Канон святителю Мартину, папе Римскому

Припев: Святи́телю о́тче Марти́не, моли́ Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 27 апреля (14 апреля ст. ст.)

Глас 8.

Пе́снь 1.

Ирмо́с: Посе́ченный несеко́маго пресече́, и ви́де со́лнце зе́млю, ю́же не ви́де; лю́таго врага́ вода́ потопи́, и непроходи́мое про́йде Изра́иль; пе́снь же воспева́шеся: Го́сподеви пои́м, сла́вно бо просла́вися.

Боле́зни мно́ги, Марти́не, претерпе́л еси́ за Христа́ Бо́га и ны́не изше́л еси́ к неболе́зненней жи́зни, до́бре подвиза́вся. Те́м моея́ души́ лю́тыя боле́зни облегчи́, я́ко да воспою́ тя́, моли́твами твои́ми просвеща́емь.

Существа́ два́, и две́ во́ли, и де́йства сугу́ба нося́ща, блаже́нне, Еди́наго от Честны́я Тро́ицы научи́л еси́, Христа́, Пресу́щнаго Бо́га, и и́же не та́ко честву́ющия, вся́ отве́ргл еси́, Марти́не свяще́ннейше.

Неду́говавшия безслове́сно безу́мне, в Еди́ном Христе́, еди́ну му́дрствующе во́лю, ра́зумом и́стинным и ве́рою украша́емь, обличи́л еси́, Марти́не, я́вственно и, ра́дуяся, взыва́л еси́: пои́м Го́сподеви, сла́вно бо просла́вися.

Богоро́дичен: И́же по естеству́ Боже́ственному Неви́димый, ви́ден бы́сть из Тебе́ Младе́нец, Челове́к бы́в, сугу́ба я́ко вои́стинну хоте́ния и де́йства нося́ во Еди́ной Ипоста́си, Его́же моли́, Пренепоро́чная, вся́ ны́ спасти́, любо́вию пою́щия Тя́.

Пе́снь 3.

Ирмо́с: Стра́х Тво́й, Го́споди, всади́ в сердца́ ра́б Твои́х, и бу́ди на́м утвержде́ние, Тя́ во и́стине призыва́ющим.

Сы́й испо́лнен, всеблаже́нне, боже́ственныя ре́вности, собра́л еси́ свяще́нен, Марти́не, Собо́р и церко́вное утверди́л еси́ уче́ние.

Посреди́ Собо́ра отве́ргл еси́ Пи́рра, Се́ргия и Фео́дора, Ки́ра же и подо́бныя те́м буесло́вящия злосла́вныя, о́тче.

Из Ри́ма ну́ждею изгна́н, обше́л еси́, я́ко со́лнце, лучи́ испуща́я, преподо́бне, правосла́вныя просвеща́я вся́.

Богоро́дичен: Отцу́ Равноче́стна и Сопресто́льна па́че сло́ва родила́ еси́, де́йства два́ нося́ща и две́ во́ли, Всесвята́я Отрокови́це.

Седа́лен, гла́с 4.

Испове́дании свяще́нными укра́шься, му́ченически же жи́знь соверши́в, к небесе́м восте́кл еси́, Марти́не му́дре, венце́м неувяда́емым от Бо́га венча́лся еси́. Те́мже святу́ю твою́ пра́зднуем па́мять, вопию́ще: помяни́ на́с, священноблаже́нне, Христу́ предстоя́.

Сла́ва, и ны́не, богоро́дичен: По Бо́зе во Тво́й, Богоро́дице, прибега́ю, смире́нный, покро́в боже́ственный и, припа́дая, молю́ся: поми́луй, Пречи́стая, я́ко превзыдо́ша главу́ мою́ греси́, и бою́ся, Влады́чице, му́ки, и трепе́щу, моле́ние сотвори́, Чи́стая, к Сы́ну Твоему́ от си́х изба́вити мя́.

Крестобогоро́дичен: И́же от Безнача́льнаго Отца́ рожде́ннаго напосле́док Тя́ пло́тию ро́ждшая, на Кресте́ ви́сяща, зря́щи, Христе́, — увы́ Мне́, любе́знейший Иису́се, — вопия́ше, — ка́ко сла́вимый я́ко Бо́г от а́нгел, от беззако́нных ны́не челове́к, Сы́не, хотя́, распина́ешися? Пою́ Тя, Долготерпели́ве.

Пе́снь 4.

Ирмо́с: Все́л еси́ на ко́ни, апо́столы Твоя́, Го́споди, и прия́л еси́ рука́ма Твои́ма узды́ и́х, и спасе́ние бы́сть ежде́ние Твое́ ве́рно пою́щим: сла́ва си́ле Твое́й, Го́споди.

Непра́ведно от престо́ла твоего́, му́дре, изгоня́емь, от челове́к непра́ведных пра́ведный пострада́ти благоволи́л еси́, я́ко да пра́ведное уче́ние церко́вное, о́тче, спасе́ши невреди́мо.

