Канон святителю Григорию Нисскому, епископу

Припев: Святи́телю, о́тче Григо́рие, моли́ Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 23 января (10 января ст. ст.)

Глас 5.

Пе́снь 1.

Ирмо́с: Коня́ и вса́дника в мо́ре Чермно́е сокруша́яй бра́ни, мы́шцею высо́кою, Христо́с истрясе́, Изра́иля же спасе́, побе́дную пе́снь пою́ща.

Бе́здна сы́й прему́дрости, и ра́зума сокро́вище, и самобла́гости Исто́чник сы́й, дае́ши ми́, Христе́, сла́вныя Твоея́ Це́ркве пе́сньми свети́льника пе́ти Григо́рия.

Приими́ учи́телей, Григо́рие, све́тлое удобре́ние, о́тче, убо́гое пе́ние твое́й приноси́мое от любве́ па́мяти, в не́йже Христа́ на́м уми́лостиви.

Обре́те очище́ну свяще́нную твою́ ду́шу от страсте́й тиме́ния Сия́ние непристу́пное. Те́мже, я́ко всели́вся в тя́, о́тче, све́т тя́ показа́, науча́юща земны́я концы́.

Сло́вом, священнотаи́нниче, бога́тым же и му́дрым, честну́ю Це́рковь богосло́вити научи́л еси́ Еди́ницу Тричи́сленную и Тро́ицу Сопресто́льну и Единоче́стну, о Григо́рие!

Богоро́дичен: Ве́ра да вменя́ется еди́на, а не показа́ние су́щих па́че ума́ чуде́с, Богороди́тельнице Де́во, Твои́х, и́бо Непостижи́маго Бо́га Сло́ва родила́ еси́, обле́кшася в челове́чество.

Пе́снь 3.

Ирмо́с: Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую, на недви́жимем, Христе́, ка́мени за́поведей Твои́х, Це́рковь Твою́ утверди́, Еди́не Бла́же и Человеколю́бче.

Пло́ти у́бо влады́це уму́ взыгра́ния, Всецарю́ же у́м покори́л еси́. Те́мже, непреткнове́нно пу́ть за́поведей проше́д, ты́ Тро́ицы оби́телище бы́л еси́ ле́потно, Григо́рие.

Подо́бно я́ростное у́бо на зми́я души́ вооружи́л еси́, всеблаже́нне, жела́ние же Бо́гу все́ ку́пно просте́р, к недомы́сленней и неизме́нней добро́те впери́л еси́, преподо́бне.

Дея́нию виде́ние, о́тче, приложи́л еси́, те́мже о́бласть Це́ркве тебе́ принося́, вруча́ет Христо́с, ю́же у́бо непоро́чно я́ко неботаи́нник упра́вил еси́ изря́днейший, всеблаже́нне Григо́рие.

Проходя́ доброде́телей преде́л, Григо́рие, и восхожде́ния в се́рдцы твое́м ты́ полага́я, от земли́ взя́лся еси́ непреста́нным тече́нием к небе́сному жи́тельству пре́жде от пло́ти изше́ствия твоего́.

Богоро́дичен: Ты́, Ма́ти Бо́жия, несочта́нно родила́ еси́ из нетле́ннаго Отца́ Возсия́вшаго без боле́зней ма́терних. Те́мже Тя́, Богоро́дицу, воплоще́ннаго ро́ждшую Сло́ва, правосла́вно пропове́дуем.

Конда́к, гла́с 2.

Це́ркве Боже́ственный иера́рх и прему́дрости честны́й тайноглаго́льник, Нисси́йский бо́дрый у́м, Григо́рий, со а́нгелы ликовству́я и наслажда́яся Боже́ственным све́том, мо́лится непреста́нно о все́х на́с.

Седа́лен, гла́с 3.

Боже́ственное осия́ние насле́довал еси́, житие́ невеще́ственно пожи́в, тезоимени́тным свяще́нством просия́л еси́, преесте́ственно бо уясни́в уче́ньми, правосла́вием ми́р утверди́л еси́, о́тче преподо́бне. Христа́ Бо́га моли́ дарова́ти на́м ве́лию ми́лость.

Пе́снь 4.

Ирмо́с: Боже́ственное Твое́ разуме́в истоща́ние прозорли́во, Авваку́м, Христе́, со тре́петом вопия́ше Тебе́: во спасе́ние люде́й Твои́х, спасти́ пома́занныя Твоя́ прише́л еси́.

Я́ко сто́лп, ви́ден бы́л еси́ всесве́тел житие́м же и сло́вом, те́плою правосла́вия, Григо́рие, разжже́н ре́вностию, Но́ваго Изра́иля предводя́.

Благода́ть прии́м духо́вную, ве́тхаго зако́на раздра́л еси́ оде́жду писа́ния и сокрове́нную добро́ту на́м ра́зума откры́л еси́.

