Канон священномученику Поликарпу, епископу Смирнскому

Припев: Священному́чениче Полика́рпе, моли́ Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 08 марта (23 февраля ст. ст.)

Глас 2.

Пе́снь 1.

Ирмо́с: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты Еги́петския, я́ко просла́вися.

Христо́вым светоли́тием сия́я и Того́ просвеще́нием, о́тче, наполня́емь, омраче́нную ду́шу мою́ озари́, богому́дре, моли́твами твои́ми.

Просвеще́ние спаси́тельнаго пропове́дания, чи́стое се́рдце твое́, я́коже зерца́ло нескве́рно, о́тче, облиста́в зари́, все́м просия́.

Зако́на но́ваго столпописа́ние ты́ бы́л еси́, напи́сано име́я, о́тче, не черни́лом, но Ду́хом Боже́ственным благода́ти боже́ственное Ева́нгелие.

Богоро́дичен: Бо́га, из Тебе́ воплоще́нна, ве́дуще, без хоте́ния плотска́го, су́ща пре́жде тва́ри и пре́жде все́х ве́к, вои́стинну Богоро́дицу, Тя́ испове́дуем.

Пе́снь 3.

Ирмо́с: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Ма́слина, псало́мски рещи́, плодови́та бы́л еси́, Полика́рпе богоявле́нне, в дому́ Го́спода твоего́, весе́лие нося́ пропове́дания.

Напра́вил еси́ усе́рдно, богоблаже́нне, у́м тво́й повеле́нием Спа́совым, по досто́инству бы́л еси́ Того́ Це́ркве па́стырь изря́ден.

Всеце́лую тебе́ сама́го Христу́ прине́сл еси́ я́ко жи́ву же́ртву муче́нием, со́вести свиде́тельством, предпострада́в, всеблаже́нне, по́стничеством.

Богоро́дичен: Умерщвле́ния на́шего пе́рсть оттрясла́ еси́, ро́ждши и́стинно безсме́ртие, и оде́жды на́м истка́ла еси́ нетле́ния, Де́во, Рождество́м Твои́м.

Седа́лен, гла́с 8.

Благода́тный гро́зд в души́ вои́стинну возде́лав, о́тче му́дре, я́ко вино́, источи́л еси́ ве́ры сло́во, веселя́щее все́х ве́рных мы́сли, и чуде́с яви́лся еси́ непроходи́ма пучи́на; те́мже и му́чеников яви́лся еси́ удобре́ние, огне́м скончава́емь и све́та сподобля́емь присносу́щнаго, Полика́рпе. Моли́ Христа́ Бо́га прегреше́ний оставле́ние дарова́ти пра́зднующим любо́вию святу́ю па́мять твою́.

Сла́ва, и ны́не, богоро́дичен: Помышле́ньми поползну́вся лука́выми, во глубину́ впадо́х грехо́вную и, стеня́, взыва́ю Ти́ от се́рдца, Пречи́стая: на мне́ удиви́ бога́тую ми́лость, и Твоего́ милосе́рдия неизме́рную пучи́ну, и щедро́т Твои́х неисче́тное бога́тство и да́ждь ми́ покая́ние и прегреше́ний проще́ние, да любо́вию взыва́ю Тебе́: моли́ Христа́ Бо́га прегреше́ний оставле́ние дарова́ти ми́, Тя́ бо наде́жду име́ю, ра́б Тво́й.

Крестобогоро́дичен: А́гнца, и Па́стыря, и Изба́вителя А́гница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мляй Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй прегреше́ний оставле́ние ве́рою пою́щим боже́ственныя Стра́сти Твоя́.

Пе́снь 4.

Ирмо́с: Услы́шах, Го́споди, слу́х Твоего́ смотре́ния, и просла́вих Тя́, Еди́не Человеколю́бче.

Многопло́дный доброде́телей добропло́дный са́д Влады́це яви́лся еси́, о́тче Полика́рпе.

Всесожже́ние соверше́нно и чи́ста же́ртва прине́слся еси́ Спа́су все́х, о́тче Полика́рпе.

Песносло́вим, сла́вне, души́ твоея́ кре́пкое терпе́ние и твои́х по́двиг до́блесть.

Богоро́дичен: Просвети́, Чи́стая, омраче́нную ду́шу мою́ све́том Твои́м, Я́же Све́т ро́ждшая Присносу́щный.

Пе́снь 5.

Ирмо́с: Све́та Пода́телю, и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Заре́ю духо́вною просвеща́емь, у́м, преподо́бне, обра́зно огне́м опаля́емь, я́ве научи́лся еси́ огне́м, богому́дре, твоего́ сконча́ния.

Струю́ прия́л еси́ жи́зни, я́ко от пото́ка пи́щи, прему́дре, ученико́м возлю́бленным науче́н бы́в, поче́рпшим прему́дрости бе́здну.