Стоя́ среди́ пребеззако́ннующих я́ко зако́нен страда́лец, святи́телю богоприя́тне, и от ни́х оскорбля́емь, и наруга́емь, и влачи́мь всу́е, пребы́л еси́ умо́м непревра́щен.

Младе́нцев вмени́л еси́, о́тче, стреля́ния, Марти́не, всу́е оскорбля́ющих тя́ и, терпели́вно пострада́в, гони́мь, и вя́жемь всу́е, и в темни́цах заключа́емь.

Богоро́дичен: Во двою́ существу́ богому́жно познава́емаго, от Тро́ицы Еди́наго родила́ еси́, я́ко Бо́га и Челове́ка, во́ли нося́ща прили́чно обе́ма естество́ма, Де́во Пренепоро́чная.

Пе́снь 5.

Ирмо́с: От но́щи неве́дения по душелови́тельному пути́ при́сно блудя́щаго, све́том ра́зума Твоего́, Го́споди, преднаставля́я мя́, на стезю́ за́поведей Твои́х напра́ви.

Свяще́ннейшим твои́м сло́вом, о́тче, всесвяще́нное уче́ние я́ве утверди́л еси́ и ерети́ческия полки́ низве́ргл еси́, претерпева́я изгна́ния, и темни́цы, и ско́рби мно́ги.

Дрема́ния твои́м ве́ждом, преподо́бне, не да́л еси́, до́ндеже вселе́ние Бо́гу бы́л еси́, и всю́ разве́ял еси́ е́реси пре́лесть, му́ченически подвиза́вся.

Вражде́бно тя́, я́коже зве́рие, влеко́ша вери́гами, му́дре, врази́, связа́вше посреде́ гра́да, руга́тельно, укоря́юще, и ху́ляще, и без студа́ на тя́ напа́дающе.

Богоро́дичен: Неискусобра́чно, Де́во, неопи́санное Сло́во пло́тию ро́ждши, пло́ти моея́ стра́сти умертви́, оживи́ же ду́шу мою́, умерщвле́нную прегреше́ньми.

Пе́снь 6.

Ирмо́с: Бе́здна грехо́в и прегреше́ний бу́ря мя́ смуща́ет и во глубину́ ну́жднаго ре́ет мя́ отча́яния, но Твою́ кре́пкую ру́ку мне́ простри́, я́ко Петро́ви, о Упра́вителю, и спаси́.

Разсе́деся лука́вый при ногу́ твое́ю свяще́нною, богоно́се, и лука́вых челове́к бездве́рная уста́ загражда́ются твои́м сло́вом, и явля́ется, сия́ющи, уче́ние боже́ственное, па́че со́лнца.

Простира́ют тя́ неща́дно и у́жи связу́ют преле́стницы, вя́жуща вся́ку ле́сть и ерети́ческий сою́з растерза́юща сою́зом боже́ственных уче́ний твои́х, святи́телю о́тче Марти́не свяще́ннейше.

Стоя́л еси́ пред суди́щем судя́щих, осужда́я пре́лесть пропове́дающих еди́ну во Христе́, о́тче, во́лю и му́ченическими я́ве украша́яся венцы́, богоблаже́нне Марти́не му́дре.

Богоро́дичен: Зако́ни естества́ в Тебе́ разоря́ются, неизрече́нно бо ражда́еши Соде́теля все́х, Богоро́дице Всепе́тая, я́ко Бо́га же и Челове́ка, две́ во́ли же иму́ща и де́йства, Ма́ти Де́во.

Пе́снь 7.

Ирмо́с: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Сугу́бых де́йств и хоте́ний, о́тче, Христа́ лиши́вшиися лиши́ша тя́ престо́ла, отда́вше изгна́нием да́льним, зову́щаго: оте́ц на́ших Бо́же, благослове́н еси́.

Проше́д многовре́менныя темни́цы я́ко храни́тель непоро́чныя ве́ры, ерети́ческую тму́ ума́лил еси́ и пе́ти ве́рныя просвети́л еси́: оте́ц на́ших Бо́же, благослове́н еси́.

Я́коже ле́в, о́тче, упова́в, на беззако́нныя де́рзостно наскочи́л еси́ Фео́дора, и Ки́ра, и Се́ргия, и Пи́рра, и си́х единомы́сленныя отлуча́я Христо́вы Святы́я Це́ркве.

Богоро́дичен: Во дву́ во́лях и де́йствах дву́х из Тебе́, Пренепоро́чная, рожде́йся несказа́нно, И́же си́це му́дрствующия спаса́ет, зову́щия: оте́ц на́ших Бо́же, благослове́н еси́.

Пе́снь 8.

Ирмо́с: Богоглаго́ливии о́троцы, в пещи́ со огне́м пла́мень попира́юще, поя́ху: благослови́те, дела́ Госпо́дня, Го́спода.