Все́х доброде́телей ви́ды Христо́с показу́я блаже́нствы, Григо́рие, тебе́ вве́ри, я́ко служи́телю Сло́ва, простра́нно сказа́ти конце́м.

Богоро́дичен: Без смеше́ния у́бо зачала́ еси́ нерастле́нно во утро́бе, и пре́жде боле́зни родила́ еси́, и по рождестве́ Де́ва, Бо́га пло́тию ро́ждши, сохрани́лася еси́.

Пе́снь 5.

Ирмо́с: Одея́йся све́том, я́ко ри́зою, к Тебе́ у́тренюю и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

Ты́, я́ко о́гнь, попали́л еси́ ересе́й терноно́сная плете́ния слове́с, ве́рных же умы́ просвети́л еси́, блаже́нне, тайново́дче Григо́рие.

Евно́миево ты́ изобличи́л еси́ беззако́ние и сего́ словеса́ неудобоизбе́жная, сете́й же пру́гла зе́льная, я́ко паучи́нная тка́ния, разори́л еси́.

Обличи́л еси́, всеизря́днейше, безбо́жнейшаго Македо́ния, Боже́ственный Ду́х безсту́дно укори́вшаго, я́ко неприча́стна сему́ су́ща, Григо́рие.

Богоро́дичен: Ты́, пра́вду же и избавле́ние на́м ро́ждши — Христа́ — безсе́менно, свобо́дно соде́яла еси́ от кля́твы, Богоро́дице, естество́ пра́отца.

Пе́снь 6.

Ирмо́с: Неи́стовствующееся бу́рею душетле́нною, Влады́ко Христе́, страсте́й мо́ре укроти́ и от тли́ возведи́ мя́, я́ко Благоутро́бен.

Смире́нное мудрова́ние стяжа́в, все́м же кро́ток боре́ц показа́лся еси́, Григо́рие, проти́ву тща́щимся, ума́лити сла́ву Христо́ву.

А́риево отчужде́ние Тро́ицы, сло́вом бога́тным де́рзостное разделе́ние, Григо́рие, и всеконе́чно низложи́л еси́ мудрова́ния.

Неуче́нно соедине́ние Тро́ическое смеше́ние му́дрствуя, тобо́ю Саве́ллий обличи́ся богобо́рец, Григо́рие всеблаже́нне.

Богоро́дичен: Де́ва роди́ и, ро́ждши, пребы́сть чиста́, на рука́х Нося́щаго вся́ческая я́ко вои́стинну, Де́во Ма́ти, носи́вши.

Конда́к, гла́с 1.

О́ком душе́вным бо́дрствуя, святи́телю, бо́др па́стырь яви́лся еси́ ми́ру, и жезло́м му́дрости твоея́, и те́плым предста́тельством твои́м вся́ отгна́л еси́ злосла́вныя, я́ко во́лки, невре́дно соблю́д ста́до, Григо́рие всему́дре.

И́кос:

Ле́ностию окая́нный отпадо́х и к сме́рти усну́х, но я́ко па́стырь бо́дрейший воздви́гни мя́, о́тче, и стра́сти моя́ успи́, зле́ му́чащия мя́, я́ко да, воста́в, чи́сте воспою́ твое́ светоно́сное преставле́ние, е́же Влады́ка вселе́нныя просла́ви досто́йно, я́ко раба́ ве́рнейшаго, я́ко учи́теля всему́драго, я́ко дру́га и таи́нника и я́ко строи́теля Свои́х преда́ний, и́хже до́бре сохрани́л еси́ пома́зание нескве́рно, Григо́рие всему́дре.

Пе́снь 7.

Ирмо́с: Превозноси́мый отце́в Госпо́дь, пла́мень угаси́, о́троки ороси́, согла́сно пою́щия: Бо́же, благослове́н еси́.

Жела́нием соедини́вся Трисо́лнечнаго Божества́ сия́нию, Григо́рие, все́м, я́ко зерца́ло, сия́я, блиста́еши све́та зари́.

Сокро́вище — словеса́ твоя́ оте́чески оста́вил еси́, обы́чай души́ очище́ние и ра́зума исполне́ние ве́рою песнопою́щим: Бо́же, благослове́н еси́.

Пе́рваго Ума́ и вино́вна, Отца́ возвести́л еси́, Сло́ва у́бо Роди́теля, ку́пно же Производи́теля Ду́ха, Тро́ицу песнопоя́: Бо́же, благослове́н еси́.

Богоро́дичен: Еди́ну у́бо Ипоста́сь во двою́ естеству́, Всенепоро́чная, родила́ еси́ воплоще́нна Бо́га, Ему́же вси́ песнопое́м: Бо́же, благослове́н еси́.

Пе́снь 8.

Ирмо́с: Тебе́, Вседе́телю, в пещи́ о́троцы, всеми́рный ли́к спле́тше, поя́ху: дела́ вся́кая, Го́спода по́йте и превозноси́те во вся́ ве́ки.

