Канон священномученику Марку, епископу Арефусийскому, и другим мученикам

Припев: Святи́и му́ченицы, моли́те Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 11 апреля (29 марта ст. ст.)

Глас 8.

Пе́снь 1.

Ирмо́с: Посе́ченый несеко́маго пресече́, и ви́де со́лнце зе́млю, ю́же не ви́де, лю́таго врага́ вода́ потопи́, и непроходи́мое про́йде Изра́иль. Пе́снь же воспева́шеся: Го́сподеви пои́м, сла́вно бо просла́вися.

Со а́нгелы Бо́гу предстоя́ще, Царю́ все́х, му́ченицы всеблаже́ннии, проси́те на́м прегреше́ний избавле́ния, любо́вию блажа́щим вы́ и во хвале́нии пою́щим: Го́сподеви воспои́м, сла́вно бо просла́вися.

Архиере́я Ду́х Святы́й тя́ предста́ви, Ма́рко, оби́льны па́ствити лю́ди во вся́ком преподо́бии догма́тов па́лицею слове́сною. С ни́ми же, блаже́нне, пе́л еси́: Го́сподеви воспои́м, сла́вно бо просла́вися.

Струя́ми крове́й пла́мень многобо́жия угаси́вше, му́дрии, ра́дующеся, пострада́сте, е́ллинския мудрецы́ коне́чно посра́мльше, и ны́не с му́ченики Христу́ предстоите́, зову́ще: Го́сподеви воспои́м, сла́вно бо просла́вися.

Богоро́дичен: Из Отрокови́цы нетле́нныя Бо́г воплоща́ется, Его́же безпло́тных ли́цы, трепе́щуще, сла́вят, я́ко все́х Творца́ и Еди́наго непреме́ннаго, и челове́цы на земли́ всегда́ пою́т, воспева́юще: Го́сподеви пое́м, сла́вно бо просла́вися.

Пе́снь 3.

Ирмо́с: Стра́х Тво́й, Го́споди, всади́ в сердца́ ра́б Твои́х, и бу́ди на́м утвержде́ние, Тя́ во и́стине призыва́ющих.

Не прине́сл еси́ че́сти безслове́сным истука́нным, всеблаже́нне, но претерпе́л еси́ крепча́йше му́ки многообра́зныя, Ма́рко доблему́дренне.

Ума́ до́блестию претерпе́л еси́, пресла́вне Кири́лле, наруга́ния же и му́ки муже́й пребеззако́ннующих, му́чениче страстоте́рпче.

Обнажа́еми, му́ченицы многострада́льнии, и ра́нами сокруша́еми, непрело́жни пребы́сте, па́че Христо́вы любве́ ничто́же предпочита́юще.

Богоро́дичен: Из Тебе́ возсия́, Всенепоро́чная, озаря́яй подсо́лнечную пресла́вными осия́нии Пра́вды Со́лнце, Де́во.

Седа́лен:

Просве́щшеся благода́тию и́стинною, земны́я концы́ све́тло наставля́ете благоче́стно, священному́ченицы сла́внии. Те́мже ве́рою ва́с ублажа́ем.

Богоро́дичен: Пречи́стеи ру́це Твои́, Де́во Ма́ти, просте́рши, покры́й упова́ющия на Тя́ и Сы́ну Твоему́ зову́щия: все́м пода́ждь, Христе́, ми́лости Твоя́.

Крестобогоро́дичен: На дре́ве ви́дящи воздви́жена Сы́на Твоего́, Пречи́стая, утро́бою ма́тернею растерза́ема, жа́лостно взыва́ла еси́: увы́ Мне́, ка́ко заше́л еси́, Све́те Мо́й безле́тный?

Пе́снь 4.

Ирмо́с: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися, богови́дно усмотри́, и со стра́хом славосло́вяше си́лу Твою́.

Исте́кшая на зе́млю кро́вь твоя́, богому́дре, сию́ пои́стинне освяти́ досто́йно и ду́ши напои́ благоче́ствующих, к ре́вности боже́ственней воздвиза́ющи.

Заре́ю мы́сленною я́ве просвеща́еми, но́щь злу́ю безбо́жнаго злосла́вия отгна́сте, му́ченицы, пресла́вно, Ма́рко и Кири́лле всеблаже́ннии.

Исцели́ на́ша неду́ги, Благоде́телю, Ма́рка моли́твами и Кири́лла боже́ственнаго и ми́лости Твоя́, Благоутро́бне, на вся́ воспева́ющия Тя́ низпосли́.