Бога́тство, и сла́ву све́тлу, и долготу́ жития́, и жи́знь нетле́нну и́стинная му́дрость — Христо́с, тебе́ дарова́, о́тче, я́ко вельми́ Того́ возлю́бльшему.

Богоро́дичен: Ве́тхий де́ньми, я́коже на руно́ до́ждь, Пречи́стая, в Твое́ чре́во сни́де освяще́нное, и но́в яви́ся Ада́м, Человеколю́бец.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Умертви́вся, богоглаго́ливе, ми́ру всему́, Еди́ному же Христу́ живы́й пребыва́я, и к Нему́ преше́л еси́, жи́зненное нетле́ние прие́мля.

Благообра́зно ходя́, блаже́нне, ча́до же све́та и ми́ра явля́яся, нощна́го пе́рвенца и бори́теля позна́л еси́, Маркио́на.

Науча́еми, о́тче, словесы́ твои́ми, вся́ку побежда́ем скве́рную е́ресь и лука́вая со́нмища, два́ вводя́щих нача́ла злочести́вых.

Богоро́дичен: Гре́х ми́ра взе́млющаго, Чи́стаго А́гнца заче́нши, Всенепоро́чная, согреше́ний проще́ние моли́ дарова́ти рабо́м Твои́м.

Конда́к, гла́с 1.

Плоды́ слове́сныя Го́сподеви принося́, Полика́рпе му́дре, доброде́телей же́ртвы, те́мже и от Бо́га досто́ин иера́рх просла́вился еси́. Сего́ ра́ди дне́сь, просве́щшеся твои́ми словесы́, воспева́ем твою́ достохва́льную па́мять, сла́вяще Го́спода.

И́кос:

Му́дрости благосты́ню поче́рп, от тоя́, о́тче, напо́лнил еси́ богоразу́мия ста́до твое́ и всесвята́го и неизрече́ннаго Божества́ Трисо́лнечное облиста́л еси́, Отца́ нерожде́ние, Сы́на же рожде́ние и исхожде́ние Ду́ха, Еди́но Божество́, Еди́ну Сла́ву я́сно научи́л еси́ и и́дольское безбо́жие из ко́рене посе́кл еси́, плоды́ же зре́лы — ду́ши ве́рующих — приводя́ к Не́й, сла́вне, в Ню́же крести́хомся, в Ню́же и ве́руем, сла́вяще Го́спода.

Пе́снь 7.

Ирмо́с: О́бразу злато́му, на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси́, Бо́же оте́ц на́ших.

Тве́рдым по́мыслом горя́щий пла́мень премину́л еси́, сла́вне, я́ко трие́ о́троцы пе́щь, огне́м невеще́ственным ороша́еми, посреди́ же огня́ взыва́я, неопали́мь пребы́л еси́: благослове́н еси́, Бо́же оте́ц на́ших.

Блаже́н еси́, и добро́ тебе́ е́сть, ны́не все́льшемуся, иде́же пра́ведных селе́ния, иде́же му́ченик во́инства, иде́же му́дрых апо́столов ли́цы взыва́ют: благослове́н еси́, Бо́же оте́ц на́ших.

Непло́дныя пе́рвее, многопло́дны Христу́ ду́ши приве́л еси́, возде́ланием духо́вным уравни́в, и благокла́сно си́м предлага́я се́мя, и наказу́я пою́щия с тобо́ю: благослове́н еси́, Бо́же оте́ц на́ших.

Богоро́дичен: Ты́ еди́на Бо́гу, вся́ческая му́дре соде́лавшему, Ма́ти яви́лася еси́ Неискусобра́чная, Де́во Ма́ти Всечи́стая. Те́мже благоче́стно Тебе́, Всенепоро́чная, взыва́юще, пое́м: благослове́на, Я́же Бо́га пло́тию ро́ждшая.

Пе́снь 8.

Ирмо́с: В пе́щь о́гненную ко отроко́м евре́йским снизше́дшаго, и пла́мень в ро́су прело́жшаго Бо́га, по́йте дела́, я́ко Го́спода, и превозноси́те во вся́ ве́ки.

Священноде́йствовав, сла́вне, Христо́ву та́йную слу́жбу, слове́сное овча́ — себе́ приве́л еси́ Бо́гу, же́ртву прия́тну и благоуго́дну, всепло́дну, Полика́рпе треблаже́нне.

Ю́ношское в седи́не и глубоча́йшее му́жество показа́л еси́: кре́стною си́лою воздви́гл еси́ себе́ к боже́ственным подвиго́м, богому́дре, священному́чеников Христо́вых сла́ва, преподо́бне.

Утвержда́емь кресто́м, и святи́тельскою красото́ю досто́йно облече́н, о́тче, в Це́рковь Бо́жию вше́л еси́ твое́ю кро́вию Пастыренача́льнику Христу́ яви́тися.

За Христа́ закла́вся, я́коже знамени́т ове́н, священноявле́нне, подо́бник яви́лся еси́ страда́нием Его́, и сла́вы бы́л еси́ соприча́стник, и Ца́рствия Его́ снасле́дник.