Всю́ зарю́ Уте́шителеву, блаже́нне, прия́л еси́ наше́дшую, зовя́, преподо́бне: вся́ дела́, Го́спода по́йте и превозноси́те во вся́ ве́ки.

Истека́ют на́м по Боже́ственному сло́ву Христо́ву из чре́ва твоего́ ре́ки ра́зума: вои́стинну бо исто́чника непреста́нна благода́ть показа́ ми́ру тя́, о́тче, во ве́ки.

О, чу́дныя бра́тския дво́ицы, пло́тию же сро́дныя и боже́ственныя мудрова́нием! Сию́ чту́ще, Васи́лия досто́йно вку́пе с Григо́рием почти́м во ве́ки.

Све́т мы́сленный, в тя́ всели́вся, о́тче, свещу́ тя́ негаси́му ми́рови поста́вил е́сть, Еди́наго Све́та пою́ща, Трисо́лнечна и Боже́ственна, Его́же превозно́сим во вся́ ве́ки.

Богоро́дичен: Тебе́, па́че ума́ Богому́жным сло́вом ро́ждшую Го́спода и де́вствующую, вся́ дела́, досто́йно благослови́м и превозно́сим во вся́ ве́ки.

Пе́снь 9.

Ирмо́с: Иса́ие, лику́й, Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к и́мя Ему́, Его́же велича́юще, Де́ву ублажа́ем.

Исправле́ний же и слове́с твои́х блиста́ния, Григо́рие, восхвали́ти у́м не моги́й я́ве на́ш, испове́дует побежде́ние благопохва́льно, твое́ же возвеща́ет па́че си́лы похвале́ние.

Таи́нниче небе́сных изря́днейше, Тро́ице ны́не предстоя́ со апо́стольским ли́ком и проро́ческим, му́чеников же, и пра́ведных, и патриа́рхов, помяни́ на́с, воспева́ющих твою́ па́мять, Григо́рие.

Назира́еши свы́ше, защища́я ны́не, святи́телю Це́ркви Христо́вы, побе́ды да́руя ве́рным лю́дем, и рабо́тное сокруши́ и́го, твоя́ спаса́я певцы́ моли́твами твои́ми, Григо́рие.

Богоро́дичен: Я́ко ро́ждши, Всечи́стая, тва́ри Соде́теля, по всему́ Рожде́ннаго но́сиши нача́ло, неоску́дное иму́щи вели́чие и преесте́ственное. Те́мже, Рождеству́ Твоему́ покланя́ющеся, Тя́ сла́вим.

Свети́лен.

Па́стыря до́браго, Григо́рия всему́драго, Ниссе́ев председа́теля, Васи́лия прему́драго единонра́внаго бра́та по пло́ти, пра́зднственными пе́сньми просла́вим вси́.

Пѣ́снь а҃.

І҆рмо́съ: Конѧ̀ и҆ вса́дника въ мо́ре чермно́е, сокрꙋша́ѧй бра̑ни, мы́шцею высо́кою хрⷭ҇то́съ и҆стрѧсѐ, і҆и҃лѧ же спасѐ, побѣ́днꙋю пѣ́снь пою́ща.

Бе́здна сы́й премꙋ́дрости, и҆ ра́зꙋма сокро́вище, и҆ самобла́гости и҆сто́чникъ сы́й дае́ши мѝ, хрⷭ҇тѐ, сла́вныѧ твоеѧ̀ цр҃кве пѣ́сньми свѣти́льника пѣ́ти григо́рїа.

Прїимѝ, ᲂу҆чи́телей, григо́рїе, свѣ́тлое ᲂу҆добре́нїе, ѻ҆́тче, ᲂу҆бо́гое пѣ́нїе твое́й приноси́мое ѿ любвѐ па́мѧти, въ не́йже хрⷭ҇та̀ на́мъ ᲂу҆ми́лостиви.

Ѡ҆брѣ́те ѡ҆чище́нꙋ свѧще́ннꙋю твою̀ дꙋ́шꙋ ѿ страсте́й тимѣ́нїѧ, сїѧ́нїе непристꙋ́пное. Тѣ́мже ꙗ҆́кѡ всели́всѧ въ тѧ̀, ѻ҆́тче, свѣ́тъ тѧ̀ показа̀, наꙋча́юща земны̑ѧ концы̀.

Сло́вомъ, сщ҃еннотаи́нниче, бога́тымъ же и҆ мꙋ́дрымъ, чⷭ҇тнꙋ́ю цр҃ковь бг҃осло́вити наꙋчи́лъ є҆сѝ є҆ди́ницꙋ тричи́сленнꙋю, и҆ трⷪ҇цꙋ сопресто́льнꙋ и҆ є҆диноче́стнꙋ, ѽ григо́рїе.

Бг҃оро́диченъ: Вѣ́ра да вмѣнѧ́етсѧ є҆ди́на, а҆ не показа́нїе сꙋ́щихъ па́че ᲂу҆ма̀ чꙋде́съ, бг҃ороди́тельнице дв҃о, твои́хъ: и҆́бо непостижи́маго бг҃а сло́ва родила̀ є҆сѝ, ѡ҆бле́кшасѧ въ человѣ́чество.