Си́лою Боже́ственною и благода́тию сло́ва, му́ченицы Христо́вы, хра́мы и́дольския низлага́юще, Ду́ха Свята́го хра́м ве́рою показа́стеся.

Богоро́дичен: Яви́лася еси́ Бо́жие простра́нное вмести́лище, престо́л высо́к и две́рь, Богоро́дице, е́юже про́йде неизрече́нным рождество́м, от тли́ ны́ воззыва́я.

Пе́снь 5.

Ирмо́с: От но́щи неве́дения Богове́дением просвети́вый концы́, просвети́ мя у́тром человеколю́бия Твоего́, Го́споди.

Мироявле́ннии свети́льницы, священному́ченицы боже́ственнии бы́вше, вся́ просвеща́ете Боже́ственными светлостьми́ Ду́ха.

Усмотря́я, всеблаже́нне, воздая́ния боже́ственная, терпе́л еси́, Ма́рко, нестерпи́мыя ра́ны и боле́зни крепча́йше.

Священноде́тель сы́й и, безкро́вныя же́ртвы принося́ Христу́, же́ртву, блаже́нне, благово́нную — тебе́ сама́го — Го́сподеви прине́сл еси́.

Богоро́дичен: Рождество́м стра́нным Царя́ все́х родила́ еси́, Пречи́стая Богоро́дице, на благодея́ние тва́ри.

Пе́снь 6.

Ирмо́с: Ио́ну в ки́те, Го́споди, еди́наго всели́л еси́, мене́ же свя́занного мре́жами вра́жиими, я́ко от тли́ о́наго, спаси́.

Претерпе́в му́ки многоплете́нныя и сме́рть хода́тайственную, богому́дре, в сла́ве присносу́щней лику́еши на небесе́х, о на́с, Кири́лле, моля́ся.

Глаго́л Бо́жий жи́в в се́рдцы твое́м я́ко име́я, Ма́рко сла́вне, к ве́ре Боже́ственней привле́кл еси́ лю́ди и наро́ды, му́дре, и благосла́вно тече́ние сконча́л еси́.

Священноде́теле и же́ртвы соверше́ны, Го́сподеви принесо́стеся, му́ками всесоже́гшеся, и в вы́шних све́тли Царю́ все́х предстоите́.

Богоро́дичен: Разреше́ние на́м долго́в испроси́ и жития́ исправле́ние, Де́во, песносло́вящим вели́чия Твоя́ и благочести́вым ра́зумом Тя́ сла́вящим.

Пе́снь 7.

Ирмо́с: От Иуде́и доше́дше, о́троцы в Вавило́не иногда́, ве́рою тро́ическою пла́мень пе́щный попра́ша, пою́ще: отце́в Бо́же, благослове́н еси́.

Просве́щшеся заре́ю Святы́я Тро́ицы, богоблаже́ннии, тму́ пре́лести изгна́сте и сла́ву улучи́сте, песнопою́ще: оте́ц на́ших Бо́же, благослове́н еси́.

Ни́жняя оста́вльшии и вы́шняя насле́довавшии, богоно́сный Ма́рко и Кири́лл боже́ственный да почту́тся, песнопою́ще: оте́ц на́ших Бо́же, благослове́н еси́.

Дрема́ние нераде́ния во вре́мя подвиго́в оттря́сше, соверши́сте тече́ние и собо́ром страстоте́рпец, песнопою́ще, совокупи́стеся: оте́ц на́ших Бо́же, благослове́н еси́.

Богоро́дичен: Из Тебе́ спасе́ние па́че ума́ же и сло́ва, Де́во, возсия́ во тме́ седя́щим сме́ртней и до́ле су́щия небе́сны соде́ла, вопию́щия: оте́ц на́ших Бо́же, благослове́н еси́.

Пе́снь 8.

Ирмо́с: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те, вся́ дела́ Госпо́дня, Го́спода.

Победи́тели мучи́теля, свере́по судя́щаго, показа́вшеся, нетле́нныя венцы́, му́ченицы, прия́сте, вопию́ще: благослови́те, вся́ дела́ Госпо́дня, Го́спода.

Щито́м любве́, страда́льцы, и ве́ры вооруже́ни, вра́жия ополче́ния мече́м посеко́сте боже́ственныя до́блести, вопию́ще: благослови́те, вся́ дела́ Госпо́дня, Го́спода.

На земли́ пострада́вше, в вы́шних, святи́и, пра́вды вене́ц от руки́ Христо́вы прия́сте, вопию́ще: благослови́те, вся́ дела́ Госпо́дня, Го́спода.