Стесня́емь, о́тче, немощьми́, и лю́тыми изгна́нии, и многообра́зными му́ками, муче́ния венцы́ я́ко му́ченик прия́л еси́.

Блаже́нства богоизбра́ннаго сподо́бился еси́, изгоня́емь, Марти́не, и пра́вды бли́з бы́л еси́, изгна́в от среды́ непра́ведную е́ресь.

Украси́в Петро́в боже́ственный престо́л и на того́ ка́мени Це́рковь неколе́блему соблю́д, Марти́не, с си́м просла́вился еси́.

Богоро́дичен: Святе́йши вы́шних во́инств и херуви́м превы́шши, Ма́ти Бо́жия су́щи, страсте́й плотски́х мя́ превы́шша сотвори́.

Пе́снь 9.

Ирмо́с: Уста́вы прешла́ еси́ естества́, Соде́теля заче́нши и Го́спода, и две́рь спасе́ния ми́рови была́ еси́, те́м Тя́, Богоро́дице, непреста́нно велича́ем.

Священноде́тель свяще́ннейший, испове́дник же и му́ченик бы́в, с патриа́ршескими ли́ки, Марти́не, всегда́ досто́йно ра́дуешися, те́мже тя́ ве́рою ублажа́ем.

Я́ко светоза́рное, блаже́нне, со́лнце, возсия́л еси́ к восто́ком от за́пада, всю́ заря́ми благоче́стия зе́млю просвети́л еси́ и отгна́л еси́ тму́ ерети́чествующих глубоча́йшую.

Ста́нем в дому́ Бо́га на́шего, пропове́дающе стра́сти, и боре́ния, и испове́дания небому́дреннаго отца́ на́шего Марти́на и сего́ любо́вию ублажи́м.

Твое́ свято́е преставле́ние дне́сь све́тло соверша́ем, испо́лни ра́дости помышле́ния восхваля́ющих тя́, богому́дре святи́телю, в не́йже вся́ ны́ помяни́.

Богоро́дичен: Гласово́м отце́в повину́ющеся, во дву́ естества́х и во́лях, Чи́стая, Еди́наго от Тро́ицы, из Тебе́ ражда́емаго, ве́рно испове́дуем и Тя́ непреста́нно велича́ем.

Пѣ́снь а҃.

І҆рмо́съ: Посѣ́ченый несѣко́маго пресѣчѐ, и҆ ви́дѣ со́лнце зе́млю, ю҆́же не ви́дѣ: лю́таго врага̀ вода̀ потопѝ, и҆ непроходи́мое про́йде і҆и҃ль: пѣ́снь же воспѣва́шесѧ: гдⷭ҇еви пои́мъ, сла́внѡ бо просла́висѧ.

Болѣ̑зни мнѡ́ги, марті́не, претерпѣ́лъ є҆сѝ за хрⷭ҇та̀ бг҃а, и҆ ны́нѣ и҆зше́лъ є҆сѝ къ неболѣ́зненнѣй жи́зни, до́брѣ подвиза́всѧ: тѣ́мъ моеѧ̀ дꙋшѝ лю̑тыѧ болѣ̑зни ѡ҆блегчѝ, ꙗ҆́кѡ да воспою́ тѧ, моли́твами твои́ми просвѣща́емь.

Сꙋщєства̀ два̀, и҆ двѣ̀ вѡ́ли, и҆ дѣ̑йства сꙋгꙋ̑ба носѧ́ща, бл҃же́нне, є҆ди́наго ѿ честны́ѧ трⷪ҇цы наꙋчи́лъ є҆сѝ, хрⷭ҇та̀ пресꙋ́щнаго бг҃а, и҆ и҆̀же не та́кѡ чествꙋ́ющыѧ, всѧ̑ ѿве́рглъ є҆сѝ, марті́не свѧще́ннѣйше.

Недꙋ́говавшыѧ безслове́снѡ безꙋ́мнѣ, въ є҆ди́номъ хрⷭ҇тѣ̀ є҆ди́нꙋ мꙋ́дрствꙋюще во́лю, ра́зꙋмомъ и҆́стиннымъ и҆ вѣ́рою ᲂу҆краша́емь, ѡ҆бличи́лъ є҆сѝ, марті́не, ꙗ҆́вственнѡ, и҆ ра́дꙋѧсѧ взыва́лъ є҆сѝ: пои́мъ гдⷭ҇еви, сла́внѡ бо просла́висѧ.

Бг҃оро́диченъ: И҆́же по є҆стествꙋ̀ бжⷭ҇твенномꙋ неви́димый, ви́дѣнъ бы́сть и҆зъ тебє̀ млⷣнецъ, чл҃вѣ́къ бы́въ, сꙋгꙋ̑ба ꙗ҆́кѡ вои́стиннꙋ хотѣ̑нїѧ и҆ дѣ̑йства носѧ̀, во є҆ди́ной ѵ҆поста́си: є҆го́же молѝ, пренепоро́чнаѧ, всѧ̑ ны̀ спастѝ любо́вїю пою́щыѧ тѧ̀.

