Акафистник

Помочь сайту
·
·
·
·

Канон святителю Григорию Двоеслову, папе Римскому (второй)

Память: 25 (12) марта

Глас 2.

Припев: Святи́телю, о́тче Григо́рие, моли́ Бо́га о на́с.

Пе́снь 1.

Ирмо́с: Гряди́те лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

До́браго ко́рене свяще́нная розга́ бы́л еси́, житие́м, ве́рою и любо́вию процве́л еси́, и насле́дник небе́снаго ца́рствия яви́лся еси́.

Венце́м смире́ния, а́ки не́коею дража́йшею у́тварию украси́лся еси́, вся́ мирска́я возненави́дев Христа́ ра́ди, и убо́гих возлюби́в, Ца́рство небе́сное насле́довал еси́.

А́ще в ю́ностнем телеси́ у́м соверше́н стяжа́л еси́, бога́тство твое́ не на украше́ние су́етное, но на созида́ние оби́телей, и учрежде́ние убо́гих и стра́нных истощи́л еси́, те́м и Христо́с украси́ тя́ нетле́нием.

Богоро́дичен: Кто́ досто́йно изочте́т вели́чия чуде́с Твои́х, Богоблагода́тная, я́ко родила́ еси́ Еди́наго от Тро́ицы, Христа́ Бо́га на́шего, Его́же моли́ спасти́ся на́м.

Пе́снь 3.

Ирмо́с: Процвела́ е́сть пусты́ня я́ко кри́н Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Процве́л еси́ Дави́дски, святи́телю, в житии́ твое́м, егда́ а́нгелу Бо́жию во о́бразе навкли́ра три́жды в еди́н де́нь ми́лостыню пода́л еси́, и́же пребы́сть с тобо́ю во вся́ дни́ живота́ твоего́.

Толи́каго ра́ди нестяжа́ния и кра́йняго к убо́гим милосе́рдия, Госпо́дь нарече́ тя́ первопресто́льника Це́ркве Своея́, и наме́стника верхо́внаго Своего́ апо́стола Петра́, с ни́мже моли́ся о на́с, свя́те Григо́рие.

Боже́ственным озаря́емь све́том, на престо́ле святи́тельстем се́д, лю́ди благоразу́мием упа́сл еси́, науча́я я́ правосла́вным догма́там, Христу́ приве́л еси́. Но и на́с не забу́ди, святи́телю, присеща́я святы́ми твои́ми моли́твами.

Богоро́дичен: Безсе́менно во чре́ве Бо́га зачала́ еси́, и ражда́еши несказа́нно воплоще́нна, на Него́же зре́ти не сме́ют, Чи́стая, небе́сныя си́лы, Присноде́во.

Седа́лен, гла́с 6:

А́ще у́бо Дави́д глаго́лет: блаже́н разумева́яй на ни́ща и убо́га; то́ кольми́ па́че блаже́н еси́ ты́, святи́телю Григо́рие, я́ко убо́гим и стра́нным име́ние твое́ расточи́л еси́, того́ ра́ди а́нгелы и Самаго́ Христа́ Го́спода прия́ти и на трапе́зе твое́й учреди́ти сподо́бился еси́, но помина́й на́с, мо́лим тя́, во святы́х твои́х моли́твах, и́хже досто́йно ны́не прино́сиши Го́споду.

Сла́ва, и ны́не: Не́бо небеси́ не довле́ет Тебе́, Влады́ко, но на́с ра́ди обнища́в всели́лся еси́ во утро́бу смиренному́дрыя Твоея́ Ма́тере, Ея́ же мольбы́ приими́ о на́с, Го́споди, и поми́луй ны́.

Пе́снь 4.

Ирмо́с: Услы́шах, Го́споди, слу́х Твоего́ смотре́ния, и просла́вих Тя́, Еди́не Человеколю́бче.

Кра́йним милосе́рдием, свя́те, стяжа́л еси́ некра́домое бога́тство, я́ко не су́щу ти́ еще́ во святи́тельстве, мно́гая во оби́тели твое́й чудеса́ соде́лал еси́.