Тро́ичен: Я́ко Еди́ницу Естество́м, я́ко Тро́ицу Тя́ честву́ю начерта́ньми, О́тче Вседержи́телю, и Сы́не, и Ду́ше Святы́й, взыва́я: благослови́те, вся́ дела́ Госпо́дня, Го́спода.

Богоро́дичен: Ста́мну Тя́ ма́нны жи́зненныя пропове́дуем, Благослове́нная, трапе́зу, и же́зл, и кади́льницу, златы́й све́щник, го́ру же и две́рь, купину́ неопали́му, престо́л Вы́шняго и ми́ра спасе́ние.

Пе́снь 9.

Ирмо́с: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Стопа́м, му́ченицы, Христа́, пострада́вшаго и стра́сти умертви́вшаго, после́довавше, мно́гих ра́н искуше́ние прия́сте, и, обличи́вше враго́в безбо́жных служе́ния, возвели́чистеся, и а́нгелом я́ве уподо́бистеся.

Яви́стеся у́глие о́гненно, приобщи́вшеся Бо́гу, всеблаже́ннии, и попали́сте многобо́жия ве́щь благода́тию, и к Све́ту у́мному, ра́дующеся, преидо́сте, богоблаже́ннии, озаря́юще на́ша разуме́ния.

Поста́вльше на ка́мени мы́сленнем ду́ш ва́ших стопы́, всехва́льнии, не поколеба́стеся мно́гих му́к приложе́ньми. Те́мже утвержда́йте на́ша при́сно мы́сли, кова́рствы вра́жиими коле́блемыя, добропобе́днии му́ченицы.

Взя́стеся к пресве́тлому свиде́тельства, страстоте́рпцы, краегра́дию, к высоте́ вели́цей, и Ца́рство Бо́жие непоколеби́мое сподо́бистеся прия́ти, Ма́рко свяще́ннейший, Кири́лле сла́вне, его́же получи́ти все́м на́м моли́теся.

Богоро́дичен: Сия́нием Твои́м, Отрокови́це, мы́сленным просвети́ на́ша мы́сли, Богора́дованная, и сердца́, и мудрова́ния, я́ко да по стезя́м жи́зни пра́во ше́ствующе, ми́лость улучи́м, возвеща́юще при́сно хвалы́ Твоя́.

Пѣ́снь а҃.

І҆рмо́съ: Посѣ́ченный несѣко́маго пресѣчѐ, и҆ ви́дѣ со́лнце зе́млю, ю҆́же не ви́дѣ, лю́тагѡ врага̀ вода̀ потопѝ, и҆ непроходи́мое про́йде і҆и҃ль, пѣ́снь же воспѣва́шесѧ: гдⷭ҇еви пои́мъ, сла́внѡ бо просла́висѧ.

Со а҆́гг҃лы бг҃ꙋ предстоѧ́ще, цр҃ю̀ всѣ́хъ, мꙋ́чєницы всеблаже́ннїи, проси́те на́мъ прегрѣше́нїй и҆збавле́нїѧ, любо́вїю блажа́щымъ вы̀, и҆ во хвале́нїи пою́щымъ: гдⷭ҇еви воспои́мъ, сла́внѡ бо просла́висѧ.

А҆рхїере́а дх҃ъ ст҃ы́й тѧ̀ предста́ви, ма́рко, ѻ҆би̑льны па́ствити лю́ди, во всѧ́комъ преподо́бїи, догма́тѡвъ па́лицею слове́сною. съ ни́миже, блаже́нне, пѣ́лъ є҆сѝ: гдⷭ҇еви воспои́мъ: сла́внѡ бо просла́висѧ.

Стрꙋѧ́ми крове́й пла́мень многобо́жїѧ ᲂу҆гаси́вше, мꙋ́дрїи, ра́дꙋющесѧ пострада́сте, є҆́ллинскїѧ мꙋдрецы̀ коне́чнѡ посра́мльше, и҆ ны́нѣ съ мꙋ́чєники хрⷭ҇тꙋ̀ предстоитѐ зовꙋ́ще: гдⷭ҇еви воспои́мъ, сла́внѡ бо просла́висѧ.

Бг҃оро́диченъ: И҆зъ ѻ҆трокови́цы нетлѣ́нныѧ бг҃ъ воплоща́етсѧ, є҆го́же безпло́тныхъ ли́цы трепе́щꙋще сла́вѧтъ, ꙗ҆́кѡ всѣ́хъ творца̀, и҆ є҆ди́наго непремѣ́ннаго, и҆ человѣ́цы на землѝ всегда̀ пою́тъ воспѣва́юще: гдⷭ҇еви пое́мъ, сла́внѡ бо просла́висѧ.