Богоро́дичен: Светови́ден сто́лп о́гнен и о́блак све́тел, предводя́щь, к небе́сному насле́дию, Богороди́тельнице Чи́стая, бу́ди ми́, Де́во Всенепоро́чная, в пусты́ни жития́ заблужде́нному.

Пе́снь 9.

Ирмо́с: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

Светоно́сная твоя́, о́тче, возсия́вши па́мять, просвеща́ет ду́ши благоче́стно сию́ соверша́ющих, чу́дне, и прича́стники Боже́ственнаго светоявле́ния сия́ соверша́ет. Ю́же досто́йно, богому́дре, пе́сньми ублажа́ем.

С вы́шними ли́ки святы́х а́нгел престо́лу Влады́чнему предстоя́, Сего́ моли́ дости́гнути на́м спаси́тельную Стра́сть и Того́ Воскресе́ние све́тло, доброде́телей многообра́зныя ви́ды соверша́ющия.

Венцено́сна тя́, о́тче, и по́чести побе́ду прии́мша Боже́ственныя десни́цы, и по́двиги сконча́вша, и све́та исполня́ема, ве́рующе, Полика́рпе му́дре, моли́твенника Христу́ тя́ усе́рдно предлага́ем.

Богоро́дичен: Я́ко Богоро́дицу Тя́, Де́во, и Ма́терь Сло́ва, и Хода́таицу су́щую на́м присносу́щныя и Боже́ственныя жи́зни, я́ко пра́вды Со́лнце возсия́вшую на́м, ве́рнии, единому́дренно пе́сньми велича́ем.

Свети́лен.

Богосло́вному ученику́ учени́к бы́в, Полика́рпе, мно́г пло́д Го́споду ве́рных приве́л еси́, себе́ же самого́ всепло́дие прине́сл еси́ о твое́м ста́де, и ны́не моли́ся за вся́ ны́.

Богоро́дичен: Щедро́ты Твоя́, Бо́же, на лю́ди и ста́до Твое́ низпосли́ моли́твами Пречи́стыя Твоея́ Ма́тере и все́х святы́х Твои́х и на́м все́м да́руй вели́кую Твою́ ми́лость.

Пѣ́снь а҃.

І҆рмо́съ: Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ, ꙗ҆́кѡ просла́висѧ.

Хрⷭ҇то́вымъ свѣтоли́тїемъ сїѧ́ѧ, и҆ тогѡ̀ просвѣще́нїемъ, ѻ҆́ч҃е, наполнѧ́емь, ѡ҆мраче́ннꙋю дꙋ́шꙋ мою̀ ѡ҆зарѝ, бг҃омꙋ́дре, моли́твами твои́ми.

Просвѣще́нїе спаси́тельнагѡ проповѣ́данїѧ, чи́стое се́рдце твоѐ, ꙗ҆́коже зерца́ло нескве́рно, ѻ҆́ч҃е, ѡ҆блиста́въ зари̑ всѣ̑мъ просїѧ̀.

Зако́на но́вагѡ столпописа́нїе ты̀ бы́лъ є҆сѝ напи́сано и҆мѣ́ѧ, ѻ҆́ч҃е, не черни́ломъ, но дх҃омъ бжⷭ҇твеннымъ, бл҃года́ти бжⷭ҇твенное є҆ѵⷢ҇лїе.

Бг҃оро́диченъ: Бг҃а и҆зъ тебє̀ воплоще́нна вѣ́дꙋще, безъ хотѣ́нїѧ плотска́гѡ, сꙋ́ща пре́жде тва́ри, и҆ пре́жде всѣ́хъ вѣ̑къ, вои́стиннꙋ бцⷣꙋ тѧ̀ и҆сповѣ́дꙋемъ.

Пѣ́снь г҃.

І҆рмо́съ: Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщвле́й грѣ́хъ, и҆ стра́хъ тво́й всадѝ въ сердца̀ на́съ пою́щихъ тѧ̀.

Ма́слина, ѱало́мски рещѝ, плодови́та бы́лъ є҆сѝ, полѷка́рпе бг҃оѧвле́нне, въ домꙋ̀ гдⷭ҇а твоегѡ̀ весе́лїе носѧ̀ проповѣ́данїѧ.

Напра́вилъ є҆сѝ ᲂу҆се́рднѡ, бг҃облаже́нне, ᲂу҆́мъ тво́й повелѣ́нїемъ сп҃совымъ, по досто́инствꙋ бы́лъ є҆сѝ тогѡ̀ цр҃кве па́стырь и҆зрѧ́денъ.

Всецѣ́лꙋю тебѐ сама́го хрⷭ҇тꙋ̀ прине́слъ є҆сѝ, ꙗ҆́кѡ жи́вꙋ же́ртвꙋ мꙋче́нїемъ, со́вѣсти свидѣ́тельствомъ предпострада́въ, всебл҃же́нне, по́стничествомъ.

