Канон священномученику Ипатию, епископу Гангрскому

Припев: Священному́чениче Ипа́тие, моли́ Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 13 апреля (31 марта ст. ст.)

Глас 4.

Пе́снь 1.

Ирмо́с: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние.

Боже́ственнаго страда́льца, му́драго святи́теля, чуде́с исто́чника, па́стыря до́браго, Це́ркве утвержде́ние пе́сньми велегла́сно я́ко свети́льника всеми́рнаго вси́ восхва́лим, ра́дующеся.

Боже́ственная река́, наводни́вшая, преблаже́нне, чи́стую твою́ ду́шу, источи́ на́м пречи́сты во́ды, всему́дре, мно́гих чуде́с, то́ки изсуша́ющия му́тных страсте́й, Ипа́тие.

Умертви́в плотски́я сла́сти воздержа́нием, жи́знь и́стинную — Христа́, на́с ра́ди уме́рша, Ипа́тие, име́л еси́, вну́трь в души́ твое́й живу́ща и вся́ твоя́ к Нему́ ше́ствия направля́юща.

Се́рдце и ду́шу Тро́ицы соде́лал еси́ нескве́рнен хра́м, хра́мы же свяще́нныя Го́споду в хвалу́, преподо́бне священному́чениче, созда́л еси́, спаси́телен бы́в прави́тель ста́ду твоему́.

Богоро́дичен: Спа́са и Бо́га от чи́стых Твои́х крове́й воплоти́ла еси́, Чи́стая, показа́вшаго на́м му́драго святи́теля Своего́, Пречи́стая, спаси́тельна и те́пла засту́пника, чу́днаго вои́стинну Ипа́тия.

Пе́снь 3.

Ирмо́с: Не му́дростию, и си́лою, и бога́тством хва́лимся, но Тобо́ю, О́тчею ипоста́сною Му́дростию, Христе́: не́сть бо свя́т, па́че Тебе́, Человеколю́бче.

Все́м се́рдцем ко исто́чнику до́брых отлучи́лся еси́ и отту́ду све́тло богате́йшими сия́я, о́тче свяще́нне, Боже́ственными светлостьми́.

Зако́ны Боже́ственными огражде́н, беззако́нных собо́рище си́лою, о́тче, Боже́ственною истреби́л еси́ ересе́й, спаса́я ста́до твое́, о́тче Ипа́тие.

От вы́шния пресве́тлыя свещи́ Ду́ха просвеща́емь, му́дре, но́щию преходя́щим свещи́ тя́ яви́ша, от воды́ озаря́юще.

Отце́в боже́ственных ли́к соисполня́я блаже́нный, его́же собра́ Христо́с, Собо́ра Пе́рваго, блаже́нне, яви́лся еси́, сдавля́я пребезу́мнаго А́рия.

Богоро́дичен: Изба́ви мя́ вся́каго прило́га сопроти́внаго змии́на, Ма́ти Де́во Чи́стая, и се́рдце мое́ просвети́, ве́рою Тя́ сла́вящаго, Всенепоро́чную.

Седа́лен, гла́с 1.

Возсия́л еси́ в ми́ре, святи́телю Ипа́тие, чудесы́ просвеща́я ве́рно приходя́щия к тебе́; пострада́в же кро́вию, му́дре, мно́жае присво́ился еси́ Христу́ и лику́еши со а́нгелы на небесе́х, о на́с моля́ся. Сла́ва укре́пльшему тя́ Бо́гу, сла́ва Венча́вшему тя́, сла́ва Де́ющему тобо́ю все́м исцеле́ния.

Богоро́дичен: Ру́це Твои́ боже́ственнии, и́миже Созда́теля понесла́ еси́, Де́во Пресвята́я, вопло́щшагося благосты́нею, просте́рши, умоли́ Его́ изба́вити ны́ от искуше́ний, и страсте́й, и бе́д, хва́ляшия Тя́ любо́вию и вопию́щия: сла́ва Все́льшемуся в Тя́, сла́ва Проше́дшему из Тебе́, сла́ва Изба́вльшему на́с рождество́м Твои́м.

Крестобогоро́дичен: На Кресте́ Тебе́ распе́ншуся от беззако́нных и от во́ин, Спа́се, копие́м ре́бром Твои́м прободе́нным, Пречи́стая рыда́ше го́рько и, мно́гому Твоему́ и стра́шному терпе́нию ужаса́ющися, вопия́ше: сла́ва к челове́ком Твое́й любви́, сла́ва Твое́й бла́гости, сла́ва сме́ртию Твое́ю челове́ки обезсме́ртившему.

Пе́снь 4.

Ирмо́с: Седя́й в сла́ве на Престо́ле Божества́, во о́блаце ле́гце прии́де Иису́с Пребоже́ственный нетле́нною дла́нию и спасе́ зову́щия: сла́ва, Христе́, си́ле Твое́й.