Бо́жиим нарече́нием избра́н бы́л еси́ па́пою, но скры́лся еси́ в пусты́нныя места́, убега́я то́ль высо́каго са́на и почита́ния челове́ческаго, Бо́жиим же про́мыслом показа́ся то́ ме́сто, на не́м же бы́л еси́ в столпе́ о́гненне.

Егда́ Бо́жиим изволе́нием прия́л еси́ святи́тельский са́н, усугу́бил еси́ попече́ние о ни́щих и убо́гих, его́же да стя́жим и мы́, помоли́ся о на́с ко Го́споду.

Богоро́дичен: Мо́лим Тя́, Чи́стая, Я́же Бо́га безсе́менно заче́нши, при́сно моли́ти за рабы́ Твоя́.

Пе́снь 5.

Ирмо́с: Све́та Пода́телю, и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Восше́д на апо́стольский престо́л, я́ко свети́льник возсия́л еси́, свя́те Григо́рие, уче́нии я́же о Святе́й Тро́ице, Е́йже ны́не моли́ся о чту́щих тя́.

Не та́ко благоро́дством по пло́ти, я́коже смире́нием и милосе́рдием просия́л еси́, отону́дуже и даро́в невеще́ственных сподо́бился еси́.

Ца́рства Христо́ва насле́дник потща́лся еси́ бы́ти, зла́та и сребра́ не пощади́л еси́ убо́гих ра́ди, и сего́ ра́ди восприе́млеши от Христа́ стокра́тное мздовоздая́ние.

Богоро́дичен: Несказа́нно зача́тие и не пости́жен е́сть о́браз рожде́ния, Бо́га бо пло́тию родила́ еси́, и на рука́х Твои́х носи́ла, Ма́ти Де́во Пресвята́я, Его́же моли́ о воспева́ющих Тя́.

Пе́снь 6.

Ирмо́с: Бе́здна мя́ мно́га грехо́вная окружа́ет, и вопию́ Ти́, проро́ка подража́яй: от тли́ мя́, Го́споди, возведи́.

Бе́здну милосе́рдия, смире́ния ве́рх, и любве́ твоея́, свя́те Григо́рие, кто́ испове́сть, и́миже украси́л еси́ ду́шу твою́ для Ца́рства Христо́ва.

Любвеоби́льный исто́чник в тебе́, о́тче показа́ся, егда́ не то́чию о приходя́щих к тебе́ милосе́рдовав, но и во Иерусали́ме странноприи́мницу созда́л еси́, да упоко́ятся стра́ннии и ни́щии.

Тща́ние еди́но тебе́, о́тче, да не иму́щии пребу́дут безбе́дны, сего́ ра́ди в го́ру Сина́йскую, по вся́ ле́та живота́ твоего́, мно́гую на препита́ние и́ноком ми́лостыню посыла́л еси́.

Богоро́дичен: Бе́здну милосе́рдия и неисчерпа́емый исто́чник бла́гости, позна́хом Тя́, Богома́ти Де́во Влады́чице, те́м Тя́ велича́ем.

Конда́к, гла́с 2:

Я́ко Петро́ва престо́ла наме́стника, столпа́ Правосла́вия и милосе́рдия исто́чник, святи́теля Григо́рия, ве́рнии вси́ восхва́лим, то́й у́бо язы́ком веща́я, де́лом же соверша́я Спа́сова глаго́лания, сего́ ра́ди и просла́вился еси́, я́ко боже́ственный таи́нник Бо́жия благода́ти.

И́кос:

Не то́чию е́же стяжа́ти, но и своя́ име́ния со усе́рдием истощи́л еси́ на созида́ние оби́телей и дово́льствуя стра́нных и ни́щих, те́м Христо́с па́стыря и наме́стника Петро́ва престо́ла устроя́ет тя́, его́же нра́вы украси́лся еси́, и просла́вился еси́, я́ко боже́ственный таи́нник Бо́жия благода́ти.

Пе́снь 7.

Ирмо́с: О́бразу злато́му, на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси́, Бо́же оте́ц на́ших.