Бг҃оро́диченъ: Оу҆мерщвле́нїѧ на́шегѡ пе́рсть ѿтрѧсла̀ є҆сѝ, ро́ждши и҆́стиннѡ безсме́ртїе, и҆ ѻ҆дє́жды на́мъ и҆стка́ла є҆сѝ нетлѣ́нїѧ, дв҃о, ржⷭ҇тво́мъ твои́мъ.

Сѣда́ленъ, гла́съ и҃.

Бл҃года́тный гро́здъ въ дꙋшѝ вои́стиннꙋ воздѣ́лавъ, ѻ҆́ч҃е мꙋ́дре, ꙗ҆́кѡ вїно̀ и҆сточи́лъ є҆сѝ вѣ́ры сло́во, веселѧ́щее всѣ́хъ вѣ́рныхъ мы̑сли, и҆ чꙋде́съ ꙗ҆ви́лсѧ є҆сѝ непроходи́ма пꙋчи́на: тѣ́мже и҆ мꙋ́ченикѡвъ ꙗ҆ви́лсѧ є҆сѝ ᲂу҆добре́нїе, ѻ҆гне́мъ скончава́емь, и҆ свѣ́та сподоблѧ́емь присносꙋ́щнагѡ, полѷка́рпе, молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти пра́зднꙋющымъ любо́вїю свѧтꙋ́ю па́мѧть твою̀.

Сла́ва, и҆ ны́нѣ, бг҃оро́диченъ: Помышле́ньми поползнꙋ́всѧ лꙋка́выми, во глꙋбинꙋ̀ впадо́хъ грѣхо́внꙋю, и҆ стенѧ̀ взыва́ю тѝ ѿ се́рдца, пречⷭ҇таѧ: на мнѣ̀ ᲂу҆дивѝ бога́тꙋю ми́лость, и҆ твоегѡ̀ милосе́рдїѧ неизмѣ́рнꙋю пꙋчи́нꙋ, и҆ щедро́тъ твои́хъ неизче́тное бога́тство: и҆ да́ждь мѝ покаѧ́нїе, и҆ прегрѣше́нїй, проще́нїе, да любо́вїю взыва́ю тебѣ̀: молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти мѝ, тѧ́ бо наде́ждꙋ и҆мѣ́ю ра́бъ тво́й.

Крⷭ҇тобг҃оро́диченъ: А҆́гнца и҆ па́стырѧ и҆ и҆зба́вителѧ а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи вопїѧ́ше: мі́ръ ᲂу҆́бѡ ра́дꙋетсѧ, прїе́млѧй тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. долготерпѣли́ве гдⷭ҇и, ми́лости бе́здно, и҆ и҆сто́чниче неисчерпа́емый, ᲂу҆милосе́рдисѧ, и҆ да́рꙋй прегрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стрⷭ҇ти твоѧ̑.

Пѣ́снь д҃.

І҆рмо́съ: Оу҆слы́шахъ, гдⷭ҇и, слꙋ́хъ твоегѡ̀ смотре́нїѧ, и҆ просла́вихъ тѧ̀, є҆ди́не чл҃вѣколю́бче.

Многопло́дный добродѣ́телей, добропло́дный са́дъ влⷣцѣ ꙗ҆ви́лсѧ є҆сѝ, ѻ҆́ч҃е полѷка́рпе.

Всесожже́нїе соверше́нно, и҆ чи́ста же́ртва прине́слсѧ є҆сѝ сп҃сꙋ всѣ́хъ, ѻ҆́ч҃е полѷка́рпе.

Пѣсносло́вимъ, сла́вне, дꙋшѝ твоеѧ̀ крѣ́пкое терпѣ́нїе, и҆ твои́хъ пѡ́двигъ до́блесть.

Бг҃оро́диченъ: Просвѣтѝ, чⷭ҇таѧ, ѡ҆мраче́ннꙋю дꙋ́шꙋ мою̀ свѣ́томъ твои́мъ, ꙗ҆́же свѣ́тъ ро́ждшаѧ присносꙋ́щный.

Пѣ́снь є҃.

І҆рмо́съ: Свѣ́та пода́телю и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀, и҆но́гѡ бо́га не зна́емъ.

Заре́ю дꙋхо́вною просвѣща́емь ᲂу҆́мъ, прпⷣбне, ѻ҆бра́знѡ ѻ҆гне́мъ ѡ҆палѧ́емь ꙗ҆́вѣ наꙋчи́лсѧ є҆сѝ, ѻ҆гне́мъ, бг҃омꙋ́дре, твоегѡ̀ сконча́нїѧ.

Стрꙋю̀ прїѧ́лъ є҆сѝ жи́зни, ꙗ҆́кѡ ѿ пото́ка пи́щи, премꙋ́дре, ᲂу҆ченико́мъ возлю́бленнымъ наꙋче́нъ бы́въ, поче́рпшимъ премꙋ́дрости бе́зднꙋ.