Неле́стно сло́во и уче́ние и́скренно соблюда́я, пропове́дал еси́ Сло́во, Отцу́ Соприсносу́щно, ариому́дренную пре́лесть победи́в, священному́чениче, чудотво́рче досточу́дне.

Горча́йшия от го́р теку́щия во́ды зна́мением то́кмо цельбоно́сны показа́л еси́, во́ду жи́ву стяжа́в в се́рдцы твое́м, в ве́чную, о́тче, жи́знь теку́щую.

Свяще́нствовав преподо́бно и зако́нне пострада́в, свяще́нство показа́л еси́ све́тльшее кровьми́, излия́нными за любо́вь истощи́вшаго Кро́вь честну́ю за челове́ческое избавле́ние.

Не укосне́вши благода́ть на тебе́, чудеса́ содева́ющи, де́моном го́рьким предаде́ го́рько и безбо́жно умертви́вшия тя́, всеблаже́нне му́чениче Христо́в свяще́ннейший.

Богоро́дичен: Дарова́ний Твои́х струи́, и исто́чницы исцеле́ний, и Боже́ственнаго бога́тства раздая́ния подава́ются от живонача́льныя дла́ни, Богоневе́сто, ро́ждшагося от Твоея́ утро́бы Вседержи́теля.

Пе́снь 5.

Ирмо́с: Ужасо́шася вся́ческая о Боже́ственней сла́ве Твое́й, Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая.

Ума́ превосхо́дит твоея́ благода́ти постиже́ние, язы́к изрещи́ не мо́жет твои́х чуде́с безме́рныя пучи́ны, му́чениче, святи́телю и па́стырю, га́нгряном удобре́ние и свети́льниче всея́ тва́ри.

Уби́л еси́ зми́я, огню́ препосла́в, показа́л еси́ в тебе́ Боже́ственную благода́ть, богате́йше все́льшуюся и тя́ пред царе́м и все́ми просла́вльшую людьми́, свяще́ннейше.

Печа́ть и храни́теля сокро́вищу вообрази́, о́тче, ца́рь твою́ ико́ну, се́ю почита́я тя́ и я́ве провозвеща́я, я́ко приноси́мая че́сть на первообра́зное прехо́дит, Ипа́тие.

Вельми́ подвиза́ся, вельми́ и просла́вися, чудеса́ соверша́я священнообра́зно, неду́ги отгоня́, прогоня́я де́моны, упражня́я си́х наве́ты, побежда́я ересе́й губи́тельное зломы́слие.

Богоро́дичен: Му́дрость родила́ еси́ Бо́жию Ипоста́сную, Пречи́стая Де́во Богоро́дице, святы́я всему́дры показа́вшую, те́мже зло́бы мудреца́ паде́ шата́ние и лю́тая злоухищре́ния.

Пе́снь 6.

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Возше́л еси́ на высоту́ доброде́телей, Ипа́тие, и прибли́жился еси́, блаже́нне, к чисте́йшему исто́чнику Боже́ственных дарова́ний, и чуде́с пучи́ну источи́л еси́.

Вене́ц тебе́ ка́меней мета́ния бы́ша и к небе́сней высоте́ и степе́ни, о́тче, и ле́ствица, е́юже возше́д, и Бо́гу присво́ился еси́ ясне́йше.

Исцеле́ния твоя́ ра́ка источа́ет при́сно, благослове́ние же, о́тче, честны́я твоея́ пе́рсти прие́млемо, изве́стно, я́ко пра́х, истнева́ет зло́бу.

Зако́нне пострада́в и я́ко му́ченик почествова́лся еси́, во глубоча́йшей же ста́рости к твои́м преше́л еси́, ра́дуяся, отце́м и вене́ц твои́х трудо́в прия́л еси́ от Христа́ досто́йно.

Богоро́дичен: О, чудесе́, все́х чуде́с нове́йшаго! Я́ко Де́ва во утро́бе вся́ческая Содержа́щаго, неискусому́жно заче́нши, не тесновмести́.

Пе́снь 7.

Ирмо́с: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.

Уста́ ника́коже на тя́ отве́рзе по́лзаяй зми́й, раболе́пно же на о́гнь идя́ше, повину́яся, приснопа́мятне, стра́шному повеле́нию твоему́, оте́ц на́ших, — вопию́щу, — Бо́же, благослове́н еси́.

Крове́й проли́тием, е́же от сле́з совоку́пль, еди́но от обою́ пи́во, му́дре, соверши́л еси́, тебе́ помина́ему пи́щному, досточу́дне, пото́ку во ве́ки, му́чеником похвало́.

Во цве́тник честны́х боле́зней твои́х входя́ще, блаже́нне, благоуха́ем ду́шу, благово́ние тя́ Христо́во ве́дуще, и вопие́м, Ипа́тие: препе́тый Го́споди, Бо́же оте́ц на́ших, благослове́н еси́.