Пѣ́снь г҃.

І҆рмо́съ: Стра́хъ тво́й, гдⷭ҇и, всадѝ въ сердца̀ ра̑бъ твои́хъ, и҆ бꙋ́ди на́мъ ᲂу҆твержде́нїе, тѧ̀ во и҆́стинѣ призыва́ющихъ.

Сы́й и҆спо́лненъ, всебл҃же́нне, бжⷭ҇твенныѧ ре́вности, собра́лъ є҆сѝ свѧще́ненъ, марті́не, собо́ръ, и҆ церко́вное ᲂу҆тверди́лъ є҆сѝ ᲂу҆че́нїе.

Посредѝ собо́ра ѿве́рглъ є҆сѝ пѵ́рра, се́ргїа и҆ ѳео́дѡра, кѵ́ра же, и҆ подѡ́бныѧ тѣ̑мъ бꙋесло́вѧщыѧ ѕлосла̑вныѧ, ѻ҆́ч҃е.

И҆зъ ри́ма нꙋ́ждею и҆згна́нъ, ѡ҆бше́лъ є҆сѝ ꙗ҆́кѡ со́лнце лꙋчѝ и҆спꙋща́ѧ, прпⷣбне, правосла̑вныѧ просвѣща́ѧ всѧ̑.

Бг҃оро́диченъ: Ѻ҆ц҃ꙋ̀ равноче́стна и҆ сопресто́льна, па́че сло́ва родила̀ є҆сѝ, дѣ̑йства два̀ носѧ́ща, и҆ двѣ̀ вѡ́ли, всест҃а́ѧ ѻ҆трокови́це.

Сѣда́ленъ, гла́съ д҃.

И҆сповѣ̑данїи свѧще́нными ᲂу҆кра́шсѧ, мч҃нически же жи́знь соверши́въ, къ нб҃сє́мъ восте́клъ є҆сѝ, марті́не мꙋ́дре, вѣнце́мъ неꙋвѧда́емымъ ѿ бг҃а вѣнча́лсѧ є҆сѝ. тѣ́мже свѧтꙋ́ю твою̀ пра́зднꙋемъ па́мѧть, вопїю́ще: помѧнѝ на́съ, сщ҃енноблаже́нне, хрⷭ҇тꙋ̀ предстоѧ̀.

Сла́ва, и҆ ны́нѣ, бг҃оро́диченъ: По бз҃ѣ во тво́й, бцⷣе, прибѣга́ю смире́нный покро́въ бжⷭ҇твенный, припа́даѧ молю́сѧ: поми́лꙋй, пречⷭ҇таѧ, ꙗ҆́кѡ превзыдо́ша главꙋ̀ мою̀ грѣсѝ, и҆ бою́сѧ, влⷣчце, мꙋ́ки, и҆ трепе́щꙋ. моле́нїе сотворѝ, чⷭ҇таѧ, къ сн҃ꙋ твоемꙋ̀, ѿ си́хъ и҆зба́вити мѧ̀.

Крⷭ҇тобг҃оро́диченъ: И҆́же ѿ безнача́льнагѡ ѻ҆ц҃а̀ рожде́ннаго, напослѣ́докъ тѧ̀ пло́тїю ро́ждшаѧ, на крⷭ҇тѣ̀ ви́сѧща зрѧ́щи, хрⷭ҇тѐ, ᲂу҆вы̀ мнѣ̀, любе́знѣйшїй і҆и҃се, вопїѧ́ше: ка́кѡ сла́вимый ꙗ҆́кѡ бг҃ъ ѿ а҆́гг҃лъ, ѿ беззако́нныхъ ны́нѣ человѣ̑къ, сн҃е, хотѧ̀ распина́ешисѧ; пою́ тѧ, долготерпѣли́ве.

Пѣ́снь д҃.

І҆рмо́съ: Всѣ́лъ є҆сѝ на ко́ни, а҆пⷭ҇лы твоѧ̑, гдⷭ҇и, и҆ прїѧ́лъ є҆сѝ рꙋка́ма твои́ма ᲂу҆зды̀ и҆́хъ, и҆ спасе́нїе бы́сть ѣ҆жде́нїе твоѐ вѣ́рнѡ пою́щымъ: сла́ва си́лѣ твое́й, гдⷭ҇и.

Непра́веднѡ ѿ престо́ла твоегѡ̀, мꙋ́дре, и҆згонѧ́емь, ѿ человѣ̑къ непра́ведныхъ пра́ведный пострада́ти благоволи́лъ є҆сѝ, ꙗ҆́кѡ да пра́ведное ᲂу҆че́нїе церко́вное, ѻ҆́ч҃е, спасе́ши невреди́мо.

Стоѧ̀ средѝ пребеззако́ннꙋющихъ, ꙗ҆́кѡ зако́ненъ страда́лецъ, ст҃и́телю бг҃опрїѧ́тне, и҆ ѿ ни́хъ ѡ҆скорблѧ́емь и҆ нарꙋга́емь, и҆ влачи́мь всꙋ́е, пребы́лъ є҆сѝ ᲂу҆мо́мъ непревраще́нъ.