Пѣ́снь г҃.

І҆рмо́съ: Стра́хъ тво́й, гдⷭ҇и, всадѝ въ сердца̀ ра̑бъ твои́хъ, и҆ бꙋ́ди на́мъ ᲂу҆твержде́нїе, тѧ̀ во и҆́стинѣ призыва́ющихъ.

Не прене́слъ є҆сѝ че́сти безсловє́снымъ и҆стꙋка̑ннымъ, всеблаже́нне, но претерпѣ́лъ є҆сѝ крѣпча́йше мꙋ̑ки многоѻбра̑зныѧ, ма́рко доблемꙋ́дренне.

Оу҆ма̀ до́блестїю претерпѣ́лъ є҆сѝ, пресла́вне кѷрі́лле, нарꙋга̑нїѧ же и҆ мꙋ̑ки, мꙋже́й пребеззако́ннꙋющихъ, мꙋ́чениче страстоте́рпче.

Ѡ҆бнажа́еми, мꙋ́чєницы многострада́льнїи, и҆ ра́нами сокрꙋша́еми, непрело́жни пребы́сте, па́че хрⷭ҇то́вы любвѐ ничто́же предпочита́юще.

Бг҃оро́диченъ: И҆зъ тебє̀ возсїѧ̀, всенепоро́чнаѧ, ѡ҆зарѧ́ѧй подсо́лнечнꙋю пресла́вными ѡ҆сїѧ̑нїи, пра́вды сл҃нце, дв҃о.

Сѣда́ленъ:

Просвѣ́щшесѧ благода́тїю и҆́стинною, земны̑ѧ концы̀ свѣ́тлѡ наставлѧ́ете благоче́стнѡ, сщ҃енномꙋ́ченицы сла́внїи. тѣ́мже вѣ́рою ва́съ ᲂу҆блажа́емъ.

Бг҃оро́диченъ: Пречи́стѣи рꙋ́цѣ твоѝ, дв҃омт҃и, просте́рши, покры́й ᲂу҆пова́ющыѧ на тѧ̀, и҆ сн҃ꙋ твоемꙋ̀ зовꙋ́щыѧ: всѣ̑мъ пода́ждь, хрⷭ҇тѐ, ми́лѡсти твоѧ̑.

Крⷭ҇тобг҃оро́диченъ: На дре́вѣ ви́дѧщи воздви́жена сн҃а твоего̀, пречⷭ҇таѧ, ᲂу҆тро́бою мт҃рнею растерза́ема, жа́лостнѡ взыва́ла є҆сѝ: ᲂу҆вы̀ мнѣ̀, ка́кѡ заше́лъ є҆сѝ, свѣ́те мо́й безлѣ́тный;

Пѣ́снь д҃.

І҆рмо́съ: И҆зъ горы̀ приѡсѣне́нныѧ, сло́ве, проро́къ, є҆ди́ныѧ бцⷣы, хотѧ́ща воплоти́тисѧ бг҃ови́днѡ ᲂу҆смотрѝ, и҆ со стра́хомъ славосло́вѧше си́лꙋ твою̀.

И҆сте́кшаѧ на зе́млю кро́вь твоѧ̀, бг҃омꙋ́дре, сїю̀ пои́стиннѣ ѡ҆свѧтѝ досто́йнѡ: и҆ дꙋ́шы напоѝ благочествꙋ́ющихъ, къ ре́вности бжⷭ҇твеннѣй воздвиза́ющи.

Заре́ю мы́сленною ꙗ҆́вѣ просвѣща́еми, но́щь ѕлꙋ́ю безбо́жнагѡ ѕлосла́вїѧ ѿгна́сте, мꙋ́чєницы, пресла́внѡ, ма́рко и҆ кѷрі́лле, всеблаже́ннїи.

И҆сцѣлѝ на́шѧ недꙋ́ги, благодѣ́телю, ма́рка моли́твами и҆ кѷрі́лла бжⷭ҇твеннагѡ, и҆ ми́лѡсти твоѧ̑, благоꙋтро́бне, на всѧ̑ воспѣва́ющыѧ тѧ̀ низпослѝ.

Си́лою бжⷭ҇твенною и҆ благода́тїю сло́ва, мꙋ́чєницы хрⷭ҇тѡ́вы, хра́мы і҆́дѡльскїѧ низлага́юще, дх҃а ст҃а́гѡ хра́мъ вѣ́рою показа́стесѧ.