Богоро́дичен: Неискусобра́чная Чи́стая, без се́мене заче́ншая Отцу́ Единосу́щнаго и ро́ждшая пло́тию, Богоневе́сто, от святы́х крове́й Твои́х, моля́щи ны́не не преста́й спасти́ вся́.

Пе́снь 8.

Ирмо́с: О́троки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте дела́ и превозноси́те Его́ во вся́ ве́ки.

Гла́с тво́й, све́ту сраствори́вся и Боже́ственными осия́н светлостьми́, тму́ ересе́й, всему́дре, разори́ и ко дню́ напра́ви правосла́вия лю́ди, вопию́щия: Го́спода по́йте, дела́, и превозноси́те Его́ во вся́ ве́ки.

Красне́йший, я́ко тро́сть, я́влься, язы́к тво́й, всему́дре, написа́ зако́н благода́тию, вся́ на дска́х ве́тхия погла́ждши о́бразы, Ипа́тие, те́мже тя́ я́ко му́дра кни́жника песносло́вим во вся́ ве́ки.

Сто́лп о́гнен боже́ственный и к высоте́ небе́сней взе́млем, забра́ло непрекло́нное, стена́ неразори́ма, Це́ркве утвержде́ние, святи́телей степе́нь, му́чеников кра́сная ле́пота, чудоно́сный Ипа́тий да почте́н бу́дет.

Ви́дети сподо́бился еси́, Его́же жела́л еси́, разре́шшимся и́стины въявле́нием: еще́ бо и те́плей кро́ви ка́плющи, к жела́нию после́днему, му́чениче, восте́кл еси́, с му́ченическими и преподо́бных ли́ки боже́ственными лику́я во вся́ ве́ки.

Богоро́дичен: Мно́гими содержи́маго беда́ми и молво́ю греха́ бе́дствуемаго, к безво́лненному стремле́нию тишины́ мя́ Ду́ха, Богороди́тельнице Чи́стая, Влады́чице, ны́не наста́ви, приста́нище бо еси́ христиа́н, те́мже Тя́ пое́м во вся́ ве́ки.

Пе́снь 9.

Ирмо́с: Е́ва у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Я́ко ши́пок, я́ко кри́н свяще́нный сладково́нен, святи́телю, я́ко кипари́с, я́ко ми́ро Боже́ственно и благово́нно, ра́ка твоя́ благово́нствует чудесы́, злосмра́дныя неду́ги отгоня́щи, священному́чениче всече́стне.

Собесе́дник яви́лся еси́ проро́ков, му́чеников же свяще́нных, кро́вию уже́ до́бре сконча́вшихся, святы́х и преподо́бных равностоя́телен и все́х пра́ведных соприча́стник, су́щих от ве́ка, досточу́дне.

Па́мять твоя́ дне́сь на́м возсия́ светле́йши со́лнца, све́том невеще́ственным сердца́ на́ша просвеща́ющая, ве́рою тя́ в не́й блажа́щих, Ипа́тие, и моле́бно восхваля́ющих тя́.

Све́том твои́м озари́ на́ша, Ипа́тие, помышле́ния, соверша́ющих твою́ па́мять боже́ственную и светоно́сную, и изба́ви огня́, и му́ки, и вся́каго искуше́ния мольба́ми твои́ми благоче́стно тя́ блажа́щия.

Богоро́дичен: Возвы́си благода́ть Твою́, Чи́стая, возвели́чи мольбу́ и приведи́ чи́ны а́нгельския Влады́це, апо́стол же и проро́к ли́ки и вся́ пра́ведники с му́ченики, я́ко да спасе́мся, чту́щии Тя́.

Пѣ́снь а҃.

І҆рмо́съ: Трїста́ты крѣ̑пкїѧ, рожде́йсѧ ѿ дв҃ы, безстра́стїѧ во глꙋбинѣ̀ дꙋшѝ трича́стное потопѝ, молю́сѧ, да тебѣ̀, ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ побѣ́дное воспою̀ пѣ́нїе.

Бжⷭ҇твеннаго страда́льца, мꙋ́драго свѧти́телѧ, чꙋде́съ и҆сто́чника, па́стырѧ до́браго, цр҃кве ᲂу҆твержде́нїе, пѣ́сньми велегла́снѡ, ꙗ҆́кѡ свѣти́льника всемі́рнаго, всѝ восхва́лимъ ра́дꙋющесѧ.

Бжⷭ҇твеннаѧ рѣка̀, наводни́вшаѧ, преблаже́нне, чи́стꙋю твою̀ дꙋ́шꙋ, и҆сточѝ на́мъ пречи̑сты во́ды, всемꙋ́дре, мно́гихъ чꙋде́съ, то́ки и҆зсꙋша́ющыѧ мꙋ́тныхъ страсте́й, ѵ҆па́тїе.