Младе́нцєвъ вмѣни́лъ є҆сѝ, ѻ҆́ч҃е, стрѣлѧ́нїѧ, марті́не, всꙋ́е ѡ҆скорблѧ́ющихъ тѧ̀, и҆ терпѣли́внѡ пострада́въ, гони́мь и҆ вѧ́жемь всꙋ́е, и҆ въ темни́цахъ заключа́емь.

Бг҃оро́диченъ: Во двою̀ сꙋщєствꙋ̀ бг҃омꙋ́жнѡ познава́емаго, ѿ трⷪ҇цы є҆ди́наго родила̀ є҆сѝ, ꙗ҆́кѡ бг҃а и҆ чл҃вѣ́ка, вѡ́ли носѧ́ща прили́чнѡ ѻ҆бѣ́ма є҆стество́ма, дв҃о пренепоро́чнаѧ.

Пѣ́снь є҃.

І҆рмо́съ: Ѿ но́щи невѣ́дѣнїѧ, по дꙋшелови́тельномꙋ пꙋтѝ при́снѡ блꙋдѧ́щаго, свѣ́томъ ра́зꙋма твоегѡ̀, гдⷭ҇и, преднаставлѧ́ѧ мѧ̀ на стезю̀ за́повѣдей твои́хъ, напра́ви.

Свѧще́ннѣйшимъ твои́мъ сло́вомъ, ѻ҆́ч҃е, всесвѧще́нное ᲂу҆че́нїе ꙗ҆́вѣ ᲂу҆тверди́лъ є҆сѝ, и҆ є҆реті́чєскїѧ полкѝ низве́рглъ є҆сѝ, претерпѣва́ѧ и҆згна̑нїѧ и҆ темни̑цы, и҆ скѡ́рби мнѡ́ги.

Дрема́нїѧ твои̑мъ вѣ́ждѡмъ, прпⷣбне, не да́лъ є҆сѝ, до́ндеже вселе́нїе бг҃ꙋ бы́лъ є҆сѝ: и҆ всю̀ развѣ́ѧлъ є҆сѝ є҆́реси пре́лесть, мꙋ́ченически подвиза́всѧ.

Вражде́бнѡ тѧ̀, ꙗ҆́коже ѕвѣ́рїе влеко́ша вери́гами, мꙋ́дре, вразѝ, свѧза́вше посредѣ̀ гра́да рꙋга́тельнѡ, ᲂу҆корѧ́юще и҆ хꙋ́лѧще, и҆ безъ стꙋда̀ на тѧ̀ напа́дающе.

Бг҃оро́диченъ: Неискꙋсобра́чнѡ, дв҃о, неѡпи́санное сло́во пло́тїю ро́ждши, пло́ти моеѧ̀ стра̑сти ᲂу҆мертвѝ, ѡ҆живи́ же дꙋ́шꙋ мою̀ ᲂу҆мерщвле́ннꙋю прегрѣше́ньми.

Пѣ́снь ѕ҃.

І҆рмо́съ: Бе́здна грѣхѡ́въ и҆ прегрѣше́нїй бꙋ́рѧ мѧ̀ смꙋща́етъ, и҆ во глꙋбинꙋ̀ нꙋ́жднагѡ рѣ́етъ мѧ̀ ѿча́ѧнїѧ: но твою̀ крѣ́пкꙋю рꙋ́кꙋ мнѣ̀ прострѝ, ꙗ҆́кѡ петро́ви, ѽ ᲂу҆пра́вителю! и҆ спасѝ.

Разсѣ́десѧ лꙋка́вый при ногꙋ̀ твоє́ю свѧщє́нною, бг҃оно́се, и҆ лꙋка́выхъ человѣ̑къ бездвє́рнаѧ ᲂу҆ста̀ загражда́ютсѧ твои́мъ сло́вомъ, и҆ ꙗ҆влѧ́етсѧ сїѧ́ющи ᲂу҆че́нїе бжⷭ҇твенное па́че со́лнца.

Простира́ютъ тѧ̀ неща́днѡ, и҆ ᲂу҆́жи свѧзꙋ́ютъ прелє́стницы, вѧ́жꙋща всѧ́кꙋ ле́сть, и҆ є҆реті́ческїй сою́зъ растерза́юща, сою́зомъ бжⷭ҇твенныхъ ᲂу҆че́нїй твои́хъ, ст҃и́телю ѻ҆́ч҃е марті́не свѧще́ннѣйше.

Стоѧ́лъ є҆сѝ предъ сꙋди́щемъ сꙋдѧ́щихъ, ѡ҆сꙋжда́ѧ пре́лесть проповѣ́дающихъ є҆ди́нꙋ во хрⷭ҇тѣ̀, ѻ҆́ч҃е, во́лю, и҆ мꙋ́ченическими ꙗ҆́вѣ ᲂу҆краша́ѧсѧ вѣнцы̀, бг҃облаже́нне марті́не мꙋ́дре.