Пѣ́снь г҃.

І҆рмо́съ: Водрꙋзи́вый на ничесо́мже зе́млю повелѣ́нїемъ твои́мъ, и҆ повѣ́сивый неѡдержи́мѡ тѧготѣ́ющꙋю, на недви́жимѣмъ, хрⷭ҇тѐ, ка́мени за́повѣдей твои́хъ, цр҃ковь твою̀ ᲂу҆твердѝ, є҆ди́не бл҃же и҆ чл҃вѣколю́бче.

Пло́ти ᲂу҆́бѡ влⷣцѣ ᲂу҆мꙋ̀ взыгра̑нїѧ, всецр҃ю́ же ᲂу҆́мъ покори́лъ є҆сѝ. Тѣ́мже, непреткнове́ннѡ пꙋ́ть за́повѣдей проше́дъ, ты̀ трⷪ҇цы ѡ҆би́телище бы́лъ є҆сѝ лѣ́потно, григо́рїе.

Подо́бнѡ ꙗ҆́ростное ᲂу҆́бѡ на ѕмі́ѧ дꙋшѝ воѡрꙋжи́лъ є҆сѝ, всебл҃же́нне, жела́нїе же бг҃ꙋ всѐ кꙋ́пнѡ просте́ръ, къ недомы́сленнѣй и҆ неизмѣ́ннѣй добро́тѣ впери́лъ є҆сѝ, прпⷣбне.

Дѣѧ́нїю видѣ́нїе, ѻ҆́тче, приложи́лъ є҆сѝ, тѣ́мже ѻ҆́бласть це́ркве тебѣ̀ приносѧ̀ врꙋча́етъ хрⷭ҇то́съ, ю҆́же ᲂу҆́бѡ непоро́чнѡ ꙗ҆́кѡ неботаи́нникъ ᲂу҆пра́вилъ є҆сѝ и҆зрѧ́днѣйшїй, всеблаже́нне григо́рїе.

Проходѧ̀ добродѣ́телей предѣ́лъ, григо́рїе, и҆ восхождє́нїѧ въ се́рдцы твое́мъ ты̀ полага́ѧ, ѿ землѝ взѧ́лсѧ є҆сѝ, непреста́ннымъ тече́нїемъ къ нбⷭ҇номꙋ жи́тельствꙋ, пре́жде ѿ пло́ти и҆зше́ствїѧ твоегѡ̀.

Бг҃оро́диченъ: Ты̀, мт҃и бж҃їѧ, несочта́ннѡ родила̀ є҆сѝ и҆зъ нетлѣ́ннагѡ ѻ҆ц҃а̀ возсїѧ́вшаго, безъ болѣ́зней ма́тернихъ. Тѣ́мже тѧ̀ бцⷣꙋ, воплоще́ннаго ро́ждшꙋю сло́ва, правосла́внѡ проповѣ́дꙋемъ.

Конда́къ, гла́съ в҃.

Цр҃кве бж҃е́ственный і҆ера́рхъ, и҆ премꙋ́дрости честны́й тайноглаго́льникъ, нѷссі́йскїй бо́дрый ᲂу҆́мъ григо́рїй, со а҆́гг҃лы ликовствꙋ́ѧ, и҆ наслажда́ѧсѧ бж҃е́ственнымъ свѣ́томъ, мо́литсѧ непреста́ннѡ ѡ҆ всѣ́хъ на́съ.

Сѣда́ленъ, гла́съ г҃.

Бжⷭ҇твенное ѡ҆сїѧ́нїе наслѣ́довалъ є҆сѝ, житїѐ невеще́ственно пожи́въ, тезоимени́тнымъ свѧще́нствомъ просїѧ́лъ є҆сѝ: преесте́ственнѡ бо ᲂу҆ѧсни́въ ᲂу҆че́ньми, правосла́вїемъ мі́ръ ᲂу҆тверди́лъ є҆сѝ, ѻ҆́тче прпⷣбне, хрⷭ҇та̀ бг҃а молѝ, дарова́ти на́мъ ве́лїю ми́лость.

Пѣ́снь д҃.

І҆рмо́съ: Бжⷭ҇твенное твоѐ разꙋмѣ́въ и҆стоща́нїе, прозорли́вѡ а҆ввакꙋ́мъ, хрⷭ҇тѐ, со тре́петомъ вопїѧ́ше тебѣ̀: во спасе́нїе люде́й твои́хъ, спастѝ пома̑занныѧ твоѧ̑ прише́лъ є҆сѝ.

Ꙗ҆́кѡ сто́лпъ ви́дѣнъ бы́лъ є҆сѝ всесвѣ́телъ, житїе́мъ же и҆ сло́вомъ, те́плою правосла́вїѧ, григо́рїе, разжже́нъ ре́вностїю, но́ваго і҆и҃лѧ предводѧ̀.