Бг҃оро́диченъ: Ꙗ҆ви́ласѧ є҆сѝ бж҃їе простра́нное вмѣсти́лище, прⷭ҇то́лъ высо́къ, и҆ две́рь, бцⷣе, є҆́юже про́йде неизрече́ннымъ рождество́мъ, ѿ тлѝ ны̀ воззыва́ѧ.

Пѣ́снь є҃.

І҆рмо́съ: Ѿ но́щи невѣ́дѣнїѧ, бг҃овѣ́дѣнїемъ просвѣти́вый концы̀, просвѣти́ мѧ ᲂу҆́тромъ чл҃вѣколю́бїѧ твоегѡ̀, гдⷭ҇и.

Мїроѧвле́ннїи свѣти́льницы, свѧщенномꙋ́ченицы бж҃е́ственнїи, бы́вше, всѧ̑ просвѣща́ете бжⷭ҇твенными свѣтлостьмѝ дх҃а.

Оу҆смотрѧ́ѧ, всеблаже́нне, воздаѧ̑нїѧ бжⷭ҇твєннаѧ, терпѣ́лъ є҆сѝ, ма́рко, нестерпи̑мыѧ ра̑ны и҆ болѣ̑зни крѣпча́йше.

Свѧщеннодѣ́тель сы́й, и҆ безкрѡ́вныѧ жє́ртвы приносѧ̀ хрⷭ҇тꙋ̀, же́ртвꙋ, блаже́нне, благово́ннꙋю тебѐ сама́го гдⷭ҇еви прине́слъ є҆сѝ.

Бг҃оро́диченъ: Рождество́мъ стра́ннымъ, цр҃ѧ̀ всѣ́хъ родила̀ є҆сѝ, пречⷭ҇таѧ бцⷣе, на благодѣѧ́нїе тва́ри.

Пѣ́снь ѕ҃.

І҆рмо́съ: І҆ѡ́нꙋ въ ки́тѣ, гдⷭ҇и, є҆ди́наго всели́лъ є҆сѝ, мене́ же свѧ́заннаго мре́жами вра́жїими, ꙗ҆́кѡ ѿ тлѝ ѻ҆́наго, спасѝ.

Претерпѣ́въ мꙋ̑ки многоплетє́нныѧ и҆ сме́рть хода́тайственнꙋю, бг҃омꙋ́дре, въ сла́вѣ присносꙋ́щнѣй ликꙋ́еши на небесѣ́хъ, ѡ҆ на́съ, кѷрі́лле, молѧ́сѧ.

Глаго́лъ бж҃їй жи́въ въ се́рдцы твое́мъ ꙗ҆́кѡ и҆мѣ́ѧ, ма́рко сла́вне, къ вѣ́рѣ бжⷭ҇твеннѣй привле́клъ є҆сѝ лю́ди и҆ наро́ды, мꙋ́дре, и҆ благосла́внѡ тече́нїе сконча́лъ є҆сѝ.

Свѧщеннодѣ́телє и҆ жє́ртвы совершє́ны гдⷭ҇еви принесо́стесѧ, мꙋ́ками всесожже́гшесѧ, и҆ въ вы́шнихъ свѣ́тли цр҃ю̀ всѣ́хъ предстоитѐ.

Бг҃оро́диченъ: Разрѣше́нїе на́мъ долгѡ́въ и҆спросѝ, и҆ житїѧ̀ и҆справле́нїе, дв҃о, пѣсносло́вѧщымъ вели̑чїѧ твоѧ̑, и҆ благочести́вымъ ра́зꙋмомъ тѧ̀ сла́вѧщымъ.

Пѣ́снь з҃.

І҆рмо́съ: Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆ц҃є́въ бж҃е, бл҃гослове́нъ є҆сѝ.

Просвѣ́щшесѧ заре́ю ст҃ы́ѧ трⷪ҇цы, бг҃облаже́ннїи, тмꙋ̀ пре́лести и҆згна́сте, и҆ сла́вꙋ ᲂу҆лꙋчи́сте пѣснопою́ще: ѻ҆тє́цъ на́шихъ бж҃е, благослове́нъ є҆сѝ.

Ни̑жнѧѧ ѡ҆ста́вльшїи, и҆ вы̑шнѧѧ наслѣ́довавшїи, бг҃оно́сный ма́рко и҆ кѷрі́ллъ бжⷭ҇твенный, да почтꙋ́тсѧ пѣснопою́ще: ѻ҆тє́цъ на́шихъ бж҃е, благослове́нъ є҆сѝ.