Бг҃оро́диченъ: Зако́ни є҆стества̀ въ тебѣ̀ разорѧ́ютсѧ, неизрече́ннѡ бо ражда́еши содѣ́телѧ всѣ́хъ, бцⷣе всепѣ́таѧ, ꙗ҆́кѡ бг҃а же и҆ чл҃вѣ́ка, двѣ̀ вѡ́ли же и҆мꙋ́ща и҆ дѣ̑йства, мт҃и дв҃о.

Пѣ́снь з҃.

І҆рмо́съ: Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀ вѣ́рою трⷪ҇ческою пла́мень пе́щный попра́ша пою́ще: ѻ҆тцє́въ бж҃е, бл҃гослове́нъ є҆сѝ.

Сꙋгꙋ́быхъ дѣ́йствъ и҆ хотѣ́нїй, ѻ҆́ч҃е, хрⷭ҇та̀ лиши́вшїисѧ, лиши́ша тѧ̀ престо́ла, ѿда́вше и҆згна́нїємъ да̑льнимъ, зовꙋ́щаго: ѻ҆тє́цъ на́шихъ бж҃е, бл҃гослове́нъ є҆сѝ.

Проше́дъ многовре́мєнныѧ темни̑цы, ꙗ҆́кѡ храни́тель непоро́чныѧ вѣ́ры, є҆реті́ческꙋю тмꙋ̀ ᲂу҆ма́лилъ є҆сѝ, и҆ пѣ́ти вѣ̑рныѧ просвѣти́лъ є҆сѝ: ѻ҆тє́цъ на́шихъ бж҃е, бл҃гослове́нъ є҆сѝ.

Ꙗ҆́коже ле́въ, ѻ҆́ч҃е, ᲂу҆пова́въ, на беззакѡ́нныѧ де́рзостнѡ наскочи́лъ є҆сѝ, ѳео́дѡра и҆ кѵ́ра, и҆ се́ргїа, и҆ пѵ́рра, и҆ си́хъ є҆диномы́слєнныѧ ѿлꙋча́ѧ хрⷭ҇то́вы ст҃ы́ѧ цр҃кве.

Бг҃оро́диченъ: Во двꙋ̀ во́лѧхъ и҆ дѣ́йствахъ двꙋ́хъ, и҆зъ тебє̀, пренепоро́чнаѧ, рожде́йсѧ несказа́ннѡ, и҆́же си́це мꙋ́дрствꙋющыѧ спаса́етъ, зовꙋ́щыѧ: ѻ҆тє́цъ на́шихъ бж҃е, бл҃гослове́нъ є҆сѝ.

Пѣ́снь и҃.

І҆рмо́съ: Бг҃оглаго́ливїи ѻ҆́троцы въ пещѝ, со ѻ҆гне́мъ пла́мень попира́юще, поѧ́хꙋ: бл҃гослови́те, дѣла̀ гдⷭ҇нѧ, гдⷭ҇а.

Стѣснѧ́емь, ѻ҆́ч҃е, немощьмѝ и҆ лю́тыми и҆згна̑нїи, и҆ многоѻбра́зными мꙋ́ками, мꙋче́нїѧ вѣнцы̀ ꙗ҆́кѡ мч҃никъ прїѧ́лъ є҆сѝ.

Блаже́нства бг҃оизбра́ннагѡ сподо́билсѧ є҆сѝ, и҆згонѧ́емь, марті́не, и҆ пра́вды бли́зъ бы́лъ є҆сѝ, и҆згна́въ ѿ среды̀ непра́веднꙋю є҆́ресь.

Оу҆краси́въ петро́въ бжⷭ҇твенный престо́лъ, и҆ на тогѡ̀ ка́мени цр҃ковь неколе́блемꙋ соблю́дъ, марті́не, съ си́мъ просла́вилсѧ є҆сѝ.

Бг҃оро́диченъ: Ст҃ѣ́йши вы́шнихъ во́инствъ, и҆ херꙋві̑мъ превы́шши, мт҃и бж҃їѧ сꙋ́щи, страсте́й плотски́хъ мѧ̀ превы́шша сотворѝ.

Пѣ́снь ѳ҃.

І҆рмо́съ: Оу҆ста́вы прешла̀ є҆сѝ є҆стества̀, содѣ́телѧ заче́нши и҆ гдⷭ҇а, и҆ две́рь спасе́нїѧ мі́рови была̀ є҆сѝ: тѣ́мъ тѧ̀, бцⷣе, непреста́ннѡ велича́емъ.

Свѧщеннодѣ́тель свѧще́ннѣйшїй, и҆сповѣ́дникъ же и҆ мꙋ́ченикъ бы́въ, съ патрїа́ршескими ли́ки, марті́не, всегда̀ досто́йнѡ ра́дꙋешисѧ: тѣ́мже тѧ̀ вѣ́рою ᲂу҆блажа́емъ.