Бл҃года́ть прїи́мъ дх҃о́внꙋю, ве́тхагѡ зако́на раздра́лъ є҆сѝ ѻ҆де́ждꙋ писа́нїѧ, и҆ сокрове́ннꙋю добро́тꙋ на́мъ ра́зꙋма ѿкры́лъ є҆сѝ.

Всѣ́хъ добродѣ́телей ви́ды хрⷭ҇то́съ показꙋ́ѧ блаже́нствы, григо́рїе, тебѣ̀ ввѣ́ри, ꙗ҆́кѡ слꙋжи́телю сло́ва, простра́ннѡ сказа́ти концє́мъ.

Бг҃оро́диченъ: Безъ смѣше́нїѧ ᲂу҆́бѡ зачала̀ є҆сѝ нерастлѣ́ннѡ во ᲂу҆тро́бѣ и҆ пре́жде болѣ́зни родила̀ є҆сѝ, и҆ по ржⷭ҇твѣ̀ дв҃а, бг҃а пло́тїю ро́ждши, сохрани́ласѧ є҆сѝ.

Пѣ́снь є҃.

І҆рмо́съ: Ѡ҆дѣѧ́йсѧ свѣ́томъ, ꙗ҆́кѡ ри́зою, къ тебѣ̀ ᲂу҆́тренюю, и҆ тебѣ̀ зовꙋ̀: дꙋ́шꙋ мою̀ просвѣтѝ ѡ҆мраче́ннꙋю, хрⷭ҇тѐ, ꙗ҆́кѡ є҆ди́нъ бл҃гоꙋтро́бенъ.

Ты̀, ꙗ҆́кѡ ѻ҆́гнь, попали́лъ є҆сѝ є҆ресе́й тернонѡ́снаѧ плетє́нїѧ слове́съ, вѣ́рныхъ же ᲂу҆мы̀ просвѣти́лъ є҆сѝ, блаже́нне тайново́дче григо́рїе.

Є҆ѵно́мїево ты̀ и҆з̾ѡбличи́лъ є҆сѝ беззако́нїе, и҆ сегѡ̀ словеса̀ неꙋдобоизбѣ̑жнаѧ: сѣте́й же прꙋ̑гла ѕѣ̑льнаѧ, ꙗ҆́кѡ паꙋчи̑ннаѧ тка̑нїѧ, разори́лъ є҆сѝ.

Ѡ҆бличи́лъ є҆сѝ, всеизрѧ́днѣйше, безбо́жнѣйшаго македо́нїа, бжⷭ҇твенный дх҃ъ безстꙋ́днѡ ᲂу҆кори́вшаго, ꙗ҆́кѡ неприча́стна семꙋ̀ сꙋ́ща, григо́рїе.

Бг҃оро́диченъ: Ты̀ пра́вдꙋ же и҆ и҆збавле́нїе на́мъ ро́ждши хрⷭ҇та̀ безсѣ́меннѡ, свобо́дно содѣ́ѧла є҆сѝ ѿ клѧ́твы, бцⷣе, є҆стество̀ пра́ѻтца.

Пѣ́снь ѕ҃.

І҆рмо́съ: Неи́стовствꙋющеесѧ бꙋ́рею дꙋшетлѣ́нною, влⷣко хрⷭ҇тѐ, страсте́й мо́ре ᲂу҆кротѝ, и҆ ѿ тлѝ возведѝ мѧ̀, ꙗ҆́кѡ бл҃гоꙋтро́бенъ.

Смире́нное мꙋдрова́нїе стѧжа́въ, всѣ̑мъ же кро́токъ боре́цъ показа́лсѧ є҆сѝ, григо́рїе, проти́вꙋ тща́щымсѧ ᲂу҆ма́лити сла́вꙋ хрⷭ҇то́вꙋ.

А҆́рїево ѿчꙋжде́нїе трⷪ҇цы, сло́вомъ бога́тнымъ де́рзостное раздѣле́нїе, григо́рїе, и҆ всеконе́чнѡ низложи́лъ є҆сѝ мꙋдрова̑нїѧ.

Неꙋче́ннѡ соедине́нїе трⷪ҇ческое, смѣше́нїе мꙋ́дрствꙋѧ, тобо́ю саве́ллїй ѡ҆бличи́сѧ бг҃обо́рецъ, григо́рїе всебл҃же́нне.

Бг҃оро́диченъ: Дв҃а родѝ, и҆ ро́ждши пребы́сть чиста̀, на рꙋка́хъ носѧ́щаго всѧ́чєскаѧ, ꙗ҆́кѡ вои́стиннꙋ, дв҃о мт҃и, носи́вши.

Конда́къ, гла́съ а҃.