Дрема́нїе нерадѣ́нїѧ во вре́мѧ подвигѡ́въ ѿтрѧ́сше, соверши́сте тече́нїе, и҆ собо́ромъ страстоте́рпєцъ пѣснопою́ще совокꙋпи́стесѧ: ѻ҆тє́цъ на́шихъ бж҃е, благослове́нъ є҆сѝ.

Бг҃оро́диченъ: И҆зъ тебє̀ спасе́нїе па́че ᲂу҆ма́ же и҆ сло́ва, дв҃о, возсїѧ̀ во тмѣ̀ сѣдѧ́щымъ сме́ртнѣй, и҆ до́лѣ сꙋ́щыѧ небє́сны содѣ́ла, вопїю́щыѧ: ѻ҆тє́цъ на́шихъ бж҃е, благослове́нъ є҆сѝ.

Пѣ́снь и҃.

І҆рмо́съ: Побѣди́тели мꙋчи́телѧ и҆ пла́мене благода́тїю твое́ю бы́вше, за́повѣдемъ твои̑мъ ѕѣлѡ̀ прилѣжа́ще, ѻ҆́троцы вопїѧ́хꙋ: благослови́те, всѧ̑ дѣла̀ гдⷭ҇нѧ, гдⷭ҇а.

Побѣди́тели мꙋчи́телѧ, свирѣ́пѡ сꙋдѧ́щагѡ, показа́вшесѧ, нетлѣ̑нныѧ вѣнцы̀, мꙋ́чєницы, прїѧ́сте: вопїю́ще: благослови́те, всѧ̑ дѣла̀ гдⷭ҇нѧ, гдⷭ҇а.

Щито́мъ любвѐ страда́льцы и҆ вѣ́ры воѡрꙋже́ни, вра̑жїѧ ѻ҆полчє́нїѧ мече́мъ посѣко́сте бжⷭ҇твенныѧ до́блести, вопїю́ще: благослови́те, всѧ̑ дѣла̀ гдⷭ҇нѧ, гдⷭ҇а.

На землѝ пострада́вше, въ вы́шнихъ, ст҃і́и, пра́вды вѣне́цъ ѿ рꙋкѝ хрⷭ҇то́вы прїѧ́сте, вопїю́ще: благослови́те, всѧ̑ дѣла̀ гдⷭ҇нѧ, гдⷭ҇а.

Трⷪ҇ченъ: Ꙗ҆́кѡ є҆ди́ницꙋ є҆стество́мъ, ꙗ҆́кѡ трⷪ҇цꙋ тѧ̀ чествꙋ́ю начерта́ньми, ѻ҆́ч҃е вседержи́телю, и҆ сн҃е, и҆ дш҃е ст҃ы́й, взыва́ѧ: благослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ: Ста́мнꙋ тѧ̀ ма́нны жи́зненныѧ, проповѣ́дꙋемъ, благослове́ннаѧ, трапе́зꙋ и҆ же́злъ, и҆ кади́льницꙋ, златы́й свѣ́щникъ, го́рꙋ же и҆ две́рь, кꙋпинꙋ̀ неѡпали́мꙋ, престо́лъ вы́шнѧгѡ, и҆ мі́ра спасе́нїе.

Пѣ́снь ѳ҃.

І҆рмо́съ: Оу҆страши́сѧ всѧ́къ слꙋ́хъ неизрече́нна бж҃їѧ снисхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃ческагѡ чре́ва бы́въ чл҃вѣ́къ. Тѣ́мже пречⷭ҇тꙋю бцⷣꙋ, вѣ́рнїи, велича́емъ.

Столпа́мъ, мꙋ́чєницы, хрⷭ҇та̀ пострада́вшагѡ и҆ стра̑сти ᲂу҆мертви́вшагѡ послѣ́довавше, мно́гихъ ра́нъ и҆скꙋше́нїе прїѧ́сте, и҆ ѡ҆бличи́вше врагѡ́въ безбо́жныхъ слꙋжє́нїѧ, возвели́чистесѧ, и҆ а҆́гг҃лѡмъ ꙗ҆́вѣ ᲂу҆подо́бистесѧ.

Ꙗ҆ви́стесѧ ᲂу҆́глїе ѻ҆́гненно, приѡбщи́вшесѧ бг҃ꙋ, всеблаже́ннїи, и҆ попали́сте многобо́жїѧ ве́щь благода́тїю, и҆ къ свѣ́тꙋ ᲂу҆́мномꙋ ра́дꙋющесѧ преидо́сте, бг҃облаже́ннїи, ѡ҆зарѧ́юще на̑ша разꙋмѣ̑нїѧ.

