сти, На­ча­ла, Ар­хан­ге­лы, Ан­ге­лы (Со­бор Небес­ных Сил бес­плот­ных – 8 но­яб­ря.)

Цель Бо­го­учре­жден­ной Ан­гель­ской иерар­хии – вос­хож­де­ние к Бо­го­по­до­бию чрез очи­ще­ние, про­све­ще­ние и со­вер­шен­ство­ва­ние. Выс­шие ли­ки ста­но­вят­ся но­си­те­ля­ми и ис­точ­ни­ка­ми Бо­же­ствен­но­го Све­та и Бо­же­ствен­ной жиз­ни для ли­ков под­чи­нен­ных. Не толь­ко ум­ные, бес­плот­ные си­лы вклю­че­ны в све­то­нос­ные ду­хов­ные иерар­хии, но и род че­ло­ве­че­ский, вос­со­зда­ва­е­мый и освя­ща­е­мый в Церк­ви Хри­сто­вой.

Кни­га свя­ти­те­ля Ди­о­ни­сия "О цер­ков­ной иерар­хии" яв­ля­ет­ся про­дол­же­ни­ем его кни­ги "О Небес­ной иерар­хии". Цер­ковь Хри­сто­ва в ее все­мир­ном слу­же­нии зи­ждет­ся, как и Ан­гель­ские ли­ки, на Бо­го­учре­жден­ном свя­щен­но­на­ча­лии.

В мир зем­ной, к ча­дам цер­ков­ным, Бо­же­ствен­ная бла­го­дать нис­хо­дит при­кро­вен­но – в свя­тых цер­ков­ных Та­ин­ствах, ду­хов­ных по су­ще­ству, но чув­ствен­ных по об­ра­зу. Лишь немно­гие свя­тые по­движ­ни­ки про­зре­ва­ли зем­ны­ми оча­ми ог­не­об­раз­ную при­ро­ду Свя­тых Тайн Бо­жи­их. Но вне цер­ков­ных Та­инств, вне Кре­ще­ния и Ев­ха­ри­стии, нет для че­ло­ве­ка све­то­нос­ной спа­са­ю­щей бла­го­да­ти Бо­жи­ей, нет Бо­го­по­зна­ния, нет обо­же­ния.

Кни­га "О име­нах Бо­жи­их" из­ла­га­ет пу­ти Бо­го­по­зна­ния чрез Ле­стви­цу Бо­же­ствен­ных имен.

Кни­га свя­ти­те­ля Ди­о­ни­сия "О ми­сти­че­ском бо­го­сло­вии" так­же из­ла­га­ет уче­ние о Бо­го­по­зна­нии. Бо­го­сло­вие Пра­во­слав­ной Церк­ви все ос­но­ва­но на опыт­ном Бо­го­по­зна­нии. Чтобы по­знать Бо­га – нуж­но к Нему при­бли­зить­ся, до­стичь со­сто­я­ния Бо­го­об­ще­ния и обо­же­ния. Это бо­лее все­го до­сти­га­ет­ся мо­лит­вой. Не по­то­му, что мо­лит­вой мы при­бли­жа­ем к се­бе Непо­сти­жи­мо­го Бо­га, но по­то­му, что чи­стая сер­деч­ная мо­лит­ва нас при­бли­жа­ет к Бо­гу.

Тво­ре­ния свя­то­го Ди­о­ни­сия Аре­о­па­ги­та (их на­зы­ва­ют "Аре­о­паги­ти­ки") име­ют ис­клю­чи­тель­ное зна­че­ние в Бо­го­сло­вии Пра­во­слав­ной Церк­ви. На про­тя­же­нии по­чти че­ты­рех ве­ков, до на­ча­ла VI сто­ле­тия, тво­ре­ния свя­то­го от­ца со­хра­ня­лись лишь в тай­ном пре­да­нии, пре­иму­ще­ствен­но бо­го­сло­ва­ми Алек­сан­дрий­ской Церк­ви. Они бы­ли из­вест­ны Кли­мен­ту Алек­сан­дрий­ско­му, Ори­ге­ну, Ди­о­ни­сию Ве­ли­ко­му, пре­ем­ствен­но воз­глав­ляв­шим огла­си­тель­ное учи­ли­ще в Алек­сан­дрии, и свя­то­му Гри­го­рию Бо­го­сло­ву. Свя­той Ди­о­ни­сий Алек­сан­дрий­ский пи­сал свя­ти­те­лю Гри­го­рию Бо­го­сло­ву тол­ко­ва­ния на "Аре­о­паги­ти­ки". Об­ще­цер­ков­ное при­зна­ние тво­ре­ния свя­то­го Ди­о­ни­сия Аре­о­па­ги­та по­лу­чи­ли в VI–VII вв. Осо­бую из­вест­ность име­ют ком­мен­та­рии к ним, на­пи­сан­ные пре­по­доб­ным Мак­си­мом Ис­по­вед­ни­ком († 662).

В Рус­ской Пра­во­слав­ной Церк­ви уче­ние свя­то­го Ди­о­ни­сия о ду­хов­ных свя­щен­но­на­ча­ли­ях и обо­же­нии че­ло­ве­че­ской при­ро­ды бы­ло из­вест­но сна­ча­ла по "Бо­го­сло­вию" пре­по­доб­но­го Иоан­на Да­мас­ки­на. Пер­вый сла­вян­ский пе­ре­вод са­мих "Аре­о­паги­тик" был сде­лан на Афоне ок. 1371 го­да мо­на­хом Ис­а­и­ей. Спис­ки его бы­ли ши­ро­ко рас­про­стра­не­ны в Рос­сии. Мно­гие из них до­ныне сбе­ре­га­ют­ся в оте­че­ствен­ных кни­го­хра­ни­ли­щах – в том чис­ле пер­га­мент­ная ру­ко­пись "Тво­ре­ния свя­то­го Ди­о­ни­сия Аре­о­па­ги­та", при­над­ле­жав­шая свя­ти­те­лю Ки­при­а­ну, мит­ро­по­ли­ту Ки­ев­ско­му и всея Ру­си († 1406) и пи­сан­ная его ру­кой.

См. так­же: "Жи­тие и стра­да­ние свя­то­го свя­щен­но­му­че­ни­ка Ди­о­ни­сия Аре­о­па­ги­та" в из­ло­же­нии свт. Ди­мит­рия Ро­стов­ско­го.