Ꙗ҆́кѡ свѣтоза́рное, бл҃же́нне, со́лнце, возсїѧ́лъ є҆сѝ къ восто́кѡмъ ѿ за́пада, всю̀ зарѧ́ми благоче́стїѧ зе́млю просвѣти́лъ є҆сѝ, и҆ ѿгна́лъ є҆сѝ тмꙋ̀ є҆реті́чествꙋющихъ глꙋбоча́йшꙋю.

Ста́немъ въ домꙋ̀ бг҃а на́шегѡ, проповѣ́дающе стра̑сти и҆ борє́нїѧ и҆ и҆сповѣ̑данїѧ нб҃омꙋ́дреннагѡ ѻ҆ц҃а̀ на́шегѡ марті́на, и҆ сего̀ любо́вїю ᲂу҆блажи́мъ.

Твоѐ свѧто́е преставле́нїе дне́сь свѣ́тлѡ соверша́емъ, и҆спо́лни ра́дости помышлє́нїѧ восхвалѧ́ющихъ тѧ̀, бг҃омꙋ́дре ст҃и́телю, въ не́йже всѧ̑ ны̀ помѧнѝ.

Бг҃оро́диченъ: Гласовѡ́мъ ѻ҆тцє́въ повинꙋ́ющесѧ, во двꙋ̀ є҆стества́хъ и҆ во́лѧхъ, чⷭ҇таѧ, є҆ди́наго ѿ трⷪ҇цы, и҆зъ тебє̀ ражда́емаго вѣ́рнѡ и҆сповѣ́дꙋемъ, и҆ тѧ̀ непреста́ннѡ велича́емъ.

Свя­ти­тель Мар­тин Ис­по­вед­ник, па­па Рим­ский, был уро­жен­цем Тос­кан­ской об­ла­сти в Ита­лии. Он по­лу­чил хо­ро­шее об­ра­зо­ва­ние и по­сту­пил в клир Рим­ской Церк­ви. По­сле смер­ти па­пы Фе­о­до­ра I (642–649) пре­сви­тер Мар­тин был из­бран на пре­стол.

В то вре­мя мир Церк­ви был на­ру­шен ере­сью мо­но­фе­ли­тов, по­лу­чив­шей ши­ро­кое рас­про­стра­не­ние.

Бес­ко­неч­ные спо­ры мо­но­фе­ли­тов с пра­во­слав­ны­ми про­ис­хо­ди­ли во всех сло­ях на­се­ле­ния. Им­пе­ра­тор Кон­станс (641–668) и Кон­стан­ти­но­поль­ский пат­ри­арх Па­вел II (641–654) так­же бы­ли при­вер­жен­ца­ми ере­си мо­но­фе­ли­тов. Им­пе­ра­тор Кон­станс из­дал ере­ти­че­ский "Об­ра­зец ве­ры" (Ти­пос), обя­за­тель­ный для все­го на­се­ле­ния. В нем за­пре­ща­лись вся­кие даль­ней­шие спо­ры.

Этот ере­ти­че­ский "Об­ра­зец ве­ры" был по­лу­чен в Ри­ме в 649 го­ду. Свя­той па­па Мар­тин, твер­дый по­бор­ник пра­во­сла­вия, со­звал в Ри­ме По­мест­ный Со­бор, ко­то­рый осу­дил мо­но­фе­лит­скую ересь. Свя­ти­тель Мар­тин од­новре­мен­но по­слал Кон­стан­ти­но­поль­ско­му пат­ри­ар­ху Пав­лу по­сла­ние с уве­ща­ни­ем вер­нуть­ся к Пра­во­слав­но­му ис­по­ве­да­нию. Раз­гне­ван­ный им­пе­ра­тор при­ка­зал во­е­на­чаль­ни­ку Олим­пию до­ста­вить свя­ти­те­ля Мар­ти­на на суд. Но Олим­пий, при­быв в Рим, по­бо­ял­ся ду­хо­вен­ства и на­ро­да, со­шед­ше­го­ся на Со­бор, и по­до­слал во­и­на, чтобы тай­но убить свя­то­го па­пу. Ко­гда убий­ца при­бли­зил­ся к свя­ти­те­лю Мар­ти­ну то неожи­дан­но ослеп. Ис­пу­ган­ный Олим­пий по­спеш­но уехал в Си­ци­лию и вско­ре был убит в сра­же­нии.