Поста́вльше на ка́мени мы́сленнѣмъ дꙋ́шъ ва́шихъ стѡпы̀, всехва́льнїи, не поколеба́стесѧ мно́гихъ мꙋ́къ приложе́ньми. тѣ́мже ᲂу҆твержда́йте на́шѧ при́снѡ мы̑сли, кова́рствы вра́жїими коле́блємыѧ, добропобѣ́днїи мꙋ́чєницы.

Взѧ́стесѧ къ пресвѣ́тломꙋ свидѣ́тельства, страстоте́рпцы, краегра́дїю, къ высотѣ̀ вели́цѣй: и҆ црⷭ҇тво бж҃їе непоколеби́мое сподо́бистесѧ прїѧ́ти, ма́рко свѧще́ннѣйшїй, кѷрі́лле сла́вне. є҆гѡ́же полꙋчи́ти всѣ̑мъ на́мъ моли́тесѧ.

Бг҃оро́диченъ: Сїѧ́нїемъ твои́мъ, ѻ҆трокови́це, мы́сленнымъ просвѣтѝ на́шѧ мы̑сли, бг҃ора́дованнаѧ, и҆ сердца̀, и҆ мꙋдрова̑нїѧ: ꙗ҆́кѡ да по стезѧ́мъ жи́зни пра́вѡ ше́ствꙋюще, ми́лость ᲂу҆лꙋчи́мъ, возвѣща́юще при́снѡ хвалы̑ твоѧ̑.

Свя­ти­тель Марк был ру­ко­по­ло­жен в епи­ско­па си­рий­ско­го го­ро­да Аре­фу­сии в прав­ле­ние свя­то­го Кон­стан­ти­на Ве­ли­ко­го. Дви­жи­мый рев­но­стью о Бо­ге, он про­сла­вил­ся то­гда борь­бой с идо­ло­по­клон­ством и соб­ствен­ны­ми ру­ка­ми раз­ру­шил язы­че­ское ка­пи­ще, по­стро­ив на его ме­сте хри­сти­ан­скую цер­ковь.

Во вре­мя сму­ты, по­сле­до­вав­шей за Ни­кей­ским Со­бо­ром, он ока­зал­ся в ря­дах по­лу­а­ри­ан­ских епи­ско­пов, ко­то­рые, не от­ри­цая Бо­же­ствен­но­сти Сло­ва, не при­ни­ма­ли до­бав­ле­ния в Сим­вол ве­ры тер­ми­на «еди­но­сущ­ный». Свя­той Марк при­ни­мал уча­стие в Со­бо­рах в го­ро­дах Сар­ди­ке (343) и Сир­мии (351) и да­же со­ста­вил ве­ро­оп­ре­де­ле­ние, ко­то­рое долж­но бы­ло при­ми­рить про­ти­во­по­лож­ные пар­тии, чтобы вос­ста­но­вить един­ство Церк­ви (359). Но вско­ре епи­скоп осо­знал свою ошиб­ку и яв­ным об­ра­зом, без дву­смыс­лен­но­стей, при­со­еди­нил­ся к Пра­во­сла­вию.

Вско­ре по­сле это­го власть пе­ре­шла к Юли­а­ну От­ступ­ни­ку, ко­то­рый на­чал по­ли­ти­ку на­силь­ствен­но­го вос­ста­нов­ле­ния язы­че­ства (361). Ко­гда языч­ни­ки Аре­фу­сии, та­ив­шие упор­ную непри­язнь по от­но­ше­нию к епи­ско­пу, узна­ли о том, что по­ло­же­ние дел из­ме­ни­лось, они по­пы­та­лись схва­тить его. Юли­ан, за­быв о при­зна­тель­но­сти к Мар­ку, ко­то­рый неко­гда спас ему жизнь во вре­мя уби­е­ния его ро­ди­те­лей, вы­ка­зал языч­ни­кам бла­го­склон­ность в этом де­ле и поз­во­лил им разыс­ки­вать епи­ско­па по всей про­вин­ции. Свя­ти­тель Марк, дабы не под­вер­гать­ся без нуж­ды пре­сле­до­ва­нию, бе­жал, но узнав, что вме­сто него аре­сто­ва­ли дру­гих хри­сти­ан и под­вер­га­ют их му­че­ни­ям, пре­дал­ся в ру­ки языч­ни­ков.