Оу҆мертви́въ плотскі̑ѧ сла̑сти воздержа́нїемъ, жи́знь и҆́стиннꙋю хрⷭ҇та̀, на́съ ра́ди ᲂу҆ме́рша, ѵ҆па́тїе, и҆мѣ́лъ є҆сѝ внꙋ́трь въ дꙋшѝ твое́й живꙋ́ща, и҆ всѧ̑ твоѧ̑ къ немꙋ̀ шє́ствїѧ направлѧ́юща.

Се́рдце и҆ дꙋ́шꙋ трⷪ҇цы содѣ́лалъ є҆сѝ нескве́рненъ хра́мъ, хра́мы же сщ҃є́нныѧ гдⷭ҇ꙋ въ хвалꙋ̀, преподо́бне сщ҃енномꙋ́чениче, созда́лъ є҆сѝ, спаси́теленъ бы́въ прави́тель ста́дꙋ твоемꙋ̀.

Бг҃оро́диченъ: Сп҃са и҆ бг҃а ѿ чⷭ҇тыхъ твои́хъ крове́й воплоти́ла є҆сѝ, чⷭ҇таѧ, показа́вшаго на́мъ мꙋ́драго ст҃и́телѧ своего̀, пречⷭ҇таѧ, спаси́тельна и҆ те́пла застꙋ́пника, чꙋ́днаго вои́стиннꙋ ѵ҆па́тїа.

Пѣ́снь г҃.

І҆рмо́съ: Не мꙋ́дростїю и҆ си́лою, и҆ бога́тствомъ, хва́лимсѧ, но тобо́ю, ѻ҆́ч҃ею ѵ҆поста́сною мꙋ́дростїю, хрⷭ҇тѐ: нѣ́сть бо свѧ́тъ, па́че тебє̀, чл҃вѣколю́бче.

Всѣ́мъ се́рдцемъ ко и҆сто́чникꙋ до́брыхъ ѿлꙋчи́лсѧ є҆сѝ, и҆ ѿтꙋ́дꙋ свѣ́тлѡ богатѣ́йшими сїѧ́ѧ, ѻ҆́ч҃е свѧще́нне, бжⷭ҇твенными свѣтлостьмѝ.

Закѡ́ны бж҃е́ственными ѡ҆гражде́нъ, беззако́нныхъ собо́рище си́лою, ѻ҆́ч҃е, бж҃е́ственною и҆стреби́лъ є҆сѝ є҆ресе́й, спаса́ѧ ста́до твоѐ, ѻ҆́ч҃е ѵ҆па́тїе.

Ѿ вы́шнїѧ пресвѣ́тлыѧ свѣщѝ дх҃а просвѣща́емь, мꙋ́дре, но́щїю преходѧ́щымъ, свѣщы́ тѧ ꙗ҆ви́ша ѿ воды̀ ѡ҆зарѧ́юще.

Ѻ҆ц҃є́въ бжⷭ҇твенныхъ ли́къ соисполнѧ́ѧ блаже́нный, є҆го́же собра̀ хрⷭ҇то́съ, собо́ра пе́рвагѡ, блаже́нне, ꙗ҆ви́лсѧ є҆сѝ, сдавлѧ́ѧ пребезꙋ́мнаго а҆́рїа.

Бг҃оро́диченъ: И҆зба́ви мѧ̀ всѧ́кагѡ прило́га сопроти́внагѡ ѕмїи́на, мт҃и дв҃о чⷭ҇таѧ, и҆ се́рдце моѐ просвѣтѝ, вѣ́рою тѧ̀ сла́вѧщаго всенепоро́чнꙋю.

Сѣда́ленъ, гла́съ а҃.

Возсїѧ́лъ є҆сѝ въ мі́рѣ, свѧти́телю ѵ҆па́тїе, чꙋдесы̀ просвѣща́ѧ вѣ́рнѡ приходѧ́щыѧ къ тебѣ̀, пострада́въ же кро́вїю, мꙋ́дре, мно́жае присво́илсѧ є҆сѝ хрⷭ҇тꙋ̀, и҆ ликꙋ́еши со а҆́гг҃лы на нб҃сѣ́хъ, ѡ҆ на́съ молѧ́сѧ. Сла́ва ᲂу҆крѣ́пльшемꙋ тѧ̀ бг҃ꙋ, сла́ва вѣнча́вшемꙋ тѧ̀, сла́ва дѣ́ющемꙋ тобо́ю всѣ̑мъ и҆сцѣлє́нїѧ.

Бг҃оро́диченъ: Рꙋ́цѣ твоѝ бж҃е́ственнїи, и҆́миже созда́телѧ понесла̀ є҆сѝ, дв҃о прест҃а́ѧ, вопло́щшагосѧ благосты́нею, просте́рши, ᲂу҆молѝ є҆го̀, и҆зба́вити ны̀ ѿ и҆скꙋше́нїй, и҆ страсте́й, и҆ бѣ́дъ хва́лѧщыѧ тѧ̀ любо́вїю, и҆ вопїю́щыѧ: сла́ва все́льшемꙋсѧ въ тѧ̀: сла́ва проше́дшемꙋ и҆зъ тебє̀: сла́ва и҆зба́вльшемꙋ на́съ рождество́мъ твои́мъ.