Бога́тство и҆ сла́вꙋ свѣ́тлꙋ, и҆ долготꙋ̀ житїѧ̀, и҆ жи́знь нетлѣ́ннꙋ, и҆́стиннаѧ мꙋ́дрость хрⷭ҇то́съ, тебѣ̀ дарова̀, ѻ҆́ч҃е, ꙗ҆́кѡ вельмѝ того̀ возлю́бльшемꙋ.

Бг҃оро́диченъ: Ве́тхїй де́ньми, ꙗ҆́коже на рꙋно̀ до́ждь, пречⷭ҇таѧ, въ твоѐ чре́во сни́де ѡ҆свѧще́нное, и҆ но́въ ꙗ҆ви́сѧ а҆да́мъ чл҃вѣколю́бецъ.

Пѣ́снь ѕ҃.

І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

Оу҆мертви́всѧ, бг҃оглаго́ливе, мі́рꙋ всемꙋ̀, є҆ди́номꙋ же хрⷭ҇тꙋ̀ живы́й пребыва́ѧ: и҆ къ немꙋ̀ преше́лъ є҆сѝ, жи́зненное нетлѣ́нїе прїе́млѧ.

Благоѻбра́знѡ ходѧ̀, бл҃же́нне, ча́до же свѣ́та и҆ ми́ра ꙗ҆влѧ́ѧсѧ, нощна́го пе́рвенца, и҆ бори́телѧ позна́лъ є҆сѝ маркїѡ́на.

Наꙋча́еми, ѻ҆́ч҃е, словесы̀ твои́ми, всѧ́кꙋ побѣжда́емъ скве́рнꙋю є҆́ресь, и҆ лꙋка̑ваѧ сѡ́нмища, два̀ вводѧ́щихъ нача̑ла ѕлочести́выхъ.

Бг҃оро́диченъ: Грѣ́хъ мі́ра взе́млющаго, чⷭ҇таго а҆́гнца заче́нши, всенепоро́чнаѧ, согрѣше́нїй проще́нїе молѝ дарова́ти рабѡ́мъ твои̑мъ.

Конда́къ, гла́съ а҃.

Плоды̀ словє́сныѧ гдⷭ҇еви приносѧ̀, полѷка́рпе мꙋ́дре, добродѣ́телей жє́ртвы, тѣ́мже и҆ ѿ бг҃а досто́инъ і҆ера́рхъ просла́вилсѧ є҆сѝ. сегѡ̀ ра́ди дне́сь просвѣ́щшесѧ твои́ми словесы̀, воспѣва́емъ твою̀ достохва́льнꙋю па́мѧть, сла́вѧще гдⷭ҇а.

І҆́косъ:

Мꙋ́дрости благосты́ню поче́рпъ, ѿ тоѧ̀, ѻ҆́ч҃е, напо́лнилъ є҆сѝ бг҃оразꙋ́мїѧ ста́до твоѐ: и҆ всест҃а́гѡ и҆ неизрече́ннагѡ бжⷭ҇тва̀ трисо́лнечное ѡ҆блиста́лъ є҆сѝ, ѻ҆ц҃а̀ нерожде́нїе, сн҃а же рожде́нїе, и҆ и҆схожде́нїе дх҃а, є҆ди́но бжⷭ҇тво̀, є҆ди́нꙋ сла́вꙋ ꙗ҆́снѡ наꙋчи́лъ є҆сѝ, и҆ і҆́дѡльское безбо́жїе и҆зъ ко́рене посѣ́клъ є҆сѝ: плоды́ же зрѣ̑лы дꙋ́шы вѣ́рꙋющихъ приводѧ̀ къ не́й, сла́вне, въ ню́же крести́хомсѧ, въ ню́же и҆ вѣ́рꙋемъ, сла́вѧще гдⷭ҇а.

Пѣ́снь з҃.

І҆рмо́съ: Ѻ҆́бразꙋ злато́мꙋ, на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ, посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Тве́рдымъ по́мысломъ горѧ́щїй пла́мень преминꙋ́лъ є҆сѝ, сла́вне, ꙗ҆́кѡ трїѐ ѻ҆́троцы пе́щь ѻ҆гне́мъ невеще́ственнымъ ѡ҆роша́еми, посреди́ же ѻ҆гнѧ̀ взыва́ѧ, неѡпали́мь пребы́лъ є҆сѝ: бл҃гослове́нъ є҆сѝ, бж҃е ѻ҆тє́цъ на́шихъ.

Блаже́нъ є҆сѝ, и҆ добро̀ тебѣ̀ є҆́сть, ны́нѣ все́льшемꙋсѧ, и҆дѣ́же пра́ведныхъ селє́нїѧ, и҆дѣ́же мꙋ́чєникъ вѡ́инства, и҆дѣ́же мꙋ́дрыхъ а҆пⷭ҇лѡвъ ли́цы взыва́ютъ: бл҃гослове́нъ є҆сѝ, бж҃е ѻ҆тє́цъ на́шихъ.