Ѻ҆́комъ дꙋше́внымъ бо́дрствꙋѧ, ст҃и́телю, бо́дръ па́стырь ꙗ҆ви́лсѧ є҆сѝ мі́рꙋ: и҆ жезло́мъ мꙋ́дрости твоеѧ̀, и҆ те́плымъ предста́тельствомъ твои́мъ, всѧ̑ ѿгна́лъ є҆сѝ ѕлосла̑вныѧ ꙗ҆́кѡ во́лки, невре́дно соблю́дъ ста́до, григо́рїе всемꙋ́дре.

І҆́косъ:

Лѣ́ностїю ѻ҆каѧ́нный ѿпадо́хъ, и҆ къ сме́рти ᲂу҆снꙋ́хъ: но ꙗ҆́кѡ па́стырь бо́дрѣйшїй воздви́гни мѧ̀, ѻ҆́тче, и҆ стра̑сти моѧ̑ ᲂу҆спѝ, ѕлѣ̀ мꙋ́чащыѧ мѧ̀: ꙗ҆́кѡ да воста́въ, чи́стѣ воспою̀ твоѐ свѣтоно́сное преставле́нїе, є҆́же влⷣка вселе́нныѧ просла́ви досто́йнѡ: ꙗ҆́кѡ раба̀ вѣ́рнѣйшаго, ꙗ҆́кѡ ᲂу҆чи́телѧ всемꙋ́драго, ꙗ҆́кѡ дрꙋ́га и҆ таи́нника, и҆ ꙗ҆́кѡ строи́телѧ свои́хъ преда́нїй, и҆́хже до́брѣ сохрани́лъ є҆сѝ пома́занїе нескве́рнѡ, григо́рїе всемꙋ́дре.

Пѣ́снь з҃.

І҆рмо́съ: Превозноси́мый ѻ҆тцє́въ гдⷭ҇ь, пла́мень ᲂу҆гасѝ, ѻ҆́троки ѡ҆росѝ, согла́снѡ пою́щыѧ: бж҃е, бл҃гослове́нъ є҆сѝ.

Жела́нїемъ соедини́всѧ трисо́лнечнагѡ бжⷭ҇тва̀ сїѧ́нїю, григо́рїе, всѣ̑мъ ꙗ҆́кѡ зерца́ло сїѧ́ѧ, блиста́еши свѣ́та зари̑.

Сокро́вище словеса̀ твоѧ̑, ѻ҆ч҃ески ѡ҆ста́вилъ є҆сѝ, ѻ҆бы́чай дꙋшѝ ѡ҆чище́нїе, и҆ ра́зꙋма и҆сполне́нїе, вѣ́рою пѣснопою́щымъ: бж҃е, благослове́нъ є҆сѝ.

Пе́рваго ᲂу҆ма̀, и҆ вино́вна, ѻ҆ц҃а̀ возвѣсти́лъ є҆сѝ, сло́ва ᲂу҆́бѡ роди́телѧ, кꙋ́пнѡ же производи́телѧ дх҃а, трⷪ҇цꙋ пѣснопоѧ̀: бж҃е, благослове́нъ є҆сѝ.

Бг҃оро́диченъ: Є҆ди́нꙋ ᲂу҆́бѡ ѵ҆поста́сь во двою̀ є҆стєствꙋ̀, всенепоро́чнаѧ, родила̀ є҆сѝ воплоще́нна бг҃а, є҆мꙋ́же всѝ пѣснопое́мъ: бж҃е, бл҃гослове́нъ є҆сѝ.

Пѣ́снь и҃.

І҆рмо́съ: Тебѣ̀ вседѣ́телю, въ пещѝ ѻ҆́троцы всемі́рный ли́къ спле́тше, поѧ́хꙋ: дѣла̀ всѧ̑каѧ, гдⷭ҇а по́йте, и҆ превозноси́те во всѧ̑ вѣ́ки.

Всю̀ зарю̀ ᲂу҆тѣ́шителевꙋ, блаже́нне, прїѧ́лъ є҆сѝ наше́дшꙋю, зовѧ̀, преподо́бне: всѧ̑ дѣла̀, гдⷭ҇а по́йте, и҆ превозноси́те во всѧ̑ вѣ́ки.

И҆стека́ютъ на́мъ, по бжⷭ҇твенномꙋ сло́вꙋ хрⷭ҇то́вꙋ, и҆зъ чре́ва твоегѡ̀ рѣ́ки ра́зꙋма: вои́стиннꙋ бо и҆сто́чника непреста́нна благода́ть показа̀ мі́рꙋ тѧ̀, ѻ҆́тче, во вѣ́ки.

Ѽ чꙋ̑дныѧ бра̑тскїѧ дво́ицы, пло́тїю же срѡ́дныѧ, и҆ бжⷭ҇твєнныѧ мꙋдрова́нїемъ! сїю̀ чтꙋ́ще, васі́лїа досто́йнѡ вкꙋ́пѣ съ григо́рїемъ почти́мъ во вѣ́ки.