Крⷭ҇тобг҃оро́диченъ: На крⷭ҇тѣ̀ тебѣ̀ распе́ншꙋсѧ ѿ беззако́нныхъ, и҆ ѿ вѡ́инъ, сп҃се, копїе́мъ ре́брѡмъ твои̑мъ прободє́ннымъ, пречⷭ҇таѧ рыда́ше го́рькѡ, и҆ мно́гомꙋ твоемꙋ̀ и҆ стра́шномꙋ терпѣ́нїю ᲂу҆жаса́ющисѧ, вопїѧ́ше: сла́ва къ человѣ́кѡмъ твое́й любвѝ: сла́ва твое́й бла́гости: сла́ва сме́ртїю твое́ю человѣ́ки ѡ҆безсме́ртившемꙋ.

Пѣ́снь д҃.

І҆рмо́съ: Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.

Неле́стно сло́во и҆ ᲂу҆че́нїе и҆́скренно соблюда́ѧ, проповѣ́далъ є҆сѝ сло́во ѻ҆ц҃ꙋ̀ соприсносꙋ́щно, а҆рїомꙋ́дреннꙋю пре́лесть побѣди́въ, сщ҃енномꙋ́чениче, чꙋдотво́рче досточꙋ́дне.

Горча́йшыѧ ѿ го́ръ текꙋ́щыѧ во́ды, зна́менїемъ то́кмѡ цѣльбонѡ́сны показа́лъ є҆сѝ, во́дꙋ жи́вꙋ стѧжа́въ въ се́рдцы твое́мъ, въ вѣ́чнꙋю, ѻ҆́ч҃е, жи́знь текꙋ́щꙋю.

Свѧще́нствовавъ преподо́бнѡ, и҆ зако́ннѣ пострада́въ, свѧще́нство показа́лъ є҆сѝ свѣ́тльшее, кровьмѝ и҆злїѧ́нными, за любо́вь и҆стощи́вшагѡ кро́вь честнꙋ́ю, за человѣ́ческое и҆збавле́нїе.

Не ᲂу҆коснѣ́вши благода́ть на тебѣ̀, чꙋдеса̀ содѣва́ющи, де́мѡнѡмъ гѡ́рькимъ предадѐ го́рькѡ и҆ безбо́жнѡ ᲂу҆мертви́вшыѧ тѧ̀, всеблаже́нне, мꙋ́чениче хрⷭ҇то́въ свѧще́ннѣйшїй.

Бг҃оро́диченъ: Дарова́нїй твои́хъ стрꙋи̑, и҆ и҆сто́чницы и҆сцѣле́нїй, и҆ бжⷭ҇твеннагѡ бога́тства раздаѧ̑нїѧ подава́ютсѧ ѿ живонача́льныѧ дла́ни, бг҃оневѣ́сто, ро́ждшагѡсѧ ѿ твоеѧ̀ ᲂу҆тро́бы вседержи́телѧ.

Пѣ́снь є҃.

І҆рмо́съ: Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

Оу҆ма̀ превосхо́дитъ твоеѧ̀ благода́ти постиже́нїе, ѧ҆зы́къ и҆зрещѝ не мо́жетъ твои́хъ чꙋде́съ безмѣ́рныѧ пꙋчи́ны, мꙋ́чениче ст҃и́телю и҆ па́стырю, га́ггрѧнѡмъ ᲂу҆добре́нїе, и҆ свѣти́льниче всеѧ̀ тва́ри.

Оу҆би́лъ є҆сѝ ѕмі́ѧ, ѻ҆гню̀ препосла́въ, показа́лъ є҆сѝ въ тебѣ̀ бжⷭ҇твеннꙋю благода́ть, богатѣ́йше все́льшꙋюсѧ, и҆ тѧ̀ предъ царе́мъ и҆ всѣ́ми просла́вльшꙋю людьмѝ, свѧще́ннѣйше.

Печа́ть и҆ храни́телѧ сокро́вищꙋ, воѡбразѝ, ѻ҆́ч҃е, ца́рь твою̀ і҆кѡ́нꙋ, се́ю почита́ѧ тѧ̀, и҆ ꙗ҆́вѣ провозвѣща́ѧ, ꙗ҆́кѡ приноси́маѧ че́сть на первоѻбра́зное прехо́дитъ, ѵ҆па́тїе.

Вельмѝ подвиза́сѧ, вельмѝ и҆ просла́висѧ, чꙋдеса̀ соверша́ѧ свѧщенноѻбра́знѡ, недꙋ́ги ѿгонѧ̀, прогонѧ́ѧ де́мѡны, ᲂу҆пражнѧ́ѧ си́хъ навѣ́ты, побѣжда́ѧ є҆ресе́й гꙋби́тельное ѕломы́слїе.