Идо­ло­слу­жи­те­ли немед­ля на­бро­си­лись на стар­ца, как зве­ри, не при­ни­мая во вни­ма­ние его се­ди­ны, и, со­рвав с него одеж­ду, при­ня­лись осы­пать уда­ра­ми. За­тем по­са­ди­ли епи­ско­па в смрад­ную сточ­ную ка­на­ву и пре­да­ли на за­ба­ву де­тям, ко­то­рые про­ты­ка­ли его те­ло па­лоч­ка­ми для пись­ма. По­том те­ло Мар­ка на­ма­за­ли рас­со­лом и ме­дом и за­клю­чи­ли его в кор­зи­ну, ко­то­рую под­ве­си­ли на от­кры­том воз­ду­хе, предо­ста­вив стар­ца сол­неч­но­му зною и жа­лу ос и пчел.

Несмот­ря на эти му­че­ния, свя­той оста­вал­ся неко­ле­бим в ис­по­ве­да­нии ве­ры и от­вер­гал лю­бые ком­про­мис­сы с языч­ни­ка­ми, же­лав­ши­ми по мень­шей ме­ре вы­рвать у него обе­ща­ние са­мо­му вос­ста­но­вить храм, раз­ру­шен­ный им же. Свя­той от­ка­зы­вал­ся обе­щать что бы то ни бы­ло, ска­зав, что в этом слу­чае мел­кая мо­не­та ста­ла бы рав­но­силь­на пол­но­му от­ре­че­нию от ве­ры. Он на­сме­хал­ся над их под­ло­стью и зем­ны­ми за­бо­та­ми, хо­тя и на­хо­дил­ся под­ня­тым на воз­дух во вре­мя тех пы­ток, ко­то­рым они его под­вер­га­ли. По­тер­пев по­ра­же­ние, языч­ни­ки в кон­це кон­цов от­пу­сти­ли его, а неко­то­рые из них, впе­чат­лен­ные стой­ко­стью и ре­ча­ми епи­ско­па, об­ра­ти­лись в хри­сти­ан­ство. Свя­той Марк мир­но скон­чал­ся в 364 г., по­лу­чив на­гра­ду ис­по­вед­ни­ков Хри­сто­вых.

В ту же эпо­ху Ки­рилл, диа­кон в Илио­по­ле Фини­кий­ском, ко­то­рый так­же раз­ру­шил нема­ло идо­лов во вре­ме­на св. Кон­стан­ти­на, был схва­чен языч­ни­ка­ми. Они раз­ре­за­ли ему жи­вот, раз­бро­са­ли внут­рен­но­сти по зем­ле и съе­ли его пе­чень сы­рой. Ви­нов­ные в этом бес­че­стии под­верг­лись впо­след­ствии от­мще­нию Бо­жию: од­ни по­те­ря­ли все зу­бы, язы­ки дру­гих под­верг­лись гни­е­нию, а тре­тьи ли­ши­лись зре­ния.

В па­ле­стин­ских го­ро­дах Ас­ка­лоне и Га­зе, где бы­ло силь­но язы­че­ство, идо­ло­по­клон­ни­ки схва­ти­ли свя­щен­но­слу­жи­те­лей и жен­щин, по­свя­щен­ных Бо­гу. Они вы­рва­ли у них внут­рен­но­сти и от­да­ли их в пи­щу сви­ньям, а жи­во­ты му­че­ни­ков на­пол­ни­ли ов­сом.

В Се­ва­стии они от­кры­ли ра­ку с мо­ща­ми св. Иоан­на Пред­те­чи и Кре­сти­те­ля Гос­под­ня и бро­си­ли их в огонь, а за­тем раз­ве­я­ли пе­пел по вет­ру.

Несмот­ря на все эти зло­де­я­ния, языч­ни­кам не уда­лось вос­ста­но­вить по­чи­та­ние идо­лов. На­род, в по­дав­ля­ю­щем боль­шин­стве, до та­кой сте­пе­ни остал­ся рав­но­душ­ным к их уси­ли­ям, что, ко­гда Юли­ан за­хо­тел ор­га­ни­зо­вать в Ан­тио­хии боль­шое празд­не­ство в честь Апол­ло­на, он с удив­ле­ни­ем об­на­ру­жил се­бя и сво­их при­двор­ных од­них в пу­стом хра­ме, в то вре­мя как в го­ро­де над ним на­сме­ха­лись.

Со­ста­ви­тель – иеро­мо­нах Ма­ка­рий Си­мо­но­петр­ский,
адап­ти­ро­ван­ный рус­ский пе­ре­вод – из­да­тель­ство Сре­тен­ско­го мо­на­сты­ря

См. так­же: "Стра­да­ние пре­по­доб­но­го от­ца на­ше­го Мар­ка, епи­ско­па Аре­фу­сий­ско­го" в из­ло­же­нии свт. Ди­мит­рия Ро­стов­ско­го.