Свѣ́тъ мы́сленный въ тѧ̀ всели́всѧ, ѻ҆́тче, свѣщꙋ̀ тѧ̀ негаси́мꙋ мі́рови поста́вилъ є҆́сть, є҆ди́наго свѣ́та пою́ща трисо́лнечна и҆ бжⷭ҇твенна, є҆го́же превозно́симъ во всѧ̑ вѣ́ки.

Бг҃оро́диченъ: Тебѐ па́че ᲂу҆ма̀ бг҃омꙋ́жнымъ сло́вомъ ро́ждшꙋю гдⷭ҇а и҆ дѣ́вствꙋющꙋю, всѧ̑ дѣла̀ досто́йнѡ благослови́мъ, и҆ превозно́симъ во всѧ̑ вѣ́ки.

Пѣ́снь ѳ҃.

І҆рмо́съ: И҆са́їе ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ чл҃вѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆блажа́емъ.

И҆справле́нїй же и҆ слове́съ твои́хъ блиста̑нїѧ, григо́рїе, восхвали́ти ᲂу҆́мъ не могі́й ꙗ҆́вѣ на́шъ, и҆сповѣ́дꙋетъ побѣжде́нїе благопохва́льно, твоѐ же возвѣща́етъ па́че си́лы похвале́нїе.

Таи́нниче нбⷭ҇ныхъ и҆зрѧ́днѣйше, трⷪ҇цѣ ны́нѣ предстоѧ̀ со а҆пⷭ҇льскимъ ли́комъ, и҆ прⷪ҇ро́ческимъ, мч҃никѡвъ же и҆ пра́ведныхъ, и҆ патрїа́рхѡвъ, помѧнѝ на́съ, воспѣва́ющихъ твою̀ па́мѧть, григо́рїе.

Назира́еши свы́ше защища́ѧ ны́нѣ, свѧти́телю, цр҃кви хрⷭ҇тѡ́вы, побѣ̑ды да́рꙋѧ вѣ̑рнымъ лю́демъ и҆ рабо́тное сокрꙋшѝ и҆́го, твоѧ̑ спаса́ѧ пѣвцы̀ мл҃твами твои́ми, григо́рїе.

Бг҃оро́диченъ: Ꙗ҆́кѡ ро́ждши, всечи́стаѧ, тва́ри содѣ́телѧ, по всемꙋ̀ рожде́ннаго но́сиши нача́ло, неѻскꙋ́дное и҆мꙋ́щи вели́чїе и҆ преесте́ственное. Тѣ́мже ржⷭ҇твꙋ̀ твоемꙋ̀ покланѧ́ющесѧ, тѧ̀ сла́вимъ.

Свѣти́ленъ.

Па́стырѧ до́браго григо́рїа всемꙋ́драго, нѷссе́євъ предсѣда́телѧ, васі́лїа премꙋ́драго є҆динонра́внаго бра́та по пло́ти, пра́зднственными пѣ́сньми просла́вимъ, всѝ.

Житие святителя Григория Нисского

Свя­ти­тель Гри­го­рий, епи­скоп Нис­ский, был млад­шим бра­том свя­ти­те­ля Ва­си­лия Ве­ли­ко­го (па­мять 1 ян­ва­ря). Рож­де­ние и вос­пи­та­ние его сов­па­ло с са­мым раз­га­ром ари­ан­ских спо­ров. По­лу­чив пре­крас­ное об­ра­зо­ва­ние, он был од­но вре­мя на­став­ни­ком крас­но­ре­чия. В 372 го­ду был ру­ко­по­ло­жен свя­тым Ва­си­ли­ем Ве­ли­ким во епи­ско­па го­ро­да Нис­сы в Кап­па­до­кии.

Свя­той Гри­го­рий был твер­дым рев­ни­те­лем пра­во­сла­вия и вме­сте со сво­им бра­том Ва­си­ли­ем Ве­ли­ким бо­рол­ся про­тив ари­ан­ской ере­си, пре­тер­пе­вая го­не­ния со сто­ро­ны ари­ан, ко­то­ры­ми в 376 го­ду был лож­но об­ви­нен в непра­виль­ном упо­треб­ле­нии цер­ков­но­го иму­ще­ства, ли­шен ка­фед­ры и со­слан в Ан­ки­ру. На сле­ду­ю­щий год свя­той Гри­го­рий был вновь за­оч­но низ­ло­жен со­бо­ром ари­ан­ству­ю­щих епи­ско­пов, но про­дол­жал укреп­лять свою паст­ву в пра­во­сла­вии, пе­ре­хо­дя с ме­ста на ме­сто. По­сле смер­ти ца­ря Ва­лен­та (378) был воз­вра­щен на свою ка­фед­ру и с ра­до­стью при­нят сво­ей паст­вой. В 379 го­ду скон­чал­ся брат его, свя­той Ва­си­лий Ве­ли­кий. Свя­той Гри­го­рий тя­же­ло пе­ре­жи­вал по­те­рю сво­е­го на­став­ни­ка. Он на­пи­сал ему над­гроб­ное сло­во и за­кон­чил со­став­лен­ное свя­ти­те­лем Ва­си­ли­ем опи­са­ние ше­сти дней тво­ре­ния, так на­зы­ва­е­мый "Ше­стод­нев". В том же го­ду свя­той Гри­го­рий участ­во­вал в Ан­тио­хий­ском Со­бо­ре про­тив ере­ти­ков, не чтив­ших непо­роч­но­го дев­ства Бо­жи­ей Ма­те­ри, и дру­гих, по­кло­няв­ших­ся Бо­го­ма­те­ри как Бо­же­ству. Он был из­бран Со­бо­ром для обо­зре­ния церк­вей в Ара­вии и Па­ле­стине и утвер­жде­ния пра­во­слав­но­го уче­ния о Пре­свя­той Бо­го­ро­ди­це. На об­рат­ном пу­ти свя­той Гри­го­рий по­се­тил Иеру­са­лим и по­кло­нил­ся свя­тым ме­стам.