Бг҃оро́диченъ: Мꙋ́дрость родила̀ є҆сѝ бж҃їю ѵ҆поста́снꙋю, пречⷭ҇таѧ дв҃о бцⷣе, ст҃ы̑ѧ всемꙋ̑дры показа́вшꙋю: тѣ́мже ѕло́бы мꙋдреца̀ падѐ шата́нїе, и҆ лю̑таѧ ѕлоꙋхищрє́нїѧ.

Пѣ́снь ѕ҃.

І҆рмо́съ: Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.

Возше́лъ є҆сѝ на высотꙋ̀ добродѣ́телей, ѵ҆па́тїе, и҆ прибли́жилсѧ є҆сѝ, блаже́нне, къ чистѣ́йшемꙋ и҆сто́чникꙋ бжⷭ҇твенныхъ дарова́нїй, и҆ чꙋде́съ пꙋчи́нꙋ и҆сточи́лъ є҆сѝ.

Вѣне́цъ тебѣ̀ ка́меней мета̑нїѧ бы́ша, и҆ къ небе́снѣй высотѣ̀, и҆ степє́ни, ѻ҆́ч҃е, и҆ лѣ́ствица, є҆́юже возше́дъ, и҆ бг҃ꙋ присво́илсѧ є҆сѝ ꙗ҆снѣ́йше.

И҆сцѣлє́нїѧ твоѧ̀ ра́ка и҆сточа́етъ при́снѡ, благослове́нїе же, ѻ҆́ч҃е, честны́ѧ твоеѧ̀ пе́рсти прїе́млемо, и҆звѣ́стнѡ ꙗ҆́кѡ пра́хъ и҆стнѣва́етъ ѕло́бꙋ.

Зако́ннѣ пострада́въ, и҆ ꙗ҆́кѡ мꙋ́ченикъ почествова́лсѧ є҆сѝ, во глꙋбоча́йшей же ста́рости къ твои̑мъ преше́лъ є҆сѝ ра́дꙋѧсѧ ѻ҆тцє́мъ, и҆ вѣне́цъ твои́хъ трꙋдѡ́въ прїѧ́лъ є҆сѝ ѿ хрⷭ҇та̀ досто́йнѡ.

Бг҃оро́диченъ: Ѽ чꙋдесѐ всѣ́хъ чꙋде́съ новѣ́йшагѡ! ꙗ҆́кѡ дв҃а во ᲂу҆тро́бѣ всѧ́чєскаѧ содержа́щаго, неискꙋсомꙋ́жнѡ заче́нши, не тѣсновмѣстѝ.

Пѣ́снь з҃.

І҆рмо́съ: Спасы́й во ѻ҆гнѝ а҆враа̑мскїѧ твоѧ̑ ѻ҆́троки, и҆ халдє́и ᲂу҆би́въ, ꙗ҆̀же пра́вда пра́веднѡ ᲂу҆ловлѧ́ше, препѣ́тый гдⷭ҇и, бж҃е ѻ҆тє́цъ на́шихъ, бл҃гослове́нъ є҆сѝ.

Оу҆ста̀ ника́коже на тѧ̀ ѿве́рзе по́лзаѧй ѕмі́й, раболѣ́пнѡ же на ѻ҆́гнь и҆дѧ́ше, повинꙋ́ѧсѧ, приснопа́мѧтне, стра́шномꙋ повелѣ́нїю твоемꙋ̀, ѻ҆тє́цъ на́шихъ, вопїю́щꙋ, бж҃е, благослове́нъ є҆сѝ.

Крове́й проли́тїемъ, є҆́же ѿ сле́зъ совокꙋ́пль, є҆ди́но ѿ ѻ҆бою̀ пи́во, мꙋ́дре, соверши́лъ є҆сѝ, тебѣ̀ помина́емꙋ пи́щномꙋ, досточꙋ́дне, пото́кꙋ во вѣ́ки, мꙋ́ченикѡмъ похвало̀.

Во цвѣ́тникъ честны́хъ болѣ́зней твои́хъ входѧ́ще, блаже́нне, благоꙋха́емъ дꙋ́шꙋ, благово́нїе тѧ̀ хрⷭ҇то́во вѣ́дꙋще, и҆ вопїе́мъ, ѵ҆па́тїе, препѣ́тый гдⷭ҇и, бж҃е ѻ҆тє́цъ на́шихъ, благослове́нъ є҆сѝ.

Бг҃оро́диченъ: Неискꙋсобра́чнаѧ чⷭ҇таѧ, безъ сѣ́мене заче́ншаѧ ѻ҆ц҃ꙋ̀ є҆диносꙋ́щнаго, и҆ ро́ждшаѧ пло́тїю, бг҃оневѣ́сто, ѿ ст҃ы́хъ крове́й твои́хъ, молѧ́щи ны́нѣ не преста́й, спастѝ всѧ̑.

Пѣ́снь и҃.