Неплѡ́дныѧ пе́рвѣе многоплѡ́дны хрⷭ҇тꙋ̀ дꙋ́шы приве́лъ є҆сѝ, воздѣ́ланїемъ дꙋхо́внымъ ᲂу҆равни́въ, и҆ благокла́сно си̑мъ предлага́ѧ сѣ́мѧ, и҆ наказꙋ́ѧ пою́щыѧ съ тобо́ю: бл҃гослове́нъ є҆сѝ, бж҃е ѻ҆тє́цъ на́шихъ.

Бг҃оро́диченъ: Ты̀ є҆ди́на бг҃ꙋ, всѧ́чєскаѧ мꙋ́дрѣ содѣ́лавшемꙋ, мт҃и ꙗ҆ви́ласѧ є҆сѝ неискꙋсобра́чнаѧ, дв҃о мт҃и всечⷭ҇таѧ. тѣ́мже благоче́стнѡ тебѣ̀, всенепоро́чнаѧ, взыва́юще, пое́мъ: бл҃гослове́на, ꙗ҆́же бг҃а пло́тїю ро́ждшаѧ.

Пѣ́снь и҃.

І҆рмо́съ: Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте, дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.

Сщ҃еннодѣ́йствовавъ, сла́вне, хрⷭ҇то́вꙋ та́йнꙋю слꙋ́жбꙋ, слове́сное ѻ҆вча̀ себѐ приве́лъ є҆сѝ бг҃ꙋ же́ртвꙋ прїѧ́тнꙋ и҆ благоꙋго́днꙋ, всепло́днꙋ, полѷка́рпе требл҃же́нне.

Ю҆́ношское въ сѣди́нѣ, и҆ глꙋбоча́йшее мꙋ́жество показа́лъ є҆сѝ: крⷭ҇тною си́лою воздви́глъ є҆сѝ себѐ къ бж҃е́ствєннымъ подвигѡ́мъ, бг҃омꙋ́дре, свѧщенномꙋ́ченикѡвъ хрⷭ҇то́выхъ сла́ва, преподо́бне.

Оу҆твержда́емь крⷭ҇то́мъ, и҆ ст҃и́тельскою красото́ю досто́йнѡ ѡ҆блече́нъ, ѻ҆́ч҃е, въ цр҃ковь бж҃їю вше́лъ є҆сѝ твое́ю кро́вїю пастыренача́льникꙋ хрⷭ҇тꙋ̀ ꙗ҆ви́тисѧ.

За хрⷭ҇та̀ закла́всѧ, ꙗ҆́коже знамени́тъ ѻ҆ве́нъ, сщ҃енноѧвле́нне, подо́бникъ ꙗ҆ви́лсѧ є҆сѝ страда́нїємъ є҆гѡ̀, и҆ сла́вы бы́лъ є҆сѝ соприча́стникъ, и҆ црⷭ҇твїѧ є҆гѡ̀ снаслѣ́дникъ.

Бг҃оро́диченъ: Свѣтови́дѣнъ сто́лпъ ѻ҆́гненъ, и҆ ѻ҆́блакъ свѣ́телъ, предводѧ́щь къ нбⷭ҇номꙋ наслѣ́дїю, бг҃ороди́тельнице чⷭ҇таѧ, бꙋ́ди мѝ, дв҃о всенепоро́чнаѧ, въ пꙋсты́ни житїѧ̀ заблꙋжде́нномꙋ.

Пѣ́снь ѳ҃.

І҆рмо́съ: Ѿ бг҃а бг҃а сло́ва, неизрече́нною мꙋ́дростїю прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи, є҆диномꙋ́дреннѡ пѣ́сньми велича́емъ.

Свѣтоно́снаѧ твоѧ̀, ѻ҆́ч҃е, возсїѧ́вши па́мѧть, просвѣща́етъ дꙋ́шы благоче́стнѡ сїю̀ соверша́ющихъ, чꙋ́дне: и҆ прича́стники бжⷭ҇твеннагѡ свѣтоѧвле́нїѧ сїѧ̑ соверша́етъ: ю҆́же досто́йнѡ, бг҃омꙋ́дре, пѣ́сньми ᲂу҆блажа́емъ.

Съ вы́шними ли́ки ст҃ы́хъ а҆́гг҃лъ прⷭ҇то́лꙋ влⷣчнемꙋ предстоѧ̀, сего̀ молѝ дости́гнꙋти на́мъ спаси́тельнꙋю стрⷭ҇ть и҆ тогѡ̀ воскрⷭ҇нїе, свѣ́тлѡ добродѣ́телей многоѻбра̑зныѧ ви́ды соверша́ющыѧ.