В 381 го­ду свя­той Гри­го­рий был од­ним из глав­ных де­я­те­лей II Все­лен­ско­го Со­бо­ра, со­зван­но­го в Кон­стан­ти­но­по­ле про­тив ере­си Ма­ке­до­ния, непра­виль­но учив­ше­го о сущ­но­сти Свя­то­го Ду­ха, На этом Со­бо­ре по ини­ци­а­ти­ве свя­то­го Гри­го­рия был до­пол­нен Ни­кей­ский Сим­вол ве­ры.

Вме­сте с дру­ги­ми епи­ско­па­ми свя­той Гри­го­рий утвер­дил в сане Кон­стан­ти­но­поль­ско­го ар­хи­пас­ты­ря свя­то­го Гри­го­рия Бо­го­сло­ва.

В 383 го­ду свя­той Гри­го­рий Нис­ский был участ­ни­ком Со­бо­ра в Кон­стан­ти­но­по­ле, где про­из­нес сло­во о Бо­же­стве Сы­на и Свя­то­го Ду­ха. В 386 го­ду он сно­ва был в Кон­стан­ти­но­по­ле, и ему бы­ло по­ру­че­но про­из­не­сти над­гроб­ное сло­во по­чив­шей ца­ри­це Пла­кил­ле. В 394 го­ду свя­той Гри­го­рий вновь при­сут­ству­ет в Кон­стан­ти­но­по­ле на По­мест­ном Со­бо­ре, со­зван­ном для ре­ше­ния цер­ков­ных дел в Ара­вии.

Свя­ти­тель Гри­го­рий Нис­ский был пла­мен­ный за­щит­ник пра­во­слав­ных дог­ма­тов и рев­ност­ный учи­тель сво­ей паст­вы, а так­же ми­ло­сти­вый и со­стра­да­тель­ный отец сво­их па­со­мых, за­ступ­ник их пе­ред су­дья­ми; от­ли­чал­ся ве­ли­ко­ду­ши­ем, тер­пе­ни­ем и ми­ро­лю­би­ем.

До­жив до глу­бо­кой ста­ро­сти, свя­той Гри­го­рий Нис­ский мир­но скон­чал­ся вско­ре по­сле Кон­стан­ти­но­поль­ско­го Со­бо­ра. Вме­сте со сво­и­ми ве­ли­ки­ми совре­мен­ни­ка­ми, свя­ти­те­ля­ми Ва­си­ли­ем Ве­ли­ким и Гри­го­ри­ем Бо­го­сло­вом, свя­ти­тель Гри­го­рий Нис­ский имел зна­чи­тель­ное вли­я­ние на цер­ков­ную жизнь сво­е­го вре­ме­ни. Его сест­ра, свя­тая Мак­ри­на, пи­са­ла ему: "Ты из­ве­стен и го­ро­дам, и на­род­ным со­бра­ни­ям, и це­лым об­ла­стям: Церк­ви по­сы­ла­ют и зо­вут те­бя на по­мощь". Свя­ти­тель Гри­го­рий во­шел в ис­то­рию как один из са­мых вид­ных бо­го­сло­вов и де­я­те­лей хри­сти­ан­ской мыс­ли IV ве­ка. Об­ла­дая глу­бо­ким фило­соф­ским да­ром, он по­ни­мал фило­со­фию толь­ко как сред­ство для бо­лее глу­бо­ко­го про­ник­но­ве­ния в под­лин­ный смысл Бо­же­ствен­но­го от­кро­ве­ния.

Свя­той Гри­го­рий оста­вил по­сле се­бя мно­го со­чи­не­ний дог­ма­ти­че­ско­го ха­рак­те­ра, сло­ва и по­уче­ния.


См. так­же: "Жи­тие свя­то­го от­ца на­ше­го Гри­го­рия, епи­ско­па Нис­ско­го" в из­ло­же­нии свт. Ди­мит­рия Ро­стов­ско­го.