Жену́, усумне́вшуюся о пречи́стых та́йнах Христо́вых, уве́рил еси́, претвори́в хле́б в ви́д са́маго и́стаго те́ла челове́ческаго, и па́ки претвори́в е́ в хле́б.

Житие́м равноа́нгельным и ди́вными чудесы́ Це́рковь Христо́ву украси́л еси́, те́м лю́дие взыва́ху о тебе́: благослове́н Бо́г оте́ц на́ших.

Ду́х Святы́й в ви́де голуби́не пока́зовашеся над тобо́ю, егда́, о́тче, писа́л еси́ боговдохнове́нныя твоя́ бесе́ды, и́хже с любо́вию наслажда́ющеся, взыва́ем: благослове́н Бо́г оте́ц на́ших.

Богоро́дичен: Вся́кий ро́д и во́зраст чти́м Тебе́, Богороди́тельнице, и непреста́нно пое́м: благослове́н Бо́г оте́ц на́ших.

Пе́снь 8.

Ирмо́с: Неизрече́нною му́дростию соста́вльшаго вся́ческая Бо́га Сло́ва и от не су́щих во е́же бы́ти приве́дшаго, благослови́те, дела́, я́ко Го́спода, и превозноси́те во вся́ ве́ки.

Бесе́ды твоя́ во умиле́ние, святи́телю, приво́дят чту́щих я́, я́коже бо река́ вели́кая очища́ет ае́р, та́ко и си́и отго́нят злосмра́дие от ду́ш на́ших, при́сно взыва́ющих: Го́спода по́йте и превозноси́те во вся́ ве́ки.

Не то́чию препода́л еси́ Це́ркве Христо́ве исправле́ния, о́тче Григо́рие, но и Литурги́ю Преждеосвяще́нных, Ду́хом Бо́жиим наставля́емь, соста́вил еси́, ю́же свята́я Це́рковь соверша́я по вся́ Четыредеся́тницы, во умиле́нии взыва́ет: Го́спода по́йте и превозноси́те во вся́ ве́ки.

Собра́л еси́ сказа́ния жити́й святы́х во Итали́йстей стране́ богоуго́дно пожи́вших и поуче́ния душеспаси́тельная, и са́м сподо́бился еси́ впи́сан бы́ти в кни́гу живота́, те́м взыва́еши: Го́спода по́йте и превозноси́те во вся́ ве́ки.

Богоро́дичен: Из Отца́ проше́дшаго пре́жде ве́к безле́тнаго Бо́га Сло́ва, и в после́дняя возсия́вша из Де́вы, по́йте и превозноси́те во вся́ ве́ки.

Пе́снь 9.

Ирмо́с: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Боже́ственных твои́х слове́с наслади́вшеся, Григо́рие, в твое́й па́мяти торжеству́юще, вопие́м ти́: моли́ о на́с Го́спода, да изба́вимся прегреше́ний.

А́ще и те́лом подвиза́лся еси́ на земли́, но со безпло́тными сподо́бился предста́ти Го́споду на небеси́, иде́же моли́ся о на́с, свя́те Григо́рие.

Ду́хом в вы́шнем Сио́не живе́ши ны́не и назира́еши свы́ше призыва́ющия тя́, святи́телю Григо́рие, те́м мо́лим тя́, испроси́ на́м у Христа́ очище́ния и ве́лия ми́лости.

Богоро́дичен: Кре́посте моя́, Пречи́стая Богороди́тельнице, моли́ со все́ми святы́ми изба́вити мя́ гее́нны и ве́чнаго осужде́ния.

Свети́лен:

Тро́ичным све́том освеща́емь, и во све́тлости святы́х лику́я, о Григо́рие му́дре! Пода́ждь и на́м благода́ть, да воспева́ем непреста́нно Све́та Невече́рняго — Отца́, Сы́на и Свята́го Ду́ха.

Сла́ва, и ны́не: Предста́тельство Твое́ воспева́ем, Богороди́тельнице, заступи́ на́с от жите́йских страсте́й прило́га и просвети́ на́с све́том Твои́м, Влады́чице.

Yandex Metrika