Вѣнцено́сна тѧ̀, ѻ҆́ч҃е, и҆ по́чести побѣ́дꙋ прїи́мша, бжⷭ҇твенныѧ десни́цы, и҆ по́двиги сконча́вша, и҆ свѣ́та и҆сполнѧ́ема, вѣ́рꙋюще, полѷка́рпе мꙋ́дре, моли́твенника хрⷭ҇тꙋ̀ тѧ̀ ᲂу҆се́рднѡ предлага́емъ.

Бг҃оро́диченъ: Ꙗ҆́кѡ бцⷣꙋ тѧ̀, дв҃о, и҆ мт҃рь сло́ва, и҆ хода́таицꙋ сꙋ́щꙋю на́мъ, присносꙋ́щныѧ и҆ бжⷭ҇твенныѧ жи́зни, ꙗ҆́кѡ пра́вды сл҃нце возсїѧ́вшꙋю на́мъ, вѣ́рнїи, є҆диномꙋ́дреннѡ пѣ́сньми велича́емъ.

Свѣти́ленъ.

Бг҃осло́вномꙋ ᲂу҆ч҃никꙋ̀ ᲂу҆чени́къ бы́въ, полѷка́рпе, мно́гъ пло́дъ гдⷭ҇ꙋ вѣ́рныхъ приве́лъ є҆сѝ: себе́ же самого̀ всепло́дїе прине́слъ є҆сѝ ѡ҆ твое́мъ ста́дѣ, и҆ ны́нѣ моли́сѧ за всѧ̑ ны̀.

Бг҃оро́диченъ: Щедрѡ́ты твоѧ̑, бж҃е, на лю́ди и҆ ста́до твоѐ низпослѝ, моли́твами пречⷭ҇тыѧ твоеѧ̀ мт҃ре, и҆ всѣ́хъ ст҃ы́хъ твои́хъ, и҆ на́мъ всѣ̑мъ да́рꙋй вели́кꙋю твою̀ ми́лость.

Жизнь и труды апостолов – Св. священномученик Поликарп, епископ Смирнский

Житие священномученика Поликарпа, епископа Смирнского

Свя­ти­тель По­ли­карп, епи­скоп Смирн­ский, ро­дил­ся око­ло 80 г., жил в Ма­лой Азии, в г. Смирне. Ра­но остав­шись си­ро­той, он был вос­пи­тан, по ука­за­нию Ан­ге­ла, бла­го­че­сти­вой вдо­вой Кал­ли­стой. По­сле смер­ти на­ре­чен­ной ма­те­ри По­ли­карп раз­дал свое име­ние и стал ве­сти це­ло­муд­рен­ную жизнь, слу­жа боль­ным и немощ­ным. Его очень по­лю­бил и при­бли­зил к се­бе свя­той епи­скоп Смирн­ский Ву­кол (па­мять 6 фев­ра­ля). Он по­свя­тил По­ли­кар­па в диа­ко­на, по­ру­чив ему про­по­ве­до­вать в хра­ме Сло­во Бо­жие.

В то вре­мя был жив свя­той апо­стол Иоанн Бо­го­слов. Свя­той По­ли­карп был осо­бен­но бли­зок к свя­то­му Иоан­ну Бо­го­сло­ву, ко­то­ро­го со­про­вож­дал в его апо­столь­ских пу­те­ше­стви­ях. Свя­ти­тель Ву­кол ру­ко­по­ло­жил свя­то­го По­ли­кар­па во пре­сви­те­ра, а неза­дол­го до кон­чи­ны за­ве­щал по­ста­вить его епи­ско­пом на Смирн­скую ка­фед­ру. Ко­гда со­вер­ша­лось по­свя­ще­ние свя­то­го По­ли­кар­па во епи­ско­пы, ему явил­ся Гос­подь Иисус Хри­стос. Свя­ти­тель По­ли­карп с апо­столь­ской рев­но­стью ру­ко­во­дил сво­ей паст­вой. Поль­зо­вал­ся он боль­шой лю­бо­вью и сре­ди свя­щен­ства. С боль­шой теп­ло­той от­но­сил­ся к нему свя­той Иг­на­тий Бо­го­но­сец. От­прав­ля­ясь в Рим, где его ожи­да­ла казнь (он был рас­тер­зан ди­ки­ми зве­ря­ми), он пи­сал свя­то­му По­ли­кар­пу: "Как корм­чим нуж­ны вет­ры или обу­ре­ва­е­мо­му – при­стань, так на­сто­я­ще­му вре­ме­ни ну­жен ты для то­го, чтобы до­стиг­нуть Бо­га".