В 654 го­ду им­пе­ра­тор по­слал в Рим с преж­ней це­лью дру­го­го во­е­на­чаль­ни­ка, Фе­о­до­ра, ко­то­рый предъ­явил свя­ти­те­лю Мар­ти­ну тяж­кие об­ви­не­ния в тай­ном об­ще­нии с вра­га­ми им­пе­рии – са­ра­ци­на­ми, ху­ле­нии Пре­свя­той Бо­го­ро­ди­цы и нека­но­ни­че­ском вступ­ле­нии на пап­ский пре­стол. Несмот­ря на предъ­яв­лен­ные рим­ским ду­хо­вен­ством и ми­ря­на­ми до­ка­за­тель­ства пол­ной невин­но­сти свя­то­го па­пы, во­е­на­чаль­ник Фе­о­дор но­чью с от­ря­дом во­и­нов схва­тил свя­ти­те­ля Мар­ти­на и от­пра­вил его на один из Цик­лад­ских ост­ро­вов (Нак­сос) в Эгей­ском мо­ре. Це­лый год то­мил­ся свя­ти­тель Мар­тин на этом по­чти без­люд­ном ост­ро­ве, тер­пя ли­ше­ния и оскорб­ле­ния от стра­жи. За­тем из­му­чен­но­го ис­по­вед­ни­ка на­пра­ви­ли на суд в Кон­стан­ти­но­поль.

Боль­но­го стар­ца при­нес­ли на но­сил­ках, но судьи гру­бо при­ка­за­ли ему под­нять­ся и от­ве­чать стоя. По­ка шел до­прос, во­и­ны под­дер­жи­ва­ли осла­бев­ше­го от бо­лез­ни свя­ти­те­ля. На су­де вы­сту­пи­ли лже­сви­де­те­ли, окле­ве­тав­шие свя­то­го в из­мен­ни­че­ских свя­зях с са­ра­ци­на­ми. При­страст­ные судьи не ста­ли да­же слу­шать оправ­да­ний свя­ти­те­ля. В глу­бо­кой скор­би он ска­зал: "Гос­по­ду из­вест­но, ка­кое ве­ли­кое бла­го­де­я­ние ока­же­те вы мне, ес­ли ско­ро пре­да­ди­те смер­ти".

По­сле та­ко­го су­да свя­ти­те­ля в разо­дран­ной одеж­де вы­ста­ви­ли на из­де­ва­тель­ство тол­пы, ко­то­рую за­став­ля­ли кри­чать: "Ана­фе­ма па­пе Мар­ти­ну!" Но те, кто знал, что свя­той па­па стра­да­ет невин­но, со сле­за­ми ухо­ди­ли. На­ко­нец, са­кел­ла­рий, по­слан­ный им­пе­ра­то­ром, по­до­шел к во­е­на­чаль­ни­ку и огла­сил при­го­вор – ли­шить па­пу са­на и пре­дать смерт­ной каз­ни. По­лу­на­го­го свя­ти­те­ля за­ко­ва­ли в це­пи и по­во­лок­ли в тем­ни­цу, где за­клю­чи­ли с раз­бой­ни­ка­ми. Они бы­ли бо­лее ми­ло­серд­ны к свя­ти­те­лю, чем ере­ти­ки.

Меж­ду тем им­пе­ра­тор при­шел к уми­рав­ше­му Кон­стан­ти­но­поль­ско­му пат­ри­ар­ху Пав­лу и рас­ска­зал ему о су­де над свя­тым Мар­ти­ном. Тот от­вер­нул­ся от им­пе­ра­то­ра и ска­зал: "Го­ре мне! Еще но­вое де­я­ние к мо­е­му осуж­де­нию", – и про­сил пре­кра­тить му­че­ния свя­ти­те­ля Мар­ти­на. Им­пе­ра­тор опять по­слал к свя­ти­те­лю в тем­ни­цу но­та­рия и дру­гих лиц для до­пол­ни­тель­но­го до­про­са. Свя­ти­тель от­ве­чал им: "Ес­ли да­же и раз­дро­бят ме­ня, не бу­ду в об­ще­нии с Кон­стан­ти­но­поль­ской Цер­ко­вью, по­ка она пре­бы­ва­ет в зло­ве­рии". Му­чи­те­ли бы­ли по­ра­же­ны му­же­ством ис­по­вед­ни­ка и за­ме­ни­ли смерт­ную казнь ссыл­кой в от­да­лен­ный Хер­со­нес Та­ври­че­ский.

Там свя­ти­тель и скон­чал­ся, из­ну­рен­ный бо­лез­нью, нуж­дой, го­ло­дом и ли­ше­ни­я­ми († 16 сен­тяб­ря 655). Он был по­гре­бен вне го­ро­да во Влахерн­ской церк­ви во имя Пре­свя­той Бо­го­ро­ди­цы.

Ересь мо­но­фе­ли­тов бы­ла осуж­де­на на VI Все­лен­ском Со­бо­ре в 680 го­ду. Мо­щи свя­то­го ис­по­вед­ни­ка па­пы Мар­ти­на бы­ли пе­ре­не­се­ны в Кон­стан­ти­но­поль, а по­том в Рим.

См. так­же: "Стра­да­ние во свя­тых от­ца на­ше­го Мар­ти­на Ис­по­вед­ни­ка, па­пы Рим­ско­го" в из­ло­же­нии свт. Ди­мит­рия Ро­стов­ско­го.