І҆рмо́съ: Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

Гла́съ тво́й свѣ́тꙋ сраствори́всѧ, и҆ бжⷭ҇твенными ѡ҆сїѧ́нъ свѣтлостьмѝ, тмꙋ̀ є҆ресе́й, всемꙋ́дре, разорѝ, и҆ ко дню̀ напра́ви правосла́вїѧ лю́ди, вопїю́щыѧ: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

Краснѣ́йшїй, ꙗ҆́кѡ тро́сть ꙗ҆́вльсѧ ѧ҆зы́къ тво́й, всемꙋ́дре, написа̀ зако́нъ благода́тїю, всѧ̑ на дска́хъ вє́тхїѧ погла́ждши ѻ҆́бразы, ѵ҆па́тїе. Тѣ́мже тѧ̀ ꙗ҆́кѡ мꙋ́дра кни́жника, пѣсносло́вимъ во всѧ̑ вѣ́ки.

Сто́лпъ ѻ҆́гненъ бжⷭ҇твенный, и҆ къ высотѣ̀ небе́снѣй взе́млемъ, забра́ло непрекло́нное, стѣна̀ неразори́ма, це́ркве ᲂу҆твержде́нїе, свѧти́телей степе́нь, мꙋ́ченикѡвъ кра́снаѧ лѣ́пота, чꙋдоно́сный ѵ҆па́тїй да почте́нъ бꙋ́детъ.

Ви́дѣти сподо́билсѧ є҆сѝ, є҆го́же жела́лъ є҆сѝ, разрѣ́шшымсѧ и҆́стины в̾ѧвле́нїємъ: є҆ще́ бо и҆ те́плѣй кро́ви ка́плющи, къ жела́нїю послѣ́днемꙋ, мꙋ́чениче, восте́клъ є҆сѝ, съ мꙋ́ченическими и҆ преподо́бныхъ ли̑ки бжⷭ҇твенными, ликꙋ́ѧ во всѧ̑ вѣ́ки.

Бг҃оро́диченъ: Мно́гими содержи́маго бѣда́ми, и҆ молво́ю грѣха̀ бѣ́дствꙋемаго, къ безво́лненномꙋ стремле́нїю тишины̀ мѧ̀ дх҃а, бг҃ороди́тельнице чⷭ҇таѧ влⷣчце, ны́нѣ наста́ви: приста́нище бо є҆сѝ хрⷭ҇тїа́нъ. тѣ́мже тѧ̀ пое́мъ во всѧ̑ вѣ́ки.

Пѣ́снь ѳ҃.

І҆рмо́съ: Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же, дв҃о бцⷣе, прозѧбе́нїемъ чревоноше́нїѧ, мі́рови бл҃гослове́нїе процвѣла̀ є҆сѝ. тѣ́мъ тѧ̀ всѝ велича́емъ.

Ꙗ҆́кѡ ши́покъ, ꙗ҆́кѡ крі́нъ сщ҃е́нный сладково́ненъ, ст҃и́телю: ꙗ҆́кѡ кѷпарі́съ, ꙗ҆́кѡ мѵ́ро бжⷭ҇твенно и҆ бл҃гово́нно, ра́ка твоѧ̀ бл҃гово́нствꙋетъ чꙋдесы̀, ѕлосмра̑дныѧ недꙋ́ги ѿгонѧ́щи, сщ҃енномꙋ́чениче всече́стне.

Собесѣ́дникъ ꙗ҆ви́лсѧ є҆сѝ прⷪ҇ро́кѡвъ, мꙋ́ченикѡвъ же сщ҃е́нныхъ, кро́вїю ᲂу҆жѐ до́брѣ сконча́вшихсѧ, ст҃ы́хъ и҆ преподо́бныхъ равностоѧ́теленъ, и҆ всѣ́хъ првⷣныхъ соприча́стникъ, сꙋ́щихъ ѿ вѣ́ка, досточꙋ́дне.

Па́мѧть твоѧ̀ дне́сь на́мъ возсїѧ̀ свѣтлѣ́йши со́лнца, свѣ́томъ невеще́ственнымъ сердца̀ на̑ша просвѣща́ющаѧ, вѣ́рою тѧ̀ въ не́й блажа́щихъ, ѵ҆па́тїе, и҆ моле́бнѡ восхвалѧ́ющихъ тѧ̀.

Свѣ́томъ твои́мъ ѡ҆зарѝ на̑ша, ѵ҆па́тїе, помышлє́нїѧ, соверша́ющихъ твою̀ па́мѧть бжⷭ҇твеннꙋю и҆ свѣтоно́снꙋю. и҆ и҆зба́ви ѻ҆гнѧ̀ и҆ мꙋ́ки, и҆ всѧ́кагѡ и҆скꙋше́нїѧ, мольба́ми твои́ми, благоче́стнѡ тѧ̀ блажа́щыѧ.