На рим­ский пре­стол всту­пил им­пе­ра­тор Марк Авре­лий (161–180), на хри­сти­ан бы­ло воз­двиг­ну­то од­но из же­сто­чай­ших го­не­ний. Языч­ни­ки тре­бо­ва­ли, чтобы су­дья ис­кал свя­то­го По­ли­кар­па – "от­ца всех хри­сти­ан" и "со­вра­ти­те­ля всей Азии". В это вре­мя свя­ти­тель По­ли­карп по на­сто­я­тель­ной прось­бе сво­ей паст­вы пре­бы­вал в неболь­шом се­ле­нии неда­ле­ко от Смир­ны. Ко­гда во­и­ны при­шли за ним, свя­той По­ли­карп вы­шел на­встре­чу и ве­лел их на­кор­мить, а сам в это вре­мя стал мо­лить­ся, го­то­вясь к му­че­ни­че­ско­му по­дви­гу. Его стра­да­ния и смерть опи­са­ны в "По­сла­нии хри­сти­ан Смирн­ской Церк­ви к дру­гим Церк­вам" – од­ном из са­мых древ­них па­мят­ни­ков хри­сти­ан­ской пись­мен­но­сти. Бу­дучи при­ве­ден на суд, свя­ти­тель По­ли­карп твер­до ис­по­ве­дал свою ве­ру во Хри­ста и был при­го­во­рен к со­жже­нию. Па­ла­чи хо­те­ли при­бить его к стол­бу, но он спо­кой­но им ска­зал, что не сой­дет с ко­ст­ра, и его толь­ко свя­за­ли ве­рев­кой. Пла­мя окру­жи­ло свя­то­го, но не кос­ну­лось его, со­мкнув­шись в воз­ду­хе над его го­ло­вой. Ви­дя, что огонь не вре­дит ему, тол­па языч­ни­ков и иуде­ев ста­ла тре­бо­вать, чтоб он был убит ме­чом. Ко­гда свя­то­му По­ли­кар­пу на­нес­ли ра­ну, из нее вы­тек­ло так мно­го кро­ви, что она по­га­си­ла пла­мя. Те­ло свя­щен­но­му­че­ни­ка По­ли­кар­па со­жгли. Смирн­ские хри­сти­ане с бла­го­го­ве­ни­ем со­бра­ли его чест­ные остан­ки, свя­то чтя его па­мять.

Со­хра­нил­ся рас­сказ о свя­том По­ли­кар­пе его уче­ни­ка, свя­то­го Ири­нея Ли­он­ско­го, ко­то­рый при­во­дит Ев­се­вий в "Цер­ков­ной Ис­то­рии" (V, 20): "Я был еще очень мо­лод, ко­гда ви­дел те­бя в Ма­лой Азии у По­ли­кар­па, – об­ра­ща­ет­ся свя­той Ири­ней к сво­е­му дру­гу Фло­ри­ну. – ...Я мог бы те­перь ука­зать ме­сто, где си­дел бла­жен­ный По­ли­карп и бе­се­до­вал, – мог бы изо­бра­зить его по­ход­ку, об­раз его жиз­ни, внеш­ний вид, его бе­се­ды к на­ро­ду, его дру­же­ское об­ра­ще­ние с Иоан­ном, как он сам рас­ска­зы­вал, и с про­чи­ми са­мо­вид­ца­ми Гос­по­да, – то, как он при­по­ми­нал сло­во их и пе­ре­ска­зы­вал, что слы­шал от них о Гос­по­де, Его уче­нии и чу­де­сах... По ми­ло­сти Бо­жи­ей ко мне я и то­гда еще вни­ма­тель­но слу­шал По­ли­кар­па и за­пи­сы­вал сло­ва его не на дос­ке, но в глу­бине мо­е­го серд­ца... Итак, мо­гу за­сви­де­тель­ство­вать пе­ред Бо­гом, что ес­ли бы этот бла­жен­ный и апо­столь­ский ста­рец услы­шал что-ни­будь по­доб­ное тво­е­му за­блуж­де­нию, то он тот­час за­гра­дил бы слух свой и изъ­явил бы него­до­ва­ние свое обыч­ною по­го­вор­кою: "Бо­же Бла­гий! До ка­ко­го вре­ме­ни Ты до­пу­стил ме­ня до­жить".

При жиз­ни свя­ти­тель на­пи­сал несколь­ко по­сла­ний к пастве и пи­сем к раз­ным ли­цам. До на­ше­го вре­ме­ни до­шло его по­сла­ние к филип­пий­цам, ко­то­рое, по со­об­ще­нию бла­жен­но­го Иеро­ни­ма, чи­та­лось в ма­ло­азий­ских церк­вах за бо­го­слу­же­ни­ем. Оно бы­ло на­пи­са­но свя­ти­те­лем в от­вет на прось­бу филип­пий­цев при­слать им со­хра­нив­ши­е­ся у свя­ти­те­ля По­ли­кар­па пись­ма свя­щен­но­му­че­ни­ка Иг­на­тия Бо­го­нос­ца.

См. так­же: "Жи­тие и стра­да­ние свя­то­го свя­щен­но­му­че­ни­ка По­ли­кар­па, епи­ско­па Смирн­ско­го" в из­ло­же­нии свт. Ди­мит­рия Ро­стов­ско­го.