Бг҃оро́диченъ: Возвы́си бл҃года́ть твою̀, чⷭ҇таѧ, возвели́чи мольбꙋ̀, и҆ приведѝ чи́ны а҆́гг҃льскїѧ влⷣцѣ, а҆пⷭ҇лъ же и҆ прⷪ҇рѡ́къ ли́ки, и҆ всѧ̑ пра́ведники съ мꙋ́чєники, ꙗ҆́кѡ да спасе́мсѧ чтꙋ́щїи тѧ̀.

Свя­щен­но­му­че­ник Ипа­тий, епи­скоп Ган­гр­ский, был епи­ско­пом го­ро­да Ган­гры в Па­фла­го­нии (Ма­лая Азия). В 325 го­ду он при­ни­мал уча­стие в I Все­лен­ском Со­бо­ре в Ни­кее, на ко­то­ром бы­ла пре­да­на ана­фе­ме ересь Ария.

Ко­гда в 326 го­ду свя­ти­тель Ипа­тий воз­вра­щал­ся из Кон­стан­ти­но­по­ля в Ган­гры, в пу­стын­ном ме­сте на него на­па­ли по­сле­до­ва­те­ли рас­коль­ни­ков Но­ва­та и Фе­ли­цис­си­ма. Ере­ти­ки из­ра­ни­ли его ме­ча­ми и ко­лья­ми и сбро­си­ли с вы­со­ко­го бе­ре­га в бо­ло­то. По­доб­но пер­во­му­че­ни­ку ар­хи­ди­а­ко­ну Сте­фа­ну, свя­ти­тель Ипа­тий мо­лил­ся за уби­вав­ших его. Од­на жен­щи­на-ари­ан­ка уда­ри­ла свя­ти­те­ля кам­нем по го­ло­ве, и он скон­чал­ся. Убий­цы скры­ли те­ло му­че­ни­ка в пе­ще­ре, где его об­на­ру­жил кре­стья­нин, хра­нив­ший там со­ло­му. Опо­знав те­ло епи­ско­па, он по­спе­шил со­об­щить об этом в го­род, и жи­те­ли Гангр с че­стью по­греб­ли мо­щи сво­е­го лю­би­мо­го ар­хи­пас­ты­ря.

По­сле смер­ти мо­щи свя­ти­те­ля Ипа­тия про­сла­ви­лись мно­го­чис­лен­ны­ми чу­до­тво­ре­ни­я­ми, в осо­бен­но­сти из­гна­ни­ем бе­сов и ис­це­ле­ни­ем бо­лез­ней.

С дав­них пор свя­щен­но­му­че­ник Ипа­тий осо­бо чтил­ся в Рус­ской зем­ле. Так, в 1330 го­ду в Ко­стро­ме был по­стро­ен Ипа­тьев­ский мо­на­стырь, на ме­сте яв­ле­ния Бо­жи­ей Ма­те­ри с Пред­веч­ным Мла­ден­цем и пред­сто­я­щи­ми свя­ты­ми – апо­сто­лом Филип­пом и свя­щен­но­му­че­ни­ком Ипа­ти­ем, епи­ско­пом Ган­гр­ским. Этот мо­на­стырь впо­след­ствии за­ни­мал зна­чи­тель­ное ме­сто в ду­хов­ной и об­ще­ствен­ной жиз­ни на­ше­го на­ро­да, осо­бен­но в го­ды Смут­но­го вре­ме­ни. Древ­ней­шие спис­ки жи­тия свя­щен­но­му­че­ни­ка Ипа­тия бы­ли ши­ро­ко рас­про­стра­не­ны в рус­ской пись­мен­но­сти, и один из них во­шел в со­став Че­ти­их Ми­ней мит­ро­по­ли­та Ма­ка­рия (1542–1564). В этом жи­тии со­хра­ни­лась за­пись о яв­ле­нии Спа­си­те­ля свя­ти­те­лю Ипа­тию на­ка­нуне му­че­ни­че­ской кон­чи­ны. По­чи­та­е­мо­му свя­то­му со­став­ля­лись мо­лит­вы, по­хваль­ные сло­ва и по­уче­ния в день его па­мя­ти. Бла­го­го­вей­ное по­чи­та­ние свя­ти­те­ля Ипа­тия вы­ра­зи­лось и в ли­тур­ги­че­ском твор­че­стве рус­ских ав­то­ров. В XIX ве­ке бы­ла на­пи­са­на но­вая служ­ба свя­щен­но­му­че­ни­ку Ипа­тию, от­ли­ча­ю­ща­я­ся от служ­бы, на­пи­сан­ной пре­по­доб­ным Иоси­фом Сту­ди­том, со­дер­жа­щей­ся в мар­тов­ской Ми­нее.

См. так­же: "Па­мять свя­то­го свя­щен­но­му­че­ни­ка Ипа­тия чу­до­твор­ца, епи­ско­па Ган­гр­ско­го" в из­ло­же­нии свт. Ди­мит­рия Ро­стов­ско­го.